\id 1TI
\h 1 TIMOTEO 
\toc1 1 TIMOTEO
\mt1 1 TIMOTEO
\mt2 Ná nꞌda ra søcuą bi ꞌyorba ra Timoteo a ra Pablo
\c 1
\s Ran zɛngua 
\p
\v 1 Nugä dra Pablogä, ma ꞌbäigäꞌbe ra Jesucristo nangue rán tꞌɛ̨di Oją ma yąntehʉ, nɛ ra Jesucristo, guesɛꞌa ran ho dí tømhbʉ a.
\v 2 Dí pɛnhꞌna nꞌda ra søcuą gra Timoteo, tenguꞌbʉ majuąni ma tsꞌʉntꞌʉ i, ngue ya dá xänꞌna ma tꞌɛ̨cꞌyɛihʉ. Nɛ dí äp Oją ma Tahʉ di ꞌdaꞌa rá mate nɛ rán huɛ̨cate, nɛ da hyutꞌa ni mbʉi a ra Cristo Jesús ma Hmuhʉ.
\s Da mba ma hɛcpi ʉ nꞌdanꞌyo in xänbate
\p
\v 3 Nɛ tengu dá xiꞌa ꞌbʉ má mba bʉ Macedonia, nɛ ngutho dí xiꞌa ya, dami copʉ Éfeso, nɛ gui hɛcpa ʉ ꞌda bí ꞌbʉpʉ, ngue hinga nꞌdanꞌyo da ma ꞌbʉ in xänbate.
\v 4 Nɛ dami xifi hin din xäh miꞌda yʉ cuento gue ꞌbɛꞌa sä ɛ̨mbi bi ꞌyøtꞌʉ ndu ma bombøtahʉ mayaꞌbʉ nɛꞌbʉ ɛ̨mmɛ ma ꞌbɛꞌa yʉ́ thuhu ʉ, ngue manꞌda di xąntꞌʉ yʉ́m hma. Nguetho nuꞌʉ yʉm hma tengu ʉ, säti thoho ran ꞌyomfɛ̨ni di unꞌna nꞌda, pɛ hin di ꞌyomfɛ̨niba nꞌda da ꞌyɛ̨cꞌyɛi Oją.
\v 5 Pɛ nuꞌa ma ꞌbɛfihʉ dyʉ xänbatehʉ, ga xänba yʉ jąꞌi dan huɛ̨jʉ. Nɛ gueꞌa ran huɛ̨cate di nɛqui bʉ ma mbʉihʉ ꞌbʉ mꞌbeꞌtꞌe a, nɛꞌbʉ ząi dí øthʉ a di bɛ̨ngahʉ Oją, nɛꞌbʉ høntꞌa Oją dím bɛ̨mhbʉ a.
\v 6 Pɛ nuꞌʉ ꞌda hinga guehya yʉm hma dín huɛ̨ca nꞌda i honi, pɛ bi ꞌuepʉ ja rá ꞌyu Oją, janangue i tɛn yʉm hma säti thoho.
\v 7 Nuꞌʉ, ɛ̨mmɛ i honi nde din xänbate nangue yʉ́n tꞌɛ̨di Oją bi man ra Moisés, pɛ hingui pądi ꞌbɛꞌa im ma. Sä i mantsꞌɛditho, pɛ nɛ hingui pądi ꞌbɛꞌa nam bønꞌʉ yʉ́m hmansɛ i ma ꞌbʉ i man yʉn tꞌɛ̨di.
\v 8 Dí pąhmbʉ gue xʉn ho ʉ yʉn tꞌɛ̨di bi xi Oją ra Moisés. Pɛ bi tsꞌän yʉ́n tꞌɛ̨di Oją gue dí mba ma hɛcpi ʉ yʉ dąditsꞌoqui.
\v 9 Nɛ gueꞌʉ yʉn tꞌɛ̨di dí mba ma hɛcpi ʉ toꞌo jasɛ yʉ́n tꞌɛ̨di zɛhɛ, nɛꞌʉ i fɛsta yʉ́n tꞌɛ̨di Oją, nɛꞌʉ to hingui numansu Oją, nɛ di ho da ꞌyøtꞌ yʉ tsꞌoqui. Nɛꞌʉ to hingui ɛ̨spa Oją, nɛ i tɛn ra ximhäi, nɛ i ho yʉ́ ta nɛ yʉ́ mbe, nɛ yʉ hyodu. Gueꞌʉ da sih yʉ́n tꞌɛ̨di Oją ʉ, nɛ hinga gueꞌʉ høntꞌ Oją mbɛ̨ni.
\v 10 Nɛ bi tsꞌän yʉ́n tꞌɛ̨di Oją dí mba ma hɛcpi ʉ øtꞌ ran ꞌyomtꞌɛ̨ni, nɛꞌʉ din ꞌyąsäbi yʉ́ minꞌyohʉhʉ tenguꞌbʉ nꞌda ra xisu, nɛꞌʉ i pɛ̨ yʉ́ mijąꞌihʉ, nɛꞌʉ i man yʉ fɛhni, nɛ i xih ra fɛhni yʉ zɛꞌmi. Nɛ gätho ʉ nꞌdanꞌyo i øtꞌe xínda gue ra hoganxädi, nɛ gueꞌʉ da sih yʉ́n tꞌɛ̨di Oją ʉ, nguetho i xijʉ hin ga øthʉ yʉ tsꞌoqui.
\v 11 Pɛ nuꞌa rán ho maꞌdaꞌyo ra Cristo dí pärca ma mbʉihʉ Oją a, nuꞌa mixte xʉn hotho a. Nɛ gueꞌa ran ho maꞌdaꞌyo bi xicä Oją gam mangä.
