\id PHP
\h FILIPENSES
\toc1 FILIPENSES
\mt1 FILIPENSES
\mt2 Ra søcuą bi ꞌyorba ra Pablo ʉ yʉ ꞌyɛ̨cꞌyɛ̨i bʉ ja ra dąhnini Filipos
\c 1
\s Ran zɛngua
\p
\v 1 Nugä drá Pablogä dí yoꞌbe ra Timoteo drá ꞌyɛ̨hɛ̨ꞌbe ra Jesucristo. Dí oꞌtꞌäꞌbe na ra søcuą gätho ahʉ ma zʉ cu ahʉ, nɛ ʉ yʉ ngʉrbi nɛ ʉ yʉ́m fätsꞌihʉ yʉ ngʉrbi, nɛ gätho ʉ i ꞌbʉpʉ ra dąhnini Filipos ngue i tɛnꞌna ra Cristo.
\v 2 Pɛ dí ndep Oją ma Tahʉ nɛ ma Hmuhʉ ra Jesucristo da ꞌyɛntsꞌahʉ rán jąpi nɛ da hyutꞌa ni mbʉihʉ.
\s Nu ra Pablo i äp ra jamadi Oją nangue yʉ ꞌyɛ̨cꞌyɛ̨i
\p
\v 3 Jamadi, dí ɛ̨mpꞌa ma Oją, nꞌdandį ngu nꞌdandį dím bɛ̨n ahʉ, nguetho gue ahʉ mam fätsꞌi ahʉ bi ꞌdacä Oją.
\v 4 Nɛ ząi ɛ̨mmɛ i jagä ran johya ꞌbʉ dí äpä ra jamadi Oją nangue ahʉ.
\v 5 Nɛ dadín johyagä nguetho nꞌdatꞌa rá ꞌbɛfi ran ho maꞌdaꞌyo dí comhbʉ, gueꞌa gní zɛjʉ a, nɛ gueꞌa gá ꞌyøthʉ ꞌbʉ rá mbʉdi gá ꞌyɛcꞌyɛ̨hhʉ, nɛ asta gue yʉ pa i jabʉya.
\v 6 Nugä dí pądi ngue Oją di thocta a ra hogaꞌbɛfi ngue bi dʉꞌmi bi ꞌyørbʉ ni mbʉihʉ, janangue a di juadi xʉn ho ꞌbʉ bi zøn ra pa ba ɛ̨h mahønꞌa ra Jesucristo.
\v 7 Nɛ gueꞌa ná äpä ra jamadi Oją a, ngue ɛ̨mmɛ dím bɛ̨n ahʉ. Nɛ tenguꞌbʉ ꞌdaꞌangu dí sähʉ ran ʉnbi dí sägä nɛ gueꞌa ná comhbʉ rán jąpi Oją a, dá gueꞌbʉ dí ofädigä, o gueꞌbʉ dí ꞌbäpʉ ja ran juąnbate, ngue dadín yąn a rán ho maꞌdaꞌyo ra Cristo dím ma ngue majuąni a.
\v 8 Nɛ høntꞌa Oją i pądi hangu nan gu bʉ ná huɛ̨cꞌahʉ, nɛ tengu bʉ ɛ̨mmɛ ni huɛ̨gahʉ ra Jesucristo.
\v 9 Hanangueꞌa dí äp Oją ngue manꞌda xʉn gu din ja ahʉ ran huɛ̨cate nꞌda ngu nꞌda ahʉ, nɛ din ja ahʉ ran ꞌyomfɛ̨ni xʉn ho, nɛ guim bɛ̨mhbʉ xʉn ho nangue a ꞌbɛꞌa gätho guí øthʉ.
\v 10 Nꞌdamhma gui huanhdʉ ꞌbɛꞌa manꞌda xʉn ho gui ꞌyøthʉ, nɛ nꞌdatꞌa guim bɛ̨mhbʉ, nɛ hin hapʉ di nɛqui ni tsꞌoquihʉ ꞌbʉ bi zøn ra pa ngue ba ɛ̨h ra Cristo.
\v 11 Nɛ høntꞌa ra Jesucristo sä di ꞌda ahʉ ra hogambʉi, ngue xʉn gu yʉ hogaꞌbɛfi din ja ahʉ, nɛ gueꞌa dí tꞌɛ̨spa Oją a.
\s Høntꞌa ra Cristo nám ꞌbʉ a ra Pablo
\p
\v 12 Ma zʉ cu ahʉ, dín nde ahʉ ngue gui pąhmbʉ, gueꞌa nán te ran ho maꞌdaꞌyo a nám ꞌbäcä ua.
\v 13 Ngue gätho yʉ dofʉi ua ja ran gutsꞌʉtꞌabi, nɛꞌʉ gätho miꞌda yʉ jąꞌi i pądi ngue rá ꞌbɛfi ra Cristo a ná ꞌbäcä ua.
