\id HEB
\h HEBREOS
\toc1 HEBREOS
\mt1 HEBREOS
\mt2 Ra søcuą bi ꞌbɛnba yʉ ꞌyɛ̨cꞌyɛi, yʉ israel, ngue na yą ra hebreo ʉ
\c 1
\s Bin ꞌyusɛ Oją nangueꞌa rá Tsꞌʉntꞌʉ
\p
\v 1 Nuꞌbʉ mayaꞌbʉ thoho ꞌdahmi tsꞌʉ bʉ í ꞌyuꞌa rán ꞌyomfɛ̨ni Oją, nɛ ꞌdahma ꞌdanꞌyo bʉ á xiꞌʉ yʉ́ pøngahyą. Nɛ gueꞌʉ bi xi a mam bombøtahʉ ʉ, gue dyʉ israelhʉ.
\v 2 Pɛ nuya rán zɛgui yʉ pa ya, bi jajʉ ga pąhmbʉ xʉn ho Oją ya nangue rá Tsꞌʉntꞌʉ bi zøcua dí ꞌbʉhmbʉ. Nɛ guesɛ a rá Tsꞌʉntꞌʉ í ꞌyøtꞌ Oją gätho yʉ ximhäi, nɛ bi zänni dim Hmu ꞌbɛꞌa gätho i ja.
\v 3 Nɛ ní ꞌyɛ̨pʉ bí ꞌbʉ Oją rá Tsꞌʉntꞌʉ tenguꞌbʉ rá thai ra hyadi, gueꞌa di jajʉ ga pąhmbʉ a rán ho Oją. Nɛ tengu ꞌbʉ ra sello, ꞌda angu da bøni. Nɛ di ꞌyonsɛ ꞌbɛꞌa gätho i ja a rá Tsꞌʉntꞌʉ Oją, nangue rám hma i ja rá tsꞌɛdi. Nɛ nuꞌbʉ mí juasɛ bi hoga ma tsꞌoquihʉ ua, bi mbeng bʉ mahɛ̨tsꞌi ꞌdarpʉ ní mandaui a tąte thoho i ja rá tsꞌɛdi.
\s Manꞌda i ja rá tsꞌɛdi rá Tsꞌʉntꞌʉ Oją xinda gueꞌʉ yʉ́m ꞌbɛhni mahɛ̨tsꞌi
\p
\v 4 Nu rá Tsꞌʉntꞌʉ Oją ꞌbʉ ya xí hogahʉ, bin tꞌun rá tsꞌɛdi xʉn ho xinda gueꞌʉ yʉ́m ꞌbɛhni mahɛ̨tsꞌi. Nguetho ya rá Tsꞌʉntꞌʉ zɛhɛ Oją a, i conhui rá tsꞌɛdi rá Ta xinda gueꞌʉ yʉ́m ꞌbɛhni.
\v 5 Nguetho:
\q Nuꞌi ma ꞌdatsꞌʉntꞌʉ i,
\q dí ꞌda a ni tsꞌɛdi ya,
\m pɛ njąmꞌbʉ bi tꞌɛ̨mpꞌʉ yʉ́m ꞌbɛhni Oją, pɛ hinda høntꞌa rá Tsꞌʉntꞌʉ zɛhɛ. Nɛ:
\q Nugä dra Ta nangue ma Tsꞌʉntꞌʉ,
\m nɛ xínga nꞌda rám ꞌbɛhni Oją bi ꞌyɛ̨mbi.
\v 6 Pɛ nu Oją ꞌbʉ mambá si ua ja ra ximhäi a rá Tsꞌʉntꞌʉ, nɛ bi ꞌyɛ̨na:
\q Nu ahʉ gyʉm ꞌbɛhnihʉ mahɛ̨tsꞌi, gätho gui thąndehʉ na ma Tsꞌʉntꞌʉ,
\m bi ꞌyɛ̨n Oją. Nguetho nuꞌa rá Tsꞌʉntꞌʉ go da tꞌɛ̨spa a bʉ na nu Oją.
\v 7 Pɛ nu yʉ́m ꞌbɛhni mahɛ̨tsꞌi, i øtꞌ Oją yʉ́ ꞌyɛ̨hɛ thoho ʉ, tengu mán tꞌoꞌtꞌi:
\q Ɛ̨mmɛ i tih yʉ́m ꞌbɛhni ꞌbʉ i ørpa rá ꞌbɛfi tengu ꞌbʉ yʉn dąhi,
\q nɛ di juadi ꞌbɛꞌa gätho hingui numanho Oją tengu ꞌbʉ yʉ sibi, nangue rá tsꞌɛdi zɛhɛ Oją.
\m 
\v 8 Pɛgue bi ꞌyɛ̨mpꞌa rá Tsꞌʉntꞌʉ Oją:
\q Nuꞌi gra Oją, thocpa thoho gam manda zɛhɛ maząi,
\q njąmꞌbʉ dim ꞌbɛh ni tsꞌɛdi, nɛ guidí manda xʉn ho.
\m
\v 9 Nɛ bi ꞌyɛ̨mbi:
\q Nuꞌi gra Oją, ɛ̨mmɛ guí numanho a ran ho, nɛ ꞌbe xingui 
\q tsꞌʉ guí nde gui nu a ran tsꞌo.
\q Janangueꞌa ni Ojągui manꞌda dá ꞌdaꞌa ran johya
\q xinda gueꞌʉ gätho miꞌda ni cu gue ma ꞌyɛ̨cꞌyɛi,
\m bi ꞌyɛ̨mbi.
\v 10 Nɛ bi ꞌyɛ̨mpꞌa rá Tsꞌʉntꞌʉ a Oją:
\q Nuꞌi gra Hmu, rá mbʉdi gá ꞌyøtꞌ ra ximhäi,
\q nɛ gá ꞌyøzɛhɛ ꞌbɛꞌa gä bí ja mahɛ̨tsꞌi,
\m bi ꞌyɛ̨n Oją.
\q
\v 11 Nɛ nuꞌa ra ximhäi dim pädi, nɛ mahɛ̨tsꞌi, pɛ nuꞌi gam ꞌbʉi maząi.
\q Gätho yʉ din tsꞌoni tenguꞌbʉ yʉ ꞌyahe.
\q 
\v 12 Nɛ tenguꞌbʉ di päh ní he nꞌda,
\q din jabʉ ꞌbʉ gá päh ra ximhäi.
\q Pɛ nuꞌi njąmꞌbʉ gam pädi gätho yʉ pa,
\q nɛ njąmꞌbʉ da guaꞌa ni te.
\q
\v 13 Nɛ, dami manda ua ja ma tsꞌɛdi ui,
\q ja gueꞌbʉ ga ja i gui tąpꞌʉ gätho man sʉihʉ,
\m bi ꞌyɛ̨mpꞌa rá Tsꞌʉntꞌʉ a Oją. Pɛ njąmꞌbʉ bi xi ʉ yʉ́m ꞌbɛhni Oją tengu a.
\v 14 Gätho yʉ́m ꞌbɛhni bí pɛnhua, tenguꞌbʉ yʉn dąhi gue hin dí nuhʉ, i øtꞌ yʉ́ ꞌyɛ̨hɛ Oją nanguejʉ toꞌo gätho ntsꞌänni da hyąn a ra te njąmꞌbʉ da guadi.
\c 2
\s Jatho ga ʉrpahʉ ra güɛnda a ní yąnjʉ Oją
\p
\v 1 Pɛ nuꞌa rá Tsꞌʉntꞌʉ Oją bi ꞌyurcahʉ rá ꞌyu Oją, xinda gue ʉ ꞌbɛꞌa mí hma mayaꞌbʉ. Janangueꞌa manꞌda ɛ̨mmɛ jatsꞌɛditho ga jamansuhʉ a ꞌbɛꞌa dí øhmbʉ ya, nꞌdahma hin ga ꞌbɛhmbʉ a, nɛ xín dam ꞌbɛhmbʉ bʉya.
\v 2 Nuꞌbʉ mí manꞌʉ yʉ́m ꞌbɛhni Oją ʉ yʉ́n tꞌɛ̨di Oją mayaꞌbʉ, pɛ guehma bi nu ran ʉnbi a rán säui a to bi mbɛsta a bi ma. Pɛ nuꞌa rám hma Oją bi manꞌa rá Tsꞌʉntꞌʉ, manꞌda ja rá tsꞌɛdi a.
\v 3 Janangue ꞌbe xíngui tsꞌʉ ga ponjʉ ꞌbʉ hin dí ʉrpahʉ ra güɛnda a rám hma mixte thoho. Nɛ gueꞌa ram hma ní yąnjʉ Oją a. Nɛ rá mbʉdi bi mansɛ ra Hmu ꞌbʉ mim ꞌbʉcua ja ra ximhäi. Nɛ mꞌbɛjua bi xijʉ ʉ yʉ́ xädi gue bi ꞌyø a bi man ra Hmu.
\v 4 Nɛꞌa Oją bi ꞌyudi majuąni a ram hma ꞌbʉ mí ꞌyøtꞌ yʉ hmɛpya nɛ xʉn ngu yʉn tꞌøtꞌe mixte. Nɛꞌbʉ mí ꞌdajʉ ra tsꞌɛdi nangue rá Hogandąhi, tengu mí ndesɛ Oją bi darcahʉ. Nɛ gueꞌa í ꞌyudi majuąni a ram hma.
\s Nu ra Jesús njuąntho bin ja tengu thohogahʉ
\p
\v 5 Pɛ nuna rá tsꞌɛdi Oją gue dí mangä, hinga nan ja xʉn ho. Pɛ hinga gueꞌʉ yʉ́m ꞌbɛhni mahɛ̨tsꞌi di jap Oją di manda bʉ ja ra ꞌdaꞌyo ximhäi ꞌbʉ bin ja rá tsꞌɛdi Oją xʉn ho bʉ.
\v 6 Pɛgue bi zän Oją toꞌo di manda bʉ, tengu bi siꞌa Oją ꞌbʉ mí tꞌänni ꞌbɛꞌa di ꞌyɛ̨tꞌui yʉ jąꞌi:
\q ꞌBɛꞌa gue ɛ dí pɛhmbe gue ɛ̨mmɛ guím bɛ̨nje,
\q nɛ dyʉ jąꞌi thohohe. Nɛ manꞌda guidí jamansuje.
\q 
\v 7 Pɛ ja ꞌda yʉ pa gá jaje him mí ja ma tsꞌɛdihe, xinda gueꞌʉ nim ꞌbɛhni bʉ mahɛ̨tsꞌi.
\q Pɛgue gá sänni gui ꞌyɛ̨scahe, nɛ gui ꞌdac ma tsꞌɛdihe.
\q Nɛ gá sänni ga mandahe ꞌbɛꞌa gätho i ꞌbʉi nɛ ꞌbɛꞌa gätho i ja gue gá ꞌyøtꞌe.
\q 
\v 8 Nɛ gätho gá sänꞌndʉ miꞌda ꞌbɛꞌa gä gá ꞌyøtꞌe gue da ꞌyɛ̨cꞌyɛigahe,
\m bi ꞌyɛ̨m bʉ mán tꞌoꞌtꞌi. Janangueꞌa hinꞌyʉ ꞌbɛꞌa bi zänni gue hin ga mandahʉ, nguetho bi ꞌyɛ̨na: “Gätho da tꞌɛ̨cꞌyɛi ʉ yʉ jąꞌi.” Pɛ hindaná nuhʉ gue gätho da ꞌyɛ̨cꞌyɛigahʉ.
\v 9 Pɛ hinda høntꞌa ra Jesús, bin ja tengu mán tꞌoꞌtꞌi, bi tꞌɛ̨spa ꞌbʉ mí du, bin tꞌun rá tsꞌɛdi. Pɛgue xín ja ꞌda yʉ pa bin japi him mí ja rá tsꞌɛdi xinda gueꞌʉ yʉ́m ꞌbɛhni Oją mahɛ̨tsꞌi. Janangueꞌa bi zä bi du nangue nꞌda ngu nꞌdajʉ, nangue rán huɛ̨cate Oją. Nɛ nuꞌa ran dąte bi nu, gueꞌa í tꞌɛ̨spa a.