\s I xi Oją jamadi ra Pablo, nangue rá mate xʉn ngu 
\p
\v 12 Jamadi dí xih ma Hmuhʉ ra Jesucristo, nguetho bi huangui dram ꞌbɛhnigä, nɛ i pądi ga jąꞌtsꞌi, nguetho di ꞌdac rám fätsꞌi ga øtꞌa i xiqui.
\v 13 Pɛ nugä ɛ̨mmɛ dra nɛxmategä mamꞌbɛtꞌo, nɛ mí sangä a ra Cristo gueꞌbʉ go má ʉnba ʉ ꞌda yʉ́ ꞌyɛ̨cꞌyɛi. Nɛ xíngui tsꞌʉ mí pącä ꞌbɛꞌa nam bønꞌa mí øtꞌä, nguetho him mí ɛ̨cꞌyɛigä ra Cristo. Pɛ Oją bi ꞌdac rá mate bi pungui.
\v 14 Pɛ ɛ̨mmɛ xʉn ngu rá mate ma Hmuhʉ ra Cristo Jesús, bi jaqui dá däpä ma mbʉi a, nɛ bi jaqui ɛ̨mmɛ dá numanhogä a Oją nɛ dá huɛ̨c ma mijąꞌiꞌbe.
\v 15 I ja ua nꞌda ram hma da zä ga pąhmbʉ majuąni, ngue bi zøcua ja ra ximhäi a ra Jesucristo di pøꞌʉ yʉ tsꞌomꞌbäi tengugä manꞌda xʉn tsꞌo dá øtꞌä.
\v 16 Pɛ ɛ̨mmɛ xʉn ngu rá mate bi ꞌyørcä Oją, nguetho nde gätho da ꞌyut miꞌda yʉ jąꞌi ɛ̨mmɛ ja rá yembʉi a ra Jesucristo. Nɛ tengu thohogä, ngutho da ꞌyørpa ʉ toꞌo di däp yʉ́ mbʉi a, nɛꞌʉ din ja ra te maząi.
\v 17 Janangueꞌa ga ɛ̨spa ma Ojąhʉ gätho yʉ pa maząi. Nuꞌa, ra Hmutsꞌʉtꞌabi maząi a, nɛ njongui sä da nu, nɛ njąmꞌbʉ da guadi. Nɛ nꞌdatho Oją, njoꞌo manꞌda, nɛ gätho i pądi. Nɛ høntꞌa gam bɛ̨mhbʉ a ya.
\v 18 Nɛ nuya gra Timoteo, tenguꞌbʉ ma tsꞌʉntꞌʉ i, i ja ua a dí xiꞌa ya. Nuꞌi gra dofʉi nangue Oją, dami ꞌyøtꞌ ra hogatuhni, tengu thoho bi xiꞌa ʉ yʉ́ pøngahyą Oją. Janangueꞌa dami hyądumbʉi gui ꞌyɛ̨cꞌyɛi rá hogamhma Oją, nɛ gui ꞌyøtꞌa ꞌbɛꞌa i xiꞌa ꞌbʉ in zopꞌa ni mbʉi.
\v 19 Nɛ hin gui ꞌyøtꞌe tengu mi øtꞌʉ ꞌda ꞌbʉ mí zop yʉ́ mbʉi Oją, pɛ bi mbɛstaꞌa ꞌbɛꞌa bi sifi, bi tsꞌonsɛ yʉ́ mbʉi bʉya.
\v 20 Tengu mí øtꞌa ra Himeneo nɛ ra Alejandro. Pɛ dá juąnba ʉ, nɛ dá xifi bi mba ma dä bʉ ꞌbʉh ra zįthu, di ʉnbi, da bądi hin da zan Oją.
\c 2
\s Da mba ntꞌäpi rám fätsꞌi Oją nangue gätho yʉ jąꞌi
\p
\v 1 Nɛ i ja ua nꞌda ram hma ga xiꞌi, gra Timoteo, ngue mahyoni gui ꞌyørpʉ ja ram pɛti. Ngue nuꞌbʉ guí yąhʉ Oją, gui xihmbʉ nangue gätho yʉ jąꞌi, gui ꞌyäfʉ rá mate nangueꞌʉ, nɛ gui xihmbʉ jamadi Oją nangueꞌa ꞌbɛꞌa bi ꞌyørpa nꞌda ngu nꞌda ʉ yʉ jąꞌi.
\v 2 Nɛꞌʉ yʉ tsꞌʉtꞌabi nɛ gätho toꞌo ja yʉ́ tsꞌɛdi, dami ꞌyäfʉ rám fätsꞌi Oją nangueꞌʉ, ngue hin din ja yʉ sʉi nɛ xíng ra dumbʉi, nɛ hin te gam bɛ̨mhbʉ, nɛ da zä bʉ ga øthʉ xʉn ho ꞌbɛꞌa bi man Oją bʉya.
\v 3 Nɛ xʉn ho ꞌbʉ ga øthʉ a, nguetho gueꞌa numanho Oją mam pørpatehʉ a. 
\v 4 Nguetho in nde Oją da yąni gätho yʉ jąꞌi nangue rá tsꞌɛdi ra zįthu nɛ di ꞌyomfɛ̨nibi nangueꞌa majuąni.
\v 5 Nɛ nꞌdatho Oją i ꞌbʉi. Nɛ nꞌdatho a i ꞌbäꞌinde nɛ din hocpate bʉ bí ꞌbʉ Oją, nuꞌa ra Jesucristo ngue bin jąꞌi a.
\v 6 Nguetho bin däsɛ ngue gätho bi gurca ma tsꞌoquihʉ. Nɛ guehna ram hma bi xijʉ Oją ꞌbʉ mi zøn ra pa bi ma.