\v 14 Nɛ dá gueꞌbʉ dí ofädigä, pɛ gueꞌa ní hyutꞌan zambʉi ma cuhʉ ngueꞌʉ xʉn gu i ꞌbʉcua, nɛ hinguin su ꞌbʉ im man rám hman Oją.
\v 15 I ꞌbʉcua ꞌda ʉ ngue im mampꞌa rám hman Oją, i sɛya nangue rám hman Oją dí øtꞌä. Pɛ i ꞌbʉh miꞌda ngue im man rám hman Oją ngue nde da ꞌyøtꞌ ran ho.
\v 16 Nɛ nuꞌʉ ngue ʉ i ja ran tsꞌɛya, im ma nangue ra Cristo, nguetho in nde ꞌbɛꞌa da dąsɛ ʉ. Pɛ hinga gätho rá mbʉi im ma, pɛ høntho nde ʉ ngue di yop a ma dumbʉigä ua ja ra fädi.
\v 17 Pɛ nuꞌʉ miꞌda di huɛ̨gä, nɛ nde da mbäxgui, nɛ gueꞌa ní man rám hman ra Cristo ʉ, nguetho i pądi ꞌbɛꞌa ná ꞌbäcä ua, ngue dín yąnba a rán ho maꞌdaꞌyo ra Cristo.
\v 18 Pɛ madague a høntꞌa go toꞌo im mampꞌa rám hman Oją, dá gueꞌbʉ nꞌdatꞌa im bɛ̨ni o hinꞌna ꞌbʉ im ma nangue a ra Cristo, nɛ guexta a ɛ̨mmɛ dadín johya. Nɛ thocuą thoho dan johyagä.
\v 19 Nguetho dí pądi ngue ga pømanhogä ua ja ra fädi, nguetho ząi guí äfʉ rá tsꞌɛdi Oją nanguecä, nɛ ząi i fäxcä rá Hogandąhi ra Jesucristo.
\v 20 Nugä hin dín ndegä ngue mꞌbɛjua ga pɛꞌtsꞌ ma sä nangue ꞌbɛꞌa dí øtꞌä, pɛ ɛ̨mmɛ dín nde ga hutꞌan zambʉi gam mangä xʉn ho rám hman Oją ꞌbʉ bi tsꞌɛgbä. Janangue a gätho yʉ jąꞌi da bąh rán uįxte ra Cristo nangue a dí øtꞌä, madagueꞌbʉ dí ꞌbʉcä o gueꞌbʉ da thogä.
\v 21 Nguetho høntꞌa dí ꞌbʉi nangue ra Cristo, dín ndegä ngue din uįxte ra Cristo nangue ꞌbɛꞌa gätho dí øtꞌä, nɛ manꞌda tho ꞌbʉ dá tugä.
\v 22 Pɛ nuꞌbʉ guexta a dadí thoqui dí ꞌbʉcua ja ra häi, sä ga tąh miꞌda yʉ jąꞌi ngue da ꞌyɛ̨cꞌyɛi a ra Hmu mahɛ̨tsꞌi. Pɛ hin dí pąsɛ nda a ga huanhni, hague dam ꞌbʉi, uague ga tu.
\v 23 Pɛ nugä ɛ̨mmɛ xʉn hɛ̨i ga pądi nda a ngue manꞌda xʉn ho.  Pɛ nuꞌbʉ da hønsɛgä, manꞌda dín nde ꞌbʉ ga tu ngue ga mba ním ꞌbʉꞌbe ra Cristo, nguetho manꞌda xʉn ho nanguecä.
\v 24 Pɛ manꞌda xʉn ho nangue ahʉ ngue guexta a dí ꞌbʉcä ua ja ra ximhäi.
\v 25 Janangue a dí hąxanjuąni guexta a dam ꞌbʉcä ua ngue ga fäx ahʉ ngue dín te ni tꞌɛ̨cꞌyɛihʉ. Nɛ manꞌda din ja ahʉ ran johya ꞌbʉ manꞌda gá ꞌyɛ̨cꞌyɛihʉ ra Cristo.
\v 26 Nɛ nuꞌbʉ dí ꞌbʉcä ua ja ra häi, nɛ guín nujʉ mahønꞌa, ɛ̨mmɛ da hyu ni mbʉihʉ nangue ra Cristo, nɛ gui ꞌyɛ̨spahʉ ra Cristo bʉya.
\v 27 Pɛ damam ꞌbʉhmbʉ ꞌbɛꞌa rán sähʉ rán ho maꞌdaꞌyo ra Cristo. Nɛ madague a ꞌdarbʉ dí ꞌbʉhmbʉ o yabʉ dí ꞌbʉcä, pɛ ga øcä ran ho gui ꞌyøthʉ bʉya, nangue ꞌdaꞌ angu guim bɛ̨mhbʉ, nɛ gui fähmbʉ ma tꞌɛ̨cꞌyɛihʉ nangue rán ho maꞌdaꞌyo ra Cristo.
