\id 1PE
\h 1 Pedro
\toc1 1 Pedro
\mt SAN PEDRO ITLATITLANIL IN DIOS YAKINIKA OKIJKUILOJ YIN AMATLAJKUILOLE
\c 1
\s Pedro okintlajkuililij in tokniwan tlaneltokakej katlej xintokej itech oksekimej paismej
\p
\v 1 Nej niPedro, niitlatitlanil in toSeñor Jesucristo.
Namechtlajkuililia namejwan katlej ankajtejkej amochan
iwan anyajkej anmochantitoj intech oksekimej paismej
de Ponto, de Galacia, de Capadocia, de Asia iwan de itech
país de Bitinia.
\v 2 Dios oamechpejpenke desde ya wejkawitl iwan okimatia
nik se tonale namejwan ankineltokanij in toSeñor Jesucristo
para ijkón anyeskej ikonewan Dios. Iwan por yonik in
Espíritu Santo oamechyolchipaj ika ieso in toSeñor Jesucristo
para xiwelikan xiktlakitakan. Ma Dios kipia weyi iteiknotlamachilis
amonawak iwan ma amechmaka yolosewilistle.
\s Tonemilis katlej tikpiaj inawak Jesucristo
\p
\v 3 Ma tikweyikixtikan toTajtzin Dios katlej iPapan
toSeñor Jesucristo. Porke toTajtzin Dios okipixke weyi
iteiknotlamachilis towan iwan otechmakak yankuik nemilistle
inawak Jesucristo katlej Yej okiyolitij satepan de omikke.
Iwan por yonik axan tejwan tikchiaj tlan satepan techmakas.
\v 4 Porke ompa ilwikak techpialijtok tlan Yej yokijtoj
techmakas, katlej mach palanis iwan nion mach ijtlakawis,
iwan nion mach pojpoliwis ken xochitl nijkuak piliwi.
\v 5 Iwan komo namejwan ankipiaj tlaneltokalistle inawak
Dios, por yonik in Yej amechmonekuitlawijtos ika ipoder.
Iwan nijkuak ajsis in sa iyakatlanka tonale, ijkuakón
Yej amechititis kenik amechmakixtis.
\p
\v 6 Por yonik moneki sa tekitl xipakikan, maski ok antlajyowiskej
miek tlamantle de neyolkokole kanaj ok keski tonale.
\v 7 Iwan ijkón ken nijkuak in tlakaj kiyejyekoaj in
oro ijtik tlitl para kipiaskej in oro katlej sa tekitl
kuale, toTajtzin Dios no ijkón kichiwa towan. Yej kitekawilia
ma tipanokan tlajyowilistle para kiyejyekos totlaneltokalis
para kitas kox melawak kuale tikneltokaj. Iwan nijkuak
kiyejyekoa totlaneltokalis, yon okachi ipatij iwan amo
ken oro katlej ajsi tonale tlami. Tonses, tla tejwan
melawak kuale tikneltokaj in toSeñor Jesucristo, in toTajtzin
Dios Yej techweyikixtis, techweyimatis iwan techpialis
tetlakitalistle nijkuak in toSeñor Jesucristo walmuikas
oksemi.
\p
\v 8 Namejwan ankitlasojtlaj in toSeñor Jesucristo maski
mach keman ankitaj. Maski namejwan axan mach ankitaj,
namejwan ankineltokaj, iwan sa tekitl anpakij. Iwan yon
pakilistle sa tekitl weyi katlej ankipiaj ipan amoyolo
ke asta mach anwelij ankijtaj ika tlajtole.
\v 9 Namejwan ankipiaj pakilistle porke Dios kimakixtia
namoanima ijkón ken Yej okijtoj kichiwas tla amejwan
ankineltokaskej.
\p
\v 10 Ya wejkawitl in profetajtin okijkuilojkej kenik
in Dios kipias weyi iteiknotlamachilis towan, pero yejwan
mach okimomakakej kuenta tlan okijkuilojkej. Yejwan
okimomachtijkej tlan okijkuilojkej porke okinekiaj kimatiskej
kenik in Dios techmakixtis.
\v 11 Cristo iEspíritu oyeka intech in profetajtin, iwan
okinmakak tlalnamikilistle para ma kijkuilokan tlan
Cristo panoani de yen tlajyowilistle. Iwan noijki okijkuilojkej
kenik in Cristo satepan kipiani weyi tlanawatijkayotl.
Yejwan okinekiaj kimatiskej akin yon tlakatl katlej
ijkón tlajyowiani iwan keman ijkón tlapanoani.
