\id 2TI
\h 2 TIMOTEO
\toc1 2 TIMOTEO
\mt1 2 TIMOTEO
\mt2 Ná yoho ra søcuą bi ꞌyorba ra Timoteo a ra Pablo
\c 1
\s Ran zɛngua
\p
\v 1 Nugä dra Pablogä, Oją bi zänni ma ꞌbäiꞌbe a ra Jesucristo, ga xih yʉ jąꞌi a bi mam majuąni Oją, ngue di un ra temaząi ʉ to di däp yʉ́ mbʉi ra Cristo Jesús.
\v 2 Dí pɛnꞌna ra søcuą gra Timoteo, dadí huɛ̨cꞌaꞌi tenguꞌbʉ ma tsꞌʉntꞌʉ i. Nɛ dí äp Oją ma Tahʉ di ꞌdaꞌa rá mate nɛ rán huɛ̨cate nɛ da hyutꞌa ni mbʉi, nɛ ra Cristo Jesús ma Hmuhʉ.
\s Ra Timoteo da ma ran ho maꞌdaꞌyo nangue ra Jesucristo
\p
\v 3 Dí ɛ̨mbä jamadi Oją ꞌbʉ dím bɛ̨nꞌi, ra xui nɛ ra pa thocpa thoho, nguetho dí pądi guí ɛ̨cꞌyɛi xʉn ho tengugä, ngue dá øtꞌä ra ꞌbɛfi bi ꞌdacä Oją, nɛ ngutho mi øtꞌʉ mam bombøtahe ꞌbʉ mayaꞌbʉ.
\v 4 Dím bɛ̨nꞌi gán zom ꞌbʉ mán xummi, nɛ bi däh ni guidä. Nɛ ɛ̨mmɛ dín nde ga nu i mahønꞌa, nɛ din jagä ran johya xʉn ho ꞌbʉ ga nu i.
\v 5 Dím bɛ̨nꞌi ngue hingui yoho ni mbʉi. Pɛ guí ɛ̨cꞌyɛi xʉn ho, tengubʉ na ꞌyɛ̨cꞌyɛi ni ndømbe ra Loida nɛꞌa ni mbe ra Eunice.
\v 6 Janangueꞌa dín ndeꞌe thocpa tho guim bɛ̨ni bi ꞌdaꞌa rá tsꞌɛdi Oją ꞌbʉ má cäx ma ꞌyɛ bʉ ni yą, nɛ dí xiꞌi gan ɛ̨hya gui ꞌyøtꞌ rá ꞌbɛfi Oją bi ꞌdaꞌi.
\v 7 Nguetho nuꞌa rá Hogandąhi Oją bi ꞌdajʉ hin di jajʉ dan suhʉ, pɛ di jajʉ ga huthʉ ran zambʉi, nɛ dan huɛ̨jʉ nꞌda ngu nꞌdajʉ, nɛ ga sąm zɛhɛ ma mbʉihʉ. 
\v 8 Janangueꞌa o guí pɛsꞌ ni sä gui mampꞌa rám hmam ma Hmuhʉ, nɛ o guí su ngue dí ofädigä nangue Oją. Pɛ nɛꞌi dami hyätꞌi gui sɛt yʉn ʉnbi tengu thohogä, nangue rám  hman Oją guí øtꞌe. Nɛ Oją da mbäxꞌiꞌi.
\v 9 Nɛ bi yąnjʉ Oją nɛ bi mberca ma mbʉihʉ, nɛ nubʉya bi xijʉ ga ørpahʉ rá ꞌbɛfi. Pɛ hin í yąnjʉ a rá ꞌbɛfi Oją dí øthʉ, pɛ bi yąnjʉ ꞌbʉ má hąmhbʉ rá mate. Nɛ gueꞌa bi zän zɛhɛ Oją ꞌbʉ him maní ꞌyøtꞌ ra ximhäi, ngue da yąnjʉ ra Jesucristo.
