\id ACT
\h HECHOS
\toc1 HECHOS
\mt1 HECHOS
\mt2 Yʉ́n tꞌøtꞌe yʉ́ ꞌbäihʉ ra Jesucristo
\c 1
\s Bi man ra Jesús ba ɛ̨h rá Hogandąhi Oją
\p
\v 1 Nuꞌi Teófilo, rá mbʉdi ra søcuą dá oꞌtꞌaꞌi mámꞌbɛtꞌo, dá xiꞌi gätho bi ꞌyøtꞌ ra Jesús nuꞌbʉ mi dʉmpꞌ rá ꞌbɛfi.  Nɛ dá xiꞌaꞌi gätho ngue bi ma ꞌbʉ mín xänbate.
\v 2 Nɛ dá xiꞌaꞌi gätho bi ꞌyøtꞌa ra Jesús asta gueꞌbʉ mi mba mahɛ̨tsꞌi. Nɛ nuꞌbʉ mi ꞌbʉcua ja ra häi, nu rá Hogandąhi Oją bi xih ra Jesús ꞌbɛꞌa da xih yʉ́ ꞌbäihʉ gue da ꞌyøtꞌe.  Nuꞌʉ yʉ́ ꞌbäihʉ, gueꞌʉ yʉn ꞌyohʉ bi huanh ra Jesús ngue man yʉ́ xädi ʉ. 
\v 3 Nu ra Jesús bi nu ran ʉnbi nɛ bi du. Nɛ gätho nyote pa ꞌbʉ mí ndantsꞌi mahønꞌa, bin ꞌyusɛ bʉ ꞌbʉh yʉ́ ꞌbäihʉ, jaꞌbʉ bi hnu, jaꞌbʉ hinꞌna. Nɛ bi ꞌyuti xʉn ngu yʉn tꞌøtꞌe guepʉ bi nde da fądi gue i ꞌbʉi. Nɛ bi xiꞌʉ nangue rá ꞌbɛfi i øtꞌ Oją ua ja ra ximhäi, nɛ ꞌbɛpʉ dí manda Oją ʉ gätho dim ꞌbʉi.
\p
\v 4 Nuꞌbʉ mím ꞌbʉhmbʉ yʉ́ ꞌbäihʉ mahønꞌa a ra Jesús, nɛ bin sihmɛhʉ, bi xiꞌʉ da dømpꞌʉ Jerusalén ꞌbɛꞌa bi ma majuąni rá Ta gue ba ɛ̨hɛ. Nɛ ɛ̨nꞌa ra Jesús:
\p ―Ya xcá ꞌyøhmbʉ dá mangä mamꞌbɛtꞌo ngue ba pɛnh Oją rá Hogandąhi. 
\v 5 Nuꞌa ra Xuua bi ꞌyøtꞌahʉ ran xixyą nangue ra dehe thoho, pɛ mi tsꞌʉtho ya ga ꞌda ahʉ rá Hogandąhi Oją, bi ꞌyɛ̨nꞌa ra Jesús.
\s Bi ndex mahɛ̨tsꞌi ra Jesús
\p
\v 6 Nuꞌbʉ mim pɛti ʉ, bi ꞌyänni:
\p ―Ma Hmu ahe, hague guehya yʉ pa jabʉya gui ꞌyøtꞌe din ja ma tsꞌɛdi zɛhɛhʉ mahønꞌa, dyʉ israelhʉ. 
\p
\v 7 Bi dąꞌa ra Jesús:
\p ―Hingui sä gui pąhmbʉ ndaꞌa ní pa xʉn zän ma Tahʉ da ꞌyøtꞌa ꞌbɛꞌa gätho da ꞌyøzɛhɛ. Hin ni ꞌbɛfihʉ gui pąhmbʉ. 
\v 8 Pɛ nuꞌbʉ bá ɛ̨h rá Hogandąhi Oją, nɛ gam ꞌbʉhmbʉ, din ja ni tsꞌɛdihʉ. Nɛ nuꞌbʉ bin ja, gui xihmbʉ yʉ jąꞌi ua ra dąhnini Jerusalén nanguecä, nɛ gätho ua ra häi Judea, nɛpʉ ra häi Samaria, nɛ gätho na ngʉni ra ximhäi.
\p
\v 9 Nuꞌbʉ mi guaꞌa man ra Jesús bi mba mahɛ̨tsꞌi. Nu yʉ́ ꞌbäihʉ bi nu nuꞌbʉ mi ndex mahɛ̨tsꞌi. Nɛ nꞌda ra güi bi goꞌmi nɛ him bi nu yʉ́ ꞌbäihʉ mahønꞌa.
\v 10 Nɛ mi ꞌbäpʉ, mi ndøꞌtsꞌ mahɛ̨tsꞌi, ꞌbex mi ꞌbähmbʉ yoho yʉ́m ꞌbɛhni Oją mahɛ̨tsꞌi, i he yʉ tꞌaxca pahni.
\v 11 Nɛ bi ꞌyɛ̨mbi:
\p ―Nuꞌahʉ gyʉ mɛnguhʉ Galilea, hanja gní ꞌbähmbʉ ua ya nɛ gni ndøsꞌhʉ mahɛ̨tsꞌi. Nu ra Jesús bi ndex ua guí ꞌbähmbʉ, nɛ tengutho bʉ á ndetsꞌe, ngutho ꞌbʉ bá cąh mahønꞌa, nɛ guetꞌa ra Jesús a. 
\s Bi thahnꞌna ra Matías rám poniui ra Judas 
\p
\v 12 Nu yʉ́ ꞌbäihʉ ra Jesús bi nɛxpʉ ja ra nyuni Olivos bʉya, bi mba bʉ ra hnini Jerusalén, nɛ hinga yatho, ndehnini. 
\v 13 Nɛ nuꞌbʉ mi yʉrpʉ ja ra hnini bi ndexpʉ nꞌda ra cuarto magątsꞌi guepʉ i ꞌbʉꞌʉ. Gueꞌʉ i ꞌbʉpʉ ʉ, ra Pedro, nɛ ra Xuua, nɛ ra Jacobo, nɛ ra Andrés, nɛ ra Felipe, nɛ ra Tomás, nɛ ra Bartolomé, nɛ ra Mateo, nɛ ra Jacobo rá tsꞌʉntꞌʉ ra Alfeo, nɛ ra Simón gue tꞌɛ̨mbi ra Zelote, nɛ ra Judas rán ꞌyohʉ ra Jacobo. 
\v 14 Gätho ya ꞌdarpʉ bim pɛti nɛ ząi min yąhʉ Oją. Nɛ bi zøpʉ ꞌda yʉ xisu nɛ ra María rá mbe ra Jesús, nɛꞌʉ yʉ́n ꞌyohʉ ra Jesús.   
\p
\v 15 ꞌDarpʉ madím pɛti ʉ nꞌda ciɛnto nɛ ꞌdäte njąꞌi. Nɛ nuꞌʉ yʉ paꞌʉ bi ndantsꞌa ra Pedro nɛ bi ꞌyɛ̨na:
\p
\v 16 ―Ma cu ahʉ nangue ra Cristo, nu rá Hogandąhi Oją mayaꞌbʉ bi japꞌa ra David da ꞌyoꞌtꞌ ra søcuą, nɛ bi ma ꞌbɛꞌa da ꞌyøtꞌ ra Judas, nguetho mí pą Oją ꞌbɛꞌa da ꞌyøtꞌa. Gueꞌa ra Judas ngue bi däꞌa ra Jesús nuꞌbʉ mi fɛntꞌi. Nɛ gueꞌa bin ja nguetho gätho ꞌbɛꞌa mán tꞌoꞌtꞌi bʉ rám hman Oją din ja. 
\v 17 ꞌDatꞌa ra ꞌbɛfi dá øthe ra Judas nguetho ra Jesús bi huahnꞌna ra Judas tengu bʉ á huancähe.
\v 18 Nɛ bi thänꞌa nꞌda ra häi nangueꞌa í mbäꞌa ra Jesús. Nuꞌbʉ mi zohäi ra Judas, bi nyepʉ häi, nɛ bi føh rá foho, nɛ bi bøni gätho yʉ́ xɛ̨fo.
\v 19 Gätho yʉ jąꞌi mi ꞌbʉpʉ Jerusalén bi ꞌyøde ꞌbɛꞌa bin ja. Jananjabʉ bi mba ma huti ra häi ngue yʉ́ ndeꞌʉ, Acéldama, gue nde da ma bim fäm bʉ ra ji.
\v 20 Nguetho ntꞌoꞌtꞌi bʉ ja rá søcuą ra Salmos:
\q Din häitho ra häi
\q nɛ njon dim ꞌbʉpʉ,
\m nɛ ntꞌoꞌtꞌi ngue nꞌdanꞌyo da hyąn rá ꞌbɛfi mi ja xtá ꞌyøtꞌa. 
\p
\v 21 Janangueꞌa jatho ga huahndʉ a dam pɛhmbe. Jatho ga huahndʉ nꞌda rám poniui ra Judas, gueꞌa nꞌda madí hyʉnje gätho yʉ pa mí ꞌbʉhmbe ra Hmu, ra Jesús.
\v 22 Nɛ ga huahndʉ nꞌda bi nu ꞌbʉ mi xixyąba ra Jesús a ra Xuua, nɛ madí hyʉnje gätho yʉ pa dám ꞌbʉhmbe ra Jesús, gueꞌbʉ go mí mba mahɛ̨tsꞌi, bi nu, nguetho nꞌdatꞌa ga mamhbe ngue bi ndantsꞌ mahønꞌa ra Jesús ꞌbʉ mi du, bi ꞌyɛ̨nꞌa ra Pedro. 
\p
\v 23 Nɛ nubʉya bi ndønba yʉ́ thuhu toꞌo da thahni, gue yoho yʉn ꞌyohʉ bi hndøni. Nuꞌa nꞌda ra José Barsabás nɛ í Justo, nɛ nuꞌa manꞌda ra Matías.
\v 24 Nɛ nuꞌʉ yʉ jąꞌi bin yąhʉ ra Hmu bʉya, nɛ bi ꞌyɛ̨na: 
\p ―Ma Hmu ahe, guí pąrpa yʉ́ mbʉi gätho, dami ꞌyurcahe ya yoho ndaꞌa xcá huahni.
\v 25 Nuꞌa ga comhbe ra ꞌbɛfi ngue ma ꞌbäigähe ra Jesucristo, ngueꞌa xtá ꞌyøtꞌa ra Judas. Nguetho xí ꞌuepʉ ja rá ꞌbɛfi nangue rá tsꞌoqui, bi mba da nuꞌa rán säui da nu, bi ꞌyɛ̨m ꞌbʉ min yąhʉ Oją.
\p
\v 26 Nu yʉ ꞌyɛ̨cꞌyɛi bʉya bi ꞌyøtꞌe tenguꞌbʉ nꞌda ran tąha, ngue nde da bąꞌʉ ndaꞌa bi nde Oją. Bi bøni gue gueꞌa ra Matías. Nɛ nu yʉ ꞌyɛ̨cꞌyɛi bʉya bi huanh ra Matías, nɛ bi gomhbʉ yʉ́ ꞌbɛfi ʉ ꞌdɛꞌmaꞌda yʉ́ ꞌbäihʉ ra Cristo. 
\c 2
\s Bi zøh rá Hogandąhi Oją
\p
\v 1 Pɛ guextaꞌa di thoqui dim pɛti gätho yʉ ꞌyɛ̨cꞌyɛi, din jaꞌa mí tøꞌmi, gue bá pɛnh Oją a rá Hogandąhi, nɛ bin thɛui nꞌda ra dąmpɛti mí sänba Oją ʉ yʉ israel, tꞌɛ̨mbi Pentecostés.
\v 2 ꞌDahmantho bi zøpʉ di hį, tenguꞌbʉ nꞌda ra ndønthį gue bí ꞌyɛ̨h mahɛ̨tsꞌi a. Nɛ nuꞌa ní hį bʉ, bi yusꞌpʉ ja ra ngu guepʉ mi huꞌʉ.
\v 3 Bi nɛqui tengu yʉ tꞌʉsibi nɛ ꞌdaꞌi tsꞌʉ bi zox yʉ́ yą yʉ jąꞌi nꞌda ngu nꞌda ʉ mi ꞌbʉpʉ.
\v 4 Ngue nꞌda ngu nꞌda mi ꞌbʉpʉ, gätho bin tꞌun rá Hogandąhi Oją, nɛ bi hąt ra tsꞌɛdi xʉn ho ʉ. Nɛ bi mbʉdi ꞌdahma ꞌdanꞌyo bʉ án yąꞌʉ nꞌda ngu nꞌdaꞌʉ nangue rá tsꞌɛdi rá Hogandąhi Oją in ꞌyohʉ.
\p
\v 5 Nɛ nuꞌʉ yʉ paꞌʉ bi zøm bʉ Jerusalén ʉ yʉ judío, da ꞌyøtꞌa ra dąmpɛti mí xi Oją mayaꞌbʉ, ngue bá nɛxpʉ gätho yʉ häi ua ja ra ximhäi.
\v 6 Nɛ nuꞌbʉ mi ꞌyøꞌa di hį ʉ yʉ jąꞌi, bim pɛti bʉ, nɛ nꞌda ngu nꞌda ʉ bi zoꞌʉ yʉ ꞌyɛ̨cꞌyɛi nangue yʉ́ ndesɛ, nɛ him bi zä bi bɛ̨ni ha bin ja.
\v 7 Nɛ bi hyonya thoho nɛ him bi bądi ꞌbɛꞌa nam bøni, nɛ bin ꞌyɛ̨mb zɛhɛ ʉ:
\p ―Hague án zä bin ja bʉ, bin ꞌyɛmpꞌʉ. Ha hinga gueꞌʉ yʉ mɛngu bʉ Galilea gätho i yą ua ya. 
\v 8 Hanja sä i sijʉ ma ndesɛhʉ nꞌda ngu nꞌdajʉ.
\v 9 Nɛ nujʉ nꞌdaꞌa nꞌdanni bá nɛxhʉ, nɛ ꞌdajʉ, ꞌbʉꞌi ꞌda bá nɛxpʉ Partia, nɛpʉ Media, nɛpʉ Elam, nɛpʉ Mesopotamia, nɛpʉ Judea, nɛpʉ Capadocia, nɛpʉ Ponto, nɛpʉ ra häi Asia.
\v 10 Nɛpʉ Frigia, nɛpʉ Panfilia, nɛpʉ ra häi Egipto, nɛpʉ ra häi Africa jom bʉ Cirene. Nɛ nuꞌʉ miꞌda yʉ romanos ʉ, madagueꞌbʉ gätho yʉ judío ʉ, nɛ nu miꞌda ʉ gue ɛ̨cꞌyɛi tengugahʉ dyʉ judíohʉ, nɛ ꞌbʉh miꞌda bá nɛxpʉ Creta, nɛpʉ Arabia.
\v 11 Nɛ dí øhmbʉ i mam ma ndehʉ nangue yʉ́n tꞌøtꞌe gue i øtꞌ rá tsꞌɛdi Oją, bin ꞌyɛ̨mpꞌʉ. 
\p
\v 12 Nɛ gätho madi hyonya thoho, nɛ hingui pądi ꞌbɛꞌa da bɛ̨ni. Nɛ nꞌda ngu nꞌda bi mansɛ ʉ:
\p ―ꞌBɛꞌa ní mba na in ja ya. 
\p
\v 13 Pɛ nuꞌʉ miꞌda bi ma:
\p ―Įti ʉ. 
\s Bi zoh yʉ jąꞌi ra Pedro
\p
\v 14 Nɛ nu ra Pedro bʉya ꞌdarpʉ mí ꞌbähmbʉ ʉ mi ꞌdɛꞌmaꞌda yʉ́ ꞌbäihʉ ra Cristo, nɛ ntsꞌɛdi bin yą, bi ꞌyɛ̨na: 
\p ―Nꞌyohʉ ahʉ dyʉ judíohʉ nɛ gätho ahʉ guí ꞌbʉhmbʉ ua Jerusalén, dami ꞌyøhmbʉ xʉn ho ꞌbɛꞌa ga xi ahʉ ya.
\v 15 Nuje hin dí įtihe tengu guím bɛ̨mhbʉ, nguetho ja gʉto ya.  
\v 16 Pɛ nuna guehna gue bin ja ya, gueꞌa bi man ra Joel rá pøngahyą Oją, bi ꞌyɛ̨na: 
\q 
\v 17 Din ja bʉ nꞌda ra pa ba ɛ̨hɛ, ɛ̨n Oją, 
\q gue ga pɛnꞌnahʉ ma Hogandąhi gätho nangu yʉ jąꞌi ꞌbʉcua ja ra ximhäi.
\q Nɛ nuꞌʉ ni tsꞌʉntꞌʉhʉ nɛ ni tꞌįxuhʉ dim pøngahyą. 
\q Nɛ ni tsꞌʉntꞌʉhʉ da nuꞌʉ yʉn tꞌuti tengu yʉ tꞌį
\q nɛ ni dącꞌyɛihʉ da ꞌuį yʉ tꞌį. 
\q 
\v 18 Nuꞌbʉ bin ja, nuꞌʉ ma ꞌyɛ̨hɛ, yʉn ꞌyohʉ nɛ yʉ xisu, ga pɛnpä ma Hogandąhi ʉ,
\q nɛ dim pøngahyą nanguecä. 
\q 
\v 19 Nɛ ga uh yʉ hmɛpya bʉ magątsꞌi,
\q nɛpʉ ja ra häi, yʉ hmɛpya ra ji, nɛ ra sibi nɛ ra ꞌbifi. 
\q 
\v 20 Nɛ nuꞌa ra hyadi ya hin din ja rán nɛqui, 
\q nɛ ra ząna xtan thɛni tengu ra ji. 
\q Mꞌbɛtꞌo nja bʉ din ja, mꞌbɛjua da zøn ra pa dua ɛ̨h ra Hmu mahɛ̨tsꞌi, 
\q nɛ nuꞌa ra pa a, nuįxte thoho nɛ ntsꞌutho ꞌbɛꞌa din ja. 
\q 
\v 21 Nɛ nuꞌa ra pa dua ɛ̨hɛ, din ja gue høntꞌa toꞌo xí mbaꞌtꞌa ra Hmu da yąn Oją a. 
\m
Ngubʉ bi ꞌyoꞌtꞌa ra Joel ꞌbʉ mayaꞌbʉ, bi ꞌyɛ̨nꞌa ra Pedro.  
\p
\v 22 Nu ra Pedro xø bi ꞌyɛ̨mpꞌʉ mahønꞌa: 
\p ―Nꞌyohʉ ahʉ dyʉ israelhʉ, dami ꞌyøhmbʉ ma nde. Dím mangä nangue ra Jesús ra mɛngu Nazaret. Oją bi japi ngue bi ꞌyøtꞌ yʉn tꞌøtꞌe nuįxte nangue rá tsꞌɛdi Oją, nɛ yʉ hyonya ntꞌøtꞌe, nɛ yʉ hmɛpya, guepʉ da zä gui pąhmbʉ ngue Oją bi zɛꞌa. 
\v 23 Nɛ mayaꞌbʉ Oją mi pądi ꞌbɛꞌa gá ꞌyørpahʉ rá Tsꞌʉntꞌʉ. Nɛ Oją mi sänni gue gá cuathʉ bʉ ja nꞌda ra pontꞌi nangue yʉ́ ꞌyɛ yʉ tonto, nɛ gá hyohʉ.
\v 24 Pɛ nuꞌa Oją bi xox ꞌbʉ mí du, nɛ bi hyącua ran dąte, nguetho hinꞌyʉ rá tsꞌɛdi ran dąte xtán zä xtán ząmꞌma ra Jesús.
\v 25 Nguetho bi man ra David gue ꞌbɛꞌa da nu ra Jesús, ꞌbʉ mí ꞌyɛ̨na:
\q Nugä thocua thoho dí nugä Oją bʉ ja ma hmi. 
\q Nɛ di ꞌdac ra tsꞌɛdi, janangueꞌa njon da zä di ꞌuegagui. 
\q 
\v 26 Janangueꞌa i hu ma mbʉi, nɛ dadín johya ꞌbʉ dím mangä nangueꞌa. 
\q Nɛ nuꞌbʉ din sʉnya ma jąꞌi bʉ ja ran ꞌyägui, dí tøpꞌma ran ho da tꞌørcagui. 
\q 
\v 27 Nguetho hin gui hyɛgä ma te da gopʉ guepʉ oꞌʉ xʉn du, 
\q Nɛ hin gui japi da ꞌya ma ngøcꞌyɛi, guecä, ni Hoga tꞌʉhnigui. 
\q 
\v 28 Nɛ gá ꞌyurqui ꞌbɛpʉ dám ꞌbʉhmi maząi mahønꞌa, 
\q nɛ nuꞌi gui jaqui ngue din ja ran johya ma mbʉi nuꞌbʉ dá nutꞌa ni hmi, 
\q
bi ꞌyɛ̨n ra Pedro tengu bi man ra David.
\p
\v 29 Nɛ xø bi ꞌyɛ̨nꞌa ra Pedro:
\p ―Nꞌyohʉ ahʉ, da zä ga xi ahʉ majuąni nangue ma ngʉrpa mbombøtahʉ ra David mi ꞌbʉi mayaꞌbʉ, him bi mansɛ nanguesɛ ꞌbɛꞌa da tꞌørpe, nguetho bi du, nɛ guextaꞌa i o bʉ rán ꞌyägui i ja ua dí ꞌbʉhmbʉ.
\v 30 Pɛ nu ra David bim pøngahyą ꞌbʉ mí man na, nɛ mí pądi majuąni ꞌbɛꞌa bi xiꞌa Oją, gue nꞌda rám bomꞌbɛto ra David din tsꞌʉtꞌabi nangue yʉ israel tengu ra David, nɛ guehna ra Cristo na.
\v 31 Nɛ mi pąh ra David ꞌbɛꞌa din ja, janangueꞌa bi ma nangue da ndantsꞌ mahønꞌa ra Cristo, nɛ hin da tsꞌopʉ nidu rá te, nɛ xín da ꞌya rá ngøcꞌyɛi a.
\v 32 Nguehna ra Jesús, Oją bi xox ꞌbʉ mi du, nɛ nuꞌa dí pąhmbe majuąni gätho gahe, nɛ dí mamhbe nguetho dá nuhe ꞌbɛꞌa bi tꞌørpe.
\v 33 Oją bi xotsꞌi nɛ bi zixpʉ ja rá tsꞌɛdi, nɛ bi unꞌna rá Hogandąhi tengu xí man Oją, janangueꞌa bi ꞌdacähe bʉya.  Gueꞌa rá Hogandąhi i øtꞌe ꞌbɛꞌa gätho guín nuhʉ ya, nɛ guí øhmbʉ ya.
\v 34 Nguetho ra David him bi ndex mahɛ̨tsꞌi, pɛ gueꞌa im mansɛ a:
\q Nuꞌa ra Hmu bi xiꞌa ma Hmu: 
\q “Dami hyucua ja ma tsꞌɛdi, 
\q 
\v 35 asta gueꞌbʉ ga tąhui man sʉiui,”
\m bi ꞌyɛ̨nꞌa ra David, bi ꞌyɛ̨nꞌa ra Pedro.
\p
\v 36 Nɛ xø bi ꞌyɛ̨na:
\p ―Gätho ahʉ ma mi israel ahʉ, gui pąhmbʉ ya majuąni bi jap Oją dim hmu a gá cuathʉ bʉ ja ra pontꞌi, nɛ guehna ra Jesús, nɛ gui pąhmbʉ gue bi huan Oją a, bi ꞌyɛ̨nꞌa ra Pedro.
\p
\v 37 Nuꞌbʉ mi ꞌyøh yʉ jąꞌi ꞌbɛꞌa bi manꞌa ra Pedro, ɛ̨mmɛ bi du yʉ́ mbʉi, ꞌbʉ mí ꞌyøde gue rá Tsꞌʉntꞌʉ Oją a xí hyo. Nɛ bi tꞌänꞌna ra Pedro nɛ yʉ́n ꞌyohʉ:
\p ―Man ꞌyohʉ ahʉ, ꞌbɛꞌa da zä ga øthe ya, ɛ̨nꞌʉ.
\p
\v 38 Nu ra Pedro bi dąti:
\p ―Gui päh nin ꞌyomfɛ̨nihʉ nangue ran tsꞌo, nɛ gan xixyąhʉ nꞌda ngu nꞌda ahʉ nangue rá thuhu ra Jesucristo. Nɛ din ja ra punbi ni tsꞌoquihʉ, nɛ di ꞌda ahʉ rá Hogandąhi Oją.
\v 39 Nguetho bi man Oją di ꞌda ahʉ ran tꞌunni gueꞌa rá Hogandąhi Oją, nɛ ni tꞌʉhnihʉ din tꞌunni, nɛ gätho ʉ hønbʉ go hapʉ i ꞌbʉi din tꞌunni, gue høntꞌa go toꞌo da zohnꞌna Oją ra Hmu, bi ꞌyɛ̨nꞌa ra Pedro. 
\p
\v 40 Nɛ nu ra Pedro manꞌda xʉn ngu bi xifi nɛ bi hɛcui, nɛ bi ꞌyɛ̨mbi: 
\p ―Damin yąmhbʉ nangueꞌa ran ʉnbi da nuꞌʉ yʉ tsꞌomꞌbäi i ꞌbʉcua ya, bi ꞌyɛ̨nꞌa ra Pedro.
\p
\v 41 Nɛ gätho toꞌo bi ꞌyømanho a bi man ra Pedro bi mba ma xixyąbi. Nu ra pa gue bi man ra Pedro, mbɛ hyu mahuąhi yʉ jąꞌi bi ꞌyɛ̨cꞌyɛi.
\v 42 Nɛ nuꞌʉ bi thoctaꞌa bi xänba yʉ́ ꞌbäihʉ ra Cristo ʉ, nɛ bi hyu yʉ́ mbʉi nguetho ꞌdaꞌangu im bɛ̨ni. Nɛ thocua thoho bim pɛti gue din yąhʉ Oją, nɛ da zi ra xɛcahmɛ, ngue bi bɛ̨n rán dąte ra Hmu.
\s Yʉ́m ꞌbʉi ʉ mbʉdi bi ꞌyɛ̨cꞌyɛi
\p
\v 43 Gätho yʉ jąꞌi bi numansu Oją nɛ ɛ̨mmɛ bi hyonya thoho ꞌbɛꞌa bin ja nangue yʉn tꞌøtꞌe nuįxte nɛ yʉ hmɛpya bi ꞌyøtꞌ yʉ́ ꞌbäihʉ ra Cristo.
\v 44 Nɛ gätho gue bi ꞌyɛ̨cꞌyɛi nꞌdatꞌa in numanho nꞌda ngu nꞌda, nɛ nuꞌa ꞌbɛꞌa mí pɛꞌtsꞌi nꞌda ngu nꞌda, ꞌda nan gomthoho.
\v 45 Nɛ nuꞌbʉ nꞌda mí honi ꞌbɛꞌa madí ꞌbɛdi, nuꞌa manꞌda bʉya bi mbä ꞌbɛꞌa mí pɛꞌtsꞌi, bi unꞌna bʉya.
\v 46 Nɛ mpa ꞌbʉ mpa ꞌbʉ madím pɛti bʉ ja ra dąniją. Nɛ nuꞌbʉ xʉn sihmɛ, bin sänbi bi mba bʉ ja yʉ́ ngu yʉ́ miꞌyɛ̨cꞌyɛihʉ, nɛ bin johya yʉ́ mbʉi, nɛ ꞌdatꞌa im bɛ̨ni.
\v 47 Nɛ bi ꞌyɛ̨spa Oją, nɛ bi hnumansu ʉ nangue gätho yʉ jąꞌi. Nɛ nu Oją bi japi nꞌdapa ngu nꞌdapa i cʉrpʉ ja rá tsꞌɛdi miꞌda yʉ jąꞌi, gue bi zinꞌʉ. 
\c 3
\s Bi zä ra dogua 
\p
\v 1 Nꞌda ra pa ꞌbʉ hyunde, gueꞌa ra ora ꞌbʉ nząi mí yąhʉ Oją yʉ jąꞌi, bi mba bʉ ra dąniją ra Pedro nɛ ra Xuua. 
\v 2 Mi ꞌbʉpʉ nꞌda ran ꞌyohʉ ra dogua gueꞌbʉ go mim ꞌbʉi. Nɛ nząi bi thuxpʉ ja rá goxthi ra dąniją. Nu ra goxthi tꞌɛ̨mbi mahotho. Nu ran ꞌyohʉ da ꞌyäp yʉn tꞌunni yʉ jąꞌi i thopʉ mbo. 
\v 3 Nuna, nuꞌbʉ min nu ra Pedro nɛꞌa ra Xuua ní mba bʉ ja ra dąniją, bi ꞌyäp ran tꞌunni.
\v 4 Nu ra Pedro nꞌyoui ra Xuua, nuꞌbʉ min nu i hupʉ, bi ꞌyɛ̨mbi:
\p ―Hyandgäꞌbe. 
\p
\v 5 Nu ra dogua bi hyantꞌʉ, mi tøꞌmi da hyąni ꞌbɛꞌa di unꞌdʉ.
\v 6 Pɛ nu ra Pedro bi ꞌyɛ̨mbi:
\p ―Xíng ra tꞌaxi xíng ra cꞌaxtꞌi dí hągä, pɛ nuꞌa i jagui dadí ꞌdaꞌaꞌi. Nangue rá tsꞌɛdi ra Jesucristo mɛngu bʉ Nazaret, damí ndantsꞌi nɛ gan ꞌyo, bi ꞌyɛ̨mbi. 
\p
\v 7 Nu ra Pedro bi bɛntpa rán ꞌyɛi, bi xotsꞌi. ꞌBex bin hątsꞌɛdi rá gua, nɛ rá hyudi xįngua.
\v 8 Nɛ nꞌda sägui thoho bi ꞌyøtꞌ ꞌbʉ mi ndantsꞌi nɛ bin ꞌyo. Nɛꞌa bi yʉthʉ bʉ ja ra dąniją, sägui nɛ ꞌyo, nɛ ɛ̨spa Oją.
\v 9 Gätho yʉ jąꞌi bi nu ran ꞌyohʉ ngue bin ꞌyo nɛ bi ꞌyɛ̨spa Oją. 
\v 10 Nɛ mi pądi gue nuꞌa mi hupʉ ja ra goxthi mahotho bʉ ja ra dąniją mi äh ra mbɛti. Nɛ gätho bi hyonya thoho ꞌbɛꞌa bin ja ran ꞌyohʉ. 
\s Nu ra Pedro im mam bʉ ja ra ngunꞌyu tꞌɛ̨mbi Salomón
\p
\v 11 Nuꞌa mi dogua hingui nde da hyɛꞌa ra Pedro nɛ ra Xuua, nɛ bá ɛ̨pʉ xʉn ngu yʉ jąꞌi guepʉ ja ra ngunꞌyu mi ꞌbä ʉ, tꞌɛ̨mbi Salomón, nɛ madí hyonya thoꞌʉ.
\v 12 Nuꞌbʉ mí hyantꞌʉ yʉ jąꞌi a ra Pedro, bi ꞌyɛ̨mbi:
\p ―Nꞌyohʉ ahʉ dyʉ israelhʉ, hanja gadí hyonya thohʉ nanguehna ra dogua, nɛ hanja gní hyandgaꞌbe. Ha guí ɛ̨mhbʉ gue ma tsꞌɛdisɛꞌbe nɛ man hosɛꞌbe gue xtá japꞌbe bin ꞌyo na. 
\v 13 Hinꞌna maha, pɛ ga xi ahʉ hague bin ja. Nꞌdatꞌa Oją gue mí ɛ̨spa mam bombøtahʉ ra Abraham nɛ ra Isaac nɛ ra Jacob, bi zixpʉ mahɛ̨tsꞌi a rá Tsꞌʉntꞌʉ, nɛ bi un rá tsꞌɛdi. Nꞌdatꞌa ra Jesús gue gá dähʉ bʉ ja rá hmi ra Pilato nɛ gá cømhbʉ bʉ. Nu ra Pilato mim ma xtá mba nthɛgui. 
\v 14 Pɛ nuꞌehʉ gá cømhbʉ nꞌda xʉn ho, nɛ gueꞌa rá Thahni Oją a. Nɛ gá ꞌyähmbʉ nꞌda ra hyodu da socꞌahʉ.
\v 15 Nɛ gá mamhbʉ gue da mba ntho ra Hmu gue di un ra te. Pɛ Oją bi xoxpʉ ꞌbʉꞌʉ xʉn du, gueꞌa dá nuhe nɛ dadín juąnhde.
\v 16 Bi zä na ran ꞌyohʉ nguetho bi ꞌyɛ̨cꞌyɛi ra Jesús. Nɛ guehna ran ꞌyohʉ guín nuhʉ ya, nɛ guí pąhmbʉ toꞌo na.
\p
\v 17 Pɛ nuya, nꞌyohʉ ahʉ, dí pącä ngue hin gmí pąhmbʉ ꞌbɛꞌa xcá ꞌyøthʉ ꞌbʉ gmí hyohʉ ra Jesús, nɛ ximangutho ni ngʉrpihʉ.
\v 18 Pɛ Oją bi japi bin ja ꞌbɛꞌa gätho bi ma mayaꞌbʉ, gue bi man yʉ pøngahyą nangue ran ʉnbi bi nu ra Cristo rá Thahni Oją.
\v 19 Janangueꞌa nuya, damí päh nin ꞌyomfɛ̨nihʉ nɛ gui däp ni mbʉihʉ Oją. Nɛ nu Oją bʉya da zä da ducꞌa ni tsꞌoquihʉ nɛ di ꞌda ahʉ ran johya ni mbʉihʉ.
\v 20 Nɛ nu Oją ba pɛnhua mahønꞌa ra Jesús nɛ gueꞌa ra Cristo xa tsꞌänni di jącuahʉ.
\v 21 Nu ra Jesús jatho da gopʉ mahɛ̨tsꞌi jagueꞌbʉ da zøn ra pa da mba ma hoqui gätho ua ja ra ximhäi, tengu bi man Oją mayaꞌbʉ, nangue yʉ́ nde yʉ́ hoga pøngahyą. 
\v 22 Pɛ bi ꞌyɛ̨nsɛ a ra Moisés: “Nuꞌa ra Hmu ma Ojąhʉ, da zänna nꞌda rám ꞌbɛhni ngue gueꞌa nin ꞌyohʉhʉ tengugä. Damí ꞌyøhmbʉ ꞌbɛꞌa gätho da manꞌa.
\v 23 Nɛ din ja, høntꞌa go toꞌo má jąꞌi hin da ꞌyømanho a, da mba ma ꞌueque nangue yʉ́ tꞌʉhni Oją, nɛ da mba ma ꞌbɛpi rá te,” bi ꞌyɛ̨nꞌa ra Moisés.
\p
\v 24 Nɛ majuąni, gätho bi man yʉ́ pøngahyą Oją gueꞌbʉ mí man ra Samuel nɛ gätho miꞌda yʉ pøngahyą mꞌbɛjua mí ꞌbʉi, gätho bi ma ꞌbɛꞌa gätho da ꞌyøtꞌ Oją, nɛ gueꞌʉ dí nuhʉ yʉ pa jabʉya.
\v 25 Guejʉ dyʉm bomꞌbɛtojʉ yʉ́ pøngahyą Oją, nɛ ndejʉ Oją ga comhbʉ rán hogui bi ꞌyørpa ma ngʉrpa bøtahʉ nuꞌbʉ mi tꞌɛ̨mpꞌa ra Abraham: “Nangue nꞌda nim bomꞌbɛto dim ꞌbʉh niyaꞌbʉ, dí mba ma jąpi gätho yʉ ją ꞌi guecua ja ra häi,” bi tꞌɛ̨mpꞌa.
\v 26 Janangueꞌa nuꞌbʉ mi xoxa Oją a rá Tsꞌʉntꞌʉ gue bi du, mꞌbɛtꞌo thoho bá pɛnhua dí ꞌbʉhmbʉ, ngue nde di ꞌuegahʉ nꞌda ngu nꞌdajʉ nangue ma tsꞌoquihʉ, bi ꞌyɛ̨nꞌa ra Pedro.                      
\c 4
\s Pa ma juąnbi ra Pedro nɛ ra Xuua
\p
\v 1 Nuꞌbʉ mi xänba yʉ jąꞌi ra Pedro nɛ ra Xuua, bá ɛ̨h yʉ mbäją nɛꞌʉ yʉ hmu bʉ ja rá dąniją yʉ judío, nɛ yʉ saduceos.  
\v 2 Nuꞌʉ ɛ̨mmɛ bin cuɛ ʉ, nguetho bi xänba yʉ jąꞌi gue bi ndantsꞌa ra Jesús bʉ ꞌbʉꞌʉ xʉn du.
\v 3 Nuꞌʉ bi bɛntꞌa ra Pedro nɛ ra Xuua, nɛ bi gotꞌa fädi, jagueꞌbʉ mi hyatsꞌi bi juąnbi, nguetho xʉn de ꞌbʉ mi gotꞌi.
\v 4 Pɛ xʉn ngu ʉ xí ꞌyøh ram hma bi ma, bi ꞌyɛ̨cꞌyɛi. Mbɛ í juaꞌi cʉtꞌa mahuąhi yʉn ꞌyohʉ ngue bi ꞌyɛ̨cꞌyɛi. 
\p
\v 5 Nuꞌbʉ mi hyatsꞌi bim pɛti bʉ Jerusalén yʉ ngʉrpa mbäją nɛ yʉ dącꞌyɛi nɛ yʉ xänbate niją.
\v 6 Mi ꞌbʉpʉ ra Anás ra dąmbäją a, nɛ ra Caifás, nɛ ra Xuua, nɛ ra Alejandro, nɛ gätho miꞌda yʉ́ mɛni ra dąmbäją, bim pɛti ngue di juąnba ra Pedro nɛ ra Xuua.
\v 7 Nɛ bi manda da tsꞌispa ra Pedro nɛ ra Xuua, nɛ bim ꞌbäpʉ ja yʉ́ hmi nɛ bi ꞌyänni:
\p ―ꞌBɛꞌa má tsꞌɛdi o gue toꞌo rán tꞌɛ̨di ngue xcá ꞌyøtꞌui na. 
\p
\v 8 Nu ra Pedro bʉya nꞌyoui xʉn ngu rá tsꞌɛdi rá Hogandąhi Oją, bi ꞌyɛ̨mbi: 
\p ―Gyʉ́ ngʉrpihʉ yʉ jąꞌi nɛ gyʉ dącꞌyɛihʉ dyʉ jąꞌi israelhʉ. 
\v 9 Ha guí ängahe nam pa ya nangue ran ho bi tꞌørpa na ran ꞌyohʉ, nɛ hague nja bi zä na ran ꞌyohʉ ngue mi ʉ.
\v 10 Nuꞌbʉ majuąni guí ängahe, gui ꞌyøhmbʉ ya, nɛ gätho ma miꞌisraelhʉ, ngue nangue rá tsꞌɛdi ra Jesucristo, gueꞌa í zä ín ꞌyo na ran ꞌyohʉ ya. Gueꞌa ra Jesús ra mɛngu bʉ Nazaret, gue gá cuathʉ bʉ ja ra pontꞌi, nɛ nu Oją bi xoxpʉ ꞌbʉꞌʉ xʉn du.
\v 11 Guehna ra Jesús hin gá nde gá pąhmbʉ, ngue tenguꞌbʉ gyʉ gądohʉ gá samhbʉ nꞌda ra do. Pɛ nuya Oją bi japi ngue tenguꞌbʉ nꞌda ra do manꞌda mahyonidą bʉ pa nthøe ra ngujądo.
\v 12 Njoꞌo manꞌda da zä di pøꞌa nꞌda hinda høntꞌa ra Jesús. Nguetho him bi zän Oją manꞌda ra tsꞌɛdi ua ja ra ximhäi gue da zä di pøjʉ, hinda høntꞌa ra Jesús, bi ꞌyɛ̨nꞌa ra Pedro. 
\p
\v 13 Nɛ madi hyonya thoho ʉ yʉ juąnbate ꞌbʉ mí bądi him bi zu din yąhʉ ra Pedro nɛ ra Xuua, gue mí pądi him bin xädi. Pɛ bi bɛ̨m bʉya, bin ꞌyohʉ ra Jesús ra Pedro nɛ ra Xuua.
\v 14 Nɛ nuꞌbʉ min nu ran ꞌyohʉ xí zä gue mi ꞌbʉhmbʉ ʉ, hinꞌyʉ ꞌbɛꞌa manꞌda sä da xifi.
\v 15 Nɛ bi mbɛhn bʉ thi ʉ yoho nꞌda zʉ ora, ngue nde din ꞌyänꞌdʉ ꞌbɛꞌa da zä da ꞌyørpe. 
\v 16 Nɛ bin ꞌyänꞌdʉ:
\p ―ꞌBɛꞌa sä ga øthʉ nangue yʉn ꞌyohʉ, nguetho majuąni nꞌda ran tꞌøtꞌe nuįxte bi ꞌyøtꞌʉ. Nɛ gätho ꞌbʉcua Jerusalén i pądi, hingui sä ga cømhbʉ.
\v 17 Pɛ guehma ndeꞌbʉ ga sʉhmbʉ nꞌdahma njon da xifi nangue ra Jesús, gue him manꞌda di thoc ram hma bʉ ꞌbʉh yʉ jąꞌi, bi ꞌyɛ̨nꞌʉ. 
\p
\v 18 Bi zohn mahønꞌa ʉ, bi xih pʉya, gue him manꞌdandį da ma, xín da xänba yʉ jąꞌi nangue ra Jesús.
\v 19 Bi dąh ra Pedro nɛ ra Xuua, bi ꞌyɛ̨mbi: 
\p ―ꞌBɛꞌa go guím bɛ̨nsɛhʉ ngue i nde Oją ga øtꞌbe, ha gueꞌa guím mamhbʉ o gueꞌa man Oją a ga øtꞌbe.
\v 20 Nguetho jatho ga mamhbe ꞌbɛꞌa xtá nuhe nɛ ꞌbɛꞌa xtá øhmbe, bi ꞌyɛ̨nꞌʉ. 
\p
\v 21 Nuꞌbʉ manꞌda mi dąmhyą ʉ, bi hyɛgui nguetho him mi tįni ꞌbɛꞌa dí ʉnba ʉ. Nuꞌʉ i supi din cuɛ yʉ jąꞌi ꞌbʉ xtí ʉnba ra Pedro nɛ ra Xuua, nguetho gätho yʉ jąꞌi mí ɛ̨spa Oją nangueꞌa xín ja. 
\v 22 Nguetho nu ran ꞌyohʉ mi ponga nyote njɛya mi pɛꞌtsꞌi, ngue bi tꞌørpa ran tꞌøtꞌe nuįxte, gue bi zä. 
\s Nu yʉ ꞌyɛ̨cꞌyɛi bi ꞌyäp Oją hin din su 
\p
\v 23 Nuꞌbʉ mi thɛh ra Pedro nɛ ra Xuua, bá ɛ̨pʉ guepʉ mi ꞌbʉh yʉ ꞌyɛ̨cꞌyɛi. Nɛ bi xifi gätho xí xiꞌʉ yʉ mbäją nɛ yʉ dącꞌyɛi.
\v 24 Nuꞌʉ, nuꞌbʉ mí ꞌyøde, bi zo Oją, nꞌdatꞌa im bɛ̨ni, nɛ bi ꞌyɛ̨nꞌʉ:
\p ―Ma Oją ahe, gue gra Hmu, gá ꞌyøtꞌ mahɛ̨tsꞌi nɛcua ja ra häi nɛ ra deją nɛ gätho ʉ i jabʉ.
\v 25 Nɛ nu ní Hogandąhi bi bɛ̨nba mam bombøtahe ra David, ni ꞌyɛ̨hɛ, ꞌbʉ mí ꞌyɛ̨na: 
\q Hanja nín ꞌyoꞌtsꞌʉ yʉ jąꞌi gue hingui tɛnꞌna Oją,
\q nɛ im bɛ̨nꞌʉ gue him majuąni. 
\q
\v 26 Yʉ́ hmutsꞌʉtꞌabi yʉ häi ya bi dʉꞌmi bi zä bi dʉmpꞌ ra sʉi. 
\q Nɛ yʉ tsꞌʉtꞌabi bim pɛti
\q din sʉhmbʉ ra Hmu Oją nɛ ra Cristo rá Thahni Oją, 
\m bi ꞌyɛ̨nꞌa ra David. 
\p
\v 27 Nguetho majuąni bim pɛti ua ja ra hnini ra Herodes, nɛ ra Poncio Pilato, nɛ yʉ jąꞌi ngue hing yʉ judío, nɛ ma miꞌisraelhe, nɛ bi zʉh ni hoga Tsꞌʉntꞌʉ Jesús, gueꞌa gá huahni. 
\v 28 Nuꞌʉ bi ꞌyøtꞌʉ gätho ꞌbɛꞌa xcá sän mamꞌbɛtꞌo gue bin ja.
\v 29 Nuya ma Hmu ahe, damí nuꞌʉ gue nde di ʉnje, nɛ damí ꞌdaje ni tsꞌɛdi, ni ꞌyɛ̨hɛgähe, ga huthe ran zambʉi ga mamhbe nim hma.
\v 30 Nɛ ga uthe yʉ jąꞌi ni tsꞌɛdi gue da zäꞌʉ yʉn zämanꞌʉ. Nɛ gui ꞌyut yʉn tꞌøtꞌe nuįxte nɛ yʉ hmɛpya nangue ni Hoga tsꞌʉntꞌʉ ra Jesús, bi ꞌyɛ̨m ꞌbʉ min yąhʉ Oją ʉ. 
\p
\v 31 Nɛ nuꞌbʉ mí juaꞌa bin yąhʉ Oją, nu ra ngu guepʉ xím pɛti bin huąni, nɛ gätho ʉ manꞌda bi hyą yʉ́ tsꞌɛdi nangue rá Hogandąhi Oją. Nɛ gätho yʉ ꞌyɛ̨cꞌyɛi bi hyutꞌan zambʉi, bi mampꞌa rám hman Oją. 
\s Bi gohmi ꞌbɛꞌa gätho mi ja 
\p
\v 32 Gätho yʉ ꞌyɛ̨cꞌyɛi i ꞌbʉi tengu nꞌdanjąꞌi tho, ꞌdatꞌa i øtꞌe, ꞌdatꞌa im bɛ̨ni. Xínga nꞌda bi ma gue jasɛ yʉ́ mbɛti, nɛ gätho ꞌbɛꞌa mi ja mi cohmi.
