\id 2PE
\h 2 Pedro
\toc1 2 Pedro
\mt SAN PEDRO ITLATITLANIL IN DIOS IPAN OJPA OKIJKUILOJ YIN AMATLAJKUILOLE
\c 1
\s Pedro okonintlajkuililij in tlaneltokakej
\p
\v 1 Nej niSimón Pedro, nitekipanoj iwan nitlatitlanile
de Jesucristo. Namechtlajkuililia namejwan katlej ankipiaj
namotlaneltokalis katlej sa tekitl miek ipatij ijkón
ken tejwan tikpiaj. Namejwan ankipiaj yon tlaneltokalistle
porke in toDios Jesucristo katlej toTemakixtij, Yej kichiwa
tlan kuale ken moneki.
\v 2 ToTajtzin Dios ma kipia weyi iteiknotlamachilis
amonawak iwan ma amechmaka yolosewilistle nochipa porke
ya ankixmatiwej nochi tonale in toTajtzin Dios iwan
toSeñor Jesús.
\s Dios techmaka nochi tlan moneki para kuale ma tiekan inawak
\p
\v 3 Cristo ika weyi ipoder techmaka nochi tlan moneki
para ika ma timopanoltikan iwan para okachi ma timotemaktikan
(timotemaktilikan) inawak Dios. Nochi tlan moneki tejwan
tikpiaj porke tikixmatij in Cristo Jesús. Yej otechnotzke
ika imawisotlanex iwan ika ipoder.
\v 4 Iwan ika yon poder, in Dios techmaka tlan yotechkakitij
katlej sa tekitl weyi iwan miek ipatij. Iwan techmakixtia
de itech tlan amo kuale katlej in tlaltikpaktlakaj kichijtinemij
ika inmelewilis mach kuale. Iwan techmaka se yankuik
nemilistle ijkón ken Dios inemilis porke ijkón otechkakitij
techmakas.
\v 5 Por yonik, xikchiwakan de amo san xitlaneltokakan,
sino noijki xikchiwakan tlan kuale itech namonemilis.
Iwan amo san xikchiwakan tlan kuale itech namonemilis,
sino noijki moneki xikmatikan tlanon Dios kineki.
\v 6 Iwan amo san xikmatikan tlanon Dios kineki, sino
noijki xikmatikan xikmoxikoltikan para amo antlajtlakoskej.
Iwan amo san xikmoxikoltikan para amo antlajtlakoskej,
sino noijki xikmatikan xikxikokan tlan anpanoaj. Iwan
amo san xikmatikan xikxikokan, sino noijki ximotemaktikan
(ximotemaktilikan) okachi inawak Dios.
\v 7 Iwan amo san ximotemaktikan inawak Dios, sino noijki
xikmochiwilikan tlan kuale se iwan oksé kej anmiknimej
inawak Dios. Iwan amo san yon, sino noijki ximotlasojtlakan.
\p
\v 8 Tla namejwan ankichiwaskej iwan anmoskaltiskej
okachi itech yon tlamantle, tonses toTajtzin Dios amechtekimakas
itech itekiw para namonemilis ma serbiro. Iwan ijkón
mach yetos san tekitl ankixmatij in toSeñor Jesucristo.
\v 9 Pero akin amo kichiwa yon tlamantle, kajki kej yeskia
mach tlachia o noso mach yektlachia, iwan yokelkaj nik
in Dios yokichipaj de itlajtlakol katlej achtoj okichiwaya.
\v 10 Nokniwan, Dios oamechnotzke iwan oamechpejpenke.
Iwan por yonik ximochijchikawakan de xinemikan ijkón
ken nej yonamechilwij, iwan tla namejwan ijkón ankichiwaskej,
mach ok keman anwetziskej itech tlajtlakole.
\v 11 Iwan toSeñor Jesucristo katlej toTemakixtij, Yej
amechtlatlapolis ompa ilwikak iwan amechresibiros ika
pakilistle nijkuak ompa anmajsitiwej kan Yej tlanawatijtos
nochipa.
\p
\v 12 Por yonik nochipa namechelnamiktis yon tlamantle,
maski namejwan ya ankimatij iwan ya anmoyekketokej itech
itlajtol in Dios katlej melawak.
