\id COL
\h COLOSENSES
\toc1 COLOSENSES
\mt1 COLOSENSES
\mt2 Ra søcuą bi ꞌyorba ra Pablo ʉ yʉ ꞌyɛ̨cꞌyɛi bʉ ja ra dąhnini Colosas
\c 1
\s Ran zɛngua
\p
\v 1 Nugä drá Pablogä, ma ꞌbäigäꞌbe ra Cristo Jesús, nangue rá pähä Oją.
\v 2 Nɛ dí yoꞌbe ma cuhʉ ra Timoteo, dadí zɛngua ahʉ gätho yʉ ꞌyɛ̨cꞌyɛi ngue guí ꞌbʉhmbʉ bʉ ja ra hnini Colosas, dadín cuhʉ nangue nꞌdatꞌa dím bɛ̨mhbʉ ra Cristo. Nɛ dín ndehe ngue gätho ahʉ guin nuhʉ rán jąpi Oją ma Tahʉ, nɛ da hyutꞌa ni mbʉihʉ.
\s  Jamadi dí ɛ̨mfe Oją
\p
\v 3 Nuꞌbʉ dí yąhe Oją ngue rá Ta ma Hmuhʉ ra Jesucristo, thocua thoho dí ɛ̨mfe jamadi nangue ahʉ.
\v 4 Nguetho ya xtá øhmbe nangue ni tꞌɛ̨cꞌyɛ̨ihʉ nangue ra Cristo Jesús, nɛ dá øhmbe ngue ja ahʉ ran huɛ̨cate nangue ni mi ꞌyɛ̨cꞌyɛ̨ihʉ.
\v 5 Nguetho guí tømhbʉ ꞌbɛꞌa gätho yʉn ho guin nuhʉ bʉ mahɛ̨tsꞌi, nɛ guí tømhbʉ gueꞌbʉ go rá mbʉdi gmí ꞌyɛ̨cꞌyɛ̨ihʉ a ram hma majuąni.
\v 6 Nu ran ho maꞌdaꞌyo ngue xcá ꞌyøhmbʉ, nuya din xąndi, nɛ hønbʉ go hapʉ i pa, di pärpa yʉ́ mbʉi yʉ jąꞌi, tengu tho bin ja bʉ guí ꞌbʉhmbʉ ꞌbʉ gmí ꞌyɛ̨cꞌyɛ̨ihʉ njuąntho rá mate Oją.
\v 7 Gmí ꞌyøhmbʉ ran ho maꞌdaꞌyo gueꞌa bi xi ahʉ man ꞌyoꞌbe ra Epafras. Nugähe ɛ̨mmɛ dadí huɛ̨je na, nguetho nuna ran ꞌyohʉ nꞌda rá ꞌyɛ̨hɛ̨ ra Cristo, nɛ di zɛ ahʉ nangue rá ꞌbɛfi Oją.
\v 8 Nɛ nuna ra Epafras bi xije ngue gadí huɛ̨gahe nangue rá Hogandąhi Oją di bɛ̨nꞌnahʉ.
\v 9 Nɛ nuꞌbʉ ra pa dá øhmbe ngue xʉn ho ni tꞌɛ̨cꞌyɛ̨ihʉ nɛ nin huɛ̨catehʉ, thocua thoho dí äfe rá tsꞌɛdi Oją nangue ahʉ, ngue gui pąhmbʉ rá pähä Oją nɛ gui pąhmbʉ rán ꞌyomfɛ̨ni a rá Hogandąhi Oją.
\v 10 Nɛ dí äfe rá tsꞌɛdi Oją ngue gam ꞌbʉhmbʉ tengu rán säui ʉ yʉ́ tꞌʉhni Oją, nɛ thocua thoho ząi gui ꞌyøthʉ a in numanho ra Hmu. Nɛ dí äfe Oją ngue gui ꞌyøthʉ yʉ hogantꞌøtꞌe, nɛ din te ni mbʉihʉ ngue manꞌda gui pąhmbʉ Oją.
\v 11 Nɛ gätho nan gu rá tsꞌɛdi Oją dí äpähe nangue gätho yʉn ʉnbi guín nuhʉ, ngue hin gan xømbʉihʉ. Nɛ nangue rá tsꞌɛdi Oją di ja ahʉ ngue hin di ʉnꞌna ni mbʉihʉ, nɛ din ja ahʉ ran johya.
\v 12 Janangue a da zä gui ꞌyɛ̨mfʉ jamadi ma Tahʉ Oją, nguetho bi hogahʉ da zä ga comhbʉ ꞌbɛꞌa gätho di un yʉ ꞌyɛ̨cꞌyɛ̨i guepʉ bí ja rán nɛqui.
\v 13 Nɛ bi yąnjʉ Oją bʉ ja rá tsꞌɛdi ra ꞌbɛxui, nɛ bi zixgahʉ bʉ di manda rá Tsꞌʉntꞌʉ di huɛ̨qui.
