\id EPH
\h EFESIOS
\toc1 EFESIOS
\mt1 EFESIOS
\mt2 Nu ra søcuą bi ꞌyorba ra Pablo ʉ yʉ ꞌyɛ̨cꞌyɛi bʉ ra dąhnini Éfeso
\c 1
\s Ran zɛngua
\p
\v 1 Nugä drá Pablogä, nangue rá pähä Oją ma ꞌbäigäꞌbe ra Jesucristo. Nuꞌahʉ gyʉ́ ꞌyɛ̨cꞌyɛihʉ bʉ ja ra hnini Éfeso, dí otꞌahʉ na ra søcuą. Nɛ gätho gyʉ mbɛti ahʉ Oją nangue guí ɛ̨cꞌyɛihʉ ra Cristo Jesús.
\v 2 Dí äp Oją ma Tahʉ di ꞌda ahʉ rán jąpi, nɛ rán johya da hyutꞌa ni mbʉihʉ, nɛ ma Hmuhʉ ra Jesucristo.
\s Oją di jącuahʉ nangue dín ꞌyohʉ ra Cristo
\p
\v 3 Dí ɛ̨spahʉ Oją, nuꞌa rá Ta ma Hmuhʉ ra Jesucristo. Nɛ nangue a dín ꞌyohʉ ra Cristo, nuꞌa Oją bi jącuahʉ nangue gätho yʉ́n jąpi i ja bʉ mahɛ̨tsꞌi.
\v 4 Nu Oją bi huangahʉ nangue ra Cristo nuꞌbʉ ma hinꞌyʉ ra ximhäi, nguetho in ndejʉ hin din ja ma tsꞌoquihʉ, nɛ xtán hotho ma mbʉihʉ bʉ na nu Oją.
\v 5 Nɛ nangue rá pähä Oją ya xʉ huangahʉ, nɛ nangue ra Jesucristo bi jajʉ ngue dyʉ́ tꞌʉhnigahʉ Oją. Nɛ gueꞌa bi ꞌyøtꞌe nguetho bi huɛ̨gahʉ.
\v 6 Janangueꞌa ząi dí ɛ̨spahʉ Oją, nguetho ɛ̨mmɛ xʉn ngu rán huɛ̨ cate bi ꞌyørcahʉ ꞌdarbʉ dí ꞌ bʉhmbʉ a rá Tsꞌʉntꞌʉ di huɛ̨qui. Nɛ gueꞌa rán jąpi bi ꞌdajʉ ꞌbʉ má däh ma mbʉihʉ a rá Tsꞌʉntꞌʉ.
\v 7 Ngue ɛ̨mmɛ bi huɛ̨gahʉ Oją, nɛ gueꞌa í du a rá Tsꞌʉntꞌʉ bi pøjʉ, bi nde bi punga ma tsꞌoquihʉ.
\v 8 Nɛ ɛ̨mmɛ xʉn ngu rán huɛ̨cate Oją, ngue bi jajʉ dá pąhmbʉ a rá ꞌyu, nɛ bi ꞌdajʉ rán ꞌyomfɛ̨ni xʉn ho.
\v 9 Pɛ bi jajʉ Oją dá pąhmbʉ ꞌbɛꞌa mán tꞌągui, ngue ꞌbɛꞌa mím bɛ̨nsɛ da ꞌyøtꞌe ngue da ꞌyøtꞌa ra Cristo.
\v 10 Nguetho da zøn ra pa di juaꞌa ꞌbɛꞌa mim bɛ̨n Oją da ꞌyøtꞌe, ngue di jap ra Cristo di manda gätho ja ua ja ra häi nɛpʉ mahɛ̨tsꞌi.
\v 11 Nuꞌa Oją i øtꞌe ꞌbɛꞌa gätho mim bɛ̨ni da ꞌyøtꞌe, nɛ bi huangahʉ mayaꞌbʉ ngue dan ꞌyohʉ ra Cristo. Nɛ nangueꞌa dín ꞌyohʉ ra Cristo, sä ga hąmhbʉ yʉ́n jąpi di ꞌdajʉ a.
\v 12 Gueꞌa bi zän Oją nanguejʉ, janangueꞌa da tꞌɛ̨spa Oją ꞌbʉ bi hnu a ran ho da ꞌyørcahʉ. Nɛ guecähe yʉ́ mbʉdigähe dá ɛ̨cꞌyɛihe ra Cristo, nɛ yʉ́ mbʉdigähe bi ꞌyørcahe a.
\v 13 Nɛ ahʉ, nuꞌbʉ gmí ꞌyøhmbʉ rán ho maꞌdaꞌyo ra Cristo di pøjʉ, gue ram hma majuąni a, gá ꞌyɛ̨cꞌyɛihʉ a. Nɛ nuꞌbʉ gmí ꞌyɛ̨cꞌyɛihʉ, nɛ ahʉ gá hyąmhbʉ rá Hogandąhi Oją, ra hmɛpya ngue yʉ́ mbɛti ahʉ Oją, tengu xí ma. 
\v 14 Nu rá Hogandąhi i udi ngue majuąni ga hąmhbʉ rán tꞌunni di ꞌdajʉ Oją ꞌbʉ bi zøn ra pa da zixcahʉ bʉ mahɛ̨tsꞌi, gätho gahʉ ngue yʉ́ mbɛtigahʉ a. Gueꞌa ná ɛ̨spahʉ nuįxte thoho a.
\s Nu ra Pablo i äp Oją di un ran ꞌyomfɛ̨ni xʉn ho yʉ ꞌyɛ̨cꞌyɛi
\p
\v 15 Nɛ nuꞌbʉ má øcä ngue guí ɛ̨cꞌyɛihʉ a ra Hmu Jesús, nɛ i ja ahʉ ran huɛ̨cate nangue ni miꞌyɛ̨cꞌyɛihʉ, dán yąꞌbe Oją,
\v 16 nɛ ząi dí xi Oją i hu ma mbʉi ngue di huɛ̨cꞌahʉ, nɛ ząi dí äpä rám fätsꞌi nangue ahʉ.
\v 17 Nɛ nuꞌa ra Ta nuįxte thoho, gueꞌa rá Oją ma Hmuhʉ ra Jesucristo, dí äpꞌahʉ ran ꞌyomfɛ̨ni manꞌda gui pąhmbʉ xʉn ho a.
\v 18 Nɛ dí äpꞌa Oją ngue manꞌda da xocꞌa nin ꞌyomfɛ̨nihʉ, ngue gui pąhmbʉ a ran ho nuįxte guí tøhmbʉ, ngue gueꞌa í zonꞌnahʉ gui comhbʉ a. Nɛ gui pąhmbʉ ngue ɛ̨mmɛ nuįxte thoho di muui ꞌbɛꞌa di ꞌda ahʉ Oją gätho ʉ toꞌo yʉ́ mbɛti a.
\v 19 Nɛ dí äp Oją gui pąhmbʉ ɛ̨mmɛ xʉn ndoho rá tsꞌɛdi rá Hogandąhi hin hapʉ nín zɛgui, ngue dim pɛpʉ mbo ma mbʉihʉ, gätho gahʉ dí ɛ̨cꞌyɛihʉ.
