\id 2CO
\h 2 CORINTIOS
\toc1 2 CORINTIOS
\mt1 2 CORINTIOS
\mt2 Ná yoho ra søcuą bi ꞌyorba ra Pablo ʉ yʉ ꞌyɛ̨cꞌyɛi bʉ ja ra dąhnini Corinto
\c 1
\s Ran zɛngua
\p
\v 1 Nugä drá Pablogä, nɛ nangue rá pähä Oją ma ꞌbäigäꞌbe a ra Jesucristo. Dín ꞌyogäꞌbe ma cuhʉ ra Timoteo. Nɛ dí pɛnꞌnahʉ bʉ ra søcuą gyʉ ꞌyɛ̨cꞌyɛihʉ ngue dim pɛti bʉ ja rán ngu Oją bʉ ja ra hnini Corinto, nɛ gätho yʉ ꞌyɛ̨cꞌyɛi i ꞌbʉpʉ ja ra xɛqui Acaya.
\v 2 Nɛ nuꞌa Oją ma Tahʉ nɛ ra Jesucristo ma Hmuhʉ di ꞌda ahʉ rá mate a, nɛ da hyutꞌa ni mbʉihʉ.
\s Yʉ́n ʉnbi ra Pablo
\p
\v 3 Jamadi Oją rá Ta ma Hmuhʉ ra Jesucristo, nguetho i ja rá yembʉi nanguejʉ. Nɛ guesɛ Oją thocua thoho i hurca ma mbʉihʉ.
\v 4 Nuꞌa Oją i hurca ma mbʉihʉ nangue gätho yʉn ʉnbi dín nuhʉ. Janangueꞌa da zä ga hurpahʉ yʉ́ mbʉi ꞌda toꞌo in nu ran ʉnbi, tengu tho bʉ í hyurcahʉ ma mbʉihʉ Oją.
\v 5 Nuꞌbʉ dí comhbʉ yʉ́n ʉnbi ra Cristo, nuꞌa di zɛrca ma mbʉihʉ, go din thɛui ran ʉnbi dín nuhʉ.
\v 6 Nɛ nangue ran ʉnbi dín nugäꞌbe, gueꞌa dín te ni tꞌɛ̨cꞌyɛihʉ, nɛ di zɛtꞌa ni mbʉihʉ a. Nɛ nuꞌbʉ di zɛrca ma mbʉiꞌbe Oją, nɛ ahʉ di zɛtꞌa ni mbʉihʉ. Nguetho nuꞌbʉ guím bɛ̨mhbʉ a ran ʉnbi dín nuꞌbe, sä gui hyäthʉ nɛ hin gan xømbʉihʉ ran ʉnbi guín nuhʉ, tengu thohogäꞌbe.
\v 7 Hin tsꞌʉ dadí ꞌyon ma mbʉiꞌbe nangue ni tꞌɛ̨cꞌyɛihʉ. Nɛ dí pąꞌbe ngue guí comhbʉ man ʉnbiꞌbe. Ngutho Oją da hyurca ma mbʉihʉ.
\v 8 Nugäꞌbe dín nde ahʉ, ma cu ahʉ, gui pąhmbʉ ngue dán nuꞌbe ran ʉnbi bʉ ja ra häi Asia. Nɛ hinꞌyʉ ma tsꞌɛdiꞌbe ngue xcá häzɛhɛꞌbe, nguetho ɛ̨mmɛ tsꞌɛdi ran ʉnbi dá nuꞌbe, nɛ mi tsꞌʉtho xcá tuꞌbe bʉ. 
\v 9 Majuąni ɛ maguepʉ xcá tuꞌbe, pɛ gätho ʉ bin ja nꞌdamhma sä ga pąꞌbe ngue hinꞌyʉ ma tsꞌɛdi zɛhɛꞌbe, pɛ ga tømꞌbe ꞌbɛꞌa da ꞌyøtꞌ Oją, ngue manꞌda xʉn ndoho rá tsꞌɛdi ngue da xoxꞌʉ xʉn du. 
\v 10 Nuꞌa Oją bi yąngäꞌbe bʉ ja ran dąte ngue ɛ̨mmɛ ntsꞌutho, nɛ dí pąꞌbe ngue Oją da yąngäꞌbe mahønꞌa. Nɛ dí ɛ̨cꞌyɛiꞌbe nɛ dí tømꞌbe ngue thocuą thoho da yąngäꞌbe Oją.
\v 11 Nɛ nu ahʉ sä gui zɛcꞌbe tsꞌʉ ꞌbʉ guín yąhʉ Oją nanguecäꞌbe, nɛ mꞌbɛjua bʉya da zä gätho ahʉ nꞌdatꞌa ga xihmbʉ jamadi Oją nangue ꞌbɛꞌa bi ꞌyørcaꞌbe. 
\s Ra Pablo bi ma hanja him bi mba nꞌdihi bʉ ja ra hnini Corinto
\p
\v 12 I hu ma mbʉiꞌbe nguetho di bɛ̨nga ma mbʉiꞌbe ngue xʉn ho ꞌbɛꞌa dí øtꞌbe ua ja ra ximhäi, nɛ xʉn ho ꞌbɛꞌa dí øtꞌbe nangue ahʉ. Nɛ hin nangue man ꞌyomfɛ̨nisɛꞌbe, pɛ Oją i fäxcaꞌbe ngue dí øtꞌbe ran ho.
\v 13 Dín nde ahʉ gui pąhmbʉ xʉn ho ꞌbɛꞌa dí øtꞌbe, tengu dí otꞌahʉ ya.
\v 14 Nɛ madagueꞌbʉ hin guí pąhmbʉ gätho ya dí xiꞌahʉ, pɛ nuꞌbʉ bi zøn ra pa ba ɛ̨h ra Hmu Jesús, gan johyahʉ nangue a ram hma dí otꞌahʉ. Nɛ ngutho gaꞌbe da hyu ma mbʉiꞌbe nangue ahʉ.
\v 15 Majuąni min ndegä xcá mba bʉ, nɛ nuꞌbʉ xcá mba bʉ, mi sä nyondį xcá hutꞌa ni mbʉihʉ.
\v 16 Mim bɛ̨ngä ngue xcá thocä bʉ guí ꞌbʉhmbʉ, gan nu ahʉ tsꞌʉ nuꞌbʉ má mbagä bʉ ja ra häi Macedonia, nɛ dím bɛ̨ngä ga thopʉ mahønꞌa ꞌbʉ dá pøngä ua ja ra häi Macedonia. Nɛ nuꞌbʉ dá mba bʉ, dím bɛ̨ngä ngue gui fäxcä bʉ ja ra ꞌyu Judea.
\v 17 Pɛ hingui yoho man ꞌyomfɛ̨nigä, tengu guí ɛ̨njʉ dí øtꞌä ꞌbʉ him má thocä bʉ. Hin dí øtꞌä tengu øtꞌi ꞌda ʉ yʉn ꞌyohʉ ngue yoho im bɛ̨ni.
\v 18 Nɛ majuąni dá bɛ̨ngä xcá mba bʉ ꞌbʉ má xi ahʉ. Nɛ i pą Oją majuąni dí xi ahʉ.
\v 19 Nugä nɛ ra Timoteo nɛ ra Silvano ya dá xi ahe nangue ra Cristo Jesús, rá Tsꞌʉntꞌʉ Oją. Nɛ nuꞌa ra Cristo hin di pä a im bɛ̨ni, pɛ høntꞌa majuąni im man a.
\v 20 Nɛ gueꞌa ra Cristo ní jąꞌtsꞌi ꞌbɛꞌa gätho i sän Oją da ꞌyøtꞌe, nɛ nangue bi hogahʉ ra Cristo dí pąhmbʉ di ꞌdajʉ rá mate Oją ꞌbʉ dí äfʉ, nɛ gueꞌa ná ɛ̨spahʉ Oją a. 
\v 21 Guetꞌa Oją bi ꞌdajʉ ra tsꞌɛdi ngue thocua thoho ga tɛnhdʉ ra Cristo, nɛ nꞌda ngu nꞌdajʉ bi ꞌdajʉ ra ꞌbɛfi.
\v 22 Nɛ guetꞌa Oją bi ꞌyøtꞌe yʉ́ mbɛti gahʉ a, nɛ bi ꞌdajʉ rá Hogandąhi mbo ma mbʉihʉ, guepʉ na fądi majuąni di ꞌdajʉ ꞌbɛꞌa gätho manꞌda.
\v 23 Majuąni a dí xi ahʉ ngue hanja hin dá thocä bʉ guí ꞌbʉhmbʉ. Nuꞌbʉ xcá søngä bʉ a ra pa dá xi ahʉ, xcá dąmhyą ahʉ tsꞌʉ ꞌbʉ, nguetho hinga nadí hojʉ ꞌbɛꞌa guí øthʉ. Nɛ ndetho ɛ̨mmɛ xcá ʉnꞌna ni mbʉihʉ ꞌbɛꞌa xcá xi ahʉ. Nɛ dí pądi majuąni a dí xi ahʉ ya, nɛ dí xi Oją di ꞌdac ran ʉnbi ꞌbʉ him majuąni a dím ma.
\v 24 Pɛ dín nde ahʉ da hyu ni mbʉihʉ, nɛ hin da du ni mbʉihʉ ꞌbɛꞌa ga xi ahʉ. Nɛ gueꞌa dín nde ga øtꞌahʉ ꞌbʉ dá mbagä bʉ. Pɛ hinꞌyʉ manꞌda sä ga xi ahʉ gui ꞌyɛ̨cꞌyɛihʉ, nguetho i juaꞌa guí ɛ̨cꞌyɛihʉ ngue guí pąhmbʉ majuąni ra Cristo.
\c 2
\p
\v 1 Janangueꞌa dá ɛ̨nsɛgä, nuꞌbʉ dá mba bʉ mahønꞌa, hin ga ꞌda ahʉ ra dumbʉi mahønꞌa.
\v 2 Nguetho nuꞌbʉ guím bɛ̨ndumbʉihʉ, hingui sä gui ꞌdajʉ ran johya ꞌbʉ. Nɛ hønsɛ ahʉ sä gui ꞌdajʉ ran johya, pɛ hingui sä ꞌbʉ i tu ni mbʉihʉ.
\v 3 Janangueꞌa dá otꞌahʉ ra søcuą nguetho dín nde ngue gan ꞌyomfɛ̨nihʉ tsꞌʉ, nɛ sä gui hojʉ ꞌbɛꞌa gnám ꞌbʉhmbʉ. Nɛ nuꞌbʉ dá mbagä bʉ, ya xquí hojʉ a ꞌbɛꞌa manꞌda gnám ꞌbʉhmbʉ, nɛ sä gui ꞌdajʉ ran johya bʉya nɛ hin din jaꞌahʉ ra dumbʉi. Nguetho dí ɛ̨nsɛgä ngue nꞌdatꞌa dím bɛ̨mhbʉ, nuꞌbʉ dín johyagä nɛ ahʉ ja nin johyahʉ.
\v 4 Nɛ ɛ̨mmɛ mi tu ma mbʉi nuꞌbʉ má otꞌahʉ ra søcuą, nɛ ɛ̨mmɛ dán zoni, nguetho hin dín nde gui ʉꞌtꞌ ni mbʉihʉ nangue ꞌbɛꞌa dá otꞌahʉ, pɛ dín nde gui pąhmbʉ ngue ɛ̨mmɛ dadí huɛ̨c ahʉ.
\s Da mba ma punbi toꞌo bi ꞌyøtꞌ ran tsꞌo
\p
\v 5 Hinga hønsɛgä pɛ gätho ahʉ i ja ahʉ ra dumbʉi nangue ꞌbɛꞌa bi ꞌyøtꞌ ran ꞌyohʉ ngue bi zin rá hømbe.
\v 6 Pɛ dí ɛ̨na xøtꞌa ya ran ʉnbi gá unhdʉ a ran ꞌyohʉ.
\v 7 Nɛ nuya ndeꞌbʉ gui punbahʉ rá tsꞌoqui, nɛ gui hyurpahʉ rá mbʉi. Nguetho nuꞌbʉ hin gui hyurpahʉ rá mbʉi, manꞌda din ja ra dumbʉi ngue njąmꞌbʉ sä din hogui.
\v 8 Nuya dí ä ahʉ ra mate ngue gui ꞌyuthʉ xʉn ho nin huɛ̨catehʉ a ran ꞌyohʉ.
\v 9 Nugä dá otꞌahʉ nguetho dín nde ga pą ꞌbʉ guí øthʉ tengu dí xi ahʉ, uague hinꞌna.
\v 10 Nuꞌbʉ guí punbahʉ nꞌda ni mijąꞌihʉ, nɛcä ga punba a. Nɛ nuꞌbʉ guí punbahʉ ꞌbɛꞌa bi ꞌyøtꞌa nꞌda, nɛ dí punbä a nangue rán tꞌɛ̨di ra Cristo.
\v 11 Nguetho hin dín ndegä da dąjʉ ra zįthu nangue ꞌbɛꞌa dí øthʉ. Dí pąhmbʉ ꞌbɛꞌa nde da ꞌyøtꞌa ra zįthu nguetho in nde da hyäjʉ.