\v 28 Nɛ hin gui suhʉ toꞌo da zʉ ahʉ nangue ran ho maꞌdaꞌyo. Nɛ nangue hin gá suhʉ, da bądi ngue di ꞌbɛh yʉ́ te ʉ, nɛ da bądi ngue i ja ahʉ ra temaząi ngue bi ꞌda ahʉ Oją.
\v 29 Nguetho hinga høntꞌa ran ho bi ꞌda ahʉ Oją ngue gui ꞌyɛ̨cꞌyɛihʉ ra Cristo, pɛ nɛꞌa manꞌda ran ho, ngue gui sähʉ yʉn ʉnbi nangue ra Cristo.
\v 30 Nɛ ꞌdaꞌangu dí øthʉ ya, dadín ʉnbahʉ ngue dín yąmhbʉ a ran ho maꞌdaꞌyo, tengu thoho gá nuhʉ dá øtꞌä mámꞌbɛtꞌo, nɛ guí øhmbʉ ngue guextaꞌa dí øtꞌä ya.
\c 2
\s Nu rán uįxte ra Cristo, hinꞌyʉ ran ꞌyɛ̨tsꞌi
\p
\v 1 Nuꞌbʉ gueꞌa ra Cristo di zɛ ahʉ, nɛ guí pąhmbʉ rán huɛ̨cate a, nɛ nuꞌbʉ guín ꞌyohʉ rá Hogandąhi Oją, nɛ guí pąhmbʉ gui ꞌyøthʉ ra yembʉi nɛ ra mate, dan johyagä ꞌbʉ.
\v 2 Pɛ dami yusca ma mbʉi ran johya nangue ꞌbɛꞌa guí øthʉ ya, ngue nꞌdatꞌa guim bɛ̨mhbʉ, nɛ ꞌda xctín huɛ̨ctahʉ, nɛ ꞌdaꞌangu nin ꞌyomfɛ̨nihʉ guim bɛ̨mhbʉ, hinga ꞌdahma ꞌdanꞌyo guim bɛ̨mhbʉ.
\v 3 Nɛ hin ga øthʉ ran ꞌyʉya, nɛ hin dan ꞌyɛ̨xhʉ, nɛ hin gam bɛ̨mhbʉ ngue dan uįxtehʉ, pɛ manꞌda da bɛ̨nse nꞌda hingui hosɛ xinda gueꞌʉ gä miꞌda.
\v 4 Nɛ hinga høntꞌa ga honsɛhʉ gam bɛ̨mhbʉ, pɛ nɛꞌa i hon ʉ miꞌda ga fäxhʉ.
\v 5 Pɛ nꞌda nguꞌnꞌda dam bɛ̨mhbʉ tengu tho bʉ í bɛ̨njʉ ra Cristo.
\v 6 Nu ra Cristo ꞌdaꞌangudui Oją a, pɛ him bin ꞌyɛ̨zɛhɛ ngue Oją a, nguetho bi bɛ̨njʉ.
\v 7 Ngue bá sogui gätho rá tsꞌɛdi mahɛ̨tsí, nɛ bin ꞌyɛ̨hɛ ꞌbʉ mín jąꞌi ua ja ra ximhäi, nɛ bi mbäx yʉ jąꞌi.
\v 8 Nɛ nuꞌbʉ mín jąꞌi xingui tsꞌʉ bin ꞌyɛ̨tsꞌi, pɛ bi ꞌyøtꞌe gätho ꞌbɛꞌa min nde Oją, nɛ bi du bʉ ja ra pontꞌi tengu nꞌda ra tsꞌomꞌbäi.
\v 9 Nɛ nangue a bi ꞌyøtꞌ ra Cristo, Oją bi ꞌyɛ̨spa a, nɛ bi un ra tsꞌɛdi manꞌda xʉn gu, nɛ gueꞌa ra thuhu bi unni ɛ̨mmɛ manꞌda di muui.
\v 10 Janangue a nuꞌa ra Jesús gueꞌa rán säui din thąnde a, gätho ꞌbʉpʉ mahɛ̨tsꞌi nɛcua ja ra häi nɛꞌʉ gätho xʉn du, yʉ jąꞌi nɛ yʉ́m ꞌbɛhni Oją nɛ yʉ zįthu, gätho da ꞌyɛ̨spa ra Jesucristo ra Hmu.
\v 11 Nɛ gätho nán gu da bądi nɛ da ma ngue gueꞌa ra Jesucristo a ra Hmu nangue gätho ꞌbɛꞌa i ja, nꞌdamhma gätho da ꞌyɛ̨spa Oją ra Ta.
\s Nu yʉ ꞌyɛ̨cꞌyɛ̨i guesɛ ʉ yʉn yotꞌi ua ja ra ꞌbɛxui
\p
\v 12 Janangue a ma zʉ cu ahʉ ngue dadí huɛ̨cꞌahʉ, ząi gá ꞌyøthʉ ꞌbɛꞌa dá xi ahʉ nuꞌbʉ ꞌdarbʉ mám ꞌbʉhmbʉ, pɛ̨ madagueꞌa yaua dí ꞌbʉcä ya, manꞌda hnɛhi thoho gui ꞌyøthʉ a nin sähʉ ngue i ꞌbʉh ma pørpatehʉ, nɛ hin gan ꞌyɛ̨xhʉ, pɛ guin numansuhʉ Oją.