\v 20 Nɛ nꞌdatꞌa rá tsꞌɛdi ngue ɛ̨mmɛ sɛ a dim pɛpʉ mbo ma mbʉihʉ, gueꞌa bá xoxꞌa ra Cristo bʉ ꞌbʉ ʉ xʉn du, nɛ bi japi ngue da hyupʉ ja rán ꞌyɛi Oją bʉ mahɛ̨tsꞌi.
\v 21 Nɛ nuꞌa ra Cristo bin tꞌun manꞌda ra tsꞌɛdi xinda gueꞌʉ toꞌo gätho ja yʉ́ tsꞌɛdi bʉ mahɛ̨tsꞌi nɛcua ja ra häi, o gue yʉ tsꞌʉtꞌabi, o gue yʉ ngʉrbi, o gueꞌʉ miꞌda di manda. Nɛ hingui sä nꞌda da ndønba nꞌda ra thuhu da tꞌɛ̨mbi i ja manꞌda rá tsꞌɛdi gue i ꞌbʉhya o gue yʉ pa dí ꞌyɛ̨pʉ.
\v 22 Nɛ gätho ꞌbɛꞌa i ja Oją bi japꞌa ra Cristo ngue gätho di manda. Nɛ bi japꞌa ra Cristo ngue di manda gätho yʉ ꞌyɛ̨cꞌyɛi, nguetho tengu ꞌbʉ ma yąhʉ a di mandagahʉ.
\v 23 Nɛ nu yʉ ꞌyɛ̨cꞌyɛi i ꞌbʉi tengu ꞌbʉ rá jąꞌi ra Cristo. Nɛ dí comhbʉ ꞌbɛꞌa gätho i ja ra Cristo. Nɛ nu rá tsꞌɛdi í yuꞌa ꞌbɛꞌa gä øzɛhɛ ua ja ra häi, nɛpʉ mahɛ̨tsꞌi.
\c 2
\s Dám pøhmbʉ nangue rán huɛ̨cate Oją
\p
\v 1 Nɛ mamꞌbɛtꞌo tengutho ꞌbʉ xtá tuhʉ nangue ma tsꞌoquihʉ, nguetho him mi ørpahʉ masu a ran ho mi sijʉ. Pɛ nuya nu Oją bi ꞌdajʉ ra temaząi nangue ra Cristo.
\v 2 Nɛ nuꞌahʉ nuꞌbʉ hin gmí ꞌyɛ̨cꞌyɛihʉ, gmí tɛnhdʉ yʉ́n tꞌøtꞌe ra ximhäi, nɛ madí manda ahʉ rá hmu yʉ zįthu, tengutho yʉ pa ja bʉ ya, gätho toꞌo hingui ørpa masu Oją, nɛ hingui øtꞌe ꞌbɛꞌa nde Oją.
\v 3 Nɛ gätho gähe ꞌdaꞌangu tho mi øthʉ ꞌbʉ mamꞌbɛtꞌo, nɛ mi tɛnhdʉ ꞌbɛꞌa min nde ma jąꞌi zɛhɛhʉ. Nɛ dá øtꞌ ma pähä zɛhɛhʉ. Nɛ nuꞌbʉ xcá thoqui xcá tɛnhdʉ, ɛ̨mmɛ xcá nuhʉ rá cuɛ Oją ꞌbʉ, tengu tho ʉ miꞌda.
\v 4 Pɛ nuꞌa Oją ɛ̨mmɛ xʉn ngu rá yembʉi i ja, nɛ ɛ̨mmɛ i ja rán huɛ̨cate nanguejʉ.
\v 5 Janangueꞌa bi ꞌdajʉ ra ꞌdaꞌyote, tengu ꞌbʉ ꞌdarbʉ bi xoxgahʉ ra Cristo, madagueꞌbʉ tengu ꞌbʉ ya xí du ma tehʉ nangue ma tsꞌoquihʉ. Pɛ nangue rá mate thoho Oją xtám pøhmbʉ.
\v 6 Nɛ nuꞌa Oją nꞌdatꞌa bi xoxgahʉ ra Cristo Jesús, nɛ bi jajʉ ꞌdarbʉ dá huhmbʉ a ra Cristo bʉ mahɛ̨tsꞌi bʉ nam bɛ̨n Oją.
\v 7 Guehna bi ꞌyøtꞌe, ngue gätho yʉ pa maząi da ꞌyuh rán huɛ̨cate, nɛ da fądi hin hapʉ sɛ a rá mate bi ꞌyørcahʉ ꞌbʉ mí yąnjʉ ra Cristo Jesús.
\v 8 Bi pøjʉ Oją ꞌbʉ má hąmhbʉ rá mate thoho Oją, nɛ hin nangue yʉ hogantꞌøtꞌe dá øthʉ. Pɛ nangue a rán tꞌunni zɛhɛ Oją xtám pøhmbʉ.
\v 9 Nɛ hin nangue ra ꞌbɛfi xʉn ho xtá øthʉ, janangueꞌa njon da zä din ꞌyɛ̨tsꞌi.
\v 10 Nguetho bi ꞌyørca zɛhɛhʉ Oją ngue dám ꞌbʉhmbʉ maꞌdaꞌyo nangue ra Cristo Jesús, guepʉ da zä ga øthʉ xʉn ho rá ꞌbɛfi bi zän Oją mayaꞌbʉ.
\s Nu ra Cristo bi jajʉ dán yąmanhohʉ dyʉ judíohe nɛꞌahʉ
\p
\v 11 Nɛ nu ahʉ ngue hin gyʉ́ judíoꞌahʉ, o gadín ꞌyɛ̨xhʉ nangue rá mate Oją, pɛ damim bɛ̨mhbʉ ngue yatho gnán hyajʉ Oją mamꞌbɛtꞌo. Nɛ nte má hmɛpya gmí øthʉ tengu mí øtꞌähe ngue dá hɛc ma xifanihe dyʉ́ judíohe. Nɛ gueꞌa ná hutꞌa thohohe gyʉ ꞌyąnthɛquihʉ.
\v 12 Nɛ nuꞌʉ yʉ pa ʉ, hin te nin jahʉ ra Cristo, xín te nin jahʉ ʉ yʉ judío. Nɛ hin gní pąhmbʉ ran hogui ngue mi man Oją da ꞌyøtꞌe. Pɛ gám ꞌbʉhmbʉ ua ja ra ximhäi nɛ nte gmí tømhbʉ ꞌbɛꞌa da ꞌyøtꞌ Oją, nguetho hin gní pąhmbʉ Oją.
\v 13 Nɛ gmí ꞌyo man hɛ̨thʉ nangue a Oją, pɛ nuya bá jʉnꞌnahʉ, nɛ sä guin ꞌyohʉ ra Cristo ngue bi du nanguejʉ.
\v 14 Pɛ nuꞌa ra Cristo bi jajʉ dán yąmanhohʉ, dyʉ judíohe nɛ ahʉ ngue hin gyʉ́ judíohʉ. Nɛ bi jajʉ ngue ꞌdaꞌangu bʉ na nujʉ Oją yʉ judío nɛꞌʉ hing yʉ judío. Nuꞌa ra Cristo bi hogahʉ ꞌbɛꞌa madín hyajʉ.
\v 15 Nguetho bi du ra Cristo, nɛ gueꞌa í jua ʉ yʉ́n tꞌɛ̨di yʉ judío bi xi Oją, ngue yʉn tꞌuti mi øtꞌʉ. Nɛ bi japi ngue ꞌdaꞌangu ga comhbʉ ra temaząi yʉ judío nɛꞌʉ hing yʉ judío, nangue maꞌdaꞌyo dí ꞌbʉhmbʉ ra Cristo ya, nɛ hinga ꞌdahma ꞌdanꞌyo bʉ dán nujʉ Oją. Janangueꞌa hin dadín sʉhmbʉ ya.