\v 10 Nuya bi nɛqui a mán tsꞌänni, ngue bi nɛqui ma yąntehʉ ra Jesucristo, nuꞌa bi dąp rá tsꞌɛdi ran dąte, nɛ bi jajʉ dán ꞌyohʉ rá ꞌyu ra te maząi. Nɛ gueꞌa i xijʉ rán ho maꞌdaꞌyo ra Cristo.
\v 11 Nɛ gueꞌa ram hma dá mangä, nɛ bá ꞌbɛngä, nɛ gueꞌa ram  hma dá xänba ʉ yʉ jąꞌi hing yʉ judío.
\v 12 Janangueꞌa dí sägä ran ʉnbi ya. Pɛ hin dí pɛsꞌ ma sä, nguetho dí pącä a toꞌo dí ɛ̨cꞌyɛigä, dí pądi i ja rá tsꞌɛdi da mbɛsca ma tegä ngue dá däpi, ga pømanho ꞌbʉ rán zɛgui.
\v 13 Nɛ nangue ran ho maꞌdaꞌyo dá xänꞌniꞌi, dami thoqui gui ꞌyɛ̨cꞌyɛi ra Cristo Jesús nɛ dami ꞌyøtꞌ ran huɛ̨cate bi ꞌdaꞌi.
\v 14 Nɛ dami jamansu ran ho maꞌdaꞌyo i ꞌyo ni güɛnda, nangue rá Hogandąhi Oją i ꞌbʉpʉ mbo ma mbʉihʉ.
\v 15 Guí pądi gätho bi ꞌueꞌʉ yʉ cu ngue yʉ mɛngu bʉ Asia, bi ꞌuegue nanguecä, nɛ ra Figelo nɛ ra Hermógenes.
\v 16 Pɛ nuꞌʉ gätho ꞌbʉpʉ rá ngu ra Onesíforo, Oją dí jąpꞌʉ. Nguetho nu ra Onesíforo xʉn ngu yʉ nidį bi mbäxcagui, nɛ him bi mbɛsꞌ rá sä nangue yʉ cadena i thurcä.
\v 17 Nɛ nuꞌbʉ mi zøcua Roma a, ɛ̨mmɛ bi hyongui nɛ bi dįngui.
\v 18 Nu ra Jesucristo di jąpi xʉn ho ꞌbʉ rán zɛgui ra pa, nguetho nuꞌbʉ mám ꞌbʉpʉ Éfeso, nɛ ɛ̨mmɛ xʉn ngu ꞌbɛꞌa gätho bi ꞌyørpʉ ngue bi mbäx rá ꞌbɛfi Oją bʉ a. Nɛ manꞌda guí pądi xinda guecä.
\c 2
\s Ra hoga dofʉi nangue ra Jesucristo
\p
\v 1 Pɛ nuꞌi tenguꞌbʉ ma tsꞌʉntꞌʉ i, gra Timoteo, dami hyą ra tsꞌɛdi nangue rá mate bi ꞌdaꞌa ra Jesucristo.
\v 2 Nu ram hma gá ꞌyøde dá mangä, nɛ xʉn nguꞌʉ i manꞌa majuąni. Nɛ nꞌdatꞌa ram hma gui thocpa ra ꞌbɛfi miꞌda yʉ hocjąꞌi, gui huanꞌndʉ toꞌo da zä da xänba ʉ miꞌda.
\v 3 Dami hyät yʉn ʉnbi tengugä, nguetho gra hogadofʉi nangue ra Jesucristo. 
\v 4 Nu ra dofʉi hingui sä xtán hɛ̨ti rá mbʉi, ngue xʉn ngu miꞌda ꞌbɛꞌa gätho da ꞌyøtꞌe tengu miꞌda yʉ jąꞌi thoho, janangueꞌa da zä da ꞌyøtꞌa i numanho rá hmu ngue bi cʉꞌtꞌ ran dofʉi.
\v 5 Nuꞌa toꞌo nde da dąh ran tꞌɛ̨ni, pɛ hin da dą ꞌbʉ hin da ꞌyørpa yʉ́n tꞌɛ̨di a ran tꞌɛ̨ni.