\s Him bin säya a ní bɛ̨m bʉ Corinto ra Pablo
\p
\v 12 Nuꞌbʉ má søngä bʉ ja ra hnini Troas, Oją ya xí xocua yʉ́ mbʉi yʉ jąꞌi bʉ. Nɛ hingui hɛ̨i dá mangä bʉ rán ho maꞌdaꞌyo ra Cristo nguetho yʉ jąꞌi min nde da ꞌyøde. 
\v 13 Pɛ hin dán johyagä, nguetho hin dá tįngä bʉ ma cuhʉ ra Tito. Ngue xtá xiqui ꞌbɛꞌa guí øthʉ bʉ. Jananjabʉ dá socä yʉ jąꞌi bʉ Troas nɛ dá mbagä bʉ ja ra häi Macedonia, ja dá tįngä bʉ a ra Tito.
\s Nangue ra Cristo sä ga tąfʉ ra zįthu
\p
\v 14 Pɛ jamadi Oją, nangue dín ꞌyohʉ ra Cristo di jajʉ ga tąfʉ ra zįthu bɛꞌa gätho dí øthʉ. Nɛ hønbʉ go hapʉ dím mamꞌbe ran ho maꞌdaꞌyo, Oją di japi da tho a, tengu tho ꞌbʉ nꞌda ra ꞌyɛ̨thi i tux ran dąhi i yʉmanho.
\v 15 Nɛ nangue dín ꞌyohʉ ra Cristo, Oją in numanhojʉ, tengu ra ꞌyɛ̨thi i yʉmanho bʉ nam bɛ̨n Oją. Nugäꞌbe dím mamꞌbe ra Cristo Jesús bʉ ꞌbʉi gätho yʉ jąꞌi, gueꞌʉ i ja yʉ́ temaząi, nɛ ʉ di ꞌbɛh ra temaząi.
\v 16 Nu a ram hma dím mamꞌbe, da zänba ran ʉnbi a ꞌbʉ hingui nde da hyąn a nꞌda, pɛ nu ʉ toꞌo i ɛ̨cꞌyɛi ꞌbɛꞌa dím mamꞌbe, di un ra te a. Pɛ toꞌo maha da hyätꞌi daꞌyøtꞌ na.
\v 17 Høntꞌʉ tengu gäꞌbe ngue nꞌdatꞌa Oją dím bɛ̨mhbe, nɛ dyʉm ꞌbɛhnigäꞌbe Oją, nɛ dyʉ́ ꞌyɛ̨hɛ gäꞌbe ra Cristo, nɛ nu a Oją in nucꞌbe. Nɛ nugäꞌbe hin dí øtꞌbe tengu øtꞌʉ ꞌda xʉn ngu ngue in nde da dąsɛ nangue rá ꞌbɛfi Oją i øtꞌe.
\c 3
\s Rán hoqui Oją maꞌdaꞌyo
\p
\v 1 Ha guí ɛ̨mhbʉ dí ozɛhɛ ma certificadoꞌbe ꞌbʉ dí xi ahʉ ꞌbɛꞌa dí øtꞌbe. Ha jatho din ja ma certificadoꞌbe ngue da xi ahʉ xʉn ho dí øtꞌbe tengu i cą yʉ hyäte xänbate guí ꞌbʉhmbʉ bʉ. O ha guí ɛ̨mhbʉ jatho gui ꞌyørcaꞌbe nꞌda tengu guí ørpa ʉ ꞌda.
\v 2 Pɛ go guesɛ ahʉ ma certificado ahʉ nguetho nuꞌbʉ ꞌboꞌo ngue bi bąꞌa gním ꞌbʉhmbʉ, da bądi ꞌbɛꞌa ma hogaꞌbɛfi dá øtꞌä bʉ ꞌbʉ mám ꞌbʉhmbʉ bʉ.
\v 3 Nɛ nu ʉ yʉ jąꞌi ngue hingui ɛ̨cꞌyɛi da nu ahʉ, tengu ꞌbʉ bi nu nꞌda ra søcuą nangue rám hman Oją. Pɛ hinga gue ra søcuą ntꞌoꞌtꞌi ra tinta o gue ntꞌoꞌtꞌi bʉ ja ra do ngue da nu ʉ, pɛ gueꞌa bi ꞌyoꞌtꞌa ra Cristo bʉ ni mbʉihʉ nangue rá Hogandąhi Oją ꞌbʉ má xänꞌnahʉ. 
\v 4 Da zä ngubʉ ga xi ahʉ ngue xʉn ho ra ꞌbɛfi dí øtꞌaꞌbe, nguetho i fäxcaꞌbe Oją nangue dín ꞌyohʉ ra Cristo.
\v 5 Nɛ hin nangue man hosɛꞌbe da zä ga øtꞌbe ran ho, pɛ hønsɛ Oją di ꞌdacꞌbe ra tsꞌɛdi ga øtꞌbe ꞌbɛꞌa dí øtꞌbe. 
\v 6 Nu Oją bi ꞌdacꞌbe ꞌbɛꞌa ga homꞌbe ngue i juadi xʉn ho, ngue da zä ga xiꞌbe yʉ jąꞌi rán hoqui Oją maꞌdaꞌyo. Nu ran hoqui hinga ꞌdaꞌanguui i mammi yʉn tꞌɛ̨di ntꞌoꞌtꞌi mayaꞌbʉ. Nguetho nuꞌa ran ho maꞌdaꞌyo i xijʉ di ꞌdajʉ ra temaząi a rá Hogandąhi Oją. Pɛ nu yʉn tꞌɛ̨di i xijʉ tengu ꞌbʉ ma yąpatehʉ, ngueꞌa hin dí hätꞌi ga øzɛhɛhʉ a ran ho im mam bʉ.
\v 7 Pɛ nuꞌbʉ rá mbʉdi bin tꞌun yʉn tꞌɛ̨di, pɛ min ꞌyoui a rá nuįxte Oją, nguetho ɛ̨mmɛ madi yoxni rá hmi ra Moisés ꞌbʉ madín tꞌun yʉ do ntꞌoꞌtꞌi yʉn tꞌɛ̨di, janangueꞌa hingui sä ʉ yʉ jąꞌi da hyɛ̨rpa rá hmi. Mꞌbɛjua bʉya bim ꞌbɛ a rá nuįxte mi ja bʉ rá hmi. Pɛ madagueꞌa in ꞌyoui ra nuįxte ʉ yʉn tꞌɛ̨di ꞌbʉ ja min tꞌuni, pɛ din yąpate nɛ ran ʉnbi.
\v 8 Nu yʉn tꞌɛ̨di min ꞌyoui rá nuįxte Oją nɛ bi man a ran dąte. Pɛ ɛ̨mmɛ xʉn ngu manꞌda rá nuįxte Oją in ꞌyoui rá ꞌbɛfi rá Hogandąhi Oją.
\v 9 Nꞌyoui rá nuįxte Oją yʉ́n tꞌɛ̨di ngue din yąpate, pɛ ɛ̨mmɛ manꞌda xʉn ngu rá nuįxte Oją din ꞌyoui ran ho maꞌdaꞌyo ngue im man Oją di hogahʉ.
\v 10 Nuya bim ꞌbɛh rá tsꞌɛdi ʉ yʉn tꞌɛ̨di, nguetho ɛ̨mmɛ manꞌda i ja rá tsꞌɛdi ran ho maꞌdaꞌyo.
\v 11 Nu yʉn tꞌɛ̨di min ꞌyoui ra nuįxte, pɛ ntsꞌänni ꞌda yʉ patho da hyätꞌi, nɛ bi thogui. Pɛ nuya ɛ̨mmɛ  xʉn ngu ra nuįxte in ꞌyoui a ran ho maꞌdaꞌyo, nɛ njąmꞌbʉ da guadi.
\v 12 Dí pąhmbʉ ngue njąmꞌbʉ dim ꞌbɛh rá tsꞌɛdi a ran hoqui maꞌdaꞌyo ngue bi ꞌyøtꞌ Oją. Janangueꞌa sä ga huthʉ nząmbʉi gam mamhbʉ ran ho maꞌdaꞌyo.
\v 13 Nɛ nuꞌbʉ dím mamhbʉ ran ho maꞌdaꞌyo, hin dí øthʉ tengu mi øtꞌ ra Moisés mayaꞌbʉ, ngue bi gop rá hmi ra ꞌbøꞌtꞌe, ndepe hin da nu yʉ jąꞌi israel gueꞌbʉ xtím ꞌbɛ a rá nuįxte.
\v 14 Pɛ nu yʉ jąꞌi him mi pą ʉ ngue dim ꞌbɛ ʉ yʉ́ nuįxte yʉn tꞌɛ̨di nɛ guextaꞌa yʉ pa ya, nuꞌbʉ in nu ra søcuą guepʉ ntꞌoꞌtꞌi yʉn tꞌɛ̨di rán hoqui Oją mayaꞌbʉ, hingui sä da bądi. Nguetho tengu ꞌbʉ i ja nꞌda ra ꞌbøꞌtꞌe bʉ ja rá hmi da gop rá dä. Nɛ høntꞌa ra Cristo sä di ꞌuecpa a.
\v 15 Guextaꞌa yʉ́ mbʉi ʉ ꞌda i ꞌbʉhya, nuꞌbʉ in nde da dɛn yʉ́n tꞌɛ̨di ra Moisés nɛ nuꞌbʉ im ma, hingui sä da bądi ꞌbɛꞌa nam bøn ʉ, nguetho njotꞌi tho yʉ́ mbʉi.
\v 16 Pɛ nuꞌbʉ di päh rán ꞌyomfɛ̨ni nꞌda nangue a ra Cristo nɛ di däp rá mbʉi a, din ja ran nɛqui rá mbʉi ꞌbʉ.
\v 17 Nuꞌa ra Cristo, ꞌda anguui rá Hogandąhi. Nɛ nuꞌbʉ i ꞌbʉpʉ mbo ma mbʉihʉ, nɛ gueꞌa í thøgahʉ bʉ ja ra ꞌbɛxui nɛ ran ʉnbi.
\v 18 Nɛ hingan joꞌmi ma mbʉihʉ tengu ꞌbʉ dí hanthʉ xʉn ho a rá nuįxte ra Cristo. Nɛ tengu nꞌda ra hyɛ̨dä di nɛqui bʉ toꞌo da hyandi, nɛ ngutho gahʉ manꞌda manꞌda di nɛqui gahʉ rá nuįxte ra Cristo dí hanthʉ, nɛ gueꞌa ní ꞌyørcahʉ a ngue ga cohmbʉ tengu a.
\c 4
\p
\v 1 Nu rá mate zɛhɛ Oją ngue bi ꞌdacꞌbe ra ꞌbɛfi, janangueꞌa hingui cuent ma mbʉiꞌbe nangue ra ꞌbɛfi dí øtꞌbe. 
\v 2 Ząi hin di thoc man ꞌyomfɛ̨nisɛꞌbe nangue rá ꞌbɛfi Oją, nɛ hin dí häteꞌbe ꞌbʉ dím mamꞌbe rám hman Oją tengu i øtꞌʉ ꞌda. Pɛ dím mamꞌbe ngue majuąni a rám hman Oją, nɛ gätho yʉ jąꞌi sä da bądi ngue dí ꞌyoꞌbe xʉn ho bʉ ja rá hmi Oją.
\v 3 Høntꞌʉ ngue ní mba bʉ ja ran ʉnbi hingui pądi ꞌbɛꞌa nam bøn a dím mamꞌbe ngue ran ho maꞌdaꞌyo.
\v 4 Nguetho nu ra zįthu tꞌɛ̨mbi oją ua ja ra ximhäi i ja ya di xädäba yʉ́ mbʉi ʉ i tɛnni, hin di japi ngue da nu nuįxte a rán ho maꞌdaꞌyo ra Cristo, ngue xtí yorpʉ ꞌbʉi. Pɛ nuꞌa ra Cristo gueꞌa ní fą Oją a, nɛ ꞌda anguui rá tsꞌɛdi.
\v 5 Pɛ nugäꞌbe hin dím mamꞌbe a dí hnumanhocꞌbe, pɛ dím mamꞌbe ngue gueꞌa ra Cristo Jesús ra Hmu a. Nɛ dí øtꞌbe ni ꞌyɛ̨hɛ gaꞌbe, nguetho ɛ̨mmɛ dín numanhoꞌbe ra Jesús.
\v 6 Nu Oją rá mbʉdi bi manda din ja ran nɛqui bʉ mi ja ra ꞌbɛxui, guetꞌa Oją bi yorbʉ ja ma mbʉihʉ. Nɛ nangue ran nɛqui i jajʉ bʉ ma mbʉihʉ, sä ga pąhmbʉ rá nuįxte Oją. Nguetho ra Jesucristo bi jajʉ dá pąhmbʉ rá nuįxte Oją.
\s Nám ꞌbʉhmbʉ a ngue dí pąhmbʉ a majuąni
\p
\v 7 Oją bi ꞌdajʉ rá tsꞌɛdi mbo ma mbʉihʉ, tengu nꞌda ra jąhäi bi järpʉ a xʉn ngu di muui. Tengu ꞌbʉ dyʉ tsꞌøehʉ din xɛnꞌa nꞌdihi. Pɛ guepʉ na fądi him ma tsꞌɛdi zɛhɛhʉ a ná ørpahʉ rá ꞌbɛfi Oją, pɛ guesɛ rá tsꞌɛdi a bi ꞌdajʉ.
