\id 1TI
\h 1 TIMOTHY
\toc1 1 TIMOTHY
\mt Id ash d Paul Wehpeg Oꞌohana am Timothy Wui
\c 1
\m
\v 1 Ni-wehnag Timothy:
\p Ia ant haꞌichu wo i m-oꞌohani ahni Paul mani d kehshaj g
Jesus Christ. Jiosh at ni-cheha mant wo i ahgahi ab amjed g
alidaj Jesus Christ. T hab ab wo hiwgad g hemajkam mat heg
am wo ha uꞌapa Jiosh kihdag wui.
\p
\v 2 Ab g ni-kaiham ahpi Timothy map d ni-alidag ab i
s-wohochudk g haꞌichu ni-ahga ab amjed g Jesus Christ.
\p Ab o wa si s-m-hoꞌigeꞌid g t-ohg Jiosh g t-kownalig
Jesus Christ wehm ch ab wo wa baꞌich i m-mahkad g i
wehmtadag ch s-ap tahhadkam.
\s Mash am haꞌi chum ha iattogid g wohochuddam
\p
\v 3 Ab ani wa si s-ap m-ahgid mapt am wo wih Ephesus t am
mani wa am him gam hu wo himk Macedonia wui. Am g wabsh i
dakad ch am wo si ha keshwua hegam mo g iattogi chum ha
mashcham.
\v 4 Idam o chum ha mashcham mo g hohoꞌoki aꞌagida ab
wehnags g Jiosh haꞌichu ahga ch ep chum ha mashcham mat
hemho wa wo s-chegitok g e-shohshonbad ha-chechgig. T
wabshaba ihda ha-mashchama hab wo ha juh mat wo dagito g
Jiosh hab elida k ab wabsh aꞌai wo e neꞌowinad. Bat waꞌi
masma wo s-mahchk g Jiosh hab elida mat ab wo i s-wohoch g
haꞌichu ahgaj.
\p
\v 5 Pt wo ha ahgi mat woho ab wo s-wohochudad g Jiosh
haꞌichu ahga ch heg hab wo waꞌi junihid mo haschu s-mahch
mo d s-apꞌekam ch hab pi wo e kudutad. Id at hab wo ha juh
mat wo i geꞌeda g ha-tatchuidag.
\v 6 Haꞌi at dagito g e-wohochudadag k hekaj wabsh ha wehm
e neꞌowin.
\v 7 Idam o hab chum e elid mo d chehanig ha mashchamdam
ch wabshaba pi amichud g Jiosh haꞌichu ahga chum as hab e
elid mo s-e mahchk ch neneok.
\p
\v 8-9 S-apꞌe o g chehanig. K wabshaba idam pi ap hekaj am
chum ha shohbidch hegam mo hab wua g s-apꞌekam. K eda g
chehanig chum e hekaj mat wo ha shohbi hegam mo g pi apꞌekam
hab wua. Idam o pi ab hu has elid g Jiosh ch pi ab hu
wohog elid. Haꞌijj o s-ha muꞌamk chum hems g e-ohg o g
e-jeꞌe.
\v 10 Haꞌijj o g s-totontom haꞌichu chegitok ch chum hems
chum e uꞌuwichud o e chechojchud ch e wehm hab junihim g
s-uam haꞌichu. Haꞌijj o ha lilsochud wabsh hejel e wehhejed
ch ha iattogid ch ab haꞌichu ha abchud g s-apꞌekam
oꞌodham. Nahnko masma o ab wui gegok g mashchamaj g Jiosh
hegam mo chum ha mashcham g iattogi.
\v 11 Jiosh o ni-nuhkudachud ihda s-kehg haꞌichu e-ahga.
K heg am t-tashogid ihda mant em-ahgi.
\s Mash g Paul ab si hoꞌigeꞌid g Jiosh
\p
\v 12 T-kownalig Jesus oki hab ni-elid mant s-ap am hab wo
junihid ihda chickpan nat pi am i ni-kehsh k ab ni-mahkch
g gewdag wehhejed. Kuni heg hekaj ab si hoꞌigeꞌid.