\v 6 Nuꞌa to dim pɛpʉ ja ra häi da zi a rá mbʉdi din ja, janangueꞌa da hyumbi da ꞌyøtꞌ rá ꞌbɛfi, ngue da bądi rá mbʉdi i tąsɛ rá ꞌbɛfi nangue rá mbʉi zɛhɛ.
\v 7 Dami pądi ꞌbɛꞌa dí xiꞌi, Oją di ꞌyomfɛ̨niꞌi ngue ꞌbɛꞌa gätho gui ꞌyøtꞌe.
\v 8 Thocpa thoho guim bɛ̨ni i ꞌbʉꞌa ra Jesucristo ya, bi dąmbɛ̨ni ꞌbʉ mi du, nɛ nuꞌa nꞌda rám bomꞌbɛto ra David. Nɛ gueꞌa ram hma dí mangä a.
\v 9 Janangueꞌa dí sä ran ʉnbi ya, nɛ dí ofädi, tenguꞌbʉ drá tsꞌomꞌbäigä. Pɛ nu rám hman Oją hingui ofädi a.
\v 10 Nɛ dí hätꞌi dí thocä a ra ꞌbɛfi, madagueꞌbʉ pa ma ʉnguigä, dín ndepe nɛꞌʉ dim pø ʉ toꞌo gätho nthahni. Nɛ ga comhbʉ rá tsꞌɛdi mixte a ra Cristo, gätho yʉ pa maząi.
\v 11 Majuąni a ram hma, ngue
\q Nuꞌbʉ dím bɛ̨mhbʉ tengutho ꞌbʉ ꞌdarbʉ xcamá tuhʉ ra Cristo, da zä ꞌdarbʉ dam ꞌbʉhmbʉ ꞌbʉ.
\q
\v 12 Nɛ nuꞌbʉ dí häthʉ yʉn ʉnbi, pɛ ꞌdarbʉ ga comhbʉ bʉ ja rá  tsꞌɛdi ꞌbʉ.
\q Pɛ nuꞌbʉ dí cømhbʉ a ra Cristo, nɛꞌa da gønjʉ a.
\q 
\v 13 Nuꞌbʉ hin dí ɛ̨cꞌyɛihʉ gue majuąni a, pɛ guextaꞌa majuąni a,
\q nɛ gätho da ꞌyøtꞌa bi ma da ꞌyøtꞌe.
\s Oją da numanho ra hogambɛfi
\p
\v 14 Dami bɛ̨nba ʉ bí ꞌbʉpʉ nanguehya yʉm hman ya, nguetho in nu Oją ʉ. Gui xifi hin din juntꞌi nangue yʉ́m hma. Nguetho säti tho ꞌbʉ din juntꞌi, ndetho di ʉꞌtꞌʉ toꞌo i øde.
\v 15 Nɛ gan ɛ̨hya gan xädi nguetho gra hogambɛfi nangue a ram hma majuąni. Damin ꞌyomfɛ̨ni gui hyoni ꞌbɛꞌa nam bøni nꞌda ngu nꞌda ram hma, nɛ gui pądi ꞌbɛꞌa pɛ ʉ nꞌda ngu nꞌda yʉm hma, nɛ gui pɛpi xʉn ho. Janangueꞌa da numanho Oją a guí øtꞌe, nɛ hin gui pɛsꞌ ni sä.
\v 16 Nɛ gui ꞌuegue nangue yʉm hma säti thoho, nguetho nuꞌʉ hingui ho ʉ, nɛ di japi ɛ̨mmɛ din tsꞌomꞌbäi nꞌda.
\v 17 Nɛ nuꞌʉ yʉ́m hma, tenguꞌbʉ ra sąsi din ndoqui, nɛ da ꞌya rá jąꞌi nꞌda. Ngue tengu yʉ́m hma i manꞌa ra Himeneo nɛ ra Fileto.
