\id 1TH
\h 1 TESALONICENSES
\toc1 1 TESALONICENSES
\mt1 1 TESALONICENSES
\mt2 Ná nꞌda ra søcuą bi ꞌyorba ra Pablo ʉ yʉ ꞌyɛ̨cꞌyɛi bʉ ja ra dąhnini Tesalónica
\c 1
\s Ran zɛngua
\p
\v 1 Nugä dra Pablogä nɛ ra Silvano nɛ ra Timoteo dí otꞌähe na ra søcuą, nɛ dí pɛnhꞌnahe ran zɛngua gätho ʉ yʉ ꞌyɛ̨cꞌyɛi gue dim pɛti bʉ ja ra hnini Tesalónica, gätho yʉ jąꞌi ngue in ꞌyohʉ Oją ma Tahʉ nɛ ra Jesucristo ma Hmuhʉ. Nɛ nu ahʉ nɛ dín ndehe din ja ahʉ rán jąpi Oją, nɛ da hyutꞌa ni mbʉihʉ Oją ma Tahʉ nɛ ma Hmuhʉ ra Jesucristo.
\s Bi tꞌutꞌʉ ꞌbɛpʉ dí ꞌyɛ̨cꞌyɛi ʉ ꞌbʉpʉ miꞌda yʉ häi
\p
\v 2 Nɛ ząi dí xihmbe jamadi Oją nangue ahʉ. Nɛ ząi dím bɛ̨n ahʉ ꞌbʉ dí yąhe Oją.
\v 3 Nɛ dím bɛ̨n ahʉ ꞌbʉ dí yąhe Oją ma Tahʉ, nangue ni tꞌɛ̨cꞌyɛihʉ gníꞌyøthʉ rá ꞌbɛfi Oją nɛ nangue nin huɛ̨catehʉ ɛ̨mmɛ guí humbi gam pɛhmbʉ, nɛ nangue a guí tømdahʉ ngue ba ɛ̨h mahønꞌa ra Jesucristo, nɛ gueꞌa gní hyätꞌi gní sɛthʉ ꞌbɛꞌa gätho guín nuhʉ.
\v 4 Ma zʉ cu ahʉ dí pąhmbe ngue ɛ̨mmɛ di huɛ̨cꞌahʉ Oją, nɛ bi huanꞌnahʉ ngue gyʉ mbɛti ahʉ a.
\v 5 Nɛ nuꞌbʉ rá mbʉdi dá mangähe bʉ a rán ho maꞌdaꞌyo ra Cristo, gá pąhmbʉ him mam hmansɛgä, pɛ nangue rá tsꞌɛdi a rá Hogandąhi Oją guí hyąmhbʉ a ram hma bi bɛ̨nꞌnahʉ gue majuąni a. Nɛ guí pąhmbʉ mam ꞌbʉihe nuꞌbʉ mám ꞌbʉcähe bʉ, nguetho dá utꞌahʉ ꞌbɛꞌa dám ꞌbʉ a nꞌda.
\v 6 Nɛ nu ahʉ gá tɛnhdʉ a ram ꞌbʉi dá utꞌahe ngue tengu bi ꞌyøtꞌ ra Hmu mahɛ̨tsꞌi. Nɛ madagueꞌa xʉn ngu ran ʉnbi gá nuhʉ, pɛ guehma gá hyąmhbʉ a ram hma nɛ gán johyahʉ nangue rá Hogandąhi Oją.
\v 7 Pɛ nangue mpähä thoho gá hyąmhbʉ ram hma nɛ gám ꞌbʉmanhohʉ, gätho gá ꞌyuthʉ ꞌbɛpʉ dí ꞌyɛ̨cꞌyɛi ʉ ꞌbʉpʉ ra häi Macedonia nɛpʉ ra häi Acaya.
\v 8 Nɛ nangue ahʉ gá jafʉ bi fą a rán ho maꞌdaꞌyo ra Cristo, janangueꞌa hinga hønbʉ ra häi Macedonia nɛ ra häi Acaya, pɛ hønbʉ go hapʉ i fądi gue ɛ̨mmɛ i ja ni tꞌɛ̨cꞌyɛihʉ nangue Oją. Nɛ him mahyoni ga xihmbe a ram hman ya.
