\id COL
\h COLOSSIANS
\toc1 COLOSSIANS
\mt Id ash d Paul Oꞌohana am ha Wui g Colossai t Am Wohochuddam
\c 1
\m
\v 1-2 T-wepnag mam am kih Colossai t am:
\p Am ant wo i em-oꞌohani g Jiosh haꞌichu ahga ahni Paul mat
g Jiosh am i ni-kei mant wo i ahgahi ab amjed g alidaj
Jesus Christ.
\p K ia i ni-wehmt g t-wehnag Timothy.
\p Ab o wa si s-em-hoꞌigeꞌid g Jiosh t-ohg ch ab wo wa
baꞌich i em-mahkad g i wehmtadag ch s-ap tahhadkam.
\s Mash g Paul ab si hoꞌigeꞌid g Jiosh ha hekaj
\p
\v 3 Chum ach hekid ab i hoꞌigeꞌid g Jiosh em-wehhejed
t-hoꞌigeꞌidahunch.
\v 4 Ab amtsh i s-wohoch g wohokam ab amjed g t-kownalig
Jesus Christ k ab hahawa si ha tatchua g e-wehm
wohochuddam. Id ach hekaj ab i hoꞌigeꞌid g ohgaj Jiosh.
\v 5 Bam masma nam pi ab wui i e gewpkadch hegai s-kehg
kihdag mo g Jiosh am nahtokch t-wehhejed an dahm kahchim
ch ed.
\v 6 Am at em-wui jiwia ihda s-kehg haꞌichu ahga no pi an
wehsko chehmohim g jewed ch am ha apꞌechudahim hegam mo ab
kaiham hab masma mo hab em-wua. Woho amsh s-mahch g Jiosh
hoꞌigeꞌidadag
\v 7 nash pi am em-ahgid ihda t-wehm chikpandam Epaphras.
Id ach ab si tatchua ch hab elid mo si s-ap hab wua g
e-chikpan am em-shahgid.
\v 8 Ia at hahawa jiwia k am t-ahgid mamsh ab aꞌai si e
tatchua g gewkdajkaj g Hekia S-apꞌekam Gewkdag.
\p
\v 9 Kuch heg hekaj chum hekid t-hoꞌigeꞌidahun em-wehhejed.
Hekia S-apꞌekam Gewkdag o ab em-mahkch g amichudadag. Kuch
ab tahni g Jiosh mat hab wo em-juh mamt s-ap wo hekaj hegai
amichudadag k wo s-mahchk g tatchuij.
\v 10 Bamt masma ab wo si haꞌichuchudad g t-kownalig Jesus
ch ab wo hehgchulidad am hab junihidch g s-apꞌekam namt
pi baꞌich i s-ap wo s-mahchk g Jiosh.
\v 11 Jiosh o wehs edgid g gewkdag. Kuch ab tahni mat
baꞌich ab wo i em-mahkad g gewkdag. Mt hekaj wehs haꞌichu
s-e tahtk ch wo nakogad ch wo si s-hehgigk.
\v 12 Jiosh kownaltalig o d hekia tonlig. K g Jiosh s-kehg
haꞌichu an nahtokch t-wehhejed ahchim mach d hemajkamgaj.
Kumt ab wo si i hoꞌigeꞌel mat am i em-apꞌech mam d hahawa
hemajkamgaj ch ab wo bei hegai mo an nahtokch.
\v 13 Jiawul o an wehs ha uꞌukch hegam mo hedai pi mahch g
Jiosh. K g kownaltaligaj d hekia s-chuhugam. T wabshaba g
Jiosh ab i t-wuwhas ab gewkdaj amjed k am i t-wahpki si
e-tatchuidch e-alidag kownaltalig ed.
\v 14 T heg t-doꞌibia k gam hu hab i juh g pi ap
t-chuꞌijig.
\s Mo has chuꞌig g Jiosh si Kehsha ch has mahs chikpan hab
wua
\p
\v 15 Jiosh o pi ta neidagma ch wabshaba hemu e chehgidch
gahi wuhshanim g e-alidag. Kutt hab waꞌi masma ab wo nei g
Jiosh matt wo nei g alidaj. Heki o hu an wehmaj g e-ohg mat
eda koi an hu haꞌichu e nahto ch wehs haꞌichu baꞌich d i si
s-has haꞌichu.