\v 18 Nuꞌʉ bi ꞌuegue nangue ram hma majuąni, nɛ sä ɛ̨nꞌʉ ya bin ja ngue ya xʉn dąmbɛ̨ni ʉ yʉ ꞌyɛ̨cꞌyɛi i ꞌbʉi. Janangueꞌa bi pärpa yʉ́ tꞌɛ̨cꞌyɛi ʉ ꞌda.
\v 19 Pɛ nu rá ꞌbɛfi Oją i ørpa yʉ ꞌyɛ̨cꞌyɛi, hin da zä dim ꞌbɛdi, nguetho di jamansu ʉ yʉ́ tꞌʉhni Oją. Nɛ nuꞌʉ yʉ́ tꞌʉhni Oją, ngue i man rá thuhu ra Cristo, i jatho da ꞌuepʉ ja ra tsꞌoqui.
\v 20 Nɛ nujʉ dyʉ ꞌyɛ̨cꞌyɛihʉ, dí øthʉ tenguꞌbʉ dyʉm  pɛfihʉ bʉ ja rá ngu Oją. Nɛ tenguꞌbʉ xʉn ngu yʉm pɛfi bí ja bʉ. Nuꞌʉ ꞌda yʉ oro, nɛ yʉ tꞌaxi, pɛgue ra za ʉ ꞌda, nɛ ra jąhäi ʉ miꞌda. Nuꞌʉ ꞌda ɛ̨mmɛ pa nthoni, nuꞌʉ ꞌda hin ɛ mahyoni.
\v 21 Nuꞌbʉ nꞌda ra jąꞌi da ꞌuesɛ bʉ ja ra tsꞌoqui, da gohi xʉn ho, tengu nꞌda ram pɛfi i pa nthoni, da mba ma jamansu, nɛ da zä di pɛpi xʉn ho rá hmu bʉ ja rá ngu.
\v 22 Janangueꞌa dami ꞌuegue nangue yʉ tsꞌoqui di ho yʉ tsꞌʉntꞌʉ, pɛ gan ɛ̨hya gui ꞌyøtꞌ ran ho in nde Oją. Nɛ gui hyą ra tsꞌɛdi nangue guim bɛ̨n Oją, nɛ din ja nin huɛ̨cate, nɛ nꞌdatꞌa guim bɛ̨mhbʉ ʉ gä miꞌda i ɛ̨cꞌyɛi Oją, nangueꞌʉ mꞌbeꞌtꞌe yʉ́ mbʉi.
\v 23 Nɛ gui ꞌuetho nangue ran juntꞌi im manꞌʉ toꞌo hin din ꞌyomfɛ̨ni, nguetho ja guepʉ da mbʉpʉ nꞌda ra sʉi.
\v 24 Pɛ nu yʉ́ ꞌyɛ̨hɛ ra Hmu hingui sä din sʉi, pɛ din ja yʉ́ yembʉi nangue nꞌda ngu nꞌda ʉ, nɛ din ɛ̨hya din xänbate, nɛ da hyätꞌi xʉn ho ꞌbɛꞌa da tꞌørpe.
\v 25 Nɛ nuꞌbʉ ꞌbʉꞌa nꞌda nꞌdanꞌyo im bɛ̨ni, jante thoho gui ꞌyuti, xøhma tho Oją di japi di päh rá mbʉi, da zøni da bą a majuąni.
\v 26 Nɛ da dįn ran ꞌyomfɛ̨ni xʉn ho bʉya, nguetho da yąni nangue rá ꞌdihi ra zįthu xí bɛntꞌi, mín nde a ra zįthu xtá ꞌyørpa rá pähä.
\c 3
\s I jatho dam fähmbʉ nangueꞌʉ yʉ tsꞌomꞌbäi
\p
\v 1 Nuꞌi Timoteo, dami pądi ꞌbɛꞌa din ja. Ba ɛ̨pʉ yʉ pa xʉn hɛ̨i, nguetho dim ꞌbʉh yʉ tsꞌomꞌbäi.
