\id 2TI
\h 2 TIMOTHY
\toc1 2 TIMOTHY
\mt Id ash d Hema Ep Paul Oꞌohana am Timothy Wui
\c 1
\m
\v 1 Ni-wehnag Timothy:
\p Ia ant ep wo haꞌichu i m-oꞌohani ahni Paul mani d kehshaj
g Jesus Christ. Do Jiosh tatchui mant wo i ahgahi ab amjed
g alidaj. T hab wo bei g wechij doakag hegam mat ab wo i
s-wohoch ab amjed g alidaj hab masma mash wa heki hu hab
kaij matsh hab wo e juh.
\p
\v 2 Ab g ni-kaiham ahpi map d ni-alidag t-wohochudadag
ed.
\p Ab o wa si s-m-hoꞌigeꞌid g t-ohg Jiosh g t-kownalig
Jesus Christ wehm ch ab wo wa baꞌich i m-mahkad g i
wehmtadag ch s-ap tahhadkam.
\s Mash g Paul am i gewkemhun g Timothy
\p
\v 3 Chum ani hekid ab si hoꞌigeꞌid g Jiosh mani hekid i
ni-hoꞌigeꞌidahun m-wehhejed. Jiosh ash wa am ha tashogid g
t-shohshon matt has masma wo himad g t-doakag ch ab wo si
has elidad. Kuni hab masma hab ni-wua ch hab pi shaꞌi
ni-kudut.
\v 4 P ahpi hab waꞌap ab s-wohochud g s-kehg haꞌichu ahgaj
g Jiosh. Kuni s-chegito mapt si pi ap e taht mant hekid am
i m-dagito. Kuni s-m-neidamk mapt ep wo si s-hehgigk.
\v 5 Am apt ha oidk hab e juh g e-huꞌul Lois ch e-jeꞌe
Eunice mapt ab i s-wohoch g Jiosh haꞌichu ahga.
\p
\v 6 Pt wo s-chegito matt ab toa g t-nohnhoi m-ab k am
m-wehhejed t-hoꞌigeꞌidahu. T g Jiosh ab m-mah g gewkdag k
am m-chehgi mapt has i mahs chikpan hab wo junihid
wehhejed. Pegih, pt wo i e gewkad k am hab wo junihid.
\v 7 Jiosh at ab t-mah g Hekia S-apꞌekam Gewkdag mat an wo
t-uꞌukchid ch ab wo t-mahkchid g gewkdag ch pihk
elidadag ch dodolimadag ahchim mach d hemajkamgaj. Kutt
heg hekaj pi haꞌichu wo shaꞌi ehbidad.
\p
\v 8 Pegih, pt pi has wo e elidad am wehhejed neokch g
t-kownalig Jesus ch hab wa masma pi has wo e elidad ab
ni-amjed mani wehhejed d lihso. Ab o t-mahkch g Jiosh g
gewkdag matt am wehhejed wo t-shoꞌigch. Kupt wo si nako g
e-shoꞌigdag am ahgachugch g s-kehg haꞌichu ahgaj.
\v 9 Do Jiosh mat t-doꞌibia ab pi apꞌekam t amjed. Pi att
has masma has wo t-juh k wo t-doꞌibia. Gd hu i si wehpeg at
am i apꞌech mat wo s-t-hoꞌigeꞌel am gahi wuhshanim g
e-alidag Jesus Christ matt d wo Jiosh hemajkamgak.
\v 10 Ia at jiwia g t-doꞌibiakam Jesus Christ k am i
t-tashogi g Jiosh hoꞌigeꞌidadag. Kah att g s-kehg haꞌichu
ahgaj k s-mai matt has masma s-ap am wo gahi wuwha g muhkig
edgidch g pi ha huhugedam doakag.
\p
\v 11 Jiosh at am i ni-kei mant wo ahgachugad g s-kehg
haꞌichu ahgaj ch wo ha mashchamad.
