\id GAL
\h GÁLATAS
\toc1 GÁLATAS
\mt1 GÁLATAS
\mt2 Ra søcuą bi ꞌyorba ra Pablo ʉ yʉ ꞌyɛ̨cꞌyɛi bʉ ja ra häi Galacia
\c 1
\s Ran zɛngua
\p
\v 1 Nugä dra Pablogä, guecä him bi huangä yʉn ꞌyohʉ, pɛ guesɛ a ra Jesucristo, nɛꞌa rá Ta, ngue bi xoxꞌa rá Tsꞌʉntꞌʉ ꞌbʉ mi du.
\v 2 Nugä nɛ gätho ya ma cuhʉ nangue Oją ngue i ꞌbʉcua dí pɛnꞌnahʉ ran zɛngua. Guehna ra søcuą dí otꞌahʉ, nangue gätho yʉ ꞌyɛ̨cꞌyɛi i ꞌbʉpʉ ra häi Galacia.
\v 3 Dí äp Oją ra Ta nɛ ma Hmuhʉ ra Jesucristo di ꞌda ahʉ rán jąpi nɛ da hyutꞌa ni mbʉihʉ.
\v 4 Nuꞌa ra Jesús bin däsɛ bi gurca ma tsꞌoquihʉ. Nɛ nangueꞌbʉ mí du a, bi zä da yąnjʉ nangue ran tsꞌo i jaua ja ra ximhäi. Nɛ guehna rá pähä ma Tahʉ Oją bi ꞌyørcahʉ.
\v 5 Janangueꞌa dí ɛ̨spahʉ Oją nɛ i ja rá nuįxte gätho yʉ pa maząi.
\s Hinꞌyʉ manꞌda ram hma ngue dím pø a nꞌda
\p
\v 6 Nugä xøgue dadí hyonya thoho hanja ꞌbexque gá hyɛhmbʉ Oją ngue bi zonꞌnahʉ xquí pąhmbʉ rá mate ra Cristo, nɛ gá hyąxhʉ nꞌdanꞌyo ra ꞌyu tꞌɛ̨mbi ní zin ahʉ Oją.
\v 7 Pɛ hinꞌyʉ manꞌda ra ꞌyu ní zinjʉ Oją, hinda høntꞌa rán ho maꞌdaꞌyo ra Cristo. Pɛ i ꞌbʉꞌi ꞌdaꞌʉ in nde da hyä ahʉ, ngue nde di pätꞌahʉ ra ꞌyu nangue ra Cristo.
\v 8 Pɛ ya xtá xi ahʉ ra ꞌyu ngue majuąni dí yąnjʉ Oją a. Nuꞌbʉ ꞌboꞌo da xi ahʉ nɛ ꞌdahma ꞌdanꞌyotho da xi ahʉ, da nu rán tsꞌɛmbi Oją a, madagueꞌbʉ guecä o nꞌda rám ꞌbɛhni mahɛ̨tsꞌi. 
\v 9 Ga xi ahʉ mahønꞌa tengu ya xtá xi ahʉ, nuꞌbʉ ꞌboꞌo xi ahʉ nꞌdanꞌyo nꞌda ra ꞌyu xinda gueꞌa gá hyąmhbʉ, Oją da zänba ran ʉnbi a.
\v 10 Nuna ram hma dí xi ahʉ ntsꞌɛdi tsꞌʉ. Mfądi hin dí honi guin numanhojʉ, pɛgue dí hongä Oją da numanhogui. Pɛ nuꞌbʉ xcá honi ꞌbɛꞌa dí numanhog yʉ jąꞌi, hingui sä xcán ꞌyɛ̨hɛgä nangue ra Cristo ꞌbʉ.
\s Høntꞌa Oją bi bɛ̨nba ram hma im man ra Pablo
\p
\v 11 Ma zʉ cu ahʉ, dín nde ahʉ gui pąhmbʉ hing rám hman yʉ jąꞌi a rán ho maꞌdaꞌyo ra Cristo dá xi ahʉ.
\v 12 Nu ran ho maꞌdaꞌyo dím mangä, xínga nꞌda ran ꞌyohʉ bi xiqui, nɛ hín dá øcä bʉ ja man xädi a, pɛ guesɛ a ra Jesucristo bi jaqui dí pądi.
\v 13 Nu ahʉ ya gá ꞌyøhmbʉ ꞌbɛꞌa mí øtꞌä nuꞌbʉ mi tɛndä yʉ́ tꞌɛ̨cꞌyɛi ʉ ma mijudíohe, ɛ̨mmɛ madí undä ran ʉnbi ʉ yʉ́ ꞌyɛ̨cꞌyɛi ra Cristo, nɛ mim bɛ̨ngä xcá juadi gätho ʉ.
\v 14 Nɛ mi øtꞌä xʉn ho yʉ́ tꞌɛ̨cꞌyɛi ma mɛnguhe yʉ judío, ɛ̨mmɛ mi ɛ̨hya ga jąꞌtsꞌä ʉ, nɛ xínda gueꞌʉ miꞌda ꞌda ingu yʉ jɛya mi pɛsꞌhe. Nguetho ɛ̨mmɛ min nde xcá thocä yʉ́n tꞌøtꞌe ʉ ndu mam bombøtahe mayaꞌbʉ.
\v 15 Pɛ nuꞌbʉ hin nám ꞌbʉcä, Oją xí huangui, nɛ mꞌbɛjua bi zongui nangue rá mate. Nguetho bi ndesɛ Oją a.
\v 16 Janangueꞌa bi jaqui dá pąꞌa rá Tsꞌʉntꞌʉ ngue gueꞌa ra Cristo, guepʉ bi zä gam man rám hma bʉ ꞌbʉh yʉ jąꞌi hing yʉ judío. Nɛ nuꞌbʉ mi zoncä Oją, xínga nꞌda ra jąꞌi bi xängui.
\v 17 Nɛ him ꞌbex dá mbagä bʉ ja ra hnini Jerusalén ngue xcán yąꞌbe ʉ miꞌda yʉ́ ꞌbäihʉ ra Cristo ngue mꞌbɛtꞌo xinda guecä. Pɛ mꞌbɛtꞌo dá mbagä bʉ ja ra häi Arabia bʉ njongui ꞌbʉi, guepʉ dán yąsɛꞌbe Oją. Mꞌbɛjua bʉya duá pengä bʉ ra hnini Damasco. 
\v 18 Pɛ xí thoꞌan hyu jɛya ꞌbʉ má mbagä bʉ ja ra dąhnini Jerusalén, ja dá pącä ra Pedro bʉya, nɛ ꞌdɛꞌmacʉtꞌa thoho dám ꞌbʉꞌbe bʉ ra Pedro.
\v 19 Pɛ hin dá nugä miꞌda yʉ́ ꞌbäihʉ ra Cristo, pɛ høntꞌa ra Jacobo rán ꞌyohʉ ma Hmuhʉ dá nugä bʉ.
\v 20 Pɛ majuąni na dí otꞌahʉ, nguetho i pą Oją hin dí mangä ra fɛhni.
\v 21 Mꞌbɛjua bʉya dá mbagä bʉ ja ra häi Siria nɛ ra häi Cilicia.
\v 22 Nɛ nuꞌʉ yʉ ꞌyɛ̨cꞌyɛi dim pɛti bʉ ja yʉ́m pɛti bʉ ra häi Judea, him mi pąqui nguetho njąmꞌbʉ min nugui.
