\id JUD
\h JUDE
\toc1 JUDE
\mt Id ash d Jude Oꞌohana
\c 1
\m
\v 1 Ni-wepnag:
\p Am ant wo i em-oꞌohani ahni mani d Jude ch d piongaj g
Jesus Christ ch d James wehnag.
\p Jiosh o si pihk e elid em-hekaj ch ab i em-gawulkad k
em-nuhkud am wehhejed g e-alidag Jesus Christ.
\p
\v 2 Ab ani tahni g Jiosh mat ab baꞌich wo i
s-em-hoꞌigeꞌidad ch ab baꞌich wo i em-mahkad g s-ap
dahhadkam ch pihk elidadag.
\s Mat wo i wuwha g s-chu iꞌattomkam k wo s-ha mashchamam
\p
\v 3-4 Ab ant haꞌichu wo i chum em-oꞌohani ab amjed g
t-doꞌibiadag. T wabshaba haꞌi i wuwha mo d s-chu
iꞌattomkam ch am chum gawul s-junimk g Jiosh haꞌichu ahga ab
amjed g doꞌibiadag ch ab wui gegok g t-kownalig Jesus
Christ. Idam o hab s-junimk g pi apꞌekam ch heg hekaj hab
kaij mat g oꞌodham wabsh chum haschu has wo junihid ab i
s-wohochudk g Jiosh haꞌichu ahga. K wabshaba heki hu an
oꞌohanas mat s-koꞌokam wo ha namkid g Jiosh hegam mat ab
wui wo gegokiwua. Heki o hu t-ahgid g Jiosh matt haschu ab
wo chum s-wohochudad. Kum ahpim ab s-wohochud g haꞌichu
ahgaj. Nt heg hekaj am wo i em-oꞌohanid k ab wo i
em-gewkemhu mamt si s-gewkam wo uꞌukchid.
\p
\v 5 Am g wo s-chegitok mat has ha juh g Jiosh hegam mo pi
ab hu wohog elid. Chum as wehs e doꞌibia g Tutuligo ab
Egypt jewed t amjed, k eda muꞌijj pi ab hu wohog elid g
Jiosh ch hekaj s-koꞌokam e koꞌij.
\p
\v 6 Am g wo s-chegitok mat has e juh g anghil. Ab o chum
s-wohog elid g Jiosh ch wabshaba haꞌi gam hu hab i e juh ab
amjed. T hegam am i ha kuh g Jiosh k am s-wihnam ha kuhpch
s-chuhugam k ed mat wo ha lodai geꞌe lodaita tash ch ed.
\p
\v 7 Am g wo s-chegitok mat has i ha juh hegam mo am kih
Sodom kihhim t am ch Gomorra kihhim t am ch gan hu ha wehgaj.
Bo wa ep pi ab hu wohog elid g Jiosh ch hab junihim g pi
apꞌekam am ha wehm wohpiwup hegam mo pi d ha-wehm kihkam.
Chechoj o am e wehm wohpiwup ch hab wua g pi apꞌekam. T g
Jiosh ab i huduni g mehi am ha dahm idam kihhim k am wehs
ha kokda g hemajkam. Bo wa masma i t-tashogid g Jiosh mat
s-koꞌokam wo ha namkid hegam mat pi wo dagito g pi
apꞌekam. T g s-koꞌok ha-namkidadag pi hekid wo huhug.
\p
\v 8 Idam s-chu iꞌattomkam mo am haꞌichu chum em-mashcham
ash haꞌichu chehchk ch heg oidch am hab e junihim ch hekaj
e uamhun ch pi ab hu wohog elid g Jiosh ch nahnko ha ahg g
anghil.
\v 9 Chum ash wa hems hegai anghil ha-geꞌejig mash hab
chehgig Michael pi s-koꞌokam ab abchud g ge Jiawul no pi
heg hab waꞌap d chum anghilkahim. Jiawul ash wa pi ap hab e
wua am chum s-behimkch g Mosesbad mat am i muh. Kush ihda
Michael am s-daꞌid ch wabshaba pi s-koꞌokam has ahg ch hab
hi wabsh kaij, “Jiosh at wo waꞌi s-m-kehꞌel heg hekaj.”
\v 10 Sh wabshaba hegam s-chu iꞌattomkam nahnko ahg mo
haschu i pi amichud ch hab wua mo haschu i tatchua hab
masma mo g mischini haꞌichu doakam ch hab masma e uamhun.
\v 11 Jiosh at s-koꞌokam wo ha namkid no pi pi ab hu wohog
elid.
\p Heki o hu mash wa hema d Cain ch mua g e-wehnag. Kush eda
g wehngaj d s-apꞌekam. K idam s-chu iꞌattomkam am hab
waꞌap e wua.