\v 14 Nɛ nuꞌa rá Tsꞌʉntꞌʉ bi gurca ma tsꞌoquihʉ, nɛ gueꞌa í zä bi pungahʉ Oją a.
\s  Rá ꞌbɛfi bi ꞌyøzɛhɛ ra Cristo
\p
\v 15 Nɛ nu Oją hingui sä da nu nꞌda, pɛ nu ra Cristo ngue ꞌdaꞌangudui Oją, nɛ bin jąꞌi ua ja ra häi tengu tho ꞌbʉ dá nuhʉ Oją. Nu ra Cristo mi ꞌbʉ ꞌbʉ rá mbʉdi thoho, ꞌbʉ nte mi ja ua.
\v 16 Nɛ nangue rá tsꞌɛdi Oją ra Cristo bi ꞌyøtꞌe ꞌbɛꞌa gätho i ja nɛ toꞌo gätho i ꞌbʉi, guecua ja ra häi, nɛpʉ mahɛ̨tsꞌi, nuꞌʉ di nɛqui nɛꞌʉ hin di nɛqui, gätho ʉ i ja yʉ́ tsꞌɛdi, nɛꞌʉ ɛ̨mbi i jasɛ yʉ́ tsꞌɛdi, pɛ nu ra Cristo bi ꞌyøtꞌe gätho ʉ ngue di manda ʉ.
\v 17 Nɛ nuꞌa ra Cristo mi ꞌbʉi nuꞌbʉ ma hinꞌyʉ ua ra ximhäi. Nɛ nangue rá tsꞌɛdi di jamansu xʉn ho gätho ꞌbɛꞌa bi ꞌyøtꞌe, nɛ gueꞌa ní bømanho a.
\v 18 Nu gätho yʉ ꞌyɛ̨cꞌyɛ̨i i ꞌbʉi nꞌdamꞌbʉi tho i øtꞌe tenguꞌbʉ nꞌdanjąꞌi tho, nu ra Cristo tenguꞌbʉ rá yą a. Nɛ di un ra temaząi yʉ ꞌyɛ̨cꞌyɛ̨i. Nɛ nuꞌa, rá mbʉdi ngue bi dąmbɛ̨ni a. Janangue a hinꞌyʉ manꞌda ra tsꞌɛdi nuįxte tengu rá tsꞌɛdi a. 
\v 19 Nguetho bi zän Oją høntꞌa rá Tsꞌʉntꞌʉ bi unni gätho rá tsꞌɛdi. 
\v 20 Nɛ nuꞌbʉ mí mbän rá ji ra Cristo bʉ ja ra pontꞌi, bi ꞌbɛrpa yʉ́ tsꞌɛdi ʉ gätho madín sʉhmbʉ Oją i ꞌbʉcua ja ra häi nɛpʉ mahɛ̨tsꞌi. Nɛ gueꞌa dí hocpi gätho ꞌbɛꞌa i ja, nɛ gueꞌa dí hocpa ʉ toꞌo gätho in nde.
\v 21 Nɛ nuꞌa ra Cristo bi hogahʉ, nguetho yatho dá ꞌuehmbʉ bʉ rá ꞌyu Oją, nɛ mí øthʉ yʉn tsꞌo, nɛ gueꞌa dán sʉhmbʉ Oją a. Pɛ nuya Oją sä da numanhojʉ.
\v 22 Nu Oją bi hogahʉ gätho ma tsꞌoquihʉ, nguetho rá jąꞌi ra Jesús bi nu ran ʉnbi nɛ ran dąte nanguejʉ. Janangueꞌa xtán hotho gahʉ ꞌbʉ bi däjʉ bʉ ꞌbʉ Oją, nɛ hin da dįnga ma tsꞌoquihʉ.
\v 23 Pɛ nuꞌbʉ guín nde ngue din ja ahʉ bʉ, pɛ jatho thocua thoho gui ꞌyɛ̨cꞌyɛ̨ihʉ, nɛ hin gui ꞌyon nin ꞌyomfɛ̨nihʉ. Nɛ gui thoqui gui tømhbʉ ran ho maꞌdaꞌyo gá ꞌyøhmbʉ, nuꞌa bi sih yʉ jąꞌi gätho ra ximhäi. Nɛ nꞌdatꞌa ram hma dí øtꞌä ngue dím pøngahyągä, guecä drá Pablogä.
\s  Rá ꞌbɛfi ra Pablo
\p
\v 24 Nɛ nugä di johya ma mbʉi ꞌbʉ dín nu ran ʉnbi nangue ahʉ. Nɛ xʉn zän Oją ga comhbʉ rán ʉnbi ra Cristo, nguetho yʉ́ mbɛti gahʉ a. Nuꞌa bi nu ran ʉnbi nangue gätho yʉ ꞌyɛ̨cꞌyɛ̨i, nɛcä dín nu ran ʉnbi tengu bi zän Oją ngue gan nugä.
