\id 1CO
\h 1 CORINTIOS
\toc1 1 CORINTIOS
\mt1 1 CORINTIOS
\mt2 Ná nꞌda ra søcuą bi ꞌyorba ra Pablo ʉ yʉ ꞌyɛ̨cꞌyɛi bʉ ja ra dąhnini Corinto
\c 1
\s Ran zɛngua
\p
\v 1 Ma zi cu ahʉ guí ꞌbʉhmbʉ bʉ ra dąhnini Corinto, dí otꞌahʉ ra søcuą i jaua. Dí zɛngua ahʉ gätho gyʉ ꞌyɛ̨cꞌyɛihʉ Oją. Nɛ nugä drá Pablogä, bi huangä Oją, nɛ rá pähä zɛhɛ bi xiqui gam mangä rám hman ra Jesucristo hønbʉ go hapʉ. Nɛꞌa man ꞌyohʉhʉ ra Sóstenes dí ꞌbʉꞌbe ua, di zɛngua ahʉ.
\v 2 Nuꞌa ra Cristo Jesús bi ꞌuecꞌa ni mbʉihʉ bʉ ja ra tsꞌoqui. Nɛ bi zonꞌnahʉ gui ꞌyørpahʉ rá ꞌbɛfi Oją. Nɛ tenguꞌbʉ ꞌdarpʉ guí ꞌbʉhmbʉ ʉ miꞌda toꞌo gätho i thąnde ma Hmuhʉ ra Jesucristo, ngue nꞌdatꞌa ra Hmu dí comhbʉ ʉ.
\v 3 Nɛ dí äpä Oją ma Tahʉ nɛ ma Hmuhʉ ra Jesucristo ngue di ꞌda ahʉ yʉ́n jąpi, nɛꞌa rán johya gui hyąmhbʉ a.
\s Bi dįn yʉ́n jąpi Oją nguetho i ꞌbʉhmbʉ ra Cristo
\p
\v 4 Bi ꞌda ahʉ yʉ́n jąpi Oją nguetho ꞌdarpʉ guí ꞌbʉhmbʉ ra Cristo Jesús. Gueꞌa ná undä ra jamadi Oją a ya.
\v 5 Nɛ nte di ꞌbɛpʉ ja nim pɛtihʉ, nguetho ꞌdarpʉ guí ꞌbʉhmbʉ ra Cristo. Pɛ gä i ja ahʉ ran ꞌyomfɛ̨ni da zä gui pąhmbʉ xʉn ho a ya, nɛ da zä guim mamhbʉ xʉn ho rá ꞌbɛfi Oją ya.
\v 6 Nɛ gueꞌa rám hman ra Cristo gá hyąmhbʉ, gueꞌa gní bømanhohʉ a ya.
\v 7 Janangueꞌa i juadi xʉn ho rá tsꞌɛdi bi ꞌda ahʉ Oją nangue rá ꞌbɛfi guí øthʉ gätho gní tømhbʉ dí ꞌyɛ̨h mahønꞌa ma Hmuhʉ ra Jesucristo.
\v 8 Nɛ di ja ahʉ Oją gan ząmhbʉ bʉ gueꞌbʉ go rán zɛgui yʉ pa, janangueꞌa nte ma tsꞌoqui da dįnꞌnahʉ ꞌbʉ bá peng ma Hmuhʉ ra Jesucristo.
\v 9 Nguetho dí pąhmbʉ nząi di jąꞌtsꞌa im man Oją, nɛ guesɛ Oją bi zoncahʉ dam ꞌbʉhmbʉ rá Tsꞌʉntꞌʉ ma Hmuhʉ ra Jesucristo.
\s Bin sʉh yʉ ꞌyɛ̨cꞌyɛi
\p
\v 10 Dí äcä ra mate nꞌdatꞌa guim bɛ̨mhbʉ, nguetho guí tɛnhdʉ a ma Hmuhʉ ra Jesucristo. Nɛ ꞌyo guidín hejʉ, pɛ jatho nꞌdatho guim bɛ̨mhbʉ nɛ nꞌdatꞌa gui ꞌyøthʉ.
\v 11 Gueꞌa dí xi ahʉ a, ma zi cu ahʉ, nguetho bi xicä ꞌda yʉ cu ngue yʉ́ mɛnguhʉ ra Cloé, bi xiqui ꞌbɛꞌa guí øthʉ.
\v 12 Nguetho guí ɛ̨mhbʉ ꞌda ahʉ guí tɛngahʉ, nɛ ɛ̨nꞌi ꞌda tɛn ra Apolo, nɛ ɛ̨m miꞌda tɛn ra Pedro, nɛ ɛ̨m miꞌda ngue tɛnꞌna ra Cristo.
\v 13 Pɛ ha guím bɛ̨mhbʉ gá xɛmhbʉ ra Cristo. O xigä ha dá tugä bʉ ja ra pontꞌi nangue ahʉ. Uague guím bɛ̨mhbʉ ngue gán xixyąhʉ nangue ma thuhugä.
\v 14 Pɛ jamadi Oją ngue njoꞌo to dá xixyą ahʉ, høntꞌa ra Crispo nɛ ra Gayo.
\v 15 Nꞌdamhma njon da zä da ma bin xixyą nangue ma thuhugä.
\v 16 Nɛ høntꞌʉ gätho ꞌbʉpʉ rá ngu ra Estéfano dá xixyąbi. Pɛ hin dím bɛ̨ngä ꞌbʉ ꞌboꞌo xcamá xixyąbi miꞌda, uague høntꞌʉ.
\v 17 Nguetho hinga gueꞌa ra ꞌbɛfi bi xicä ra Cristo ga øtꞌ ran xixyą, pɛ bi xiqui gam mangä ran ho maꞌdaꞌyo. Pɛ nuꞌbʉ dím mangä a, pɛ hin dí yą tengu bʉ na yą yʉm bąmhyą, nguetho høntꞌa dí honi da bąh yʉ jąꞌi ma tsꞌoquihʉ í du ra Cristo bʉ ja ra pontꞌi. Janangueꞌa din ja ra tsꞌɛdi ram hma di hocpa yʉ́ tsꞌoqui ʉ.
\s Gueꞌa ra Cristo ní ꞌdajʉ ran ꞌyomfɛ̨ni Oją
\p
\v 18 Pɛ nuꞌa ram hma ngue ra Cristo bi du bʉ ja ra pontꞌi, ɛ̨mbi nte ní mbatho ʉ ní mba bʉ ja ran ʉnbi maząi. Pɛ nujʉ ná mbähä bʉ ja ra temaząi, dí pąhmbʉ gueꞌa ram hma ní zinjʉ Oją ngue bi du ra Cristo bʉ ja ra pontꞌi, bi hoga ma tsꞌoquihʉ. 
\v 19 Nɛ i ɛ̨m bʉ rá tꞌohni Oją:
\q Ga uti ngue nte ní mbatho ʉ im ma jasɛ yʉ́n ꞌyomfɛ̨ni,
\q nɛ ga hącpa yʉ́ tsꞌɛdi zɛhɛ yʉ jąꞌi, ga ɛm bʉ maꞌueni, bi ꞌyɛ̨n Oją.
\m
\v 20 Nguetho bi zän Oją hin te ní mbat ʉ toꞌo ɛ̨na jasɛ yʉ́n ꞌyomfɛ̨ni, nɛꞌʉ ɛ̨mmɛ bin xäsɛ yʉ́m hmansɛ yʉ jąꞌi, nɛꞌʉ ɛ̨na pądi da dąh yʉm hma. Nguetho hingui sä da yąn a nꞌda ʉ nangue yʉ́m hman ʉ.
\v 21 Nɛ bi bɛ̨nsɛ Oją, bi zän bʉya ngue hin dí bą Oją nꞌda ʉ yʉ́n ꞌyomfɛ̨nisɛ. Pɛ bi zänni da yąn ʉ to da hyąnꞌa rám hma nangue ra Cristo bi du, madagueꞌbʉ tꞌɛ̨mbi nte ní mbatho.
\v 22 Nguetho nu ma mijudíohe im bɛ̨ni gueꞌʉ yʉn tꞌøtꞌe mixte da nu ꞌbʉ gueꞌa nꞌda ram hma ngue majuąni. Nɛ nuꞌʉ ꞌda ni mɛnguhʉ ngue hing yʉ judío ahʉ nząi i honsɛ nꞌda ram hma ngue i ɛ̨mb zɛhɛ majuąni.
\v 23 Pɛ nuꞌa ram hma dím mamhbʉ ngue bi du bʉ ja ra pontꞌi ra Cristo, njonguin numanhosɛ a. Nɛꞌʉ yʉ judío i san tho ꞌbʉ i sifi, nɛꞌʉ hing yʉ judío i ɛ̨mbi nte ní mbatho ꞌbʉ i sifi.
\v 24 Pɛ nujʉ ngue bi zoncahʉ Oją, madagueꞌbʉ dyʉ judíohʉ ogue hin dyʉ judíohʉ, pɛ nꞌdatꞌa dí pąhmbʉ i ja rá tsꞌɛdi Oją di hoga ma tsꞌoquihʉ nangueꞌa ra Cristo bi du. Janangueꞌa bi nɛqui ɛ̨mmɛ xʉn ndoho rán ꞌyomfɛ̨ni Oją.
\v 25 Nɛ nuna ra ꞌyu bi zän Oją, pɛ manꞌda di muui na, madagueꞌbʉ tꞌɛ̨mbi hin te ní mbatho, xinda gueꞌʉ yʉ́ ꞌyusɛ bi zän zɛhɛ yʉ jąꞌi. Ngue gueꞌa í tꞌɛ̨mbi hinꞌyʉ rá tsꞌɛdi Oją a, ngue bi du ra Cristo, pɛ manꞌda xʉn ngu bʉ ní nɛqui a, xinda gueꞌʉ gätho yʉ́n tꞌøtꞌe zɛhɛ yʉ jąꞌi.
\v 26 Ma zi cu ahʉ ngue bi zoncahʉ Oją, gam bɛ̨mhbʉ hague dín jahʉ bʉ na nujʉ ra ximhäi, ngue xʉn ngujʉ dyʉ́ ꞌyąmbʉihʉ, nɛ xʉn ngujʉ hinꞌyʉ ma tsꞌɛdihʉ, nɛ xʉn ngujʉ ngue bin hyoya ma tahʉ.
\v 27 Pɛ bi huan Oją ʉ i tꞌɛ̨mbi yʉ ꞌyąmbʉi, nꞌdamhma da mbɛꞌtsꞌ yʉ́ sä ʉ i jasɛ yʉ́n ꞌyomfɛ̨ni. Pɛ gueꞌa í huan Oją ʉ hinꞌyʉ yʉ́ tsꞌɛdi bʉ na nu ra ximhäi, janangueꞌa da mbɛꞌtsꞌ yʉ́ sä ʉ i jasɛ yʉ́ tsꞌɛdi.
\v 28 Nɛ bi huan Oją ʉ nte di muui bʉ na nu ra ximhäi, nɛꞌʉ toꞌo i pa ntsꞌani, pɛ manꞌda in numanho Oją ʉ, nɛ gueꞌa dí ꞌbɛrpa yʉ́ tsꞌɛdi ʉ toꞌo ɛ̨na i ja sɛ yʉ́n tꞌɛ̨di.
\v 29 Janangueꞌa njon di jap Oją din ꞌyɛ̨zɛhɛ.
\v 30 Nɛ bi jajʉ Oją ꞌdarpʉ dám ꞌbʉhmbʉ ra Cristo Jesús, nɛ gueꞌa ní ꞌdajʉ ran ꞌyomfɛ̨ni Oją a, nɛ nangueꞌa ra Cristo ní zimanhojʉ Oją, nɛ gueꞌa í ꞌyørcahʉ Oją ngue yʉ́ tꞌʉhni gahʉ a, nɛ gueꞌa ní yąnjʉ bʉ ja ran tsꞌo.
\v 31 Nguetho i mam bʉ ja rá tꞌohni Oją, hinꞌyʉ ꞌbɛꞌa manꞌda ran ho da zä da manꞌa nꞌda, hinda høntꞌa ran ho bi ꞌyørpa Oją.
\c 2
\s Høntꞌa ram hma ꞌbɛꞌa í du ra Cristo i ja rá tsꞌɛdi
\p
\v 1 Ma zi cu ahʉ, nuꞌbʉ má mbagä bʉ guí ꞌbʉhmbʉ, ngue dá xi ahʉ rám hman Oją majuąni, pɛ hin dá huan thohogä yʉm hma guepʉ da numanhogä ra ximhäi, nɛ hin te dá ma nangue man ꞌyomfɛ̨nisɛ.
\v 2 Nɛ nuꞌbʉ má bɛ̨ni ga mba bʉ guí ꞌbʉhmbʉ, pɛ dá bɛ̨ni høntꞌa ga xi ahʉ ꞌbɛꞌa ín ʉnba ra Jesucristo ꞌbʉ mí du bʉ ja ra pontꞌi.
\v 3 Nɛ nuꞌbʉ mám ꞌbʉhmbʉ bʉ, dá øtꞌä hinꞌyʉ ma tsꞌɛdi, nguetho dá su Oją hin da numanho ꞌbʉ xcá uąspa mam hmansɛ, nɛ dá fɛtꞌi.
\v 4 Nɛ nuꞌbʉ mán yąhʉ bʉ ngue dá xi ahʉ ram hma, hinga gueꞌa mam hmansɛ ngue mahotho bi pät a ni mbʉihʉ, pɛ høntꞌa rá tsꞌɛdi rá Hogandąhi Oją bi zä bi hoc a ni mbʉihʉ.
\v 5 Janangueꞌa hinga gueꞌʉ yʉ́n ꞌyomfɛ̨ni ꞌda yʉn ꞌyohʉ bi ja ahʉ gá ꞌyɛ̨cꞌyɛ̨ihʉ Oją, pɛ høntꞌa rá tsꞌɛdi zɛhɛ Oją bi ja ahʉ gá ꞌyɛ̨cꞌyɛihʉ.
\s Rá Hogandąhi di japi dí fą Oją
\p
\v 6 Pɛ nuꞌa ram hma dím mamhbʉ nangue ra Cristo, go i pą ʉ xʉn ho yʉ́ tꞌɛ̨cꞌyɛ̨i, ngue ran ꞌyomfɛ̨ni majuąni a. Nɛ hinga gueꞌa rán ꞌyomfɛ̨ni ra ximhäi bi bą ʉ xʉn ho yʉ́ tꞌɛ̨cꞌyɛ̨i, xinga gueꞌʉ yʉ́m hmansɛ ʉ yʉ́ ngʉrpi ra ximhäi, nɛ nuꞌʉ mi tsꞌʉtho di ꞌbɛh yʉ́ tsꞌɛdi.
\v 7 Pɛ nu ran ꞌyomfɛ̨ni dím mamhbʉ him mám fądi, pɛgue urcahʉ Oją ya, nangue ra Cristo mi sänni da yąnjʉ ꞌbʉ him mani ꞌyøtꞌ ra ximhäi, nɛ da zixcahʉ bʉ mahɛ̨tsꞌi ní comhbʉ rán ho bʉya.
\v 8 Pɛ xinga nꞌda ʉ i ɛ̨na jasɛ yʉ́ tsꞌɛdi ua ja ra ximhäi ngue i pąrpa rán ꞌyomfɛ̨ni Oją. Nuꞌbʉ xtám bąꞌʉ ꞌda, hin xtí cuarpʉ ja ra pontꞌi a ra Hmu mixte.
\v 9 Pɛ tengu mán tꞌoꞌtꞌi bʉ ja rá tꞌohni Oją:
\q Hin da zä da bąsɛ nꞌda a ran ho bi zän Oją da ꞌyørpa ʉ toꞌo høntꞌa Oją im bɛ̨ni,
\q nɛ njąmꞌbʉ da zä da ꞌyøsɛ nꞌda,
\q nɛ njąmꞌbʉ da zä da nusɛ nꞌda, bi ꞌyɛ̨n rá tꞌohni Oją.
\m
\v 10 Pɛ nujʉ dí pąhmbʉ a, nguetho bi xijʉ rá Hogandąhi Oją. Nɛ nu rá Hogandąhi Oją di ątsꞌi xʉn ho bʉ ja rán ꞌyomfɛ̨ni Oją, nɛ gueꞌa i xijʉ a bʉya.
\v 11 Tengu yʉ jąꞌi hin jon da zä da bąrpa rá mbʉi rá mijąꞌiui, pɛ hinda høntꞌa rá mbʉi zɛhɛ nꞌda i pądi. Nɛ in jabʉ Oją, njon da bąrpi ꞌbɛꞌa mbɛ̨ni, pɛ hinda høntꞌa rá Hogandąhi zɛhɛ i pądi. Nɛ di bɛ̨ngahʉ a.
\v 12 Nguetho bi ꞌdajʉ rá Hogandąhi Oją, nɛ hinga gueꞌa rán ꞌyomfɛ̨ni ra ximhäi, ngue in nde di bɛ̨ngahʉ rán ꞌyomfɛ̨ni Oją, nɛ gätho yʉ́ hogantꞌunni bi ꞌdajʉ nangue rá mate xʉn ndoho.
\v 13 Pɛ nuꞌbʉ dím mamhbʉ rán ꞌyomfɛ̨ni Oją, pɛ hin dí uąspahʉ yʉm hma nangue man ꞌyomfɛ̨ni sɛhʉ, pɛ høntꞌʉ yʉm hma bi xängahʉ rá Hogandąhi Oją, nɛ da zä dí xihmbʉ xʉn ho ʉ toꞌo bin tꞌun rá Hogandąhi Oją.
\v 14 Pɛ nuꞌa hingui ꞌbʉhmi rá Hogandąhi Oją, hingui sä da hyąni ꞌbɛꞌa gätho i xängahʉ rá Hogandąhi Oją, nɛ ɛ̨mbi rám hman a nꞌda ra ꞌyąmbʉi. Nɛ njąmꞌbʉ sä da bądi, hinda høntꞌbʉ dim ꞌbʉhmi rá Hogandąhi Oją.
\v 15 Pɛ nuꞌa ra jąꞌi ngue ꞌbʉhmi rá Hogandąhi Oją da zä da bądi ꞌbɛꞌa nam bønꞌa ꞌbɛꞌa gä i ja, ngue ndaꞌa da numanho nɛ ndaꞌa hin da numanho. Pɛ nuꞌa hing ra ꞌyɛ̨cꞌyɛi hin da zä da bąrpa yʉ́n ꞌyomfɛ̨ni ʉ yʉ ꞌyɛ̨cꞌyɛ̨i.
\v 16 Njon da ꞌyɛ̨nsɛ da bąrpa rán ꞌyomfɛ̨ni Oją ra Hmu, njoꞌo da xifi xʉn ho ꞌbɛꞌa da ꞌyøtꞌ Oją. Pɛ nujʉ dí comhbʉ a rán ꞌyomfɛ̨ni a ra Cristo.
\c 3
\s I comhbʉ Oją rá ꞌbɛfi ʉ yʉ́ mbɛfi
\p
\v 1 Ma zi cu ahʉ, nuꞌbʉ mám ꞌbʉhmbʉ bʉ him bi zä dá xi ahʉ ʉ xʉn hɛ̨i tengu i si ʉ in ꞌyoui xʉn ho rá Hogandąhi Oją. Pɛ dá xi ahʉ tenguꞌbʉ gmí ꞌyothohʉ ua ja ra ximhäi, uague tenguꞌbʉ ja gním ꞌbʉhmbʉ nangue ra Cristo.
\v 2 Pɛ dá xi ahʉ a hingui hɛ̨i tenguꞌbʉ ra xiꞌba thoho dá ꞌda ahʉ, nguetho tenguꞌbʉ hin ní zä gui sihʉ xʉn ho ra hmɛ. Nɛ ngutho ya, guextaꞌa høntꞌa ra xiꞌba da zä gdín sihmɛhʉ.
\v 3 Nguetho hin guín zac ni mbʉihʉ. Nɛ guín nde gam mixte zɛhɛhʉ, jananjabʉ gadín sʉhmbʉ. Pɛ ha hin guí øthʉ tenguꞌbʉ gyʉ jąꞌi thohohʉ ua ja ra ximhäi.
\v 4 Nguetho guím mamhbʉ toꞌo guí tɛnhdʉ, nɛ ꞌdaꞌahʉ guí ɛ̨mhbʉ guí tɛngahʉ, nɛ miꞌda ɛ̨na tɛn ra Apolo. Pɛ gueꞌa gní ꞌyøthʉ tenguꞌbʉ gyʉ́ jąꞌi thohohʉ. 
\v 5 ꞌBɛꞌa dadí muꞌbe a ra Apolo. Ha hin guí pąhmbʉ ngue yʉ́ mbɛfi thoho gäꞌbe Oją, ngue dá fäxaꞌbe gá ꞌyɛ̨cꞌyɛihʉ ra Hmu, nangue ra ꞌbɛfi bin ꞌdacꞌbe nꞌda ngu nꞌda gäꞌbe.
\v 6 Nugä dá tuh ra hmudä bʉ, nɛ nuꞌa ra Apolo bi uąpi, pɛ nuꞌa Oją bi japi bin te nɛ bi bøx ʉ yʉ hmudä.
\v 7 Janangueꞌa hinꞌyʉ rá tsꞌɛdi a bi duh ra hmudä, xinga gueꞌa bi uąpi, pɛ høntꞌa Oją i ja rá tsꞌɛdi ngue bi japi bin te yʉ hmudä a. 