\v 13 Nguetho gueꞌa Oją dim pɛpʉ mbo ma mbʉihʉ nɛ gueꞌa di ꞌdajʉ rá pähä nɛ rá tsꞌɛdi ngue ga ørbahʉ rá pähä Oją.
\v 14 Nɛ o gadí yąni thohʉ, xín gan junthʉ, pɛ dami ꞌyøthʉ gätho in nde Oją.
\v 15 Nꞌdamhma njon da dingahʉ nꞌda ran tsꞌo ngue da ma i ja ma tsꞌoquihʉ. Pɛ dam ꞌbʉhmbʉ tengu man sähʉ ngue yʉ́ hogatꞌʉhni gahʉ Oją, guepʉ ꞌbʉ ʉ yʉ jąꞌi ngue i øtꞌ ram fɛꞌtsꞌi. Janangue a ga øthʉ bʉya tengu nꞌda ran yotꞌi bʉ ja ra ꞌbɛxui, ngue ga xihmbʉ rám hman Oją di un ra te.
\v 16 Nɛ nuꞌbʉ gui xihmbʉ rám hman ra temaząi, nugä dan jhyagä ꞌbʉ bi zøn ra pa ngue ba ɛ̨h ra Cristo, ngue hinꞌyʉ ꞌbɛꞌa dá pɛꞌtsꞌ ma sä nangue ra ꞌbɛfi xtá øtꞌä bʉ guí ꞌbʉhmbʉ.
\v 17 Nguetho dadí hocꞌa ni tꞌɛ̨cꞌyɛihʉ, tenguꞌbʉ dadí hocä nꞌda ra ꞌbøtsꞌe, xʉn ho ꞌbʉ dá undä Oją. Nɛ nugä ꞌbʉ hin dí gua ʉ yʉn ʉngi dá sä ꞌbʉ gmí ꞌyɛ̨cꞌyɛ̨ihʉ, pɛ manꞌda xʉn ho ꞌbʉ ga un ma te nɛ ga fäm ma ji, ngue dí gua a ra ꞌbøtsꞌe ga undä Oją nangue gätho ahʉ. Guexta a dadín johyagä, nɛ da zä gui hyąmhbʉ man johyagä.
\v 18 Janangue a ga comhbʉ man johyagä ꞌbʉ bi zøn ra pa da tꞌɛ̨na da thogä.
\s Ra Timoteo nɛ ra Epafrodito
\p
\v 19 Nɛ nuꞌbʉ rá pähä Oją ꞌbex ga pɛnꞌnahʉ bʉ ra Timoteo da nu ahʉ. Nɛ nuꞌbʉ dá pądi ꞌbɛꞌa gadí jahʉ bʉ dan johyagä bʉya.
\v 20 Nguetho njohgui ꞌbʉcua manꞌda ngue im bɛ̨ni tengu dím bɛ̨mꞌbe ra Timoteo nangue ahʉ.
\v 21 Nguetho gätho miꞌda i ꞌbʉcua im bɛ̨nsɛ nangue yʉ́ ꞌbɛfi zɛhɛ, nɛ him majuąni rá ꞌbɛfi ra Cristo Jesús im bɛ̨m bʉya.
\v 22 Pɛ ya guí pąhmbʉ ngue ɛ̨mmɛ di muui nangue ꞌbɛꞌa i øtꞌ na ra Timoteo, ngue dí comꞌbe rá ꞌbɛfi Oją, tengu nꞌda ra tsꞌʉntꞌʉ i conhui rá ꞌbɛfi rá ta.
\v 23 Pɛ dí tøꞌmi hasta gueꞌbʉ ga pącä ꞌbɛꞌa din jacä ua. Nɛ mꞌbɛjua ga pɛnhdä bʉ na ra Timoteo.
\v 24 Pɛ xømhma da nde ra Hmu mahɛ̨tsꞌi ngue da zä ga mba bʉ nꞌdihi, gan nu ahʉ.
\v 25 Pɛ dím bɛ̨ni ngue mꞌbɛtꞌo ga pɛnꞌnahʉ bʉ mahønꞌa na ra Epafrodito, ma cuhʉ, nɛ dí comꞌbe rá ꞌbɛfi ra Cristo dín yąnbaꞌbe a rán ho maꞌdaꞌyo. Guehna guá pɛncäꞌbe ua nangue da mbäxcaꞌbe.
\v 26 Pɛ nuya ɛ̨mmɛ nde da mba bʉ gam ꞌbʉhmbʉ mahønꞌa, nɛ ɛ̨mmɛ tu rá mbʉi ngue ya rá ꞌyøhmbʉ ngue mí ʉ a.