\v 8 Nguetho thocua thoho dín nuꞌbe yʉn ʉnbi, pɛ hingui tu ma mbʉiꞌbe nangue rá tsꞌɛdi Oją dín ꞌyohe. Nɛ jaꞌbʉ hin dí pąꞌbe ꞌbɛꞌa dán go a dí øtꞌbe, pɛ hin dím mamꞌbe ngue ga hɛh ma ꞌbɛfiꞌbe.
\v 9 I ꞌbʉh man sʉiꞌbe pɛ hin dí ꞌyosɛꞌbe nguetho ꞌbʉh mam fätsꞌihe ra Cristo, jaꞌbʉ in nu ran ʉ ma jąꞌiꞌbe, pɛ hin dí tuꞌbe.
\v 10 Hønbʉ go hapʉ ga mbɛꞌbe, dín nuꞌbe ran ʉnbi, nɛ sä xcá tuꞌbe nangue rá ꞌbɛfi ra Jesús dí øtꞌbe, tengu tho ꞌbʉ mi du ra Jesús. Pɛ nangue dí hätꞌbe yʉn ʉnbi di nɛqui dí ꞌbʉhmbe ra Jesús, nɛ di jamansucꞌbe.
\v 11 Nɛ thocua thoho ɛ̨na da thogꞌbe nangue dí øtꞌbe rá ꞌbɛfi ra Jesús, pɛ gueꞌa ní nɛqui rá tsꞌɛdi ra Jesús dín ꞌyoꞌbe a, ngue i fäxcaꞌbe, nɛ hinꞌyʉ ma tsꞌɛdi zɛhɛꞌbe.
\v 12 Janangueꞌa thocua thoho i  thusca man dątehʉ, pɛ gueꞌa manꞌda gním ꞌbʉhmbʉ Oją xʉn ho a.
\v 13 Nuꞌa nꞌda ran ꞌyohʉ bi ma mayaꞌbʉ bʉ ja rá tꞌohni Oją: “Nugä dí ɛ̨cꞌyɛigä, janangueꞌa dím mangä na,” bi ꞌyɛ̨na. Ngutho dí øtꞌäꞌbe ya, dí ɛ̨cꞌyɛiꞌbe, janangueꞌa dí mamꞌbe a dí ɛ̨cꞌyɛiꞌbe.
\v 14 Nɛ hin dí suꞌbe, nguetho dí pąꞌbe madá thogꞌbe, pɛ guetꞌa Oją ngue bi xoxꞌa ma Hmuhʉ ra Jesús ꞌbʉ mi du, da xoxcäꞌbe tengu bʉ í xoxꞌa ra Jesús. Nɛ ahʉ dan ꞌyohʉ ꞌbʉ dá sømhbʉ bʉ ꞌbʉ a Oją.
\v 15 Pɛ nuꞌʉ ꞌbɛꞌa gätho dín nuꞌbe nangue ahʉ, nꞌdamhma manꞌda xtán ngu ahʉ guin nuhʉ rá mate Oją, nɛ manꞌda xtán ngu ahʉ gui ꞌyɛ̨mfʉ Oją, jamadi ni mate. Nɛ gueꞌa manꞌda dí tꞌɛ̨spa Oją a bʉya.
\v 16 Janangueꞌa hingui cuent ma mbʉiꞌbe nangue a ma ꞌbɛfiꞌbe, madagueꞌbʉ manꞌda manꞌda in theh rá tsꞌɛdi ma jąꞌiꞌbe. Pɛ Oją di un ra tsꞌɛdi ma mbʉiꞌbe gätho yʉ pa.
\v 17 Nuꞌʉ yʉn ʉnbi dín nuhʉ ua ja ra häi hingan yaꞌa ʉ, pɛ gueꞌa manꞌda dá tįmhbʉ ran ho bʉ mahɛ̨tsꞌi. Ɛ̨mmɛ manꞌda xʉn ngu ra nuįxte gan nuhʉ bʉ, xinda gue ran ʉnbi dá nuhʉ ua ja ra häi. 
\v 18 Hin dím bɛ̨mhbʉ gätho yʉn ʉnbi dín nuhʉ ua ja ra ximhäi, nguetho da tho ʉ. Pɛ manꞌda dím bɛ̨mhbʉ ꞌbɛꞌa gätho hin dín nuhʉ ya, nguetho nuꞌa din jagähʉ bʉ mahɛ̨tsꞌi hin da tho a.
\c 5
\p
\v 1 Nɛ dí pąhmbʉ ngue ma jąꞌihʉ tengu nꞌda ra ngu ua ja ra ximhäi, hinga yaꞌa da hyätꞌi. Nɛ nuꞌbʉ da yøtꞌ ma ngu ua din ja bʉ a manꞌda ma ngumhbʉ bʉ mahɛ̨tsꞌi ngue bi hyø Oją. Nɛ njąmꞌbʉ da gua a, nguetho him bi hyøh yʉ jąꞌi.
\v 2 Nɛ nujʉ dadín xømbʉihʉ nangue ma ngøcꞌyɛ̨ihʉ i jajʉ ya, nɛ dín dømdahʉ di pärca ma jąꞌihʉ, da gohi maꞌdaꞌyo, ngue rán säui bʉ mahɛ̨tsꞌi a.
\v 3 Nu Oją di japi ngue din ja ma ngøcꞌyɛ̨ihʉ bʉ.
\v 4 Pɛ nuya ngue dí ꞌbʉhmbʉ ua, nɛ in nu ran ʉnbi ma ngøcꞌyɛihʉ nɛ dín xømbʉihʉ. Pɛ hin nangue a dín nde ga tuhʉ nꞌdihi, pɛ manꞌda dín ndehʉ a ma jąꞌihʉ maꞌdaꞌyo, ngue dím pärcahʉ ma ngøcꞌyɛ̨ihʉ i ja ya.
\v 5 Nu Oją bi zänni ngue di pärca ma jąꞌihʉ, nɛ bi ꞌdajʉ rá Hogandąhi ngue ra hmɛpya majuąni din ja.
\v 6 Nɛ dín døꞌmate thohʉ yʉ pa dí ꞌbʉhmbʉ ua. Nguetho dí pąhmbʉ nu yʉ pa dí ꞌbʉhmbʉ ma jąꞌihʉ i jajʉ ya, hin dí ꞌbʉhmbʉ ma Hmuhʉ ra Jesús bʉ ja rá ngu bʉ mahɛ̨tsꞌi.
\v 7 Dí pąhmbʉ majuąni din ja ma ngumhbʉ bʉ, nguetho dí ɛ̨cꞌyɛigähʉ Oją, madagueꞌbʉ hin dín nuhʉ.
\v 8 Nɛ dín døꞌmate thohʉ ua, pɛ dí ɛ̨mhbʉ ngue manꞌda xʉn ho ga sohmbʉ ua ma ngøcꞌyɛ̨ihʉ, nɛ ga mbähä bʉ bí ꞌbʉ a ma Hmuhʉ mahɛ̨tsꞌi. 
\v 9 Pɛ manꞌda hnɛhi thoho dín nde ga øthʉ ꞌbɛꞌa in nde ma Hmuhʉ, madagueꞌa dí ꞌbʉhmbʉ ua ja ra häi, uague dí ꞌbʉhmbʉ bʉ guepʉ bí ꞌbʉi.
\v 10 Nguetho da zøn ra pa ngue gätho dyʉ ꞌyɛ̨cꞌyɛihʉ jatho dam ꞌbähmbʉ bʉ ja rá hmi ra Cristo, nꞌda ngu nꞌdajʉ. ꞌDahmi ꞌdatho ga hąmhbʉ ꞌbɛꞌa yʉ́n thɛhʉ dá øthʉ ua ja ra häi. Ga tąhmbʉ ꞌbʉ xʉn ho, ga ꞌbɛhmbʉ ꞌbʉ hin ɛ ho.
\s Bi hogahʉ ꞌbɛꞌa nán sʉhmbʉ Oją ꞌbʉ mí du ra Cristo
\p
\v 11 Nɛ dí su ga øtꞌä a hin da numanho Oją, janangueꞌa dí humbi dí xifi ꞌbɛꞌa dí ꞌyɛ̨cꞌyɛi Oją ʉ yʉ jąꞌi. Nugäꞌbe Oją i pącꞌbe xʉn ho ꞌbɛꞌa majuąni dí øtꞌbe, nɛ nu ahʉ dín nde ngue gui pącꞌbe xʉn ho. 
\v 12 Hin dín nde aꞌbe guim bɛ̨mhbʉ ngue dím ma nangue man hosɛꞌbe. Pɛ dín nde ngue guin numanhocꞌbe, guepʉ da zä gui hɛcuahʉ yʉ jąꞌi ngue i tɛnꞌndʉ yʉn ꞌyohʉ din ꞌyɛ̨zɛhɛ, pɛ nuꞌʉ yʉ́ mbʉi ʉ him majuąni ʉ.
\v 13 Pɛ dí øtꞌbe ꞌbɛꞌa gätho da numanho Oją, nguetho dín numanhoꞌbe Oją, madagueꞌa im man yʉ jąꞌi dí tontogäꞌbe. Pɛ nuꞌa ꞌbɛꞌa dí øtꞌäꞌbe da bømanho nangue ahʉ.
\v 14 Nangue rán huɛ̨cate ra Cristo ná øtꞌbe ꞌbɛꞌa gätho dí øtꞌbe, nguetho dí pąhmbʉ ngue bi du bi nu ran ʉnbi nangue gätho yʉ jąꞌi. Nɛ gueꞌa ní zä dim pomhbʉ ran ʉnbi ʉ, tengu ꞌbʉ xtán dusɛ ngue xtán guzɛhɛ yʉ́ tsꞌoqui.
\v 15 Nɛ bi du nɛ bi ndantsꞌ mahønꞌa ngue nde di un ra ꞌdaꞌyote ʉ gätho yʉ jąꞌi. Janangueꞌa da ꞌyɛꞌtsꞌa ní ꞌyøtꞌ yʉ́ pähä zɛhɛ ʉ to da hyąn ra ꞌdaꞌyote, nɛ da ꞌyøtꞌe ꞌbɛꞌa in numanho a.
\v 16 Janangueꞌa nuya dá päh man ꞌyomfɛ̨nihʉ, nɛ nuya hin ná numanhohʉ ma mijąꞌihʉ ꞌbɛꞌa di ja, tengu mi øthʉ nuꞌbʉ him mi ɛ̨cꞌyɛihʉ. Pɛ gam bɛ̨mhbʉ tengu bʉ nam bɛ̨n Oją ʉ. Nɛ nuꞌbʉ him mi ɛ̨cꞌyɛigä, dím bɛ̨ni ngue nu ra Cristo nꞌda ran ꞌyohʉ thoho tengugä, pɛ nuya hinguin ja bʉ dím bɛ̨ngä ya.
\v 17 Nguetho gätho toꞌo in ꞌyohʉ ra Cristo tengu ꞌbʉ maꞌdaꞌyo ʉ, nu yʉ́n yon ꞌyomfɛ̨ni zɛhɛ bi ꞌbɛꞌʉ, pɛ nuya gätho bi gohi maꞌdaꞌyo.
\v 18 Pɛ gätho bi ꞌyøzɛhɛ Oją dám ꞌbʉhmbʉ maꞌdaꞌyo. Nguetho bi hogahʉ ꞌbɛꞌa madín sʉhmbʉ Oją ꞌbʉ mi du ra Cristo. Nɛ nuya bi ꞌdajʉ ra ꞌbɛfi ngue ga xihmbʉ yʉ jąꞌi ꞌbɛꞌa dí zin a Oją ʉ, nɛ da mba ma punbi yʉ́ tsꞌoqui ʉ gätho i ɛ̨cꞌyɛi.
\v 19 Nguetho nuꞌa Oją min ꞌyoui ra Cristo nuꞌbʉ mi ꞌyøtꞌe ꞌbɛꞌa dí hocpa yʉ́ mbʉi yʉ jąꞌi ja ra ximhäi. Nuya hin da gʉcpa a rá muui ʉ yʉ́ tsꞌoqui gätho toꞌo da ꞌyɛ̨cꞌyɛi a. Nɛ bi ꞌdajʉ ra ꞌbɛfi ngue ga xihmbʉ yʉ jąꞌi ꞌbɛpʉ dín yąmanhohʉ Oją ʉ.
\v 20 Nujʉ ma ꞌbäigähʉ ra Cristo, ɛ̨mmɛ dí hąh ma mbʉi dí xihmbʉ yʉ jąꞌi tengu tho ꞌbʉ xtá xisɛ Oją ʉ, ngue da ꞌyäpi di hocpa yʉ́ mbʉi, nɛ din ꞌyohʉ xʉn ho Oją. 
\v 21 Nuꞌa ra Cristo hinꞌyʉ rá tsꞌoqui, pɛ bi nu ran ʉnbi nangue ma tsꞌoquihʉ tengu ꞌbʉ yʉ́ tsꞌoqui zɛhɛ. Janangueꞌa da ꞌyɛ̨mbi rán ho a rán hosɛ ra Cristo toꞌo gätho da ꞌyɛ̨cꞌyɛi ꞌbɛꞌa í du a.