\v 12 Kuni heg hekaj hab muꞌi ni-shoꞌigchud ch pi shaꞌi has
ni-elid id amjed nani pi s-mahch hegai mani ab
s-wohochud. T heg wo e nako mat s-ap wo ni-nuhkudad mant
wehs am hab wo juh mat haschu wehhejed ab i ni-gawulkai k ab
wo ai mat ep wo jiwia.
\p
\v 13 Ab ani m-mashcham mo has chuꞌig g Jiosh haꞌichu ahga.
Kupt heg wo waꞌi ahgahid nap pi heg s-wohochud ch ab si
tatchua g Christ ch d hemako heg wehm.
\v 14 Am o t-eda g Hekia S-apꞌekam Gewkdag ch ab t-mahkch g
gewkdag. Kutt hekaj am wo si s-ap nuhkud g s-kehg haꞌichu
ahgaj g Jiosh.
\p
\v 15 Am ap wa s-mahch mat ia wabsh i ni-dagito hegam mo ab
Asia t amjed ia ni-wehmajkahim, chum wa g Phygelus ch
Hermogenes.
\v 16-17 K wabshaba g Onesiphorus pi has e elid mani d
lihso ch an i ni-gahghi ia jiwiak Rome kihhim t am am hugkam
mat ni-cheh k muꞌikko ia i ni-chehgimed k ab ni-mamka g s-ap
tahhadkam. Kuni ab tahni g Jiosh mat baꞌich ab wo i s-ha
hoꞌigeꞌel hegam Onesiphorus.
\v 18 Jiosh at wo wa s-hoꞌigeꞌel g Onesiphorus heg i tash ed
matt ab wo nam g Jiosh. S-mahch ap mat heꞌes haꞌichu s-ap am
hab ni-juni g Onesiphorus amai Ephesus kihhim t am.
\c 2
\s Matt hab wo chum masmak mo g si shondal
\p
\v 1 Jiosh o si s-hemajim ab t-mahkch g gewkdag ahchim matt ab i t-hemakoch g Jesus Christ wehm. Kuni heg hekaj m-ahgid mapt s-gegokim wo himad g e-chikpan wehhejed.
\v 2 Muꞌi hemajkam ani ha mihshmad m-kaichudch. Kupt ahpi epai wo ha mashcha hegam mat am wo i e nakog k haꞌijj epai wo ha mashcha ihda.
\p
\v 3 Neh, bapt masma wo e shoꞌigch mat g shondal am hab junihidch g e-chikpan am wehhejed g Jesus Christ.
\v 4 S-mahch ap mat g shondal wehs hab wo junihid hegai mat g uhgchugaj ab wo cheha ch pi haꞌichu wo hiwigi mas wo shohbi. Kupt ahpi hab waꞌap wo masmak am wehhejed g Jiosh.
\p
\v 5 S-mahch ap mat g s-melidkam pi ab hu wo bei g e-gehgewi heg hi wa mat am hab wo junihid g ha-chehanig. Kupt ahpi hab waꞌi masma wo bei g e-gehgewi mapt am Jiosh tatchui oidk hab wo e junihid.
\p
\v 6 Hegai mo si chikpan g e-esha at wehpeg ab wo ui g e-oda mat wo bai. Kupt ahpi hab waꞌap ab haꞌichu wo i nei am chikpank g Jiosh wehhejed.
\p
\v 7 Am g i oidahim ihda mani m-ahgid. T g Jiosh am wo i m-wehmt mapt wo s-amich.
\p
\v 8 Jesus Christ o hab waꞌap d oꞌodham ch ab s-ap nakog g shoꞌigdag. T g Jiosh ab uhpam i wuhshad heg i dahm mat muh. Do ihda s-kehg haꞌichu ahga mani am ahgachug. Kupt am wo oidahid mat haschu ab nako g Christ ch s-ap ab wo nako g e-shoꞌigdag.