\v 7 Nɛ guehna ram hma í thangä gam mangä na, nɛ guehna bí ꞌbɛncä na, nɛ majuąni hin dí fɛhnigä, ngue ma ꞌbɛfigä ga xänba ʉ hing yʉ judío, ga japi di däp yʉ́ mbʉi Oją, da yąni, nɛ da ꞌyɛ̨cꞌyɛi a majuąni.
\v 8 Nɛ manꞌda dí xiꞌi, hønbʉ go hapʉ dim pɛti yʉ ꞌyɛ̨cꞌyɛi, xtán hotho yʉ́ ꞌyɛ ʉ yʉn ꞌyohʉ di ꞌuąꞌtsꞌ ꞌbʉ din yąhʉ Oją, ngue nte má cuɛ da bɛ̨ni, nɛ xíng ran ʉcpate.
\v 9 Nɛ dí xiꞌi ꞌbɛꞌa gui xih yʉ xisu, ngue hin din hoc zɛhɛ nangue ran ꞌyɛ̨tsꞌi, uague di hoc yʉ́ yą, uague ra oro o yʉ thebe o ꞌbɛꞌa xʉm hmadi da japi. Pɛ din hoc zɛhɛ nangue yʉ́ he rán säui nꞌda ra hogambʉi nɛ ra hoganꞌyomfɛ̨ni.
\v 10 Nɛ da bądi da ꞌyøtꞌ ra hogambʉi, nɛ gueꞌa ran hoqui rán säui nꞌda ra xisu i numansu Oją.
\v 11 Nɛ nubʉ ja nim pɛtihʉ, da ndesɛ yʉ xisu da sänbi, nɛ hin go din xänbate, nɛ gätho da ꞌyøde.
\v 12 Nɛ dí xiꞌi hin dim ꞌbɛtꞌo yʉ xisu ngue da xänba yʉn ꞌyohʉ, pɛ din hɛ̨tho.
\v 13 Nguetho mꞌbɛtꞌo bi ꞌyøtꞌ Oją a ra Adán, nɛ mꞌbɛjua a ra Eva, janangueꞌa hingui sä dim ꞌbɛtꞌo nꞌda ra xisu.
\v 14 Nguetho nu ra xisu bi numanho ꞌbʉ mí xih ra zįthu da ꞌyøtꞌ ra tsꞌoqui, pɛ nu ra Adán him mín nde xtá ꞌyøtꞌe.
\v 15 Janangueꞌa din ʉnba ꞌbʉ xʉm ꞌbʉh yʉ́ tꞌʉhni ʉ yʉ xisu, pɛ da mbäx Oją ʉ ꞌbʉ thocpa thoho i ɛ̨cꞌyɛi, nɛꞌbʉ din ja yʉ́n huɛ̨cate, nɛꞌbʉ din ꞌyomfɛ̨ni xʉn ho, nꞌdatꞌa Oją da bɛ̨ni.
\c 3
\s Ndaꞌʉ yʉn ꞌyohʉ din ngʉrpi
\p
\v 1 Majuąni a ram hma, nuꞌbʉ in nde din ngʉrpi nꞌda, in nde nꞌda ra ꞌbɛfi xʉn ho.
\v 2 Pɛ jatho din hocjąꞌi nꞌda ra ngʉrpi, nɛ nte da thįnba nꞌda rá tsꞌoqui. Nɛ høntꞌa nꞌda rá xisu da zi, nɛ da bądi da ząmzɛhɛ rá mbʉi nɛ din ꞌyomfɛ̨ni xʉn ho, nɛ di jamansu ꞌbɛꞌa i øtꞌe, nɛ di ho di un ran tsꞌäya bʉ ja rá ngu, nɛ da bądi din xänbate nangue rám hman Oją.
\v 3 Nɛ njąmꞌbʉ dim mihni, xín din ndesʉi, nɛ hin da ꞌyømanꞌʉ a i sifi, nɛ xín din hecpate pɛ din hocpate, nɛ hin da nde xʉn ngu ra mbɛti.
\v 4 Nɛ da bądi dim ꞌbɛtꞌo bʉ ja rá ngusɛ, nɛ nu yʉ́ tꞌʉhni da ꞌyøtꞌe ꞌbɛꞌa i xifi, nguetho numansu yʉ́ ta. 
\v 5 Nguetho nuꞌbʉ hingui pądi dim ꞌbɛtꞌo bʉ ja rá ngusɛ nꞌda ran ꞌyohʉ, hin da bądi di jamansu yʉ ꞌyɛ̨cꞌyɛi ꞌbʉ.
\v 6 Nɛ hin din ngʉrpi nꞌda ra ꞌdaꞌyo ꞌyɛ̨cꞌyɛi, tsꞌʉrpʉ thoho din ꞌyɛ̨tsꞌi tengutho ra zįthu, nɛ da dɛxꞌa Oją a.
\v 7 Nɛ nu yʉ ngʉrpi da ꞌyøtꞌe ngue da hnumansu, nɛpʉ ꞌbʉ ʉ hing yʉ ꞌyɛ̨cꞌyɛi da ꞌyøtꞌe ꞌbɛꞌa dí hnumansu, janangueꞌa njon di cꞌąmanꞌʉ, nɛ hin da dąp ra zįthu bʉya.
\s Ndana ní jąꞌi dim fäxte
\p
\v 8 Ximangutꞌʉ yʉ́m fätsꞌihʉ yʉ ngʉrpi, ngutho guextaꞌa jatho din hocjąꞌi, nɛ ꞌdaꞌangu da ma, nɛ hin dim mihni, xín din siyate nangue ra mbɛti.
\v 9 Nɛ da bądi xʉn ho ꞌbɛꞌa gätho rán thɛui a ram hma nɛ din ząm bʉ, nɛ ząi øtꞌa xi Oją ꞌbʉ in zop yʉ́ mbʉi.