\v 2 Nguetho din huɛ̨c zɛhɛ, nɛ høntꞌa ra mbɛti da nde. Nɛ ná yątꞌa, nɛ din ꞌyɛ̨zɛhɛ, nɛ din sante, da mbɛstaꞌa ꞌbɛꞌa i xih rá ta nɛ rá mbe, nɛ hinguim bɛ̨n ra mate bi tꞌørpe, nɛ hingui numansu Oją.
\v 3 Nɛ hin din ja yʉ́n huɛ̨cate, nɛ njąmꞌbʉ din hoh yʉ́ mbʉi, nɛ høntꞌa go ꞌbɛꞌa da xih yʉ́ mijąꞌihʉ, nɛ øzɛhɛ yʉ́ pähä zɛhɛ, nɛ njoꞌo to i su, nɛ i sanꞌʉ i øtꞌ ran ho.
\v 4 Nɛ yʉ ząndatetho, nɛ hingam ꞌbɛ din ꞌyomfɛ̨ni ꞌbɛꞌa da ꞌyøtꞌe. Nɛ mbɛ̨ni ma guesɛ, nɛ di ho rán johya ra ximhäi xinda gue rá pähä Oją.
\v 5 I ja yʉ́n tꞌøtꞌe tengu yʉ́ tꞌɛ̨cꞌyɛi, pɛ hingui nde da hyąn rá tsꞌɛdi Oją ʉ. Pɛ gui ꞌuegue nangueꞌʉ. 
\v 6 Nɛ i pa bʉ ja yʉ ngu, i hätꞌ yʉ xisu, i xifi ꞌdaꞌangu da ꞌyøthʉ ngueꞌʉ yʉ xisu hinguin zaqui yʉ́ mbʉi, ngueꞌa xʉn ngu yʉ́ tsꞌoqui i tu. Nɛ manꞌda ní tsꞌixpʉ ja ra tsꞌoqui.
\v 7 Nɛ da ꞌyømanho ꞌbɛꞌa gä ním hma da sifi nɛ thocpa tho din xädi pɛ njąmꞌbʉ da bą a majuąni.
\v 8 Tengu mi øtꞌʉ ra Janes nɛ ra Jambres, ngueꞌa mim bądi ʉ, nɛ midín sʉhmbʉ ra Moisés, ngue rá pøngahyą Oją. Nɛ ngutho i øtꞌ yʉn ꞌyohʉ ya, din sʉhmbʉ a ram hma majuąni. Nɛ bi tsꞌon yʉ́n ꞌyomfɛ̨ni, nɛ bim ꞌbɛdi nangueꞌa ra ꞌyu majuąni.
\v 9 Pɛ hingui ngu yʉ pa da hyätꞌi, nguetho gätho da tꞌuti nte ní mbatꞌʉ yʉ́m hma, tengu bin japꞌʉ yʉ bądi ngue ra Janes nɛ ra Jambres.
\s Rán zɛgui ran zofo
\p
\v 10 Pɛ nuꞌi Timoteo, gá tɛnni ꞌbɛꞌa dá xänꞌnaꞌi. Nɛ guí pądi ꞌbɛꞌa dám ꞌbʉcä, nɛ guí pądi hanja dá øtꞌä a. Guí pądi ꞌbɛꞌa dí ɛ̨cꞌyɛigä, nɛ gán nu njąmꞌbʉ dán xømbʉigä. Nɛ guí pądi ja man huɛ̨cate.
\v 11 Nɛ guí pądi ɛ̨mmɛ bi mba ma ʉgui, nɛ gán nu ꞌbɛꞌa mán ʉnbi dá hätꞌä. Nɛ guí pądi ꞌbɛꞌa gätho dá thocä bʉ Antioquía, nɛpʉ Iconio, nɛpʉ Listra, ngue nu yʉn ʉcpi dá nugä. Pɛ Oją bi yąngui nangue gätho ʉ.
\v 12 Nɛ majuąni dí xiꞌi, toꞌo gätho da nde nꞌdatꞌa ra Cristo da dɛnni, da mba ma ʉcpi ʉ.