\v 16 Jiosh at am i kei g e-alidag mat wehs haꞌichu wo
nahto. T heg wehs nahto hegai mo haschu an hab i chuꞌig
dahm kahchim ch ed ch in jewed dahm, hegai mach haschu i
neid ch hegai mach pi neid. K wehs d chuhchaij g nahnko
mahs kokownal in jewed dahm ch an dahm kahchim ch ed. K d
Jiosh tatchui mat wehs haꞌichu d wo enigajk g alidaj.
\v 17 K wehs haꞌichu in hab chuꞌig g alidaj gewkdagkaj.
\v 18 K heg d t-moꞌo am himdam ahchim mach ab ihm. Kuch ab
amjed bekch g t-doakag hab masma mo g honshpadag ab moꞌo t
amjed bekch g e-doakag. Jiosh alidag o wehs d t-siꞌihegi
ch ab i wuhsh muhkig amjed mat d wo si s-has haꞌichuk am
wehs haꞌichu dahm.
\v 19 Chum as hab masma ia jiwia g Jesus mo g oꞌodham k eda
d Jiosh wehmaj g e-ohg ch heg hekaj wepo chuꞌig.
\v 20 Ab amt naggai kots t ab k mua. Kut eda ha hiwigi g
Jiosh no pi hab d elidaj mat g alidaj wo hejel e iagchul.
T heg hekaj wehs haꞌichu wo e nako mat wo chum i e apꞌech am
Jiosh wui.
\p
\v 21 Mehk am wa ab amjed g Jiosh ch d obgaj nam pi pi ap
haꞌichu chegito ch pi ap haꞌichu hab junihim.
\v 22 T wabshaba g Jiosh gam hu hab i juh g e-obgatalig k ab
wabsh i chum em-hemakoj e wehm heg hekaj e-alidag muhkig.
Kumt heg hekaj d wo hekia s-apꞌekamk ch pi ab hu wo ha
chuꞌijigk
\v 23 mamtp am wabsh i s-gewkam wo wohochudad g s-kehg
haꞌichu ahgaj ab amjed g alidaj ch pi gam hu hab wo i e juh
ab amjed. Ihda s-kehg haꞌichu ahga o wehsijj ab d ha wuikam
g hemajkam ch heg hekaj an wehsko chehmohim g jewed.
\s Mash g Paul wehsko ha mihshmdahim
\p
\v 24 Bo sha mahs mach d honshpadaj g Christ ahchim mach ab
ihm. Heg atsh si e shoꞌigch t-wehhejed. Kuni wabsh si s-ap
ni-tahtk ch am oidch ni-shoꞌigchud mat s-ap wo e nahto g
honshpadaj hegam ha hekaj mat hab waꞌap ab wo i s-wohoch g
haꞌichu ni-ahga.
\v 25 Am at i ni-kei g Jiosh mant wo em-ahgidahi ihda
s-kehg haꞌichu ahgaj. Ni heg hekaj d em-pionag ch am
em-ahgid.
\v 26 E o ehstokch ged hu i shohshon k amjed mat woho has wo
t-juni g Christ. T wabshaba hemuch am si tashogi g Jiosh
t-wui.
\v 27 K d ihda mat g Christ ab wo t-mah g Hekai S-apꞌekam
Gewkdag. Kut heg am wo t-edak, chum hems ahpim gawul mahs
hemajkam, ch hab wo t-juh matt d wo Jiosh hemajkamgak ch
wehmaj ab wo si has t-elidad am kihdaj ed.
\p
\v 28 Kuch am chum t-nakog matt wehs wo ha ahgi g hemajkam
ab amjed g Jesus Christ k wo ha shohbid k ep wo ha mashcha
mat has wo masmak haꞌas mach heꞌes i s-amichud. T hab
s-geꞌema wo hihimad e-wohochudadag ed. Kutt am wo ha
chehgi Jiosh wui mo hab masma.
\v 29 Ab o si geꞌe ni-mahkch g Christ g gewkdag. Ni heg
hekaj am si ni-gewkadch mant wo nahto ihda chikpan.
\c 2
\p
\v 1 Mamt hu wo i s-mahchk mani has i masma s-gewkam
ni-hoꞌigeꞌidahun am em-wehhejed ch am ep ha wehhejed hegam
mo am kih Laodicea t am, pej wehs ha wehhejed hegam mo pi
ni-mahch no ge ni-neid.