\v 10 Nɛ ndeꞌbʉ ꞌbɛ da hnu ꞌbʉ tɛnni xʉn ho, nɛ nubʉya nuꞌbʉ hin te da thįnbi, da zä da ꞌyøtꞌ ra ꞌbɛfi dim fäxte bʉya.
\v 11 Ximangutho ꞌbʉ dim fäxte nꞌda ra xisu, i jatho da hnumansu, pɛ hin din cꞌąte, nɛ xín dim mihni, pɛ din ꞌyomfɛ̨ni xʉn ho, nɛ di jąꞌtsꞌi ꞌbɛꞌa gä øtꞌe.
\v 12 Nɛ nu nꞌda ran ꞌyohʉ ꞌbʉ im fäxte, nꞌdatho rá xisu da zi, nɛ da bądi dim ꞌbɛtꞌo bʉ ja rá ngu, nɛ da ꞌyøtꞌʉ yʉ́ tꞌʉhni ꞌbɛꞌa da xifi.
\v 13 Nguetho nuꞌbʉ i øtꞌe xʉn ho rá ꞌbɛfi nꞌda ram fätsꞌi, da hnumanho bʉya, nɛ manꞌda da hyutꞌ ran zambʉi nangue rá ꞌbɛfi ra Cristo.
\s Mixte xʉn ho a ram hma dí ɛ̨cꞌyɛihʉ
\p
\v 14 Guehna dí otꞌa na ya, gra Timoteo, madagueꞌbʉ dím bɛ̨ni ga mba bʉ nꞌdihi.
\v 15 Pɛ xiꞌbʉ him ꞌbex da zä ga mba bʉ, pɛ ya dá xiꞌi ꞌbɛꞌa xʉn ho gui ꞌyøtꞌe nangue a rá ngu Oją. Ngue nu yʉ ꞌyɛ̨cꞌyɛi xa hyømba rá ngu Oją nangue yʉ́ mbʉi, ngue ꞌdatꞌa Oją i ꞌbʉi. Nɛ tenguꞌbʉ rá ngujʉ Oją guepʉ na fądi xʉn ho rám hma Oją, nɛ dín yąmhbʉ a.
\v 16 Nɛ gueꞌa ran ho maꞌdaꞌyo dí tɛnhdʉ mixte xʉn ho a, 
\q ngue bin ꞌyusɛ ra Cristo ua ja ra häi ꞌbʉ mín jąꞌi a,
\q pɛ bin ꞌyoui rá Hogandąhi Oją guepʉ í fądi hinꞌyʉ rá tsꞌoqui a,
\q nɛ bi nu ʉ yʉ́m ꞌbɛhni Oją mahɛ̨tsꞌi.
\q Nɛ bi hmangua dí ꞌbʉhmbʉ hønbʉ go hapʉ ꞌbʉh yʉ jąꞌi gue ꞌdahmaꞌdanꞌyo bʉ na yą.
\q Nɛ bi tꞌɛ̨cꞌyɛi ua ja ra ximhäi,
\q bi tsꞌix mahɛ̨tsꞌi bʉ bí ja rá tsꞌɛdi Oją mixte bʉya.
\c 4
\s Mi pą Oją da ꞌueꞌʉ ꞌda
\p
\v 1 Nu rá Hogandąhi Oją mꞌbɛtꞌo di bɛ̨ngä ngue da ꞌuepʉ ja rá ꞌyu Oją ʉ ꞌda. Ngue da ꞌyømanho ʉ yʉ́ nde ʉ yʉ hyäte xänbate bin xädi nangue yʉ́m hman yʉ zįthu.
\v 2 Nu yʉ hyäte hingui sä bʉ da zop yʉ́ mbʉi Oją, nguetho bi tsꞌon yʉ́ mbʉi nangue yʉ fɛhni ząi im ma.
\v 3 Ngue sä di hɛcpa yʉ jąꞌi, i xifi hin din thąti, xín da zi ꞌda yʉn tsꞌihmɛ, sä ɛ̨nꞌʉ. Pɛ bi zängahʉ Oją ga hąmhbʉ høntꞌa go ꞌbɛꞌa mán tsꞌihmɛ ꞌbʉ dí xihmbʉ jamadi Oją, gue nujʉ dyʉ ꞌyɛ̨cꞌyɛihʉ, nɛ dí pąhmbʉ ndaꞌa majuąni.
\v 4 Nguetho gätho xʉn ho ꞌbɛꞌa bi ꞌyøtꞌ Oją, nɛ hinꞌyʉ ꞌbɛꞌa ga ɛmhbʉ, pɛ ga hąmhbʉ nɛ ga ɛ̨mfʉ jamadi Oją bʉya.
\v 5 Nguetho mająpi ngueꞌa dí äfʉ rán jąpi Oją, nɛ nu rám hman Oją i ɛ̨mbi xʉn ho a.
\s Rá hogambɛfi ra Jesucristo a ra Timoteo
\p
\v 6 Nuꞌi gra Timoteo, xʉn ho ꞌbʉ guim bɛ̨nba yʉ cu na ram hma i ja ua, janangueꞌa gam pɛfi xʉn ho nangue ra Jesucristo. Nguetho bi hąꞌa ra tsꞌɛdi ni mbʉi a ra hogamhma dí ɛ̨cꞌyɛihʉ, ngue ra hoganxädi guí tɛnni.
\v 7 Nɛ o gui ʉrpa ra güɛnda yʉ́m hmansɛ yʉ jąꞌi säti thoho nɛ xʉn tsꞌo. Pɛ dami hyądumbʉi nangue rá ꞌbɛfi Oją.
\v 8 Nɛ tengu ꞌbʉ ząi dadin cunh ma jąꞌihʉ, nɛ da hyą ra tsꞌɛdi, nɛ ngutho ga øthʉ nangue ma mbʉihʉ, da hyą ra tsꞌɛdi ꞌbʉ ząi ga humbahʉ nangue rá ꞌbɛfi Oją. Nɛ ɛ̨mmɛ xʉn ngu di muui ꞌbʉ ga humbahʉ, nguetho i ørcahʉ ran ho yʉ pa i jabʉ ya, nɛ gätho yʉ pa maząi.