\v 12 Pero Dios okichij ma kimomakakan kuenta ke tlan
okijkuilojkej mach para yen tlakajtin katlej oyekaj
itech yon tiempo. Sino okijkuilojkej para yen tejwan
katlej axan tikkakij itlajtol in Dios para ma tikmomakakan
kuenta. Iwan katlej oamechmatiltijkej in kuale tlajtole
katlej temakixtia, oamechmatiltijkej ika ipoder in Espíritu
Santo katlej Dios okualtitlanke de ilwikak. Iwan tlan
namejwan oamechmatiltijkej kijtosneki yen yon tlajtole
katlej ya wejkawitl okijkuilojkej in profetajtin. Iwan
onkaj sekin tlamantle ke asta yen angelestin kinekij
kimomakaskej kuenta nochi tlan Dios techilwia de yen
Cristo.
\s Dios kineki ma tichipawkanemikan
\p
\v 13 Por yonik, xikyektlalikan namotlalnamikilis para
ankichiwaskej tlan kuale. Xikchiakan ika nochi amoyolo
tlan Dios ika iteiknotlamachilis amechmakas nijkuak
in toSeñor Jesucristo walmuikas oksemi.
\v 14 Moneki xiktlakitakan Dios porke namejwan anikonewan.
Ayakmo xitlajtlakokan ika namotlalnakayo ken achtoj
ankichiwayaj nijkuak ayamo ankixmatiaj itlajtol in Dios.
\v 15 Sino, moneki ke nochi tlan ankichiwaskej xikchiwakan
ika amoyolo chipawak, ijkón ken Dios Yej yolchipawak
katlej oamechnotzke para xiekan anikonewan.
\v 16 In tiotlajkuilole ijkín kijta: “Namejwan xiekan
anyolchipawakej porke Nej niyolchipawak.”
\p
\v 17 Tla amejwan ankilwiaj “Papan” in toTajtzin Dios
nijkuak ankinotzaj, in yon kuale kajki, pero moneki nochipa
xiktlakitakan asta ijkuak anmikiskej de ixko yin tlaltikpak,
porke Yej mach kinchichikotlasojtlas in tlakaj nijkuak
tlaixkomakas (tlatzonmanas). Yej kinmixkomakas nochtin
tlakaj katlej kichiwaj tlan kuale iwan katlej kichiwaj
tlan amo kuale.
\v 18 Namejwan ankimatij nik mach itlaj ipatij in nemilistle
katlej achtoj ankipiayaj. In ya wejkawitl namoweyitajwan
no ijkón oyekaj, iwan yejwan oamechititijkej ijkón xikchiwakan.
Pero Dios oamechmakixtij de itech yon nemilistle katlej
mach itlaj ipatij. Yej okitlaxtlaj para oamechmakixtij
iwan mach okitlaxtlaj ika oro o noso ika plata katlej
ajsi tonale tlami.
\v 19 Sino okitlaxtlaj ika ieso in toSeñor Jesucristo
nijkuak omikke, iwan yon ieso sa tekitl patíoj. Ya wejkawitl
in tlakaj okimiktiayaj se ichkatzin katlej sa tekitl
kuale iwan chipawak para okimakayaj in toTajtzin Dios
kej se tlamanale, Cristo no ijkón omikke por tejwan maski
mach okipixke nion se tlajtlakole.
\v 20 Ya wejkawitl desde ijkuak ayamo oyeka in tlaltikpak,
in toTajtzin Dios desde ijkuakón okipejpenke in Cristo
para ma miki por amejwan iwan ijkón welis amechmakixtis
itech yinmej tonaltin porke Yej sa tekitl amechtlasojtla.
\v 21 Iwan por yen tlan Cristo okichij, namejwan ankineltokaj
in Dios katlej okiyolitij in Cristo satepan de omikke,
iwan satepan okimakak weyi tlanawatijkayotl. Iwan ijkón
axan namejwan ankitlaliaj nochi namotlaneltokalis inawak
Dios iwan ankichiaj se tonale anyeskej inawak.
\p
\v 22 Axan namejwan ya anyolchipawakej porke ankineltokakej
itlajtol in Dios katlej melawak, iwan ijkón axan welis
ankintlasojtlaskej in tokniwan. Por yonik moneki sa
tekitl ximotlasojtlakan se iwan oksé ika nochi amoyolo.
\v 23 Namejwan ya antlakatkej oksemi, pero amo antlakatkej
oksemi de intech amotajwan katlej ajsi tonale mikij,
sino namejwan antlakatkej itech itlajtol in Dios katlej
amechmaka yankuik nemilistle katlej mach keman tlamis.