\c 6
\p
\v 1 Nɛsɛ a Oją dí comhbe rá ꞌbɛfi, nɛ janangueꞌa gätho ma mbʉiꞌbe dí xi ahʉ ngue gui jamansuhʉ rá mate Oją.
\v 2 Nguetho Oją bi mam bʉ ja rá tꞌohni: “Dá øcä ni ndehʉ a ra pa gá zojʉ, nɛ dá øtꞌahʉ ra mate. Nɛ dá zɛ ahʉ ra pa dá yąn ahʉ,” ɛ̨nꞌa Oją. Nuya yʉ pa ja bʉya Oją sä da ꞌyøtꞌahʉ ran ho, nuya nám pa ya Oją i sä di pøꞌahʉ.
\v 3 Nɛ dí honi xʉn ho ꞌbɛꞌa gätho ga øtꞌbe, ngue hin di ʉꞌtꞌ yʉ́ mbʉi ꞌda ꞌbɛꞌa dí øtꞌbe, nꞌdamhma njon di cꞌąmanꞌʉ rá ꞌbɛfi Oją dí øtꞌbe.
\v 4 Nɛ nangue ꞌbɛꞌa dí øtꞌbe dín nde ga ut yʉ jąꞌi ngue majuąni yʉ́m ꞌbɛhnigaꞌbe ra Cristo ua ja ra häi. Nɛ gätho dí øtꞌbe xʉn ho nɛ hin dín xømbʉiꞌbe, madagueꞌbʉ xʉn ngu ran ʉnbi dín nuꞌbe. Nɛ xʉn hɛ̨i ꞌbɛꞌa nám ꞌbʉꞌbe, nɛ jaꞌbʉ hin dí pąꞌbe ꞌbɛꞌa ga øtꞌbe. 
\v 5 Nɛ xʉn ngu yʉ nidi i ꞌbɛnzagaꞌbe, nɛ dí ofädiꞌbe, nɛ dín nuꞌbe ꞌda yʉn ꞌyoꞌtsꞌi ꞌbʉ in cuɛ yʉ jąꞌi. Nɛ ꞌda yʉ pa ɛ̨mmɛ dí yäꞌbe nangue ra ꞌbɛfi xʉn hɛ̨i dí øtꞌbe. Nɛ dí äthąꞌbe ꞌda ʉ yʉ xui, hin dí ąꞌbe, pɛ dí tømdaꞌbe ꞌbɛꞌa din ja. Nɛ ꞌda yʉ pa hinꞌyʉ ga siꞌbe.
\v 6 Pɛ nꞌdatho ma mbʉiꞌbe tengu rán säui a majuąni, nɛ dá øtꞌbe ran ho nguetho dín ꞌyoꞌbe rá Hogandąhi Oją. Nɛ hin dadí xømbʉiꞌbe nangue ma ꞌbɛfiꞌbe, pɛ dí utäꞌbe yʉ jąꞌi ma yembʉiꞌbe nɛ man huɛ̨cateꞌbe.
\v 7 Nɛ dím mamꞌbe a ram hma majuąni, nguetho di zɛcꞌbe Oją ga øtꞌbe rá ꞌbɛfi. Nɛ nangue ma hocjąꞌi dí øtꞌäꞌbe, hingui sä di yącpaꞌbe yʉ jąꞌi.
\v 8 Jaꞌbʉ i hnumansucꞌbe, jaꞌbʉ hinꞌna, nuꞌʉ ꞌda di cꞌąmanꞌʉcꞌbe, nuꞌʉ miꞌda im ma xʉn ho dí øtꞌbe, nuꞌʉ ꞌda im ma dí fɛhnigäꞌbe. Pɛ madagueꞌa xʉn ngu ꞌbɛꞌa man ʉ yʉ jąꞌi, dím mamꞌbe ꞌbɛꞌa ngue majuąni.
\v 9 ꞌBʉ i ꞌda ngue im ma ngue hingui pądi ꞌbɛꞌa dí øtꞌbe, pɛ ꞌbʉ i ꞌda i pącꞌbe xʉn ho. Nɛ nꞌdapa ngu nꞌdapa i husca man dąteꞌbe, pɛ guextaꞌa dí ꞌbʉꞌbe. Nɛ xʉn ngu yʉn ʉnbi dín nuꞌbe, pɛ hin dí tuꞌbe.
\v 10 Nɛ nuꞌbʉ dín nuꞌbe ra dumbʉi, ꞌbex di ꞌdacꞌbe ran johya ra Hmu mahɛ̨tsꞌi. Nugäꞌbe dí hyoyaꞌbe, pɛ xʉn ngu ʉ dí japꞌbe da dįn a ran ho, nguetho dí xicäꞌbe ꞌbɛꞌa di unꞌna Oją. Nɛ hinꞌyʉ ꞌbɛꞌa da zä gam mamꞌbe ngue ma mbɛti zɛhɛꞌbe, pɛ hinꞌyʉ ꞌbɛꞌa dadí ꞌbɛꞌbe, nguetho Oją di ꞌdacꞌbe gätho dí homꞌbe.
\v 11 Nu ahʉ ma amigo ahʉ guí ꞌbʉhmbʉ bʉ ja ra hnini Corinto, ya dá xi ahʉ gätho ꞌbɛꞌa dím bɛ̨ni, nguetho dadí huɛ̨cꞌahʉ ngue gätho ma mbʉi.
\v 12 Nugäꞌbe majuąni dadí huɛ̨c ahʉ, pɛ nu ahʉ hin ɛ ja nin huɛ̨cate nanguecäꞌbe.
\v 13 Pɛ dí xi ahʉ tengu tho ꞌbʉ ma tꞌʉhni ahʉ, dami xoc ni mbʉihʉ nɛ din ja ahʉ ran huɛ̨cate nanguecäꞌbe, tengu tho dí øtꞌbe nangue ahʉ.
\s Oją i ꞌbʉpʉ mbo ma mbʉihʉ
\p
\v 14 O guín ꞌyohʉ ʉ ꞌda ngue hingui ɛ̨cꞌyɛi Oją, nguetho nte yʉ́n jahʉ nꞌda ʉ øtꞌ ran tsꞌo ꞌbʉ øtꞌ ran ho nꞌda. Nɛ nte rán jaui ra ꞌbɛxui a ran nɛqui.
\v 15 Nɛ hin te rán jaui ra Cristo a ra Satanás ngue ra zįthu, nɛ hinga ꞌdatꞌa im bɛ̨mmi nꞌda ra ꞌyɛ̨cꞌyɛi a hingui ɛ̨cꞌyɛi.
\v 16 Nɛ hin te rán jaui rá ngu Oją ʉ yʉ hmite, nguetho ni mbʉihʉ rá ngu Oją ngue i ꞌbʉi maząi. Nɛ gueꞌa bi man Oją mayaꞌbʉ: “Nugä dam ꞌbʉpʉ mbo yʉ́ mbʉi, nɛ dan ꞌyohʉ, nɛ nugä ga øtꞌe yʉ́ Ojągä ʉ, nɛ nuꞌʉ ga øtꞌe ngue ma tꞌʉhnigä ʉ,” bi ꞌyɛ̨n Oją.
\v 17 Janangueꞌa bi ꞌyɛ̨n Oją: “Damí ꞌuehmbʉ bʉ, o guí tɛnhdʉ ngueꞌʉ hingui ɛ̨cꞌyɛi, nɛ ꞌyo guí sähʉ ꞌbɛꞌa xʉn tsꞌo. Nɛ ga øtꞌe ngue ni Ojąjʉ, nɛ ga sin ahʉ bʉya.
\v 18 Nɛ ga øtꞌe ni Tajʉ nɛ nu ahʉ ga øtꞌe ma tsꞌʉntꞌʉ ahʉ nɛ ma tꞌįxu ahʉ.” Gueꞌa bi man Oją ngue nuįxte rá tsꞌɛdi.
\c 7
\s Bim päh yʉ́ mbʉi yʉ ꞌyɛ̨cꞌyɛi
\p
\v 1 Ma amigo ahʉ dadí huɛ̨c ahʉ, ya xʉn ngu yʉn ho bi man Oją da ꞌyørcahʉ, pɛ jatho ga ꞌuehmbʉ bʉ i ja ꞌbɛꞌa gätho xʉn tsꞌo. Nɛ ga ꞌuehmbʉ ꞌbɛꞌa in nde di tsꞌon ma jąꞌihʉ, nɛ ma mbʉihʉ. Jatho ga homhbʉ manꞌda manꞌda ꞌbɛꞌa dí guaꞌa dán hojʉ, ngue gan numansuhʉ Oją.
\v 2 Nɛ nu ahʉ guí ꞌbʉhmbʉ bʉ ja ra hnini Corinto, dami bɛ̨ncꞌbe nanguecäꞌbe, nguetho xinga nꞌda ahʉ bi nu ran ʉnbi ꞌbɛꞌa dá øtꞌahʉ, nɛ hin te dá øtꞌäꞌbe ngue di tsꞌonꞌna ni mbʉihʉ, nɛ xinga nꞌda ahʉ dá hä ahʉ ngue mꞌbɛjua ga ɛ̨nꞌahʉ gui jurcahʉ. 
\v 3 Nuya hin dín nde ngue ga dąmhyą ahʉ, nguetho ya dí xi ahʉ ngue ɛ̨mmɛ dadí huɛ̨c ahʉ, nɛ thocua thoho dím bɛ̨n ahʉ, asta gueꞌbʉ ga tugä. 
\v 4 Nugä dí ɛ̨cꞌyɛi ngue guí øthʉ ran ho, nɛ gueꞌa ní hyu ma mbʉi a. Nɛ nu ahʉ gadí ꞌdajʉ ran johya, madague xʉn ngu yʉn ʉnbi dín nugäꞌbe, pɛ ɛ̨mmɛ hu ma mbʉi ran johya.
\v 5 Nuꞌbʉ má søngäꞌbe bʉ ja ra häi Macedonia, ɛ̨mmɛ xʉn hɛ̨i ꞌbɛꞌa dá øtꞌbe, nguetho hønbʉ go hapʉ dá thoꞌbe bi zʉcꞌbe yʉ jąꞌi, nɛ xʉn hɛ̨i ꞌbɛꞌa nám ꞌbʉꞌbe nɛ mi ja ra mbidi ma mbʉiꞌbe.
\v 6 Pɛ nu Oją nząi i hurpa yʉ́ mbʉi ʉ toꞌo i tu yʉ́ mbʉi, nɛ bi hyurca ma mbʉiꞌbe ꞌbʉ mi zøm bʉ ra Tito.
\v 7 Bi hyurca ma mbʉiꞌbe nangue gá hyurpa rá mbʉi ra Tito ꞌbʉ gmí ꞌbʉhmbʉ bʉ. Nu ra Tito bi xicäꞌbe ngue ɛ̨mmɛ bi du ni mbʉihʉ nangue ꞌbɛꞌa gá ꞌyøthʉ ngue hingui ho. Nɛ bi xicäꞌbe ɛ̨mmɛ gmín ndehʉ guin nujʉ. Nɛ nuꞌbʉ mi cꞌąmanꞌʉgä ꞌda, nu ahʉ bʉ gá yąnjʉ. Nɛ nangue guím bɛ̨njʉ, manꞌda i hu ma mbʉi.
\v 8 Bi du ma mbʉigä ꞌda yʉ pa nangue rá mbʉdi søcuą dá pɛnꞌnahʉ bʉ, pɛ hinꞌna ya. Bi du ma mbʉi nangue ra dumbʉi dá ꞌda ahʉ.
\v 9 Nuya dadí johyagä, hin nangue bi du ni mbʉihʉ, pɛ nangue gá päh nin ꞌyomfɛ̨nihʉ ꞌbʉ mi du ni mbʉihʉ. Nɛ nu Oją bi japi ngue bi bømanho ꞌbɛꞌa dá xi ahʉ. Nɛ nte man ʉnbi bi gohi ꞌbɛꞌa dá øtꞌaꞌbe.
\v 10 Nguetho nuꞌʉ i hon Oją ꞌbʉ i tu yʉ́ mbʉi, di japi di päh yʉ́ mbʉi nangue yʉ́ tsꞌoqui, ngue da yąni, nɛ da ꞌueꞌa ra dumbʉi bʉya. Pɛ nuꞌbʉ i tu yʉ́ mbʉi ngue hingui pądi ꞌbɛꞌa da ꞌyøtꞌe nɛ im bɛ̨n ra ximhäi, hin di päh rá mbʉi ꞌbʉ, pɛ manꞌda di un ran dąte bʉya.
\v 11 Nu ni dumbʉihʉ bi ꞌda ahʉ ran ꞌyomfɛ̨ni xʉn ho nangue gá hyomhbʉ Oją, nɛ ɛ̨mmɛ gá hyumbi gá hojʉ ꞌbɛꞌa bin ja. Nɛ ɛ̨mmɛ gá numanꞌʉhʉ a ngue bi ꞌyøtꞌ ra tsꞌoqui, nɛ ɛ̨mmɛ gá suhʉ ꞌbɛꞌa bin ja. Nɛ gá un ran ʉnbi toꞌo bi ꞌyøtꞌ ran tsꞌo, nɛ ɛ̨mmɛ gán ɛ̨hyahʉ gui ꞌyøthʉ ran ho. Ɛ̨mmɛ gmín ndehʉ xcá mbagä bʉ xcá zɛ ahʉ. Nɛ ya gá ꞌyuhmbʉ bin ho a ra tsꞌoqui gmín ꞌyohʉ.
