\id 2JN
\h 2 Juan
\toc1 2 Juan
\mt SAN JUAN ITLATITLANIL IN DIOS IPAN OJPA OKIJKUILOJ YIN AMATLAJKUILOLE
\c 1
\s Ma timotlasojtlakan se iwan oksé
\p
\v 1 Nej, nitetajtzin, katlej nitlayekanke de yejwan katlej
kineltokaj in toSeñor Jesucristo, nikijkuiloa yin amatlajkuilole
para tejwatzin siwatl katlej Dios omitzpejpenke, iwan
noijki para mokonewan. Nej namechtlasojtla, iwan amo
san yen nej, sino noijki amechtlasojtlaj nochtin katlej
yokixmatkej itlajtol in Dios katlej melawak.
\v 2 Tejwan tamechtlasojtlaj porke tikpiaj tlan melawak
ipan toyolo, iwan tikpiaskej para iktlanke (ik tlami).
\v 3 ToPapan Dios iwan toSeñor Jesucristo, iKone in toPapan
Dios, ma techmakakan intlatiochiwalis, inteiknotlamachilis
iwan inyolosewilis, porke tikixmatij tlan melawak iwan
timotlasojtlaj se iwan oksé.
\p
\v 4 Nikpia miek pakilistle porke onikmatke nik sekimej
de mokonewan kichiwaj tlan kijta itlajtol in Dios katlej
melawak, ijkón ken toPapan Dios otechnawatij ma tikchiwakan.
\v 5 Iwan axan, tej nokni siwatl, nimitztlatlawtia ma
timotlasojtlakan tinochtin. Yin tlan nimitzijkuililia
mach se yankuik tlanawatile, sino san yen tlanawatile
katlej ya tikpiaj desde ijkuak opéj tikneltokaj in Cristo.
\v 6 Tla timotlasojtlaj, kijtosneki tikchijtokej nochi
tlan Dios technawatijtok. Iwan tlan Dios technawatijtok,
yen yin: ma timotlasojtlakan, ijkón ken otechilwij desde
ijkuak opéj tikneltokaj in Cristo.
\s Nemij miekej tekajkayajkej
\p
\v 7 Porke nemij miekej tekajkayajkej ixko yin tlaltikpak
katlej kijtaj ke Jesucristo mach owitza ixko yin tlaltikpak
ika itlalnakayo ken tejwan. Akin ijkón kijta, kijtosneki
tekajkayaj iwan kineki kipojpolos tlan kichiwa in Cristo.
\v 8 Xikpiakan kuidado, para amo ma amechkajkayawakan
iwan para amo xikpolokan namotlaxtlawil por ankitekipanoaj
in toTajtzin Dios. Xikpiakan kuidado iwan Dios amechmakas
ajsitok namotlaxtlawil.
\p
\v 9 Tla akaj kineltoka itlaj oksé tlamachtile iwan
ayakmo kineltoka in tlamachtile de Cristo, kijtosneki
mach kipia in Dios ipan iyolo. Pero tla akaj kineltoka
in tlamachtile de Cristo, kijtosneki kipia in Dios iwan
iKone ipan iyolo.
\v 10 Tla akaj tlamachtij witz amonawak iwan amo amechmachtia
ika Cristo itlamachtil, amo xikkalakikan namokalijtik
iwan nion amo xikilwikan: “Xiwalmuika tejwatzin.”
\v 11 Porke akin ijkón kilwis, kijtosneki in yej noijki
kajki de akuerdo itech tlan amo kuale tlan yej kichiwa.
\s Juan okoninyolopachoj
\p
\v 12 Nikpia miek tlan nikneki namechilwis, pero mach
nikneki nikijkuilos itech yin amatlajkuilole. Porke
nikneki nias namechitati iwan nikneki namechtlapowis,
para ijkón tikpiaskej miek pakilistle.
\p
\v 13 Mitzontlajpaloaj ipilwan in mokni siwatl katlej
Dios noijki okinpejpenke. Ijkón ma yeto.