\v 23 Pɛgue mi øde ngue guecä drá Pablo mi ɛ̨na xcá juah yʉ ꞌyɛ̨cꞌyɛi, pɛ nuya dím mangä rám hman Oją. 
\v 24 Janangueꞌa bi un ra jamadi Oją ngue ꞌbɛꞌa bin ja nanguecä.
\c 2
\s Miꞌda yʉ́ ꞌbäihʉ ra Cristo bi zimanho a ra Pablo
\p
\v 1 Nuꞌbʉ mi thoꞌa ꞌdɛꞌmagoho njɛya dá mbagä mahønꞌa bʉ ja ra dąhnini Jerusalén. Dá mbɛꞌbe ra Bernabé nɛ dá sixꞌbe ra Tito.
\v 2 Nugä dá mbähmbe bʉ nguetho bi bɛ̨ngä Oją. Nɛ dán yąhe ꞌdaꞌʉ yʉ́ ngʉrpi yʉ ꞌyɛ̨cꞌyɛi. Nɛ høntꞌʉ dá xiꞌbe ꞌbɛꞌa ním hma dí xiꞌʉ hing yʉ judío, ngue gueꞌa rán ho maꞌdaꞌyo ra Cristo. Nguetho dí su di ʉꞌtꞌ yʉ́ mbʉi ꞌbɛꞌa dí øtꞌä, ngue hinga nɛꞌʉ yʉ́ tꞌɛ̨cꞌyɛi yʉ judío dí mangä hapʉ dí ꞌyo. Nɛ nuꞌbʉ hin xtá numanho, xtí tsꞌonga ma ꞌbɛfi bʉ ꞌbʉ.
\v 3 Pɛ nte bi xicꞌbe, xím bi ma ngue jatho da thɛcuą rá xifani ra Tito tengu yʉ́ tꞌɛ̨cꞌyɛi yʉ judío. Nɛ nuna ra Tito hin ra judío na, pɛ ra griego na.
\v 4 Pɛ mi ꞌbʉpʉ ʉ ꞌda yʉ hyäte ngue yʉn ꞌyøxte, ngue høntho in øxtho, ngue nde da bądi gueꞌbʉ dí øtꞌä yʉ́ tꞌɛ̨cꞌyɛi yʉ judío o hinꞌna. Nuꞌʉ in nde di hɛgahʉ ꞌbɛꞌa gätho bi ꞌdajʉ ra Cristo, ngue bi jajʉ ga hɛhmbʉ yʉ́n tꞌøtꞌe yʉ judío.
\v 5 Pɛ xíngui tsꞌʉ dán hyɛhmbe ngue da hyäje ʉ yʉ hyäte, pɛ dá zacuahe a ram hma majuąni. Nguetho dín ndehe, høntꞌa majuąni rán ho maꞌdaꞌyo ra Cristo gui ꞌyɛ̨ꞌtꞌambʉihʉ a.
\v 6 Nɛ nuꞌʉ njuąntho yʉ ngʉrpi bʉ, madagueꞌbʉ tꞌɛ̨mbi manꞌda ja yʉ́n tꞌɛ̨di xinda guecä, pɛ ꞌdaꞌangudähe, nguetho ꞌdaꞌangu yʉn ꞌyohʉthoho bʉ na nu Oją. Nɛ him bi xiqui nꞌdanꞌyo nꞌda ram hma ga xänba yʉ jąꞌi.
\v 7 Pɛ nuꞌʉ yʉ ngʉrpi bi hyąxa njuąni ngue gueꞌa Oją bi ꞌdacä ra ꞌbɛfi ga xiꞌʉ hing yʉ judío a rán ho maꞌdaꞌyo ra Cristo, tengu thoho ra ꞌbɛfi bi un Oją ra Pedro nangue da xih ma mijudíohe. 
\v 8 Nguetho nꞌdatꞌa Oją bi ꞌdacꞌbe ra tsꞌɛdi ra Pedro, nɛ bi xifi da xiꞌʉ yʉ judío, pɛ nugä, bi xiqui ga xiꞌʉ hing yʉ judío.
\v 9 Janangueꞌa nuꞌbʉ mi hyąxa njuąni ngue ꞌdaꞌangu nan hɛ̨tsꞌi a ra ꞌbɛfi bin ꞌdaje ʉ yʉ ngʉrpi a ra Jacobo, nɛ ra Pedro, nɛ ra Xuua, bi bɛndga ma ꞌyɛꞌbe ra Bernabé. Nuꞌa nám bønꞌa nꞌdatꞌa dí ɛ̨cꞌyɛihe, nɛ nꞌdatꞌa dím mamhbe ga mbɛꞌbe bʉ ꞌbʉꞌʉ hing yʉ judío, dam pɛꞌbe bʉ, pɛ nuꞌʉ, di thoqui da xih yʉ judío.
\v 10 Høntꞌa bi xicꞌbe jatho ga fäxꞌbe yʉ hyoya, pɛ ngubʉ dí ɛ̨hya ga øtꞌa.
\s Nuꞌa ra Pablo bi dąmhyą ra Pedro bʉ Antioquía
\p
\v 11 Pɛ nuꞌbʉ mi mba bʉ ja ra hnini Antioquía a ra Pedro, nugä dá xip rá hmi, nguetho hingui ho bi ꞌyøtꞌe.
\v 12 Nguetho nuꞌbʉ mi zøm bʉ ꞌda ʉ ma mijudíohe bi mbɛnꞌna ra Jacobo, nɛ ꞌbex bi ꞌyɛꞌtsꞌa na sihmɛhʉ ʉ hing yʉ judío, sä bi zu da ꞌyɛ̨mpꞌʉ yʉ́ mijudíohʉ hingui ho bi ꞌyøtꞌe.
\v 13 Nɛ nuꞌʉ miꞌda yʉ judío ngue mi ɛ̨cꞌyɛi bʉ, bi dɛnꞌna ra Pedro. Nɛꞌa ra Bernabé bi dɛnꞌndʉ ngue madí yorba yʉ́n tꞌøtꞌe.
\v 14 Pɛ nuꞌbʉ má nugä ngue him bin thɛui ran ho maꞌdaꞌyo a bi ꞌyøtꞌʉ, dá xiꞌa ra Pedro, nɛ gätho mi ꞌbäpʉ: “Nuꞌi gra Pedro gra judío, pɛ hin gmi øtꞌ yʉ́n tꞌøtꞌe yʉ judío. Pɛ hanja gní ꞌyøtꞌ mahønꞌa yʉ́n tꞌøtꞌe yʉ judío, nɛ nꞌdanni guín sihmɛ. Pɛ tenguꞌbʉ guí uthʉ ʉ hing yʉ judío ngue da ꞌyøtꞌ yʉ́n tꞌøtꞌe yʉ judío,” dá ɛ̨mbi.
\s Dyʉ judíohe, ní yąnje a ra Cristo
\p
\v 15 Nugähe ngue dám ꞌbʉhmbe dyʉ judíohe, nząi dá øthe yʉ́n tꞌɛ̨di Oją bi sije. Nɛ hin dám ꞌbʉhmbe tenguꞌʉ hing yʉ judío, ngue hingui pąh yʉ́n tꞌɛ̨di Oją ʉ.