\v 9 Ni ahni hab waꞌap ni-shoꞌigchud am ahgachugch ihda s-kehg haꞌichu ahga hask mam ep ge ni-wulshch g e hukshchim wapainomikaj hab masma mantp d si pi ap hemajkam. K wabshaba g Jiosh neꞌoki pi e wulshch.
\v 10 Am ani wabsh i ni-dagitokch mantp haschu ab wo i nako ha wehhejed hegam mat g Jiosh am i apꞌech mat wo e doꞌibia. Idam at ab wo i s-wohoch g haꞌichu t-ahga ab amjed g Jesus Christ. T g Jiosh chum hekid ab wo si has ha elidad.
\v 11 Do si wohokam ihda hab ha-cheꞌi:
\q Chum att hekid d wo dodakamk g Christ wehm mach hedai ab i t-dagitokch wui nat pi t-wehhejed muh.
\q
\v 12 T heg ab wo t-hiwigi matt wo i wehmt am eda g kownaltaligaj ahchim matt an wo uꞌukchid g t-wohochudadag am t-shoꞌigdag ed.
\q T wabshaba im hu hab wo i e juh ab ha amjed hegam mat wo dagito g e-wohochudadag.
\q
\v 13 Hemho wa at am hab wo juh mo has i kaij.
\q Kut pi gam hu hab wo i e juh ab t-amjed, heg hi wa mattp wo dagito g t-wohochudadag.
\s Mat has masma d wo s-ap chikpandamk
\p
\v 14 Am g i ha chegitochud ihda mani wa m-ahgid k ab ha shohbid g Jiosh gewkdagkaj mat pi wabsh pehegi wo neneokad ch pi wo e cheggiad. Id at wo ha padch hegam mat wo kaiha.
\v 15 Am g si i e nakog mapt d wo si s-ap piongajk g Jiosh ch si s-ap am wo ha mashchamad g Jiosh wohokam mapt pi wo shaꞌi si e elidad.
\p
\v 16-18 Haꞌi at dagito g wohokam k ha mashcham mat heki hu ab i wuwha g koꞌi muhkig amjed. Gohkajj idam mo id hekaj ha iattogid o d Hymanaeus ch Phyletus. K g ha-mashchama padchud g ha-wohochudadag hab masma mat g pi kehg hihwdag wo em-cheawuagi. Pi g ha wehm aꞌagad g ha-mashchama. Gm at hu hab wo i m-juh ab amjed g Jiosh.
\v 19 T wabshaba g Jiosh s-wihnam shondad g e-neꞌoki mat pi hedai wo shaꞌi gawul juh. K an oꞌohanas:
\q Jiosh o s-ha mahch mo hedai woho ab s-wohochud. \rq Numbers 16:5 \rq*
\m K an ep oꞌohanas:
\q Matp hedai hab wo chei mo d Jiosh hemajkamga k hemho wa gam hu hab wo i e juh ab amjed g pi apꞌekam. \rq Psalm 34:14 \rq*
\p
\v 20 Neh, matp hems am wo haꞌichugk g nahnko mahs hohashahaꞌa am s‑kais kih ed. Tp hems haꞌi d wo ohlak ch haꞌi d wo plahtak ch haꞌi d wo uhsk ch haꞌi d wo bidk. Kut wo e hekaj hegam mo s‑namkig ha wehhejed g s‑has hahaꞌichu. T g pi namkigchu wabsh chum has masma wo e hekaj.
\v 21 Pegih, t g Jiosh hab wa masma si s‑has haꞌichukaj wo t‑hekaj mattp hedai wo t‑kegchudch ab amjed g pi apꞌekam natt pi wo t‑nahtokch ch wo i t‑gawulkadch wehhejed.