\v 8 Nɛ nugä dí comhmaꞌbɛfiꞌbe a ra Apolo, nɛ nugä dá tuhu, nɛ nuꞌa ra Apolo bi uąpi. Nɛ di ꞌdacꞌbe Oją ꞌbɛꞌa in nde di ꞌdacꞌbe nangue ra ꞌbɛfi dá øtꞌbe nꞌda ngu nꞌda gäꞌbe.
\v 9 Nɛsɛ Oją dí comhbe rá ꞌbɛfi. Nɛ nuꞌahʉ tenguꞌbʉ yʉ́ huąhi ahʉ Oją ngue bi thuhu.
\p Nɛ nuꞌahʉ tenguꞌbʉ nꞌda ra ngu ngue i hø a Oją.
\v 10 Nɛ nugä tenguꞌbʉ nꞌda drá ngʉrpagądo nangue rá mate zɛhɛ Oją, ngue dá fäꞌmi xʉn ho yʉ́ guangujądo a ra ngu. Nɛ nu manꞌda pɛ di thoqui dim pɛpʉ ja a ra ngu. Pɛ nꞌda ngu nꞌda ra mbɛfi ꞌbʉ dim pɛpʉ ja a ra ngu, pɛ i jatho dim pɛfi xʉn ho.
\v 11 Nɛ njon da zä di pärpa a rá guangujądo ra ngu, nɛ høntꞌa ra Jesucristo ngue rá guangu nꞌda rá ngu Oją.
\v 12 Pɛ nuꞌʉ toꞌo di thocꞌa ra ngu, sä da huahni xʉn ho ꞌbɛꞌa da japi. Xʉn ho ꞌbʉ xøtho yʉ do dí føꞌtꞌa ra ngu, nɛ nu rá ꞌbetꞌe, xøtho yʉ tꞌɛgui ʉ. Pɛ ꞌboꞌo im bɛ̨ni dí føꞌtꞌ yʉ za, o gue yʉ ꞌyoxꞌyo, nɛ ꞌboꞌo im bɛ̨ni dí mbetꞌ yʉ paxi.
\v 13 Nɛ nu yʉ́ ꞌbɛfi nꞌda ngu nꞌda yʉ ꞌyɛ̨cꞌyɛi da hnu hangu nangu di muui ꞌbʉ bi zøn ra pa din ja ran juąnbi. Nguetho da zøn ra pa da tsꞌä nangue ra sibi, nɛ da fąh pʉya gueꞌbʉ xʉn ho bi ꞌyøt rá ꞌbɛfi nꞌda ngu nꞌda yʉ ꞌyɛ̨cꞌyɛ̨i.
\v 14 Nɛ nuꞌbʉ nꞌda ra mbɛfi bi hyätꞌ ra sibi a rá ngu bi hyøe, da dąh rán zäbi bʉya.
\v 15 Pɛ nuꞌbʉ bin zø a ra ngu bi hyøe, nɛ nte da dąh rán zäbi bʉya nangue rá ꞌbɛfi bi ꞌyøtꞌe. Nɛ maguepʉ hin xtám bongui, tengu ʉ ꞌda bi ꞌda ꞌbʉ min zø yʉ́ ngu.
\v 16 Pɛ ha hin guí pąhmbʉ ngue gue ahʉ yʉ́ ngu ahʉ Oją, nɛ nu rá Hogandąhi Oją i ꞌbʉpʉ mbo ni mbʉihʉ.
\v 17 Nɛ nuꞌa toꞌo da ꞌyɛ̨na di tsꞌonba rá ngu Oją, ɛ̨mmɛ xʉn ngu yʉn ʉnbi da ꞌyørpa Oją. Nguetho nu rá ngu Oją xʉn ndʉxqui a, nɛ guesɛ ahʉ rá ngu ahʉ Oją.
\v 18 Nɛ hin da zä gui thoqui gan hyäzɛhɛhʉ ngue guim bɛ̨mhbʉ jasɛ nin ꞌyomfɛ̨nihʉ. Pɛ jatho gam pumbɛ̨nihʉ a guím bɛ̨nsɛhʉ, janangueꞌa da zä gui tįmhbʉ a njuąntho ran ꞌyomfɛ̨ni xʉn ho.
\v 19 Pɛ nu rán ꞌyomfɛ̨ni ra ximhäi nte di muui bʉ na nu Oją. Nɛ gueꞌa mán tꞌoꞌtꞌi bʉ rám hman a, ngue nuꞌa nín ꞌyomfɛ̨nisɛ nꞌda ꞌbʉ i ɛ̨na dim mixte, pɛ di jap Oją dim ꞌbɛsɛ bʉ nꞌda bʉya. 
\v 20 Nɛ manꞌda bi man ram hma, ngue nuꞌa toꞌo ɛ̨na jasɛ yʉ́n ꞌyomfɛ̨ni, pɛ go i pą a ra Hmu ngue nte di muui ʉ yʉ́n ꞌyomfɛ̨ni.
\v 21 Janangueꞌa hin guim bɛ̨mhbʉ manꞌda di muui nꞌda ra jąꞌi. Pɛ Oją bi ꞌda ahʉ gätho ni ngʉrpihʉ ngue da mbäx ahʉ. Nɛ gätho ʉ i jaua ja ra ximhäi nɛꞌʉ ꞌbɛꞌa gä i ꞌbʉi, nɛ bi zän Oją di zɛ ahʉ ʉ. 
\v 22 Nɛcä ngue drá Pablogä dí fäx ahʉ, nɛ ra Apolo, nɛ ra Pedro. Pɛ nɛꞌa ꞌbɛꞌa gätho dín nuhʉ ua ja ra ximhäi i fäxcahʉ ga pąhmbʉ Oją, nɛ ra te i fäxcahʉ, nɛ ran dąte, nɛ ra pa i jabʉ ya, nɛ ra pa ba ɛ̨hɛ. Nɛ janangueꞌa gätho ni mbɛtihʉ ʉ.
\v 23 Nguetho yʉ́ mbɛti ahʉ ra Cristo nɛ nu ra Cristo rá mbɛti Oją a.
\c 4
\s Yʉ́ ꞌbɛfi i øtꞌ yʉ́ ꞌbäihʉ ra Cristo
\p
\v 1 Pɛ nugä nɛ ra Apolo, nɛ jatho guim bɛ̨mhbʉ ngue yʉ́ ꞌyɛ̨hɛ gäꞌbe ra Cristo, bin ꞌdacꞌbe ra ꞌbɛfi ngue ga xi aꞌbe rám hman Oją him mám fądi.
\v 2 Pɛ damím bɛ̨mhbʉ, nꞌda ra ꞌyɛ̨hɛ̨ thoho ꞌbʉ bin tꞌun ra ꞌbɛfi, i jatsꞌɛdi tho di jąꞌtsꞌa sifi.
\v 3 Pɛ hin dí ʉrpä a ra güɛnda a guím bɛ̨mhbʉ, ximangutho ʉ miꞌda yʉ jąꞌi ɛ̨ngui hin dí jąꞌtsꞌi. Nɛ xínga guecä i sä ga pąsɛ ꞌbʉ dí jąꞌtsꞌi uague hinꞌna. 
\v 4 Pɛ nu ma mbʉigä dím bɛ̨ni hin dá soh ma ꞌbɛfi. Pɛ madagueꞌbʉ ngubʉ dím bɛ̨nsɛ, pɛ jatho ga tøꞌmi gueꞌbʉ go da nusɛ Oją ꞌbɛꞌa dá øtꞌä.
\v 5 Pɛ hin go mꞌbɛtꞌo gui ꞌyɛ̨mfʉ hingui ho bi ꞌyøtꞌa nꞌda. Pɛ ꞌbɛ gui tømhbʉ ba ɛ̨h ra Hmu, nɛ gätho di nɛqui bʉya ꞌbɛꞌa mim bɛ̨mhbʉ mbo ma mbʉihʉ nꞌda ngu nꞌdajʉ. Nɛ di un Oją bʉya ꞌbɛꞌa rán säui a bi ꞌyøtꞌa nꞌda ngu nꞌda ra ꞌyɛ̨cꞌyɛi.
\v 6 Nu ram hma dí xi ahʉ, ma zi cu ahʉ, nanguecäꞌbe ra Apolo, pɛ nꞌda ran zofo ngue hin da dontsꞌi ꞌbɛꞌa gui ꞌyøthʉ. Nɛ him man guim bɛ̨mhbʉ i ja rá tsꞌɛdi nꞌda ra xänbate, nɛ xín guim bɛ̨mhbʉ nꞌdatho xʉn ho xinda gueꞌʉ miꞌda. Janangueꞌa hin gui thoqui gan ꞌyɛ̨xhʉ.
\v 7 Pɛ toꞌo bi ja ahʉ ngue xʉn ho ahʉ xinda gueꞌʉ miꞌda. Gätho ꞌbɛꞌa i ja ahʉ bi ꞌda ahʉ Oją. Nɛ nuꞌbʉ guí pąhmbʉ bin ꞌdaꞌadahʉ ꞌbɛꞌa gä i ja ahʉ, pɛ hanja gnán ꞌyɛ̨zɛhɛhʉ, tenguꞌbʉ gá tįnsɛhʉ a ran ho i ja ahʉ.
\v 8 Pɛ guí øthʉ tenguꞌbʉ gám hmusɛhʉ, ngue hin te guidí ꞌbɛhmbʉ, nɛ tenguꞌbʉ ya bin ꞌda a ni tsꞌɛdihʉ ngue guidí mandahʉ gätho miꞌda. Pɛ nuya tenguꞌbʉ ya gá sogahe. Pɛ hyøcta hmaha ꞌbʉ xquí søni ngue xtín ja ni tsꞌɛdihʉ, nguetho nɛcähe nꞌdatꞌa xtín ꞌdac ma tsꞌɛdihʉ ꞌbʉ.
\v 9 Pɛ nugähe ngue ma ꞌbäihe ra Cristo, dím bɛ̨mhbe Oją bi ꞌyørcähe ngue i hnuhäigahe xinda gue gätho miꞌda. Nɛ tenguꞌbʉ dyʉ́ ofädihe i pɛꞌtsꞌi da thoje. Nɛ i pa ma ʉnguigahe ꞌbʉ i thengahe ra ximhäi. Nɛꞌʉ yʉ́m ꞌbɛhni Oją mahɛ̨tsꞌi di hyonya thoho nangue ꞌbɛꞌa dí sähe.
\v 10 Nɛ nuje tꞌɛ̨nje dyʉ́ ꞌyąmbʉihe, nguetho dí tɛnhde ra Cristo. Pɛ nuꞌahʉ ɛ̨mmɛ guí homhbʉ da tꞌɛ̨n ahʉ i ja nin ꞌyomfɛ̨nihʉ nguetho guí ɛ̨na guí tɛnhdʉ ra Cristo. Pɛ nugähe hinꞌyʉ ma tsꞌɛdihe bʉ na hnuje, pɛ nu bʉ na hnu ahʉ tenguꞌbʉ ɛ̨mmɛ i ja ni tsꞌɛdihʉ. Nɛ ɛ̨mmɛ i pa ntꞌɛ̨ꞌtsꞌi ahʉ, pɛ nugähe i pa ntsꞌani gähe.
\v 11 Nɛ gätho yʉ pa xʉ thogui, nɛ gätho yʉ pa i jabʉ ya, ɛ̨mmɛ dí sähe ra thuhu, nɛ ra tuthe, nɛ dyʉ́ ꞌyąhehe, nɛ pa mꞌbɛꞌmigahe, nɛ hin hapʉ pøni i ja ma ngumhbe.
\v 12 Nɛ ɛ̨mmɛ dí yähmbe ngue dadím pɛsɛhe nangue ma ꞌyɛhe. Nɛ ɛ̨mmɛ i tsꞌanje, pɛ manꞌda dí äfe rán jąpi Oją nangue ʉ i sante. Nɛ ɛ̨mmɛ pa ma ʉngui gahe, pɛ mpähä thoho dí häthe ꞌbɛꞌa i tꞌørcahe.
\v 13 Nɛ di cꞌąmanꞌʉje, pɛ manꞌda dín zomanhohe. Nɛ ngutho yʉ pa jabʉ ya, i tꞌørcahe tenguꞌbʉ dyʉ́ ngohäihe ra ximhäi ngue hinꞌyʉ ꞌbɛꞌa dadí muje.
\v 14 Pɛ hin dín nde ahʉ gui pɛꞌtsꞌ ni sähʉ nanguehna dí xi ahʉ. Pɛ dadí ꞌda ahʉ nꞌda ran zofo, nguetho tenguꞌbʉ ma tꞌʉhni ahʉ ɛ̨mmɛ dadí huɛ̨cꞌahʉ.
\v 15 Pɛ madagueꞌbʉ xquín nuhʉ ꞌdɛtꞌa mahuąhi ni ngʉrpihʉ i xänꞌnahʉ nangue ra Cristo, pɛ høntꞌa nꞌdatho ni tahʉ i ꞌbʉi, ngue guecä, nguetho rá mbʉdi thoho dá xi ahʉ nangue ra Cristo, jananjabʉ gá ꞌyɛ̨cꞌyɛihʉ bʉya.
\v 16 Janangueꞌa dí äꞌahʉ ra mate ngue gui ꞌyøthʉ tengu dí øtꞌä.
\v 17 Nɛ gueꞌa dá pɛhndä bʉ ra Timoteo, ngue di zɛ ahʉ. Nɛ nuꞌa tenguꞌbʉ majuąni ma tsꞌʉntꞌʉ ngue ɛ̨mmɛ dadí huɛ̨qui, nɛ di jąꞌtsꞌi xʉn ho, nguetho ɛ̨cꞌyɛi xʉn ho a ra Hmu. Nɛ di bɛ̨nꞌnahʉ ngue ꞌbɛꞌa dí øtꞌä ngue dí tɛnni xʉn ho ra Cristo Jesús. Nɛ ngutho dím mangä bʉ hapʉ gätho i ja yʉ́m pɛti yʉ ꞌyɛ̨cꞌyɛi.
\v 18 Nu bʉ guí ꞌbʉhmbʉ, i ꞌbʉpʉ ꞌda im bɛ̨ni jasɛ yʉ́ tsꞌɛdi, im bɛ̨ni ngue hin ga mba bʉ.
\v 19 Pɛ mi tsꞌʉtho ga mba bʉ gan nuꞌahʉ ꞌbʉ da nde Oją. Nɛ ga pądi toꞌo gätho i ɛ̨na i jasɛ yʉ́ tsꞌɛdi. Nɛ hinga høntꞌʉ yʉ́m hma ga øtsꞌe, pɛ gan nu ꞌbʉ majuąni i ja yʉ́ tsꞌɛdi nangue Oją.
\v 20 Nguetho nuꞌbʉ majuąni di manda Oją bʉ ja rá mbʉi nꞌda, hinga høntho da bądi din yą xʉn ho, pɛ din ja ra tsꞌɛdi njuąntho.
\v 21 Ha guín ndehʉ ga fɛmhyą ahʉ ꞌbʉ dá mbagä bʉ, uague guín nde ga huɛ̨cꞌahʉ ꞌbʉ dá søngä bʉ.
\c 5
\s Da thønꞌa thi nꞌda ra ꞌyɛ̨cꞌyɛi bi ꞌyøtꞌe tenguꞌbʉ ran ꞌyomtꞌɛ̨ni
\p
\v 1 Nɛ dí øcä bin thątui rá hømbe nꞌda ra cu. Pɛ nꞌda ran thąti gá ꞌyøthʉ ɛ̨mmɛ xʉn tsꞌotho, tenguꞌbʉ ran ꞌyomtꞌɛ̨ni. Nɛ njoꞌo toꞌo numanho tengu a, xínga gueꞌʉ yʉ jąꞌi hingui ɛ̨cꞌyɛi Oją.
\v 2 Nɛ sä ɛ̨mmɛ guídín ꞌyɛ̨xhʉ guí ɛ̨mhbʉ nte guídí ꞌbɛhmbʉ. Pɛ xingui tsꞌʉ tu ni mbʉihʉ nangue ꞌbɛꞌa bi ꞌyøtꞌa. Hanja ngue hin guí hømhbʉ thi a.
\v 3 Pɛ madagueꞌbʉ njoꞌogä bʉ guí ꞌbʉhmbʉ, pɛ tenguꞌbʉ ꞌdarpʉ dí ꞌbʉhmbʉ, ngue dá sändä a ran ʉnbi da nu a bi ꞌyøtꞌ ra tsꞌoqui, tengu tho ꞌbʉ ya dí ꞌbʉcä bʉ.
\v 4 Pɛ i jatho gätho gam pɛtihʉ nangue rá thuhu ma Hmuhʉ ra Jesucristo. Nɛ tengu thoho ꞌbʉ nɛcä dí ꞌbʉcä bʉ, janangueꞌa dá ꞌda ahʉ ran tꞌɛ̨di i ja ua. Pɛ gan ꞌyohʉ rán tꞌɛ̨di ma Hmuhʉ ra Jesús.
\v 5 Nɛ nuꞌa ran ꞌyohʉ, dami hyømhbʉ thi da bɛntꞌa ra zįthu, di ʉnba rá ngøcꞌyɛi, nꞌdamhma da ꞌyäp rá punbi Oją nangue rá tsꞌoqui. Nɛ da zä da yąn Oją nangue rá mbʉi ꞌbʉ bi zøn ra pa bá peng ra Hmu bʉya.
\v 6 Pɛ hingui sä gan ꞌyɛ̨xhʉ. Ha hin guí pąhmbʉ nꞌda ram hma, ngue tsꞌʉtho ra íxi pɛ i sinni gätho ra jʉni.
\v 7 Dami hyømhbʉ thi a ra nyoꞌixi ngue ran tsꞌo guí ꞌbʉhmbʉ di tsꞌonꞌna nim pɛtihʉ. Janangueꞌa xtán ho ahʉ, tengu ra thuhmɛ an tꞌøtꞌe nangue ra jʉni maꞌdaꞌyo ngue nte ma íxi da mbɛ, i tsꞌi ꞌbʉ ndąbaxjua. Nɛ i jatho dan hojʉ, gueꞌa bi nde a ra Cristo ꞌbʉ mim ꞌbøtsꞌe zɛhɛ bi hoga ma tsꞌoquihʉ. Nɛ gueꞌa ra hmɛpya mi u ʉ yʉ jąꞌi ꞌbʉ ndąbaxjua mi pøxa nꞌda ra tꞌʉdɛꞌyo.
\v 8 Janangueꞌa thocpa thoho høntꞌa xʉn ho ga øthʉ, nɛ høntꞌa ra ꞌyu majuąni ga tɛnhdʉ. Nɛ gueꞌa ra thuhmɛ a ngue hinꞌyʉ ra íxi. Pɛ hin ga øthʉ tengu ra nyoꞌixi, ngue ꞌbɛꞌa gätho dín numanhosɛ nangue man ꞌyomfɛ̨nisɛhʉ, nɛ ꞌbɛꞌa gätho miꞌda xʉn tsꞌo.
\v 9 Pɛ nu ra søcuą dá pɛnꞌnahʉ mamꞌbɛtꞌo, nɛ hin gá pąhmbʉ ꞌbɛꞌa dín nde xcá xi ahʉ, ngue dá xi ahʉ hin gan ꞌyohʉ nꞌda ra ꞌyomtꞌɛ̨ni.
\v 10 Pɛ hin dí ɛ̨n ahʉ him man zohmbʉ ʉ hinga na pądi, madagueꞌbʉ yʉ ꞌyomtꞌɛ̨ni, nɛ yʉ ziyate, nɛ yʉ bɛ̨, nɛꞌʉ thąnde yʉ hyäte oją. Nguetho nuꞌbʉ gui sothohʉ ʉ, nɛ gui ꞌuehmbʉ ua ja ra ximhäi ꞌbʉ. Pɛ hinga gueꞌa dá xi ahʉ a.
\v 11 Pɛ nuꞌa mi nde xcá xi ahʉ, ngue hin gui ꞌyɛ̨mfʉ ni cuhʉ ʉ ꞌda, nɛ xín gui comhbʉ rá ꞌbɛfi Oją nꞌda ꞌbʉ ɛ̨mbi ra cu ꞌbʉ guextaꞌa ran ꞌyomtꞌɛ̨ni øtꞌe o gueꞌbʉ bin thątui a him mi sä xtín thątui, o ran tsꞌiyate, o i thąnde yʉ hyäte oją, o nɛꞌʉ yʉ ʉcuate, o gue ra įti, o gue ra bɛ̨. Pɛ o guín ꞌyohʉ ʉ tengu ʉ, xínga ꞌdarpʉ gan sihmɛhʉ ʉ.
\v 12-13 Nguetho ni ꞌbɛfihʉ gui juąnbahʉ ni miꞌyɛ̨cꞌyɛihʉ ꞌbʉpʉ ja nim pɛtihʉ. Janangueꞌa gui hyømhbʉ thi a bi ꞌyøtꞌ ra tsꞌoqui bʉ guí ꞌbʉhmbʉ. Pɛ nuꞌʉ hinga ná ɛ̨cꞌyɛi, hingui sä ga juąnbahʉ ʉ, høntꞌa Oją di juąnba ʉ.
\c 6
\s Sä din hocpa zɛhɛ yʉ ꞌyɛ̨cꞌyɛi
\p
\v 1 Hanja gnín yąp zɛhɛhʉ bʉ ꞌbʉh ra zɛꞌmi, nuꞌa hing ra ꞌyɛ̨cꞌyɛi. Hanja hinga gueꞌʉ ni miꞌyɛ̨cꞌyɛihʉ guí xihmbʉ di hocꞌahʉ.