\v 9 Nɛ majuąni na ram hman na, janangueꞌa ndeꞌbʉ gätho ga øthʉ xʉn ho.
\v 10 Janangueꞌa dí häthʉ yʉn ʉnbi nɛ dí humbi dadím pɛhmbʉ, guepʉ go da zä ga xihmbʉ xʉn ho rám hma Oją yʉ jąꞌi. Nɛ da zä ga däp yʉ́ mbʉi Oją bʉya, nɛ dim pøhø. Nguetho nꞌdatꞌ Oją dí tømhbʉ i ꞌbʉi, nuꞌa in nde da yąnꞌʉ gätho yʉ jąꞌi i ꞌbʉi, nɛ da yąnꞌʉ toꞌo da ꞌyɛ̨cꞌyɛi a.
\v 11 Nuya yʉn xädi i ja ua, thocpa thoho gui hyądumbʉi ɛ̨mmɛ gui bɛ̨nbi nɛ gui xänbi gätho yʉ cu bí ꞌbʉpʉ.
\v 12 O to guídí japi da ꞌyʉꞌtsꞌiꞌi ngue gra tsꞌʉntꞌʉ thoho. Pɛ gui ꞌyutꞌʉ yʉ cu nangue yʉn tꞌøtꞌe bi xijʉ Oją gue gui ꞌyøzɛhɛ xʉn ho, gui jamansu ꞌbɛꞌa gui ma, o ꞌbɛꞌa gui ꞌyørpʉ. Janangueꞌa gui ꞌyuti din huɛ̨qui nꞌda ngu nꞌda, nɛ di jąꞌtsꞌi, nɛ da ząmzɛhɛ yʉ́ mbʉi.
\v 13 Pɛ gätho ꞌbʉ hin ná søngä bʉ, pɛ gui jamansu ni ꞌbɛfi ꞌbʉ guí man rám hman Oją, nɛꞌbʉ gadí un ran zofo yʉ jąꞌi, nɛꞌbʉ guí xänbi ꞌbɛꞌa nam bønꞌa nꞌdaxɛqui gui xifi. 
\v 14 Damim pɛfi xʉn ho nangue a rá tsꞌɛdi Oją bi ꞌdaꞌi, tengu bi xiꞌa ʉ ꞌda yʉ́ pøngahyą Oją. Ngue bi bɛ̨nꞌna ni mbʉi Oją ꞌbʉ mí ꞌyäp rá mfätsꞌi nangueꞌe, nɛ bi gäx yʉ́ ꞌyɛ bʉ ja ni yą.
\v 15 Thocpa thoho gui ꞌyøtꞌa dí xiꞌi, nɛ høntꞌa gui hyądumbʉi gui ꞌyøtꞌa, nɛ nubʉya da nu i gätho yʉ jąꞌi ngue bin te xʉn ho ni mbʉi nangue rá ꞌbɛfi Oją guí øtꞌe.
\v 16 Nɛ thocpa thoho gui hyądumbʉi gam fäsɛ nangue ni mbʉi, nɛ gui jamansu ꞌbɛꞌa gätho gui xi ʉ ꞌbʉpʉ nangue rám hman Oją. Nɛ nuꞌbʉ ngubʉ gui ꞌyøtꞌe, nɛ di jąpꞌa Oją, nɛꞌʉ gä miꞌda yʉ jąꞌi guí xänbi.
\c 5
\s Ga fäx ma cuhʉ
\p
\v 1 O guí sʉꞌa nꞌda ra dącꞌyɛi, pɛ dami zofo xʉn ho, tengutho ꞌbʉ ni ta. Nɛ nuꞌʉ yʉ tsꞌʉntꞌʉ gui ꞌyøtꞌe tengutho ꞌbʉ nin ꞌyohʉhʉ.
\v 2 Nɛ nu yʉ zi bømbe gui ꞌyøtꞌe tengutho ꞌbʉ ni mbe, nɛ nu yʉ hmute, gui ꞌyøtꞌe tengutho ꞌbʉ nin ju, nɛ hin guim bɛ̨nꞌa nꞌda ra ꞌyąsä nangueꞌʉ.
\v 3 Nɛ nubʉ ja yʉm pɛti gui jamansuhʉ nꞌda ra bømbe ꞌbʉ xʉn du rá ndø, ngueꞌbʉ njoꞌo toꞌo di jamansu.
\v 4 Pɛ nuꞌbʉ nꞌda ra bømbe xʉn du rá ndø, nɛ ꞌbʉh yʉ́ tꞌʉhni, o gue yʉ́ ꞌbɛto, da bądi rán tꞌɛ̨di Oją a di jamansu yʉ́ mbe, tengutho bi ꞌyørpa ꞌbʉ mín tꞌʉhni. Nɛ gueꞌa in nde Oją.
\v 5 Nɛ nuꞌbʉ nꞌda ra zi bømbe i nyąui Oją gä ra pa nɛ ra xui, nɛ høntꞌa Oją im bɛ̨ni, nɛ nuꞌbʉ njoꞌo toꞌo di jamansu, pɛ gui fäxhʉ a bʉya. 
\v 6 Pɛ nu miꞌda yʉ xisu, xʉn du yʉ́ ndø, ngue hinguim bɛ̨n Oją, nɛ i honi da ꞌyøzɛhɛ yʉ́ pähä zɛhɛ. Madagueꞌbʉ i ꞌbʉi, pɛ tenguꞌbʉ xʉn du bʉ nam bɛ̨n Oją. Hinga gueꞌʉ da mba ma jamansu bʉ ja ram pɛti ʉ.