\v 10 Nu Oją bi zänꞌndʉ gätho da hyonsɛ. Nɛ bi nde bá si xʉn ngu yʉ́ tꞌʉhni bʉ ja rá tsꞌɛdi. Janangueꞌa xʉn ho a bi ꞌyøtꞌ Oją gue bin ʉnba ʉ yʉ́ Hmu, guepʉ bi zä bi yąnjʉ xʉn ho.
\v 11 Nɛ nuꞌa ra hocpate nɛꞌʉ toꞌo mahoqui, nɛ nꞌdatꞌa yʉ Ta. Janangueꞌa hingui pɛꞌtsꞌ rá sä a ra hocpate da ꞌyɛ̨mbi yʉ́ cu ʉ bi hoqui.
\v 12 Tengu mán tꞌoꞌtꞌi, bi ꞌyɛ̨na:
\q Ga xi ʉ ma cu gätho nangueꞌe,
\q nɛ ga ɛ̨sꞌiꞌi nubʉ ja rám pɛti ma cu,
\m bi ꞌyɛ̨nꞌa ra Cristo.
\v 13 Nɛ manꞌda bi man ra Cristo:
\q Dí tøꞌmi da mbäxcä Oją.
\m Nɛ xø bi ꞌyɛ̨na:
\q Dí ꞌbähmbe ua ya yʉ́ tꞌʉhni Oją bi ꞌdaqui,
\m bi ꞌyɛ̨nꞌa ra Cristo.
\v 14 Nujʉ yʉ́ tꞌʉhnigahʉ a, dyʉ jąꞌi thohohʉ, ngue i ja ma ngøhʉ nɛ ja ma jihʉ. Nɛ a ra Jesús bin jąꞌi nɛ bin ja rá ngøcꞌyɛi tengu thoho gahʉ. Janangueꞌa bi zä bi du ngue í ꞌbɛrpa rá tsꞌɛdi a rá hmu ran dąte, ngue ra zįthu.
\v 15 Nɛ guepʉ da zä di ꞌuecpa yʉ́ mbidi ʉ toꞌo i su ran dąte gätho yʉ pa i ꞌbʉi.
\v 16 Nɛ mfądi hinga gueꞌʉ yʉ́m ꞌbɛhni Oją mahɛ̨tsꞌi bi ꞌyørpa ra güɛnda da yąni, pɛgue guenjʉ dyʉ ꞌyɛ̨cꞌyɛihʉ yʉ́m bomꞌbɛtojʉ ra Abraham, nde Oją da yąnjʉ.
\v 17 Janangueꞌa nu ra Jesús njuąntho bin ja tengu thoho gahʉ, bi bɛ̨ni ꞌbɛꞌa gätho dím bɛ̨mhbʉ, bi zä ꞌbɛꞌa gätho dí sähʉ. Nuꞌbʉ hin xtín jabʉ, hin xtán zä xtí huɛ̨gahʉ, hin xtán zä xtí juah rá ꞌbɛfi Oją gue bi hoga ma tsꞌoquihʉ. Gueꞌa í tꞌɛ̨mbi bim hmumbäją a.
\v 18 Nɛ nuya da zä da mbäxcahʉ toꞌo i tsꞌä nangue yʉn ʉnbi, nguetho nɛsɛ a bi tsꞌä nangue yʉn ʉnbi, nɛ bi hyätꞌi.
\c 3
\s Nu ra Jesús manꞌda sä da tꞌɛ̨spi xinda gueꞌa ra Moisés
\p
\v 1 Nuya, ma hoga cu ahʉ, gue bi huanꞌnahʉ ꞌdarpʉ dam ꞌbʉhmbʉ bʉ mahɛ̨tsꞌi a Oją. Dami ꞌyøhmbʉ ya nangue ra Jesús, nuꞌa ra pøngahyą nɛ ra hocpate nangue rá ꞌyu Oją dí tɛnhdʉ.
\v 2 Nu ra Jesús bi juah rá ꞌbɛfi bi unꞌna Oją, tengutho ra Moisés bi juah rá ꞌbɛfi gue bi jamansu ʉ nꞌdamꞌbʉi yʉ́ tꞌʉhni Oją.
\v 3 Pɛ nu ra Jesús manꞌda sä da tꞌɛ̨spi xinda gueꞌa ra Moisés, tengu thoho ra ta bʉ ja nꞌda ra ngu manꞌda da tꞌɛ̨spi xinda gueꞌʉ yʉ́ tꞌʉhni.
\v 4 Pɛ madagueꞌbʉ i ørpa rá ꞌbɛfi Oją ʉ yʉ jąꞌi, tengu bi ꞌyøtꞌ ra Moisés, pɛ nuꞌa Oją i øzɛhɛ gätho rá ꞌbɛfi.
\v 5 Nguetho rá ꞌyɛ̨hɛ Oją a ra Moisés, nɛ bi jąꞌtsꞌ rá bɛfi bi jamansu gätho yʉ́ tꞌʉhni Oją mayaꞌbʉ. Nɛ nu rá ꞌbɛfi ra Moisés bi ꞌyu i tsꞌʉ a rá ꞌbɛfi ra Cristo da ꞌyøtꞌ ꞌbʉ bi zøhø.
\v 6 Pɛ nu ra Cristo rá Tsꞌʉntꞌʉ Oją a, nɛ bi jąꞌtsꞌi bim hmu nangueꞌʉ nꞌdamꞌbʉi yʉ́ tꞌʉhni Oją. Nɛ guectahʉ ya nꞌdamꞌbʉi yʉ́ tꞌʉhni gahʉ Oją, ꞌbʉ dadí thoctahʉ dí pąhmbʉ majuąni a, nɛꞌbʉ dadí thojʉ a nán johyahʉ a ran ho dí tømhbʉ.
\s Da zin yʉ́ tꞌʉhni Oją da hyurpa yʉ́ mbʉi
\p
\v 7 Janangueꞌa i ɛ̨nꞌa rá Hogandąhi Oją bʉ ja rá tꞌohni:
\q Nuya ra pa i jabʉ ya in zo ahʉ Oją. Pɛ ɛ̨mmɛ xʉn ho ꞌbʉ gui ꞌyøhmbʉ a i xi ahʉ.
\q 
\v 8 ꞌYo gadí ʉꞌtꞌ ni mbʉihʉ tengu bi ꞌyøtꞌʉ mí tɛn ra Moisés, bi numanꞌʉtho Oją ꞌbʉ mín ꞌyo bʉ ja ra ʉhäi.
\q Nɛ bi zä Oją ʉ yʉ jąꞌi nangue ꞌbɛꞌa bi numanhosɛ.
\q 
\v 9 Nu nim bombøtahʉ bi ꞌyørca ran tsꞌäte nɛ bi \q numanꞌʉthogui ꞌbʉ nyote njɛya mín ꞌyo bʉ ja ra ꞌyu, madagueꞌbʉ bi nu xʉn ngu yʉn tꞌøtꞌe gue dá ut ma tsꞌɛdi, bi ꞌyɛ̨n Oją.
\q 
\v 10 Janangueꞌa dán cuɛgä nangueꞌʉ yʉ jąꞌi,
\q nguetho thocpa thoho i ꞌuegue nangue yʉ́ mbʉi,
\q hin jąmꞌbʉ bi bą a ra ꞌyu dá xifi, bi ꞌyɛ̨n Oją.
\q 
\v 11 Janangueꞌa ɛ̨mmɛ dán cuɛgä nangueꞌʉ. Majuąni dá ma, 
\q hin ga singä bʉ ja ra häi ʉ ngue da hyu yʉ́ mbʉi, bi ꞌyɛ̨n Oją.
\m
\v 12 Ma zi cu ahʉ, pɛ dam fähmbʉ. Xiꞌbʉ nꞌda ahʉ gui ꞌuehmbʉ ꞌbʉ din ja ahʉ ra tsꞌombʉi, gue gui ꞌyɛ̨na hin gui nde gui ꞌyɛ̨cꞌyɛihʉ Oją, i ꞌbʉi.
\v 13 Pɛ nꞌda ngu nꞌda ahʉ damim fäxhʉ bʉ ja ra hogaꞌyu, nꞌda pa ngu nꞌda pa, janya i sä ga øhmbʉ a im ma Oją, yʉ pa ya. Nɛ nuꞌbʉ din jabʉ gui ꞌyøthʉ, xínga nꞌda ahʉ da hyä ahʉ yʉ tsꞌoqui, gue di ꞌbätꞌa ni mbʉihʉ.
\v 14 Nguetho dí comhbʉ a rán ho ra Cristo ꞌbʉ dí thojʉ a ní hyu ma mbʉihʉ a, gueꞌbʉ go rán zɛgui tengu ꞌbʉ rá mbʉdi dá tįmhbʉ.
\v 15 Janangueꞌa i xijʉ a rá tꞌohni Oją ya:
\q Ɛ̨mmɛ xʉn ho ꞌbʉ gui ꞌyøhmbʉ a rá nde Oją gue in zo ahʉ ya.
\q ꞌYo gadí ʉꞌtꞌ ni mbʉihʉ tengu bi ꞌyøtꞌʉ ꞌda bi numanꞌʉ tho Oją, bi ꞌyɛ̨na.
\m 
\v 16 Toꞌo ʉ bi ꞌyøh rám hma Oją nɛ bi numanꞌʉ tho. Ha hinga gue ʉ yʉ jąꞌi bi yąn Oją nangueꞌa ra häi Egipto mín ꞌyohʉ ra Moisés.
\v 17 Nɛ toꞌo bi un ra cuɛ Oją gätho nyote njɛya. Ha hinga guetꞌʉ bi yąn Oją bʉ ja ra häi Egipto, bi ꞌyøtꞌ yʉ tsꞌoqui, janangue bi du bʉ ja ra ʉhäi.
\v 18 Nɛ toꞌo ʉ majuąni bi tꞌɛ̨mbi hin da hyurpa yʉ́ mbʉi Oją. Ha hinga guetꞌʉ him bi ꞌyɛ̨cꞌyɛi Oją.
\v 19 Gam bɛ̨mhbʉ ya hanja him bi zä bi zin Oją ʉ, nguetho him bi ꞌyɛ̨cꞌyɛi Oją ʉ.
\c 4
\p
\v 1 Nuya i jatho ga suhʉ, janya i ja yʉ pa i xijʉ Oją da zinjʉ bʉ ja rá ngu ngue da hyurca ma mbʉihʉ. Xøhma tsꞌʉrbʉ thoho hin da zøni ga cʉthʉ bʉ.
\v 2 Nguetho nɛjʉ bi sijʉ a ram hma gue dí cʉꞌtꞌa nꞌda, tengu bi sih yʉ jąꞌi mí ꞌbʉh mayaꞌbʉ, gueꞌʉ bin ꞌyohʉ ra Moisés. Pɛ nuꞌʉ, him bi zä í tsꞌim bʉ a ram hma bi sifi, nguetho him bi nde bi bą ʉ gue majuąni a.
\v 3 Pɛ nujʉ gue dí pąhmbʉ majuąni a ram hma, guenjʉ gue ga cʉthʉ bʉ da hyurca ma mbʉihʉ Oją. Nɛ guepʉ him bi zä bi yʉtꞌʉ ꞌda, bi ꞌyɛ̨n Oją:
\q Janangueꞌa dán cuɛgä nangue ʉ, nɛ majuąni dá ma,
\q njąmꞌbʉ ga singä ʉ gue da hyu yʉ́ mbʉi, bi ꞌyɛ̨n Oją.
\m Pɛ bi dʉꞌmi bi xih yʉ jąꞌi gue da zim bʉ ꞌbʉ mí jua a bi ꞌyøtꞌ ra ximhäi Oją, nɛ bin säya bʉ, bi hyu rá mbʉi zɛhɛ.
\v 4 Tengu bi ma rá tꞌohni gue nubʉ bi ma, gue:
\q Ná yoto ma pa bin säya Oją ꞌbʉ mí jua a bi ꞌyøtꞌ ra ximhäi.
\q 
\v 5 Pɛgue bi xiꞌʉ bʉya nangueꞌʉ ꞌda mín ꞌyohʉ ra Moisés:
\q “Njąmꞌbʉ ga singä ʉ gue da hyu yʉ́ mbʉi,” bi ꞌyɛ̨n Oją.