\v 33 Nɛ nu yʉ́ ꞌbäihʉ ra Cristo, nuꞌbʉ mí thoqui bi ma gue bi ndantsꞌa ra Hmu Jesús ꞌbʉ mi du, nɛ bi jap Oją bin ja rá tsꞌɛdi yʉ́m hma, nɛ xʉn ngu rá mate Oją bin tꞌunꞌndʉ nꞌda ngu nꞌda ʉ.
\v 34 Gätho yʉ ꞌyɛ̨cꞌyɛi nte madi ꞌbɛdi ꞌbɛꞌa gätho mi honi, nguetho xʉn ngu bi mbä yʉ́ häi o gue yʉ́ ngu mí ja, nɛ bi un ra mbɛti yʉ́ ꞌbäihʉ ra Cristo.
\v 35 Nɛ nuꞌʉ bi darpa ʉ toꞌo di ꞌbɛ a da hyoni.
\v 36 Nɛ gueꞌa bi ꞌyøtꞌa nꞌda ra ꞌyɛ̨cꞌyɛi, ra José na, ra mɛngu Chipre, rá ꞌyʉ ra Leví, pɛ nuꞌʉ yʉ́ ꞌbäihʉ ra Cristo bi zänba manꞌda rá thuhu gue dí Bernabé, nde da ma i hurpa rá mbʉi nꞌda.
\v 37 Nɛ gueꞌa bi ꞌyøtꞌe, bi mbä nꞌda rá huąhi mi ja, nɛ bá hą ra mbɛti, nɛ bi dä bʉ ꞌbʉh yʉ́ ꞌbäihʉ ra Cristo, ngue di unꞌdʉ nte mi ja. 
\c 5
\s Rá tsꞌoqui ra Ananías nɛ ra Safira  
\p
\v 1 Pɛ nuꞌa manꞌda ra ꞌyɛ̨cꞌyɛi í Ananías mi ꞌbʉpʉ, nɛ rá xisu, bi mbä yʉ́ häi. Nuꞌa rá xisu ra Safira a.
\v 2 Nɛ bi gønꞌi tsꞌʉ ra mbɛti nɛ ꞌdatꞌa bi bɛ̨ mmi rá xisu. Nɛ bá hąc made ra mbɛti, bi gäpʉ ꞌbʉꞌʉ  yʉ́ ꞌbäihʉ ra Cristo. 
\v 3 Pɛ nu ra Pedro bi ꞌyɛ̨mpꞌa:
\p ―Nuꞌi grá Ananías, hanja guí cʉꞌtꞌ ni mbʉi ra zįthu, ra Satanás, gue di ꞌbɛpꞌiꞌi gui xih ra fɛhni rá Hogandąhi Oją, ngue gá hyącꞌi tsꞌʉ ra mbɛti guí pä ni häi.
\v 4 Nuꞌbʉ hin xquí pä ni häi, ha hin xquí cohmi gue ni mbɛti zɛhɛ. Nɛ nuꞌi gá pä ni häi, ha hinga gue ni ꞌbɛfizɛhɛ xquí ꞌyøtꞌe nangue ni mbɛti. Hanja ngubʉ guím bɛ̨ni. Hinga gueꞌʉ yʉn ꞌyohʉ gá xih ra fɛhni, pɛgue Oją gá xih ra fɛhni, bi ꞌyɛ̨nꞌa ra Pedro.  
\p
\v 5 Nɛ nuꞌbʉ mí ꞌyøꞌa ra Ananías ꞌbɛꞌa bi manꞌa ra Pedro, ꞌbex bi du. Nɛ gätho toꞌo bi ꞌyøde nangueꞌa ɛ̨mmɛ bin ja ra mbidi yʉ́ mbʉi ʉ.
\v 6 Nuꞌʉ yʉn ꞌyohʉ mi ꞌbʉpʉ bi ndantsꞌi, bi mbantꞌa ra ánima Ananías, bi dutsꞌi, bi ꞌyägui. 
\p
\v 7 Nɛ nuꞌbʉ mi thoꞌi tsꞌʉ nhyu ora, bi zøh ra Safira, rá xisu ra Ananías, nɛ him mi pądi ꞌbɛꞌa bi thogui.
\v 8 Nu ra Pedro bi ꞌyänꞌna ra xisu: 
\p ―Xiqui hangu guí päui ni häi, tengu man ni ndø, bi ꞌyɛ̨nꞌa ra Pedro.
\p ―Hąha ngubʉ rá muui, bi ꞌyɛ̨ntho ra Safira. 
\p
\v 9 Nu ra Pedro bi ꞌyɛ̨mpꞌa bʉya: 
\p ―Hanja ꞌdatꞌa gá bɛ̨mmi, hanja sä gá cøn rá Hogandąhi Oją. Nuya ꞌbäcua ja ra goxthi ʉ gue bá äcꞌa ni ndø, nɛꞌe da duxꞌa ya, bi ꞌyɛ̨mbi. 
\p
\v 10 Nɛ ꞌbex bi yørpʉ ja rá gua ra Pedro, nɛ bi du. Bi yʉtꞌʉ yʉn ꞌyohʉ, bi nu, ya xí du, nɛ bi dutsꞌi, nɛ bi ꞌyägui, ꞌdarpʉ thoho bi ꞌyoui rá ndø.
\v 11 Nɛ ɛ̨mmɛ bi mbidi gätho ʉ yʉ ꞌyɛ̨cꞌyɛi, nɛꞌʉ gätho miꞌda bi ꞌyøde bi mbidi. 
\s Xʉn ngu yʉn tꞌøtꞌe nuįxte bi ꞌyøtꞌ yʉ́ ꞌbäihʉ ra Cristo
\p
\v 12 Xʉn ngu yʉ hmɛpya, nɛ yʉn tꞌøtꞌe nuįxte bi ꞌyøtꞌ yʉ́ ꞌbäihʉ ra Cristo bʉ ꞌbʉh yʉ jąꞌi. Nɛ gätho madim pɛti bʉ ja ra dąniją guepʉ tꞌɛ̨mbi rá ngunꞌyu ra Salomón, nɛ ꞌdatꞌa im bɛ̨nꞌʉ. 
\v 13 Nɛ nuꞌʉ miꞌda ʉ gue hingui ɛ̨cꞌyɛi, bi zu din uąnsꞌhʉ yʉ ꞌyɛ̨cꞌyɛi, nɛ bi hnumansu yʉ ꞌyɛ̨cꞌyɛi.
\v 14 Pɛ manꞌda manꞌda xʉn ngu bi ꞌyɛ̨cꞌyɛi ra Hmu, yʉn ꞌyohʉ nɛ yʉ xisu.
\v 15 Nɛ nangue bi ꞌyøtꞌ yʉn tꞌøtꞌe nuįxte yʉ́ ꞌbäihʉ ra Cristo, jananjabʉ i tsꞌopʉ ja ꞌyu yʉ hyɛ̨nni guepʉ da thoꞌʉ, i oxpʉ ja yʉ́ tꞌotsꞌi nɛ yʉ́ fįdi. Nɛ nuꞌbʉ da thopʉ rá xudi ra Pedro da yąni.
\v 16 Nɛ xʉn ngu bi bøm bʉ ja yʉ hnini guepʉ hän bʉ Jerusalén, bi mba bʉ Jerusalén, bi zixꞌʉ yʉn zämanꞌʉ, nɛꞌʉ min ꞌyohʉ yʉ zįthu. Gätho bi zä.
\s Ra Pedro nɛ ra Xuua bi hnumanꞌʉ
\p
\v 17 Janangueꞌa yʉ dąmbäją nɛ gätho min ꞌyohʉ, nuꞌʉ ɛ̨mbi yʉ saduceos, ɛ̨mmɛ bin ja yʉn tsꞌɛya yʉ́ mbʉi ʉ.
\v 18 Janangueꞌa bi bɛntꞌʉ yʉ́ ꞌbäihʉ ra Cristo nɛ bi gotꞌa fädi. 
\v 19 Pɛ nuꞌa nꞌda ram ꞌbɛhni bí ꞌyɛ̨h mahɛ̨tsꞌi ꞌbʉ min xui, bi xocua ra jutꞌi yʉ ofädi nɛ bi zixpʉ thi. Nɛ bi xifi: 
\p
\v 20 ―Ní mba, damam ꞌbähmbʉ bʉ ja ra dąniją, dami xihmbʉ yʉ jąꞌi gätho nangue ram ꞌbʉi maꞌdaꞌyo, bi ꞌyɛ̨na.  
\p
\v 21 Nuꞌʉ, nuꞌbʉ mí ꞌyøh na, bi yʉrpʉ ja ra dąniją ꞌbʉ mi tꞌʉxuditho, nɛ bi xänba yʉ jąꞌi. 
\p Nɛ nuꞌbʉ mí pɛti yʉ hmumbäją bʉ ja nꞌda ra ngu, nɛꞌʉ min ꞌyohʉ, nɛ madin zohni yʉ ngʉrpi nɛ yʉ́ dącꞌyɛi yʉ israel, nɛ sä bi mbɛnpʉ fädi yʉ asmayo gue ba si yʉ́ ꞌbäihʉ ra Cristo.
\v 22 Pɛ nuꞌbʉ mi zøm bʉ ja ra fädi yʉ asmayo, njom bi dįm bʉ ʉ. Bi mbeng mahønꞌa bʉ bí ꞌbʉh yʉ hmumbäją,
\v 23 nɛ bi ꞌyɛ̨mbi:
\p ―Dá tįmꞌbe ra goxthi xø man thʉꞌtꞌi thoho nɛ yʉ mbädi mi ꞌbäpʉ thi ja ra goxthi. Nɛ nuꞌbʉ ma xocꞌbe, njoꞌo toꞌo dá tįmꞌbe bʉ mbo, bi ꞌyɛ̨nꞌʉ. 
\p
\v 24 Nɛ nuꞌbʉ mi ꞌyøꞌa rá hmu yʉ mbädi bʉ ja ra dąniją, nɛ yʉ hmumbäją, bi hyonya thoho. Ɛ̨mmɛ bi du yʉ́ mbʉi: “Hapʉ maha nín sɛꞌa øtꞌʉ,” din ꞌyɛ̨mpꞌʉ.
\v 25  ꞌBex bi zønꞌa nꞌda, bi xifi: 
\p ―Nuꞌʉ yʉn ꞌyohʉ gá cothʉ fädi bí ꞌbäpʉ ja ra dąniją ya, nɛ i xänba ʉ yʉ jąꞌi, bi tꞌɛ̨mpꞌʉ. 
\p
\v 26 Nɛ bi mba rá hmu yʉ mbädi bʉya, nɛ in ꞌyohʉ yʉ mbädi. Nɛ xø bá si yʉ́ ꞌbäihʉ ra Cristo, nɛ him bi ʉnbi, nguetho mí su xtí mba ma batꞌado.
\v 27 Nɛ nuꞌbʉ bá tsꞌi bʉ ja ra junta, bi ꞌyän yʉn tꞌänni a ra hmumbäją. Bi ꞌyɛ̨mpꞌʉ: 
\p
\v 28 ―Ha hin dá hɛcꞌahʉ gue hin gui xänbahʉ yʉ jąꞌi nangue ra Jesús. Pɛ hin guí øhmbʉ ꞌbɛꞌa dá mangähe. Nuya gätho yʉ jąꞌi ꞌbʉcua Jerusalén i pąh ram hma guí mamhbʉ. Ha guí ɛ̨nje go ma tsꞌoquihe bi du ra Jesús. 
\p
\v 29 Nuꞌa ra Pedro nɛꞌʉ miꞌda yʉ́n ꞌyohʉ bi dąti:
\p ―Jatho ga øthe ꞌbɛꞌa i xije Oją xinda gue i xije yʉ jąꞌi. 
\v 30 Nu Oją gue bi dąnde ma ngʉrpa bøtahʉ, bi xoxꞌa ra Jesús, nuꞌa gueꞌa gá hyohʉ ꞌbʉ gmí cuathʉ bʉ ja ra za.
\v 31 Pɛ Oją bi zixpʉ bi gonhui rá tsꞌɛdi, ngue dim hmu nɛ dim pørpate. Nɛ da japi di päh yʉ́ mbʉi yʉ jąꞌi israel nɛ di punba yʉ́ tsꞌoqui.
\v 32 Nɛ nugähe dí mamhbe majuąni nanguehna. Nɛꞌa rá Hogandąhi Oją im ma majuąni nanguehna. Nɛ nu Oją bi un rá Hogandąhi toꞌo gätho bi ꞌyɛ̨cꞌyɛi, gue da bąsɛ gue majuąni a, bi ꞌyɛ̨nꞌa ra Pedro.
\p
\v 33 Nɛ nuꞌbʉ mí ꞌyøꞌʉ hupʉ, ɛ̨ mmɛ bi dɛ ra cuɛ, nɛ min nde xtá hyo ʉ. 
\v 34 Pɛ bi ndantsꞌa nꞌda ran ꞌyohʉ mi hupʉ ja ra junta, nuna nꞌda ra fariseo rá thuhu ra Gamaliel. Gueꞌa nꞌda ra xänbate yʉ́n tꞌɛ̨di yʉ judío. Nɛ gätho yʉ jąꞌi in numansu a. Nuꞌa bi manda da tsꞌixpʉ thi nꞌda zʉ ora ʉ i pa ma juąnbi. 
\v 35 Nɛ bi ꞌyɛ̨na:
\p ―Nꞌyohʉ ahʉ, dyʉ israelhʉ, dami jamansu ꞌbɛꞌa guí ørpahʉ ya yʉn ꞌyohʉ.
\v 36 Nguetho hin ɛ huą mayaꞌbʉ bi ndantsꞌa nꞌda ran ꞌyohʉ ra Teudas, mi ɛ̨na mi jasɛ rá tsꞌɛdi. Nɛ xʉn ngu yʉ jąꞌi bi dɛnni, mbɛ goho ciɛnto. Nɛ nte dá ørpahʉ pɛ bi tho, nɛ gätho mi tɛnni bin ꞌuɛ̨xtꞌi ꞌdaꞌa nꞌdanni bi mba. 
\v 37 Mꞌbɛjua bʉya, bi ndantsꞌ ra Judas ra mɛngu ra häi Galilea. Nu yʉ pa bin ja ra pede bin tɛtꞌi ꞌda yʉ jąꞌi. Pɛ nɛꞌa bi mba ntho, nɛ gätho mi tɛnni bin ꞌuɛ̨xtꞌi. 
\v 38 Janangueꞌa dí xi ahʉ, dami hyɛhmbʉ ya yʉn ꞌyohʉ, nguetho nuꞌbʉ rá tsꞌɛdi zɛhɛ gue ra ꞌbɛfi i øtꞌe, da mba ma juadi ꞌbʉ.
\v 39 Pɛ nuꞌbʉ rá ꞌbɛfi Oją i øtꞌe, hingui sä gui hɛcpahʉ. Nuꞌbʉ guí ɛ̨na gui hɛcpahʉ, gan sʉhmbʉ Oją ꞌbʉ, bi ꞌyɛ̨nꞌa ra Gamaliel. 
\p
\v 40 Nuꞌʉ, bi ꞌyømanho ꞌbɛꞌa bi man ra Gamaliel, nɛ nuꞌbʉ mí xifi da yʉtꞌa mbo mahønꞌa yʉ́ ꞌbäihʉ ra Cristo, bi mba mꞌbɛi, nɛ bi xiꞌʉ hin din xänbate nangue ra Jesús, nɛ bi hyɛtho bʉya. 
\v 41 Nuꞌbʉ mí bøm bʉ ja ra junta ʉ, bin johya yʉ́ mbʉi, nguetho ya bi nu ran ʉnbi nangue ra Jesús. 
\v 42 Nɛ xínga nꞌda ra pa mi ɛꞌtꞌi gue him mi mampꞌa ra hogam hma nangue ra Jesucristo, nɛ bi xänba yʉ jąꞌi nubʉ ja rá dąniją yʉ judío, nɛpʉ ja yʉ ngu. 
\c 6
\s Bi thahni yoto má ꞌyohʉ ngue dim fäxte  
\p
\v 1 Nuꞌʉ yʉ pa ʉ manꞌda xʉn ngu bi ꞌyɛ̨cꞌyɛi. Nuꞌʉ ꞌda bʉya gue i yą ra griego, bi dʉꞌmi bi zʉꞌʉ i yą ra hebreo, i ɛ̨na hingui pa ma pɛti xʉn ho ʉ ꞌda yʉ́ mɛnguhʉ, gue yʉ xisu xʉn du yʉ́ ndø, gueꞌbʉ pa ma datꞌi yʉn tsꞌihmɛ nꞌda pa ngu nꞌda pa. 
\v 2 Nuꞌʉ ꞌdɛꞌmayoho yʉ́ ꞌbäihʉ ra Cristo bi ma gue dim pɛti yʉ ꞌyɛ̨cꞌyɛi bʉya, nɛ bi xifi:
\p ―Hingui sä yoho ga øtꞌähe, hingui sä  ga thoqui ga unhde yʉn tsꞌihmɛ yʉ jąꞌi, nguetho jatho ga mamhbe rám Hman Oją. 
\v 3 Janangueꞌa ma zʉ cu ahʉ nangue ra Cristo, dami huahndʉ ꞌda gue gueꞌahʉ yoto yʉ hoganꞌyohʉ gue i hą ra tsꞌɛdi xʉn ho nangue rá Hogandąhi Oją in ꞌyohʉ, nɛ xʉn ho yʉ́n ꞌ yomfɛ̨ni, di darpa yʉ́n tsꞌihmɛ yʉ jąꞌi ngue nte i ja. 
\v 4 Pɛ nugähe ga thoje dan yąhe Oją nɛ ga mamhbe rám Hman Oją. 
\p
\v 5 Nɛ gätho ʉ gue madi pɛti bʉ, bi ꞌyømanho ʉ ꞌbɛꞌa bi manꞌʉ yʉ́ ꞌbäihʉ ra Cristo. Nɛ bi thanꞌna ra Esteban, nꞌda ran ꞌyohʉ ɛ̨mmɛ ɛ̨cꞌyɛi xʉn ho nɛ in ꞌyoui xʉn ho rá Hogandąhi Oją. Nɛ bi thanꞌna ra Felipe, nɛ ra Prócoro, nɛ ra Nicanor, nɛ ra Timón, nɛ ra Parmenas, nɛ ra Nicolás, nuꞌa mí tɛnba yʉ́ tꞌɛ̨cꞌyɛi yʉ judío ꞌbʉ hin ní ꞌyɛ̨cꞌyɛi ra Cristo, nuꞌa bá nɛxpʉ ja ra hnini Antioquía.
\v 6 Nɛ gätho bi tsꞌixpʉ ꞌbʉh yʉ́ ꞌbäihʉ ra Cristo. Nɛ nuꞌʉ bi gäspa yʉ́ ꞌyɛ yʉ́ yą ʉ bʉya, nɛ bin yąhʉ Oją ngue da mbäxꞌʉ nangue ra ꞌbɛfi bin tꞌunꞌdʉ. 
\p
\v 7 Nɛ manꞌda manꞌda bi hman rám hman Oją, janangueꞌa manꞌda xʉn ngu yʉ jąꞌi bʉ Jerusalén bi ꞌyɛ̨cꞌyɛi. Nɛꞌʉ yʉ mbäją bʉ ja yʉ́ niją yʉ judío, xʉn ngu bi ꞌyɛ̨cꞌyɛi nɛ bi dɛnni.  
\s Bi fɛntꞌa ra Esteban
\p
\v 8 Nuna ra Esteban, xʉn ngu rám fätsꞌi Oją bi unni nɛ rá tsꞌɛdi, nɛ bi ꞌyøtꞌ yʉn tꞌøtꞌe nuįxte nɛ yʉ hmɛpya nangue rá tsꞌɛdi Oją bʉ ꞌbʉh yʉ jąꞌi.
\v 9 Pɛ nuꞌʉ ꞌda yʉn ꞌyohʉ bi dʉꞌmi bin junthʉ ra Esteban, gueꞌʉ i pa bʉ ja nꞌda rá niją yʉ judío guepʉ i pa yʉ jąꞌi min ꞌyɛ̨hɛ, nɛꞌʉ ꞌda yʉ mɛngu bʉ ra häi Cirene, nɛpʉ ja ra hnini Alejandría, nɛpʉ ja ra häi Cilicia, nɛ ꞌda yʉ mɛngu bʉ ra häi Asia, gätho bin junthʉ ra Esteban. 
\v 10 Pɛ him bi zä bi dąpꞌa ra Esteban, nguetho xʉn ngu rán ꞌyomfɛ̨ni mi ja, ngue mi yą con rá tsꞌɛdi rá Hogandąhi Oją.
\v 11 Janangueꞌa ntꞌągui thoho bi ꞌbɛpꞌi ꞌda da man ra fɛhni, da ꞌyɛ̨na: “Dá øhmbe a bi ma, bi cꞌąmanꞌʉ ra Moisés gue bi ꞌdac man tꞌɛ̨dihʉ, nɛ bi cꞌąmanꞌʉ Oją,” bi tꞌɛ̨mpꞌʉ ꞌda.
\v 12 Bi parpa yʉ jąꞌi bʉya, nɛ yʉ dącꞌyɛi, nɛ yʉ xänbate niją, bi fɛntꞌa ra Esteban nɛ bi tsꞌixpʉ bí ja ra junta nguepʉ i ja rán juąnbate yʉ hmumbäją. 
\v 13 Nɛ bi mba nthoni ꞌda da man yʉ fɛhni, nɛ bi ꞌyɛ̨na: 
\p ―Hingui ɛꞌtsꞌa ní cꞌąmanꞌʉ na ra dąniją nɛꞌʉ yʉ́n tꞌɛ̨di ra Moisés.
\v 14 Nguetho dá øhmbe bi man na ran ꞌyohʉ, bi ꞌyɛ̨na: “Nu ra Jesús ra mɛngu Nazaret da xoꞌtꞌ ra dąniją nɛ di päh yʉn tꞌøtꞌe gue bi xijʉ ra Moisés,” bi ꞌyɛ̨n na ra Esteban, sä bi ꞌyɛ̨nꞌʉ. 
\p
\v 15 Gätho mi hupʉ ja ra junta bi hyand ra Esteban, nɛ bi nu ngue majuąni in ꞌyoui xʉn ngu rá tsꞌɛdi Oją.
\c 7
\s Din juąn ra Esteban
\p
\v 1 Nuꞌa ra dąmbäją bi ꞌyänꞌna ra Esteban:
\p ―Ha majuąni ꞌbɛꞌa siꞌa ya.
\p
\v 2 Nu ra Esteban bi dądi:
\p ―Nꞌyohʉ ahʉ, gyʉ ta ahʉ, dami ꞌyøhmbʉ ya ꞌbʉ majuąni guecä dí øtꞌä a i sicä. Nuꞌa Oją nuįxte thoho bin yąui ma ngʉrpa bøtahʉ ra Abraham, nuꞌbʉ mí ꞌbʉpʉ Mesopotamia, nɛ hin ní mba bʉ ra häi Harán.
\v 3 Oją bi xifi: “Dami pøngua ni häi, nɛ gui socua ni mɛni, nɛ gua ɛ̨pʉ nꞌda ra häi ga utꞌaꞌi,” bi ꞌyɛ̨mbi.
\v 4 Janangueꞌa bi bøm bʉ ra häi Mesopotamia, nɛ i tꞌɛ̨mbi Caldea, nɛ bim ꞌbʉpʉ ra häi Harán. Nuꞌbʉ ya bi du rá ta, bi nɛxpʉ Harán nɛ Oją bá si ua ja ra häi dí ꞌbʉhmbʉ ya.
\v 5 Pɛ nu ra Abraham hinga gueꞌa ra ora bi xi Oją di unꞌna ra häi, xínga nꞌda xɛqui da ma gue rá häi zɛhɛ. Pɛ majuąni bi xifi di un ra häi gue da gomhbʉ yʉ́m bomꞌbɛto. Nuꞌbʉ mi xifi, mán joꞌo yʉ́ tꞌʉhni ra Abraham.
\p
\v 6 Nuꞌa Oją bi ꞌyɛ̨mbi: “Nu nim bomꞌbɛto ban ꞌyɛ̨hɛ bʉ nꞌdanni ra häi, nɛ da mba ma ʉnbi goho ciɛnto njɛya.”
\v 7 Nɛ xø bi ꞌyɛ̨mbi: “Nugä ga ʉnbä ʉ yʉ jąꞌi ꞌbʉpʉ ja ra häi guepʉ din ꞌyɛ̨hɛ, nɛ mꞌbɛjua bʉya nuꞌʉ ba pøm bʉ guepʉ min ꞌyɛ̨hɛ, nɛ ba ɛ̨cua ja ra häi, nɛ guecua da dąndegui,” bi ꞌyɛ̨n Oją.
\v 8 Oją bi ꞌyøtꞌui ran hoqui ra Abraham, nu rá hmɛpya a gue da mba nthɛqui rá xifani, nɛꞌʉ yʉ́ xifani yʉ́ tsꞌʉntꞌʉ. Bin jabʉ ꞌbʉ mim ꞌbʉh ra Isaac rá tsꞌʉntꞌʉ ra Abraham, ná hyąto pa bi mba nthɛqui rá xifani. Nɛ nuꞌbʉ mín dąnꞌyohʉ ra Isaac, bim ꞌbʉh ra Jacob rá tsꞌʉntꞌʉ, nɛ nuꞌbʉ min te ra Jacob bim ꞌbʉꞌi ꞌdɛꞌmayoho yʉ́ tsꞌʉntꞌʉ, nuꞌʉ gueꞌʉ ma ngʉrpa bøtahʉ ʉ, bi ꞌyɛ̨nꞌa ra Esteban.
\p
\v 9 Nɛ xø bi ꞌyɛ̨na:
\p ―Nuꞌa nꞌda rá tsꞌʉntꞌʉ ra Jacob, ra José a. Nɛ nu yʉ́n ꞌyohʉ ra José bi sɛyabi, nɛ bi mbä. Nɛ nuꞌa toꞌo bi däi bi zixpʉ ja ra häi Egipto. Pɛ Oją min ꞌyoui ra José.
\v 10 Nu Oją bi zɛh ra José nangue gätho yʉn ʉnbi bi nu, nɛ bi un rám fätsꞌi nɛ bi un rán ꞌyomfɛ̨ni xʉn ho. Nɛ nuꞌa ra Faraón, ra hmutsꞌʉtꞌabi bʉ ja ra häi Egipto, bi numanho a ra José, nɛ bi japi di manda gätho ra häi bʉ nɛpʉ ja rá ngu.
\p
\v 11 Nɛ bin ja nꞌda ra dąthu bʉ gätho ra häi Egipto, nɛpʉ ra häi Canaán, nɛ nu yʉ jąꞌi bi nu ran ʉnbi nguetho xø ma hinꞌyʉ ꞌbɛꞌa da zi ma bøtahʉ bʉ mí ꞌbʉpʉ.
\v 12 Nɛ nuꞌbʉ mi ꞌyøh ra Jacob gue mi pa mꞌbɛꞌtsꞌi bʉ ꞌbɛꞌa da tsꞌi bʉ ja ra häi Egipto, bi mbɛnꞌdʉ ꞌda yʉ́ tsꞌʉntꞌʉ, gueꞌʉ ma bøtahʉ ʉ.
\v 13 Nɛ nuꞌbʉ mi mba mahønꞌa yʉ́n ꞌyohʉ, guextaꞌa him mi pąꞌa ra José. Nu ra José bi ꞌyɛ̨mpꞌʉ: “Dadín ꞌyohʉhʉ.” Nɛ nuꞌa ra José bi xiꞌa ra Faraón gue gueꞌʉ yʉ́n ꞌyohʉ ʉ.
\v 14 Nu ra José bʉya bi ma din zohni rá ta, ra Jacob, nɛ gätho ná ngu mi ꞌbʉpʉ ja rá ngu, gue í juaꞌi hyąte maꞌdɛꞌma cʉtꞌanjąꞌi.
\v 15 Janangueꞌa nu ra Jacob bi mba bʉ ja ra häi Egipto nɛ bi du bʉ. Nɛꞌʉ yʉ́ tsꞌʉntꞌʉ mam bombøtahʉ bá tu bʉ ʉ.
\v 16 Pɛ nuꞌʉ, him bá tꞌäpʉ, pɛ bi thuxpʉ Siquem nubʉ ra häi mí ꞌbʉi, nɛ bi tꞌäpʉ ja nꞌda ra jądo. Nu ra jądo gueꞌa bi dänꞌa ra Abraham gue bi mbä yʉ́ tsꞌʉntꞌʉ ra Hamor, ra mɛngu Siquem.
\p
\v 17 Nuꞌbʉ mi tsꞌʉtho da hyän yʉ pa tengu bi xi Oją ra Abraham, gue di un rá häi yʉ́m bomꞌbɛto, ɛ̨mmɛ bin xąnd yʉ jąꞌi bʉya, gue ma miꞌisraelhʉ, nubʉ ja ra häi Egipto.
\v 18 Nɛ nubʉya bi ndantsꞌ manꞌda ra Faraón bʉ Egipto, nguetho gätho ní huti yʉ Faraón yʉ tsꞌʉtꞌabi Egipto. Nɛ nuna manꞌda ra Faraón him mí pąh ra José.
\v 19 Janangueꞌa bi ʉcpi nɛ bi ʉnba ʉ mam bombøtahʉ. Nɛ bi manda da mba ma bʉnbi gätho yʉ́ tsꞌʉntꞌʉ a ra pa dim ꞌbʉi, gue da du, nguetho in ndepe him manꞌda din xąnd yʉ jąꞌi israel.
\v 20 Nuꞌʉ yʉ paꞌʉ bim ꞌbʉꞌa ra Moisés. Nuꞌa, nꞌda ra tꞌʉhni madi nɛqui din hocjąꞌi, nɛ mi numanho Oją. Nhyuzna bi jamansu rá ta nɛ rá mbe bʉ ja yʉ́ ngusɛ.
\v 21 Pɛ nuꞌbʉ mi thønꞌa thi ra ꞌuɛre Moisés, nu rá tꞌįxu ra Faraón bi dįni. Nɛ bi zini nɛ bi tede tenguꞌbʉ ɛ rá tꞌʉhni zɛhɛ.
\v 22 Nuꞌa ra Moisés bʉya gätho mi sänbi ꞌbɛꞌa mí pąh yʉ mɛngu Egipto. Nɛ gätho i pømanho ꞌbɛꞌa mi ma, nɛ xʉn ngu mi sä da ꞌyøtꞌe.
\p
\v 23 Nɛ nuꞌbʉ mi mbɛꞌtsꞌa nyote njɛya, bi bɛ̨ni da mba bí zɛngua hapʉ madím pɛh yʉ́ mɛnguhʉ gue yʉ jąꞌi israel.
\v 24 Nuꞌa nꞌda ʉ, bi nu ran ʉnbi ngue bi ʉnba nꞌda ra jąꞌi egipto. Nuꞌbʉ mi nuꞌa ra Moisés, bi yąni, bi cospa ra pengui bi hyo ngue bi du ra jąꞌi egipto.
\v 25 Nu ra Moisés mim bɛ̨ni gue mi pąꞌʉ yʉ jąꞌi israel ꞌbɛꞌa da ꞌyøtꞌ Oją, gue ra Moisés da yąnꞌʉ, di japi him man da nu ran ʉnbi. Pɛ him mi pąꞌʉ yʉ jąꞌi.
\v 26 Manꞌda pa bʉya bi nu mahønꞌa ra Moisés gue bin tuhni yoho yʉn ꞌyohʉ israel, nɛ nu ra Moisés bi zä bi hocua yʉ́ mbʉi, bi ꞌyɛ̨mbi: “Nꞌyohʉ aui gadín cuui, ꞌbɛꞌa guí ɛ̨nui a guí øtꞌui gadín sʉhmi,” bi ꞌyɛ̨mbi.
\v 27 Pɛ nuꞌa gue mi ja rá tsꞌoqui bin cuɛ, nɛ bi ndønꞌna ra Moisés, bi ꞌyɛ̨mpꞌa: “Ha i ja nin tꞌɛ̨di gui hegäꞌbe, toꞌo bi xiꞌi gan tsꞌʉtꞌabi ngue gui hogäꞌbe.
\v 28 Ha guí ɛ̨na gui hyogui tenguꞌbʉ gmí hyo ra mɛngu Egipto mán de,” bi ꞌyɛ̨mbi.
\v 29 Nu ra Moisés nuꞌbʉ mi ꞌyøde ꞌbɛꞌa bi manꞌa ran ꞌyohʉ, bi ꞌdagui, bi mba bʉ ꞌdanguadi ra häi Madián. Nɛ mí ꞌbʉpʉ tengu bʉ nam ꞌbʉꞌʉ yʉ ꞌdanꞌyo jąꞌi, nɛ guepʉ ja bim ꞌbʉpʉ yoho yʉ́ tsꞌʉntꞌʉ.
\p
\v 30 Nɛ nuꞌbʉ mi thoꞌa nyote njɛya ngue mi ꞌbʉpʉ, bi nɛqui nꞌda rám ꞌbɛhni Oją mahɛ̨tsꞌi bʉ ja ra tꞌʉza mi zø ra sibi, nubʉ ja ra ʉhäi, jombʉ ra tꞌøhø tꞌɛ̨mbi Sinaí.
\v 31 Nuꞌbʉ mín nu ra Moisés, madi hyonya thoho, bi mba bi hyänꞌi tsꞌʉ bʉ ja ra tꞌʉza ɛ̨na da nu ꞌbɛꞌa i ja bʉ. Bi ꞌyørpa rá nde ra Hmu mahɛ̨tsꞌi bʉya,
\v 32 bi ꞌyɛ̨mbi: “Nugä drá Oją gue i thąnde ni ngʉrpa mbombøtahʉ. Nugä dra Oją gue i thąnde ra Abraham, nɛ ra Isaac, nɛ ra Jacob,” bi ꞌyɛ̨mbi. Pɛ nu ra Moisés bi fɛtꞌi nɛ bin su, him bi hyąnzambʉi gue xpi hyandi.
\v 33 Nuꞌa ra Hmu bi ꞌyɛ̨mbi: “Dami cꞌoc ni thįxfani nguetho nuua guí ꞌbäi, xʉn ho ua, ngue ya dí ꞌbäcä ua,” bi ꞌyɛ̨n Oją.
\v 34 Nɛ xø bi ꞌyɛ̨n Oją: “Dá nu ma tꞌʉhni ꞌbʉpʉ ra häi Egipto ngue i pa ma ʉnbi. Nɛ dá øcä yʉ́ hmbafi ʉ. Bá ɛ̨cä ya gue ga japi da thɛgui. Nɛ nuya gui mba bʉ Egipto,” bi ꞌyɛ̨n Oją, bi tꞌɛ̨mpꞌa ra Moisés, bi ꞌyɛ̨nꞌa ra Esteban.
\p
\v 35 Nu ra Esteban xø bi xiꞌʉ yʉ juąnbate mahønꞌa, bi ꞌyɛ̨na:
\p ―Guehna ra Moisés bi tsꞌʉ ꞌbʉ mí ꞌyɛ̨na xtí hecua yoho yʉn ꞌyohʉ ma miꞌisraelhʉ, nɛ bi tꞌɛ̨mbi: “Ha i ja nin tꞌɛ̨di gui hegäꞌbe, toꞌo bi xiꞌi gan tsꞌʉtꞌabi.” Guehna ra Moisés, Oją bi mbɛnpʉ ngue din tsꞌʉtꞌabi nangue yʉ jąꞌi israel, nɛ bi japi bi mba nthɛgui. Nɛ nuꞌa ꞌbɛꞌa bi ꞌyøtꞌa ra Moisés, bi ꞌyøtꞌe nangue rám ꞌbɛhni Oją mahɛ̨tsꞌi bi nɛqui bʉ, nuꞌbʉ mi dɛ ra tꞌʉza.
\v 36 Nuna ra Moisés bi ꞌyøtꞌ yʉn tꞌøtꞌe nuįxte nɛ yʉ hmɛpya nubʉ ja ra häi Egipto. Mꞌbɛjua bʉya bi gʉcpʉ thi yʉ jąꞌi bʉ ja ra häi Egipto, nɛpʉ ja ra thɛnga deją bi ꞌyøtꞌa nꞌda ran tꞌøtꞌe nuįxte, nɛpʉ maꞌueni nguepʉ bin ꞌyo yote njɛya yʉ jąꞌi.
\v 37 Guehna ra Moisés bi xih yʉ jąꞌi israel: “Oją da huanꞌnahʉ nꞌda ra pøngahyą guepʉ ꞌbʉh nin ꞌyohʉhʉ, tengutho bʉ bi huancä. Nuꞌa jatho gui ꞌyøhmbʉ ꞌbɛꞌa da manꞌa,” bi ꞌyɛ̨na, bi ꞌyɛ̨nꞌa ra Esteban.
\p
\v 38 Nu ra Moisés gueꞌa bin ꞌyohʉ yʉ jąꞌi bʉ maꞌueni. Nɛ nubʉ ja rá yą ra tꞌøhø Sinaí bin yąui rám ꞌbɛhni Oją mahɛ̨tsꞌi, ꞌbʉ mi gopʉ ja rán dʉi ra tꞌøhø mam bombøtahʉ. Nɛ bi hyąnba rám hman Oją ra Moisés gue njąmꞌbʉ da guadi, nɛ gueꞌa bi thogahʉ a ya.
\p
\v 39 Pɛ nuꞌʉ mam bombøtahʉ him bi nde bi ꞌyɛ̨cꞌyɛi a ra Moisés, him bi nde bi dɛnni xʉn ho, pɛ bi numanꞌʉtho nɛ bi goh yʉ́ mbʉi, mím bɛ̨m bʉ Egipto.
\v 40 Nuꞌʉ bi ꞌyɛ̨mpꞌa ra Aarón, ra hmumbäją: “Dami ꞌyørcahe ꞌda yʉ oją da zixcahʉ. Nguetho hin dí pąhmbe ꞌbɛꞌa bi ja a ra Moisés gue bá jʉgähe bʉ ja ra häi Egipto,” bi ꞌyɛ̨nꞌʉ.
\v 41 Nuꞌʉ bi ꞌyøtꞌa nꞌda ra tꞌʉndąni bʉya, ɛ̨mbi yʉ́ oją, nɛ bi hyo yʉn dąni nɛ bi mbøx yʉ́ ꞌbøtsꞌe. Nɛ madín johya a bi ꞌyøtꞌe nangue yʉ́ ꞌyɛsɛ.
\v 42 Pɛ nu Oją bi ꞌuegue nangueꞌʉ, nɛ bi hyɛgui da dąnde ra hyadi, ra ząna, nɛ yʉ sø, nguetho ntꞌoꞌtꞌi bʉ ja rá søcuą yʉ pøngahyą:
\q Pɛ hanja hinga guecä gá pøscahʉ ꞌbʉ gmí hyohʉ yʉn dąni ꞌbʉ gmí ꞌbʉhmbʉ nyote njɛya bʉ maꞌueni,
\m i ɛ̨n Oją, bi ꞌyɛ̨nꞌʉ yʉ pøngahyą.
\q
\v 43 Pɛ hinga guecä gá thąndegahʉ pɛ guá tuhʉ nꞌda ra nguꞌbøꞌtꞌe guepʉ gá thąndehʉ a gá sänba zɛhɛ rá thuhu, gá ɛ̨mfʉ ra Moloc.
\q Nɛ guá tuhʉ nꞌda rá hmite ra sø gá ꞌyɛ̨mb zɛhɛhʉ ra oją Renfán,
\q ngue gá nde gá thąnde zɛhɛhʉ.
\q Janangueꞌa ga ʉnꞌnahʉ nɛ ga pɛnꞌnahʉ manꞌda yatho xínda guepʉ ra häi Babilonia,
\m i ɛ̨n Oją, bi ꞌyɛ̨nꞌʉ yʉ pøngahyą.
\p
\v 44 Pɛ guehma mi tu nꞌda ra nguꞌbøꞌtꞌe gue mí sänba Oją ʉ ma ngʉrpa bombøtahʉ ꞌbʉ mín ꞌyo bʉ maꞌueni, guepʉ da dąnde Oją ʉ, bi ꞌyøtꞌe tengu xí xi Oją ra Moisés, nuꞌbʉ min yąui bʉ ja ra tꞌøhø. Bi xifi da ꞌyøtꞌe tengu ra hmɛpya xí nu.
\v 45 Mꞌbɛjua bʉya, nuꞌbʉ mí ngʉrpi ra Josué, pɛ guextaꞌa ra nguꞌbøꞌtꞌe bá tuꞌʉ ma ngʉrpa bombøtahʉ ꞌbʉ mí zøm bʉ ja ra häi xí xi Oją. Nɛ mí ꞌbʉpʉ miꞌda yʉ jąꞌi gue hing yʉ israel. Nu Oją bʉya bi hyønꞌa thi yʉ ꞌdanꞌyo jąꞌi nɛ bim ꞌbʉpʉ yʉ israel bʉya. Nɛ guextaꞌa mí jatho ra nguꞌbøꞌtꞌe nuꞌbʉ min tsꞌʉtꞌabi ra David.
\v 46 Nuꞌa Oją ɛ̨mmɛ mí numanho ra David, gue ꞌdatꞌa Oją mí thąnde ra Jacob. Nuꞌa ra David bi ꞌyäp rán tꞌɛ̨di Oją da hyømba rá ngu gue rám poniui ra nguꞌbøꞌtꞌe.
\v 47 Pɛ nu ra Salomón rá tsꞌʉntꞌʉ ra David a, gueꞌa bi hyømba rá ngu Oją.
\v 48 Pɛ nuꞌa Oją nuįxte thoho hingui ꞌbʉpʉ ja yʉ ngu ntꞌøtꞌe ngue yʉ́ ꞌyɛ yʉn ꞌyohʉ. Ngubʉ bi man ra pøngahyą ꞌbʉ mi thocpa rám hma ra Hmu mahɛ̨tsꞌi, nɛ bi ꞌyɛ̨na:
\q
\v 49 Nuua mahɛ̨tsꞌi i ja ma tsꞌɛdi,
\q nɛcua ja ra ximhäi ja ma tsꞌɛdi,
\q ꞌbɛꞌa ní ngu guín nde gui hyøguahʉ,
\q o hapʉ guí ɛ̨mhbʉ ja ma säya.
\q
\v 50 Ha hinga guesɛgä dá øtꞌä gätho ja ua ya,
\m ɛ̨n Oją, bi ꞌyɛ̨nꞌa ra pøngahyą, bi ꞌyɛ̨nꞌa ra Esteban.
\p
\v 51 Nɛ bi thocꞌa ra Esteban bi xiꞌʉ yʉ mbäją i ørpa ran juąnbi:
\p ―Nuꞌahʉ xíngui tsꞌʉ guí øhmbʉ ꞌbʉ jaꞌa si ahʉ, nɛ xʉm mɛ ni mbʉihʉ, xíngui tsꞌʉ di cʉꞌtꞌ ni zaguhʉ. Thocua thoho guí sämanꞌʉhʉ rá Hogandąhi Oją tengutho mam bombøtahʉ, guín jahʉ bʉ.
\v 52 Xínga nꞌda rá pøngahyą Oją gue him bi hyo mam bombøtahʉ, nꞌdatꞌʉ yʉ pøngahyą gue bi ma dua ɛ̨h ra Hoga Cristo, gueꞌa gá dähʉ nɛ gá yąfʉ nɛ xin gá hyohʉ.
\v 53 Nuꞌʉ yʉ́m ꞌbɛhni Oją mahɛ̨tsꞌi bi ꞌdajʉ rán tꞌɛ̨di Oją, pɛ hin guí ʉrpahʉ ra güɛnda a ꞌbɛꞌa bi ma, bi ꞌyɛ̨nꞌa ra Esteban ꞌbʉ mi ꞌyɛ̨mpꞌʉ yʉ ngʉrpi.
\s Bi tho ra Esteban
\p
\v 54 Nɛ nuꞌbʉ mí ꞌyøh ya ꞌbɛꞌa bi ma ra Esteban, bi dɛ ra cuɛ yʉ́ mbʉi nɛ bi yɛ̨xpa yʉ́ tsꞌi.
\v 55 Pɛ nu ra Esteban mí hą ra tsꞌɛdi xʉn ho rá mbʉi nangue rá Hogandąhi Oją in ꞌyoui, nɛ bi ndøsꞌ mahɛ̨tsꞌi nɛ di nɛc thoho hapʉ ꞌbʉ Oją. Nɛ bi nu ra Jesús ꞌdarpʉ ꞌbʉhmi Oją nɛ i ja rá tsꞌɛdi.
\v 56 Nɛ bi ꞌyɛ̨na:
\p ―Pɛ dami ndøsꞌhʉ nʉ dín nugä, nꞌyø, nsoqui mahɛ̨tsꞌi nɛ dín nugä a bin jąꞌi ua ja ra ximhäi, i ꞌbʉhnʉ ja rán ꞌyɛi Oją, bi ꞌyɛ̨na.
\p
\v 57 Pɛ nuꞌʉ bʉya manꞌda bi got yʉ́ zagu, nɛ bi mbafi nangue yʉ́ cuɛ, gätho bi muxpʉ ꞌbäh ra Esteban.
\v 58 Nɛ bi gʉcpʉ ja ra hnini nɛ bi batꞌado bʉ maꞌueni. Nɛ nuꞌʉ gue bim bate, bi mbøh yʉ́ coto nguetho in nde nte di hɛ̨nꞌʉ. Bi mbøpʉ ja rá gua nꞌda ran ꞌyohʉ ní huti ra Saulo, nɛ bi ꞌyɛ̨nꞌʉ:
\p ―Gui jamansu tsꞌʉ ma cotogähe, bi tꞌɛ̨mpꞌa.
\v 59 Nɛ nuꞌbʉ gätho ní mba ma batꞌado ra Esteban, bi zoꞌa Oją, bi ꞌyɛ̨mbi:
\p ―Nuꞌi ma Hmu Jesús, dami hyąnga ma te ya.
\p
\v 60 Nɛ bin dąnyahmu, ntsꞌɛdi bi mbafi, bi ꞌyɛ̨na:
\p ―Ma Hmu i, o guí ʉrpa ra güɛnda nanguehna ra tsꞌoqui bin ja ya.
\p Nɛ nuꞌbʉ mi man na, bi du bʉya.