\v 13 Nej nikyejyekoa nik moneki namechelnamiktijtos
in yon tlamantle mientras ok nikaj ixko yin tlaltikpak,
para amo xikelkawakan.
\v 14 Nej nikmati nik ya ajsi tonale para nimikis porke
ijkón yonechmatiltij in toSeñor Jesucristo.
\v 15 Pero nikchiwas asta kan niwelis para ke satepan
de ijkuak yonimikke, namejwan amo keman xikelkawakan
nochi yon tlamantle katlej yonamechilwij.
\s Pedro iwan oksekimej tlakaj okitakej imawisotlanex in Cristo
\p
\v 16 Nijkuak otamechtlapowijkej de ipoder in toSeñor
Jesucristo iwan de yej nijkuak witz oksemi, mach otamechkajkayajkej
kej yeskia otamechilwijkej se kuento, sino nej iwan oksekimej
tlakaj otikitakej imawisotlanex ika toixtololowan.
\v 17 Tejwan otikkakej nijkuak toPapan Dios okiweyikixtij
iwan okitak ika tetlakitalistle iKone Jesucristo desde
ilwikak, iwan Dios okijtoj ika se tlajtole kuakualtzin:
“Yin yen notlasojKone, katlej inawak nipaki.”
\v 18 Tejwan tonewian otikkakej yon tlajtole katlej
omokakke de ilwikak, porke tejwan otiekaj iwan toSeñor
Jesús ipan nekáj tepetl tlatiochiwaloj.
\p
\v 19 Tejwan tikpiaj tlan okijkuilojkej in profetajtin
katlej moneki itech timokitzkiskej. Iwan namejwan moneki
kuale xikmomakakan kuenta tlan yejwan okijkuilojkej.
Iwan ijkón tlan yejwan okijtojkej yetos ken tlanextle
katlej tlawia ijtik tlatleyualotl asta ijkuak walanesi.
Iwan sitlale katlej kisa kualkan witz para amechtlawilis
ipan namoyolo.
\v 20 Pero moneki xikmatikan ke nochi tlan okijkuilojkej
in profetajtin, mach okiske de itech itlayejyekol akaj
tlakatl iwan nion mach tikmomakaj kuenta ika totlayejyekol.
\v 21 Porke in profetajtin mach okijkuilojkej yon tlajtole
san por yejwan okiyejyekojkej, sino in yonmej tlakaj
yolchipawakej otlajtojkej de itlajtol in Dios tlan Espíritu
Santo okinmilwiaya ma kijtokan.
\c 2
\s Tlamachtijkej katlej tekajkayajkej
\r (Judas 4-13)
\p
\v 1 Ya wejkawitl entre yejwan tlakaj de Israel oyekaj
profetajtin tekajkayajkej, iwan entre namejwan noijki
yeskej tlamachtijkej tekajkayajkej. Tlamachtiskej ichtaka
de tlan amo melawak iwan nochtin akinmej kineltokaskej,
moixpoloskej. Iwan yonmej tlamachtijkej asta kijtoskej
nik mach melawak in Jesucristo okinkoj ika ieso nijkuak
omikke itech krus. Pero Dios san niman kinmixpolos porke
yejwan innewian kimotetemiliaj yon tlajtlakole.
\v 2 Miekej kichiwaskej tlan yejwan kinmachtiskej tlan
mach kuale. Iwan por yonik miekej tlakaj tlapoaskej
biero de iojwi in toTajtzin Dios katlej melawak.
\v 3 Yonmej tlamachtijkej tekajkayajkej kinekiskej namotomin,
iwan por yonik amechkajkayawaskej ika tlajtole katlej
mach melawak. Pero Dios ya kinpialijtok se lugar desde
ya wejkawitl kan yejwan tlajyowiskej iwan mach welis
mopalewiskej nijkuak ajsis ora.
\p
\v 4 Dios mach okintlapojpolwij in angelestin katlej
otlajtlakojkej, sino okintlamotlak ijtik tliko iwan ompa
okintzakke ijtik tlatleyualotl, iwan ompa mochiaj asta
nekáj tonale nijkuak in Dios kinmixkomakas (kintzonmanas).
\v 5 Iwan Dios noijki mach okintlapojpolwij in tlakaj
katlej oyekaj ya wejkawitl, sino okititlanke se tlamawisolkiawatl
inpan nochtin tlakaj katlej mach kualtin. Iwan Dios
okimakixtij san yen Noé iwan oksekimej chikomen tlakajtin,
porke Noé okitematiltiayaj kenik se welis yetos chipawak
inawak Dios.