\v 9 Nɛ nuꞌʉ gätho yʉ jąꞌi i ma ngue ɛ̨mmɛ gá simanhoje ꞌbʉ má mbähmbe bʉ ni hninihʉ. Nɛ i ma nangue gá sohmbʉ ni nyoguihʉ, nɛ nuya guí thąndehʉ Oją i ꞌbʉi ngue majuąni a.
\v 10 Nɛ i ma gue guí tøhmbʉ ba ɛ̨h mahønꞌa mahɛ̨tsꞌi ra Jesús, rá Tsꞌʉntꞌʉ Oją. Gueꞌa bá xoxꞌa Oją bʉ ꞌbʉ ʉ xʉn du, nɛ gueꞌa ra Jesús da yąnjʉ nangue rán tsꞌɛmbi Oją xʉn ʉ tho ngue ba ɛ̨hɛ.
\c 2
\s Rá ꞌbɛfi ra Pablo bʉ Tesalónica
\p
\v 1 Nɛ nu ahʉ ma zʉ cu ahʉ guí pąhmbʉ ngue hinga säti thoho dá mbähmbe bʉ guí ꞌbʉhmbʉ.
\v 2 Nɛ guí pąhmbʉ hangu nangu ran ʉnbi bi mba ma ʉnguigahe nuꞌbʉ mám ꞌbʉhmbe bʉ ja ra hnini Filipos. Pɛ madagueꞌa dá nuhe ran ʉnbi, nu Oją bi ꞌdaje ran zambʉi dá xi ahʉ rán ho maꞌdaꞌyo ra Cristo, madague xʉn ngu min nde da zʉje.
\v 3 Nguetho hin dá xi ahʉ nꞌda ram hma him majuąni, nɛ hin dá xi ahʉ nangue ꞌbɛꞌa ga tąsɛhe, nɛ hin dím bɛ̨ni ngue høntho xcá hä ahʉ.
\v 4 Pɛ nugähe nząi dí mamhbe tengu in nde Oją, nguetho Oją bi huangähe ga mamhbe rán ho maꞌdaꞌyo ra Cristo, nɛ i pą Oją ngue hin te dá cømhbe, nɛ hin dá homhbe ꞌbɛꞌa da numanho yʉ jąꞌi. Pɛ Oją di ąsca ma mbʉihe.
\v 5 Nɛ hin dí huanhde yʉm hma mahotho guepʉ da numanhoje yʉ jąꞌi. Nɛ hin dí homhbe ngue ga tąhmbe ra mbɛti. Nuꞌa Oją i pądi ꞌbɛꞌa dí mamhbe.
\v 6 Nɛ hin dá homhbe ꞌbɛꞌa dí numansuje yʉ jąꞌi, xínga gue ahʉ o gueꞌʉ miꞌda, madagueꞌa mi sä xcá øtꞌahe tsꞌɛdi nguetho ma ꞌbäigähe ra Cristo.
\v 7 Pɛ ɛ̨mmɛ dá tumpꞌa ma mbʉihe tenguꞌbʉ nꞌda ra mbe di jamansu yʉ́ tꞌʉhni, nangue man huɛ̨catehe dá øtꞌahʉ.
\v 8 Dín nde ga comhbʉ a rám hman Oją madagueꞌa jatho ga ɛm ma tehe, nguetho ɛ̨mmɛ dadí huɛ̨cꞌahʉ.
\v 9 Ma zʉ cu ahʉ, ha hin guím bɛ̨mhbʉ ꞌbɛꞌa dá øthe ꞌbʉ mám pɛhmbe bʉ ma pa nɛ ra xui ngue dá honsɛhe ꞌbɛꞌa dá homhbe, nguetho him mi nde ga pa ahe. Pɛ ra mate thoho dá xi ahʉ rám Hman Oją.
\v 10 Pɛ ha hin guí pąsɛhʉ, nɛ a Oją i pądi ꞌbɛꞌa mam ꞌbʉihe nuꞌbʉ mám ꞌbʉhmbe bʉ guí ꞌbʉhmbʉ gyʉ ꞌyɛ̨cꞌyɛihʉ, ngue høntꞌa Oją dín ndehe da tꞌɛ̨spi, nɛ hinꞌyʉ ꞌbɛꞌa dí mba ma yącpihe, nguetho gätho xʉn ho ꞌbɛꞌa dá øthe.