\v 13 Heki anid hu  wa ha shoꞌigchud hegam mo ab
s-wohochud g Jesus ch ab ha wui pi ap has ahg g Jesus. Kut
eda heg ab si i s-ni-hoꞌigeꞌel nani pi pi ni-mahch ch hab
junihim pi ab hu wohochudch.
\v 14 Si at s-hemajim ab ni-wui i e tashogi. Nt hab ab i
s-wohochud k ab i ni-hemakoj wehmaj k ab wui a pihk
ni-elid.
\p
\v 15-16 Neh, hema hab cheꞌidag o hab chuꞌig, “Ia at jiwia
g t-kownalig Jesus jewed dahm mat wo ha doꞌibia g pi ap
chuꞌijkam.” K id d si wohokam nat pi ab si s-ni-hoꞌigeꞌel.
Ni eda shahag wepo mani wa wehs ha baꞌiwechkim d si pi ap
chuꞌijkam mani wa cheggia g t-doꞌibiakam Jesus ha
shoꞌigchudch hegam mo ab s-wohochud. T heg ab wabsh
ni-bahbgi mat wehs am wo ha chehgi g hemajkam mat ab wabsh
wo ha bahbgi. Tp hems hab waꞌap ab wo i s-wohochud k ab wo
bei g pi ha huhugedam doakag.
\p
\v 17 Neh, wehs haꞌichu dahm o d kownal g Jiosh ch pi ta
neidagma ch pi hekid im hu hab wo i e juh. Kutt ab wo si
uhgk i ulin k ab wo hehgchulidad chum hekid. Neh, woho o
wa ihda.
\p
\v 18 Pegih, ni wehnag, Timothy, heki o hu am i t-tashogid
g Jiosh maptki am hab wo junihid ihda chikpan. Kuni ab ep
i m-gewkemhun mapt hab wo wa junihid. Hegai Jiosh haꞌichu
ahga ab m-wui at hab wo masmak mo g s-kehg cheggiakud. Pt
hekaj ab wui kehkkad g ge Jiawul.
\v 19 An g si uꞌukchid g e-wohochudadag ch heg hab wo waꞌi
junihid map haschu s-mahch mo d s-apꞌekam. Haꞌijj oki pi
hab masma ch hekaj padch g e-wohochudadag.
\v 20 Hymanaeus ch Alexander oki haꞌi hegam ch pi ap has ahg
g Jiosh. Nt gam hu i ha dagito ge Jiawul wui mat wo e
shoꞌigchud k atp hems wo dagito g pi ap e-chuꞌijig.
\c 2
\s Mat has Masma g wohochuddam ab wo ihmad g Jiosh
\p
\v 1 Si ani s-m-ahgidamk mapt wo haꞌichu ha ahgi g t-wehm
wohochuddam. Do si haꞌichu mat ab wo e hoꞌigeꞌidahunad
Jiosh wui. Pt wo ha ahgi mat ab wo tahnid g i wehmtadag ch
wo e hoꞌigeꞌidahunad am ha wehhejed g wehs nahnko mahs
hemajkam.
\v 2 K hab ep mahs mat wo e hoꞌigeꞌidahunad am ha wehhejed
g kokownal ch uꞌusagakam mat idam s-ap hab wo junihid g
e-chikpan. Kutt hab s-dodolim wo kihdagk ch wo s-ap
t-tahtkkad.
\v 3 Neh, id at wo hohhoꞌidach g Jiosh no pi d
t-doꞌibiakam
\v 4 ch tatchua mat wehs nahnko mahs hemajkam wo e doꞌibia
k wo s-mai g wohokam ab amjed.
\p
\v 5 Do waꞌi hemako g t-ohg Jiosh. K hab waꞌap d waꞌi
hemako g si Kehshaj ch d Jesus Christ ch d waꞌi hegai mat i
t-hemakoch g Jiosh wehm. Jesus Christ at t-wepo e juh mat d
wo oꞌodhamk
\v 6 ch ab wo bei g s-koꞌok t-namkidadag k hab wo
t-doꞌibia. Id o am t-chehgidch mo wehs hemajkam s-ha
doꞌibiamk g Jiosh.