\v 6 Dios noijki okintlajyowiltij in tlakajtin mach
kualtin katlej ochantiaj itech weyikan de Sodoma iwan
itech weyikan de Gomorra, iwan okinmixpoloj ika tlitl
iwan omokaj sa puro tlikonextle. Dios ijkón okichij
para kinmakas se ejemplo in tlakaj katlej satepan mach
kinekiskej kineltokaskej in Dios.
\v 7 Pero Dios okimakixtij in Lot katlej oyeka kuale
tlakatl, katlej sa tekitl omotekipachoaya por yen tlakaj
mach kualtin katlej okichiwayaj san tlan okinekia intlalnakayo.
\v 8 Porke in Lot katlej oyeka kuale tlakatl, ochantia
inwan yonmej tlakaj mach kualtin, iwan yej okitaya iwan
okikakia nochi tlan amo kuale tlan yejwan okichiwayaj.
Iwan por yonik in Lot sa tekitl omoyolkokoaya ipan iyolo
chipawak nochi tonale.
\v 9 Por yonik tikmomakaj kuenta nik in Dios kimati
kenik kinmakixtis in tlakaj katlej motemaktiaj (motemaktiliaj)
inawak para ke in Amo Kuale Tlakatl amo ma kintokti
ma tlajtlakokan. Iwan Dios kimati kenamij kintlalis
se lado in tlakaj katlej mach kualtin asta ijkuak ajsis
ora para kinmixkomakas (kintzonmanas) iwan kintlajyowiltis.
\p
\v 10 Pero Dios okachi kintlajyowiltis in tlakaj katlej
mach kualtin katlej kichiwaj miek tlamantle biero ika
intlalnakayo iwan amo kitlakitaj itlanawatil in Dios.
Yonmej tlamachtijkej tekajkayajkej mach kimatij tlakakij
iwan kichiwaj san tlan yejwan kinekij, iwan mach momawtiaj
de kinwikaltiaj in espíritus katlej kipiaj miek tlanawatijkayotl
itech ilwikak.
\v 11 Pero in angelestin, katlej katej ixpan toTajtzin
Dios, maski kipiaj okachi miek chikawalistle iwan poder,
mach siera mixewiaj tlapoaj biero de yen espíritus katlej
kipiaj miek tlanawatijkayotl.
\p
\v 12 Pero yonmej tlamachtijkej tekajkayajkej katej
kej yolkamej katlej mach kipiaj intlalnamikilis. Porke
in yolkamej mach kimatij kiyejyekoaj tlan kichiwaj, yejwan
sanwel katej para se kinkitzkis iwan se kinmiktis. In
yonmej tlamachtijkej tekajkayajkej tlapoaj biero de
tlan yejwan mach kimomakaj kuenta, iwan por yonik yejwan
noijki mikiskej ken yolkamej.
\v 13 Yejwan kintlajyowiltiaj in oksekimej iwan por
yonik in Dios noijki kintlajyowiltis in yejwan. Yejwan
maski tonayan mopaktiaj itech tlajtlakole katlej kinmaka
pakilistle. Sa tekitl tepinatij tlan kichiwaj iwan biero
motaj nijkuak yawij itech namoilwiw, yejwan tlakuaj amowan
kej yeskia kualtin tlakaj pero pakij porke amechkajkayawaj.
\p
\v 14 Yejwan nijkuak kitaj se siwatl niman pewa kixelewiaj.
Mach keman kikawaj de tlajtlakoaj. Yejwan kinkajkayawaj
katlej mach ya kuale kineltokaj Dios para ma tlajtlakokan
noijki ken yejwan. Kiwelitaj tomin iwan kimatij kenik
kimoaxkatiskej tlan amo inmaxka. In yonmej tlakaj katlej
ijkón kichiwaj sa tekitl tlajyowiskej ijtik tliko.
\v 15 Yejwan yomopolojkej porke okikajkej in kuale ojtle.
Kichiwaj ijkón ken okichij in Balaam ikone in Beor, katlej
ya wejkawitl okiwelitaya kitlanis tomin ika tlan amo
kuale.
