\id REV
\h Apocalipsis
\toc1 Apocalipsis
\mt JESUCRISTO OKITITIJ IN SAN JUAN TLAN SATEPAN TLAPANOS
\c 1
\s Tlan Jesucristo okititij in Juan
\p
\v 1 Itech yin tiotlajkuilole nikijta tlan Jesucristo
onechititij katlej mach ok wejkawitl para tlapanos.
Dios okimakak in Jesucristo yin tlamantle para ma techititi
in tejwan tiitekipanojkawan. Iwan Jesucristo onechwaltitlanilij
se iángel para ma nechititiki yin tlamantle. Nej niJuan
niktekipanoa in toTajtzin Dios.
\v 2 Nej namechilwia nochi tlan melawak de tlan onikitak
iwan tlan Jesucristo onechilwij de itlajtol in Dios.
\p
\v 3 Ma paki akin kileroa yin tlajtole de tlan satepan
tlapanos, iwan ma paki akin kikaki iwan kichiwa nochi
tlan nian ijkuilitok. Porke ya ajsitiwitz in tonale.
\s Juan okintlajkuililij in tokniwan tlaneltokakej de itech chikomen tiopanmej
\p
\v 4 Nej niJuan, namechtlajkuililia namejwan antlaneltokakej
de itech chikomen tiopanmej katlej ankatej itech estado
de Asia. Ma Dios amechtiochiwa iwan ma amechmaka yolosewilistle.
Jesucristo yen katlej achtoj yoyeka, yen katlej axan
onkaj, iwan yen katlej satepan witz. Iwan chikome espíritus
noijki ma amechtiochiwakan iwan ma amechmakakan yolosewilistle,
katlej katej iyakapan Dios kan tlanawatia.
\v 5 Noijki Jesucristo ma amechtiochiwa iwan ma amechmaka
yolosewilistle katlej inawak tiktlaliaj nochi totlaneltokalis
itech nochi tlan kijta, katlej omikke porke okijtoj tlan
melawak. Yen katlej achtoj omoyolkuik satepan de omikke
iwan mach oksemi mikis, iwan yen kinnawatia nochtin in
tlatlanawatijkej de ixko yin tlaltikpak. Jesucristo
techtlasojtla iwan ika ieso yotechchipawilij toyolo
de nochi totlajtlakol.
\v 6 Yej otechmakak poder para tieskej kej titlanawatijkej,
iwan para tiktekipanoskej iPapan in toSeñor Jesucristo
kej titiopixkej. In weyikixtilistle iwan poder ma yeto
nochipa iaxka. Ijkón ma yeto.
\p
\v 7 Xikitakan, Cristo witz ijtik mixtle. Nochtin in
tlakaj kitaskej, iwan noijki kitaskej nekatej tlakaj
katlej okikestzopitijkej. Iwan nochtin in tlaltikpaktlakaj
chokaskej nijkuak kitaskej. Melawak, ijkón tlamochiwas.
\p
\v 8 “Nej niachtoj iwan Nej niitlamian de nochi tlamantle,
ijkón ken abecedario pewa ika A iwan tlami ika Z”, ijkón
kijta in toSeñor, katlej kipia nochi poder, katlej achtoj
yoyeka, katlej axan onkaj, iwan katlej satepan witz.
\s Juan okitak in Cristo itech imawisotlanex
\p
\v 9 Nej namokni Juan, nej noijki nitlajyowia ken namejwan
por yen toSeñor Jesucristo. Iwan nej, noijki ken namejwan,
nikchia ika yolchikawalistle katlej nechmaka in Jesucristo,
nik se tonale tieskej ompa kan Dios tlanawatia. Nej
onieka ipan se tlale katlej pankistok itech atl itoka
Patmos. Ompa onechkawatoj katlej kikokoliaj in toTajtzin
Dios porke nej onikintlapowiaya in tlakaj de itlajtol
in Dios iwan onikinmatiltiaya de tlan nikmati de Jesucristo.
\v 10 Itech se tonale domingo, in Espíritu Santo onikmachilij
owalaj notech, iwan onikakke ik nokuitlapan se tlajtole
chikawak kej se tlapitzalistle.
\v 11 Onechilwij:
\p ―Nej niachtoj iwan Nej niitlamian de nochi tlamantle,
ijkón ken abecedario pewa ika A iwan tlami ika Z. Xikijkuilo
tlan tikita, iwan tlan tikijkuilos xikintitlanili in
tlaneltokakej katlej katej itech nekatej chikomen tiopanmej
de estado de Asia, kijtosneki katlej katej itech weyikan
de Éfeso, itech weyikan de Esmirna, itech weyikan de Pérgamo,
itech weyikan de Tiatira, itech weyikan de Sardis, itech
weyikan de Filadelfia iwan itech weyikan de Laodicea.
\p
\v 12 Nej onimokuepke para nikitas akin nechtlapowia,
iwan nijkuak onimokuepke, onikitak chikome kandelerojtin
de oro,
\v 13 iwan tlatlajko de yen yonmej chikome kandelerojtin,
onikitak yen katlej omochij tlakatl, otzotzolejtoka ika
itzotzol weyak asta itech ikxiwan, iwan okipiaya se itlajkoilpika
de oro patlawak asta ielpan.
\v 14 Itzonkal oyeka istak ken ichkatl istak, o noso
istak ken tesiwitl, iwan ixtololowan oxotlatokaj ken
tlitl.
\v 15 Ikxiwan opetlaniaj ken tepostle de bronce kostik
ken nijkuak kipatiltiaj ijtik tlitl. Iwan itlajtol omokakia
chikawak ken nijkuak kukuyokaj miekej weyamej.
\v 16 Itech iyekma okinpiaya chikome sitlaltin, iwan
de ijtik itenko okisaya se espada de ojkan itlatekia.
Ixko sa tekitl opetlania ken tonale nijkuak chikawak
petlani.
\p
\v 17 Nijkuak onikitak, oniwetzito ikxitlan kej nimikkatl.
Pero Yej okitlalij iyekma nopan iwan onechilwij:
\p ―Amo ximomawti. Nej niachtoj iwan Nej niitlamian de
nochi tlamantle,
\v 18 Nej katlej niyolitok. Nej onimikka, pero axan niyolitok
iwan mach ok keman nimikis. Nej nikinpixtok in yabejtin
para welis niktlapos o noso niktzakuas in puerta de
yen mikilistle iwan de yen puerta kan katej in animajtin
katlej yomikkej.
\v 19 Xikijkuilo kiné, nochi tlan yotikitak, tlan axan
tlamochiwa, iwan tlan satepan tlamochiwas.
\v 20 Axan nimitzilwis katlej mach akaj kimati tlan
kijtosneki in chikome sitlaltin katlej otikinmitak itech
noyekma, iwan de yen chikome kandelerojtin de oro. In
chikome sitlaltin kijtosneki yen tlayekankej katlej
kinmonekuitlawiaj in chikome tiopanmej. Iwan in chikome
kandelerojtin kijtosneki yen chikome tiopanmej.
\c 2
\s Kintlajkuililiaj in tiopantlaneltokakej katlej katej itech weyikan de Éfeso
\p
\v 1 ’Xiktlajkuilili in tlayekanke de yen tiopan katlej
kajki itech weyikan de Éfeso iwan ijkín xikilwi: “Ijkín
kijta katlej kinpia chikome sitlaltin itech iyekma, iwan
nemi tlatlajko de yen chikome kandelerojtin de oro:
\v 2 Nej nikmati nochi tlan tikchiwa, iwan kenik titekipanoa
chikawak iwan tikxikoa nochi tlan tipanoa. Iwan nikmati
nik mach tikinxikoa in tlakaj katlej mach kualtin, iwan
tikinyejyekoa katlej kijtaj nik yejwan tlatitlaniltin
de Dios iwan mach melawak, iwan tikmomaka kuenta nik
san tekajkayajkej.
\v 3 Nikmati nik titlajyowia iwan tikxikoa nochi tlan
tipanoa, iwan titekipanoa chikawak por Nej iwan mach
timosotlawa.
\v 4 Pero nikpia se tlamantle katlej moneki nimitzilwis.
Mach ok tinechtlasojtla ken achtoj otinechtlasojtlaya.
\v 5 Por yonik, xikelnamiki kenik otinechtlasojtlaya
in achtoj, iwan ximoyolkuepa iwan xikchiwa ken achtoj
otikchiwaya. Tla amo ijkón tikchiwas, niwitz iwan nimitzkixtilis
mokandelero de Éfeso kan katej in tiopantlaneltokakej,
tla amo timoyolkuepas.
\v 6 Pero onkaj se tlamantle katlej kuale tikchiwa:
mach tikwelita tlan kichiwaj in nicolaítas, ijkón ken
Nej noijki mach nikwelita tlan kichiwaj.
\v 7 Akin kineki kimomakas kuenta, ma kikaki tlan iEspíritu
in toTajtzin Dios kinmilwia in tiopantlaneltokakej.
Akinmej tlatlaniskej, Nej nikinmakas ma kikuakan itlakilo
in tlatokkuawitl katlej kitemaka nemilistle, katlej kajki
kan paraíso kan sa tekitl tlakualkan, kan kajki in toTajtzin
Dios.”
\s Kintlajkuililiaj in tiopantlaneltokakej katlej katej itech weyikan de Esmirna
\p
\v 8 ’Xiktlajkuilili noijki in tlayekanke de yen tiopan
katlej kajki itech weyikan de Esmirna iwan ijkín xikilwi:
“Ijkín kijta katlej yen achtoj iwan yen itlamian de
nochi tlamantle, katlej omikka iwan oksemi omoyolkuik:
\v 9 Nej nikmati nochi tlan tikchiwa, nochi in tlajyowilistle
katlej tipanoa, iwan nikmati nik tipobre maski melawak
tiriko inawak Dios. Iwan nikmati nik sa tekitl tlapoaj
mach kuale de tej katlej motenewaj judiojtin, o noso
ikonewan Dios, iwan mach melawak sino yejwan katej kej
se grupo de itekipanojkawan in Satanás.
\v 10 Amo ximomawti de tlan tipanos. Porke in diablo
kintzakuas telpiloyan sekimej de amejwan para amechyejyekos,
iwan antlajyowiskej majtlaktle tonale. Pero xitlaneltokato
nonawak asta ijkuak timikis, iwan Nej nimitzmakas kej
tlaxtlawile in yankuik nemilistle katlej mach keman
tlamis.
\v 11 Akin kineki kimomakas kuenta, ma kikaki tlan iEspíritu
in toTajtzin Dios kinmilwia in tiopantlaneltokakej.
Akinmej tlatlaniskej mach ojpa mikiskej, kijtosneki mach
yaskej ijtik tliko kan mach keman sewis in tlitl.”
\s Kintlajkuililiaj in tiopantlaneltokakej katlej katej itech weyikan de Pérgamo
\p
\v 12 ’Xiktlajkuilili noijki in tlayekanke de yen tiopan
katlej kajki itech weyikan de Pérgamo iwan ijkín xikilwi:
“Ijkín kijta katlej kipia iespada de ojkan itlatekia:
\v 13 Nej nikmati nochi tlan tikchiwa iwan nikmati kan
tichanti. Tichanti kan Satanás tlanawatia, pero maski
ompa tichanti, tej ok titlaneltokatok nonawak. Maski
okimiktijkej in Antipas katlej otetlapowiaya de Nej,
ompa kan chanti Satanás, tej mach keman otinechkaj.
\v 14 Pero nikpia kanaj keski tlajtole katlej moneki
nimitzilwis. Ompa mowan katej sekimej katlej kichiwaj
tlan kijta itlamachtil in Balaam. Porke in Balaam okimachtij
in Balac kenamij kichiwas para ma tlajtlakokan in tlakaj
de Israel. Okinmilwij ma kikuakan in tlamanale katlej
kinmanilia in santojtin iwan ma momekatikan.
\v 15 Noijki ompa mowan katej sekimej katlej kichiwaj
tlan kijta intlamachtil in nicolaítas, katlej Nej mach
nikwelita.
\v 16 Por yonik, ximoyolkuepa porke tla amo timoyolkuepas,
niwitz iwan nikinmagas (nikinmakas) ika noespada katlej
kisa de ijtik noten.
\v 17 Akin kineki kimomakas kuenta, ma kikaki tlan iEspíritu
in toTajtzin Dios kinmilwia in tiopantlaneltokakej.
Akin tlatlanis, nikmakas ma kikua in tlakuale itoka maná
katlej tlatitok ilwikak. Iwan noijki nikmakas se tetzintle
istak kan ijkuilitos se yankuik tokayitl (tokayotl)
katlej mach akaj kixmatis, sino san yen akin kiresibiros.”
\s Kintlajkuililiaj in tiopantlaneltokakej katlej katej itech weyikan de Tiatira
\p
\v 18 ’Xiktlajkuilili noijki in tlayekanke de yen tiopan
katlej kajki itech weyikan de Tiatira iwan ijkín xikilwi:
“Ijkín kijta iKone in Dios, katlej kinpia ixtololowan
katlej xotlatokej ken tlitl iwan kinpia ikxiwan petlantokej
ken tepostle bronce:
\v 19 Nej nikmati nochi tlan tikchiwa. Nikixmati motlasojtlalis,
motlaneltokalis, motekitilis inawak Dios iwan noijki
nikmati nik tikxikoa tlan tipanoa. Noijki nikmati nik
axan okachi titekipanoa iwan amo ken achtoj.
\v 20 Pero nikpia se tlajtole katlej moneki nimitzilwis.
In siwatl Jezabel katlej motenewa profeta, tikkawilia
ma kinmachti notekipanojkawan. Kinmachtia ma momekatikan
iwan ma kikuakan in tlamanale katlej kinmaniliaj in
santojtin.
\v 21 Yon siwatl Nej yonikmakak tiempo para ma moyolkuepa
para ayakmo ma kinmomekati in tlakaj, pero mach tlakaki.
\v 22 Por yonik, in yon siwatl niktoktis ma mokoko chikawak
asta ma sa weto ipan itlapech, iwan noijki akinmej kinmomekatia
noijki nikintoktis ma mokokokan iwan ma tlajyowikan
miek tla amo kikawaskej yon tlajtlakole katlej kichiwaj
ken yon siwatl kichiwa.
\v 23 Iwan ikonewan in yon siwatl nikinmiktis. Ijkón,
nochtin in tiopantlaneltokakej kimomakaskej kuenta nik
in Nej nochi kuale nikmati tlanon kiyejyekoaj in tlakaj
ipan intlalnamikilis iwan ipan inyolo. Iwan kada se
de amejwan namechmakas según tlan ankichijkej.
\v 24 Pero namejwan katlej ankatej ompa Tiatira, katlej
mach ankitlakitaj yon tlamachtile iwan mach ankixmatij
tlan yejwan kitenewaj weyi tlamachtile de Satanás katlej
miekej mach kimatij, para amejwan mach itlaj oksé tlamantle
namechnawatia.
\v 25 Pero xikneltokatokan in tlamachtile katlej ya
ankimatij asta ijkuak oksemi niwitz.
\v 26 Akinmej tlatlaniskej iwan kichijtoskej tlan Nej
nikneki asta ijkuak mikiskej, Nej nikintlalis yejwan
ma tlanawatikan itech nochtin in paismej
\v 27 ijkón ken noPapan onechtlalij ma nitlanawati.
Iwan ika se vara de tepostle ken ivara in tekiwaj ika
kintlajtlamiskej in paismej, kej yeskia kintlajtlapanaskej
xoktzinmej.