\v 27 Nɛ majuąni ɛ̨mmɛ mi ʉ nɛ mi tsꞌʉtho xtán du. Pɛ nangue rá mate Oją ngue him bi du. Nɛ nuꞌbʉ xtán du, manꞌda ɛ̨mmɛ xʉn gu ra dumbʉi xcá nugä ꞌbʉ.
\v 28 Pɛ janangue a dí humbi ga pɛnhdä nꞌdihi na, nꞌdamhma gan johyahʉ ꞌbʉ guin nuhʉ mahønꞌa, nɛcä da hyu ma mbʉigä ua.
\v 29 Nɛ nuꞌbʉ bi zøm bʉ dami simhbʉ xʉn ho, nɛ gui ꞌyäfʉ ra jamadi Oją ngue bi xox a. Nɛ gätho yʉ jąꞌi guin numansuhʉ ngue øtꞌe tengu i øtꞌ na ra Epafrodito.
\v 30 Nɛ nuna mi tsꞌʉtho xtán du nangue rá ꞌbɛfi Oją, nguetho bi ꞌyɛn rá te nangue bi zɛqui, ngue bi ꞌyøtꞌ ra ꞌbɛfi tengu thoꞌbʉ gue ahʉ xzuí zɛjʉ.
\c 3
\s Nu ra Cristo ꞌbʉ dí ɛ̨cꞌyɛihʉ, gueꞌa ní bo ma mbʉihʉ a
\p
\v 1 Nuya ma zʉ cu ahʉ, dí xi ahʉ, daman johyahʉ nangue ra Hmu mahɛ̨tsꞌi. Nugä hin dadín xømbʉi ngue ga xi ahʉ mahønꞌa, gan johyahʉ, nguetho nin hosꞌɛhʉ ngue dí xi ahʉ.
\v 2 Daman jamansuhʉ nangue ʉ yʉ tsꞌonꞌyomfɛ̨ni jąꞌi, nguetho nuꞌʉ tengu thoꞌbʉ yʉ satexąꞌyo, nɛ i xi ahʉ jatho da hmɛpya ni jąꞌihʉ ngue da mba nthɛqui ahʉ.
\v 3 Pɛ nujʉ majuąni am hmɛpya gahʉ bʉ na nujʉ Oją, nguetho dí thąndehʉ Oją nangue rá Hogandąhi, nɛ dadín johyahʉ nangue a ra Cristo Jesús, nɛ dí pąhmbʉ hinga gueꞌa man hosɛgahʉ ní ꞌyɛ̨njʉ yʉ́ tꞌʉnigahʉ Oją.
\v 4 Pɛ nuꞌbʉ ꞌboꞌo sä ɛ̨na yʉ́ tꞌʉhni Oją nangue xʉn hosɛ, pɛ manꞌda sä xcá ɛ̨ngä ꞌbʉ, nguetho manꞌda mi pømanho man tꞌøtꞌegä.
\v 5 Nguetho dám ꞌbʉi nangue yʉ judío, nɛ ná hyątopa xtám ꞌbʉcä ꞌbʉ mi thɛgä ma xifani, nɛ gätho dá comhbe a bi xije Oją dyʉ́ hebreohe dyʉ́ judíohe, nguetho nuꞌa ma ta ra hebreo a gue a bi xąnd mam bombøta ra Benjamín mi ꞌbʉh mayaꞌbʉ. Nɛ dá tɛndä ꞌbɛꞌa im man yʉ fariseo, ngue ɛ̨mmɛ dá humbi dá øtꞌä ʉ yʉ́n tꞌɛ̨di yʉ judío.
\v 6 Nɛ nugä ɛ̨mmɛ dá yąngä a ma tꞌɛ̨cꞌyɛ̨ihe dyʉ́ judíohe, janangue a madí ʉnba yʉ́ ꞌyɛ̨cꞌyɛ̨i ra Cristo. Nɛ mi øtꞌä ʉ gätho yʉn ho im man ʉ yʉ́n tꞌɛ̨di yʉ judío, janangueꞌa njoꞌo toꞌo mi sä da manꞌa nꞌda rán tꞌɛ̨di Oją ngue dá fɛsthoho.
\v 7 Nɛ mím bɛ̨ngä ní zingä Oją a man hosɛ. Pɛ nuya dí pądi ndetho di ꞌbɛrpa nín ꞌyomfɛ̨ni nꞌda a. Nɛ dá ɛꞌtsꞌä a ná bɛ̨ngä xʉn ho sɛgä janangue bi zä dá tįngä ran ho nangue ra Cristo.
\v 8 Nɛ madagueꞌa hangu nan gu xtá øzɛhɛgä, pɛ ndetho manꞌda dí ꞌbɛdi, nguetho manꞌda di muui ngue dí pącä ra Cristo Jesús ma Hmu. Janangue a gätho man hosɛ dá ꞌbɛdi, ya him mín numanho, nꞌdamhma bi zä dán ꞌyoꞌbe ra Cristo.