\v 25-26 Nɛ bi huancä Oją gätho yʉ ꞌyɛ̨cꞌyɛ̨i ga pɛpi, ngue ga xih ran ho maꞌdaꞌyo. Nɛ nuꞌa ran ho maꞌdaꞌyo ní gua a rám hman Oją a, ngue im ma gätho him mam fądi mamꞌbɛtꞌo. Nguetho gueꞌbʉ rá mbʉdi thoho njom mí pądi. Nɛ nuꞌbʉ mám ꞌbʉhmbʉ bʉya, nɛ ja dá pąhmbʉ bʉya.
\v 27 Nɛ nuna ram hma him mam fądi, ngue dim ꞌbʉpʉ ra Cristo bʉ mbo ma mbʉihʉ, ngue gätho dyʉ́ ꞌyɛ̨cꞌyɛ̨ihʉ i ꞌbʉh ra ximhäi, nɛꞌʉ hing yʉ judío. Nɛ nangue dim ꞌbʉpʉ mbo ma mbʉihʉ ra Cristo, sä ga tømhbʉ a rán ho nuįxte bí ja bʉ mahɛ̨tsꞌi. Nɛ guehna ran tꞌøtꞌe nuįxte in ndejʉ Oją ga pąhmbʉ ya.
\v 28 Janangue a nu ran ho maꞌdaꞌyo dím mamhbe nɛ dí xänbahe xʉn ho, nɛ gätho yʉ jąꞌi dí xihmbe ran ho, nangue bi ꞌdacä ran ꞌyomfɛ̨ni Oją. Nguetho dí ndepe gätho da mba ma hocpi yʉ́ mbʉi ʉ, nuꞌbʉ i pądi ꞌbɛꞌa bi ꞌyørba ra Cristo. Nɛ da zä dim ꞌbʉi xʉn ho ra Cristo bʉ mbo yʉ́ mbʉi bʉya.
\v 29 Janangue a gätho ma mbʉi dí øtꞌä ma ꞌbɛfi, nangue ra tsꞌɛdi ngue bi ꞌdac ra Cristo dí øtꞌä.
\c 2
\p
\v 1 Nugä drá Pablogä dín nde ahʉ gui pąhmbʉ ngue dí hądumbʉi dí äpä rá tsꞌɛdi Oją nangue ahʉ gyʉ́ ꞌyɛ̨cꞌyɛ̨ihʉ. Nɛꞌʉ ngue ꞌbʉpʉ ra hnini Laodicea nɛ gätho ʉ miꞌda ngue njąmꞌbʉ mi nugui.
\v 2 Dín nde ahʉ ngue da hyu ni mbʉihʉ, nɛ nꞌdatꞌa guim bɛ̨mhbʉ nangue i ja ahʉ nin huɛ̨catehʉ nꞌda ngu nꞌda ahʉ. Nɛ hin te di ꞌbɛdi ngue gui pąhmbʉ nangue ra Cristo, nguetho ꞌbɛꞌa gätho him mam fądi sä gui tįmhbʉ nangue ra Cristo.
\v 3 Pɛ nangue ra Cristo sä gui tįmhbʉ ꞌbɛꞌa him mam fądi nangue rán ꞌyomfɛ̨ni ra Cristo. Nɛ høntꞌa ra Cristo sä da ꞌyut ahʉ rán ꞌyomfɛ̨ni Oją.
\v 4 Nuna guehna dí xi ahʉ na, nguetho ꞌbʉꞌi ꞌda nde da hyä ahʉ, ɛ̨mmɛ mahotho im man ʉ, pɛ him majuąni.
\v 5 Nugä hinga ꞌdarbʉ dí ꞌbʉhmbʉ ya, pɛ i so ma mbʉi nangue ahʉ. Nɛ ɛ̨mmɛ i hu ma mbʉi ꞌbʉ dí øde ngue hingui cuentꞌ ni mbʉihʉ, nɛ hingui tąp a ni mbʉihʉ ʉ yʉ hyäte, nangue ni tꞌɛ̨cꞌyɛihʉ nangue ra Cristo.
\v 6 Ndeꞌbʉ thocua thoho gan ꞌyohʉ ra Cristo Jesús ra Hmu, nguetho ya gá sin a ra Cristo ngue dim Hmu bʉ ja ni mbʉihʉ, nɛ bi du nangue ahʉ.
\v 7 Nu ra Cristo tenguꞌbʉ ra dąꞌyʉ a, nɛ nꞌdatꞌa guí comhbʉ rá te ni mbʉihʉ, nɛ gueꞌa nán te ni mbʉihʉ a. Nɛ dami zacua ni tꞌɛ̨cꞌyɛ̨ihʉ, tengu bi sänꞌnahʉ. Nɛ ząi gui ꞌyɛ̨mfʉ jamadi Oją gätho bi ꞌda ahʉ.