\v 28 Nej nikpalewis akin tlatlanis para ma yeto nowan
nijkuak niwitz, porke Nej nikaj ken sitlale katlej kisa
kualkan.
\v 29 Akin kineki kimomakas kuenta, ma kikaki tlan iEspíritu
in toTajtzin Dios kinmilwia in tiopantlaneltokakej.”
\c 3
\s Kintlajkuililiaj in tiopantlaneltokakej katlej katej itech weyikan de Sardis
\p
\v 1 ’Xiktlajkuilili noijki in tlayekanke de yen tiopan
katlej kajki itech weyikan de Sardis iwan ijkín xikilwi:
“Ijkín kijta katlej kinpia chikome Espíritus de Dios
iwan chikome sitlaltin: Nej nikmati nochi tlan tikchiwa,
iwan nikmati nik miekej kijtaj tikpia nemilistle inawak
Dios pero amo melawak, sino tikaj kej timikkatl.
\v 2 Xiijsato, iwan xikchikajto katlej ok tikpixtok katlej
ya ixpolitok. Porke nikita mach kuale tlan tikchijtok
inawak Dios.
\v 3 Por yonik, xikelnamiki tlan omitzmachtijkej iwan
tlan otikakke. Xikchiwa iwan ximoyolkuepa. Porke tla
amo tiijsatos, niwitz kej se ichtekke iwan mach tikmomakas
kuenta tlan ora noonkisaki.
\v 4 Pero tikinpixtok ompa Sardis sekimej katlej mach
ya kisokiotia innemilis ika tlajtlakole. Yejwan nowan
nemiskej ika intlaken istak, porke yejwan okichijkej
tlan omonekia kichiwanij.
\v 5 Akinmej tlatlaniskej, tlakentitoskej de istak, iwan
mach nikintokayopolos de itech libro kan ijkuilitok
intoka nochtin akinmej kipiaj yankuik nemilistle katlej
mach keman tlamis, sino nikinteixmachtis (nikinteititis)
ixpan noPapan iwan inmixpan iangelwan.
\v 6 Akin kineki kimomakas kuenta, ma kikaki tlan iEspíritu
in toTajtzin Dios kinmilwia in tiopantlaneltokakej.”
\s Kintlajkuililiaj in tiopantlaneltokakej katlej katej itech weyikan de Filadelfia
\p
\v 7 ’Xiktlajkuilili noijki in tlayekanke de yen tiopan
katlej kajki itech weyikan de Filadelfia iwan ijkín
xikilwi: “Ijkín kijta katlej yolchipawak iwan yolmelawak,
katlej kipia in yabe de yen rey David, katlej kipia poder
para tlatlapos o noso tlatzakuas kan Yej tlanawatia.
Nijkuak Yej tlatlapoa mach akaj weli kitzakua. Iwan
nijkuak Yej tlatzakua mach akaj weli tlatlapoa:
\v 8 Nej nikmati nochi tlan tikchiwa. Nej yonimitztlapolij
se puerta katlej mach akaj welis kitzakuas. Maski mach
tichikawak, tej tikchiwa tlan kijta notlajtol, iwan mach
keman tikijta mach tinechixmati.
\v 9 Ijkón kiné, in tlakaj katlej mach kualtin katlej
powij iwan Satanás, katlej motenewaj judiojtin o noso
ikonewan in Dios, katlej san tekajkayajkej, Nej nikchiwas
ma motlankuaketzakan mokxitlan, para ma kimatikan nik
Nej nimitztlasojtla.
\v 10 Iwan komo tikchiwa tlan kijta notlajtol iwan tikxikoa
ika tlajyowilistle, por yonik Nej nimitzpalewis para
amo ma mitzajsi itech nekáj ora in tlajyowilistle katlej
witz itech nochi in tlaltikpak, para nikinyejyekos nochtin
in tlaltikpaktlakaj.
\v 11 Niwitz san niman. Xikneltokato nochipa notlajtol,
para amakaj ma mitzkixtili motlaxtlawil katlej mitztokaroa.
\v 12 Akinmej tlatlaniskej, Nej nikchiwas yejwan ma yekan
kej pilartin itech itiopan noDios, iwan mach ok keman
kisaskej de ompa. Iwan inpan nikijkuilos itoka in noDios
iwan itoka iweyikan noDios, katlej yankuik Jerusalén
katlej waltemos de ilwikak kan kajki noDios. Iwan noijki
inpan nikijkuilos in yankuik notoka.
\v 13 Akin kineki kimomakas kuenta, ma kikaki tlan iEspíritu
in toTajtzin Dios kinmilwia in tiopantlaneltokakej.”
\s Kintlajkuililiaj in tiopantlaneltokakej katlej katej itech weyikan de Laodicea
\p
\v 14 ’Xiktlajkuilili noijki in tlayekanke de yen tiopan
katlej kajki itech weyikan de Laodicea iwan ijkín xikilwi:
“Ijkín kijta katlej kisentlalia itlajtol, katlej kijta
tlan melawak de Dios, iwan por Yej, in Dios okichij nochi
tlan onkaj:
\v 15 Nej nikmati nochi tlan tikchiwa. Nikmati nik mach
tisesek iwan nion mach titotonik. Okachi kuale tla tieni
tisesek o noso titotonik.
\v 16 Pero komo san tiyamankatotonik, iwan amo tisesek
nimpor amo titotonik, tonses Nej nimitzkixtis de nonawak
ken nijkuak nikixtia notlakuepal de ijtik noten porke
tej san tiyamankatotonik.
\v 17 Porke tej tikijta tiriko, iwan tikijta mach itlaj
mitzpoloa. Pero mach tikmomaka kuenta nik ixpan Dios
in tej tipobre, mach itlaj tikpia, tiktemaka lástima, mach
titlachia iwan tixitlatztik.
\v 18 Por yonik, Nej nimitzilwia xikkowa nonawak oro
katlej yokichipajkej ijtik tlitl iwan ya chipawak para
ijkón melawak xieto tiriko. Iwan nonawak xikkowa tzotzole
istak para ximotzotzolti para ayakmo xipinawa por tixitlatztik.
Iwan noijki nonawak xikkowa pajtle para moixtololowan
para kuale xitlachia.
\v 19 Nej nikinmajwa iwan nikinkastigaroa akinmej nikintlasojtla.
Ijkón kiné, xinechtlakita ika nochi moyolo iwan ximoyolkuepa.
\v 20 Xikkaki. Nej nikaj kan puerta nitlatatalatok.
Tla akaj kikakis notlajtol iwan kitlapos in puerta, Nej
nikalakis iwan nitlakuas iwan, iwan yej noijki tlakuas
nowan.
\v 21 Akinmej tlatlaniskej, Nej nikinkawilis nowan ma
motlalikan kan nitlanawatia, ijkón ken Nej onitlatlanke
iwan onimotlalij iwan noPapan kan Yej tlanawatia.
\v 22 Akin kineki kimomakas kuenta, ma kikaki tlan iEspíritu
in toTajtzin Dios kinmilwia in tiopantlaneltokakej.”
\c 4
\s Kiweyikixtiaj in toTajtzin Dios ompa ilwikak
\p
\v 1 Satepan de yin, onikitak se puerta tlapotok ompa
ilwikak. Iwan nekáj chikawak tlajtole kej tlapitzalistle,
katlej achtoj onechtlapowij, onechilwij:
\p ―Xiwaltlejko nian, iwan nimitzititis nochi tlan tlapanos
satepan.
\p
\v 2 Ijkuakón in Espíritu Santo onikmachilij owalaj
notech, iwan onikitak se siya ompa ilwikak, iwan itech
yon siya onikitak akaj ompa ewatok.
\v 3 Iwan katlej oewatoka itech yon siya omotaya kej
se tetl petlantok itoka jaspe o noso cornalina. Iwan
siya kiyawalojtok se akosamalotl, katlej opetlania kej
se tetl itoka esmeralda.
\v 4 Yon siya noijki okiyawalojtokaj oksekimej senpoale
iwan nawi siyajtin, iwan itech yonmej siyajtin oewatokaj
senpoale iwan nawi tetajtzitzintin, otlakentitokaj de
istak iwan okipiayaj itech intzontekon se korona de
oro.
\v 5 Iwan kan kajki yon siya okisaya miek tlapejpetlanalistle,
otlakukuyokaya iwan otlatijtikuinia. Iwan iyakapan siya
otlikuitokaj chikome tlanextin, kijtosneki yen chikome
espíritus de Dios.
\v 6 Iyakapan siya noijki oyeka itlaj kej se mar sa
tekitl chipawak kej teskatl asta pepetlani.
\p Tlatlajko iwan ik iyawalojkan yon siya, oyekaj nawin
katlej yolitokej katlej otentokaj de ixtololomej ik
inyakapan iwan ik inkuitlapan.
\v 7 Se katlej yolitok omotaya kej se lión, oksé omotaya
kej se toro, oksé okipiaya ixko kej se tlakatl, iwan oksé
omotaya kej se kuixin (águila) patlantok.
\v 8 Nochtin yonmej nawin katlej yolitokej okinpiayaj
chikuasen inmajaswan kada se, iwan ik tlixko iwan ik
tlijtik okinpiayaj miekej ixtololomej. Tonayan iwan
yuak mach omosewiayaj de okijtoayaj:
\q Santo, Santo, Santo,
\q Señor, Dios katlej kipia nochi poder,
\q katlej achtoj yoyeka, katlej axan onkaj iwan katlej
satepan witz.
\p
\v 9 Iwan nijkuak in yonmej katlej yolitokej okimakayaj
weyikixtilistle, tetlakitalistle iwan tlasojkamachilistle,
katlej ewatok ipan isiya, katlej yolitok iktlanke (ik
tlami),
\v 10 in senpoale iwan nawi tetajtzitzintin omotlankuaketzayaj
iyakapan katlej ewatok ipan isiya, iwan okiweyikixtiayaj
katlej yolitok iktlanke, iwan okitlaliayaj inkorona iyakapan
siya, iwan okijtoayaj:
\q
\v 11 ToTeko Dios, tejwatzin motech powi para timitzmakaskej
\q miek weyikixtilistle iwan miek tetlakitalistle, porke
tejwatzin tikpia weyi mopoder.
\q Tejwatzin otikchij nochi tlan onkaj,
\q tejwatzin otikmonekiltij ma yekan, iwan por yonik otikinchij.
\c 5
\s Juan okitak in libro iwan Ichkatzin
\p
\v 1 Ijkuakón onikitak itech iyekma de yen katlej oewatoka
ipan siya, iwan onikitak se libro tetejkuixtok ijkuilitok
ik tlixko iwan ik tlijtik iwan otzaktoka ika chikome
seyojtin.
\v 2 Iwan onikitak se ángel katlej kipia poder katlej
otlajtlania chikawak:
\p ―¿Akin itech powi kitlapos in libro iwan kintzayanas
in seyojtin?
\p
\v 3 Pero mach akaj oyeka ompa itech ilwikak nimpor
ixko yin tlaltikpak nimpor itlampa in tlaltikpak akin
ma itech powi kitlapos in libro, iwan nion para kitas
tlanon ijkuilitok.
\v 4 Iwan nej sa tekitl onichokak, porke mach oyeka nion
se akin ma itech powi para kitlapos iwan kileros in
libro, iwan nion para kitas tlanon ijkuilitok.
\v 5 Ijkuakón se de yen tetajtzitzintin onechilwij:
\p ―Amo xichoka, porke in lión katlej walajtok nelwatl
de familia de Judá iwan noijki de familia de David, Yej
yotlatlanke para welis kitlapos in libro iwan kintzayanas
in chikome seyojtin.
\p
\v 6 Ijkuakón onikitak moketok se Ichkatzin tlatlajko
de yen siya iwan tlatlajko de yen nawin katlej yolitokej,
iwan tlatlajko de yen tetajtzitzintin. Yon Ichkatzin
omotaya kej yokimiktijkaj. Okinpiaya chikome ikuakuawan
iwan chikome ixtololowan. In chikome ixtololowan kijtosneki
yen chikome espíritus de Dios katlej okintitlankej ixko
nochi in tlaltikpak.
\v 7 Yon Ichkatzin oyáj kan kajki in siya, iwan okitzkij
in libro katlej okipiaya itech iyekma de yen katlej
oewatoka itech siya.
\v 8 Nijkuak okitzkij in libro, in nawin katlej yolitokej
iwan senpoale iwan nawi tetajtzitzintin, omotlankuaketzkej
iyakapan Ichkatzin. Kada se de yonmej tetajtzitzintin
okipiaya se arpa, iwan okinmitkiaj kopajtin de oro tentokej
de kopale, iwan yon kopale kijtosneki yen intiotzajtzilis
de yen katlej iaxkawan in Dios.
\v 9 Yejwan okitlakuikayaj (okuikayaj) se yankuik tlakuikale:
\q Tejwatzin motech powi para tikitzkis in libro iwan
tikintzayanas in seyojtin.
\q Porke omitzmiktijkaj, iwan ika moeso otikinkoj para
ma yekan iaxkawan in toTajtzin Dios,
\q nochtin in tlaltikpaktlakaj, nochtin katlej tlapoaj
tlatlamantle tlajtole, de nochtin pueblojtin, iwan de
nochtin paismej.
\q
\v 10 Iwan otikintlalij ma yekan kej tlanawatijkej iwan
kej tiopixkej para kitekipanoskej in toTajtzin Dios,
\q iwan para tlanawatiskej ixko yin tlaltikpak.
\p
\v 11 Satepan onitlachixke iwan onikinkakke miekej angelestin
katlej okiyawalojtokaj in siya, iwan okinyawalojtokaj
in nawin katlej yolitokej, iwan noijki okinyawalojtokaj
in senpoale iwan nawi tetajtzitzintin. Oyekaj miekej
miyones de angelestin.
\v 12 Iwan okijtoayaj chikawak:
\q In Ichkatzin katlej okimiktijkaj
\q itech powi ma kipia poder iwan ma kipia rikojyotl,
\q ma kipia ixtlamachilistle iwan ma kipia chikawalistle,
\q ma kipialikan tetlakitalistle, ma kimakakan weyikixtilistle
iwan noijki nochtin ma kiyektenewakan.
\p
\v 13 Iwan nochi tlamantle tlan Dios okichij, katlej
katej ilwikak, katlej katej ixko yin tlaltikpak iwan
katlej katej itlampa yin tlaltikpak, iwan katlej katej
ijtik atl, onikinkakke okijtojkej:
\q Nochtin ma kiyektenewakan, ma kipialikan tetlakitalistle,
ma kimakakan weyikixtilistle iwan ma kipia poder,
\q iktlanke (ik tlami) ma yeto nochi iaxka katlej ewatok
ipan isiya iwan noijki ma yeto iaxka in Ichkatzin.
\p
\v 14 In nawin katlej yolitokej okijtoayaj:
\q ―¡Ijkón ma yeto!
\p In senpoale iwan nawi tetajtzitzintin omotlankuaketzkej
iwan okiweyikixtijkej katlej yolitok iktlanke (ik tlami).
\c 6
\s In Ichkatzin okintzayanke in seyojtin
\p
\v 1 Ijkuakón onikitak in Ichkatzin okitzayanke se seyo
de yen chikome seyojtin, iwan onikakke se de yen nawi
katlej yolitokej okijtoj chikawak kej se tlatikuinalistle:
\p ―¡Xiwiki iwan xikita!
\p
\v 2 Onitlachixke, iwan onikitak se kabayo istak, iwan
katlej ipan oyetiaya okitzkijtoka se arko. Iwan okimakakej
se korona, iwan okiske kej se tlatlanke para tlatlanis
okachi.