\c 8
\s Nu ra Saulo bi un ran ʉnbi yʉ ꞌyɛ̨cꞌyɛi
\p
\v 1-3 Nɛ nuꞌa ra Saulo ꞌdaꞌangu bi mamhbʉ ʉ bi hyoꞌa ra Esteban. Janangueꞌa nu ra pa ngue bi nu ran ʉnbi ra Esteban, nu yʉ ꞌyɛ̨cꞌyɛi mi ꞌbʉpʉ Jerusalén bi mba ma ʉcpi. Nɛ xʉn ngu ʉ bi mba bʉ miꞌda yʉ hnini bʉ ra häi Judea, nɛpʉ ra häi Samaria, pɛ bi gopʉ ʉ ꞌdɛꞌmayoho yʉ́ ꞌbäihʉ ra Cristo. Nɛ ꞌdaꞌʉ yʉ ꞌyɛ̨cꞌyɛi bi ꞌyäh ra Esteban, nɛ ɛ̨mmɛ bin zoni nangueꞌa. Nu ra Saulo ɛ̨mmɛ madi ʉcpa yʉ ꞌyɛ̨cꞌyɛi, nɛ mi cʉrpʉ ja yʉ ngu mi six yʉn ꞌyohʉ nɛ yʉ xisu, nɛ bi gotꞌa fädi. 
\s I hman ran ho maꞌdaꞌyo nubʉ ra häi Samaria
\p
\v 4 Pɛ nuꞌʉ bi ꞌdagui, bi mampꞌa rán ho maꞌdaꞌyo ra Cristo bʉ nꞌdanni ním pa.
\v 5 Nuꞌa ra Felipe bi mba bʉ ja nꞌda ra hnini ra häi Samaria, nɛ bi xih yʉ jąꞌi nangue ra Cristo.
\v 6 Gätho yʉ jąꞌi bi ꞌyømanho ꞌbɛꞌa bi man na ra Felipe ꞌbʉ mi nu yʉn tꞌøtꞌe nuįxte bi ꞌyøtꞌa. 
\v 7 Nguetho xʉn ngu yʉ jąꞌi bi hyønba thi yʉ zįthu, nɛ ntsꞌɛdi bi mba ꞌbʉ mí bønꞌʉ. Nɛ nuꞌʉ mí ꞌuɛꞌtsꞌ yʉ́ jąꞌi nɛꞌʉ yʉ dogua gätho bi zä. 
\v 8 Janangueꞌa ɛ̨mmɛ bin ja ran johya bʉ ja ra hnini. 
\p
\v 9 Nɛ mí ꞌbʉpʉ nꞌda ran ꞌyohʉ í Simón, mi øtꞌ ran thäte, nɛ nuꞌʉ yʉ mɛngu Samaria madi hyonya thoho. Nu ra Simón min ndep yʉ jąꞌi da bɛ̨ni jasɛ rá tsꞌɛdi. 
\v 10 Nɛ gätho na nguꞌʉ, yʉ tꞌʉhni nɛ yʉ dącꞌyɛi, nuꞌbʉ mi ꞌyøꞌʉ ꞌbɛꞌa bi man a, bi ꞌyɛ̨na:
\p ―Nuna ran ꞌyohʉ na, ja ra tsꞌɛdi tengu Oją, ɛ̨n yʉ jąꞌi. 
\p
\v 11 Nuꞌʉ mi numansu ra Simón nguetho nyaꞌa thoho mi häte. Nɛ bi hyonya thoho ʉ ꞌbɛꞌa bi ꞌyøtꞌa.
\v 12 Pɛ nu yʉ jąꞌi bi ꞌyɛ̨cꞌyɛi ꞌbɛꞌa bi manꞌa ra Felipe nuꞌbʉ mí ma ra Hogamhma ꞌbɛpʉ ní manda rá tsꞌɛdi Oją, ngue bi ma nangue ra Jesús. Nɛ bi mba ma xixyąbi yʉn ꞌyohʉ nɛ yʉ xisu. 
\v 13 Nɛꞌa ra Simón ɛ̨na bi ꞌyɛ̨cꞌyɛi, nɛ nuꞌbʉ mín xixyą, bi dɛnꞌna ra Felipe. Nɛ nuꞌbʉ mín nu yʉ hmɛpya nɛ yʉn tꞌøtꞌe nuįxte bi ꞌyøtꞌ ra Felipe, bi hyonya thoho ra Simón.  
\p
\v 14 Nɛ nuꞌbʉ mi ꞌyøꞌʉ yʉ́ ꞌbäihʉ ra Cristo ꞌbʉpʉ Jerusalén gue bi ꞌyɛ̨cꞌyɛi yʉ mɛngu Samaria, bi mbɛnpʉ ra Pedro nɛ ra Xuua ʉ miꞌda yʉ́ ꞌbäihʉ ra Cristo.
\v 15 Nuꞌbʉ mi zøm bʉ bʉya, bin yąhʉ Oją, bi ꞌyäp rá tsꞌɛdi ngue da hyąn rá Hogandąhi Oją yʉ ꞌyɛ̨cꞌyɛi ꞌbʉpʉ.  
\v 16 Nguetho hin ní zøh rá Hogandąhi Oją bʉ ja yʉ́ mbʉi ʉ, pɛ høntꞌa nangue rá thuhu ra Hmu Jesús bin xixyą ʉ.  
\v 17 Nu ra Pedro nɛ ra Xuua bʉya, bi gäspa yʉ́ ꞌyɛ yʉ́ yą yʉ ꞌyɛ̨cꞌyɛi, nɛ bi hyąn rá Hogandąhi Oją bʉya. 
\p
\v 18 Pɛ nu ra Simón, nuꞌbʉ mi nu bi hyąn rá Hogandąhi Oją ʉ bi gäx yʉ́ ꞌyɛ yʉ́ ꞌbäihʉ ra Cristo, bi ꞌyut ra mbɛti bʉya.
\v 19 Bi ꞌyɛ̨mbi:
\p ―Dami ꞌdac ma tsꞌɛdi gue høntꞌa toꞌo ga cäx ma ꞌyɛ da hyąn rá Hogandąhi Oją tengu guí øtꞌui, ma gá jutꞌaui, bi ꞌyɛ̨na. 
\p
\v 20 Pɛ nu ra Pedro bi ꞌyɛ̨mbi: 
\p ―Di jua Oją ni mbɛti, nɛꞌe, nguetho guím bɛ̨ni nangue ra mbɛti sä gui tänꞌa ꞌbɛꞌa di un Oją.
\v 21 Nguetho hinga gueꞌe ga comhbʉ na ra ꞌbɛfi, mfądi ya him mahoqui ni mbʉi bʉ ja rá hmi Oją.
\v 22 Dami päh ni mbʉi nangue ran tsꞌo. Dami ꞌyäp rá punbi ra Hmu, nɛ da zä di punꞌnaꞌi nangue ran tsꞌo gá bɛ̨ni. 
\v 23 Nguetho dí pądi ɛ̨mmɛ ja ran tsꞌɛya ni mbʉi, nɛ ɛ̨mmɛ xʉn ngu ran tsꞌo ja ni mbʉi guím bɛ̨ni. 
\p
\v 24 Nu ra Simón bi dąti: 
\p ―Nuꞌaui gui ꞌyähmi tsꞌʉ rá tsꞌɛdi ra Hmu nanguecä, ngue hin gan nugä a guí mammi, bi ꞌyɛ̨mpꞌʉ. 
\p
\v 25 Nuꞌbʉ mim ꞌbʉꞌi tsꞌʉ bʉ ra Xuua nɛ ra Pedro, nɛ xí mampꞌa rám hma ra Hmu mahɛ̨tsꞌi, bi mbeng bʉ Jerusalén. Pɛ him ꞌbex bi zøm bʉ, nɛ mꞌbɛtꞌo gätho ná ngu ra häi Samaria bi manꞌa ran ho maꞌdaꞌyo bʉ bi thogui. 
\s Nu ra Felipe nɛ ra mɛngu Etiopía 
\p
\v 26 Nuꞌa nꞌda rám ꞌbɛhni Oją mahɛ̨tsꞌi bi zøm bʉ bí ꞌbʉꞌa ra Felipe, nɛ bi ꞌyɛ̨mbi: 
\p ―Ní mba ꞌdanguadi guepʉ bí thoh ra ꞌyu ní mba Gaza, gue ní bøm bʉ Jerusalén. Nuna ra ꞌyu ní mba bʉ ra huɛnhäi na, bi ꞌyɛ̨mpꞌa rám ꞌbɛhni Oją. 
\p
\v 27 Bi ndantsꞌa ra Felipe ꞌbex bi mba bʉ. Bi nu, i ꞌyo bʉ ꞌyu nꞌda ran ꞌyohʉ xʉn hɛ̨tsꞌi rá ꞌbɛfi, di jamansup rá mbɛti ra xutsꞌʉtꞌabi Candace bʉ ra häi Etiopía. Janangueꞌa i tꞌɛ̨mbi ra eunuco, ngue nde da ma, mꞌboqui.
\v 28 Nuꞌa xpí mbeng bʉ Jerusalén guepʉ bá thąnde Oją.
\v 29 Nu rá Hogandąhi Oją bi ꞌyɛ̨mpꞌa ra Felipe:
\p ―Gui mba gui sʉꞌa ran ꞌyohʉ i hux ra carro. 
\p
\v 30 Nu ra Felipe bin tih pʉya nɛ bi zʉdi. Nuꞌbʉ mí zøm bʉ, bi ꞌyøde gue mi nɛh ra søcuą ran ꞌyohʉ, gue rá søcuą ra Isaías rá pøngahyą Oją. Ra Felipe bi ꞌyän bʉya: 
\p ―Ha guí pądi ꞌbɛꞌa nam bønꞌa ra søcuą gadín xäh ya. 
\p
\v 31 Bi dąꞌa ran ꞌyohʉ:
\p ―Hague dán zä ga pącä nuꞌbʉ njon da xängui. 
\p Nɛ bi xih ra Felipe da ndetsꞌe din hyʉmmi bʉ. 
\p
\v 32 Nɛ nuꞌa ra søcuą madin xäh ran ꞌyohʉ mim ma gue: 
\q I tsꞌixꞌa nꞌda ran ꞌyohʉ tengu nꞌda ra dɛꞌyo i tsꞌitsꞌi ngue da hyo. 
\q Nɛ tengu nꞌda ra tꞌʉdɛꞌyo nuꞌbʉ i ąxpa rá xįngu, hin di cꞌuɛ̨hɛ, 
\q nɛ ngutho a ran ꞌyohʉ hin din yą. 
\q 
\v 33 Nɛ nuꞌbʉ mín nu ran ʉnbi, njom bi yąni, njom bi mbätsꞌi. 
\q Nɛ njon da zä da ma hangu da dɛnni, 
\q nguetho bi thącua rá te ua ja ra ximhäi. 
\m Gueꞌa bi man ra søcuą bi nu ran ꞌyohʉ. 
\p
\v 34 Nu ran ꞌyohʉ bʉya bi ꞌyänꞌna ra Felipe:
\p ―Dami xiqui tsꞌʉ toꞌo nín ꞌyohʉ na da nu ran ʉnbi, uague guesɛ na ra pøngahyą bi nu, uague nꞌdanꞌyo, bi ꞌyɛ̨mbi.
\p
\v 35 Nuꞌa ra Felipe bʉya, bi dʉꞌmi bi ma ꞌbɛꞌa nam bønꞌa ra søcuą nubʉ madín xäh na ran ꞌyohʉ, nɛ bi xifi nangue ra Jesús bi tꞌørpa na im man ra søcuą, nɛ bi thoqui bi xifi xʉn ho. 
\v 36 Nɛ nuꞌbʉ mí zøm bʉ po ra dehe, nuꞌa ran ꞌyohʉ bi ꞌyɛ̨mpꞌa ra Felipe: 
\p ―Ha hin da zä dan xixyągä ꞌbʉ, nɛ po ua ra dehe ya, bi ꞌyɛ̨nꞌa. 
\p
\v 37 Bi dąꞌa ra Felipe: 
\p ―Da zä, nuꞌbʉ guí ɛ̨cꞌyɛi a dí xiꞌi nangue ra Jesús, gue gätho ni mbʉi.
\p Bi dąꞌa ran ꞌyohʉ: 
\p ―Dí ɛ̨cꞌyɛi gue gueꞌa ra Jesucristo rá Tsꞌʉntꞌʉ Oją a.
\p
\v 38 Nɛ bi säyabi rá carro bʉya. Nɛ bi gąpʉ ja ra carro nɛ bi mba bʉ mi po ra dehe. Nu ra Felipe bʉya bi ꞌyørpa ran xixyą a ranꞌyohʉ. 
\v 39 Nɛ nuꞌbʉ mi bøxpʉ mí po ra dehe, ꞌdahmantho bi ꞌbɛrpʉ ra Felipe gue bi zix rá Hogandąhi Oją. Nɛ nu ra mɛngu Etiopía him manꞌdandį bi nuꞌa. Nɛ nuꞌbʉ mí thogui, bin johya rá mbʉi.
\v 40 Pɛ nu ra Felipe ní nɛqui mahønꞌa bʉ ra hnini Azoto. Nɛ nuꞌbʉ mambá thopʉ ja yʉ hnini, bi mam bʉ ran ho maꞌdaꞌyo asta gueꞌbʉ mi zøm bʉ ja ra hnini Cesarea.
\c 9
\s Nuꞌa ra Saulo bi päh rán ꞌyomfɛ̨ni
\p
\v 1 Pɛ nuꞌa ra Saulo mim man yʉn ʉcuate, nɛ ran dąte nangue yʉ ꞌyɛ̨cꞌyɛi, gätho ná ꞌyøtꞌa bi ꞌyøtꞌ ra Felipe. Nɛ bi mba bʉ bí ꞌbʉh ra hmumbäją.
\v 2 Nɛ bi ꞌyäp ra søcuą ngue ran tꞌɛ̨di da mba bʉ ja yʉ́ niją yʉ judío nubʉ ra hnini Damasco. Nɛ nuꞌbʉ ꞌboꞌo da dįm bʉ gue i tɛn ra Cristo, ogue ran ꞌyohʉ ogue ra xisu, da bɛntꞌi nɛ da zixpʉ Jerusalén nthuꞌtꞌi din ofädi bʉ.
\v 3 Nɛ nuꞌbʉ mí mba bʉ ꞌyu, mí tsꞌʉtho da zøm bʉ Damasco, ꞌbex bí ꞌyɛ̨h mahɛ̨tsꞌi nꞌda ra nyotꞌi ɛ̨mmɛ bi hyärpʉ i ꞌbäꞌa ra Saulo.
\v 4 Bi dąng bʉ häi ra Saulo bʉya, nɛ bi ꞌyøꞌa nꞌda ra nde bi ꞌyɛ̨na:
\p ―Saulo, Saulo, hanja gní ʉngui.
\p
\v 5 Bi dąꞌa ra Saulo:
\p ―Toꞌo i, gra Hmu.
\p Nu ra Hmu bi dątꞌa:
\p ―Nugä dra Jesús, guecä gadí ʉngui, nɛ xʉn hɛ̨i guí øtꞌe tengu nꞌda ra mbʉndąni i pa ma sʉni ra tꞌo ndepe dim pɛfi xʉn ho, nɛ i nɛte thoho.
\p
\v 6 Nuꞌa ra Saulo ɛ̨mmɛ bin su nɛ bi fɛtꞌi, bi ꞌyɛ̨na:
\p ―Ma Hmu, ꞌbɛꞌa guín nde ga øtꞌä.
\p Nu ra Hmu bi ꞌyɛ̨mbi:
\p ―Dami ndantsꞌi gui mba bʉ ja ra hnini, nubʉ, da siꞌi ꞌbɛꞌa gui ꞌyøtꞌe, bi tꞌɛ̨mbi.
\p
\v 7 Nɛ nuꞌʉ gätho mín ꞌyohʉ him mi sä din yą nguetho bin su. Nuꞌʉ mí øh ra nde pɛ him min nu toꞌo min yą.
\v 8 Nuꞌbʉ mi ndantsꞌa ra Saulo bi zøtꞌ rá dä pɛ him mi nu, mi xädä thoho. Nuꞌʉ mín ꞌyohʉ bi bɛntpa rá ꞌyɛ bi zixpʉ Damasco.
\v 9 Nɛ hyupa bám ꞌbʉpʉ, nɛ mi xädä, nɛ him mi sihmɛ, xing ra dehe mi si.
\p
\v 10 Nɛ mi ꞌbʉpʉ Damasco nꞌda ra ꞌyɛ̨cꞌyɛi rá thuhu ra Ananías. Nu ra Hmu mahɛ̨tsꞌi bin ꞌyusɛ bʉ nɛ bi zofo tenguꞌbʉ bin ꞌuį.
\p ―Ananías, bi ꞌyɛ̨mbi.
\p Nu ra Ananías bi dądi:
\p ―Dí ꞌbʉcä ua gra Hmu.
\p
\v 11 Nu ra Hmu bi ꞌyɛ̨mpꞌa:
\p ―Dami ndantsꞌi gui mba bʉ ja ra ꞌyu tꞌɛ̨mbi xʉn juąni, nɛ gui hyom bʉ nꞌda ran ꞌyohʉ ra Saulo, ra mɛngu Tarso, i ꞌbʉpʉ ja rá ngu ra Judas. Nuya in zocä ya.
\v 12 Nɛꞌa ra Saulo in nu tenguꞌbʉ ra tꞌį ngue guí mba bʉ nɛ guí cäx ni ꞌyɛ, nɛ da nu ran nɛqui mahønꞌa, bi ꞌyɛ̨n Oją.
\p
\v 13 Bi dątꞌa ra Ananías:
\p ―Ma Hmu i, xʉn ngu yʉ jąꞌi bi xiqui ꞌbɛꞌa øtꞌna ra Saulo, xʉn ngu yʉn tsꞌo xʉ ꞌyørpa yʉ ꞌyɛ̨cꞌyɛi ꞌbʉpʉ Jerusalén.
\v 14 Nɛ nuna bá äp rán tꞌɛ̨di yʉ hmumbäją da bɛntꞌi nɛ da gotꞌa fädi gätho toꞌo da ndønꞌna ni thuhu, bi ꞌyɛ̨na.
\p
\v 15 Pɛ nuꞌa ra Hmu bi xiꞌa ra Ananías:
\p ―Ní mbahma nguetho dá huahndä da ma nanguecä bʉ ꞌbʉꞌʉ hing yʉ judío, nɛ yʉ hmutsꞌʉtꞌabi, nɛ yʉ jąꞌi israel ngue yʉ judío.
\v 16 Nɛ ga xifi xʉn ngu yʉn ʉnbi da nu nanguecä, go bi ꞌyɛ̨n Oją.
\p
\v 17 Bi mba ra Ananías bʉya, nɛ nuꞌbʉ mi yʉrpʉ ja ra ngu, bi gäx rá ꞌyɛ rá yą ra Saulo nɛ bi ꞌyɛ̨mbi:
\p ―Ma cuꞌi Saulo, nu ra Hmu Jesús, nuꞌa gue gá nu bʉ ꞌyu ꞌbʉ guá ɛ̨hɛ, bá pɛncä ua ya gue di ja i da xoh ni dä. Nɛ di ja i gui hyą ra tsꞌɛdi xʉn ho nangue rá Hogandąhi Oją gan ꞌyoui, bi ꞌyɛ̨na.
\p
\v 18 Nɛ ꞌbex bi hyøꞌʉ mi comba yʉ́ dä tengu ra xihuą. Nɛ ꞌbex bi hyand ran nɛqui yʉ́ dä ra Saulo, ꞌbex bi ndantsꞌ pʉya nɛ bin xixyą.
\v 19 Nɛ nubʉya, bin sihmɛ nɛ bi zac mahønꞌa rá jąꞌi. Nɛ bám ꞌbʉꞌi tsꞌʉ bʉ bí ꞌbʉꞌi ꞌda yʉ ꞌyɛ̨cꞌyɛi bʉ ra hnini Damasco.
\s Nuꞌa ra Saulo bi mam bʉ rám Hman Oją bʉ Damasco
\p
\v 20 Nɛ nu ra Saulo bʉya ꞌbex bi dʉꞌmi bá mam bʉ rám Hman Oją bʉ ja yʉ́ niją yʉ judío. Nɛ bi xifi gue nu ra Jesús rá Tsꞌʉntꞌʉ Oją a.
\v 21 Gätho mi øde bi hyonya thoho nɛ bi ꞌyɛ̨na:
\p ―Ha hinga guehna ran ꞌyohʉ na mi cotꞌa fädi gätho mi ndønba rá thuhu ra Jesús bʉ Jerusalén. Nɛ ha him bá ɛ̨cua ngubʉ da ꞌyøtꞌe, nɛ da zitsꞌi nthuꞌtꞌi bʉ ꞌbʉh yʉ hmumbäją, bin ꞌyɛ̨mpꞌʉ.
\p
\v 22 Pɛ nu ra Saulo manꞌda bi hyą ra tsꞌɛdi bi ma xʉn ho. Nɛ nu yʉ judío ꞌbʉpʉ Damasco nte mi sä da ma, nguetho bi xifi, nu ꞌbɛꞌa gätho mán tsꞌänni daꞌyøtꞌa rá Thahni Oją gue ra Cristo, pɛ gueꞌa bi ꞌyøtꞌa ra Jesús, guepʉ bi ꞌyuti nꞌdatꞌa.
\s Nuꞌa ra Saulo bi ꞌdagui, ɛ̨na xtám bɛnt yʉ judío
\p
\v 23 Nɛ nu ra Saulo ꞌbʉ mím ꞌbʉpʉ nyaꞌa tsꞌʉ yʉ pa, nꞌdatꞌa mí manꞌʉ yʉ judío hing yʉ ꞌyɛ̨cꞌyɛi, ngue da hyo.
\v 24 Pɛ nu ra Saulo mi øde ꞌbɛꞌa mbɛ̨nꞌʉ yʉ judío. Nuꞌʉ mí fäh yʉ́ goxthi bʉ ja ra ndehnini, guepʉ ma mbäꞌtꞌi ra jądo. Ma pa nɛ ra xui mí fäh yʉ goxthi ngue nde da hyo.
\v 25 Pɛ nu yʉ ꞌyɛ̨cꞌyɛi bi zix ra Saulo gue ra xui, í cąꞌma nꞌda ra ꞌbøtsꞌe bʉ thi bʉ ja ra jądo ngue ma føꞌtꞌe ra hnini. Gueꞌa í ꞌdaꞌa.
\s Ra Saulo ꞌbʉpʉ ja ra hnini Jerusalén
\p
\v 26 Nuꞌbʉ mí zøm bʉ Jerusalén ra Saulo, mim bɛ̨ni gue xtín ꞌyohʉ yʉ ꞌyɛ̨cꞌyɛi. Pɛ nuꞌʉ mín suꞌʉ nɛ him mi ɛ̨cꞌyɛi gue ra ꞌyɛ̨cꞌyɛi ra Saulo.
\v 27 Pɛ nu ra Bernabé bi zixꞌa ra Saulo guepʉ ꞌbʉh yʉ́ ꞌbäihʉ ra Cristo. Nɛ bi xifi ngue bi nu ra Hmu bʉ ꞌyu, nɛ bin yąui ra Hmu. Nɛ bi xifi bi hyutꞌ ran zambʉi bʉ Damasco nuꞌbʉ mím ma nangue ra Jesús.
\v 28 Nu yʉ ꞌyɛ̨cꞌyɛi bi zim bʉya, nɛ bin ꞌyohʉ bʉ Jerusalén.
\v 29 Nɛ nu ra Saulo bi hyutꞌ ran zambʉi bi mampꞌa rám Hman Oją nangue ra Jesús. Pɛ nuꞌʉ ꞌda yʉ́ mijudíohʉ gue i yą ra nde ra griego, madin junthʉ ra Saulo, nɛꞌʉ nde da hyoꞌʉ.
\v 30 Nuꞌbʉ mí ꞌyøh yʉ ꞌyɛ̨cꞌyɛi gue nde da tho ra Saulo, bi zixpʉ Cesarea nɛ bi mbɛnpʉ Tarso.
\p
\v 31 Nuya bin hɛ̨ yʉ́n ʉnbi yʉ ꞌyɛ̨cꞌyɛi gätho ra häi Judea, nɛ ra häi Galilea nɛ ra häi Samaria. Nɛ bin te yʉ́ mbʉi nangue Oją. Bi numansu ra Hmu nɛ bi nu rám fätsꞌi rá Hogandąhi Oją. Nɛ manꞌda xʉn ngu bi ꞌyɛ̨cꞌyɛi.
\s Bi zäꞌa ra Eneas
\p
\v 32 Nuꞌa ra Pedro mí ꞌyo mi nu ʉ yʉ ꞌyɛ̨cꞌyɛi ꞌbʉpʉ ja yʉ hnini, nɛ bi zøm bʉ ja ra hnini Lida gue da nu yʉ ꞌyɛ̨cꞌyɛi ꞌbʉpʉ.
\v 33 Nɛ bi dįm bʉ nꞌda ran ꞌyohʉ ní hu Eneas, nhyąto njɛya xí ꞌyoi gue xʉn ʉ, xín tꞌɛꞌtsꞌ rá jąꞌi.
\v 34 Nu ra Pedro bi ꞌyɛ̨mpꞌa:
\p ―Eneas, da zäꞌi nangue ra Jesús, dami ndantsꞌi pantsꞌ ni fįdi, bi ꞌyɛ̨mbi.
\p ꞌBex bi ndantsꞌa ra Eneas bʉya.
\v 35 Nɛ gätho ngue ꞌbʉpʉ Lida nɛpʉ Sarón bi ꞌyɛ̨cꞌyɛi ra Hmu ꞌbʉ mín nuꞌa bin ja, nɛ bi hyɛsɛ yʉ́ tꞌɛ̨cꞌyɛi.
\s Nuꞌa ra Dorcas bi dąmbɛ̨ni ꞌbʉ mi du
\p
\v 36 Nɛ nuꞌʉ yʉ pa ʉ, mí ꞌbʉpʉ ja ra hnini Jope nꞌda ra xisu gue ra ꞌyɛ̨cꞌyɛi, í Tabita, nɛ í Dorcas ngue rá nde yʉ griego. Nuna ra xisu ɛ̨mmɛ xʉn ngu ran huɛ̨cate mí ørpa yʉ́ mijąꞌihʉ.
\v 37 Pɛ nuya bin zämanꞌʉ, nɛ bi du. Nuꞌbʉ mi ꞌberpa rá jąꞌi, bi jäxpʉ bí ja nꞌda ra tꞌotsꞌi magątsꞌi.
\v 38 Nu ra hnini Lida mí hän bʉ Jope. Nuꞌbʉ mí ꞌyøh yʉ ꞌyɛ̨cꞌyɛi, gue ꞌbʉpʉ Lida ra Pedro, bi mbɛhnꞌdʉ yoho yʉn ꞌyohʉ gue ba ørpa ra tsꞌɛdi ba ɛ̨hɛ.
\v 39 Nu ra Pedro bʉya ꞌbex bán ꞌyohʉ ʉ. Nuꞌbʉ mí zøhø, ꞌbex bi tsꞌixpʉ magątsꞌi ja a ra cuarto guepʉ mí ꞌbäꞌʉ yʉ hyoya xisu mí zoni. Nɛ bi ꞌyut yʉ́ he xí tꞌørpabi, gue bi ꞌyørpa ra Dorcas ꞌbʉ mi ꞌbʉi.
\v 40 Pɛ nu ra Pedro bi xifi:
\p ―Dami pømhbʉ tsꞌʉ nꞌda zʉ ora gätho ahʉ.
\p Nɛ bin dąnyahmu nɛ bin yąui Oją. Nɛ bi hyantꞌa gue bi du, bi ꞌyɛ̨mbi:
\p ―Tabita dami ndantsꞌi, bi ꞌyɛ̨mbi.
\p ꞌBex bi zøtꞌ rá dä, nɛ nuꞌbʉ mín nu ra Pedro, bi hyudi.
\v 41 Nu ra Pedro bʉya bi bɛntpa rá ꞌyɛ nɛ bi xotsꞌi, bim ꞌbäi. ꞌBex bi zohnꞌdʉ yʉ ꞌyɛ̨cꞌyɛi nɛ yʉ hyoya xisu bʉya:
\p ―Dami nuhʉ na xí du, nɛ bi dąmbɛ̨ni ya, bi ꞌyɛ̨mpꞌʉ.
\p
\v 42 Nuꞌbʉ mí ꞌyøꞌʉ gätho ra hnini Jope, xʉn ngu bi ꞌyɛ̨cꞌyɛi ra Hmu.
\v 43 Nɛ nu ra Pedro xʉn ngu tsꞌʉ yʉ pa bá copʉ Jope, bám ꞌbʉpʉ rá ngu ra Simón. Nu ra Simón ra hoca xindąni a.
\c 10
\s Ra Pedro nɛ ra hmudofʉi Cornelio
\p
\v 1 Mí ꞌbʉpʉ nꞌda ran ꞌyohʉ í Cornelio, nubʉ ra hnini Cesarea. Gue nuna ran ꞌyohʉ im hmu nangueꞌʉ nꞌda muntsꞌi yʉ dofʉi gueꞌa ní tꞌɛ̨mbi Italiano ʉ.
\v 2 Nuna ra Cornelio madagueꞌbʉ hing ra judío a, pɛ nuꞌa nɛ gätho ꞌbʉpʉ rá ngu mi thąnde Oją nɛ mí numansu a. Nząi mi un yʉn tꞌunni yʉ hyoya nɛ nząi min yąhʉ Oją.
\v 3 Nꞌda ra pa mbɛ hyunde, tenguꞌbʉ bi ꞌuį ꞌbʉ mí nu nꞌda rám ꞌbɛhni Oją mahɛ̨tsꞌi, bi yʉrpʉ ja ra cuarto mí ꞌbäi, bi zofo:
\p ―Cornelio, bi ꞌyɛ̨mbi.
\p
\v 4 Nɛ nuꞌbʉ mí hyandi, bin su nɛ bi dądi:
\p ―ꞌBɛꞌa ma Hmu.
\p Nu ram ꞌbɛhni bi ꞌyɛ̨mbi:
\p ―Nuꞌa Oją im bɛ̨nꞌi, nɛ i øꞌbʉ guí yąui, nɛ in nu    Oją ꞌbʉ gdí un yʉn tꞌunni yʉ hyoya.
\v 5 Nuya, gui pɛhnꞌdʉ ꞌda yʉn ꞌyohʉ bʉ Jope da dįm bʉ nꞌda gue ra Simón, nɛ guetꞌa ra Pedro a, nɛ gua pɛnhua.
\v 6 Nuꞌa ra Pedro i ꞌbʉhmbʉ nꞌda ran ꞌyohʉ í Simón gue ra hoca xindąni a, nɛ i ꞌbʉpʉ ndendeją.  Nuꞌa da xiꞌaꞌi ꞌbɛꞌa gui ꞌyøtꞌe, bi ꞌyɛ̨nꞌa rám ꞌbɛhni Oją.
\p
\v 7 Nuꞌbʉ mí guaꞌa im ma, ꞌbex bi mbeng mahɛ̨tsꞌi ram ꞌbɛhni. Nu ra Cornelio bʉya bi zohni yoho yʉ́ ꞌyɛ̨hɛ nɛ nꞌda ra dofʉi ngue i numansu Oją, ngue rá ꞌyɛ̨hɛ a. 
\v 8 Nɛ nuꞌbʉ mi xifi gätho ꞌbɛꞌa bi xih rám ꞌbɛhni Oją mahɛ̨tsꞌi, bi mbɛnpʉ Jope ʉ bʉya.
\p
\v 9 Manꞌda pa bʉya mbɛ huxyadi nuꞌbʉ bá ɛ̨pʉ ꞌyu yʉ́m ꞌbɛhni ra Cornelio, häntho Jope, nu ra Pedro bi ndexpʉ thi bʉ ja ra zɛꞌtsꞌangu bʉ mí ꞌbʉi, guepʉ din yąui Oją.
\v 10 Nuꞌa ra Pedro ɛ̨mmɛ bin tumanthuhu, nɛ gätho ní mba mahoqui ran tsꞌihmɛ, nu ra Pedro bʉya bi nu nꞌda ran tꞌuti, tenguꞌbʉ bi ꞌuį.
\v 11 Nɛ bi nu nsoqui mahɛ̨tsꞌi, nɛ bá cąi tengu nꞌda ra theꞌbøꞌtꞌe xʉn ndoho gue mfɛntꞌi yʉ́ tsꞌątꞌi.
\v 12 Nɛ ba ꞌyo bʉ ja ra ꞌbøꞌtꞌe høntꞌa go ꞌbɛꞌa má zuꞌuɛ̨ i ja goho yʉ́ gua, nɛ yʉ zate, nɛ yʉ pozʉ, nɛ yʉ doja.
\v 13 Nu ra Pedro bi ꞌyøꞌa nꞌda ra nde, bi tꞌɛ̨mbi:
\p ―Dami ndantsꞌi gui hyo gue gui sa.
\p
\v 14 Bi dąꞌa ra Pedro:
\p ―Hinꞌna ma Hmu, nguetho njąmꞌbʉ xtá sagä xʉn tsꞌo, gueꞌa i man nin tꞌɛ̨di hingui ho ꞌbʉ ga sa.
\p
\v 15 Nɛ bi ꞌyɛ̨mbi mahønꞌa:
\p ―ꞌYo guí ɛ̨na hingui ho ꞌbɛꞌa dá sändä da tsꞌa, ngue gätho dí hocä ʉ, bi ꞌyɛ̨mpꞌa ra nde.
\p
\v 16 Ná hyundį bi sifi, bi ndex mahønꞌa mahɛ̨tsꞌi ra ꞌbøꞌtꞌe.
\v 17 Nu ra Pedro, nuꞌbʉ gätho madí hyonya thoho nɛ im bɛ̨ni ꞌbɛꞌa ní mbaꞌa xí nu tengu ra tꞌį, ꞌbex bi zøh yʉ́m ꞌbɛhni ra Cornelio. Nɛ mí ꞌbäpʉ thi ja ra goxthi rá ngu ra Simón, nɛ xí ꞌyänni hapʉ jaꞌa ra ngu.
\v 18 Nuꞌbʉ mí zøm bʉ, bi ꞌyänni:
\p ―Ha ꞌbʉcua ra Simón Pedro.
\p
\v 19 Nɛ gätho nín ꞌyomfɛ̨ni ra Pedro ꞌbɛꞌa ní mba a xí nu, nuꞌa rá Hogandąhi Oją bi ꞌyɛ̨mbi: 
\p ―ꞌBʉpʉ hyu yʉn ꞌyohʉ i honꞌi.
\v 20 Dami ndantsꞌi, gui cąi nɛ gui mbähä ʉ yʉn ꞌyohʉ, gui tɛnni nɛ hin gan su, nguetho nugä bá pɛnhdä ʉ, bi ꞌyɛ̨mbi.
\p
\v 21 Nu ra Pedro bʉya bi gąpʉ mi ꞌbäh yʉn ꞌyohʉ gue bá pɛnh ra Cornelio, nɛ bi xifi:
\p ―Nugä guecä guí hongui. ꞌBɛꞌa gní hyonjʉ.
\p
\v 22 Bi dąꞌʉ:
\p ―Nu ra Cornelio ra ngʉrpa dofʉi bá pɛncähe. Nu ra Cornelio nꞌda ra hocjąꞌi gue i numansu Oją. Nɛ gätho yʉ judío i ndømanho nangueꞌa. Nɛ nꞌda ram ꞌbɛhni mahɛ̨tsꞌi bi xiꞌa da zonhꞌnaꞌi, gue gui mba bʉ rá ngu, nɛ da tꞌømanho ꞌbɛꞌa gätho gui xifi, bi ꞌyɛ̨nꞌʉ.
\p
\v 23 Nu ra Pedro bi xifi da yʉrpʉ mbo ra ngu, bin oxpʉ bʉya. Nuꞌbʉ mi hyatsꞌi bi mbähä ra Pedro. Nɛꞌʉ ꞌda yʉ ꞌyɛ̨cꞌyɛi mí ꞌbʉpʉ Jope bi mbähä.
\p
\v 24 Manꞌda pa bʉya bi zøm bʉ ra hnini Cesarea. Nu ra Cornelio xí zohni gätho ꞌbʉpʉ ja rá ngu nɛ yʉ́ amigo, ngue dim pɛti bʉ ja rá ngu. Gätho i tømꞌbʉ.
\v 25 Nuꞌbʉ mí zøm bʉ ja ra goxthi ra Pedro, bá pøn ra Cornelio, bi dądi nɛ bin dąnyahmu bi dąnde. 
\v 26 Pɛ nu ra Pedro bi gʉꞌtsꞌi nɛ bi ꞌyɛ̨mbi:
\p ―Dami ndantsꞌi nguetho nugä dran ꞌyohʉ thohogä tengutho i, bi ꞌyɛ̨na.
\p
\v 27 Nɛ i yąui gätho án yʉtꞌa mbo rá ngu. Nɛ bi nu xʉn ngu xím pɛti bʉ. 
\v 28 Nu ra Pedro bi ꞌyɛ̨mpꞌʉ bʉya:
\p ―Guí pąhmbʉ hin ꞌyʉ man tꞌɛ̨dihe dyʉ judíohe gue dan uąnsꞌhʉ o gue ga cʉthe bʉ ja ni ngumhbʉ, nguetho hin gyʉ judío ahʉ. Pɛ Oją xʉ ꞌyurcagui gue xínga nꞌda yʉ jąꞌi ga ɛ̨mhbe hin da zä dan yąmanhohe, ogue ga ɛ̨mfe hingui ho.
\v 29 Janangueꞌa nuꞌbʉ gmí zoncagui, bá ɛ̨cä nɛ nte mán tꞌänni dá änni. Nuya dín nde ga pądi hanja gá zoncagui, bi ꞌyɛ̨nꞌa.
\p
\v 30 Nu ra Cornelio bi ꞌyɛ̨m bʉya:
\p ―Ná goho pa tengu ra ora jabʉya, dá ɛꞌtꞌ man tsꞌihmɛ ꞌbʉ mán yągäꞌbe Oją, ꞌbex bi zøꞌa nꞌda ran ꞌyohʉ ua dí ꞌbʉi, mí he ra pahni di fɛxni.
\v 31 Nɛ bi ꞌyɛ̨ngui: “Cornelio, Oją bi ꞌyøde ꞌbɛꞌa gám ma nɛ bi nu yʉn tꞌunni gá un yʉ hyoya, nɛ im bɛ̨nꞌaꞌi.
\v 32 Nuya guin zohna ra Simón Pedro ꞌbʉpʉ Jope bʉ ja rá ngu ra Simón ra hoca xindąni a, nɛ i ja rá ngu bʉ ndendeją. Nɛ nuꞌbʉ da zøcua gan yąui,” ɛ̨nꞌa ram ꞌbɛhni mahɛ̨tsꞌi ꞌbʉ min zoqui.
\v 33 Jananjabʉ dá zonhꞌna ꞌi nɛ xʉn ho guá ɛ̨hɛ. Nuya gäthogähe dí ꞌbʉhmbe ua ngue da nuje Oją, ga øhmbe ꞌbɛꞌa gätho da xije Oją, gue gui xije, ɛ̨nꞌa ra Cornelio.
\s Bi sih ran ho maꞌdaꞌyo a ra Cornelio
\p
\v 34 Nu ra Pedro bi ꞌyɛ̨mpꞌʉ:
\p ―Nugä dí pącä ya hingui huahna Oją toꞌo da numanho gueꞌbʉ ra judío o hing ra judío.
\v 35 Nu Oją da zini høntꞌa go ndaꞌa ní nde i yą, ngue toꞌo gätho da numansuꞌa, nɛ toꞌo i øtꞌ ran ho.
\v 36 Guí pąhmbʉ ram hma bá pɛncähe Oją dyʉ israelgähe, dyʉ judíogähe, bi ma nangue ra Jesucristo, gue nuꞌa di hocpa ní mbʉi nꞌda, guehna rá Hmu ʉ gätho høntꞌa go ꞌbɛꞌa ní nde i yą. 
\v 37 Nɛ guí pąhmbʉ ram hma nangue ra Jesucristo bi hmam bʉ gätho ra häi Judea, bí mbʉpʉ Galilea, gueꞌbʉ ya xí juah rá ꞌbɛfi ra Xuua Nxixyą gue bi ma di xixyąba yʉ jąꞌi.
\v 38 Nɛ guí pąhmbʉ Oją bi un rá tsꞌɛdi rá Hogandąhi Oją ra Jesús, ra mɛngu bʉ Nazaret. Nu ra Jesús hønbʉ go hapʉ bin ꞌyo mí øtꞌ ran ho, nɛ gätho ʉ mín ꞌyohʉ ra zįthu bi hyønba thi ra zįthu. Gätho bi ꞌyøtꞌʉ nguetho min ꞌyoui Oją.
\v 39 Nɛ nugähe ma ꞌbäigähe a ra Jesús, dí mamhbe majuąni, nguetho dá nuhe ꞌbɛꞌa gätho bi ꞌyøtꞌ ra Jesús nubʉ ma häihe dyʉ judíohe, nɛpʉ ma ngʉrpa hninihe Jerusalén. Nɛ mꞌbɛjua bi tho, bi guarpʉ ja ra pontꞌi.
\v 40 Pɛ Oją bi xoxꞌa ná hyupa, nɛ bi japi dá nugähe xʉn ho.
\v 41 Pɛ njom miꞌda bi nu, høngdähe gue xí huancähe Oją. Janangue dí mamhbe majuąni, gue ya majuąni dán sihmɛgähe ra Jesús ꞌbʉ mi ndantsꞌ ꞌbʉ mi du.
\v 42 Nɛ nuꞌa bi mbɛncähe gue ga xihmbe yʉ jąꞌi nɛ ga mamhbe, gue gueꞌa bi huahnꞌna Oją da ꞌyørpa ran juąnbi yʉ jąꞌi ꞌbʉi nɛꞌʉ xʉn du.
\v 43 Nɛ guehna mím manꞌʉ gätho yʉ́ pøngahyą Oją, gue gätho toꞌo da ꞌyɛ̨cꞌyɛi nangue ra Jesús,  da hyąn ra punbi nangue yʉ́ tsꞌoqui, bi ꞌyɛ̨nꞌa ra Pedro.
\s Nuꞌʉ hing yʉ judío bin tꞌun rá Hocandąhi Oją
\p
\v 44 Nɛ i yą ra Pedro, ꞌbex bá ɛ̨h rá Hogandąhi Oją, gätho bi gohmbʉ yʉ jąꞌi i øh rám hma ra Pedro.
\v 45 Nɛ nuꞌʉ yʉ judío min ꞌyohʉ ra Pedro madí hyonya thoho ꞌbʉ mí bądi bin tꞌun rá Hogandąhi Oją ʉ hing yʉ judío.
\v 46 Nguetho bi ꞌyøde bin yą ꞌda yʉ nde hing yʉ́ ndesɛ ʉ, gue bi ꞌyɛ̨spa Oją ꞌbʉ mí yą.
\v 47 Nɛ bi ꞌyɛ̨nꞌa ra Pedro, bi ꞌyänni:
\p ―Ha sä da mba ma hɛcpi ya ꞌbʉcua gue hin din xixyą, nɛ ya xʉ hyąn rá Hogandąhi Oją tengugahʉ, bi ꞌyɛ̨na.
\p
\v 48 Nɛ bi ma di xixyąbi nangue rá thuhu ra Jesucristo. Mꞌbɛjua bʉya bi ꞌyäp ra mate ra Pedro da gohmbʉ bʉ miꞌda yʉ pa.
\c 11
\s Nu ra Pedro i xih yʉ ꞌyɛ̨cꞌyɛi bʉ Jerusalén hague án zä bi ꞌyɛ̨cꞌyɛi ʉ hing yʉ judío
\p
\v 1 Nɛ nuꞌʉ miꞌda yʉ́ ꞌbäihʉ ra Cristo nɛ yʉ ꞌyɛ̨cꞌyɛi bʉ ra häi Judea mí øde gue yʉ jąꞌi hing yʉ judío bi hyąn rám hman Oją.
\v 2 Pɛ nuꞌbʉ mí mbeng bʉ Judea ra Pedro, nɛ bi zøm bʉ Jerusalén, nuꞌʉ ꞌda yʉ judío yʉ ꞌyɛ̨cꞌyɛi bʉ, bi zʉꞌa ra Pedro.
\v 3 Nuꞌʉ bi xiꞌa ra Pedro, bi ꞌyɛ̨mbi:
\p ―Hanja gá mba bʉ yʉ́ ngu yʉ jąꞌi ngue hing yʉ judío, nɛ gán sihmɛhʉ ʉ.
\p
\v 4 Nu ra Pedro bʉya bi xifi ꞌbɛꞌa gätho xín ja, gueꞌbʉ mí dʉꞌmi bi xi Oją gue da zøm bʉ rá ngu ra Cornelio. Bi ꞌyɛ̨na:
\p
\v 5 ―Mí ꞌbʉcä bʉ ra hnini Jope, nɛ mí yągäꞌbe Oją. Dá nugä tenguꞌbʉ dá ꞌuį, bá cąh mahɛ̨tsꞌi tengu nꞌda ra theꞌbøꞌtꞌe. Nɛ bá cąi mfɛntꞌi goho yʉ́ tsꞌątꞌi, nɛ bi zøpʉ dí ꞌbʉi.
\v 6 Nuꞌbʉ má handi dá nu høntꞌa go ꞌbɛꞌa má zuꞌuɛ̨ ꞌbʉcua ja ra häi. Dá nuꞌʉ ja goho yʉ́ gua, yʉ zuꞌuɛ̨ nɛ yʉ zate nɛ miꞌda. Nɛ dá nu yʉ pozʉ nɛ yʉ doja.
\v 7 Nɛ dá øꞌa nꞌda ra nde bi xiqui: “Pedro, dami ndantsꞌi gui hyo gue gui sa,” bi ꞌyɛ̨ngui.
\v 8 “Hinꞌna ma Hmu,” dá ɛ̨mbi, “nguetho njąmꞌbʉ dá sagä a man nin tꞌɛ̨di ngue hin ga sahe.”
\v 9 Pɛ nu ra nde mahɛ̨tsꞌi bi xiqui mahønꞌa: “Pɛ ꞌyo guí ɛ̨na hingui ho ꞌbɛꞌa dí sändä da tsꞌa, ngue gätho dá hocä yʉ,” bi ꞌyɛ̨ngä a ra nde.
\v 10 Nhyundį bi ꞌyøtꞌe njabʉ, bi mba ra ꞌbøꞌtꞌe bʉ mahɛ̨tsꞌi bʉya.
\v 11 Nɛ ꞌbexque gueꞌa ra pa bi zøpʉ hyu yʉn ꞌyohʉ bʉ ja ra goxthi guepʉ dám ꞌbʉcä, gue yʉm ꞌbɛhni bá nɛxpʉ Cesarea, nɛ bi hyongui.