\v 2-3 Jiosh o am chum wehs t-tashogid g e-amichudadag ch
e-mahchig gahi wuhshanim g e-alidag. Kuni ab tahni mat am
wo si i em-gewkemhunad mamt wo s-ap s-mai hegai mo wa g
Jiosh am t-tashogid k ab aꞌai wo i e tatchuad hab masma
mam d e-hajunim.
\p
\v 4 Haꞌi o chum ha iattogid ch gam hu ha wanchshulig ab
amjed g Christ. Kumt wabshaba pi ab hu wo ha kaiha, chum as
hems hab wo e wuad mo s-apꞌe.
\v 5 Pi ani am hu haꞌichug em-wehm ch wabshaba chum hekid
am em-chegito. Am amsh aꞌai i e wehmt ch s-gewkam ab
s-wohochud g Jesus Christ. Kuni heg hekaj si s-ap ni-tahtk.
\p
\v 6 Ab amt i e dagito Jesus Christ wui mat d wo
em-kownaligk. K d hahawa em-wuikam mamt ab wo wechok ch am
wo himad g e-doakag ch wehmaj d wo hemakok.
\v 7 An g behꞌi g e-gewkdag ab amjed mamt heg amjed baꞌich
i s-gewkam ab wo wohochudad mam has i masma mashchamas ch
chum hekid ab wo i mahkchid g e-hoꞌigeꞌidadag.
\p
\v 8 S-e g wo nenꞌoidk mat pi hedai wo em-iattogi. Haꞌi ash
chum s-em-mashchamamk hegai mo haschu d wabsh oꞌodham
ha-mahchig ch em-ahgid mamt heg ab s-ap wo himad g
e-doakag. Tt wabshaba ab wo beihid g t-mashchamadag ab
amjed g Christ
\v 9 no pi heg d Jiosh am wehmaj g e-ohg, chum as hi wa hab
masma ia jiwia mo g hemajkam.
\v 10 Kumt am i e hemakoj g Christ wehm k wehmaj d hekiakam.
K heg ab em-mahkch g wechij doakag ch d kownal am wehs ha
dahm g kokownal am jewed dahm ch an dahm kahchim ch ed.
\p
\v 11-12 Heki ach hu wa t-pahl hikuchk ahchim Tutuligo am
t-chehanig oidch. K wabshaba d t-himdag ahchim matt ab ihm
g Christ matt wo t-pahl wakon k hab wo t-chehgi matt ab i
t-hemakoj heg wehm k ab i t-wulꞌo pi ap t-tatchui amjed. Gd
att hu t-wachumch shuhdagi wecho t-pahl wakonch k am ep i
wuhsh shuhdagi t amjed. K id heg wa wepo matt ged hu
t-hiash muhk k amjed ab uhpam i wuhsh muhkig amjed hab masma
mat g Christ hab e juh.
\p
\v 13-14 Neh, ahpim mam d gawul mahs hemajkam ch pi edgid g
t-chehanig am wa si gawulkdas ab Jiosh t amjed heg hekaj
pi ap e-chuꞌijig. T wabshaba g Jiosh ab em-wui mahtchul g
e-alidag. Kumt ab i s-wohochud k hab bei g wechij doakag.
Jiosh alidag at ab nako g s-koꞌok t-namkidadag kots t ab k
gm hu hab i juh g pi ap t-chuꞌijig.
\v 15 Jiawul o chum s-wulshpamk g Jiosh alidag. T wabshaba
ab i e wulꞌo gewkdaj amjed k gewito t-wehhejed k hab masma
wehs ha gewito g jijawul.
\p
\v 16-17 Jiosh ash wa hab masma ha chehani g Tutuligo mat am
wa has mahs haꞌichu hugi wo koꞌad ch am hab wo junihid g
mihshmda piast. Idam chehanig o am chum t-tashogidahim
mat has wo masmak g Jiosh si Kehsha mat hekid wo jiwia. T
wabshaba ia hahawa jiwia g Jiosh si Kehsha k am hejel i e
tashogi t-wui. K hahawa pi hab mahs machs am hab wo junihid
hegai hab mahs haꞌichu k ch hekaj wo chum s-mahchk g Jiosh
si Kehsha.