\s  Dí comhbʉ ra ꞌdaꞌyote ra Cristo
\p
\v 8 Damin jamansuhʉ ngue hin din tsꞌon ni tꞌɛ̨cꞌyɛ̨ihʉ nangue ꞌbɛꞌa im man i ꞌda yʉn ꞌyohʉ, ngue nde da hyä ahʉ. Pɛ im bɛ̨nsɛ a i xi ahʉ, nɛ him majuąni a i xi ahʉ. Gueꞌʉ yʉ́m hmansɛ yʉn ꞌyohʉ im ma miꞌda yʉ hmu hin di nɛqui di manda ua ja ra ximhäi, nɛ hin rán tꞌɛ̨di ra Cristo ʉ.
\v 9 Pɛ nangue a ra Cristo da zä ga pąhmbʉ xʉn ho Oją. Nguetho Oją bin jąꞌi nangue rán gøcꞌyɛ̨i ra Cristo, nɛ nte di ꞌbɛdi gätho i ja a Oją nangue rá jąꞌi ra Cristo.
\v 10 Janangue a nuꞌbʉ dín ꞌyohʉ ra Cristo, i jajʉ ꞌbɛꞌa gätho dí homhbʉ. Nɛ nuꞌa ra Hmutsꞌʉtꞌabi a, nɛ høntꞌa di manda gätho ꞌbɛꞌa i ja.
\v 11 Nɛ nuꞌbʉ má ɛ̨cꞌyɛ̨ihʉ ra Cristo, bi thɛgahʉ gätho ma tsꞌoquihʉ gätho gahʉ, nɛ ahʉ ngue hing yʉ judío ahʉ. Nɛ gueꞌa njuąntho ran thɛqui in nu Oją a bi ꞌyøt ahʉ ra Cristo.
\v 12 Nguetho nuꞌbʉ mán xixyąhʉ, tenguꞌbʉ ꞌdarbʉ bi tꞌägahʉ a ra Cristo, ngue dá sohmbʉ bʉ ma nyon ꞌyomfɛ̨nihʉ. Nɛ tenguꞌbʉ ꞌdarbʉ dá thąmbɛ̨nihʉ ra Cristo bʉ ja ra ꞌdaꞌyote, nguetho dí ɛ̨cꞌyɛ̨ihʉ rá tsꞌɛdi Oją bi xoxꞌa ra Cristo ꞌbʉ mi du, nangue rá tsꞌɛdi xʉn ndoho.
\v 13 Nɛ nuꞌbʉ hin ní hoc ni mbʉihʉ, gätho ahʉ ngue hing yʉ judío ahʉ, tenguꞌbʉ gyʉ́ duhʉ nangue ni tsꞌoquihʉ, nɛ hin gmi comhbʉ ran hoqui bi man Oją mayaꞌbʉ. Pɛ nu Oją bi ja ahʉ nɛꞌahʉ dá comhbʉ ra temaꞌdaꞌyo ra Cristo, nɛ bi pungahʉ gätho ma tsꞌoquihʉ.
\v 14 Nɛ nujʉ hin dá jąshʉ yʉ́n tꞌɛ̨di Oją, o gueꞌa ran hocjąꞌi dí pąsɛhʉ hin dá jąshʉ a, nɛ gueꞌa gä dín dupatehʉ a. Pɛ bi gurga man dupatehʉ a ra Jesús ꞌbʉ mi du bʉ ja ra pontꞌi. Nɛ gueꞌa ní hogahʉ Oją a.
\v 15 Nɛ nangue a ꞌbɛꞌa bi ꞌyøtꞌ ra Cristo ꞌbʉ mi du bʉ ja ra pontꞌi, bi ꞌbɛrpa yʉ́ tsꞌɛdi ʉ i ɛ̨na i ja yʉ́ tsꞌɛdi ngue hin di nɛqui. Nɛ bi japi ngue bi mbɛꞌtsꞌ yʉ́ sä ꞌbʉ mi hnu ngue bi dą a ra Cristo.
\s Ga homhbʉ ga øthʉ ngue dyʉ mɛnguhʉ bʉ mahɛ̨tsꞌi.
\p
\v 16 Janangue a njon da zä da xijʉ ga sufʉ ꞌbɛꞌa dí sihʉ, nɛ njon da zä da xijʉ jatho ga sufʉ nꞌda ran go, gueꞌʉ yʉ tꞌʉngopa, o gueꞌʉ yʉ pa ran tsꞌäya.
\v 17 Nɛ nuya yʉn tꞌɛ̨di ɛ̨mbi xʉn dʉxqui, bi man Oją mayaꞌbʉ ngue bi xi ʉ yʉ judío, pɛ ꞌda yʉ patho ʉ. Nɛ din tꞌɛsꞌ ꞌbʉ bá ɛ̨h ra Cristo ʉ, nguetho yʉ hmɛpya thoho nangue a ra Cristo. Pɛ nuya bi zøh ra Cristo, nɛ gueꞌa majuąni i ja rá tsꞌɛdi a.