\v 16 Pɛ guehma dí pąhmbe hin dí hogahe ʉ yʉn tꞌɛ̨di gue Oją bi un mam bombøtahe mayaꞌbʉ, pɛ høntꞌbʉ ga hąmhbe rá mate ra Jesucristo, di hoga ma tsꞌoquihe, dyʉ judíogähe. Janangueꞌa nɛcähe ngue dá pąhmbe yʉ́n tꞌɛ̨di Oją, pɛ dá hąmhbe rá mate ra Jesucristo ngue di hogahe. Nɛ hin dí ɛ̨mhbe di hogahe ꞌbʉ dí øzɛhɛhe ʉ yʉn tꞌɛ̨di. Nguetho mán tꞌoꞌtꞌi: “Xínga nꞌda da tꞌɛ̨mbi xʉn ho nangue yʉ́n tꞌɛ̨di Oją.”
\v 17 Nɛ nugähe dyʉ judíohe, pɛ nangue ra Cristo dí homhbe di hogahe ya. Nɛ gueꞌa ná ɛsꞌhe a dím bɛ̨mhbe di hogahe ʉ yʉ́n tꞌɛ̨di Oją. Pɛ hin dím bɛ̨mhbe ngue dyʉ ꞌyøtꞌatsꞌoquihe ꞌbʉ dí ɛsꞌhe ʉ, nguetho gätho xʉn hotho rá ꞌyu ra Cristo.
\v 18 Pɛ nuꞌbʉ gam mangä ngue jatho ga øtꞌä mahønꞌa yʉ́n tꞌɛ̨di Oją bi un ma mijudíohe, ngue gueꞌʉ dí hogä ʉ, pɛ ga cohi dra ꞌyøtꞌatsꞌoqui ꞌbʉ, nguetho hin dí hätꞌi ga øtꞌä yʉn tꞌɛ̨di tengu in nde Oją.
\v 19 Janangueꞌa dá ɛꞌtsꞌä ná bɛ̨ngä ní zingä Oją ʉ yʉ́n tꞌɛ̨di, nɛ dá tɛnꞌna ra Jesucristo nguepʉ da zä di ꞌdac ra ꞌdaꞌyote, nɛ da zä bʉ ga ørpa rá ꞌbɛfi Oją bʉya.
\v 20 Nuya dám ꞌbʉcä tengutho ꞌbʉ ꞌdarpʉ xcá tuꞌbe ra Cristo bʉ ja ra pontꞌi, ngue bi ꞌbɛrca man ꞌyomfɛ̨nisɛ. Nɛ gueꞌa ra Cristo i ꞌbʉcua mbo ma mbʉi ya, di bɛ̨ngä a dím ma nɛ ꞌbɛꞌa gätho manꞌda dí øtꞌä. Pɛ gueꞌa nám ꞌbʉcä a ngue thocua tho dí hąngä rá tsꞌɛdi a rá Tsꞌʉntꞌʉ Oją, ngue bi huɛ̨gä a nɛ bi un rá te nanguecä.
\v 21 Nɛ nugä hin te dím mangä ngue säti thoho bi duꞌa ra Cristo. Pɛ nuꞌbʉ xtí hogahʉ ʉ yʉ́n tꞌɛ̨di Oją, säti thoho bi duꞌa ra Cristo ꞌbʉ.
\c 3
\s Hinga gueꞌʉ yʉn tꞌɛ̨di ín ꞌdajʉ rá Hogandąhi Oją ʉ
\p
\v 1 Nuꞌahʉ ma zʉ cu ahʉ, ngue guí ꞌbʉhmbʉ bʉ ra häi Galacia, hanja gnán ꞌyąmbʉihʉ, toꞌo bi hyä ahʉ ngue hin gui ꞌyøthʉ a majuąni. Nguetho rá mbʉdi gá ꞌyøhmbʉ xʉn ho ꞌbɛꞌa nam bønꞌa í duꞌa ra Jesucristo.
\v 2 Pɛ damim bɛ̨mhbʉ ya ndaꞌa ín ꞌdajʉ rá Hogandąhi Oją a, ha gueꞌʉ yʉ́n tꞌɛ̨di Oją bi man ra Moisés, uague gueꞌbʉ má ɛ̨cꞌyɛihʉ bi du ra Cristo nangue ma tsꞌoquihʉ.
\v 3 Nɛ ya gá dʉhmbʉ gán ꞌyohʉ rá Hogandąhi Oją nangue gá ꞌyɛ̨cꞌyɛihʉ ra Cristo. Ha guí ɛ̨na gui hyɛhmbʉ a, nɛ guí ɛ̨na gan hoczɛhɛhʉ ya. Hanja gán tontohʉ.
\v 4 Nɛ nangue gätho yʉn ʉnbi gá nuhʉ, ha hin te tsꞌʉ nin ꞌyomfɛ̨ni bi ꞌda ahʉ yʉn ʉnbi. Ndeꞌbʉ gui pąhmbʉ tsꞌʉ ꞌbɛꞌa nam bønꞌʉ yʉn ʉnbi.
\v 5 Pɛ gá ꞌyɛ̨cꞌyɛihʉ ꞌbɛꞌa bi ꞌyøtꞌahʉ ra Cristo, nɛ gueꞌa ín ꞌda ahʉ rá Hogandąhi Oją a, nɛ gueꞌa ní ja ahʉ gui ꞌyøthʉ yʉn tꞌøtꞌe nuįxte, nɛ hinga gueꞌa gní ꞌyøthʉ yʉ́n tꞌɛ̨di yʉ judío.
\v 6 Nu ra Abraham bi ꞌyɛ̨cꞌyɛi a bi xi Oją da ꞌyørpe, nɛ hinꞌyʉ manꞌda ꞌbɛꞌa í tsꞌimanho a.
\v 7 Ndeꞌbʉ gui pąhmbʉ ya ngue gätho yʉ ꞌyɛ̨cꞌyɛi i comhbʉ rán jąpi Oją bin tꞌunꞌna ra Abraham, tenguꞌbʉ njuąntho gätho yʉ́ tꞌʉhni ra Abraham. Nguetho i ɛ̨cꞌyɛi ꞌbɛꞌa bi man Oją tengu ra Abraham.
\v 8 Nu Oją mámꞌbɛtꞌo mi pądi ngue da numanho ʉ gätho toꞌo da ꞌyɛ̨cꞌyɛi ꞌbɛꞌa bi ma, dagueꞌbʉ dyʉ́m bomꞌbɛtohʉ ra Abraham o hinꞌna. Janangueꞌa Oją bi xiꞌa ra Abraham: “Gätho yʉ nde ꞌdahma ꞌdanꞌyo gui comhbʉ ran jąpi ʉ da ꞌyɛ̨cꞌyɛigui tengu i,” bi tꞌɛ̨mpꞌa ra Abraham. 
\v 9 Janangueꞌa gätho toꞌo da hyąntho ram hma nangue ran ho da ꞌyørcahʉ Oją, nꞌdatꞌa ran jąpi ga comhbʉ ra Abraham, nguetho nꞌdatꞌa rá tꞌɛ̨cꞌyɛi dí øthʉ. 
\v 10 Nuꞌʉ gätho ngue i ɛ̨na, jatho da ꞌyøtꞌ yʉn tꞌɛ̨di bi un Oją yʉ judío, gätho da nu rán tsꞌɛmbi Oją ʉ. Nguetho i mam bʉ ja rám Hman Oją: “Nuꞌbʉ gui fɛsthohohʉ a nꞌda ran tꞌɛ̨di, säti thoho ꞌbɛꞌa miꞌda gui ꞌyøthʉ ꞌbʉ, nɛ guextaꞌa gui nuhʉ rán tsꞌɛmbi Oją.”