\v 11 Nɛ guí pąhmbʉ ngue nꞌda ngu nꞌda ahʉ dá øthe tenguꞌbʉ ma tꞌʉhni ahe tengutho nꞌda ra ta di huɛ̨c yʉ́ tꞌʉhni nɛ di un ran zofo. Nɛ xtá hątꞌahʉ ra tsꞌɛdi ni mbʉihʉ.
\v 12 Nɛ dá xiꞌahʉ ja tsꞌɛditho gui ꞌyøthʉ ram ꞌbʉi tengu i numanho Oją. Nguetho Oją bi zonhꞌnahʉ gui comhbʉ a rá tsꞌɛdi nuįxte bʉ di manda.
\v 13 Nɛ nząi dadí unhde ra jamadi Oją nangue ahʉ, nguetho nuꞌbʉ má xi ahʉ rám Hman Oją, gá hyąmhbʉ a majuąni rám Hman Oją, nɛ hin gá ꞌyɛ̨mhbʉ gue høntho rám hman ra jąꞌi. Nɛ gueꞌa ram hma dim pɛpʉ mbo ni mbʉihʉ ya, gätho ahʉ ngue guí ɛ̨cꞌyɛihʉ.
\v 14 Nu ahʉ ma zʉ cu ahʉ, gá nuhʉ ran ʉnbi gue bi ꞌyøtꞌa ni mɛnguhʉ, tengutho bi nu yʉ ꞌyɛ̨cꞌyɛi bʉ ra häi Judea nuꞌbʉ mi nu ran ʉnbi ngue bi ꞌyørpa yʉ́ mijudíohʉ ʉ.
\v 15 Nu yʉ judío bi hyo a ra Hmu Jesús, tengutho bi ꞌyørpa yʉ́ pøngahyą Oją mamꞌbɛtꞌo, nɛcähe bi hyønje thi, nɛ Oją din sʉhmbʉ ʉ, nɛ njoꞌo to i numanho ʉ.
\v 16 Nɛ nuꞌbʉ má xihmbe yʉ jąꞌi ngue hing yʉ judío ra ꞌyu dí pø Oją ʉ, pɛ bi hɛgähe ʉ yʉ judío. Janangueꞌa bin te yʉ́ tsꞌoqui ʉ, nɛ nuya bi tsꞌänni da nu rán tsꞌɛmbi Oją ntsꞌutho ʉ.
\s Nuꞌa ra Pablo nde da mba mahønꞌa bʉ Tesalónica
\p
\v 17 Ma zʉ cu ahʉ, nuꞌbʉ má njoꞌogähe bʉ ꞌda yʉ pa, hin dadí pumbɛ̨ni ahʉ, pɛ dím bɛ̨n ahʉ nɛ ɛ̨mmɛ dín ndehe ga mbähmbe bʉ, gua nu ahe.
\v 18 Nugähe mim bɛ̨ni ga mbähmbe bʉ, nɛ nugä dra Pablogä mi säpi ga mbagä bʉ xʉn ngu yʉ nidį, pɛ ꞌbex bi ząngua ra zįthu.
\v 19 Pɛ gueꞌa zɛhɛhʉ man johya ahe. Nguetho nuꞌbʉ bá ɛ̨h mahønꞌa ma Hmuhʉ ra Jesucristo, di nɛqui xʉn ho ma ꞌbɛfihe, ngue ya gá ꞌyɛ̨cꞌyɛihʉ.
\v 20 Majuąni guesɛ ahʉ man johya ahʉ, nguetho tenguꞌbʉ man tꞌunni ahʉ ga dä ahʉ bʉ.
\c 3
\p
\v 1-2 Pɛ nugä him mí hätꞌi ga tøꞌmi miꞌda yʉ pa ngue da ꞌbäx ahʉ. Janangueꞌa dá pɛnꞌnahʉ na ma zʉ cuhʉ ra Timoteo ba fäx ahʉ nɛ di zɛ ahʉ nangue ni tꞌɛ̨cꞌyɛihʉ, nɛ dá coꞌbe ua ja ra hnini Atenas. Nɛ nu ra Timoteo nꞌda rá ꞌyɛ̨hɛ Oją ngue dadím pɛhmbe ngue dí mamhbe rán ho maꞌdaꞌyo ra Cristo.