\p
\v 22 Pegih, pi g am i e dagito pi apꞌekam ch ed k am s‑ap wo i e gewkadch s‑apꞌekam k ed ch am hab wo junihid mapt haschu wo ha ahgi ch wo si pihk e elidad wehs ha hekaj ch wo si s‑ap e tahtkkad ab ha wui g e‑wehm wohochuddam. T hegam mo ab ihm g Jiosh ch s‑ap haꞌichu chegito m‑wehm hab wo masmak.
\v 23 Bant ep wo chei mapt pi wo ha neꞌowi hegam mat wabsh wo has hu kaijjid ch pi e mahch ch e neꞌowin. S‑mahch ap mat id am wabsh wo ha uꞌapa kawhaina ch ed.
\v 24 Jiosh pionag at pi wo chum ha kawhainad ch wabsh wo si s‑hemajimak ab wehs ha wui ch wo si s‑ap ha mashchamad
\v 25 ch si s‑hemajim wo ha shohbidad hegam mat ab wui wo gegokiwua ch wo ha mashchamad. Tp hems ab wo ha mah g Jiosh g apꞌedag mat wo s‑ohhod g pi ap e‑chegitoi k ab wo s‑mai g wohokam.
\v 26 T hab masma uhpam wo bei g s‑ap e‑chegitoidag k wo e doꞌibia ab amjed g Jiawul.
\c 3
\s Matsh has wo chuꞌigk g hemajkam si oidch tash ed
\p
\v 1 Si g s‑chegitok mat wehs haꞌichu wo s‑hasigk mat d wo i
ha oidch tatshk.
\v 2 Hemajkam at wo s‑chu daꞌad ch wo si pihk e elidad g
lialkaj ch wo chum si e hahaschudad. Muꞌi hemajkam at wo
aꞌai s‑koꞌokam has e ahgad ch pi ab hu uhpam wo i
nodgidad g s‑apꞌekam. Muꞌi at wo has ahgad g Jiosh. T g
aꞌal pi ab hu wo wohog ha elidad g e‑geꞌegedga.
\v 3 Muꞌi hemajkam at wo pi aꞌamdagk ch pi hedai ha hekaj wo
pihk e elidad ch haꞌichu wo e iattogidad ab aꞌai e amjed
ch wo s‑ta ehbidamak ch wo s‑ta kekeꞌidamak. Muꞌi at wo
s‑ohhodad g s‑apꞌekam.
\v 4 Muꞌi at pi ab hu wo ha tatchuad hegam mo d chum
ha‑naipijju ch has am wabsh wo si e wuad ch pi ab hu wo
tatchuad g Jiosh ch wabshaba g pi kehg s‑tahhadkam ab wo
tatchuad.
\v 5 Hemajkam at hi wo wa e mihshmdad ch wabsh pi wo
wohochudad hegai mo haschu ab chum kah ch im hu hab wabsh
wo i juh g Jiosh gewkdag. Pi g am hu ha wehmajk idam hab
mahs hemajkam.
\p
\v 6 Haꞌi at am wabsh ep wo si i wahpkad ha‑kihki ed ch wo
s‑ap ha iattogi g uꞌuwi. T hegam mo pi gewkpdag am
e‑wohochudadag ed ab wo ha kaihamad no pi tatchua g pi
apꞌekam ch e kudut g e‑chuꞌijigkaj
\v 7 ch pi mahch g wohokam, chum as hems hi wa chum
s‑mahchimk.
\v 8 Hegam mo ha iattogid o ab wui gegok g wohokam hab
masma mo wa Jannesbad ch Jambresbad ab wui gegok g Mosesbad.
Ho o wabsh pi ap haꞌichu chegito ch d ep hegam mat pi e nako
am Jesus wohochudadag ed.
\v 9 T wabshaba wehsijj wo s‑mai mo pi haꞌichu aꞌamichud
hab masma mat wa am hab e juh ha tahgio g Jannesbad ch
Jambresbad. Kut heg hekaj pi wo e nako mat geꞌe haꞌichu wo
padch.