\v 12 Jananjabʉ gueꞌa dá otꞌahʉ ra søcuą a, ngue hinga høntꞌa ngue di hoc rá mbʉi a ran ꞌyohʉ ngue bi ꞌyøtꞌ ran tsꞌo, xínga gueꞌa bi tꞌørpa ran tsꞌo, pɛ nangue ma søcuą dá otꞌahʉ, Oją bi zä bi ꞌyutꞌahʉ ngue majuąni guí tɛngahʉ.
\v 13 Janangueꞌa ɛ̨mmɛ hu ma mbʉiꞌbe. Nɛ manꞌda dadí johyaꞌbe nuꞌbʉ mi xicꞌbe ra Tito ngue gá hyurpa rá mbʉi a nangue ꞌbɛꞌa gá ꞌyøthʉ.
\v 14 Nɛ dá xih ra Tito, gue da tꞌømanho a rám hma bʉ guí ꞌbʉhmbʉ. Nɛ gueꞌa gá ꞌyørpahʉ, gá ꞌyømanho a ram hma bi xi ahʉ. Janangueꞌa hin dí pɛꞌtsꞌ ma sägä nangue ꞌbɛꞌa dá xifi, pɛ ɛ̨mmɛ i hu ma mbʉi.
\v 15 Nguetho nuꞌbʉ mí mba bʉ ra Tito, ɛ̨mmɛ gá numansuhʉ, nɛ ɛ̨mmɛ gán ɛ̨hyahʉ gá ꞌyøthʉ ꞌbɛꞌa gätho bi xi ahʉ. Janangueꞌa manꞌda bin ja rán huɛ̨cate ra Tito nangue ahʉ bʉ.
\v 16 Nɛ ɛ̨mmɛ hu ma mbʉi nguetho sä ga ɛ̨cꞌyɛi ngue majuąni guí øthʉ ran ho.
\c 8
\s Yʉ́n tꞌunni yʉ ꞌyɛ̨cꞌyɛi
\p
\v 1 Ma zʉ cuꞌahʉ, dín nde ahʉ gui pąhmbʉ ꞌbɛꞌa gätho bi ꞌyøtꞌ rá mate Oją bʉ mbo yʉ́ mbʉi yʉ ꞌyɛ̨cꞌyɛi dim pɛti bʉ ja ra häi Macedonia.
\v 2 Nu yʉ ꞌyɛ̨cꞌyɛi bʉ bi nu ran ʉnbi nguetho yʉ hyoya thoho ʉ. Pɛ guemhma ɛ̨mmɛ i ja ran johya yʉ́ mbʉi, nɛ manꞌda manꞌda di unda yʉn tꞌunni yʉ́ miꞌyɛ̨cꞌyɛihʉ.
\v 3 Nugä dí hąxanjuąni ngue bi unni xʉn ngu, madagueꞌa hinꞌyʉ ꞌbɛꞌa da gopʉ ja rá ngusɛ, nɛ rá pähäzɛhɛ bi uni.
\v 4 Nɛ bi ꞌyäc ra mate ngue nɛꞌʉ da gomꞌma ram fätsꞌi din tꞌunꞌndʉ yʉ hyoya ꞌyɛ̨cꞌyɛi bʉ ja ra häi Judea.
\v 5 Nɛ manꞌda xʉn ho bi ꞌyøtꞌe xinda gueꞌa dá bɛ̨ngä, nguetho mꞌbɛtꞌo thoho bi hyon rá pähä Oją ngue di bɛ̨nbi ꞌbɛꞌa da ꞌyøtꞌe, nɛ nubʉya bi xiqui ngue da mbäxqui ga fäx ʉ yʉ cu.
\v 6 Nu ra Tito rá mbʉdi bi xi ahʉ nangue yʉn tꞌunni gui umhbʉ. Nɛ dá xiꞌbe ra Tito di juaꞌa di pɛti gätho nin tꞌunnihʉ gá mamhbʉ gui umhbʉ, nangue nin huɛ̨catehʉ, ngue ra mate thoho.
\v 7 Nu ahʉ ɛ̨mmɛ xʉn ngu yʉn ho guí øthʉ, nɛ i ja ni tꞌɛ̨cꞌyɛihʉ xʉn ho, nɛ sä guím mamfʉ rám hman Oją xʉn ho, nɛ ɛ̨mmɛ guí pąhmbʉ xʉn ho, nɛ ɛ̨mmɛ guí ɛ̨hya gui ꞌyøthʉ rá ꞌbɛfi Oją, nɛ ja ahʉ nin huɛ̨catehʉ nanguecäꞌbe. Pɛ nuya xʉn ho ꞌbʉ gui umhbʉ xʉn ho nin tꞌunnihʉ, nꞌdamhma hin te gui ꞌbɛhmbʉ nangue rá ꞌbɛfi Oją guí øthʉ. 
\v 8 Nugä drá Pablogä hin dín nde ga manda ahʉ ꞌbɛꞌa guí øthʉ. Nuna ꞌbɛꞌa bi ꞌyøtꞌ yʉ cu bʉ ja ra häi Macedonia, nꞌda ra hmɛpya a. Nuꞌbʉ ngubʉ gui ꞌyøthʉ, da zä ga pącä ngue majuąni i ja ahʉ nin huɛ̨catehʉ nangue yʉ ꞌyɛ̨cꞌyɛi.
\v 9 Nguetho guí pąhmbʉ rá mate ma Hmuhʉ ra Jesucristo. Nuꞌa tengu ꞌbʉ ra mɛmbɛti a, pɛ bin hyoya nanguejʉ ngue bi nde din jajʉ xʉn ngu.
\v 10 Nuya i ja a ga xi ahʉ ꞌbɛꞌa dím bɛ̨ngä. Xʉn ho ꞌbʉ gui juahmbʉ ꞌbɛꞌa gá dʉmhbʉ má jɛya, nguetho ɛ̨mmɛ gán ɛ̨hyahʉ má jɛya gá un nin tꞌunnihʉ.
\v 11 Nuya dami pɛthʉ nin tꞌunnihʉ, nɛ daman ɛ̨hyahʉ ya, tengu ꞌbʉ rá mbʉdi gá bɛ̨mhbʉ, nɛ gui umhbʉ ꞌbɛꞌa gätho sä gui umhbʉ.
\v 12 Nuꞌbʉ ja a nde di un a nꞌda, Oją da numanho, ꞌbʉ gueꞌa rán thɛui ꞌbɛꞌa pɛꞌtsꞌa nꞌda a di uni.
\v 13 Pɛ hin dí ɛ̨na go din dąnhyɛ̨i ʉ ꞌda o dim mɛmbɛti ʉ ꞌda nangue a gá unhdʉ, nɛ nu ahʉ bʉya hinꞌyʉ ꞌbɛꞌa gui hyomhbʉ.
\v 14 Pɛ nuꞌa dí xi ahʉ, pɛ nuya xʉn ngu i ja ahʉ, xʉn ho ꞌbʉ gui unhdʉ tsꞌʉ ʉ ꞌda hinꞌyʉ ꞌbɛꞌa da hyoni. Nɛ nuꞌbʉ da zøn ra pa ngue hinꞌyʉ ꞌbɛꞌa gui hyomhbʉ, nuꞌʉ di zɛ ahʉ ʉ. Janangueꞌa gätho thocua thoho din ja ꞌbɛꞌa da hyoni.
\v 15 Nɛ gueꞌa mán tꞌoꞌtꞌi bʉ ja rám hman Oją: “Toꞌo di pɛti xʉn ngu, pɛ hin da bong thoho a da hyonsɛ, pɛ nɛꞌʉ di pɛti zʉ tsꞌʉtho, hin te di ꞌbɛdi.”
\s Ra Tito nɛꞌʉ in ꞌyohʉ
\p
\v 16 Dí ɛ̨mfe jamadi Oją ngue bi ꞌdac mam fätsꞌiꞌbe ra Tito, ngue nɛꞌa ɛ̨mmɛ im bɛ̨n ahʉ nɛ ɛ̨mmɛ ɛ̨hya nangue ahʉ.
\v 17 Ngue nu ra Tito min nde da ꞌyøtꞌe ꞌbɛꞌa dá xifi, nɛꞌa mi ja rá pähä zɛhɛ da mba bʉ.
\v 18 Nɛ da mbɛ ra Tito na manꞌda ra cu ngue dí pɛnhdä bʉ, nuꞌa im man rám hman Oją xʉn ho, nɛ gätho yʉ ꞌyɛ̨cꞌyɛi ngubʉ im ma nangueꞌa.
\v 19 Ma miꞌyɛ̨cꞌyɛihʉ bi huanhna ran ꞌyohʉ na, ngue dan ꞌyohe ꞌbʉ dá hąxhe ra mbɛti bʉ Judea. Nɛ gueꞌa ná uh man huɛ̨catehe ngue dín nde ga fäx ma cuhʉ, nɛ dí nuįxte ra Hmu mahɛ̨tsꞌi a.
\v 20 Nugäꞌbe dadí jamansu ꞌbɛꞌa dí øtꞌbe nangue yʉn tꞌunni xʉn ngu, nguetho hin dín nde din ja ꞌbɛꞌa dí cꞌąmanꞌʉcꞌbe. Nɛ gueꞌa í thanꞌndʉ miꞌda yʉ cu ngue ga mbähmbe ꞌbʉ dá hąxhe a ra mbɛti.
\v 21 Nguetho dín nde ga øtꞌbe gätho xʉn ho bʉ na nu Oją nɛpʉ na nu ma mijąꞌiꞌbe.
\v 22 Nɛ ga pɛnꞌnahʉ bʉ manꞌda ra cu mahønꞌa ngue da mbähä ra Tito. Nɛ nuna dí pąhmbe ngue ra ꞌyɛ̨cꞌyɛi xʉn ho na. Nɛhna ɛ̨mmɛ ɛ̨hya da ꞌyøtꞌe xʉn ho rá ꞌbɛfi Oją. Ɛ̨mmɛ nde da mba bʉ da nu ahʉ, nguetho ya dá xihna nangue ni hogantꞌøtꞌehʉ.
\v 23 Nɛ nuna ra Tito, man ꞌyoꞌbe nangue ma ꞌbɛfi dadí zɛ ahʉ. Nɛ nuꞌʉ miꞌda in ꞌyohʉ ra Tito, yʉ́m ꞌbɛhni ʉ yʉ ꞌyɛ̨cꞌyɛi dim pɛti ua. Nɛ da mbäx ahʉ nangue rá ꞌbɛfi Oją, gueꞌa dín nɛqui xʉn ho rá nuįxte ra Cristo bʉ guí ꞌbʉhmbʉ.
\v 24 Nuya dami ꞌyørcaꞌbe ra mate gui simanhohʉ yʉn ꞌyohʉ, nꞌdamhma gätho miꞌda yʉ ꞌyɛ̨cꞌyɛi da bądi ngue majuąni i ja nin huɛ̨catehʉ, tengu tho dím mangä ngue nząi i ja ahʉ ran huɛ̨cate.
\c 9
\s Di pɛt yʉn tꞌunni nangue yʉ́ miꞌyɛ̨cꞌyɛihʉ
\p
\v 1 Nugä hingui jatho ga xi ahʉ nangue gui zɛhmbʉ ni miꞌyɛ̨cꞌyɛihʉ, nangue yʉn tꞌunni gui unhdʉ.
\v 2 Nguetho dí pądi ngue ɛ̨mmɛ i ja ahʉ ra pähä gui zɛhmbʉ ʉ. Nɛ ya dá xih yʉ jąꞌi ngue i ꞌbʉcua ja ra häi Macedonia ꞌbɛꞌa guí øthʉ bʉ ja ra häi Acaya. Dá xihya ngue gán ɛ̨hyahʉ gá pɛt nin tꞌunnihʉ má jɛya. Nɛ yʉ cu ua nde da dɛnꞌnahʉ ꞌbɛꞌa guí øthʉ.
\v 3 Nuya dí pɛnꞌnahʉ ya yʉ cu da mbäx ahʉ gui pɛthʉ nin tꞌunnihʉ jannangueꞌa di ja bʉ ꞌbʉ dá søngähe bʉ, nɛ din nɛqui ngue guín ɛ̨hyahʉ gui fäxhʉ yʉ hyoya, tengu dá xih yʉ cu ua ngue guí øthʉ.
\v 4 Nɛ nuꞌbʉ ga mbähmbe bʉ ʉ ꞌda yʉ mɛngu ua ja ra häi Macedonia, nɛ hin xquín ɛ̨hyahʉ gui pɛt nin tꞌunnihʉ, ga pɛꞌtsꞌ ma sähʉ ꞌbʉ. Nguetho ɛ̨mmɛ dí ɛ̨cꞌyɛi guí øthʉ ꞌbɛꞌa guím mamhbʉ.
