\id PHM
\h Filemón
\toc1 Filemón
\mt SAN PABLO ITLATITLANIL IN DIOS OKITLAJKUILILIJ IN FILEMÓN
\c 1
\s Pablo okitlajkuililij in Filemón
\p
\v 1 Nej niPablo, nitzaktok telpiloyan, nitzaktok porke
niktekipanoa in Cristo Jesús. Nikaj iwan tokni Timoteo
iwan san sekan timitztlajkuililiaj tejwatzin titotetlasojkaikni
Filemón, tejwatzin noijki titekipanoj ken tejwan.
\v 2 Noijki tiktlajkuililiaj in tokni siwatl Apia, iwan
tokni Arquipo katlej kajki kej soldado de Dios ken tejwan
noijki tikatej. Iwan noijki tikintlajkuililiaj nochtin
in tokniwan tiopantlaneltokakej katlej mololoaj mochan.
\v 3 ToPapan Dios iwan toSeñor Jesucristo ma amechtiochiwa
iwan ma amechmaka yolosewilistle.
\s Pablo okijtoj kuale tlaneltoka in Filemón iwan kuale tetlasojtla
\p
\v 4 Nochipa niktlajsojkamachilia noTeko Dios nijkuak
nimitzelnamiki itech notiotzajtzilis tejwatzin Filemón,
\v 5 porke nechilwiaj nik tikpia tlasojtlalistle iwan
tlaneltokalistle inawak toSeñor Jesús, iwan innawak nochtin
katlej iaxkawan Dios.
\v 6 Niktlajtlanilia toTajtzin Dios ke nochtin katlej
otikintlaneltokitij ika motlaneltokalis, ma kuale kimomakakan
kuenta nochi in tlatiochiwalistle katlej Cristo Jesús
otechmakak.
\v 7 Tejwatzin nokni, motlasojtlalis nechmaka miek pakilistle
iwan yolosewilistle porke ika otikinyolchikaj in tokniwan
katlej iaxkawan Dios.
\s Pablo okitlajtlanke se favor para yen Onésimo
\p
\v 8 Por yonik, maski inawak Cristo nikpia derecho komo
nitlatitlanile para nimitznawatis tlan moneki tikchiwas,
\v 9 okachi kuale nikneki nimitztlajtlanilis ika tlasojtlalistle.
Nej, niPablo, ya nitetajtzin iwan axan nitzaktok telpiloyan
por yen Jesucristo.
\v 10 Nimitztlatlawtia por yen Onésimo, katlej omochij
kej nokone porke oniktlapowij de itlajtol in Dios nian
kan nitzaktok iwan yej okineltokak.
\p
\v 11 Achtoj, itech nekatej tonaltin, Onésimo oyeka se
tlanamaktle katlej mach itlaj owelia okichiwaya iwan
mach owelia omitzpalewiaya, pero axan yej kuale nechpalewia
iwan tejwatzin noijki kuale mitzpalewis.
\v 12 Nimitztitlanilia oksemi in Onésimo, katlej sa tekitl
niktlasojtla. Kuale xikresibiro kej yeskia yen nej tinechresibiroa.
\v 13 Nej niknekiskia nian ma mokawa nowan para ma nechpalewijto
ma mitzpatkayoti, mientras nian nitzaktok telpiloyan
por yen kuale tlajtole katlej temakixtia.
\v 14 Pero mach itlaj nikneki nikchiwas tla tejwatzin
mach mitzpaktia. Tlan nej nimitztlatlawtia xikchiwa,
xikchiwa ika mopakilis, mach nikneki xikchiwa tla tejwatzin
amo tikneki.
\v 15 Xamo omitzcholilijka in Onésimo kanaj keski tonale
para satepan mowan yetos iktlanke (ik tlami),
\v 16 pero axan mach ok tikpias kej se tlanamaktle, sino
kej itlaj katlej okachi kuale iwan amo kej tlanamaktle,
kijtosneki kej se motetlasojkaikni. Nej sa tekitl niktlasojtla,
pero tejwatzin moneki okachi xiktlasojtla, amo san kej
yeskia tiktlasojtla akaj oksé tlakatl sino moneki tiktlasojtlas
kej se tokni inawak toSeñor.
\p
\v 17 Ijkón kiné, tla melawak tikyejyekoa nik tisepantekipanojkej
inawak Dios, xikresibiro in Onésimo kej yeskia yen nej
tinechresibiroa.
\v 18 Tla itlaj omitztoktij mach kuale, o noso tla itlaj
mitzwikilia, nej nimitztlaxtlawilis.
\v 19 Nej, niPablo, nikijkuiloa yin amatl ika noma, para
ijkón noijki xikmati nik yen nej nimitztlaxtlawilis
tla itlaj mitzwikilia in tokni Onésimo, maski welis nimitzelnamiktis
nik in tejwatzin noijki tinechwikilia asta yen moanima.
\v 20 Ijkón kiné, nokni, nimitztlatlawtia xinechchiwili
yin tlan nimitzilwia porke tej titlaneltokak inawak
toSeñor. Xinechmaka pakilistle ipan noyolo porke tejwatzin
tinokni inawak Cristo.
\p
\v 21 Nimitztlajkuililia porke nikmati nik tikchiwas
tlan nimitztlajtlanilia, iwan kuale nikmati nik tikchiwas
asta okachi de tlan nimitztlajtlanilia.
\v 22 Noijki xikyektlali se lugar kan nietos ompa mochan,
porke nikchia nik in Dios amechnankilis ika namotiotzajtzilis
para nikisas de ijtik yin telpiloyan, iwan nechkawilis
ma niwia ma namechitati.
\s Oksekimej tokniwan noijki okontlajpalojkej in Filemón
\p
\v 23 Noijki mitzontlajpaloa in tokni Epafras, katlej
nowan tzaktok porke yej noijki kitematiltia itlajtol
in Cristo Jesús.
\v 24 Noijki mitzontlajpaloaj in Marcos, Aristarco, Demas
iwan Lucas, katlej nowan tekipanoaj inawak Dios.
\p
\v 25 In toSeñor Jesucristo ma amechtiochiwa miek ipan
namoyolo. Ijkón ma yeto.