Porke itlajtol in Dios yolitok iwan yetos iktlanke (ik
tlami).
\v 24 In tiotlajkuilole ijkín kijta:
\q Nochtin tlaltikpaktlakaj katej ken xiwitl porke mach
wejkawaj.
\q Iwan nochi tlan kipiaj in tlaltikpaktlakaj yon ken
xochitl katlej ajsi tonale piliwi.
\q In xiwitl waki iwan ixochio tepewi.
\q
\v 25 Pero itlajtol in Dios yetos iktlanke (ik tlami).
\m Iwan yin itlajtol in Dios yen katlej namejwan ya ankikakej.
\c 2
\p
\v 1 Por yonik, xikkawakan se lado nochi tlan amo kuale
iwan ayakmo keman xitlakajkayawakan, ayakmo xiekan anteixkajkayajkej,
ayakmo intech ximoxikokan in oksekimej, iwan ayakmo xiekan
antlajtoltlatlalijkej.
\v 2 Ijkón ken selikkonemej kinekij leche para ika moskaltiaj,
namejwan noijki xiknekikan itlajtol in Dios katlej melawak
para ika ximoskaltikan iwan ika ximomakixtikan.
\v 3 Namejwan ya ankimomakakej kuenta nik in Dios sa
tekitl kuale tlakatl.
\s Cristo kajki kej se tetl katlej yolitok
\p
\v 4 Ximijkuanikan, kiné, inawak in toSeñor Jesucristo
katlej kajki kej se tetl katlej kipia nemilistle. In
tlakaj mach okinekej iwan okitlalijkej se lado, pero
yon tetl yen katlej Dios okipejpenke. Yon tetl para
Dios sa tekitl patíoj iwan sa tekitl kuale.
\v 5 Iwan tejwan titlaneltokakej katlej tikpiaj yankuik
nemilistle noijki tikatej ken temej katlej Dios ika
kichiwa se tiopan katlej mach mota. Iwan namejwan ankitekipanoaj
in Dios itech yon tiopan kej antiopixkej anyolchipawakej,
iwan ankimakaj in toTajtzin Dios namonemilis kej se
tlamanale katlej kipaktia porke namejwan ankineltokaj
in Jesucristo.
\v 6 Por yonik in tiotlajkuilole noijki kijta:
\q Xikitakan, Nej niktlalia itech weyikan de Sión se tetl
katlej Nej onikpejpenke, katlej okachi kichikajtos notiopan,
iwan katlej sa tekitl patíoj.
\q Iwan akin tlaneltokas inawak yon tetl mach keman mopinatis.
\m
\v 7 Para tejwan katlej tikneltokaj tikitaj in yon tetl
nik sa tekitl patíoj. Pero in tlakaj katlej amo kineltokaj,
mochiwa tlan kijta in tiotlajkuilole:
\q In tetl katlej in kalchijkej mach okinekej,
\q omochij yen tetl katlej okachi kichikajtok in kale.
\m
\v 8 Iwan noijki mochiwa tlan kijta in tiotlajkuilole:
\q Se tetl katlej ika motepotlamiskej, se tetl katlej kinmayawis.
\m Yejwan motepotlamiaj iwan mopoloaj porke mach kineltokaj
itlajtol in Dios. Dios ijkón yokitlalij ma panokan.
\s Katlej iaxkawan Dios
\p
\v 9 Pero namejwan Dios oamechpejpenke para xipowikan
itech ipueblo, namejwan antiopixkej de yen toRey. Namejwan
ankatej kej se pueblo de tlaneltokakej yolchipawakej
katlej iaxkawan Dios. Dios oamechpejpenke para xiktematiltikan
tlan kuale katlej Dios kichiwa. Yej oamechnotzke para
xikisakan de ijtik tlatleyualotl iwan xikalakikan ijtik
tlanextle katlej sa tekitl kuakualtzin.
\v 10 Achtoj namejwan mach anpowiaj itech ipueblo in
Dios, pero axan ya anpowij itech ipueblo. Achtoj namejwan
mach akaj oamechiknomatia, pero axan Dios yoamechiknomatke.
\s Xiekan para ankitekipanoskej in toTajtzin Dios
\p
\v 11 Notetlasojkaikniwan, namejwan ankimatij nik anpowij
ompa ilwikak maski axan san anpanokoj kanaj keski tonale
ixko yin tlaltikpak. Por yonik, namechtlatlawtia xikkawakan
se lado tlan amo kuale tlan kiyoltilana namotlalnakayo
katlej kineki kijtlakos namoanima.
