\id 3JN
\h 3 Juan
\toc1 3 Juan
\mt SAN JUAN ITLATITLANIL IN DIOS YA EYI BUELTA OKIJKUILOJ YIN AMATLAJKUILOLE
\c 1
\s Kuale tlapoaj de Gayo
\p
\v 1 Nej, nitetajtzin, katlej nitlayekanke de yejwan katlej
kineltokaj in toSeñor Jesucristo, nikijkuiloa yin amatlajkuilole
para tejwatzin, Gayo, katlej nej ipan melajka nimitztlasojtla.
\p
\v 2 Notetlasojkaikni, nimotiotzajtzilia inawak Dios
por tej. Niktlajtlanilia in toTajtzin Dios xieto ika
kuale itech nochi tlamantle, iwan xichikawato, ijkón ken
moanima kajki kuale inawak Dios.
\v 3 Onikpixke miek pakilistle nijkuak owalajkej sekimej
tokniwan iwan onechilwijkej nik tiktlakita tlan kijta
itlajtol in Dios katlej melawak, iwan nik tikchiwa ijkón
ken tlan kijta yon tlan melawak.
\v 4 Mach onkaj itlaj oksé katlej okachi ma nechpakti,
sino san yen nijkuak nikkaki nik nokonewan kichiwaj
ijkón ken techilwia in Dios itlajtol katlej melawak.
\p
\v 5 Notetlasojkaikni, sa tekitl kuale tlan tikchiwa
porke tikinpalewia in tokniwan maski sekimej mach tikinmixmati
katlej witzej de oksekan.
\v 6 Nian ijtik tiopan iwan inmixpan nochtin tokniwan
tlaneltokakej, yejwan okijtojkej de kenik tikinpalewia
ika miek tlasojtlalistle. Nimitztlatlawtia, xikinpalewi
nijkuak oksemi yaskej ipan inmojwi para amitlaj ma kinpolo
ipan ojtle, xikinpalewi ijkón ken Dios kipaktia.
\v 7 Porke yejwan okiskej para kitekipanoskej in toSeñor
Jesucristo, iwan yejwan mach kiresibiroaj itlaj tlapalewile
de oksekimej katlej mach kixmatij Dios.
\v 8 Por yonik moneki tejwan tikinpalewiskej ika tlan
yejwan kinpoloa. Para ijkón tejwan noijki tisepantekipanoskej
inwan, tikinpalewijtoskej para ma kitematiltikan itlajtol
in Dios katlej melawak.
\s Diótrefes mach kuale iyelis
\p
\v 9 Nej onikijkuiloj se amatlajkuilole para yen tokniwan
tiopantlaneltokakej, pero Diótrefes kineki yen tlayekantos
de entre namejwan, iwan mach kineki techkakilis tlan
tikilwiaj.
\v 10 Por yonik, nijkuak nej nias ompa, namechilwis tlan
biero kichijtok. Nechistlakawijtinemi ika tlan amo melawak
iwan tlapojtinemi biero de nej. Iwan amo san yon, sino
noijki mach kineki kinresibiros in tokniwan katlej ompa
ajsij. Iwan akinmej kinekij kinresibiroskej in tokniwan,
yej mach kinkawilia, iwan asta kinkixtia iktlanke (ik
tlami) de itech tiopan.
\p
\v 11 Notetlasojkaikni, amo xikchiwa tlan amo kuale ken
kichiwaj in tlakaj katlej mach kualtin, sino xikchiwa
tlan kuale ijkón ken kichiwaj in tlakaj katlej kualtin.
Akin kichiwa tlan kuale kijtosneki tekone de Dios, pero
akin kichiwa tlan amo kuale kijtosneki mach kixmati
in Dios.
\s Ichipawkanemilis in Demetrio
\p
\v 12 Nochtin kijtaj nik kuale chipawkanemi in Demetrio,
iwan nochtin kimatij ke tlan kijta iwan tlan kichiwa
melawak. Tejwan noijki kuale tikmatij nik kuale chipawkanemi
iwan namejwan noijki ankimatij nik melawak tlan tikijtaj.
\s Juan okoninyolopachoj
\p
\v 13 Nikpia miek tlan nikneki nimitzilwis, pero amo
nikneki nikijkuilos nochi itech yin amatlajkuilole.
\v 14 Porke nikneki nias nimitzitati san niman, iwan
ijkuakón kemaj welis timotlapowiskej.
\p
\v 15 Ma Dios mitzmaka yolosewilistle ipan moyolo. Motetlasojkaikniwan
katlej nian katej mitzontlajpaloaj. Nimitzontlatlawtia
noijki xinechonintlajpalili nochtin totetlasojkaikniwan
katlej ompa katej.