\v 7 Kut heg hekaj am i ni-kei mant wo i ahgahi ab amjed g
alidaj k wo ha mashcha g gawul mahs hemajkam g wohokam.
S-mahch ap wehs ihda.
\p
\v 8 Bant wo chei mat wahm g chechoj ab wo e
hoꞌigeꞌidahunad Jiosh wui ch atp hems am wo uhgk uhꞌul
e-nohnhoi. S-ap at haꞌichu hab wo elidad ch pi wo shaꞌi
s-bagak ab hedai i wui.
\p
\v 9 Kunt hab ep wo chei mat g uꞌuwi wabsh s-ap ab wo e
enigadadch ch ep s-ap hab wo juhkchid g e-moꞌo mat pi heg
hekaj wo chum si e hahaschudad.
\v 10 Ab o ha ab mat chum hekid am hab wo junihid g
s-apꞌekam ch heg amjed wo e chehgidch mo d wohochuddam.
\v 11 Ab o d ep ha-wuikam mat wabsh s-bahbagi ch s-dodolim
ab wo kaiham k wo mahchid g Jiosh himdag.
\p
\v 12 Ahni ani pi shaꞌi ha hiwgid g uꞌuwi mas wo ha mashcha
g chechoj o am ha dahm wo e uhꞌulinchid.
\v 13 Ab o ha ab g chechoj mat am wo i ha wanim g hemajkam
id eda himdag. Jiosh at wehpeg nahto g cheoj k am haha
wabsh oidk nahto g uwi. Idam ash wa hab chechgig Adam ch
Eve.
\v 14 Kush pi d Adambad mat e iattogi. Hegai uwi atsh e
iattogid k melchkwua g Jiosh chehanig.
\v 15 T g Jiosh heg hekaj ab ha mah g uꞌuwi mat wo e
shoꞌigch hekid am i ha mamsijid g aꞌal. T wabshaba ab ha
amjed wo mahsi g t-doꞌibiakam. Kut wo e doꞌibia matp ab wo
s-wohochudad g Jiosh ch wo si pihk e elidad wehs ha
hekaj ch wo s-apꞌek ch wo s-e neimakad.
\c 3
\s Matsh has wo chum masmak g ha wanimeddam g wohochuddam
\p
\v 1 Tatchua o g si s-kehg chickpan hegam matp hedai s-ha
wanimelimk g wohochuddam. Neh, id o d hab ha cheꞌidag ch
d wohokam.
\v 2 Kunt am wo i em-chegitoch mat has wo chum masmak hegam
mo hab s-e junimk. S-ap at d wo oꞌodhamk. T hab pi hedai wo
e nako mas ab wo haꞌichu ha abch. Hemako at wo waꞌi hohnigk
ch wo si s-e tahtkk wehs haꞌichu k ed ch wo si s-ap hejel e
nuhkudad ch s-ap haꞌichu am hab wo junihid ch wo
s-chechojimak hegam ha wui matp hedai am wo ha chehgio
ha-kihki am. Ab o ha ab mat wo s-mahchk mat has masma wo ha
mashcha.
\v 3 Pi o hab chuꞌig mas wo nawkkoꞌod o s-hohtam wo
babgatad o wo ha kawnid o heg waꞌi lial ab wo si
tatchuad.
\v 4 S-hemajim at am wo ha dahmk g e-wehm kihkam. T g
aꞌaligaj ab wo wechok ch ab wo si has elidad.
\v 5 Pi at has masma wo s-ap i ha wanim g e-wehm
wohochuddam matp pi ap wo ha wanim g e-wehm kihkam.
\v 6 Pi at d wo hema hegamk mat hemuch ab i s-wohoch g Jiosh
haꞌichu ahga nat pi am hu wo chum si e haschudad ch wo i
gei hab masma matsh wa g ge Jiawul hab e juh.