\m 
\v 6 Pɛ guehma ꞌbʉi toꞌo din säya bʉ da hyu yʉ́ mbʉi. Pɛ hinga gueꞌʉ ꞌda bi sifi mayaꞌbʉ, nguetho him bi ꞌyɛ̨cꞌyɛi a ram hma.
\v 7 Pɛgue bi ꞌyu Oją nꞌda ra pa mahønꞌa, gue ra pa i jabʉ ya, tengu bi ma ra David nangue ʉ xʉn ngu yʉ jɛya xí thogui ꞌbʉ mí ꞌbʉh ra Moisés. Nɛ gueꞌa ram hma xí hmangua, gue ɛ̨na:
\q Nuya ra pa i jabʉ ya in zo ahʉ Oją. Pɛ ɛ̨mmɛ xʉn ho ꞌbʉ gui ꞌyøhmbʉ a i xi ahʉ.
\q ꞌYo gadí ʉꞌtꞌ ni mbʉihʉ tengu bi ꞌyøtꞌʉ ꞌda bi numanꞌʉtho Oją, bi ꞌyɛ̨nꞌa ra David.
\m 
\v 8 Nuꞌa ra Moisés bim pommi a ra Josué bi thoqui bi zix ʉ yʉ jąꞌi. Bi säyabi bʉ ja a ra häi Canaan bi un Oją, bin johya bʉ. Pɛ nuꞌbʉ da gueꞌa ran johya bi man a Oją, hin xtá ma mahønꞌa Oją nangue manꞌda ra pa ꞌbʉ.
\v 9 Janangueꞌa guextaꞌa i ja nꞌda ra xɛqui í juadi xʉn ho, guepʉ da hyurca ma mbʉihʉ Oją, gue yʉ́ tꞌʉhnigahʉ a.
\v 10 Nuꞌʉ toꞌo da yʉtꞌi gue da hyurpa yʉ́ mbʉi a Oją, din säya nangue gätho yʉ́ ꞌbɛfi ʉ tengu tho Oją bin säya nangue gätho rá ꞌbɛfi bi hyu rá mbʉi ꞌbʉ mí jua a bi ꞌyøtꞌ ra ximhäi.
\v 11 Janangueꞌa ndeꞌbʉ ɛ̨mmɛ ga ndehʉ ga cʉthʉ bʉ. Hin ga øthʉ tengu ʉ him bi ꞌyɛ̨cꞌyɛi ram hma ꞌbʉ mí xi Oją.
\v 12 Pɛ nuꞌa rám hman Oją dim pɛfi tenguꞌbʉ ra thɛni yoho yʉ́ hɛtꞌi, pɛ manꞌda i ja rá tsꞌɛdi a xinda gue ra thɛni, ngue i sä da zørpʉ mbo ní mbʉi nꞌda, i urcahʉ ꞌbɛꞌa gätho dím bɛ̨mhbʉ mbo ma mbʉihʉ, ꞌbɛꞌa majuąni dín nde ga øthʉ, ngue ndaꞌa bi bɛ̨ngahʉ Oją, nɛ ndaꞌa dá bɛ̨nsɛhʉ.
\v 13 Xinga nꞌda ʉ bi ꞌyøtꞌa Oją gue i sä da ꞌyącpi ꞌbɛꞌa mbɛ̨ni, gätho i pądi, nɛ di nɛqui bʉ ja rá dä a to i hąscahʉ ra güɛnda.
\s Nu ra Jesús ma hmumbäjąhʉ xʉn ndoho rá tsꞌɛdi
\p
\v 14 Nu ra Jesús rá Tsꞌʉntꞌʉ Oją, i tꞌɛ̨mbi ma hmumbäjąhʉ nguetho ma hocpatehʉ a. Nɛ bi zøm bʉ mbo mahɛ̨tsꞌi. Nɛ i fäxcahʉ a gue i ja rá tsꞌɛdi mixte. Janangueꞌa ga thoqui ga tɛnhdʉ a rám hma.
\v 15 Nu ra Jesús ma hmumbäjąhʉ i pądi hinga gätho dí häthʉ ʉ dí sähʉ, nguetho bi zä ꞌbɛꞌa gätho dí sähʉ. Pɛ hin jąmꞌbʉ bi ꞌyøtꞌa nꞌda ra tsꞌoqui.
\v 16 Janangueꞌa hin ga suhʉ dan yąhʉ Oją bʉ bí ja rá tsꞌɛdi, nguetho di huɛ̨gahʉ nɛ di pungahʉ, nɛ da mbäxcahʉ a ra ora dí homhbʉ a.
\c 5
\p
\v 1 Bi thanꞌdʉ ꞌda yʉ jąꞌi israel ꞌbʉ mayaꞌbʉ ngue dim hmumbäją. Nɛ da ꞌyäpꞌa Oją nangue gätho miꞌda. Nɛ midí thocpa Oją ʉ yʉ́ ꞌbøtsꞌe nangue ʉ yʉ zuꞌuɛ̨ bi tho, gue ní mba ma punbi yʉ́ tsꞌoqui yʉ jąꞌi.
\v 2 Nɛ nangue yʉ jąꞌi thoho ʉ yʉ hmumbäją, hinga gätho bi ꞌyøtꞌe xʉn ho, ngutho ʉ miꞌda yʉ́ mijąꞌihʉ. Janangueꞌa bi zä janate tho bi hocꞌʉ yʉ ꞌyąmbʉi nɛ yʉ ꞌyøtꞌatsꞌoqui.
\v 3 Nɛ jatho rá mbʉdi midí un Oją nꞌda ra ꞌbøtsꞌe ra mbäją nangue yʉ́ tsꞌoqui zɛhɛ, tengu bi ꞌyøtꞌe nangue yʉ́ tsꞌoqui yʉ jąꞌi.
\v 4 Njongui sä da ꞌyøtꞌe gue dim hmumbäjąsɛ, nɛ høntꞌa Oją sä da huahna nꞌda ra hmumbäją, tengu ꞌbʉ mí huahna ra Aarón.
\v 5 Nɛ ngutho bin ja nangue ra Cristo, him bi mansɛ gue dim hmumbäjąsɛ, pɛ Oją bi un ran tꞌɛ̨di gue dim hmumbäją, tengu bi ma rá tꞌohni Oją ꞌbʉ mí ꞌyɛ̨na:
\q Nuꞌi ma ꞌdatsꞌʉntꞌʉ i,
\q dadí ꞌdaꞌa ni tsꞌɛdi ya.
\m 
\v 6 Nɛ bi ꞌyɛ̨mbi mahønꞌa:
\q Nuꞌi gam mbäją gätho yʉ pa ya, 
\q tengu ra hmɛpya bi ꞌyøtꞌ ra Melquisedec,
\m bi ꞌyɛ̨n Oją bʉ ja rá tꞌohni.
\v 7 Nu ra Cristo ꞌbʉ mim ꞌbʉcua ja ra häi, ząi nan yąui Oją, bi ꞌyäp rá mfätsꞌi da dąpꞌʉ. Ntsꞌɛdi bi mbafi nɛ bin zoni. Pɛ bi bądi ja rá tsꞌɛdi Oją da yąm bʉ ja ran dąte. Nɛ bi ꞌyø Oją ꞌbʉ mí nde din unsɛ bʉ ja rá pähä Oją.
\v 8 Nuꞌa ra Cristo, madagueꞌbʉ rá Tsꞌʉntꞌʉ Oją a, pɛgue bin jąꞌi a, janangueꞌa bi xänba yʉn ʉnbi ꞌbɛꞌa dí ꞌyørpa rá pähä Oją a.
\v 9 Bin jabʉ bi ꞌyøtꞌe, janangueꞌa bi zøni bi jąꞌtsꞌi gätho rá pähä Oją. Nɛ bi zä bi unꞌna ra te maząi gue toꞌo gätho da ꞌyɛ̨cꞌyɛi a.
\v 10 Nguetho bi huan Oją a gue dim hmumbäją nangue dyʉ ꞌyɛ̨cꞌyɛihʉ, tengu ra hmɛpya bi ꞌyøtꞌ ra Melquisedec.
\s Ntsꞌutho ꞌbʉ ga penjʉ
\p
\v 11 I ja xʉn ngu ꞌbɛꞌa dín nde ga xi ahʉ nangue a bim hmumbäją a ra Cristo. Pɛ xʉn hɛ̨i ga xi ahʉ nguetho hin guí honi gui pąhmbʉ.
\v 12 Nɛ xʉn ngu yʉ pa xʉ thogui gue mí ja ngue xquín xänbatehʉ, pɛ guextaꞌa i jatho da si ahʉ ʉ yʉm hma hingui hɛ̨i nangue Oją. Nguetho gá cohi gán ꞌyąmbʉihʉ. I jatho gui sihʉ ra xiꞌba tenguꞌbʉ gyʉ ꞌuɛrehʉ, nɛ hin guí häthʉ gui sihʉ njuąntho ran tsꞌihmɛ.
\v 13 Nɛ nuꞌa gnán tsꞌihmɛhʉ ra xiꞌba, in ja tengu yʉ ꞌuɛre, nɛ hinda ná pąhmbʉ ꞌbɛꞌa ra te gue dám ꞌbʉhmbʉ njuąntho.
\v 14 Pɛ nu ran tsꞌihmɛ xʉn ho ntꞌøtꞌe nangue yʉ dąjąꞌi. Nɛ xʉn te yʉ́ mbʉi nangue ząi din ꞌyomfɛ̨ni, janangueꞌa pądi ndaꞌa xʉn ho nɛ ndaꞌa hingui ho.
\c 6
\p
\v 1 Janangueꞌa ndeꞌbʉ ga thoqui ga homhbʉ gue dan dąjąꞌihʉ. Ndeꞌbʉ hinga høntꞌa ga mamhbʉ a rá mbʉdi bi sängahʉ nangue ra Cristo. Ndeꞌbʉ hinga høntꞌa ga mamhbʉ gue ga päh ma mbʉihʉ gue mí ɛ̨na xtá hyojʉ, nɛ hinga høntꞌa ga mamhbʉ ga däp ma mbʉihʉ Oją.
\v 2 Ndeꞌbʉ hinga høntꞌa ga mamhbʉ ram hma dan xixyąhʉ, nɛ nangue ran jäxaꞌyɛ, nɛ nangue da dąmbɛ̨ni ʉ xʉn du, nɛ nangue din ja ran juąnbi ꞌbʉ rán zɛgui, ndeꞌbʉ hinga høntꞌʉ ga mamhbʉ ya, nguetho dí pąhmbʉ ndaꞌa ʉ.
\v 3 Mbähä ga thojʉ ꞌbʉ da zä da xocꞌa ni mbʉihʉ Oją, nguetho i ja miꞌda.
\v 4-6 Nguetho nuꞌbʉ hin ga thohmbʉ, xøhma thoho da bɛ̨ni da mbenc i ꞌda. Nɛ nubʉya him manꞌdandį da nde ba pengui mahønꞌa. Nguetho nuꞌbʉ mí numanho nꞌdandį rán nɛqui Oją, nɛ bi zämanho a bi un Oją, nɛ bin ꞌyohʉ rá Hogandąhi Oją, nɛ bi zämanho a rá hogamhma Oją, nɛ bi bą i tsꞌʉ rá tsꞌɛdi a ra ꞌdaꞌyo ximhäi din ja. Pɛ nuꞌbʉ da mbengui, ya him manꞌdandį da zä di hoc yʉ́ mbʉi mahønꞌa. Nguetho im bɛ̨ni tenguꞌbʉ da zä di cuat mahønꞌa bʉ ja ra pontꞌi a rá Tsꞌʉntꞌʉ Oją, nɛ di japi din thenda a ra Cristo.
\v 7 Nguetho tenguꞌbʉ nꞌda ra häi a ra jąꞌi, nꞌdandį ngu nꞌdandį din ꞌye, i pøtꞌe, nɛ i pøtsꞌe ꞌbɛꞌa pa nthuhu bʉ. Nɛ nuꞌa ra häi nuꞌbʉ di japi din ja ꞌbɛꞌa tupʉ a ra mbɛfi, da hyąn rán jąpi Oją a.
