\id 2TH
\h 2 TESALONICENSES
\toc1 2 TESALONICENSES
\mt1 2 TESALONICENSES
\mt2 Ná yoho ra søcuą bi ꞌyorba ra Pablo ʉ yʉ ꞌyɛ̨cꞌyɛi bʉ ja ra dąhnini Tesalónica
\c 1
\s Ran zɛngua
\p
\v 1 Nugä dra Pablo, nɛ ra Silvano nɛ ra Timoteo dí oꞌtꞌahʉ na ra søcuą gätho ahʉ gyʉ cuhʉ nangue ra Cristo guí ꞌbʉhmbʉ bʉ ra hnini Tesalónica, gue ahʉ guí ꞌbʉhmbʉ Oją ma Tahʉ nɛ ma Hmuhʉ ra Jesucristo.
\v 2 Nuꞌa Oją ma Tahʉ, nɛ ma Hmuhʉ ra Jesucristo dí ndepe di ꞌda ahʉ rán jąpi nɛ da hyutꞌa ni mbʉihʉ.
\s Di ʉnba ʉ yʉ tsꞌomꞌbäi ꞌbʉ bá peng ra Cristo
\p
\v 3 Ma zʉ cu ahʉ jatho ga xihmbe Oją jamadi nangue ahʉ. Nɛ xʉn ho ngue ngubʉ dím bɛ̨mhbe, nguetho thocua thoho manꞌda te ni tꞌɛ̨cꞌyɛihʉ, nɛ manꞌda manꞌda gnín huɛ̨ctahʉ nꞌda ngu nꞌda ahʉ.
\v 4 Janangueꞌa manꞌda jagähe ran johya nuꞌbʉ dí xihmbe miꞌda yʉ ꞌyɛ̨cꞌyɛi ꞌbɛꞌa guí øthʉ. Nguetho hin gadín xømbʉihʉ nangue ni tꞌɛ̨cꞌyɛihʉ, madagueꞌa hangu nangu yʉn ʉnbi guín nuhʉ nɛꞌʉ ꞌbɛꞌa gätho i tꞌøtꞌahʉ ya nangue guí tɛnhdʉ ra Cristo.
\v 5 Nangue a guí häthʉ yʉn ʉnbi, guí uhmbʉ gue jatho di ʉnba Oją ʉ to di ʉnꞌnahʉ, pɛ nu ahʉ gám pomhbʉ a. Nɛ nuꞌʉ yʉn ʉnbi guín nuhʉ ya, gueꞌa ní hocꞌa ni mbʉihʉ Oją tengu rán säui bʉ di manda Oją.
\v 6 Nɛ xʉn ho da ꞌyøtꞌ Oją ꞌbʉ bi un ran ʉnbi ʉ to di ʉnꞌnahʉ.
\v 7 Nɛ nu Oją di japi din säya nin ʉnbi guí nuhʉ ya, nɛ ngutho da ꞌyørcahe ꞌbʉ bá ɛ̨h mahønꞌa mahɛ̨tsꞌi ma Hmuhʉ ra Jesús, din ꞌyohʉ yʉ́m ꞌbɛhni gue i ja yʉ́ tsꞌɛdi, nɛ ban ꞌyohʉ ra sibi ntsꞌutho.
\v 8 Nɛ nuꞌbʉ bá ɛ̨hɛ, di un ran tsꞌɛmbi gätho toꞌo hingui pą Oją, nɛ gätho toꞌo him bi ꞌyørpamasu rán ho maꞌdaꞌyo ma Hmuhʉ ra Jesucristo.
\v 9 Nɛ nuꞌʉ toꞌo da nu ran tsꞌɛmbi xmá mba da nu ran ʉnbi ngue njąmꞌbʉ da guadi, nɛ ma ꞌueque tho bʉ ꞌbʉh ra Hmu mahɛ̨tsꞌi, nɛpʉ hapʉ ja rá tsꞌɛdi nuįxte.
\v 10 Pɛ nuꞌʉ yʉ ꞌyɛ̨cꞌyɛi, gueꞌʉ dí hnu a rá nuįxte a ra Hmu ꞌbʉ bi zøn ra pa ba ɛ̨hɛ. Nɛ gätho yʉ ꞌyɛ̨cꞌyɛi da ꞌyɛ̨spa a, nɛ ahʉ gan ꞌyohʉ ʉ, nguetho gá ꞌyɛ̨cꞌyɛihʉ ran ho maꞌdaꞌyo dá xi ahʉ.