\v 16 Nɛ nuꞌbʉ mi du bʉ ja ra pontꞌi ra Cristo, bi japi da numanho Oją ʉ høntꞌa go toꞌo ma jąꞌi da ꞌyɛ̨cꞌyɛi a, madagueꞌa yʉ judío, uague hing yʉ judío. Nɛ him man sʉhmbʉ ʉ.
\v 17 Nuꞌa ra Cristo bi zøcua ja ra häi nɛ bi xijʉ ran ho maꞌdaꞌyo, ngueꞌa dá ɛshʉ ran sʉi mi øthʉ a Oją, guecähe dyʉ judíohe ngue mi hänthe rá ꞌyu Oją, nɛ ahʉ ngue hing yʉ judíoꞌahʉ ngue gmin ꞌyomanhɛ̨tho nangue rá ꞌyu Oją.
\v 18 Nɛ gueꞌa ra Cristo bi zä dán yąmanhohʉ Oją rá Ta, nguetho nꞌdatꞌa rá Hogandąhi bi ꞌdajʉ, madagueꞌbʉ dyʉ judíohʉ o gue hin dyʉ judíohʉ.
\v 19 Pɛ nuya hin guí ꞌbʉhmbʉ tengu ꞌbʉ gyʉ́ ꞌdamhninihʉ ya, pɛ ꞌdaꞌangugdahʉ ngue dyʉ ꞌyɛ̨cꞌyɛihʉ. Nguetho nuya gätho gahʉ dyʉ mɛnguhʉ bʉ bí ꞌbʉ Oją, nɛ gätho gahʉ yʉ́ tꞌʉhni gahʉ Oją.
\v 20 Nɛ nujʉ dyʉ ꞌyɛ̨cꞌyɛihʉ, tengu ꞌbʉ nꞌda ra ngu bi thøe nguepʉ dim ꞌbʉ Oją. Nɛ bi dʉꞌmi bi hyøh yʉ pøngahyą mayaꞌbʉ, nɛꞌʉ yʉ́ ꞌbäihʉ ra Cristo nuꞌbʉ mi ma nangue ra Cristo. Nɛ bi dʉꞌmi tengu ꞌbʉ i pa mꞌbäꞌmi yʉ́ guangujądo nꞌda ra ngu, nɛ guesɛ a ra Jesucristo a ra do mahyoni bim pɛpʉ. Nɛ guenjʉ tengu ꞌbʉ dyʉ føꞌtꞌehʉ bʉya.
\v 21 Nɛ nuꞌa ra Cristo tengu ꞌbʉ ra cemento nín zøtꞌʉ yʉ do bʉ pa nthøtsꞌe a ra ngu, ngue da gomanho, asta gueꞌbʉ go bi guadi xʉn ho, guepʉ ja rá ngu Oją, tengu ndesɛ Oją.
\v 22 Nɛ nangue dín ꞌyohʉ ra Cristo, nɛjʉ tengu ꞌbʉ dyʉ dohʉ ngue dim pɛpʉ ja a rá ngu Oją, guepʉ i ꞌbʉh rá Hogandąhi.
\c 3
\s Nu ra Pablo rá ꞌbɛfi i xih ran ho maꞌdaꞌyo ʉ hing yʉ judío
\p
\v 1 Janangueꞌa dí äpä rá tsꞌɛdi Oją nangue ahʉ, drá Pablogä. Pɛ dí ofädigä nangue dí xi ahʉ ran ho maꞌdaꞌyo, gue ahʉ ngue hing yʉ judíoꞌahʉ.
\v 2 Masque ya gá ꞌyøhmbʉ ngue Oją bi ꞌdacä ra ꞌbɛfi ngue dí xi ahʉ rám hma, nangue rá mate thoho.
\v 3 Nugä ya dá otꞌahʉ tsꞌʉ ꞌbɛꞌa bi ꞌyurcäzɛhɛ Oją, ngue njom mi pądi, ngue nɛ ʉ hing yʉ judío da zin Oją nangue ra Cristo.
\v 4 Nɛ nuꞌbʉ gá nuhʉ ra søcuą, sä gui pąhmbʉ a bi xicä Oją ngue njom mi pądi nangue ra Cristo.
\v 5 Nɛ xʉn ngu yʉ jɛya bi thogui ngue him mi xi Oją yʉ jąꞌi ꞌbɛꞌa mim bɛ̨ni da ꞌyøtꞌe. Pɛ nuya bi ꞌuega ma mbʉihe gueje ma ꞌbäigähe ra Cristo nɛ ʉ yʉ́ pøngahyą, nɛ bi jaje rá Hogandąhi ga pąhmbe ꞌbɛꞌa him mam fądi, ngue i fąh ya.
\v 6 Pɛ nuna him mam fądi, guehna ngue ran ho maꞌdaꞌyo sä gui pąhmbʉ ya ꞌbɛꞌa i ja ua ya, ngue nɛꞌʉ yʉ jąꞌi hing yʉ judío sä dim ꞌbʉhmbʉ Oją tengutho yʉ judío. Nɛ nꞌdatꞌa gui comhbʉ yʉ judío ran hogui bi ꞌyøtꞌ Oją nangue ra Cristo Jesús. Nɛ nꞌdanjąꞌitho gui comhbʉ nangue rá jąꞌi ra Cristo, nguetho ya gá ꞌyɛ̨cꞌyɛihʉ rán ho maꞌdaꞌyo ra Cristo.
\v 7 Pɛ nangue rá mate zɛhɛ nɛ rá tsꞌɛdi Oją sä gam mangä rán ho maꞌdaꞌyo ra Cristo, madagueꞌa him man ꞌyɛnigäꞌbe.
\v 8 Nugä hin te tsꞌʉ dadí muꞌbe, nɛ him man ꞌyɛniꞌbe ngue ga xih yʉ jąꞌi ngue hing yʉ judío rán ho maꞌdaꞌyo ra Cristo. Pɛ guehma bi ꞌdacä Oją ra mate ngue gam mangä a, nɛ ga xih yʉ jąꞌi njon da hyätꞌi da mbede hangu nan ngu yʉn ho in nde di ꞌdajʉ ra Cristo. 
\v 9 Nɛ bi ꞌdac rá ꞌbɛfi ga japi gätho yʉ jąꞌi da bądi ꞌbɛꞌa him mam fądi, ngue ꞌbɛꞌa mím bɛ̨n Oją da ꞌyøtꞌe ꞌbʉ rá mbʉdi thoho, ngue nɛꞌʉ hing yʉ judío da zin Oją ꞌbʉ da hyąn rá mate ra Cristo. Nɛ gueꞌa mi sänni da ꞌyøtꞌ Oją, nꞌdatꞌa Oją bi ꞌyøtꞌe ꞌbɛꞌa gätho ja ua ja ra ximhäi, nɛpʉ mahɛ̨tsꞌi.
\v 10 Gueꞌa mím bɛ̨n Oją da ꞌyørpa yʉ ꞌyɛ̨cꞌyɛi, guepʉ da fądi xʉn ho gätho rá hoganꞌyomfɛ̨ni, da bą ʉ i ꞌbʉpʉ mahɛ̨tsꞌi ngue i ja yʉ́ tsꞌɛdi.