\v 8 Pɛ nuꞌbʉ hin di japi da bøxꞌa ꞌbɛꞌa bi thupʉ, nɛ høntꞌʉ yʉ ꞌuįni i ja bʉ, nte di muui ꞌbʉ. Nɛ hin da hnumanho a ra häi ꞌbʉ. Nɛ nzɛgui da mba ntꞌudi nangue ra sibi.
\s Bi ząngba ma mbʉihʉ a ra Jesús, dí tømhbʉ a ran ho ya
\p
\v 9 Pɛ madagueꞌbʉ njabʉ dá mamhbe, ma zi cu ahʉ, pɛgue dí hąxhe njuąni gan jahʉ tengu ra hogahäi, bin japi bin ja xʉn ngu ꞌbɛꞌa bi thupʉ, nguetho bi hocꞌa ni mbʉihʉ Oją. Nɛ xʉn ndoho ran jąpi ba ɛ̨hɛ, guin nuhʉ.
\v 10 Nguetho xʉn ho øtꞌ Oją ngue hin di pumbɛ̨ni a ra ꞌbɛfi gá ꞌyøthʉ, nɛ ran huɛ̨cate gá ꞌyuthʉ ʉ ꞌda ni cuhʉ, nangue rá thuhu Oją, nɛ nangue a guí ødahʉ ya.
\v 11 Ɛ̨mmɛ dí ndehe gui thojʉ gan ɛ̨hyahʉ, nꞌda ngu nꞌda ahʉ, gueꞌbʉ go rán zɛgui ra pa. Janangueꞌa da zøni gui hyąmhbʉ ꞌbɛꞌa gätho guí tømhbʉ.
\v 12 Hin dí ndehe da yʉndąnhyɛ̨i thoho ahʉ, pɛ dami ꞌyøthʉ ꞌbɛꞌa mí øtꞌʉ ꞌda ꞌbʉ mí bądi majuąni a rám hma Oją, nɛ bi hyätꞌi bi zɛt yʉ́ mbʉi, janangueꞌa bi hyąn a ra herencia bi ma majuąni Oją.
\v 13 Nu Oją ꞌbʉ mí xih majuąni a ra Abraham, bi ma majuąni nangue rá thuhu zɛhɛ. Nguetho njoꞌo manꞌda xʉn ndoho rá tsꞌɛdi hinda hønsɛ a. 
\v 14 Nɛ bi ꞌyɛ̨n Oją: “Majuąni xʉn ngu ran ho ga ꞌda i, nɛ ga ꞌda i xʉn ngu nim bomꞌbɛto,” bi tꞌɛ̨mpꞌa ra Abraham.
\v 15 Nu ra Abraham bʉya bi hyätꞌi bi døꞌmi, janangueꞌa bi hyąni ꞌbɛꞌa bi xi a Oją.
\v 16 Nuꞌbʉ ꞌda yʉ jąꞌi im ma majuąni ꞌbɛꞌa da ꞌyøtꞌe, i ndønba rá thuhu Oją, nɛ ya him ma hyom miꞌda yʉm hma dí hocꞌa, nguetho i fądi majuąni a bi ma.
\v 17 Nɛꞌa Oją ꞌbʉ mí nde da ꞌyurcahʉ ngue majuąni a rám hma, bi man rá thuhu zɛhɛ ꞌbʉ mí xijʉ ra herencia. Ngue guejʉ ntsꞌänni ga hąmhbʉ a. Janangueꞌa ga pąhmbʉ njąmꞌbʉ di pä a bi xijʉ.
\v 18 Janangueꞌa yoho bʉ dá pąhmbʉ, rám hmansɛ nɛ rá thuhu zɛhɛ, ga pąhmbʉ hin dim fɛhni Oją, pɛ majuąni da zinjʉ bʉ. Ngue guejʉ bá ꞌdahmbʉ bʉ mí ja xcá tuhʉ, dá bɛnthʉ bʉ hapʉ da zinjʉ ya.
\v 19 Janangueꞌa bi zinjʉ bʉ a ra Jesús, bi ząngba ma mbʉihʉ bʉ mbo rá ngu Oją, njąmꞌbʉ da hyɛgahʉ.
\v 20 Nguetho mꞌbɛtꞌo bi yʉrpʉ a ra Jesús. Nɛ bi xi a Oją ngue bi hogahʉ ngue da numanhojʉ bʉ. Gueꞌa nam bøni ma hmumbäjąhʉ, ngue i ꞌbʉi maząi, tengu ra hmɛpya bi ꞌyøtꞌ ra Melquisedec.
\c 7
\s Bim mbäją ra Jesús tengu ra hmɛpya bi ꞌyøtꞌa ra Melquisedec
\p
\v 1 Nu ra Melquisedec bim hmutsꞌʉtꞌabi bʉ ja ra hnini Salem, nɛ bim mbäją nangue Oją mixtetho rá tsꞌɛdi. Nɛ nu ra Abraham ꞌbʉ mam bá tąpꞌʉ ꞌda yʉ tsꞌʉtꞌabi, bin cꞌatꞌui ra Melquisedec, bi tꞌäp rán jąpi Oją nangue a ra Abraham.
\v 2 Nɛ nuꞌa ra Abraham bʉya bi unꞌna ra Melquisedec a ná ꞌdɛtꞌa gue xpí hyąnba yʉ́n sʉihʉ, gue rán tꞌunni Oją a ná ꞌdɛtꞌa. Nɛ nu rá thuhu ra Melquisedec nde da ma “ra hoga hmutsꞌʉtꞌabi.” Nɛ nde da ma gue “ra hmutsꞌʉtꞌabi di hocpa ra sʉi,” nɛ gueꞌa nam bønꞌa rá thuhu rá hnini Salem.
\v 3 Nɛ hinga mfądi toꞌo rá ta ra Melquisedec, o toꞌo rá mbe. Nɛ hinga mfądi ndaꞌa rá ꞌyʉ, nɛ hinga ntꞌoꞌtꞌi gueꞌbʉ mím ꞌbʉi o gueꞌbʉ mí du. Janangueꞌa tenguꞌbʉ rá tsꞌɛdi rá Tsꞌʉntꞌʉ Oją bʉ ín ꞌyu a ra Melquisedec, gue dim mbäją gätho yʉ pa hønꞌbʉ go njąmꞌbʉ.
\v 4 Janangueꞌa sä ga pąhmbʉ ya gue xʉn ngu rá tsꞌɛdi ra Melquisedec ꞌbʉ min ja, nguetho guesɛ ma ngʉrpa bøtahʉ ra Abraham bi unꞌna ná ꞌdɛtꞌa bá tąpꞌʉ yʉ́n sʉihʉ.
\v 5 Nu rán tꞌɛ̨di Oją bi xi ʉ yʉ́ tꞌʉhni ra Leví gue yʉ́ mbäją yʉ israel, gue da hyącpa a ná ꞌdɛtꞌa ʉ yʉ́ mɛni, madagueꞌbʉ yʉ́m bomꞌbɛto ra Abraham ʉ, pɛ nɛsɛ ʉ.
\v 6 Pɛ nu ra Melquisedec, madagueꞌbʉ hingui conhui rá ꞌyʉ ra Leví gue ra Abraham, pɛ bi unꞌna ná ꞌdɛtꞌa gueꞌa bá tąh ra Abraham. Nɛ nu ra Abraham, madagueꞌbʉ xʉn ngu rá tsꞌɛdi bʉ nam bɛ̨n Oją, nguetho bi xifi majuąni da ꞌyørpa a Oją. Pɛ manꞌda ja rá tsꞌɛdi ra Melquisedec nguetho bi tꞌäp a ran jąpi a ra Abraham.
\v 7 Nɛ mfądi nuꞌa di jąpꞌa nꞌda manꞌda ja rá tsꞌɛdi xinda gueꞌa pa ma jąpi.
\v 8 Pɛ nuꞌʉ yʉ́ mbäją ra israel ząi midin tꞌunꞌna ná ꞌdɛtꞌa, pɛ yʉ jąꞌi ʉ, nɛ i tu ʉ. Pɛ nu manꞌda ra mbäją gue ra Melquisedec, i mam bʉ ja ra tꞌohni tengu ꞌbʉ i ꞌbʉtho.
\v 9 Nɛ da zä gam bɛ̨mhbʉ ya, gue gätho rá ꞌyʉ ra Leví, gue yʉ́ mbäją ra israel, gue i äpꞌa ná ꞌdɛtꞌa ʉ yʉ́ mɛni, gam bɛ̨mhbʉ gue nɛꞌʉ tenguꞌbʉ bin jutꞌʉ ꞌbʉ mí unꞌna ná ꞌdɛtꞌa xɛqui a ra Melquisedec a ra Abraham.
\v 10 Nguetho da zä gam bɛ̨mhbʉ nangue ra Abraham, tenguꞌbʉ ya xmín ꞌyohʉ yʉ́m bomꞌbɛto ꞌbʉ mín cꞌatꞌui ra Melquisedec, madagueꞌbʉ hin nám ꞌbʉi.
\v 11 Bim mbäją ra Aarón gue rá ꞌyʉ ra Leví, nɛ rá ngʉrpa bøta a ra Abraham a. Nɛ gueꞌʉ bim mbäją ʉ nangueꞌʉ yʉ israel, tengu bi man yʉ́n tꞌɛ̨di Oją. Pɛ nuꞌbʉ da guehya yʉ́ ꞌbɛfi gue ní yąn Oją ʉ yʉ jąꞌi, him mi jatho xtí nɛqui manꞌda ra mbäją gue nꞌdanꞌyo ꞌbʉ, tengu ra hmɛpya bi ꞌyu a ra Melquisedec, nɛ hin nangue a ra Aarón.
\v 12 Pɛ nuꞌbʉ mí mba ma pädi yʉ mbäją, nɛ ꞌbɛꞌa mí øtꞌe, nɛ ʉ yʉn tꞌɛ̨di mí tɛnni, mí jatsꞌɛditho da mba ma pädi ʉ.
\v 13-14 Bi ꞌyɛ̨n ra tꞌohni gue nu a manꞌda ra mbäją gue ra Cristo a, bim ꞌbʉi nangue manꞌda rá tsꞌʉntꞌʉ ra Israel, ngue hing rá ꞌyʉ yʉ mbäją. Nguetho mfądi xʉn ho gue ma Hmuhʉ bim ꞌbʉi nangue rá ꞌyʉ ra Judá. Nɛ nte bi ma yʉ́n tꞌɛ̨di ra Moisés, gue dim mbäją a rá ꞌyʉ ra Judá.
\v 15 Pɛ manꞌda gui pąhmbʉ ꞌbɛꞌa dá mangä ꞌbʉ guim bɛ̨mhbʉ nangue a ra Melquisedec, gue i udi tengu a manꞌda ra mbäją, nuꞌa ra Cristo a.
\v 16 Nɛ hin nangue ra ꞌyʉ bi man ʉ yʉn tꞌɛ̨di da zä dim mbäją a ra Cristo. Nɛ xín nangue ʉ yʉn tꞌɛ̨di mí ma ꞌbɛꞌa da tꞌøtꞌua bi dɛnꞌna, nguetho him mán tsꞌänni ząi din ja ʉ. Pɛgue bi zä bim mbäją nangue a rá tsꞌɛdi a rá tesɛ njąmꞌbʉ da zä da guadi.
\v 17 Gueꞌa bi man Oją:
\q Nuꞌi gra mbäją maząi,
\q tengu ra hmɛpya bi ꞌyøtꞌa ra Melquisedec, 
\m bi ꞌyɛ̨n Oją.
\v 18 Gueꞌa án tꞌɛꞌtsꞌa ra ꞌyu gue bi tsꞌän mayaꞌbʉ, nguetho mbɛ nte midí muui a.
\v 19 Nguetho njom bi zä bi hocpa yʉ́ tsꞌoqui ʉ yʉn tꞌɛ̨di bin tꞌun ra Moisés. Pɛ bi nɛqui manꞌda xʉn ho, gue i sixcahʉ bʉ bí ꞌbʉ Oją.