\v 11 Mfądi ya ngue xínga nꞌda ra jąꞌi sä da zinꞌa Oją nangueꞌa ní ꞌyøtꞌ yʉ́n tꞌɛ̨di yʉ judío. Pɛ tengu i mam bʉ ja rám Hman Oją: “Gätho toꞌo da hyąntho ram hma nangue ran ho da tꞌørpe, nu Oją di hocpa yʉ́ tsꞌoqui, nɛ di un ra temaząi.”
\v 12 Pɛ nu yʉ́n tꞌɛ̨di Oją, guí ɛ̨mhbʉ gui uąspahʉ rá mate Oją ʉ. Pɛ bi ꞌyɛ̨ntho ʉ: “Nuꞌbʉ ꞌbʉi toꞌo da hyätꞌi da ꞌyøtꞌe gätho yʉ́n tꞌøtꞌe yʉn tꞌɛ̨di, dí zin Oją ʉ yʉ́n tꞌɛ̨di ꞌbʉ,” bi ꞌyɛ̨nꞌʉ.
\v 13 Nuꞌa ra Cristo bi yąnjʉ nangue ran tsꞌɛmbi mi ja xcá nuhʉ ngue hin dá jąsꞌhʉ yʉn tꞌɛ̨di. Nguetho bi nu ran tsꞌɛmbi nanguejʉ ꞌbʉ mín zʉpʉ ja ra pontꞌi. Nɛ gueꞌa nam bønꞌa mán tꞌoꞌtꞌi bʉ ja rám Hman Oją: “Da nu rán tsꞌɛmbi Oją a toꞌo din zʉpʉ ja ra za,” mi ɛ̨na.
\v 14 Nangue ꞌbɛꞌa bi ꞌyøtꞌa ra Cristo Jesús, sä ga hąmhbʉ rá Hogandąhi Oją, nangueꞌa dá ɛ̨cꞌyɛihʉ. Nɛ nꞌdatꞌa ran jąpi bi un Oją ra Abraham ngue da comhbʉ yʉ jąꞌi hing yʉ judío, nɛ gätho miꞌda ngue da ꞌyɛ̨cꞌyɛi.
\s Hingui sä yʉn tꞌɛ̨di di tsꞌonba ran hoqui bi ꞌyøtꞌ ra Jesucristo
\p
\v 15 Ma zʉ cu ahʉ, ga xi ahʉ nꞌda ra hmɛpya ya. Tenguꞌbʉ yoho yʉn ꞌyohʉ i hon yʉ testigo da ꞌyøtꞌa nꞌda ran hoqui, nɛ i huspa yʉ́ firma nɛ rá sello ra zɛꞌmi. Njoꞌo manꞌda ran ꞌyohʉ sä di pädi.
\v 16 Nu ran hogui bi ꞌyøtꞌui Oją a ra Abraham nɛ rám bomꞌbɛto. Pɛ nu rám hman Oją him bi ma ngue gätho yʉ́m bomꞌbɛto, pɛ bi ma høntꞌa nꞌdatho, ngue gueꞌa ra Cristo.
\v 17 Nugä ga xi ahʉ ya ꞌbɛꞌa nam bønꞌa dím mangä. Mꞌbɛtꞌo thoho xí ꞌyøtꞌui ran hogui Oją a ra Abraham, nɛ tenguꞌbʉ ya bi firmabi ngue njąmꞌbʉ dim pädi. Nɛ mꞌbɛjua bʉya bi un yʉn tꞌɛ̨di ma mijudíohe, ꞌbʉ ya xí thoqui goho ciɛnto nɛ ꞌdäte ma ꞌdɛtꞌan jɛya. Pɛ hinꞌyʉ yʉ́ tsꞌɛdi ʉ yʉn tꞌɛ̨di ngue di tsꞌonba a ran hogui bi ꞌyøtꞌui Oją ra Abraham.
\v 18 Nɛ nuꞌbʉ da gueꞌʉ yʉn tꞌɛ̨di xtí zinjʉ Oją, pɛ hin xtá manꞌa Oją a ran hogui í hogazɛhɛhʉ Oją ꞌbʉ. Pɛ nuꞌa ran hogui bi mammi Oją a ra Abraham, di untho nangue rá mate zɛhɛ.
\v 19 Pɛ hanja í zänꞌna Oją ʉ yʉn tꞌɛ̨di, gueꞌbʉ ya hinga gueꞌʉ ørcahʉ ran ho ʉ. Pɛ mꞌbɛjua bi man Oją yʉn tꞌɛ̨di, guepʉ da fądi gätho i ja yʉ́ tsꞌoqui yʉ jąꞌi. Pɛ nuꞌʉ yʉ́m ꞌbɛhni Oją mahɛ̨tsꞌi bi xiꞌa ra Moisés ngue di un yʉn tꞌɛ̨di yʉ jąꞌi nɛ hinga guesɛ Oją. Nɛ bi zän Oją din tꞌɛꞌtsꞌ ꞌbʉ bi zøh rám bomꞌbɛto ra Abraham ngue bi ma ba ɛ̨hɛ̨, ngue gueꞌa ra Cristo.
\v 20 Pɛ nu Oją bin yąsɛui ra Abraham ꞌbʉ mí ꞌyøtꞌui ran hogui, njom mi ꞌbäꞌinde nꞌda ra pøngahyą, nɛ him mi ꞌbähmi nꞌda rám ꞌbɛhni mahɛ̨tsꞌi. Nɛ høntꞌa Oją bi ꞌyøtꞌui ran hogui ra Abraham.
\s ꞌBɛꞌa nam bøn ʉ yʉn tꞌɛ̨di
\p
\v 21 Pɛ nuꞌa Oją hingui yoho yʉm hma bi xijʉ. Nuꞌbʉ xcá häthʉ xcá jąsꞌhʉ yʉ́n tꞌøtꞌe ʉ yʉn tꞌɛ̨di, gueꞌʉ xtí ꞌdajʉ ra temaząi ꞌbʉ.
\v 22 Pɛ nu rám Hman Oją i ma ngue gätho yʉ jąꞌi i ja yʉ́ tsꞌoqui. Nɛ gätho toꞌo da ꞌyɛ̨cꞌyɛi ꞌbɛꞌa bi ꞌyøtꞌa ra Jesucristo, da hyąni ꞌbɛꞌa bi man Oją ngue di unni.
\v 23 Nuꞌbʉ hin ní zøcua häi ra Cristo, mí øthe yʉ́n tꞌɛ̨di Oją madí mandagahe xʉn ho, tenguꞌbʉ dyʉ ofädihe. Jagueꞌbʉ mi zøh ra Cristo, dá hąmhbe rá mate bi xogahe.
\v 24 Nɛ nu yʉn tꞌɛ̨di midí mandagahe ꞌbʉ hin ná pąhmbe ra Cristo. Nɛ tengu nꞌda ra tꞌʉhni i pa ma ʉnbi ꞌbʉ hingui ho øtꞌe, pɛ gueꞌʉ dá hąmhbe rá mate ra Cristo di hogahe.
\v 25 Nuya dá däh ma mbʉihʉ ra Cristo, nɛ him man dí homhbʉ ꞌbɛꞌa manꞌda di mandagahʉ.