\v 3 Nuna ra Timoteo di zɛ ahʉ ngue hin gui ꞌuehmbʉ bʉ ja rá ꞌyu Oją nangue ran ʉnbi guín nuhʉ. Nguetho ya guí pąhmbʉ gue rá pähä Oją ga nuhʉ ran ʉnbi nangueꞌa ga tɛnhdʉ ra Cristo.
\v 4 Guí pąhmbʉ ꞌbɛꞌa dá xi ahʉ nuꞌbʉ mám ꞌbʉhmbʉ, ngue jatho guin nuhʉ ran ʉnbi tengu guín nuhʉ ya.
\v 5 Nɛ nuꞌbʉ him mi sä manꞌda nyaꞌa ga tøꞌmi, dá pɛhndä nꞌdihi bʉ ra Timoteo, nguetho dín nde ga pądi ꞌbɛꞌa guí øthʉ nangue ni tꞌɛ̨cꞌyɛihʉ. Nguetho nugä dí su da dą ahʉ ra zįthu, nɛ säti thoho ra ꞌbɛfi dá øtꞌahe bʉ ꞌbʉ.
\v 6 Pɛ nuna ra Timoteo ya bí ꞌbärpʉ guepʉ guí ꞌbʉhmbʉ nɛ dá hąmhbe ra nde nangue ni tꞌɛ̨cꞌyɛihʉ nɛ nangue nin huɛ̨catehʉ. Nɛ bi xije ngue nząi ɛ̨mmɛ guím bɛ̨nje nɛ guín nde guin nuje, tengutho bʉ na ndegähe gan nu ahe.
\v 7 Janangueꞌa ma zʉ cu ahʉ, madagueꞌa dín nuhe ran ʉnbi ua, pɛ nuꞌbʉ má øhmbe ngueꞌa gadí zacuatho ni tꞌɛ̨cꞌyɛihʉ, ꞌbex bi hyu ma mbʉihe.
\v 8 Nɛ nugähe sä ga häthe ʉ yʉn ʉnbi dín nuhe ua, nguetho dí pąhmbe gue ya gadí thotꞌa ni tꞌɛ̨cꞌyɛihʉ nangueꞌa ra Hmu.
\v 9 Thocua thoho dí xihmbe jamadi Oją nangueꞌa ran johya gadí ꞌdaje. 
\v 10 Nɛ nu ra pa nɛ ra xui dí yąhe Oją nangue ahʉ, nɛ dí äpꞌahe rá tsꞌɛdi Oją ngue gan nu ahʉ mahønꞌa. Nguetho dín nde ga xänꞌnahʉ ꞌbɛꞌa gadí ꞌbɛhmbʉ nangue ni tꞌɛ̨cꞌyɛihʉ.
\v 11 Nɛ dí äcähe Oją ma Tahʉ nɛꞌa ma Hmuhʉ ra Jesucristo gue di jaje ga mbähmbe bʉ gua nu ahʉ.
\v 12 Nɛ ma Hmuhʉ di ja ahʉ ngue ꞌda gdán huɛ̨ctahʉ nꞌda ngu nꞌda ahʉ, nɛ gui huɛ̨jʉ gätho miꞌda, tengugähe ngue dadí huɛ̨cꞌahʉ.
\v 13 Gue nuꞌa ran huɛ̨cate i ja ahʉ dí zacꞌa ni mbʉihʉ nɛ di ja ahʉ nꞌdatꞌa Oją guim bɛ̨mhbʉ, nɛ gätho ma hoqui bʉ dán nu Oją ma Tahʉ nuꞌbʉ bá ɛ̨h mahønꞌa ma Hmuhʉ ra Jesús din ꞌyohʉ gätho xʉm pøhø.
\c 4
\s Dam ꞌbʉhmbʉ a dí numanhojʉ Oją
\p
\v 1 Nuya ma zʉ cu ahʉ, dí xi ahʉ nangue rá thuhu ma Hmuhʉ ra Jesús gue gui thojʉ gui ꞌyøthʉ ꞌbɛꞌa dá xänꞌnahʉ. Nɛ gam ꞌbʉhmbʉ a dí numanho ahʉ Oją, nɛ manꞌda gui thojʉ xʉn ho.
\v 2 Nɛ guim bɛ̨mhbʉ ya ꞌbɛꞌa gätho dá xänꞌnahʉ nangue rá thuhu ma Hmuhʉ ra Jesús gue gui ꞌyøthʉ.