\v 11 Janangue a nząi dí yąhe Oją nangue ahʉ. Nɛ dí äfe di ꞌdaꞌa ni mbʉihʉ ngue yʉ́n thɛhʉ ram ꞌbʉi bi zänꞌnahʉ. Nɛ nuꞌa Oją di ꞌda ahʉ rá tsꞌɛdi gui ꞌyøthʉ ran ho guím bɛ̨ni gui ꞌyøthʉ. Nɛ nangue ni tꞌɛ̨cꞌyɛihʉ, Oją di zɛ ahʉ gui ꞌyøthʉ rá ꞌbɛfi.
\v 12 Nɛ nangueꞌa ꞌbɛꞌa gui ꞌyøthʉ bʉya, nuꞌa ma Hmuhʉ ra Jesucristo da tꞌɛ̨spi. Nɛ nuꞌa xin da ꞌyɛ̨sꞌahʉ, nangue rá mate zɛhɛ a Oją nɛ ma Hmuhʉ ra Jesucristo.
\c 2
\s Ran ꞌyohʉ ngue ra ngʉrpa ꞌyøtꞌatsꞌoqui
\p
\v 1 Nuya ma zʉ cu ahʉ, dí xi ahʉ ya ꞌbɛꞌa din ja nuꞌbʉ bá ɛ̨h mahønꞌa ma Hmuhʉ ra Jesucristo, ngue di pɛrcahʉ ꞌdarbʉ dam ꞌbʉhmbʉ.
\v 2 ꞌYo gadí päh nin ꞌyomfɛ̨nihʉ ꞌbʉ ꞌboꞌo da xi ahʉ, ya bi zøn ra pa ba ɛ̨h ra Hmu. ꞌYo gadí ꞌyon ni mbʉihʉ ꞌbʉ ꞌboꞌo da xi ahʉ bi bɛ̨nba Oją ngue ya ba ɛ̨h ra hmu ya. Nɛ ꞌyo guí ɛ̨cꞌyɛihʉ ꞌbʉ ꞌboꞌo da hyä ahʉ ngue da ꞌyɛ̨n ahʉ dá oꞌtꞌähe ra søcuą dá mamhbe ya bi zøh ra Hmu mahɛ̨tsꞌi.
\v 3 Nɛ ꞌyo guí ɛ̨cꞌyɛihʉ ꞌbɛꞌa gätho i man yʉ jąꞌi. Nguetho him ba ɛ̨h ra Hmu asta gueꞌbʉ go gätho yʉ jąꞌi i ꞌbʉcua ja ra häi ngue hingui ɛ̨cꞌyɛi din sʉhmbʉ Oją. Nɛ him ba ɛ̨h ra Cristo asta gueꞌbʉ din ꞌyo a nꞌda ran ꞌyohʉ ngue ra ngʉrpa ꞌyøtꞌatsꞌoqui, ngue mꞌbɛjua da tꞌɛ̨rpʉ ja ran ʉnbi maząi.
\v 4 Nɛ nuꞌa ra ngʉrpa ꞌyøtꞌatsꞌoqui da zʉi gätho yʉ ꞌyɛ̨cꞌyɛi gue i thąnde Oją, nɛ da zʉ ʉ miꞌda i thąnde høntꞌa go ꞌbɛꞌa i thąnde, nguetho in nde a dí mba nthąnde zɛhɛ. Nɛ da yʉrpʉ ja nꞌda ra niją nɛ da hyupʉ, tenguꞌbʉ gueꞌa Oją a.
\v 5 Ha hin guím bɛ̨mhbʉ guehna dá xi ahʉ nuꞌbʉ mám ꞌbʉhmbʉ bʉ.
\v 6 Pɛ nuya guí pąhmbʉ ꞌbɛꞌa i sąmmi ngue ba ɛ̨hɛ, nguetho hinga na søn ra pa da man Oją gue ba ɛ̨hɛ.
\v 7 Pɛ nuya ɛ̨mmɛ xʉn ngu dim pɛpʉ yʉ́ mbʉi yʉ jąꞌi a rá tsꞌɛdi ra zįthu, ngue hin di nɛqui. Pɛ i pa ntsꞌąmbi thoho rá tsꞌɛdi asta gueꞌbʉ go bi zøn ra pa ngue Oją di ꞌuecꞌa toꞌo i sąmmi.
\v 8 Nɛ gätho da nu ran ꞌyohʉ ngue ra ngʉrpa ꞌyøtꞌatsꞌoqui. Pɛ nuꞌbʉ bá ɛ̨h mahønꞌa ra Hmu Jesús nuįxtetho rá tsꞌɛdi, da hyo a ran ꞌyohʉ, ngue da huic thoho.