\v 7 Nɛ nuya yʉm hma i ja ua, gui xänba ʉ yʉ cu, janangueꞌa njon da ꞌyɛ̨na hingui ho øtꞌʉ.
\v 8 Nɛ nuꞌbʉ nꞌda hin di unni ꞌbɛꞌa di ꞌbɛ a rá ta o gue rá mbe, o gätho miꞌda yʉ́ mɛni, manꞌda xʉn tsꞌo rá mbʉi ꞌbʉ, xinda gueꞌbʉ hin xtá ꞌyɛ̨cꞌyɛi, nɛ bi gønꞌa ra Cristo.
\v 9 Nuya ga xiꞌi ndaꞌʉ ní hyoya bømbe gui hyuspa yʉ́ thuhu dim pɛpʉ ja ram pɛti. Høntꞌʉ pɛꞌtsꞌa hyąte njɛya nɛ ɛ̨mmɛ bim ꞌbʉmanhoui yʉ́ ndø.
\v 10 Nɛ i hnumanho nangue yʉ hogaꞌbɛfi i øtꞌe, nɛ bi jamansu xʉn ho yʉ́ tꞌʉhni, nɛ ząi di säyaba yʉ jąꞌi bʉ ja yʉ́ ngu, nɛ him bin ꞌyɛ̨zɛhɛ pɛ bin ꞌyɛ̨hɛ nangue yʉ́  miꞌyɛ̨cꞌyɛihʉ, nɛ bi hyurpa yʉ́ mbʉi toꞌo mi tu yʉ́ mbʉi, nɛ bin ɛ̨hya bi ꞌyøtꞌ miꞌda yʉ hogantꞌøtꞌe. Nɛ guehya yʉ hyoya bømbe gui hyuspa yʉ́ thuhu ya.
\v 11-12 Pɛ nu miꞌda yʉ xisu xʉn du yʉ́ ndø, nuꞌbʉ hingui ngu yʉ jɛya pɛꞌtsꞌi, hin gui hyuspa yʉ́ thuhu gue gui ꞌyɛ̨mfʉ dim pɛpʉ. Nguetho tsꞌʉrpʉ thoho da bɛ̨ni din thąti, nɛ nuꞌbʉ din thąti mahønꞌa hin da ꞌyøtꞌa ra ꞌbɛfi mí ma xtá ꞌyøtꞌe. Nɛ ra tsꞌoqui a nguetho him bi jąꞌtsꞌa bi ma.
\v 13 Nɛ nuꞌʉ, tsꞌʉrpʉ thoho din dąnhyɛ̨i yʉ́ mbʉi ꞌbʉ njoꞌo yʉ́ ndø, nɛ da hyąꞌda thoho yʉ ngu, nɛ høn nan cꞌąte di ja, im manꞌa hingui ho, nɛ sä din thįntꞌi i øtꞌe nɛ hin rá ꞌbɛfi bʉ.
\v 14 Janangueꞌa manꞌda xʉn ho ꞌbʉ din thąti mahønꞌa, dim ꞌbʉh yʉ́ tꞌʉhni, nɛ dim pɛpʉ ja yʉ́ ngusɛ. Nɛ nuꞌbʉ din jabʉ da ꞌyøtꞌe, hin di cꞌąmanꞌʉjʉ man sʉihʉ ꞌbʉ.
\v 15 Nguetho i ꞌbʉ i ꞌda yʉ xisu xʉn du yʉ́ ndø, nɛ ya xʉ mbengui nɛ i tɛn ra zįthu.
\v 16 Nɛ dí xiꞌi mahønꞌa, nuꞌbʉ ꞌbʉ a nꞌda ra cu ngue bi du rá ndø a rá mbe, jatho da mbɛpi, o gue rá nana bi du rá ndø, o gue rá mɛni, i jatho di jamansu, nɛ hinga gueꞌa ra mbɛti pa ma pɛti bʉ ja ra niją dí mba ma jamansu ʉ. Janangueꞌa dí guaꞌa ra mbɛti bʉ ja ra niją ngue høntꞌʉ njoꞌo toꞌo di jamansu da mba mꞌbɛpi bʉ.
\v 17 Nu yʉ ngʉrpi bʉ ja ram pɛti, nuꞌʉ to di jąꞌtsꞌi xʉn ho yʉ́ ꞌbɛfi, da tꞌɛ̨spa ʉ, nɛ da mba mꞌbätsꞌi ꞌbɛꞌa di ꞌbɛdi. Nɛ nuꞌʉ to i humbi din xänbate nangue rám hman Oją, manꞌda jatsꞌɛditho da tꞌɛ̨spi.
\v 18 Nguetho ntꞌoꞌtꞌi: “Nu yʉ uąfanindąni ꞌbʉ i uąhi hingan thuꞌtꞌi yʉ́ nde, pɛ da zä da za yʉ paxi i ja bʉ.” Nɛ manꞌda ram hma i ja: “Nuꞌa to dim pɛfi ja rán tꞌɛ̨di din juꞌtꞌi,” i ɛ̨na.
\v 19 Nɛ hin gui ꞌyʉrpa ra güɛnda ꞌbʉ da mba ma yąpi nꞌda ra ngʉrpi tꞌɛ̨mbi bi ꞌyøtꞌ ra tsꞌoqui, hinda høntꞌbʉ di yoho hyu ʉ di yąpi gui ꞌyøh pʉya.
\v 20 Nɛ nuꞌbʉ majuąni bi ꞌyøtꞌ ra tsꞌoqui, da mba ma hɛcpi bʉ dim pɛti ʉ miꞌda, nꞌdahma gätho din su.