\v 3 Nɛ gueꞌa nde Oją gue gui däfʉ gätho ni mbʉihʉ, nɛ hin gui ꞌyøthʉ ran ꞌyomtꞌɛ̨ni.
\v 4 Nɛ nꞌda ngu nꞌda ahʉ ndeꞌbʉ gui pąhmbʉ guin numansu ni xisu zɛhɛhʉ, janangueꞌa hin gui ꞌyøthʉ ran ꞌyomtꞌɛ̨ni miꞌda yʉ xisu.
\v 5 Nɛ hin gui ꞌyørpahʉ ran tsꞌo tengu i øtꞌʉ yʉ jąꞌi ngue hingui pą Oją.
\v 6 Ndeꞌbʉ xínga nꞌda ahʉ gui ꞌyøthʉ gui ʉnba ni minꞌyohʉhʉ ngue gui nutontofʉ rá xisu. Nguetho Oją di cosꞌahʉ ran ʉnbi ꞌbʉ gueꞌa gui ꞌyøthʉ, tengu dá xi ahʉ.
\v 7 Nguetho Oją bi zongahʉ ga øthʉ ran ho nɛ him bi zongahʉ ga øthʉ ran tsꞌo.
\v 8 Nuꞌa toꞌo fɛsthoho ʉ yʉn zofo im mangua, pɛ hin rám hmansɛ nꞌda ran ꞌyohʉ i fɛsthoho pɛ rán tꞌɛ̨di Oją, ngue bi ꞌdajʉ rá Hogandąhi.
\v 9 Nu Oją ya bi xänꞌnahʉ ngue gan huɛ̨jʉ nꞌda ngu nꞌda ahʉ, janangueꞌa hinꞌyʉ manꞌda ga xi ahʉ.
\v 10 Nɛ ya gá ꞌyuthʉ nin huɛ̨catehʉ gätho yʉ cu i ꞌbʉpʉ ra häi Macedonia. Pɛ dí xi ahʉ ma zʉ cu ahʉ nɛ manꞌda gui ꞌyuthʉ nin huɛ̨catehʉ.
\v 11 Nɛ nu ahʉ o gadím pate thohohʉ pɛ gui ꞌyøzɛhɛ ni ꞌbɛfi zɛhɛhʉ nɛ gui hyądumbʉi gui hyomhbʉ ꞌbɛꞌa gdám ꞌbʉhmbʉ, tengu xtá xi ahʉ.
\v 12 Nuꞌbʉ ngubʉ gui ꞌyøthʉ, da numanho ahʉ ʉ hingui ɛ̨cꞌyɛi, nguetho hin guí äthʉ ꞌbɛꞌa guí homhbʉ. 
\s Ba ɛ̨h mahønꞌa ma Hmuhʉ ra Jesucristo
\p
\v 13 Nuya ma zʉ cu ahʉ dín nde ahʉ gui pąhmbʉ ꞌbɛꞌa din ja ʉ yʉ ꞌyɛ̨cꞌyɛi xʉn du, janangueꞌa hin da du ni mbʉihʉ tengu ʉ yʉ jąꞌi nte mán ho i tøꞌmi, ngue hingui pą Oją.
\v 14 Nɛ tengu bʉ na ɛ̨cꞌyɛihʉ ngue bi du ra Jesús nɛ bi dąmbɛ̨ni a, nɛ ngutho bʉ dá ɛ̨cꞌyɛihʉ da dąmbɛ̨ni ʉ yʉ ꞌyɛ̨cꞌyɛi xʉn du, nɛ di jap Oją gätho din ꞌyohʉ ra Jesús nuꞌbʉ bá ɛ̨h mahønꞌa.
\v 15 Guehna rám hman ra Hmu dí xi ahʉ ya, nujʉ dyʉ ꞌyɛ̨cꞌyɛihʉ gue dí ꞌbʉthohʉ ꞌbʉ bá ɛ̨h mahønꞌa ra Hmu, hin dam ꞌbɛtꞌohʉ ga texhʉ mahɛ̨tsꞌi, pɛ nuꞌʉ yʉ ꞌyɛ̨cꞌyɛi xʉn du dim ꞌbɛtꞌo ʉ.