\v 2 Ha hin guí pąhmbʉ ngue ga juąnbahʉ ra ximhäi ꞌbʉ rán zɛgui yʉ pa, nguetho yʉ́ tꞌʉhni gahʉ Oją. Hague má guetꞌʉ yʉn sʉi dí øthʉ hin ga hojʉ, nguetho manꞌda hingui hɛ̨i dan hocpahʉ.
\v 3 Nɛ asta gueꞌʉ yʉ́m ꞌbɛhni Oją mahɛ̨tsꞌi ga juąnbahʉ. Ha má guetꞌʉ yʉn juntꞌi dí øzɛhɛhʉ yʉ pa i jabʉ ya ngue hin da zä ga hojʉ.
\v 4 Janangueꞌa nuꞌbʉ ja nꞌda ran juntꞌi, pɛ hin ga xihmbʉ nꞌda ra zɛꞌmi, nguetho hin dí comh ma ꞌbɛfihʉ a.
\v 5 Gueꞌa dí xi ahʉ a, janangueꞌa jatho gui pɛꞌtsꞌ ni sähʉ ꞌbɛꞌa guí øthʉ. Ha njoꞌo nꞌda ahʉ i ja tsꞌʉ ran ꞌyomfɛ̨ni ngueꞌa di hocꞌahʉ nangue ran sʉi guí øthʉ.
\v 6 Ha i jatho da zix rá cu bʉ ꞌbʉh ra zɛꞌmi nꞌda ra ꞌyɛ̨cꞌyɛi, nɛ hing ra ꞌyɛ̨cꞌyɛi a ra zɛꞌmi.
\v 7 Nɛ nuꞌa gní ꞌyøthʉ yʉn juntꞌi, nɛ gueꞌa gním ꞌbɛhmbʉ a. Hanja hin gní hyäthʉ a ran tsꞌo i tꞌøt ahʉ, nɛ hin guídí jafʉ da fɛ̨ ahʉ ꞌbɛꞌa guí pɛshʉ.
\v 8 Hin guí häthʉ, nguetho guesɛ ahʉ guí ørpahʉ ran tsꞌo ni cuhʉ, nɛ guí pɛ̨fʉ ꞌbɛꞌa i pɛꞌtsꞌi.
\v 9 Pɛ ha hin guí pąhmbʉ ngue hin da zä da yʉrpʉ di manda Oją nꞌda ra tsꞌomꞌbäi. Nɛ o sä guim bɛ̨mhbʉ da zin Oją ʉ yʉ ꞌyomtꞌɛ̨ni, o gueꞌʉ i thąnde yʉ hyäte oją, o gueꞌʉ in nutonto yʉ́ xisu yʉ́ mim ꞌyohʉhʉ, o gueꞌʉ di ꞌyąsäba yʉ́ mim ꞌyohʉhʉ  tenguꞌbʉ ra xisu.
\v 10 Nɛ hin da yʉrpʉ di manda Oją ʉ yʉ bɛ̨, o yʉ ziyate, o yʉ įti, o yʉ ʉcuate, o yʉ nɛxmate.
\v 11 In jabʉ gá ꞌyøthʉ ꞌda ahʉ, pɛ bi mba mꞌbeꞌtꞌe ni tsꞌoquihʉ, nɛ guesɛ Oją bi ꞌyøtꞌe yʉ́ tꞌʉhni ahʉ. Nɛ bi hocꞌahʉ nangue a guí ɛ̨cꞌyɛihʉ ra Hmu Jesús, nɛ nangue a guí ꞌbʉhmbʉ rá Hogandąhi ma Ojąhʉ.
\s Rá mbɛti Oją ma jąꞌihʉ
\p
\v 12 Majuąni a ram hma ngue i ja man tꞌɛ̨dihʉ ga øthʉ ꞌbɛꞌa gätho dín ndehʉ. Pɛ mꞌbatho a da bømanho ga øthʉ. Majuąni ngue i ja man tꞌɛ̨dihʉ ga øthʉ ꞌbɛꞌa gätho dín ndehʉ. Pɛ hin gan nde ga øthʉ a da dącpa ma mbʉihʉ.
\v 13 Nɛ majuąni a ram hma nangue ran tsꞌihmɛ, ngue nuꞌbʉ in ndehmɛ ma fohohʉ, dan sihmɛhʉ. Pɛ hinꞌyʉ ꞌbɛꞌa manꞌda ntsꞌänni nangue ma fohohʉ, nɛ da zøn ra pa ngue da man Oją him man dan sihmɛhʉ. Pɛ nuꞌbʉ in nde ran ꞌyomtꞌɛ̨ni ma jąꞌihʉ, hingui sä ga øthʉ a, nguetho nu ma jąꞌihʉ bi zän Oją dim ꞌbʉpʉ ra Hmu.
\v 14 Nɛ da xox Oją ma jąꞌihʉ nangue rá tsꞌɛdi, tengu thoho a ra Cristo bi xox ꞌbʉ mi du.
\v 15 Ha hin guí pąhmbʉ ngue nu ma jąꞌihʉ, gueꞌa rá jąꞌi ra Cristo a. Ha da zä ga hąjʉ nꞌda xɛqui rá jąꞌi ra Cristo, ngue ga øtꞌ ran ꞌyomtꞌɛ̨ni, tenguꞌbʉ nꞌdanjąꞌi tho ga øtꞌbe nꞌda ra xisu ra ꞌyomtꞌɛ̨ni. Pɛ hingui sä ga øthʉ tengu a.
\v 16 Pɛ gueꞌa i øtꞌ ra ꞌyomtꞌɛ̨ni bʉ na nu Oją, tengu bi mam bʉ ja rá tꞌohni, ngue nuꞌʉ mi yonjąꞌi, pɛgue bi ꞌyøtꞌe tengʉꞌbʉ nꞌdanjąꞌi tho bi gohi. 
\v 17 Pɛ nuꞌa ra jąꞌi ꞌbʉ in ꞌyoui ra Cristo, tenguꞌbʉ nꞌdanjąꞌi tho da ꞌyøtꞌui.
\v 18 Janangueꞌa da zä gui ꞌdahmbʉ bʉya nangueꞌa ran ꞌyomtꞌɛ̨ni. Nguetho nu miꞌda yʉ tsꞌoqui di tsꞌonba bʉ maxøtsꞌe rá ngu Oją, pɛ nu ran ꞌyomtꞌɛ̨ni di tsꞌonba bʉ mbo rá ngu Oją.
\v 19 Ha hin guí pąhmbʉ ngue nu ni jąꞌihʉ rá ngusɛ rá Hogandąhi Oją a, nguetho ꞌbʉpʉ mbo ma jąꞌihʉ a, gueꞌa bi ꞌdajʉ Oją a. Nɛ nu ni jąꞌihʉ hin ni mbɛti zɛhɛhʉ a.
\v 20 Nguetho Oją bi ꞌyøtꞌe rá mbɛti ahʉ, nɛ tenguꞌbʉ xʉm hmadi bi gutꞌi. Janangueꞌa ga ørpahʉ rá ꞌbɛfi Oją nangue ma jąꞌihʉ nɛ nangue ma mbʉihʉ.
\c 7
\s Ran zofo nangue ran thąti
\p
\v 1 Pɛ nuya ga xi ahʉ a guí ängahʉ. Nɛ ya dí xi ahʉ ngue xʉn ho ꞌbʉ da zɛtꞌa nꞌda ran ꞌyohʉ, hin da hyon rá xisu.
\v 2 Pɛ ɛ̨mmɛ xʉn ngu ran ꞌyomtꞌɛ̨ni i ja. Janangueꞌa manꞌda xʉn ho ꞌbʉ dim ꞌbʉh rá xisu nꞌda ran ꞌyohʉ, nɛ dim ꞌbʉh rá ndø nꞌda ra xisu.
\v 3 Nu ran ꞌyohʉ i jatho dim ꞌbʉhmi xʉn ho rá xisu. Nɛ ngutho ra xisu, i jatho dim ꞌbʉhmi xʉn ho rá ndø.
\v 4 Nguetho nu nꞌda ra xisu hin di manda zɛhɛ a rá jąꞌi zɛhɛ, pɛgue di manda a rá ndø. Nɛ ngutho nꞌda ran ꞌyohʉ hin di manda zɛhɛ a rá jąꞌizɛhɛ, pɛgue di manda a rá xisu, nguetho nꞌdatꞌa ram ꞌbʉi øtꞌe.
\v 5 Pɛ hin da ꞌueꞌa nꞌda nangue rá xisu, nɛ xín da ꞌueh ra xisu nangue rá ndø. Pɛ hinda høntꞌbʉ gá bɛ̨mhbʉ gan yąhʉ Oją ꞌda yʉ pa da zä gui sɛthʉ. Pɛ i jatho ꞌdaꞌangu guim bɛ̨mhbʉ ni xisuhʉ. Nɛ mꞌbɛjua bʉya da zä gan yąhʉ ni xisuhʉ mahønꞌa. Nguetho nuꞌbʉ nyaꞌa tsꞌʉ yʉ pa hin gui yąhʉ ni xisuhʉ, xømhma thoho da hyä ahʉ ra zįthu ꞌbʉ hingui sä gui sɛthʉ.
\v 6 Nuꞌa dí xi ahʉ, tenguꞌbʉ nꞌda ran tꞌɛ̨di. Pɛ hin dadí hɛcꞌahʉ ꞌbʉ guín nde gan thąthʉ o xin guín nde gam ꞌbʉsɛhʉ.
\v 7 Pɛ dí ɛ̨nsɛgä ngue xʉn ho ꞌbʉ gätho dim ꞌbʉsɛ tengugä. Pɛ hingui sä, nguetho nꞌda ngu nꞌda bin ꞌdajʉ ra tsꞌɛdi nangue Oją, ngue ꞌdahma ꞌdanꞌyo ga øthʉ nꞌda ngu nꞌdajʉ.
\v 8 Pɛ dí xi ahʉ, nuꞌʉ toꞌo hinga na din thąti, nɛꞌʉ xʉn du yʉ́ xisu, nɛꞌʉ xʉn du yʉ́ ndø, manꞌda xʉn ho ꞌbʉ ya hin gan simhbʉ, tengu thohogä.
\v 9 Pɛ nuꞌbʉ hingui sä da zɛthoho nꞌda, manꞌda xʉn ho da hyon rám pɛpiui, ngutho nꞌda ra xisu, nɛ ngutho nꞌda ran ꞌyohʉ. Nguetho ɛ̨mmɛ di xømbʉi ngue njongui ꞌbʉhmi.
\v 10 Nɛ dí xi ʉ toꞌo i ꞌbʉhmi yʉ́ ndø, hingui sä da zogui.
\v 11 Nɛ nuꞌbʉ bi zoh rá ndø nꞌda ra xisu, i jatho dim ꞌbʉsɛ, o gue dim ꞌbʉhmi mahønꞌa a rá ndø. Nɛ ximangutho nꞌda ran ꞌyohʉ, hingui sä din xummi a rá xisu. Nɛ nuna ran tꞌɛ̨di i jaua dí xi ahʉ, him mam hmansɛgä, pɛgue rám hma ma Hmuhʉ ra Jesucristo ꞌbʉ miꞌbʉcua ja ra ximhäi.
\v 12 Nɛ nu manꞌda ram hma dí xi ahʉ him bi manꞌa ma Hmuhʉ ꞌbʉ mi ꞌbʉcua. Nɛ nuꞌa ram hma dí xi ahʉ, nuꞌbʉ nꞌda ra cu, ngue hing ra ꞌyɛ̨cꞌyɛi a rá xisu, pɛ nu ra xisu ꞌbʉ in nde ma zä dim ꞌbʉpʉ, pɛ manꞌda xʉn ho ꞌbʉ di thoqui dim ꞌbʉhmi. 
\v 13 Nɛ ngutho nꞌda ra xisu ꞌbʉ ra ꞌyɛ̨cꞌyɛi, nɛ hing ra ꞌyɛ̨cꞌyɛi a rá ndø, pɛ nu rá ndø ꞌbʉ ma zä in nde dim ꞌbʉhmi a rá xisu, pɛ manꞌda xʉn ho ꞌbʉ di thoqui dim ꞌbʉhmi.
\v 14 Nɛ nu Oją di jamansu nꞌda ran ꞌyohʉ ngue hing ra ꞌyɛ̨cꞌyɛi, ngueꞌbʉ ra ꞌyɛ̨cꞌyɛi a rá xisu. Nɛ ngutho nꞌda ra xisu ngue hing ra ꞌyɛ̨cꞌyɛi, pɛ Oją di jamansu ngueꞌbʉ ra ꞌyɛ̨cꞌyɛi a rá ndø. Nuꞌbʉ hin xtan jabʉ, ya hin xtí jąp Oją ni tꞌʉhnihʉ ꞌbʉ. Pɛgue ya mająpi nangue Oją ʉ.
\v 15 Pɛ nuꞌa ran ꞌyohʉ hing ra ꞌyɛ̨cꞌyɛi, o gue nꞌda ra xisu, nɛ nuꞌbʉ in nde da zo a ra ꞌyɛ̨cꞌyɛi mi ꞌbʉhmi, manꞌda xʉn ho ꞌbʉ di thøtho da mba. Nɛ hingui sä da ꞌyørpa ra tsꞌɛdi dim ꞌbʉhmi ꞌbʉ ya hingui nde. Nguetho Oją bi zängahʉ dam ꞌbʉmanhohʉ ngue nte man sʉi din ja.
\v 16 Nɛ nuꞌbʉ guí ꞌbʉhmbʉ ʉ hing yʉ ꞌyɛ̨cꞌyɛi, xømhma thoho da yąn yʉ́ mbʉi ꞌbʉ gui fäxhʉ da dįn ra ꞌyu, nɛꞌahʉ gyʉ́ xisuhʉ, nɛꞌahʉ gyʉn ꞌyohʉhʉ.
\v 17 Pɛ jatho gui ꞌyøthʉ a dí bømanho a rá tsꞌɛdi bi ꞌda ahʉ Oją, nꞌda ngu nꞌda ahʉ, ngue ndaꞌa bi zän Oją gdám ꞌbʉhmbʉ, tengu gmí øthʉ ꞌbʉ hin ní zonꞌnahʉ Oją. Nɛ ngutho dí xicä miꞌda ngue hønbʉ go hapʉ i ja yʉ́m pɛti yʉ ꞌyɛ̨cꞌyɛi.
\v 18 Nɛ nuꞌʉ toꞌo nthɛqui yʉ́ xifani ꞌbʉ mi ꞌyɛ̨cꞌyɛi Oją, pɛ i jatho guextaꞌa rá hmɛpya yʉ́ jąꞌi nguetho yʉ judío. Nɛ nuꞌbʉ nꞌda ngue him mán thɛqui rá xifani, pɛ hin da bɛ̨ni ngue mꞌbɛjua tho da hyɛqui.
\v 19 Nguetho nte ni mba tho ꞌbʉ am hmɛpya uague hinꞌna. Pɛ manꞌda i jatsꞌɛditho ga øthʉ a i xijʉ Oją.
\v 20 Pɛ nꞌda ngu nꞌda da ꞌyøtꞌe ndaꞌa da zä dám ꞌbʉi, tengu mi øt ꞌbʉ hin ní ꞌyɛ̨cꞌyɛi.
\v 21 Nuꞌbʉ gmín ꞌyɛ̨hɛhʉ bʉ ꞌbʉh yʉ jąꞌi ꞌbʉ gmí däp ni mbʉihʉ Oją, pɛ hingui jatho gui päh ni ꞌbɛfihʉ. Pɛ nuꞌbʉ da xi a ni hmuhʉ ngue gui pømhbʉ, pɛ manꞌda xʉn ho ꞌbʉ gui pømhbʉ bʉya.
\v 22 Nɛ nuꞌbʉ nꞌda ra ꞌyɛ̨hɛ, ꞌbʉ mi däp rá mbʉi ra Cristo, bi mba ma thøgue bʉ na nu Oją. Nɛ ximangutho nꞌda ra jąꞌi ngue him bin ꞌyɛ̨hɛ, pɛ bin ꞌyɛ̨hɛ nangue ra Cristo.
\v 23 Ngue nu Oją bi ꞌyøtꞌe yʉ́ tꞌʉhni gahʉ, nɛ tenguꞌbʉ xʉm hmadi bi gutꞌi. Janangueꞌa ꞌyo guí tɛnthohohʉ ꞌbɛꞌa di ꞌbɛp ahʉ gui ꞌyøthʉ yʉ jąꞌi ꞌbʉ i xi ahʉ gui ꞌyøthʉ yʉ tsꞌoqui.
\v 24 Nɛ nꞌda ngu nꞌda ahʉ, ma zi cu ahʉ, gui thoqui gui ꞌyøthohohʉ ni ꞌbɛfihʉ, tengu gmí øthʉ ꞌbʉ hin gní ꞌyɛ̨cꞌyɛihʉ Oją. Pɛ manꞌda gui thoqui gui ꞌyøthʉ xʉn ho guepʉ da numanho Oją.
\v 25 Nɛ nu manꞌda ram hma guí ängahʉ nangueꞌʉ njoꞌo yʉ́ xisu o yʉ́ ndø, pɛ hinꞌyʉ nꞌda ram hma bi mansɛ a ma Hmuhʉ ra Jesucristo ꞌbʉ mim ꞌbʉcua ja ra häi. Pɛ ga xi ahʉ a dím bɛ̨ngä. Nɛ xʉn ho ꞌbʉ gui ꞌyøthʉ a dím mangä, nangue a rá mate ma Hmuhʉ bi ꞌdac ran ꞌyomfɛ̨ni.
\v 26 Nɛ nu mam hmangä dí xi ahʉ ya, nangue njoꞌo yʉ́ xisu o njoꞌo yʉ́ ndø, xʉn ho ꞌbʉ din jatho tengu in ja ya. Nguetho nuꞌʉ yʉ pa jabʉ ya, xʉn hɛ̨itho ꞌbʉ gan nuhʉ yʉn ʉnbi ꞌbʉ dán simhbʉ.
\v 27 Nɛ nuꞌbʉ nꞌda i ꞌbʉh rá xisu, hin da bɛ̨ni ngue da hyɛgui, nɛ nuꞌbʉ nꞌda njoꞌo rá xisu, hin da bɛ̨ni da hyoni.
\v 28 Pɛ nuꞌbʉ guín ndehʉ gan simhbʉ, hin guim bɛ̨mhbʉ ngue ra tsꞌoqui a. Nɛ ngutho ꞌbʉ nꞌda ra hmute da bɛ̨ni din thąti, pɛ hin da ꞌyɛ̨mbi ra tsꞌoqui a. Pɛgue nuꞌbʉ gan simhbʉ, manꞌda xʉn hɛ̨i ram ꞌbʉi gui ꞌyøthʉ, xinda gueꞌbʉ njon xtím ꞌbʉ ahʉ. Nɛ dín nde gan yąn ahʉ nangue ʉ xʉn hɛ̨i.
\v 29 Ma zi cu ahʉ, nuꞌa nam bøn a dí xi ahʉ, him min ngu yʉ pa dam ꞌbʉhmbʉ ua ja ra ximhäi. Janangueꞌa i jatho ga humbahʉ ga juahmbʉ nꞌdihi rá ꞌbɛfi Oją yʉ pa ní mba bʉ. Nɛ nuꞌʉ toꞌo i ꞌbʉh yʉ́ xisu bʉya, nɛ xingui tsꞌʉ da bɛ̨ni da ꞌyɛꞌtsꞌa rá ꞌbɛfi Oją nangue a rá xisu.
\v 30 Nɛ hingui sä nyaꞌa ga ɛshʉ rá ꞌbɛfi Oją ꞌbʉ ya dín nuhʉ ra dumbʉi, nguetho dí xønhdʉ ga juahmbʉ nꞌdihi rá ꞌbɛfi Oją. Nɛ xíngui sä nyaꞌa dan johyahʉ nangue ma amigohʉ, xínga gueꞌʉ dí tämhbʉ nyaꞌa gan numanhohʉ.
\v 31 Nɛ ngutho ʉ toꞌo gätho i øtꞌ yʉ́ ꞌbɛfi zɛhɛ ua ja ra ximhäi, pɛ manꞌda zi tsꞌʉtho da bɛ̨ni. Nguetho mi tsꞌʉtho da guadi ꞌbɛꞌa gätho dín nuhʉ ya.
\v 32 Janangueꞌa dín nde ahʉ ngue manꞌda tsꞌʉtho guim bɛ̨mhbʉ ꞌbɛꞌa di hɛ̨n ahʉ ua ja ra ximhäi. Nɛ nuꞌbʉ nꞌda ran ꞌyohʉ ngue njoꞌo rá xisu, pɛ manꞌda ɛ̨mmɛ da bɛ̨n a rá ꞌbɛfi Oją, nguetho ꞌbʉsɛ, nɛ i honi ꞌbɛꞌa da numanho Oją.
\v 33 Pɛ nuꞌbʉ ya i ꞌbʉh rá xisu, nɛ hinga høntꞌa rá ꞌbɛfi Oją da hyom bʉya, nɛꞌa rá xisu da numanho nɛ da hyonbi ꞌbɛꞌa gätho da hyoni.
\v 34 Nɛ nuꞌa nꞌda ra xisu ngue njoꞌo rá ndø, pɛ manꞌda da zä høntꞌa rá ꞌbɛfi Oją da bɛ̨ni da ꞌyøtꞌe. Pɛ nɛꞌa rá jąꞌi nɛꞌa rá mbʉi høntꞌa rá ꞌbɛfi Oją øtꞌe. Pɛ nuꞌa ra xisu ꞌbʉ ya i ꞌbʉh rá ndø, nɛ da ꞌyøtꞌe dí numanho a rá ndø.