\v 18 Nɛ masque i si ahʉ gui ꞌbɛhmbʉ rán jąpi Oją ꞌbʉ hin gui thąndehʉ yʉ́m ꞌbɛhni Oją mahɛ̨tsꞌi. Pɛ o guí suhʉ. Gueꞌa im man ʉ ꞌda, nguetho ɛ̨mbi ran ꞌyɛ̨tsꞌi ꞌbʉ dí thąndehʉ ra Cristo, nguetho i ja rá tsꞌɛdi. Pɛ go i ɛ̨n ʉ hing ran ꞌyɛ̨tsꞌi ꞌbʉ ga thąndehʉ ʉ i coh yʉ́ tsꞌɛdi, ngue yʉ́m ꞌbɛhni Oją mahɛ̨tsꞌi. Pɛ im mansɛ, nɛ him bi ꞌyut Oją, nguetho ɛ̨mmɛ xʉn tsꞌo yʉ́n ꞌyomfɛ̨ni ʉ.
\v 19 Pɛ nuꞌʉ hinꞌyʉ ꞌbɛꞌa yʉ́n jahʉ ra Cristo. Pɛ nujʉ dyʉ ꞌyɛ̨cꞌyɛ̨ihʉ dí ꞌbʉhmbʉ ra Cristo tenguꞌbʉ nꞌdanjąꞌi tho dí comhbʉ. Nu ra Cristo tenguꞌbʉ ra yą, nɛ di bɛ̨ngahʉ yʉn ꞌyomfɛ̨ni xʉn ho, nɛ gueꞌa nán te ma mbʉihʉ a, tengu bi zän Oją.
\s ꞌDarbʉ dá tuhʉ ra Cristo nɛ ꞌdarbʉ dí ꞌbʉhmbʉ a
\p
\v 20 Ha hin gá tuhʉ ra Cristo, nɛ guí ɛ̨na gá hyɛhmbʉ yʉ́n tꞌøtꞌe ra ximhäi. Pɛ hanja guexta a gní ꞌyøthʉ tenguꞌbʉ rá mbɛti ahʉ ra ximhäi, ngue guí ødahʉ yʉ́n tꞌɛ̨di ʉ toꞌo ɛ̨mbi di manda ua ja ra ximhäi.
\v 21 Ngue sä i ɛ̨n ahʉ: “ꞌYo guí thähmbʉ ya, nɛ o guí sahʉ ya, nɛ o guí hąxhʉ ya.” Pɛ ndeꞌbʉ hin gan hyɛhmbʉ ngue di ꞌbɛp ahʉ ʉ yʉ́n tꞌɛ̨di ʉ.
\v 22 Pɛ gätho ya ɛ̨njʉ ga sufʉ, pɛ an tsꞌänni gätho ga homhbʉ nɛ din thegue.
\v 23 Nɛ ɛ̨na gueꞌbʉ gueꞌa ran ꞌyomfɛ̨ni xʉn ho a im man ya yʉn ꞌyohʉ, nguetho im man a nꞌda ran thąnde ngue hin dín ꞌyɛ̨x a nꞌda, nɛ im ma da zɛthoho ꞌbɛꞌa in nde nꞌda. Pɛ mfądi hinga gueꞌa, nguetho hinga gueꞌa ní zɛrpa ní mbʉi nꞌda ꞌbʉ im bɛ̨ni da ꞌyøtꞌ ran tsꞌo.
\c 3
\p
\v 1 Pɛ gam bɛ̨mhbʉ ngue ꞌdarbʉ dá thąmbɛ̨nihʉ ra Cristo, tenguꞌbʉ ya dá sohmbʉ ra ximhäi. Janangue a ga homhbʉ ga øthʉ ngue dyʉ mɛnguhʉ bʉ mahɛ̨tsꞌi, ngue ya dí ꞌbʉhmbʉ ra Cristo, nɛ nuꞌa i ꞌbʉpʉ ja rán ꞌyɛi Oją, i conhui rá tsꞌɛdi a.
\v 2 Gam bɛ̨mhbʉ tengu bʉ nam bɛ̨n ʉ ꞌbʉpʉ mahɛ̨tsꞌi, nɛ hin gam bɛ̨mhbʉ tengu bʉ nam bɛ̨n ʉ ꞌbʉcua ja ra ximhäi.
\v 3 Gam bɛ̨mhbʉ ngue ꞌdarbʉ dá tuhʉ ra Cristo, nɛ nuya ꞌdarbʉ bi ꞌbɛsca ma tehʉ ra Cristo bʉ bí ja rá tsꞌɛdi Oją, bʉ nam bɛ̨n a.