\v 12 Xichipawkanemikan inmixpan tlakaj katlej mach
kixmatij Dios. Iwan maski yejwan ma tlapoakan de amejwan
iwan ma kijtokan mach ankualtin, yejwan kitaskej tlan
kuale katlej ankichiwaj, iwan ijkón yejwan welis kiweyikixtiskej
in toTajtzin Dios nijkuak Yej witz para kinmixkomakas
(kintzonmanas).
\p
\v 13 Xikintlakitakan nochtin in tlatlanawatijkej katlej
in tlakaj kintlaliaj ixko yin tlaltikpak porke toTajtzin
Dios ijkón kineki ma tikintlakitakan. Xiktlakitakan
in weyi tlanawatij rey, porke yej kipia okachi weyi tlanawatijkayotl
ke oksekimej.
\v 14 Iwan noijki moneki xikintlakitakan in gobernadortin
tekiwajkej, katlej in rey kintlalia para ma kintlajyowiltikan
katlej kichiwaj tlan amo kuale, o noso para ma kinweyimatikan
katlej kichiwaj tlan kuale.
\v 15 Porke Dios kineki ma tikchiwakan tlan kuale, para
ijkón katlej mach tlalnamikilisejkej amo ma techistlakawikan
de itlaj tlamantle katlej yejwan mach kimatij.
\p
\v 16 Namejwan Dios yoamechmakixtij de imak in Amo Kuale
Tlakatl, pero amo ok xitlajtlakokan maski ya anmomakixtijkej.
Sino xiktekipanokan toTajtzin Dios porke Yej oamechkoj
para xiekan iaxkawan.
\v 17 Moneki xikintlakitakan nochtin tlakaj. Xikintlasojtlakan
nochtin tokniwan, xikimakasikan toTajtzin Dios, iwan xiktlakitakan
katlej okachi weyi tlanawatij rey.
\s Ma tikxikokan in tlajyowilistle ken Cristo okixikoj
\p
\v 18 Namejwan antlakaj katlej oamechkojkej, moneki xikintlakitakan
namotekowan iwan xikchiwakan tlan yejwan amechnawatiaj.
Tla namotekowan kuale inyelis o noso amo kuale inyelis,
namejwan xikintlakitakan.
\v 19 Tla anpanoskej tlajyowilistle iwan ankixikoskej,
maski mach ankichiwaj tlan amo kuale, in Dios amechtiochiwas
porke namejwan ankinekij ankichiwaskej tlan Yej kineki.
\v 20 Pero tla amejwan amechtlajyowiltiaj porke ankichiwaj
tlan amo kuale, tonses mach se amechweyikixtis tla ankixikoskej
in tekokojkayotl. Pero tla ankichiwaskej tlan kuale
iwan ankixikoskej in tlajyowilistle, tonses Dios amechtiochiwas.
\v 21 Dios oamechnotzke namejwan para xikxikokan yon
tlajyowilistle porke Cristo noijki otlajyowij por amejwan,
iwan oamechmakak se ejemplo para noijki xikxikokan ijkón
ken Yej okixikoj.
\v 22 Yej mach okichij nion se tlajtlakole, iwan nion
mach keman akaj okikajkayaj ika itlajtol.
\v 23 Nijkuak okiwijwikaltiayaj in Cristo, in Yej mach
itlaj okinnankiliaya. Nijkuak okitlajyowiltiayaj, Yej
mach okinmajmawtiaya itlaj kintoktis, sino nochi okikawaya
imak toTajtzin Dios katlej nochipa tlaixkomaka (tlatzonmana)
ken moneki.
\v 24 Iwan Cristo okitlaxtlaj in totlajtlakol itech
itlalnakayo nijkuak omikke itech krus. Para ijkón tejwan
welis tikkawaskej in tlajtlakole iwan welis tikpiaskej
in tonemilis chipawak ken Dios kineki. Cristo okixojxolejkej
itech itlalnakayo para tejwan otipajtikej de yen tlajtlakole,
kijtosneki Cristo omikke para otechmakixtij de itech
tlajtlakole.
\v 25 Tejwan achtoj otinemiaj kej ichkamej nijkuak mopolojtinemij,
pero axan yotimokuepkej inawak toSeñor katlej kajki
kej toTlajpixke iwan kej toTlamonekuitlawij de toanima.