\v 11 Nɛ gueꞌa i øtꞌ Oją ya, tengu mim bɛ̨m ꞌbʉ ra mbʉdi thoho da ꞌyøtꞌe, nangue ma Hmuhʉ ra Jesucristo, nɛ da ꞌyøtꞌe gätho yʉ pa maząi.
\v 12 Nɛ nangue dí ɛ̨cꞌyɛihʉ ra Cristo, hin dí su ga sømhbʉ bʉ nangue ma mbʉihʉ ngue dan yąhʉ Oją. Nɛ dí pąhmbʉ da ꞌyøde.
\v 13 Janangueꞌa dí äꞌahʉ ra mate hin da du ni mbʉihʉ ꞌbʉ dín nugä ran ʉnbi, nangueꞌa dá xi ahʉ ran ho maꞌdaꞌyo. Xingui tsꞌʉ guim bɛ̨mhbʉ ngueꞌa dín nugä ran ʉnbi, pɛ ꞌda dán johya thohohʉ ngue bin ꞌdac ra tsꞌɛdi ga hätꞌ yʉn ʉnbi.
\s Rán huɛ̨cate ra Cristo
\p
\v 14 Nuꞌbʉ dím bɛ̨ngä ngue nɛ ahʉ gyʉ mɛnguhʉ bʉ bí ꞌbʉ Oją, dín dąnyahmu dí äpꞌahʉ ra jamadi Oją rá Ta ma Hmuhʉ ra Jesucristo.
\v 15 Nɛ rá Ta ʉ gätho yʉ ꞌyɛ̨cꞌyɛi, nɛꞌʉ bi zøm bʉ mahɛ̨tsꞌi, nɛꞌʉ ꞌbʉtua ja ra ximhäi.
\v 16 Nɛ dí äp Oją ma Tahʉ nuįxte thoho di muui rá tsꞌɛdi, ngue di zac ni mbʉihʉ nangue rá tsꞌɛdi rá Hogandąhi Oją.
\v 17 Nɛ dí äp Oją ngue din ząm bʉ mbo ni mbʉihʉ a ra Cristo, nguetho guí ɛ̨cꞌyɛihʉ a. Nɛ dí äp Oją ngue manꞌda din te nin huɛ̨catehʉ, nɛ nangue nin huɛ̨catehʉ dí zac ni mbʉihʉ.
\v 18 Janangueꞌa nɛ ahʉ nɛ gätho miꞌda yʉ ꞌyɛ̨cꞌyɛi da zä gui pąhmbʉ hangu nan uantꞌi, nɛ hangu na mba, nɛ hangu nan hɛ̨, nɛ hangu nan hɛ̨tsꞌi a rán huɛ̨cate ra Cristo. 
\v 19 Nɛ madagueꞌbʉ hingui sä gätho ga pąhmbʉ rán huɛ̨cate ra Cristo nguetho ɛ̨mmɛ xʉn ngu, pɛ dí äp Oją ngue manꞌda manꞌda gui pąhmbʉ a, janangueꞌa da zä gätho da yuh ni mbʉihʉ a rá tsꞌɛdi zɛhɛ Oją.
\v 20 Pɛ xʉn ho ga ɛ̨spahʉ Oją gätho yʉ pa maząi, nguetho i ja rá tsꞌɛdi da ꞌyøtꞌe xʉn ngu manꞌda, xinda gueꞌa ꞌbɛꞌa dí ähmbʉ o ꞌbɛꞌa dím bɛ̨mhbʉ. Ngue nꞌdatꞌa ra tsꞌɛdi dim pɛpʉ mbo ma mbʉihʉ.
\v 21 Nɛ gätho gahʉ dyʉ ꞌyɛ̨cꞌyɛihʉ, xʉn ho dan johyahʉ ga ɛ̨spahʉ Oją, nangueꞌa ra Cristo Jesús dí pąhmbʉ, hønꞌbʉ go njąmꞌbʉ maząi. Nɛ høntꞌa gam bɛ̨mhbʉ a ya.
\c 4
\s Nu rá Hogandąhi Oją di jajʉ nꞌdatꞌa gam bɛ̨mhbʉ
\p
\v 1 Nugä drá Pablogä dí ofädigä nangue dí øtꞌa rá ꞌbɛfi ra Hmu. Nɛ dí äꞌahʉ ra mate ngue gam ꞌbʉmanhohʉ tengu nin sähʉ ngue ya bi zonꞌnahʉ Oją.
\v 2 Nɛ hin gan ꞌyɛ̨xhʉ, pɛ gui ꞌyøthʉ ngue hinꞌyʉ ni tsꞌɛdi zɛhɛhʉ, nɛ hin gan xømbʉi nꞌda ngu nꞌda ahʉ ꞌbɛꞌa i tꞌøtꞌahʉ, nɛ hin gan xuhnanyahʉ nꞌda ngu nꞌda ahʉ, pɛ gan huɛ̨jʉ.
\v 3 Nɛ ɛ̨mmɛ gan jamansuhʉ ngue hinga ꞌdahma ꞌdanꞌyo guim bɛ̨mhbʉ. Pɛ dami thoqui gui tɛnhdʉ rá Hogandąhi Oją di ja ahʉ nꞌdatꞌa guim bɛ̨mhbʉ.
\v 4 Nguetho tengu ꞌbʉ gätho nꞌdanjąꞌidähʉ bʉ na nujʉ Oją dyʉ ꞌyɛ̨cꞌyɛihʉ, nɛ nꞌdatꞌa rá Hogandąhi Oją dí comhbʉ. Nɛ nꞌdatꞌa dí tømhbʉ ꞌbɛꞌa da ꞌyørcahʉ Oją, ngue gätho bi zongahʉ.
\v 5 Høntꞌa nꞌda ma Hmuhʉ i ꞌbʉi ngue di mandagahʉ. Nɛ nꞌdatꞌa ma tꞌɛ̨cꞌyɛihʉ nangue ma Ojąhʉ i ꞌbʉi, nɛ nꞌdatꞌa man xixyąhʉ dí øthʉ, ngue dí uhmbʉ yʉ́ mbɛtigahʉ Oją.
\v 6 Nɛ nꞌdatꞌa Oją gueꞌa ma Tahʉ dí comhbʉ, ngue gätho gahʉ, nɛ gätho di mandagahʉ, nɛ gätho di ꞌyonjʉ, nɛ gätho gahʉ i ꞌbʉpʉ mbo ma mbʉihʉ a.
\v 7 Nuꞌa ra Cristo, nangue ra mate thoho, ꞌdahmaꞌdanꞌyo yʉ tsꞌɛdi bi ꞌdajʉ nꞌda ngu nꞌdajʉ ngue sä ga øthʉ ra ꞌbɛfi ngue ndejʉ ga øthʉ.
\v 8 Nɛ gueꞌa mán tꞌoꞌtꞌi bʉ ja rám hman Oją mayaꞌbʉ: “Pɛ gueꞌa ra Cristo bi un yʉ́ tsꞌɛdi ʉ yʉ jąꞌi ꞌbʉ mí mbeng bʉ mahɛ̨tsꞌi, ꞌbʉ mi dąmbɛ̨ni. Nɛ bi ꞌbɛrba rá tsꞌɛdi gätho nan ngu ran tsꞌo mim bɛntꞌʉ yʉ jąꞌi.”