\v 4 Nu ra Cristo dá simhbʉ mbo ma mbʉihʉ, nɛ gueꞌa ma tehʉ i jajʉ a ya. Nɛ nuꞌbʉ bi hnu a rá tsꞌɛdi nuįxte ra Cristo, nɛjʉ da hnu ngue dí comhbʉ rá nuįxte a.
\s Høntꞌa maꞌdaꞌyo gam bɛ̨mhbʉ ya
\p
\v 5 Janangue a nuya gätho yʉ́n tsꞌo ra ximhäi i ja bʉ mbo ma mbʉihʉ ga hɛhmbʉ, tenguꞌbʉ dán hyosɛhʉ. Hin dan ꞌyomtꞌɛ̨nihʉ, xin ga øthʉ yʉ ꞌyąsä, nɛ ga ɛshʉ ʉ yʉ tsꞌonꞌyomfɛ̨ni. Xín dan siyatehʉ, nguetho tenguꞌbʉ dí thąndehʉ ʉ yʉ oją ngue him majuąni.
\v 6 Pɛgue guehya da nu rán tsꞌɛmbi Oją ntsꞌutho, ngue gätho ʉ hin di jamansu ꞌbɛꞌa im man Oją.
\v 7 Nuꞌehʉ ngubʉ gmí øthʉ ꞌbʉ gmí ꞌyohʉ bʉ ja ra ꞌbɛxui.
\v 8 Pɛ nuya dami hyɛhmbʉ ꞌbɛꞌa gmím bɛ̨nbahʉ ni mijąꞌihʉ ya, gätho ra cuɛ, nɛ dami hyɛhmbʉ a gní ꞌyɛ̨tꞌambʉihʉ ran tsꞌo. Nɛ o gadí cꞌąmanꞌʉ ni mijąꞌihʉ nangue ra tsꞌore, nɛ gui ꞌyɛshʉ nangue ra tsꞌore i pøn ni ndehʉ.
\v 9 Nɛ o gadín xihmbʉ yʉ fɛhni nꞌda ngu nꞌda ahʉ, nguetho ya gá pähmbʉ nin ꞌyomfɛ̨nihʉ nɛ gätho ꞌbɛꞌa gmí øthʉ.
\v 10 Nɛ nuya i ja ahʉ maꞌdaꞌyo nin ꞌyomfɛ̨nihʉ. Pɛ nu Oją manꞌda manꞌda di ꞌda ahʉ ran ꞌyomfɛ̨ni, da gohi tengu thoho rán ꞌyomfɛ̨ni ra Cristo, ngue bi ꞌdajʉ ra ꞌdaꞌyote.
\v 11 Nu ra Cristo ꞌdaꞌangu bʉ na nu yʉ jąꞌi, madague høntꞌa go ꞌbɛꞌa má jąꞌi, yʉ griego, o gue yʉ judío o gue hing yʉ judío, o gue yʉm ꞌbʉndąpo jąꞌi, o gue yʉ ꞌyɛ̨hɛ̨, o gue hing yʉ ꞌyɛ̨hɛ̨. Nu ra Cristo in ꞌyohʉ høntꞌa toꞌo nde da ꞌyɛ̨cꞌyɛ̨i, nɛ nangue ra Cristo ga tįmhbʉ gätho dí homhbʉ.
\v 12 Nɛ nangue rán huɛ̨cate Oją ya bi huancahʉ ngue ga ɛ̨cꞌyɛ̨ihʉ. Janangue a ndeꞌbʉ ga øthʉ ran hocjąꞌi, nɛ hin dan ꞌyɛ̨xhʉ, nɛ ga ørbahʉ ran ho ma mijąꞌihʉ, nɛ din ja ma yembʉihʉ, nɛ hin dan xømbʉihʉ ꞌbɛꞌa da tꞌørcahʉ.
\v 13 Nɛ dam punbahʉ nꞌda ngu nꞌdajʉ nuꞌbʉ da ꞌyørcahʉ ran tsꞌo nꞌda, tengutho bʉ í pungahʉ ra Cristo.
\v 14 Pɛ manꞌda ɛ̨mmɛ hnɛhi thoho ga øthʉ ran huɛ̨cate, hin te dadí ꞌbɛhmbʉ ꞌbʉ.
\v 15 Nɛ ga jafʉ ra Cristo di manda gahʉ, nꞌdamhma dim ꞌbʉmanho ma mbʉihʉ. Nguetho ya bá zoncahʉ Oją ngue dam ꞌbʉhmbʉ tenguꞌbʉ nꞌdanjąꞌitho. Nɛ thocua thoho ga xihmbʉ ra jamadi ꞌbɛꞌa bi ꞌyørcahʉ Oją.