\p
\v 3 Nijkuak yon Ichkatzin okitzayanke ipan ome seyo,
onikakke in oksé katlej yolitok, okijtoj:
\p ―¡Xiwiki iwan xikita!
\p
\v 4 Iwan okiske oksé kabayo, oyeka chichiltik, iwan katlej
ipan oyetiaya okimakakej se weyi espada iwan okimakakej
poder para ma kichiwa mach ok ma motlasojtlakan in tlaltikpaktlakaj
iwan ma momijmiktikan san entre yejwan.
\p
\v 5 Nijkuak yon Ichkatzin okitzayanke ipan eyi seyo,
onikakke oksé katlej yolitok, okijtoj:
\p ―¡Xiwiki iwan xikita!
\p Nej onitlachixke, iwan onikitak se kabayo tliliwik,
iwan katlej ipan oyetiaya okipiaya se libra (librajxikale)
itech ima.
\v 6 Iwan onikakke se tlajtole tlatlajko de kan katej
in nawin katlej yolitokej, okijtoayaj:
\p ―Se kilo de trigo o noso eyi kilo de cebada ipatij
tlan se tlakatl kitlani por tekipanoa se tonale. Pero
amo san xikawilti in aseite iwan vino.
\p
\v 7 Nijkuak in Ichkatzin okitzayanke ipan nawi seyo,
onikakke noijki in ya ipan nawi katlej yolitok, okijtoj:
\p ―¡Xiwiki iwan xikita!
\p
\v 8 Onitlachixke, iwan onikitak se kabayo kostik, iwan
katlej ipan oyetiaya oyeka itoka Mikilistle. Iwan ikuitlapan
owalaya in lugar kan yawij mikkamej. Iwan okimakakej
poder para kinmijmiktis se kuarta parte de nochtin in
tlaltikpaktlakaj. Para kinmijmiktis ika guerra, ika apistle,
ika kokolistle, iwan ika yolkamej tekuanimej.
\p
\v 9 Nijkuak yon Ichkatzin okitzayanke ipan makuile
seyo, onikitak itlampa artal inmanimajwan de katlej okinmiktijkej
porke okineltokayaj itlajtol in toTajtzin Dios, iwan
porke okitematiltiayaj itlajtol.
\v 10 Iwan okijtoayaj chikawak:
\p ―Señor, tejwatzin tiyolchipawak iwan nochipa tikijta
tlan melawak, ¿asta keman tikinmixkomakas (tikintzonmanas)
iwan tikintlaxtlawaltis in tlaltikpaktlakaj katlej otechmiktijkej?
\p
\v 11 Ijkuakón okinmakakej intlaken istak, iwan okinmilwijkej
ok ma mosewikan ok keski tonale, asta ma majxitikan nochtin
oksekimej inmikniwan katlej kitekipanoaj in toTajtzin
Dios katlej noijki kinmiktiskej ken yejwan.
\p
\v 12 Nijkuak in Ichkatzin okitzayanke ipan chikuasen
seyo, onikitak sa tekitl chikawak otlalolinke. In tonale
otliliwiak kej itzotzol se mikatl tliliwik, in metztle
ochichiliwiak kej estle,
\v 13 iwan sitlaltin de ilwikak owetzkej ixko yin tlaltikpak,
ijkón ken nijkuak in ejekatl kitepewa itlakilo in igos.
\v 14 In ilwikak opoliwik kej yeskia se amatl omotejkuixke,
iwan nochtin in tepemej iwan tlalmej katlej pankistokej
itech atl omijkuanijkej de kan oyekaj.
\v 15 Iwan in tlatlanawatijkej de ixko yin tlaltikpak,
in tlayekankej, in rikojtin, in kapitanmej de soldadojtin,
in tlakaj katlej chijchikawakej, in tlakaj katlej tekipanoaj
kej tlanamaktin, iwan katlej inselti monawatiaj, oyajkej
omotlatitoj ijtik kuyoktin iwan ijtik tepejximej.
\v 16 Iwan okinmilwiayaj in tepemej iwan tepejximej:
\p ―Topan xiwetzikij, iwan xitechtlaatikan para amo ma
techita nekáj katlej ewatok ipan isiya, iwan para amo
ma techajsi in temawtij kualanilistle de yen Ichkatzin.
\p
\v 17 Porke yoajsiko in weyi tonale de ikualanilis, iwan
mach akaj welis kixikos.
\c 7
\s Okinseyarojkej 144, 000 judiojtin
\p
\v 1 Satepan de yin, onikinmitak nawi angelestin moketokej
itech nawi eskinajtin de yen tlaltikpak, katlej okintzakuilijtokaj
in nawi ejekamej para amo ma ejeka ixko yin tlaltikpak,
nion ixko atl, iwan nion itech kuanmej.
\v 2 Noijki onikitak oksé ángel katlej otlejkoya ik
ikisayan tonale, katlej okipiaya iseyo in Dios katlej
nochipa yolitok. Yon ángel okintzajtzilij chikawak in
nawi angelestin katlej okinmakakej poder para tlaijtlakoskej
ipan tlaltikpak iwan itech atl, okijtoj:
\p
\v 3 ―Ayamo xikijtlakokan in tlaltikpak, nion ayamo xikijtlakokan
in atl, iwan nion ayamo xikinmijtlakokan in kuanmej, achtoj
moneki tikinseyaroskej itekipanojkawan in toTajtzin
Dios ika se seyo itech inmixkuak.
\p
\v 4 Iwan onikakke okintenejkej se siento iwan omenpoale
iwan nawi mil tlakaj katlej okinseyarojkej itech inmixkuak
de nochtin in majtlaktin iwan ome familias de Israel.
\q
\v 5 De familia de Judá oyekaj majtlaktle iwan ome mil
katlej okinseyarojkej.
\q De familia de Rubén okinseyarojkej majtlaktle iwan
ome mil,
\q de familia de Gad okinseyarojkej majtlaktle iwan ome
mil,
\q
\v 6 de familia de Aser okinseyarojkej majtlaktle iwan
ome mil,
\q de familia de Neftalí okinseyarojkej majtlaktle iwan
ome mil,
\q de familia de Manasés okinseyarojkej majtlaktle iwan
ome mil,
\q
\v 7 de familia de Simeón okinseyarojkej majtlaktle iwan
ome mil,
\q de familia de Leví okinseyarojkej majtlaktle iwan ome
mil,
\q de familia de Isacar okinseyarojkej majtlaktle iwan
ome mil,
\q
\v 8 de familia de Zabulón okinseyarojkej majtlaktle iwan
ome mil,
\q de familia de José okinseyarojkej majtlaktle iwan ome
mil,
\q iwan de familia de Benjamín okinseyarojkej majtlaktle
iwan ome mil.
\s Miekej tlakaj otlakentitokaj de istak
\p
\v 9 Satepan de yin, onitlachixke iwan onikinmitak sa
tekitl miekej tlakaj asta mach akaj welis kinpoas. Owalajkej
de nochtin paismej, de nochi tlatlamantin tlakajtin, de
nochtin pueblojtin, iwan de nochtin katlej tlapoaj tlatlamantle
tlajtole. Omoketokaj iyakapan siya iwan iyakapan in
Ichkatzin. Okipiayaj intlaken istak iwan okikitzkijtokaj
sekin soyatl itech inma.
\v 10 Iwan chikawak otzajtziaj, okijtoayaj:
\q Totemakixtilis witz de toTajtzin Dios,
\q katlej ewatok ipan isiya,
\q iwan noijki witz de yen Ichkatzin.
\m
\v 11 Iwan nochtin in angelestin omoketokaj okiyawalojtokaj
in siya iwan okinyawalojtokaj in tetajtzitzintin, iwan
noijki okinyawalojtokaj in nawin katlej yolitokej. Iwan
omotlankuaketzkej iyakapan siya asta okitennamikej in
tlale iwan okiweyikixtijkej in toTajtzin Dios.
\v 12 Okijtojkej:
\q ¡Ijkón ma yeto! Dios ma yeto iaxka axan iwan iktlanke
(ik tlami) in yektenewalistle,
\q weyikixtilistle, ixtlamachilistle, tlasojkamachilistle,
\q tetlakitalistle, poder iwan chikawalistle. Ijkón ma
yeto.
\p
\v 13 Ijkuakón se de yen tetajtzitzintin onechtlajtlanij:
\p ―¿Akinmej yinmej katlej tlakentitokej ika intlaken
istak, iwan de kan owalajkej?
\p
\v 14 Iwan nej onikilwij:
\p ―Señor, mach nikmati. Tejwatzin tikmati akinmej iwan
de kan owalajkej.
\p Iwan Yej onechilwij:
\p ―Yinmej yejwan katlej opanokej in temawtij tlajyowilistle.
Iwan axan yokiskej iwan yokipakej intlaken ika ieso
in Ichkatzin iwan yoistayakej.
\v 15 Por yonik katej iyakapan isiya in Dios, iwan kitekipanoaj
itech itiopan yuale tonale. Iwan katlej ewatok ipan
isiya kinpalewis porke inwan yetos.
\v 16 Mach ok tiojsiwiskej iwan mach ok amikiskej, mach
ok tonaltlatlaskej iwan nion mach ok tonalmikiskej.
\v 17 Porke in Ichkatzin katlej kajki tlatlajko de yen
siya, kinmonekuitlawis kej ichkamej iwan kinwikas itech
ameyaltin katlej kitemakaj nemilistle. Iwan toTajtzin
Dios kinwajwachilis inmixayo.
\c 8
\s Okitzayankej in chikome seyo
\p
\v 1 Nijkuak in Ichkatzin okitzayanke ipan chikome seyo
de yen libro, mach ok itlaj omokakke ompa ilwikak kej
tlajko ora.
\v 2 Satepan onikinmitak chikome angelestin katlej omoketokaj
iyakapan Dios, iwan kada se okimakakej se tlapitzale.
\v 3 Satepan owalaj oksé ángel iwan omoketzke iyakapan
artal, iwan okipiaya se popochtepalkatl de oro. Iwan
okimakakej miek kopale para ma kichichino iyakapan Dios
iwan ma tlejko ipokyo san sekan iwan intiotzajtzilis
de nochtin in tokniwan yolchipawakej. Iwan yon ángel
okitlalij in kopale ipan artal de oro katlej oyeka iyakapan
siya.
\v 4 Ipokyo in kopale okiske de itech in popochtepalkatl
katlej okipixtoka in ángel itech ima, otlejkok in poktle
iwan intiotzajtzilis in tokniwan yolchipawakej iwan
oajsito asta inawak Dios.
\v 5 Ijkuakón in ángel okitzkij in popochtepalkatl, okitemitij
ika tlixochtle de yen tlitl katlej oyeka ipan artal,
iwan okitlamotlak ipan tlaltikpak. Opéj tlatijtikuini,
tlakukuyoka, tlapejpetlani iwan tlalolini.
\s Otlapitzkej in angelestin
\p
\v 6 Satepan in chikome angelestin katlej okipiayaj
in chikome tlapitzaltin omoyektlalijkej para tlapitzaskej.
\p
\v 7 Se ángel achtoj otlapitzke, iwan ijkuakón otesiwik
ixko yin tlaltikpak iwan owetzke tlitl nelitok iwan
estle. Iwan otlatlak se tercera parte de yen tlaltikpak,
otlatlak nochi in kuawyoj iwan nochi in xiwyoj.
\p
\v 8 In ya ipan ome ángel otlapitzke, iwan ijkuakón owetzke
ijtik atl kej se tepetl xotlatok. Iwan se tercera parte
de yen atl omokuepke estle.
\v 9 Se tercera parte de nochtin in yolkamej katlej
oyekaj ijtik atl omikkej, iwan se tercera parte de nochtin
in barkojtin oxakualikej.
\p
\v 10 In ya ipan eyi ángel otlapitzke, iwan ijkuakón
se weyi sitlale owetzke de ilwikak katlej oxotlatiwalaya
kej okotl. Owetziko ipan se tercera parte de nochtin
in weyamej iwan ameyaltin katlej katej ixko yin tlaltikpak.
\v 11 In sitlale oyeka itoka Chichik. Iwan se tercera
parte de nochi in atl de ixko yin tlaltikpak ochichiyak,
iwan miekej tlaltikpaktlakaj omikkej por okonikej in
yon atl.
\p
\v 12 In ya ipan nawi ángel otlapitzke, iwan ijkuakón
se tercera parte de yen tonale, in metztle, iwan sitlaltin
osewkej. In tonale iwan metztle mach ok otlawijkej chikawak
porke osewkej se tercera parte.
\p
\v 13 Satepan onikitak se ángel patlantinemi tlatlajko
ilwikak, iwan onikakke okijtoj chikawak:
\p ―¡Ay, ay! ¡Pobrestin katlej chantij ixko yin tlaltikpak
nijkuak tlapitzaskej in oksekimej eyin angelestin katlej
ok poliwij!
\c 9
\p
\v 1 In ya ipan makuile ángel otlapitzke, iwan onikitak
se sitlale katlej owetziko de ilwikak asta ipan tlaltikpak.
Yon sitlale okimakakej in yabe para kitlapos in kuyoktle
katlej mach kipia kan tlantok.
\v 2 Okitlapoj in yon kuyoktle, iwan okiske miek poktle
kej yeskia ipokyo se orno. Yon poktle okitlatleyualtij
in tonale iwan ejekatl.
\v 3 De ijtik yon poktle okiskej miekej chapulimej katlej
opatlaniaj ixko yin tlaltikpak. Iwan yonmej chapulimej
okinmakakej poder para tetzopitiskej kej yeskia kolomej.
\v 4 Okinnawatijkej amo ma kijtlakokan in xiwitl, nion
itlaj katlej xoxowik, iwan nion se kuawitl, sino san yen
tlaltikpaktlakaj katlej mach kipiaj iseyo in Dios itech
inmixkuak.
\v 5 Pero mach okinkawilijkej ma kinmiktikan in tlaltikpaktlakaj,
sino san ma kinkojkokokan makuile metztle. Oyeka sa
tekitl tekokoj ken nijkuak akaj kitzopitia se kolotl.
\v 6 Itech yonmej tonaltin in tlaltikpaktlakaj kinekiskej
ma mikikan pero mach welis. Iwan maski kinekiskej mikiskej,
in mikilistle kincholilis.
\p
\v 7 In chapulimej (xolinmej) oyekaj kej kabayojtin
katlej moesojkej para yaskej itech guerra. Itech intzontekon
okipiayaj kej se korona de oro, iwan inmixko oyeka kej
ixko se tlakatl.
\v 8 Okipiayaj intzonkal kej itzonkal se siwatl, iwan
intlanwan oyeka kej itlanwan se lión.
\v 9 Itech intlalnakayo okipiayaj kej intlaken de tepostle
katlej ika omotzakuiliayaj. Iwan inmajaswan okukuyokayaj
chikawak ken nijkuak in kabayojtin kintlatlalochtiaj
in karretajtin itech guerra.
\v 10 Okipiayaj inkuitlapil kej ikuitlapil se kolotl
iwan okipiayaj inmin (inmimij). Iwan okipiayaj poder
itech inkuitlapil para kinkojkokoskej in tlaltikpaktlakaj
makuile metztle.
\v 11 In chapulimej (xolinmej) okipiayaj se intlanawatij,
yen ángel de yen kuyoktle katlej mach kipia kan tlantok.
Yon ángel ika tlajtole hebreo itoka Abadón, iwan ika
tlajtole griego itoka Apolión, kijtosneki teijtlakoj.
\p
\v 12 Opanok in yakinika tekokojkayotl, pero ok opoliwia
ok ome tekokojkayotl para panos.