\v 35 Nɛ nuna dí xi ahʉ dín nde ga fäx ahʉ, nɛ hin dín nde ga ʉnꞌnahʉ. Nɛ dín nde ahʉ gui ꞌyøthʉ a xʉn ho, ngue hin di hɛ̨i ni mbʉihʉ ꞌbʉ gui ꞌyøthʉ rá ꞌbɛfi Oją.
\v 36 Pɛ nuꞌbʉ nꞌda ran ꞌyohʉ ngue i ꞌbʉ a nꞌda rá tꞌįxu, nɛ ya bi zøn ra ora din thąti. Nɛ im bɛ̨ni hingui ho ꞌbʉ da ząmmi, nɛ ɛ̨mmɛ in nde rá tꞌįxu din thąti, xʉn ho ꞌbʉ di thąrpa a rá tꞌįxu, nɛ hin da ꞌyɛ̨mbi ra tsꞌoqui a.
\v 37 Pɛ nuꞌbʉ nꞌda ran ꞌyohʉ hin te im bɛ̨n rá mbʉi ngue din thątꞌa rá tꞌįxu, nɛ nuꞌbʉ ja rán tꞌɛ̨di rá ta da zä da xifi, pɛgue manꞌda xʉn ho ꞌbʉ dim ꞌbʉtpʉ. Nɛ nꞌdatꞌa im bɛ̨ni ngue gueꞌa xʉn ho da ꞌyøtꞌa. Nɛ da bądi xʉn ho a bi ꞌyør bʉya.
\v 38 Janangueꞌa nuꞌʉ toꞌo di thąrpa yʉ́ tꞌįxu, xʉn ho i øtꞌe, pɛ nɛꞌʉ to hingui nde di thąrpa yʉ́ tꞌįxu, pɛ manꞌda xʉn ho i øtꞌʉ.
\v 39 Pɛ nuꞌbʉ nꞌda ra xisu bi hyon rá ndø, pɛ i jatho dim ꞌbʉhmi gätho yʉ pa i ꞌbʉ a rá ndø. Nɛ nuꞌbʉ ya bi du a rá ndø, ꞌbʉ in nde din thąt mahønꞌa, xʉn ho ngue din thąti, pɛgue nꞌda rá miꞌyɛ̨cꞌyɛiui din thątui mahønꞌa.
\v 40 Pɛ dí ɛ̨nsɛgä ngue manꞌda din johya ꞌbʉ hin din thąti mahønꞌa. Nɛ dím bɛ̨ni ngutho di bɛ̨ngä rá Hogandąhi Oją.
\c 8
\s ꞌDa yʉn tꞌänni nangue yʉ ꞌbøtsꞌe
\p
\v 1 Nɛ nuya dín nde ga xi ahʉ a gá ꞌyängahʉ, ꞌbʉ da zä gui sahʉ a ra ngø xí ꞌbøspa ʉ yʉ hyäte oją, uague hinꞌna. Nɛ majuąni guím mamhbʉ ngue gätho gahʉ dí pąhmbʉ xʉn ho a. Pɛ nuꞌa gní pąhmbʉ, gueꞌa gnín ꞌyɛ̨xtahʉ a. Pɛ manꞌda gueꞌa ran huɛ̨cate nan te rá ꞌbɛfi Oją a.
\v 2 Pɛ nuꞌbʉ guí ɛ̨nsɛhʉ guí pąhmbʉ ran ꞌyomfɛ̨ni, pɛ guepʉ na fąpʉ bʉya ngue hinga ná pąhmbʉ xʉn ho, nguetho guidín ꞌyɛ̨xhʉ. 
\v 3 Pɛ nuꞌbʉ majuąni dín numanhohʉ Oją, nɛ dí comhbʉ rán ꞌyomfɛ̨ni Oją ꞌbʉ.
\v 4 Nuya, nuꞌʉ ꞌbɛꞌa gätho bí ꞌbøspa ʉ yʉ hmite, pɛ dí pąhmbʉ hing yʉ oją ʉ ɛ̨mbi nꞌyoui. Nɛ dí pąhmbʉ nꞌdatho Oją ꞌbʉi, nɛ høntꞌa i ja rá tsꞌɛdi a.
\v 5-6 Nɛ madagueꞌbʉ tꞌɛ̨mbi ꞌbʉh yʉ oją ua ja ra häi nɛpʉ mahɛ̨tsꞌi, nɛ tꞌɛ̨mbi xʉn ngu yʉ oją nɛ yʉ hmu, pɛ nujʉ, høntꞌa nꞌdatho a Oją dí ꞌbʉhmbʉ, ngue ra Ta, nɛ bi zänni ꞌbɛꞌa gätho i ja, nɛjʉ bi zängahʉ ga ørpahʉ rá ꞌbɛfi. Nɛ høntꞌa nꞌdatho a ra Hmu dí ꞌbʉhmbʉ, ngue gueꞌa ra Jesucristo a, nɛ gueꞌa í ꞌyøtꞌ Oją ꞌbɛꞌa gätho i ja, nɛ gueꞌa bi ꞌdajʉ ra te xʉn ho ma mbʉihʉ a.
\v 7 Pɛ hinga gätho yʉ cu guí ꞌbʉhmbʉ i pądi xʉn ho nangue ʉ yʉ hyäte oją, nɛ ząi mi thąnde ʉ, janangueꞌa ɛ̨na guextaꞌa im bɛ̨m ꞌbʉ ya bi za a ra ngø xí ꞌbøtsꞌe. Nɛ i ɛ̨nsɛ ngueꞌa ra tsꞌoqui a ꞌbʉ ya bi za, nguetho hinguin zaqui yʉ́ tꞌɛ̨cꞌyɛ̨i.
\v 8 Pɛ hinga gue yʉn tsꞌihmɛ dí sihʉ nan numanhojʉ Oją. Xín gam bɛ̨mhbʉ ngueꞌa nan numanhojʉ a ꞌbʉ dí sihʉ o hin dí sihʉ. 
\v 9 Pɛ i jatho gui jamansufʉ yʉ́ mbʉi ni cuhʉ. Nɛ mamí jafʉ da dąng bʉ ja ra tsꞌoqui, nguetho hinga na pądi ꞌbɛꞌa guí øthʉ ꞌbʉ guí øthʉ a guí pąhmbʉ xʉn ho.
\v 10 Pɛ xiꞌbʉ da nu ahʉ ꞌda ni cuhʉ gueꞌa guí sihmɛhʉ bʉ ja yʉ́ niją yʉ hmite. Nɛ guí pąhmbʉ xʉn ho ꞌbɛꞌa guí sihʉ. Pɛ nuꞌʉ ni cuhʉ im bɛ̨nsɛ gueꞌa ra tsꞌoqui a ꞌbʉ da tsꞌi. Nɛ xiꞌbʉ sä da ꞌyɛ̨na da hyutꞌan zambʉi da zi ʉ xí ꞌbøx bʉya.
\v 11 Jananjabʉ nu nin ꞌyomfɛ̨nihʉ gueꞌa nam ꞌbɛh ni cuhʉ a, nguetho hinga na pądi xʉn ho. Pɛ nuꞌʉ ni cuhʉ, gueꞌa í du ra Cristo a ngue da yąnba yʉ́ te.
\v 12 Janangueꞌa nuꞌbʉ ngubʉ guí øthʉ, pɛ guí ørpahʉ ra tsꞌoqui ra Cristo ꞌbʉ, nguetho guí ørpahʉ ra tsꞌoqui ni cuhʉ ngue hinguin zaqui yʉ́ tꞌɛ̨cꞌyɛ̨i, nɛ guidí tsꞌonbahʉ yʉ́ mbʉi.
\v 13 Nɛ nugä drá Pablogä, nuꞌbʉ gueꞌa ra ngø dí sagä nin ʉnba rá mbʉi nꞌda ma cu, pɛ manꞌda xʉn ho ꞌbʉ him man ga sagä ra ngø ꞌbʉ, janangueꞌa hin ga japi da mbeng bʉ ja yʉ tsꞌoqui nꞌda ma cu.
\c 9
\s Da bɛ̨ni ndaꞌa xʉn ho da ꞌyøtꞌ yʉ́ ꞌbäihʉ ra Cristo
\p
\v 1 Nɛ nugä manꞌda ja man tꞌɛ̨di xcá øtꞌä ꞌbɛꞌa gätho dín numanho ga øtꞌä, nguetho majuąni ma ꞌbäigäꞌbe a ra Cristo, ngue dá nusɛgä a ra Hmu. Nɛ mfądi majuąni bin ꞌdac man tꞌɛ̨di nguetho dá ja ahʉ gá ꞌyɛ̨cꞌyɛihʉ Oją nangue rám fätsꞌi ra Hmu.
\v 2 Nɛ masque i ꞌbʉh miꞌda ɛ̨ngui him ma ꞌbäigäꞌbe ra Cristo, pɛ nuꞌahʉ guí pąhmbʉ, nɛ mfądigui nangue ahʉ. 
\v 3 Nɛ gueꞌa ga xicä ʉ toꞌo da ꞌyängui nangue man tꞌɛ̨di.
\v 4 Nɛ i ja man tꞌɛ̨di xcá tąh man zäbi o xtín ꞌdac man tsꞌihmɛ.
\v 5 Nɛ i ja man tꞌɛ̨di xcán thątꞌbe nꞌda ra xisu, ngue ma miꞌyɛ̨cꞌyɛ̨iꞌbe, nɛ xcá sitsꞌi hønbʉ go hapʉ dí ꞌyo, tengu i øtꞌʉ yʉ́n ꞌyohʉ ra Cristo, nɛ ra Pedro, nɛ miꞌda yʉ́ ꞌbäihʉ ra Cristo.
\v 6 Pɛ ha guím bɛ̨mhbʉ hinꞌyʉ man tꞌɛ̨diꞌbe a ra Bernabé ngue xcá ɛꞌtsꞌ ma ꞌbɛfi zɛhɛꞌbe ngueꞌa ná tąh man tsꞌihmɛꞌbe.
\v 7 Nguetho njoꞌo nꞌda ra dofʉi i juzɛhɛ yʉ́ gasto zɛhɛ. Nɛ nꞌda ra jąꞌi ꞌbʉ i øtꞌ ran uąndätꞌä i jantꞌɛ̨di da zi. Nɛ yʉ jąꞌi ꞌbʉ di ꞌyɛ̨h yʉ́ dɛꞌyo, i jantꞌɛ̨di da zip yʉ́ xiꞌba ʉ yʉ́ dɛꞌyo ꞌbʉ in nde.
\v 8 Pɛ hinga høntꞌʉ yʉ jąꞌi im ma tengu na dí xi ahʉ, pɛ nɛꞌa Oją im ma tengu na, nɛ gueꞌa mán tꞌoꞌtꞌi bʉ ja rán tꞌɛ̨di Oją a.
\v 9 Nguetho nuꞌa rán tꞌɛ̨di Oją bi ꞌyoꞌtꞌa ra Moisés: “Pɛ nuꞌbʉ nꞌda ra mbʉndąni i pʉ, hingui sä da thurpa rá nde, nꞌdamhma da zä da za ʉ yʉ xiꞌyømpøhø i jabʉ,” bi ꞌyɛ̨na. Pɛ ha gam bɛ̨mhbʉ høntꞌʉ yʉn dąni in nu Oją.
\v 10 Ha hin dí pąhmbʉ ngue nɛjʉ da tꞌørcahʉ a i hmangua, nguetho nꞌda ran tꞌuti a, man tꞌoꞌtꞌi nanguejʉ. Nɛ tenguꞌbʉ dadím pɛhmbʉ bʉ ja ra häi, ngutho ʉ yʉ dujʉ nɛꞌʉ yʉ mbɛjʉ, nɛ xʉn ho ꞌbʉ da bɛ̨ni da dąh yʉ́n zäbi nangue yʉ́ ꞌbɛfi øtꞌe.
\v 11 Nɛ nugäꞌbe tenguꞌbʉ ya dá tuꞌbe ra hmudä bʉ guí ꞌbʉhmbʉ nangue ra te. Pɛ xiya ha guím bɛ̨mhbʉ hingui ho ꞌbʉ xcá xocꞌbe ngue ga siꞌbe. Nuꞌa nam bønꞌa dí xi ahʉ, tenguꞌbʉ ya xquí jurcaꞌbe.
\v 12 Pɛ nuꞌʉ miꞌda yʉ xänbate i hąni ꞌbɛꞌa guídí unhdʉ, nɛ manꞌda i ja man tꞌɛ̨diꞌbe xcá hąmꞌbe ꞌbʉ xcá ndeꞌbe. Pɛ hinga gueꞌa dí hongäꞌbe ngueꞌa ga tąꞌbe. Xʉn ngu ʉ gätho dadín ꞌyɛptaꞌbe, nguetho dí suꞌahʉ hin xquí hyąmhbʉ a rán ho maꞌdaꞌyo ra Cristo.
\v 13 Pɛ guí pąhmbʉ ꞌbɛꞌa i øtꞌʉ toꞌo dim pɛpʉ ja yʉ́ niją ma mijudíohe, høntꞌa i tįm bʉ ja ra niją i si, nɛ gueꞌa nam pɛp ʉ yʉn tꞌunni din tꞌunꞌna Oją bʉ.
\v 14 Nɛ nguthogähe ya, ngueꞌa dím mamhbe rán ho maꞌdaꞌyo ra Cristo, bi zän ra Hmu ngue gueꞌa dám pɛpähe a rám hma.
\v 15 Pɛ hin dí øtꞌʉ yʉn tꞌɛ̨di gä bin ꞌdaqui. Nɛ hinga gueꞌa nam bønꞌa dá otꞌahʉ a, ngue gui ꞌdajʉ man zäbigä. Pɛ manꞌda xʉn ho ꞌbʉ ga tugä, xínda gueꞌbʉ ꞌboꞌo da ꞌuįngui, nɛ ndetho dí ꞌuega man johya.
\v 16 Pɛ nuꞌbʉ høntꞌa ga øtꞌä ngue ga mangä rám hman ra Cristo, pɛ hin dí guah man johyagä a ꞌbʉ, nguetho gueꞌa ín ꞌdac ma ꞌbɛfi a. Nguetho jatsꞌɛdi tho gam mangä a ram hma.
\v 17 Pɛ nuꞌbʉ mpähä thoho dí øtꞌä rá ꞌbɛfi ma Hmu, nɛ i ja ꞌbɛꞌa dí tąhą. Pɛ nuꞌbʉ dątsꞌɛdi tho ga øtꞌe tsꞌʉtho, pɛ guemhma ꞌyo ma güɛnda ga juadi.
\v 18 Pɛ ꞌbɛꞌa nin jurca ꞌbʉ mpähä thoho dím man rán ho maꞌdaꞌyo ra Cristo. Pɛ manꞌda dí tąh ran johya ꞌbʉ nte dí tącä ra hmɛ. Janangueꞌa manꞌda xʉn ho ꞌbʉ nte ga tąhą, madagueꞌbʉ i ja man tꞌɛ̨di ngue xcá tąhą nangueꞌa ma ꞌbɛfi.
\v 19 Nɛ madagueꞌbʉ hingan tsꞌänni ngue dan ꞌyɛ̨hɛ̨gä, nɛ njoꞌo nꞌda ra jąꞌi ngueꞌa ma hmu, pɛ dí cohi tenguꞌbʉ drá ꞌyɛ̨hɛ̨gä ʉ gätho yʉ jąꞌi, nguepʉ da zä ga zɛdi da dįn ra ꞌyu xʉn ho ʉ miꞌda xʉn ngu.
\v 20 Janangueꞌa nuꞌbʉ dí ꞌbʉhmbe ma mijudíohe, ngue i øtꞌ yʉn tꞌɛ̨di bi xi Oją yʉ judío, nɛcä dí øtꞌä ʉ, madagueꞌbʉ hin di mandagä ʉ. Janangueꞌa da zä ga zɛrpa yʉ́ mbʉi da ꞌyɛ̨cꞌyɛ̨i ra Cristo.
\v 21 Pɛ nuꞌbʉ dí ꞌbʉhmbe ʉ hingui pąh yʉn tꞌɛ̨di bi xi Oją yʉ judío, nɛcä hin dí øtꞌä ʉ. Janangueꞌa da zä bʉ ga zɛdi da ꞌyɛ̨cꞌyɛ̨i ra Cristo. Pɛ hingui nde da ma ngue dí sotho ʉ yʉ́n tꞌɛ̨di Oją, nguetho dí tɛndä a im man ra Cristo.
\v 22 Nɛ nuꞌbʉ dí ꞌbʉhmbe ʉ xʉn güentꞌi thoho yʉ́ tꞌɛ̨cꞌyɛ̨i, pɛ nɛcä dí øtꞌä tenguꞌbʉ xʉn güentꞌi thohogui, janangueꞌa i sä bʉ dí zɛdi da ꞌyɛ̨cꞌyɛ̨i ra Cristo. Nɛ gueꞌa dí øtꞌä, ngue ꞌdaꞌiguje nꞌda ngu nꞌda yʉ jąꞌi, nɛ dí honi xʉn ho ꞌbɛpʉ dí ꞌyɛ̨cꞌyɛ̨i yʉ jąꞌi.
\v 23 Guehna gätho dí øtꞌä na, janangueꞌa da zä ga comhbʉ rán jąpi ra Cristo høntꞌa go toꞌo ní jąꞌi da hyąnꞌa ran ho maꞌdaꞌyo.
\v 24 Pɛ guín nuhʉ yʉn tꞌuti nangueꞌʉ i tihi, madagueꞌbʉ i tihi, pɛ nꞌdatho a i tąh ran tꞌunni. Pɛ dami tihmbʉ ya nguepʉ da zä gui tąhmbʉ.
\v 25 Nɛ tengu thoho yʉn ꞌyɛ̨ni ua ja ra ximhäi, ɛ̨mmɛ din jamansusɛ, nɛ hingui nde da ꞌyøtꞌa di hɛ̨ni. Pɛ høntꞌa dim ꞌbɛdi i tą ʉ. Pɛ nuꞌbʉ in jabʉ ga øthʉ, ga tąhmbʉ a da hyätꞌi maząi. 
\v 26 Nɛ nugä tenguꞌbʉ dí øtꞌ ra ꞌdihi, dí hąx ra ꞌyu i uɛ̨ntho bʉ hapʉ i ja ran tąhą. Nɛ tenguꞌbʉ ꞌboꞌo dadín tunꞌbe, pɛ hinga ha sätho dí pʉcpi, pɛ dí pądi hapʉ dí täpi xʉn ho.
\v 27 Pɛ dí sąm zɛhɛ ma ngøcꞌyɛ̨i, dín ndepe da ꞌyøtꞌa dí xifi, nꞌdamhma hin go ga ꞌbɛcä a ꞌbɛꞌa dí xiꞌʉ miꞌda ngue da dąhą.
\c 10
\s Ma hɛcpi yʉ ꞌyɛ̨cꞌyɛ̨i nangue yʉ hmite
\p
\v 1 Nɛ gueꞌa dín nde ahʉ gui pąhmbʉ a, ma zi cu ahʉ, ngue ꞌbɛꞌa bi ꞌyøtꞌ mam bombøtahe mayaꞌbʉ, gätho mi cot ra güi bʉ ní mba ʉ, nɛ bi zitsꞌi. Nɛ gätho bi ꞌdaxpʉ ꞌdanguadi ra thɛngdeją.
\v 2 Nɛ gätho bin yąm bʉ ja ran ʉnbi ꞌbʉ mi dɛn ra Moisés, tenguꞌbʉ ya yʉ́ yąnte a. Nɛ janangueꞌa i tꞌɛ̨mbi tenguꞌbʉ bin xixyą nangueꞌa ra deją bʉ bi thogui nɛ ra güi.
\v 3 Nɛ gätho ꞌdaꞌan zitho ra maná ngue ra hmɛ bi un Oją hapʉ ní mba. 
\v 4 Nɛ gätho bi zi ra dehe bi bøm bʉ ja ra do, tenguꞌbʉ bi zip rán zaqui a ra Cristo, nɛ tenguꞌbʉ ya bin ꞌyohʉ ra Cristo bʉ ní mba ʉ.
\v 5 Nɛ madagueꞌbʉ bi tꞌørpe gätho ʉ, pɛ ɛ̨mmɛ xʉn ngu ʉ him bi numanho Oją a bi ꞌyøtꞌe. Nɛ hønbʉ go hapʉ bin cꞌuaxtꞌ yʉ́ doꞌyo bʉ ja yʉ dąpo bi thogui.
\v 6 Nɛ gueꞌa urcahʉ a, janangueꞌa hin gan ndehʉ ga øthʉ yʉ tsꞌoqui, tengu mi øtꞌʉ ꞌbʉ mi ꞌyo bʉ ja ra dąpo.
\v 7 Janangueꞌa o guí thąndehʉ yʉ hyäte oją, tengu mi øtꞌi ꞌda ʉ, tengu mán tꞌoꞌtꞌi, ngue bin sihmɛ ʉ nɛ bim mihni, bi ndantsꞌi bin nɛ ꞌbʉ mi dąnde ra pøte xí ꞌyøzɛhɛ.
\v 8 Janangueꞌa hin ga øthʉ ran ꞌyomtꞌɛ̨ni tengu mi øtꞌi ꞌda, nɛ nꞌdapa thoho án du ꞌdäte ma hyu mahuąhi njąꞌi.