\v 7 Heg amt am wo i kei mo chum hems g pi wohochuddam ab
si has elid. T hab pi hedai ab hu haꞌichu wo chuꞌijigch
mas heg hekaj wo i wua g ge Jiawul.
\s Mat has wo chum masmak g i ha wehmtdam
\p
\v 8 T hab waꞌap s-ap d wo oꞌOdhamk hegam mo am i ha wehmaj
g ha wanimeddam. Pt wo ha ahgi mat pi wo chu iattomk ch pi
wo nawkkoꞌod ch pi heg waꞌi lial ab wo tatchuad.
\v 9 Do si haꞌichu mat am wo si wehs s-ap oidad g Jiosh
haꞌichu ahga ch heg hab wo waꞌi junihid mo haschu s-mahch
mo d s-apꞌekam.
\v 10 Wehpeg amt am wo i ha mamche k am haha wo i ha chuhcha
matp s-ap am hab wo masmak.
\p
\v 11 Uꞌuwi chikpandam at hab waꞌap s-ap d wo uꞌuwik ch pi
wo chu ahgamk ch pi wo nawkkoꞌod ch pi wo chu iattomk.
\p
\v 12 Idam i ha-wehmtdam at hehemako wo wehm kihkamk ch
hab waꞌap s-ap wo ha dahmk g e-aꞌaliga ch s-ap wo himad g
e-kihdag.
\v 13 Hegam mat s-ap hab wo juh g e-chikpan at pi wo has e
elid k si s-gewkam am hab wo junihid. Kumt ab wo si has ha
elidad.
\s Mat haschu am i t-tashogi g Jiosh.
\p
\v 14-15 Bani chum ni-tahtk mant s-hohtam am wo i m-chehgim.
Tp wabshaba hems pi wo ni-apꞌet. Kunt heg hekaj am wo
haꞌichu i m-oꞌohani. Kumt id ab wo s-mahchk mamt has masma
hab wo e junihid mamt s-ap wo himchudad g Jiosh himdag.
Dam Jiosh hemajkamga ch d nuhkuddam g wohokam.
\v 16 Pi o wa ta machima matt has masma wo s-apꞌekamk am
Jiosh tahgio. T wabshaba id am i t-tashogi g Jiosh. K d
wohokam ihda mo an hab chuꞌig neꞌi ed:
\q T-wepo at hab e juh g Jiosh alidag k an e mahsid.
\q T g Hekia S-apꞌekam Gewkdag am wohokamch mo d s-apꞌekam.
\q S-ta neidamam at hab e juh, chum hems g anghil ha
wehhejed.
\q S-kehg haꞌichu ahga ab amjed o an e ahgahim nahnko mahs
hemajkam ha wui.
\q T muꞌi hemajkam ab s-wohoch.
\q Kut am uhpam ep i bei g Jiosh dahm kahchim wui.
\m Neh, pi at hedai wo shaꞌi e nako mas wo pi wohokamch
ihda wohokam.
\c 4
\s Mat an haꞌi wo i wuwha mat g pi wohokam wo ha mashcha
\p
\v 1 Si o tasho am i ni-tashogid g Hekia S-apꞌekam Gewkdag
mat ab wo i e ai g tash mat muꞌi wo dagito g
e-wohochudadag. Haꞌi at wo ha mashcha g iattogi nat pi g
jijawul wo i ha wahmud. T muꞌi hemajkam ab wo ha wohog el.
\v 2 Hegam mat chum hekid wo ha iattogidad at pi wo shaꞌi
e kudutad heg hekaj nat pi ged hu wabsh wo i ha apꞌet.
\v 3 Idam o ha mashcham mo d pi apꞌekam mat wo e hohont ch
ep pi ha hiwgid mas wo koꞌad g has mahs haꞌichu hugi. K
eda wehs ihda d Jiosh nahtoi ch am wa s-apꞌe am t-wehhejed.
Ahchim mach s-mahch g wohokam att hekaj ab wo hoꞌigeꞌel g
Jiosh k ab wo ui g nahtoij.