\p
\v 13 In ya ipan chikuasen ángel otlapitzke, iwan onikakke
se tlajtole katlej omokakke tlatlajko de yen nawi kuakuawmej
katlej oyekaj itech artal de oro katlej oyekaj iyakapan
Dios.
\v 14 Yon tlajtole okilwij in ya ipan chikuasen ángel
katlej okipixtoka itlapitzal:
\p ―Xikinkajkawa in nawi angelestin katlej ilpitokej
inakastlan weyatl katlej itoka Eufrates.
\p
\v 15 In yonmej nawi angelestin yokinyektlalijkaj para
kichiwaskej intekiw itech yon ora, itech yon tonale, itech
yon metztle iwan itech yon xiwitl, iwan ijkuakón okinkajkajkej
para ma kinmiktikan se tercera parte de nochtin in tlaltikpaktlakaj.
\v 16 Iwan nej onikakke okintenejkej ome siento miyones
de soldadojtin katlej kipiaj inkabayojwan.
\p
\v 17 Ijkón onikinmitak in kabayojtin iwan katlej inpan
oyetiayaj, onikinmitak kej yeskia oniteemiktoka. Iwan
katlej inpan oyetiayaj okipiayaj inmelpantlaken de tepostle.
Yon tepostle okipiaya eyi kolor. Oyeka chichiltik kej
tlitl, asultik kej ilwikak, iwan kostik kej azufre. In
kabayojtin okipiayaj intzontekon kej itzontekon se lión,
iwan de ijtik inten okisaya tlitl, okisaya poktle, iwan
okisaya azufre.
\v 18 Ika yin eyi kokolistle, omikkej se tercera parte
de nochtin in tlaltikpaktlakaj. Omikkej ika tlitl, ika
poktle, iwan ika azufre katlej okisaya de ijtik inten
in kabayojtin.
\v 19 Porke in poder de yonmej kabayojtin okipixtokaj
itech inten iwan itech inkuitlapil. Porke inkuitlapil
oyekaj kej koamej katlej okipiayaj intzontekon iwan
otetzopitiayaj.
\p
\v 20 Pero in oksekimej tlaltikpaktlakaj, katlej mach
omikkej ika yonmej kokolistin, mach okikajkej de tlajtlakolchiwaskej.
Sino okiseguirojkej okinweyikixtiayaj in mach kualtin
ejekamej iwan santojtin de oro, de plata, de bronce, de
tetl, iwan de kuawitl, katlej mach tlachiaj, nion mach
tlakakij, iwan nion mach nejnemij.
\v 21 Iwan nion mach okikajkej de temiktiskej, de texoxaskej
(tebrujojwiskej), de momekatiskej, iwan de tlachtekiskej.
\c 10
\s In ángel katlej okipiaya se librojtzin
\p
\v 1 Satepan onikitak oksé ángel chikawak katlej owaltemoaya
de ilwikak, kikentiwitz mixtle iwan ikpak okualkuia se
akosamalotl. Ixko opetlania ken tonale, iwan ikxiwan
omotayaj kej pilartin tlikuitokej.
\v 2 Okipixtoka itech ima se librojtzin tlapotok, iwan
okitlalij iyekikxi ipan atl iwan iopochikxi okitlalij
ipan tlaltikpak.
\v 3 Iwan otzajtzik chikawak ken ijkuak tzajtzi se lión.
Iwan nijkuak otzajtzik, omokakke chikome tlatikuinalistin
okinankilijkej.
\v 4 Iwan nijkuak in yonmej chikome tlatikuinalistin
owaltlajtojkej, nej ya nikijkuiloani, pero ijkuakón onikakke
se tlajtole de ilwikak onechilwij:
\p ―Amo xikijkuilo tlan okijtojkej in chikome tlatikuinalistin,
sino san tej xikmato tlan okijtojkej.
\p
\v 5 Satepan in ángel katlej onikitak moketok ipan atl
iwan ipan tlaltikpak, okiketzke iyekma ik ilwikak
\v 6 iwan okijtoj se tlajtole, asta okijtoj Dios tlachixtok
katlej yolitok nochipa, katlej okichij in ilwikak, in
tlaltikpak, in atl, iwan nochi tlan onkaj intech. Okijtoj:
\p ―Ya ajsis ora, mach ok wejkawas.
\v 7 Porke nijkuak ajsis tonale nijkuak in ya ipan chikome
ángel tlapitzas, ijkuakón panos nochi tlan ayamo okimatiaj
in tlaltikpaktlakaj, tlan Dios ya wejkawitl okinmilwij
itekipanojkawan profetajtin de tlan tlapanos.
\p
\v 8 In tlajtole katlej onikakke katlej omokakke de
ilwikak, oksemi onechilwij:
\p ―Xiwia, iwan xikitzki in librojtzin katlej tlapotok
itech ima in ángel katlej moketok ipan atl iwan ipan
tlaltikpak.
\p
\v 9 Oniaj kiné kan oyeka in ángel iwan onikilwij ma
nechmaka in librojtzin, iwan yej onechilwij:
\p ―Xikitzki iwan xikua. Ijtik moten tikmachilis tzopelik
kej nektle, pero ik moijtik tikmachilis chichik.
\p
\v 10 Ijkuakón onikitzkij in librojtzin de itech ima
in ángel iwan onikuaj. Iwan ijtik noten onikmachilij
tzopelik, pero nijkuak oniktoloj, ik noijtik onikmachilij
chichik.
\v 11 Satepan in ángel onechilwij:
\p ―Moneki oksemi tikinmatiltis in tlaltikpaktlakaj tlan
Dios kijta. Xikinmatilti tlan panoskej katlej katej
itech nochtin pueblojtin iwan paismej, katlej tlapoaj
ika oksekin tlatlamantle tlajtole iwan noijki katlej
tlatlanawatijkej.
\c 11
\s Omen testigojtin
\p
\v 1 Satepan onechmakakej se kuawitl kej metro, iwan
onechilwijkej:
\p ―Ximoketza iwan xiktamachiwa itiopan Dios iwan artal.
Iwan xikinpoa keskimej katlej ompa kiweyikixtiaj in
Dios.
\v 2 Pero amo xiktamachiwa in patio katlej kajki kalan
de yen tiopan, porke yon patio yokinmaktilijkej in tlakaj
katlej mach judiojtin. Yejwan ipan tlajtlaksaskej iweyikan
Dios omenpoale iwan ome metztle.
\v 3 Iwan nej nikintitlanis ome notestigojwan profetajtin
para ma kitematiltikan tlan tlapanos de tlan nej nikinmilwis.
Yejwan kitematiltiskej notlajtol se mil iwan ome siento
iwan eyinpoale tonaltin, iwan motzotzoltiskej ika intzotzol
tetzojtzopitij katlej konakiaj in tlakaj nijkuak mikkayoaj.
\p
\v 4 Yonmej omen notestigojwan profetajtin kijtosneki
yejwan ome olivoskuanmej iwan ome kandelerojtin, katlej
katej iyakapan Dios katlej tlanawatia ixko yin tlaltikpak.
\v 5 Iwan tla akaj kinekis itlaj kintoktis in yonmej
omen, yejwan kixtiskej tlitl de ijtik inten iwan kinchichinoskej
inkontraswan. Ijkón kiné, akin kinekis itlaj kintoktis,
ijkón nik mikis.
\v 6 Yonmej ome testigojtin profetajtin kipiaj poder
para kitzakuaskej in ilwikak, para amo ma kiawi nijkuak
kitematiltiskej tlan tlapanos de tlan Dios kinmilwis.
Noijki yejwan kipiaj poder para kikuepaskej estle in
atl, iwan noijki para kitlajyowiltiskej in tlaltikpak
ika nochi tlamantle kokolistle, san kech yejwan kinekiskej.
\v 7 Iwan nijkuak tlamiskej de kitematiltiskej tlan
Dios okinmilwij, in amo kuale yolkatl katlej kisas de
ijtik in kuyoktle katlej mach kipia kan tlantok, yas
en kontra de yejwan, iwan kintlanis, iwan kinmiktis.
\v 8 Intlalnakayo melatoskej ipan ojmej de yen weyikan
de Jerusalén kan toSeñor Jesucristo okimajmasoltijkej
itech krus. Yon weyikan kitokayoawiltiaj noijki Sodoma
o noso Egipto. Porke in tlakaj de yon weyikan kipiaj
inyolo mach kuale noijki ken tlakaj de weyikan de Sodoma
iwan de país de Egipto.
\v 9 In tlakaj de nochtin pueblojtin, de nochi tlatlamantin
tlakajtin, de nochtin katlej tlapoaj tlatlamantle tlajtole,
iwan de nochtin paismej, kitaskej intlalnakayo de yonmej
omen mikkamej melatoskej eyi tonale iwan tlajko, iwan
mach kitekawiliskej ma kintookakan.
\v 10 In tlaltikpaktlakaj pakiskej porke yomikkej in
yonmej omen, sa tekitl kiwelitaskej iwan asta kimomamakaskej
tlatliokoliltin se iwan oksé, porke in yonmej omen profetajtin
mach ok tlakuejsoskej.
\v 11 Pero satepan de eyi tonale iwan tlajko, se espíritu
katlej kitemaka nemilistle katlej Dios kititlanis, kalakis
intech in yonmej omen profetajtin iwan mewaskej. Iwan
nochtin akinmej kinmitaskej sa tekitl momawtiskej.
\v 12 Satepan yonmej omen testigojtin profetajtin kikakiskej
se tlajtole chikawak, kinmilwis:
\p ―Xitlejkokan nian tlakpak.
\p Yejwan tlejkoskej ilwikak ijtik se mixtle iwan inkontraswan
kinmitaskej.
\v 13 San niman ijkuakón chikawak tlalolinis iwan se
majtlaktle parte de nochi in weyikan xitinis, iwan mikiskej
chikome mil tlakaj ika yon tlalolinalistle. Oksekimej
katlej mach mikiskej, sa tekitl momawtiskej, iwan kiweyikixtiskej
in toTajtzin Dios katlej kajki ilwikak.
\p
\v 14 Ijkón nik opanok in ya ipan ome tekokojkayotl,
pero ok opoliwia oksé tekokojkayotl katlej witz san
niman para ajsis ya ipan eyi tekokojkayotl.
\s In chikome ángel otlapitzke
\p
\v 15 In ya ipan chikome ángel otlapitzke, iwan omokakej
miekej tlajtoltin ompa ilwikak, okijtojkej chikawak:
\q Nochi in tlaltikpak kan tlanawatiaj in tlaltikpaktlakaj
ya iaxka in toTajtzin Dios iwan de Jesucristo.
\q Iwan Yej tlanawatis iktlanke (ik tlami).
\m
\v 16 Ijkuakón in senpoale iwan nawi tetajtzitzintin
katlej oewatokaj ipan insiya iyakapan toTajtzin Dios,
omotlankuaketzkej asta okitennamikej in tlale iwan okiweyikixtijkej
in toTajtzin Dios,
\v 17 okijtojkej:
\q Timitztlasojkamachiliaj, Señor,
\q tejwatzin Dios katlej tikpia nochi poder,
\q tejwatzin katlej achtoj yotieka, katlej axan tikaj iwan
katlej nochipa tietos,
\q timitztlasojkamachiliaj porke yotikonanke mopoder iwan
yopéj titlanawatia.
\q
\v 18 In tlaltikpaktlakaj de nochtin paismej kualanij
monawak,
\q pero yoajsiko in tonale katlej ika mokualanalis tikintitlanis
kan tlajyowiskej,
\q yoajsiko in tonale para tikinmixkomakas (tikintzonmanas)
iwan tikintlaxtlawis in mikkamej.
\q Noijki yoajsiko in tonale para tikintlaxtlawis motekipanojkawan
profetajtin,
\q iwan katlej otikinpejpenke ma yekan moaxkawan, iwan
katlej mitztlakitaj,
\q wejweyin iwan tzitzikinmej.
\q Iwan noijki yoajsiko in tonale para tikinmixpolos katlej
kixpoloaj in tlaltikpak.
\p
\v 19 Ijkuakón otlapowik itiopan Dios katlej kajki ilwikak,
iwan ompa ijtik tiopan omotaya in kaja kan oyeka in
akuerdo katlej Dios okichij inwan itlaneltokakej. Chikawak
otlapejpetlanke, otlakukuyokak, otlatijtikuinke, otlalolinke
iwan chikawak otesiwik.
\c 12
\s In siwatl iwan koatl
\p
\v 1 Satepan omotak se weyi señal itech ilwikak. Omotak
se siwatl petlantok ken tonale, iwan in metztle oyeka
ikxitlan, iwan okikuaonakijtoka se korona de majtlaktle
iwan ome sitlaltin.
\v 2 Yon siwatl ootztitoka ika ikone, iwan otzajtzia
chikawak porke ya tlakatis ikone.
\v 3 Satepan omotak oksé señal itech ilwikak. Omotak
se weyi koatl chichiltik, okinpiaya chikome itzontekonwan,
majtlaktle ikuakuawan, iwan se korona itech kada se itzontekon.
\v 4 Ika ikuitlapil okintepej se tercera parte de nochtin
in sitlaltin de ilwikak iwan okintlamotlak ixko yin
tlaltikpak. Yon koatl omoketzke iyakapan siwatl katlej
ya kitlakatilis ikone, para kikualis san niman nijkuak
tlakatis.
\v 5 In siwatl okitlakatilij se chokotzin, katlej kinnawatis
ika ivara de tepostle nochtin in tlaltikpaktlakaj de
nochtin paismej. Ijkuakón ikone okikixtilijkej iwan
okiwikilijkej inawak Dios kan ewatok itech isiya para
ompa Iwan yetos.
\v 6 In siwatl ocholoj iwan oyáj kan tlawaki, kan Dios
yokiyektlalilijka se lugar para ompa ma kitlamakakan
se mil iwan ome siento iwan eyinpoale tonaltin.
\p
\v 7 Satepan omochij se guerra itech ilwikak. In arcángel
Miguel iwan oksekimej angelestin katlej yej kinyekana
okichijkej guerra iwan yon koatl. In koatl iwan iangelwan
noijki inwan okimomagakej (omomakakej),
\v 8 pero mach owelikej otlatlankej, iwan mach ok oyeka
lugar para yejwan itech ilwikak.
\v 9 Ijkuakón in koatl iwan iangelwan okinkixtijkej
de ilwikak iwan okintlamotlakej asta ipan tlaltikpak.
Yon koatl yen katlej yoyeka desde ya wejkawitl, katlej
yokinkajkayaj miekej tlaltikpaktlakaj, katlej noijki
itoka diablo o noso Satanás.
\p
\v 10 Ijkuakón onikakke se tlajtole chikawak ompa ilwikak,
okijtoj:
\p ―Yoejkok in tonale nijkuak nochtin katlej iaxkawan
in Dios kinmakixtiskej, yoneske ipoder in toTajtzin Dios
iwan yopéj tlanawatia. Iwan Cristo noijki yokiresibiroj
tekiwajkayotl, porke yokiwaltlamotlakej de ilwikak in
Amo Kuale Tlakatl katlej teistlakawij de yen tokniwan,
katlej okinmistlakawiaya yuale tonale iyakapan Dios.
\v 11 In tokniwan okitlankej in Amo Kuale Tlakatl ika
ieso in Ichkatzin iwan ika itlajtol Cristo katlej yejwan
okitematiltijkej. Porke mach okimakaskej kipoloskej
innemilis, sino omotemaktijkej (omotemaktilijkej) maski
ma kinmiktikan.
\v 12 Por yonik kiné, ma yeto pakilistle ompa ilwikak.