\v 9 Pɛ hingui sä ga sähʉ ra Hmu nangue ma tsꞌoquihʉ, tengu mi øtꞌi ꞌda, nɛ xʉn ngu bi du, bi za yʉ cꞌɛ̨yą.
\v 10 Janangueꞌa hin ga sämanꞌʉhʉ nangue Oją, tengu bi ꞌyøtꞌʉ ꞌda, nɛ gueꞌa bí mbɛnh Oją nꞌda ram ꞌbɛhni mahɛ̨tsꞌi ngueꞌa bi hyo ʉ.
\v 11 Nɛ gueꞌa bin ja a tenguꞌbʉ ya nꞌda ran tꞌuti ngue i sujʉ dan jahʉ bʉ. Nɛ gueꞌa xmán tꞌoꞌtꞌi ꞌbɛꞌa dám ꞌbʉhmbʉ yʉ pa i jabʉ ya ngue rán zɛgui.
\v 12 Janangueꞌa nuꞌbʉ dím bɛ̨mhbʉ tengu bi ꞌyøtꞌʉ, pɛ hingui sä ga ɛ̨mhbʉ, nangue ra tsꞌɛdi bi ꞌdajʉ Oją hinꞌyʉ ꞌbɛꞌa ga suhʉ. Pɛ i jatho ɛ̨mmɛ dam fäsɛhʉ, ngue hin ga tąnjʉ bʉ ja yʉ tsꞌoqui.
\v 13 Pɛ nuꞌbʉ i tsꞌäc ma mbʉihʉ ga øthʉ yʉ tsꞌoqui, tenguꞌbʉ i tsꞌäp yʉ́ mbʉi gätho miꞌda yʉ jąꞌi. Pɛ dí pąhmbʉ di zɛrca ma mbʉihʉ Oją ga tąfʉ ran tsꞌäte. Pɛ nuꞌbʉ ɛ̨na da sijʉ miꞌda xʉn hɛ̨i ngue hin da zä ga tąfʉ, hin di jajʉ Oją gan nuhʉ ʉ. Nɛ i urcahʉ ꞌbɛpʉ dá tąfʉ ʉ dín nuhʉ.
\v 14 Nɛ nuya, ma zi cu ahʉ, nɛ xingui tsꞌʉ guim bɛ̨mhbʉ gui thąndehʉ yʉ hyäte oją.
\v 15 Nɛ guehna dá xiꞌahʉ na ya, nguetho i ja nin ꞌyomfɛ̨nihʉ, nɛ sä gui pąsɛhʉ ꞌbɛꞌa nam bønꞌa dá xi ahʉ.
\v 16 Nɛ ząi dí äfʉ Oją rán jąpi ꞌbʉ dí sihʉ ran tsꞌihmɛ bi zänꞌna ra Cristo bʉ ja ram pɛti. Nɛ nuꞌbʉ dí sihʉ rán gui ra uva, ha hin dím bɛ̨mhbʉ ngue dí comhbʉ rá ji ra Cristo ngue bi hogahʉ. Nɛꞌbʉ dí xɛmhbʉ ra hmɛ nɛ dí sihʉ a, ha hin dím bɛ̨mhbʉ ngue dí comhbʉ rá jąꞌi ra Cristo ngue bi ʉnba ꞌbʉ mi hogahʉ.
\v 17 Madagueꞌbʉ ɛ̨mmɛ xʉn ngujʉ ngue dá sihʉ ʉ, pɛ nꞌdatꞌa ra hmɛ, nɛ gueꞌa ní ꞌyørcahʉ nꞌdatho ma jąꞌi dí comhbʉ a ra Cristo.
\v 18 Nɛ tengu bi ꞌyøtꞌ ma miꞌisraelhe, gä bi zi yʉn tꞌunni mí pa ntꞌunni Oją, nɛ gueꞌa í gomhma rá te Oją a.
\v 19 Janangueꞌa hin nin sähʉ gui comhbʉ a i si ʉ pa mꞌbøspe yʉ hmite, madagueꞌbʉ hingui ndʉxqui ʉ yʉ ngø i pa mꞌbøspe ʉ, nɛ hinꞌyʉ yʉ́ tsꞌɛdi ʉ yʉ hmite.
\v 20 Pɛgue dí xi ahʉ, nuꞌʉ ꞌda ngue hingui pą Oją, i pøspa yʉ hmite, pɛgue yʉ zįthu i hąni. Janangueꞌa hin dín ndeꞌahʉ gui comꞌma gui sihʉ ʉ yʉ́ ꞌbøtsꞌe, nꞌdamhma hin gui comhbʉ rá ꞌbɛfi yʉ zįthu.
\v 21 Hingui sä ga thɛcpahʉ rá tasa ra Cristo ꞌbʉ dí thɛcpahʉ rá tasa yʉ zįthu. Nɛ hingui sä ga comhbʉ rá ngøcꞌyɛ̨i ra Cristo ꞌbʉ dí comhbʉ yʉ́ ꞌbøtsꞌe yʉ zįthu.
\v 22 Uague guím bɛ̨mhbʉ go gui muthʉ a Oją. Ha manꞌda i ja ni tsꞌɛdihʉ xinda gue Oją.
\s I sä ꞌbɛꞌa da ꞌyøtꞌ yʉ ꞌyɛ̨cꞌyɛ̨i, pɛ da bɛ̨n ran huɛ̨cate
\p
\v 23 Majuąni a ram hma ngue da zä ga øthʉ ꞌbɛꞌa go dín numanhohʉ. Pɛ nuꞌbʉ ga øthʉ ꞌbɛꞌa gä i ja, hinga gä xʉn ho bʉ dán gohi. Majuąni da zä da ꞌyøtꞌe høntꞌa go numanho nꞌda ra jąꞌi, pɛ hinga gätho nan te rá ꞌbɛfi Oją ʉ.
\v 24 Pɛ i jatho ga huanhdʉ ndaꞌa manꞌda xʉn ho, ngue da zä ga fäxhʉ ʉ miꞌda, nɛ hin nangue man hosɛhʉ.
\v 25 Pɛ dami sihʉ ꞌbɛꞌa gätho i ꞌbä bʉ ja ra täi, nɛ hingui jatho gui ꞌyänhdʉ ꞌbɛꞌa di ja a ra ngø ꞌbʉ mꞌbøtsꞌe o hinꞌna.
\v 26 Nguetho gätho rá mbɛti Oją ʉ gätho i ja ua ja ra häi, nɛ ra ngø, nɛꞌa ra ximhäi bʉya.
\v 27 Nɛ nuꞌbʉ ꞌboꞌo da zixꞌahʉ na tsꞌihmɛ bʉ ja yʉ́ ngu ʉ hing yʉ ꞌyɛ̨cꞌyɛ̨i, nɛ nuꞌbʉ guín nde gui mbähä, dami sahʉ ꞌbɛꞌa gätho di ꞌdaꞌahʉ, nɛ hin te gui ꞌyänhdʉ, nɛ o guím bɛ̨mhbʉ ngue di hɛcꞌahʉ Oją ngue gui sihʉ.
\v 28 Pɛ nuꞌbʉ nꞌda ngue da xiꞌahʉ: “Nuna ra ngø bi mba mꞌbøspe yʉ hmite,” da tꞌɛ̨nꞌahʉ, pɛ o guí sihʉ bʉya, janangueꞌa hin gui ʉnbahʉ rá mbʉi a to bi xiꞌahʉ, nguetho im bɛ̨ni hingui nde Oją gui sihʉ a.
\v 29 Nguetho i jatho gui jamansup rá mbʉi ni mijąꞌiui, madagueꞌbʉ guí pądi ngue xʉn ho a ra ngø. Pɛ masque ꞌbʉꞌi ꞌda ahʉ guín nde gui ꞌyängahʉ: “Hanja ngue ga ɛtꞌ man tsꞌihmɛhʉ ꞌbʉ ꞌboꞌo hingui numanho a, pɛ tenguꞌbʉ hinꞌyʉ ma tsꞌɛdihʉ ꞌbʉ.
\v 30 Nɛ nuꞌbʉ dadí unhde ra jamadi Oją nangue man tsꞌihmɛ dí sihe, hanja ngue sä di cꞌąmanꞌʉje ʉ ꞌda,” gueꞌbʉ ꞌboꞌo da ꞌyängui.
\v 31 Pɛ dí xiꞌahʉ, dami jamansuhʉ a guí øthʉ, uague ran tsꞌihmɛ guí sihʉ, o ꞌbɛꞌa gätho guí øthʉ, pɛ høntꞌa dí tꞌɛ̨spa Oją gui ꞌyøthʉ.
\v 32 Nɛ ɛ̨mmɛ ga jamansuhʉ ꞌbɛꞌa dí øthʉ ngue njon ga jafʉ da dąngui, xinga nꞌda ra judío, xínga gueꞌʉ hing yʉ judío, nɛ xínga gueꞌʉ ma miꞌyɛ̨cꞌyɛ̨ihʉ.
\v 33 Nguthogä ya, ɛ̨mmɛ dí honi ngue ga øtꞌä ꞌbɛꞌa gätho da numanho miꞌda yʉ jąꞌi xʉn ngu, nɛ hin dí honi ꞌbɛꞌa dín numanhosɛgä. Pɛgue dí honi nangue miꞌda, nguepʉ da zä da dįn ra temaꞌdaꞌyo ʉ gä miꞌda xʉn ngu.
\c 11
\p
\v 1 Pɛ dí xiꞌahʉ gui tɛnhdʉ a dí øtꞌä, nguetho dí øtꞌä a i øtꞌa ra Cristo dí tɛndä.
\s ꞌBɛꞌa da ꞌyøtꞌ yʉ xisu bʉ ja ram pɛti
\p
\v 2 Pɛ xʉn ho guí øthʉ ngueꞌa guím bɛ̨nthohʉ ꞌbɛꞌa gätho dá xiꞌahʉ, ngue bi bɛ̨ngä Oją ga xi ahʉ.
\v 3 Pɛ dín nde ahʉ gui pąhmbʉ, ngue nu ra Cristo, go rá hmu nꞌda ngu nꞌda ran ꞌyohʉ, nɛ nu yʉ xisu, tenguꞌbʉ yʉ́ hmu ʉ yʉ́ ndø. Nɛ dín jahʉ bʉ nangue Oją. Nɛ in jabʉ a ra Cristo, rá Hmu a Oją a.
\v 4 Pɛ nuꞌbʉ nꞌda ran ꞌyohʉ i yąui Oją bʉ i ja ram pɛti, o gue im man ram hma, pɛ hingui sä da hyuꞌtsꞌ rá fʉi, tenguꞌbʉ hinꞌyʉ rá tsꞌɛdi.
\v 5 Pɛ nuꞌbʉ nꞌda ra xisu i yąui Oją bʉ ja ram pɛti, o gue im man ram hma, i jatho da gompꞌ rá yą, ngue hin da mispa a rá ndø, nɛ hin da ꞌyøtꞌe tenguꞌbʉ ntꞌąxi rá yą.
\v 6 Pɛ nuꞌbʉ nꞌda ra xisu hingui nde da gompꞌ rá yą, manꞌda xʉn ho ꞌbʉ da ꞌyąx rá yą ꞌbʉ. Pɛ nuꞌbʉ guím bɛ̨mhbʉ ra ꞌyąsä ꞌbʉ ntꞌąxi nꞌda ra xisu, o gueꞌbʉ tenguꞌbʉ hinꞌyʉ yʉ́ xtą, pɛ manꞌda xʉn ho ꞌbʉ xtán gompꞌ rá yą.
\v 7 Pɛ nu nꞌda ran ꞌyohʉ hingui sä da hyuꞌtsꞌ rá fʉi bʉ ja ram pɛti, nguetho i udi i ja rá tsꞌɛdi xʉn ho, tengu ꞌbʉ guesɛ Oją i ꞌbʉpʉ. Pɛ nu nꞌda ra xisu i udi manꞌda ja rá tsꞌɛdi nꞌda ran ꞌyohʉ.
\v 8 Nguetho mbʉdi bi ꞌyøtꞌ Oją a ran ꞌyohʉ, nɛ mꞌbɛjua bʉya bi thącpa nꞌda rá doꞌyoꞌbøtsꞌe a ran ꞌyohʉ, nɛ gueꞌa í tꞌøtꞌ ra xisu a bʉya. 
\v 9 Nu ran ꞌyohʉ hin í tꞌøtꞌe ngue da mbäxꞌa ra xisu, pɛ í tꞌøtꞌa ra xisu ngue da mbäxꞌa ran ꞌyohʉ.
\v 10 Nɛ ɛ gueꞌa dím mangä a, ngue nu yʉ xisu i jatho da gompꞌ yʉ́ yą, janangueꞌa da ꞌyudi ja yʉ́ tsꞌɛdi yʉ́ ndø. Nɛ gueꞌa dín numanho yʉ́m ꞌbɛhni Oją mahɛ̨tsꞌi a bʉya.
\v 11 Pɛ nu bʉ ja rá ꞌbɛfi ra Cristo, hin da bømanho ꞌbʉ høntꞌʉ yʉn ꞌyohʉ dim pɛpʉ, xín da bømanho ꞌbʉ høntꞌʉ yʉ xisu, pɛgue gätho ꞌda dám fäxtahʉ ʉ.
\v 12 Nguetho majuąni nuꞌa ra xisu ntꞌøtꞌe nangue rá doꞌyoꞌbøtsꞌe a ran ꞌyohʉ, pɛ guextaꞌa majuąni ím ꞌbʉ a nꞌda ran ꞌyohʉ nangue rá mbe. Nɛ gätho bi zän Oją din jabʉ.
\v 13 Pɛ dami bɛ̨nsɛhʉ ꞌbɛꞌa manꞌda xʉn ho gui ꞌyøthʉ, nangue nꞌda ra xisu ꞌbʉ in yąui Oją, ꞌbʉ hingan joꞌmi rá yą. Ha guí ɛ̨mhbʉ xʉn ho i øtꞌe uague hinꞌna.
\v 14 Nɛ dí pąhmbʉ ꞌyąsä ꞌbʉ xtá mba rá yą nꞌda ran ꞌyohʉ.
\v 15 Nɛ ngutho nꞌda ra xisu, gueꞌa ní nɛcmanho a rá xtą ꞌbʉ xʉ mba. Nɛ gueꞌa í tsꞌänba nꞌda ra xisu a, ngueꞌa xtá mba yʉ́ xtą, tenguꞌbʉ ya rán joꞌmayą a.
\v 16 Pɛ nuꞌbʉ ꞌboꞌo in nde dán juntꞌa ꞌbɛꞌa dí xi ahʉ, pɛ hingui sä dán junthʉ a. Nɛ i jatho ga xifi ngue ngutho i tꞌørpʉ ja miꞌda yʉ́m pɛti yʉ ꞌyɛ̨cꞌyɛ̨i.
\s Da hnumansu ran tsꞌihmɛ bi zän ra Hmu
\p
\v 17 Pɛ nuꞌa manꞌda ga xi ahʉ ya, hingui sä ga ɛ̨nꞌahʉ xʉn ho guí øthʉ. Nguetho hingui sä di zɛtꞌa ni mbʉihʉ a guí øthʉ bʉ ja nim pɛtihʉ, pɛ manꞌda di tsꞌonꞌnahʉ.
\v 18 Nguetho i siqui ꞌbɛꞌa guí øthʉ ꞌbʉ guídím pɛtihʉ, guídín junthʉ nꞌda ngu nꞌda ahʉ. Nɛ dí ɛ̨cꞌyɛ̨i ngue majuąni a i siqui.
\v 19 Masque guím bɛ̨mhbʉ jatho gan hejʉ. Pɛ guepʉ bi fądi ndaꞌa majuąni yʉ ꞌyɛ̨cꞌyɛ̨i.
\v 20 Nguetho nu bʉ ja nim pɛtihʉ guí sihmɛhʉ, pɛ him majuąni gueꞌa ran tꞌøtꞌe bi xic ma Hmuhʉ guí øthʉ.
\v 21 Pɛ nuꞌbʉ ra ora guí sihmɛhʉ, ɛ̨mmɛ guídín uɛ̨mhbʉ nin tsꞌihmɛhʉ nꞌda ngu nꞌda ahʉ. Nuꞌʉ ꞌda xínga nꞌdamhmɛ gá unhdʉ, nɛ nuꞌahʉ bʉya gueꞌbʉ go ɛ̨mmɛ gán niyahʉ.
\v 22 Ha hinꞌyʉ ni ngumhbʉ ngue gan sihmɛhʉ bʉ. Nguetho guídí tsꞌonbahʉ rá ꞌbɛfi Oją, nɛ guídí ꞌyąsäbahʉ ʉ ni cuhʉ nte gá unhdʉ. ꞌBɛꞌa guí ɛ̨na ga xi ahʉ. Ha guí ɛ̨na ga ɛ̨nꞌahʉ xʉn ho a guí øthʉ. Pɛ hinꞌna.
\s Nangue ꞌbɛꞌa nam bøn a ran tsꞌihmɛ bi zän ra Hmu
\p
\v 23 Janangueꞌa dín nde ga xi ahʉ mahønꞌa ya ꞌbɛꞌa nam bøn a ran tsꞌihmɛ bi zän ra Hmu. Nɛ tengu thoho bi xängä ra Hmu, nɛ ngutho dí xi ahʉ. Ngue nꞌdatꞌa ra xui bi mba ma dä ra Hmu Jesús, nɛ bi hyąc ra hmɛ, 
\v 24 bi ꞌyäp ra jamadi Oją nɛ bi xɛm bʉya. Nɛ bi ꞌyɛ̨na: “Dami sihʉ na, nuna ma ngøcꞌyɛ̨igä na, ngue din ʉnbi nangue ahʉ. Nɛ gui thoqui gui ꞌyøthʉ na, nꞌdamhma guim bɛ̨njʉ.”
\v 25 Nuꞌbʉ mi jua a bi zi a ra hmɛ, bi dɛc a ra tasa bʉya, ngue mi po ra guiꞌuva, nɛ bi ꞌyɛ̨na: “Nuna nam bøni ngue ya di hocꞌahʉ xʉn ho ra ꞌdaꞌyoꞌyu da ꞌyøtꞌahʉ Oją nangue ma jigä. Nɛ nꞌdandį ngu nꞌdandį gui sihʉ, guim bɛ̨njʉ dá tugä nangue ahʉ,” bi ꞌyɛ̨nꞌa ra Jesús.
\v 26 Janangueꞌa nꞌdandį ngu nꞌdandį ga sihʉ ra hmɛ nɛ ra guiꞌuva, dí uhmbʉ rán dąte ra Hmu gueꞌbʉ go bá pengua mahønꞌa.
\s ꞌBɛpʉ dá fɛ̨n ran tsꞌihmɛ bi zän ra Hmu
\p
\v 27 Pɛ nuꞌa toꞌo hin din ꞌyomfɛ̨ni, nɛ sä i si a ra hmɛ nɛ ra guiꞌuva, ya i ja rá tsꞌoqui, nguetho hingui numansup rán dąte a ra Hmu bi du.
\v 28 Janangueꞌa i jatho mꞌbɛtꞌo da bąsɛ nꞌda ꞌbɛꞌa i ja mbo rá mbʉi, nɛ nubʉya da zä da zi ra hmɛ nɛꞌa ra guiꞌuva.
\v 29 Nguetho nuꞌbʉ i si a ra hmɛ nɛ i si rán gui ra uva, nɛ hinguim bɛ̨ni ꞌbɛꞌa ín ʉnba ra Hmu ꞌbʉ mi du, nɛ høntꞌa ran ʉnbi da nu a.
\v 30 Nɛ gue a guí øthʉ a, janangueꞌa xʉn ngu xʉn ʉ ahʉ nɛ xʉn güentꞌi ahʉ, nɛ ya xcá tuhʉ ꞌda ahʉ.
\v 31 Pɛ nuꞌbʉ mꞌbɛtꞌo dadí juąnbazɛhɛ ma mbʉihʉ, hin da zɛgbahʉ ra Hmu ꞌbʉ.
\v 32 Pɛ nuꞌbʉ hin dadí juąnbazɛhɛ ma mbʉihʉ, guemhma da ꞌyørcahʉ ram fɛi ꞌbʉ. Pɛ manꞌda xʉn ho ꞌbʉ da mbɛgbahʉ ra Hmu ya, nꞌdamhma hinga ꞌdarpʉ gan nuhʉ ran ʉnbi ra ximhäi.
\v 33 Janangueꞌa ma zi cu ahʉ, nuꞌbʉ guidím pɛtihʉ, ngue gui sihʉ ra hmɛ nɛ ra guiꞌuva, ndeꞌbʉ hin gan uɛ̨nsɛhʉ, pɛ gui tømhbʉ din ꞌda ahʉ nꞌda ngu nꞌda ahʉ.
\v 34 Nɛ nuꞌbʉ ꞌboꞌo i tumanthuhu, hin da bɛ̨ni din sihmɛ bʉ ja ram pɛti, pɛ jatho ꞌbɛ din sihmɛ bʉ ja rá ngu, nꞌdamhma hin da mbɛp ahʉ Oją nangueꞌa nim pɛti guí øthʉ. Nɛ nuꞌa ꞌbɛꞌa gätho manꞌda guí øthʉ, ga hocꞌahʉ ꞌbʉ dá mba bʉ.