\v 18 Haꞌi o hab e elid mo em-baꞌich i s-apꞌe natsh pi
haꞌichu nei am e-nena ed ch hab chum kaij mamt pi wo e
doꞌibia k hoꞌip ab i e shoꞌigchud k ab wo i has ha
elidad g anghil. Pi g wo shaꞌi ha wohochud. Ho o wabsh
chum si e hahaschud g hejel e-chegitoidagkaj
\v 19 ch pi ab hu hiwig g Jiosh si Kehsha. K eda heg d
t-moꞌo ch s-ap ab i t-dagioꞌid ch t-geꞌelid. Kuch ahchim
ab ab giꞌi k ch ab ep aꞌai t-ab giꞌi hab masma mo g hon ch
hab waꞌap masma i geꞌelhim.
\s Matt dagito g heki hu t-himdag
\p
\v 20 Id o heg wa wepo matt heki hu koi nach pi d hemako
heg wehm mat t-wehhejed muh. Heg at ab i t-wulꞌo heg amjed
mo d wabsh hemajkam ha-mashchama. Pi g heg hekaj am haha wo
i chum e apꞌechud Jiosh tahgio.
\v 21 Hegam mo em-kudut o ab chum em-chehani mamt pi an hu
wo hudawgad ch jejkad ch tattamad haꞌichu i.
\v 22 K wabshaba am wa s-apꞌe mamt wabsh wo hekaj mo haschu
i s-apꞌe. T wabsh wo huhug e hekajk. Hegai mo d wabsh
hemajkam ha-chehanig ch ha-mashchama
\v 23 o pi woho d haꞌichu amichudadag. Bo em-ahgid mamt
heg oidk wo e mihshmdad ch wo e shoꞌigchudad ch hab ab
wo e shoꞌigchudad Jiosh wui. T wabshaba id pi wo shaꞌi
dodolimagi g pi ap em-tatchui.
\c 3
\p
\v 1 Jiosh at ab t-mah g wechij doakag ahchim matt ab ihm g
alidaj mo d t-doꞌibiakam. K id heg wa wepo mat ab i
t-wuwhas muhkig t amjed hab masma mat ab i wuhshad g
e-alidag. Hemuch o an daha g alidaj s-apkojed hugidaj
an ch am t-wehhejed apꞌechud matt wo wehmajk. Kutt heg wui
am wo i t-gewpkai.
\v 2 Pi g am hu wo chegitokad g jewed dahm haꞌichu ch
wabshaba g dahm kahchim haꞌichu wo tatchuad.
\v 3 Jiosh at am i t-wehnadk g e-alidag. T heg heki hu muh
k an hab chuꞌig dahm kahchim ch ed. K id heg wa wepo matt
heki hu koꞌo k an wehmaj.
\v 4 Ia at ep wo i wuhsh g Christ jewed dahm. Kutt am
wehmaj wo i wuwhag k wepo masma wo si s-kehgajk.
\s Matt dagito g pi apꞌekam
\p
\v 5 Mt gam hu hab wo i juh g pi kehg e-tatchui ch pi kehg
e-chegitoi k pi wo wehmaj woꞌiwua matp hedai pi d em-wehm
kihkam k pi wo pihk e elidad mamt geꞌe haꞌichu wo bei.
Hegai mat wo s-behim mo haschu pi ab hu d wuikamaj o heg
jioshchud.
\v 6 S-koꞌok namkidadag at ab ha ab wo gei hegam mo hab
masma haꞌichu hab junihim.
\v 7 Ahpim o wa an em-uꞌukch g pi kehg tatchui. Kum wa g pi
apꞌekam hab junihim.
\v 8 An o wa em-uꞌukch g bagatalig ch hehgamdadag ch
kehꞌidadag. Mt wabshaba hemuch im hu wehs hab wo i juh
ihda pi apꞌekam ab e amjed k pi hekid pad wo neokad
\v 9 ch pi haꞌichu wo ha iattogidad. Wehs at mukito ihda
hab mahs haꞌichu ab em-ab.
\s Matt bei g wechij doakag
\p
\v 10 Ab amt i e dagito Jiosh wui. T heg ab em-mah g wechij
doakag k em-tatchuid mamt wo wepo masmak ch ab wo s-ap
s-mahchk.