Xipakikan namejwan katlej ankatej ilwikak. Pero, pobrestin
katlej chantij ixko tlaltikpak iwan katlej katej ijtik
atl. Porke in diablo yotemok kan amejwan ankatej, sa
tekitl kualani, porke kimati nik sa keski tonale kipia
para kichiwas tlan yej kineki.
\p
\v 13 Nijkuak in koatl okimomakak kuenta nik yokiwaltlamotlakej
ipan tlaltikpak, opéj kitemojtinemi in siwatl katlej
okitlakatilij ikone.
\v 14 Pero in siwatl okimakakej ome iajaswan wejweyin
de se weyi kuixin (águila), para ma patlani wejka de
kan kajki in yon koatl iwan ma wia asta kan tlawaki,
kan kitlamakaskej eyi xiwitl iwan tlajko.
\v 15 In koatl okikixtij miek atl de ijtik iten kej
se weyatl para ma kiwika in siwatl.
\v 16 Pero in tlaltikpak okipalewij in siwatl. In tlaltikpak
otlapowik iwan okitoloj in weyatl katlej in koatl okikixtij
de ijtik iten.
\v 17 In koatl sa tekitl okualanke inawak in yon siwatl,
iwan oyáj inwan okimomagato (okinmomakato) oksekimej
ipilwan in yon siwatl, katlej kichiwaj tlan Dios kijta
iwan tetlapowiaj de Jesucristo. Iwan yon koatl omoketzato
itempan atl ijtik xale.
\c 13
\s Omen yolkamej amo kualtin
\p
\v 1 Iwan onikitak okiske de ijtik atl se amo kuale
yolkatl katlej okinpiaya chikome itzontekonwan iwan
majtlaktle ikuakuawan. Itech kada se ikuakuaw okipiaya
se korona, iwan itech kada se itzontekon oijkuilitoka
se tokayotl bierotik katlej okiwikaltiaya in toTajtzin
Dios.
\v 2 Yon amo kuale yolkatl omotaya kej se tigre, iwan
okinpiaya ikxiwan kej ikxiwan se oso, iwan okipiaya iten
kej iten se lión. In koatl okimakak ipoder in amo kuale
yolkatl iwan okitlalij ipan isiya, iwan noijki okimakak
weyi tekiwajkayotl.
\v 3 Se de yen itzontekon in amo kuale yolkatl omotaya
kej yeskia okikuatzontekej iwan omotaya kej ya mikkatl.
Pero yon kan okikuatzontekej opajtik, iwan nochtin in
tlaltikpaktlakaj sa omotlajtlachialtijkej (omomajmawtijkej)
iwan nochtin pewa yawij inawak in amo kuale yolkatl.
\v 4 Okiweyikixtijkej in koatl porke okimakak tekiwajkayotl
in amo kuale yolkatl, iwan noijki okiweyikixtijkej in
amo kuale yolkatl. Okijtojkej:
\p ―Mach akaj oksé kipia poder ken yin amo kuale yolkatl.
¿Akin welis mokitzkis iwan yej?
\p
\v 5 Noijki okikawilijkej in amo kuale yolkatl ma moweyineki
ika iten iwan ma kiwikalti in Dios. Iwan noijki okikawilijkej
ma tlanawati omenpoale iwan ome metztle.
\v 6 Iwan ijkón okichij. Otlawikaltij inawak Dios, okiwikaltij
itoka iwan kan chanti, iwan noijki okinwikaltij katlej
chantij ilwikak.
\v 7 Noijki okikawilijkej ma inwan kimomaga in tokniwan
yolchipawakej asta ma kintlani. Iwan okimakakej poder
para kinnawatis nochtin in tlaltikpaktlakaj, de nochtin
pueblojtin, de nochtin katlej tlapoaj tlatlamantle tlajtole,
iwan de nochtin paismej.
\v 8 Iwan nochtin in tlaltikpaktlakaj katlej mach kipiaj
intoka ijkuilitok itech libro, kan nestok intoka de nochtin
katlej kipiaj yankuik nemilistle, okiweyikixtijkej in
amo kuale yolkatl. Yon libro omochij desde antes de
kichiwani in Dios in tlaltikpak. In Ichkatzin katlej
okimiktijkej, yen kipia in yon libro.
\p
\v 9 Akin kineki kimomakas kuenta, ma kikaki.
\v 10 Akin tetzakuas, noijki kitzakuaskej. Akin temiktis,
noijki kimiktiskej. Por yonik, in tokniwan yolchipawakej
moneki kixikoskej tlan panoskej, iwan moneki kitlaliskej
intlaneltokalis inawak Dios.
\p
\v 11 Satepan onikitak oksé amo kuale yolkatl, pankistiwitz
de ipan tlaltikpak. Okinpiaya ome ikuakuawan kej ikuakuawan
se ichkatzin, pero otlajtoaya kej se koatl.
\v 12 Iwan noijki okipiaya poder no ken oksé amo kuale
yolkatl katlej achtoj omonextij iwan katlej ompa iwan
okatka. Yin ya ipan ome amo kuale yolkatl okintoktij
nochtin in tlaltikpaktlakaj ma kiweyikixtikan in achtoj
amo kuale yolkatl, katlej oyeka kuatlatzontektle iwan
opajtik.
\v 13 Noijki okinchiwaya wejweyin señalestin, iwan asta
okichiwaya ma wetzi tlitl de ilwikak asta ipan tlaltikpak
inmixpan tlakaj.
\v 14 Yon amo kuale yolkatl okinkajkayaj in tlaltikpaktlakaj
ika yonmej señalestin katlej okikawilijkej ma kinchiwa
ixpan oksé amo kuale yolkatl. Iwan okinnawatij ma kichiwakan
se iretrato de yen achtoj amo kuale yolkatl, katlej oyeka
kuatlatzontektle iwan opajtik.
\v 15 In ya ipan ome amo kuale yolkatl noijki okimakakej
poder para ma kijpitza iretrato in achtoj amo kuale
yolkatl, para ma weli ma tlajto yon retrato iwan ma kinmikti
nochtin katlej mach kinekij kiweyikixtiskej.
\v 16 Noijki in ya ipan ome amo kuale yolkatl okintoktij
nochtin in tlakaj, katlej wejweyin iwan katlej tzitzikinmej,
katlej kimopialiaj iwan katlej mach kimopialiaj, katlej
tlanamaktin iwan katlej mach tlanamaktin, ma kintlalilikan
se marka itech inyekma o noso itech inmixkuak.
\v 17 Iwan mach akaj owelia otlakowaya nimpor otlanamakaya
tla amo okipiaya yon marka. Yon marka yen itoka in amo
kuale yolkatl o noso inúmero yon yolkatl.
\v 18 Moneki miek ixtlamachilistle itech yin tlamantle.
Akin kimomaka kuenta ma kixyejyeko inúmero in amo kuale
yolkatl porke onkaj se número katlej kimatij in tlakaj.
In número yen chikuasen siento iwan eyinpoale iwan chikuasen
(666).
\c 14
\s Intlakuikal de yen 144,000 tlakaj
\p
\v 1 Satepan onikitak in Ichkatzin moketok ipan tepetl
itoka Sión. Iwan ompa Iwan oyekaj se siento iwan omenpoale
iwan nawi mil tlakaj, katlej okipiayaj ijkuilitok itech
inmixkuak itoka de yen Ichkatzin iwan itoka de yen iPapan.
\v 2 Satepan onikakke ik ilwikak kej itlaj chikawak
ken nijkuak kukuyokaj miekej weyamej o noso ken nijkuak
chikawak tlatikuini. Onikakke kej otlatzotzonayaj miekej
ika arpa.
\v 3 Iwan okitlakuikayaj se yankuik tlakuikale, iyakapan
siya iwan inyakapan nawin katlej yolitokej iwan inyakapan
in tetajtzitzintin. Mach akaj owelia okitlakuikaya in
tlakuikale, sino san yejwan in se siento iwan omenpoale
iwan nawi mil tlakaj, katlej Cristo okinkoj ika ieso
de intzalko nochtin in tlaltikpaktlakaj.
\v 4 Yejwan mach otlajtlakojkej inwan siwamej, sino omomalwijkej.
Iwan san kan yawi in Ichkatzin yejwan noijki ompa yawij.
Yejwan okinkojkej de intzalko nochtin in tlaltikpaktlakaj,
para yejwan yeskej in yakinika iaxkawan Dios iwan Ichkatzin.
\v 5 Mach keman okijtojkej itlaj tlan amo melawak. Mach
itlaj tlajtlakole kipiaj.
\s Eyin angelestin tlapoaj
\p
\v 6 Satepan onikitak oksé ángel opatlania tlatlajko
ilwikak katlej okipiaya in yankuik tlajtole katlej temakixtia
katlej mach keman tlamis, para kintlapowis in tlaltikpaktlakaj,
de nochtin paismej, de nochi tlatlamantin tlakajtin, de
nochtin katlej tlapoaj tlatlamantle tlajtole, iwan de
nochtin pueblojtin.
\v 7 Iwan okijtoaya chikawak:
\p ―Xikimakasikan toTajtzin Dios iwan xikweyikixtikan,
porke yoajsik ora para tlaixkomakas (tlatzonmanas).
Xikweyikixtikan katlej okichij in ilwikak iwan tlaltikpak,
in mar iwan ameyaltin.
\p
\v 8 Oksé ángel oyáj ikuitlapan katlej achtoj ángel
iwan okijtoj:
\p ―Yowetzke, yowetzke in weyikan de Babilonia, katlej
oyeka kej se siwatl mach kuale katlej kintlatlapololtia
in tlakaj iwan kintoktia ma tlajtlakokan ken yej, iwan
kintlawantia ika tlajtlakole. Yon weyikan de Babilonia
ijkón okintoktiaya in tlakaj de nochi in tlaltikpak.
\p
\v 9 Satepan in ya ipan eyi ángel oyáj inkuitlapan nekatej
ome angelestin iwan okijtoj ika chikawak tlajtole:
\p ―Tla akaj kiweyikixtia in amo kuale yolkatl iwan iretrato,
iwan motekawilia ma kitlalilikan imarka itech ixkuak
o noso itech ima,
\v 10 Dios kitlajyowiltis ika nochi ichikawalis iwan
ika nochi ikualanilis. Iwan kitlajyowiltiskej ika tlitl
iwan ika azufre inmixpan iangelwan in Dios iwan ixpan
Ichkatzin.
\v 11 Iwan nochipa tlejkotos in poktle de yen tlitl
katlej kitlajyowiltijtos nochipa iwan mach keman sewis.
Iwan mach keman kipiaskej nesewile nion tonayan nion
yuak nochtin katlej kiweyikixtiskej in amo kuale yolkatl
iwan iretrato, iwan nochtin katlej motekawiliskej ma
kintlalilikan imarka de yen itoka in amo kuale yolkatl.
\v 12 Por yonik moneki amo ma mosotlawakan iwan ma kixikokan
in tlajyowilistle nochtin in tokniwan yolchipawakej,
katlej kitlakitaj itlanawatil iwan kitlaliaj intlaneltokalis
inawak Jesús.
\p
\v 13 Ijkuakón onikakke se tlajtole de ilwikak. Onechilwij:
\p ―Xikijkuilo tlan nimitzilwis: “Ma pakikan katlej mikiskej
de nian para tlayakapan nochtin katlej kineltokaj in
toSeñor.” In Espíritu Santo noijki kijta: “Melawak, sa
tekitl ma pakikan, porke yejwan mosewiskej de intekiw,
iwan Dios kintlaxtlawis ompa ilwikak por tlan okichijkej.”
\s Pixkalistle ixko tlaltikpak
\p
\v 14 Ijkuakón onikitak se mixtle istak. Iwan ipan mixtle
oewatoka yen katlej omochij tlakatl. Okipiaya se korona
de oro ipan itzontekon iwan okikitzkijtoka se oso (ojoso)
sa tekitl tlateki.
\v 15 Iwan oksé ángel okiske de ijtik itiopan Dios iwan
okitzajtzilij chikawak katlej ewatok ipan mixtle:
\p ―Xikteki ika mooso in tlakilotl. Porke yochikawak
iwan yoajsik in tonale para se kololos.
\p
\v 16 Ijkuakón katlej ewatok ipan mixtle okitemowij
ioso ipan tlaltikpak iwan okitekke in tlakilotl.
\p
\v 17 Satepan oksé ángel okiske de ijtik itiopan Dios
katlej kajki ilwikak, iwan noijki okipiaya se oso sa
tekitl tlateki.
\v 18 Iwan noijki okiske oksé ángel de itech artal katlej
okipiaya poder ika tlitl. Iwan okinotzke ika chikawak
tlajtole in ángel katlej kipia ioso tlateki. Okilwij:
\p ―Xiktemowi mooso tlateki, iwan xikololo itlakilo in
uvas katlej onkaj ixko tlaltikpak porke yochikawak.
\p
\v 19 In ángel okitemowij ioso iwan okololoj in uvas
de ixko tlaltikpak. In uvas okitenke ijtik se tanke
para ompa mopatzkas. Iayo yon uvas kijtosneki yen inmeso
de yejwan katlej kichiwaj tlan amo kuale, katlej Dios
sa tekitl kintlajyowiltis porke sa tekitl kikualaniaj.
\v 20 Yon uvas okipatzkakej kalan de yen weyikan de
Jerusalén. Iwan kan oyeka in tanke kan okipatzkakej
in uvas okiske estle. Oyeka sa tekitl miek estle iwan
otlejkok asta itech infreno in kabayojtin, iwan omotlaloj
in estle kanaj eyi siento kilómetro de wejka.
\c 15
\s Chikome angelestin katlej okinpiayaj in salúltimo chikome kokolistin
\p
\v 1 Onikitak itech ilwikak oksé señal sa tekitl weyi
iwan sa onechtlajtlachialtij (onechmajmawtij). Onikinmitak
chikome angelestin katlej okipixtokaj in salúltimo chikome
kokolistin. Nijkuak tlamiskej in yonmej chikome kokolistin,
noijki tlamis ikualanilis in Dios de inwan tlaltikpaktlakaj.
\p
\v 2 Noijki onikitak kej se mar de teskatl nelitok iwan
tlitl. Iwan ompa omoketokaj ipan yon mar de teskatl
katlej okitlankej in amo kuale yolkatl, katlej amo omotlankuaketzkej
iyakapan iretrato, iwan nion amo omotekawilijkej ma kintlalilikan
inúmero de itoka. Okinpixtokaj inmarpajwan katlej Dios
okinmakak.
\v 3 Iwan okitlakuikayaj (okuikayaj) se tlakuikale katlej
Moisés okijkuiloj katlej okitekipanoaya in toTajtzin
Dios, iwan noijki otlakuikayaj para yen Ichkatzin. Ijkín
nik otlakuikayaj:
\q Weyi iwan tetlajtlachialtij (temajmawtij) nochi tlan
tejwatzin otikchij,
\q Señor, tejwatzin Dios katlej tikpia nochi poder.
\q Tikchiwa tlan kuale iwan tlan melawak,
\q tejwatzin tiRey de nochtin paismej.
\q
\v 4 ¿Akin amo mitzimakasis, Señor?
\q ¿Akin amo mitzweyikixtis?
\q San yen tejwatzin tiyolchipawak,
\q iwan nochtin tlaltikpaktlakaj de nochtin paismej witzej
iwan mitzweyikixtiskej,
\q porke in tlaltikpaktlakaj kitaj nik tikchiwa nochi
tlan kuale.
\p
\v 5 Satepan onikitak itech ilwikak in weyi tiopan iwan
otlatlapowik Kan Tlixpantzin, kan kajki in akuerdo katlej
Dios okichij inwan itlaneltokakej.