\v 21 Nɛ madagueꞌbʉ gadín amigoui o hinꞌna, pɛ ꞌdaꞌangu gui ꞌyørpe. Nɛ gueꞌa i jatsꞌɛdi dí xiꞌi gui ꞌyøtꞌa, nguetho in nu a Oją, Oją da bądi ꞌbʉ guí jąꞌtsꞌi, nɛꞌa ra Hmu, ra Jesucristo, in nu i, nɛ yʉ́ hogam ꞌbɛhni Oją mahɛ̨tsꞌi in nu i.
\v 22 Him ꞌbex gui un ra ꞌbɛfi nꞌda ran ꞌyohʉ, ꞌbɛ gui pąhmbʉ ꞌbɛꞌa rá mbʉi. Nguetho nuꞌbʉ nꞌda gá un ra ꞌbɛfi, nɛ da ꞌyøtꞌ ra tsꞌoqui, guí conhui rá tsꞌoqui a bʉya. Janangueꞌa gan ꞌyomfɛ̨ni xʉn ho, nɛ nte gan dupate bʉya.
\v 23 Nuya dí xiꞌi gra Timoteo, nangue ni mbʉi xʉn ʉ, nɛ jantꞌa pʉntsꞌ thoho, dami si zitsꞌʉtho ra vino, nɛ hinga høntꞌa ra dehe gui si.
\v 24 Guim bɛ̨mhbʉ ndana ʉ yʉn ꞌyohʉ da sih ra ꞌbɛfi bʉ ja ram pɛti, ꞌbʉ i ꞌda ngue mfądi i ja yʉ́ tsꞌoqui, nɛ ꞌbʉh miꞌda ngue hinga mfądi i ja yʉ́ tsꞌoqui jagueꞌbʉ da zøn ra pa da thįnba yʉ́ tsꞌoqui.
\v 25 Nɛ ngutho nangue ran hocjąꞌi i øtꞌa nꞌda, mfądi nangue yʉ jąꞌi. Nɛ nuꞌbʉ him ꞌbexque mfądi, pɛ mꞌbɛjua da fądi, nguetho hingui sä da ꞌyągui.
\c 6
\p
\v 1 Nuꞌʉ yʉ ꞌyɛ̨hɛ bí ꞌbʉpʉ, da numansu ʉ yʉ́ hmu to i ørpa yʉ́ ꞌbɛfi. Nɛ nuꞌbʉ din jabʉ da ꞌyøtꞌe, njon di cꞌąmanꞌʉ nangue Oją nɛ njon di cꞌąmanꞌʉ rán xädi Oją.
\v 2 Nɛ nuꞌbʉ yʉ ꞌyɛ̨cꞌyɛi ʉ yʉ́ hmu yʉ ꞌyɛ̨hɛ, pɛ guextaꞌa da numansu ʉ yʉ́ hmu nɛ hin da zani ngueꞌbʉ mbɛ̨ni din cuhʉ ʉ. Pɛ manꞌda da bɛ̨ni da mbɛpi xʉn ho, nguetho rá miꞌyɛ̨cꞌyɛiui da mbɛpi, nɛ di huɛ̨cꞌa rá hmu. Dami xänba na ram hma, nɛ thocpa thoho gui bɛ̨nba ʉ.
\s Xʉn ngu dí tąhmbʉ nangue rá ꞌbɛfi Oją nguetho i hurca ma mbʉihʉ
\p
\v 3 Pɛ i ꞌbʉꞌi ꞌda yʉ xänbate nꞌdanꞌyo ram hma in xänbate, nɛ hin din thɛui a rám hma ma Hmuhʉ ra Jesucristo ngue majuąni di zɛrca ma mbʉihʉ, nɛ hin din thɛui a ram hma ga däp ma mbʉihʉ Oją.
\v 4 Pɛ nuꞌʉ, bi ʉꞌtꞌ yʉ́ mbʉi nangue ran ꞌyɛ̨tsꞌi, nɛ nte i pądi. Nɛ ɛ̨mmɛ honi di dunba yʉm hma guepʉ i fʉpʉ ran tsꞌɛya, ran heque, ran tsꞌante, ran tꞌʉꞌtꞌate, ꞌbɛꞌa gätho im bɛ̨n rá mbʉi.
\v 5 Nɛ nuꞌʉ thocpa tho din sʉi nꞌda ngu nꞌda ʉ, gueꞌʉ bin tsꞌon yʉ́n ꞌyomfɛ̨ni, nɛ hingui sä da bądi ndana a majuąni. Nɛ im bɛ̨ni xʉn ngu ra mbɛti da dąha nangue rá ꞌbɛfi Oją. Pɛ o guí øhmbʉ a i man ʉ.
\v 6 Pɛ majuąni xʉn ngu dí tąhmbʉ nangue rá ꞌbɛfi Oją, i hurca ma mbʉihʉ, nɛ dí ꞌbʉmanhohʉ nangue Oją.
\v 7 Nguetho nte bá hąhʉ ꞌbʉ mám ꞌbʉhmbʉ ua ja ra ximhäi, nɛ nte da zä ga hąxhʉ ꞌbʉ bi zøn ra pa ga tuhʉ.
\v 8 Pɛ hin da du ma mbʉihʉ ꞌbʉ zí tsꞌʉtho dí pɛsꞌhʉ yʉn tsꞌihmɛ nɛ yʉ he.
\v 9 Pɛ nuꞌʉ toꞌo in nde dim mɛmbɛti, hingan tsꞌärpʉ thoho da thätꞌi da ꞌyøtꞌa ra tsꞌoqui. Nɛ tenguꞌbʉ da mba nthuꞌtꞌi rá mbʉi, nɛ manꞌda manꞌda nín xąndi ꞌbɛꞌa gätho da bɛ̨n rá mbʉi. Pɛ ndetho din ʉnbazɛhɛ, nɛ din tonto rá mbʉi ꞌbɛꞌa gätho honi, nɛ gueꞌʉ yʉ́n tꞌøtꞌe ní zo bʉ ja ram ꞌbɛdi.