\v 12 Nɛ nuꞌa rá Hogandąhi Oją bi xiqui ga tɛnni, nɛ nte mán tꞌänni ga änni. Nɛ ꞌbäcua ya ꞌdato yʉ ꞌyɛ̨cꞌyɛi ngue dá mbähmbe. Nɛ dá cʉthe bʉ ja rá ngu nꞌda ran ꞌyohʉ í Cornelio.
\v 13 Nɛ nuꞌa bi xije gue bi nu nꞌda rám ꞌbɛhni Oją mahɛ̨tsꞌi mí ꞌbäpʉ ja rá ngu, gue bi xifi da mbɛnpʉ ja ra hnini Jope ꞌda yʉn ꞌyohʉ, da ꞌyänni nanguecä.
\v 14 Nɛ bi xifi gue ga xifi hague dán zä dim pøhø, nɛꞌʉ ꞌbʉpʉ rá ngu.
\v 15 Nɛ nuꞌbʉ mí juaꞌa bi xic ra Cornelio, dá dʉꞌmi dá zocä bʉya. Nɛ nuꞌbʉ má dʉꞌmi dá mangä, nu rá Hogandąhi Oją bá ɛ̨hɛ nɛ bi gohmbʉ ʉ mí ꞌbʉpʉ bʉya, tengutho bi ꞌyørcahʉ rá mbʉdi thoho.
\v 16 Nɛ nubʉya dá bɛ̨ngä rám hma ra Hmu Jesús nuꞌbʉ mim ma: “Nu ra Xuua bi xixyą ahʉ ra dehe, pɛ nugä ga ꞌda ahʉ rá Hogandąhi Oją,” bi ꞌyɛ̨ngähe ra Jesús, bi ꞌyɛ̨nꞌa ra Pedro.
\p
\v 17 Nɛ xø bi ꞌyɛ̨na:
\p ―Nuꞌbʉ nꞌdatꞌa ran tꞌunni bi un Oją ʉ, tengutho bi ꞌdajʉ ꞌbʉ ya xtá ɛ̨cꞌyɛihʉ ra Hmu Jesucristo, ha da zä ga sɛrpä a in nde da ꞌyøtꞌ Oją, bi ꞌyɛ̨nꞌa ra Pedro.
\p
\v 18 Nuꞌbʉ mí ꞌyøꞌʉ yʉ ꞌyɛ̨cꞌyɛi ꞌbʉpʉ Jerusalén ꞌbɛꞌa bi man ra Pedro, him mam bi zʉi pɛ bi ꞌyɛ̨spa Oją, nɛ bi ꞌyɛ̨nꞌʉ:
\p ―A, njabʉ øt Oją ꞌbʉ, gue nɛꞌʉ yʉ jąꞌi hing yʉ judío di japi di päh yʉ́n ꞌyomfɛ̨ni nangue yʉ́ tsꞌoqui, ngue nɛꞌʉ din ja ra temaząi ʉ, bi ꞌyɛ̨nꞌʉ.
\s Nu yʉ ꞌyɛ̨cꞌyɛi dim pɛti bʉ Antioquía
\p
\v 19 Nuꞌʉ ꞌda yʉ ꞌyɛ̨cꞌyɛi ngue bi nu ran ʉnbi bʉ Jerusalén ꞌbʉ mí mba ntho ra Esteban, bin ꞌuɛ̨xtꞌʉ. Nuꞌʉ ꞌda bi mba bʉ nꞌdanni yʉ häi Fenicia nɛpʉ Chipre nɛpʉ ja ra hnini Antioquía. Bi man rán ho maꞌdaꞌyo ra Cristo bʉ bim ꞌbʉi, pɛ høntꞌʉ yʉ́ mijudíohʉ bi xifi.
\v 20 Pɛ nuꞌbʉ mí zøm bʉ Antioquía ꞌda yʉ mɛngu bʉ Chipre nɛpʉ Cirene, bi zoꞌʉ hing yʉ judío, gue nɛꞌʉ bi xifi nangue ra Hmu Jesús.
\v 21 Nuꞌʉ mí ja ra tsꞌɛdi xʉn ho nangue Oją ʉ, janangueꞌa xʉn ngu yʉ jąꞌi hing yʉ judío bi ꞌyɛ̨cꞌyɛi, bi hyɛsɛ yʉ́ tꞌɛ̨cꞌyɛi, nɛ bi dɛnꞌna ra Hmu.
\p
\v 22 Nɛ bi ꞌyøꞌʉ yʉ ꞌyɛ̨cꞌyɛi ꞌbʉpʉ Jerusalén gue bi ꞌyɛ̨cꞌyɛi ʉ ꞌda hing yʉ judío bʉ Antioquía. Janangueꞌa bi mbɛnpʉ a ra Bernabé.
\v 23 Nɛ nuꞌbʉ mí zøm bʉ, bi nu ngue i nu rá mate Oją yʉ jąꞌi i ꞌbʉpʉ. Bin johya rá mbʉi ra Bernabé bʉya, nɛ bi zofo, bi xifi hin da hyɛgui, pɛ din ꞌyomanho bʉ ja rá ꞌyu Oją, nɛ da ꞌyørpa rá ꞌbɛfi Oją ngue gätho yʉ́ mbʉi.
\v 24 Nuna ra Bernabé nꞌda ra hocjąꞌi na, nɛ mí hą rá tsꞌɛdi xʉn ho rá mbʉi nangue rá Hogandąhi Oją in ꞌyoui, nɛ mí ɛ̨cꞌyɛi xʉn ho. Janangueꞌa xʉn ngu miꞌda yʉ jąꞌi bi ꞌyɛ̨cꞌyɛi ra Hmu.
\p
\v 25 Nubʉya, bá pøm bʉ ra Bernabé, bi mba bʉ Tarso bi hyom bʉ ra Saulo. Nɛ nuꞌbʉ mi dįni, bi zixpʉ Antioquía.
\v 26 Nɛ nꞌdajɛya bám ꞌbʉhmi bʉ, nɛ mi pa bʉ ja ram pɛti nɛ bi xänbi xʉn ngu yʉ jąꞌi. Guepʉ ra mbʉdi bi tꞌɛ̨mbi yʉ cristiano ʉ yʉ ꞌyɛ̨cꞌyɛi, gue mí nde da ma, i tɛn ra Cristo ʉ.
\p
\v 27 Nuꞌʉ yʉ pa ʉ, bá nɛxpʉ Jerusalén ꞌda yʉ pøngahyą, bi mba bʉ Antioquía.
\v 28 Nuꞌa nꞌda í Agabo, bi ndantsꞌi bim ꞌbäpʉ madím pɛti yʉ ꞌyɛ̨cꞌyɛi, nɛ bi ma con rá tsꞌɛdi rá Hogandąhi Oją. Bi ma gue din ja ra thuhu gätho ra ximhäi. Nɛ nuna bin ja ꞌbʉ mim hmutsꞌʉtꞌabi bʉ Roma a ra Claudio.
\v 29 Nɛ nuꞌbʉ mín ja ra thuhu, nuꞌʉ yʉ ꞌyɛ̨cꞌyɛi bʉ Antioquía bi zänni hangu na ngu tsꞌʉ ra mbɛti da bądi nꞌda ngu nꞌda, gue da ꞌbɛnpa ʉ yʉ́ mi ꞌyɛ̨cꞌyɛihʉ ꞌbʉpʉ ra häi Judea, ngue da mbäxꞌi tsꞌʉ.
\v 30 Nɛ ngubʉ bi ꞌyøtꞌe, bi mbɛnpa ra mbɛti ʉ yʉ́ ngʉrpi yʉ ꞌyɛ̨cꞌyɛi bʉ Judea, bi hyąxꞌa ra Bernabé nɛ ra Saulo.
\c 12
\s Bi tho ra Jacobo nɛ bi mba mfɛntꞌi ra Pedro
\p
\v 1 Nuꞌʉ yʉ pa ʉ, nu ra tsꞌʉtꞌabi Herodes bi manda da mba mfɛntꞌi yʉ ꞌyɛ̨cꞌyɛi, bi dʉꞌmi di ʉnba ʉ.
\v 2 Nɛ bi manda ngue bi tho ra Jacobo rán ꞌyohʉ ra Xuua, ra juai í tho a.
\v 3 Nuꞌbʉ mi bąh ra Herodes gue i numanho yʉ judío hing yʉ ꞌyɛ̨cꞌyɛi gue bi hyo ra Jacobo, bi bɛntꞌa ra Pedro, nɛ bin thɛui nꞌda ra dąmpɛti mí sänba Oją ʉ yʉ israel, tꞌɛ̨mbi dąbaxjua.
\v 4 Janangueꞌa him ꞌbex bi tho ra Pedro, pɛ bi jotꞌa fädi. Nɛ bi manda ꞌdɛꞌma ꞌdato yʉ́ dofʉi ra Herodes di jamansu ra goxthi, ꞌdaꞌi goho nꞌda cʉtꞌi. Mím bɛ̨nꞌa ra Herodes xtán zixpʉ ꞌbʉh yʉ jąꞌi, mí ɛ̨na xtá hyo bʉ ꞌbʉ mí guaꞌa ram pɛti ran dąbaxjua.
\v 5 Nu ra Pedro guextaꞌa mí pa mꞌbädi xʉn ho bʉ ja ra fädi, pɛ nu yʉ́ mi ꞌyɛ̨cꞌyɛihʉ bim pɛti, nɛ ɛ̨mmɛ bin yąhʉ Oją nangue ra Pedro.
\s Oją bi gʉcꞌa ra Pedro nuꞌbʉ mí ofädi
\p
\v 6 Nu ra xui a gue mi ɛ̨nꞌa ra Herodes xtán gʉc ꞌbʉ mí hyatsꞌi, nu ra Pedro mi cätꞌinde yoho yʉ dofʉi, nɛ nuꞌa, nthuꞌtꞌi yoho yʉ cadena, nɛ bin ąha. Nɛ xø mí ꞌbäpʉ miꞌda yʉ dofʉi bʉ ja rá goxthi ra fädi. 
\v 7 Nꞌdahmantho bi zøpʉ ꞌbʉh ra Pedro nꞌda rám ꞌbɛhni ra Hmu mahɛ̨tsꞌi. Nɛ bi nɛcpʉ mbo ra fädi. Nu ram ꞌbɛhni bi ꞌyąnba rá hyo ra Pedro, bi ꞌyäꞌa, nɛ bi ꞌyɛ̨mbi:
\p ―Ndantsꞌa nꞌdihi, bi ꞌyɛ̨mbi.
\p Nu yʉ cadena bi xosɛ gueꞌa mán thuꞌtꞌi rá ꞌyɛ.
\v 8 Nɛ nu ram ꞌbɛhni bi ꞌyɛ̨mpꞌa mahønꞌa:
\p ―Dami tʉꞌtꞌ ni ngʉꞌtꞌi nɛ gui ꞌyʉꞌtꞌ ni thįxfani.
\p Nu ra Pedro bi ꞌyøtꞌe tengu bi siꞌa. Nɛ xø bi ꞌyɛ̨mbi:
\p ―Hye ni dąpahni nɛ gui tɛngui.
\p
\v 9 Nu ra Pedro bi dɛnꞌna ram ꞌbɛhni, bi bøm bʉya. Pɛ him mí pą ꞌbʉ majuąni gueꞌa rám ꞌbɛhni Oją bi zitsꞌi, uague tenguꞌbʉ bi ꞌuįtho.
\v 10 Nɛ nuꞌbʉ mi thopʉ bí ꞌbäh rá mbʉdi yʉ mbädi, nɛ bi thopʉ ná yoho ꞌbäh yʉ mbädi, bi zøm bʉ bí ja ra jutꞌitꞌɛgui bʉ ja ra ꞌyu ní mba bʉ hnini. Bi xosɛ ra jutꞌi nɛ bi bøm bʉya. Nɛ nuꞌbʉ min ꞌyo bʉ ꞌyu, bi ꞌueꞌa rám ꞌbɛhni Oją, bi tsꞌoꞌa ra Pedro bʉya.
\v 11 Nuꞌa ra Pedro, nuꞌbʉ mi bądi ꞌbɛꞌa gätho bin ja, ngue majuąni nɛ hing ra tꞌį, bi ꞌyɛ̨nsɛ:
\p ―Dí pąsɛgä ya gue ra Hmu mahɛ̨tsꞌi bá pɛhna nꞌda rám ꞌbɛhni, nɛ bá jʉgä bʉ ja rá tsꞌɛdi ra tsꞌʉtꞌabi Herodes, nɛ bi yąngä nangue ꞌbɛꞌa nde xtá ꞌyørcä ma mijudíohe, biꞌ yɛ̨nsɛ ra Pedro.
\p
\v 12 Nɛ nuꞌbʉ mín ꞌyomfɛ̨ni tsꞌʉ, bi mba bʉ ja rá ngu ra María, rá mbe ra Xuua Marcos, nɛ xʉn ngu madím pɛti bʉ, i yąhʉ Oją nangue ra Pedro.
\v 13 Nɛ nuꞌbʉ madí jät ra jutꞌi bʉ thi ja ra mbäꞌtꞌi, bi mba bʉ nꞌda ra hmute, ra ꞌyɛ̨hɛ, í Rode, gue da bądi toꞌo i ꞌbäpʉ.
\v 14 Nɛ nuꞌbʉ mí ꞌyørpa rá nde ra Pedro, bi bądi toꞌo, nɛ ɛ̨mmɛ madí johya. Pɛ him ꞌbex bi xocuabi nguetho in nde mꞌbɛtꞌo bi xiꞌa nꞌdihi yʉ jąꞌi ꞌbʉpʉ, gue ꞌbäpʉ ra Pedro bʉ ja ra goxthi.
\v 15 Nu yʉ jąꞌi bi ꞌyɛ̨mbi:
\p ―Guí häte.
\p Pɛ nuꞌa ra hmute guextaꞌa mi ma gue gueꞌa ra Pedro. Nɛ nuꞌʉ bi ma:
\p ―Gueꞌa rán dąhi a.
\p
\v 16 Pɛ nu ra Pedro bi thoc thoho di jät ra jutꞌi, nɛ nuꞌbʉ mi xocpi nɛ bi nu gue gueꞌa ra Pedro, bi hyonya thoho ʉ.
\v 17 Pɛ nuꞌa ra Pedro bi uąnba rá ꞌyɛ, ndepe din hɛ̨. Nɛ bi xifi ha án zä bi gʉcpʉ ja ra fädi ra Hmu. Nɛ bi ꞌyɛ̨mpꞌʉ yʉ jąꞌi:
\p ―Dami xihmbʉ a manꞌda ra Jacobo, gue ra Santiago a, nɛꞌʉ miꞌda yʉ ꞌyɛ̨cꞌyɛi ꞌbɛꞌa bin ja, bi ꞌyɛ̨na.
\p Nɛ bi bønꞌa ra Pedro bi mba nꞌdanni.
\p
\v 18 Nuꞌbʉ mi hyatsꞌi, ɛ̨mmɛ bin ja ran cui, gueꞌda xnin ꞌyänthoho yʉ dofʉi, nguetho him bi bądi ꞌbɛꞌa bin ja ra Pedro. 
\v 19 Nɛ nu ra Herodes bi manda dí honi pɛ him bá thįni. Nɛ nubʉya bi ꞌyänꞌdʉ yʉ mbängoxthi hague bin ja, nɛ bi manda ngue da thoꞌʉ bʉya. Mꞌbɛjua bi bønꞌa ra Herodes ra häi Judea, bi mba bʉ ja ra hnini Cesarea, nɛ bám ꞌbʉpʉ.
\s Bi du a ra Herodes
\p
\v 20 Nɛ nu ra Herodes ɛ̨mmɛ mí numanꞌʉ yʉ jąꞌi ꞌbʉpʉ ra hnini Tiro nɛpʉ Sidón. Pɛ nu yʉ  jąꞌi  bim pɛti, pɛ mꞌbɛtꞌo bin amigohʉ ra Blasto, rám fätsꞌiui ra tsꞌʉtꞌabi Herodes. Nɛ bi sih ra Blasto din hocpahʉ a ra Herodes, nguetho jatho dí nɛxpʉ ꞌbɛꞌa da zi yʉ jąꞌi bʉ bí ja rá häi ra Herodes. 
\v 21 Janangueꞌa bi zän manꞌda ra pa bʉya, nu yʉ jąꞌi bim pɛti. Nu ra Herodes bi hye rá pahni ɛ̨mmɛ xʉn ho, nɛ bi hyupʉ ja rá mɛxa, nɛ bin høtꞌahyą.
\v 22 Nɛ ɛ̨mmɛ bi mbahni yʉ jąꞌi nɛ bi ꞌyɛ̨nꞌʉ:
\p ―Hing rá nde nꞌda ran ꞌyohʉ bʉ na yą nʉ, pɛgue rá nde nꞌda ra oją, sä ɛ̨nꞌʉ.
\p
\v 23 ꞌDahmantho nꞌda rám ꞌbɛhni Oją mahɛ̨tsꞌi bi japi ꞌbex bin zämanꞌʉ ra Herodes, nguetho him bi ma ngue hinga gueꞌa Oją a, him bi ꞌyɛ̨spa Oją. ꞌBex bi nɛqui yʉ zuꞌuɛ̨ mbo rá foho, bi du bʉya.
\p
\v 24 Pɛ nu rám Hman Oją bi thoqui bi hma, gätho bʉ nꞌdanni bi ꞌyøh rám Hman Oją yʉ jąꞌi.
\p
\v 25 Nu ra Bernabé nɛ ra Saulo, nuꞌbʉ mi guah yʉ́ ꞌbɛfi, gue bi sifi da hyąx ra mbɛti bʉ Jerusalén, bá peng bʉya, bán ꞌyohʉ ra Xuua Marcos, bi zøpʉ Antioquía mahønꞌa. 
\c 13
\s Nu ra Bernabé nɛ ra Saulo bi dʉmpꞌ yʉ ꞌbɛfi ngue bi mamp rám hman Oją bʉ nꞌdanni yʉ häi
\p
\v 1 Nubʉ ra hnini Antioquía mi ꞌbʉpʉ yʉ ꞌyɛ̨cꞌyɛi ngue nząi dim pɛti. ꞌDaꞌʉ yʉ  pøngahyą, nɛ ꞌdaꞌʉ  yʉ xänbate. Mí ꞌbʉpʉ ra Bernabé, nɛ Simón tꞌɛ̨mbi Negro, nɛ ra Lucio ra mɛngu bʉ Cirene. Nɛ mí ꞌbʉpʉ ra Manaén, nuꞌa ꞌdarpʉ bi mba ma tedeui ra Herodes rá tsꞌʉtꞌabi ra häi Galilea, nɛ mí ꞌbʉpʉ ra Saulo.
\v 2 Nꞌda ra pa nuꞌbʉ mí ꞌyøtꞌ ram pɛti ʉ, nɛ mí ɛꞌtꞌ yʉ́n tsꞌihmɛ, nɛ nuꞌa rá Hogandąhi Oją bi ꞌyɛ̨mpꞌʉ:
\p ―Dami ꞌuejʉ ya yoho yʉn ꞌyohʉ, ra Bernabé nɛ ra Saulo, nguetho xtá huanhdä ʉ da ꞌyøtꞌ ra ꞌbɛfi dá xifi, bi ꞌyɛ̨mbi.
\p
\v 3 Nuꞌbʉ mí ꞌyɛꞌtꞌ yʉ́n tsꞌihmɛ mahønꞌa, bi ꞌyäp rám fätsꞌi Oją ꞌbʉ mí dospa rá yą ra Bernabé nɛ ra Saulo.
\p Bin ꞌyɛ̨hmbʉ bʉya:
\p ―Oją da zix ahʉ, bi ꞌyɛ̨mbi.
\s Nuꞌʉ bi ꞌbɛhni bi mam bʉ rám Hman Oją bʉ Chipre
\p
\v 4 Nubʉya nu rá Hogandąhi Oją bi zixꞌa ra Bernabé nɛ ra Saulo, bi mba bʉ ra hnini Seleucia. Nuꞌbʉ mí nɛxpʉ, bi hyu ra barco, bi mba bʉ ra häi Chipre, ra tꞌʉhäi i ja bʉ made ra deją.
\v 5 Nɛ nuꞌbʉ mi zøm bʉ ra hnini Salamina, bi mam bʉ rám Hman Oją bʉ ja yʉ́ niją yʉ judío. Nɛ ra Xuua Marcos mín ꞌyohʉ nɛ bim fäxpʉ.
\v 6 Nuꞌbʉ mi thopʉ gätho ra häi Chipre, bi zøm bʉ ja yʉ́ hyodi ra hnini Pafos. Nɛ bin tįmhbʉ nꞌda ra judío gue ra bądi, ɛ̨na rá pøngahyą Oją pɛgue ra hyäte a, nu rá thuhu í Barjesús.
\v 7 Nuꞌa mín ꞌyoui bʉ ja rá ꞌbɛfi ra Sergio Paulo, rá tsꞌʉtꞌabi ra häi bʉ. Nuꞌa ra Sergio Paulo nꞌda ran ꞌyohʉ ɛ̨mmɛ mí ja rán ꞌyomfɛ̨ni xʉn ho. Nuꞌa bi zohna ra Bernabé nɛ ra Saulo nguetho nde da ꞌyøh rám Hman Oją.
\v 8 Pɛ nu ra bądi Barjesús, nꞌdatꞌa ra Elimas, bi ꞌyʉꞌtꞌa ra tsꞌʉtꞌabi, nguetho hingui ndepe da ꞌyɛ̨cꞌyɛi a i sifi, nɛ bin junthʉ a ra Bernabé nɛ ra Saulo.
\v 9 Nu ra Saulo, nꞌdatꞌa ra Pablo a, nꞌyoui xʉn ngu ra tsꞌɛdi nangue rá Hogandąhi Oją a, ɛ̨mmɛ bi hyɛ̨tꞌa ran ꞌyohʉ ngue ra bądi.
\v 10 Nɛ bi ꞌyɛ̨mpꞌa:
\p ―Nuꞌi gra ndøhyäte ɛ̨mmɛ guín ꞌyoui gätho ꞌbɛꞌa xʉn tsꞌo. Nuꞌi gra tsꞌʉntꞌʉ i ra dąmantsꞌo. Nuꞌi gadí ʉcua ꞌʉ gätho xʉn ho. Ha njąmꞌbʉ gui ꞌyɛꞌtsꞌa gní xih yʉ jąꞌi hingui ho ꞌbʉ da dɛn Oją.
\v 11 Nuya da ꞌyøtꞌaꞌi ran ʉnbi ra Hmu mahɛ̨tsꞌi. Gan xädä gue hin da zä gui nu ran nɛqui ꞌda yʉ pa, bi ꞌyɛ̨mpꞌa ra Pablo.
\p ꞌBex bin xädä, bi gą ꞌbɛxui rá dä, nɛ bi hyoni toꞌo da gʉrpa rá ꞌyɛꞌa bʉya.
\v 12 Nuꞌbʉ mí nuꞌa ra tsꞌʉtꞌabi ꞌbɛꞌa bin ja, bi hyonya thoho, ꞌbex bi ꞌyɛ̨cꞌyɛi bʉya, nguetho ya bi bądi majuąni a rán xädi ra Hmu mahɛ̨tsꞌi ngue mím manꞌa ra Pablo.
\s Ra Pablo nɛ ra Bernabé nubʉ ra hnini Antioquía, gue ra häi Pisidia
\p
\v 13 Nu ra Pablo nɛꞌʉ mín ꞌyohʉ bi hyu ra barco, bi nɛxpʉ Pafos nɛ bi zøm bʉ Perge bʉ ja ra häi Panfilia. Pɛ nu ra Xuua Marcos bá ɛ̨ꞌa, bá sotho ʉ mín ꞌyohʉ, nɛ bá peng mahønꞌa bʉ Jerusalén.
\v 14 Nu ra Pablo nɛꞌa ra Bernabé mín ꞌyoui, bi nɛxpʉ Perge bi mba bʉ manꞌda ra hnini Antioquía bʉ ra häi Pisidia. Nɛ nuꞌbʉ mi zøn ra pa ran säya, bi yʉrpʉ ja rá niją yʉ judío nɛ bi hyupʉ ʉ.
\v 15 Nuꞌbʉ mi guaꞌa manꞌʉ ꞌbʉpʉ, ngue rá søcuą yʉ́n tꞌɛ̨di yʉ judío nɛ rá søcuą yʉ pøngahyą, nuꞌʉ di jamansu bʉ ja ra niją bi xiꞌa ra Pablo nɛ ra Bernabé:
\p ―Nꞌyohʉ aui, nuꞌbʉ ja aui tsꞌʉ nꞌda ran zofo, dami xije tsꞌʉ.
\p
\v 16 Bi ndantsꞌa ra Pablo bʉya, bim ꞌbäi, bi uąn rá ꞌyɛ ngue ndepe da ꞌyøh yʉ jąꞌi, nɛ bi ꞌyɛ̨mbi:
\p ―Nꞌyohʉ ahʉ ma miꞌisraelhʉ, nɛ gätho ahʉ guín numansuhʉ Oją, dami ꞌyøhmbʉ ya.
\v 17 Nuꞌa Oją gue dí tɛnhdʉ dyʉ israelhʉ, bi huanꞌdʉ mam bombøtahʉ nɛ bi japi bin xąndi xʉn ngu nuꞌbʉ mí ꞌbʉpʉ ra häi Egipto, nɛ mí ꞌbʉpʉ tengu yʉ nꞌdanꞌyo jąꞌi. Nɛ nu Oją bʉya bá jʉcꞌʉ nangue rá tsꞌɛdi bʉ mi ꞌbʉi.
\v 18 Nɛ madagueꞌa him madí däp Oją yʉ́ mbʉi ʉ ꞌbʉ min ꞌyo mbɛ nyote njɛya bʉ maꞌueni ʉ, pɛ guehma bin ja rá yembʉi Oją.
\v 19 Nɛ bi unꞌna ra häi Canaán ʉ ma miꞌisraelhʉ gue di manda zɛhɛ, ꞌbʉ mí juaꞌa bi hyoꞌʉ yoto yʉ nde xmí ꞌbʉpʉ. Nɛ bin ząm bʉ ma miꞌisraelhʉ bʉya.
\v 20 Nu Oją bʉya bi japi bim ꞌbʉh yʉ́ zɛꞌmi, nɛ goho ciɛnto nɛ yote maꞌdɛtꞌa njɛya madí manda ma miꞌisraelhʉ, asta gueꞌbʉ go mím ꞌbʉh ra pøngahyą Samuel.
\v 21 Mꞌbɛjua bi ndesɛ yʉ jąꞌi nꞌda ra hmutsꞌʉtꞌabi di manda ʉ. Nɛ bi jap Oją a ra Saúl dim hmutsꞌʉtꞌabi bʉya. Nu ra Saúl, rá ta a ra Cis, gue rám bombøta ra Benjamín mí ꞌbʉh mayaꞌbʉ. Nɛ nuꞌa ra Saúl bim hmutsꞌʉtꞌabi yote njɛya.
\v 22 Nuꞌbʉ mi ꞌuec Oją ra Saúl bʉya, bi japi bim hmutsꞌʉtꞌabi ra David. Nɛ mi man Oją, bi ꞌyɛ̨na: “Nuna ra David, rá tsꞌʉntꞌʉ a ra Isaí, ɛ̨mmɛ dín numanho, nguetho da ꞌyørca a ma pähä nɛ ꞌbɛꞌa gätho dín nde,” bi ꞌyɛ̨n Oją, bi ꞌyɛ̨nꞌa ra Pablo ꞌbʉ mín zoꞌʉ yʉ́ mijudíohʉ bʉ ra hnini Antioquía, ra häi Pisidia.
\p
\v 23 Nɛ bi thoqui bi man ra Pablo, bi ꞌyɛ̨na:
\p ―Nɛ gueꞌa ra David rám bomꞌbɛto na ra Jesús gue bá pɛncahʉ Oją, ma pørpatehʉ dyʉ israelhʉ, dyʉ judíohʉ, tengu mí man Oją mayaꞌbʉ.
\v 24 Ya ma guepʉ di dʉmpꞌrá ꞌbɛfi ra Jesús, nu ra Xuua mí xih ma miꞌisraelhʉ gue din xixyą toꞌo gätho bi päh yʉ́ mbʉi nangue yʉ́ tsꞌoqui.
\v 25 Nuꞌbʉ mi tsꞌʉtho da du a ra Xuua, nuꞌa mí mam buya: “Nuꞌa gá bɛ̨mhbʉ gue guecä pɛ hinga guecä. Pɛ mꞌbɛjua ba ɛ̨hɛ, nɛ hin dí sʉcä tengu a, nguetho ɛ̨mmɛ xʉn hɛ̨tsꞌi rá tsꞌɛdi a,” mí ɛ̨nꞌa ra Xuua, bi ꞌyɛ̨nꞌa ra Pablo.
\p
\v 26 Nɛ bi thoqui bi man ra Pablo, bi ꞌyɛ̨na:
\p ―Man ꞌyohʉ ahʉ, yʉ́m bomꞌbɛtojʉ ra Abraham, nɛ miꞌda ahʉ gue nɛꞌahʉ guí numansuhʉ Oją, guejʉ bá pɛncahʉ na rám hma Oją, nɛ i ma hague dán zä di pøjʉ. 
\v 27 Pɛ nu ma mɛnguhʉ mí ꞌbʉpʉ Jerusalén, nɛ yʉ́ ngʉrpi ʉ, him mi pądi gue gueꞌa ra Jesús mí oꞌtꞌ yʉ pøngahyą, madagueꞌbʉ i hmam bʉ ja ma nijąhʉ gätho yʉ́ pa ran säya. Janangueꞌa bi ꞌyørpa ra Jesús tengu mán tꞌoꞌtꞌi ꞌbʉ mí yąpi gue da hyo.
\v 28 Nu ra Jesús nte min dupate, pɛ bi siꞌa ra Pilato gue di manda da tho.
\v 29 Nɛ nuꞌbʉ mí ꞌyørpe ꞌbɛꞌa gätho mán tꞌoꞌtꞌi bʉ ja rám hman Oją, nɛ mꞌbɛjua bʉya bi mba ma cąꞌmi bʉ ja ra pontꞌi, nɛ bi tꞌägui.
\v 30 Pɛ nu Oją mꞌbɛjua tsꞌʉ bi xoxpʉ ꞌbʉꞌʉ xʉn du.
\v 31 Nɛ nu yʉn ꞌyohʉ mín ꞌyohʉ mamꞌbɛtꞌo a ra Jesús ꞌbʉ mí nɛxpʉ ra häi Galilea, nɛ bi mba bʉ ra dąhnini Jerusalén, nɛ guetꞌʉ i xih yʉ jąꞌi ʉ ya.
\p
\v 32 Nɛcäꞌbe dí xi ahʉ ya nangue ra Jesús, ran ho maꞌdaꞌyo gueꞌa mí xi Oją ʉ ma bøtahʉ ꞌbʉ mí ma gue ꞌbɛꞌa majuąni din ja.
\v 33 Nɛ gueꞌa bin ja a ya. Gue bi jącuahʉ ꞌbʉ mí xoxꞌa ra Jesús, gue guejʉ dyʉm bomꞌbɛtojʉ ʉ bi xi Oją majuąni. Tengu mán tꞌoꞌtꞌi bʉ ja rám Hman Oją, ná yoho ra Salmo, i ɛ̨na: “Nuya nam pa ya, dí ɛ̨ꞌtsꞌiꞌi, da nuꞌʉ yʉ jąꞌi ya gue majuąni ma Tsꞌʉntꞌʉ i,” mí ɛ̨n Oją ꞌbʉ mi ꞌyɛ̨na, bi ꞌyɛ̨nꞌa ra Pablo.
\p
\v 34 Nɛ xø bi ꞌyɛ̨nꞌa ra Pablo:
\p ―Nɛ bi xox Oją a ra Jesús ꞌbʉ mí du, nɛ hin da du mahønꞌa. Nɛ gueꞌa bi man Oją, ꞌbʉ mi ꞌyɛ̨na: “ꞌDatꞌa ra hoganjąpi ga ꞌdaꞌi tengu dá xih majuąni ra David,” bi ꞌyɛ̨n Oją, bi ꞌyɛ̨nꞌa ra Pablo.
\p
\v 35 Nɛ xø bi ꞌyɛ̨na:
\p ―Nɛ gueꞌa bi mam bʉ manꞌda ra Salmo gue bi ꞌyoꞌtꞌa ra David, bi xi Oją: “Hin gui japꞌa ni Hoga Tsꞌʉntꞌʉ da ꞌya a rá ngøcꞌyɛi,” bi ꞌyɛ̨mbi.
\v 36 Pɛ nu ra David nuꞌbʉ mí juaꞌa rá ꞌbɛfi ngue bi ꞌyørpa rá pähä Oją gätho mí ꞌbʉcua ja ra häi, bi du. Nɛ ꞌdarpʉ yʉ́n ꞌyägui yʉ́ bøta bi tꞌägui, nɛ bi ꞌya bʉ rá ngøcꞌyɛi a bʉya.
\v 37 Pɛ nuꞌa rá ngøcꞌyɛi ra Jesús, bi xox Oją a, him bi ꞌya a. 
\v 38 Ma cu ahʉ, dín nde ahʉ gui pąhmbʉ, nangue ra Jesús i jajʉ ra punbi nangue ma tsꞌoquihʉ, nɛ gueꞌa dí xi ahʉ a ya.
\v 39 Høntꞌa go toꞌo gahʉ ga däp ma mbʉihʉ a ra Jesús, din jajʉ ra punbi gätho ma tsꞌoquihʉ. Nɛ madagueꞌa dí øthʉ yʉ́n tꞌɛ̨di ra Moisés bi xi Oją, pɛ hinga gueꞌʉ dí punga ma tsꞌoquihʉ ʉ.
\v 40 Dami ꞌyɛ̨cꞌyɛihʉ ra Cristo ya, janangueꞌa hin gui nuhʉ ꞌbɛꞌa bi man yʉ pøngahyą bʉ ja rám Hman Oją, nuꞌbʉ mí ma:
\q 
\v 41 Damin ꞌyomfɛ̨nihʉ tsꞌʉ a gnán thennate thohʉ, 
\q nguetho dí øtꞌä nꞌda ra ꞌbɛfi nuįxte yʉ pa jabʉya guí ꞌbʉhmbʉ.
\q Pɛ nuꞌbʉ hin gui ꞌyɛ̨cꞌyɛihʉ ꞌbʉ ꞌboꞌo i xi ahʉ, gui hyonya thohohʉ ꞌbʉ bi mba ma ʉnꞌni ahʉ, nɛ gui tuhʉ bʉya.
\m Gueꞌa mí man yʉ pøngahyą ꞌbʉ mí ꞌyɛ̨n Oją, bi ꞌyɛ̨nꞌa ra Pablo.
\p
\v 42 Nɛ nuꞌbʉ mí bøm bʉ ja ra niją ra Pablo nɛꞌa mín ꞌyoui, nɛ nuꞌʉ ꞌda gue madim pɛti bʉ bi ꞌyäp ra mate gue da xih mahønꞌa ꞌbʉ ni yoto ʉ, tengu xí xih ya.
\v 43 Nɛ nuꞌbʉ mí guaꞌa ram pɛti bʉ ja ra niją, xʉn ngu yʉ́ mijudíohʉ nɛꞌʉ i ɛ̨cꞌyɛi tengu yʉ judío, bi dɛnꞌna ra Pablo nɛ ra Bernabé. Nu ra Pablo nɛ ra Bernabé bi xifi ngue di thoqui da ꞌyɛ̨cꞌyɛi ra Jesús, gue dí ꞌdajʉ rá mate Oją a.
\p
\v 44 Janangueꞌa nuꞌbʉ mí zønꞌa hyąto pa bʉya, ngue ra pa ran säya, mbɛ gätho na ngu yʉ jąꞌi ꞌbʉpʉ ja ra hnini bim pɛti bʉ, ngue da ꞌyøh rám Hman Oją mahønꞌa.
\v 45 Pɛ nuꞌbʉ mi nuꞌʉ yʉ judío ngue ní mba bʉ ja yʉ́ niją gätho yʉ jąꞌi, nɛ bin sɛya ʉ bʉya. Nɛ bin junthʉ ra Pablo nɛ mí ɛ̨nꞌʉ him majuąni a bi ma, nɛ bi cꞌąmanꞌʉ a.
\v 46 Nu ra Pablo nɛ ra Bernabé bi hyutꞌran zambʉi nɛ ntsꞌɛdi bi ma:
\p ―Bi zän Oją mꞌbɛtꞌo thoho bi sijʉ rám Hman Oją dyʉ judíohʉ, nɛ hin gá hyąmhbʉ. Janangueꞌa hin nin sähʉ gui hyąmhbʉ ra temaząi. Pɛ ga mbähmbe ga xihmbe yʉ jąꞌi hing yʉ judío ya.
\v 47 Nguetho ra Hmu mahɛ̨tsꞌi bi mbɛncähe nɛ mi ma:
\q Ya dá pɛnhꞌnahʉ gui xihmbʉ yʉ jąꞌi hing yʉ judío, din ja ran nɛqui yʉ́ mbʉi.
\q Nɛ gätho ra ximhäi gui mamhbʉ hague dán zä ga yąnba yʉ́ te yʉ jąꞌi,
\m nɛ gueꞌa bi xije ra Hmu a, bi ꞌyɛ̨nꞌa ra Pablo.
\p
\v 48 Nɛ nuꞌbʉ mí ꞌyøh yʉ jąꞌi ngue hing yʉ judío ꞌbɛꞌa bi man ra Pablo, bin johya yʉ́ mbʉi, nɛ bi ꞌyɛ̨na:
\p ―Xʉn ho rám Hman Oją, bi ꞌyɛ̨nꞌʉ.
\p Nɛ bi ꞌyɛ̨cꞌyɛi toꞌo gätho mán thahni gue din tꞌunꞌna ra temaząi.
\v 49 Nɛ nu rám Hman Oją, ya gätho bʉ ja ra häi Pisidia bi hma.
\v 50 Pɛ nuꞌʉ ꞌda yʉ judío bi parpa ʉ ꞌda yʉ xisu, gueꞌʉ ꞌda mí søm bʉ ja yʉ́ niją nɛ mí pa ntꞌɛ̨spi bʉ ja ra hnini, nɛꞌʉ miꞌda yʉn ꞌyohʉ gue yʉ ngʉrpi bʉ ja ra hnini. Nɛ nuꞌʉ bi ʉcpa ra Pablo nɛ ra Bernabé bʉya, nɛ bi xifi da bøm bʉ ja yʉ́ häi.
\v 51 Janangueꞌa nu ra Pablo nɛ ra Bernabé bi huąc yʉ́ gua yʉ fonthäi, ngue nꞌda ra hmɛpya nde da ma, da nu rán thɛui a bi ꞌyøtꞌʉ. Nɛ bi mba bʉ ja ra hnini Iconio bʉya.
\v 52 Pɛ nu yʉ ꞌyɛ̨cꞌyɛi bʉ Pisidia ɛ̨mmɛ bin johya, nɛ bi hyą ra tsꞌɛdi xʉn ho nangue rá Hogandąhi Oją.
\c 14
\s Ra Pablo nɛ ra Bernabé nubʉ ra hnini Iconio
\p
\v 1 Nubʉ Iconio, bi yʉrpʉ ra Pablo nɛ ra Bernabé bʉ ja yʉ́ niją yʉ judío, nɛ bi mam bʉ a rám Hman Oją. Nɛ bi ma xʉn ho, janangueꞌa xʉn ngu yʉ́ mijudíohʉ bi ꞌyɛ̨cꞌyɛi, nɛꞌʉ yʉ jąꞌi gue hing yʉ judío.
\v 2 Pɛ nuꞌʉ ꞌda yʉ judío ngue him bi ꞌyɛ̨cꞌyɛi ɛ̨mmɛ madin ꞌyʉthʉ ʉ hing yʉ judío, bim parbi da zʉꞌʉ yʉ ꞌyɛ̨cꞌyɛi. 
\v 3 Pɛ nu ra Pablo nɛ ra Bernabé nyaꞌa bim ꞌbʉpʉ, nguetho xʉn ngu bi ꞌyɛ̨cꞌyɛi bʉ, nɛ bi hyutꞌ ran zambʉi bi ma nangue ra Hmu mahɛ̨tsꞌi. Nu ra Hmu bi un yʉ́ tsꞌɛdi ʉ ngue da ꞌyøtꞌ yʉ hmɛpya nɛ yʉn tꞌøtꞌe nuįxte, guepʉ da bąh yʉ jąꞌi, Oją in ꞌyohʉ ra Pablo nɛ ra Bernabé.
\v 4 Pɛ nu yʉ jąꞌi bʉ ja ra hnini bin heque. ꞌDaꞌʉ bi dɛn yʉ judío hing yʉ ꞌyɛ̨cꞌyɛi, nɛ ꞌdaꞌʉ bi dɛn ra Pablo nɛ ra Bernabé.
\v 5 Janangueꞌa, nu yʉ ngʉrpi bʉ ja ra hnini bi un ran tꞌɛ̨di ʉ hing yʉ ꞌyɛ̨cꞌyɛi, yʉ judío ʉꞌda, hing yʉ judío ʉ ꞌda, gue da zʉꞌʉ, nɛ di batꞌado ʉ.
\v 6 Pɛ nu ra Pablo nɛ ra Bernabé, ꞌbʉ mí bądi ꞌbɛꞌa nde da ꞌyørpe, bi ꞌdagui, bi mba bʉ ja ra hnini Listra, nɛpʉ ra hnini Derbe nubʉ ra häi Licaonia. Nɛ bin ꞌyo gätho ra xɛqui bʉ.
\v 7 Nɛpʉ bá mam bʉ rán ho maꞌdaꞌyo ra Cristo bʉ ʉ.
\s Bi mba ma batꞌado ra Pablo bʉ Listra
\p
\v 8 Nubʉ ja ra hnini Listra mí ꞌbʉpʉ nꞌda ran ꞌyohʉ, ra dogua, ngue ya xín jabʉ ꞌbʉ mim ꞌbʉi. Nɛ mí hurpʉ nguetho hin jąmꞌbʉ bin ꞌyo.
\v 9 Nu ran ꞌyohʉ i øde ꞌbɛꞌa bi man ra Pablo. Nuꞌbʉ mí hyɛ̨t a ra Pablo, mí pądi ꞌbɛꞌa mím bɛ̨nꞌa zʉ dogua, ngue ya i ɛ̨cꞌyɛi gue dí hocpa rá gua ya.
\v 10 Janangueꞌa nu ra Pablo ntsꞌɛdi bi ma:
\p ―Ndantsꞌi gam ꞌbäi.
\p Nu ran ꞌyohʉ bʉya ꞌbex bi zägui bin ꞌyo.
\v 11 Nɛ nuꞌʉ yʉ jąꞌi, nuꞌbʉ mín nu ꞌbɛꞌa bi ꞌyøtꞌa ra Pablo, ntsꞌɛdi bi mbafi, nɛ bin yą yʉ́ nde ꞌʉ licaonia, bi ꞌyɛ̨na:
\p ―Nuya yʉ oją ya, pɛ bi nɛqui tenguꞌbʉ yʉn ꞌyohʉ, bi zøcua ja ra häi dí ꞌbʉhmbʉ, bi ꞌyɛ̨nꞌʉ.
\p
\v 12 Nu ra Bernabé bi ꞌyɛ̨mbi tengu rá thuhu yʉ́ oją zɛhɛ ra Júpiter, ximangutho a ra Pablo bi ꞌyɛ̨mbi tengu rá thuhu yʉ́ oją zɛhɛ ra Mercurio. Nguetho manꞌda mi yąꞌa ra Pablo, nɛ i ɛ̨mbi rá pøngahyą ra Júpiter a ra Mercurio.
\v 13 Nuꞌa ra mbäją bʉya, ngue mí pɛpꞌa yʉ́ oją Júpiter, mí ja bʉ nꞌda ra ngu bʉ ndehnini, guepʉ mí thąnde ra Júpiter yʉ jąꞌi. Nuꞌa ra mbäją nɛꞌʉ ꞌda yʉ jąꞌi bá si yʉn dąni guepʉ ꞌbʉh ra Pablo nɛ ra Bernabé, ɛ̨mbi ra Mercurio nɛ ra Júpiter, gue da hyo yʉn dąni da mbøspe. Nɛ bá cą yʉ døni, gätho da mbøspe.
\v 14 Pɛ nuꞌbʉ mí bąh ra Bernabé nɛ ra Pablo ꞌbɛꞌa i nde da ꞌyøtꞌʉ yʉ jąꞌi, bi yʉrpʉ ꞌbʉh yʉ jąꞌi, bi dʉn yʉ́ pahni, ndepe da bąh yʉ jąꞌi hingui numanho ꞌbɛꞌa nde da ꞌyøtꞌʉ, nɛ bi ꞌyɛ̨mbi:
\p
\v 15 ―Nꞌyohʉ ahʉ hanja ngubʉ gní ꞌyøthʉ. Nguetho dyʉ́n ꞌyohʉ thohoꞌbe, pɛ bá ɛ̨ꞌbe ua gue dín nde ga xi aꞌbe gui ꞌyɛsꞌhʉ ꞌbɛꞌa guí øthʉ, nguetho säti thoho ꞌbɛꞌa guím bɛ̨mhbʉ. Ndeꞌbʉ gui ꞌyɛsꞌhʉ gní thąndehʉ ʉ guí ɛ̨mfʉ yʉ oją ua ja ra häi, nɛ gui thąndehʉ majuąni Oją. Nguetho gueꞌa bi ꞌyøtꞌ mahɛ̨tsꞌi nɛcua ja ra häi nɛ ra deją nɛ gätho i ja ua.
\v 16 Nuꞌʉ yʉ pa bi thogui, Oją bi hyɛtho yʉ jąꞌi da ꞌyøzɛhɛ yʉ́ pähä zɛhɛ.
\v 17 Pɛ nu Oją bʉya ząi i urcahʉ rá hogan ꞌyomfɛ̨ni i ørcahʉ, gue bí pɛnh ra ꞌye nɛ di japi din ja ma huąhihʉ, nɛ di ꞌdajʉ ꞌbɛꞌa dí sihʉ nɛ di ꞌdajʉ ran johya ma mbʉihʉ, bi ꞌyɛ̨nꞌa ra Pablo.
\p
\v 18 Madagueꞌbʉ ngubʉ mí man ra Pablo, pɛ xʉn hɛ̨i bʉ í hɛcpa yʉ jąꞌi gue hin da mbøspe.
\p
\v 19 Pɛ bi zøm bʉ ꞌda yʉ judío bá nɛxpʉ ra hnini Antioquía bʉ ja ra häi Pisidia, nɛpʉ Iconio, nɛ nuꞌʉ bi parba yʉ jąꞌi da zʉh ra Pablo nɛ ra Bernabé. Nu yʉ jąꞌi bʉya bi batꞌado ra Pablo nɛ bi gʉrpʉ häi, bi hyønꞌa thi bʉ ja ra hnini, nɛ ɛ̨mbi gue ya bi du.