\v 5 Janangueꞌa dá xihya yʉ cu dim ꞌbɛtꞌo da mba bʉ, di zɛ ahʉ, nꞌdamhma da zä gui pɛthʉ gätho nin tꞌunnihʉ, di jua a gá mamhbʉ. Nɛ nuꞌbʉ dá mbähmbe bʉ, ya xtí guadi xquí pɛtꞌʉ gätho nin tꞌunnihʉ. Nɛ nu man ꞌyohe da bądi ngue gá umhbʉ nangue ni pähä zɛhɛhʉ, nɛ hin nangue dá xi ahʉ.
\v 6 Dami bɛ̨mhbʉ ya, toꞌo i tu zʉ yoho yʉ hmudä, zʉ yoho da xocꞌʉ, pɛ toꞌo da duhu xʉn ngu, da xoqui xʉn ngu ʉ. Janangueꞌa mpähä thoho gui unhdʉ yʉ hyoya yʉn tꞌunni, nɛ nu Oją xʉn ngu ran jąpi di ꞌda ahʉ bʉya.
\v 7 Nꞌda ngu nꞌda di uni tengu im bɛ̨n rá mbʉi zɛhɛ di uni. O gadí umhbʉ ꞌbʉ hin guín ndesɛ ni mbʉihʉ, pɛ xinga gueꞌʉ miꞌda da xi ahʉ gui umhbʉ. Nguetho Oją di huɛ̨cꞌʉ toꞌo i ja ran johya di uni.
\v 8 Nu Oją sä di ꞌda ahʉ xʉn ngu, janangueꞌa dí gua a gui hyonsɛhʉ, pɛ nɛꞌa thocua thoho gui unhdʉ toꞌo hinꞌyʉ ꞌbɛꞌa da hyoni.
\v 9 Ntꞌoꞌtꞌi bʉ ja rám hman Oją toꞌo ngue di unni xʉn ho ʉ yʉ hyoya, nuꞌa rá hogantꞌøtꞌe da gohi maząi.
\v 10 Nguetho nuꞌa Oją ngue nząi di un yʉ hmudä toꞌo i tupʉ ja ra huąhi, nɛ di japi din xąndi ngue din ja ꞌbɛꞌa da zi, guetꞌa Oją di ꞌdaꞌahʉ ra hmudä dán xąnd ni hogantꞌøtꞌehʉ, tengu bʉ nan xąnd yʉ hmudä bʉ ja ra huąhi.
\v 11 Nu Oją di ꞌdajʉ xʉn ngu, nꞌdamhma da zä xø ga thojʉ xʉn ngu bʉya. Nɛ nuꞌbʉ dá undähe nin tꞌunnihʉ, nɛ toꞌo da hyąni da ꞌyɛ̨spa Oją nɛ di un ra jamadi Oją.
\v 12 Yoho yʉn ho da bøni nangue nin tꞌunnihʉ, nu yʉ ꞌyɛ̨cꞌyɛi din ja ꞌbɛꞌa da hyoni, nɛ gätho ʉ di un ra jamadi Oją bʉya.
\v 13 Nɛ gätho toꞌo da hyąn nin tꞌunnihʉ da ꞌyɛ̨spa Oją, nguetho nu nin tꞌunnihʉ ra hmɛpya a ngue majuąni guí ɛ̨cꞌyɛihʉ rán ho maꞌdaꞌyo ra Cristo, nɛ ɛ̨mmɛ di johya ngue guí pąhmbʉ ni cuhʉ ʉ, nɛꞌʉ gätho miꞌda yʉ cu.
\v 14 Nɛ toꞌo da hyąn nin tꞌunnihʉ, da ꞌyäp Oją da mbäx ahʉ, nɛ di huɛ̨c ahʉ bʉya, nguetho i ja ahʉ xʉn ngu rá mate Oją bʉ mbo ni mbʉihʉ.
\v 15 Pɛ jamadi Oją nangue ran tꞌunni ɛ̨mmɛ xʉn ho bi ꞌdajʉ, ngue rá Tsꞌʉntꞌʉ, nɛ hingui sä gam bɛ̨mhbʉ hangu na ngu di muui a. Janangueꞌa nuꞌbʉ dím bɛ̨mhbʉ ꞌbɛꞌa bin ꞌdajʉ, hin ga hyøjʉ ꞌbɛꞌa dí pɛshʉ ꞌbʉ.
\c 10
\s I ja rán tꞌɛ̨di ra Pablo ꞌbɛꞌa da xih yʉ ꞌyɛ̨cꞌyɛi
\p
\v 1 Nugä drá Pablogä, ɛ̨mmɛ dín nde ahʉ gui ꞌyøhmbʉ a ga xi ahʉ, pɛ janate tho ga xi ahʉ, tengu thoho ꞌbʉ da xiꞌazɛhɛhʉ ra Cristo. Nguetho guí ꞌbʉhmbʉ bʉ ꞌda ʉ sä ɛ̨na mbɛ dín su ꞌbʉ dí ꞌbʉhmbʉ bʉ, ngueꞌa janate tho dím mangä, pɛ nuꞌbʉ dí pɛnꞌnahʉ ma søcuą, ɛ̨mmɛ ntsꞌɛdi dím mam bʉya, sä ɛ̨n ʉ ꞌda.
\v 2 Nuꞌbʉ dá mbagä bʉ, hin dín nde ga utꞌahʉ hangu rá tsꞌɛdi man zambʉi, pɛ sä ga dąmhyągä tsꞌʉ toꞌo im ma ngue dím bɛ̨nsɛgäꞌbe ꞌbɛꞌa dí øtꞌbe. 
\v 3 Majuąni dyʉ jąꞌi thohogaꞌbe ua ja ra ximhäi, pɛ hin dí tįmꞌbe ua a ra tsꞌɛdi ná tąfʉ ra ximhäi.
\v 4 Nujʉ hinga gueꞌa ma tsꞌɛdizɛhɛ nán sʉhmbʉ, pɛ rá tsꞌɛdisɛ Oją a ná tąfʉ rá tsꞌɛdi ran tsꞌo.
\v 5 Nangue rá tsꞌɛdi Oją dí hɛcuahʉ yʉ́n ꞌyɛ̨tsꞌi yʉ jąꞌi nangue ꞌbɛꞌa pąsɛ, nɛꞌʉ hinguin nde da bą Oją. Nɛ nu rá tsꞌɛdi Oją da zä di pärpa yʉ́n ꞌyomfɛ̨ni yʉ jąꞌi ngue ꞌdaꞌanguui da bɛ̨mhbʉ ra Cristo.
\v 6 Nɛ nuꞌbʉ ya dá pąꞌbe ngue majuąni guí øthʉ ꞌbɛꞌa in nde Oją, nugä ga hutꞌanzambʉi ngue ga ꞌuecꞌʉ ꞌda guí ꞌbʉhmbʉ bʉ, ngue hingui nde da ꞌyøtꞌa in nde Oją.
\v 7 Dami bɛ̨mhbʉ ya ꞌbɛꞌa i tꞌøtꞌahʉ. ꞌBʉ i ꞌda ahʉ ngue im bɛ̨ni ngue majuąni in ꞌyohʉ ra Cristo, xʉn ho ꞌbʉ, pɛ jatho da bądi ngue nɛcäꞌbe dín ꞌyoꞌbe ra Cristo.
\v 8 Hin dí pɛꞌtsꞌ ma sä xʉn ngu yʉ nidi ga xi ahʉ, ngue bi ꞌdac man tꞌɛ̨diꞌbe Oją. Nu Oją bi ꞌdacꞌbe ra tsꞌɛdi ga zɛ ahʉ manꞌda gui pąhmbʉ Oją, pɛ hin nangue ga tsꞌongäꞌbe ra ꞌbɛfi bʉ.
\v 9 Nugä hin dín nde gui suhʉ nangue ꞌbɛꞌa dí otꞌahʉ.
\v 10 Nguetho ꞌbʉpʉ ꞌda di cꞌąmanꞌʉgä, nɛ ɛ̨nꞌʉ: “Ɛ̨mmɛ ja rá tsꞌɛdi rá søcuą ra Pablo, pɛ nuꞌbʉ i ꞌbʉcua hinꞌyʉ rá tsꞌɛdi, nɛ hingui sä din yą xʉn ho,” ɛ̨n ʉ ꞌda.
\v 11 Pɛ jatho guim bɛ̨mhbʉ ꞌda ahʉ ngue tengu bʉ nan ja rá tsꞌɛdi ʉ ma søcuągä, nɛ ngutho ꞌbʉ dá xi a zɛhɛhʉ.
\v 12 Nugäꞌbe hinga ꞌdaꞌígu dím bɛ̨mhbe yʉ jąꞌi i ꞌbʉpʉ, ngue i ja ran ꞌyɛ̨tsꞌi nangue ꞌbɛꞌa ɛ̨na pąsɛ ʉ. Pɛ nuꞌʉ toꞌo im bɛ̨ni manꞌda i pąsɛ xinda gueꞌʉ miꞌda, pɛ hingui pą a majuąni. Nguetho sä i nuįspa yʉ́ mijąꞌihʉ nangue ꞌbɛꞌa im bɛ̨nsɛ.
\v 13 Pɛ nugäꞌbe hin dím mamꞌbe manꞌda ja man tꞌɛ̨diꞌbe xinda gueꞌa bi zängaꞌbe Oją, pɛ høntꞌa dí øtꞌbe ꞌbɛꞌa i xicꞌbe Oją. Nɛ bi xicꞌbe Oją dam pɛꞌbe bʉ guí ꞌbʉhmbʉ.
\v 14 Nɛ njon da zä da ꞌyɛ̨na manꞌda bi thoꞌa dá øtꞌbe, xinda gueꞌa bi xicꞌbe Oją ꞌbʉ mbʉdi thoho dá sømꞌbe bʉ guí ꞌbʉhmbʉ dá xi ahʉ rán ho maꞌdaꞌyo ra Cristo.
\v 15 Nɛ hin dín nde ga ɛ̨mꞌbe ngue ma ꞌbɛfiꞌbe ꞌbɛꞌa bi ꞌyøtꞌʉ miꞌda bʉ guí ꞌbʉhmbʉ, høntꞌa ma ꞌbɛfiꞌbe ga ja ahʉ guim bɛnthʉ ni tꞌɛ̨cꞌyɛihʉ xʉn ho, nɛ gueꞌa dí zä ga øtꞌbe manꞌda ra ꞌbɛfi bʉ, ꞌbʉ da xicꞌbe Oją.
\v 16 Nɛ sä ga mbɛꞌbe bʉ miꞌda yʉ hnini bʉya ngue manꞌda yatho guepʉ njom bi xih yʉ jąꞌi rán ho maꞌdaꞌyo ra Cristo. Nɛ njon da zä da ma ngue nꞌdanꞌyo dá thocpa rá ꞌbɛfi bʉ.
\v 17 Hingui ho ꞌbʉ din ꞌyɛ̨zɛhɛ nꞌda, pɛ manꞌda da hyądumbʉi da ꞌyɛ̨spa ra Hmu mahɛ̨tsꞌi.
\v 18 Nguetho hin te di muui ꞌbʉ din ꞌyɛ̨zɛhɛ nꞌda, pɛ nuꞌbʉ i øtꞌe ꞌbɛꞌa da numanho Oją, gueꞌa di muui.
\c 11
\s Ra Pablo bi ma nangue yʉ hyäte
\p
\v 1 O gadín xømbʉihʉ ꞌbɛꞌa dí xi ahʉ ya, madagueꞌa dí yątontogä tsꞌʉ.
\v 2 Pɛ nugä ɛ̨mmɛ dí hąh ma mbʉi nangue ahʉ, nguetho i ja bʉ mbo ma mbʉi rán huɛ̨cate Oją. Nɛ ɛ̨mmɛ dín nde ahʉ hønsɛ ra Cristo guin numanhohʉ, tengu nꞌda ra hmute ngue hin di tsꞌon rá mbʉi, høntꞌa in numanho a toꞌo dim ꞌbʉhmi.
\v 3 Pɛ dín su ngue di tsꞌon nin ꞌyomfɛ̨nihʉ nangue ra fɛhni im man ra zįthu, tengu thoho bi ꞌyørpa ra zįthu ra Eva rá mbʉdi thoho, nɛ tsꞌʉrpʉ thoho di ja ahʉ ngue hinga gätho ni mbʉihʉ guin numanhohʉ ra Cristo.
\v 4 Pɛ ɛ̨mmɛ guí øhmbʉ ꞌbɛꞌa gätho i xi ahʉ ꞌda yʉ jąꞌi ngue i søm bʉ guí ꞌbʉhmbʉ, madagueꞌa i xi ahʉ nꞌdanꞌyo ra Jesús ngueꞌa hin din thɛui a dá xi ahʉ, nɛ nꞌdanꞌyo nꞌda ran ꞌyomfɛ̨ni in nde di ꞌda ahʉ, nɛ i xi ahʉ nꞌdanꞌyo thoho nangue ran ho maꞌdaꞌyo, xinda gueꞌa dá xi ahʉ.
\v 5 Pɛ nugä hingui coh ma tsꞌɛdigä xinda gue ʉ ꞌda guí tɛnhdʉ, ngue im mansɛ ngue manꞌda yʉ́ ꞌbäihʉ ra Jesucristo.