\v 11 Christ o d si s-has haꞌichu am t-wehhejed ahchim mach
ab ihm. Heg doakag o am haꞌichug t-dodakag ed. Kuch heg
hekaj ab i t-hemakochudch. Pi ach hahawa t-gawulkadch ab
em-amjed ahchim mach d Tutuligo. Pi o has d ahga g pahl
hikuchka. Pi o t-gawulkadch g haꞌichu t-amichudadag.
Nenehol o d hemako ahchim t-wehm mach pi d nenehol. Wehsijj
ach d hemako ab ihmch g Christ.
\p
\v 12 Jiosh o si pihk e elid t-hekaj ch ab i t-gawulkai.
Kutt heg hekaj wo si pihk t-elidad ha hekaj g hemajkam ch
wo s-hemajimak ch s-t-tahtk ch wo nakogad haꞌichu ch pi hab
wo chum t-wuad machs d s-has hahaꞌichu am ha-nena ed.
\v 13 Jiosh at ab s-t-hoꞌigeꞌid k gam hu hab i juh g pi ap
t-chuꞌijig. Kutt hab waꞌap wo s-ha bahbgi hegam mat hab wo
juh g pi apꞌekam ab t-wui k hab waꞌap ab wo s-ha hoꞌigeꞌel.
\v 14 Ab o t-ab matt aꞌai t-hekaj wo si pihk t-elidad ch
hab s-ap d wo hemakok.
\p
\v 15 Christ o ab em-makiog g s-ap tahhadkam. Ab g wo i
hoꞌigeꞌidad heg hekaj ch wo si s-ap e tahtkkad ab aꞌai e
wui nam pi d hemako heg wehm hab sha masma mam d honshpadaj.
\v 16 Mt am wo s-chegitok g Christ haꞌichu ahga. Jiosh o ab
em-makiog g amichudadag. Kumt ab aꞌai wo i e mashchamad
ch wo ahgad g Jiosh oꞌohana ed nenꞌei ch mihshmda nenꞌei
ch wo neꞌichudad g Jiosh ch ab wo i mahkchid g geꞌe
hoꞌigeꞌidadag.
\v 17 Wehs amt hab wo jundad g t-kownalig Jesus hegai mamt
haschu hab wo junihid. Kumt ab wo hoꞌigeꞌidad g t-ohg
Jiosh am gahi wuhshanim g Jesus.
\s Matt has masma ab aꞌai wo t-neidad
\p
\v 18 Ahpim uꞌuwi mam ab ihm g Christ amt ab wo s-wohog ha
elidad g e-wehm kihkam. Bo masma em-tatchuid g Jiosh.
\p
\v 19 Kumt ahpim chechoj wo si pihk e elidad ha hekaj g
e-wehm kihkam ch ab wabsh wo i s-ha bahbgi.
\p
\v 20 Ahpim aꞌal amt ab wo s-wohog ha elidad g e-jehj chum
hekid. Id o d tatchuij g Jiosh.
\p
\v 21 Kumt ahpim ha-jehj pi am wo si ha babgachudad g
e-aꞌaliga mat pi wo heb hu wua g e-chegitoidag.
\p
\v 22 Ahpim mam d ha-pionag amt ab wo s-wohog ha elidad g
e-aꞌamo wohoꞌi e-tatchui ab heg wabsh hekaj mam ab si has
elid g Jiosh ch pi heg hekaj mas am wo em-nei g em-aꞌamo k
wo s-hohhoꞌi g em-chikpan.
\v 23-24 Pi o d waꞌi oꞌodham mo em-chikpnachud ch wabshaba
d t-kownalig Jesus. Ab o him g tash mamt an wo wehmajk. T
heg ab wo em-namkid heg hekaj em-chikpan. Kumt heg hekaj
wohoꞌi e-tatchui ab am hab wo junihid g e-chikpan.
\v 25 T-kownalig Jesus at ep wo namkid hegai matp hedai hab
wo juh g pi apꞌekam. Heg at wo bei g s-koꞌok e-namkidag.
Jiosh at wehs wo ha lodai g hemajkam k hab masma wo ha
namkid matp has i masma hab e junihim.