\v 20 Pɛ nuꞌbʉ mí zøh yʉ ꞌyɛ̨cꞌyɛi bʉ ꞌbɛnꞌa ra Pablo, bi ndantsꞌ pʉya, nɛ bi mba mahønꞌa bʉ ja ra hnini. Nuꞌbʉ mí hyax bʉya bi mbɛ ra Bernabé bʉ ja ra hnini Derbe.
\p
\v 21 Nubʉ ja ra hnini Derbe bi mampꞌa rán ho maꞌdaꞌyo ra Cristo, nɛ xʉn ngu bi ꞌyɛ̨cꞌyɛi. Nɛ nubʉya, nu ra Pablo nɛ ra Bernabé bá nɛxpʉ, bi thoh mahønꞌa bʉ ja yʉ hnini Listra nɛ Iconio nɛpʉ Antioquía bʉ ra häi Pisidia.
\v 22 Guepʉ bi thoqui bi hąt ra tsꞌɛdi yʉ́ mbʉi yʉ ꞌyɛ̨cꞌyɛi, nɛ bi xifi di thocta a dí ꞌyɛ̨cꞌyɛi, nguetho gätho toꞌo da yʉrpʉ di manda rá tsꞌɛdi Oją, jatho da nu xʉn ngu yʉn ʉnbi.
\v 23 Nɛ nubʉya nu ra Pablo nɛ ra Bernabé bi ꞌyɛꞌtꞌ yʉ́n tsꞌihmɛ ꞌbʉ mí huanꞌdʉ din ngʉrpi nꞌda ngu nꞌda bʉ ja yʉm pɛti. Nɛ bi ꞌyäp Oją ngue da mbäxꞌʉ yʉ ngʉrpi. Nɛ bi däpꞌa Oją ʉ gätho na ngu ʉ yʉ ꞌyɛ̨cꞌyɛi gue di jamansu, nguetho bi ꞌyɛ̨cꞌyɛi Oją ʉ.
\s Bá peng bʉ ra Pablo nɛ ra Bernabé bʉ Antioquía ra häi Siria
\p
\v 24 Nɛ nubʉya ra Pablo nɛ ra Bernabé bi thopʉ ra häi Pisidia nɛ bi zøm bʉ ra hnini Perge nubʉ ra häi Panfilia.
\v 25 Nɛ guepʉ bi mampꞌa rán ho maꞌdaꞌyo ra Cristo. Mꞌbɛjua bʉya bi mba bʉ ra hnini Atalia.
\v 26 Guepʉ bi hyu ra barco bi mba bʉ Antioquía bʉ ra häi Siria, guepʉ ra mbʉdi xí un Oją yʉ́ ꞌbɛfi ʉ, nɛ xí tꞌäp rám fätsꞌi Oją ʉ. Nɛ nuya bi juah ya.
\v 27 Nuꞌbʉ mi zøm bʉ, bi ma dim pɛti yʉ ꞌyɛ̨cꞌyɛi, nɛ bi xifi gätho bi ꞌyøtꞌe ngue bi zɛꞌa Oją, nɛ bi xifi nɛꞌʉ hing yʉ judío bi jap Oją bi ꞌyɛ̨cꞌyɛi.
\v 28 Nɛ nu ra Pablo nɛ ra Bernabé, nyaꞌa bim ꞌbʉhmbʉ yʉ ꞌyɛ̨cꞌyɛi bʉ bʉya.
\c 15
\s Bim pɛti yʉ ngʉrpi bʉ Jerusalén
\p
\v 1 Nuꞌʉ yʉ pa ʉ bi zøm bʉ Antioquía ꞌda yʉn ꞌyohʉ bi nɛxpʉ ra häi Judea. Nɛ sä bi xiꞌʉ yʉ ꞌyɛ̨cꞌyɛi hing yʉ judío ngue hingui sä dim pøꞌa nꞌda ꞌbʉ hinga nthɛqui yʉ́ xifani, tengu bi xänba ra Moisés ʉ yʉ judío.
\v 2 Nu ra Pablo nɛ ra Bernabé ntsꞌɛdi bin junthʉ ʉ, janangueꞌa bi tꞌɛ̨mbi da mba bʉ Jerusalén, nɛꞌʉ miꞌda yʉ ꞌyɛ̨cꞌyɛi, din yąhʉ bʉ yʉ́ ꞌbäihʉ ra Cristo nɛꞌʉ miꞌda yʉ ngʉrpi bʉ, nangue ꞌbɛꞌa bi manꞌʉ yʉn ꞌyohʉ.
\p
\v 3 Janangueꞌa nuꞌʉ yʉ ꞌyɛ̨cꞌyɛi bʉ Antioquía bin ꞌyɛ̨hmbʉ bʉya, bi mbɛnpʉ ja ra ꞌyu ʉ. Nɛ nuꞌbʉ mi hyąx ra ꞌyu ní mba Jerusalén, bi thopʉ ja ra häi Fenicia nɛpʉ ra häi Samaria. Nɛ nubʉ bi thogui, bi xih yʉ ꞌyɛ̨cꞌyɛi ngue bi hyɛꞌʉ yʉ́ tꞌɛ̨cꞌyɛi zɛhɛ ʉ hing yʉ judío, nɛ bi dɛn ra Cristo. Nɛ nuꞌbʉ mí ꞌyøꞌʉ yʉ cu nangue ra Cristo ꞌbɛꞌa bi man ra Pablo, bin johya bʉya.
\p
\v 4 Nu ra Pablo nɛ ra Bernabé nɛꞌʉ mín ꞌyohʉ bʉya, bi zøm bʉ Jerusalén. Nɛ nu yʉ́ ꞌbäihʉ ra Cristo nɛꞌʉ miꞌda yʉ ngʉrpi mi ꞌbʉpʉ, nɛ gätho miꞌda yʉ ꞌyɛ̨cꞌyɛi, bin johya ꞌbʉ mín nuꞌʉ, nɛ bim pɛtihʉ. Nɛ nu ra Pablo nɛ ra Bernabé bi ma gätho ꞌbɛꞌa bi ꞌyøtꞌe, ngue bi zɛꞌa Oją ꞌbʉ mí xiꞌʉ hing yʉ judío.
\v 5 Pɛ ꞌdaꞌʉ yʉ judío, yʉ fariseo ʉ ngue mí ɛ̨cꞌyɛi, bim ꞌbäi nɛ bi ꞌyɛ̨na:
\p ―Jatho da mba nthɛqui yʉ́ xifani yʉ ꞌyɛ̨cꞌyɛi gue hing yʉ judío, nɛ da sifi da ꞌyøtꞌ yʉ́n tꞌɛ̨di ra Moisés, bi ꞌyɛ̨nꞌʉ.
\p
\v 6 Nuꞌʉ yʉ́ ꞌbäihʉ ra Cristo bʉya, nɛꞌʉ miꞌda yʉ ngʉrpi, bim pɛti ngue bin ꞌyänꞌdʉ ꞌbɛꞌa manꞌda xʉn ho da ꞌyøtꞌe.
\v 7 Nɛ nuꞌbʉ nyaꞌa thoho madín ꞌyomfɛ̨ni ʉ, bim ꞌbäꞌa ra Pedro, nɛ bi ꞌyɛ̨na:
\p ―Nꞌyohʉ ahʉ, guí pąhmbʉ gue mayaꞌbʉ tsꞌʉ bi xicä Oją nꞌdandį gue ga xiꞌʉ ꞌda yʉ jąꞌi hing yʉ judío ran ho maꞌdaꞌyo. Nɛ nangue dá mangä, bi zä bi ꞌyøde nɛ bi ꞌyɛ̨cꞌyɛi.
\v 8 Nu Oją gue i pąrpa yʉ́ mbʉi yʉ jąꞌi, bi jajʉ ga pąhmbʉ i sinꞌʉ hing yʉ judío, nguetho bi un rá Hogandąhi Oją ʉ, tengu bi ꞌdajʉ dyʉ judíohʉ.
\v 9 Nu Oją him bi ꞌyøtꞌa nꞌda ran heque nanguejʉ dyʉ judíohʉ nɛꞌʉ hing yʉ judío, pɛ nɛꞌʉ bi japi bi bo yʉ́ mbʉi ngue bi ꞌyɛ̨cꞌyɛi.
\v 10 Nuya hanja guí ɛ̨mhbʉ hin da zin Oją ʉ gue him bi ꞌyøtꞌ yʉ́n tꞌɛ̨di ra Moisés, pɛ ya bi zin Oją ʉ. Nguetho guí ɛ̨mhbʉ i jatho da ꞌyøtꞌʉ yʉn tꞌɛ̨di, tenguꞌbʉ gui hyøspahʉ nꞌda ra ꞌbɛni, gue hin dá häthʉ, xínga gueꞌʉ mam bombøtahʉ xtá hyätꞌi, bi ꞌyɛ̨nꞌa ra Pedro.
\p
\v 11 Nɛ xø bi ꞌyɛ̨na:
\p ―Pɛ nujʉ dí ɛ̨cꞌyɛihʉ ngue da mba ma pøhøgähʉ nangue rá mate ra Hmu Jesús, nguthoꞌʉ hing yʉ judío, bi ꞌyɛ̨nꞌa ra Pedro.
\p
\v 12 Nɛ nubʉya bi yą ra Bernabé nɛ ra Pablo, nɛ bi xiꞌʉ ꞌbɛꞌa gätho bi ꞌyøtꞌe nangue rá tsꞌɛdi Oją, yʉ hmɛpya nɛ yʉn tꞌøtꞌe nuįxte ngue bi ꞌyørpʉ ꞌbʉh yʉ jąꞌi hing yʉ judío. Nɛ gätho ná yąꞌʉ njom bin yą.
\v 13 Nuꞌbʉ mí guaꞌa bi ma ra Pablo nɛ ra Bernabé, nu ra Jacobo Santiago bi ꞌyɛ̨mpꞌʉ madim pɛti bʉ:
\p ―Nꞌyohʉ ahʉ gui ꞌyøhmbʉ ya ꞌbɛꞌa dí mangä.
\v 14 Nu ra Simón Pedro ya bi xijʉ ha ín ja Oją ra mbʉdi bi huahnꞌni ꞌda yʉ jąꞌi hing yʉ judío ngue da ꞌyɛ̨cꞌyɛi.
\v 15 Nɛ ngutho bi man yʉ pøngahyą ꞌbʉ mayaꞌbʉ, ꞌbʉ mi ꞌyoꞌtꞌi ꞌbɛꞌa bi man Oją.
\q
\v 16 Bi ꞌyɛ̨na: 
\q Mꞌbɛjua gua pengä mahønꞌa,
\q nɛ ga japi din thąndegui mahønꞌa tengu mi thąndegui nuꞌbʉ mí ꞌbʉh ra David.
\q Tengutho ꞌbʉ di hoc mahønꞌa nꞌda ra niją gue xʉn yøtꞌe.
\q 
\v 17 Nɛ gätho miꞌda yʉ jąꞌi da hyongui, guecä dra Hmu mahɛ̨tsꞌi.
\q Gätho toꞌo yʉ jąꞌi hing yʉ judío ngue ma mbɛti ʉ, da hyongui.
\q 
\v 18 Njabʉ bi man Oją mayaꞌbʉ nɛ bi japi bi fąhya gueꞌbʉ go mayaꞌbʉ. 
\p
\v 19 Janangueꞌa dí xi ahʉ ya, ɛ̨nꞌa ra Jacobo, ndeꞌbʉ hin te ga xihmbʉ da ꞌyøtꞌa xʉn hɛ̨i ʉ hing yʉ judío, gue nuꞌʉ xí hyɛsɛ yʉ́ tꞌɛ̨cꞌyɛi nɛ i tɛnꞌna Oją.
\v 20 Pɛ ga othʉ nꞌda ra søcuą, nɛ ga xihmbʉ ʉ da hyɛgui gätho yʉ́n tꞌøtꞌe yʉ hmite, nɛ hin da ꞌyøtꞌ yʉn ꞌyomtꞌɛ̨ni, nɛ hin da za ra ngø gue him bi bøn rá ji ꞌbʉ mí tho, nɛ hin da zi ra ji. 
\v 21 Janangueꞌa hin di ʉnba yʉ́ mbʉi to i tɛn yʉ́n tꞌɛ̨di ra Moisés, nguetho xʉn ngu yʉ jɛya xí thogui i hmam bʉ ja yʉ́ niją yʉ judío yʉ́n tꞌɛ̨di ra Moisés, gätho yʉ hnini i hma ꞌbʉ ra pa ran tsꞌäya, bi ꞌyɛ̨nꞌa ra Jacobo.
\p
\v 22 Gätho yʉ ꞌyɛ̨cꞌyɛi nɛ yʉ́ ꞌbäihʉ ra Cristo nɛ miꞌda yʉ ngʉrpi bi numanho ꞌbɛꞌa bi manꞌa ra Jacobo. Nɛ mi ɛ̨nꞌʉ gue da thanhꞌni ꞌda da ꞌbɛhni da mbähä ra Pablo nɛ ra Bernabé bʉ Antioquía. Nɛ bi thanhꞌna ra Judas tꞌɛ̨mbi Barsabás nɛ ra Silas, nɛ gueꞌʉ ꞌda yʉ́ ngʉrpi yʉ ꞌyɛ̨cꞌyɛi ʉ.
\v 23 Nɛ nu ra søcuą ngue bi  gątsꞌi bi ma:
\p “Nugähe, ma ꞌbäigähe a ra Jesucristo, nɛ miꞌda gähe gue dyʉ́ ngʉrpigähe, nɛ gätho ni cuje nangue ra Cristo, dí pɛnꞌnahʉ ra søcuą, ma cu ahʉ, nɛ dadí zɛngua ahe. Dadín cuhʉ nangue ra Cristo gyʉ jąꞌihʉ ngue hin gyʉ judíohʉ guí ꞌbʉhmbʉ bʉ Antioquía, nɛpʉ gätho ra häi Siria nɛpʉ ra häi Cilicia.
\v 24 Nugähe dá øhmbe ngue ꞌda  yʉn ꞌyohʉ bi nɛxua bi mba bʉ, nɛ bi patꞌahʉ nɛ bi xi ahʉ ngue jatho da mba nthɛqui ni xifanihʉ nɛ gui ꞌyøthʉ rán tꞌɛ̨di ra Moisés. Pɛ nuꞌʉ hin dá pɛnhdähe ʉ. 
\v 25 Nugähe dám pɛtihe nɛ dá sänhde ꞌda yʉn ꞌyohʉ da mbähä ra Pablo nɛ ra Bernabé.
\v 26 Nu ra Pablo nɛ ra Bernabé ɛ̨mmɛ dí numanhohe, nguetho hingui su din ꞌyo bʉ hapʉ ɛ̨na da tho, ngue da ma nangue ma Hmuhʉ ra Jesucristo.
\v 27 Nɛ dá pɛnhde ra Judas nɛ ra Silas da xiꞌasɛhʉ ꞌbɛꞌa dá othe.
\v 28 Nguetho rá Hogandąhi Oją bi xije, nɛ dá numanhohe, ngue hin ga ꞌda ahʉ miꞌda yʉn tꞌɛ̨di xʉn hɛ̨i gui ꞌyøthʉ nangue yʉ́n tꞌɛ̨di ra Moisés. Høntꞌ ya zʉ tsꞌʉ yʉn tꞌɛ̨di dá otꞌahe.
\v 29 Nuya dí xi ahe ya, ngue hin gui sihʉ ꞌbɛꞌa bi ꞌbøspa yʉ hmite, xínga gue ra ji gui sihʉ, xínga gue gui sahʉ ra ngø gue him bi bøn ra ji ꞌbʉ mi tho. Nɛ hin gui ꞌyøthʉ yʉn ꞌyomtꞌɛ̨ni. Nuꞌbʉ gui hyɛhmbʉ gätho ꞌbɛꞌa dí xi ahe, xʉn ho ꞌbʉ. Oją da mbäx ahʉ. Nɛ høntꞌa dí xi ahe ya,” bi ꞌyɛ̨nꞌa ra søcuą bi ꞌyoꞌtꞌa ra Jacobo Santiago ꞌbʉ mi ja ram pɛti bʉ Jerusalén, bi gąx ra Pablo.
\p
\v 30 Nɛ nubʉya, bi mbähä ra Pablo, ra Bernabé, nɛ ra Judas, nɛ ra Silas bʉ ja ra hnini Antioquía. Nuꞌbʉ mí zøm bʉ, bi ma dí pɛti yʉ ꞌyɛ̨cꞌyɛi nɛ bi dä ra søcuą bʉya.
\v 31 Nɛ nuꞌbʉ mí nuꞌʉ ꞌbɛꞌa mí mam bʉ ja ra søcuą, bin johya yʉ́ mbʉi nangue ran zofo bi sifi, ngue bi hyurpa yʉ́ mbʉi.
\v 32 Nu ra Judas nɛ ra Silas, nɛꞌʉ, yʉ pøngahyą ʉ. Nɛ nangue rán zofo ʉ bi hyurpa yʉ́ mbʉi yʉ ꞌyɛ̨cꞌyɛi. Nɛ bi mbätsꞌi da ꞌyɛ̨cꞌyɛi xʉn ho.
\v 33 Nu ra Judas nɛ ra Silas bim ꞌbʉpʉ Antioquía ꞌda yʉ pa. Mꞌbɛjua bin ꞌyɛ̨te yʉ ꞌyɛ̨cꞌyɛi, bi mbɛhni da mbeng bʉ ꞌbʉꞌʉ ngue bá pɛnhꞌdʉ. 
\v 34 Nɛ mꞌbɛjua him bi nde bi mbeng bʉ ra Silas, nɛ bá copʉ Antioquía.
\v 35 Nɛ ra Pablo nɛ ra Bernabé bi gopʉ Antioquía. Nuꞌʉ nɛꞌʉ gätho miꞌda yʉ xänbate bin xänbate bʉ, nɛ bi mampꞌa rám Hman ra Cristo.
\s Ná yondį bi mba nꞌdanni ra Pablo, bi man rám Hman Oją
\p
\v 36 Nuꞌbʉ mí thoꞌi ꞌda yʉ pa, ra Pablo bi ꞌyɛ̨mpꞌa ra Bernabé:
\p ―Ga mbɛ bʉ ja nꞌda ngu nꞌda yʉ hnini xtán ꞌyoui xtám mammi rám Hman Oją. Ga nuui ma cuhʉ nangue ra Cristo ꞌbɛꞌa  di jaꞌʉ.
\p
\v 37 Nu ra Bernabé bi nde da zixꞌa ra Xuua Marcos.
\v 38 Pɛ nu ra Pablo him mi nde da zixꞌa, nguetho nuꞌa bi ꞌdapʉ Panfilia, nɛ him bi thoc rá ꞌbɛfi bʉ.
\v 39 Nɛ hinga ꞌdaꞌangu bi bɛ̨mmi nɛ bin heque. Nu ra Bernabé bi zixꞌa ra Marcos bi hyu ra barco í mba bʉ ra tꞌʉhäi Chipre.
\v 40 Nu ra Pablo bi huanhꞌna ra Silas ngue da mbɛ. Nɛ nu yʉ ꞌyɛ̨cꞌyɛi bʉ Antioquía bin yąhʉ Oją, bi ꞌyäp rá mate Oją nangueꞌʉ. Bi mba bʉya.
\v 41 Nɛ nuꞌʉ bi thopʉ ra häi Siria nɛpʉ Cilicia, nɛ nyaꞌa tsꞌʉ bim ꞌbʉpʉ hapʉ bi thogui, gue bi hąt ra tsꞌɛdi xʉn ho yʉ ꞌyɛ̨cꞌyɛi bʉ.
\c 16
\s Nu ra Timoteo bin ꞌyohʉ ra Pablo nɛ ra Silas
\p
\v 1 Nu ra Pablo nɛ ra Silas bi mba bʉ ra hnini Derbe nɛpʉ Listra. Nɛ bin tįmhbʉ bʉ nꞌda ra ꞌyɛ̨cꞌyɛi, ra Timoteo na. Nu rá mbe ra judío, nɛ ra ꞌyɛ̨cꞌyɛi a, pɛ nu rá ta, ra mɛngu bʉ Grecia a.
\v 2 Nu yʉ ꞌyɛ̨cꞌyɛi bʉ Listra nɛpʉ Iconio bi mamanho nangue ra Timoteo.
\v 3 Nɛ nu ra Pablo bi nde din ꞌyoui a, janangueꞌa bi hyɛcpa rá xifani, gue hin di ʉꞌtꞌ yʉ́ mbʉi yʉ judío. Nguetho gätho yʉ judío ꞌbʉpʉ i pądi ngue rá ta ra mɛngu bʉ Grecia a.
\v 4 Nɛ gätho yʉ hnini bʉ bi thogui bi xih yʉ ꞌyɛ̨cꞌyɛi da ꞌyøtꞌe ꞌbɛꞌa bi man ra Jacobo nɛ yʉ́ ꞌbäihʉ ra Cristo nɛ yʉ́ ngʉrpi yʉ ꞌyɛ̨cꞌyɛi bʉ Jerusalén, ngue ꞌbɛꞌa xʉn ho da ꞌyøtꞌʉ hing yʉ judío.
\v 5 Nɛ gätho yʉ ꞌyɛ̨cꞌyɛi bi thoctatho bin te yʉ́ mbʉi nangue ꞌbɛꞌa bi ꞌyɛ̨cꞌyɛi. Nɛ mpa ꞌbʉ mpa ꞌbʉ manꞌda i huxꞌa ná ngu yʉ ꞌyɛ̨cꞌyɛi.
\s Nu ra Pablo bi ꞌuį tenguꞌbʉ nꞌda ra mɛngu Macedonia
\p
\v 6 Nuꞌʉ bi thocpʉ ra häi Frigia nɛpʉ ra häi Galacia bʉya, nguetho him bi japꞌa rá Hogandąhi Oją xtá  man ram hma bʉ ra häi Asia.
\v 7 Nuꞌbʉ mi zøm bʉ ra häi Misia ɛ̨na xtá mba bʉ ra häi Bitinia, pɛ nu rá Hogandąhi Oją xínga guepʉ bi japi da mba bʉ.
\v 8 Bi thorpʉ ja ra häi Misia bʉya, bi mba bʉ ra hnini Troas bʉ ndendeją. 
\v 9 Nɛ nubʉya nu ra Pablo bi nu nꞌda ran tꞌuti ꞌbʉ mín xui, tenguꞌbʉ ra tꞌį, ɛ̨na gueꞌbʉ nꞌda ran ꞌyohʉ ra mɛngu Macedonia mí ꞌbäpʉ ja rá hmi, nɛ bi ꞌyɛ̨mbi: “Ba ɛ̨cua ja ra häi Macedonia nɛ gui zɛje tsꞌʉ,” bi ꞌyɛ̨na.
\v 10 Nɛ nugä dra Lucas, dí oꞌtꞌä ra søcuą i ja ua, dín nde ga mbähmbe bʉ ra Pablo. Nɛ nangueꞌa bi tꞌutꞌa ra Pablo, janangueꞌa ꞌbex dán sähe ga mbähmbe bʉ ja ra häi Macedonia, nguetho dá hąxhe njuąni ngueꞌa Oją bi zoncähe bʉ, in ndeje ga mamhbe bʉ ran ho maꞌdaꞌyo dí yąnjʉ a.
\s Bi zøm bʉ Filipos ra Pablo nɛ ra Silas
\p
\v 11 Nuꞌbʉ má pømhbe bʉ Troas dá huhe nꞌda ra barco nɛ njuąntho dá uɛ̨nthe bʉ ja ra tꞌʉhäi Samotracia gue i jabʉ made ra deją. Nuꞌbʉ mi hyatsꞌi dá thohmbe bʉ Neápolis.
\v 12 Dá nɛxhe bʉ Neápolis bʉya nɛ dá sømhbe bʉ ra dąhnini Filipos, rán guatꞌi ra häi Roma. Nu ra hnini Filipos manꞌda ja rá tsꞌɛdi xinda gue miꞌda yʉ hnini bʉ ra häi Macedonia. Nɛ dám ꞌbʉhmbe bʉ ꞌda yʉ pa.
\v 13 Nɛ nuꞌbʉ ra pa ran säya dá pømhbe bʉ ja ra hnini, dá mbähmbe bʉ ja ra ndendąthe guepʉ ząntꞌa min yąhʉ Oją yʉ jąꞌi. Nɛ dá huhmbe bʉ, dá xihmbe rám Hman Oją ʉ yʉ xisu ngue madím pɛti bʉ.
\v 14 Nɛ nu nꞌda ra xisu í Lidia ra mɛngu bʉ Tiatira, bi ꞌyøde ꞌbɛꞌa dá mamhbe. Nuꞌa ra Lidia ra mbäꞌbøꞌtꞌe na, i pä ra ꞌbøꞌtꞌe xʉn jʉpoi ngue xʉn ho. Nuꞌa i ɛ̨cꞌyɛi nɛ mi numansu Oją, janangueꞌa bi xocua rá mbʉi da ꞌyøde xʉn ho ꞌbɛꞌa bi manꞌa ra Pablo. 
\v 15 Nu ra Lidia bin xixyą bʉya nɛ gätho ꞌbʉpʉ rá ngu. Mꞌbɛjua bi xicähe:
\p ―Nuꞌbʉ guí ɛ̨na majuąni dí ɛ̨cꞌyɛi ra Hmu mahɛ̨tsꞌi, ba ɛ̨hmbʉ ua ja ma ngu gam ꞌbʉhmbʉ ua ꞌda yʉ pa, bi ꞌyɛ̨nje.
\p Nɛ bi ꞌyørcahe tsꞌɛdi janangueꞌa dá mbähmbe.
\p
\v 16 Nꞌda ra pa nuꞌbʉ má mbähmbe bʉ ząi bi yąhʉ Oją yʉ jąꞌi, dán cꞌathe nꞌda ra hmute ra ꞌyɛ̨hɛ. Nuꞌa man ra ꞌyøde nangue ra zįthu min ꞌyoui, nɛ mí tąha xʉn ngu ra mbɛti di unꞌdʉ yʉ́ hmu.
\v 17 Nuꞌa ra hmute mi tɛnꞌna ra Pablo nɛcähe. Bi mbafi bi ꞌyɛ̨na: 
\p ―Nuya yʉn ꞌyohʉ, yʉ́ mbɛfi Oją nuįxte thoho, i xängahʉ hague dán zä dam pøhmbʉ, bi ꞌyɛ̨na.
\p
\v 18 Nɛ xʉn ngu yʉ pa ngubʉ mi øtꞌ ra hmute. Madí xømbʉi ra Pablo nɛ bi xiꞌa ra zįthu min ꞌyoui ra hmute:
\p ―Nangue rá thuhu ra Jesucristo dami pøm bʉ rá mbʉi na ra hmute, bi ꞌyɛ̨mbi.
\p ꞌBexque bi bøn ra zįthu bʉya.
\p
\v 19 Nuꞌbʉ mí pąh yʉ́ hmu ra hmute gue him man zä da dąp rán zäbi, bi bɛntꞌa ra Pablo nɛ ra Silas, nɛ bi zixpʉ ja ra täi guepʉ ꞌbʉh yʉ zɛꞌmi. 
\v 20 Nɛ nuꞌbʉ mi dä bʉ ꞌbʉh yʉ zɛꞌmi, bi ꞌyɛ̨nꞌʉ:
\p ―Nuya yʉn ꞌyohʉ ꞌbʉcua, yʉ judío ya. Nɛ in nde di tsꞌon yʉ jąꞌi ꞌbʉcua ja ma hninihʉ.
\v 21 Nɛ i man yʉn tꞌøtꞌe gue hingui sä ga øthʉ, nguetho nujʉ dyʉ romanohʉ. Nɛ hinꞌyʉ man tꞌɛ̨di ga øthʉ a i xijʉ, sä bi ꞌyɛ̨nꞌʉ yʉ yąpate.
\p
\v 22 Nɛ bi muntsꞌ yʉ jąꞌi ngue nde da zʉꞌʉ. Nu yʉ zɛꞌmi bʉya, bi manda da ꞌbøcua yʉ́ pahni, da mba mꞌbɛi ra Pablo nɛ ra Silas.
\v 23 Nɛ nuꞌbʉ mi juadi ngue ɛ̨mmɛ xí ꞌbɛi, bi mba njotꞌi bʉ ja ra fädi. Nɛ bi sih ra mbängoxthi da mbädi xʉn ho.
\v 24 Nuꞌbʉ min tꞌun ran tꞌɛ̨di ra mbädi bi zixpʉ manꞌda mbo. Nɛ bi zɛmba yʉ́ gua bʉ ja ra fädiza.
\p
\v 25 Nuꞌbʉ mi zøm made ra xui bʉya, nu ra Pablo nɛ ra Silas min yąhʉ Oją nɛ bin tuh yʉ́ thuhu Oją. Nɛ gätho miꞌda  yʉ ofädi mi øde.
\v 26 Nɛ ꞌdahmantho ꞌbʉ mi mbʉdi bin ja nꞌda ra
ꞌyąnhäi, gueꞌbʉ go mi guhni yʉ́ guangu ra fädi. Gätho yʉ jutꞌi bin xozɛhɛ nɛ gätho yʉ tꞌɛgui man thątꞌi yʉ ofädi bin xozɛhɛ.
\v 27 Nɛ nuꞌbʉ mi nuh rá mbängoxthi ra fädi, bi nu gätho nsoqui yʉ goxthi, bi gʉx rá juai bʉya gue nde xtín hyosɛ, nguetho mim bɛ̨ni ngue ɛ̨mbi gätho xí ꞌdaꞌʉ yʉ ofädi. 
\v 28 Pɛ nu ra Pablo ntsꞌɛdi bi mbaꞌtꞌi, bi ꞌyɛ̨mbi:
\p ―O gadín ʉnba zɛhɛ nguetho gätho dí ꞌbʉcähe ua.
\p
\v 29 Nɛ nuꞌa ra mbängoxthi bʉya bi ꞌyäꞌa nꞌda ra sibi, bi yʉrpʉ mbo, nɛ ɛ̨mmɛ di fɛtꞌi nguetho min su. Nɛ bi yørpʉ ja rá gua ra Pablo nɛ ra Silas. 
\v 30 Nɛ bi gʉcpʉ thi ʉ, nɛ bi ꞌyänni:
\p ―Nꞌyohʉ aui ꞌbɛꞌa sä ga øtꞌä nguepʉ da zä dam pøcä, bi ꞌyɛ̨na.
\p
\v 31 Nu ra Pablo nɛ ra Silas bi ꞌyɛ̨mbi:
\p ―Dami däp ni mbʉi ra Hmu, ra Jesucristo, di punꞌna ni tsꞌoqui, nɛ da zimanho i, nɛꞌʉ gätho ꞌbʉpʉ ni ngu, ꞌbʉ di däp yʉ́ mbʉi a, bi ꞌyɛ̨mbi.
\p
\v 32 Nubʉya bi xih rán ho maꞌdaꞌyo ra Cristo nɛ gätho ꞌbʉpʉ rá ngu.
\v 33 Nɛ nuꞌa ra mbängoxthi nɛ gätho ꞌbʉpʉ ja rá ngu bin xixyą a ra xui a.
\v 34 Nuꞌa ra mbängoxthi bʉya bi zixꞌa ra Pablo nɛ ra Silas bʉ ja rá ngu, nɛ bi ꞌuįni. Nɛꞌa, nɛ gätho ꞌbʉpʉ ja rá ngu ɛ̨mmɛ bin johya nguetho bi ꞌyɛ̨cꞌyɛi Oją.
\p
\v 35 Nuꞌbʉ mí hyatsꞌi, nuꞌʉ yʉ zɛꞌmi bi mbɛnhꞌdʉ yʉ asmayo da xih ra mbängoxthi da bøm bʉ ja ra fädi ra Pablo nɛ ra Silas. 
\v 36 Nɛ nuꞌa ra mbängoxthi bi xiꞌa ra Pablo bʉya: 
\p ―Nu yʉ zɛꞌmi bá pɛnh ra nde ga xocꞌaui. Nuya sä gui pømmi nɛ nte gui jaui, bi ꞌyɛ̨mbi.
\p
\v 37 Pɛ nu ra Pablo bi ꞌyɛ̨mbi:
\p ―Nugäꞌbe dí cąꞌbe ran tꞌɛ̨di bi bøm bʉ Roma, pɛ guehma bi ꞌbɛnzagäꞌbe bʉ ꞌbʉh yʉ jąꞌi, nɛ him ꞌbɛ bi juąngäꞌbe pɛ bi goctäꞌbe. Nuya ha ɛ̨nꞌʉ gui jʉgäꞌbe ngue njon da nu. Hinꞌna, hingui sä. Bá xifi ba ɛ̨sɛ da xogäꞌbe, bi ꞌyɛ̨na.
\p
\v 38 Nu yʉ asmayo bʉya bi mba bi xih yʉ zɛꞌmi ꞌbɛꞌa bi ma ra Pablo. Nu yʉ zɛꞌmi nuꞌbʉ mi ꞌyøde ngue i cą yʉn tꞌɛ̨di bʉ Roma a ra Pablo nɛ ra Silas bʉya, ɛ̨mmɛ bin su.
\v 39 Nɛ nuꞌbʉ bá ɛ̨h yʉ zɛꞌmi bʉya, bi xocuabi nɛ bi ꞌyäp ra punbi, nɛ bi xiꞌʉ:
\p ―ꞌYørcahe ra mate gui pømmi ua ja ra hnini, bi ꞌyɛ̨mbi.
\p
\v 40 Pɛ nu ra Pablo nɛ ra Silas ꞌbʉ mí bøm bʉ ja ra fädi, bi mba bʉ ja rá ngu ra Lidia. Nɛ nuꞌbʉ mi nu yʉ cu nangue ra Cristo, bi hąt ra tsꞌɛdi yʉ́ mbʉi ʉ, nɛ bi mba bʉya.
\c 17
\s Ran ꞌyoꞌtsꞌi bʉ Tesalónica
\p
\v 1 Nuꞌa ra Pablo nɛ ra Silas bi thopʉ ja ra hnini Anfípolis nɛpʉ Apolonia nɛ bi zøm bʉ ja ra hnini Tesalónica. Guepʉ Tesalónica bí ja bʉ nꞌda rá niją yʉ judío.
\v 2 Nɛ nhyu semana bim ꞌbʉpʉ, nɛ nuꞌbʉ xʉn dät yʉ pa ran säya, bi mam bʉ rám Hman Oją a ra Pablo. 
\v 3 Nɛ jante thoho bi xifi xʉn ho nangue ram hma mán tꞌoꞌtꞌi mayaꞌbʉ, gue gueꞌa ra Cristo jatho da nu ran ʉnbi nɛ da du, nɛ mꞌbɛjua da ndantsꞌ mahønꞌa bʉ ꞌbʉꞌʉ xʉn du.
\p ―Nɛ gueꞌa bi nu ra Jesús a mán tꞌoꞌtꞌi tengu dí xi ahʉ, janangueꞌa ga pąhmbʉ gue gueꞌa ra Cristo rá Thahni Oją a, bi ꞌyɛ̨m ꞌbʉ mi xänbi.
\p
\v 4 Nɛ nuꞌʉ ꞌda yʉ judío bi däp yʉ́ mbʉi ra Cristo, nɛ bi dɛnꞌna ra Pablo nɛ ra Silas. Nɛ ɛ̨mmɛ xʉn ngu yʉ mɛngu bʉ Grecia ngue mi numansu Oją bi ꞌyɛ̨cꞌyɛi. Nɛ xʉn ngu yʉ xisu yʉ mɛngu bʉ grecia gue mí hnumansu, bi ꞌyɛ̨cꞌyɛi. 
\v 5 Pɛ ꞌda yʉ judío ngue him mí ɛ̨cꞌyɛi bin sɛya, nɛ bi zonhꞌnʉ yʉ tsꞌomꞌbäi bi xifi di parba yʉ jąꞌi, asta gueꞌbʉ gätho ra hnini bi parbi. Nɛ nuꞌʉ bi mba bʉ rá ngu ra Jasón, bi ꞌuɛ̨xpa bʉ rá ngu, i honꞌa ra Pablo nɛ ra Silas, ɛ̨na da gʉqui gue di dä bʉ ꞌbʉh yʉ jąꞌi.
\v 6 Nɛ nuꞌbʉ him mi dįn ra Pablo nɛ ra Silas, bi zixꞌa ra Jasón, ntsꞌɛdi bi gʉtsꞌi, nɛ miꞌda yʉ ꞌyɛ̨cꞌyɛi, bi zixpʉ ꞌbʉh yʉ zɛꞌmi bʉ ja ra hnini. Bi mbafi nɛ bi ꞌyɛ̨na:
\p ―Guehna nꞌdatꞌa mbɛ̨mhbʉ ʉ yʉn ꞌyohʉ gue ya bi tsꞌoni gätho ra ximhäi, nɛ bi zøcua ya.
\v 7 Nɛ nuna ra Jasón bi säyaba bʉ rá ngu. Nɛ nuꞌʉ hingui numansu rán tꞌɛ̨di ma tsꞌʉtꞌabihʉ bʉ Roma, nguetho ɛ̨nꞌʉ i ꞌbʉh manꞌda ra tsꞌʉtꞌabi guehna ra Jesús, bi ꞌyɛ̨nꞌʉ yʉ tsꞌomꞌbäi.
\p
\v 8 Nu yʉ jąꞌi nɛ yʉ zɛꞌmi bin cuɛ ꞌbʉ mí ꞌyøde ꞌbɛꞌa bi manꞌʉ.
\v 9 Nɛ nubʉya nu ra Jasón nɛꞌʉ miꞌda bi thącua ra mbɛti gue da bøm bʉ ja ra hnini ra Pablo nɛ ra Silas, nɛ bi mba ma thøgue bʉya.
\s Bi zøm bʉ Berea ra Pablo nɛ ra Silas
\p
\v 10 ꞌBexque guetꞌa ra xui a bin ꞌyɛ̨hmbʉ yʉ ꞌyɛ̨cꞌyɛi a ra Pablo nɛ ra Silas. Bi mba bʉ ja ra hnini Berea. Nɛ nuꞌbʉ mí zøm bʉ, bi mba bʉ ja rá niją yʉ judío.
\v 11 Nu yʉ judío gue ꞌbʉpʉ, manꞌda xʉn ho yʉ́ mbʉi xinda gueꞌʉ ꞌbʉpʉ Tesalónica. Nguetho ꞌbexque bi xoc yʉ́ mbʉi, mí ja ra pähä ngue da hyąn a bi man ra Pablo. Nɛ gätho yʉ pa bi nɛh yʉ́ søcuą Oją mayaꞌbʉ, ngue nde bʉ da bądi ꞌbʉ din thɛui ʉ i manꞌa ra Pablo.
\v 12 Nɛ xʉn ngu ʉ bi ꞌyɛ̨cꞌyɛi. Nɛ yʉ xisu, yʉ mɛngu bʉ grecia, ngue mi hnumansu, xʉn ngu bi ꞌyɛ̨cꞌyɛi, ximangut yʉn ꞌyohʉ bi  ꞌyɛ̨cꞌyɛi.
\v 13 Nɛ nu yʉ judío bʉ Tesalónica nuꞌbʉ mi bądi gue i man ran ho maꞌdaꞌyo bʉ Berea a ra Pablo, bi mba bʉ bʉya ngue di parba yʉ jąꞌi.
\v 14 Pɛ nu yʉ ꞌyɛ̨cꞌyɛi ꞌbex bi zixꞌa ra Pablo bʉ ndendeją. Pɛ nu ra Silas nɛ ra Timoteo bi gopʉ Berea.
\v 15 Nuꞌʉ min ꞌyohʉ ra Pablo bi zixpʉ ja ra hnini Atenas bʉya. Nɛ bi mbeng bʉ, nɛ bi xiꞌa ra Silas nɛ ra Timoteo gue ra Pablo ndepe da mba bʉ nꞌdihi bʉ ꞌbʉi.
\s Bi zoh yʉ mɛngu Atenas a ra Pablo
\p
\v 16 Nɛ nuꞌbʉ min døꞌmate ra Pablo bʉ Atenas, ɛ̨mmɛ bi du rá mbʉi ꞌbʉ mín nu gätho ra hnini xí munsꞌ yʉ nyogui.
\v 17 Janangueꞌa nu ra Pablo bin yąhʉ yʉ judío bʉ ja ra niją, nɛꞌʉ miꞌda ngue mi thąnde Oją. Nɛ gätho yʉ pa mi yąhʉ yʉ jąꞌi ngue gätho mi tįm bʉ ja ra täi.
\v 18 Nɛꞌʉ ꞌda yʉn ꞌyohʉ gue i tɛnba yʉ́ tꞌɛ̨cꞌyɛi zɛhɛ yʉ Epicúreos, nɛ miꞌda i tɛnba yʉ́ tꞌɛ̨cꞌyɛi zɛhɛ yʉ Estoicos, bin yąhʉ ra Pablo. Nuꞌʉ ꞌda bi ma:
\p ―ꞌBɛꞌa ní mba i man na ra ndemhyą nꞌyohʉ.
\p Nɛꞌʉ miꞌda bi ma, bi ꞌyɛ̨na:
\p ―Masque im ma ngue ꞌbʉh miꞌda yʉ oją, bi ꞌyɛ̨nꞌʉ.
\p Ngubʉ bi ma nguetho bi man ra Pablo nangue ra Jesús, nɛ bi ma ngue bi ndantsꞌ ꞌbʉ mi du.
\v 19 Nuꞌʉ bi zixꞌa ra Pablo bʉ ja ra nyuni tꞌɛ̨mbi Areópago bʉ ja ra hnini guepʉ ząi i hman yʉn zofo. Nɛ bi xiꞌa ra Pablo:
\p ―ꞌBɛꞌa ním hma guín nde gui xije, dín nde ga pąhmbe.  
\v 20 Nguetho guí xije ꞌdanꞌyo yʉm hma ngue hin dí pąhmbe, nɛ dín nde ga pąhmbe ꞌbɛꞌa nám bønꞌa, bi ꞌyɛnꞌʉ. 
\p
\v 21 Nguetho yʉ mɛngu bʉ Atenas nɛꞌʉ miꞌda yʉ ꞌdamhnini mí ꞌbʉpʉ, høntꞌa numanho da ꞌyøtꞌa, gue da ꞌyøde ꞌbɛꞌa gue maꞌ
daꞌyo, nɛ da ma. 
\p
\v 22 Nɛ nu ra Pablo bi ꞌbäꞌinde bʉ ja ra junta guepʉ Areópago. Nɛ bi xiꞌʉ: 
\p ―Nꞌyohʉ ahʉ gyʉ mɛnguhʉ ua Atenas, dá nugä ɛ̨mmɛ guí thąndehʉ yʉ oją.
\v 23 Nuꞌbʉ mán ꞌyogä bʉ ja ni hninihʉ dá nugä ꞌbɛꞌa guí thąndehʉ. Nɛ dá nugä nꞌda ra mɛxado guepʉ guí thąndehʉ manꞌda ra Oją, nɛ man tꞌoꞌtꞌi bʉ: “Ra Oją ngue njongui pądi toꞌo a.” Nuya ga xi ahʉ ya nangue ra Oją guí thąndehʉ pɛ hin guí pąhmbʉ toꞌo.
\p
\v 24 Nuꞌa Oją ngue bi ꞌyøtꞌ ra ximhäi nɛ gätho ꞌbɛꞌa i ja ua, nuꞌa gueꞌa ra Hmu mahɛ̨tsꞌi nɛcua ja ra häi. Nuꞌa hingui ꞌbʉpʉ ja yʉ ngu i høh yʉ jąꞌi.
\v 25 Nɛ nte di ꞌbɛdi, hingui jatho da hyąni ꞌbɛꞌa da ꞌyørpa yʉ jąꞌi nguetho gueꞌa di un ra te nɛ di un ran zaqui gätho toꞌo i ꞌbʉi. Nɛ gätho miꞌda mahyoni di uni.
\p
\v 26 Nɛ ꞌdatꞌa ra ji bi ꞌyøtꞌ Oją gätho yʉ jąꞌi ngue gätho yʉ nde, ndepe dim ꞌbʉi gätho na ngʉni ra ximhäi, nɛ bi zänba yʉ pa dim ꞌbʉcua ja ra häi, nɛ bi zänbi hapʉ dim ꞌbʉi.
\v 27 Njabʉ bi ꞌyøtꞌ Oją, ndepe gätho yʉ jąꞌi da hyonꞌa Oją nguepʉ da dįni. Pɛ majuąni hinga yatho i ꞌbʉ Oją ꞌbʉ ga homhbʉ ga pąhmbʉ a. 
\v 28 Nguetho nu Oją bi jajʉ dám ꞌbʉhmbʉ, nɛ bi jajʉ dí ꞌyohʉ, nɛ dadí ꞌyąmhbʉ. Tengu bi manꞌi ꞌda ni ꞌyosøcuąhʉ nuꞌbʉ i ɛ̨na: “Nujʉ yʉ́ jąꞌigähʉ Oją nguetho bi zänni dám ꞌbʉhmbʉ ua,” bi ꞌyɛ̨nꞌʉ.
\v 29 Nuꞌbʉ gueꞌa Oją di ꞌdajʉ ma tehʉ, hanja gní ꞌyɛ̨mfʉ Oją a ra hmite ra cꞌaxtꞌi o gue ra tꞌaxi o gue ra do ntꞌøtꞌe ngue yʉ́ ꞌyɛ yʉn ꞌyohʉ, nangue yʉ́n ꞌyomfɛ̨nisɛ.
\v 30 Pɛ nu Oją him bi ꞌyʉrpa ra güɛnda ꞌbɛꞌa mim bɛ̨nsɛ ʉ yʉ jąꞌi ꞌbʉ him mi bą Oją mamꞌbɛtꞌo.
Pɛ nuya Oją bi ma ngue gätho yʉ jąꞌi di päh yʉ́n ꞌyomfɛ̨ni.
\v 31 Nguetho xʉn zän Oją nꞌda ra pa din ja ran tꞌänni nangue ra ximhäi. Da ꞌyøtꞌran tꞌänni xʉn ho nꞌda ran ꞌyohʉ ngue bi huanh Oją. Nuna ran ꞌyohʉ, Oją bi xox ꞌbʉ mi du, janangueꞌa da bąh yʉ jąꞌi hingui hɛ̨i da ꞌyøtꞌ ran juąnbi, bi ꞌyɛ̨nꞌa ra Pablo.