\v 6 Ijtik in weyi tiopan okiskej in chikome angelestin
katlej okinpixtokaj in chikome kokolistin. Otlakentitokaj
ika tzotzole katlej kuale itoka lino, chipawak iwan opetlania.
Noijki okipiayaj intlajkoilpika de oro asta inmelpan.
\v 7 Satepan se de yen nawi katlej yolitokej, okinmakak
kada se de yen chikome angelestin se kopa de oro tentok
de ikualanilis in Dios katlej nochipa yolitok.
\v 8 In weyi tiopan otenke de poktle katlej owalaj de
imawisotlanex iwan de ipoder in Dios. Iwan mach akaj
owelia okalakia ijtik in weyi tiopan mientras in chikome
angelestin ayamo otlamiaj okinnokiayaj in chikome kokolistin.
\c 16
\s Chikome kopajtin de ikualanilis Dios
\p
\v 1 Satepan onikakke se chikawak tlajtole katlej okiske
de ijtik in weyi tiopan, iwan okinmilwij in chikome angelestin:
\p ―Xiwian xikinnokitij ipan tlaltikpak in chikome kopajtin
katlej tentokej de ikualanilis in Dios, para kintlajyowiltis
in tlaltikpaktlakaj.
\p
\v 2 Achtoj se ángel oyáj iwan okinokij ikopa ipan tlaltikpak,
iwan nochtin in tlaltikpaktlakaj katlej okipiayaj imarka
in amo kuale yolkatl iwan katlej okiweyikixtiayaj iretrato,
intech okiskej tzotzomej sa tekitl bierotikej iwan sa
tekitl tetonejkej.
\p
\v 3 In ya ipan ome ángel okinokij ikopa ijtik atl, iwan
in atl omokuepke estle kej ieso se mikkatl, iwan nochtin
in yolkamej katlej onemiaj ijtik atl omikkej.
\p
\v 4 In ya ipan eyi ángel okinokij ikopa ijtik weyamej
iwan ijtik ameyaltin, iwan nochi in atl omokuepke estle.
\v 5 Satepan onikakke in ángel katlej kinawatia in atl.
Okijtoj:
\p ―Tejwatzin otikchij ken moneki, Señor, tejwatzin tiyolchipawak,
tejwatzin katlej axan tikaj iwan katlej achtoj yotieka.
\v 6 Porke yejwan okinmiktijkej katlej moaxkawan iwan
moprofetajwan. Iwan axan tejwatzin tikinmaka ma konikan
estle, para ma kitlaxtlawakan por tlan okichijkej.
\p
\v 7 Noijki onikakke se tlajtole katlej omokakke desde
itech artal. Okijtoj:
\p ―Melawak, Señor, tejwatzin toTajtzin Dios katlej tikpia
nochi poder, yon tlan tejwatzin tikchiwa para tikintlajyowiltia
in tlakaj, yon melawak iwan tikchiwa ijkón ken intech
moneki.
\p
\v 8 In ya ipan nawi ángel okinokij ikopa ipan tonale,
iwan tonale okimakakej poder para ma kinchichino in
tlakaj ika itliyo.
\v 9 Iwan tlaltikpaktlakaj sa tekitl otlatlakej ika
itliyo in tonale, pero mach omoyolpejpenkej (omoyolkuepkej)
iwan nion mach okiweyikixtijkej in toTajtzin Dios, katlej
kipia poder itech in yonmej kokolistin katlej kintitlanilijtok,
sino yej okiwikaltijkej in Dios.
\p
\v 10 In ya ipan makuile ángel okinokij ikopa ipan isiya
in amo kuale yolkatl, iwan kan tlanawatia otlatleyuak
chikawak. Iwan tlakaj asta omonenepiltetexoayaj porke
sa tekitl otlajyowiayaj.
\v 11 Iwan okiwikaltiayaj in toTajtzin Dios katlej kajki
ilwikak, porke otlajyowiayaj iwan porke otenkej de tzotzomej,
pero maski ijkón, mach okikajkej tlan amo kuale.
\p
\v 12 In ya ipan chikuasen ángel okinokij ikopa ijtik
in weyatl itoka Eufrates, iwan in atl owakke, para ijkón
otlapowik se ojtle kan panoskej in reytin katlej witzej
ik ikisayan tonale.
\p
\v 13 Satepan onikitak de ijtik iten in koatl, iwan de
ijtik iten in amo kuale yolkatl, iwan noijki de ijtik
iten in profeta tekajkayaj, okiskej eyin ejekamej mach
kualtin katlej omotayaj kej kalamej (ranas).
\v 14 Yonmej iejekawan in Amo Kuale Tlakatl oweliaj
okinchiwayaj wejweyin señalestin. Okisayaj para kinmololoskej
nochtin reytin de ixko yin tlaltikpak para momagaskej
(momakaskej) iwan Dios itech nekáj weyi tonale katlej
yokitlalij in Dios katlej kipia nochi poder.
\v 15 Ijkuakón Jesucristo okijtoj: “Xikkaki, mach akaj
kimati keman niwitz, porke Nej niwitz ijkón ken nijkuak
witz se ichtekke. Ma paki akin ijsatos iwan kimalwijtos
itzotzol, para satepan amo nemis xitlatztik iwan amo
pinawas nijkuak kitaskej.”
\p
\v 16 Iwan eyin ejekamej mach kualtin okinmololojkej
in reytin se lugar kan kitokaxtiaj ika tlajtole hebreo
Armagedón.
\p
\v 17 In ya ipan chikome ángel okinokij ikopa ixko ejekatl,
iwan omokakke se tlajtole chikawak de kan weyi tiopan
de ilwikak, iwan omokakke okiske kan kajki in siya. Okijtoj:
\p ―Nochi yotlanke yomochij.
\p
\v 18 Ijkuakón otlapejpetlanke, otlakukuyokak iwan otlatijtikuinke.
Otlalolinke sa tekitl chikawak ixko yin tlaltikpak ke
mach keman ijkón nik tlalolini desde ijkuak oneskej
in tlakaj ixko yin tlaltikpak.
\v 19 In weyikan de Babilonia katlej sa tekitl weyi,
otlapanke iwan omochij eyi pedaso, iwan in weyikantin
de nochi in tlaltikpak oxixitinkej. Dios mach okelkaj
in weyikan de Babilonia para kitlajyowiltis chikawak
ika ikualanilis.
\v 20 Nochtin in tlalmej katlej pankistokej itech atl
iwan nochtin in tepemej opolikej.
\v 21 Noijki owetzke wejweyi tesiwitl de ilwikak iwan
otepewik inpan tlaltikpaktlakaj. Kada se tesiwitl oyeka
etik kej omenpoale kilo. Iwan tlaltikpaktlakaj okiwikaltijkej
in toTajtzin Dios por okintitlanilij yon kokolistle
de tesiwitl katlej oyeka sa tekitl teixpoloj.
\c 17
\s In siwatl katlej weyi momekatij
\p
\v 1 Ijkuakón owalaj se de yonmej chikome angelestin
katlej okinpiayaj in chikome kopajtin, iwan onechilwij:
\p ―Xiwiki iwan nimitzititis tlan panos in siwatl katlej
wel momekatij, katlej ewatok inpan miekej amej.
\v 2 In reytin de nochi in tlaltikpak okimomekatijkej
in yon siwatl. Iwan tlaltikpaktlakaj omotlawantijkej
ika ivino, kijtosneki in tlaltikpaktlakaj okimomekatijkej
in yon siwatl.
\p
\v 3 Satepan in Espíritu Santo notech owalaj iwan onechwikak
kan tlawaki, iwan onikitak se siwatl ewatok ipan se amo
kuale yolkatl chichiltik. Yon amo kuale yolkatl otentoka
de tokayomej katlej ika okiwikaltiayaj in toTajtzin
Dios, iwan okinpiaya chikome itzontekonwan iwan majtlaktle
ikuakuawan.
\v 4 In siwatl otzotzolejtoka ika itzotzol moradotik
iwan chichiltik. Ochijchitoka ika oro, ika perlas iwan
ika tetzitzintin katlej petlanij iwan patiojkej. Okitzkijtoka
se kopa de oro tentok de tlajtlakole bierotik katlej
Dios mach kiwelita, iwan noijki tentok de tlajtlakole
mach kuale ken nijkuak in tlakaj kinneltokaj oksekimej
diosmej.
\v 5 Itech ixkuak oijkuilitoka se tokayotl katlej mach
akaj okimomakaya kuenta tlan kijtosneki. Yon tokayotl
ijkín okijtoayaj: “Weyikan de Babilonia, in tenan de
nochtin in siwamej momekatijkej, iwan de nochtin katlej
kinneltokaj oksekimej diosmej, iwan de nochi tlajtlakole
pitzotik de ixko yin tlaltikpak katlej Dios mach kiwelita.”
\v 6 Iwan onikmomakak kuenta nik in yon siwatl oiwintitoka
ika inmeso de yen tokniwan yolchipawakej iwan ika inmeso
de katlej okinmiktijkej por otetlapowiayaj de Jesús.
Nijkuak ijkón onikitak, sa tekitl sa onitlajtlachixke
(onimomajmawtij).
\v 7 Ijkuakón in ángel onechilwij:
\p ―¿Tlanik wel timotlajtlachialtia (timomajmawtia)?
Nimitzilwis tlanon kijtosneki tlan otikitak de yon siwatl
iwan de yen amo kuale yolkatl katlej ipan yetiw, katlej
kinpia chikome itzontekonwan iwan majtlaktle ikuakuawan.
\v 8 In amo kuale yolkatl katlej otikitak yen katlej
achtoj yoyeka, pero axan mach ok yolitok. Pero maski
mach ok yolitok, yej walkisas de ijtik kuyoktle katlej
mach kipia kan tlantok, iwan satepan yas kan nochipa
tlajyowijtos. Iwan nochtin in tlaltikpaktlakaj, katlej
mach nestok intoka itech libro kan ijkuilitok intoka
nochtin katlej kipiaj yankuik nemilistle desde ijkuak
opéj in tlaltikpak, sa tekitl motlajtlachialtiskej (momajmawtiskej)
nijkuak kitaskej in amo kuale yolkatl, katlej achtoj
yoyeka, pero axan mach yolitok, iwan katlej oksemi witz.
\p
\v 9 ’Nian onkaj sekin tlamantle para katlej kipiaj
kuale intlalnamikilis: In chikome itzontekonwan in amo
kuale yolkatl kijtosneki chikome tepemej katlej ipan
ewatok in siwatl,
\v 10 iwan noijki kijtosneki chikomen reytin. Makuiltin
de yonmej reytin yomikkej. Se de yonmej reytin axan
tlanawatijtok, iwan oksé asta axan mach ya witz. Pero
nijkuak witz in yon rey katlej poliwi, mach wejkawas
tlanawatis.
\v 11 In amo kuale yolkatl katlej achtoj yoyeka, iwan
katlej axan mach ok yolitok, yen ya ipan chikueyi rey.
Yej noijki inwan powi in chikome reytin iwan katlej
tlanawatis oksemi, pero satepan yas kan nochipa tlajyowijtos.
\p
\v 12 ’In majtlaktle kuakuawmej katlej otikinmitak kijtosneki
majtlaktle reytin katlej mach ya tlanawatiaj. Pero kinmakaskej
tekiwajkayotl de reytin san sekan iwan amo kuale yolkatl,
iwan mach wejkawaskej tlanawatiskej.
\v 13 Yonmej majtlaktin reytin motlaliskej san se tlajtole,
intekiwajkayo kimakaskej in amo kuale yolkatl.
\v 14 Yejwan kimomagaskej (kimomakaskej) iwan Ichkatzin,
pero in Ichkatzin kintlanis. Porke in Ichkatzin yen
inTeko de nochtin in tekomej iwan yen Tlanawatij de
nochtin in tlatlanawatijkej. Iwan katlej katej iwan
Ichkatzin, Dios okinnotzke iwan okinpejpenke, iwan nochipa
okitlakitakej in Ichkatzin.
\p
\v 15 In ángel noijki onechilwij:
\p ―In yonmej amej katlej otikinmitak, katlej inpan ewatok
in siwatl momekatij, kijtosneki yen nochtin in tlaltikpaktlakaj
de nochtin pueblojtin, de nochtin katlej tlapoaj tlatlamantle
tlajtole, iwan de nochtin paismej.
\v 16 Iwan yonmej majtlaktin kuakuawmej katlej otikinmitilij
in amo kuale yolkatl, kikokoliskej in siwatl momekatij.
Kikixtiliskej nochi tlan kipia iwan kixitlatzoskej.
Kikuaskej itlalnakayo iwan kichichinoskej ika tlitl.
\v 17 Dios okintlalilij ipan inyolo in reytin para ma
kichiwakan tlan Dios kineki. Yejwan motlaliskej san
se tlajtole iwan kimakaskej intekiwajkayo in amo kuale
yolkatl, para ma tlanawati asta ijkuak ma mochiwa nochi
tlan Dios yokijtoj tlapanos.
\v 18 Iwan siwatl katlej otikitak, kijtosneki yen weyi
weyikan katlej kinnawatia nochtin in reytin de ixko
yin tlaltikpak.
\c 18
\s Wetzi in weyikan de Babilonia
\p
\v 1 Satepan de yin, onikitak oksé ángel katlej owaltemoaya
de ilwikak ika weyi ipoder. Iwan okitlawilij nochi in
tlaltikpak ika itlanexo.
\v 2 Iwan otzajtzik chikawak, okijtoj:
\p ―Yowetzke, yowetzke in weyikan de Babilonia, axan ompa
yomochantijkej in demoniojtin, yomochij inchan in ejekamej
mach kualtin, iwan ompa yomotepajsoltijkej nochi tlamantle
de totomej mach kualtin iwan mach chipawakej.
\v 3 Porke nochtin in paismej yomotlawantijkej ika ivino
katlej okintoktij ma tlajtlakolchiwakan iwan amo ma
kitlakitakan Dios. Kijtosneki nochtin in reytin de ixko
yin tlaltikpak okintoktij ma kinneltokakan idioswan.
Iwan tlasemankej de nochi in tlaltikpak omorikojtilijkej
ika nochi tlamantle tlan kipia in yon weyikan.
\p
\v 4 Satepan onikakke oksé tlajtole de ilwikak, okijtoj:
\p ―Xikisakan de itech yon weyikan, namejwan katlej annoaxkawan,
para amo inwan xitlajtlakokan, iwan para amo inwan antlajyowiskej.
\v 5 Porke yejwan sa panoa kuenta tlajtlakoaj iwan intlajtlakol
yoajsito asta ilwikak. Iwan axan Dios yokelnamikke nochi
tlan amo kuale tlan kichiwa yon weyikan.
\v 6 Xikkuepaltikan tlan amo kuale in yon weyikan ijkón
ken yej okintoktij tlan amo kuale in oksekimej. Xikkuepaltikan
ome tanto de tlan okichij. Ijkón ken yej okichichilij
in tlaonilistle para okinmakak in oksekimej, axan yej
noijki xikchichililikan in tlaonilistle ome tanto okachi
chichik iwan ma koni.
\v 7 Xikmakakan tekokojkayotl iwan tlajyowilistle no
ijkón ken omoweyineke iwan omopaktij ika irikojyo. Porke
ipan iyolo kijta: “Nej nian niewatok kej nireina, mach
niviuda, iwan mach keman nimoyolkokos.”
\v 8 Por yonik, san itech se tonale ipan witz tlajyowilistle.
Panos mikilistle, neyolkokole, apistle iwan tlatlas. Porke
in toSeñor kipia weyi ipoder para kitlajyowiltis.