\v 9 Nɛ nuꞌbʉ bá ɛ̨h ran ꞌyohʉ ngue xʉn ngu rá tsꞌɛdi ra zįthu in ꞌyoui, nɛ da ꞌyøtꞌe xʉn ngu yʉ hmɛpya, nɛ yʉn tꞌøtꞌe nuįxte ngue dí hyätꞌ yʉ jąꞌi.
\v 10 Nɛ gätho ꞌbɛꞌa mán thäte da ꞌyøtꞌe, ngue da hyätꞌ yʉ jąꞌi i ꞌyo rá ꞌyu ram ꞌbɛdi, gueꞌʉ him mín nde da ꞌyɛ̨cꞌyɛi a majuąni guepʉ mí sä xtím pøhø.
\v 11 Nɛ nuꞌʉ gätho him bi nde da ꞌyɛ̨cꞌyɛi a majuąni Oją, di japi da ꞌyɛ̨cꞌyɛi yʉ fɛhni nɛ da dɛnꞌna ran ꞌyohʉ ngue ra ngʉrpa ꞌyøtꞌatsꞌoqui.
\v 12 Janangueꞌa gätho ʉ him bi ꞌyɛ̨cꞌyɛi a majuąni pɛ manꞌda di ho ran tsꞌo, ꞌdarbʉ da nu rán tsꞌɛmbi Oją ʉ.
\s Nthahni dim pøhø
\p
\v 13 Pɛ nząi ga xihmbe jamadi Oją nangue ahʉ ꞌbɛꞌa gätho bi ꞌyøtꞌahʉ ma zʉ cu ahʉ, ngue di huɛ̨cꞌahʉ ra Hmu. Nguetho Oją bi huahnꞌnahʉ rá mbʉdi thoho ngue di pø ahʉ. Nɛ nangue gá ꞌyɛ̨cꞌyɛihʉ a majuąni, nuꞌa rá ꞌbɛfi rá Hogandąhi Oją í bo ni mbʉihʉ.
\v 14 Nɛ bi huahnꞌnahʉ Oją ngue gá ꞌyɛ̨cꞌyɛihʉ ꞌbʉ má xi ahe rán ho maꞌdaꞌyo ra Cristo. Nɛ bi zänꞌnahʉ Oją gui comhbʉ rá nuįxte ma Hmuhʉ ra Jesucristo.
\v 15 Nuya ma zʉ cu ahʉ dami thoctahʉ ni tꞌɛ̨cꞌyɛihʉ, nɛ ꞌyo gadí uąnsꞌhʉ ꞌbɛꞌa guím bɛ̨mhbʉ, nɛ ꞌyo gadí pumbɛ̨nihʉ ꞌbɛꞌa dá xänꞌnahʉ nuꞌbʉ ꞌdarbʉ mám ꞌbʉhmbʉ, nɛꞌa ꞌbɛꞌa dá xi ahʉ nuꞌbʉ má oꞌtꞌahe ʉ yʉ søcuą.
\v 16 Nuya gue ma Hmuhʉ ra Jesucristo, guesɛ a, nɛ Oją ma Tahʉ, da hyutꞌa ni mbʉihʉ maząi nangue rán hosɛ Oją. Nuꞌa Oją di huɛ̨cꞌahʉ, nɛ nangue rá mate bi jajʉ ga tøhmbʉ ꞌbɛꞌa di ꞌdajʉ.
\v 17 Nɛ nuꞌa Oją da hyu ni mbʉihʉ, nɛ di zɛtꞌa ni mbʉihʉ ngue gui mamhbʉ nɛ gui ꞌyøthʉ ꞌbɛꞌa gätho xʉn ho.
\c 3
\s Gui ꞌyäfʉ Oją nanguecähe, ɛ̨nꞌa ra Pablo
\p
\v 1 Høntꞌa dí xi ahʉ ya ma zʉ cu ahʉ, dami ꞌyäfʉ rá tsꞌɛdi Oją nanguecähe nꞌdahma din ja rá tsꞌɛdi rám hman ra Hmu, nɛ da bømanho hønbʉ go hapʉ ga ꞌyomhbe. Nɛ gätho toꞌo da ꞌyøde da hyąni nangue ran johya, tengutho bin ja bʉ guí ꞌbʉhmbʉ.
\v 2 Nɛ gui ꞌyäfʉ rá tsꞌɛdi Oją ngue da yąnje bʉ ꞌbʉh yʉ tsꞌomꞌbäi jąꞌi, nguetho hinga gätho in nde da hyąn rám hman Oją.