\v 26 Nguetho gätho bi ꞌyørcahʉ yʉ́ tꞌʉhnigahʉ Oją ꞌbʉ má hąmhbʉ rá mate ra Cristo.
\v 27 Nɛ gätho dán xixyąhʉ nangue dí tɛnhdʉ ra Cristo nɛ ꞌdaꞌangu dím bɛ̨mhbʉ a.
\v 28 Nɛ dí ꞌbʉhmbʉ ra Cristo, janangueꞌa hinga ꞌdahma ꞌdanꞌyo bʉ na nujʉ Oją, dyʉ judíohʉ, o gue dyʉ griegohʉ, o gue dyʉ ꞌyɛ̨hɛ̨hʉ o gue hin dyʉ ꞌyɛ̨hɛ̨hʉ, o gue yʉn ꞌyohʉ, o gue yʉ xisu. Pɛ gätho gahʉ tenguꞌbʉ dí ꞌbʉhmbʉ nꞌdanjąꞌitho bʉ na nu Oją.
\v 29 Nɛ nuꞌbʉ dí ꞌbʉhmbʉ ra Cristo, tenguꞌbʉ nɛ ahʉ gätho bi xąndgahʉ ra Abraham, nɛ sä ga comhbʉ ran hogui bi ꞌyøtꞌui Oją a, nɛ sä ga hąmhbʉ rán jąpi Oją bi ma di unni.
\c 4
\p
\v 1 Nuya dín nde ga xi ahʉ nꞌda ra hmɛpya ꞌbɛꞌa mi ørcahe yʉ́n tꞌɛ̨di Oją ꞌbʉ him mi tįmhbe ran ꞌyomfɛ̨ni. Tenguꞌbʉ nꞌda ra tꞌʉtꞌʉhni da du rá ta, nɛ i ꞌbʉi tenguꞌbʉ nꞌda ra ꞌyɛ̨hɛ̨ bʉ ja rá ngu, madagueꞌbʉ xʉn ngu ꞌbɛꞌa bi zocpa a rá ta.
\v 2 Jatho da mba ma manda asta gueꞌbʉ go bin te ra tꞌʉhni.
\v 3 Nɛ gueꞌa mi øthe a ꞌbʉ hin ná pąhmbe, midí mandagahe ʉ yʉ́n tꞌɛ̨di Oją, gue bi xije ꞌbɛpʉ dán ꞌyohe ua ja ra ximhäi.
\v 4 Pɛ nuꞌbʉ mi zøn ra pa ngue bá pɛnh Oją rá Tsꞌʉntꞌʉ, nɛ bim ꞌbʉi nangue nꞌda ra xisu ngue ma mijudíohe. Nɛ nuꞌa rá Tsꞌʉntꞌʉ Oją bi ꞌyøtꞌ yʉ́n tꞌɛ̨di Oją.
\v 5 Janangueꞌa bi zä bi hyągahʉ gätho yʉ tsꞌoqui dín dupatehʉ nangue hin dá øthʉ yʉn tꞌɛ̨di xʉn ho, nɛ bi zä bʉ bi zinjʉ Oją ngue dyʉ tꞌʉhni gahʉ bʉya.
\v 6 Nɛ nujʉ yʉ́ tꞌʉhnigahʉ Oją, nɛ bá pɛngahʉ a rá Hogandąhi bʉ ja ma mbʉihʉ. Nɛ nangue dí ꞌbʉhmbʉ rá Hogandąhi Oją, sä gam mamhbʉ ngue ma Tahʉ Oją.
\v 7 Nuya guí ꞌbʉhmbʉ ngue yʉ́ tꞌʉhni ahʉ Oją, nɛ hin guí ꞌbʉhmbʉ tengu gyʉ ꞌyɛ̨hɛ̨hʉ. Nɛ nangueꞌa ꞌbɛꞌa bi ꞌyøtꞌa ra Cristo, Oją di ꞌda ahʉ ꞌbɛꞌa gätho i ja, nguetho yʉ́ tꞌʉhni ahʉ.
\s I hądumbʉi ra Pablo nangue yʉ ꞌyɛ̨cꞌyɛi
\p
\v 8 Pɛ nuꞌbʉ hin gní pąhmbʉ Oją majuąni, ngue gueꞌahʉ hing yʉ judío ahʉ, gmín ꞌyɛ̨hɛ̨hʉ yʉ oją ngue him majuąni.
\v 9 Pɛ nu ahʉ ya gá pąhmbʉ Oją, nɛꞌa Oją i pą ahʉ. Ha guím bɛ̨mhbʉ gui hyomhbʉ manꞌda ra ꞌyu mahønꞌa, ngue gan ꞌyɛ̨hɛhʉ yʉ́n tꞌɛ̨di Oją guím bɛ̨nsɛhʉ dí zinꞌahʉ Oją ʉ. Pɛ nu yʉn tꞌɛ̨di hinꞌyʉ yʉ́ tsꞌɛdi ʉ, tengutho a ra ꞌyu gá hyɛhmbʉ mamꞌbɛtꞌo, ꞌbʉ gmí thąndehʉ yʉ oją him majuąni. Pɛ nte manho da ꞌyøtꞌahʉ mahønꞌa ʉ.
\v 10 Pɛ nuya guí ɛ̨mhbʉ i ja yʉ́ tsꞌɛdi ʉ ꞌda yʉ pa, o gueꞌʉ ꞌda yʉ ząna, o gue ꞌda yʉ jɛya.
\v 11 Nugä dra Pablogä, ɛ̨mmɛ dí su nangue ra ꞌbɛfi xtá øtꞌä bʉ guí ꞌbʉhmbʉ, nɛ ꞌbɛꞌa dá xi ahʉ, ɛ̨na gueꞌbʉ nte ní mbatho.
\v 12 Nu ahʉ ma zʉ cu ahʉ, dín nde ahʉ gam ꞌbʉhmbʉ tengugä, nguetho dá ɛꞌtsꞌ yʉn tꞌɛ̨di mi øtꞌä, nɛ dí ꞌbʉcä tengu ahʉ ngue njąmꞌbʉ gá ꞌyøthʉ yʉn tꞌɛ̨di mamꞌbɛtꞌo. Nɛ nuꞌbʉ mám ꞌbʉhmbʉ bʉ, gán numanhojʉ, nte mán tsꞌo gá ꞌyørcahʉ. Masque nɛhya gui ꞌyømanhohʉ na.
\v 13 Pɛ guí pąhmbʉ ngue mi ʉgä, nɛ gueꞌa dá mbagä bʉ. Nɛ nuꞌbʉ mám ꞌbʉhmbʉ bʉ, dá xi ahʉ ran ho maꞌdaꞌyo bʉya.
\v 14 Ɛ̨mmɛ xʉn hɛ̨i ran ʉ mi jagä, pɛ njoꞌo ahʉ gá sanjʉ ngue xʉn ʉgui. Pɛ gätho ahʉ gá sinjʉ xʉn ho, tenguꞌbʉ dram ꞌbɛhni mahɛ̨tsꞌigä, o tenguꞌbʉ da guecä dra Jesucristogä.
\v 15 Ɛ̨mmɛ mi hu ni mbʉihʉ ꞌbʉ má xi ahʉ ram hma. Nɛ nuꞌbʉ ꞌboꞌo xtán zä, xtá hyąh rá dä nɛ xtí ꞌdaqui.
\v 16 Pɛ nuya, ha guí sʉjʉ ya nangue dí xi ahʉ majuąni.