\v 9 Nɛ nuya sä dam ꞌbʉꞌbe ra Cristo, nɛ ntemanho i jagä ꞌbɛꞌa dí øzɛhɛgä nangue yʉn tꞌɛ̨di, pɛ nangue a dí ɛ̨cꞌyɛi ꞌbɛꞌa bi ꞌyørca ra Cristo, nɛ gueꞌa í bo ma mbʉi a nɛ in numanhogä Oją. Nguetho Oją in numanho ʉ i hąntho rá mate ra Cristo.
\v 10 Nɛ nuya høntꞌa manꞌda ɛ̨mmɛ dín nde ga pądi xʉn ho a ra Crsito. Ngue ga comꞌbe xʉn ho a rá tsꞌɛdi bin tꞌum ꞌbʉ mi dámbɛ̨ni, nguepʉ da zä dam ꞌbʉi xʉn ho ꞌbʉ dí ꞌbʉtua ja ra ximhäi, nɛ da zä dan ʉnbä tengu yʉn ʉnbi bi nu a, nɛ da zä ga comꞌbe rán dąte, ngue nde da ma di ꞌbɛrqui xʉn ho a man yombʉi zɛhɛ.
\v 11 Nɛ nubʉya xømhma thoho da zä ga comꞌbe xʉn ho a rá tsꞌɛdi ra Cristo bin tꞌum ꞌbʉ mí dąmbɛ̨ni, ngue dam ꞌbʉi xʉn ho a ra ꞌdaꞌyote.
\s Gan uɛ̨nthohʉ ga tąhmbʉ ra ꞌdihi bʉya
\p
\v 12 Pɛ nugä hingui sä gam mangä ngue gätho dí comꞌbe rá tsꞌɛdi ra Cristo, nguetho hin daná søni ngue gätho xtán hotho ga øtꞌe. Pɛ guexta a dadí thoqui dí honi ngue ga pądi gätho ꞌbɛꞌa bi bɛ̨ngä ra Cristo Jesús ꞌbʉ mi bɛndgä.
\v 13 Pɛ ma zʉ cu ahʉ dí xi ahʉ ya, ngue hinga gätho dí øtꞌä xʉn ho, pɛ hin dín nde gam bɛ̨ngä mahønꞌa ꞌbɛꞌa xtá øtꞌä mamꞌbɛtꞌo. Pɛ guexta a ɛ̨mmɛ dadí thoqui dí nde manꞌda ga øtꞌä ran ho, ngue ga tąhą xʉn ho.
\v 14 Nɛ dín nde gan uɛ̨ntho xʉn ho, ngue ga tąhą ga hąn a í zoncahʉ Oją bʉ mahɛ̨tsꞌi ga hąmhbʉ, nangue dí ɛ̨cꞌyɛihʉ ra Cristo.
\v 15 Nɛ gätho ahʉ ngue xʉn te nin ꞌyomfɛ̨nihʉ nangue ni tꞌɛ̨cꞌyɛihʉ, ndeꞌbʉ ꞌdaꞌangu guim bɛ̨mhbʉ tengu dím bɛ̨ngä. Nɛ nuꞌbʉ bʉ a nꞌda ahʉ nꞌdanꞌyo guím bɛ̨mhbʉ, nu a Oją di ja ahʉ ngue gui pąhmbʉ ꞌbɛꞌa nde Oją.
\v 16 Pɛ ndeꞌbʉ ga thohmbʉ tengu ząi dí øthʉ, nangue rá ꞌbɛfi Oją.
\v 17 Ma zʉ cu ahʉ, dami tɛnhdʉ a ꞌbɛꞌa dí øtꞌä, nɛꞌʉ miꞌda ꞌbʉ i øtꞌa tengu dí øtꞌä, dami tɛnhdʉ ʉ.
\v 18 Nugä drá Pablogä, ga xi ahʉ mahønꞌa, ɛ̨mmɛ xʉn gu yʉ nidį ya xtá xi ahʉ, nguetho ɛ̨mmɛ tu ma mbʉi nangue ꞌbɛꞌa i øtꞌʉ ꞌda xʉn gu, i ɛ̨na i ꞌyo bʉ rá ꞌyu Oją, pɛgue din sʉhmbʉ ra Cristo ngue hingui ɛ̨cꞌyɛ̨i ꞌbɛꞌa í du bʉ ja ra pontꞌi.
\v 19 Nɛ da zøn ra pa ngue da guadi nɛ di ꞌbɛh yʉ́ te, nguetho høntꞌa ꞌbɛꞌa i si nɛ ꞌbɛꞌa ndesɛ rá jąꞌi i hądumbʉi. Pɛ ɛ̨mmɛ din ꞌyɛ̨x ʉ nangue ꞌbɛꞌa i øtꞌʉ nɛ hinꞌyʉ yʉ́ ꞌyąsä. Nɛ høntꞌa im bɛ̨ni nangue a ꞌbɛꞌa jaua ja ra ximhäi.