\c 12
\s ꞌDahma ꞌdanꞌyo yʉ́ tsꞌɛdi bi un rá Hogandąhi Oją
\p
\v 1 Nɛ nuya ma zi cu ahʉ, dín nde ahʉ gui pąhmbʉ ꞌbɛꞌa nam bøn a ra tsꞌɛdi di ꞌdajʉ rá Hogandąhi Oją nangue ga ørpahʉ rá ꞌbɛfi ꞌdahma ꞌdanꞌyo.
\v 2 Guí pąhmbʉ ꞌbɛꞌa gá ꞌyøthʉ ꞌbʉ him maní ꞌyɛ̨cꞌyɛ̨ihʉ, nɛ gá hyą ꞌdahʉ yʉ hyäte oją, nɛ hingui yą ʉ.
\v 3 Janangueꞌa dín nde ahʉ gui pąhmbʉ a majuąni ya. Nuꞌbʉ guí øhmbʉ ꞌboꞌo i yą nangue rá Hogandąhi Oją, da ꞌyɛ̨mbi rá Hmu a ra Jesús ꞌbʉ i yą. Pɛ nuꞌbʉ i sanꞌa ra Jesús ꞌbʉ i yą, him majuąni in ꞌyoui rá Hogandąhi Oją a.
\v 4 Nɛ ꞌdahma ꞌdanꞌyo yʉ ꞌbɛfi da zä da hyąnꞌa nꞌda ngu nꞌda yʉ ꞌyɛ̨cꞌyɛ̨i, pɛ nꞌdatꞌa rá tsꞌɛdi rá Hogandąhi Oją ngue di unni. 
\v 5 Nɛ ꞌdahma ꞌdanꞌyo ꞌbɛpʉ ní ꞌyørpa rá ꞌbɛfi Oją nꞌda ngu nꞌda, pɛ nꞌdatꞌa ra Hmu dí ørpahʉ rá ꞌbɛfi.
\v 6 Nɛ gätho bi tsꞌänbi ꞌbɛꞌa da mbɛfi nꞌda ngu nꞌda yʉ ꞌyɛ̨cꞌyɛ̨i, pɛ nꞌdatꞌa Oją di bɛ̨nbi ꞌbɛꞌa da ꞌyøtꞌe.
\v 7 Nɛ nu Oją bi ꞌdajʉ ra tsꞌɛdi, janangueꞌa gätho dí uhmbʉ ngue dín ꞌyohʉ rá Hogandąhi Oją. Nɛ gueꞌa bi ꞌyørcahʉ Oją a, nꞌdamhma da zä ꞌda dám fäxtahʉ.
\v 8 Nuꞌʉ ꞌda bin tꞌun ra tsꞌɛdi da manꞌa rá hoganꞌyomfɛ̨ni Oją ngue him mám fądi, pɛ nangue rá Hogandąhi Oją di bɛ̨nbi da ma. Nɛ nu miꞌda bin tꞌun ra tsꞌɛdi da ma xʉn ho ꞌbɛꞌa nam bønꞌa rám hman Oją. Nɛ nꞌdatꞌa rá Hogandąhi Oją bi unni gätho yʉ́ ꞌbɛfi ꞌdahma ꞌdanꞌyo.
\v 9 Nɛ nu miꞌda bin tꞌun ra tsꞌɛdi da bądi din tꞌunꞌna i äpꞌa Oją. Nɛ nuꞌʉ ꞌda bin tꞌun ra tsꞌɛdi da xox yʉ hyɛ̨nni, nɛ nꞌdatꞌa rá Hogandąhi Oją di unni.
\v 10 Nɛ nuꞌʉ ꞌda bin tꞌun ra tsꞌɛdi ngue da ꞌyøtꞌ yʉn tꞌøtꞌe mixte ngue hingui sä da ꞌyøtꞌa nꞌda ra jąꞌi. Nɛ nuꞌʉ ꞌda bin tꞌun ra tsꞌɛdi da ma ꞌbɛꞌa din ja. Nɛ nuꞌʉ ꞌda bin tꞌun ra tsꞌɛdi da bądi ndaꞌa ním hma bi bɛ̨nba rá Hogandąhi Oją, nɛ ndaꞌa bi bɛ̨nba ra zįthu. Nɛ nuꞌʉ ꞌda bʉya bin tꞌun ra tsꞌɛdi din yą manꞌda ra nde ngue hingam fądi ꞌbɛꞌa nam bøni. Nɛ nuꞌʉ ꞌda bʉya da ma ꞌbɛꞌa nam bønꞌa bi man a.
\v 11 Pɛ gätho ya i øzɛhɛ rá Hogandąhi Oją, nɛ di darpi nꞌda ngu nꞌda ꞌbɛꞌa da ndesɛ Oją da ꞌyøtꞌe.
\s Gätho nꞌdanjąꞌi tho dí comhbʉ
\p
\v 12 Nɛ tengu nꞌda ra jąꞌi ɛ̨mmɛ xʉn ngu ní hut rá jąꞌi, pɛ nꞌdanjąꞌi tho i cohi. Nɛ in jabʉ ra Cristo nanguejʉ. 
\v 13 Nɛ dá gueꞌbʉ dyʉ judíohʉ o dyʉ griegohʉ, o dá gueꞌbʉ dyʉ́ ꞌyɛ̨hɛhʉ o hinꞌna, pɛ nꞌdatꞌa rá Hogandąhi Oją dá hąmhbʉ bʉ ja ma mbʉihʉ, tenguꞌbʉ ꞌdarbʉ í nɛx ra dehe dá sihʉ. Nɛ gueꞌa í ꞌyørcahʉ ngue nꞌdanjąꞌi tho dín jahʉ.
\v 14 Pɛ nu rá jąꞌi nꞌda, hinga nꞌdatho ní huti, pɛ ɛ̨mmɛ xʉn ngu i ja yʉ́ thuhu, ngue i juadi xʉn ho nꞌda ra jąꞌi.
\v 15 Pɛ nuꞌbʉ nꞌda ra gua da ꞌyɛ̨nsɛ ngue hinga gueꞌa ra ꞌyɛ: “Janangueꞌa hin te dí pɛcä ꞌbʉ,” ɛ̨na. Pɛ hingui sä ngubʉ da bɛ̨ni, nguetho rá gua ra jąꞌi a.
\v 16 Nɛ nuꞌbʉ nꞌda ra zagu da bɛ̨ni: “Hin te dí pɛcä,” nguetho im bɛ̨ni hinga gueꞌa ra dä a. Pɛ hingui sä ngubʉ da bɛ̨ni, nguetho rá zagu ra jąꞌi a. Nɛ hingui sä da bɛ̨ni ngue hing rá ngø ra jąꞌi a. 
\v 17 Nguetho nuꞌbʉ gätho xtín jąꞌi a rá dä nꞌda, ꞌbɛꞌa dí ꞌyøhnahyą ꞌbʉ. Xiꞌbʉ gä xtín zagu rá jąꞌi nꞌda, nɛ hinꞌyʉ rá xįyu, ꞌbɛꞌa xtán zä xtám bąhą tengu rá xįyu.
\v 18 Pɛ nu Oją bi zänni ꞌbɛꞌa gätho i ja rá jąꞌi nꞌda, nɛ nꞌda ngu nꞌda bi un rá tsꞌɛdi ngue da zä da ꞌyøtꞌe ꞌbɛꞌa gätho in ndepe da ꞌyøtꞌe.
\v 19 Pɛ nuꞌbʉ nꞌdaxɛqui tho, ha dán zä din ja tengu ra jąꞌi.
\v 20 Pɛ in jabʉ nꞌda ra jąꞌi, ɛ̨mmɛ xʉn ngu yʉ xɛqui i ja, guepʉ nan ho a nꞌda ra jąꞌi.
\v 21 Pɛ nu rá dä nꞌda hingui sä da ꞌyɛ̨mp a rá ꞌyɛ, ngue nte ní mbätsꞌi, xinga gueꞌa rá yą hingui sä da ꞌyɛ̨mp ʉ yʉ́ gua nte ní mbätsꞌi.
\v 22 Pɛ hingui sä ngubʉ da ma, nguetho nꞌda ngu nꞌda yʉ xɛqui gätho i ja yʉ́ ꞌbɛfi. Pɛ nu yʉ́ xɛqui ma jąꞌihʉ ngue dí ɛ̨mfʉ nte i pɛfi, pɛ manꞌda ɛ̨mmɛ di muui ʉ.
\v 23 Nɛ nu ꞌda yʉ xɛqui dí ɛ̨mfʉ di ꞌbɛdi, pɛ manꞌda ga hojʉ nꞌdamhma xtán ho. Nɛ nu yʉ xɛqui dí ɛ̨mfʉ hingui sä da hnu, pɛ manꞌda dí jamansuhʉ nꞌdamhma hin da tsꞌani.
\v 24 Pɛ nu ꞌbɛꞌa di nɛcmanho nangue ma jąꞌihʉ, ya hinꞌyʉ ꞌbɛꞌa manꞌda ga jafʉ. Pɛ Oją bi hoqui gätho ma jąꞌihʉ, nɛ bi japi ngue manꞌda bi muui a dí ɛ̨mfʉ hingui ho. Janangueꞌa hin da tꞌɛ̨mp a nꞌda xɛqui nte di muui.
\v 25 Janangueꞌa hin da zä din hec yʉ ꞌyɛ̨cꞌyɛ̨i, tenguꞌbʉ yʉ́ xɛqui ma jąꞌihʉ, pɛ ꞌda xtín jamansu nꞌda ngu nꞌda.
\v 26 Janangueꞌa nuꞌbʉ nꞌdaxɛqui ma jąꞌihʉ xʉn ʉ, ya ꞌda nan ʉ tho gätho ma jąꞌihʉ bʉya. O nuꞌbʉ nꞌda ra xɛqui ngue hin hapʉ i sä, ya di johya gätho ma jąꞌihʉ bʉya.
\v 27 Pɛ guim bɛ̨mhbʉ nangue nim pɛtihʉ, nɛ gueꞌa rá jąꞌi ra Cristo a, nɛ nꞌda ngu nꞌda ahʉ tenguꞌbʉ nꞌda a nꞌdaxɛqui ahʉ rá jąꞌi ra Cristo.
\v 28 Nɛ ngubʉ bi zän Oją nangue ram pɛti dí øthʉ, ngue ꞌbɛꞌa ní ꞌbɛfi dí øthʉ nꞌda ngu nꞌdajʉ. Nɛ nuꞌʉ yʉ́ ꞌbäihʉ ra Cristo manꞌda bi tsꞌänbi da hnumansu ʉ. Nɛ nu yʉ́ pøngahyą Oją, nɛꞌʉ bi tsꞌänbi da hnumansu ʉ, pɛ hinga ꞌdaꞌigu. Nɛ ná hyu bʉya yʉ xänbate nangue rám hman Oją, nɛ bi tsꞌänbi nɛꞌʉ da hnumansu ʉ, pɛ hinga ꞌdaꞌiguhʉ ʉ miꞌda. Nɛꞌʉ miꞌda i øtꞌ yʉn tꞌøtꞌe mixte, nɛꞌʉ miꞌda i øthe yʉ hyɛ̨nni, pɛ nɛꞌʉ miꞌda toꞌo i fäx yʉ́ miꞌyɛ̨cꞌyɛ̨ihʉ nangue ran huɛ̨cate ørpe, nɛꞌʉ miꞌda yʉ ngʉrbi di manda ram pɛti, nɛꞌʉ toꞌo ꞌdahma ꞌdanꞌyo bʉ na yą ngue yʉ nde hingam fądi, gätho bi tsꞌänba yʉ́ ꞌbɛfi nꞌda ngu nꞌda.
\v 29 Pɛ ha gätho ahʉ ni ꞌbäihʉ ra Cristo ꞌbʉ, uague yʉ́ pøngahyą ahʉ Oją ꞌbʉ, uague guí ɛ̨mhbʉ gätho gan xänbatehʉ, uague gätho gui ꞌyøthʉ yʉn tꞌøtꞌe mixte ꞌbʉ.
\v 30 Ha gätho i ja ni tsꞌɛdihʉ ngue gui xoxhʉ yʉ hyɛ̨nni, uague gä ꞌdahma ꞌdanꞌyo yʉ nde guí yąhʉ, ha gätho guí pądi guim mamhbʉ ꞌbɛꞌa nam bønꞌʉ yʉ nde xʉn hɛ̨i. Nɛ majuąni dí xi ahʉ ngue hinꞌna.
\v 31 Pɛ dami hyomhbʉ Oją ngue di ꞌda ahʉ ra tsꞌɛdi ndaꞌa manꞌda dí fäx ni mijąꞌihʉ. Pɛ nuya ga utꞌahʉ manꞌda ra ꞌbɛfi ꞌbɛꞌa ctí fäx ni mijąꞌihʉ pɛ xinda gue miꞌda.
\c 13
\s Nangueꞌa ran huɛ̨cate
\p
\v 1 Pɛ nuꞌbʉ gä xcán yąhʉ yʉ́ nde yʉ jąꞌi, o tengu bʉ na yą ʉ yʉ́m ꞌbɛhni Oją mahɛ̨tsꞌi, pɛ nuꞌbʉ hinꞌyʉ man huɛ̨catehʉ, hin te ní mba tho ꞌbɛꞌa dí øthʉ ꞌbʉ, tengu thoho nꞌda ra dambu o gueꞌʉ yʉ xitꞌɛgui zʉntho nɛ ndetho ɛ̨mmɛ xʉn hɛ̨i.
\v 2 Nɛ madagueꞌbʉ i ja ma tsꞌɛdihʉ gam mamhbʉ ram hma ngue dím pøngahyąhʉ nangue Oją, pɛ nuꞌbʉ hin dadí huɛ̨jʉ to dí xihmbʉ ram hma, nte ní mba tho. O nuꞌbʉ xcá pąhmbʉ ꞌbɛꞌa gätho an tꞌągui nangue Oją, o gueꞌbʉ xcá pąhmbʉ ꞌbɛꞌa gätho manꞌda xʉn hɛ̨i, o nuꞌbʉ ga pąhmbʉ da tꞌørcahʉ a dí äfʉ Oją, nɛꞌʉ yʉ tꞌøhø da zä da ꞌuegue, pɛ nuꞌbʉ hinꞌyʉ man huɛ̨catehʉ, hin te dadí muhʉ ꞌbʉ.
\v 3 O nuꞌbʉ xcá unhdʉ yʉ hyoya ꞌbɛꞌa gätho dí pɛshʉ, pɛ nuꞌbʉ hin dá bɛ̨mhbʉ a ran huɛ̨cate, ya nte dá tąhmbʉ bʉ na nu Oją ꞌbʉ. Nɛ ma xinda gueꞌbʉ gätho ma jąꞌihʉ xcá umhbʉ ngue xtín zø, pɛ nuꞌbʉ him bin ja man huɛ̨catehʉ, ya nte dá tąhmbʉ bʉya nangue rán jąpi Oją.
\v 4 Pɛ nuꞌa ran huɛ̨cate nam bøni, ra yembʉi, nɛ hin din xømbʉi, nɛ hin din sɛya, nɛ xín ná yątꞌa ngue ja rá tsꞌɛdi, xíngui honi da tꞌɛ̨spa zɛhɛ.
\v 5 Nɛ nu ran huɛ̨cate nam bøni, pɛspa rá sä rá mijąꞌiui, nɛ hingui honi nangue rán hosɛ pɛ i honba ran ho rá mijąꞌiui. Nɛ hingui sämanꞌʉ, nɛ hingui ørpa ra güɛnda ran tsꞌo bi tꞌørpe ꞌbʉ majuąni ja rán huɛ̨cate.
\v 6 Nɛ nuꞌʉ di huɛ̨c yʉ́ mijąꞌihʉ, hin di johya ꞌbʉ ꞌboꞌo in nu i øtꞌ ra tsꞌoqui, pɛ ɛ̨mmɛ di johya ꞌbʉ ꞌboꞌo in nu i tɛnꞌna ra ꞌyu majuąni.
\v 7 Nɛ nuꞌa i ja rán huɛ̨cate, hingui sumanhɛ̨i di huɛ̨cꞌa nꞌda, madagueꞌbʉ i ørpa ran tsꞌo. Nɛ hinjąmꞌbʉ ɛ̨cꞌyɛ̨i ꞌbʉ tꞌɛ̨mbi øtꞌ ran tsꞌo a to di huɛ̨qui. Pɛ nuꞌbʉ i pądi bi ꞌyøtꞌ ran tsꞌo, i tøꞌmi din ꞌyomfɛ̨ni. Nɛ hinjąmꞌbʉ ɛꞌtsꞌa ní ꞌyøtꞌ ran huɛ̨cate.
\v 8 Pɛ nuꞌʉ ꞌda gä dí øthʉ ya, da zøni da zɛꞌʉ. Nguetho da zøn ra pa ngue njom mam pøngahyą nangue Oją, nɛ njom mam ma nangue miꞌda yʉ nde ꞌdahma ꞌdanꞌyo ngue hingam fądi. Nɛ nuꞌʉ toꞌo i ja yʉ́ tsꞌɛdi da ma ꞌbɛꞌa gätho xʉn hɛ̨i da fądi nangue Oją, pɛ him ma manꞌʉ, ꞌbʉ ya gätho ga pąhmbʉ xʉn ho. 
\v 9 Pɛ nuya nu toꞌo bin tꞌunni da manꞌa xʉn hɛ̨i, pɛ hinga gätho i pądi xʉn ho nangue Oją. Nɛꞌʉ to bin tꞌunni dim pøngahyą, pɛ hinga gä im ma.
\v 10 Nɛ nuꞌa dí øthʉ ya ngue dí ꞌbʉhmbʉ yʉ pøngahyą, pɛ ya him ma homhbʉ ꞌbʉ dá pąhmbʉ xʉn ho, nguetho hinga gätho im manꞌʉ.
\v 11 Nɛ tenguꞌbʉ mán tꞌʉhnihʉ, dá yąhʉ tengu bʉ na yą yʉ tꞌʉhni, nɛ ngubʉ dám bɛ̨mhbʉ, tengu bʉ nam bɛ̨n yʉ tꞌʉhni. Nɛ nuꞌbʉ mán dąnꞌyohʉhʉ bʉya, ya dá bɛ̨mhbʉ ngue ga sohmbʉ ꞌbɛꞌa gätho mí øthʉ ꞌbʉ mán tꞌʉhnihʉ.
\v 12 Nɛ gueꞌa dí øthʉ yʉ pa i jabʉ a ya, nɛ hingui sä gan nuhʉ ꞌbɛꞌa di ja Oją. Tengu thoho ꞌbʉ dí hɛ̨thʉ nꞌda ran hyɛ̨dä hingui di nɛqui xʉn ho rá hmi nꞌda ra jąꞌi. Pɛgue da zøni ngue da zä ga pąhmbʉ xʉn ho ꞌbʉ dá nusɛhʉ Oją. Nuya hingui sä ga pąhmbʉ xʉn ho ha in ja, pɛgue da zøni ga pąhmbʉ xʉn ho, tengu thoho Oją i pąjʉ ya.
\v 13 Pɛ hyu i jajʉ ngue hinjąmꞌbʉ ga juahmbʉ. Nuꞌa nꞌda, ngueꞌa ga pąhmbʉ majuąni da ꞌyøtꞌa ran ho bi man Oją, nɛ nuꞌa ná yoho ngueꞌa ga tømhbʉ a i mam bʉya, ná hyu bʉya, ngue a ran huɛ̨cate. Nɛ manꞌda xʉn ngu di muui ran huɛ̨cate xinda gueꞌʉ miꞌda i hmangua.
\c 14
\s Nangueꞌʉ ꞌdahma ꞌdanꞌyo bʉ na yą
\p
\v 1 Pɛ manꞌda ga humbi ga øthʉ ran huɛ̨cate. Nɛ a manꞌda di bɛ̨ngahʉ rá Hogandąhi Oją, dam pøngahyąhʉ ga mamhbʉ rám hman Oją. Nɛ mꞌbɛjua tsꞌʉ da zä ga øthʉ miꞌda yʉ ꞌbɛfi di bɛ̨ngahʉ rá Hogandąhi Oją bʉya.
\v 2 Pɛ nuꞌʉ toꞌo i yą nꞌda ra nde hingam fądi, høntꞌa Oją da zä din yąui, nɛ hinga gueꞌʉ yʉ jąꞌi i yąhʉ. Nguetho njongui øde ꞌbɛꞌa im ma. Nɛ masque rá Hogandąhi Oją di bɛ̨nbi, pɛ ntꞌągui thoho.
\v 3 Pɛ nuꞌʉ toꞌo dim pøngahyą nangue ra nde ngueꞌa mfądi, i xih yʉ́ mijąꞌihʉ, nɛ da zä di japi din te yʉ́ mbʉi, nɛ di zɛrpa yʉ́ mbʉi, nɛ ɛ̨mmɛ di un ran johya yʉ́ mbʉi.
\v 4 Pɛ nuꞌʉ toꞌo i yą nꞌda ra nde ngue hingam fądi, masque di zɛsɛ rá mbʉi, pɛ nuꞌʉ to dim pøngahyą, gä di zɛꞌʉ yʉ́ miꞌyɛ̨cꞌyɛihʉ.
\v 5 Nɛ dín ndehmagä gätho ahʉ gan yąhʉ ꞌdahma ꞌdanꞌyo yʉ nde. Pɛ ɛ̨mmɛ manꞌda dín nde ahʉ gätho gui mamhbʉ rám hma Oją nangue ra nde ngue mfądi. Nguetho manꞌda xʉn ho a, xinda gueꞌbʉ gan yąhʉ miꞌda yʉ nde gue nꞌdanꞌyo hinda hønꞌbʉ da zä gui mamhbʉ ꞌbɛꞌa nam bønꞌa gá mamhbʉ, nɛ gätho din te yʉ́ mbʉi yʉ ꞌyɛ̨cꞌyɛi bʉya.