\v 13 Nu yʉ tsꞌomꞌbäi nɛ yʉ hyäte, manꞌda manꞌda xʉn tsꞌo ꞌbɛꞌa da ꞌyøtꞌe. Nɛ ꞌda xtín hyäthoho.
\v 14 Pɛ nuꞌi, dami thoqui ꞌbɛꞌa gán xädi, guí pądi gue majuąni a, gue guí pądi toꞌo bi xänꞌnaꞌi.
\v 15 Nɛ gueꞌbʉ go gmín tꞌʉhni, gá pąh rá tꞌohni Oją, i ja rá tsꞌɛdi bi bɛ̨nꞌniꞌi gá däp ni mbʉi ra Jesucristo, nɛ gán yąni.
\v 16 Gätho rá tꞌohni Oją bi bɛ̨nba Oją nangue rá mbʉi toꞌo bi ꞌyoꞌtꞌi. Nɛ mahyoni di jajʉ ga pąhmbʉ ꞌbɛꞌa rán ꞌyomfɛ̨ni Oją, nɛ da xijʉ ꞌbʉ hinga gueꞌa dí øthʉ, nɛ gueꞌa dí pärca ma mbʉihʉ a, nɛ da xängahʉ ran ho ga øthʉ.
\v 17 Janangueꞌa nte di ꞌbɛ a rá mbɛfi Oją, da zä bʉ da ꞌyøtꞌe ꞌbɛꞌa gätho xʉn ho.
\c 4
\p
\v 1 Janangueꞌa dí xiꞌi gra Timoteo, Oją in nujʉ, nɛ ra Jesucristo, nuꞌa i jatho ba pengua da ꞌyøtꞌ ran tsꞌʉtꞌabi, di juąnbą ʉ ꞌbʉi nɛꞌʉ xʉn du. In nujʉ, janangueꞌa ɛ̨mmɛ dí xiꞌi:
\v 2 Dami mampꞌa rám hma, ɛ̨mmɛ gan ɛ̨hya guim ma, hønbʉ go hapʉ nɛ høntꞌa go ní ora, pɛ guehma gui xifi nꞌda ngu nꞌda yʉ jąꞌi. Dami hɛcpa yʉ dąditsꞌoqui, japi da ꞌyɛꞌtsꞌ yʉ́ tsꞌoqui, nɛ gui zɛrpa yʉ́ mbʉi bʉya. Nɛ jante thoho gui xänbi nɛ hin gan xømbʉi.
\v 3 Gui hyumbi nguetho ba ɛ̨pʉ yʉ pa njon da nde da ꞌyøꞌa ram hma di hocpa yʉ́ mbʉi, pɛgue da zonhꞌnʉ miꞌda yʉ xänbate, da man ʉ ꞌda yʉm hma manꞌda di hosɛ.
\v 4 Da goh yʉ́ mbʉi nangueꞌa majuąni, nɛ da dɛnꞌnʉ yʉm hma him majuąni.
\v 5 Pɛ nuꞌi thocpa thoho gan ꞌyomfɛ̨ni xʉn ho. Dami hyätꞌ yʉn ʉnbi, dami jąꞌtsꞌi xʉn ho a ni ꞌbɛfi, nangue rán ho maꞌdaꞌyo ra Jesucristo.
\v 6 Nɛ nugä, mi tsꞌʉtho da zøn ra pa da guah ran tꞌunni nangue ma te dadí un Oją, da zøn ra ora ga pøngä ua, ngue ga tu.
\v 7 Bi gua a ran tąha dá øtꞌä ya nangueꞌa ran tąha xʉn ho, nɛ bi gua a ra ꞌdihi dá øtꞌä. Dá jamansu ma ꞌbɛfi nangue ma tꞌɛ̨cꞌyɛi dá øtꞌe.