\v 20 Pɛ nujʉ dyʉ́ ꞌyɛ̨cꞌyɛihʉ, dyʉ́ mɛnguhʉ bʉ mahɛ̨tsꞌi, nɛ dadí thoqui dí tømdahʉ ngue ba ɛ̨h mahɛ̨tsꞌi a mam pørpatehʉ, ngue gueꞌa ma Hmuhʉ ra Jesucristo.
\v 21 Nɛ nuꞌa ra Cristo di pärca ma ngøcꞌyɛ̨ihʉ tengu rá jąꞌizɛhɛ ngue nuįxte thoho, rá rsꞌɛdi i ja. Nɛ nꞌdatꞌa rá tsꞌɛdi ngue di manda ꞌbɛꞌa gätho i jaua.
\c 4
\s Thoscua thoho dan johyahʉ nangue ra Hmu 
\p
\v 1 Ma zʉ cu ahʉ ɛ̨mmɛ dadí huɛ̨cꞌahʉ nɛ ɛ̨mmɛ dím bɛ̨n ahʉ, nguetho xcá ꞌdajʉ ran johya, nɛ nangue gá ꞌyɛ̨cꞌyɛihʉ, gueꞌa ní nɛqui xʉn ho ma ꞌbɛfigä a. Nɛ nuya ma zʉ cu ahʉ, o gadí uąnspa nin ꞌyomfɛ̨nihʉ nangue ni tꞌɛ̨cꞌyɛ̨ihʉ.
\v 2 Nɛ nu aui man ju aui nangue ra Cristo ra Evodia nɛ ra Síntique, dami ꞌyørcaui ra mate ngue ꞌyo gadín sʉhmi, nguetho gadín cuui nangue ra Hmu mahɛ̨tsꞌi.
\v 3 Nɛ nu i ma hogamfätsꞌiꞌi ngue gá fäxca ra ꞌbɛfi, dami fäx ʉ yʉ xisu ngue dim ꞌbʉmanho, nguetho ɛ̨mmɛ dám pɛcähe ʉ nuꞌbʉ má mamhbe bʉ rán ho maꞌdaꞌyo ra Cristo. Nɛ a ra Clemente nɛꞌʉ miꞌda bi mbäxqui, ngue gätho bi thusca ma thuhuhʉ bʉ ja ra xøcuą bʉ mahɛ̨tsꞌi nangue bin ꞌdajʉ ra temaząi.
\v 4 Pɛ thocua thoho dan johyahʉ nangue ra Hmu, nɛ dí xi ahʉ mahønꞌa, dan johyahʉ.
\v 5 Nɛ ga fäxhʉ ma mijąꞌihʉ, nꞌdamhma gätho yʉ jąꞌi da nu ngue dadí jamansuhʉ ꞌbɛꞌa nám ꞌbʉhmbʉ. Nɛ gam bɛ̨mhbʉ ngue mi tsꞌʉtho ba ɛ̨h ra Hmu mahɛ̨tsꞌi. 
\v 6 Nɛ hin ga hądumbʉihʉ nangue ꞌbɛꞌa gätho dí homhbʉ, pɛ gätho ga xihmbʉ Oją ꞌbɛꞌa dí homhbʉ, nɛ ga xihmbʉ ra jamadi ngue ząi ørcahʉ a xʉn ho.
\v 7 Nɛ nu Oją da hyurca ma mbʉihʉ bʉya nangue ran johya hingui sä xtám bąsɛ nꞌda, pɛ gueꞌa ran johya ní jamansuc ma mbʉihʉ nɛ man ꞌyomfɛ̨nihʉ, nangue dín ꞌyohʉ ra Cristo Jesús.
\s Gam bɛ̨mhbʉ ꞌbɛꞌa gähto xʉn ho
\p
\v 8 Nuya ma zʉ cu ahʉ, miꞌda jaua ngue dín nde ga xi ahʉ. Ngue gam bɛ̨mhbʉ gätho ꞌbɛꞌa a majuąni, nɛ gätho ꞌbɛꞌa yʉ́n thɛhʉ ngue dí hnumansujʉ, nɛ gam bɛ̨mhbʉ hin di yoho bʉ dá øthʉ ꞌbɛꞌa dí øthʉ, nɛ hin te man tsꞌo gam bɛ̨mhbʉ. Nɛ gam bɛ̨mhbʉ ga ørpahʉ ꞌbɛꞌa dí hyu yʉ́ mbʉi ʉ ma jijąꞌihʉ, nɛ gam bɛ̨mhbʉ ga øthʉ ꞌbɛꞌa mfądi ngue xʉn ho. Nɛ gam bɛ̨mhbʉ gätho ꞌbɛꞌa ɛ̨mmɛ xʉn ho, nɛ gam bɛ̨mhbʉ ngue ꞌbɛꞌa gätho da tꞌɛ̨spi xʉn ho.