\p
\v 9 In reytin de ixko yin tlaltikpak katlej okimomekatijkej
iwan omopaktijkej ika inrikojyo, chokaskej iwan moyolkokoskej
nijkuak kitaskej ipokyo in tlitl nijkuak tlatlas in
weyikan.
\v 10 Yejwan san wejka konitoskej porke kimakasiskej
itlajyowilis tlan panos, iwan kijtoskej:
\p ―¡Ay! Pobre de tej, weyikan de Babilonia katlej okachi
otitlatlantoka de nochtin. Axan san totokatijkak mopan
owalaj motlajyowilis.
\p
\v 11 In tlasemankej de nochi in tlaltikpak noijki chokaskej
iwan moyolkokoskej por yon weyikan, porke mach ok akaj
kinkowilis tlan yejwan kinamakaj.
\v 12 Mach ok kikowaskej oro, plata, tetzitzintin katlej
petlanij, perlas, tzotzole de lino katlej kuale, tzotzole
de seda, iwan tzotzole katlej moradotik iwan chichiltik.
Noijki nochi tlamantle de kuawitl ajwiak, nochi tlamantle
tlachiwale ika marfil, ika kuawitl kuakualtzin, ika tepostle
de bronce, ika tepostle de hierro iwan ika tetl de marmol,
\v 13 canela, xiwitl ajwiakayotl, kopale, mirra, ajwiakayotl
katlej se kimotlalilia, vino, aseite, arina katlej kuale,
trigo, yolkamej katlej tlamamaj, ichkamej, kabayojtin, karretajtin,
iwan asta tlakaj katlej tlanamaktin, kijtosneki in tlakaj
katlej kinnamakaj para kitekipanoaj oksé tlakatl nochipa.
\v 14 Iwan kilwiskej yon weyikan:
\p ―Mach ok tikpia in welik tlakilotl katlej otikwelitaya.
Iwan axan iktlanke (ik tlami) yotikpoloj nochi tlan
kuale iwan nochi tlan otikwelitaya.
\p
\v 15 In tlasemankej de yonmej tlamantin, katlej omorikojtilijkej
itech yon weyikan, san wejka konitoskej in weyikan porke
kimakasiskej itlajyowilis tlan panos, iwan yejwan chokaskej
iwan moyolkokoskej.
\v 16 Iwan kijtoskej:
\p ―¡Ay! Pobre weyikan. Oyeka kej se siwatl otlakentitoka
ika kuale tzotzole itoka lino iwan ika tzotzole moradotik
iwan chichiltik. Ochijchitoka ika oro, ika tetzitzintin
patiojkej katlej petlanij iwan ika perlas.
\v 17 Axan san totokatijkak otlanke nochi in rikojyotl.
\p Nochtin kapitanmej de yen barkojtin, nochtin katlej
okitlaxtlajkej para yaskej itech barko, nochtin katlej
tekipanoaj itech barko, iwan nochtin katlej tekipanoaj
itech atl, san wejka konitoskej in weyikan.
\v 18 Iwan nijkuak kitaskej ipokyo in tlitl nijkuak
tlatlatos in weyikan, kijtoskej:
\p ―Mach oyeka oksé weyikan katlej okachi ma tlayekanto
ke yin weyikan.
\p
\v 19 Yejwan mokuatlaltemiskej kej se señas nik sa tekitl
moyolkokoaj. Chokaskej iwan moyolkokoskej, kijtoskej:
\p ―¡Ay! Pobre weyikan. Ika irikojyo omorikojtilijkej
nochtin katlej okinpiayaj inbarkojwan. Iwan axan san
totokatijkak nochi otlanke.
\p
\v 20 Pero xipakikan namejwan katlej ankatej ilwikak
porke in weyikan yokixpolojkej. Noijki xipakikan namejwan
antlatitlaniltin, namejwan antokniwan yolchipawakej iwan
namejwan anprofetajtin, porke Dios yokitlajyowiltij in
weyikan por yen tlan amo kuale oamechtoktij.
\p
\v 21 Ijkuakón se ángel ika ichikawalis okajkokke se
weyi tetl kej imetlayo in molino, iwan okitlamotlak ijtik
atl. Iwan okijtoj:
\p ―Ijkín noijki kitlamotlaskej in weyikan de Babilonia,
iwan mach ok keman akaj kitas.
\v 22 Mach ok keman se kinkakis kintzotzonaskej arpajtin,
flautajtin iwan tlapitzaltin itech yon weyikan. Iwan
ayakmo yetos nion se tekipanoj de itlaj tlamantle tekitl,
iwan mach ok keman mokakis ma tlapayana se molino.
\v 23 Nion se tlanextle mach ok tlawis itech moweyikan,
iwan mach ok keman mokakis ilwichiwaj kan monamiktiaj.
Porke motlasemankej oyekaj wejweyikistokej (wejweyititokej)
de ipan tlaltikpak, iwan ika motexoxalis (mobrujojkayo)
otikinkajkayaj nochtin in paismej.
\p
\v 24 Tej weyikan de Babilonia, por tej motlajtlakol,
okinmiktijkej in profetajtin iwan katlej Dios iaxkawan,
iwan nochtin katlej okinmiktijkej ixko yin tlaltikpak.
\c 19
\s Omokakke weyikixtilistle itech ilwikak
\p
\v 1 Satepan de yon, onikinkakke miekej otlajtoayaj chikawak
ompa ilwikak. Okijtoayaj:
\q Ma tikweyikixtikan in toTajtzin Dios porke Yej techmakixtia.
\q Ma tikweyikixtikan porke Yej kipia weyi ipoder.
\q
\v 2 Yej tlaixkomaka (tlatzonmanas) ika melajkayotl ijkón
ken moneki.
\q Yokitlajyowiltij in siwatl katlej weyi momekatij,
\q katlej ika imomekatilis okinmijtlakoj in tlaltikpaktlakaj.
\q Dios yokikuepaltij in siwatl momekatij inmikilis de
yen itekipanojkawan in Dios.
\p
\v 3 Iwan oksemi okijtojkej:
\p ―¡Ma tikweyikixtikan toTajtzin Dios! Porke ipokyo
in yon weyikan katlej yokixpolojkej nochipa tlejkotos
ipokyo.
\p
\v 4 In senpoale iwan nawi tetajtzitzintin iwan in nawin
katlej yolitokej, omotlankuaketzkej ipan tlale iwan okiweyikixtijkej
in toTajtzin Dios, katlej oewatoka ipan isiya. Iwan okijtojkej:
\p ―¡Ijkón ma yeto! ¡Ma tikweyikixtikan toTajtzin Dios!
\p
\v 5 Ijkuakón omokakke se tlajtole katlej okiske kan
kajki in siya iwan okijtoaya:
\q Nochtin namejwan katlej ankitekipanoaj
\q iwan katlej ankimakasij in toTajtzin Dios,
\q wejweyin iwan tzitzikinmej,
\q xikweyikixtikan toTajtzin Dios.
\s Monamiktia in Ichkatzin iwan kiilwichiwiaj
\p
\v 6 Noijki onikakke kej intlajtol de miekej tlakaj,
ken nijkuak mokaki kukuyokaj miekej weyamej iwan chikawak
tlatijtikuini. Okijtoayaj:
\q ¡Ma tikweyikixtikan toTajtzin Dios! Porke yopéj tlanawatia
in toSeñor, in toTajtzin Dios katlej kipia nochi poder.
\q
\v 7 Ma tipakikan, ma titemikan ika pakilistle iwan ma
tikweyikixtikan toTajtzin Dios,
\q porke yoajsiko in tonale para monamiktis in Ichkatzin,
\q iwan katlej yetos isiwa yomoyejyektlalij.
\q
\v 8 Iwan okimakakej ma motzotzolti ika itzotzol de lino
katlej kuale, chipawak iwan petlantok.
\m Lino katlej kuale kijtosneki yen inmelajkanemilis
in tokniwan yolchipawakej.
\p
\v 9 Ijkuakón in ángel onechilwij:
\p ―Xikijkuilo: “Ma pakikan akinmej okinnotzkej para
tlakuaskej itech ilwitl nijkuak monamiktis in Ichkatzin.”
\p Iwan noijki onechilwij:
\p ―Yin tlajtole melawak itlajtol in Dios.
\p
\v 10 Nej onimotlankuaketzke ikxitlan ángel para nikweyikixtis,
pero yej onechilwij:
\p ―Amo xinechweyikixti. Porke nej noijki niktekipanoa
in toTajtzin Dios ijkón ken tej iwan mokniwan katlej
kichijtokej tlan kijta itlamachtil in Jesús. Moneki
xikweyikixti yen toTajtzin Dios.
\p Tlan se kitematiltia de Jesús yen yon tlan okachi
okintekipachoaya kitematiltiskej in profetajtin.
\s Katlej ipan oyetiaya in kabayo istak
\p
\v 11 Satepan onikitak in ilwikak tlapotok, iwan owalmonextij
se kabayo istak. Iwan katlej ipan oyetiaya itoka Kichiwa
Tlan Kijta iwan noijki itoka Melawak. Porke tlaixkomaka
(tlatzonmana) iwan temaga (temaka) ken moneki.
\v 12 Ixtololowan oxotlatokaj kej tlitl, iwan itech itzontekon
okinpiaya miekej koronajtin. Iwan okipiaya itoka ijkuilitok
katlej mach akaj okimatia tlanon kijtosneki, sino san
Yej okimatia.
\v 13 Otzotzolejtoka ika itzotzol sa matztik ika estle,
iwan itoka Dios iTlajtol.
\v 14 In soldadojtin de ilwikak ikuitlapan owalayaj
ipan kabayojtin istakej, otlakentitokaj ika intlaken
de lino katlej kuale, istak iwan chipawak.
\v 15 De ijtik iten okisaya se espada sa tekitl tlateki,
katlej ika kinmagas nochtin in paismej. Iwan Yej kinnawatis
ika se vara de tepostle kej tekiwaj. Iwan kintoktis
ken kitoktiaj in uvas nijkuak ipan tlajtlaksaj para
kipatzkaj, kijtosneki sa tekitl kintlajyowiltis ika ikualanilis
in Dios katlej kipia nochi poder.
\v 16 Itech itzotzol iwan itech imetztomawakan oijkuilitoka
yin tokayotl: “Tlanawatij de nochtin tlatlanawatijkej
iwan inTeko de nochtin tekomej.”
\p
\v 17 Satepan onikitak se ángel katlej omoketoka ipan
tonale iwan okintzajtzilij chikawak nochtin in totomej
katlej patlantinemij ilwikak:
\p ―Xiwikikan iwan ximololokan para ankikuaskej se weyi
tlakuale katlej Dios amechmakas.
\v 18 Ankinkuaskej intlalnakayo in reytin, intlalnakayo
in kapitanmej iwan intlalnakayo in tlakaj katlej chijchikawakej.
Noijki ankinkuaskej innakayo in kabayojtin iwan intlalnakayo
katlej inpan yetinemij, intlalnakayo de nochtin tlakaj,
maski tlanamaktin o noso amo tlanamaktin, maski wejweyin
o noso tzitzikinmej.
\p
\v 19 Ijkuakón onikitak in amo kuale yolkatl iwan nochtin
reytin de ixko yin tlaltikpak iwan insoldadojwan, omololojkej
para kimomagaskej iwan katlej ipan oyetiaya in kabayo
istak iwan isoldadojwan.
\v 20 In amo kuale yolkatl okikitzkijkej, iwan noijki
okikitzkijkej in profeta tekajkayaj katlej owelia okinchiwaya
wejweyin señalestin ixpan amo kuale yolkatl. Ika yonmej
señalestin okinkajkayaj katlej omotekawilijkej ma kintlalilikan
imarka in amo kuale yolkatl iwan okiweyikixtijkej iretrato.
In amo kuale yolkatl iwan profeta tekajkayaj, nochtin
omen okintlamotlakej san ken yolitokej ijtik tliko kan
xotlatok in tlitl ika azufre.
\v 21 Iwan nochtin oksekimej insoldadojwan okinmiktijkej
ika iespada tlateki katlej okisaya de ijtik iten de
yen katlej oyetiaya ipan ikabayo istak. Iwan nochtin
in totomej otlakuajkej ika yon nakatl asta kan oixwikej.
\c 20
\s Panoa mil xiwitl
\p
\v 1 Satepan onikitak se ángel owaltemoaya de ilwikak
kitzkijtiwitz se kadena itech ima iwan se yabe de yen
kuyoktle katlej mach kipia kan tlantok.
\v 2 In ángel okitzkij in koatl, yen katlej yoyeka desde
ya wejkawitl, katlej noijki itoka diablo o noso Satanás,
iwan okilpij ika kadena para ma ilpito mil xiwitl.
\v 3 In ángel okitlamotlak in Satanás ijtik in kuyoktle
katlej mach kipia kan tlantok iwan ompa okitzakke. Noijki
kuale okitzakke in puerta para amo welis kisas in Satanás,
para ayakmo ma kinkajkayawa okachi in tlaltikpaktlakaj
de nochtin paismej, asta ijkuak ma pano mil xiwitl. Nijkuak
tlamis in yon mil xiwitl, kikajkawaskej kanaj keski tonale.
\p
\v 4 Satepan onikinmitak miekej siyajtin iwan inpan
oewatokaj katlej okinmakakej tekiwajkayotl para tlaixkomakaskej
(tlatzonmanaskej). Iwan onikinmitak inmanimajwan de
yejwan katlej okinkechtzontekej por okitematiltiayaj
in tlamachtile de Jesús iwan por otetlapowiayaj de itlajtol
in Dios. Yejwan mach okiweyikixtijkej in amo kuale yolkatl
iwan iretrato, iwan nion mach omotekawilijkej ma kintlalilikan
imarka in amo kuale yolkatl itech inmixkuak o noso itech
inma. Onikinmitak omoyolkuikej iwan otlanawatijkej iwan
Cristo mil xiwitl.
\v 5 Yonmej yejwan katlej achtoj omoyolkuikej. Pero
in oksekimej mikkamej mach moyolkuiskej (moyolitiskej)
asta ma pano in mil xiwitl.
\v 6 Sa tekitl ma pakikan in tokniwan yolchipawakej
katlej achtoj moyolkuiskej. Yejwan mach mikiskej ojpa
ken oksekimej, sino yejwan yeskej tiopixkej inawak Dios
iwan inawak Cristo. Iwan tlanawatiskej iwan Cristo mil
xiwitl.
\p
\v 7 Nijkuak panos in yon mil xiwitl, Satanás mach ok
tzaktos, sino kikajkawaskej.
\v 8 Kisas para kinkajkayawas in tlaltikpaktlakaj de
nochtin paismej. Kijtosneki yen Gog iwan Magog. Kinmololos
nochtin para kichiwaskej guerra. Yeskej sa tekitl miekej
sa ken xale katlej onkaj itempan atl.
\v 9 Witzej de nochi in tlaltikpak iwan kiyawaloskej
kan yeskej in tokniwan yolchipawakej iwan weyikan katlej
Dios kitlasojtla. Pero Dios kiwaltitlanis tlitl de ilwikak
iwan kinchichinos nochtin.
\v 10 Iwan diablo, katlej okinkajkayaj, kitlamotlaskej
ijtik tliko kan xotlatok in tlitl ika azufre, kan kajki
in amo kuale yolkatl iwan profeta tekajkayaj. Ompa tlajyowijtoskej
iktlanke (ik tlami) yuale tonale.