\c 3
\s Kenik moneki yeskej katlej tlanamiktiltin
\p
\v 1 Ijkón noijki, namejwan katlej ansiwamej katlej anmokichwajkej,
moneki xikinkawilikan namookichwan yejwan ma amechyekanakan.
Ijkón tla akaj se de amejwan kipia iokich katlej amo
kineltoka itlajtol in Dios, iwan kitas isiwa kichiwa
tlan kuale iwan tetlakitak, tonses iokich welis kineltokas
itlajtol in Dios maski isiwa amo ma kitlapowi.
\v 2 Porke yej kimomakas kuenta nik melawak chipawkanemi
isiwa iwan melawak tetlakitak.
\v 3 Namejwan ansiwamej nijkuak anmochijchiwaskej, amo
xikyektlalikan namotzonkal para ika anmoweyinekiskej,
amo ximochijchiwakan ika oro, o noso ika amotzotzol patíoj.
\v 4 Sino xiekan ankualtin tlakaj iwan xiekan anpasensiajtin,
iwan ijkón ankipiaskej amochijchikayo katlej mach keman
tlamis, iwan yen yon katlej okachi ipatij inawak Dios.
\v 5 Porke ya wejkawitl ijkón nik omochijchiwayaj in
siwamej yolchipawakej. Yejwan okitlaliayaj nochi intlaneltokalis
inawak Dios iwan okinkawiliayaj inmokichwan ma kinyekanakan.
\v 6 Ijkón ken Sara noijki okitlakitak in Abraham katlej
oyeka iokich iwan okinotzaya “tataj”. Iwan namejwan
welis anyeskej kej anteichpokawan de Sara tla ankichiwaskej
tlan kuale ken yej okichij, iwan ijkón mach anmomawtiskej
de itlaj.
\p
\v 7 Ijkón noijki namejwan tlakajtin katlej ansiwayejkej,
moneki xiekan ika kuale inwan namosiwawan, iwan xikmomakakan
kuenta nik in siwamej mach chijchikawakej ken namejwan
anmokichtin. Moneki xikintlakitakan namosiwawan, porke
Dios ika iteiknotlamachilis noijki kinmaka in siwamej
yankuik nemilistle kej se tlatliokolile ijkón ken namejwan
amechmaka. Tla ijkón ankichiwaskej, tonses mach itlaj
kitzakuilis namotiotzajtzilis para amechnankilis in
toTajtzin Dios.
\s Tlakajtin katlej tlajyowiaj porke kichiwaj tlan kuale
\p
\v 8 Iwan axan nikneki namechilwis yin tlajtole. Aminochtin
xikpiakan san se namotlalnamikilis. Tla namokniwan pakij
o noso moyolkokoaj, namejwan noijki xipakikan o noso
ximoyolkokokan ken yejwan. Xikintlasojtlakan amokniwan,
xiteiknomatikan iwan xiekan ankualtin tlakaj.
\v 9 Tla akaj amechtoktia itlaj mach kuale, amo xikkuepaltikan.
Tla akaj amechilwia san tlan amo, namejwan amitlaj xikilwikan.
Sino moneki xiktlajtlanilikan in Dios ma kintiochiwa,
iwan tla amejwan ijkón ankichiwaskej, tonses in Dios
amechtiochiwas.
\v 10 In tiotlajkuilole kijta:
\q Akin kineki yetos ika kuale iwan kineki kipias pakilistle,
\q moneki ayakmo ma kijto tlan amo kuale
\q iwan ayakmo keman ma tlakajkayawa.
\q
\v 11 Moneki kikawas se lado tlan amo kuale, iwan ma kichiwa
tlan kuale.
\q Moneki ma kitemo de kenik yetos ika kuale inwan oksekimej,
iwan yen yon ma kitemojto nochipa.
\q
\v 12 Porke toTajtzin Dios kinmonekuitlawia katlej kichiwaj
tlan kuale
\q iwan kinkakilia intiotzajtzilis.
\q Pero Dios mach kinwelita katlej kichiwaj tlan amo kuale.
\p
\v 13 Tla amejwan ankichiwaskej tlan kuale, tonses mach
akaj mixewis amechtoktis itlaj mach kuale.
\v 14 Iwan maski in tlakaj ma amechtlajyowiltikan por
ankichiwaj tlan kuale, namejwan xipakikan. Namejwan amo
xikinmiimakasikan iwan nion amo ximomawtikan.