\v 9 Nɛ gui ꞌyøthʉ ꞌbɛꞌa gätho dá xänꞌnahʉ, nɛ gui tɛnhdʉ gätho ꞌbɛꞌa xtá ut ahʉ. Nɛ nuꞌbʉ ngubʉ gui ꞌyøthʉ, da zä gan ꞌyohʉ xʉn ho Oją ngue ząi i hurpa ní mbʉi nꞌda.
\s Bi ꞌbɛnpi tsꞌʉ ram fätsꞌi a ra Pablo
\p
\v 10 Nɛ nu Oją bi ꞌdacä ran johya nangue a gá bɛ̨njʉ mahønꞌa, ngue gadí zɛjʉ tsꞌʉ. Nɛ dí pącä ngue hin gá pumbɛ̨nijʉ, pɛ høntꞌa nja, him mi sä bʉ gui zɛjʉ mamꞌbɛtꞌo.
\v 11 Pɛ hin dí ɛ̨na ngue xcán ʉnbä ꞌbʉ hin xquí fäxcahʉ, nguetho ya xtán ząi ngue i jagä ran johya madagueꞌbʉ i ja a ga honi o hinꞌyʉ.
\v 12 Nugä dí pącä ꞌbɛꞌa nám ꞌbʉmanho nꞌda ra hyoya, nɛ dí pącä ꞌbɛꞌa nám ꞌbʉmanho nꞌda ngue i ja xʉn gu. Nɛ dadín johyagä madague a dín niyągä o gue dí tumanthuhugä. Nɛ høntꞌa go ꞌbɛꞌa dín nu, uague xʉn gu i jagä o hinꞌyʉ, pɛ i hu ma mbʉigä. 
\v 13 Nɛ høntꞌa go má tsꞌɛdi i ndec Oją, ya gätho sä ga øtꞌe, nguetho i fäxca ra Cristo.
\v 14 Pɛ guexta a xʉn ho gá ꞌyøthʉ ngue gá zɛjʉ tsꞌʉ, ngue i pan hnumanꞌʉgä.
\v 15 Nɛ nu ahʉ guí ꞌbʉhmbʉ bʉ Filipos, guí pąhmbʉ ngue hønsɛ ahʉ gá zɛjʉ tsꞌʉ nuꞌbʉ má pøngä bʉ ra häi Macedonia, ngue rá mbʉdi dá mangä ran ho maꞌdaꞌyo bʉ, nɛ gá pɛncahʉ ra mbɛti.
\v 16 Nɛ nuꞌbʉ guexta a mí ꞌbʉcä bʉ ra hnini Tesalónica, yondį hyundį gá pɛncahʉ ra mbɛti, gueꞌbʉ má hongä.
\v 17 Nɛ hinga høntho dín nde ga hąni, pɛ dín nde ngue di jąp ahʉ Oją nangue a xcá ꞌdajʉ, nangue gá zɛjʉ.
\v 18 Nugä ya dá hąni ꞌbɛꞌa guá pɛncähʉ ꞌbʉ mi zøcua ra Epafrodito, nɛ i pongui tsꞌʉ ꞌbɛꞌa dí honi. Nɛ nangue ꞌbɛꞌa guá pɛncähʉ, nu Oją i numanho, tenguꞌbʉ nꞌda ran tꞌunni ɛ̨mmɛ di muui.
\v 19 Nɛ nuꞌa ma Ojąhʉ di ꞌda ahʉ xʉn ho ꞌbɛꞌa gätho guí homhbʉ nangue dí ꞌbʉhmbʉ ra Cristo Jesús. Nguetho nte di ꞌbɛꞌa, nɛ ɛ̨mmɛ xʉn ho a di ꞌdajʉ.
\v 20 Pɛ dí ɛ̨spahʉ ma Tahʉ Oją nɛ gätho yʉ pa maząi. Nɛ høntꞌa dím bɛ̨ngä a.
\s Rán zɛgui ran zɛngua
\p
\v 21 Nɛ dí pɛnꞌnahʉ ran zɛngua gätho yʉ ꞌyɛ̨cꞌyɛi ngue i ꞌbʉpʉ, nangue rá thuhu ra Jesucristo. Nɛ gätho ya yʉ cu dí ꞌbʉhmbe ua i pɛnꞌnahʉ ran zɛngua.
\v 22 Nɛꞌʉ miꞌda yʉ ꞌyɛ̨cꞌyɛi ngue i ꞌbʉcua ja ra hnini, gätho i pɛnꞌnahʉ ran zɛngua. Nɛ nuꞌʉ yʉ ꞌyɛ̨cꞌyɛi ngue dim pɛcua ja ran gutsꞌʉtꞌabi manꞌda in nde di zɛngua ahʉ.
\v 23 Nɛ nu ma Hmuhʉ ra Jesucristo dí äpä di ꞌdaꞌahʉ rán jąpi gätho ahʉ. Nɛ høntꞌa dí xi ahʉ a, nɛ høntꞌa gam bɛ̨mhbʉ a ya.