\v 16 Nɛ gam bɛ̨mhbʉ rám hman ra Cristo, nɛ nangue rám hma din jajʉ ran ꞌyomfɛ̨ni xʉn ho. Nɛ gueꞌa dán xänbahʉ a nꞌda ngu nꞌdajʉ. Nɛ ga ɛ̨mfʉ jamadi Oją nuꞌbʉ dí tuhmbʉ yʉ thuhu, o gue dím mamhbʉ rám hman Oją.
\v 17 Nɛ ꞌbɛꞌa gätho dí øthʉ, nɛ ꞌbɛꞌa gätho dím mamhbʉ, pɛ ga øthʉ a dí tꞌɛ̨spa ra Hmu Jesús. Nɛ ga ɛ̨mfʉ jamadi Oją ma Tahʉ, nangue a ra Jesús.
\s Dam ꞌbʉmanhohʉ bʉ ja ma ngumhbʉ
\p
\v 18 Nɛ nu ahʉ gyʉ xisuhʉ, dami ꞌyøhmbʉ ꞌbɛꞌa im man ni ndøhʉ, nguetho gueꞌa rán säui nꞌda ra ꞌyɛ̨cꞌyɛ̨i.
\v 19 Nɛ nu ahʉ gyʉn ꞌyohʉhʉ, dami huɛ̨c ni xisuhʉ, nɛ hin gui sʉhmbʉ ʉ.
\v 20 Nɛ nu ahʉ gyʉ tꞌʉhnihʉ, dami ꞌyøthʉ ꞌbɛꞌa gätho man ni tahʉ nɛ ni mbehʉ, nguetho gueꞌa in numanho Oją a. 
\v 21 Nɛ nu ahʉ gyʉ tahʉ, nɛ gyʉ mbehʉ, hinga thocua tho gui sʉh ni tꞌʉhnihʉ, janangue a mpähä thoho da ꞌyøtꞌa guín numanhohʉ.
\v 22 Nɛ nu ahʉ gyʉ ꞌyɛ̨hɛ̨hʉ nɛ gyʉ mbɛfihʉ, dami ꞌyøthʉ ꞌbɛꞌa gätho nde ni hmuhʉ, yʉ jąꞌi. Pɛ hinga høntꞌʉ guim bɛ̨mhbʉ da numanho ahʉ ʉ, pɛ gueꞌa Oją guín ndehʉ da numanho ahʉ. Janangue a gui ꞌyøthʉ xʉn ho ni ꞌbɛfihʉ ngue dí numanho ahʉ Oją.
\v 23 Nɛ nuꞌʉ ꞌbɛꞌa gätho ní ꞌbɛfi guí øthʉ, gui ꞌyøthʉ xʉn ho, nguetho hinga høntꞌa ra jąꞌi ni hmuhʉ, pɛ nɛsɛ a Oją.
\v 24 Nguetho ya guí pąhmbʉ a ra herencia di ꞌdajʉ ra Cristo, ngue i juadi xʉn ho, nɛ gueꞌa majuąni ni Hmuhʉ a.
\v 25 Pɛ nuꞌʉ toꞌo i øtꞌ ran tsꞌo, Oją di cospa a bi ꞌyøtꞌe, madague a høntꞌa go toꞌo ní jąꞌi.
\c 4
\p
\v 1 Nɛ nu ahʉ gyʉ hmuhʉ, dami ꞌyørpahʉ ran ho ni ꞌyɛ̨hɛ̨hʉ o gue ni mbɛfihʉ, nguetho guí pąhmbʉ i ꞌbʉpʉ mahɛ̨tsꞌi ni Hmuhʉ.
\s Manꞌda ran zofo
\p
\v 2 Nɛ gätho gahʉ hin dan xømbʉihʉ nangue dan yąhʉ Oją, nɛ thocua thoho ga xihmbʉ jamadi Oją ꞌbɛꞌa gätho di ꞌdajʉ.
\v 3 Nɛ nu ahʉ damin yąhʉ Oją nanguecähe, ngue di jaje ga thoje gam mamhbe rám hma, nɛ ga xih yʉ jąꞌi ꞌbɛꞌa bi ꞌyurcahʉ, ram hma ngue him mam fądi, ngue dim ꞌbʉpʉ mbo ma mbʉihʉ ra Cristo. Nɛ nugä dí ofädigä nguetho dím mangä na ram hma.
\v 4 Dami ꞌyäfʉ rá tsꞌɛdi Oją ngue da bømanho ꞌbɛꞌa dím mangä, ngue ꞌbɛꞌa bi ꞌyurcahʉ, nguetho jatho gam mangä xʉn ho a.
\v 5 Nɛ dami jamansu ni mbʉihʉ, janangue a nu yʉ jąꞌi hing yʉ ꞌyɛ̨cꞌyɛ̨i da nu ngue majuąni guín ꞌyohʉ ra Cristo. Nɛ dąman ɛ̨hyahʉ gui xihmbʉ nangue ra Cristo.