\v 17 Nu yʉ jąꞌi ngue i hä ahʉ, høntho in nde di ꞌuecꞌahʉ nanguecä, nguetho in nde ahʉ go gui numansuhʉ ʉ nɛ gui tɛnhdʉ ʉ.
\v 18 Xʉn ho ngue gui tɛnhdʉ ʉ ꞌda, pɛ gui huanhdʉ toꞌo majuąni im ma xʉn ho, madagueꞌa hinga ꞌdarbʉ dí ꞌbʉhmbʉ.
\v 19 Ma zʉ tꞌʉhni ahʉ nangue ra Cristo, ntsꞌɛdi gá ʉngahʉ, tenguꞌbʉ nꞌda ra xisu ngue hinga nam ꞌbʉh rá tꞌʉhni, ngue xø ga ja ahʉ gam ꞌbʉhmbʉ maꞌdaꞌyo mahønꞌa. Nɛ guextaꞌa ga thoqui ga nu ran ʉnbi, jagueꞌbʉ gá pąhmbʉ xʉn ho a ra Cristo.
\v 20 Xiꞌbʉ di ꞌbʉcä bʉ, nꞌdahma sä dan yąsɛhʉ, nguetho nuua dí ꞌbʉcä hingui sä ga pądi ꞌbɛꞌa guím bɛ̨mhbʉ.
\s Rá hmɛpya ra Agar nɛ ra Sara
\p
\v 21 Nu ahʉ ngue guín nde gui ꞌyøthʉ yʉ́n tꞌɛ̨di ma mijudíohe, ga xi ahʉ ya ꞌbɛꞌa nam bøn ʉ yʉn tꞌɛ̨di.
\v 22 Ntꞌoꞌtꞌi ngue mi ꞌbʉꞌi yoho yʉ́ tsꞌʉntꞌʉ ra Abraham. Nꞌda rá tsꞌʉntꞌʉ ra ꞌyɛ̨hɛ̨ xisu, nɛ nꞌda rá tsꞌʉntꞌʉ a rá xisu zɛhɛ ngue hinga gueꞌa rá ꞌyɛ̨hɛ̨.
\v 23 Nu rá tsꞌʉntꞌʉ ra ꞌyɛ̨hɛ xisu bim ꞌbʉi tengutho ꞌbʉ im man yʉ jąꞌi dim ꞌbʉh yʉ́ tꞌʉhni, pɛ nu rá tsꞌʉntꞌʉ a rá xisu zɛhɛ bim ꞌbʉi nangue rá tsꞌɛdi Oją nguetho ya xí manꞌa Oją ngue dim ꞌbʉi.
\v 24 Nꞌda ra hmɛpya ngue yoho yʉ ꞌyu i hąx yʉ jąꞌi. Nu ra ꞌyɛ̨hɛ xisu ní huti ra Agar, rán tꞌuti ʉ yʉ́n tꞌɛ̨di Oją bin tꞌunꞌna Moisés bʉ ja ra tꞌøhø Sinaí. Nɛ nuꞌʉ to i tɛnꞌndʉ, tenguꞌbʉ yʉ ꞌyɛ̨hɛ ʉ.
\v 25 Nu ra Agar i uh ra hmɛpya nangue ra tꞌøhø Sinaí nubʉ ja ra häi Arabia, nɛ ngutho ra dąhnini Jerusalén ngueꞌa i ja bʉ a ya. Nɛ nu yʉ jąꞌi i ꞌbʉpʉ, i uh ra hmɛpya tenguꞌbʉ yʉ́ ꞌyɛ̨hɛ ʉ yʉ́n tꞌøtꞌe yʉn tꞌɛ̨di ʉ.
\v 26 Pɛ nu ra xisu ngue hing ra ꞌyɛ̨hɛ i uh ra hmɛpya nguepʉ mahɛ̨tsꞌi, ra hnini Jerusalén maꞌdaꞌyo. Nɛ njongui pa ma manda bʉ nangue yʉn tꞌɛ̨di. Nɛ nujʉ dyʉ́ mɛnguhʉ bʉ.
\v 27 Ntꞌoꞌtꞌi bʉ ja rám hman Oją:
\q Gan johya gra xisu ngue hing ra ꞌyɛ̨hɛ, madagueꞌbʉ hinga nam ꞌbʉh ni tꞌʉhni.
\q Ntsꞌɛdi gan yą nangue nin johya, gueꞌe hin gana nu ran ʉnbi.
\q Nguetho dim ꞌbʉh miꞌda ni tꞌʉhni ngue yʉ́ tꞌʉhni Oją, ɛ̨mme xtán ngu, xinda gueꞌa ra ꞌyɛ̨hɛ xisu ngue i tįn yʉ́ tꞌʉhni nangue bi mansɛ tengu yʉ jąꞌi. 
\m
\v 28 Ma zʉ cu ahʉ, nuya dí øthʉ tengu ra Isaac rá tsꞌʉntꞌʉ ra Abraham, ngue Oją bi ma dim ꞌbʉi. Nguetho yʉ́ tꞌʉhnigahʉ Oją tengu bi ma.
\v 29 Pɛ nu manꞌda ra tsꞌʉntꞌʉ ngue bim ꞌbʉi nangue bi mansɛ tengu man yʉ jąꞌi, bi zʉꞌa ra tsꞌʉntꞌʉ ngue bim ꞌbʉi nangue rá tsꞌɛdi a rá Hogandąhi Oją, tengutho in ja ya.
\v 30 Im mam bʉ ja rám hman Oją; “Dami ꞌyɛthʉ ra ꞌyɛ̨hɛ xisu nɛꞌa rá tꞌʉhni, nguetho hin da gonhui ꞌbɛꞌa i ja rá tsꞌʉntꞌʉ ra xisu ngue hing ra ꞌyɛ̨hɛ.”
\v 31 Gui pąhmbʉ ya, ma zʉ cu ahʉ, ngue hin dyʉ tꞌʉhni gahʉ ra ꞌyɛ̨hɛ xisu. Pɛ tenguꞌbʉ dyʉ tꞌʉhnigahʉ ra xisu ngue hing ra ꞌyɛ̨hɛ.
\c 5
\s Hin dan ꞌyɛ̨hɛhʉ yʉn tꞌɛ̨di mahønꞌa
\p
\v 1 Nuꞌa ra Cristo bi yąnjʉ bʉ min ꞌyɛ̨hɛhʉ mamꞌbɛtꞌo, ngue ya him man dan ꞌyɛ̨hɛhʉ bʉ. Pɛ damin ząmhbʉ bʉ hapʉ bi mbäpꞌahʉ ra Cristo, nɛ ꞌyo gadín umhbʉ gan ꞌyɛ̨hɛhʉ mahønꞌa.
\v 2 Dami ꞌyøhmbʉ ya ꞌbɛꞌa dí xi ahʉ, nugä dra Pablogä. Nuꞌbʉ gui ꞌyɛ̨na gui ꞌyøthʉ ꞌda yʉn tꞌɛ̨di ngue gui hyɛc ni xifanihʉ, nuꞌa ra Cristo hin da zä da ꞌyøtꞌahʉ nꞌda ran ho a ꞌbʉ.
\v 3 Dín nde ga xi ahʉ mahønꞌa. Nuꞌbʉ gui dʉꞌmi gui ꞌyøthʉ yʉ́n tꞌɛ̨di ma mijudíohe, jatho gätho gui ꞌyøthʉ, nguetho hinga xøtꞌa nꞌdatho gui ꞌyøthʉ.