\v 15 Sino moneki xiktlakitakan in Cristo ipan namoyolo
porke yen namoTeko. Tla akaj amechtlajtlanis tlanik
ankineltokaj in Cristo iwan tlanik anmochiaj inawak,
namejwan xikmatikan kenik ankinnankiliskej, pero xikinnankilikan
ika kuale amoyolo iwan ika tetlakitalistle.
\v 16 Xichipawkanemikan para ma chipato namotlalnamikilis.
Iwan katlej tlapoaj mach kuale de amejwan pinawaskej
porke nochtin kimatiskej nik namejwan ankichiwaj tlan
kuale porke antlaneltokaj inawak Cristo.
\v 17 Tla namejwan antlajyowiskej por ankichiwaj tlan
kuale, tonses xitlajyowikan kiné, tla Dios ijkón kimonekiltis.
Pero tla namejwan antlajyowiskej por ankichiwaj tlan
amo kuale, tonses yon kemaj mach kuale kaj.
\p
\v 18 Porke Cristo noijki otlajyowij iwan omikke san
se buelta iwan okitlaxtlaj in totlajtlakol. Yej mach
oyeka tlajtlakolej pero Yej omikke por tejwan katlej
titlajtlakolejkej para techwikas inawak Dios. Iwan maski
in tlakaj okimiktijkej itlalnakayo, Yej omoyolkuik ika
iEspíritu.
\v 19 Iwan ika iEspíritu in Jesucristo oyáj iwan okinmatiltij
de itlajtol in espíritus katlej axan tzaktokej kan Dios
okintlalij ma tzaktokan,
\v 20 katlej ya wejkawitl mach okineltokakej in toTajtzin
Dios. Dios okipixke pasensia iwan okinchixtoka miek
tonale para ma moyolkuepakan mientras Noé okichiwaya
in weyi barko. Iwan yon barko okinmakixtij san chikueyi
tlakaj de ijtik atl.
\v 21 Iwan nekáj atl axan tejwan noijki techmakixtia,
porke nijkuak timokuateekiaj tikteititiaj nik ya tikpiaj
yankuik nemilistle porke Cristo omoyolkuik. Pero amo
timokuateekiaj para ma chipawi totlalnakayo, sino para
ma techmakixti de totlajtlakol iwan ijkón welis timijkuaniskej
inawak Dios ika totlalnamikilis chipawak.
\v 22 Iwan Jesucristo oyáj para ilwikak iwan ompa kajki
ik iyekma in toTajtzin Dios. In toSeñor Jesucristo kinnawatia
nochtin angelestin, iwan nochtin katlej kipiaj tekiwajkayotl,
iwan nochtin katlej kipiaj poder.
\c 4
\s Tla tikneltokaj in Cristo moneki noijki titlajyowiskej
\p
\v 1 Cristo otlajyowij itech itlalnakayo nijkuak omikke,
iwan por yonik in tejwan noijki moneki amo ma tikimakasikan
nijkuak titlajyowiskej por Yej. Porke akin tlajyowia
itech itlalnakayo kijtosneki yokikaj in tlajtlakole,
\v 2 para ayakmo kichiwas tlan kineki itlalnakayo. Sino
kineki kichiwas tlan Dios kineki asta ijkuak mikis de
ixko yin tlaltikpak.
\v 3 Namejwan ankichijkej miek tlajtlakole nijkuak anyekaj
ken tlakaj katlej mach kixmatij Dios. Achtoj namejwan
anmomekatiayaj iwan ankichiwayaj miek tlamantle mach
kuale katlej okinekia namotlalnakayo. Namejwan antlawanayaj,
anmopaktiayaj biero itech ilwimej asta ankuawtzajtziaj,
ankichiwayaj ilwitl para antlawanaskej, iwan ankinweyikixtiayaj
namosantojwan katlej Dios mach kineki ma se kinweyikixti.
\v 4 Iwan axan katlej mach kixmatij Dios, mach kimomakaj
kuenta tlanik mach ok inwan anmoneloaj para ankichiwaskej
tlan amo kuale ken yejwan kichiwaj, iwan por yonik amechpojpoaj.
\v 5 Pero yejwan kipia de kitemakaskej kuenta inawak
Cristo de tlan kichijtokej. Porke in Cristo ya mochixtok
para kinmixkomakas (kintzonmanas) in tlakaj katlej axan
yolitokej iwan noijki katlej yomikkej.
\v 6 Por yonik, in kuale tlajtole katlej temakixtia, noijki
okinmatiltijkej katlej yomikkej. Iwan maski yejwan yomikkej
ijkón ken mikij nochtin tlaltikpaktlakaj, iwan tla yejwan
okineltokakej itlajtol in Dios, tonses inmespíritu kipias
nemilistle ijkón ken Dios kipia.