\v 6 Jannangueꞌa ma zi cuꞌahʉ, xiꞌbʉ høntꞌʉ yʉ nde hingam fądi gam mangä ꞌbʉ dá mbagä bʉ, ꞌbɛꞌa ním fätsꞌi ga øtꞌahʉ ꞌbʉ. Pɛ manꞌda xʉn ho ꞌbʉ ga xänꞌnahʉ rám hman Oją nangue ma ndesɛhʉ, nɛ ga ꞌda ahʉ nꞌda ran ꞌyomfɛ̨ni hin guí pąhmbʉ, nɛ ga xänꞌnahʉ ꞌbɛꞌa bi ꞌyurcä Oją.
\v 7 Nɛ gam bɛ̨mhbʉ ꞌbɛꞌa i øtꞌ yʉm ꞌbixtꞌi nɛ yʉ ꞌbida. Nuꞌʉ hingui ja yʉ́ te pɛ i yą. Pɛ nuꞌbʉ hingui pømanho a im ma, ya hingam fądi ꞌbɛꞌa ní ꞌbɛi a bʉya, nguetho ꞌda nan gɛ̨tho.
\v 8 Nɛ ngutho nꞌda ra thʉxi bʉ ja ra sʉi, da ma xʉn ho a ra ꞌbɛi ngue dín tunh yʉ dofʉi. Pɛ nuꞌbʉ hin da mba mꞌbixtꞌi xʉn ho, njon da bądi ꞌbɛꞌa nam bøni, nɛ njon din sä da mba ra tuhni. 
\v 9 Nɛ ngutho ahʉ ꞌbʉ hin guí yąhʉ nꞌda ra nde ntꞌøde xʉn ho, hague dán zä da fądi ꞌbɛꞌa guím mamhbʉ.
\v 10 Nɛ masque ɛ̨mmɛ xʉn ngu yʉ nde i ja ua ja ra ximhäi, nɛ gätho xʉn ho ꞌbʉ ꞌboꞌo i pądi ꞌbɛꞌa nam bøni.
\v 11 Pɛ nugä, nuꞌbʉ hin dí pą a ra nde ní tsꞌoqui, ya xcá øtꞌbe tenguꞌbʉ nꞌda an ꞌdanni ma hniniꞌbe, nɛ hingui sä dam pąꞌbe.
\v 12 Nuꞌa guí ndehʉ ɛ̨mmɛ din ja ni tsꞌɛdihʉ nangue rá Hogandąhi Oją, pɛ dami ꞌyäfʉ ꞌbɛꞌa ní tsꞌɛdi da zä dín te yʉ́ mbʉi gätho yʉ ꞌyɛ̨cꞌyɛi guí ꞌbʉhmbʉ. 
\v 13 Nuꞌbʉ nꞌda ra jąꞌi din yą manꞌda ra nde hingam fądi, pɛ da ꞌyäp rá tsꞌɛdi Oją da zä da ma ꞌbɛꞌa nam bøni.
\v 14 Nuꞌbʉ dí yąꞌbe Oją nangue manꞌda ra nde nꞌdanꞌyo, go i yą rá Hogandąhi Oją i o ma mbʉi, pɛ hin dí thocpa ran ꞌyomfɛ̨ni ʉ miꞌda ꞌbʉpʉ, ngue ꞌbɛꞌa nam bønꞌa dí ma.
\v 15 ꞌBɛꞌa xʉn ho ga øtꞌe. Pɛ ndeꞌbʉ dan yąꞌbe Oją nangue rá Hogandąhi, pɛ i jatho ga japi da bą ʉ miꞌda ꞌbʉpʉ ngue ꞌbɛꞌa nam bøni. Nɛ ngutho ꞌbʉ dan tuh yʉ thuhu, ga ɛ̨spa Oją nangue rá Hogandąhi, pɛ guextaꞌa i jatho ga bɛ̨ni ꞌbɛꞌa nam bøni, nɛ ga japi da bɛ̨nꞌʉ miꞌda bʉya.
\v 16 Nguetho nuꞌbʉ guí ɛ̨spahʉ Oją nangue nꞌda ra nde hingam fądi, nɛ madagueꞌbʉ di bɛ̨nꞌnahʉ rá Hogandąhi Oją, pɛ nuꞌʉ ꞌda hin da zä gui comhbʉ a ram hma ꞌbɛꞌa gní ꞌyɛ̨spahʉ Oją, nguetho hingui pądi ꞌbɛꞌa nam bønꞌa guí mamhbʉ.
\v 17 Nɛ madagueꞌbʉ majuąni guídí unhdʉ ra jamadi Oją gueꞌbʉ nꞌdanꞌyo ra nde guí yąhʉ, pɛ hin guídí zɛrpahʉ yʉ́ mbʉi ni mijąꞌihʉ, ngue nɛꞌʉ dí un ra jamadi Oją.
\v 18 Jamadi Oją nguetho manꞌda i sä dan yągä yʉ nde hingam fądi xinda gue ahʉ.
\v 19 Pɛ nu bʉ ja yʉm pɛti, madagueꞌbʉ høntꞌi cʉtꞌa thoho yʉm hma ga ma gueꞌʉ ntꞌøde xʉn ho, pɛ manꞌda xʉn ho, xinda gueꞌbʉ ga ɛ̨na ga mam bʉ ꞌdɛtꞌa mahuąhi yʉm hma gueꞌʉ hingam fądi ꞌbɛꞌa nam bøni. Nguetho dín nde ga xänba yʉ cu.
\v 20 Ma zi cu ahʉ, o guí øthʉ tenguꞌbʉ gyʉ́ tꞌʉhni ahʉ, pɛ damín ꞌyomfɛ̨nihʉ xʉn ho ꞌbɛꞌa manꞌda xʉn ho gui ꞌyøthʉ bʉ ja nim pɛtihʉ. Nguetho gyʉ  dąjąꞌihʉ, madagueꞌbʉ i tꞌɛ̨nꞌahʉ gyʉ ꞌuɛrehʉ ngueꞌa hin guí nde gui ꞌyøthʉ yʉ tsꞌoqui.
\v 21 Bi ꞌyɛ̨m bʉ ja rá tꞌohni Oją: “Madagueꞌbʉ dá japi bá ɛ̨h yʉ ꞌdamhnini ngue ꞌdanꞌyo bʉ na yą, ngue da zo ʉ ꞌbʉcua, pɛ ngutho him bi ꞌyʉrpa ra güɛnda a dám mangä ʉ,” biꞌ yɛ̨n Oją.
\v 22 Janangueꞌa ga pąhmbʉ nꞌda ra hmɛpya ꞌbʉ ꞌboꞌo din yą manꞌda ra nde nꞌdanꞌyo, i uh rá tsꞌɛdi Oją, hndepe da ꞌyɛ̨cꞌyɛi ʉ hingui nde da ꞌyɛ̨cꞌyɛi. Nɛ hinga gueꞌʉ yʉ ꞌyɛ̨cꞌyɛi i pa ntꞌørpe yʉ hmɛpya. Pɛ nu ra tsꞌɛdi ngue da man rám hman Oją nangue yʉ́ ndesɛ ʉ, xʉn ho ngueꞌa da xänbi gätho yʉ ꞌyɛ̨cꞌyɛi, nɛ hin nangueꞌʉ ɛ̨mmɛ xʉm mɛ yʉ́ mbʉi, hingui nde da ꞌyɛ̨cꞌyɛi.
\v 23 Pɛ xiꞌbʉ bim pɛti gätho yʉ ꞌyɛ̨cꞌyɛi nɛ gätho ꞌdahma ꞌdanꞌyo yʉ nde i yą, nɛ da zøm bʉ ꞌda ngue hing yʉ ꞌyɛ̨cꞌyɛi, o gueꞌʉ hinga na pądi xʉn ho. Ha hin guím bɛ̨mhbʉ ngue da ꞌyɛ̨nꞌahʉ guí jąthʉ.
\v 24 Pɛ nuꞌbʉ gätho guí mamhbʉ rám hma Oją ngue ra nde mfądi, nɛ da yʉrpʉ ꞌda hing yʉ ꞌyɛ̨cꞌyɛi o gueꞌʉ hinga na pądi xʉn ho. Nɛ da bąsɛ bʉya ngue ja yʉ́ tsꞌoqui, nɛ da bądi ꞌbɛꞌa i ja yʉ́ mbʉi zɛhɛ ꞌbʉ bi ꞌyøꞌa guí mamhbʉ.
\v 25 Nɛ nuꞌa ntꞌągui bʉ mbo yʉ́ mbʉi da japi di nɛqui xʉn ho. Nɛ din dąnyahmu nɛ da ꞌyäp rá punbi Oją bʉya. Nɛ da ꞌyɛ̨na: “Majuąni maha guí ꞌbʉhmbʉ Oją,” da ꞌyɛ̨m bʉya.
\s Da tꞌøtꞌe xʉn ho a ram pɛti
\p
\v 26 Nuya, ma zi cu ahʉ, dín nde ga xi ahʉ ꞌbɛꞌa manꞌda xʉn ho gui ꞌyøthʉ ꞌbʉ guídím pɛtihʉ. Pɛ ndeꞌbʉ ꞌbɛ guim bɛ̨mhbʉ ꞌbɛꞌa dín te yʉ́ mbʉi gätho yʉ ꞌyɛ̨cꞌyɛi, nɛ da zä gan tuhmbʉ nꞌda ra thuhu guín nde gan tuhmbʉ bʉya, o gue nꞌda ram hma guín nde gan xänbatehʉ, o gue nꞌda ram hma bi bɛ̨nꞌnahʉ Oją ngue gui mamhbʉ, o nꞌda ram hma guí nde gui mamhbʉ nꞌda ra nde hingam fądi ꞌbɛꞌa nam bøni, pɛ gueꞌbʉ di ꞌbʉi toꞌo da man a ꞌbɛꞌa nam bøni ngue hingam fądi.
\v 27 Pɛ nuꞌbʉ guí yąhʉ manꞌda ra nde nꞌdanꞌyo, høntꞌʉ yonjąꞌi din yą, nɛ nuꞌbʉ xʉn ngu, hyunjąꞌi. Nɛ hinga nꞌdatꞌa ra ora din yą gätho. Nubʉya i jatho dim ꞌbʉꞌa nꞌda da ma ꞌbɛꞌa nam bøn a bi hma.
\v 28 Pɛ nuꞌbʉ njongui ꞌbʉpʉ nꞌda i pądi da ma ꞌbɛꞌa nam bønꞌa bi hma, manꞌda xʉn ho ꞌbʉ nte da mam bʉ ja nim pɛtihʉ. Da zä din yą, pɛ nꞌdanni din yąsɛui Oją.
\v 29 Ximangutho ʉ i man rám hman Oją nangue ra nde mfądi, din yą yoho o hyu. Nɛ nuꞌʉ toꞌo bin tꞌun ra tsꞌɛdi da bądi ꞌbɛꞌa nam bønꞌa ram hma, da mam ꞌbʉ hingui ho, ua gueꞌbʉ xʉn ho. 
\v 30 Nɛ nuꞌbʉ i hupʉ nꞌda bi bɛ̨nba Oją da ma ꞌbɛꞌa im bɛ̨ni da ma, pɛ ꞌbɛ di jua a i yą bʉ, nɛ gui jafʉ din yą a manꞌda bʉya.
\v 31 Janangueꞌa da xøtꞌa gan yąhʉ ꞌdahmi ꞌdatho, nɛ gätho ahʉ toꞌo gätho di bɛ̨nba Oją din yą. Nubʉya tengu ꞌbʉ gán niyąbahʉ yʉ cu nangue yʉ́ mbʉi nɛ gätho da hyą yʉ tsꞌɛdi yʉ́ mbʉi bʉya.
\v 32 Nuꞌʉ to i man rám hman Oją i jatho da ząmzɛhɛ rá mbʉi zɛhɛ, madagueꞌbʉ Oją bi bɛ̨nbi din yą, pɛ jatho da døꞌmi tsꞌʉ, ꞌbɛ din yą a manꞌda.
\v 33 Nguetho nde Oją da tsꞌänni ꞌbɛꞌa gätho din ja bʉ, nɛ hinga ꞌda ni thąs thoho ꞌbɛꞌa gätho i øtꞌ Oją. Nɛ in jabʉ i tꞌøtꞌe hønbʉ go hapʉ i ja yʉ́m pɛti ma miꞌyɛ̨cꞌyɛihʉ.
\v 34 Nɛ nu yʉ xisu hingui sä din yą bʉ ja yʉ dąmpɛti, nguetho hinꞌyʉ yʉ́n tꞌɛ̨di din yą ʉ, nɛ i jatho da ꞌyøꞌa ꞌbɛꞌa da sifi, nɛ hin dim ꞌbɛtꞌo, tengu i mam bʉ ja rá tꞌohni Oją.
\v 35 Nɛ nuꞌbʉ in nde da ꞌyänni ꞌbɛꞌa nam bøn a hmam bʉ, i jatho da ꞌyänꞌna rá ndø bʉ ja rá ngusɛ, nguetho hin di nɛcmanho ꞌbʉ i yą nꞌda ra xisu bʉ ja ram pɛti.
\v 36 Ha guím bɛ̨mhbʉ gá dʉmzɛhɛhʉ rá ꞌbɛfi Oją, ngue guí ɛ̨mhbʉ da zä gui sänzɛhɛhʉ ꞌbɛꞌa gui ꞌyøthʉ. Uague guím bɛ̨mhbʉ hønꞌadahʉ gá hyąmhbʉ a ram hma.
\v 37 Pɛ nuꞌbʉ majuąni bi ꞌda ahʉ rá tsꞌɛdi Oją gui mamhbʉ rám hma, o gueꞌbʉ majuąni bin ꞌda ahʉ nin ꞌyomfɛ̨nihʉ nangue rá Hogandąhi Oją, nuꞌbʉ, jatho gui ꞌyøthʉ a dá otꞌahʉ ꞌbʉ, nguetho rá manda ra Hmu a.
\v 38 Nɛ nuꞌbʉ ꞌboꞌo hingui nde da ꞌyøꞌa dá otꞌahʉ, pɛ hingui sä gui ꞌyʉrpahʉ ra güɛnda a.
\v 39 Janangueꞌa ma zi cu ahʉ, manꞌda ɛ̨mmɛ gui hyumbi gui mamhbʉ rám hman Oją nangue ra nde mfądi. Pɛ hin gui hɛcpahʉ toꞌo in nde din yą manꞌda ra nde.
\v 40 Pɛ gan ꞌyomfɛ̨nihʉ xʉn ho, nɛ ꞌdarpʉ dí mba gui ꞌyøthʉ, nɛ hinga ꞌda dí thąs thoho ꞌbɛꞌa gätho gui ꞌyøthʉ.
\c 15
\s Bi ndantsꞌ mahønꞌa ra Cristo
\p
\v 1 Nuya ma zi cuꞌahʉ, dín nde ga xi ahʉ mahønꞌa ran ho maꞌdaꞌyo, tengu dá xi ahʉ mam ꞌbɛtꞌo. Nɛ gueꞌa ram hma gá hyąmhbʉ, nɛ gueꞌa gním ꞌbähmbʉ xʉn ho a.
\v 2 Nɛ guetꞌa ram hman a gní yąn ni tehʉ a ꞌbʉ guidí thoqui gui tɛn thohohʉ a dá xi ahʉ. Pɛ nuꞌbʉ hinꞌna, säti tho guí ɛ̨mhbʉ guí øthʉ ꞌbʉ.
\v 3 Nɛ dá ja ahʉ gá pąhmbʉ a ram hma bin ꞌdacä ngue manꞌda jatsꞌɛdi tho ga pąhmbʉ. Ngue dá xänꞌnahʉ bi du ra Cristo, bi hoga ma tsꞌoquihʉ, tengu thoho mán tꞌoꞌtꞌi bʉ ja rá tꞌohni Oją.
\v 4 Bi tꞌägui, nɛ bi xox Oją ꞌbʉ ná hyupa, tengu thoho mí mam bʉ ja rá tꞌohni Oją.
\v 5 Nɛ nuꞌbʉ mi dąmbɛ̨ni ra Cristo, mꞌbɛtꞌo bin ꞌyusɛ bʉ ꞌbʉh ra Pedro, nɛ mꞌbɛjua bʉya bi nu miꞌda yʉ́ xädi.
\v 6 Nɛ mꞌbɛjua bʉya xø ꞌbexque bi nɛqui bʉ ꞌdarpʉ mídím pɛti cʉtꞌa ciɛnto yʉ cu. Nɛ ɛ̨mmɛ xʉn ngu i ꞌbʉtho ʉ ya, madagueꞌbʉ xʉn du ʉ ꞌda.
\v 7 Nɛ mꞌbɛjua bi nu ra Jacobo, nɛ mꞌbɛjua mahønꞌa bi nu gätho ʉ yʉ́ ꞌbäihʉ.
\v 8 Pɛ rán zɛgui thoho nɛcä bi zä dá nugä ra Cristo bʉ ꞌyu. Nɛ ɛ̨mmɛ xʉn hɛ̨i bʉ dá ɛ̨cꞌyɛigä a ram ꞌbʉi maꞌdaꞌyo, tenguꞌbʉ nꞌda ra ꞌuɛre hingui sä dim ꞌbʉi, nɛ ɛ̨mmɛ din ʉnbi.
\v 9 Nɛ him man zäꞌbe ngue xtá tꞌɛ̨ngä ma ꞌbäiꞌbe ra Cristo, nɛ manꞌda tsꞌʉtho dadí muꞌbe xinda gueꞌʉ miꞌda yʉ́ ꞌbäihʉ, nguetho ɛ̨mmɛ dá ʉnbä ʉ yʉ́ ꞌyɛ̨cꞌyɛi Oją.
\v 10 Pɛ nu Oją rá mate zɛhɛ bi jaqui tengu dín jagä ya. Nɛ hinga säti thoho rá mate Oją bi ꞌyørque, nguetho ɛ̨mmɛ dá humbi xinda gue gätho miꞌda yʉ́ ꞌbäihʉ ra Cristo. Pɛ hinga guecä dá øtꞌ ra ꞌbɛfi, nɛ gueꞌa rá mate zɛhɛ Oją bi zɛqui dá øtꞌe.
\v 11 Madagueꞌbʉ guecä o gueꞌʉ miꞌda bi xänꞌnahʉ, pɛ nꞌdatꞌa ram hma dí mamhbe ngue bi du ra Cristo nangue ma tsꞌoquihʉ, nɛ bi xox Oją ꞌbʉ mi du. Nɛ gueꞌa ram hma gá ꞌyɛ̨cꞌyɛihʉ a.
\s Da xox Oją ʉ xʉn du
\p
\v 12 Pɛ xi a ram hma dí mamhbʉ, ngue bi dąmbɛ̨ni ra Cristo ꞌbʉ mí du, pɛ hanja gní ꞌyɛ̨mhbʉ ꞌda ahʉ bʉya, ngue hingui sä da dąmbɛ̨ni ʉ xʉn du.
\v 13 Nuꞌbʉ hin da dąmbɛ̨ni ʉ xʉn du, pɛ xinga gueꞌa ra Cristo xtán dąmbɛ̨ni ꞌbʉ, nɛ guextaꞌa ya xʉn du a ya ꞌbʉ.
\v 14 Nɛ nuꞌbʉ hin xtán dąmbɛ̨ni a ra Cristo, hinꞌyʉ rá tsꞌɛdi a ram hma dí mamhbʉ ꞌbʉ, nɛ ndetho guí ꞌyohʉ bʉ ꞌbʉ.
\v 15 Nɛ nuꞌbʉ ngubʉ guím bɛ̨mhbʉ ngue hingui sä da dąmbɛ̨ni ʉ xʉn du, guí nubɛthąni gahe ꞌbʉ ngue dí mamhbe bi xox Oją a ra Cristo ꞌbʉ mi du.
\v 16 Nuꞌbʉ hingui sä da dąmbɛ̨ni nꞌda ra du, pɛ xínga gue a ra Cristo xtán zä xtán dąmbɛ̨ni ꞌbʉ.
\v 17 Nɛ nuꞌbʉ guextaꞌa ra du a ra Cristo, säti thoho guí ɛ̨cꞌyɛihʉ a ꞌbʉ, nɛ guextaꞌa him mahoqui ni tsꞌoquihʉ ꞌbʉ.
\v 18 Nɛ nuꞌbʉ ngubʉ guím bɛ̨mhbʉ, pɛ nɛꞌʉ yʉ ꞌyɛ̨cꞌyɛi xʉn du bʉ ja rá ꞌyɛ ra Cristo, nɛ má zä dim ꞌbɛpʉ ꞌbʉ Oją ꞌbʉ, gueꞌbʉ ya má zä bim ꞌbɛ a ra Cristo ꞌbʉ mí du.
\v 19 Pɛ nuꞌbʉ høntya dí nuhʉ ran ho nangue ra Cristo, ha hin guím bɛ̨mhbʉ ga nuhʉ manꞌda ran ho ꞌbʉ dá tuhʉ ꞌbʉ. Pɛ huɛ̨higahʉ ꞌbʉ nte ga nuhʉ, xinda gueꞌʉ gä miꞌda yʉ jąꞌi ngue nte mbɛ̨ni da nu.