\v 4 Nuꞌbʉ ꞌbʉ i ꞌda ahʉ ɛ̨na ngue ja yʉ́ tsꞌɛdi ʉ yʉn tꞌɛ̨di di hocꞌa ni mbʉihʉ ngue da zimanho ahʉ Oją, pɛ ya gá hyɛhmbʉ ra Cristo ꞌbʉ, nɛ gá ꞌuehmbʉ bʉ ja rán huɛ̨cate Oją bʉya.
\v 5 Pɛ nu rá Hogandąhi Oją dá hąmhbʉ ꞌbʉ má pąhmbʉ majuąni ra Cristo, gueꞌa dí ꞌyɛ̨njʉ xʉn hojʉ Oją a, nɛ gueꞌa ná tømhbʉ da zinjʉ xʉn ho.
\v 6 Nɛ nuꞌbʉ dí ꞌbʉhmbʉ ra Cristo, madagueꞌbʉ da mba nthɛqui ma xifanihʉ o hinꞌna, hin te di muui. Pɛ manꞌda hnɛhi thoho ga simhbʉ xʉn ho ma mbʉihʉ a ra Cristo, nɛ gueꞌa dí jajʉ ga øthʉ ran huɛ̨cate a.
\v 7 Pɛ nuꞌbʉ rá mbʉdi thoho, ɛ̨mmɛ gmí ꞌyohʉ xʉn ho bʉ ja rá ꞌyu Oją. Toꞌo bi ząmpꞌahʉ ngue hin guí øthʉ ra ꞌbɛfi majuąni.
\v 8 Him bi ząmpꞌahʉ Oją, nguetho guesɛ Oją bi zonꞌnahʉ gan ꞌyohʉ bʉ ja rá ꞌyu.
\v 9 Nuꞌbʉ guí ꞌbʉhmbʉ nꞌda in nde di tsꞌonꞌna nin ꞌyomfɛ̨nihʉ, ꞌda xni tsꞌonꞌnatho ni mbʉihʉ ꞌbʉ, tenguthoho ꞌbʉ rá íxi ra thuhmɛ i sinni gätho ra jʉni.
\v 10 Nugä dí hąxa njuąni ngue ma Hmuhʉ Oją di ja ahʉ ꞌdaꞌangu gam bɛ̨mhbʉ. Nɛ toꞌo i ꞌbʉpʉ ngue in nde di tsꞌonꞌna nin ꞌyomfɛ̨nihʉ, da nu rán tsꞌɛmbi Oją a, høntꞌa go toꞌo.
\v 11 Nuꞌbʉ guextaꞌa dí xicä yʉ jąꞌi, jatho gui ꞌyøthʉ yʉ́n tꞌɛ̨di ma mijudíohe, hin din nugä ran ʉcpi ꞌbʉ. Pɛ guextaꞌa i pa ma ʉguigä nguetho dím mangä, jatho gui ꞌyɛ̨cꞌyɛihʉ a ra Cristo, ngue bi du bʉ ja ra pontꞌi nangue ma tsꞌoquihʉ.
\v 12 Nuꞌa toꞌo in nde da hyɛcꞌa ni xifanihʉ, manꞌda xʉn ho ꞌbʉ da ꞌuetho ʉ.
\v 13 Nguetho nu ahʉ, ma zʉ cu ahʉ, Oją bi ja ahʉ bi thøcꞌahʉ yʉn tꞌɛ̨di, nɛ bi zonꞌnahʉ in nde ahʉ gan ꞌyɛ̨hɛhʉ nꞌda ngu nꞌda ahʉ nangue ran huɛ̨cate. Nɛ hínguin nde ahʉ gui ꞌyøthʉ ni pähä zɛhɛhʉ.
\v 14 Pɛ tenguꞌbʉ dá jąsꞌhʉ gätho yʉ́n tꞌɛ̨di Oją ꞌbʉ dan huɛ̨jʉ nꞌda ngu nꞌdajʉ tengu bʉ nan huɛ̨csɛhʉ.
\v 15 Pɛ gan jamansuhʉ, xøhma tsꞌʉrpʉ thoho gam ꞌbɛsɛhʉ ꞌbʉ gan sʉhmbʉ nꞌda ngu nꞌda ahʉ, nɛ gan täthʉ.
\s Gam bɛ̨mhbʉ rá Hogandąhi Oją
\p
\v 16 Pɛ guehna dí xi ahʉ na ya. Dami ꞌyøthʉ a di bɛ̨nꞌnahʉ rá Hogandąhi Oją, nɛ gueꞌa gní ꞌyɛsꞌhʉ gní ꞌyørpa rá pähäzɛhɛ ni jąꞌihʉ bʉya.
\v 17 Nguetho nín ꞌyomfɛ̨nisɛ nꞌda, hinga gueꞌa im man rá Hogandąhi Oją a, nɛ nu rá Hogandąhi Oją hinga ꞌdaꞌanguui ní pähäzɛhɛ nꞌda, nɛ din sʉhmi ʉ. Nɛ nu rá Hogandąhi Oją hin di jajʉ ga øthʉ ꞌbɛꞌa in nde ma tsꞌon ꞌyomfɛ̨nihʉ. 
\v 18 Nɛ nuꞌbʉ gueꞌa rá Hogandąhi Oją dí tɛnhdʉ, di zɛrca ma mbʉihʉ, janangueꞌa hin da zä da sijʉ dá fɛstahʉ yʉ́n tꞌɛ̨di Oją.
\v 19 Gätho mfądi ꞌbɛꞌa nín tꞌøtꞌe nꞌda ꞌbʉ øzɛhɛ ꞌbɛꞌa in nde ní jąꞌi nꞌda. Ngue i øtꞌ ran ꞌyomtꞌɛ̨ni, nɛ ran tsꞌomꞌbäi, nɛ ra tsꞌonꞌyomfɛ̨ni,
\v 20 nɛ i thąnde yʉ za o gue yʉ hmite, nɛ i øtꞌ yʉn jąxtøni, nɛ i øtꞌ yʉn sʉi, nɛ i øtꞌ ran tsꞌɛya, nɛ in cuɛ, nɛ i øtꞌa i numanhosɛ, nɛ i øtꞌ yʉn heque, nɛ i nde nꞌdanni din ꞌyo, 
\v 21 nɛ i siyate, nɛ i hote, nɛ mihni, nɛ di munsꞌ pʉ ja yʉ ngo ngue da ꞌyøtꞌ yʉ tsꞌoqui, nɛ nꞌdanꞌyo thoho i øtꞌe. Nɛ dí xi ahʉ mahønꞌa tengu dá xi ahʉ, ngue nuꞌʉ toꞌo øtꞌ ya, hin nan säui da yʉrpʉ di manda rá tsꞌɛdi Oją.
\v 22 Pɛ nuꞌa rá Hogandąhi Oją di jajʉ ga øthʉ ran huɛ̨cate, nɛ ran johya, nɛ ní hyu ma mbʉihʉ a, nɛ hin dan xømbʉihʉ, nɛ ga øthʉ ra yembʉi, nɛ ran hocjąꞌi, nɛ ga jąsꞌhʉ dí mamhbʉ, 
\v 23 nɛ hin ga sämanꞌʉhʉ, nɛ ga sąmzɛhɛ ma mbʉihʉ. Nɛ nuꞌbʉ ga øthʉ ya, hinꞌyʉ nꞌda ran tꞌɛ̨di da zä dí zʉjʉ ꞌbʉ.