\v 16 Nguetho guesɛ ra Hmu ba cąh mahønꞌa mahɛ̨tsꞌi, nɛ ɛ̨mmɛ tsꞌɛdi da ma nangue rá tsꞌɛdi nuꞌbʉ bi zøn ra pa da man Oją. Nɛ rá ngʉrpa mꞌbɛhni mahɛ̨tsꞌi ɛ̨mmɛ ntsꞌɛdi da ma. Nɛ gätho na ngʉni ra ximhäi da tꞌø a rá thʉxi Oją. Nɛ gätho ʉ toꞌo xí ꞌyɛ̨cꞌyɛi, ngue xʉn du, da dąmbɛ̨ni, nɛ gueꞌʉ rá mbʉdi da ndexpʉ mahɛ̨tsꞌi.
\v 17 Nɛ dim ꞌbɛjua ʉ yʉ ꞌyɛ̨cꞌyɛi ngue i ꞌbʉtho, ꞌdatꞌa da zixcahʉ,  nɛ dan cꞌathʉ ra Hmu bʉ i ja yʉ güi nɛ dam ꞌbʉhmbʉ ra Hmu gätho yʉ pa maząi.
\v 18 Nɛ guehna dá xi ahʉ gnín hyurpa ni mbʉihʉ nꞌda ngu nꞌda ahʉ.
\c 5
\p
\v 1 Ma zʉ cu ahʉ, hingui jatho ga xi ahʉ jąmꞌbʉ da zøn ʉ yʉ pa din ja ʉ an tsꞌänni din ja.
\v 2 Nguetho nu ahʉ guí pąhmbʉ xʉn ho ngue njongui pądi, o gue ra pa o gue ra xui ba ɛ̨h ra Hmu. Tenguꞌbʉ hingui pą a nꞌda jąmꞌbʉ ba ɛ̨ꞌa nꞌda ra bɛ̨.
\v 3 Nɛ nuꞌbʉ da man ʉ hing yʉ ꞌyɛ̨cꞌyɛi gue gätho i ꞌbʉmanho nɛ nte mán tsꞌo din ja, ꞌbex ba ɛ̨h ran tsꞌɛmbi da ꞌyøtꞌ Oją ngue hin dim pommi ʉ. Nguetho tengu nꞌda ra xisu gue bi zøn ra ora dim ꞌbʉh rá tꞌʉhni, nɛ hin hapʉ sä da mbatho.
\v 4 Pɛ nu ahʉ ma zʉ cu ahʉ, hin di pi ahʉ ngue tenguꞌbʉ ba ɛ̨ a nꞌda ra bɛ̨, nɛ hingan tsꞌärbʉ da zøhø, nɛ di pi ʉ i hupʉ ja ra ꞌbɛxui. Pɛ guí tømhbʉ ra pa ba ɛ̨h ra Hmu.
\v 5 Nguetho gätho gahʉ dí ꞌbʉhmbʉ bʉ ja ra ꞌbɛxui tenguꞌbʉ ra xui.
\v 6 Ndeꞌbʉ hin dam ꞌbʉhmbʉ tenguꞌbʉ dí ąhmbʉ, tengu ʉ miꞌda, pɛ dí nuhmbʉ nɛ dan ꞌyomfɛ̨nihʉ xʉn ho.
\v 7 Nu ra xui i ąh yʉ jąꞌi nɛ ra xui di ho di mihni.
\v 8 Pɛ nujʉ gue dí ꞌbʉhmbʉ ja rán nɛqui Oją, ndeꞌbʉ nząi din jajʉ ran ꞌyomfɛ̨ni xʉn ho. Nɛ nujʉ jatho ga hehʉ rá tsꞌɛdi Oją nangue ma tꞌɛ̨cꞌyɛihʉ, nɛ ran huɛ̨cate, nɛ ga tømdahʉ rán ho maꞌdaꞌyo ra Cristo gue gueꞌa dí pøjʉ, janangueꞌa hin da dąjʉ ra zįthu.
\v 9 Nguetho Oją him bi zängahʉ ga nuhʉ rán tsꞌɛmbi a. Pɛ bi zängahʉ ga hąmhbʉ a ran ho maꞌdaꞌyo ngue di pøjʉ ma Hmuhʉ ra Jesucristo.
\v 10 Nguetho nu ra Jesucristo bi du nanguejʉ, ngue in nde ꞌdarbʉ dam ꞌbʉhmbʉ a, madagueꞌbʉ xtá tuhʉ o gue dí tehʉ nuꞌbʉ bá ɛ̨h mahønꞌa.