\v 20 Pɛ majuąni maha bi dąmbɛ̨ni ra Cristo ꞌbʉ mí du. Nɛ tenguꞌbʉ rá mbʉdi nꞌda ra thą bi sopʉ ja nꞌda ra huąhi, nɛ gueꞌa nam bøni ngue da xox Oją ʉ toꞌo gätho i ꞌbʉhmi ra Cristo.
\v 21 Tengu thoho ꞌbʉ mí dʉmpꞌ ran dąte ua ja ra ximhäi nꞌda ran ꞌyohʉ, ngue ra Adán, nɛ ngutho a manꞌda ran ꞌyohʉ ngue ra Cristo, bi dʉꞌmi ngue da ndantsꞌ mahønꞌa yʉ du.
\v 22 Nɛ tengu tho ʉ gätho bi xąnd ra Adán, gätho i tu, pɛ nu gätho di xąnd ra Cristo, gätho da mba nsotsꞌi.
\v 23 Pɛ hinga gätho nꞌdatꞌa ra ora da mba nsotsꞌi, nguetho rá mbʉdi a ra Cristo, nɛ nuꞌbʉ bá ɛ̨h ra Cristo, gätho ʉ xʉ huahni da mba nsotsꞌi mꞌbɛjua.
\v 24 Nɛ nubʉya, ba ɛ̨h rá pa ran zɛgui. Nguetho nuꞌa ra Cristo xí dąpi ꞌbɛꞌa gätho má tsꞌɛdi, ngue yʉ́n sʉihʉ Oją, nɛ gätho toꞌo i hąsɛ yʉ́n tꞌɛ̨di, nɛ toꞌo di manda zɛhɛ, ngueꞌʉ yʉ jąꞌi nɛꞌʉ yʉ zįthu. Nɛ nuꞌbʉ ya bi dąha, di unꞌna Oją rá Ta rá tsꞌɛdi mahønꞌa.
\v 25 Nguetho nu ra Cristo, im Hmutsꞌʉtꞌabi ya, nɛ gueꞌbʉ go bi dąha di ꞌbɛrpa yʉ́ tsꞌɛdi ʉ gätho yʉ́n sʉihʉ.
\v 26 Nɛ nuꞌa ran dąte ran zɛgui thoho da dąpi, nɛ má zä dim ꞌbɛ a bʉya. 
\v 27 Tengu bi mam bʉ ja rá tꞌohni Oją, di japi da dąh ra Cristo ꞌbɛꞌa gätho má tsꞌɛdi i ja. Pɛ njon da bɛ̨ni nɛꞌa Oją rá Ta da dąpi, nguetho guesɛ bi un rá tsꞌɛdi ra Cristo a.
\v 28 Nɛ nuꞌbʉ gätho bi dą a ra Cristo ʉ ꞌbɛꞌa gä ní tsꞌɛdi i ja, nɛ nuꞌa ra Cristo bʉya, ngue rá Tsꞌʉntꞌʉ Oją, nɛ din däsɛ bʉ ꞌbʉ Oją rá Ta. Nguetho mꞌbɛtꞌo xí un rá tsꞌɛdi. Nubʉya da hønsɛ Oją din ja rá tsꞌɛdi bʉya.
\v 29 Nɛ manꞌda guí øthʉ guídín xixyąhʉ nangueꞌʉ xʉn du. Pɛ hanja gní ꞌyɛ̨mhbʉ him mam ꞌbʉ ʉ xʉn du bʉya.
\v 30 Nɛ hanja hin dí su man dątehe, gätho ʉ yʉ pa dí ꞌbʉhmbe ua thą, gueꞌbʉ xcá pąhmbe hin ga ndanshe mahønꞌa. 
\v 31 Nɛ majuąni thocpa thoho dadím pomꞌbe ran dąte. Nɛ gueꞌa dí xi ahʉ a ngueꞌa dín nde ahʉ gui pąhmbʉ ꞌbɛꞌa dí øtꞌä. Nguetho ɛ̨mmɛ dí numanho ahʉ, ma zi cu ahʉ, ngue nꞌdatꞌa ma Hmuhʉ ra Jesucristo dí ɛ̨cꞌyɛihʉ.
\v 32 Nɛ dá hätꞌi xʉn ngu yʉn ʉnbi, nɛ xi ʉ yʉ zate dán tunhdäꞌbe ua Éfeso, ngubʉ i ɛ̨mb yʉ jąꞌi. Pɛ ꞌbɛꞌa ní mba a dá øtꞌä ꞌbʉ hin da dąmbɛ̨ni ʉ xʉn du. Pɛ nuꞌbʉ hin ga ndanshʉ mahønꞌa, mbähä dan sihmɛhʉ ya nɛ dam minhdʉ, nguetho má zä ga tuhʉ nixudi mani.
\v 33 O guídín hyɛhmbʉ da thä ahʉ gui tɛnhdʉ yʉ́m hman ʉ ꞌda yʉ hyäte, janangueꞌa hin gui ꞌbɛhmbʉ yʉ hogan tꞌøtꞌe.
\v 34 Pɛ damin ꞌyomfɛ̨nihʉ xʉn ho gui pąhmbʉ ndaꞌa ram hma gue majuąni, nɛ gui ꞌyɛshʉ yʉ tsꞌoqui bʉya. Nguetho guí ꞌbʉhmbʉ ꞌda hinga ná pąhmbʉ xʉn ho Oją. Nɛ guehna dí xi ahʉ na, janangueꞌa gui pɛsꞌ ni sähʉ.
\s Hague din ja ꞌbʉ bi dąmbɛ̨ni ʉ xʉn du
\p
\v 35 Uague guím bɛ̨mhbʉ ꞌda ahʉ gui ꞌyängahʉ: “ꞌBɛꞌa di ja ꞌbʉ bi dąmbɛ̨ni ʉ xʉn du, nɛ ꞌbɛꞌa ní ngøcꞌyɛi din ja mahønꞌa.”
\v 36 Pɛ nꞌda rán tꞌänni yʉ ꞌyąmbʉi a. Ha hin guí nuhʉ ꞌbɛꞌa di ja nꞌda ra hmudä ꞌbʉ pa nthuhu ngue i ꞌya rá xi nɛ ja da bøxꞌa rá mbʉi bʉya.
\v 37 Nɛ høntꞌa go má hmudä guí tuhmbʉ, hinga guextaꞌa rá ndä ꞌbʉ bi bøtsꞌe. Nguetho gueꞌa rá ndä gá tuhmbʉ, nɛ ra paxi bʉ dán go ꞌbʉ bi bøtsꞌe.
\v 38 Nɛ høntꞌa go ndaꞌa má hmudä da thuhu, gätho yʉ́ xisɛ ꞌbʉ bin ja, tengu bi zänba Oją a.
\v 39 Nɛ hinga ꞌdaꞌangu ma ngøcꞌyɛihʉ yʉ fani o gue yʉ doja o yʉ huą.
\v 40 Nɛ in jabʉ ꞌbɛꞌa gätho i ja bʉ mahɛ̨tsꞌi nɛ ꞌbɛꞌa gätho i ja ua ja ra ximhäi, nuꞌʉ bí ja bʉ mahɛ̨tsꞌi, nꞌdanꞌyo thoho nán ho xinda gueꞌʉ ja ua ja ra häi.
\v 41 Nuꞌa rán nɛqui ra hyadi nɛ ra ząna nɛ yʉ sø gätho ꞌdahma ꞌdanꞌyo. Nɛ hinga ꞌdaꞌangu ʉ yʉ sø, ꞌdahma ꞌdanꞌyo bʉ ni nɛqui.
\v 42 Nɛ ngutho nangueꞌbʉ bi dąmbɛ̨ni yʉ du, nɛ nuꞌbʉ bi tꞌä a ra ngøcꞌyɛi, da ꞌya nguetho ntsꞌänbi da ꞌya a. Pɛ nuꞌbʉ bi dąmbɛ̨ni bʉya nɛ hin njąmꞌbʉ da du mahønꞌa.
\v 43 Nuꞌa bi tꞌägui hingui ho, pɛ nuꞌa da bøtsꞌe ɛ̨mmɛ xʉn ho a. Nuꞌbʉ mi tꞌägui hinꞌyʉ rá tsꞌɛdi, pɛ nuꞌbʉ mí bøtsꞌe, manꞌda ɛ̨mmɛ bin ja rá tsꞌɛdi.
\v 44 Nuꞌa ra ngø ꞌbʉ mi tꞌägui, ntsꞌänni høntꞌua ja ra ximhäi dim ꞌbʉi. Pɛ nuꞌbʉ bi bøtsꞌe, ntsꞌänni dim ꞌbʉpʉ mahɛ̨tsꞌi bʉya. Nɛ guí pąhmbʉ i ja ma jąꞌihʉ nangue ra ximhäi, pɛ manꞌda i jatho gui pąhmbʉ ngue nɛꞌa din ja ma jąꞌihʉ nangue rá Hogandąhi Oją.
\v 45 Nɛ gueꞌa in ja a tengu mán tꞌoꞌtꞌi bʉ ja rá tꞌohni Oją, gue ná nꞌda ra Adán bi tsꞌänni bin jąꞌi ua ja ra ximhäi. Pɛ nuꞌa ná yoho gueꞌa di un ra temaząi ngue njąmꞌbʉ da guadi, gueꞌa ra Cristo a.
\v 46 Nɛ mꞌbɛtꞌo dám ꞌbʉhmbʉ nangue ma ngøcꞌyɛihʉ ngue høntꞌua ja ra ximhäi dim ꞌbʉi. Nɛ mꞌbɛjua bʉya dam ꞌbʉhmbʉ nangue ra ngøcꞌyɛi ngue ntsꞌänni dim ꞌbʉpʉ mahɛ̨tsꞌi. 
\v 47 Nɛ nu rá mbʉdi ran ꞌyohʉ ntꞌøtꞌe nangue ra häi. Nu a ná yoho gueꞌa bí ꞌyɛ̨h mahɛ̨tsꞌi, ma Hmuhʉ ra Cristo a.
\v 48 Nɛ ngutho ma ngøcꞌyɛihʉ ua ja ra häi, tengu tho a ran ꞌyohʉ ngue bi tꞌøtꞌe nangue ra häi. Pɛ nu ma ngøcꞌyɛihʉ mꞌbɛjua din ja tengu thoho rá ngøcꞌyɛi a ma Hmuhʉ ra Cristo, nuꞌa ran ꞌyohʉ bí ꞌyɛ̨h mahɛ̨tsꞌi a.
\v 49 Nɛ tengu thoho bʉ dá nɛquihʉ nangue ra Adán ntꞌøtꞌe ra häi, nɛ ngutho bʉ dá nɛquihʉ mahønꞌa nangueꞌa ra mɛngu bʉ mahɛ̨tsꞌi.
\v 50 Nɛ dín nde ga xi ahʉ mahønꞌa, ma zi cu ahʉ, ngue nuꞌa man ngøhʉ nɛ ma jihʉ i jajʉ ya, hingui sä da gonhui rá tsꞌɛdi Oją mahɛ̨tsꞌi a. Nguetho nuꞌa hingui hätꞌi, hingui sä ꞌdarpʉ da ꞌbɛsꞌui a da hyätꞌi hønꞌbʉ go njąmꞌbʉ.
\v 51 Pɛ dín nde ahʉ gui pąhmbʉ a him mam fądi, ngue hinga gätho ga tuhʉ ngue dyʉ́ ꞌyɛ̨cꞌyɛihʉ, pɛ gätho da mba ma pärquigahʉ ma ngøcꞌyɛihʉ.
\v 52 Nɛ xøgue nꞌdan cꞌuɛ̨rpadätho da ꞌyørcahʉ ꞌbʉ bin yą ra thʉxi ꞌbʉ rán zɛgui ra pa. Nɛ nuꞌbʉ bin yą ra thʉxi, ꞌbex da ndantsꞌi gätho ʉ yʉ ꞌyɛ̨cꞌyɛi xʉn du, nɛ din ja yʉ́ ngø him man zä din tsꞌoni. Nɛꞌʉ xí du, nɛꞌʉ hin ní du, gätho da mba ma pädi.
\v 53 Nɛ nu ma ngøcꞌyɛihʉ dí hehʉ ya hin da hyätꞌi, janangueꞌa da mba mahoqui ngue da hyätꞌi maząi bʉya. Nɛ i ja rán dąte a ma ngøcꞌyɛihʉ ya, pɛgue din jajʉ a njąmꞌbʉ da du.
\v 54 Nɛ nuꞌbʉ bin ja ma ngøcꞌyɛihʉ ngue njąmꞌbʉ da du, ya bi jąꞌtsꞌa bi man rá tꞌohni Oją bʉya, bi ꞌyɛ̨na: “Pɛ nuꞌbʉ dám ꞌbʉhmbʉ mahønꞌa, gueꞌa dí guah ran dąte a, nguetho ya bi thąpi.”
\v 55 “Hague grán dąte, hapʉ i ja ni tsꞌɛdi ya ngue gui hyoje. ꞌBɛꞌa gá ja ya thą, nɛ ya guí ɛ̨na xquí tąje.”
\v 56 Nɛ nu yʉ́n tꞌɛ̨di Oją nɛ gueꞌʉ nám fądi ja ma tsꞌoquihʉ. Nɛ nuꞌa ma tsꞌoquihʉ bʉya, gueꞌa ní zä di ʉngahʉ ran dąte a.
\v 57 Pɛ jamadi gahʉ Oją, nguetho bi jajʉ dá tąfʉ ran dąte nangueꞌa ma Hmuhʉ ra Jesucristo.
\v 58 Janangueꞌa, ma zi cu ahʉ, damín ząmhbʉ bʉ xʉn ho nɛ hin  hapʉ gui ꞌuehmbʉ bʉ. Nɛ gui hyumbi manꞌda manꞌda gam pɛhmbʉ nangue rá ꞌbɛfi ra Hmu, nguetho guí pąhmbʉ hinga säti thoho a, xinda gueꞌbʉ hin ga ndanshʉ mahønꞌa.
\c 16
\s Nthąqui yʉ mbɛti da ꞌbäx yʉ cu
\p
\v 1 Nɛ nuya dín nde ga xi ahʉ ꞌbɛꞌa gui ꞌyøthʉ nangue ra mbɛti guídí pɛthʉ, ngue nuꞌa rám fätsꞌi ma miꞌyɛ̨cꞌyɛihʉ. Damí ꞌyøthʉ tengu thoho dá xicä ʉ ꞌbʉpʉ ja yʉm pɛti bʉ Galacia. 
\v 2 Ngue gätho ꞌbʉ domingo, nꞌda ngu nꞌda ahʉ gui hyąjʉ tsꞌʉ a hangu xquí tąhmbʉ nhyąto ꞌbʉ nhyąto, gui pɛshʉ. Nɛ nuꞌbʉ dá søngä bʉ, ya di jabʉ, nɛ hinga ja gui pɛthʉ bʉya.
\v 3 Nɛ nuꞌbʉ dá søngä bʉ, ga pɛhndä bʉ Jerusalén ʉ yʉn ꞌyohʉ ngue gá huanhdʉ. Nɛ ga un ra søcuą da gątsꞌi nangue ran zɛngua, nɛ da hyąxꞌa xquí pɛthʉ bʉya.
\v 4 Nɛ ꞌbɛ dán ꞌyomfɛ̨ni ꞌbʉ da zä ꞌnɛqui ga mba, ya ꞌdarpʉ dá mbähmbe bʉya.
\s Bi ma da bøn na ꞌyo ra Pablo
\p
\v 5 Nɛ nuꞌbʉ dá mba na ꞌyo, i jatho ꞌbɛ ba søngä bʉ Macedonia, nɛ ja ga thocä bʉ Corinto bʉya.
\v 6 Nɛ xømhma thoho dam ꞌbʉhmbʉ bʉ ꞌda yʉ pa, uague dam ꞌbʉhmbʉ bʉ gätho dám bøn yʉ pa xʉ sɛ. Nɛ nubʉya xømhma thoho da zä gui zɛjʉ tsꞌʉ ꞌbʉ di nɛqui toꞌo da ꞌyurca ra ꞌyu hapʉ gätho dan ꞌyo mꞌbɛjua.
\v 7 Pɛ hin dín ndegä ngue xø ga thotho bʉ guí ꞌbʉhmbʉ, pɛ dín nde dam ꞌbʉpʉ ꞌda yʉ pa, ꞌbʉ gueꞌa da nde ma Hmuhʉ a.
\v 8 ꞌBɛ dam ꞌbʉcä ua ja ra hnini Éfeso man yozna, ja ga mba bʉ.
\v 9 Nguetho ɛ̨mmɛ hndeque ga man rám hman Oją ua, madagueꞌbʉ xʉn ngu man sʉiꞌbe ꞌbʉcua. Pɛ ɛ̨mmɛ i te rá ꞌbɛfi Oją ua, jannangueꞌa him ꞌbexque sä ga mba nꞌdihi.
\v 10 Nɛ nuꞌbʉ da zøm bʉ a ra Timoteo, dami simanhohʉ, janangueꞌa nte da bɛ̨ni. Nguetho dim pɛfi nangue rá ꞌbɛfi ma Hmuhʉ a, tengu thohogä.
\v 11 Pɛ jatho gätho ahʉ gui numansuhʉ a ra Timoteo. Nɛ nuꞌbʉ bá ɛ̨cua, dami fäxhʉ ngue da zømanho ua. Nguetho dí tønꞌua a, nɛ ɛ̨mmɛ dín nde ga nu mahønꞌa, nɛꞌʉ gätho miꞌda.
\v 12 Nɛ ɛ̨mmɛ dá xicä ma cuhʉ ra Apolo xtá mbähä ꞌda yʉ cu ꞌbʉcua, ngue da nu ahʉ. Pɛ him bi nde bi mba ya. Pɛ xømhma thoho mꞌbɛjua da mba bʉ ꞌbʉ bi zä da mba. 
\s Yʉ́n zɛgui ran zɛngua
\p
\v 13 Nɛ jantꞌa thoho gui ꞌyøthʉ tenguꞌbʉ gan äthąhʉ, ngue gan ząmhbʉ bʉ ja ni tꞌɛ̨cꞌyɛihʉ. Dami hyuthʉ ran zambʉi, din ja ni tsꞌɛdihʉ xʉn ho.
\v 14 Nɛ ꞌbɛꞌa gätho guí øthʉ, pɛ dami ꞌyøthʉ nangue ran huɛ̨cate.
\v 15 Nɛ nuya ma zi cu ahʉ, guí pąhmbʉ ngue gätho ja a yʉ́n jahʉ ra Estéfano, mbʉdi yʉ ꞌyɛ̨cꞌyɛi bʉ ra häi Acaya, nɛ ɛ̨mmɛ høntꞌa im bɛ̨ni ngue da mbäx yʉ́ miꞌyɛ̨cꞌyɛihʉ ʉ.
\v 16 Janangueꞌa dín nde ahʉ ɛ̨mmɛ gui numansuhʉ a ra Estéfano, ngueꞌa gui ꞌyøthʉ a da man a. Pɛ nɛꞌʉ miꞌda i ꞌbʉpʉ, ngue ꞌdaꞌangu i øthʉ a ra Estéfano, ngueꞌa hin din sʉi, nɛ humbi da ꞌyøtꞌ ra ꞌbɛfi xʉn ho, nɛꞌʉ gui numansuhʉ ʉ.
\v 17 Nɛ ɛ̨mmɛ dadí johyagä, ngue nuꞌa mí hɛ̨mbä ꞌbɛꞌa guí øthʉ, pɛ ya dí pącä ya, nguetho bi zøcua a ra Estéfano, nɛ ra Fortunato, nɛꞌa ra Acaico.
\v 18 Janangue ɛ̨mmɛ bi xah ma mbʉi. Nɛ ahʉ bi xah ni mbʉihʉ ya, nangueꞌa ram hma gá ꞌyängahʉ gueꞌa hin gmí pąhmbʉ. Nɛ dami numanhohʉ ʉ yʉ jąꞌi tengu ʉ.
\v 19 Nu yʉ cu i ꞌbʉcua ra häi Asia, gätho i pɛnꞌnahʉ ran zɛngua. Nu ra Aquila nɛ ra Priscila rá xisu, nɛ gätho ʉ dim pɛti bʉ ja rá ngu, nɛ gätho i pɛnꞌnahʉ ran zɛngua nangue rá thuhu ma Hmuhʉ.
\v 20 Dami hyąnbahʉ yʉ́n zɛngua gätho yʉ cu i ꞌbʉcua. Damin zɛngua zɛhɛhʉ nꞌda ngu nꞌda ahʉ ngue ꞌda gdín huɛ̨ctahʉ.
\v 21 Pɛ nugä dra Pablogä ga ozɛhɛgä nꞌda ran zɛngua dí pɛnꞌnahʉ nangue ma ꞌyɛsɛgä.
\v 22 Nuꞌbʉ i ꞌbʉ a nꞌda ngue him majuąni i numanho a ma Hmuhʉ ra Jesucristo, nɛ hin te rán jaui Oją a ꞌbʉ, nɛ da zänba ran ʉnbi a. Nɛ mi tsꞌʉtho ba ɛ̨h ma Hmuhʉ da ꞌyøtꞌ ran juąnbi a. 
\v 23 Nɛ nuya da mbäx ahʉ rá mate ma Hmuhʉ ra Jesucristo.
\v 24 Nɛ ɛ̨mmɛ dadí huɛ̨cꞌahʉ gätho ahʉ nangue ꞌdarpʉ dí ꞌbʉhmbʉ ra Cristo Jesús. Nɛ høntꞌa dí xi ahʉ ya.