\v 16 Iwan iburra in Balaam otlajtoj iwan okajwak por
itlajtlakol, maski in burrojtin mach tlajtoaj. Pero in
Dios okitoktij ma tlajto in burra ijkón ken tejwan titlajtoaj,
iwan okilwij nik mach kuale tlan kichiwa. Iwan mach
okikawilij ma kichiwaj tlan yej okinekia kichiwani ika
ilokojyo.
\p
\v 17 Yonmej tekajkayajkej katej ken atekaltin katlej
mach kipiaj atl, iwan noijki katej ken mixtle katlej
mach kipia atl iwan kitki in ejekatl. Dios kintlalis
in yonmej tekajkayajkej kan sa tekitl tlatleyua iwan
ompa yeskej iktlanke (ik tlami).
\v 18 Yejwan moweyinekij nijkuak tlapoaj maski mach
itlaj ipatij tlan kijtaj. Tlakajkayawaj iwan kintlatlalwiaj
in tlakaj katlej ika miek trabajo yokikajkej in tlajtlakole.
Kintlatlalwiaj para ma kichiwakan tlan amo kuale tlan
kielewia intlalnakayo iwan kintlatlalwiaj ma kichijtinemikan
oksekin tlajtlakole.
\v 19 Yejwan kijtaj welis kinmakixtiskej in oksekimej
para amo ma ilpitokan itech tlan amo kuale, pero mach
welis porke yejwan noijki ilpitokej ijtik tlajtlakole.
Porke tla se tlakatl mach weli kikawa itlaj tlajtlakole,
tonses in yon tlajtlakole kijtosneki kinawatijtok in
yon tlakatl.
\v 20 Tla yejwan omomakixtijkej de itech tlan amo kuale
katlej kichiwaj in tlaltikpaktlakaj nijkuak okixmatkej
in toSeñor Jesucristo toTemakixtij, iwan satepan oksemi
omokuepkej iwan oksemi opéj kichijtinemij in yon tlajtlakole,
tonses kijtosneki mokuepaj okachi tlajtlakolejkej iwan
amo ken achtoj.
\v 21 Porke okachi kuale yetoskia tla amo kixmatinij
in kuale ojtle de toTajtzin Dios. Porke sa tekitl tlajtlakole
tla ya kixmatij in kuale ojtle iwan satepan kikawaj
iwan ayakmo kineltokaj itlanawatil in Dios katlej chipawak.
\v 22 Porke itech yejwan melawak mochiwa in tlajtole
katlej kijta: “In itzkuintle oksemi kikua itlakuepal.
In pitzotl maski ma kaltikan, oksemi kalaki ijtik akuitlatl.”
\c 3
\s ToSeñor Jesucristo witz oksemi
\p
\v 1 Notetlasojkaikniwan, yin yen ya ipan ojpa amatlajkuilole
katlej namechijkuililia. Iwan itech san ken omen amatlajkuiloltin
nikneki namechonyolojchikawas namejwan katlej ankipiaj
kuale namotlalnamikilis iwan namechelnamiktis de tlan
ya ankimatij.
\v 2 Porke nikneki xikelnamikikan tlan ya wejkawitl
okijtojkej in profetajtin yolchipawakej. Iwan noijki
xikelnamikikan de tlan toSeñor toTemakixtij otechnawatij
tejwan katlej tiitlatitlanilwan iwan satepan tejwan
noijki otamechilwijkej.
\p
\v 3 Nikneki kuale xikmatikan yin tlan namechilwis.
Itech sa iyakatlanka tonaltin yeskej tlakaj katlej san
ika wetzkaskej de nochi tlan tejwan tikneltokaj, iwan
kichiwaskej tlan amo kuale de tlan kineki intlalnakayo.
\v 4 Iwan amechilwiskej: “Namejwan ankijtaj nik in Cristo
okijtoj witz oksemi. ¿Kanin kaj kiné? In ya wejkawitl
toweyitajwan yomikkej, iwan nochi kajki ken achtoj desde
ijkuak omochij in tlaltikpak.”
\v 5 Pero yejwan mach kinekij kimomakaskej kuenta tlan
Dios okichij, porke ya wejkawitl ika itlajtol okichij
in ilwikak iwan tlaltikpak. In tlaltikpak opankiske
itech atl, iwan Dios okiseladojkixtij in atl para ma
yeto in tlaltikpak.