\p
\v 7 Ya ajsi tonale para tlamis in tlaltikpak. Iwan
por yonik moneki namejwan xikpiakan kuale namotlalnamikilis
iwan xikixkawikan (ximomelikaj) ximotiotzajtzilikan
inawak Dios.
\v 8 Iwan tlan okachi moneki xikchiwakan yen ximotlasojtlakan
se iwan oksé. Porke akin kitlasojtla ikni, weli kitlapojpolwia
maski ma tlajtlako miek buelta inawak.
\v 9 Xikinkalotikan amokniwan katlej amechontlajpaloaj
itech amochan iwan amo xikintlatzotzokatilikan.
\v 10 Dios otechmakak tlatlamantle poder kada se de
tejwan para ma tiwelikan ma titekipanokan inawak Dios.
Moneki kiné xiktekipanoltikan yon poder para ika xikintekichiwilikan
oksekimej. Iwan ijkón namejwan anyeskej kuale antekipanojkej
porke ankimatij kenik ankitekipanoltiskej in poder katlej
Dios oamechmakak kada se de amejwan ika iteiknotlamachilis.
\v 11 Tla akaj de amejwan tlapoa de itlajtol in Dios,
ma tlapoa kiné kej yeskia yen Dios tlapoa. Tla akaj
kinpalewia oksekimej, ma kinpalewi kiné ika nochi ichikawalis
katlej Dios kimaka. Nochi tlan ankichiwaskej ma yeto
para ika ankiweyikixtiskej in toTajtzin Dios porke namejwan
ankineltokaj in toSeñor Jesucristo, katlej kipia imawisotlanex
iwan kipia ipoder nochipa.
\s Tlajyowilistle katlej tipanoaj
\p
\v 12 Notetlasojkaikniwan, amo ma amechmajmawti nijkuak
anpanoskej tlajyowilistle. Amo ximomawtikan porke Dios
ijkón nik amechyejyekos para kitas kox melawak antlaneltokaj.
Amo ankijtoskej tlanik ijkón anpanoaj.
\v 13 Sino moneki sa tekitl xipakikan porke antlajyowiaj
ijkón ken Cristo otlajyowij, iwan ijkón namejwan noijki
sa tekitl anpakiskej nijkuak Yej walmonextis ika imawisotlanex.
\v 14 Tla sekimej amechilwiaj itlaj tlajtole biero porke
ankineltokaj in Cristo, namejwan sa tekitl xipakikan.
Porke iEspíritu in toTajtzin Dios kajki amotech ika
imawisotlanex. Yejwan tlapoaj biero de Dios, pero namewan
ankiweyikixtiaj.
\v 15 Tla namejwan antemiktiaj, antlachtekij, ankichiwaj
tlan amo kuale o noso anmokalakiaj kan amo amechtokaroa,
tonses moneki antlajyowiskej iwan ma amechpijpinatikan.
\v 16 Pero tla akaj de amejwan tlajyowia por kineltoka
in Cristo, amo ma pinawa. Sino moneki ma motlasojkamati
inawak Dios porke kikawilia ma tlajyowi por kineltoka
in Cristo.
\p
\v 17 Yoajsik tonale para Dios kinmixkomakas (kintzonmanas)
nochtin tlaltikpaktlakaj. Achtoj techixkomakas tejwan
katlej tiikonewan. Iwan tla yen tejwan achtoj techixkomakas
katlej tikneltokaj Dios, tonses ¿kenamij panoskej nekatej
katlej mach kineltokaj itlajtol in Dios katlej temakixtia?
\v 18 In tiotlajkuilole kijta:
\q Tla ika miek trabajo momakixtiaj katlej kualtin tlakaj,
\q tonses ¿kenamij nik momakixtiskej nekatej katlej mach
kualtin iwan tentokej de tlajtlakole?
\p
\v 19 Ijkón kiné, tla Dios kimonekiltia namejwan xitlajyowikan,
xikseguirokan xikchijtokan tlan kuale iwan moneki ximotemaktikan
(ximotemaktilikan) inawak Dios katlej otechchij iwan
katlej nochipa kichiwa tlan kijta.
\c 5
\s Xikinmonekuitlawikan ikonewan Dios
\p
\v 1 Axan nikneki namechilwis se tlajtole namejwan katlej
ankatej kej antlayekankej de tiopan. Nej noijki nikaj
kej nitlayekanke ken namejwan. Nej onikitak nijkuak
in Cristo otlajyowij iwan omikke. Iwan nej noijki nikresibiros
tlan nechtokaroa itech nekáj tonale nijkuak walmonextis
imawisotlanex in Dios.
