\id TIT
\h TITUS
\toc1 TITUS
\mt Id ash d Paul Oꞌohana Am Titus Wui
\c 1
\m
\v 1 Ni-wehnag Titus:
\p Am ant wo haꞌichu i m-oꞌohani ahni Paul mani d Jiosh
pionag ch m-ahgi g s-kehg haꞌichu ahgaj. S-mahch ap mat g
Jesus Christ am i ni-kei mant id wo ahgachugad. K hab d
elidaj mant am wo i ha gewkemhunad hegam mat g Jiosh ab i
ha gawulkai mat d wo hemajkamgajk. T hab wo i gewka g
ha-wohochudadag. T baꞌich wo i mai ihda wohokam ab amjed g
Jiosh.
\v 2 Bo kaij g Jiosh mat eda pi koi haꞌichu shaꞌi nahto
matsh ab wo ha mah g pi ha huhugedam doakag hegam mat ab
wo i s-wohoch.
\v 3 T hemu am i e ai mat s-ap maskogi g haꞌichu e-ahga.
\v 4 Kupt ab i s-wohoch ab ni-ab k hahawa wepogidas map d
ni-alidag.
\p Ab o wa si s-m-hoꞌigeꞌid g t-ohg Jiosh g t-doꞌibiakam
Jesus Christ wehm ch ab wo wa baꞌich i m-mahkad g i
wehmtadag ch s-ap tahhadkam.
\s Mash haschu d chikpanaj g Titus
\p
\v 5 Am ant i m-dagito Crete jewed t am mapt am wo i apꞌech
mo haschu koi apꞌechudas am ha shaꞌashagid hegam mo hemiap
e mihshmad. Am apt wo i ha chuhcha wehs kihhim ed hegam mat
wo ha wanimedad mani wa id heki hu m-chehani. Kunt am wo i
m-chegitoch mat has wo chum masmak.
\p
\v 6 Dat wo si s-ap oꞌodhamk ch hemako wo hohnigk ch pi wo
ha chuꞌijigk. T g ha-aꞌaliga hemho wa d wo wohochuddamk
ch ab wo ha kaihamad g e-geꞌegedga. T hab pi hedai wo e
nako mas ab wo haꞌichu ha abch.
\v 7 Pi o hab chuꞌig mas g ha wanimeddam wo ge e
haschudad o s-hohtam wo babgatad o wo nawkkoꞌod o wo ha
cheggiad o muꞌi haꞌichu wo si s-behimkkad.
\v 8 K wabshaba hab chuꞌig mat wo s-dodolimak ch hab wo
junihid g s-apꞌekam ch chum hekid wo i ha wehmajk hegam mo
tatchua g i wehmtadag.
\v 9 Am ap ha mashcham g Jiosh haꞌichu ahga. Kut id an wo
si uꞌukchid mat heg hekaj wo i ha gewkemhunad g hemajkam
ch wo i ha shohbidad hegam mo ab wui gegok g Jiosh haꞌichu
ahga.
\p
\v 10-11 Heki at hu muꞌi i wuwha hegam mo chum s-keshwuimk g
Jiosh haꞌichu ahga ch ha iattogid g hemajkam ch heg hekaj
ab ha wanchkwup mat wo ui g lial, wahm hegam mo d ni-wepo
Tutuligo oꞌodham. Kumt heg hekaj wehs e wehm am wo i ha
shohbi.
\p
\v 12 Hema ash hab kaij g s-chu amichuddam am Crete t am,
“Ahchim Crete t am oꞌodham ach s-chu iꞌattomk ch s-ta
kekeꞌidama ch s-papadma ch wehs haꞌichu si s-behimk.”
\v 13 Woho o wa mo has i kaij. Kupt heg hekaj si s-gewkam wo
i ha shohbi. T hab ab wo m-kaiham k ab wo s-wohochudad g
wohokam.
\v 14 Pt wo ha ahgi mat pi wo wohochudad g Tutuligo
ha-hohoꞌoki aꞌagida ch hegai mo d wabsh ha-chehanig hegam
mo pi tatchua g wohokam.