\p
\v 32 Nɛ nuꞌbʉ mí ꞌyøꞌʉ yʉ jąꞌi ꞌbɛꞌa mí manꞌa ra Pablo, gue bi ndansꞌ ꞌbʉ mi du, ꞌdaꞌʉ bin thennate nɛ ꞌdaꞌʉ mí ɛ̨na:
\p ―Ga øhmbʉ mahønꞌa nanguehna bi ndantsꞌi.
\p
\v 33 Nu ra Pablo bi ꞌuepʉ bʉya.
\v 34 Pɛ nuꞌʉ ꞌda bi dɛnꞌna ra Pablo nɛ bi ꞌyɛ̨cꞌyɛi. Nuna nꞌda, ra Dionisio na, gue nꞌda ra zɛꞌmi bʉ guepʉ madím pɛti yʉ jąꞌi bʉ Areópago. Nɛ nꞌda ra xisu, ra Dámaris, nɛꞌʉ miꞌda bi dɛnꞌna ra Pablo.
\c 18
\s Bi zøm bʉ Corinto ra Pablo
\p
\v 1 Mꞌbɛjua bʉya nu ra Pablo bi bøm bʉ Atenas, bi mba bʉ ra hnini Corinto.
\v 2 Nɛ bin tįmmi bʉ nꞌda ra judío í Aquila, ra mɛngu ponto. Ja ní søhø bí ꞌyɛ̨pʉ Roma bʉ ra häi Italia ra Aquila nɛ rá xisu Priscila, nguetho nu ra hmutsꞌʉtꞌabi Claudio bá hønꞌa thi gätho yʉ judío bʉ ra dąhnini Roma. Nu ra Pablo bi mba bá nuꞌa ra Aquila nɛ ra Priscila bʉya.
\v 3 Nɛ bin ząm bʉ yʉ́ ngu, nguetho ꞌdatꞌa ra ꞌbɛfi i øtꞌe, i øtꞌ yʉ nguꞌbøꞌtꞌe.
\v 4 Nɛ gätho yʉ́ pa yʉn säya mí pa bʉ rá niją yʉ judío a ra Pablo, nɛ bi mam bʉ rám Hman Oją nɛ bi hyoni ꞌbɛpʉ dí ꞌyɛ̨cꞌyɛi yʉ judío nɛꞌʉ hing yʉ judío.
\p
\v 5 Nuꞌbʉ bá ɛ̨pʉ ra häi Macedonia ra Silas nɛ ra Timoteo, bi nu ra Pablo gue gätho yʉ pa ɛ̨mmɛ mi mam rám Hman Oją. Mí xänba yʉ judío ngue gueꞌa ra Jesús majuąni ra Cristo mí tøꞌbʉ yʉ judío ngue din yąnte a.
\v 6 Pɛ nu yʉ judío bi dʉꞌmi bi ʉcpa a, nɛ bi man yʉ tsꞌore nangue ra Pablo. Nɛ nu ra Pablo bʉya bi huąc rá pahni, nꞌda ra hmɛpya gue hingui numanho ꞌbɛꞌa i øtꞌʉ. Bi ꞌyɛ̨mbi:
\p ―Ya ni tsꞌoqui zɛhɛhʉ ngue hin gá hyąn ra te maząi, tenguꞌbʉ gán hyosɛhʉ. Nuya hingui pa ma güɛndagä, nguetho ya dá xi ahʉ. Pɛ nuya ga mbagä ga xih yʉ jąꞌi hing yʉ judío, bi ꞌyɛ̨nꞌa ra Pablo.
\p
\v 7
Nɛ má zä bi bøm bʉ ja rá niją yʉ judío a ra Pablo, bi mba bʉ ja rá ngu ra Justo. Nuꞌa, nꞌda ran ꞌyohʉ ngue i thąnde Oją, nɛ nu rá ngu, ꞌdarpʉ jaui rá niją yʉ judío, nɛ guepʉ din xänbate bʉ mahønꞌa.
\v 8 Nu ra Crispo, nꞌda ra ngʉrpi bʉ ja rá niją yʉ judío, bi ꞌyɛ̨cꞌyɛi nɛ gätho ꞌbʉpʉ rá ngu. Nɛ xʉn ngu yʉ mɛngu corinto mi øh ran ho maꞌdaꞌyo, nɛ bi ꞌyɛ̨cꞌyɛi, nɛ bi mba ma xixyąbi. 
\v 9 Nu ra Hmu mahɛ̨tsꞌi bi zoꞌa ra Pablo bʉya, nuꞌbʉ min xui, tenguꞌbʉ bi ꞌuį nꞌda ra tꞌį. Nɛ bi xifi:
\p ―O guín su, pɛ dami thoqui gan yą, hin gan hɛ̨tho,
\v 10 nguetho dadí hyʉnꞌaꞌi, nɛ njon da zä di ʉnꞌnaꞌi, nɛ xʉn ngu i ꞌbʉcua ja ra hnini da ꞌyɛ̨cꞌyɛigui, bi ꞌyɛ̨n Oją.
\p
\v 11 Nubʉya nu ra Pablo bi gopʉ ja ra hnini Corinto nꞌda jɛya made, nɛ bi xänba rám Hman Oją ʉ yʉ jąꞌi.
\p
\v 12 Pɛ nuꞌbʉ mín tsꞌʉtꞌabi ra Galión nubʉ ra häi Acaya, nu ꞌdaꞌʉ yʉ judío bim pɛti ngue nde da zʉꞌa ra Pablo. Nɛ bi zixꞌa ra Pablo bʉ ꞌbʉh ra tsꞌʉtꞌabi.
\v 13 Bi ꞌyɛ̨mbi:
\p ―Nuna ran ꞌyohʉ na bi xänba yʉ jąꞌi ngue da dąnde Oją, pɛ nꞌdanꞌyo im ma, hinga gueꞌa tengu man tꞌɛ̨dihʉ, ɛ̨nꞌʉ.
\p
\v 14 Nɛ nu ra Pablo in nde din yą, pɛ nu ra tsꞌʉtꞌabi ra Galión ꞌbex bi ꞌyɛ̨mpꞌʉ yʉ judío:
\p ―Nuꞌbʉ xcuá sihʉ na ran ꞌyohʉ nangue nꞌda ran tsꞌo xtá ꞌyøt na, xcá øcä a guim mamhbʉ.
\v 15 Pɛ guín cuɛhʉ nangue rá tꞌɛ̨cꞌyɛi na, ngue nde da xi ahʉ toꞌo gui thąndehʉ, nɛ nangue nin tꞌɛ̨di zɛhɛhʉ. Hin dí nde dan juąnbate nangue nin tꞌɛ̨di zɛhɛhʉ, janangueꞌa dami hocpa zɛhɛhʉ, bi ꞌyɛ̨nꞌa ra Galión.
\p
\v 16 Bi ꞌyɛtꞌi, bi hyønꞌa thi bʉya.
\v 17 Nubʉya gätho yʉ mɛngu bʉ ja ra hnini gue hing yʉ judío bi bɛntꞌa ra Sóstenes, ra ngʉrpi bʉ ja rá niją yʉ judío, nɛ bi ꞌbɛnza bʉ ja rá hmi ra tsꞌʉtꞌabi. Pɛ nu ra tsꞌʉtꞌabi ra Galión him bi ꞌyørpamasu.
\s Bi mbeng bʉ ra häi Siria a ra Pablo
\p
\v 18 Nu ra Pablo bʉya bi thoqui bim ꞌbʉpʉ nyaꞌa tsꞌʉ yʉ pa mahønꞌa bʉ Corinto. Mꞌbɛjua bí ꞌyɛ̨ꞌʉ yʉ ꞌyɛ̨cꞌyɛi, bin ꞌyohʉ ra Aquila nɛ ra Priscila, nɛ bi hyu ra barco bi mba ra häi Siria. Nɛ nuꞌbʉ mí juaꞌa ra hmɛpya gue bi te rá xtą, bi ꞌyąx rá yą bʉya, gueꞌa bi ꞌyørpʉ Cencrea. Nꞌda ra hmɛpya nangue ram hma xí man ra Pablo gue bi xi Oją di jąꞌtsꞌi.
\v 19 Nuꞌbʉ mi zøm bʉ ra hnini Éfeso ra Pablo, bi zopʉ ra Priscila nɛ ra Aquila nɛ bi mba bʉ rá niją yʉ judío. Nɛ bi xih yʉ judío bʉ rán ho maꞌdaꞌyo ra Cristo. 
\v 20 Nu yʉ judío mi ndepe xtán gopʉ ꞌda yʉ pa, pɛ nu ra Pablo him bi nde.
\v 21 Bin ꞌyɛ̨te nɛ bi ꞌyɛ̨mbi:
\p ―Jatho ga mba bʉ Jerusalén ga nu bʉ ra dąmpɛti da ꞌyøtꞌ ma mijudíohʉ. Pɛ nuꞌbʉ rá pähä Oją gua pengä mahønꞌa, bi ꞌyɛ̨na.
\p Bi nɛxpʉ, bi hyu nꞌda ra barco bʉya.
\s Ná hyundį bi mba nꞌdanni ra Pablo
\p
\v 22 
Nubʉ Cesarea bi gąpʉ ra Pablo bʉ ja ra barco, nɛ bi mba bʉ Jerusalén, bi zɛngua yʉ ꞌyɛ̨cꞌyɛi bʉ ja ra niją, nɛ ꞌbex bi mba bʉ Antioquía.
\v 23 Nuꞌbʉ mim ꞌbʉpʉ ꞌda yʉ pa, bi mba bʉ ja nꞌda ngu nꞌda yʉ hnini bʉ ja ra häi Galacia nɛpʉ Frigia, bi hąt ra tsꞌɛdi yʉ́ mbʉi yʉ ꞌyɛ̨cꞌyɛi ꞌbʉpʉ.
\s Ra Apolos bi mamp rám Hman Oją bʉ Éfeso
\p
\v 24 Nuꞌʉ yʉ pa ʉ bi zøm bʉ Éfeso nꞌda ra judío, rá thuhu Apolos, ra mɛngu bʉ ra hnini Alejandría.
Nuꞌa bi bądi xʉn ho rám Hman Oją mayaꞌbʉ.
\v 25 Nɛ bi sänbi zʉ tsꞌʉ nangue ra Hmu, ra Jesucristo. Nɛ ɛ̨mmɛ bin johya nɛ ntsꞌɛdi bi ma xʉn ho ꞌbʉ min xänbate, bi ma majuąni nangue ra Jesús. Pɛ høntꞌa rám hma ra Xuua Nxixyą mí pądi, nɛ rán xixyą.
\v 26 Nɛ nu ra Apolos bi hyutꞌan zambʉi him bi zu bi mam bʉ ja rá niją yʉ judío. Pɛ nuꞌbʉ mí ꞌyøh ra Priscila nɛ ra Aquila ꞌbɛꞌa manꞌa, nꞌdanni bi zitsꞌi nɛ bi xänbi manꞌda xʉn ho ngue rá ꞌyu Oją.
\v 27 Nɛ nuꞌbʉ mí nde da mba ra Apolos ra häi Acaya, guepʉ Corinto, nu yʉ cu nangue ra Cristo bi xifi ngue xʉn ho da mba. Bi ꞌyørpa nꞌda ra søcuą da gątsꞌi, bi xih yʉ ꞌyɛ̨cꞌyɛi bʉ ngue da zini. Nɛ nuꞌbʉ mi zøm bʉ, bi hąt ra tsꞌɛdi yʉ́ mbʉi yʉ ꞌyɛ̨cꞌyɛi bʉ, nɛ bi mbätsꞌi gätho bi ꞌyɛ̨cꞌyɛi rá mate ra Cristo.
\v 28 Nguetho nuꞌbʉ min yąhʉ yʉ judío gue hing yʉ ꞌyɛ̨cꞌyɛi, bi dąha, ngue ya mí yą con rá tsꞌɛdi Oją. Bi ꞌyuti nangue rám Hman Oją mayaꞌbʉ, gue gueꞌa ra Jesús ra Cristo mí hmam bʉ, gue mí tøꞌbʉ.
\c 19
\s Bi zøm bʉ Éfeso ra Pablo
\p
\v 1 Nuꞌbʉ mí ꞌbʉpʉ Corinto ra Apolos, nɛ nu ra Pablo bʉya i ꞌyo gätho yʉ hnini maxøtsꞌe, nɛ bi zøm bʉ ra hnini Éfeso. Nɛ bin tįmhbʉ bʉ ꞌda yʉ ꞌyɛ̨cꞌyɛi.
\v 2 Nu ra Pablo bi ꞌyän bʉya:
\p ―Ha bin ꞌda ahʉ rá Hogandąhi Oją nuꞌbʉ gmí ꞌyɛ̨cꞌyɛihʉ, bi ꞌyɛ̨na.
\p Nuꞌʉ bi dąti:
\p ―Hinꞌna, njąmꞌbʉ dá øhmbe gue i ꞌbʉh rá Hogandąhi Oją, bi ꞌyɛ̨nꞌʉ.
\p
\v 3 Nubʉya bi ꞌyänꞌna ra Pablo:
\p ―ꞌBɛꞌa ním hma gá hyąmhbʉ ꞌbʉ gmín xixyąhʉ, bi ꞌyɛ̨mpꞌʉ.
\p Nɛ bi ꞌyɛ̨nꞌʉ bʉya:
\p ―Tengu thoho bi man ra Xuua Nxixyą, bi yɛ̨nꞌʉ.
\p
\v 4 Nɛ nu ra Pablo bi ꞌyɛ̨mbi:
\p ―Guim bɛ̨mhbʉ ꞌbɛꞌa bi man ra Xuua, nguetho nuꞌa ra Xuua bi xixyą yʉ jąꞌi toꞌo bi päh yʉ́n ꞌyomfɛ̨ni nangue yʉ́ tsꞌoqui, nɛ bi xih yʉ jąꞌi da ꞌyɛ̨cꞌyɛi nꞌda ba ɛ̨hɛ mꞌbɛjua, gue ra Jesús ra Cristo na, bi ꞌyɛ̨na.
\p
\v 5 Nɛ nuꞌbʉ mí ꞌyøh rám hman ra Pablo, nuꞌʉ bi mba ma xixyąbi nangue rá thuhu ra Hmu Jesús.
\v 6 Nɛ nuꞌbʉ mí dospa yʉ́ yą yʉ jąꞌi ra Pablo, bi hyąn rá Hogandąhi Oją ʉ. Nɛ nꞌdanꞌyo yʉ nde bin yąꞌʉ bʉya, nɛ bim pøngahyą bi man rám Hman Oją.
\v 7 Nɛ nuꞌʉ yʉ jąꞌi gue bi ꞌyɛ̨cꞌyɛi, í juaꞌi ꞌdɛꞌmayoho ʉ. 
\p
\v 8 Nu ra Pablo bim ꞌbʉpʉ nhyuzna bʉ Éfeso bʉya. Bi hyutꞌan zambʉi bin yą bʉ ja rá niją yʉ judío, bi xih yʉ jąꞌi hague dán zä di manda Oją bʉ ja yʉ́ mbʉi, nɛ bi hyoni ꞌbɛpʉ dí ꞌyɛ̨cꞌyɛi yʉ jąꞌi.
\v 9 Pɛ nuꞌʉ ꞌda bi ʉꞌtꞌ yʉ́ mbʉi, hingui nde da ꞌyɛ̨cꞌyɛi, nɛ bi man ra tsꞌore nangue rá ꞌyu Oją, guepʉ madím pɛti yʉ jąꞌi. Janangueꞌa bi ꞌueꞌa ra Pablo bʉya nɛ bi mbähä yʉ ꞌyɛ̨cꞌyɛi bʉ ja nꞌda ra nguxädi, nuꞌa ra Tiranno ra xänbate bʉ. Nuꞌbʉ xʉm pøn yʉ́ xädi, i cʉtꞌa ra Pablo bʉya nɛ gätho yʉ pa mín xänbate bʉ.
\v 10 Nyo jɛya njabʉ bi ꞌyøtꞌa ra Pablo. Nɛ gätho yʉ jąꞌi ꞌbʉpʉ ja ra häi Asia, yʉ judío nɛꞌʉ hing yʉ judío mí øh ran ho maꞌdaꞌyo nangue ra Hmu, ra Jesús.
\v 11 Nɛ xʉn ngu yʉn tꞌøtꞌe nuįxte bi ꞌyøtꞌa ra Pablo, ngue bi ꞌyøtꞌ Oją. 
\v 12 Nguetho bi däꞌʉ yʉ bayu o gue yʉ ꞌbøꞌtꞌe a ra Pablo, gueꞌʉ bi mbɛnpa ʉ yʉn zämanꞌʉ bʉya, nɛ gätho bi zä, nɛ bi bønꞌʉ yʉ zįthu min ꞌyohʉ.
\p
\v 13 Nubʉya ꞌda yʉ judío ngue ząi yʉ mbonni, ɛ̨na pądi da hyønꞌa thi yʉ zįthu, nɛ sä i ndønpa rá thuhu ra Jesús. Bi dʉꞌmi bi xih yʉ zįthu:
\p ―Dami pøni nangue rá thuhu ra Jesús, gueꞌa ra Jesús i man ra Pablo, sä ɛ̨nꞌʉ.
\p
\v 14 Nɛ nuya guehya yoto, yʉ́ tsꞌʉntꞌʉ nꞌda ra judío, ra Esceva, ra hmumbäją a. Nɛ nuꞌʉ yʉ́ tsꞌʉntꞌʉ ɛ̨na da hyønꞌa thi nꞌda ra zįthu.
\v 15 Pɛ nu ra zįthu bi dądi:
\p ―Nu ra Jesús dí pącä ngue ja rá tsꞌɛdi, nɛ ra Pablo dí pącä ngue ja rá tsꞌɛdi, pɛ nuꞌehʉ, toꞌo ehʉ, bi ꞌyɛ̨nꞌa ra zįthu.
\p
\v 16 Nɛ nuna ran ꞌyohʉ min ꞌyoui ra zįthu, bi zäspa maxøtsꞌe guepʉ mi ꞌbäꞌʉ yoto má ꞌyohʉ, bi dąha bin tunhdʉ nɛ bi ʉnbi, gätho di dʉnba yʉ́ pahni. Nɛ bi bøm bʉ thi yʉn ꞌyohʉ, ya xí ʉnbi gätho, nte he yʉ́ he.
\v 17 Nɛ nuꞌa bin ja, gätho bi tꞌøpʉ ja ra hnini Éfeso. Gätho yʉ judío nɛꞌʉ hing yʉ judío bi ꞌyøde nɛ gätho mí ja ra mbidi. Nɛ gätho bi ꞌyɛ̨spa ra Jesús, ra Hmu bʉya.
\p
\v 18 Nɛ xʉn ngu ʉ gue mí ɛ̨cꞌyɛi, bi zøm bʉ, bi nde da gomanho yʉ́ mbʉi, nɛ bi dä ra güɛnda a xí ꞌyøtꞌe.
\v 19 Nɛꞌʉ ꞌda mím bądi bá cą yʉ́ søcuą, ngue yʉ libro yʉ́n xädi yʉ bądi, nɛ bi hyøspʉ ja ra sibi, gätho da nuꞌʉ mí ꞌbʉpʉ. Nɛ nuꞌbʉ mi mbede hangu gätho di muui, mbɛ mí juaꞌa yote ma ꞌdɛtꞌa mahuąhi yʉ mbɛti gue ra tꞌaxi. 
\v 20 Nɛ manꞌda xʉn ngu bi ꞌyɛ̨cꞌyɛi rám hman Oją yʉ jąꞌi bʉ Éfeso, manꞌda bi fądi ja rá tsꞌɛdi Oją.
\p
\v 21 Mꞌbɛjua bʉya bi bɛ̨nꞌa ra Pablo da mba bʉ Jerusalén, pɛ mꞌbɛtꞌo da zøm bʉ ra häi Macedonia, nɛpʉ ra häi Acaya. Nɛ bi ꞌyɛ̨na:
\p ―Dam ꞌbʉcä tsꞌʉ bʉ Jerusalén, mꞌbɛjua ga mbagä bʉ ja ra dąhnini Roma, bi ꞌyɛ̨na.
\p
\v 22 Nɛ bi mbɛnpʉ Macedonia ʉ yoho yʉ́m fätsꞌihʉ, ra Timoteo nɛ ra Erasto, pɛ guesɛ ra Pablo bim ꞌbʉpʉ miꞌda yʉ pa bʉ Éfeso gue ra häi Asia.
\s Ran ꞌyoꞌtsꞌmahyą bʉ Éfeso
\p
\v 23 Nu yʉ pa ʉ, xʉn ngu bi ndesʉi nangue rá ꞌyu Oją bʉ Éfeso,
\v 24 Nguetho nuꞌa nꞌda ran ꞌyohʉ í Demetrio, rá ꞌbɛfi da ꞌyøtꞌ yʉ zʉ tꞌʉngu ngue ra tꞌaxi, ngue yʉ́ pøte ra dąniją guepʉ i pa nthąnde ra oją Diana. Nuꞌa, nɛꞌʉ madím pɛhmbʉ, xʉn ngu bi dąha nangue ra ꞌbɛfi i øtꞌʉ.
\v 25 Nu ra Demetrio bʉya bi zonhꞌdʉ ꞌdaꞌangu ra ꞌbɛfi mí øthʉ, nɛ bi xifi:
\p ―Nꞌyohʉ ahʉ guí pąhmbʉ nangue ma ꞌbɛfihʉ xʉn ngu ra mbɛti dí tąhmbʉ.
\v 26 Dí nuhʉ nɛ dí øhmbʉ hinga høntꞌua ra hnini Éfeso pɛ gätho ra häi Asia, ꞌbɛꞌa øtꞌ na ra Pablo, i xih yʉ jąꞌi gue nuꞌʉ yʉ oją ntꞌøtꞌe yʉ́ ꞌyɛ yʉn ꞌyohʉ ɛ̨mbi ngue hing yʉ oją ʉ. Nɛ xʉn ngu yʉ jąꞌi bi päh yʉ́n ꞌyomfɛ̨ni nɛ bi ꞌyɛ̨cꞌyɛi a bi man ra Pablo.
\v 27 Nuya dán thɛhʉ nꞌda ra ꞌyąnthį, ngue nu ma pøte dí øthʉ njon da däi. Nɛ dim ꞌbɛh rá tsꞌɛdi rá ngu ra oją Diana, ngue i nuįxte. Nɛ da tꞌɛ̨mbi nte di muui. Pɛ nuꞌa ra Diana gueꞌa oją a, nɛ gätho yʉ jąꞌi ꞌbʉcua ja ra häi Asia nɛ gätho ra ximhäi i thąnde a, sä bi ꞌyɛ̨nꞌa ra Demetrio.
\p
\v 28 Nɛ nuꞌbʉ mí ꞌyøꞌʉ, ɛ̨mmɛ bi dɛ ra cuɛ. Nɛ ntsꞌɛdi i mbafi: 
\p ―Xʉn ngu rá tsꞌɛdi ra Diana gue ma ojąhʉ dyʉ mɛnguhʉ ua Éfeso.
\p
\v 29 Nɛ gätho bi yʉntonto gue ꞌbʉpʉ ja ra hnini. Nɛ gätho bin tihi ꞌdarpʉ ní muxpʉ ja nꞌda ra ngu xʉn ndoho, nɛ bá bɛntꞌ ra Gayo nɛ ra Aristarco, bi zixpʉ, nɛ nu ra Gayo nɛ ra Aristarco,  yʉ mɛngu bʉ Macedonia min ꞌyohʉ ra Pablo bʉ ꞌyu.
\v 30 Nɛꞌa ra Pablo nde xtá mba bʉ ꞌbʉh yʉ jąꞌi, pɛ nu yʉ ꞌyɛ̨cꞌyɛi bi japi hin da mba.
\v 31 Nɛ ꞌdaꞌʉ gue mi ja yʉ́ tsꞌɛdi bʉ ja ra häi Asia madin amigohʉ ra Pablo, bi mbɛnpa ra nde gue hin da mba bʉ bí mux  yʉ jąꞌi.
\v 32 Nɛ ꞌdahma ꞌdanꞌyo bi manꞌʉ nꞌda ngu nꞌda nguetho gätho bi yʉntonto. Nɛ xʉn ngu ʉ hingui pądi hanja bim pɛti bʉ.
\v 33 Nu ra Alejandro mi ꞌbäꞌinde bʉ ꞌbʉh yʉ jąꞌi, bi mba njʉqui bʉ ja yʉ́ hmi yʉ jąꞌi bʉya, nguetho ndepꞌʉ yʉ́ mijudíohʉ din yą. Nuꞌa ra Alejandro bʉya bi uąnba rá ꞌyɛ ndepe din hɛ̨ yʉ jąꞌi, nguetho nde da xifi nte mán tsꞌo mí øtꞌ yʉ judío.
\v 34 Pɛ nuꞌbʉ mi nu yʉ jąꞌi ngue ra judío ra Alejandro, mbɛ ma nyo ora bi mbafi, nɛ ꞌdaꞌingu bi ma:
\p ―Xʉn ngu rá tsꞌɛdi ra Diana ma ojąhʉ dyʉ mɛnguhʉ ua Éfeso.
\p
\v 35 Nu ra secretario bʉ ja ra hnini bʉya, bi japi ngue bin hɛ̨ yʉ jąꞌi, bi xifi:
\p ―Dyʉn ꞌyohʉhʉ, dyʉ mɛꞌefesohʉ, hingui ꞌbʉcua nꞌda ran yohʉ gue hingui pądi dí jamansuhʉ ra oją Diana, guejʉ dyʉ mɛꞌefesohʉ, nɛ gätho dí ɛ̨spahʉ ra do bi däh mahɛ̨tsꞌi, gue rá pøte ra Diana.
\v 36 Nɛ nuna njoꞌo da zä da gøni. Janangueꞌa daman ꞌyomfɛ̨nihʉ tsꞌʉ nɛ hin gui ꞌyøthʉ a hin da bømanho.
\v 37 Nu yʉn ꞌyohʉ ngue guá sihʉ ua, him bim pɛ̨ bʉ ja rá niją ra oją Diana. Nɛ him bi man ra tsꞌore nangueꞌa ma ojąhʉ ra Diana, bi ꞌyɛ̨na.
\p
\v 38 Nɛ xø bi ꞌyɛ̨nꞌa ra secretario:
\p ―Nuna ra Demetrio nɛꞌʉ miꞌda gue dim pɛhmbʉ,  nuꞌbʉ i ja ꞌbɛꞌa i nde dí yąpa nꞌda, ndeꞌbʉ gue din yąui bʉ ja ra dąngu nꞌdahma nꞌda ngu nꞌda da zä din yąsɛ.
\v 39 Nɛ nuꞌbʉ ja manꞌda guí nde gui ꞌyøthʉ, dami xihmbʉ ra zɛꞌmi da ꞌyøtꞌa nꞌda ra junta, guepʉ da mba ma hoqui.
\v 40 Nguetho dí su da hnɛrcahʉ häi ꞌbʉ da tꞌängahʉ nangue ra mbahni dá øthʉ ra pa jabʉya, nguetho hinꞌyʉ ꞌbɛꞌa sä ga mamhbʉ nangueꞌa dá øthʉ ya, bi ꞌyɛ̨na.
\p
\v 41 Nɛ nuꞌbʉ mi guaꞌa im ma, bi ꞌyɛtꞌ yʉ jąꞌi. 
\c 20
\s Nu ra Pablo bi mba bʉ ra häi Macedonia nɛpʉ ra häi Grecia
\p
\v 1 Nɛ nuꞌbʉ min hɛ̨ nín ꞌyoꞌtsꞌmahyą bʉ ra hnini Éfeso, nu ra Pablo bi zonhꞌdʉ yʉ ꞌyɛ̨cꞌyɛi. Nɛ nuꞌbʉ mí un ran zofo, bin ꞌyɛ̨te bʉya, bi mba bʉ Macedonia. 
\v 2 Nɛ gätho bi zɛngua yʉꞌyɛ̨cꞌyɛi gätho ra häi Macedonia, bi hąt ra tsꞌɛdi yʉ́ mbʉi nangue rám hman Oją bi xiꞌʉ. Nɛ mꞌbɛjua bi zøm bʉ ja ra häi Grecia mahønꞌa.
\v 3 Hyuzna bim ꞌbʉpʉ, ɛ̨na xtá hyu ra barco, gue xtá mba bʉ ra häi Siria, pɛ nuꞌʉ ꞌda yʉ judío ɛ̨na xtán däqui. Nɛ nuꞌbʉ mí bądi ꞌbɛꞌa nde xtá tꞌørpe, bin ꞌyomfɛ̨ni nɛ bá peng bʉ ja ra häi Macedonia.
\v 4 Nɛ min ꞌyohʉ ra Pablo ra Sópater ra mɛngu berea a, nɛꞌa ra Aristarco nɛ ra Segundo, yʉ mɛngu tesalónica ʉ, nɛ nu ra Gayo ra mɛngu derbe a, nɛ nuꞌa ra Timoteo nɛ ra Tíquico nɛ ra Trófimo, yʉ mɛngu asia ʉ.
\v 5 Nuꞌʉ bim ꞌbɛtꞌo bi mba ní tøguahe bʉ ra hnini Troas, nɛ nugä dra Lucascä, dí oꞌtꞌ ra søcuą jaua, dín hyʉnbahe ʉ.
\v 6 Nuꞌbʉ mí guah yʉm pɛti nangue ran dąbaxjua, dá huhe ra barco dá nɛxhe bʉ ra hnini Filipos, ncʉtꞌa pa dán ꞌyohe dá sømhbe bʉ Troas guepʉ i tøguahe ʉ miꞌda. Nɛ nyoto pa dám ꞌbʉhmbe bʉ.
\s Nu ra Pablo i ꞌbʉpʉ Troas
\p
\v 7 Nuꞌa ra pa domingo dám pɛtihe yʉ ꞌyɛ̨cꞌyɛi bʉ ja ra hnini Troas, dá sihe ra xɛcahmɛ, gue dá bɛ̨mhbe rán dąte ra Hmu. Nɛ nuꞌa ra Pablo bi man rám Hman Oją. Nɛ nyaꞌathoho bin yą gueꞌbʉ go mi zøm made ra xui, nguetho da mba ꞌbʉ bi hyatsꞌi.
\v 8 Nɛ ɛ̨mmɛ xʉn ngu ra sibi mí zø bʉ ja ra cuarto magątsꞌi guepʉ bim pɛti yʉ jąꞌi.
\v 9 Nɛ huxpʉ ja nꞌda ra ventana nꞌda ra tsꞌʉntꞌʉ í Eutico, nɛ ɛ̨mmɛ bi ndetꞌąha, nguetho ra Pablo nyaꞌa bin yą. Nu ra tsꞌʉntꞌʉ bi dop ra tꞌąha, bi dägui, ná hyu tøque ra ngu bʉ bi dägui. Ya xí du ꞌbʉ mi thątsꞌi.
\v 10 Nɛ bi gąh ra Pablo, ní nyexpʉ ꞌbɛnꞌa ra tsꞌʉntꞌʉ nɛ bi hyʉfi, nɛ bi xiꞌʉ bʉya:
\p ―O di tu ni mbʉihʉ, ya bi dąmbɛ̨ni na.
\p
\v 11 Nu ra Pablo bi ndex mahønꞌa bʉ ja ra cuarto bʉya, nɛ dán sihmɛhe. Nɛ nyaꞌa thoho bin yą ra Pablo mahønꞌa, gueꞌbʉ go mi bøx ra hyadi, ja bi mba bʉya.
\v 12 Nɛ nuꞌbʉ mí tsꞌixꞌa ra tsꞌʉntꞌʉ gue bi dägui, nɛ i te ꞌbʉ mí zøm bʉ rá ngu, gätho bin johya ʉ.
\s Bi mba bʉ Mileto ra Pablo
\p
\v 13 Nugähe dá hugähe ra barco nɛ dá mbähmbe bʉ ra hnini Asón nguetho nubʉ dan cꞌathe ra Pablo, ngubʉ bi xije mamꞌbɛtꞌo, gue xí ꞌyɛ̨n ra Pablo din ꞌyogua thoho.
\v 14 Nɛ nuꞌbʉ mán tįmhbe bʉ Asón a ra Pablo, dá sixhe dá huhe ra barco nɛ dá sømhbe bʉ ja ra hnini Mitilene.
\v 15 Nɛ dá nɛxhe bʉ, nɛ manꞌda pa dá sømhbe bʉ ní hɛ̨ꞌtꞌa ra tꞌʉhäi Quío gue i jabʉ made ra deją. Nɛ manꞌda pa bʉya dá sømhbe bʉ ra tꞌʉhäi Samos gue i jabʉ made ra deją. Nɛ dán säyahe tsꞌʉ bʉ ra hnini Trogilio, nɛ manꞌda pa bʉya dá sømhbe bʉ ra hnini Mileto.
\v 16 Nguetho nu ra Pablo bi nde bi thoctho bʉ ra hnini Éfeso, hingui nde din säya bʉ ra häi Asia. Nguetho di xøni da zønꞌa nꞌdihi bʉ Jerusalén, ya dí ꞌbʉpʉ ꞌbʉ ra pa ra dąmpɛti tꞌɛ̨mbi Pentecostés.
\s Nu ra Pablo bi zonhꞌdʉ yʉ́ ngʉrpi yʉ ꞌyɛ̨cꞌyɛi bʉ Éfeso
\p
\v 17 Nɛ nuꞌbʉ má sømhbe bʉ Mileto, ra Pablo bi ma dín zonhꞌdʉ yʉ dącꞌyɛi, ngue yʉ́ ngʉrpi yʉ ꞌyɛ̨cꞌyɛi dim pɛti bʉ ra hnini Éfeso.
\v 18 Nɛ nuꞌbʉ mi zøpʉ ʉ, bi ꞌyɛ̨mpꞌa ra Pablo:
\p ―Nuꞌehʉ guí pąhmbʉ ꞌbɛꞌa gätho mam ꞌbʉi dá øtꞌä ua ra häi Asia, asta gueꞌbʉ go rá mbʉdi dá søcä ua.
\v 19 Gätho yʉ pa dám ꞌbʉcä ua dá ørpa rá ꞌbɛfi ra Hmu mahɛ̨tsꞌi, nɛ hin dadín ꞌyɛ̨tsꞌi. Nɛ xʉn ngu ma guidä dá fäni gueꞌbʉ má hąh ma mbʉi dá äp Oją nangue ahʉ. Nɛ xʉn ngu ran ʉnbi dá nu ngue bi ꞌyørcä yʉ judío.
\v 20 Pɛ nugä hin te dá cønꞌnahʉ pɛ dá xi ahʉ gätho ꞌbɛꞌa da mbäx ahʉ. Nɛ dá xänꞌnahʉ bʉ dim pɛti yʉ jąꞌi, nɛ dá xänꞌnahʉ bʉ ja ni ngumhbʉ.
\v 21 Nɛ dá xifi xʉn ho yʉ judío nɛꞌʉ hing yʉ judío, ngue di päh yʉ́n ꞌyomfɛ̨ni nangue Oją, gue da ꞌyɛ̨cꞌyɛi ma Hmuhʉ ra Jesucristo.
\v 22 Pɛ nuya, rá Hogandąhi Oją i ørca ra tsꞌɛdi ga mbagä bʉ Jerusalén, nɛ hin dí pądi ꞌbɛꞌa gua thocä bʉ.
\v 23 Pɛ høntꞌa dí pącä gue dan ofädi bʉ Jerusalén, nɛ ga nugä xʉn ngu yʉn ʉnbi, nguetho guesɛ rá Hogandąhi Oją bi xiqui hønbʉ go hapʉ dá thocä bʉ ja yʉ hnini.
\v 24 Pɛ hinga guetꞌa dím bɛ̨nꞌa, hin te di muui ma tesɛgä nanguec zɛhɛgui. Høntꞌa ran johya dí nde ga nu ꞌbʉ dá juah ra ꞌbɛfi bi ꞌdacä ma Hmuhʉ ra Jesús, gueꞌa ga mangä ran ho maꞌdaꞌyo nangue rá mate Oją.
\p
\v 25 Nɛ gätho ahʉ dá xi ahʉ rám Hman Oją gue ꞌbɛpʉ ní mandagahʉ Oją, nɛ dí pącä xínga nꞌda ahʉ gui nurcahʉ ma hmi mahønꞌa.
\v 26 Nuya nam pa ya dí xi ahʉ, hingui pa ma güɛndagä ꞌbʉ gui ꞌbɛhmbʉ rán ho Oją ya.
\v 27 Nguetho hin te dá cønꞌnahʉ, gätho dá xi ahʉ ꞌbɛꞌa nde Oją gui pąhmbʉ.
\v 28 Nuya gui jamansu ꞌbɛꞌa gui ꞌyøthʉ, nɛ da zä bʉ gui jamansufʉ yʉ́ mbʉi ni mi ꞌyɛ̨cꞌyɛihʉ bʉya. Nɛ gueꞌa ra ꞌbɛfi bi ꞌda ahʉ rá Hogandąhi Oją, gue gui jamansufʉ yʉ́ ꞌyɛ̨cꞌyɛi ra Hmu, gätho ná nguꞌʉ i ꞌbʉhmbʉ ra Cristo, nguetho rá jisɛ ra Cristo í gurpa yʉ́ tsꞌoqui ꞌbʉ mí du.
\v 29 Pɛ nuꞌbʉ dá mbagä, dí pącä mꞌbɛjua ba ɛ̨ꞌi ꞌda tengu yʉ zate, nde da zaꞌʉ yʉ dɛꞌyo, din jabʉ da ꞌyøtꞌahʉ gue di ʉnꞌna ni mbʉihʉ gyʉ ꞌyɛ̨cꞌyɛihʉ.
\v 30 Nɛ ꞌdaꞌʉ gue guesɛ ahʉ da ndantsꞌi, nɛ hinga njuąntho da man rám Hman Oją, gue da ndepꞌa dí tɛnꞌdʉ miꞌda.
\v 31 Janangueꞌa gui jamansu ni mbʉihʉ ngue hin da hyä ahʉ ʉ. Nɛ guim bɛ̨mhbʉ gue nhyu jɛya, ma pa nɛ ra xui, dá xänꞌnahʉ nꞌda ngu nꞌda ahʉ, nɛ ɛ̨mmɛ dán zoni nangue ahʉ.
\p
\v 32 Nuya dadí dä ahʉ Oją. Nɛ ga socꞌahʉ rám Hman Oją, nuꞌa i ma nangue rá mate Oją, gueꞌa ram hma di zɛtꞌa ni mbʉihʉ, nɛ gueꞌa dín ja ahʉ gätho i ja Oją, tengu tho ʉ gätho miꞌda i pa nthahni.
\v 33 Nugä hin dá nde a ni mbɛtihʉ, xínga gue ni pahnihʉ.
\v 34 Pɛ guí pąhmbʉ dám pɛpzɛhɛ nɛ dá undä ꞌbɛꞌa gätho mí honꞌʉ dán ꞌyogähe.
\v 35 Dá øtꞌä gue dá honsɛ man tsꞌihmɛ, dá utꞌahʉ gue dam pɛhmbʉ nɛ ga fäxhʉ ʉ hin ꞌyʉ ꞌbɛꞌa da hyoni. Nɛ gam bɛ̨mhbʉ ꞌbɛꞌa bi ma ma Hmuhʉ ra Jesús ꞌbʉ mí ꞌyɛ̨na: “Manꞌda di johya ní mbʉi nꞌda ꞌbʉ di uni, xinda gueꞌbʉ din tꞌunna nꞌda,” ngubʉ bi man ra Hmu, bi ꞌyɛ̨nꞌa ra Pablo.
\p
\v 36 Nɛ nuꞌbʉ mi guaꞌa rám hma ra Pablo, bin dąnyahmu gätho mí ꞌbʉpʉ, nɛ bin yąhʉ Oją.
\v 37 Nɛ nuꞌʉ gätho bin zoni, nɛ bi hyʉꞌa ra Pablo nɛ bi zʉspa rá ꞌyogu.
\v 38 Nuꞌʉ ɛ̨mmɛ bi du yʉ́ mbʉi, nguetho ra Pablo bi xiꞌʉ him manꞌdandį da nu mahønꞌa. Nɛ nuꞌʉ bi zixꞌa ra Pablo bʉ ja ra barco bʉya.
\c 21
\s Bi mba bʉ Jerusalén ra Pablo
\p
\v 1 Nɛ nuꞌbʉ mán hyɛhmbe yʉ ꞌyɛ̨cꞌ yɛi, dá huhe ra barco, nɛ njuąntho ꞌbex dá sømhbe bʉ ja ra tꞌʉhäi Cos ngue i ja bʉ made ra deją. Nɛ manꞌda pa bʉya dá thohmbe bʉ ja ra hnini Pátara.
\v 2 Nubʉ, dá tįmhbe nꞌda ra barco ní mba bʉ ra häi Fenicia, dá huhe bʉya dá mbähmbe.
\v 3 Nɛ nuꞌbʉ má thohmbe nthandi thoho ra tꞌʉhäi Chipre i ja bʉ made ra deją, ngąha dá mbähmbe dá sømhbe bʉ ra häi Siria nubʉ ra hnini Tiro, guepʉ da zoh rá ꞌbɛni ra barco. Nɛ dá cąhmbe bʉya, dá mbähmbe bʉ ja ra hnini.
\v 4 Nuꞌbʉ má tįmhbe bʉ yʉ ꞌyɛ̨cꞌyɛi bʉya, dám ꞌbʉhmbe nyoto pa. Nɛ nu rá Hogandąhi Oją bi bɛ̨nba yʉ ꞌyɛ̨cꞌyɛi ꞌbɛꞌa da thoh ra Pablo ꞌbʉ da mba bʉ Jerusalén. Janangueꞌa bi xifi hin da mba.
\v 5 Nɛ nuꞌbʉ mí guaꞌa nyoto pa, dá pømhbe bʉ. Nɛ gätho yʉ ꞌyɛ̨cꞌyɛi, yʉn ꞌyohʉ nɛ yʉ xisu nɛ yʉ tꞌʉhni, dá mbähmbe asta gue dá pømhbe bʉ ja ra hnini. Dán dąnyahmuhe bʉ ja ra ndendeją bʉya, nɛ dán yąhe Oją.
\v 6 Nubʉya dán ꞌyɛ̨hmbe nɛ nugähe dá huhe ra barco, pɛ nuꞌʉ bi mbeng bʉ ja yʉ́ ngu.
\p
\v 7 Bá nɛxhe bʉ Tiro, dá mbähmbe nɛ dá cąhmbe ꞌbʉ má sømhbe bʉ Tolemaida. Nuꞌbʉ má zɛnguahe yʉ cu, dán tehe bʉ nꞌda pa.
\v 8 Nuꞌbʉ mi hyatsꞌi, gätho gahe ngue dín ꞌyohe ra Pablo dá thohmbe bʉ ra dąhnini Cesarea. Nɛ dán säyahe bʉ ja rá ngu ra Felipe. Nuꞌa ra Felipe ząi mi mam bʉ rán ho maꞌdaꞌyo Oją. Nuꞌa, nꞌda gueꞌʉ yoto má ꞌyohʉ nthahni mín ꞌyohʉ ra Esteban.
\v 9 Nɛ nu ra Felipe mi ꞌbʉi goho yʉ́ tꞌįxu him bin thąti, nɛ nuꞌʉ, yʉ pøngahyą ʉ, bi man rám Hman Oją.
\v 10 Nɛ nuꞌbʉ mám ꞌbʉhmbe bʉ ꞌda yʉ pa bi zøꞌa nꞌda rá pøngahyą Oją í Agabo, bá nɛxpʉ ra häi Judea.
\v 11 Nuꞌbʉ mi zøm bʉ dí ꞌbʉhmbe a, bi gąspa a rá ngʉtꞌi ra Pablo nɛ bi duzɛhɛ yʉ́ gua nɛ yʉ́ ꞌyɛ ra Agabo, nɛ bi ma:
\p ―Nu rá Hogandąhi Oją bi bɛ̨ngä ngue ngubʉ da ꞌyørpa yʉ judío a rá mbɛti na ra ngʉtꞌi bʉ Jerusalén, nɛ din dä bʉ ꞌbʉh yʉ jąꞌi ngue hing yʉ judío.
\p
\v 12 Nuꞌbʉ má øhmbe ꞌbɛꞌa bi man ra Agabo, gätho gahe nɛ yʉ mɛngu bʉ, dá ørpahe ra tsꞌɛdi hin xtá mba ra Pablo bʉ Jerusalén.
\v 13 Nu ra Pablo bi ꞌyɛ̨m bʉya:
\p ―ꞌBɛꞌa guí øthʉ guí zomhbʉ. O gadí ʉngahʉ ma mbʉi. Nugä dadín sägä høntꞌa go ꞌbɛꞌa da tꞌørcagui, o gue da thurqui o gue da thog bʉ Jerusalén nangue ra Jesús, ma Hmu.
\p
\v 14 Nɛ him bi zä dá sąmhbe, dá hɛthe bʉya nɛ dá ɛ̨mhbe:
\p ―Nuꞌa rá pähä Oją da tꞌøtꞌe.
\p
\v 15 Nɛ mꞌbɛjua bʉya dán sähe nɛ dá mbähmbe ra Pablo bʉ Jerusalén.
\v 16 Nɛ ꞌdaꞌʉ yʉ ꞌyɛ̨cꞌyɛi bʉ Cesarea dá mbähmbe. Nɛ nuꞌbʉ má sømhbe bʉ Jerusalén, nuꞌʉ bi zixcähe bʉ rá ngu ra Mnasón, ra mɛngu chipre. Nɛ mayaꞌbʉ thoho mí ɛ̨cꞌyɛi ra Mnasón. Guepʉ rá ngu dán säyahe.
\s Bi zɛngua ra Jacobo ra Pablo bʉ Jerusalén
\p
\v 17 Nuꞌbʉ má sømhbe bʉ Jerusalén, nu yʉ cu nangue ra Cristo bʉ, bi hyu yʉ́ mbʉi ꞌbʉ mi nuje, nɛ bi zimanhoje.
\v 18 Manꞌda pa bʉya dá mbähmbe ra Pablo dá nuhe ra Jacobo Santiago, nɛꞌʉ gätho mí ꞌbʉpʉ, yʉ́ mingʉrpihʉ, yʉ dącꞌyɛi.
\v 19 Nu ra Pablo bi zɛngua ʉ nɛ ꞌbex bi dʉꞌmi ꞌdahmiꞌdatho bi ma ꞌbɛꞌa gätho bi ꞌyøtꞌ Oją nangue rá ꞌbɛfi ra Pablo, nubʉ ꞌbʉh yʉ jąꞌi ngue hing yʉ judío.