\v 2 Namechtlatlawtia xikinmonekuitlawikan ikonewan
Dios katlej Yej oamechinmaktilij, xikinmonekuitlawikan
ijkón ken se tlajpixke kinmonekuitlawia ichkawan. Xikinmonekuitlawikan
ika kuale amoyolo. Amo xikyejyekokan akaj amechafuersajtia
xikchiwakan yon tekitl, nion amo xikchiwakan porke ankinekij
ankitlaniskej tomin. Sino xikinmonekuitlawikan ika pakilistle,
ijkón ken Dios kineki.
\v 3 Amo xikinnawatikan ika chikawak ikonewan Dios katlej
Yej oamechinmaktilij, nion amo xikchiwakan kej yeskia
antekomej. Sino namejwan xiekan amejemplojtin para yejwan
no ijkón ma kichiwakan.
\v 4 Iwan nijkuak walmonextis in toweyi Tlajpixke de
nochtin tlajpixkej, Yej amechmakas se korona katlej kipia
imawisotlanex katlej mach keman ijtlakawis.
\p
\v 5 Noijki namejwan katlej antelpokamej, nikneki xikchiwakan
tlan amechnawatiaj in tlayekankej de tiopan. Iwan aminochtin
ximotlakitakan se iwan oksé ika kuale amoyolo, porke
itech tiotlajkuilole kijta:
\q Dios mach kinneki katlej moweyinekij,
\q pero Dios kipia weyi iteiknotlamachilis para katlej
mach moweyinekij.
\m
\v 6 Tla namejwan anmoiknomatiskej inawak Dios katlej
kipia weyi ipoder, ajsis tonale Yej amechweyikixtis.
\v 7 Xikilwikan toTajtzin Dios nochi tlan amechtekipachoa
iwan xiktlalikan ipan imatzin, porke Yej nochipa amechmonekuitlawia.
\p
\v 8 Xikpiakan kuale namotlalnamikilis iwan ximotlachilijtokan,
porke in diablo namokontra kineki amechixpolos. In diablo
nemi kej se lión tekuani katlej tzajtzitinemi kitemojtinemi
akin kikuas.
\v 9 Amo xikkawilikan ma amechtlani in diablo iwan ximoyekketokan
itech namotlaneltokalis.
\m Namejwan xikmatikan ke oksekimej tokniwan tlaneltokakej
katlej katej ixko yin tlaltikpak noijki panoaj tlajyowilistle
ken namejwan.
\v 10 Iwan nijkuak ya antlajyowijkej kanaj keski tonale,
in toTajtzin Dios kichiwas namejwan xiekan sa tekitl
ankualtin itech nochi tlamantle. Kichiwas xiekan anchijchikawakej
iwan kichiwas kuale ximoyekketokan inawak, para amo keman
xiwetzikan de itech namotlaneltokalis. Dios ika iteiknotlamachilis
otechnotzke para ma tikpiakan parte itech imawisotlanex
katlej yetos iktlanke (ik tlami), porke tisetitokej san
se iwan Jesucristo.
\v 11 Nochipa ma kipia imawisotlanex iwan ipoder. Ijkón
ma yeto.
\s Pedro okonintlajpaloj in tokniwan
\p
\v 12 Onamechijkuilij kanaj keski tlajtlole itech yin
amatlajkuilole, katlej namechtitlanilia iwan tokni Silvano
katlej sa tekitl kineltoka in toTajtzin Dios. Iwan itech
yin amatlajkuilole namechnajnawatia iwan namechmatiltia
nik in Dios sa tekitl kipia weyi iteiknotlamachilis
towan ijkón ken namejwan ya ankimatij. Ximelajkanemikan
itech iteiknotlamachilis in toTajtzin Dios.
\p
\v 13 In tokniwan tiopantlaneltokakej katlej katej itech
weyikan de Babilonia amechontlajpaloaj. ToTajtzin Dios
noijki okinpejpenke in yonmej tokniwan ijkón ken namejwan
noijki oamechpejpenke. Noijki amechontlajpaloa in Marcos
katlej kajki kej nokone inawak Dios.
\v 14 Ximotlajpalokan ika tlasojtlalistle se iwan oksé
ken Dios kineki.
\p Xiekan ika yolosewilistle aminochtin namejwan katlej
anpowij inawak Jesucristo. Ijkón ma yeto.