\v 24 Nɛ nuꞌa toꞌo in ꞌyoui a ra Cristo, tenguꞌbʉ xí guarpʉ ja ra pontꞌi a rá tsꞌonꞌyomfɛ̨ni zɛhɛ, ngue him man di manda a rá pähä zɛhɛ nɛ gätho ꞌbɛꞌa mí nde rá jąꞌi.
\v 25 Pɛ nuꞌbʉ dí ꞌbʉhmbʉ rá Hogandąhi Oją, jatho ga jafʉ di mandagahʉ ꞌbɛꞌa gätho dí øthʉ ꞌbʉ.
\v 26 Pɛ ndeꞌbʉ hin dan ꞌyɛ̨zɛhɛhʉ, janangueꞌa hin ga bɛ̨nbahʉ ʉ miꞌda ngue da nde da ꞌyøtꞌe tenguꞌʉ ꞌda bin ꞌyɛ̨tsꞌi.
\c 6
\s Dam fäxhʉ nꞌda ngu nꞌdajʉ
\p
\v 1 Ma zʉ cu ahʉ, nuꞌbʉ ꞌbʉꞌa nꞌda ahʉ bi dąng bʉ ja ran tsꞌo, pɛ nuꞌahʉ gue guextaꞌa guím bɛ̨mhbʉ rá Hogandąhi Oją, janate tho guin zohmbʉ a, gui zɛhmbʉ da mbeng bʉ ja rá ꞌyu Oją, guim bɛ̨mhbʉ nɛꞌahʉ hinꞌyʉ ni tsꞌɛdihʉ, tsꞌʉrpʉ thoho nɛ ahʉ gui tąnjʉ ꞌbʉ da tsꞌä ahʉ.
\v 2 Nɛ nuꞌbʉ guí comhbʉ ni dumbʉihʉ, guí øthʉ rán tꞌɛ̨di ra Cristo ꞌbʉ.
\v 3 Pɛ nuꞌbʉ ꞌbʉꞌa nꞌda ahʉ din ꞌyɛ̨zɛhɛ, nɛ hinꞌyʉ ꞌbɛꞌa pądi, din hyäzɛhɛ ꞌbʉ.
\v 4 Nɛ hinga gueꞌa nan johyahʉ ngue gam bɛ̨mhbʉ xʉn ho ma ꞌbɛfihʉ xinda gue miꞌda. Pɛ ga ørpamasu ma ꞌbɛfihʉ ngue ga øthʉ xʉn ho, nɛ gueꞌa dán johyahʉ a bʉya.
\v 5 Pɛ nꞌda ngu nꞌda ahʉ jatho gui ꞌyøzɛhɛhʉ ꞌbɛꞌa go ní ꞌbɛfi di ꞌda ahʉ Oją, ngue ni ꞌbɛfizɛhɛhʉ.
\v 6 Nu ahʉ ngue i sänꞌnahʉ ran ho maꞌdaꞌyo, ndeꞌbʉ gui fäxhʉ ni xänbatehʉ gätho ꞌbɛꞌa i honi, janangueꞌa ꞌda xtám fäxtahʉ.
\v 7 O guím bɛ̨mhbʉ gui nuhʉ ran ho ꞌbʉ guí øthʉ ran tsꞌo, nguetho guidín hyäzɛhɛhʉ ꞌbʉ guím bɛ̨mhbʉ a, nɛ hingui sä ga häthʉ Oją. Tenguꞌbʉ ga tuhmbʉ yʉ hmudä. Nuꞌbʉ dá tuhmbʉ a xʉn ho, xʉn ho a din ja bʉya, pɛ nuꞌbʉ ga tuhmbʉ a hingui ho, hingui ho din ja bʉya.
\v 8 Nuꞌbʉ ꞌbʉi toꞌo i øtꞌe ngue i numanhosɛ rá jąꞌizɛhɛ, xmá mba di ꞌbɛh ra temaząi ꞌbʉ. Pɛ toꞌo ꞌbʉi nangue rá pähä rá Hogandąhi Oją, nuꞌa din tꞌun ra temaząi.
\v 9 Ndeꞌbʉ hin dan xømbʉihʉ ngue ga øthʉ ran ho, nguetho da zøn ra pa da hnurca ma ꞌbɛfihʉ ꞌbʉ hin da güentꞌ ma mbʉihʉ.
\v 10 Janangueꞌa jantꞌa thoho ga ørpahʉ ran ho gätho ma mijąꞌihʉ a ra ora ngue da zä ga ørpahʉ. Nɛ manꞌda gam bɛ̨mhbʉ ga ørpahʉ ran ho ʉ ma cuhʉ nangue ra Cristo.
\s Manꞌda ran zofo, nɛ ran zɛngua ran zɛgui
\p
\v 11 Guín nuhʉ ya yʉ tꞌohni xʉn ndoho dá oꞌtꞌäzɛhɛ.
\v 12 Nuꞌʉ toꞌo in nde di ꞌbɛpꞌahʉ ngue gui hyɛc ni xifanihʉ, pɛ høntꞌa in nde dí numanho yʉ jąꞌi. I su xtá nu ran ʉnbi ꞌbʉ xtá ma, høntꞌa ra Cristo í hogahʉ ꞌbʉ mí du bʉ ja ra pontꞌi nangue ma tsꞌoquihʉ.
\v 13 Nuꞌʉ toꞌo im ma ngue da thɛcꞌa ni xifanihʉ, pɛ nde høntꞌa dí yątꞌa gui tɛnhdʉ, gueꞌbʉ da zä di ꞌbɛpꞌahʉ gui hyɛc ni xifanihʉ. Nɛ hingui øtꞌe gätho yʉn tꞌɛ̨di.
\v 14 Pɛ nugä hin dín nde dá yątꞌa dí øzɛhɛ. Pɛ høntꞌa nán johyagä a í du bʉ ja ra pontꞌi ma Hmuhʉ ra Jesucristo. Nɛ nugä tenguꞌbʉ ꞌdarbʉ dá tuꞌbe ra Cristo, tenguꞌbʉ dá tugä ua ja ra ximhäi, ngue hin dí øtꞌä yʉ́n tꞌøtꞌe a. Nɛ nu yʉ́n tꞌøtꞌe ra ximhäi, hin te rán jaui a ꞌbɛꞌa dí øtꞌä.
\v 15 Pɛ nuꞌʉ in ꞌyohʉ ra Cristo, hin te di muui ꞌbʉ nthɛqui o hinꞌna, pɛ manꞌda di muui ngue i ja ra temaꞌdaꞌyo.
\v 16 Nɛ dí äp Oją da hyurpa yʉ́ mbʉi, nɛ di un rán johya ʉ gätho toꞌo i ꞌyo ra ꞌyu dí xi ahʉ, nguetho gueꞌʉ majuąni yʉ́ tꞌʉhni Oją ʉ.
\v 17 Nu yʉ pa dí mba bʉ ya, o ɛ̨mmɛ gadí ʉngahʉ ma mbʉi, nguetho i ja yʉ mbɛdi ma jąꞌi hapʉ bi tsꞌɛgui, nangue dán ꞌyɛ̨hɛgä ra Hmu Jesús.
\v 18 Ma zʉ cu ahʉ, dami cohmbʉ rá mate ma Hmuhʉ ra Jesucristo. Nɛ høntꞌa dí xi ahʉ a ya.