\p Hema ash wa d Balaam ch am ahgachug g Jiosh haꞌichu ahga
heg wabsh hekaj mat wo ui g lial. K idam s-chu iꞌattomkam
hab waꞌap e wua.
\p Hema ash wa d Kora ch ab wui kehk g Jiosh. K idam s-chu
iꞌattomkam hab waꞌap e wua. T heg hekaj g Jiosh im hu hab wo
i ha juh ab e amjed.
\p
\v 12 Kah ani mash idam s-chu iꞌattomkam am em-wehm e
gegosid ch am chum em-uamhun.
\p Neh, pi at am hu wo i em-wehmajk g chewagi matp gam hu
wabsh wo wiꞌichkwua k pi wo ha juh. T hab wa masma pi am hu
wo i em-wehmajk idam mo wabsh hejel i e chegito.
\p Neh, t wabsh wo e huhp g haꞌichu babhedam uhs matp pi ab
hu wo ha babhed mat eda wo chum e ai mat ab wo bai. Kut
idam s-chu iꞌattomkam hab wa masma wabsh wo huhug no pi pi
shaꞌi e chehgid g haꞌichu s-apꞌekam ab ha amjed.
\v 13 S-ta edam haꞌichu ash am wabsh e chehgid ab ha amjed
hab masma mo g totshagi am e chehgid an shuhdagi hugid
an. Idam o wabsh pi dodolima ch ab aihim mat g Jiosh gm
hu wo ha shul geꞌe s-chuhugam k ed.
\p
\v 14-15 Tsh wabshaba g Jiosh heki hu hema tashogi mat has
wo ha juh. Sh id hab chehgig Enoc ch d wosmdaj hegai mash g
woskaj wosk d si wehpeg oꞌodham. Sh g Jiosh hab ahg mat wo
ha ahgi g hemajkam mat ab wo i hih g Jiosh mat wehs wo ha
lodait k s-koꞌokam wo ha namkid hegam mo pi tatchua ch has
ahg ch hab wua g pi apꞌekam. T wehst-mahm mihl anghil ab wo
i oi.
\p
\v 16 Idam s-chu iꞌattomkam o chum hekid aꞌaga g pi
e-apꞌedag ch hab wua g pi ap e-tatchui. Ge o e hahaschud
ch hab wabsh e wua mo ab haꞌi si ha hahaꞌichuchud mat hekaj
ab aigo wo si ha hahaꞌichuch.
\s Haꞌichu ahgidadag ch haꞌichu shohbidadag
\p
\v 17 Am g wo s-chegitok mo haschu i em-ahgid hegam mo d
chuhchaij g t-kownalig Jesus Christ.
\v 18 Bo wa kaij ab em-wui, “Am at haꞌi wo i wuwha
em-shahgid mo eda e aihim g si ha oidch tash k hab wabsh
wo junihid g hejel e-tatchui ch wo nahnko em-ahgad.”
\v 19 T am wo tashok mo idam pi shaꞌi e dagitokch am wui
g Hekia S-apꞌekam Gewkdag no pi am hab junihim g hejel
e-tatchui ch hab chum em-wua mamt ab aꞌai e wui wo
gegokiwua.
\p
\v 20 Do si hekia s-apꞌekam g t-wohochudadag. Kumt heg ab
baꞌich i s-wihnam wo e uꞌukchid. T g Hekia S-apꞌekam
Gewkdag ab wo em-mahkchid g gewkdag mamt hekaj am wo
neneokad Jiosh wui.
\v 21 Mt wabsh chum hekid am wo edak g Jiosh pihk elidadag
ch s-e tahtk ch wo nenidad mat g t-kownalig Jesus ab wo i
em-wahpki Jiosh kihdag ed mamt hahawa chum hekid an wo
haꞌichugk.
\p
\v 22 Ab g wo i s-ha hoꞌigeꞌid hegam mo pi mahch mas haschu
wo s-wohoch
\v 23 k am wo i ha ahgi g Jiosh haꞌichu ahga. T hab wo e
doꞌibia ab i s-wohochudk. Kumt wabshaba wo s-e nenꞌoidk
mo haschu pi ap hab wua mamt ahpim hab waꞌap pi heg hekaj wo
e uamhu.
\s Matt ab wo hehgchulidad g Jiosh
\p
\v 24-25 Ab att wo si has elidad g Jiosh nat pi g alidaj
Jesus Christ t-doꞌibia k d t-kownalig. Jiosh o si
s-gewkdag ch wehs haꞌichu dahm chum hekid. Ab att wo i
t-dagito wui. T wo e nako mat wo t-nuhkud. Kutt pi gam hu
hab wo i t-juh ab amjed. T am wo i t-wahpki e-kihdag ed.
Kutt wo si s-hehgigk ch ab wo si has elidad chum hekid.