\v 6 Dami zomanhohʉ yʉ jąꞌi, nɛ hin gui ꞌyʉthʉ ʉ, pɛ dąmi hyurpahʉ yʉ́ mbʉi. Pɛ ga pąhmbʉ ꞌbɛꞌa dá thąhmbʉ nꞌda ngu nꞌda, nangue a ran ho di bɛ̨ngahʉ Oją ngue ga xihmbʉ.
\s  Ran zɛngua ran zɛgui
\p
\v 7 Nuna ma zʉ cuhʉ ra Tíquico, ɛ̨mmɛ dadí huɛ̨cä na, nɛ bi mbäxqui xʉn ho ngue dá øtꞌbe rá ꞌbɛfi Oją. Nuꞌbʉ bi zøm bʉ, da xi ahʉ gätho ꞌbɛꞌa dadí jagä.
\v 8 Janangue a dí pɛhndä bʉ ya, ngue gui pąhmbʉ ꞌbɛꞌa dí jagähe ua. Nɛ nuꞌa da hyut a ni mbʉihʉ nangue ra Cristo.
\v 9 Nɛ da mbɛ ra Tíquico ma cuhʉ ra Onésimo, nuna i ɛ̨cꞌyɛ̨i xʉn ho na, nɛhna dadí huɛ̨cä na. Nuna nꞌda ra mɛngu bʉ guí ꞌbʉhmbʉ, nɛ da xi ahʉ ꞌbɛꞌa gätho bin ja ua.
\v 10 Nɛhna ma mi ofädiꞌbe ra Aristarco, i pɛnꞌnahʉ ran zɛngua, nɛ ra Marcos rá mɛni ra Bernabé i pɛnꞌnahʉ ran zɛngua. Nɛ ya dá xi ahʉ nangue ra Marcos, nɛ nuꞌbʉ da zøm bʉ, dami simhbʉ xʉn ho.
\v 11 Nɛhna ra Jesús í Justo i pɛnꞌnahʉ ran zɛngua. Pɛ høndi hyutho ya ma mijudíohe ngue yʉ ꞌyɛ̨cꞌyɛ̨i dadím pɛhmbe ua nangue rá ꞌbɛfi Oją, nɛ guehya hyu ɛ̨mmɛ i hurca ma mbʉi.
\v 12 Nɛ nuna i pɛnꞌnahʉ ran zɛngua na ra Epafras, nꞌda ra mɛngu bʉ guí ꞌbʉhmbʉ, nɛ rá ꞌyɛ̨hɛ̨ ra Cristo na. Nɛ ząi i äp rá tsꞌɛdi Oją nangue ahʉ, ngue hin gui päh nin ꞌyomfɛ̨nihʉ nangue ra Cristo, pɛ njuąntho gui ꞌyøthʉ rá pähä Oją.
\v 13 Nɛ majuąni dím mangä nangue ra Epafras, ngue ɛ̨mmɛ xʉ hyądumbʉi in yąui Oją nangue ahʉ, pɛ hinga hønꞌa thohʉ, pɛ nɛꞌʉ yʉ ꞌyɛ̨cꞌyɛi i ꞌbʉpʉ ja ra hnini Laodicea, nɛꞌʉ ꞌbʉpʉ ja ra hnini Hierápolis.
\v 14 Nuꞌa ra Lucas, ra médico, ɛ̨mmɛ dadí huɛ̨jʉ a, nɛꞌa i pɛnꞌnahʉ ran zɛngua.
\v 15 Nɛcä dra Pablogä dí pɛnpa ran zɛngua yʉ ꞌyɛ̨cꞌyɛ̨i ngue i ꞌbʉpʉ ja ra hnini Laodicea, nɛꞌa man juhʉ nangue ra Cristo ra Ninfas, nɛ gätho ʉ yʉ ꞌyɛ̨cꞌyɛ̨i ngue dim pɛti bʉ rán gu.
\v 16 Nɛ nu ahʉ, nuꞌbʉ gá jua a gá mamhbʉ na ra søcuą dí pɛnꞌnahʉ ya, dami thocpahʉ ʉ yʉ ꞌyɛ̨cꞌyɛ̨i bí ꞌbʉpʉ ja ra hnini Laodicea. Nɛꞌa manꞌda ra søcuą dá pɛhndä bʉ Laodicea, dami nuhʉ bʉ.
\v 17 Nɛ nuꞌi gra Arquipo, pɛ i jaua a dí xi aꞌi. Dami ꞌyøtꞌe xʉn ho ra ꞌbɛfi ngue bi ꞌda aꞌi ra Hmu, nɛ hingui tsꞌʉtho gui ꞌyøtꞌe.
\v 18 Nugä dra Pablogä, dá oꞌtꞌä ua na man zɛngua nangue ma ꞌyɛsɛ. Pɛ damim bɛ̨mhbʉ ngue dí ofädigä. Oją di jamansu ahʉ nɛ da mbäx ahʉ. Nɛ høntꞌa dí xiꞌahʉ ya.