\v 9 Nɛ nuꞌbʉ mi mbeng bʉ mahɛ̨tsꞌi, mfądi ngue guepʉ bá nɛxpʉ, nɛ bi zøcua ja ra häi, nɛ bi mba ntꞌägui.
\v 10 Guetꞌa bá cąi, nɛ guetꞌa bi ndex mahɛ̨tsꞌi, ngue da yuꞌtsꞌ rá tsꞌɛdi bʉ mahɛ̨tsꞌi, nɛ hønbʉ go hapʉ, nɛcua ja ra häi bi yuꞌtsꞌ rá tsꞌɛdi.
\v 11 Nɛ ꞌdahma ꞌdanꞌyo yʉ tsꞌɛdi bin ꞌdajʉ nꞌda ngu nꞌdajʉ ngue dyʉ ꞌyɛ̨cꞌyɛihʉ. Bin ꞌdac ma tsꞌɛdihe ꞌdagähe ngue ma ꞌbäigähe ra Cristo, nɛ ꞌda ahʉ di jaꞌahʉ gam pøngahyąhʉ, nɛ miꞌda ahʉ di ja ahʉ gadí ꞌyomhbʉ a ran ho maꞌdaꞌyo, nɛ ꞌda ahʉ di ja ahʉ gam mbädihʉ, nɛ miꞌda ahʉ di ja ahʉ ngue gan xänbatehʉ nangue rám hman Oją.
\v 12 Ngubʉ bi ꞌyøtꞌa ra Cristo, bi un yʉ́ tsꞌɛdi yʉ ꞌyɛ̨cꞌyɛi, nguepʉ da zä da ꞌyøtꞌe xʉn ho ra ꞌbɛfi bi zänbi nꞌda ngu nꞌda, nangue rá ꞌbɛfi Oją. Janangueꞌa da zä ꞌda dám fäxtahʉ. Nɛ gueꞌa dín te rá ꞌbɛfi Oją a, tengu ꞌbʉ bi zac rá jąꞌi ra Cristo.
\v 13 Nɛ da zøni ngue gätho ꞌdatꞌa gam bɛ̨mhbʉ nangue ma tꞌɛ̨cꞌyɛihʉ, nɛ gätho nꞌdatꞌa ga pąhmbʉ xʉn ho rá Tsꞌʉntꞌʉ Oją. Nɛ gueꞌa dín te xʉn ho ma mbʉihʉ nɛ dam ꞌbʉmanhohʉ tengu ra Cristo.
\v 14 Nɛ nuꞌbʉ gueꞌa dí homhbʉ, hin da thäjʉ tengu ꞌbʉ dyʉ tꞌʉhnihʉ, ꞌbʉ ꞌboꞌo ꞌdahma ꞌdanꞌyo da xijʉ ngue da ꞌyɛ̨na da hyäjʉ. Nguetho nuꞌʉ yʉ hyäte ɛ̨na gueꞌbʉ ɛ̨mmɛ pądi, pɛ høntꞌa in ndejʉ ga tɛnhdʉ yʉ́ fɛhni.
\v 15-16 Pɛ ga pądi ga tɛnhdʉ a majuąni nangue ran huɛ̨cate. Nɛ gueꞌa nán te xʉn ho ma mbʉihʉ, nɛ di jajʉ tengu ꞌbʉ nꞌdanjąꞌi tho ga cohmbʉ. Tengu ꞌbʉ rá jąꞌigahʉ ra Cristo, nɛ nuꞌa ra Cristo, tengu ꞌbʉ rá yą a. Nɛ gueꞌa nín zøtꞌʉ yʉ ꞌyɛ̨cꞌyɛi. Nguetho di manda gahʉ nɛ di zɛrca ma mbʉihʉ, di jajʉ nꞌdatꞌa gam bɛ̨mhbʉ, nɛ gätho ga comhmaꞌøtꞌehʉ xʉn ho ra ꞌbɛfi bi ꞌdajʉ nꞌda ngu nꞌdajʉ, ngue ꞌda dám fäxtahʉ, nangue ran huɛ̨cate. Nɛ gueꞌa nán te xʉn ho rá ꞌbɛfi Oją, tengu ꞌbʉ bin te xʉn ho rá jąꞌi ra Cristo. 
\s Dám ꞌbʉhmbʉ maꞌdaꞌyo nangue ra Cristo
\p
\v 17 Nugä dra Pablogä dím pøngahyągä nangue ra Hmu ꞌbʉ dí xi ahʉ na jaua, ngue nuꞌahʉ him mam ꞌbʉhmbʉ ya tengu ʉ yʉ jąꞌi hinga na pą Oją. Nɛ him mam ꞌbʉhmbʉ tengu yʉ jąꞌi ngue di manda yʉ́ tsꞌonꞌyomfɛ̨ni zɛhɛ.
\v 18 Nɛ nuꞌʉ i ꞌyo tengu nꞌda ra xädä nangue yʉ́n ꞌyomfɛ̨ni, nɛ hingui pądi ꞌbɛꞌa nam bønꞌa i øtꞌe nguetho hingui ꞌyo bʉ ja rán nɛqui Oją. Nɛ hinguin nde da bą Oją nguetho ɛ̨mmɛ xʉm mɛ yʉ́ mbʉi ʉ.
\v 19 Nɛ hingui pɛꞌtsꞌ yʉ́ sä ꞌbʉ øt yʉ tsꞌoqui, nguetho ya xʉm bɛnt ran tsꞌo, nɛ ɛ̨mmɛ di ho da ꞌyøtꞌe høntꞌa go ꞌbɛꞌa man tsꞌo, nguetho hinꞌyʉ mbo yʉ́ mbʉi ꞌbɛꞌa di zɛdi ngue da ząmmi.
\v 20 Pɛ nuꞌehʉ hinga ngubʉ bi xänꞌnahʉ ʉ bi xiꞌahʉ nangue ra Cristo.
\v 21 Ya gá ꞌyøhmbʉ nangue ra Cristo, nɛ nuꞌbʉ majuąni gá ꞌyøhmbʉ ꞌbɛꞌa bi xi ahʉ, guí pąhmbʉ ya ngue gueꞌa majuąni a.
\v 22 Janangueꞌa dami hyɛhmbʉ gätho ꞌbɛꞌa gnám ꞌbʉhmbʉ, ngue ni nyonꞌyomfɛ̨nisɛhʉ i hä ahʉ, ngue ꞌbɛꞌa guí ndesɛ gui ꞌyøthʉ.
\v 23 Nɛ maꞌdaꞌyo ni mbʉihʉ nɛ nin ꞌyomfɛ̨nihʉ, ngue gätho maꞌdaꞌyo guim bɛ̨mhbʉ ya.
\v 24 Nɛ dami hyehʉ ngue gätho maꞌdaꞌyo tengu bi zänꞌnahʉ Oją nangue rá pähä zɛhɛ. Nuya dami ꞌyuhmbʉ ram ꞌbʉi njuąntho gui ꞌyøthʉ, ngue nte man tsꞌo gui ꞌyøthʉ ya.
\v 25 Dami ꞌyɛshʉ a ra fɛhni ngue madín xihmbʉ nꞌda ngu nꞌda ahʉ, nɛ guim mamhbʉ a majuąni. Nguetho tengu ꞌbʉ nꞌdanjąꞌitho dí comhbʉ ra Cristo.