\v 6 Pɛ dí pącä a majuąni ran ꞌyomfɛ̨ni nangue Oją, nɛ gueꞌa dá utꞌahʉ xʉn ngu yʉ nidi, madagueꞌa hingui sä dan høtꞌahyą tenguꞌʉ yʉn ꞌyohʉ.
\v 7 Uague guí ɛ̨mhbʉ hingui ho dá øtꞌä nguetho nte dá hącꞌahʉ ꞌbʉ má mangä rán ho maꞌdaꞌyo ra Cristo bʉ. Pɛ dá øtꞌ ra ꞌbɛfi dá honsɛ man tsꞌihmɛ, nguetho min nde ga zɛ ahʉ.
\v 8 Nɛ nuꞌbʉ má xänꞌnahʉ bʉ, nuꞌʉ yʉ ꞌyɛ̨cꞌyɛi i ꞌbʉpʉ miꞌda yʉm pɛti, gueꞌʉ bi ꞌdacä ꞌbɛꞌa dá hongä bʉ, janangueꞌa bi zä dá xi ahʉ ran ho maꞌdaꞌyo nɛ nte dá ä ahʉ.
\v 9 Nɛ nuꞌbʉ mám ꞌbʉhmbʉ bʉ, him mi ja ꞌbɛꞌa dá hongä, nɛ hin te dá ä ahʉ. Pɛ nuꞌbʉ mí zøm bʉ ma cuhʉ yʉ mɛngu macedonia, bi ꞌdacä ꞌbɛꞌa madi ꞌbɛcä. Nɛ ngubʉ ga øtꞌahʉ mahønꞌa bʉ, hin te ga ä ahʉ.
\v 10 Nɛ dím ma majuąni bʉ ja rá hmi ra Cristo, ngue hin te ga hącua yʉ cu ꞌbʉpʉ ja ni häihʉ Acaya, nangue rá ꞌbɛfi Oją dí øtꞌä bʉ, nɛ njon da zä da xiqui ga äh ra mbɛti.
\v 11 Ha gueꞌa dí øtꞌä gní ꞌyɛ̨mhbʉ hin dadí huɛ̨cꞌahʉ, pɛ Oją i pądi ngue dadí huɛ̨cꞌahʉ.
\v 12 Nɛ ga thoqui tengu dá øtꞌä, nꞌdamhma di nɛqui ngue hinga ꞌdaꞌigu dí øthe yʉ hyäte madagueꞌbʉ ná yątꞌa ɛ̨na i øtꞌe xʉn ho rá ꞌbɛfi Oją.
\v 13 Nu ʉ im mansɛ ʉ ɛ̨na yʉ́ ꞌbäihʉ ra Cristo, pɛ him majuąni im man ʉ, yʉ hyäte thoho, nɛ hin yʉ́ ꞌbäihʉ ra Cristo ʉ.
\v 14 Pɛ ndeꞌbʉ hin gui hyonya thohohʉ ꞌbɛꞌa i øtꞌʉ, nguetho nɛsɛ a ra zįthu da zä da hyä ahʉ, da zä da ꞌyøtꞌe tengu ꞌbʉ nꞌda ra hogamꞌbɛhni mahɛ̨tsꞌi bá pɛnꞌna Oją.
\v 15 Janangueꞌa ꞌdaꞌigu øthʉ ʉ yʉ́ ꞌyɛ̨hɛ ra zįthu, nɛ im bɛ̨n yʉ jąꞌi yʉ hogamꞌbɛhni ʉ. Pɛ da zøn ra pa da nu ran ʉnbi din thɛhʉ ꞌbɛꞌa bi ꞌyøtꞌe.
\s Ran ʉnbi bi nu ra Pablo nguetho rá ꞌbäiui ra Cristo a
\p
\v 16 Pɛ ɛ̨mmɛ dí nde ahʉ gui ꞌyøhmbʉ ꞌbɛꞌa dí xi ahʉ, madagueꞌbʉ guím bɛ̨mhbʉ ngue dí tontogä tsꞌʉ ꞌbʉ dí mansɛ ꞌbɛꞌa dí øtꞌä.
\v 17 Nuꞌbʉ dím mansɛ ꞌbɛꞌa dí øtꞌä, ɛ̨na gueꞌbʉ hinga gueꞌa bi xicä Oją ngue gam ma, pɛ ɛ̨na gueꞌbʉ dí tontogä tsꞌʉ ꞌbʉ dím mangä tengu na.
\v 18 Pɛ nu yʉn ꞌyohʉ bʉ i xi ahʉ nangue yʉ́n hosɛ, nuya nɛcä ga xi ahʉ tsꞌʉ nangue man hosɛ.
\v 19 Nu ahʉ ɛ̨mmɛ xʉn ho nin ꞌyomfɛ̨nihʉ, pɛ ɛ̨mmɛ guí ɛ̨hyahʉ guí øhmbʉ ꞌbɛꞌa i xi ahʉ yʉ tonto.
\v 20 Nɛ ɛ̨mmɛ gadí hohʉ gan ꞌyɛ̨hɛhʉ toꞌo in nde di manda ahʉ, madagueꞌbʉ i hä ahʉ o gue i ä ahʉ ꞌbɛꞌa gätho i ja ahʉ. Nɛ guín numansuhʉ ʉ ɛ̨mmɛ din ꞌyɛ̨zɛhɛ, madague da mbɛpꞌa ni hmihʉ, pɛ guextaꞌa guí tɛnhdʉ ʉ.
\v 21 Nugäꞌbe hingui sä ga øtꞌbe tengu ʉ, pɛ gueꞌa gním mamhbʉ hinꞌyʉ ma tsꞌɛdigäꞌbe. Nuꞌʉ yʉn ꞌyohʉ guí ꞌbʉhmbʉ bʉ im man yʉ́n hosɛ. Nɛcä ga hutꞌanzambʉi gam mangä tsꞌʉ nangue man hosɛ, tengu nꞌda ra tonto.
\v 22 Ná yątꞌʉ ngue yʉ hebreo ʉ, pɛ nɛcä drá hebreogä. Nɛ ná yątꞌʉ gue yʉ israel ʉ, pɛ nɛcä drá israelgä. Nɛ ná yątꞌʉ gue yʉ́m bomꞌbɛto ra Abraham ʉ, pɛ nɛcä drám bomꞌbɛtogä ra Abraham.
\v 23 Nɛ ná yątꞌʉ ngue yʉ́ ꞌyɛ̨hɛ ra Cristo ʉ, pɛ nugä manꞌda drá ꞌyɛ̨hɛgä a ra Cristo xinda gueꞌʉ. Nuya dím mangä tengu nꞌda ra tonto. Nugä manꞌda xʉn ngu ra ꞌbɛfi dí øtꞌä xinda gueꞌʉ ꞌda yʉn ꞌyohʉ, nɛ manꞌda xʉn ngu yʉ nidį dán ofädigä, nɛ xʉn ngu yʉ nidį dá nu ran ʉnbi nangue yʉm fɛi, nɛ xʉn ngu yʉ nidį mi ɛ̨na xtá thogä.
\v 24 Nɛ cʉtꞌa nidį bi ꞌyørcä ꞌdäte ma ꞌdɛꞌmagʉto yʉm fɛi ʉ ma mɛnguhe yʉ judío.
\v 25 Nɛ nhyundį bi ꞌbɛnzagä, nɛ nꞌdandį yʉ jąꞌi bi batꞌadogä. Nɛ nhyundį án xɛnꞌa ra barco mi hugä bʉya, bi zo bʉ ja ra dehe, nɛ ꞌdäte ma goho ora dá o bʉ ja ra dehe bʉya.
\v 26 Pɛ xʉn ngu yʉ nidį dán ꞌyogä nɛ xʉn ngu yʉ nidį má guepʉ xcá tugä bʉ ja yʉ dąthe, nɛpʉ ꞌbʉh yʉ bɛ̨. Nɛ bi gorcä ra ꞌyu ma mɛnguhe yʉ judío, nɛꞌʉ hing yʉ judío. Nɛ mi ɛ̨na xtá thogä bʉ ja yʉ hnini nɛpʉ ja yʉ dąpo. Nɛ dá hu yʉ barco bʉ ɛ̨mmɛ ɛn ra dehe ran dąhi ɛ̨mmɛ ntsꞌutho. Nɛ mi ɛ̨na xtá hyogä ʉ yʉ hyäte ꞌyɛ̨cꞌyɛi.
\v 27 Nɛ jaꞌbʉ ɛ̨mmɛ dá yäcä nangue ma ꞌbɛfi, nɛ bin ʉnba ma jąꞌi, nɛ jaꞌbʉ nyaꞌa thoho hin dán ącä. Nɛ jaꞌbʉ nyaꞌa thoho hin dán sihmɛgä, xinga gue ra dehe dá sigä. Nɛ jaꞌbʉ xʉn sɛ nguetho hinga xøtꞌa ma pahnigä.
\v 28 Ɛ̨mmɛ xʉn hɛ̨i ꞌbɛꞌa dí øtꞌä, nɛꞌʉ yʉ ꞌyɛ̨cꞌyɛi gätho hønbʉ go hapʉ dim pɛti ɛ̨mmɛ dí hądumbʉi ga jamansugä ʉ.
\v 29 Nɛꞌa dí øtꞌä ꞌdaꞌangu dí sägähe ʉ ꞌbɛꞌa gätho i sä ʉ, nuꞌbʉ ꞌbʉ a nꞌda ra ꞌyɛ̨cꞌyɛi xʉn güentꞌi, dí comꞌbe rán güentꞌi a. Nɛ nuꞌbʉ nꞌda ra ꞌyɛ̨cꞌyɛi i øtꞌ ran tsꞌo, nugä ɛ̨mmɛ dí cuɛgä nangue a to bi ꞌbɛpi da ꞌyøtꞌe.
\v 30 Pɛ nuꞌbʉ i ja a dín nde dá yądä, pɛ høntꞌa dán güentꞌigä dá yądä.
\v 31 Nu Oją rá Ta ma Hmuhʉ ra Jesucristo mająpi maząi a, i pądi ngue hing ra fɛhni dím mangä.
\v 32 Tengu dá øtꞌä nꞌdandį nuꞌbʉ mám ꞌbʉcä bʉ ja ra hnini Damasco, nuꞌbʉ min tsꞌʉtꞌabi ra Aretas, nɛ nuꞌa ra tsꞌʉtꞌabi bi xi ʉ yʉ dofʉi da gorca ra ꞌyu bʉ ja ra goxthi rá mbäꞌtꞌi ra hnini, mim bɛ̨ni ngue da bɛndgä bʉ.
\v 33 Pɛ nugä dá pøngä bʉ ja nꞌda ra ventana nɛ dá hugä bʉ ja nꞌda ra dąꞌbøtsꞌe, nɛ nuꞌʉ ma amigo bi cąꞌma ra ꞌbøtsꞌe ngue ra xąhi bʉ thi rá mbäꞌtꞌi ra hnini. Nɛ him bi bɛndgä ʉ yʉ cotꞌyu. Mahotho dá øtꞌä ꞌbʉ má pøngä bʉ ja ra hnini Damasco.
\c 12
\s Oją bi ꞌyurpʉ mahɛ̨tsꞌi ra Pablo
\p
\v 1 Nuꞌbʉ dím mansɛgä ꞌbɛꞌa dí øtꞌä, hin te di muui. Pɛ guemhma ga xi ahʉ ꞌbɛꞌa bi ꞌyurcä ra Hmu mahɛ̨tsꞌi ꞌbʉ nꞌdandį.
\v 2 Bi bonga ꞌdɛꞌmagoho njɛya Oją bi zixcä bʉ mahɛ̨tsꞌi. Hin dí pącä ꞌbʉ nɛꞌa ma ngøcꞌyɛi o hinꞌna, pɛ Oją pądi ꞌbɛpʉ ín ja.
\v 3 Høntꞌa dí pącä ngue dá mba mahɛ̨tsꞌi, hin dí pącä ꞌbʉ nꞌyoui ma ngøcꞌyɛ̨i o hinꞌna, høntꞌa Oją pądi ꞌbɛꞌa dá øtꞌä.
\v 4 Nɛ nuꞌbʉ mí tsꞌixcä bʉ guepʉ mahotho, dá øcä ꞌbɛꞌa bi hmam bʉ, nɛ njongui man yʉ jąꞌi tengu a. Nɛ him bin ꞌdac ran tꞌɛ̨di gam ma ꞌbɛꞌa dá øpʉ. 
\v 5 Nɛ nuna bi tꞌørcä i sä xcá yądä a ꞌbʉ gueꞌa xcá bɛ̨ni gam ma, pɛ høntꞌa man hosɛgä gam mangä ngue dí pącä hinꞌyʉ ma tsꞌɛdi zɛhɛgä.
\v 6 Nugä i jagä ꞌbɛꞌa xcan ꞌyɛ̨xä ꞌbʉ xcá ndegä nɛ hin dadín hyätꞌä tengu ꞌbʉ ra tonto, nguetho da zä xcá ma majuąni ꞌbɛꞌa bi tꞌurcä. Pɛ hin dín nde ngue gueꞌa dí tꞌɛ̨scä a, pɛ dín nde ngue gueꞌa in nusɛ yʉ jąꞌi a dí øtꞌä dí numansugä ʉ, nɛꞌa ꞌbɛꞌa øsɛ ngue dím mangä.