\v 4 Jiosh at wehs haꞌichu nahto. K wehs s-kehgaj. Tt hekaj
ab wo i hoꞌigeꞌid k ab wo ui.
\v 5 Bo kaij g Jiosh mat g hoꞌigeꞌidahuna am wo i apꞌech
nenaj ed.
\s Mamt has masma d wo s-ap piongajk g Jesus
\p
\v 6 Dapt wo s-apꞌekam piongajk g Jesus Christ maptp am wo
i ha ahgi g t-wehm wohochuddam ihda haꞌichu mashchama.
Kupt an wabsh s-ap wo uꞌukchid g e-wohochudadag ch wehs
haꞌichu mashchama ab amjed map hab hi wa masma hab e wua.
\p
\v 7 Pi g am hab masma hekaj g hohoꞌoki aꞌagida mas d Jiosh
haꞌichu ahga. Pi at hab wo em-juh mamt wo s-aꞌapꞌek am Jiosh
nena ed. Am apt wo si e mashchamad mapt am hab wo junihid
s-apꞌekam himdag.
\p
\v 8 S-apꞌe mapt wo e momoisha k wo s-gewkk. K wabshaba ab
him g tash mat wo huhug ihda. K heg hekai baꞌich i s-apꞌe
mapt wo i e gewkai am e-wohochudadag ed. Id o ab m-mahkch
g s-apꞌekam doakag idani ch imhab i baꞌich.
\v 9 Do si wohokam ihda haꞌichu ahga. K hab chuꞌig mat
wehs ab wo i chum s-e wohoch.
\v 10 Jiosh at wehs wo ha doꞌibia hegam mat ab wo i
s-wohoch g haꞌichu ahgaj k am wo i e gewpkai wui. Kuch ab
s-wohochud ch heg hekaj am si t-nakog ch muꞌi haꞌichu ab
nakog matt wo ha ahgi hemajkam ab amjed ihda.
\v 11 Am g i ha mashcham ihda mani m-ahgid k ab i ha
chehani mat am hab wo junihid.
\v 12 Bapt masma s-ap hab wo e junihid ch s-ap wo neokad.
T pi hedai pad has wo m-elidad map d wabsh wechij
hemajkam. Ab g si pihk e elidad wehs ha wui ch wo si e
nuhkudad ch pi hab wo junihid g pi apꞌekam. T hab wo e
chehgidahid g em-wohochudadag.
\v 13 Am g i e nakog mapt am wo wa neꞌokchulidad g Jiosh
haꞌichu ahga am ha-namki ed ch wo ha mashchamad ch am wo i
ha gewkemhunad.
\v 14 Neh, ha wanimeddam at was e hoꞌigeꞌidahu m-wehhejed
k ab m-taht. T wa hegam mo d Jiosh haꞌichu i tashogiddam
am ah mat has mahs chikpan ab m-mah g Jiosh. Pegih, am g i e
nakogad ch heg am hab wo junihid.
\v 15 T hab ab wo i e gewkemhunad g wohochuddam an
m-neidch.
\v 16 Si g s-e nenꞌoid map has e junihim ch haschu ha
mashcham k hekaj pi wabsh wo heki wua g e-doakag. T hegam
mat ab wo m-kaiha hab waꞌap pi wo heki wua g e-dodakag.
\c 5
\s Matt has wo chum t-junihid am ha wui g t-wehm wohochuddam
\p
\v 1 Pi g ab wabsh si chehmod g keli oꞌodham k wabshaba ab wabsh wo s-ap haꞌichu kakke hab masma mapt g hejel e-ohg hab chum masma hab wo juhkchid. Wechij oꞌodham apt hab masma ab wo ha neidad mo d m-wepnag.
\v 2 ch g oꞌoki hab masma map g e-jeꞌe ch g wechij uꞌuwi hab masma mo d m-uꞌuwiga. Pt wabsh si s-ap wo ha chegitokad.
