\id 3JN
\h 3 JOHN
\toc1 3 JOHN
\mt Id ash d John Oꞌohana am Gaius Wui
\c 1
\m
\v 1 Ni-tatchui ni-wehnag, Gaius:
\p Am ant wo haꞌichu i m-oꞌohanid k d hema ha wanimeddam
wehsijj hegam mo ab si ihm g Jesus Christ.
\p
\v 2-3 Ia at haꞌi dada hegam mash am em-wui ahgachug g
Jiosh haꞌichu ahga k ia t-ahgid mapsh si s-ap himchud g
e-doakag am oidch g Jiosh haꞌichu ahga map has i masma
chum hekid hab e junihim. Si ani s-hohhoꞌid ch kah mapsh
am wabsh kia si s-ap e tahtk am Jiosh wui. Kuni ab tahni g
Jiosh mat wehs haꞌichu wo s-apꞌek am m-wehhejed. Kupt wabsh
wo si s-doak.
\v 4 Do si s-ap tahhadkam am ni-wehhejed mat hegam mani ha
ahgid g Jiosh haꞌichu ahga wo si s-ap uꞌukchid.
\p
\v 5 Kupsh am s-ap ha dagioꞌid hegam mash am daiw am
ahgachugch g Jiosh haꞌichu ahga, chum as pi d m-machiga.
\v 6 Idam mat ia dada o t-ahgid mapsh si pihk e elid
ha hekaj. Kuni ab si i m-gewkemhun mapt baꞌich wo i ha
wehmajk mat gam hu hasko ep wo i ahgachugad g Jiosh haꞌichu
ahga.
\v 7 Idam o t-ahgid mash pi ha hiwgid hegam mo pi ab hu
wohochud g Jesus mas haꞌichu ab wo i ha mah.
\v 8 Ahchim o ab d t-wuikam mach ab s-wohochud g Jiosh
alidag matt wo i ha wehmtad hegam mo ahgachug g Jiosh
haꞌichu ahga.
\p
\v 9-10 Id ani chum em-tashogid heki hu ni-oꞌohana ed
ahpim mam am e wehm e mihshmad. Kush wabshaba g Diotrephes
pi chegima g ni-oꞌohana ch am em-iattogid ch pad neok ab
t-amjed ahchim mach ahgachug g Jiosh haꞌichu ahga. Tatchua
ash g Diotrephes mat d wo em-wanimeddamk. Am ant wo
em-tashogi am jiwiak mo pi apꞌe hegai mo haschu am hab
junihim. Pi ash ab hu i ha wahpkid ch pi ha dagioꞌid
hegam mo am daiw am ahgachugch g Jiosh haꞌichu ahga ch ash
pi em-hiwgid mams ahpim hab wo chum juh ch wo chum
em-wuwhas ab em-namki amjed.
\p
\v 11 Matp hedai hab masma hab wo junihid g pi apꞌekam ch
pi mahch g Jiosh. Pi g am hu s-ha wepom k wabshaba hegam
s-ha wepom mat hab wo junihid g s-apꞌekam. Idam o d Jiosh
aꞌaliga.
\v 12 Hema hegam mo hab junihim g s-apꞌekam o d Demetrius.
Wehsijj am hab wa kaij. Kuni s-mahch mo d wohokam. Kum ahpim
s-mahch mani chum hekid g wohokam ahg.
\s Mash g John s-neidamk g Gaius ch wehmaj s-neokimk
\p
\v 13 Muꞌi ani haꞌichu s-m-ahgidamk ch wabshaba pi id
hekaj am i m-oꞌohani
\v 14 nani pi am s-himimk mant wo m-neid k wo m-wehm neo ab
amjed.
\p
\v 15 Si g s-ap e tahtk am Jiosh wui mat m-doꞌibia.
\p Ia o haꞌi kih g t-wepnag ch ash si pihk e elid m-hekaj.
Am g wehs ha ahgid g t-wepnag mach si pihk t-elid ha hekaj.