\p
\v 15 Wehs o s-kehgaj g Jiosh haꞌichu nahtoi am ha wehhejed
hegam mo s-kehg haꞌichu chegitoidag. K wabshaba pi haꞌichu
s-kehgaj am ha wehhejed hegam mo pi kehg haꞌichu
chegitoidag ch pi wohochud g wohokam no pi g pi kehg
haꞌichu ha-chegitoidag wehs haꞌichu padchud ha wehhejed. K
pi has ab hu shaꞌi tahhadag g ha-iꞌibdag mo am hab junihim
g pi apꞌekam.
\v 16 Idam o hab kaij mo s-mahch g Jiosh ch wabshaba hab e
wua mo pi mahch no pi s-ta kekeꞌidama ch pi chechkaidag. K
g ha-doakag pi kehg hab mahs. K pi ab hu shaꞌi ha ab ulini
mas hab wo juh g s-apꞌekam.
\c 2
\s Mattsh heg wo waꞌi mashcha s-kehg mashchama
\p
\v 1 Kupt wabshaba ahpi am wo ha mashcha g wohochuddam mat
has wo e junihid ch hekaj wo e chehgidad mo s-kehgaj g
Jiosh mashchamadag.
\v 2 Pt wo ha ahgi g kekel oꞌodham mat d wo si oꞌodhamk ch
pi wabsh wo i e wahmud k wabshaba wabsh wo i e bahbgi wehs
haꞌichu k ed. T wabsh shelinim wo oidad g e-wohochudadag
ch wo pihk e elidad ab wehs ha wui ch s-e tahtk ch ab wo
nakogad haꞌichu.
\p
\v 3 Kupt hab waꞌap wo ha ahgi g oꞌoki mat wo s-dodolimak
ch wo e chehgidch mo am oidch hab e junihim g s-apꞌekam ch
pi wo nawkkoꞌod ch pi wo pi kehg neneokad ab hedai k
amjed.
\v 4 T g wechij uꞌuwi ab ha amjed wo mai mat has wo chum
masmak ch ab wo i ha tatchuad g e-wehm kihkam ch e-aꞌaliga
\v 5 ch wo e nuhkudad mat pi hab wo wuad g pi apꞌekam ch
wo si s-wapagimak am e-kihdag ed ch ab wo ha wohog elidad
g e-wehm kihkam. T hab pi hedai has wo ahgad g Jiosh
haꞌichu ahga.
\p
\v 6 Kupt hab waꞌap wo ha ahgi g wihpiop mat d wo si
oꞌodhamk.
\v 7 Chum apt hekid hab wo wuad g s-apꞌekam ch hab masma
wo ha chehgi mat has wo chum e junihid.
\v 8 Kupt ab wo si has elidad g wohokam ab amjed g Jiosh
ch heg wo waꞌi ha mashchamad. T hab wo si e elidad hegam
mo ab wui gegok g Jiosh haꞌichu ahga ch pi wo e nako mas has
wo m-ahgad.
\p
\v 9 Ab g ha ahgid wabsh chum hedai ha-pionag mat ab wo
kaihamad g e-ahmo ch pi ab hu wo neꞌowinad
\v 10 ch pi haꞌichu wo ehsidad ch wabshaba wo e
chehgidahid mo s-ap d pion. Kut heg amjed am wo i e
tashogi mo s-apꞌe g haꞌichu ahgaj g Jiosh matt heg hekaj
t-doꞌibia.
\p
\v 11 Jiosh o wehs s-ha hoꞌigeꞌid g hemajkam ch hab juh g
doꞌibiadag chum wehs ha wehhejed. T id am wabsh s-ap i e
chehgi.
\v 12 Kutt heg hekaj wo s-ohhod g pi apꞌekam k wo t-nuhkud
matt hab wo wuad g s-apꞌekam ch ab wo si haꞌichuch g Jiosh
id eda jewed.
\v 13 Batt wo masmak nach pi nenida mach haschu s-wohochud
mat ia ep wo jiwia k si s-tondam wo e chehgi hegai mo d
t-Jioshga ch d t-doꞌibiakam Jesus Christ.
\v 14 Heg at am i e dagito mat s-koꞌokam e muhkid k hekaj
t-doꞌibia ab amjed g pi apꞌekam k i t-kegch mach d hahawa
si hemajkamgaj k si tatchua matt hab wo junihid g
s-apꞌekam.
\p
\v 15 Pegih, am g si ha ahgid wehs ihda k i ha gewkemhun
mat hab wo junihid g s-apꞌekam k ep i ha shohbid mat hedai
hab wo i wuad g pi apꞌekam. Pi at hedai wo chum pi
m-haꞌichuchudad nap pi gewkdag mapt id am hab wo junihid.