\v 20 Nɛ manꞌda xʉn ho ra ꞌyu nangue ra ꞌdaꞌyo mbäją, nguetho bi mansɛ rá thuhu Oją ꞌbʉ mí un rán tꞌɛ̨di a rá Tsꞌʉntꞌʉ.
\v 21 Pɛ nu miꞌda yʉ mbäją ꞌbʉ mín tꞌun yʉ́ ꞌbɛfi, him bi hndønba rá thuhu Oją. Nɛ nanguehna ra hmumbäją, bi mansɛ rá thuhusɛ Oją. Tengu bi mam bʉ ja rá tꞌohni Oją, bi ꞌyɛ̨mpꞌa rá Tsꞌʉntꞌʉ zɛhɛ:
\q Nugä dra Oją, dí mansɛ ma thuhugä, nɛ hin ga pä a dí ma.
\q Nuꞌi gam mbäją gätho yʉ pa maząi, 
\q tengutho ra hmɛpya bi ꞌyøtꞌa ra Melquisedec,
\m bi ꞌyɛ̨n Oją.
\v 22 Nu ra Jesús, da zä di jąꞌtsꞌa nꞌda ran hoqui manꞌda xʉn ho xinda gueꞌa mí ja mamꞌbɛtꞌo, nguetho dim hmumbäją maząi a.
\v 23 Nuꞌʉ ꞌda yʉ mbäją bi zøni xʉn ngu mí ꞌbʉi, nguetho i tu, nɛ him bi zä bi thoqui hønꞌbʉ go njąmꞌbʉ.
\v 24 Pɛ nu ra Jesús hingui tu, janangueꞌa njoꞌo manꞌda sä da hyąnba rá ꞌbɛfi.
\v 25 Janangueꞌa da zä di hoqui xʉn ho ʉ toꞌo da zøm bʉ ꞌbʉ Oją ya, nangue a ra Cristo. Nguetho i ꞌbʉi maząi, da zä thocpa thoho da ꞌyäpꞌa Oją nangue ʉ to da zøm bʉ.
\v 26 Njuąntho ɛ gueꞌa ra Jesús a ma hmumbäją dí homhbʉ. Nguetho xʉn hotho a, nte in dupatesɛ him bi ꞌyøtꞌ yʉ tsꞌoqui, nɛ him bi hyąnba yʉ́m ꞌbäi ʉ yʉ tsꞌomꞌbäi, nɛ manꞌda i pa ntꞌɛ̨spi gue i ja rá tsꞌɛdi bʉ mahɛ̨tsꞌi.
\v 27 Nu yʉ jąꞌi ꞌbʉ mim hmumbäją di thoqui da mbøspa Oją gätho yʉ pa, mbʉdi bi mbøspe nangue yʉ́ tsꞌoqui zɛhɛ, nɛ mꞌbɛjua yʉ́ tsꞌoqui yʉ jąꞌi. Pɛ nu ra Jesús him bi ꞌyøtꞌe tengu ʉ, nɛ nꞌdandį thoho bi mbøspa Oją ꞌbʉ mi un rá tesɛ, nguetho di muui maząi a.
\v 28 Nu rán tꞌɛ̨di Oją bi man ra Moisés bi tꞌɛ̨mbi dim hmumbäją ʉ yʉ jąꞌi thoho, pɛ him bi hyätꞌi bi jąꞌtsꞌʉ yʉ́n tꞌɛ̨di Oją. Pɛ nuꞌbʉ mí mansɛ rá thuhu Oją, bi ma gue dim hmumbäją rá Tsꞌʉntꞌʉ zɛhɛ. Nɛ nuꞌa gätho bi jąꞌtsꞌʉ yʉn tꞌɛ̨di nɛ bi juadi, nte di ꞌbɛh ya. Nɛ gueꞌa rám poniui a rán tꞌɛ̨di Oją bin tꞌun ra Moisés a ra Jesús.
\c 8
\s Nu ra Jesús bin hocpate nangue ra ꞌdaꞌyon hogui
\p
\v 1 Bí ꞌbʉpʉ mahɛ̨tsꞌi a ma hmumbäjąhʉ gue ma hocpatehʉ, ꞌdarpʉ ní mandaui a tąte thoho rá tsꞌɛdi. Nɛ guehna manꞌda jatsꞌɛdi na dí xi ahʉ.
\v 2 Nɛ dim mbäją bʉ majuąni i pa nthąnde Oją bʉ mahɛ̨tsꞌi, tenguꞌbʉ ra niją bi ꞌyøtꞌ Oją, nɛ him bi hyøh yʉ jąꞌi.
\v 3 Gätho yʉ́ hmumbäją ʉ yʉ israel, bi tsꞌänni di un yʉ ꞌbøtsꞌe nangue ʉ yʉ zuꞌuɛ̨ bi tho, nɛ miꞌda. Janangueꞌa nɛ a ra Jesucristo ja ꞌbɛꞌa bi uni, nguetho nɛ a ra hmumbäją a.
\v 4 Pɛ hinga guecua ja ra ximhäi bim mbäją a. Nɛ nuꞌbʉ xtín ząngua ja ra häi, njąmꞌbʉ xtán zä xtím mbäją. Nguetho hing rá ꞌyʉ ra Leví a, nɛ hing yʉ zuꞌuɛ̨ bi mbøxꞌa, tengu bi man rán tꞌɛ̨di Oją bi man ra Moisés.
\v 5 Nɛ nuꞌa ra niją bʉ midím pɛ ʉ yʉ mbäją ua ja ra ximhäi, nꞌda ra hmɛpya thoho gue ꞌbɛꞌa ørpʉ mahɛ̨tsꞌi. Nguetho bi sih ra Moisés ꞌbʉ mí dʉpꞌa ra niją: “Dami jamansu ꞌbɛꞌa gui japꞌʉ i ja bʉ, nɛ ꞌbɛꞌa gätho gui ꞌyørpʉ, tengu thoho dá utꞌa ꞌbʉ gmí ꞌbʉpʉ ja ra tꞌøhø,” bi ꞌyɛ̨mp Oją.
\v 6 Pɛ nu ra Cristo bin tꞌunꞌna nꞌda ra ꞌbɛfi ɛ̨mmɛ manꞌda xʉn ho xinda gueꞌʉ miꞌda yʉ mbäją. Nguetho din hocpate nangue ran hogui manꞌda xʉn ho ꞌbɛꞌa gätho i ma da ꞌyørcahʉ.
\v 7 Nuꞌbʉ xtán zä xtí hocpa nꞌda a rá mbʉdi ran hogui, him mí jatho xtán ja a ná yoho ran hogui.
\v 8 Pɛ nu Oją him bi zä bi numanho yʉ jąꞌi nangue a ran hogui mí ja, pɛ guextaꞌa ndupate bʉ na nu Oją ʉ. Janangueꞌa bi ꞌyɛ̨na:
\q Da zønꞌa nꞌda ra pa 
\q ga øtꞌä nꞌda ra ꞌdaꞌyon hoqui mahønꞌa nangue yʉ mɛ israel nɛ yʉ mɛ judá.
\q 
\v 9 Nɛ hin din ja tengu ran hoqui dá xi ʉ yʉ́m bombøta
\q ꞌbʉ mambá jʉcpʉ ra häi Egipto, nɛ dá jamansu.
\q Dá xifi xtí jąꞌtsꞌi, pɛ him bi hyätꞌi da ꞌyøzɛhɛ man hoqui dá xifi, gue man tꞌɛ̨di dá xi a ra Moisés.
\q Janangueꞌa him bi zä dá numanho ʉ, bi ꞌyɛ̨nꞌa ra Hmu.
\q 
\v 10 Pɛ nu ran hoqui ga ørpa yʉ israel ꞌbʉ mꞌbɛjua miꞌda yʉ pa, din ja tengu gam mangä ya.
\q Ga un man ꞌyomfɛ̨ni bʉ ja yʉ́n ꞌyomfɛ̨ni ʉ,
\q nɛ ga japi mpähä thoho da dɛngui.
\q Janangueꞌa da numanhogui, nɛ ga øtꞌä gue yʉ́ Ojągä ʉ, nɛ din ja gue ma tꞌʉhni zɛhɛ ʉ bʉya.
\q 
\v 11 Nɛ hinga hnɛhi thoho ꞌboꞌo da xänba ʉ,
\q nɛ njon da sänbi gue da bąqui,
\q nguetho gätho da bąc zɛhɛ ʉ,
\q yʉ ngʉrpi o gue yʉ jąꞌi thoho.
\q 
\v 12 Nɛ ga punbi nangue ran tsꞌo,
\q nɛ him man gam bɛ̨ngä ʉ yʉ́ tsꞌoqui,
\m bi ꞌyɛ̨n Oją.
\v 13 In jabʉ a ra ꞌdaꞌyon hoqui, nɛ gueꞌa í tꞌɛ̨mbi ra nyonhoqui a mí ja, gue ya bi juah rá ꞌbɛfi a, nɛ ní mba bʉ dim ꞌbɛdi ꞌbʉ mí man na.
\c 9
\s Nɛcua ja ra häi mí ja rá ngu Oją, nɛpʉ mahɛ̨tsꞌi
\p
\v 1 Nuꞌa rá mbʉdi ran hoqui, mí ja yʉ́n tꞌɛ̨di nangue yʉn tꞌøtꞌe mí tꞌørpʉ ja ra niją ua ja ra ximhäi.
\v 2 Nɛ nuꞌa ra niją bi tꞌøtꞌe, bin ja nꞌda ra cuarto rá mbʉdi, tꞌɛ̨mbi xʉn dʉxqui, guepʉ mí ja rán ꞌdøgue yʉ lámpara, nɛ ra mɛxa gue i cʉx yʉ ꞌbøxthuhmɛ.
\v 3 Nɛ mí ja manꞌda ná yoho ra cuarto gue nubʉ mbo, mán joti nꞌda ra ꞌbøꞌtꞌe, guepʉ mí tꞌɛ̨mbi manꞌda xʉn dʉxqui.
\v 4 Nɛ nubʉ, mí ja bʉ ra mɛxa ra oro guepʉ mí zø ra xɛca xiza yʉmanho. Nɛ a rá huada ran hoqui gue mán jotsꞌi ra oro gätho yʉ́ hyo. Nɛ nubʉ mbo ra huada mí høpʉ nꞌda ra xaro gue ra oro, mí o bʉ zi tsꞌʉ ra hmɛ i tꞌɛ̨mbi ra maná. Nɛ a rá tøhø ra Aarón gue bi ꞌdogui, nɛ ʉ yʉ xįndo bi tꞌoꞌtꞌa ra nyonhoqui, gue nuꞌʉ yʉ́n tꞌɛ̨di Oją mayaꞌbʉ.
\v 5 Nɛ nu rán joꞌmi ra huada, nꞌda ra xithɛ i tꞌɛ̨mbi ran tsꞌäya ram punbate. Nɛ mí tøpʉ yoho yʉ́ pøte ʉ yʉ́ mbädi Oją mahɛ̨tsꞌi, mí comꞌpʉ mate ra xithɛ bʉ mí pa nsitsꞌi ra ji dím punba yʉ́ tsꞌoqui yʉ jąꞌi. Pɛ hinga xøtꞌa ga xi ahʉ ꞌbɛꞌa nam bønꞌʉ gätho yʉ hmɛpya mí ja bʉ mbo ra niją.
\v 6 Bin jabʉ bi tꞌøtꞌe. Nu yʉ mbäją thoho, thocpa thoho mí cʉrpʉ a rá mbʉdi ra cuarto, gue mí øtꞌ yʉ́ ꞌbɛfi nangue ran dąnde bʉ ja ra niją.
\v 7 Pɛ nubʉ ná yoho ra cuarto manꞌda xʉn dʉxqui, høntꞌa ra hmumbäją mí thopʉ, høntꞌa nꞌdapa thoho i tho a nꞌda jɛya. Nɛ nuꞌbʉ mí yʉrpʉ, i thɛxpʉ rá ji yʉ zuꞌuɛ̨ gue mí xixpʉ, nangue rá tsꞌoqui zɛhɛ ꞌbʉ rá mbʉdi, nɛ nangue yʉ́ tsꞌoqui yʉ jąꞌi ꞌbʉ ná yondį.