\v 20 Nɛ nuꞌbʉ mi ꞌyøꞌʉ ꞌbɛꞌa bi man ra Pablo gue bi ꞌyømanho ꞌbʉ mí sih rám Hman Oją, ɛ̨mmɛ bin johya nɛ bi ꞌyɛ̨spa Oją. Pɛ nuꞌʉ, bi ꞌyɛ̨mbi:
\p ―Pɛ guí pądi, ma zʉ cuꞌi Pablo gue yʉ mahuąhi thoho yʉ judío i ɛ̨cꞌyɛi ya, nɛ gätho i ɛ̨na jatho da ꞌyøtꞌ yʉ́n tꞌɛ̨di ra Moisés.
\v 21 Nɛ nuꞌʉ bi sifi ꞌbɛꞌa gätho gá ꞌyøtꞌe. Nɛ sä ɛ̨nꞌʉ gá xänbi gue gätho da hyɛh yʉ́n tꞌɛ̨di ra Moisés ʉ yʉ judío gue ꞌbʉpʉ ꞌbʉh yʉ jąꞌi hing yʉ judío, nɛ gá xifi ngue hin da mba nthɛqui yʉ́ xifani, nɛ hin da ꞌyøtꞌ yʉ́n tꞌøtꞌe yʉ judío, ɛ̨nꞌʉ.
\v 22 Nuya ꞌbɛꞌa sä ga øthʉ ya, guehma dim pɛti ʉ ma mi ꞌyɛ̨cꞌyɛihʉ yʉ judío, gue da gohmahyąꞌaꞌi, nguetho da ꞌyøde ya gá søhø, bi ꞌyɛ̨mbi.
\v 23 Nuya ndeꞌbʉ gui ꞌyøtꞌe ꞌbɛꞌa ga xi ahe. Nuya ꞌbʉcua goho yʉn ꞌyohʉ ngue bi ma da ꞌyøtꞌa nꞌda ran hogui nangue Oją, nɛ jatho da ꞌyøtꞌe. Nuya gui ꞌyøtꞌe ꞌbɛꞌa da ꞌyøtꞌʉ.
\v 24 Nuꞌi gueꞌe gui six bʉya yʉn ꞌyohʉ, nɛ gui ꞌyøtꞌe tengu jatho da ꞌyøtꞌʉ, ngue mí ma nꞌda ran hogui nangue Oją. Nɛ gätho gui jurpa yʉ́ gasto ʉ, gui tämb yʉ dɛꞌyo ngue da mbøtsꞌe. Nɛ nubʉya sä gui ꞌyąx ni yąhʉ tengu i øtꞌ yʉ jąꞌi nuꞌbʉ xʉn guah yʉ pa yʉn hogui. Nɛ gätho yʉ jąꞌi sä da bądi ngue him majuąniꞌbɛꞌa bi manꞌʉ ꞌda nangueꞌe. Nɛ da bąh pʉya nɛꞌe guí tɛnꞌna rán tꞌɛ̨di ra Moisés.
\v 25 Pɛ nangue yʉ jąꞌi hing yʉ judío ngue bi ꞌyɛ̨cꞌyɛi, ya dá pɛnpahe nꞌda ra søcuą, nɛ dá xihmbe hin da zi ꞌbɛꞌa bi ꞌbøspa yʉ hmite, xín da zaꞌa ra ngø ngue him bi bøn rá ji, xín da zi ra ji. Nɛ hin da ꞌyøtꞌ yʉn ꞌyomtꞌɛ̨ni, bi ꞌyɛ̨nꞌa ra Jacobo Santiago.
\s Bi mba mfɛntꞌi ra Pablo bʉ dąniją Jerusalén
\p
\v 26 Nu ra Pablo bi zixꞌʉ yʉn ꞌyohʉ bʉya, nɛ bi ꞌyøtꞌe tengu bi ꞌyøtꞌʉ. Nɛ bi mbähä bʉ mbo yʉ́ dąniją yʉ judío, ngue da ma ndaꞌa ní pa da guah yʉ́ pa ran hogui. Nɛ bi ma ndaꞌa ní pa di un yʉ ꞌbøtsꞌe.
\p
\v 27 Hin ɛ ní zønꞌa yoto pa mi juah ran hogui, nu yʉ judío gue hing yʉ ꞌyɛ̨cꞌyɛi, yʉ mɛngu ra häi Asia, bi nu bʉ mbo ra dąniją ra Pablo. Nuꞌʉ bi parba yʉ jąꞌi nɛ bi bɛntꞌ ra Pablo.
\v 28 Bi mbafi:
\p ―Nꞌyohʉ ahʉ dyʉ israelhʉ, dami zɛje gam bɛnthʉ na ran ꞌyohʉ ꞌbäcua, i xänba yʉ jąꞌi hønbʉ go hapʉ i pa ngue hingui hojʉ, nɛ ɛ̨na nte di muui yʉ́n tꞌɛ̨di ra Moisés nɛ nte di muui ma dąnijąhʉ. Nɛ hinga høntꞌa bi ꞌyøtꞌe, pɛ manꞌda, bá si ua mbo ra dąniją yʉ jąꞌi ngue hing yʉ judío. Janangueꞌa bi tsꞌonꞌa ra hoganiją ngue mająpi, sä ɛ̨nꞌʉ.
\p
\v 29 Nguetho mi nu min ꞌyoui ra Pablo bʉ ja ra hnini nꞌda ra mɛngu éfeso í Trófimo. Nɛ mi mansɛ ngue ɛ̨mbi bi zixpʉ mbo ra dąniją.
\p
\v 30 Nɛ nubʉya gätho ra hnini bin ja nꞌda ran ꞌyoꞌtsꞌi, nɛ gätho ní muxpʉ ꞌbäh ra Pablo, bi bɛntꞌi, bi gʉcpʉ thi ra dąniją. Nɛ ꞌbex bi gutꞌ yʉ́ niją.
\v 31 Nɛ nuꞌbʉ mí zäpi ɛ̨na xtá hyo ra Pablo, nu ra hmudofʉi mí øde ngue gätho ra hnini Jerusalén bin ꞌyoꞌtsꞌi.
\v 32 Nuꞌa ꞌbex bi zixꞌʉ yʉ dofʉi nɛ gätho yʉ hmudofʉi, nɛ bi mba nꞌdihi bʉ ꞌbʉh yʉ jąꞌi. Nɛ nuꞌbʉ mi nu yʉ jąꞌi gue mba bʉ yʉ dofʉi nɛ yʉ hmudofʉi, ꞌbex bin hɛ̨ ním ꞌbɛnza ra Pablo.
\v 33 Nɛ nuꞌa ra hmudofʉi bʉya bi bɛntꞌ ra Pablo ɛ̨na da gotꞌi, nɛ bi manda ngue da mba nthątꞌi yoho yʉ cadena. Mꞌbɛjua bi tꞌänꞌdʉ, nɛ bi tꞌɛ̨mpꞌʉ:
\p ―Toꞌo na, ꞌbɛꞌa bi ꞌyøtꞌna.
\p
\v 34 Pɛ nu yʉ jąꞌi ɛ̨mmɛ madí mbahni nɛ gätho ꞌdahma ꞌdanꞌyo bi ma. Janangueꞌa nu ra hmudofʉi him mi sä da bądi hanja bin ꞌyoꞌtsꞌi. Bi manda ngue da zixpʉ ja ra ngundofʉi a bʉya.
\v 35 Nɛ nuꞌbʉ mí zøm bʉ ja rá ꞌdede ra ngu, bi duxꞌʉ yʉ dofʉi a ra Pablo, nguetho nu yʉ jąꞌi manꞌda nde da bɛntꞌi mahønꞌa.
\v 36 Nguetho xʉn ngu yʉ jąꞌi bi dɛnni bi mbafi:
\p ―Dami hyohʉ, ɛ̨nꞌʉ.
\s Nu ra Pablo bin juąn zɛhɛ bʉ ja yʉ́ hmi yʉ jąꞌi
\p
\v 37 Nɛ nuꞌbʉ manguepʉ da zixpʉ mbo ja rá ngu ra Pablo bi ꞌyänꞌna ra hmudofʉi:
\p ―Dami ꞌyørqui tsꞌʉ ra mate dan yąui tsꞌʉ, bi ꞌyɛ̨na.
\p Nu ra dofʉi bi dądi:
\p ―Ha guí pąꞌa rá nde yʉ griego.
\p ―Hąha, bi yɛ̨nꞌa ra Pablo.
\p
\v 38 ―Oh, ha hinga gueꞌe gra mɛngu Egipto, ngue gá dʉpꞌa nꞌda ran ꞌyoꞌtsꞌi nɛ gá sixpʉ maꞌueni goho mahuąhi yʉn ꞌyohʉ ngue yʉ hyodu, bi ꞌyɛ̨mbi.
\p
\v 39 Nu ra Pablo bi dądi:
\p ―Hinꞌna, hinga guecä. Nugä dra judíogä nɛ dra mɛngu Tarso, nꞌda ra dąhnini ngue ja rá tsꞌɛdi bʉ ja ra häi Cilicia. Nuya dí äꞌa nꞌda ra mate ngue ga xicä tsꞌʉ yʉ jąꞌi.
\p
\v 40 Nu ra hmudofʉi bi un ran tꞌɛ̨di. Nubʉya, nu ra Pablo bí ꞌbäpʉ ja ra ꞌdede, nɛ bi uąꞌtsꞌ rá ꞌyɛ ndepe din hɛ̨ yʉ jąꞌi. Nɛ nuꞌbʉ min hɛ̨, bi zofo nangue yʉ́ ndesɛ ʉ, gue yʉ́ nde ra hebreo, bi ꞌyɛ̨na:
\c 22
\p
\v 1 ―Nꞌyohʉ ahʉ, gyʉ ta ahʉ, gui ꞌyøhmbʉ ꞌbɛꞌa ga xi ahʉ ya, bi ꞌyɛ̨nꞌa ra Pablo ꞌbʉ mi dʉꞌmi bin yą.
\p
\v 2 Nɛ nuꞌbʉ mi ꞌyøꞌʉ ngue bi tsꞌofo nangue yʉ́ ndesɛ ra hebreo, manꞌda bin hɛ̨. Nu ra Pablo bi ꞌyɛ̨m bʉya:
\p
\v 3 ―Nugä dra judíogä, dám ꞌbʉcä bʉ Tarso, nubʉ ra häi Cilicia, nɛ bi mba ma tedegä ua Jerusalén. Nɛ dán xäcä rán xädi ra Gamaliel, nɛ dán xäcä xʉn ho yʉ́n tꞌɛ̨di ʉ ma ngʉrpa bøtahʉ. Nɛ ɛ̨mmɛ mi ɛ̨hyagä nangue rá ꞌbɛfi Oją ngue gätho ma mbʉi, tengutho ahʉ ya.
\v 4 Nɛ madí undä ran ʉnbi toꞌo gätho mi ɛ̨cꞌyɛi ra Jesús, nɛ ꞌdaꞌʉ dá ho nɛꞌʉ miꞌda, yʉn ꞌyohʉ nɛꞌʉ yʉ xisu dá sixpʉ fädi.
\v 5 Nu ra hmumbäją nɛ yʉ dącꞌyɛi da zä din juąnni ꞌbɛꞌa xtá øtꞌä, nguetho dá cąnba yʉ́ søcuą bi ꞌdacä, gue mí ɛ̨na xcá un yʉ ngʉrpi bʉ ja yʉ́ niją ma mijudíohʉ bʉ Damasco. Nɛ dá hąx ra ꞌyu dá mba bʉ Damasco. Nu ra søcuą dá jʉcä ngueꞌa ran tꞌɛ̨di ga cotꞌa fädi yʉ ꞌyɛ̨cꞌyɛi, nɛ dí ɛ̨na xcuá si ua Jerusalén, ngue xtá nu ua ran ʉnbi.
\s Nu ra Pablo bi ma ha bin jabʉ í ꞌyɛ̨cꞌyɛi
\p
\v 6 Nɛ nuꞌbʉ mán ꞌyogä bʉ ꞌyu hänbʉ Damasco, tenguꞌbʉ mbɛ huxyadi, bá cą nꞌda ra nyotꞌi mahɛ̨tsꞌi, ngue ntsꞌɛdi bi hyärpʉ dí ꞌbäi.
\v 7 Nugä dá tąng bʉ häi, nɛ dá øꞌa nꞌda ra nde bi xiqui: “Saulo, Saulo, hanja gní ʉngagui,” bi ꞌyɛ̨ngui. 
\v 8 Nɛ dá thąti: “Toꞌo i ma Hmu.” Nɛ nuꞌa bi xiqui: “Nugä dra Jesús, dra mɛngu nazaret, guecä gadí ʉngagui.”
\v 9 Nɛ nuꞌʉ ꞌda min ꞌyogähe bi nuꞌa ra nyotꞌi, pɛ him bi ꞌyøꞌa ra nde ngue bi zocä.
\v 10 Nɛ dá änni: “Ma Hmu ꞌbɛꞌa sä ga øtꞌä.” Nɛ nu ra Hmu bi ꞌyɛ̨ngui: “Dami ndantsꞌi ní mba bʉ Damasco, nubʉ, da siꞌa bʉ ꞌbɛꞌa gätho dá sänꞌniꞌi gui ꞌyøtꞌe.”
\v 11 Nɛ nugä ꞌbex dán xädä nangueꞌa ra nyotꞌi, nɛ nuꞌʉ mín ꞌyogähe bi gʉrca ma ꞌyɛ, nɛ dá sømhbe bʉ ja ra hnini Damasco.
\p
\v 12 Nɛ mi ꞌbʉpʉ nꞌda ra hocjąꞌi í Ananías, ngue mi tɛnni xʉn ho yʉ́n tꞌɛ̨di ra Moisés. Nɛ gätho yʉ judío mi ꞌbʉpʉ mi numanho a.
\v 13 Nu ra Ananías bi zøpʉ dám ꞌbʉcä, nɛ bi xiqui: “Ma cuꞌi Saulo, dami hyand ran nɛqui ni dä ya.” Nɛ ꞌbex bi zø ma dä, nɛ bi zä dá nu a ran ꞌyohʉ bʉya. 
\v 14 Nɛ bi xiqui: “Nuꞌa Oją mi thąnde ma ngʉrpa bøtahʉ bi huahnꞌnaꞌi ngue gui pądi ꞌbɛꞌa rá pähä a. Nɛ bi jaꞌaꞌi gá nu rá Hoga Tsꞌʉntꞌʉ, nɛ bi jaꞌaꞌi ngue gá ꞌyørpa rá nde a.
\v 15 Nuya gui mam bʉ ꞌbʉh yʉ jąꞌi ꞌbɛꞌa gá nu nɛ ꞌbɛꞌa gá ꞌyøde.
\v 16 Nɛ hinꞌyʉ ꞌbɛꞌa manꞌda gui tøꞌmi, dami ndantsꞌi gan xixyą, gui ꞌyɛ̨cꞌyɛi majuąni a ra Hmu ngue di ꞌuecꞌaꞌʉ ni tsꞌoqui nangue rá thuhu a ra Hmu,” bi ꞌyɛ̨ngä ra Ananías, bi ꞌyɛ̨nꞌa ra Pablo.
\s Bi man ra Pablo hanja bi mba bʉ ꞌbʉꞌʉ hing yʉ judío
\p
\v 17 Nɛ xø bi ꞌyɛ̨na:
\p ―Nɛ nuꞌbʉ jąmbá pengä ua Jerusalén, dán yąꞌbe Oją bʉ mbo ra dąniją, nɛ nu Oją bi jacä dá nu tengu nꞌda ra tꞌį.
\v 18 Nɛ dá nugä ra Hmu, bi ꞌyɛ̨ngui: “ꞌDahmantho dami pøngua Jerusalén, nguetho hin da tꞌørpamasu ꞌbɛꞌa gui ma nanguecä.”
\v 19 Nɛ dá xiꞌa: “Ma Hmu, nuꞌʉ ma mɛnguhe ua gätho i pądi ꞌbɛꞌa gätho dá øtꞌä, dá mba bʉ gätho ma nijąhe, nɛ dá ʉnba ʉ gätho bi ꞌyɛ̨cꞌyɛi i, nɛ dá cotꞌa fädi ʉ.
\v 20 Nɛ nuꞌbʉ mi mba ntho ra Esteban mi ꞌbäcä bʉ, nɛ ꞌdaꞌangu dá bɛ̨mhbe ʉ bin hote, nɛ dá jamansup yʉ́ pahni ʉ.”
\v 21 Pɛ nu ra Hmu bi xiqui: “Ní mba,  nguetho ga pɛnhꞌna bʉ yabʉ guepʉ ꞌbʉh yʉ jąꞌi ngue hing yʉ judío,” ngubʉ bi xiqui, bi ꞌyɛ̨nꞌa ra Pablo.
\s Nu ra Pablo bi mba ma dä bʉ ꞌbʉh yʉ hmudofʉi
\p
\v 22 Nuꞌʉ bi ꞌyømanho ꞌbɛꞌa bi manꞌa ra Pablo, asta gueꞌbʉ mí ma da mba bʉ ꞌbʉh yʉ jąꞌi hing yʉ judío. Nubʉya bin cuɛꞌʉ yʉ judío i ꞌbäpʉ gue hing yʉ ꞌyɛ̨cꞌyɛi, bi mbafi nɛ bi ꞌyɛ̨na:
\p ―Dá tho na ran ꞌyohʉ, manꞌda xʉn ho ꞌbʉ hin di thoqui dim ꞌbʉi, bi ꞌyɛ̨nꞌʉ.
\p
\v 23 Manꞌda bi mbafi bi huąꞌtꞌ yʉ́ pahni nɛ bi ꞌyɛntsꞌ yʉ fonthäi.
\v 24 Nu ra hmudofʉi bi manda da tsꞌixpʉ mbo ra Pablo, nɛ bi manda da mba mꞌbɛi, ngue ndepꞌa dín juąnꞌna ra Pablo hanja ná mbaꞌʉ yʉ jąꞌi.
\v 25 Nɛ nuꞌbʉ i pa nthątꞌi ra Pablo ngue ra xifani, bi ꞌyänꞌna ra dofʉi ngue mi ꞌbäpʉ:
\p ―Ha i ja nin tꞌɛ̨ dihʉ gui fɛꞌa nꞌda ra romano nuꞌbʉ hin ní tꞌørpa ran juąnbi, bi ꞌyɛ̨nꞌa ra Pablo.
\p
\v 26 Nɛ nuꞌbʉ mi ꞌyøꞌa ra dofʉi a bi man ra Pablo, bi mba bá xiꞌa rá hmu nɛ bi ꞌyɛ̨mbi:
\p ―Dami jamansu ꞌbɛꞌa guí ørpa na ran ꞌyohʉ, nꞌda ra romano na.
\p
\v 27 Nɛ bá ɛ̨ꞌa ra hmudofʉi bʉya, bi ꞌyänꞌna ra Pablo:
\p ―Ha majuąni gueꞌe gra romano.
\p Nu ra Pablo bi dądi:
\p ―Hąha, bi ꞌyɛ̨na.
\p
\v 28 Nu ra hmudofʉi bi ꞌyɛ̨mpꞌa:
\p ―Xʉn ngu ra mbɛti dá jutꞌä ngue dán romanogä.
\p Nu ra Pablo bi xiꞌa:
\p ―Pɛ nugä mbʉdi thoho ma ta bin tꞌun ran tꞌɛ̨di gue din romano, janangueꞌa manꞌda dra romanogä.
\p
\v 29 Nɛ nuꞌa ra hmudofʉi bin su nguetho ya xí duꞌtꞌi nɛ nuꞌa  ra Pablo ra romano na. Janangueꞌa nuꞌʉ nte bi ꞌyørpa ra Pablo, ɛ̨na xtá mbɛi.
\s Nu ra Pablo mi ꞌbäpʉ ja rá junta ʉ yʉ́ hmumbäją yʉ judío
\p
\v 30 Nɛ nuꞌbʉ mi hyatsꞌi, nu ra hmudofʉi nde da bądi hanja í yąpꞌʉ yʉ judío, bi xoctaꞌa ra Pablo mán thuꞌtꞌi, nɛ bi manda dim pɛti yʉ hmumbäją nɛ yʉ́ ngʉrpi yʉ judío. Nɛ bi zixꞌa ra Pablo bʉ dim pɛti.
\c 23
\p
\v 1 Nu ra Pablo ɛ̨mmɛ madín hyɛ̨thʉ bʉ, nɛ bi xifi: 
\p ―Nꞌyohʉ ahʉ, nugä ząi dí øtꞌäꞌa i xicpa ma mbʉi Oją, asta gue ra pa jabʉya, bi ꞌyɛ̨m ꞌbʉ mí dʉꞌmi din yą.
\p
\v 2 Pɛ nu ra Ananías, ra dąmbäją, bi xiꞌʉ gue ꞌdarpʉ mi ꞌbähmbʉ ra Pablo, da mbɛrpa rá nde.
\v 3 Nu ra Pablo bi xiꞌa ra Ananías bʉya:
\p ―Oją da mbɛpꞌaꞌi nguetho yoho ni mbʉi. Sä guí ɛ̨mhbʉ hin dá øtꞌ yʉn tꞌɛ̨di, pɛ go gueꞌahʉ hin guí øthʉ yʉn tꞌɛ̨di, ngue gadí manda da ꞌbɛrca ma nde.
\p
\v 4 Nɛ nuꞌʉ ꞌdarpʉ mi ꞌbähmi bi ꞌyɛ̨mbi:
\p ―Hanja gní thątꞌa ra dąmbäją ngue bi huahnꞌna Oją.
\p
\v 5 Ra Pablo bi dądi:
\p ―Cu ahʉ, hin dí pącä ngue ra dąmbäją a, nuꞌbʉ xcá pącä hin xcá thątä ꞌbʉ, nguetho ntꞌoꞌtꞌi gue hin ga cꞌąmanꞌʉ ma ngʉrpihʉ, bi ꞌyɛ̨mbi.
\p
\v 6 Nɛ nuꞌa ra Pablo ꞌbʉ mí nuꞌʉ ꞌda gue hupʉ ja ra junta, bi bądi hinga ꞌdaꞌingu yʉ́ tꞌɛ̨cꞌyɛi ʉ, nguetho ꞌdaꞌʉ bi dɛnꞌdʉ i man yʉ saduceo nɛ nu miꞌda bi dɛnꞌdʉ i man yʉ fariseo. Janangueꞌa nu ra Pablo bi ꞌyɛ̨mpꞌʉ ꞌbʉpʉ ja ra junta:
\p ―Nꞌyohʉ ahʉ, nugä dra fariseogä, nɛ xin rá tsꞌʉntꞌʉgä nꞌda ra fariseo. Nugä dí ꞌbäcua nɛ guí ørcahʉ ran juąnbi nguetho dí ɛ̨cꞌyɛi gue i ndantsꞌ mahønꞌa ʉ i tu, bi ꞌyɛ̨nꞌa ra Pablo.
\p
\v 7 Nɛ nangueꞌa xí man na ra Pablo bin junthʉ yʉ fariseo ʉ yʉ saduceo, nɛ gätho bin hecpʉ ja ra junta.
\v 8 Nguetho i manꞌʉ yʉ saduceo gue hingui ndantsꞌ mahønꞌa ʉ i tu, nɛ i ma ngue njoꞌo yʉ́m ꞌbɛhni Oją mahɛ̨tsꞌi, nɛ i ma ngue njoꞌo yʉn dąhi. Pɛ nu yʉ fariseo gätho i ɛ̨cꞌyɛi.
\v 9 Bin ja nꞌda ra mbahni, nɛ nubʉya bin ndantsꞌi ꞌdaꞌʉ yʉ́ xänbate ʉ yʉ fariseo, bi ꞌyɛ̨nꞌʉ:
\p ―Nuna ran ꞌyohʉ ꞌbäcua, nte mán tsꞌo bi ꞌyøtꞌe. Xiꞌbʉ majuąni nꞌda ran dąhi o gue nꞌda rám ꞌbɛhni Oją mahɛ̨tsꞌi bin yąui, ndeꞌbʉ hin ga sʉhmbʉ Oją, bi ꞌyɛ̨na.
\p
\v 10 Pɛ nuꞌʉ ꞌbʉpʉ ja ra junta, ɛ̨mmɛ bin sʉꞌʉ, asta gueꞌbʉ mí zu ra hmudofʉi da sɛnꞌinde ra Pablo. Bi xih yʉ́ dofʉi bʉya gue ba jʉcpʉ ꞌbʉh yʉ jąꞌi, nɛ da zix mahønꞌa bʉ ja ra ngundofʉi.
\p
\v 11 Nɛ nuꞌbʉ min xui, ra Hmu mahɛ̨tsꞌi bim ꞌbähmi ra Pablo nɛ bi ꞌyɛ̨mbi:
\p ―O di tu ni mbʉi Pablo, nguetho ngutho gui ma bʉ ja ra dąhnini Roma nanguecä, tengutho gá mangua Jerusalén.
\s Mi ɛ̨na xtá tho ra Pablo
\p
\v 12 Nuꞌbʉ mi hyatsꞌi, ꞌdaꞌʉ yʉ judío ꞌdaꞌingu bi bɛ̨nꞌʉ da hyo ra Pablo, nɛ bi ma jatho di jąꞌtsꞌa bi manꞌʉ. Nɛ bi ꞌyɛ̨nꞌʉ ngue hin din sihmɛ, xíng ra dehe da zi, asta gueꞌbʉ go bi hyo.
\v 13 Nɛ mi pongui yote má ꞌyohʉ ʉ ꞌdaꞌangu bi ma ngue da hyo ra Pablo.
\v 14 Nuꞌʉ bi mba bʉ ꞌbʉh yʉ hmumbäją nɛ yʉ dącꞌyɛi, nɛ bi xifi:
\p ―Nugähe dá mamhbe majuąni ꞌbɛꞌa ga øthe, nɛ hin dan sihmɛhe asta gueꞌbʉ go dá hohe ra Pablo.
\v 15 Janangueꞌa nu ahʉ nɛꞌʉ miꞌda guín ꞌyohʉ bʉ ja ra junta, nuꞌbʉ nixudi gui xihmbʉ ra hmudofʉi ba siꞌa ra Pablo, gui ꞌyɛ̨mbi gue gui ꞌyänhdʉ miꞌda yʉn tꞌänni. Janangueꞌa nugähe bʉya, dan sähe gua täcuahe bʉ ja ra ꞌyu, ga hohe, bi ꞌyɛ̨nꞌʉ.
\p
\v 16 Pɛ nu rá ꞌbɛꞌue ra Pablo bi ꞌyøde ꞌbɛꞌa nde da ꞌyørpa yʉn ꞌyohʉ. Bi mba bʉ ja ra ngundofʉi nɛ bi xiꞌa ra Pablo.
\v 17 Nu ra Pablo bi zonhꞌna nꞌda ra dofʉi bʉya, bi ꞌyɛ̨mbi:
\p ―Dami six na ra tsꞌʉntꞌʉ bʉ bí ꞌbʉh ra hmudofʉi, nguetho i ja ꞌbɛꞌa da xifi.
\p
\v 18 Nu ra dofʉi bi zixpʉ ꞌbʉꞌa rá hmu, nɛ bi xifi:
\p ―Nuꞌa ra Pablo ngue i ofädi, bi zoncagui nɛ bi ꞌyäc ra mate gua siua na ra tsꞌʉntꞌʉ, nguetho ja ꞌbɛꞌa da xiꞌi.
\p
\v 19 Nu ra hmudofʉi bi bɛntpa rá ꞌyɛ ra tsꞌʉntꞌʉ, nꞌdanni bá änni:
\p ―ꞌBɛꞌa guín nde gui xiqui.
\p
\v 20 Nuꞌa ra tsꞌʉntꞌʉ bi xiꞌa ra hmudofʉi bʉya:
\p ―Nuꞌʉ ꞌda yʉ judío bin yąsɛꞌʉ, bi ma da ꞌyäꞌa ra mate ꞌbʉ nixudi, ngue gui sixpʉ mahønꞌa bʉ ja ra junta ra Pablo, nguetho da ꞌyɛ̨nꞌi, da ꞌyän miꞌda yʉn tꞌänni.
\v 21 Pɛ ꞌyo guí øtꞌe ꞌbɛꞌa da xiꞌi, nguetho i pongui yote má ꞌyohʉ yʉ judío ngue xʉn jotꞌ ra ꞌyu, i täcua bʉ ra Pablo. Nuꞌʉ, ꞌdaꞌangu xʉm ma ngue xín din sithe xín din sihmɛ asta gueꞌbʉ go bi hyo ra Pablo. Nɛ i tøpꞌa thoho ꞌbɛꞌa go gui ma, bi tꞌɛ̨mpꞌa ra hmudofʉi.
\p
\v 22 Nu ra hmudofʉi bi hɛcua ra tsꞌʉntꞌʉ ngue njon da xifi, ngue ya xí xiꞌa ra hmudofʉi. Nɛ nubʉya bi xifi da mba.
\s Nu ra Pablo bi mba mꞌbɛhni bʉ ꞌbʉh ra Félix
\p
\v 23 Nubʉya nu ra hmudofʉi bi zohnꞌdʉ yoho yʉ ngʉrpa dofʉi, bi xifi din sä yociɛnto ndofʉi da mba bʉ ra hnini Cesarea ꞌbʉ gʉto nxui. Nɛ da mbähä mi hyąte ma ꞌdɛtꞌa yʉ dofʉi ngue din tøgue, nɛ da mbähä mi yociɛnto yʉ dofʉi ngue i cʉ yʉn tsꞌątꞌɛgui.
\v 24 Nɛ bi manda da thøspa yʉ fani ngue da hyux a ra Pablo. Nɛ bi xifi di jamansu xʉn ho bʉ ꞌyu, asta gueꞌbʉ go bi dä bʉ ꞌbʉh ra tsꞌʉtꞌabi Félix.
\v 25 Nɛ bi ꞌyoꞌtꞌa nꞌda ra søcuą ra hmudofʉi, bi mbɛnpa ra tsꞌʉtꞌabi Félix.
\p
\v 26 Nɛ bi ꞌyɛ̨nꞌa ra søcuą:
\p “Nugä dra Claudio Lisias, dadí zɛnguaꞌi, gra Félix, gra hoga tsꞌʉtꞌabi.
\v 27 Nuna ran ꞌyohʉ na, nuꞌbʉ mi bɛntꞌ yʉ judío, nde xtá hyo. Pɛ dá yąmhbe nangue xʉn ngu yʉ dofʉi, nguetho dá øcä ngue ra romano na.
\v 28 Nugä him mí pądi hanja bi mba ma yąpi, dá sixpʉ ja rá junta yʉ judío.
\v 29 Pɛ nubʉya dá øde ngue høntꞌʉ yʉ́n tꞌɛ̨di zɛhɛ yʉ judío ngue í mba ma yąpi, nɛ hinꞌyʉ ꞌbɛꞌa dí tho, o gue dín ofädi.
\v 30 Nɛ nuꞌbʉ mi sicä ꞌbɛꞌa nde da ꞌyøtꞌ yʉ judío, ngue nde da hyo, ꞌbex dá pɛnhꞌna bʉ guí ꞌbʉi. Nɛ dá xiꞌʉ yʉ nyąpate gue da xiꞌi ꞌbɛꞌa ní mbɛspa ra hnumanꞌʉ. Nɛ høntꞌa dá xiꞌa ya,” bi ꞌyɛ̨nꞌa rá søcuą ra hmudofʉi.
\p
\v 31 Nu yʉ dofʉi bʉya bi ꞌyøtꞌe tengu bi xiꞌʉ yʉ́ hmu. Nuꞌʉ bi zixꞌa ra Pablo ꞌbʉ min xui, asta gueꞌbʉ mí zøm bʉ Antípatris.
\v 32 Nuꞌbʉ mí hyax bʉya, bá peng bʉ yʉ dofʉi gue him madín tøgue. Pɛ nuꞌʉ gätho madín tøgue bi thoqui bi zixꞌa ra Pablo ʉ.
\v 33 Nuꞌbʉ mí zøm bʉ ra hnini Cesarea, bin däp ra søcuą ra tsꞌʉtꞌabi, nɛ bi mba ma dä bʉ ra Pablo.
\v 34 Nɛ nuꞌbʉ mi nuꞌa ra tsꞌʉtꞌabi a ra søcuą, bi ꞌyänꞌna ra Pablo:
\p ―Hapʉ ni häi.
\p Nɛ nu ra Pablo bi xifi gue ra mɛngu bʉ ra häi Cilicia.
\v 35 Nu ra tsꞌʉtꞌabi bʉya bi xiꞌa ra Pablo:
\p ―Nugä ga øcä ꞌbɛꞌa gui mam ꞌbʉ bi zøꞌʉ di yąpꞌiꞌi.
\p Nɛ bi manda da mba mꞌbädi bʉ ja rá ngutsꞌʉtꞌabi ndudąn Herodes.
\c 24
\s Nu ra Pablo bin juąn zɛhɛ bʉ ꞌbʉh ra Félix
\p
\v 1 Nɛ nuꞌbʉ mi juaꞌa cʉtꞌa pa, bi mba bʉ ra Ananías, ra hmumbäją, nɛ ꞌda yʉ dącꞌyɛi, nɛ ra Tértulo ran hocpate. Nɛ bi xiꞌa ra tsꞌʉtꞌabi ꞌbɛꞌa í mba ma yąpi ra Pablo.
\v 2 Nuꞌbʉ mí tsꞌonh ra Pablo, bi dʉꞌmi bin yąpate a ra Tértulo. Nuꞌa bi xiꞌa ra Félix:
\p ―Nugähe dí pąhmbe ngue nangueꞌe i ja ran johya ua ra häi dí ꞌbʉhmbe.
\v 3 Nɛ gäthogähe manꞌda dí ꞌbʉhmbe xʉn ho nangue ꞌbɛꞌa guí øtꞌe. Nɛ gätho yʉ pa dí xiꞌahe ra jamadi nangueꞌe.
\v 4 Nuya hingui ngu ꞌbɛꞌa ga xiꞌaꞌi, pɛ gui ꞌyørca ra mate gui ꞌyøde ꞌbɛꞌa dí xi ahe.
\v 5 Nuna ran ꞌyohʉ, ɛ̨mmɛ ra tsꞌomꞌbäi na, nɛ ɛ̨mmɛ di parba yʉ judío hønbʉ go hapʉ ꞌbʉi ngue gätho ra ximhäi.  Nɛ nuna, rá ngʉrpi ꞌdaꞌʉ yʉ jąꞌi tꞌɛ̨mbi yʉ nazareno.
\v 6 Nuꞌa mí nde xtí tsꞌon ra dąniją bʉ Jerusalén, pɛ nugähe dá bɛnthe, nɛ dí ɛ̨mhbe xcá juąnbahe tengu im mam bʉ ja man tꞌɛ̨dihe.
\v 7 Pɛ nu ra hmudofʉi, ra Lisias a, con rá tsꞌɛdi bá jʉcpʉ mi ꞌbʉhmbe.
\v 8 Nɛ bi xije dan yąfe ua. Nuya, nuꞌbʉ gui ꞌyän zɛhɛ a, gui pądi gue majuąni ꞌbɛꞌa gätho ní mba ma yąpi, bi ꞌyɛ̨mpꞌa ra tsꞌʉtꞌabi a ra Tértulo.
\p
\v 9 Nɛ nuꞌʉ yʉ judío min ꞌyohʉ, ꞌdaꞌangu bi manꞌʉ.
\v 10 Nɛ nu ra tsꞌʉtꞌabi bi un ran tꞌɛ̨di ra Pablo gue din yą bʉya. Nu ra Pablo bi ma, bi ꞌyɛ̨na:
\p ―Nugä i hu ma mbʉi ngue sä dan juąndä ua, nguetho guí pądi ꞌbɛꞌa nám ꞌbʉhmbe dyʉ judíohe, gue xʉn ngu yʉ jɛya guín tsꞌʉtꞌabi ua.
\v 11 Nuꞌbʉ guí nde gui pądi, sä gui pądi, ja mán ꞌdɛꞌmayo ma pa ya gue dá mba bʉ Jerusalén, dá thąnde Oją bʉ.
\v 12 Nɛ nuꞌʉ ma mijudíohe him bi nu ꞌbʉ ꞌboꞌo xcán junthe, xím bi nu ꞌbʉ ꞌboꞌo xcá parbi, xínga guepʉ ja ma dąnijąhe, xínga guepʉ ja ma tꞌʉnijąhe, xínga guepʉ gätho ra hnini.
\v 13 Nuya hingui sä din juąnni xʉn ho nguetho him majuąni ꞌbɛꞌa ní yącpä ya.
\v 14 Pɛ nuya dadín juąndä gue dí tɛndä ra ꞌyu maꞌdaꞌyo, nɛ gueꞌa ɛ̨mbi him majuąni ʉ. Pɛ guetꞌa ra ꞌyu mí tɛnꞌdʉ ma ngʉrpa bøtahe, gue mí numansu Oją nguetho dí ɛ̨cꞌyɛi ꞌbɛꞌa gätho mán tꞌoꞌtꞌi bʉ ja rá søcuą yʉ́n tꞌɛ̨di ra Moisés nɛ yʉ́ søcuą yʉ pøngahyą. 
\v 15 Nɛ nugä dí tøꞌmi ꞌbɛꞌa nín ho da ꞌyøtꞌ Oją, tengu i tømpꞌ ya i ꞌbäcua. Nugähe dí ɛ̨cꞌyɛihe ngue gätho xʉn du da ndantsꞌi, nɛꞌʉ bi ꞌyøtꞌ ran ho, nɛꞌʉ bi ꞌyøtꞌ ran tsꞌo.
\v 16 Janangueꞌa gätho dí øtꞌä ꞌbɛꞌa di bɛ̨ngä Oją nꞌdahma hin hapʉ da thįnga ma tsꞌoqui, xínga guepʉ ꞌbʉ Oją xínga guepʉ ꞌbʉh yʉ jąꞌi, bi ꞌyɛ̨na.
\p
\v 17 Nɛ xø bi ꞌyɛ̨na:
\p ―Nɛ nuꞌbʉ mi thogui xʉn ngu yʉ jɛya, bá pengä bʉ Jerusalén ngue ga un yʉn tꞌunni ma mɛnguhe, nɛ ga un yʉn tꞌunni bʉ ja ma dąnijąhe.
\v 18 Nɛ ngubʉ dá øtꞌä bʉ dąniją, dá thąnde Oją. ꞌDaꞌʉ yʉ judío, yʉ mɛngu bʉ ra häi Asia dán tįmhbe bʉ bʉya. Nɛ njom mí ꞌbʉpʉ xʉn ngu yʉ jąꞌi, xíng ra sʉi mi ja bʉ.
\v 19 Nuꞌʉ gue dán tįngähe bʉ, ndeꞌbʉ gueꞌʉ xtambá ꞌyɛ̨cua ʉ, xtá mangua ꞌbʉ ja ꞌbɛꞌa dá øtꞌä bʉ.
\v 20 O gue guehya yʉn ꞌyohʉ ꞌbäcua da ma ꞌbʉ ja ꞌbɛꞌa bi nurcä ꞌbʉ má mbagä bʉ ja ra junta. 
\v 21 Høntꞌa ntsꞌɛdi dá mangä bʉ, nɛ dá ɛ̨mbä ʉ: “Nu ahʉ guí ørcä ran tsꞌɛmbi nam pa ya nguetho dí ɛ̨cꞌyɛi ngue i ndantsꞌʉ i tu,” dá ɛ̨ngä, bi ꞌyɛ̨nꞌa ra Pablo.
\p
\v 22 Nɛ nuꞌbʉ mi ꞌyøꞌa ra Félix ꞌbɛꞌa bi man ra Pablo, ꞌbex bi ma da guah ra junta, nguetho xʉn ngu tsꞌʉ mi pąꞌa ra Félix nangue rá ꞌyu Oją. Nɛ bi xiꞌʉ:
\p ―Nuꞌbʉ dambá ɛ̨cua ra hmudofʉi, ra Lisias, sä ga pącä ꞌbɛꞌa gätho bin ja.
\p
\v 23 Nɛ nuꞌa ra Félix bi manda da thoqui da mba mꞌbädi ra Pablo. Nɛ bi manda ngue da tꞌørpa ran ho nangueꞌa, nɛ nuꞌʉ yʉ́ amigo sä da mba bʉ nɛ di unni ꞌbɛꞌa gätho da hyoni.
\p
\v 24 Nuꞌbʉ mí thoꞌi tsꞌʉ ꞌda yʉ pa, nu ra Félix bá peng bʉ ja ra hnini Cesarea, bán ꞌyoui rá xisu í Drusila, nuꞌa ra judío a. Nɛ bi zonꞌna ra Pablo, ndepe da ma hague dán zä nꞌda da ꞌyɛ̨cꞌyɛi ra Jesucristo.
\v 25 Nɛ nuꞌbʉ mi man ra Pablo nangue ram ꞌbʉi njuąntho, nɛ bi ma ngue di jamansu ꞌbɛꞌa da ꞌyøtꞌa nꞌda, nɛ bi ma din ja ran tꞌänni ꞌbʉ ran zɛgui nangue yʉ tsꞌoqui, nu ra Félix bin su bʉya, nɛ bi xifi:
\p ―Høntꞌa gá xic ya, ꞌbɛ ním ꞌbähma bʉ ja ra fädi mahønꞌa, nɛ nuꞌbʉ da bongui ga zonꞌnaꞌi mahønꞌa, bi tꞌɛ̨mpꞌa ra Pablo.
\p
\v 26 Nu ra Félix mí ɛ̨na xtán guꞌtꞌi tsꞌʉ, nꞌdahma xtí thøꞌa ra Pablo. Janangueꞌa njąntꞌa thoho min zohni nɛ min yąui.
\v 27 Nɛ nuꞌbʉ mi guaꞌa nyojɛya bi mba ma poni a ra Félix, nɛ bi hyuꞌa ra Porcio Festo. Nu ra Félix ꞌbʉ mí bøm bʉya, bi zopʉ ra Pablo bʉ ja ra fädi, nguetho mí su da numanꞌʉ yʉ judío ꞌbʉ xtí hocpi.
\c 25
\s Nu ra Pablo din juąn bʉ ꞌbʉh ra Festo
\p
\v 1 Nu ra Festo bi mba bʉ ra häi guepʉ din tsꞌʉtꞌabi, nɛ hyupa bim ꞌbʉpʉ ra hnini Cesarea, bi mba bʉ ra hnini Jerusalén bʉya.
\v 2 Nubʉ Jerusalén, yʉ hmumbäją nɛ yʉ́ ngʉrpi yʉ judío bi xiꞌa ra Festo, bi nyąpi nangue ra Pablo.
\v 3 Nɛ bi ꞌyørpa tsꞌɛdi bi ꞌyäp ra mate ngue da zohna ra Pablo ngue da zøm bʉ Jerusalén, nguetho im bɛ̨nꞌʉ da gorpa bʉ ꞌyu, gue nde da hyo.
\v 4 Pɛ nu ra Festo bi xifi ngue ofädi bʉ Cesarea ra Pablo, nɛ “mi tsꞌʉtho ga mbagä ya,” bi ꞌyɛ̨mbi.
\p
\v 5 Nɛ bi xifi:
\p ―Ndeꞌbʉ ga mbähä ꞌda ahʉ gue ja ni tsꞌɛdihʉ, nɛ nuꞌbʉ ja mán tsꞌo bi ꞌyøtꞌa, sä gui yąfʉ.
\p
\v 6 Nu ra Festo, masque mbɛ man ꞌdɛtꞌa pa bim ꞌbʉpʉ Jerusalén, bi mba bʉ Cesarea bʉya. Nuꞌbʉ mí hyax bʉya, bi mba bʉ ja rán juąnbate, nɛ bi manda ba tsꞌi ra Pablo.
\v 7 Nɛ nuꞌbʉ mi zøm bʉ ra Pablo, nu yʉ judío ngue bá nɛxpʉ Jerusalén bi mbäꞌtsꞌi. Nɛ ɛ̨mmɛ xʉn ngu ꞌbɛꞌa xʉn tsꞌo í yąpi. Pɛ hingui sä da bøm majuąni ꞌbɛꞌa bi manꞌʉ.
\v 8 Nu ra Pablo bi ma nanguesɛ bʉya:
\p ―Nte dá øtꞌä ngue hingui ho nangue man tꞌɛ̨dihe dyʉ judíohe, xínga gueꞌa ra dąniją, xínga gueꞌa rán tꞌɛ̨di ra hmutsꞌʉtꞌabi bʉ Roma, bi ꞌyɛ̨nꞌa ra Pablo.
\p
\v 9 Nu ra Festo nde da ꞌyøtꞌa dí numanho ʉ yʉ judío, janangueꞌa bi ꞌyänꞌna ra Pablo:
\p ―Ha guí nde gui mba bʉ Jerusalén, guepʉ ba øtꞌa ran juąnbi bʉ, nangue ꞌbɛꞌa í yąpꞌa yʉ judío.
\p
\v 10 Nu ra Pablo bi dądi:
\p ―Hinꞌna, guecua rán säui da tꞌørcä ran juąnbi ua, nguetho bi ꞌdaꞌa ran tꞌɛ̨di ra hmutsꞌʉtꞌabi ꞌbʉpʉ Roma gue gui ꞌyørcä ran juąnbi ua. Nɛ nte mán tsꞌo xtá ørpa yʉ judío, gue gui sixcä bʉ. Nuꞌi guí pądi xʉn ho ngue te dá øtꞌä.
\v 11 Pɛ nuꞌbʉ xtá øtꞌä nꞌda ran tsꞌo gue i man nin tꞌɛ̨di gui hyogui, jatho ga tu ꞌbʉ, hin ga ꞌdagui nangue man dąte. Pɛ nuꞌbʉ him majuąni ꞌbɛꞌa ní yącpä ʉ, njoꞌo nꞌda i ja rán tꞌɛ̨di di dägä bʉ ja yʉ́ ꞌyɛ ʉ. Nugä dí äꞌa ran tꞌɛ̨di gui thocä bʉ ꞌbʉh ra hmutsꞌʉtꞌabi bʉ Roma, bi ꞌyɛ̨nꞌa ra Pablo.
\p
\v 12 Nuꞌbʉ min yąhʉ yʉ́m fätsꞌihʉ a ra Festo, bi xiꞌa ra Pablo:
\p ―Nuꞌbʉ guí ɛ̨na ga dä ahe bʉ Roma, da zä ꞌbʉ, bi ꞌyɛ̨mbi.
\s Nu ra Festo i yąui ra tsꞌʉtꞌabi Agripa
\p
\v 13 Nuꞌbʉ mi thoꞌi ꞌda yʉ pa, nꞌda rá tsꞌʉtꞌabi yʉ judío, ra Agripa na, nɛꞌa rán ju, Berenice, bi zøm bʉ Cesarea di zɛngua a ra tsꞌʉtꞌabi Festo.