\v 10 Nguetho nuꞌbʉ ꞌbʉ a nꞌda ɛ̨mmɛ in nde ra mbɛti, gueꞌa ní mbʉdi gätho yʉ tsꞌoqui bʉ rá mbʉi a. Nɛ nuꞌa ní ho ra mbɛti ʉ ꞌda, bi ꞌuepʉ rá ꞌyu Oją, nɛ di ʉnba zɛhɛ rá mbʉi nangue ra dumbʉi.
\s I øtꞌ ra hogatuhni nangue Oją a ra Timoteo
\p
\v 11 Pɛ nuꞌi gra Timoteo, rá mbɛfiꞌi Oją, dami ꞌuegue nangue yʉn tsꞌo i mangua. Pɛ gui hyumbi gui tɛnꞌna ran ho, nɛ høntꞌa Oją guim bɛ̨ni da mbäxꞌiꞌi, nɛ gui huɛ̨c ni mijąꞌihʉ, nɛ hin gan xømbʉi, nɛ din ja ni yembʉi.
\v 12 Xʉn ngu yʉ jąꞌi bi ꞌyø ꞌbʉ gmím ma xʉn ho ni tꞌɛ̨cꞌyɛi. Nɛ ngutho ya gui hyutꞌanzambʉi gui tąha, tenguꞌbʉ nꞌda ra dofʉi i hät yʉn ʉnbi ngue da dąh ran sʉi. Janangueꞌa da zä guim bɛntꞌi xʉn ho a ra te maꞌdaꞌyo, gueꞌa í zonꞌna a.
\v 13 Nɛ guim bɛ̨ni Oją in nu i, nuꞌa di un yʉ́ te ꞌbɛꞌa gätho i ꞌbʉi. Janangueꞌa gui hyutꞌanzambʉi nɛ hin gui su nin dąte. Nɛ in nuꞌa ra Jesucristo ngue bi ma xʉn ho a majuąni ꞌbʉ mí mba ma däpi ra Poncio Pilato.
\v 14 Janangueꞌa dí xiꞌi, jatsꞌɛditho gui jąꞌtsꞌi gätho ra ꞌbɛfi bin ꞌdaꞌi, nte gui tsꞌoni, nɛ njon da man ran tsꞌo nangueꞌa bʉya. Nɛ gueꞌa gui ꞌyøtꞌa ya, gueꞌbʉ go bi zøn ra pa di nɛqui ma Hmuhʉ ra Jesucristo.
\v 15 Nguetho nuꞌbʉ bi zøn ra pa ntsꞌänni, Oją ba pɛnhua ra Cristo mahønꞌa. Nɛ nu Oją mixte xʉn hotho, nɛ ɛ̨mmɛ di johya, nɛ i ꞌdasɛ ngue di manda. Nɛ nuꞌa Oją ra tsꞌʉtꞌabi xinda gue gätho miꞌda yʉ tsꞌʉtꞌabi ꞌbʉi, nɛ nuꞌa ja rá tsꞌɛdi xinda gue gätho miꞌda ja yʉ́ tsꞌɛdi.
\v 16 Nɛ høntꞌa Oją njąmꞌbʉ da du. Nɛ ɛ̨mmɛ di nɛc thoho hapʉ bí ꞌbʉi, njon da zä da hyäm bʉ, nɛ njongui sä da nu Oją. Nuꞌa ɛ̨mmɛ i tꞌɛ̨spi nɛ da ꞌyuh rá tsꞌɛdi maząi. Nɛ høntꞌa gam bɛ̨mhbʉ a ya.
\v 17 Dami xiꞌʉ yʉ mɛmbɛti ꞌyɛ̨cꞌyɛi, ngueꞌʉ to i ja yʉ́ mbɛti ua ja ra ximhäi, dami xifi hin din ꞌyɛ̨tsꞌi, nɛ xín da bɛ̨ni di muui yʉ́ mbɛti, nuꞌʉ tsꞌʉrpʉ thoho dim ꞌbɛdi. Pɛ dami xifi høntꞌa Oją da bɛ̨ni, ngue di muui xʉn ho, nɛ da bądi bí nɛxpʉ ꞌbʉ Oją gätho xʉn ho dí pɛsꞌhʉ, ndejʉ dan johyahʉ.
\v 18 Pɛ dami xifi da ꞌyøtꞌ ran ho, nɛ manꞌda tenguꞌbʉ gueꞌa ná mɛmbɛti ʉ bʉya. Ngue hin din ꞌyʉya pɛ da gomhbʉ yʉ jąꞌi ꞌbɛꞌa pɛꞌtsꞌi.
\v 19 Nɛ nuꞌbʉ din jabʉ ga øthʉ, ga pɛsꞌhʉ ꞌbɛꞌa majuąni di muui, nɛ ga nuhʉ xʉn ngu rán jąpi Oją ꞌbʉ bi zøn ra pa, nɛ majuąni dam ꞌbʉmanhohʉ gätho yʉ pa maząi.
\s Nꞌda ran zofo ran zɛgui
\p
\v 20 Nuꞌi gra Timoteo, dami jamansu xʉn ho ra ꞌbɛfi nangue rám hma Oją bi ꞌdaꞌi. Nɛ dami ꞌuegue nangueꞌʉ yʉm hma ɛ̨mbi ní dįn ran ꞌyomfɛ̨ni nꞌda, pɛ hingui ho ʉ. Säti thoho, nɛ nꞌdanꞌyotho ra ꞌyu i utꞌa nꞌda. Nɛ nuꞌʉ toꞌo bi dɛnni, bi ꞌbɛh rá ꞌyu Oją.
\v 21 Nɛ nuya Oją di ꞌda ahʉ rá mate. Nɛ høntꞌa dí xiꞌa ya.