\id 2JN
\h 2 JOHN
\toc1 2 JOHN
\mt Id ash d John Oꞌohana am Haꞌi ha Wui mo e Wehm e Mihshmad
\c 1
\m
\v 1-2 Ni-tatchui ni-wepnag:
\p Am ant wo haꞌichu i em-oꞌohani ahni mani d hema ha
wanimeddam wehsijj hegam mo ab si ihm g Jesus Christ. Si
ani pihk ni-elid em-hekaj nach pi d t-wehm wohochuddam.
Wehs g t-wehm wohochuddam o hab waꞌap si pihk e elid
em-hekaj. Pi at hekid gam hu hab wo i e juh g wohokam ab
t-amjed.
\p
\v 3 Ab o wa si s-em-hoꞌigeꞌid g t-ohg Jiosh g e-alidag
Jesus Christ wehm ch ab wo wa baꞌich i em-mah g i wehmtadag
ch s-ap tahhadkam. Kumt ab wo uꞌukchid g wohokam ch wo si
pihk e elidad wehs ha hekaj.
\s Matt am oidch hab wo t-junihid g Jiosh chehanig
\p
\v 4 Si ani s-ap ni-tahtk ch ia haꞌi ha neid g em-wehm
kihkam. K idam an uꞌukch g wohokam hab masma mo ab
t-chehani g Jiosh.
\v 5 Kuni ab wehs i em-gewkemhun mamt ab aꞌai e wui wo si
pihk e elidad. Pi o d wechij chehanig ihda mani am
em-ahgid. Edgid ach ihda ged hu i shohshon k amjed.
\v 6 Kutt ab aꞌai t-wui wo si pihk t-elidad ch hekaj am wo
t-chehgidad mach ab s-wohog elid ihda chehanigaj g
Jiosh.
\p
\v 7 Muꞌi at an i wuwha mo chum s-ha mashchamamk g hemajkam
ch eda d wabsh s-chu iꞌattomkam ch d obgaj g Jiosh alidag
no pi pi ha mashcham mat ia mahsi k d oꞌodham hab masma
mach ahchim.
\v 8 Kumt heg hekaj wo s-e nenꞌoidk mamt pi gam hu hab wo i
e juh ab amjed g Jiosh haꞌichu ahga k wabshaba wehs wo bei
mo haschu ab em-makiog g Jiosh.
\p
\v 9 Hegam matp hedai am gawul wo juh g Jiosh alidag
mashchama o pi shaꞌi mahch g Jiosh. S-mahch ach g Jiosh ch
ep s-mahch g alidaj ahchim mach am oidch hab masma g
alidaj mashchama.
\v 10 Kumt heg hekaj pi ab hu wo ha kaihamad hegai mat
hedai wo chum s-em-mashchamam k eda pi wo ahgachugad g
Jiosh alidag mashchama. Pi g am hu wo i ha wahpkid e-kihki
ed k chum hems pi hab wo chei ab ha wui. “Jiosh at wo wa
em-wehmajk,”
\v 11 mamt pi ab hu wo i ha wehmt hegam mat am wo
ahgachugad g pi wohokam.
\s Mash s-ha neidamk g John ch ha wehm s-neokimk
\p
\v 12 Muꞌi ani haꞌichu s-em-ahgidamk ch wabshaba pi id
hekaj am i em-oꞌohani nani pi am s-himimk mant wo em-neid k
wo em-wehm neo. Kutt am t-wehm si s-ap wo t-tahtkk.
\p
\v 13 Ia o haꞌi kih g t-wepnag ch ash si pihk e elid em-hekaj.