\v 26 Nɛ nuꞌbʉ guín cuɛhʉ nangue ran tsꞌo i tꞌøtꞌe, pɛ damím fähmbʉ, mamán dą ahʉ ran tsꞌo. Nɛ hinga nꞌdapa gan cuɛhʉ.
\v 27 Pɛ xingui tsꞌʉ ga cʉthʉ ra zįthu bʉ ja ma mbʉihʉ.
\v 28 Nuꞌbʉ guím pɛ̨hʉ ꞌda ahʉ, pɛ gui ꞌyɛshʉ a gnám pɛ̨hʉ. Nɛ gam pɛhmbʉ xʉn ho, nɛ gueꞌa gdí tįmhbʉ a guí homhbʉ, nɛ da zä gui fäxꞌʉ miꞌda ngue hinꞌyʉ ꞌbɛꞌa da hyoni.
\v 29 Nɛ ꞌyo guím mamhbʉ yʉ tsꞌore, pɛ guim mamhbʉ ran ho dí zɛꞌʉ nɛ dí hyu yʉ́ mbʉi ʉ toꞌo gui xihmbʉ.
\v 30 Nɛ ꞌyo gadí unhdʉ ra dumbʉi a rá Hogandąhi Oją nangue nꞌda ra tsꞌoqui. Nguetho nuꞌa i ꞌbʉpʉ mbo ma mbʉihʉ, nɛ gueꞌa da ꞌyudi ngue yʉ́ mbɛtigahʉ Oją ꞌbʉ rán zɛgui ra pa, tengu ꞌbʉ jajʉ ra sello.
\v 31 Dami ꞌyɛshʉ a gní bɛ̨manꞌʉhʉ, nɛ hin gan cuɛhʉ ꞌbʉ ja ꞌbɛꞌa da si ahʉ o ja ꞌbɛꞌa da tꞌøtꞌahʉ. Nɛ ꞌyo gadí cꞌąmanꞌʉhʉ nꞌda ngu nꞌda ahʉ, nɛ o guím bɛ̨mhbʉ ran tsꞌo nangue ni mijąꞌihʉ.
\v 32 Pɛ gan ꞌyørpahʉ ran ho nꞌda ngu nꞌda ahʉ, nɛ ꞌda xtán ja ni yembʉihʉ, nɛ gam punbahʉ nꞌda ngu nꞌda ahʉ, tengu tho í punꞌnahʉ Oją nangue ra Cristo.
\c 5
\s Da ꞌyøtꞌe xʉn ho ʉ yʉ́ tꞌʉhni Oją
\p
\v 1 Ga øthʉ ꞌbɛꞌa øtꞌa Oją, nguetho yʉ́ tꞌʉhni gahʉ a ngue di huɛ̨gahʉ.
\v 2 Ngue ga ørpahʉ ran huɛ̨cate ma mijąꞌihʉ, tengutho ra Cristo bi huɛ̨gahʉ ꞌbʉ mín däsɛ bʉ ja ra pontꞌi nanguejʉ. Nɛ nu ra Cristo bi un rá te, nꞌda ran tꞌunni ngue bi numanho Oją.
\v 3 Nɛ yʉ́ tꞌʉhni gahʉ Oją, janangueꞌa xingui tsꞌʉ gam bɛ̨mhbʉ ran tsꞌo, hin ga øthʉ ran ꞌyomtꞌɛ̨ni, xíng ran tsꞌiyate, nɛ xínga nꞌda ran tsꞌo ga øthʉ.
\v 4 Nɛ hin gam mamhbʉ ra tsꞌore o gue ran ꞌyąntꞌʉ, nɛ hin dan yą mangątꞌihʉ, nguetho hin rán thɛui rá ꞌyɛ̨cꞌyɛi Oją ʉ. Pɛ ga xihmbʉ Oją jamadi nangue rán ho bi ꞌdajʉ.
\v 5 Pɛ dí pąhmbʉ hingui sä nꞌda da yʉrpʉ di manda ra Cristo nɛ Oją, nuꞌbʉ i øthoho ran ꞌyomtꞌɛ̨ni, o gue im bɛ̨n ra tsꞌonꞌyomfɛ̨ni, o gue i øtꞌ ran tsꞌiyate. Nguetho nu ra ziyate tengutho ꞌbʉ i thąnde ꞌbɛꞌa i ja.
\v 6 Nɛ njon ga jafʉ da hyäjʉ gueꞌbʉ ꞌboꞌo da xijʉ ngue xʉn ho ꞌbʉ ga øthʉ ran tsꞌo. Nguetho toꞌo da ꞌyøtꞌ ya yʉn tsꞌo, ɛ̨mmɛ xʉn ngu da nu rá cuɛ Oją, nangue a him bi ꞌyørpa masu Oją.
\v 7 Pɛ hin dan ꞌyohʉ toꞌo i øtꞌ ran tsꞌo, nguetho hinꞌyʉ ꞌbɛꞌa man jahʉ ʉ.
\v 8 Pɛ nuꞌahʉ mamꞌbɛtꞌo gmí ꞌyohʉ bʉ ja ra ꞌbɛxui. Pɛ nangue guí ꞌbʉhmbʉ ra Cristo ya guí ꞌbʉhmbʉ bʉ ja rán nɛqui a. Nuya dąmam ꞌbʉhmbʉ tengu rán säui bʉ ja ran nɛqui.
\v 9 Nɛ nuꞌa rán nɛqui Oją, gueꞌa dán jahʉ ra hogambʉi a, nɛ gueꞌa dám mamhbʉ majuąni a, nɛ gueꞌa dá øthʉ ran ho a.
\v 10 Nɛ dami hyumbi gan xähmbʉ gui ꞌyøthʉ ꞌbɛꞌa dí hyu rá mbʉi Oją.
\v 11 Pɛ xíngui tsꞌʉ ga øthʉ tengu øtꞌʉ i ꞌyo bʉ ja ra ꞌbɛxui. Pɛ ga uhmbʉ ngue nte ní mbatho ꞌbɛꞌa øtꞌʉ.
\v 12 Pɛ ga pɛꞌtsꞌ ma sähʉ hin gam mamhbʉ ꞌbɛꞌa øtꞌʉ i øtꞌ mán tꞌąguitho ran tsꞌo.
\v 13 Pɛ nuꞌa rán nɛqui Oją di yotꞌʉ toꞌo i ꞌyo bʉ ja ra ꞌbɛxui, ndepe da bądi ngue i ja yʉ́ tsꞌoqui. Nɛ hingui sä da ꞌyąn mantꞌągui thoho nꞌda ꞌbɛꞌa øtꞌe, nguetho nuꞌa rán nɛqui Oją di yotꞌʉ gätho ran tsꞌo.
\v 14 Janangueꞌa ntꞌoꞌtꞌi: “Daman nuhmbʉ ngue guí ąhmbʉ, tengu ꞌbʉ gyʉ́ duhʉ, nguetho nuꞌa ra Cristo di ꞌda ahʉ ran nɛqui,” bi ꞌyɛ̨na.
\v 15 Janangueꞌa dami jamansu ꞌbɛꞌa guí øthʉ, nɛ hin gam ꞌbʉhmbʉ tengu ʉ yʉ jąꞌi ngue hingui pądi ꞌbɛꞌa øtꞌe.
\v 16 Pɛ madagueꞌa xʉn hɛ̨i yʉ pa i ja bʉ ya, dami hyumbi gam pɛhmbʉ xʉn ho.