\v 11 Janangueꞌa damin hyurpa ni mbʉihʉ nɛ gam fäxhʉ nꞌda ngu nꞌda ahʉ tengutho guí øthʉ ya.
\s Nu ra Pablo di un ran zofo yʉ ꞌyɛ̨cꞌyɛi
\p
\v 12 Nuya ma zʉ cu ahʉ, damin numansuhʉ ʉ gätho bi huan Oją ngue yʉn ngʉrpi bʉ, ngue xänꞌnahʉ nɛ di ꞌda ahʉ ran zofo nangue Oją.
\v 13 Dami numanhohʉ ʉ nɛ ɛ̨mmɛ gui huɛ̨jʉ nangue ra ꞌbɛfi i øtꞌe nangue ahʉ. Nɛ dami ꞌyɛsꞌhʉ a gnín junthʉ bʉ guí ꞌbʉhmbʉ.
\v 14 Nuya ma zʉ cu ahʉ dí xi ahʉ, dami xihmbʉ ʉ i dąnhyɛ̨i ngue hingui ho ꞌbɛꞌa i øtꞌe. Nɛ dami zɛhmbʉ toꞌo i tu yʉ́ mbʉi, nɛ dami zɛhmbʉ ʉ ngue hinguin zaqui yʉ́ tꞌɛ̨cꞌyɛi. Nɛ o gadín xømbʉihʉ nangue gätho ʉ, pɛ dami fäxhʉ ʉ.
\v 15 Nɛ gan jamansuhʉ hin gui cospahʉ ran tsꞌo ꞌbʉ i øtꞌahʉ ran tsꞌo ʉ ꞌda, pɛ gan ꞌyørpahʉ ran ho nꞌda ngu nꞌda ahʉ, nɛ gätho i ꞌbʉcua ja ra ximhäi.
\v 16 Nɛ daman johyahʉ gätho yʉ pa.
\v 17 Nɛ ꞌyo guí ɛsꞌhʉ gan yąhʉ Oją.
\v 18 Nɛ Oją gui xihmbʉ jamadi ꞌbɛꞌa gätho bi ꞌyøtꞌahʉ. Nguetho gueꞌa in nde Oją a gui ꞌyøthʉ, gue ahʉ guín ꞌyohʉ ra Cristo Jesús.
\v 19 Nɛ ꞌyo guí sɛrpahʉ rá tsꞌɛdi rá Hogandąhi Oją dim pɛpʉ mbo ni mbʉihʉ.
\v 20 Nɛ ꞌyo guí ømanꞌʉhʉ ꞌbʉ ꞌboꞌo da ma, ngue dim pøngahyą Oją.
\v 21 Dami bɛ̨mhbʉ gue ꞌbɛꞌa gätho xʉn ho o hinꞌna. Nuꞌbʉ xʉn ho, dami pɛsꞌhʉ.
\v 22 Dami ꞌuehmbʉ gätho ꞌbɛꞌa mán tsꞌo.
\v 23 Nu Oją gue bi hocꞌahʉ, nɛ di ja ahʉ gätho ni mbʉihʉ guim bɛ̨mhbʉ a. Nɛ di ja ahʉ ni mbʉihʉ nɛ ni tehʉ nte mán tsꞌo din ꞌyohʉ nuꞌbʉ bá ɛ̨h mahønꞌa ma Hmuhʉ ra Jesucristo.
\v 24 Nu Oją gueꞌa bi zonꞌnahʉ, ngubʉ da ꞌyøtꞌahʉ. Nguetho di jąꞌtsꞌa im ma nɛ da ꞌyøtꞌe gätho na.
\s Ran zɛngua ran zɛgui nɛ rán jąpi Oją
\p
\v 25 Ma zʉ cu ahʉ dami ꞌyäfʉ rá tsꞌɛdi Oją nanguecähe.
\v 26 Dami zɛnguagahʉ tsꞌʉ ʉ yʉ cu nangue ran huɛ̨cate.
\v 27 Nuya dí xi ahʉ nangue rán tꞌɛ̨di ma Hmuhʉ, dami mamhbʉ ma søcuągä bʉ ꞌbʉi gätho yʉ cu.
\v 28 Nɛ gueꞌa ma Hmuhʉ ra Jesucristo di jąpꞌahʉ. Høntꞌa dí xi ahʉ ya.