\s Mash id d si oidch haꞌichu shelinidaj g Paul am
Timothy wui
\p
\v 10 P wabshaba ahpi hig am oid g haꞌichu ni‑mashchama ch
haꞌichu hab ni‑juni ch haꞌichu hab ni‑elida. S‑mahch ap
mani haschu ab s‑wohochud ch has masma ab i s‑ha bahbgi g
hemajkam ch pihk ni‑elid ha hekaj ch nakog haꞌichu.
\v 11 S‑mahch ap mam ni‑shoꞌigchud. Kuni muꞌi haꞌichu
s‑koꞌok nakog. S‑mahch ap mant muꞌi haꞌichu nako am Antiok t
am ch Iconium t am ch Lystra t am. T wabshaba g Jiosh
ni‑doꞌibia wehs amjed ihda.
\v 12 Kupt ahpi hab waꞌap wo e shoꞌigch natt pi wehs wo
t‑shoꞌigch ahchim mach tatchua matt am wo oidad g
s‑apꞌekam doakag ab si i t‑dagitok Jesus wui.
\p
\v 13 T wo i e gewpkai g pi apꞌekam ch s‑chu iꞌattomkam k
baꞌich wo i ha iattogidad g hemajkam ch hejel wo e
iattogidad.
\v 14 Tt wabshaba ab i m‑mashcha g wohokam. Kupt ab si
s‑gewkam i s‑wohochud k wo s‑wihnam uꞌukchid s‑mahchch
matt hedai m‑mashcha.
\v 15 S‑mahch ap map ga hu i e‑alijk amjed ab kaiham g Jiosh
oꞌohana. K id d hegai map amjed ab bekch g e‑amichudadag.
Kupt hekaj ab i s‑wohoch g Jesus Christ k e doꞌibia.
\v 16 Ab o tashogid g Hekia S‑apꞌekam Gewkdag hegai mo g
Jiosh tatchua mat an wo e oꞌohan k d wo t‑mashchamak. K heg
wehs d i t‑wehmtadag matt hekaj aꞌai wo t‑mashcham k wo
s‑mahchk g wohokam ch wo shohbidad g pi t‑apꞌekam ch am wo
i t‑shelinid matt has masma s‑ap wo himchudad g
t‑doakag.
\v 17 Kutt heg hekaj wo s‑ap t‑nahtokch ahchim mach ab ihm g
Jiosh matt am hab wo juh wabsh chum has mahs s‑kehg chikpan
wehhejed.
\c 4
\p
\v 1 Jesus at am s‑ap wo i nahto g e‑kownaltalig ia ep
jiwiak k wo ha lodai wehs hemajkam, chum hems hegam mat eda
d wabsh wo kia dodakamk. Heg ani hekaj si m‑chehani am
tahgio g Jiosh
\v 2 mapt am wo si ahgahi g Jiosh haꞌichu ahga k am wo si e
gewkadch mapt am wo ahgad wabsh chum hekid ch pi am hu wo
chum ge nenidad mat hekid am wo s‑apkot mapt am wo ahgad.
Ab g i ha shohbid pi apꞌekam amjed k am i ha gewkemhun mat
hab wo junihid g s‑apꞌekam wabsh s‑bahbgim ha mashchamch.
\v 3 Ab o him g tash mat wo i muꞌida hegam mat gawul
haꞌichu wo ha mashcha. Kut muꞌi hemajkam ab wo s‑ha kaim
\v 4 k g wohokam mashchama wo dagito k ab wo hiwgad g
hohoꞌoki aꞌagida.
\v 5 Pt wabshaba ahpi wo si s‑e nenꞌoidk ch wo s‑e chegitok
wehs haꞌichu k ed ch ab wo nako g shoꞌigdag. Am g wehs hab
juhni g e‑chikpan am ahgachugch g Jiosh haꞌichu ahga nap pi
d piongaj g Jiosh.
\p
\v 6 Ahni at hi e ai g ni‑tashga mant wo ni‑muhkid.