\v 17 ꞌYo guí coꞌyąmbʉihʉ, pɛ dami hyumbi gui hyoni gui pąhmbʉ rá pähä ra Hmu.
\v 18 Pɛ hin dán johyahʉ a ra sɛ̨i, nguetho di tsꞌongahʉ a. Pɛ manꞌda dán johyahʉ rá Hogandąhi Oją. 
\v 19 Nɛ ꞌda dán johyabahʉ nꞌda ngu nꞌdajʉ ngue dan xihmbʉ ꞌbɛꞌa i ørcahʉ ra Hmu, ngue dan tuhmbʉ yʉ́ thuhu Oją gätho ma mbʉihʉ dá ɛ̨spahʉ Oją a.
\v 20 Nɛ thocua thoho ga xihmbʉ jamadi Oją ra Ta, nangue ꞌbɛꞌa gätho jajʉ, nangue rá thuhu ma Hmuhʉ ra Jesucristo.
\s Dim ꞌbʉmanho yʉ ꞌyɛ̨cꞌyɛi bʉ ja yʉ́n ngusɛ
\p
\v 21 Nɛ hin dan junthʉ, pɛ ꞌda xtán ꞌyɛ̨hɛ thohohʉ, nguetho gätho gahʉ dín numansuhʉ ra Cristo.
\v 22 Nɛ nu ahʉ gyʉ́ xisuhʉ, dami ꞌyøthʉ ꞌbɛꞌa im man ni ndøhʉ, tengutho bʉ gní ꞌyøthʉ a im mam ma Hmuhʉ mahɛ̨tsꞌi.
\v 23 Nguetho nuꞌʉ yʉn ꞌyohʉ i ꞌbɛtꞌo bʉ ja rá ngu, tengu a ra Cristo i ꞌbɛtꞌo bʉ ꞌbʉh yʉ ꞌyɛ̨cꞌyɛi, ngue tengu ꞌbʉ guesɛ a rá jąꞌi a, nɛ rám pørpate gätho ʉ.
\v 24 Nuꞌʉ yʉ xisu da ꞌyøtꞌe ꞌbɛꞌa gätho im man yʉ́ ndø, tengu tho yʉ ꞌyɛ̨cꞌyɛi da ꞌyøtꞌe ꞌbɛꞌa gätho im man ra Cristo.
\v 25 Nɛ nu ahʉ ma minꞌyohʉ ahʉ, dami huɛ̨c ni xisuhʉ, tengu tho a ra Cristo bi huɛ̨c yʉ ꞌyɛ̨cꞌyɛi, nɛ bi un rá te nanguejʉ.
\v 26 Nɛ nu a ra Cristo ngubʉ bi ꞌyøtꞌe, nuꞌbʉ mi japi da bo xʉn ho gätho yʉ ꞌyɛ̨cꞌyɛi nangue rám hman Oją. Nguetho ram hma tengu ꞌbʉ ra dehe i peꞌtꞌe gätho ran tsꞌo. Nɛ nuꞌa ran xixyą, nꞌda ra hmɛpya ngue ra Cristo bi hoga ma mbʉihʉ.
\v 27 Nꞌdamhma da zin ʉ yʉ ꞌyɛ̨cꞌyɛi, ngue ya gätho mahoqui, nɛ nte man tsꞌo din ꞌyohʉ. Nɛ hinꞌyʉ ꞌbɛꞌa da thįnbi, pɛgue gätho i jua a ran ho.
\v 28 Nɛ gätho yʉn ꞌyohʉ, ndeꞌbʉ di huɛ̨c yʉ́ xisu, tengu bʉ ní huɛ̨c rá jąꞌizɛhɛ. Nguetho nuꞌʉ toꞌo di huɛ̨c rá xisu, din huɛ̨c zɛhɛ a.
\v 29 Nɛ xinga nꞌda ra jąꞌi i san rá jąꞌizɛhɛ, pɛ din jamansu, nɛ i ꞌuįni xʉn ho rá jąꞌi, tengutho i øtꞌa ra Cristo nangue yʉ ꞌyɛ̨cꞌyɛi.
\v 30 Nguetho nujʉ dyʉ ꞌyɛ̨cꞌyɛihʉ, tengu ꞌbʉ rá ngøcꞌyɛi nɛ rá doꞌyo gahʉ a rá jąꞌi ra Cristo.
\v 31 Tengu mán tꞌoꞌtꞌi: “Nuꞌbʉ nꞌda ran ꞌyohʉ i sin rá xisu, i soh rá ta nɛ rá mbe, nꞌdamhma da zä di manda rá xisu, tengu ꞌbʉ ɛ rá jąꞌizɛhɛ,” bi ꞌyɛ̨nꞌa ra tꞌohni.
\v 32 Nɛ xʉn hɛ̨i da bądi ꞌbɛꞌa nam bøn na, pɛ dí ɛ̨ngä drá Pablogä, ngue i udi nangue ra Cristo nɛ nangue yʉ ꞌyɛ̨cꞌyɛi.
\v 33 Pɛ nɛ im ma, gätho ahʉ ngue gyʉn ꞌyohʉhʉ, dami huɛ̨c ni xisuhʉ tengu bʉ gní huɛ̨c zɛhɛhʉ. Nɛ nuꞌahʉ gyʉ xisuhʉ damin numansu ni ndøhʉ.
\c 6
\p
\v 1 Nuꞌahʉ gyʉ tꞌʉhnihʉ gyʉ ꞌyɛ̨cꞌyɛihʉ dami ꞌyøthʉ ꞌbɛꞌa man ni tahʉ ni mbehʉ, nguetho gueꞌa yʉ́n thɛhʉ a ngue gui ꞌyøthʉ.
\v 2 Dami numansu ni tahʉ nɛ ni mbehʉ. Nɛ gueꞌa rá mbʉdi a rán tꞌɛ̨di Oją ngue ní jąp Oją nꞌda a, ngue bi ma mayaꞌbʉ.
\v 3 Nɛ guehna ran jąpi bi ma da nu nꞌda ꞌbʉ da ꞌyøtꞌe, ngue din ja ran johya nɛ xʉn ngu yʉ pa dim ꞌbʉcua ja ra häi.
\v 4 Nɛ nu ahʉ gyʉ́ tahʉ, nuꞌbʉ guí sʉh ni tꞌʉhnihʉ, ndeꞌbʉ hin gui jafʉ din cuɛtho. Pɛ dami temanhohʉ guepʉ dí ꞌyɛ̨cꞌyɛi ra Hmu ʉ.
\v 5 Nɛ nu ahʉ gyʉ mbɛfihʉ nɛ gyʉ ꞌyɛ̨hɛ̨hʉ, dami ꞌyøthʉ xʉn ho ꞌbɛꞌa im man ni hmuhʉ ua ja ra häi, nɛ guin numansuhʉ ʉ, nɛ gui suhʉ. Nɛ mpähä thoho gui ꞌyøthʉ ni ꞌbɛfihʉ, tengutho bʉ gní ꞌyørpahʉ rá ꞌbɛfi ni Hmuhʉ ra Cristo.
\v 6 Dami ꞌyøthʉ xʉn ho ni ꞌbɛfihʉ, hinga hønꞌbʉ in nu ahʉ ni hmuhʉ, pɛ dami ꞌyøthʉ tengutho bʉ gnín ꞌyɛ̨hɛhʉ ra Cristo. Nɛ gätho ni mbʉihʉ, nɛ gueꞌa rá pähä Oją a bʉya.