\c 4
\p
\v 1 Ahpim aꞌamo amt s-ap ab wo ha neidad g e-pionag ch ep
wo s-chegitok mam hab waꞌap ge ahmo. K heg an daha dahm
kahchim ch ed ch d Jiosh.
\s Matt wo ahgachugad g Jiosh haꞌichu ahga
\p
\v 2 Ahpim wehs g chum hekid wo e hoꞌigeꞌidahunad ch ab
ep wo i hoꞌigeꞌidad g Jiosh.
\v 3 Chum ach s-ahgamk g Jiosh haꞌichu ahga ab amjed g
alidaj. Kumt ab wo tai mat ab wo t-mah g apꞌedag matt hab
wo t-juh. Dani lihso nani pi heg ahgachug.
\v 4 Kumt ab wo tai g Jiosh mat hab wo ni-juh mant am si
tasho wo ahgad.
\v 5 Am g si s-e mamachim hab wo e junihid am ha-nena ed
hegam mo pi ab hu ihm g Jiosh. Ab o em-mahkch g Jiosh g
apꞌedag mamt hab wo junihid g s-apꞌekam. Am g s-ap wo
hekaj g e-apꞌedag.
\v 6 Kumt chum hekid s-hemajim wo neneokad ch wo s-ta
kakaim haꞌichu ahgad. Do em-wuikam mamt wo s-mahchk mamt
has masma s-ap ab uhpam wo i nodagi g neꞌoki ab wui g
hemajkam haꞌichu kakkei.
\s Ha-hoꞌigeꞌelig
\p
\v 7 Ia o t-wehmaj hegai mo hab chehgig Tychicus ch s-ap hab
junihim g Jiosh chikpan.
\v 8 Kuni chehani mat am wo i em-chehgimed k am wo i
em-gewkemhu am em-ahgidk mach has waꞌi masma.
\v 9 T heg wo oi em-wehm kihkam Onesimus k d hahawa t-wehm
wohochuddam. Idam at am wo i em-ahgi wehs haꞌichu mo hab
e junihim iia.
\p
\v 10 Aristarcas o ni-wehm d ep lihso k ch am ep i
em-hoꞌigeꞌelid. K hegai Mark mo d Barnabas maꞌi am ep i
em-hoꞌigeꞌelid. Heki ani hu em-ahgid mamt id am wo i
wahkid k wo kaiha matp am wo hih em-wui.
\v 11 Joshua Justus o am hab waꞌap i em-hoꞌigeꞌelid. Do
waꞌi idam waik mo d Tutuligo hemajkam ch ni-wehm chikpan
am wehhejed g Jiosh. Kuni ha hekaj am si i ni-gewkemhun.
\p
\v 12-13 K ia ep dak ch am i em-hoꞌigeꞌelid hegai em-wehm
kihkam mo hab chehgig Epaphras. Nt wo em-ahgi mo id chum
hekid si e hoꞌigeꞌidahun am em-wehhejed ch am ha wehhejed
hegam mo am kih Laodicea t am ch hegam mo am kih Hieropolis
t am. Ab o tahni g mat Jiosh ab wo i gewkai g
em-wohochudadag. Mt hab s-ap wo s-wohog elidad g Jiosh.
\v 14 Ihda si t-tatchuidch t-nawoj Luke mo d mahkai o am
ep i em-hoꞌigeꞌelid. K g Demas am ep i em-hoꞌigeꞌelid.
\p
\v 15 Am g wo ha ahgid g t-wehm wohochuddam am Laodicea t
am ch hegam mo am e-mihshmad kihj am g Nymphas mat ab wo
s-t-hoꞌigeꞌel.
\p
\v 16 Ihda oꞌohana amt am wo neꞌokchulid k gam hu haha wo
ha mah hegam mo am kih Laodicea t am. T am epai wo
neꞌokchul. T hegam ab epai wo em-mah hegai mant ha oꞌohani.
Kumt am epai wo neꞌokchul.
\p
\v 17 Mt wo ahgi g Archipus mat am wo i nahto hegai Jiosh
chikpan mani wa hab ahgid.
\p
\v 18 Hejel ant an wo oꞌoha ihda wawnim ahni Paul mant am
wo si em-hoꞌigeꞌel. Pi g wo shaꞌi pi chegito mani ia hu
kuhpi.
\p Neh, ab at wo wa baꞌich i s-em-hoꞌigeꞌel g Jiosh.