\p
\v 3 Am g ha ahgid hegam mo am hemiap e mihshmad mat wo ha nuhkud hegam mo d si heheꞌejel wiꞌikam uꞌuwi.
\v 4 K wabshaba pi ab hu ha ab mas wo ha nuhkud hegam mo ge aꞌaliga. Idam ha-aꞌaliga at wo chum ha nuhkud nat pi ha geꞌegel. K d Jiosh tatchui mat aigo epai wo i ha wehmtad,
\v 5 Hegam mo woho d si heheꞌejel wihpkam o heg ab waꞌi hiwig Jiosh ch chum hekid ab tahni g i wehmtadag. Idam amt wo ha nuhkudad
\v 6 ch wabshaba wabsh wo ha dagito hegam mo wabsh e gahgid g s-tahhadkam.
\v 7 Neh, pt wo ha ahgi hegam mo e wehm mihshmad mat hab wo juh ihda mani m-ahgid. T hab pi hedai has wo ha ahgad.
\v 8 Hegam mat pi wo ha nuhkud g e-hajuni o baꞌich d i pi apꞌekam mo g mischini.
\p
\v 9 Pi at an hu wo ha ui g wechij uꞌuwi mat wo ha nuhkud. Hegam mat wo i ha wehmtad at wo aisk g chuhdpo wehst-mahm aꞌahidag ch d wo hegamk mo s-ap e nuhkudahim g e-kunbad wehhejed
\v 10 ch s-ap ha geꞌegel g aꞌal ch s-ap ha nuhkud g Jiosh wohochuddam ch wehsko s-e mahch mo haꞌichukaj i ha wehmt hegam mo tatchua g i wehmtadag, chum as hems pi d wo ha-machigak.
\p
\v 11-12 Wechij uꞌuwi atp hems ep wo s-kuhkuntam mo eda hab chum kaij mat pi hab wo e juh k wabsh wo chikpani g Jiosh, neh, k hab masma wo e chuꞌijigchud k gam hu hab wo i e juh ab amjed g Christ.
\v 13 Haꞌi atp hems wabsh wo s-e papadmakamch an oiopodch ha-kihki oidch, wahm baꞌich i pi apꞌe mat wo mai g has ahgadag k an wo gantanad g pi kehg haꞌichu ahga.
\v 14-15 Haꞌi at heki hu hab masma hab e juh k am i oi g Jiawul. Id o hekaj baꞌich i a-apꞌe mat g wechij uꞌuwi ep wo kuhkunt k wo mahmadt k wo s-ap dagioꞌi g e-kihdag. T heg hekaj g t-obga pi wo e nako mas wo pi ap has t-ahgad.
\p
\v 16 Am g ha ahgid g uꞌuwi mat wo i ha dagioꞌi g heheꞌejel wihpkam e-hajuni k pi ab hu hedai wo mohtoꞌi. Hegam mo am hemiap e mihshmad at hegam wo waꞌi ha dagioꞌi mo d si heheꞌejel wihpkam
\p
\v 17 Am g wehs ha ahgid mat ab wo si has i ha elidad hegam mo d kekel em-wanimeddam ch s-ap am hab junihim g e-chikpan, wahm hegam mo si chikpan ch hab junihim g mashchama ch mihshmda.
\v 18 An o oꞌohanas Jiosh heki hu oꞌohana ed:
\q Pi g an hu wo bishdad g woiwis chini mat wo kehimunad g haꞌichu em-bahidag.
\q T am wo wa ha kamshshapad g haꞌichu em-bahidag. \rq Deuteronomy 25:4 \rq*
\m K hab d ahga ihda mamt hab waꞌap wo ha namkidad hegam mo hab junihim g chickpan, chum hems g Jiosh pionag.
\p
\v 19 Pi g ab hu kaiham g haꞌichu abchuda ab hema i ha ab idam kekel, heg hi wa mat gohk o waik hab wo chei mo si s‑ap s‑mahch haꞌichu ab ha amjed, mt am haha wo i mamche.