\v 6 Satepan, in tlaltikpak oapachiwik iwan oixpolikej
nochtin tlaltikpaktlakaj ika se tlamawisolkiawatl.
\v 7 Pero in ilwikak iwan tlaltikpak katlej axan katej
ika itlajtol in Dios kinkajtok para kinpojpolos ika
tlitl. Dios kinkajtok asta ma ajsi nekáj tonale nijkuak
kinmixkomakas in tlaltikpaktlakaj iwan kinmixpolos in
tlakaj katlej mach tlaneltokakej.
\p
\v 8 Noijki, notetlasojkaikniwan, amo xikelkawakan yin
tlan namechilwis. ToTajtzin Dios para Yej se tonale
kej yeskia se mil xiwitl, iwan se mil xiwitl kej yeskia
se tonale.
\v 9 ToTajtzin Dios mach yokelkaj para kichiwas tlan
yotechilwij, ken sekimej kijtaj, sino Yej ok kinmakatok
ok kanaj keski tonale para ma moyolkuepakan in tlajtlakolejkej.
Dios mach kineki ma mopolo nion se tlaltikpaktlakatl.
\p
\v 10 Pero itech nekáj tonale nijkuak witz in toSeñor,
witz ijkón ken nijkuak se ichtekke mach akaj kimati
keman witz. Ijkuakón ilwikak pojpoliwis ika se tlatikuinalistle
chikawak, iwan nochi tlan onkaj itech, tlatlas ika tlitl.
In tlaltikpak iwan nochi tlamantle katlej okichijkej
in tlakaj itech, nochi pojpoliwis ika tlitl.
\p
\v 11 Iwan komo ya ankimatij nik in Dios ijkón nik kipojpolos
nochi tlan onkaj, tonses moneki okachi xichipawkanemikan
iwan okachi ximotemaktikan (ximotemaktilikan) inawak
Dios.
\v 12 Xikchiakan nekáj tonale nijkuak witz in toTajtzin
Dios. Iwan xikchiwakan nochi ken Dios kineki para niman
ma ajsi in yon tonale iwan ayakmo ma wejkawa. Itech
nekáj tonale in ilwikak tlatlas ika tlitl iwan nochi
tlan onkaj itech patis porke yetos sa tekitl totonik.
\v 13 Pero tejwan tikchiaj tlan Dios yotechilwij, tikchiaj
se yankuik ilwikak iwan se yankuik tlaltikpak kan nochtin
kichiwaskej tlan Dios kineki.
\p
\v 14 Por yonik, notetlasojkaikniwan, mientras ankichiaj
ma pano yon tlamantle, xikchiwakan de amo antlajtlakoskej
para amo amechistlakawiskej de itlaj ixpan Dios. Xiekan
ika kuale se iwan oksé para ijkón Dios pakis amonawak
nijkuak Yej witz.
\v 15 Iwan xikmatikan nik in toSeñor mach ya ejko porke
Yej ok kichia ma momakixtikan in tlakaj de intlajtlakol.
In totetlasojkaikni Pablo noijki yoamechtlajkuililij
de yin tlamantle ika ixtlamachilistle katlej Dios okimakak.
\v 16 Itech kada se iamatlajkuilol yej yoamechtlapowij
de yon tlamantle, maski sekin sa tekitl owij para se
kimomakas kuenta, iwan sekimej katlej amo momachtiaj
itlajtol in Dios iwan amo moyekketokej itech intlaneltokalis,
kipatlaj itlajtol in Pablo iwan noijki kipatlaj oksekin
tlajtole katlej kajki itech tiotlajkuilole. Iwan ijkón
yejwan innewian mopoloaj iktlanke (ik tlami).
\p
\v 17 Por yonik, notetlasojkaikniwan, komo ya ankimatij
yon tlamantle, moneki ximotlachilikan iwan amo xikinkawilikan
nekatej tlamachtijkej mach kualtin ma amechkajkayawakan
ika intlamachtil iwan amo xikpolokan namotlaneltokalis.
\v 18 Sino namejwan moneki okachi xikixmatikan in toSeñor
Jesucristo toTemakixtij, iwan ximoskaltikan okachi itech
itlasojtlalis. Moneki ma tikweyikixtikan axan iwan nochipa.
Ijkón ma yeto.