\v 8 Nuꞌa rá Hogandąhi Oją di jajʉ ga pąhmbʉ, ngue hin ní socꞌa ra ꞌyu ní mba bʉ bí ꞌbʉ Oją ꞌbʉ gätho mí tꞌøthoho ran dąnde bʉ ja a ra niją ua ja ra ximhäi. Nɛ gueꞌa nꞌda ra hmɛpya bi ꞌyu a ra ꞌbøꞌtꞌe mí corpʉ manꞌda xʉn dʉxqui, mí corpa bʉ ʉ yʉ jąꞌi.
\v 9 Gätho ʉ yʉn tꞌøtꞌe mí tꞌørpʉ ja a ra niją, nꞌda ra hmɛpya thoho nangue a njuąntho i jajʉ ya. Nguetho yʉn tꞌunni nɛ yʉ ꞌbøtsꞌe bi unꞌna Oją, him bi zä bi hocpa bʉ mbo rá mbʉi ʉ mi øtꞌe. Janangue mí pa njorpi bʉ ʉ.
\v 10 Nguetho høntꞌa mí man yʉn tꞌɛ̨di nangue yʉn tsꞌihmɛ midí hoqui, nɛ midín xʉtꞌi. Pɛ nuꞌʉ gueꞌʉ ꞌda yʉn tꞌɛ̨di gue i ja thi. Nɛ gueꞌa bi zän Oją da ꞌyøtꞌʉ, ja gueꞌbʉ mam bá ɛ̨h ra Cristo, ja bi nɛqui a majuąni ra ꞌyu ja rá tsꞌɛdi a bʉya.
\v 11 Gue ya bá ɛ̨h ra Cristo, nɛ gueꞌa ma hmumbäjąhʉ a, nangue ra ꞌdaꞌyo nhoqui i ja ya. Nɛ nuꞌa ra niją guepʉ dim pɛhna ra mbäją ya, manꞌda xʉn ho, nɛ guepʉ majuąni bʉ. Nɛ him bi ꞌyøtꞌ yʉ jąꞌi, nguetho hing ra ngugua ja ra ximhäi a.
\v 12 Pɛgue mahɛ̨tsꞌi bʉ bi yʉtꞌ na ra Cristo ya, tengu ra hmɛpya bi ꞌyuh yʉ hmumbäją ꞌbʉ mí yʉrpʉ manꞌda xʉn dʉxqui. Nɛ ya hin di un yʉ́ ji yʉ tꞌʉdɛꞌyo o gue yʉ tꞌʉndąni, pɛ bi un rá jisɛ. Nɛ nꞌdandį thoho bi yʉrpʉ, nɛ bi yąnjʉ xʉn ho a.
\v 13 Nu rán tꞌɛ̨di Oją bi tꞌɛ̨mbi xʉn tsꞌo ní ngøcꞌyɛi nꞌda ꞌbʉ xí dä a nꞌda ra du. Nɛ bi ma jatho da mba ma cꞌuaspa rá ji ra toro nɛ ra dɛꞌyo, nɛ rá ꞌbospi a ra tꞌʉsundąni gue bi tꞌupʉ ja ra sibi. Nɛ gueꞌa dí hocpa ní ngøcꞌyɛi nꞌda a. Ja bi zä bi dąnde Oją ʉ bʉya.
\v 14 Pɛ gam bɛ̨mhbʉ manꞌda ɛ̨mmɛ i ja rá tsꞌɛdi a rá ji ra Cristo, bi mberca ma tsꞌonꞌyomfɛ̨nihʉ midí ꞌuegahʉ nangue Oją, nꞌdahma da zä ga ørpahʉ rá ꞌbɛfi Oją gue i ꞌbʉi. Nguetho hinꞌyʉ rá tsꞌoqui ra Cristo, nɛ bin unsɛ bʉ ꞌbʉ Oją, ra ꞌbøtsꞌe gue maząi di muui bʉ nam bɛ̨n Oją.
\v 15 Nu ra Jesucristo bin hocpate nangue ra ꞌdaꞌyon hoqui ꞌbʉ mí du. Janangueꞌa gätho bi mba mahoqui ma tsꞌoquihʉ, gue guejʉ mí tɛnhdʉ rá mbʉdi ra yonhoqui. Hinga høngdahʉ, pɛ nɛ ʉ mí ꞌbʉ ꞌbʉ hin nán ja a ra ꞌdaꞌyon hoqui. Nɛ nubʉya gätho bi zä dá comhbʉ ran jąpi maząi gue bi xi Oją ʉ bi zohni.
\v 16 Nuꞌbʉ i manꞌa nꞌda toꞌo da zocpa ʉ ꞌbɛꞌa pɛꞌtsꞌi, pɛ ꞌbɛ da fądi ꞌbʉ majuąni bi du, ja da tꞌøtꞌa xi ma bʉya.
\v 17 Hingui sä da tꞌøtꞌa xi ma ꞌbʉ i ꞌbʉtho, hinda hønꞌbʉ bi du.
\v 18 In jabʉ bin ja ꞌbʉ rá mbʉdi a ran hoqui bi man Oją, gue bin ho ꞌbʉ mí mba mꞌbänbi rá ji nꞌda ra zuꞌuɛ̨, ja bi fądi majuąni bi nu ran dąte bʉya.
\v 19 Janangueꞌa nuꞌa ra Moisés ꞌbʉ mí xih rán tꞌɛ̨di Oją gätho yʉ mɛ israel, nɛ bi cꞌuaspa ra ji bʉya. Bi mitꞌ ra thɛnga xidɛꞌyo nɛ nꞌda ra tꞌʉꞌyɛza gue nꞌyoui yʉ́ paxi, nɛ bi gąrbʉ ja ra dehe nꞌyoui rá ji ra tꞌʉndąni nɛ rá ji yʉ chibo, bi cꞌuaspa bʉ ja rá søcuą i man rán tꞌɛ̨di Oją, nɛ gätho yʉ jąꞌi bi mba ma cꞌuaspi a ra ji bʉya.
\v 20 Nubʉya bi ꞌyɛ̨na: “Nuna ra ji, guehna dí hocꞌa ran hoqui na, gue bi man Oją nanguejʉ. Nuya da zä di punga ma tsꞌoquihʉ,” bi ꞌyɛ̨n a ra Moisés.
\v 21 Nɛ nubʉya bi cꞌuaꞌtsꞌ ra ji bʉ ja rá niją Oją, nɛ ꞌbɛꞌa gätho mí ja bʉ mbo mí pa nthoni bʉ ja rán thąnde Oją, gätho bi mboxpʉ yʉ ji.
\v 22 Nɛ i mam bʉ ja rán tꞌɛ̨di Oją, gue gueꞌa ra ji í hocꞌʉ ꞌbɛꞌa gätho mí tꞌøtꞌe. Pɛ nuꞌbʉ hin dim fän ra ji, hinꞌyʉ ra punbi nangue ra tsꞌoqui, i ɛ̨m bʉ mán tꞌoꞌtꞌi.
\s Í ꞌuec yʉ tsꞌoqui a ím ꞌbøtsꞌe ra Cristo
\p
\v 23 Nuꞌa ra niją, nꞌda ra hmɛpya thoho mí ja ua ja ra häi, bi mba ma hoqui nangue ʉ yʉ́ ji yʉ zuꞌuɛ̨ mí hma. Janangueꞌa bin ja ra ꞌbøtsꞌe manꞌda xʉn ho gue dí hogahʉ, tenguꞌbʉ dyʉ́ nijąhʉ majuąni bʉ mahɛ̨tsꞌi.
\v 24 Nɛ hinga guepʉ ja ra niją bi ꞌyøtꞌ yʉ jąꞌi i ꞌbʉh ra Cristo ya, nguetho yʉ hmɛpya tho ʉ nangue a majuąni rá ngu Oją. Pɛ ɛ guepʉ mahɛ̨tsꞌi bi yʉtꞌi, i äp Oją ya nanguejʉ.
\v 25 Nu yʉ́ hmumbäją yʉ israel, jɛya ꞌbʉ njɛya mí cʉrpʉ ja ra cuarto manꞌda xʉn dʉxqui, midí un ra ji, pɛ hin rá jisɛ. Pɛ nu ra Cristo hinga thocpa thoho di un ra ꞌbøtsꞌe.
\v 26 Xiꞌbʉ xtín ja tengu yʉ hmumbäją, jɛya ꞌbʉ njɛya midí un ra ji. Mí jatho xʉn ngu yʉ nidi xtán du ra Cristo ꞌbʉ, gueꞌbʉ go rá mbʉdi ra ximhäi. Pɛ him bin jabʉ bi ꞌyøtꞌa. Pɛ nuya nꞌdandį thoho bi zøcua ra Cristo gue bin unsɛ bim ꞌbøtsꞌe zɛhɛ, gue í ꞌuecpa yʉ́ tsꞌoqui yʉ jąꞌi. Nɛ guehya yʉ pa gue di jąꞌtsꞌa mí hma mám ꞌbɛtꞌo.
\v 27 Tengu yʉ jąꞌi, ntsꞌänni nꞌdandį thoho da du, nɛ mꞌbɛjua da nu ran juąnbi.
\v 28 Nɛ ngutho ra Cristo, nꞌdandį thoho bin uni bim ꞌbøtsꞌe, ngue bi ꞌuecpa yʉ́ tsꞌoqui ʉ xʉn ngu yʉ jąꞌi. Nɛ mꞌbɛjua ba pengua da zin ʉ i tøꞌmi, pɛ hin dí ꞌyɛ̨hɛ dí ꞌuec yʉ tsꞌoqui mahønꞌa.
\c 10
\p
\v 1 Nuꞌa ran tꞌɛ̨di bin tꞌun ra Moisés nangue yʉ ꞌbøtsꞌe bi ꞌyøtꞌ yʉ mbäją, nꞌda ra hmɛpya thoho nangueꞌa ran ho bá ɛ̨hya. Nɛ hinga gueꞌa majuąni ran ho a. Nɛ njąmꞌbʉ bi zä bi mba ma hocpi yʉ́ tsꞌoqui ʉ mí øtꞌ yʉ ꞌbøtsꞌe, madagueꞌbʉ njɛya ꞌbʉ njɛya midí uni. 
\v 2 Nuꞌbʉ da gueꞌʉ yʉ ꞌbøtsꞌe xtán zä xtín hocꞌʉ, pɛ nꞌdandįtho xtí uni, nɛ xtá ꞌyɛꞌtsꞌa ní un yʉ ꞌbøtsꞌe ꞌbʉ. Nɛ ya xtám bądi nꞌdandį thoho bi bo yʉ́ tsꞌoqui bʉya.
\v 3 Pɛ nangue yʉ ꞌbøtsꞌe bi uni gätho yʉ jɛya, bi japi da bɛ̨ni gue in dupate tho yʉ́ tsꞌoqui.
\v 4 Nguetho hinjąmꞌbʉ da zä di punba yʉ́ tsꞌoqui nꞌda ʉ yʉ́ ji yʉ ndąni nɛ yʉ dɛꞌyo.
\v 5 Janangueꞌa bi ꞌyɛ̨n ra Cristo ꞌbʉ mí zøcua ja ra häi, bi ꞌyɛ̨mpꞌa Oją rá Ta:
\q Hinga njuąntho gueꞌʉ yʉ zuꞌuɛ̨ guí nde.
\q Janangue gá jaqui dán jąꞌigä ngue dam ꞌbøtsꞌegä, bi ꞌyɛ̨nꞌa ra Cristo.
\q 
\v 6 Nɛ hin gnán johya nꞌda ran tꞌunni ngue yʉ zuꞌuɛ̨ bi tꞌupʉ ja ra sibi, xínga gueꞌʉ yʉ ꞌbøtsꞌe nangue yʉ tsꞌoqui.
\q 
\v 7 Janangue dá ɛ̨ngä: “Bá ɛ̨cä ya ga øtꞌä ni pähä ma Oją i, dam ꞌbøtsꞌe zɛhɛgä,
\q tengu mán tꞌoꞌtꞌi bʉ ja nim hma,”
\m bi ꞌyɛ̨nꞌa ra Cristo.