\c 3
\s Mattsh hab wo wa junihid g s-apꞌekam
\p
\v 1 Pt am wo ha ahgidad g wohochuddam mat has wo chum masmak. T wo s-ha wohog elidad g e-kokownalig ch am oidk hab wo e junihid g chehanig ch chum hekid wo e nahtokchid mat wo s-ap chikpanad ch hab wo junihid g s-apꞌekam.
\v 2 Am g ha ahgid mat pi wo pi kehg neneokad ab hedai i amjed ch wabshaba wo si s-ap e tahtkkad ch wo si s-hemajimak ab wehs ha wui.
\v 3 Neh, heki ach hu wa hab masmakahim mo hegam mo pi ab hu wohochud g Jiosh. Pi ach wa ab hu kaiham g Jiosh ch pi haꞌichu amichud ch hab s-junimk g pi apꞌekam ch pi aꞌamdag ch s-chu hehgamk. Haꞌi o s-t-kehꞌid. Kuch ab epai s-ha kehꞌid.
\v 4 K wabshaba g t-doꞌibiakam Jiosh si pihk e elid t-hekaj ch ia i e chehgi jewed dahm
\v 5-6 mat wo t-doꞌibia ab amjed g s-koꞌok t-namkidadag. Pi at hedai wo e nako mas wo e doꞌibia g hejel haꞌichu hab e-junikaj. T wabshaba g Jiosh ab i s-t-hoꞌigeꞌid k gam hu wako g pi ap t-chuꞌijig matt wo edagi g wechij doakag. Heg at hekaj ia jiwia g t-doꞌibiakam Jesus Christ jewed dahm k heg hekaj ab t-mah g Hekia S-apꞌekam Gewkdag. Heg o am t-eda ch ab t-mahkch hegai wechij doakag.
\v 7 Jesus Christ o ab s-t-hoꞌigeꞌid ch am i t-apꞌech matt wo s-apꞌek am Jiosh tahgio. Kuch heg hekaj edgid ihda wechij doakag ch hab am wehmaj wo kihkad chum hekid am i dahm matt wo koi.
\p
\v 8 Do wohokam ihda mani haschu m-ahgid. Kupt chum hekid am wo ha ahgidad g wohochuddam. T hekaj wo e nuhkud mat wo s-wapagimak ch hab wo junihid g s-apꞌekam. Id at d wo i ha-wehmtadagk g hemajkam.
\p
\v 9 Kupt pi wo ha neꞌowinad hegam mo wabsh pehegi haꞌichu m-kaiam ch am chum m-pipꞌichud ab amjed g Tutuligo ha-chehanig ch chum ge e haschud ch hab kaij mo ab d ha amjedkam g si s-has hahaꞌichu.
\v 10-11 Gokko apt wo s-ha daꞌi hegam mat hedai wo chum aꞌai ha gaꞌagwulkai g wohochuddam. Hegam mat pi ab hu wo m-kaiha o pi apꞌe. T g pi ap ha-chuꞌijig am wo ha chehgi. Kumt wabsh wo ha dagito.
\s Mo id d si oidchkam ahgidadag
\p
\v 12 Ia o ni-wehm dadha g Artemas ch Tychicus. Kunt idam am hema wo i kei mat am m-wui wo jiwia. Kupt am haha wo hih Nicopolis kihhim wui mapt am wo ni-wehmajk nant pi am wo dakad s-hehpichꞌed.
\v 13 Kah ani mash am m-wehm da hegai Zenas mo d chehanig hudawogdam ch atsh am hebai wo ha mihshmdam g Apollos wehm. Kupt heꞌes wo i e nakog k am wo i ha wehmt mat pi haꞌichu wo pi edagi.
\v 14 Bat wo wa chum masmak g wohochuddam mat hab waꞌap wo i ha wehmajk hegam mo hab masma tatchua g i wehmtadag.
\p
\v 15 Wehsijj o am i m-hoꞌigeꞌid idam t-wehm wohochuddam mo ia kih. Am g wehsijj i ha hoꞌigeꞌid g t-wehm wohochuddam amai.
\p Jiosh at wo wa s-em-hoꞌigeꞌel.