\v 8 Nɛ nuya bí jabʉ a ran ho di ꞌdacä ra hoga Inspector, ngue rán thɛui a ran ho dá øtꞌä. Nɛ di ꞌdacä ꞌbʉ bi zøn ra pa. Nɛ hinga høngdä, nɛ gätho ʉ miꞌda gue i xønni ba ɛ̨h ra Hmu, nɛꞌʉ gätho din tꞌun ran ho ʉ.
\s Bi mba ma bɛ̨nbi ra Timoteo
\p
\v 9 Nɛ nuꞌi, Timoteo, dami ꞌyøtꞌ ra tsꞌɛdi gua ɛ̨cua nꞌdihi.
\v 10 Nguetho nu ra Crescente bi mba bʉ Galacia, nɛ ra Tito bi mba bʉ Damacia, nuꞌa go ra Demas bi mbasɛ bʉ ra hnini Tesalónica, ngue bi ho ra ximhäi in nu ya.
\v 11 Høntꞌa ra Lucas dí ꞌbʉꞌbe ua. Bá si a ra Marcos ꞌbʉ guá ɛ̨hɛ, nguetho ga hongua a.
\v 12 Nɛ dá pɛnh pʉ ja ra hnini Éfeso a ra Tíquico.
\v 13 Pɛ nuꞌbʉ guá ɛ̨hɛ, gua cąngui tsꞌʉ ma coto dá sopʉ Troas bʉ bí ꞌbʉh ra Carpo, nɛꞌʉ ma libro gua cąngui tsꞌʉ, pɛ manꞌda jatsꞌɛdi gua cąnga yʉ søcuą hinga ntꞌoꞌtꞌi.
\v 14 Nu ra Alejandro ra ꞌyøtꞌacobre, xʉn tsꞌo ꞌbɛꞌa bi ꞌyørque. Oją di cospi nangue yʉ́n tꞌøtꞌe.
\v 15 Damim fädi hin da ꞌyøtꞌeꞌe tengu bi ꞌyørcä, nguetho ɛ̨mmɛ bi gorca ma nde ꞌbʉ mán yą.
\v 16 Nuꞌbʉ rá mbʉdi bi mba ma juąngui njom bi mbäxcagui, pɛ gätho bi hyɛga thoho. Oją di punba ʉ.
\v 17 Pɛ Oją dám ꞌbäꞌbe nɛ bi zɛrca ma mbʉi, janangueꞌa dá jąꞌtsꞌi dá manꞌa rám hman bʉ bí ꞌbʉꞌʉ hing yʉ judío. Nɛ Oją bi mbäxqui bi yąngui nangue yʉ́ nde yʉ zate.
\v 18 Nɛ Oją da yąngui nangue gätho ꞌbɛꞌa xʉn tsꞌo, nɛ ꞌbex da zixca bʉ mahɛ̨tsꞌi bʉ di manda. Ga ɛ̨spahʉ Oją gätho yʉ pa maząi. Nɛ høntꞌa gam bɛ̨mhbʉ a ya.
\s Yʉn zɛngua rán zɛgui
\p
\v 19 Dami zɛnguagui tsꞌʉ ra Prisca, nɛꞌa rá ndø, nuꞌa ra Aquila, nɛꞌʉ ꞌbʉpʉ rá ngu ra Onesíforo.
\v 20 Nu ra Erasto bí copʉ Corinto. Nuꞌa ra Trófimo dá sopʉ Mileto ngue xʉn ʉ.
\v 21 Dami ꞌyøtꞌ ra tsꞌɛdi gua ɛ̨ ꞌbʉ hin ní yʉtꞌ yʉ pa xʉn sɛ. I pɛnhꞌna ran zɛngua gätho yʉ cu i ꞌbʉcua, nu ra Eubulo nɛ ra Pudente, nɛ ra Lino, nɛ ra Claudia, nɛ gätho miꞌda yʉ cu ꞌbʉcua, gätho i pɛnhꞌna ran zɛngua.
\v 22 Nu ma Hmuhʉ ra Jesucristo da mbäxꞌa ni mbʉi, nɛ di ꞌda ahʉ rá mate Oją. Nɛ høntꞌa dá xiꞌa ya.