\v 7 S‑ap ant nahto g ni‑chikpan am s‑gewkam i oidk hab
masma mo g s‑melidkam am si i e nakog mat wo bei g
s‑apꞌekam e‑gehgewi.
\v 8 K heg am waꞌi wiꞌis mant wo bei g s‑apꞌekam ni‑gehgewi
nani pi g s‑apꞌekam am hab junihim. Jiosh alidag o d
s‑apꞌekam usagakam ch ab wo i ni‑mah ihda mat hekid ep wo
jiwia k ab wo i t‑gawulkai geꞌe lodaita ch ed. Kut wehsijj
hab waꞌap ab wo bei g e‑gehgewi hegam mo hedai ab si pihk e
elid hekaj g Jiosh alidag ch nenida mat ep wo jiwia.
\s Mash g Paul nahnko haꞌichu ab i ahgid g Timothy
\p
\v 9 Am g i e nakog k s‑hohtam ab i ni‑chehgimed
\v 10 nant pi hejel ia wih. Crescens at gam hu hih Galasia
jewed wui. T g Titus gam hu hih Dalmasia jewed wui. Demas at
ab si tatchua g jewed t ab haꞌichu k ia wabsh i ni‑dagito k
gm hu hih Thessalonica wui.
\v 11 Heg o waꞌi Luke ia ni‑chechga. Ab apt wo i bek g Mark.
T am wo i ni‑wehmt id eda chikpan.
\v 12 Ab ant cheha g Tychicus mat am wo hih Ephesus kihhim
wui.
\v 13 Ab g i ni‑behid g ni‑lihwa ch ni‑oꞌohana, wahm hegam
mant hejel oꞌoha. Ab ant nuhkudach g Carpus amai Troas
kihhim t am.
\p
\v 14 S‑koꞌokam at wa has ni‑dohdda hegai Alexander mo d
hihliyo. T g Jiosh wo wa mah g s‑koꞌok namkidadag.
\v 15 Neh, pt wo si s‑e nenꞌoidad ab amjed no pi shaꞌi si
wui kehk g haꞌichu t‑ahga.
\p
\v 16 Hegam mat wo chum i ni‑wehmt at ia wabsh i ni‑dagito
mamt wa wehpeg ni‑lodai. Ab ani tahni g Jiosh mat pi ab hu
wo ha abch ihda.
\v 17 Jiosh at wa i ni‑wehmt k ab i ni‑mah g gewkdag. Nt
hekaj hab ni‑nako mant am s‑ap ah g Jiosh haꞌichu ahga am ha
wui hegam mo am haꞌichug nahnko mahs hemajkam. T ab i
ni‑doꞌibia mamt pi am hu ni‑wua maipid ha wui
\v 18 k hab waꞌap wo ni‑doꞌibia ab wehs amjed g pi apꞌekam
haꞌichu k an wo ni‑uꞌapa dahm kahchim ch ed. Ab att wo si
has elidad g Jiosh chum hekid. Neh, id o waꞌi si.
\s Ia at i kuhgi g e‑oꞌohana
\p
\v 19 Am apt wo ha ahgi g Priscilla ch Aquila ch hegam
Onesiphorus wehm kihkam mat ab wo i s‑ni‑hoꞌigeꞌel.
\v 20 Ga at hu wih g Erastus Corinth kihhim t am. Nt g
Trophimus ga hu wuiok Miletus kihhim t am nat pi mumku.
\v 21 Am g i e nakog k ab wo i hih mat koi wo e ai g
s‑hehpichꞌedkam.
\p Idam wehsijj o ab s‑em‑hoꞌigeꞌid Eubulus ch Pudens ch
Linus ch Claudia ch wehsijj g t‑wehm wohochuddam iia.
\p
\v 22 Neh, am at wo wa em‑wehmajk g t‑kownalig Jesus. T g
Jiosh wo wa s‑em‑hoꞌigeꞌel.