\v 7 Nugä dá nugä ɛ̨mmɛ mahotho bʉ. Pɛ nu ra zįthu bi ꞌdacä nꞌda ran ʉnbi dí sägä. Nɛ Oją bi un ran tꞌɛ̨di da ꞌyørcä, ndeque hin dan ꞌyɛ̨zɛhɛgä nangue ꞌbɛꞌa bi ꞌyurcä Oją.
\v 8 Nɛ hyundį dá äpä Oją ngue di ꞌuecꞌi tsꞌʉ ran ʉ i jagä. 
\v 9 Pɛ nuꞌa Oją bi xiqui hin di ꞌuecꞌa ran ʉ, pɛ di ꞌdacä rá mate nɛ rá tsꞌɛdi sä ga hätꞌä ran ʉnbi. “Nuꞌbʉ hinꞌyʉ ni tsꞌɛdizɛhɛ, manꞌda di nɛqui ma tsꞌɛdigä,” i ɛ̨ngä Oją. Janangueꞌa nuꞌbʉ hinꞌyʉ ma tsꞌɛdi zɛhɛgä, manꞌda ɛ̨mmɛ dadín johyagä, nguetho dí pącä ngueꞌa manꞌda dí nɛqui rá tsꞌɛdi ra Cristo.
\v 10 Nuya hingui tu ma mbʉi ꞌbɛꞌa dí øtꞌä, madagueꞌa xʉn ngu yʉn ʉnbi dín nugä, ngue di cꞌąmanꞌʉg yʉ jąꞌi, uague i pa ma ʉguigä. Nɛ hingui tu ma mbʉi nangue ꞌbɛꞌa i ørca yʉ jąꞌi ꞌbʉ dí øtꞌ rá ꞌbɛfi ra Cristo. Nguetho nuꞌbʉ hinꞌyʉ ma tsꞌɛdi, pɛ manꞌda di ꞌdac rá tsꞌɛdi ra Cristo.
\s I hąh rá mbʉi ra Pablo nangue yʉ ꞌyɛ̨cꞌyɛi bʉ Corinto
\p
\v 11 Nuꞌa ꞌbɛꞌa guím bɛ̨ngahʉ, jatho ga xiꞌasɛhʉ ꞌbɛꞌa dí øtꞌä, tengu ꞌbʉ drá tontogä. Manꞌda xʉn ho ꞌbʉ xquím mansɛhʉ man hogä xinda gueꞌbʉ gam mansɛgä. Nu yʉn ꞌyohʉ guí tɛnhdʉ, hinꞌyʉ ꞌbɛꞌa i ja ʉ ngue hinꞌyʉgä, madagueꞌa nte i jagä a di muui.
\v 12 Nuꞌbʉ mám ꞌbʉcä bʉ, dá utꞌahʉ ngue majuąni ma ꞌbäigäꞌbe ra Jesucristo, hin dán xømbʉi ꞌbʉ má utꞌahʉ yʉn tꞌøtꞌe nuįxte nɛ yʉ hyonya ntꞌøtꞌe gue gá nusɛhʉ ꞌbʉ mám ꞌbʉhmbʉ bʉ.
\v 13 Hanja guím mamhbʉ ngue hin dá øtꞌahʉ bʉ tengu dá øtꞌä bʉ ꞌbʉh miꞌda yʉ ꞌyɛ̨cꞌyɛi. Pɛ ꞌdaꞌangu dá øtꞌahʉ, pɛ høntꞌa nꞌda, ngue hin dá ä ahʉ ꞌbɛꞌa dá hongä. Ha gueꞌa gni ꞌyɛ̨njʉ hingui ho a dá øtꞌä. Pɛ dami pungahʉ ꞌbʉ.
\v 14 Nuya ná hyundį ga mbagä bʉ. Nɛ hin te ga äꞌahʉ ꞌbɛꞌa dí hongä mahønꞌa, nguetho hin dín ndegä a ni mbɛtihʉ, pɛ dín ndegä gan jahʉ tengu ꞌbʉ ma tꞌʉhni ahʉ. Nɛ hinga gueꞌʉ yʉ tꞌʉhni i pɛꞌtsꞌi ꞌbɛꞌa i hon rá ta o rá mbe. Pɛ nu yʉ ta nɛ yʉ mbe i pɛꞌtsꞌi ꞌbɛꞌa da hyon yʉ́ tꞌʉhni.
\v 15 Pɛ da hyu ma mbʉi ꞌbʉ da zä ga ꞌbɛdi ꞌbɛꞌa gätho dí pɛꞌtsꞌi guepʉ da zä ga honꞌna ran ho ni mbʉihʉ, nɛ guepʉ go him mi sä dam pɛfi ga zɛꞌahʉ. Pɛ masque hin gadí huɛ̨gahʉ tengu bʉ na huɛ̨cꞌahʉ.
\v 16 Nɛ guím mamhbʉ majuąni ngue hin te dá hącä ni mbɛtihʉ, pɛ guím bɛ̨mhbʉ ꞌda ahʉ ngue dá tącä ni mbɛtihʉ ngue guí ɛ̨mhbʉ dá hä ahʉ.
\v 17 Ha guím bɛ̨mhbʉ dá hä ahʉ ngue dá pɛnꞌnahʉ yʉm ꞌbɛhni bʉ.
\v 18 Nugä dá ndep ra Tito da mba bʉ, in ꞌyoui manꞌda ma cuhʉ. Guí pąhmbʉ hin te bi dąha ngue dąmá ꞌyä ahʉ. Nguetho ꞌdaꞌingu dím bɛ̨ngäꞌbe ra Tito ngue dadí huɛ̨cꞌaꞌbe, nɛ ꞌdaꞌingu bʉ na øtꞌ ma ꞌbɛfiꞌbe.
\v 19 Ma cuꞌahʉ, dadí huɛ̨cꞌahʉ, dín ꞌyohʉ ra Cristo. Nɛ Oją pądi majuąni a dím mamꞌbe ya, ngue dí homꞌbe ꞌbɛꞌa dín te ni mbʉihʉ. Janangueꞌa dí honi ga tąpä ʉ yʉm hma him majuąni, ngue im manꞌʉ yʉ hyäte di ʉgui. Nɛ hinga gueꞌa guím bɛ̨mhbʉ ꞌda ahʉ, ngue guí ɛ̨mhbʉ dí homꞌbe guin numanhojʉ.
\v 20 Pɛ dí su ngue hin gan numanhogä ꞌbɛꞌa guí øthʉ bʉ ꞌbʉ dá mbagä bʉ. Pɛ nɛ da du ni mbʉihʉ ꞌbɛꞌa ga xi ahʉ bʉya. Dí su ngue ga tįn ahʉ gadín sʉhmbʉ nꞌda ngu nꞌda ahʉ, nɛ gadín sɛyabahʉ, nɛ gadín cuɛfʉ nꞌda ngu nꞌda ahʉ, nɛ gadín tąfʉ nꞌda ngu nꞌda ahʉ, nɛ gadín cꞌąmanꞌʉhʉ, nɛ gadín ꞌyøspatho ꞌbɛꞌa gadín xihmbʉ, nɛ gadín ꞌyɛ̨zɛhɛhʉ, nɛ dí su ga tįn ahʉ hinga gueꞌa guí øthʉ bʉ ja nim pɛtihʉ.
\v 21 Nɛ nuꞌbʉ dá mbagä bʉ, dí su ngue ma Ojąhʉ di jaqui ga pɛꞌtsꞌ ma sä nangue ꞌbɛꞌa guí øthʉ bʉ. Nɛ din jagä ra dumbʉi nangue toꞌo bi ꞌyøtꞌ ran tsꞌo mamꞌbɛtꞌo, nɛ guextaꞌa hin ni päh yʉ́ mbʉi, him bi ꞌyäp rá punbi Oją nangue ran tsꞌo bi ꞌyøtꞌe, gueꞌʉ bi ꞌyøtꞌ ran ꞌyomtꞌɛ̨ni, nɛꞌʉ bi zinba yʉ́ xisu miꞌda yʉn ꞌyohʉ.
\c 13
\s Rán zofo ra Pablo, nɛ yʉn zɛngua
\p
\v 1 Na hyundį ya ga mbagä bʉ gan nu ahʉ. Nɛ nuꞌbʉ dá mbagä bʉ, ga juąnbä ʉ i ꞌbähmbʉ ʉ yoho o gue hyu yʉ testigo.
\v 2 Nuꞌbʉ mám ꞌbʉcä bʉ mamꞌbɛtꞌo dá dąmhyą ʉ toꞌo ząi i øtꞌ yʉn tsꞌo. Nuya ga xiꞌʉ mahønꞌa nɛ gätho miꞌda ahʉ, nuꞌbʉ dá mbagä bʉ mahønꞌa, toꞌo gätho i øtꞌ ran tsꞌo hin ga huɛ̨cthoho ʉ. 
\v 3 Nɛ nuꞌahʉ da zä gui pąhmbʉ xʉn ho ngue majuąni rá tsꞌɛdi ra Cristo ꞌbʉ ja a dím mangä bʉya, nɛ him ma tsꞌɛdi zɛhɛgä. Nɛ nuꞌa ra Cristo hingui ꞌbɛh rá tsꞌɛdi nɛ guí pąhmbʉ nguetho dim pɛpʉ mbo ni mbʉihʉ rá tsꞌɛdi.
\v 4 Nu ra Cristo him mi ja rá tsꞌɛdi ꞌbʉ mi du bʉ ja ra pontꞌi, pɛ nuya i ꞌbʉi nangue rá tsꞌɛdi Oją. Nɛcäꞌbe hinꞌyʉ ma tsꞌɛdi zɛhɛꞌbe tengu tho a ra Cristo ꞌbʉ mi du, pɛ nuya dín ꞌyohe ra Cristo nangue rá tsꞌɛdi Oją, nꞌdamhma da zä ga hocꞌahʉ bʉ.
\v 5 Nuya nꞌda ngu nꞌda ahʉ dami bɛ̨mhbʉ xʉn ho mbo ni mbʉizɛhɛhʉ, janangueꞌa gui pąhmbʉ majuąni guí ɛ̨cꞌyɛihʉ o hinꞌna. Nuꞌbʉ hin gán hyäzɛhɛhʉ, sä gui pąhmbʉ majuąni i ꞌbʉpʉ mbo ni mbʉihʉ ra Cristo.
\v 6 Nɛcäꞌbe dín nde ahʉ gui pąhmbʉ ngue majuąni dí ɛ̨cꞌyɛiꞌbe ra Cristo.
\v 7 Dí äpꞌbe rá tsꞌɛdi Oją ngue gui ꞌyøthʉ ran ho, nɛ hin nangue da bømanho ma ꞌbɛfi bʉ, nguetho manꞌda dín nde ahʉ gam ꞌbʉmanhohʉ ra Cristo, xinda gueꞌbʉ guin numansucꞌbe.
\v 8 Nugäꞌbe hin dín ndehma ngue ga hɛ̨mꞌbe toꞌo i øtꞌa majuąni pɛ høntꞌa dín nde ga øtꞌbe ꞌbɛꞌa di zɛ ʉ.
\v 9 Da hyu ma mbʉiꞌbe ꞌbʉ di zac ni mbʉihʉ nangue Oją, madagueꞌa guím bɛ̨mhbʉ ngue hinꞌyʉ ma tsꞌɛdiꞌbe. Pɛ høntꞌa dí äpꞌbe Oją ngue din te ni mbʉihʉ nangue Oją.
\v 10 Dí oꞌtꞌahʉ ngue gui hoc ni mbʉihʉ, nguetho hin dín nde ntsꞌɛdi ga dąmhyą ahʉ ꞌbʉ dá mbagä bʉ. Nu Oją bi ꞌdacä ran tꞌɛ̨di ngue ga tetꞌa ni mbʉihʉ, pɛ him bi ꞌdac ran tꞌɛ̨di ga ʉꞌtꞌa ni mbʉihʉ. 
\v 11 Nuya høntꞌa dí xiꞌahʉ ya, ma zʉ cuꞌahʉ, Oją gui cohmbʉ bʉ guí ꞌbʉhmbʉ. Pɛ manꞌda din te xʉn ho ni mbʉihʉ. Nɛ dami bɛ̨mhbʉ ꞌbɛꞌa gätho dá xiꞌahʉ, ndeꞌbʉ nꞌdatꞌa guim bɛ̨mhbʉ nꞌda ngu nꞌda ahʉ, nɛ gam ꞌbʉmanhohʉ, nɛ hin gan sʉhmbʉ bʉ. Nɛ Oją da zä manꞌda di huɛ̨c ahʉ nɛ da hyu ni mbʉihʉ.
\v 12 Nꞌda ngu nꞌda dami zomanhothʉ nangue ran huɛ̨cate, nguetho nꞌdatꞌa ra Hmu dí tɛnhdʉ.
\v 13 Nɛ gätho yʉ ꞌyɛ̨cꞌyɛi ꞌbʉcua i pɛnꞌnahʉ ran zɛngua.
\v 14 Nu rá mate ma Hmuhʉ ra Jesucristo, nɛ rán huɛ̨cate Oją, nɛ rám fätsꞌi rá Hogandąhi Oją dí comhbʉ gätho ahʉ. Nɛ høntꞌa dí xi ahʉ ya.