\v 14 Nɛ nuꞌbʉ mi ꞌbʉpʉ ꞌda yʉ pa, nu ra Festo bi xiꞌa ra Agripa nangue ra Pablo, bi ꞌyɛ̨mbi:
\p ―O bʉ nꞌda ran ꞌyohʉ, i ofädi, ngue bi zocua ra Félix, í Pablo a.
\v 15 Nɛ nuꞌbʉ má mbagä bʉ Jerusalén, nu yʉ hmumbäją nɛ yʉ dącꞌyɛi ngue yʉ judío bi xicä nangue ra Pablo. Nuꞌʉ mi äp ran ʉnbi nangueꞌa.
\v 16 Nɛ nugä dá xiꞌʉ: “Pɛ nugähe dyʉ romanogähe hingui sä ga hohe nꞌda ꞌbʉ hinda nadí juąnbähe ʉ, nɛ dim ꞌbäpʉ ja yʉ́ hmi toꞌo di yąpi, din yąsɛ.” Ngubʉ dá xifi.
\v 17 Nɛ nuꞌbʉ mi zøcua yʉn yąpate, nuꞌbʉ mi hyatsꞌi, ꞌbex dá mba bʉ ja man juąnbate nɛ dá manda da tsꞌixpʉ a ra Pablo.
\v 18 Nuꞌbʉ mí ꞌbähmbe bʉ ʉ yʉn yąpate, pɛ xínga nꞌdare bi ma gue yʉ tsꞌoqui tengu mím bɛ̨ngä ngue xtá ma.
\v 19 Pɛ høntꞌa nꞌda ram hma madín junthʉ nangue ꞌbɛꞌa mi ɛ̨cꞌyɛi zɛhɛ ʉ yʉ judío. Nɛ nangue nꞌda ran ꞌyohʉ í Jesús nín juntꞌʉ, ngue bi du, pɛ nu ra Pablo ntsꞌɛdi bi ma ngue i ꞌbʉi, bi ꞌyɛ̨na.
\p
\v 20 Nu ra Festo bi thoqui bi ma:
\p ―Nɛ nugä hin dí pącä ga øtꞌä ran juąnbi nangue ꞌbɛꞌa ɛ̨cꞌyɛi yʉ judío. Janangueꞌa dá änꞌna ra Pablo ꞌbʉ nde da mba bʉ Jerusalén, da mba ma juąnbi bʉ.
\v 21 Pɛ nu ra Pablo bi ꞌyäc ran tꞌɛ̨di, nde ga dä bʉ ꞌbʉh ra hmutsꞌʉtꞌabi Augusto bʉ Roma. Dá manda bʉya da ꞌbädi asta gueꞌbʉ bi zä ga pɛhndä bʉ ꞌbʉh ra hmutsꞌʉtꞌabi, ɛ̨nꞌa ra Festo.
\p
\v 22 Nu ra tsꞌʉtꞌabi Agripa bʉya, bi xiꞌa ra Festo:
\p ―Nugä dín nde ga øde ꞌbɛꞌa da manꞌa ran ꞌyohʉ.
\p Bi dąꞌa ra Festo bʉya:
\p ―Nixudi da zä gui ꞌyøde.
\p
\v 23 Manꞌda pa bʉya bi mba bʉ ja rá ngu ran juąnbate ra Agripa nɛ ra Berenice. Nɛ bi mba bʉ mbo gätho ja yʉ́ tsꞌɛdi, min ꞌyohʉ yʉ hmudofʉi nɛ yʉ ngʉrpi bʉ ja ra hnini Cesarea. Nɛ bi tsꞌini xʉn ho nguetho i ja yʉ́tsꞌɛdi. Nɛ nuꞌa ra Festo bi manda da tsꞌixpʉ ra Pablo.
\v 24 Nɛ nubʉya bi ꞌyɛ̨nꞌa ra Festo:
\p ―Nuꞌi gra tsꞌʉtꞌabi Agripa, nɛ ahʉ gyʉn ꞌyohʉhʉ gätho guí ꞌbʉhmbʉ ua ya, guí nuhʉ na ran ꞌyohʉ. Nɛ gätho yʉ judío ꞌbʉpʉ Jerusalén nɛꞌʉ ꞌbʉcua Cesarea madín yąpi nanguehna. Nuꞌʉ njąmꞌbʉ mi ɛꞌtꞌa mi xiqui ngue mi ädi da mba ntho.
\v 25 Pɛ nuꞌbʉ má pącä ngue nte bi ꞌyøtꞌa rán säui dí tho, dá ɛ̨ngä ga pɛnpʉ ꞌbʉh ra hmutsꞌʉtꞌabi bʉ Roma, nguetho mí mansɛ da mba ma dä bʉ.
\v 26 Pɛ hinꞌyʉ ꞌbɛꞌa sä ga oꞌtꞌä a xʉ ꞌyøtꞌe ngue ga pɛnpa ma hmu. Janangueꞌa dá zonhdä na ran ꞌyohʉ, gui ꞌyøhmbʉ tsꞌʉ ꞌbɛꞌa da man ya, ma tsꞌʉtꞌabi Agripa i. Nɛ nuꞌbʉ gá ꞌyøhmbʉ, masque da zä gui xijʉ bʉya ꞌbɛꞌa da zä ga oꞌtꞌä nangue ran yąpi.
\v 27 Nguetho dí ɛ̨na hingui ho ga pɛnpʉ nꞌda ra ofädi, nɛ nte má søcuą da jątsꞌi ngue da mam bʉ hanja i ofädi, bi ꞌyɛ̨nꞌa ra Festo bʉya.
\c 26
\s Nu ra Pablo bin juąn zɛhɛ bʉ ꞌbʉh ra tsꞌʉtꞌabi Agripa
\p
\v 1 Nuꞌa ra Agripa bi xiꞌa ra Pablo:
\p ―Da zä gui mansɛ nangueꞌa zɛhɛ, bi ꞌyɛ̨mbi.
\p Nu ra Pablo bi uąn rá ꞌyɛ nɛ bi ma nanguesɛ. Bi ꞌyɛ̨na:
\p
\v 2 ―I jagä ran johya, nguetho sä dam ꞌbäcä ua ja ni hmi, gra tsꞌʉtꞌabi Agripa, nɛ sä gam mangä nangue ꞌbɛꞌa í yącpä ma mijudíohe.
\v 3 Nguetho guí pądi xʉn ho ꞌbɛꞌa gätho yʉ́n tꞌøtꞌe yʉ judío, nɛ guí pądi ꞌdahma ꞌdanꞌyo ma tꞌɛ̨cꞌyɛihe dyʉ judíohe. Janangueꞌa dí äꞌa ra mate, gui ꞌyøꞌi tsꞌʉ xʉn ho ꞌbɛꞌa gam mangä.
\s Rám ꞌbʉi ra Pablo ꞌbʉ hin ní ꞌyɛ̨cꞌyɛi
\p
\v 4 Nuꞌʉ gätho ma mijudíohe i pądi ꞌbɛꞌa ním ꞌbʉi dá øtꞌä bʉ ꞌbʉh ma mɛnguhe, ꞌbʉ mán tꞌʉhnigä nɛꞌbʉ mám ꞌbʉcä bʉ Jerusalén, asta guehya.
\v 5 Nuꞌʉ hinꞌyʉ ra pähä da ma, pɛ mayaꞌbʉ mi pądi ngue nyaꞌa thoho dá tɛnni xʉn ho tengu man yʉ fariseo. Nu yʉ fariseo manꞌda ɛ̨hya da ꞌyøtꞌ man tꞌɛ̨dihe dyʉ judíohe xinda gueꞌʉ miꞌda.
\v 6 Nuya dí ꞌbäcua ja ran juąnbate, nangueꞌa ꞌbɛꞌa dí ɛ̨cꞌyɛi. Nugä dí ɛ̨cꞌyɛi ꞌbɛꞌa bi xiꞌa Oją ma ngʉrpa bombøtahe, ngue da xoxꞌʉ xʉn du.
\v 7 Nugähe yʉ́m bomꞌbɛto ʉ ꞌdɛꞌmayoho yʉ́ tsꞌʉntꞌʉ ma ngʉrpa bombøtahe ra Jacob, dí ɛ̨hyahe ma pa nɛ ra xui nangue rá ꞌbɛfi Oją. Nɛ nugähe dí tømhbe ꞌbɛꞌa bi man Oją, gue da xoxꞌʉ xʉn du. Nugä dí ɛ̨cꞌyɛi gue majuąni bi dʉꞌmi bi ꞌyøtꞌa, nɛ gueꞌa ní yącpä ya ma mijudíohe, ma tsꞌʉtꞌabi Agripa i.
\v 8 Hanja gní bɛ̨mhbʉ ngue hingui sä Oją da xoxꞌʉ xʉn du, bi ꞌyɛ̨nꞌa ra Pablo.
\s Bi man ra Pablo madí ʉnba yʉ ꞌyɛ̨cꞌyɛi
\p
\v 9 Nɛ xø bi ꞌyɛ̨m mahønꞌa:
\p ―Guec zɛhɛgä, nyaꞌa thoho dá bɛ̨ngä ngue mi ɛ̨ngä xʉn ho ꞌbʉ ga sʉcä ra Jesús, ra mɛngu Nazaret.
\v 10 Nubʉ Jerusalén xʉn ngu yʉ ꞌyɛ̨cꞌyɛi dá cotꞌa fädi, nguetho bi ꞌdacä ran tꞌɛ̨di yʉ hmumbäją. Nɛ nuꞌbʉ mi tꞌɛ̨na da mba ntho, ꞌdaꞌangu dá bɛ̨mhbe.
\v 11 Nɛ xʉn ngu yʉ nidį dá ʉnba ʉ yʉ ꞌyɛ̨cꞌyɛi bʉ ja ma nijąhe dyʉ judíohe. Nɛ dá säpi dá sɛrpa yʉ́ tꞌɛ̨cꞌyɛi. Nɛ nugä ɛ̨mmɛ min cuɛgä nangueꞌʉ, nɛpʉ ja yʉ hnini yatho dá mbagä, dá un ran ʉnbi ʉ, bi ꞌyɛ̨na.
\s Bi mam mahønꞌa ha bin jabʉ bi ꞌyɛ̨cꞌyɛi
\p
\v 12 Nɛ xø bi ꞌyɛ̨m mahønꞌa:
\p ―Nɛ dá cąxä ra søcuą, ngue rán tꞌɛ̨di yʉ hmumbäją, ngue ga ʉnba yʉ ꞌyɛ̨cꞌyɛi. Dá hą ra ꞌyu ná mba bʉ ra hnini Damasco.
\v 13 Nuꞌi ma tsꞌʉtꞌabi Agripa i, nuꞌbʉ mbɛ huxyadi dá nu bʉ ꞌyu nꞌda ra nyotꞌi bí ꞌyɛ̨h mahɛ̨tsꞌi, nɛ manꞌda madí hyätꞌi xínda gue ra hyadi. Nɛ nuꞌa bi hyärpʉ dí ꞌbähmbe.
\v 14 Nɛ nuꞌbʉ gätho má tąnje bʉ häi, dá øcä nꞌda ra nde ngue ma ndesɛ í tsꞌoqui, ra hebreo, i ɛ̨na: “Saulo, Saulo, hanja gní ʉngui. Xʉn hɛ̨i guí øtꞌe, tengu nꞌda ra mbʉndąni i pa ma sʉni ra tꞌo hndepe dim pɛfi xʉn ho, nɛ i nɛte thoho,” bi ꞌyɛ̨ngui.
\v 15 Nɛ nugä dá änni: “Toꞌo i, ma Hmu.” Nu ra Hmu bi dądi: “Nugä dra Jesús, guecä gadí ʉngui.
\v 16 Nuya dami ndantsꞌi, gui ꞌbäi. Nuya dán ꞌyusɛgä ua nꞌdahma gui ma nɛ gan juąnni nangue gätho ꞌbɛꞌa gá nu ya, nɛ gätho ꞌbɛꞌa ga utꞌa mꞌbɛjua.”
\v 17 Nɛ bi ꞌyɛ̨ngui: “Nuya ga pɛhnꞌnaꞌi bʉ ꞌbʉh yʉ jąꞌi hing yʉ judío, nɛ ga jamansu i nangue ꞌbɛꞌa da nde da ꞌyøtꞌaꞌi yʉ judío, nɛ yʉ jąꞌi ngue hing yʉ judío.
\v 18 Nɛ nangue nim hma, ga japi da xoc yʉ́ mbʉi yʉ jąꞌi nɛ him man din ꞌyo bʉ ja ra ꞌbɛxui, pɛ din ja ran nɛqui yʉ́ mbʉi. Nɛ ga japi da ꞌuepʉ ja rá tsꞌɛdi ra zįthu, nɛ din ꞌyo bʉ ja rá tsꞌɛdi Oją ma Ta. Nɛ din ja ra punbi yʉ́ tsꞌoqui. Nɛ da nu ra te maząi ʉ, nɛ gätho ran jąpi ga unni, tengu miꞌda dá ꞌuecä,” bi ꞌyɛ̨ngä ra Jesús, bi ꞌyɛ̨nꞌa ra Pablo.
\s Ra Pablo him bi mbɛsta a bi man ra Hmu ꞌbʉ mín ꞌyusɛ
\p
\v 19 Nɛ nu ra Pablo bi thoqui bi xiꞌa ra tsꞌʉtꞌabi Agripa:
\p ―Nugä hin dá fɛsthoho ꞌbɛꞌa bi xicä ra nde gue bá ɛ̨h mahɛ̨tsꞌi.
\v 20 Rá mbʉdi dá xiꞌʉ ꞌbʉpʉ Damasco, gue di päh yʉ́n ꞌyomfɛ̨ni nɛ din ꞌyo bʉ rá ꞌyu Oją. Nɛ dá xifi da ꞌyøtꞌ ra ꞌbɛfi xʉn ho nguepʉ da fądi xʉ päh yʉ́n ꞌyomfɛ̨ni. Ngutho dá mangä bʉ Jerusalén, nɛpʉ gätho ra häi Judea, nɛ dá xicä yʉ jąꞌi ngue hing yʉ judío.
\v 21 Pɛ nangueꞌa ꞌbɛꞌa dá mangä, nuꞌʉ ꞌda yʉ judío bi bɛntcä bʉ ja ra dąniją, mi nde xta hyogui.
\v 22 Pɛ asta gue yʉ pa jabʉya i fäxcä Oją. Nɛ dí xiꞌʉ ja yʉ́ tsꞌɛdi, nɛ dí xiꞌʉ hinꞌyʉ yʉ́ tsꞌɛdi. Nɛ høntꞌa dí xänbi ꞌbɛꞌa bi man ra Moisés nɛ ꞌbɛꞌa bi man yʉ pøngahyą, ngue bin ja.
\v 23 Nuꞌʉ, bi ma ngue jatho da nu ran ʉnbi ra Cristo, nɛ gueꞌa ra mbʉdi da mba nsotsꞌi bʉ ꞌbʉꞌʉ xʉn du. Da mba nsotsꞌi guepʉ da zä di un ran nɛqui yʉ́ mbʉi ʉ yʉ judío, nɛꞌʉ hing yʉ judío, bi ꞌyɛ̨nꞌa ra Pablo.
\s Ra Pablo ndepe da ꞌyɛ̨cꞌyɛi ra tsꞌʉtꞌabi Agripa
\p
\v 24 Nɛ nuꞌbʉ ngubʉ mi man ra Pablo, nu ra Festo ntsꞌɛdi bi mbafi:
\p ―Nuꞌi gra Pablo, guín gątꞌi, ɛ̨mmɛ xʉn ngu guí pąh ra søcuą janangueꞌa guín gątꞌi.
\p
\v 25 Bi dąꞌa ra Pablo bʉya:
\p ―Hin dí jątꞌä, gra hoga tsꞌʉtꞌabi gra Festo. Pɛ gätho dí mangä majuąni a.
\v 26 Nu ra Agripa in tsꞌʉtꞌabi bʉ ꞌbʉh yʉ judío, i ꞌbʉcua, i pądi nangue ꞌbɛꞌa gätho dím mangä. Janangueꞌa hin dí su ga mangua ja rá hmi. Nɛ dí hąxa njuąni ngue i pądi, nguetho him bi tꞌągui ꞌbɛꞌa bin ja, bi ꞌyɛ̨nꞌa ra Pablo.
\p
\v 27 Nɛ xø bi xih ra tsꞌʉtꞌabi Agripa:
\p ―Ma tsꞌʉtꞌabi Agripa i, ha guí ɛ̨cꞌyɛi ꞌbɛꞌa bi man yʉ́ pøngahyą Oją. Nugä dí pącä gue guí ɛ̨cꞌyɛi, bi ꞌyɛ̨mbi.
\p
\v 28 Nu ra Agripa bʉya bi dątꞌa ra Pablo:
\p ―Nuꞌi, guí nde ꞌbex ga päcä man ꞌyomfɛ̨ni, ngue ga ɛ̨cꞌyɛi ra Cristo.
\p
\v 29 Nu ra Pablo bi ꞌyɛ̨mpꞌa:
\p ―ꞌBexgue guehya, ogue niyaꞌbʉ tsꞌʉ, Oją i pądi ꞌbɛꞌa dín ndegä. Dín nde gue gui ꞌyɛ̨cꞌyɛi, nɛ ahʉ gätho guí ꞌbʉhmbʉ ua guí øhmbʉ ꞌbɛꞌa dím mangä ya. Nɛ dín nde gui cohmbʉ tengugä, pɛ høntꞌʉ yʉ cadena hinꞌna ʉ, bi ꞌyɛ̨mbi.
\p
\v 30 Nɛ nuꞌbʉ ngubʉ mi man ra Pablo, ra Festo nɛ ra Agripa bim ꞌbäi, nɛꞌa ra Berenice nɛꞌʉ miꞌda mi hupʉ.
\v 31 Nɛ nuꞌbʉ mi mba bʉ thi, nꞌda ngu nꞌda bin yąsɛ ʉ:
\p ―Nuꞌa ran ꞌyohʉ ra Pablo, nte bi ꞌyøtꞌa ngue da du, xínga gueꞌa din ofädi, bin ꞌyɛ̨mzɛhɛ ʉ.
\p
\v 32 Nu ra Agripa bi ꞌyɛ̨mpꞌa ra Festo:
\p ―Nuꞌbʉ hin xtá ma din dä bʉ ꞌbʉh ra hmutsꞌʉtꞌabi bʉ Roma, sä da mba nsoꞌtsꞌi ꞌbʉ, bi ꞌyɛ̨mbi.
\c 27
\s Bi ꞌbɛnpʉ Roma a ra Pablo
\p
\v 1 Nuꞌbʉ ya xí hma ngue ga huhe ra barco, nɛ ga mbäcähe bʉ Roma, ra häi Italia, nu ra Pablo nɛ miꞌda yʉ ofädi bi mba ma däpi a ra ngʉrpadofʉi, rá thuhu ra Julio, rá ngʉrpadofʉi ra hmutsꞌʉtꞌabi Augusto bʉ Roma.
\v 2 Dá huhe ra barco ngue bi nɛxpʉ ra hnini Adramitio, nɛ ɛ̨nꞌʉ da thopʉ ja yʉ hnini bʉ ja ndendeją bʉ ra häi Asia. Dá nɛxhe bʉ bʉya, nɛ dá mbähmbe ra Aristarco, ra mɛngu ra hnini Tesalónica bʉ ra häi Macedonia.
\v 3 Nu manꞌda pa dá sømhbe bʉ ra hnini Sidón, dán säyahe bʉ. Nu ra Julio min yąmanhoui ra Pablo, nɛ bi un ran tꞌɛ̨di da mba bʉ ꞌbʉh yʉ́ amigo. Nɛ nu yʉ́ amigo bi un ran säya.
\v 4 Nɛ nuꞌbʉ má nɛxhe bʉ, dá thohmbe bʉ nthɛ̨ꞌtꞌi ra tꞌʉhäi Chipre i ja bʉ made ra deją. Dá thothe bʉ nꞌdanguadi nguetho ɛ̨mmɛ tsꞌɛdi ran dąhi bʉ njombʉ.
\v 5 Mꞌbɛjua dá thohmbe bʉ ja ra häi Cilicia nɛ ra häi Panfilia ja bʉ ndendeją. Dá sømhbe bʉ ra hnini Mira bʉ ra häi Licia.
\p
\v 6 Guepʉ bi dįm bʉ nꞌda ra barco a ra hmudofʉi ngue bá nɛxpʉ Alejandría, ní mba bʉ ra häi Italia. Nɛ nuꞌa ra hmudofʉi bi jaje dá huhe ra barco.
\v 7 Nɛ xʉn ngu yʉ pa zʉ njante thoho dán ꞌyohe bʉ ja ra deją, nɛ xʉn hɛ̨i dá thohmbe bʉ gätho rá nyąni ra tꞌʉhäi Gnido. Nu ran dąhi him bi jaje njuąntho dá uɛ̨nthe, janangueꞌa yabʉ dá cäthe njombʉ ja ra tꞌʉhäi Creta, guepʉ nthɛ̨ꞌtꞌi ra tꞌʉhäi Salmón.
\v 8 Nɛ xʉn hɛ̨i dá thohmbe bʉ gätho rá nyąni ra tꞌʉhäi Creta, nɛ dá sømhbe bʉ ja yʉ́n säya yʉ barco, tꞌɛ̨mbi Buenos Puertos. Nɛ hinga yabʉ ja ra hnini Lasea.
\p
\v 9 Nɛ xʉn ngu yʉ pa ya dá ꞌbɛhmbe nangue ran dąhi, nɛ ntsꞌutho bʉ dín ꞌyo ra barco bʉ ja ra dehe, nguetho yʉ pa ya i ja yʉn dąhi.
\v 10 Nuꞌa ra Pablo bi xiꞌʉ min ꞌyohʉ:
\p ―Nꞌyohʉ ahʉ dí xi ahʉ, nuꞌbʉ ga thohmbʉ, ga nuhʉ nꞌda ra ꞌyąnthį nguetho xʉn hɛ̨i thoho bʉ dí mba ma ꞌyoni ra barco. Nɛ hinga høntꞌa ra barco nɛ ra ꞌbɛni ga ꞌbɛhmbʉ, pɛ tsꞌʉrpʉ thoho nɛcähʉ ga tuhʉ, bi ꞌyɛ̨mpꞌʉ.
\p
\v 11 Pɛ nu ra hmudofʉi manꞌda mi ɛ̨cꞌyɛi ꞌbɛꞌa bi ma rá mbɛti ra barco nɛ ra hmu ngue madí ꞌyoni, xinda gueꞌa ꞌbɛꞌa mi man ra Pablo.
\v 12 Nubʉ Buenos Puertos hingui ho ngue da gopʉ ra barco yʉ pa xʉ sɛ. Janangueꞌa nuꞌʉ mbɛ gätho ʉ mi ɛ̨na xcá sømhbe bʉ ra hnini Fenice, guepʉ xcám ꞌbʉhmbe yʉ pa xʉ sɛ. Nubʉ Fenice, ra hnini bʉ ra tꞌʉhäi Creta, manꞌda ja yʉ́n säya xʉn ho bʉ yʉ barco, nguetho hin ɛ tsꞌɛdi thopʉ ran dąhi.
\s Ran dąhi bi ꞌyɛn ra deją
\p
\v 13 Nɛ nꞌda ra pa bi pom bʉ bí ꞌyɛ̨h ran dąhi, nɛ hinga ntsꞌɛdi i ꞌyo. Nɛ ɛ̨nꞌʉ xʉn ho ꞌbʉ da thogui. Janangueꞌa bi gʉxꞌa ra tꞌɛgui mi o bʉ mbo ra dehe, ngue rán tsꞌąmmi ra barco. Dá thohmbe bʉya, zʉ njante thoho á thoꞌa ndendeją ra barco bʉ ra tꞌʉhäi Creta.
\v 14 Nɛ ꞌbex bá ɛ̨ꞌa nꞌda ran dąhi ɛ̨mmɛ ntsꞌɛdi, bá nɛxpʉ Creta.
\v 15 Nɛ nuꞌbʉ mí mbʉdi bi ndøn ra barco ran dąhi, him mí sä da mba ma ꞌyoni bʉya, dán unthe bʉya, nɛ dá tɛndahe ran dąhi bʉ í mba.
\v 16 Nɛ dá cäthe bʉ hɛ̨rpʉ ja ra tꞌʉhäi Clauda i ja bʉ made ra deją, nguetho bi täcꞌi tsꞌʉ ran dąhi ra häi. Nɛ xʉn hɛ̨i bʉ dá jʉxhe bʉ mbo a nꞌda zʉ tꞌʉbarco ngue mí jʉtꞌa ra barco.
\v 17 Nɛ nuꞌbʉ mi cʉrpʉ mbo ra tꞌʉbarco, bi mba mꞌbänba yʉ xąhi a ra barco ngue hin da xøꞌtsꞌ yʉ xithɛ. Nɛ nuꞌʉ bʉya mí supi da ꞌyɛn ran dąhi ra barco bʉ ja ra ꞌbomu, nɛ da dontpʉ guepʉ tꞌɛ̨mbi Sirte. Janangueꞌa bi gącua yʉ́n thäcan dąhi ra barco. Nɛ bi duxtho ran dąhi ra barco bʉ ja ra dehe.
\v 18 Manꞌda pa bʉya bi dʉꞌmi bi hyørpʉ ja ra dehe yʉ ꞌbɛni mi høpʉ mbo ra barco, ndepe hin di hyʉ ra barco, nguetho ɛ̨mmɛ ntsꞌɛdi mi ɛnje ran dąhi. 
\v 19 Nɛ ná hyu pa bʉya dá sosɛgähe, dá hømhbe thi ꞌbɛꞌa gätho mí honi ꞌbʉ di ꞌyon ra barco. 
\v 20 Nɛ xʉn ngu yʉ pa ɛ̨mmɛ mi ja yʉ güi, nɛ nyaꞌa him bin cꞌą ra hyadi, xínga gue yʉ sø ꞌbʉ xʉn xui. Nɛ dá nuhe nꞌda ran dątendąhi ɛ̨mmɛ ntsꞌutho. Nɛ dí su ga tuhe.
\p
\v 21 Nɛ nyaꞌa thoho njom bin sihmɛ. Nu ra Pablo bim ꞌbäi bi ꞌyɛ̨na: 
\p ―Nꞌyohʉ ahʉ ndeꞌbʉ xquí ꞌyøde ꞌbɛꞌa dá mangä. Ndeꞌbʉ xcambán säyahʉ bʉ Creta, nɛ hin xcá nuhʉ ran ʉnbi ya, nɛ hin xquí ꞌbɛh ni ꞌbɛnihʉ.
\v 22 Pɛ nuya, o di tu ni mbʉihʉ, nguetho xínga nꞌda ahʉ gam ꞌbɛhmbʉ, pɛ høntꞌa ra barco dim ꞌbɛdi.
\v 23 Nguetho dám ꞌbäꞌbe nꞌda rám ꞌbɛhni Oją mahɛ̨tsꞌi má xui, gue nugä rá mbɛtigä Oją nɛ dí thąnde a. 
\v 24 Nɛ nuꞌa ram ꞌbɛhni bi xiqui: “O guín su Pablo, nguetho jatho da mba ma däꞌi bʉ ꞌbʉh ra hmutsꞌʉtꞌabi bʉ Roma. Nɛ nuꞌa Oją hin di japi da du ʉ guí ꞌbʉhmbʉ ua ja ra barco, tengu gá ꞌyäpi,” ɛ̨nꞌa rám ꞌbɛhni Oją mahɛ̨tsꞌi.
\v 25 Nuya, nꞌyohʉ ahʉ, dan johyahʉ, nguetho dí ɛ̨cꞌyɛi gue majuąni da ꞌyøtꞌ Oją tengu bi xic rám ꞌbɛhni.
\v 26 Pɛ nu ran dąhi da ꞌyɛnjʉ bʉ ja nꞌda ra tꞌʉhäi i ja bʉ made ra dehe, bi ꞌyɛ̨nꞌa ra Pablo.
\p
\v 27 Nɛ nuꞌbʉ ya xí guaꞌi ꞌdɛꞌma goho ma pa dí ꞌyohe, nubʉya bi ꞌyɛngähe ran dąhi bʉ ja rá xɛqui ra deją tꞌɛ̨mbi Adria, ꞌbʉ min xui. Nɛ nuꞌʉ yʉ mbɛfi gue di ꞌyon ra barco, mím bɛ̨ni hinga yabʉ ja nꞌda ra häi.
\v 28 Nɛ bi ꞌyɛni hangu nan hɛ̨ ra dehe, ꞌdäte ma ꞌdɛꞌmaꞌdato metro nan hɛ̨. Nɛ bi dąnꞌi tsꞌʉ ra barco, bi ꞌyɛni mahønꞌa, nɛ nuya høntꞌi ꞌdäte ma yoto metro nan hɛ̨ ra dehe. Janangueꞌa bi bądi him ma yatho bʉ ndenthe.
\v 29 Nuꞌʉ mi supi da zøm bʉ ndenthe ra barco, gue din thɛhʉ yʉ do. Janangueꞌa bi ꞌyɛntꞌi goho yʉ tꞌɛgui ngue yʉ́n tsꞌąmmi ra barco, bi ꞌyɛntpʉ ja rá xʉthä ra barco, ndepe hin din ꞌyo. Nɛ ɛ̨mmɛ mi xønni din nɛqui.
\v 30 Nu yʉ mbɛfi di ꞌyon ra barco mim bɛ̨ni xtá ꞌdagui, bi cąꞌma manꞌda ra tꞌʉbarco bʉ ja ra dehe. Pɛ bin häte, nguetho ɛ̨na gueꞌʉ yʉ tꞌɛgui xtá ꞌyɛntꞌ miꞌda bʉ ja rá yą ra barco, gue yʉ́n tsꞌąmmi.
\v 31 Pɛ nu ra Pablo bi ꞌyɛ̨mpꞌa ra hmudofʉi, nɛꞌʉ yʉ dofʉi:
\p ―I nde da ꞌdah yʉ di ꞌyon ra barco, pɛ nuꞌbʉ da ꞌdah yʉ, hin da zä gui ponjʉ ꞌbʉ.
\p
\v 32 Nu yʉ dofʉi bʉya bi hyɛcua yʉ́n thątꞌi ra tꞌʉbarco, nɛ bi dux ra dehe, janangueꞌa njom bi ꞌdagui.
\p
\v 33 Nɛ nuꞌbʉ tꞌʉnɛqui tho nuꞌa ra Pablo bi xifi ndeꞌbʉ din sihmɛ. Bi ꞌyɛ̨na:
\p ―Nuya, ná ꞌdɛꞌmagoho ma pa ya ngue mí tutho ni mbʉihʉ, nɛ hin gán sihmɛhʉ.
\v 34 Nuya dí øtꞌahʉ ra tsꞌɛdi gui sihʉ tsꞌʉ ra hmɛ. Nuꞌa dí zac ni jąꞌihʉ a, nɛ guepʉ da zä xínga nꞌda gam ꞌbɛhmbʉ nɛ njon din ʉnbi, xíngui tsꞌʉ. 
\p
\v 35 Nɛ nuꞌbʉ mi juaꞌa bi manꞌa ra Pablo bi hyąca nꞌda ra thuhmɛ, bi un ra jamadi Oją bʉ ja yʉ́ hmi gätho mí ꞌbʉpʉ, nɛ bi xɛni bi dʉꞌmi bi zi.
\v 36 Nuꞌa bi man ra Pablo bi hyurpa yʉ́ mbʉi ʉ, bin sihmɛ tsꞌʉ bʉya.
\v 37 Nɛ nugähe í juaje yociɛnto nɛ hyąte ma ꞌdɛꞌma ꞌdato njąꞌi mi ꞌbʉhmbe bʉ ja ra barco.
\v 38 Nɛ nuꞌbʉ mi juadi bin sihmɛ ʉ, nuꞌa ra trigo mi høpʉ ja ra barco bi hyøm bʉ ja ra dehe, ndepa dí cąh nan hyʉ ra barco.
\s Bi xɛn ra barco ra dehe
\p
\v 39 Nɛ nuꞌbʉ mí hyatsꞌi, him mi pądi ꞌbɛꞌa rá thuhu ra häi bi hyandi. Nuꞌbʉ mi nu mi ja bʉ nꞌda ra ꞌyɛthe gue him mí ja yʉ do, guepʉ mim bɛ̨ni mi sä xtí cʉꞌtꞌ ra barco.
\v 40 Bi hyɛcua yʉ́n thątꞌi yʉn tsꞌąmmi bʉya, bi zopʉ dehe. Nɛ bi xocua yʉ́n thuꞌtꞌi yʉ́n thäcadehe ngue yʉ́m ꞌbäꞌtꞌi ra barco. Nɛ bi ꞌyɛ̨spa mahønꞌa nꞌda ran thäcandąhi. Nu ran dąhi bʉya bi ꞌyon ra barco, nɛ bi dʉꞌmi bi hyäm bʉ ja ra ndendeją.
\v 41 Pɛ nuꞌbʉ má sømhbe hapʉ hingui hɛ̨ ra dehe, dán tįmhbe bʉ yoho yʉ ꞌyɛthe, nꞌda nꞌdanni ní yɛ̨hɛ. Nuꞌa rá yą ra barco bi yʉrpʉ ja ra ꞌbomu nɛ bin dʉ bʉ, nɛ him mi sä da thogui. Pɛ nu rá xʉthä bʉya bi mbʉdi bi xɛn ra dehe, nguetho ntsꞌɛdi din thɛ bʉ yʉ dehe.
\v 42 Nu yʉ dofʉi bʉya, ɛ̨na da hyo yʉ ofädi, ngue mi supi din xaha, da ꞌdagui.
\v 43 Pɛ nu ra hmudofʉi him mi ndepe gue nɛ ra Pablo da tho, him bi japi da ꞌyøtꞌe ꞌbɛꞌa mim bɛ̨nꞌʉ
yʉ dofʉi bʉya. Bi manda ngue toꞌo pąh nan xaha, ra mbʉdi da zo bʉ ja ra dehe nɛ din xaha, da zøm bʉ ja ra häi.
\v 44 Nɛꞌʉ miꞌda ngue him mi pąh nan xaha, bi ꞌyoxpʉ ja yʉ xithɛ o gue yʉ xɛca barco. Nɛ gätho bi zømanho bʉ ja ra häi.
\c 28
\s Bi zøm bʉ ra häi Malta a ra Pablo
\p
\v 1 Nɛ nuꞌbʉ má søhmbe bʉ ja ra häi, bi sije ngue rá thuhu ra tꞌʉhäi Malta, i ja bʉ made ra dehe.
\v 2 Nu yʉ mɛngu bʉ ɛ̨mmɛ bi ꞌyørcahe ran ho, nguetho bi ꞌyurcahe nꞌda ra sibi nguepʉ dán tąspihe. Bin ꞌye bʉ nɛ xʉ sɛje.
\v 3 Nu ra Pablo bi pɛt yʉ ꞌyontꞌo, bi ꞌyʉspʉ ja ra sibi, ꞌbex bi bønꞌa nꞌda ran dąte pozʉ bʉ ja ra tꞌo, nuꞌbʉ mi zä ra sibi. Nɛ nuna ra pozʉ bi zap rá ꞌyɛ ra Pablo, nɛ bin zʉrpʉ.
\v 4 Nuꞌbʉ mi nu yʉ mɛngu bʉ ngue i zʉrpʉ ja rá ꞌyɛ ra Pablo ra pozʉ, bi ꞌyɛ̨nꞌʉ:
\p ―Masque ra hyodu na ran ꞌyohʉ, masque him bi du bʉ ja ra dehe, pɛ nuya mꞌbɛjua da gutꞌa ꞌbɛꞌa xí ꞌyøtꞌe.
\p
\v 5 Pɛ nu ra Pablo bi huąc rá ꞌyɛ, nɛ bi däh ra pozʉ, nín so bʉ ja ra sibi, nɛ nte mán ʉnbi bi nu ra Pablo.
\v 6 Nɛ nuꞌʉ ꞌbäpʉ, mi tøꞌmi nde da nu ꞌbʉ da nden bʉ bi zapi, o gue da ꞌyagui nɛ ꞌbex da du. Nɛ nuꞌbʉ ná nyaꞌa mi tøꞌmi, hin te bi ja, bi päꞌa mim bɛ̨nꞌʉ. Nɛ ɛ̨nꞌʉ: “Masque nꞌda ra oją na.”
\p
\v 7 Nuꞌa rá tsꞌʉtꞌabi ra tꞌʉhäi Malta, í Publio a, mí jasɛ nꞌda xɛqui rá häi jombʉ dán tąspihe. Nɛ bi xije ga mbähmbe bʉ rá ngu. Nɛ hyu pa dám ꞌbʉhmbe bʉ, nɛ ɛ̨mmɛ xʉn ho bi ꞌyørcähe.
\v 8 Nu rá ta a ra tsꞌʉtꞌabi Publio ya xmí ʉ ꞌbʉ má sømhbe bʉ, mi ja ra pa nɛ ra mbøni. Nu ra Pablo bi mba bʉ da nu, bin yąui Oją nɛ bi gäx rá ꞌyɛ, nɛ ꞌbex bi zä bʉya.
\v 9 Nɛ nuꞌbʉ min ja ꞌbɛꞌa bi ꞌyøtꞌa ra Pablo, gätho mi ꞌbʉpʉ ja ra häi ngue mín zämanꞌʉ bi zøm bʉ, nɛ gätho bi hoqui, bi zä bʉya.
\v 10 Nɛ xʉn ngu yʉn tꞌunni bi ꞌdaje, nɛ nuꞌbʉ má mbäcähe, xø bi ꞌdaje gätho ꞌbɛꞌa ga homhbe bʉ ja ra barco.
\s Bi zøm bʉ Roma ra Pablo
\p
\v 11 Nhyuzna dám ꞌbʉhmbe bʉ ja ra tꞌʉhäi Malta, dá huhe nꞌda ra barco bʉya. Nu ra barco mi hø bʉ gätho yʉ pa xʉ sɛ, ngue bá nɛxpʉ Alejandría. Nu rá thuhu ra barco tꞌɛ̨mbi yʉ gonꞌyohʉ Cástor nɛ Pólux.
\v 12 Nɛ dá huhe ra barco, dá nɛxhe bʉ ra tꞌʉhäi Malta bʉya, nɛ dá sømhbe bʉ nꞌda ra hnini Siracusa, ngue ꞌdanꞌyo ra häi, nɛ hyupa dán dehe bʉ.
\v 13 Dá nɛxhe bʉ, nɛ dá cäthe bʉ ja ndendeją asta gueꞌbʉ go má sømhbe bʉ ra hnini Regio. Nɛ manꞌda pa bʉya bin ꞌyo xʉn ho ran dąhi, nɛ ná yopa dá sømhbe bʉ ra hnini Puteoli, gue ra häi Italia, nɛ dá cącähe bʉya.
\v 14 Nubʉ, dá tįmhbe ꞌdaꞌʉ yʉ cu nangue ra Cristo. Nuꞌʉ bi xije dan säyahe bʉ nyoto pa. Mꞌbɛjua bʉya dá hąxhe ra ꞌyu í pa bʉ ra dąhnini Roma.
\v 15 Nɛ nuꞌʉ yʉ cu nangue ra Cristo mi ꞌbʉpʉ Roma, mi øde ba ɛ̨hmbe bʉ ꞌyu. Bá ɛ̨h pʉya, bi dąje bʉ ja ra hnini Foro de Apio, nɛ bi dąje miꞌda bʉ ra hnini Tres Tabernas. Nɛ nu ra Pablo ꞌbʉ mí nu, bi xi Oją jamadi, nɛ nu Oją bi hyurpa rá mbʉi bʉya.
\v 16 Nɛ nuꞌbʉ má sømhbe bʉ ja ra dąhnini Roma, nu ra hmudofʉi bi dä bʉ yʉ ofädi bʉ ꞌbʉh rá hmu yʉ mbädi. Pɛ nuꞌa ra Pablo bin tꞌun ran tꞌɛ̨di dim ꞌbʉsɛ bʉ ja nꞌda ra ngu, nɛ høntꞌa nꞌda ra dofʉi da mbädi.
\s Bi man rám Hman Oją ra Pablo bʉ Roma
\p
\v 17 Nɛ nuꞌbʉ mi thoꞌan hyupa, nu ra Pablo bi zonꞌdʉ yʉ́ ngʉrpi yʉ judío ngue mí ꞌbʉpʉ. Nɛ nuꞌbʉ mim pɛti bʉ ꞌbʉꞌa ra Pablo, bi ꞌyɛ̨mbi:
\p ―Man ꞌyohʉ ahʉ, nte man tsꞌo dá ørpä ʉ ma mijudíohʉ, xín dá fɛsta yʉ́n thąnde bi thocta ʉ ma ngʉrpa bombøtahʉ, pɛ guehma bi mba ma dägä bʉ ꞌbʉh yʉ romano bʉ Jerusalén.
\v 18 Nɛ nuꞌbʉ mi ꞌyørcä ran juąnbi, nuꞌʉ mi nde xtá hyɛga thoho, nguetho nte dá øtꞌä ngue da thogui.
\v 19 Pɛ nu ma mijudíohʉ him mi nde xtá hyɛga thoho, janangueꞌa dá äh ran tꞌɛ̨di di dägä ua Roma. Pɛ hinꞌyʉ ꞌbɛꞌa dím bɛ̨ni dá yąpä ʉ ma mijudíohʉ.
\v 20 Janangueꞌa dá zohnꞌnahʉ dan nuhʉ nɛ dan yąhʉ. Nujʉ dyʉ israelhʉ, dí tømhbʉ din ja ꞌbɛꞌa bi man Oją gue din ja. Pɛ dí ɛ̨cꞌyɛi ngue ya bi dʉꞌmi bin ja ꞌbɛꞌa bi man Oją, jananjabʉ nthuꞌtꞌigä ra tꞌɛgui ja ua, bi ꞌyɛ̨nꞌa ra Pablo.
\p
\v 21 Nuꞌʉ bi xiꞌa ra Pablo:
\p ―Nugähe nte má søcuą bi ꞌbɛngähe ní ꞌyɛ̨pʉ Judea nangueꞌe. Xínga nꞌda man ꞌyohʉhʉ bí nɛxpʉ, bi man ran tsꞌo nangueꞌe, njoꞌo toꞌo bi yąpꞌaꞌi.
\v 22 Pɛ dín nde gui xije tsꞌʉ ꞌbɛꞌa guím bɛ̨ni, nguetho hønbʉ bi zä i hma hingui ho ꞌbɛꞌa guí ɛ̨cꞌyɛihʉ, bi 
ꞌyɛ̨nꞌʉ.
\p
\v 23 Nɛ nuꞌʉ bim pɛti manꞌda ra pa nangueꞌa xí ma, nɛ xʉn ngu ʉ bi zøm bʉ mi ꞌbʉꞌa ra Pablo. Nu ra Pablo bʉya gätho ra pa bi xifi nangue rá ꞌbɛfi i øtꞌ Oją ua ja ra ximhäi, nɛ ꞌbɛpʉ ní manda Oją ʉ yʉ jąꞌi. Bi hyoni ꞌbɛpʉ dí ꞌyɛ̨cꞌyɛi ra Jesús, nɛ bi ꞌyuti hapʉ ntꞌoꞌtꞌi nangue ra Jesús bʉ ja rá søcuą ra Moisés, nɛ yʉ́ søcuą yʉ pøngahyą.
\v 24 Nuꞌʉ ꞌda bi ꞌyɛ̨cꞌyɛi ꞌbʉ mí man ra Pablo, pɛ ꞌdaꞌʉ him bi ꞌyɛ̨cꞌyɛi. 
\v 25 Nɛ nuꞌbʉ him mí säꞌʉ ngue ꞌdaꞌangu da bɛ̨ni, bi mbʉdi bi mba. Pɛ nu ra Pablo manꞌda ram hma bi xiꞌʉ:
\p ―Nuna rá Hogandąhi Oją majuąni bi ma nuꞌbʉ mim pøngahyą ra Isaías, nɛ bi xiꞌʉ ma ngʉrpa bombøtahʉ.
\v 26 Nɛ bi tꞌɛ̨mpꞌʉ:
\q Ní mba bʉ ꞌbʉh ni mijudíohʉ, nɛ gui ꞌyɛ̨mbi:
\q “Nu ahʉ ząi guí øhmbʉ nangue ni zaguhʉ, pɛ hin guí pąhmbʉ ꞌbɛꞌa guí øhmbʉ.
\q Nɛ guín nuhʉ nangue ni dähʉ, pɛ hin guí pąhmbʉ ꞌbɛꞌa guín nuhʉ,”
\m ngubʉ bi ꞌyɛ̨mb yʉ jąꞌi.
\q
\v 27 Nguetho nu yʉ jąꞌi xʉm mɛ yʉ́ mbʉi,
\q nɛ xíngui tsꞌʉ cʉꞌtꞌ yʉ́ zagu ꞌbɛꞌa øde.
\q Nɛ tenguꞌbʉ di tsꞌąntꞌ yʉ́ dä,
\q nguetho su da nu,
\q su da ꞌyøde,
\q nguetho hingui nde di päh yʉ́ mbʉi
\q guepʉ da zä xcá hocpa yʉ́ mbʉi,
\m ɛ̨nꞌa rá Hogandąhi Oją ꞌbʉ mím pøngahyą ra Isaías, bi ꞌyɛ̨nꞌa ra Pablo.
\p
\v 28 Nɛ bi thoqui bi ꞌyɛ̨mbi:
\p ―Dami pąhmbʉ ngue nuya da siꞌʉ hing yʉ judío ꞌbɛpʉ da zä dí zin Oją ʉ, nɛ gätho yʉ pa dí mba bʉ. Nɛ nuꞌʉ, manꞌda da ꞌyøꞌʉ, bi tꞌɛ̨mpꞌʉ yʉ judío.
\p
\v 29 Nɛ nuꞌbʉ mí guaꞌa bi ma ra Pablo, nu yʉ judío bi mba, nɛ bin junzɛhɛ ʉ ꞌbʉ mí mbaꞌʉ, nangue ꞌbɛꞌa bi manꞌa ra Pablo.
\p
\v 30 Nɛ nuꞌa ra Pablo bim ꞌbʉpʉ nyo jɛya bʉ ja ra ngu xí mihi. Nɛ gätho toꞌo bi mba bʉ, bi numanho.
\v 31 Nɛ nu ra Pablo bi ma ꞌbɛpʉ dí manda Oją ʉ, nɛ bi xänbi nangue ma Hmuhʉ ra Jesucristo. Nɛ nuꞌa ra Pablo him mi supi toꞌo da ꞌyøde, nɛ njoꞌo to bi hɛcpi.