\id PHM
\h PHILEMON
\toc1 PHILEMON
\mt Id ash d Paul Oꞌohana am Philemon Wui
\c 1
\m
\v 1 Ni-wehnag, Philemon:
\p Ia ani kuhpi ahni Paul nani pi ahgachug g Jiosh haꞌichu
ahga ab amjed g Jesus Christ. K ia ni-wehmaj g Timothy ch ab
s-em-hoꞌigeꞌid.
\p Am ant haꞌichu wo m-oꞌohani, Philemon, s-chegitokch map
wa s-ap i t-wehmaj id eda chikpan.
\v 2 Kupt id am wo neꞌokchul Aphia wui ch heg wui Archipus
mo wa t-wehm ahgahim g Jiosh haꞌichu ahga, pej wehs ha wui
hegam mo am em-wehm e mihshmad em-kih am.
\p
\v 3 Ab o si s-em-hoꞌigeꞌid g t-ohg Jiosh ch t-kownalig
Jesus Christ ch ab wo wa baꞌich i em-mahkad g i wehmtadag
ch g s-ap tahhadkam.
\s Mash e hoꞌigeꞌidahun Philemon wehhejed
\p
\v 4-7 Ab apsh wabsh kia si hiwig g t-kownalig Jesus ch si
pihk e elid ha hekaj g e-wehm wohochuddam. (7) Sh hegam
ab si i e gewkemhun ab neidch map s-ap haꞌichu hab ha
junid. Ni heg hekaj si s-ap ni-tahtk (4) ch ab hoꞌigeꞌid g
Jiosh ch ab tahni mat baꞌich wo i m-wehmt hemu. (6) Pt hab
baꞌich ab wo i chehgi map geꞌe edgid g s-apꞌekam ab ihmch g
Jesus Christ.
\s Matsh haꞌichu hab wo chum e juh g Philemon
\p
\v 8 Ab o ni-mahkch g Christ g gewkdag mant ab wo haꞌichu
em-cheha ahpim mam ab ihm.
\v 9 Nt wabshaba ab wabsh wo i m-gewkemhu mapt haꞌichu hab
wo ni-juni heg wabsh hekaj map si pihk e elid t-hekaj.
Dani keli hemu ch ia kuhpi Jesus Christ wehhejed. Kupt ab
wo si pihk e el ni-wui k hekaj hab wo juh g ni-tatchui.
\p
\v 10 Ia o ni-wehmaj ihda m-neholiga mo hab chehgig
Onesimus. Ni am ahgid ab amjed g t-kownalig Jesus. T ab i
s-wohoch. K heg wa wepo mo d ni-alidag am t-wohochudadag
ed.
\v 11 Heki ash hu s-padmam chikpan m-wehhejed ch wabshaba
hemu s-wagimam chikpan mo hab masma hab d ahga g chehgigaj
ch hab haꞌichu ni-junid am m-wehhejed.
\p
\v 12 Ab ani chehani mat am uhpam ep wo hih m-wui. Kupt hab
masma ab wo neidad mo d ni-alidag.
\v 13-14 Chum ani hi wa tatchua mat ia wo i ni-wehmt
m-wehhejed mani ia kuhpi ch ahg g s-kehg haꞌichu ahgaj g
Jiosh. K wabshaba pi hab chum chuꞌig manis wo m-wohppoꞌi g
m-pionag. Baꞌich o i s-apꞌe mat hejel hab wo i e ah mapt has
masma wo i ni-wehmt.
\v 15 Do heb hu himkam ihda m-pionag al heꞌes i tash. Kuki
wabshaba hab d elidaj g Jiosh mat hab masma wo e chehg k d
haha wo m-wehm wohochuddamk chum hekid.
\v 16 Do si t-wehnag, wahm ahpi, no pi d m-pionag ch am i
dahm d hahawa m-wehm wohochuddam.
\p
\v 17 Bap masma hab ni-elid mani d si m-wehnag, pegih, k ch
hab wa masma hab wo elidad g Onesimus mat d wo si
m-wehnagk.
\v 18 Ab atsh m-wui pi ap chuꞌi. Kupt wabshaba ahni ab wo
ni-mohtoꞌi.
\v 19 Ahni ant wo m-namkid heg hekaj, chum aps ahpi ab
ni-ab e wulshch nant pi am m-wui uꞌapa g Jiosh haꞌichu ahga
mapt hekaj e doꞌibia.
\p
\v 20 Pegih, pt hab masma hab wo elidad g Onesimus mat d
wo m-wehnagk. Id at ab wo si i ni-gewkemhu am wehhejed g
Jiosh alidag.
\v 21 Id ant am i m-oꞌohani s-mahchch mapt baꞌich i dahm
haꞌichu hab wo ni-juni mani m-tahni.
\p
\v 22 Jiosh at ab wo kaiha g em-hoꞌigeꞌidahuna k ab wo i
ni-wuhshad ab amjed g kukpaikud. Nt am ep wo i em-chehgim.
Kumt heg hekaj am wo i apꞌech g kih ni-wehhejed.
\s Mash haꞌi ep s-hoꞌigeꞌid g Philemon
\p
\v 23 Ia o ep ni-wehm kuhpi g Epaphras ch s-m-hoꞌigeꞌid.
\v 24 K ia ep dadha g Mark ch Aristarcas ch Demas ch Luke
ch hab waꞌap s-m-hoꞌigeꞌid.
\p
\v 25 T-kownalig Jesus Christ at wo wa s-em-hoꞌigeꞌel.