\v 20 Am apt hemajkam ha kailid k wo si s‑ha kehꞌel hegam mat hedam pi gam hu wo dagito g pi apꞌekam. T hab masma wo s‑e gihugad haꞌi ehp.
\p
\v 21 Am g wehs wepo masma hab ha juhni idam mani m‑shelinid k pi hedai shaꞌi gam hu wo i gawulkai. Id ani si s‑bahbagi ab m‑chehani am ha tahgio g Jiosh ch Jesus ch am ha tahgio g hekia s‑apꞌekam anghil.
\p
\v 22 Pi g am wabsh si s‑e hohtkid mapt am wo hema i kei mat wo chikpani g Jiosh. Tp hems d pi ap chuꞌijkam. Kut d wo m‑chuꞌijig mapt s‑hohtam am i kei.
\v 23‑25 Haꞌi o g pi ap ha‑chuꞌijig am tasho e neid. Kum s‑ap s‑mahch ch pi woho am hu wo i ha chuhcha idam. K wabshaba haꞌijj pi am hu tasho e neid g ha‑chuꞌijig. Mt heg hekaj am wo si i ha mamche mamt hedai am wo i ha chuhcha. (25) K hab wa masma g s‑kehg ha‑chikpan am tasho e neid. Chum as hi wa pi am hu i si tasho ch wabshaba pi wo ehsto g s‑kehg ha‑chikpan imhab i baꞌich.
\p (23) Neh, s‑e g nenꞌoidk, Timothy. Pi o kehgaj g shuhdagi amai. Kupt am wo shaꞌal wehnad g nawait. T hab pi wo m‑mumkichudad hegai shuhdagi.
\c 6
\p
\v 1 Hegam wohochuddam mo d nenehol at ab wo si has ha
elidad g e‑aꞌamo. T heg hekaj pi hedai wo has ahgad g
Jiosh ch pi wo has ahgad g t‑mashchama.
\v 2 Hegam mo g ha‑aꞌamo hab waꞌap d wohochuddam at baꞌich
ab wo i si has ha elidad ch baꞌich i s‑ap wo ha chikpani
nat pi g ha‑chikpan d wo ha‑apꞌedagk g ha‑wehm
wohochuddam.
\s Matt pi heg waꞌi lialkaj wo si pihk t‑elidad
\p Id apt hemho wa wo i ha mashcham k hekaj wo ha mihshmad
mani wa m‑ahgid.
\v 3‑4 Ho o wabsh chum si e hahaschud ch d wabsh pi haꞌichu
mahchim hegam mat hedai i pi heg hekaj wo ha mashcha
t‑kownalig Jesus Christ mashchama. Heg o d wohokam
t‑mashchama ch am t‑tashogid g s‑apꞌekam himdag. K idam
wabsh tatchua mat wo ha neꞌowinad ch wo ha kawnid. Id o
wabsh i wahmud g hehgamdag ch bagatalig ch pi ap has
ahgadag.
\v 5 Kut hegam wo ha kawhainad matp hedam pi ap haꞌichu
chegito ch pi mahch g wohokam ch hab chum elid mat g
oꞌodham wo s‑e kaisch id hekaj t‑himdag.
\p
\v 6 K wabshaba id d s‑wohokam s‑t‑kaisdag matt wo himad
g s‑apꞌekam ch wo si s‑ap t‑tahtkkad, chum achs pi haꞌichu
wo edgidad.
\v 7 Pi ach haꞌichu shaꞌi uꞌad ch in mahsi id dahm jewed
ch pi haꞌichu shaꞌi be k wo hih.
\v 8 Heg o am wa chum s‑apꞌe am t‑wehhejed matt ab wo wa al
heꞌes haꞌichu koꞌad ch ab s‑ap wo t‑enigadadch.
\v 9 Hegam mo s‑e kaischudamk at heg hekaj hab wo s‑junim g
pi apꞌekam. T g ha‑tatchui gam hu hab wo i ha juh ab amjed g
Jiosh. Kut haꞌi ep wo ha padch.