\v 7 Dami ꞌyøtꞌ ni ꞌbɛfihʉ nangue ran johya, tengu bʉ gní ꞌyøthʉ rá ꞌbɛfi ni Hmuhʉ mahɛ̨tsꞌi, nɛ hinga høntꞌa dín numanho ahʉ yʉ jąꞌi.
\v 8 Nɛ damim bɛ̨mhbʉ ya, Oją di cosꞌahʉ ran ho nangue ran ho xcá ꞌyøthʉ, madagueꞌa gyʉ ꞌyɛ̨hɛhʉ o gue gyʉ hmuhʉ.
\v 9 Nɛ nu ahʉ gyʉ hmuhʉ, pɛ gui ꞌyørpahʉ a xʉn ho ʉ ni mbɛfihʉ, o gue ni ꞌyɛ̨hɛhʉ, tengu tho bʉ gní ndepe da ꞌyøtꞌahʉ ran ho. Nɛ hin gui xihmbʉ yʉn ʉnbi, nguetho guí pąhmbʉ ngue nꞌdatꞌa ni Hmuhʉ mahɛ̨tsꞌi. Nɛ nu a ra Hmu mahɛ̨tsꞌi hin di hyɛspʉ na nujʉ.
\s Di zɛrca ma mbʉihʉ rá tsꞌɛdi Oją tengu rá he ra dofʉi
\p
\v 10 Nɛ nuya ma zʉ cu ahʉ, ga zacua ma mbʉihʉ nangue rá tsꞌɛdi Oją i jajʉ.
\v 11 Ngue tengu nꞌda ra dofʉi i he rá he ngue ra tꞌɛgui ní täcua yʉ́n są ʉ yʉ́n sʉihʉ. Nɛ ngutho rá tsꞌɛdi Oją ꞌbʉ dí homhbʉ ngue hin da zä da hyäjʉ ra zįthu.
\v 12 Nguetho hinga gueꞌʉ yʉ jąꞌi man sʉihʉ, pɛ gueꞌʉ yʉ́ hmu yʉ tsꞌoqui, ngue ra zįthu rá hmu ra ꞌbɛxui i ja gätho ra ximhäi. Nɛ ʉ gätho yʉ́m fätsꞌihʉ ra zįthu in ꞌyoui ran dąhi, nɛ gätho ꞌbɛꞌa má tsꞌɛdi bá nɛxpʉ ꞌbʉh rá hmu ran tsꞌo, gätho man sʉihʉ ʉ.
\v 13 Janangueꞌa tengu ꞌbʉ ga hehʉ yʉ tꞌɛgui ya, nangue gätho rá tsꞌɛdi Oją, ngue ga häthʉ ga tąfʉ yʉ́n są ra zįthu i säc ma mbʉihʉ. Nɛ nuꞌbʉ dá tąhmbʉ ran sʉi, ya dá juahmbʉ xʉn ho, nɛ dá nuhʉ xingui tsꞌʉ dá ꞌbɛhmbʉ.
\v 14 Nɛ nu yʉ tꞌɛgui dí xi ahʉ, nɛ gueꞌʉ nán sähʉ ʉ. Ngue nuꞌa ram hma dí tɛnhdʉ, ngue tengu ꞌbʉ ran gʉtꞌi ngue ra tꞌɛgui gam päthʉ. Nɛ nuꞌa ná hąmhbʉ ran hogui bi ꞌyørcahʉ ra Cristo, tengu ꞌbʉ ra coto ngue ra tꞌɛgui a, ngue hingui sä da dąjʉ ra zįthu.
\v 15 Nɛ nuꞌa ná yąmanhohʉ Oją nangueꞌa ran ho maꞌdaꞌyo dá hąmhbʉ, nɛ gueꞌa ná huthʉ ran zambʉi tengu ꞌbʉ dí nɛtꞌ ma zapatohʉ ngue yʉ tꞌɛgui, nɛ dan tihmbʉ ga sʉhmbʉ ra zįthu.
\v 16 Nɛ manꞌda, nuꞌa ná pąhmbʉ majuąni Oją, ngue tengu ꞌbʉ nꞌda ra xitꞌɛgui ní däqui gätho yʉ́n są ra zįthu, tengu ꞌbʉ tꞌɛngbahʉ nꞌda ra sibi.
\v 17 Nɛ nuꞌa ná pąhmbʉ majuąni dám pøhmbʉ, tengu ꞌbʉ dá pantꞌ ma yąhʉ ra fʉi ngue ra tꞌɛgui, ngue hin gam bɛ̨mhbʉ a in nde di bɛ̨ngahʉ ra zįthu. Nɛ nuꞌa rám hman Oją, tengu ꞌbʉ ra espada di ꞌdajʉ rá Hogandąhi Oją, gueꞌa dám muthʉ ra zįthu a.
\v 18 Pɛ thocua thoho dan yąhʉ Oją, ga äfʉ rá tsꞌɛdi, xíngui tsꞌʉ ga ɛshʉ nan yąhʉ Oją, tengu di bɛ̨ngahʉ rá Hogandąhi Oją. Nɛ dan ɛ̨hyahʉ hin dan xømbʉihʉ, ngue ga äfʉ Oją da mbäxꞌʉ gätho ma miꞌyɛ̨cꞌyɛihʉ.
\v 19 Nɛ nugä drá Pablogä, dami ꞌyäfʉ Oją nanguecä, nꞌdamhma di ꞌdacä ran ꞌyomfɛ̨ni nɛ ga hutꞌanzambʉi gam mampꞌa rám hma, nɛ ga xi ʉ hing yʉ judío ꞌbɛꞌa nde Oją ngue da bąh ya.
\v 20 Gueꞌa nán ofädigä a, ngue dí xicä yʉ jąꞌi ꞌbɛꞌa bi xicä Oją. Dami ꞌyäfʉ rá tsꞌɛdi Oją ngue hin ga su ga thoqui gam mangä rám hma.
\s Ran zɛngua ran zɛgui
\p
\v 21 Nuya dí pɛnhdä bʉ na ma cuhʉ ra Tíquico, ngue ɛ̨mmɛ mahuɛ̨qui. Nɛ nuna ɛ̨mmɛ øtꞌe xʉn ho rá ꞌbɛfi Oją. Nuꞌa da xi ahʉ ꞌbɛꞌa gätho dadí jagä, nɛ nangue gätho ꞌbɛꞌa dí øtꞌä.
\v 22 Nuna ra Tíquico da gąx na ra søcuą dí øtꞌä, nɛ da xi ahʉ nanguecähe, nɛ da hyutꞌa ni mbʉihʉ.
\v 23 Pɛ Oją ma Tahʉ nɛ ma Hmuhʉ ra Jesucristo da hyutꞌa ni mbʉihʉ, nɛ di ja ahʉ gui huɛ̨ c ni miꞌyɛ̨cꞌyɛihʉ, nguetho gá hyąmhbʉ rán ho mbo ni mbʉihʉ.
\v 24 Pɛ Oją di ꞌda ahʉ rán jąpi gätho ahʉ toꞌo gätho hin gui ꞌyɛꞌtsꞌa gnín numanhohʉ a ma Hmuhʉ ra Jesucristo. Nɛ høntꞌa dá xi ahʉ ya.