\v 3 Nguetho nuꞌa ra Hmu njąmꞌbʉ da hyɛgahʉ pɛ nząi da mbäjʉ, nɛ i ja rá tsꞌɛdi ngue hin di japi di ʉnꞌnahʉ ra dąmantsꞌo.
\v 4 Nɛ nuꞌa ra Hmu di jaje dí pąhmbe ngue gadí thoctahʉ guí øthʉ ꞌbɛꞌa gätho dí xi ahe.
\v 5 Nɛ nuꞌa ra Hmu di ja ahʉ manꞌda manꞌda gui pąhmbʉ rán huɛ̨cate Oją, nɛ di ja ahʉ gui hyäthʉ ꞌbɛꞌa gätho guí thohmbʉ tengutho bi ꞌyøtꞌa ra Cristo.
\s Jatho gui ꞌyøtꞌ ni ꞌbɛfi zɛhɛhʉ
\p
\v 6 Ma zʉ cu ahʉ dí xi ahʉ nangue rá thuhu ma Hmuhʉ ra Jesucristo, dami ꞌuehmbʉ tsꞌʉ bʉ ꞌbʉ ʉ ni cuhʉ i dąnhyɛ̨i, ngue hingui nde dim pɛfi, gueꞌʉ hingui tɛnꞌna ꞌbɛꞌa dá xänꞌnahe.
\v 7 Nɛ nuꞌahʉ guí pąhmbʉ ꞌbɛꞌa gdám ꞌbʉhmbʉ, tengu dá utꞌahe ꞌbʉ mám ꞌbʉcähe bʉ, ngue hin dám ꞌbʉndąnhyɛ̨i thohogähe.
\v 8 Nɛ xíngui tsꞌʉ gá ꞌdaje ꞌbɛꞌa dá homhbe. Pɛ dám pɛhmbe ra pa nɛ ra xui nꞌdahma bin ja ꞌbɛꞌa dá homhbe, nɛ xíngui tsꞌʉ dá pa ahe. 
\v 9 Madague mí sä xcá ähmbe ngue xquí zɛje. Pɛ dá ndehe ga utꞌahe ra hmɛpya gui ꞌyøthʉ.
\v 10 Nɛ nuꞌbʉ mám ꞌbʉhmbʉ bʉ, dá xi ahʉ, ngueꞌbʉ ꞌbʉ a nꞌda hingui nde dim pɛfi, hin din sihmɛ ꞌbʉ, pɛ da zä ra thuhu ꞌbʉ.
\v 11 Nguetho dí øhmbe gue ꞌbʉ i ꞌda ahʉ hingui nde dim pɛfi, pɛ di hødąnhyɛ̨i thoho nɛ ndetho din thįnt pʉ hin yʉ́ ꞌbɛfi.
\v 12 Nuya nangue rá tsꞌɛdi ma Hmuhʉ ra Jesucristo, dí xi ʉ toꞌo hingui nde dim pɛfi, ngue da hyąnya zɛhɛ rá ꞌbɛfi da ꞌyøtꞌe, nɛ da hyonsɛ ꞌbɛꞌa dám ꞌbʉi.
\v 13 Pɛ nuꞌahʉ ma zʉ cu ahʉ, o gadín xømbʉihʉ gui ꞌyøthʉ ran ho.
\v 14 Nuꞌbʉ ꞌbʉ a nꞌda ahʉ hingui nde da ꞌyøtꞌa ꞌbɛꞌa dí xi ahʉ, dami hyɛthʉ ꞌbʉ, janangueꞌa da mbɛꞌtsꞌ yʉ́ sä.
\v 15 Pɛ o gadín sʉhmbʉ, pɛ gui unhdʉ ran zofo tenguꞌbʉ ni cuhʉ.
\s Ran zɛgui ran zofo
\p
\v 16 Nɛ guesɛ ra Hmu, høntꞌa sä da hyutꞌa ni mbʉihʉ, høntꞌa go ꞌbɛꞌa guí thohmbʉ gätho yʉ pa. Nɛ nuꞌa ra Hmu gam ꞌbʉhmbʉ gätho ahʉ.
\v 17 Nugä dra Pablo dí oꞌtꞌä na ran zɛngua i ja ua ya nangue ma ꞌyɛsɛgä. Tenguꞌbʉ ma firmagä na, ngue gätho ya ma søcuą.
\v 18 Nuya nuꞌa ma Hmuhʉ ra Jesucristo di jąpꞌahʉ, gätho ahʉ. Nɛ høntꞌa dí xi ahʉ a ya.