\s Dios tlaixkomakas (tlatzonmanas)
\p
\v 11 Satepan onikitak se weyi siya istak, iwan noijki
onikitak katlej ompa ipan oewatoka. Iwan ompa ixpan,
in tlaltikpak iwan ilwikak san owalpolikej, porke mach
ok oyeka lugar para yejwan.
\v 12 Iwan onikinmitak in mikkamej, wejweyin iwan tzitzikinmej,
omoketokaj iyakapan Dios. Iwan toTajtzin Dios okintlapoj
in librojtin, iwan noijki okitlapoj in oksé libro kan
oijkuilitokaj intoka nochtin katlej kipiaj yankuik nemilistle.
Dios okinmixkomakak in mikkamej iwan okinmakak inlugar
según tlan okichijkej, iwan según tlan oijkuilitoka itech
yonmej librojtin.
\v 13 In mikkamej katlej oyekaj ijtik atl okiskej, noijki
in mikilistle iwan lugar kan oyekaj animajtin de katlej
yomikkaj, okintemakakej in mikkamej katlej okinpixtokaj.
Iwan nochtin okinmixkomakakej iwan okinlugartijkej según
tlan okichijkej.
\v 14 Satepan in mikilistle iwan lugar kan oyekaj in
animajtin de katlej yomikkaj, okintlamotlakej ijtik tliko.
Yon tliko yen ya ipan ojpa mikilistle.
\v 15 Iwan noijki ompa okintlamotlakej nochtin katlej
mach onestokaj intoka itech libro kan ijkuilitokej nochtin
katlej kipiaj yankuik nemilistle.
\c 21
\s Yankuik ilwikak iwan yankuik tlaltikpak
\p
\v 1 Satepan onikitak se yankuik ilwikak iwan se yankuik
tlaltikpak. Porke in achtoj ilwikak iwan achtoj tlaltikpak
opolikej, iwan mach ok oyeka in atl.
\v 2 Nej niJuan, onikitak se weyikan chipawak, yen yankuik
weyikan de Jerusalén, owaltemoaya de ilwikak kan kajki
in toTajtzin Dios. Sa tekitl kuakualtzin omotaya ken
se novia nijkuak mochijchiwa para monamiktis iwan iokich.
\v 3 Iwan onikakke se tlajtole chikawak de ilwikak.
Okijtoj:
\p ―Xikita. Dios axan chanti inwan tlakaj. Yej inwan
chantis iwan yeskej iaxkawan, Yej inewian inwan yetos
iwan Yej yetos inDios.
\v 4 Dios kinmixayowajwatzas, iwan mach ok yetos mikilistle,
nion chokilistle, nion neyolkokole, iwan nion tekokojkayotl,
porke nochi tlan achtoj oyeka, yopanok.
\p
\v 5 Ijkuakón katlej oewatoka ipan isiya, okijtoj:
\p ―Xikita. Nej nikchiwas nochi tlamantle yankuik.
\p Noijki okijtoj:
\p ―Xikijkuilo tlan nimitzilwia, porke melawak tlan nimitzilwia
iwan kuale para kineltokaskej.
\p
\v 6 Iwan onechilwij:
\p ―Nochi ya kuale kajki. Nej niachtoj iwan Nej niitlamian
de nochi tlamantle ijkón ken abecedario pewa ika A iwan
tlami ika Z. Akin amikis, Nej nikmakas atl de yen ameyale
katlej kitemaka yankuik nemilistle, iwan san niktliokolis.
\v 7 Akin tlatlanis itech nochi tlan amo kuale tlan
panos, nikmakas nochi yin tlamantle kej herencia. Iwan
Nej nietos niiDios iwan yej yetos nokone.
\v 8 Pero katlej kimakasij tlajyowiskej nonawak, iwan
katlej mach kineltokaj notlajtol, iwan katlej kichiwaj
tlan amo nikwelita, iwan katlej temiktijkej, iwan katlej
momekatiaj, iwan katlej texoxkej (brujojtij), iwan katlej
kinweyikixtiaj in santojtin, iwan nochtin katlej tekajkayajkej,
yejwan yaskej ijtik tliko kan xotlatok in tlitl ika
azufre. Yen yon katlej ya ipan ojpa mikilistle.
\s In yankuik weyikan de Jerusalén
\p
\v 9 Satepan owalaj se de yen chikome angelestin katlej
okinpixtokaj chikome kopajtin tentokej ika nochi in
salúltimo chikome kokolistin. Iwan onechilwij:
\p ―Xiwiki, iwan nimitzititis in ichpochtle katlej yetos
isiwa in Ichkatzin.
\p
\v 10 In Espíritu Santo notech oyeka iwan onechwikak
ipan se tepetl weyi iwan wejkapan, iwan ompa onechititij
in chipawaktzin weyikan de Jerusalén, owaltemoaya de
ilwikak kan kajki in Dios.
\v 11 In weyikan opetlania ika imawisotlanex Dios. Ipetlanilis
oyeka kej ipetlanilis se tetl kuakualtzin katlej petlani,
kej se tetzintle de jaspe katlej mota kej teskatl.
\v 12 In weyikan okiyawalojtoka se tepamitl weyi iwan
wejkapan, iwan okinpiaya majtlaktle iwan ome puertajtin,
iwan noijki oyeka se ángel itech kada se puerta. Iwan
itech yonmej puertajtin oijkuilitokaj intoka de yen
majtlaktle iwan ome familias de Israel.
\v 13 Oyekaj eyi puertajtin ik ikisayan tonale, eyi puertajtin
ik ajko, eyi puertajtin ik tlani iwan eyi puertajtin
ik ipoliwian tonale.
\v 14 In tepamitl de yen weyikan okinpiaya majtlaktle
iwan ome cimientos de temej, iwan itech yonmej temej
oijkuilitokaj intoka de yen majtlaktle iwan omen itlatitlanilwan
in Ichkatzin.
\p
\v 15 In ángel katlej onechtlapowijtoka okipiaya se
tlatamachiwalkuawitl (metro) de oro, para ika kitamachiwas
in weyikan, ipuertajwan iwan itepanyo.
\v 16 In weyikan oyeka kuadrado. De weyak iwan de patlawak
oyeka san se parejo. In ángel okitamachij in weyikan
ika tlatamachiwalkuawitl, iwan okipiaya ome mil iwan
ome siento kilómetro kada se lado. De weyak iwan de
wejkapan iwan de patlawak oyekaj san se parejo.
\v 17 Satepan okitamachij in tepamitl, iwan okipiaya
eyinpoale iwan nawi metro. In ángel otlatamachij ika
itlatamachiwal ijkón ken tejwan titlatamachiwaj.
\p
\v 18 In tepamitl oyeka tlachiwale ika tetl de jaspe,
iwan weyikan oyeka tlachiwale ika oro katlej omotaya
kej vidrio chipawak.
\v 19 In temej de yen icimiento in tepamitl ochijchitokaj
ika miek tlamantle de tetzitzintin kuakualtzitzintin.
Ipan se cimiento ochijchitoka ika jaspe, ipan ome cimiento
ochijchitoka ika zafiro, ipan eyi cimiento ochijchitoka
ika ágata, ipan nawi cimiento ochijchitoka ika esmeralda,
\v 20 ipan makuile cimiento ochijchitoka ika ónice, ipan
chikuasen cimiento ochijchitoka ika cornalina, ipan chikome
cimiento ochijchitoka ika crisólito, ipan chikueyi cimiento
ochijchitoka ika berilo, ipan chiknawi cimiento ochijchitoka
ika topacio, ipan majtlaktle cimiento ochijchitoka ika
crisoprasa, ipan majtlaktle iwan se cimiento ochijchitoka
ika jacinto, iwan ipan majtlaktle iwan ome cimiento ochijchitoka
ika amatista.
\v 21 In majtlaktle iwan ome puertajtin oyekaj tlachiwaltin
ika majtlaktle iwan ome perlas. Kada se puerta oyeka
tlachiwale ika se perla. In ojtle katlej okachi weyi
de yon weyikan oyeka de oro chipawak kej teskatl.
\p
\v 22 Mach onikitak nion se tiopan itech yon weyikan,
porke in toSeñor, in Dios katlej kipia nochi poder, iwan
Ichkatzin, ompa katej iwan por yonik mach ok moneki tiopan.
\v 23 Itech yon weyikan mach moneki tlawis in tonale
nion metztle, porke imawisotlanex in Dios iwan Ichkatzin
yejwan kitlawiliaj.
\v 24 In tlaltikpaktlakaj de nochtin paismej nemiskej
ijtik tlanextle de yon weyikan. Iwan in reytin de nochi
in tlaltikpak kiwalkuiskej itech yon weyikan nochi tlan
kuale tlan kipiaj.
\v 25 In puertajtin nochipa tlapotoskej. Mach keman
motzakuaskej. Porke nochipa tlanestos iwan mach keman
tlatleyuas.
\v 26 In tlaltikpaktlakaj de nochtin paismej kiwalkuiskej
itech yon weyikan nochi tetlakitalistle iwan nochi tlan
kipiaj kuakualtzin.
\v 27 Pero mach keman kalakis itech yon weyikan tlan
amo chipawak, nion katlej kichiwaj tlan amo kuale katlej
mach kiwelita in Dios, iwan nion katlej tlakajkayawaj.
Sino kalakiskej san yejwan katlej nestos intoka itech
libro kan ijkuilitok intoka nochtin katlej kipiaj yankuik
nemilistle, yejwan katlej iaxkawan in Ichkatzin.
\c 22
\p
\v 1 Satepan in ángel onechititij se weyatl chipawak,
katlej kitemaka yankuik nemilistle. Yon atl oyeka chipawak
kej teskatl, iwan owalkistoka de kan isiya in toTajtzin
Dios iwan de yen Ichkatzin.
\v 2 Yon atl opanotoka tlatlajko ojtle de yen weyikan.
Iwan ojkan lado atlatentle de yen weyatl oyekaj in kuawmej
katlej kitemakaj yankuik nemilistle. Yonmej kuawmej
tlakij kada metztle, kijtosneki majtlaktle iwan ome buelta
se xiwitl, iwan inxiwyo serbiroa para ika mopajtiskej
in tlaltikpaktlakaj de nochtin paismej.
\v 3 Itech yon weyikan mach ok yetos itlaj tlan amo
kuale katlej Dios moneki kitlajyowiltis. Isiya in toTajtzin
Dios iwan isiya in Ichkatzin yetoskej itech yon weyikan.
Ompa itekipanojkawan kitekipanoskej iwan kiweyikixtiskej.
\v 4 Iwan kitaskej ixko iwan kintlaliliskej ipan inmixkuak
itoka in Dios.
\v 5 Ompa mach ok keman tlatleyuas. Iwan katlej ompa
chantiskej mach ok kinekiskej itlaj tlanextle para ika
motlawiliskej, nion mach ok monekis ma kintlawili in
tonale, porke in toSeñor Dios Yej kintlawilis. Iwan yejwan
tlanawatiskej iktlanke (ik tlami).
\s Jesucristo mach ok wejkawitl para walmukuepas
\p
\v 6 Satepan in ángel onechilwij:
\p ―Yin tlajtole melawak iwan kuale para kineltokaskej.
Iwan toSeñor Dios katlej kinmatiltia in profetajtin
tlan tlapanos, okualtitlanke iángel para kinnextilis
itekipanojkawan tlan tlapanos san niman.
\p
\v 7 Iwan Jesús okijtoj:
\p ―¡San niman niwitz oksemi! Ma paki akin kichiwas tlan
kijta in tlamachtile katlej ijkuilitok itech yin libro
katlej kitematiltia tlan tlapanos.
\p
\v 8 Nej niJuan, onikakke iwan onikitak nochi yin tlamantle.
Iwan satepan de onikakke iwan onikitak, onimotlankuaketzke
ikxitlan ángel katlej onechnextilij nochi yon tlamantle
para nikweyikixtis.
\v 9 Pero yej onechilwij:
\p ―Amo xinechweyikixti. Porke nej noijki niktekipanoa
in toTajtzin Dios ijkón ken tej iwan mokniwan profetajtin,
iwan nochtin katlej kichiwaj tlan kijta in yin libro.
Moneki xikweyikixti yen toTajtzin Dios.
\p
\v 10 Noijki onechilwij:
\p ―Amo san tej xikmato, sino xikinmatilti nochtin tlan
kijta itlajtol in Dios katlej ijkuilitok itech yin libro.
Porke ya ajsi tonale para tlamochiwas nochi tlan kijta
in yin libro.
\v 11 Iwan tla akaj kineki kichijtos tlan amo kuale,
ma kichijto kiné. Iwan akin kineki nemis ika inemilis
bierotik, ma nemi bierotik kiné. Iwan akin kineki kichijtos
tlan kuale, ma kichijto tlan kuale kiné. Iwan akin kineki
moyolchipajtos inawak Dios, ma moyolchipajto kiné.
\p
\v 12 Iwan Jesús okijtoj:
\p ―¡San niman niwitz oksemi! Nikkualkuis in tlaxtlawile
para nikmakas kada se tlakatl según tlan okichij.
\v 13 Yen Nej niachtoj iwan Nej niitlamian de nochi
tlamantle ijkón ken abecedario pewa ika A iwan tlami
ika Z.
\p
\v 14 ’Ma pakikan katlej kipakaj intlaken para welis
kalakiskej itech puerta de yen weyikan para kikuaskej
itlakilo in tlatokkuawitl katlej kitemaka yankuik nemilistle.
\v 15 Pero mokawaskej kalan katlej kipiaj mach kuale
inyolo, katlej texoxkej (brujojtij), katlej momekatiaj,
katlej temiktijkej, katlej kinweyikixtiaj insantojwan,
iwan nochtin katlej tlakajkayawaj iwan kiwelitaj tlakajkayajtinemiskej.
\p
\v 16 ’Nej niJesús, onikkualtitlanke noángel para ma
amechmatilti nochi in yin tlamantle namejwan katlej
antiopantlaneltokakej. Yen Nej ninelwatl katlej niwalajtok
de yen rey David, iwan yen Nej niteixwi de yen rey David.
Iwan noijki yen Nej nisitlale katlej kisa kualkan.
\p
\v 17 In Espíritu Santo iwan isiwa in Ichkatzin kijtaj:
\p ―Xiwiki.
\p Iwan akin kikaki, noijki ma kijto:
\p ―Xiwiki.
\p Iwan tla akaj amiki ipan iyolo, iwan kineki konis in
atl katlej kitemaka yankuik nemilistle, ma wiki, iwan
ma koni iwan mach itlaj moneki kitlaxtlawas.
\p
\v 18 Nochtin akinmej kikakij tlan kijta in tlamachtile
katlej ijkuilitok itech yin libro, nikneki namechilwis
se tlajtole: Tla akaj kajxitilia oksekin tlajtole de
tlan ya kajki ijkuilitok itech yin libro, Dios kitlajyowiltis
okachi ika yen kokolistle katlej kajki ijkuilitok itech
yin libro.
\v 19 Iwan tla akaj kikixtilia itlaj tlajtole de tlan
ya kajki ijkuilitok itech yin libro, Dios noijki kikixtilis
tlan okitokaroaya de yen nekáj tlatokkuawitl katlej
kitemaka yankuik nemilistle iwan mach kikawilis ma kalaki
itech nekáj chipawaktzin weyikan de tlan ya kijtojtok
in yin libro.
\p
\v 20 Jesús katlej techmatiltia in yin tlamantle kijta:
\p ―Ipan melajka, san niman niwitz.
\p Ijkón ma yeto. Xiwiki, Señor Jesús.
\p
\v 21 In toSeñor Jesucristo ma amechmaka iteiknotlamachilis
aminochtin. Ijkón ma yeto.