\v 10 Nahnko mahs pi apꞌekam o ab shohshon heg amjed mat
hema heg waꞌi lialkaj wo si pihk e elidad. Haꞌi at heg
hekaj im hu hab i e juh ab amjed g e‑wohochudadag k oi wa
muꞌi haꞌichu pi ap tahhadkam ab nako.
\s Haꞌichu i shelinida am Timothy wui
\p
\v 11 Pi g hab masma hab e juhni mo hegam mani am ha ahg nap
pi d Jiosh chikpandamga. Id apt eda am wo i e nako
s‑apꞌekam ch e‑wohochudadag ch pihk elidadag ch haꞌichu
nakogadag ch hemajimatalig mapt wo wepo chuꞌigk mo g Jiosh.
\v 12 Am g si e gewkad wehhejed g Jiosh k wo s‑wihnam
uꞌukchid g e‑wohochudadag mapt hekaj am wo i wah Jiosh
kihdag ed hab masma mat g s‑melidkam hab wo e juh mat wo
ha gehg.
\p Id at hekaj ab i m‑bei g Jiosh mapt wa am si s‑kehg ah g
e‑wohochudadag am muꞌi hemajkam ha kaichudk.
\v 13‑14 Bapt wabsh masma hab wo e juh matsh wa g t‑kownalig
Jesus natsh pi heg s‑ap ah g wohokam am tahgio hegai geꞌe
kownal mo hab chehgig Pontius Pilate. Kupt wehs am hab wo
juh ihda mani m‑ahgid k ab wo ai mat ab ep wo i hih g
Jesus. T hab pi hedai ab hu haꞌichu wo m‑chuꞌijigch. Id
ani ab si m‑chehani am tahgio g Jesus ch am tahgio g Jiosh.
Jiosh o ab ha mahkch g doakag wehs haꞌichu dodakam ch ab
ep wo i m‑wehmt mapt hab wo juh g ni‑chehanig.
\p
\v 15 Jesus at ia ep wo i e chehgi heg i tash ed mo kehshch
g Jiosh. Jiosh o si s‑hemajima ch wehs haꞌichu nuhkud ch d
kownal wehs ha dahm g kokownal.
\v 16 ch pi hekid ha mumkku. Pi o hedai neid ch pi hedai
wo e nako mas wo nei. An o haꞌichug hab mahs tonlig ch ed
mat pi hedai wo e nako mas ab wo miabi. Pi at hekid wo
huhug g gewkdaj. Kutt ab wo si has elidad chum hekid.
Neh, bo masma.
\p
\v 17 Ab g i ha chehani hegam mo d s‑kakais mat pi wo si e
hahaschudad heg hekaj haꞌichu e‑eniga ch pi ab hu wo
hiwgad ch wabshaba ab wo hiwgad g Jiosh. Heg o wud mo
s‑baꞌama ab t‑mahk wehs haꞌichu mach haschu i hekaj s‑ap
t‑tahtk.
\v 18 Ab g i ha chehani mat am hab wo i junihi g s‑kehg
chikpan ha wehhejed hegam mo tatchua g i wehmta k pi wo chu
daꞌad ch wo haꞌichu ha hoꞌidad g shoꞌigkam. Id o d woho
s‑kaisdag.
\v 19 Bo masma heg wa wepo mo e toꞌidahim g s‑namkig
haꞌichu an dahm kahchim ch ed hekaj wo si s‑ap tahtkkad
chum hekid.
\p
\v 20 Si g s‑ap nuhkud hegai mamt ab m‑nuhkudach. Pi g am
hu ha wehmajk hegam mo wabsh pehegi e neꞌowin heg hekaj mo
hab chum elid mo d haꞌichu mahchig. Id at pi wo shaꞌi i
t‑wehmajk matt baꞌich i s‑ap wo s‑mai g Jiosh.
\v 21 Haꞌi o hab chum e ahg mo edgid ihda mahchig ch oi wa
wabsh heb hu wua g e‑wohochudadag.
\p Neh, Jiosh at wo wa s‑m‑hoꞌigeꞌel.