\v 8 Nuꞌa rá mbʉdi bi mangua, hin nán johya Oją ʉ yʉ ꞌbøtsꞌe gue yʉ zuꞌuɛ̨ bi tꞌudi nangue yʉ́ tsꞌoqui nꞌda, madagueꞌbʉ gueꞌa bi manꞌa nꞌda rán tꞌɛ̨di a.
\v 9 Pɛ xø bi ꞌyɛ̨m mahønꞌa bʉya: “Bá ɛ̨cä ya gue ga øtꞌä ni pähä, ma Oją i, gue dam ꞌbøtsꞌe zɛhɛgä.” Gue nde da ma, dí ꞌueh ya yʉ ꞌbøtsꞌe mí ja, nɛ din ja nʉ manꞌda ra ꞌbøtsꞌe.
\v 10 Nu ra Jesucristo bi ꞌyøtꞌ rá pähä Oją, gue bi unsɛ rá jąꞌi nꞌdandį thoho bi juadi. Janangueꞌa bi hogahʉ Oją ya.
\v 11 Nu yʉ́ mbäją yʉ israel mí øtꞌʉ yʉ́ ꞌbɛfi gätho yʉ pa, nɛ thocpa thoho midi un yʉ ꞌbøtsꞌe, madagueꞌbʉ hinjąmꞌbʉ mí sä di hocpa yʉ́ tsꞌoqui nꞌda ʉ.
\v 12 Pɛ nu ra Jesucristo nꞌdandį thoho bin uni bim ꞌbøtsꞌe nangue ma tsꞌoquihʉ, pɛ him manꞌdandį din uni. Nɛ bí ꞌbʉpʉ ꞌdarbʉ ní mandaui Oją ya.
\v 13 Nɛ guepʉ bí ꞌbʉpʉ ya, gueꞌbʉ go bi dąpꞌʉ yʉ́n sʉihʉ.
\v 14 Nguetho nangue nꞌdandį thoho bin unsɛ, janangueꞌa bi juadi bi hocꞌʉ toꞌo bi ꞌyøtꞌe yʉ́ mbɛti.
\v 15 Guesɛ a rá Hogandąhi Oją di jajʉ ga pąhmbʉ a mangua, ꞌbʉ mí ma:
\q 
\v 16 Nu ran hoqui ga ørpa yʉ jąꞌi ꞌbʉ mꞌbɛjua, din ja tengu na, 
\q ga bɛ̨nba bʉ ja yʉ́ mbʉi ma pähä zɛhɛ, da ndesɛ gue da dɛngui.
\q Nguetho ga un man ꞌyomfɛ̨ni bʉ ja yʉ́n ꞌyomfɛ̨ni ʉ.
\m 
\v 17 Nɛ xø bi ꞌyɛ̨m mahønꞌa:
\q Him manꞌdandį gam bɛ̨ngä yʉ́ tsꞌoqui, nɛ xínga gueꞌʉ yʉm fɛꞌtsꞌi mí øtꞌʉ,
\m bi ꞌyɛ̨n rá Hogandąhi Oją.
\v 18 Nangue Oją bi punga ma tsꞌoquihʉ, hingui sä ga unhdʉ miꞌda yʉn tꞌunni dí punga ma tsꞌoquihʉ.
\s Da zä ga sømhbʉ bʉ ꞌbʉ Oją
\p
\v 19 Ma zi cu ahʉ, gam bɛ̨mhbʉ nangue a ra  nyonhoqui mi ja, njoꞌo nꞌda ra jąꞌi thoho mí sä da yʉrpʉ manꞌda xʉn dʉxqui, nɛ gueꞌa í tꞌuꞌa ra ꞌbøꞌtꞌe mí ndam bʉ. Pɛ nuya bi zä dí cʉthʉ bʉ ja a rá ngu Oją mahɛ̨tsꞌi, manꞌda xʉn dʉxqui. Nɛ dí cʉthʉ nangue a rá ji ra Jesucristo, bi hogahʉ. Nɛ hin dín suhʉ ya.
\v 20 Nɛ dí cʉthʉ nangue a ra ꞌyu maꞌdaꞌyo gue i ꞌbʉi. Nguetho bi ꞌuegahʉ ra ꞌbøꞌtꞌe mí ndam bʉ ja ra goxthi, ꞌbʉ mí unsɛ rá jąꞌi ra Cristo ya.
\v 21 Nuꞌa ra Jesús, gueꞌa ma hmumbäjąhʉ, nanguejʉ gue yʉ́tꞌʉhnigahʉ Oją.
\v 22 Janangueꞌa mbähä ga sømhbʉ bʉ ꞌbʉ Oją ya, nꞌdatꞌa gam bɛ̨mhbʉ majuąni i ndejʉ. Nguetho bi mberca ma mbʉihʉ nangue rá ji ra Cristo, hin gam bɛ̨mhbʉ gue dín dupatehʉ yʉ tsꞌoqui ya. Nɛ tengu ꞌbʉ am ꞌbeꞌtꞌegahʉ a ra dehe xʉn güe.
\v 23 Nɛ ga thoqui ga mamhbʉ a ran ho dí tømhbʉ, hin ga suhʉ. Nguetho majuąni di jąꞌtsꞌa rám hma bi xijʉ Oją gue di pøjʉ.
\v 24 Mbähä dan xänbahʉ ga øthʉ ran huɛ̨cate, nɛ ꞌda dán ɛ̨hyadahʉ ga øthʉ a.
\v 25 Nɛ hin ga øthʉ tengu øtꞌi ꞌda him mi søm bʉ ja mam pɛtihʉ. Pɛgue mbähä ga thoqui dam pɛtihʉ, nɛ dan xänbahʉ nꞌda ngu nꞌdajʉ. Nɛ manꞌda ga humbi ga øthʉ ya, nguetho ya mí tsꞌʉtho ba ɛ̨h ra Hmu.
\v 26 Pɛ nuꞌbʉ dí ndesɛ ga thoctahʉ yʉ tsꞌoqui ꞌbʉ ya má pąhmbʉ a majuąni, tenguꞌbʉ hin dá jamansuhʉ a ra ꞌbøtsꞌe xtím pungahʉ. Pɛ ya hinꞌyʉ ꞌbɛꞌa manꞌda sä ga umhbʉ bʉya, gue dí mba ma pungui ma tsꞌoquihʉ.
\v 27 Pɛ høntꞌa ra mbidi gan nuhʉ ꞌbʉ, gue ran ʉnbi dí coꞌtsꞌa Oją, nangue ra sibi ntsꞌutho ꞌbʉ bi dɛ, gue di jua ʉ yʉ́n sʉihʉ Oją.
\v 28 Gam bɛ̨mhbʉ tengu ran tꞌɛ̨di bin tꞌun ra Moisés, gueꞌbʉ ꞌbʉ a nꞌda i øtꞌ ram fɛꞌtsꞌi, nɛ di nɛqui yoho o gue hyu yʉ testigo gue bi nu, bi tho a ra jąꞌi bʉya, nɛ hin da mba ma huɛ̨qui.
\v 29 Pɛ ha hin dím bɛ̨mhbʉ gue manꞌda ntsꞌutho ran tsꞌɛmbi ga nuhʉ ꞌbʉ dím bɛ̨ni ga nɛmhbʉ bʉ häi a rá Tsꞌʉntꞌʉ Oją, nɛ dí ɛ̨mhbʉ nte di muui a rá ji xtí hoga ma mbʉihʉ, nɛꞌbʉ dí numanꞌʉ tho a rá Hogandąhi Oją gue mí ɛ̨na xtí huɛ̨gahʉ.
\v 30 Pɛ dí pąhmbʉ a ra Hmu gue bi ma: “Nugä ma ꞌbɛfi ga juꞌtꞌi, ga unꞌna rá muui bi ꞌyøtꞌe.” Nɛ bi ꞌyɛ̨n ra tꞌohni: “Da zɛmba yʉ́ tꞌʉhni Oją ꞌbʉ di thoqui da ꞌyøtꞌ ra tsꞌoqui.”
\v 31 Ɛ̨mmɛ ntsꞌutho ꞌbʉ da dįnba yʉ́ tsꞌoqui nꞌda a Oją bʉ ja ran juąnbi, gueꞌa i ꞌbʉi.
\v 32 Pɛ dami bɛ̨mhbʉ ꞌbɛꞌa gá ꞌyøthʉ ʉ yʉ pa xʉ thogui, gueꞌbʉ ja gmí tįmhbʉ ran nɛqui. Xʉn ho gá ꞌyøthʉ, jante tho gá hyäthʉ yʉn ʉnbi xʉn ndoho.
\v 33 Nɛ ꞌda ahʉ bi mba nthenni ahʉ, nɛ bi mba ma ʉnꞌni ahʉ bʉ ja yʉ́ hmi yʉ jąꞌi. Nɛ miꞌda ahʉ gue hin gá suhʉ da mba ma ʉnꞌni ahʉ ꞌbʉ ꞌdarbʉ gmí ꞌyohʉ ʉ bi mba ma ʉnbi.
\v 34 Nɛ hin gán suhʉ gue gá zɛnguahʉ ʉ ni cuhʉ ꞌbäpʉ ja ra fädi, nɛ gán johya thohohʉ ꞌbʉ mí thąnꞌnahʉ ꞌbɛꞌa gmí pɛsꞌhʉ. Nɛ gá pąhmbʉ ja ahʉ bʉ mahɛ̨tsꞌi a manꞌda xʉn ho, gue da hyätꞌi maząi.
\v 35 O guí ɛsꞌhʉ a gní hyuthʉ nzambʉi, janangueꞌa din ꞌda ahʉ nꞌda ran tꞌunni xʉn ndoho.
\v 36 Pɛ i jatho ga sɛthʉ tsꞌʉ, nꞌdahma da zä ga øthʉ rá pähä Oją, janangue ga hąmhbʉ a bi ma majuąni di ꞌdajʉ.
\v 37 Nguetho i mam bʉ ja rá tꞌohni Oją:
\q Mi tsꞌʉtho ba ɛ̨ꞌa i ja gue ba ɛ̨hɛ,
\q ya hin da yaꞌa ba ɛ̨hɛ, nɛ di ꞌda ahʉ a guí tømhbʉ.
\q 
\v 38 Nɛ nuꞌʉ to da ꞌyɛ̨cꞌyɛi majuąnigä, gueꞌʉ ga hocpa yʉ́ tsꞌoqui, ga ɛ̨mbi xʉn ho bʉya, nɛ ga unꞌndʉ ra temaząi ʉ.
\q Pɛ nuꞌʉ bi mbengui hin ga numanho ʉ, 
\m bi ꞌyɛ̨n Oją.
\v 39 Pɛ nujʉ hinga guejʉ dá penjʉ guepʉ xcá nuhʉ ran ʉnbi maząi. Pɛ dí ɛ̨cꞌyɛihʉ gue majuąni a Oją, janangueꞌa din jajʉ ra temaząi.
\c 11
\s Nɛ gueꞌa ná ɛ̨cꞌyɛihʉ majuąni a Oją
\p
\v 1 ꞌBɛꞌa nam bønꞌa na ɛ̨cꞌyɛihʉ majuąni a Oją. Nám bøni, gue dí ɛ̨cꞌyɛihʉ majuąni ga hąmhbʉ a ran ho bi xijʉ Oją. Nɛ nam bøni ga ɛ̨cꞌyɛihʉ majuąni ꞌbɛꞌa gätho i ma Oją, madagueꞌbʉ hin dí nuhʉ a.
\v 2 Nu ma bombøtahʉ bi hnumanho nguetho bi ꞌyɛ̨cꞌyɛi majuąni a Oją. 
\v 3 Dí ɛ̨cꞌyɛihʉ majuąni bi ꞌyøtꞌ Oją yʉ ximhäi, madagueꞌbʉ hin dá nuhʉ ꞌbʉ mí ꞌyøtꞌʉ. Nuꞌbʉ mí ꞌyɛ̨na din ja, ya bin ja bʉya, gue bi ꞌyøtꞌe nangue ʉ ꞌbɛꞌa him midí nɛqui.
\v 4 Nuꞌa ra Abel bi un Oją nꞌda ra ꞌbøtsꞌe xʉn ho xinda gue a bi un a ra Caín, nguetho bi ꞌyɛ̨cꞌyɛi majuąni a bi xi Oją. Nuꞌbʉ mí thąnba a rán tꞌunni ra Abel, bi fądi bi numanho Oją a. Nɛ madagueꞌbʉ bi du ra Abel, pɛ tengu ꞌbʉ ꞌbʉtho, gue urcahʉ ꞌbɛꞌa mí øtꞌa, gue bi ꞌyɛ̨cꞌyɛi majuąni a Oją.
\v 5 Ngutho ra Enoc, bi ꞌyɛ̨cꞌyɛi mbo rá mbʉi a majuąni. Janangueꞌa bi tsꞌixpʉ ja rá ngu Oją nɛ him bi du. Nɛ him bi thįngua ja ra häi a, nguetho bi zixꞌa Oją. Nɛ i ɛ̨n ra tꞌohni: “Nuꞌbʉ hin ní tsꞌitsꞌi, bi hnumanho a.”
\v 6 Pɛ nuꞌbʉ i ꞌbʉ a nꞌda i nde da zøm bʉ ꞌbʉ Oją, pɛgue da ꞌyɛ̨cꞌyɛi majuąni i ꞌbʉ a, nɛ da ꞌyɛ̨cꞌyɛi majuąni din tꞌun ran ho a to i hon Oją. Nguetho hingui sä da numanho Oją nꞌda ꞌbʉ hingui ɛ̨cꞌyɛi a majuąni.
\v 7 Bi ꞌyɛ̨cꞌyɛi a ra Noé gue majuąni a mí xi Oją din ja a ra dąmbʉntꞌi, madagueꞌbʉ hin ní nu. Nɛ bi ꞌyøtꞌa ra dąbarco bi xifi, guepʉ da yąnꞌʉ i ꞌbʉpʉ rá ngu. Nɛ bi ꞌyɛ̨mbi xʉn ho Oją a nguetho mí ɛ̨cꞌyɛi mbo rá mbʉi a Oją. Nɛ gueꞌa í nɛqui hing yʉ ꞌyɛ̨cꞌyɛi gätho ra ximhäi, jąn í tsꞌɛmba ʉ.
\v 8 Bi ꞌyɛ̨cꞌyɛi majuąni Oją a ra Abraham. Janangueꞌa bi bøm ꞌbʉ mí zonꞌna Oją, gue da mba bʉ ja a ra häi bi xi Oją gue di unni. Bi nɛxpʉ ja rá häi zɛhɛ, nɛ him mí pądi hapʉ man ní mba.
\v 9 Nɛ nuꞌbʉ mí zøm bʉ, pɛ bin ꞌyotho bʉ. Nguetho bi ꞌyɛ̨cꞌyɛi majuąni gue ja nín ząm bʉ rá ngu Oją mahɛ̨tsꞌi. Janangueꞌa bi hyøtho yʉ ngumꞌbøꞌtꞌe bʉ. Nɛ ngutho bi ꞌyøtꞌa ra Isaac rá tsꞌʉntꞌʉ, nɛ a ra Jacob rá ꞌbɛto, gue nɛꞌʉ da gomhbʉ ra herencia bi sih majuąni ra Abraham.
\v 10 Nguetho nu ra Abraham mí tøꞌmi da zøni nín ząm bʉ ja nꞌda ra dąhnini gue mahɛ̨tsꞌi, din ja hønꞌbʉ go njąmꞌbʉ, gue bi bɛ̨n Oją nɛ bi ꞌyøzɛhɛ.
\v 11 Nɛ bi ꞌyɛ̨cꞌyɛi majuąni a ra Sara, nɛ gueꞌa í hyąn rá tsꞌɛdi Oją a gue dim ꞌbʉh rá tsꞌʉntꞌʉ. Nɛ him mí sä xtím ꞌbʉh rá tꞌʉhni, gue ya xʉm bømbe. Pɛ bim ꞌbʉꞌa rá tsꞌʉntꞌʉ, nguetho bi bądi majuąni da ꞌyøtꞌa bi man Oją.
\v 12 Nɛ ngutho ra Abraham, madagueꞌbʉ ya xí thoh yʉ pa gue mí sä xtím ꞌbʉh yʉ́ tꞌʉhni, pɛgue bi zøni bim ꞌbʉh yʉ́m bomꞌbɛto ɛ̨mmɛ xʉn ngu, tengu yʉ sø mahɛ̨tsꞌi, o tengu yʉ ꞌbomu bʉ ja ra ndendeją, gue njongui hätꞌi da mbede.
\v 13 Nɛ gätho ʉ bi du ꞌbʉ him mani hyąn a ran ho bi xi Oją. Pɛ  tenguꞌbʉ mí handi yatho bʉ bí ja a ran ho bi sifi, nguetho mí ɛ̨cꞌyɛi mbo yʉ́ mbʉi gue majuąni din tꞌunni. Janangueꞌa bin johya ꞌbʉ mí bɛ̨ni gue da nu a. Jananjabʉ bi mansɛ tenguꞌbʉ bi thotho ua ja ra ximhäi ʉ.
\v 14 Nɛ nu ʉ im ma tengu na, i udi gue i ꞌyotho nɛ i hon manꞌda ra häi guepʉ din ząi.
\v 15 Nɛ nuꞌbʉ xtám bɛ̨ntho a ra häi bʉ xpí bøn ʉ, mí sä xtá mbeng mahønꞌa ʉ ꞌbʉ.
\v 16 Pɛ mí nde nꞌda ra häi manꞌda xʉn ho, gue nde da ma, ra häi mahɛ̨tsꞌi. Janangueꞌa bin johya Oją gue da ꞌyɛ̨mbi yʉ́ Oją ʉ, nɛ bi hocpa yʉ́ hnini ʉ.
\v 17-18 Nɛ nuꞌbʉ mí tsꞌäp rá mbʉi ra Abraham, gue bi sifi bá si a rá tsꞌʉntꞌʉ ra Isaac, da mbøspa Oją. Nɛ mí nde xtá ꞌyøtꞌe, nguetho bi ꞌyɛ̨cꞌyɛi majuąni a Oją, madagueꞌbʉ bi xifi dim ꞌbʉh yʉ́m bomꞌbɛto ꞌbʉ bi xąnd ra Isaac.
\v 19 Gueꞌa bi bɛ̨nꞌa ra Abraham gue i ja rá tsꞌɛdi Oją da xox ʉ xʉn du. Janangueꞌa tengutho ꞌbʉ bi dąmbɛ̨ni bʉ ꞌbʉ ʉ xʉn du a ra Isaac ꞌbʉ mam bá si mahønꞌa a rá ta. Nɛ nꞌda ra hmɛpya bi ꞌyøtꞌ na.
\v 20 Nɛ nangue a bi ꞌyɛ̨cꞌyɛi majuąni ra Isaac gue da gomhbʉ rán ho Oją ʉ yʉ́ tꞌʉhni, janangue bi sih majuąni ra Jacob nɛ ra Esaú gue da mba mająpi. Nɛ bi sifi ꞌbɛꞌa bi zänba Oją nꞌda ngu nꞌda ʉ.
\v 21 Nɛ ngutho a ra Jacob, bi ꞌyɛ̨cꞌyɛi majuąni a ran jąpi bi man Oją. Nɛ ní mba bʉ da du, pɛ bi thocpa a ran jąpi ʉ yʉ́ ꞌbɛto, gueꞌʉ yʉ́ tsꞌʉntꞌʉ ra José. Nɛ bi dąnde Oją ꞌbʉ mí dospa rá yą rá tøhø a ra Jacob.
\v 22 Nɛ a ra José bi ꞌyɛ̨cꞌyɛi majuąni a bi man Oją. Janangueꞌa nuꞌbʉ mí tsꞌʉtho da du, bi xi ʉ yʉ́ mɛnguhʉ gue yʉ israel, gue da zøni da mbeng bʉ yʉ́ häi zɛhɛ. Nɛ bi xifi da thuxꞌa ra ánima ꞌbʉ bi bøm bʉ ʉ, gueꞌa ra José xí du.
\v 23 Nɛ rá ta nɛ rá mbe ra Moisés ꞌbʉ mim ꞌbʉh ra Moisés, bi ꞌyąꞌa rá tsꞌʉntꞌʉ an hyuzna. Nɛ him bi numansu a rán tꞌɛ̨di ra tsꞌʉtꞌabi gue mí ma xtí tho ʉ yʉ́ tsꞌʉntꞌʉ yʉ israel. Nguetho midí nɛqui din hocjąꞌi, nɛ mí ɛ̨cꞌyɛi majuąni di jamansu Oją.
\v 24 Nɛ a ra Moisés guextaꞌa mí ɛ̨cꞌyɛi majuąni a Oją. Janangueꞌa nuꞌbʉ mín dąnꞌyohʉ, him mam bi nde da tꞌɛ̨mbi rá tsꞌʉntꞌʉ a rá tꞌįxu ra tsꞌʉtꞌabi bʉ Egipto, gue xtán zä xtín jasɛ rá tsꞌɛdi. Nɛ gueꞌa rá tꞌįxu a ra tsꞌʉtꞌabi bi dįm bʉ mán tꞌągui nɛ bi tede.
\v 25 Pɛ manꞌda bi nde ꞌdarbʉ bin ʉnbahʉ ʉ yʉ́ tꞌʉhni Oją a ra Moisés nuꞌʉ yʉ́ mɛnguhʉ, xinda gueꞌbʉ xtán dɛn rán johya ra ximhäi gue ní mba bʉ da guadi.
\v 26 Nɛ nuꞌbʉ mín ꞌyomfɛ̨ni ra Moisés, manꞌda di muui ꞌbʉ nꞌdatꞌa yʉn tsꞌante da nuui ra Cristo, xinda gueꞌbʉ xtí manda ꞌbɛꞌa gätho mí ja bʉ ra häi Egipto, nguetho manꞌda mí numanho ꞌbɛꞌa di un Oją mꞌbɛjua. 
\v 27 Nɛ nangue bi ꞌyɛ̨cꞌyɛi majuąni ra Moisés, janangueꞌa bi bøm bʉ ra häi Egipto, nɛ him bi zu a nán cuɛ a ra tsꞌʉtꞌabi. Pɛ bi hyutꞌan zambʉi, nguetho bi bądi in ꞌyoui Oją, madagueꞌbʉ him mí nu.
\v 28 Pɛ bi ꞌyɛ̨cꞌyɛi majuąni a bi xi Oją a ra Moisés, janangueꞌa bi ꞌyøtꞌa bi xifi, ngue bi manda dí cotsꞌi ra ji bʉ ja yʉ́ ꞌyojutꞌi yʉ israel. Janangueꞌa him bi thop yʉ́ mbʉdi tsꞌʉntꞌʉ ʉ yʉ israel ꞌbʉ mam bá ɛ̨h rám ꞌbɛhni Oją. Gueꞌa tꞌɛ̨mbi ndąbaxjua bi dʉꞌmi bi ꞌyøtꞌʉ.
\v 29 ꞌBʉ mí ꞌyɛ̨cꞌyɛi mbo yʉ́ mbʉi i ja rá tsꞌɛdi a Oją ʉ yʉ israel, janangueꞌa bi japꞌa Oją bi xocpa nꞌda ra ꞌyu bʉ ja ra deją, gue bi tho ʉ. Pɛ nuꞌbʉ mí ꞌyɛ̨na nɛ ʉ xtá ꞌdaxꞌʉ yʉ mɛ egipto, gueꞌʉ mí cute, bi compꞌ ra dehe bi du ʉ bʉya.
\v 30 Nu yʉ israel bi sifi di thɛ̨ꞌtsꞌa ra dąhnini Jericó gätho nyoto pa, nguetho ma mbäꞌtꞌi ra jądo a ra hnini. Nɛ nuꞌa í ꞌyɛ̨cꞌyɛi majuąni a Oją, nɛ gueꞌa í yøtꞌ ra jądo a ꞌbʉ mí guaꞌa nyoto pa di thɛ̨ꞌtsꞌi. Nɛ bi zä bi dąp ra hnini ʉ yʉ israel bʉya.
\v 31 Pɛ mí ꞌbʉpʉ nꞌda ra xisu gue ra Rahab. Nɛ madagueꞌbʉ man ra ꞌyomtꞌɛ̨ni mamꞌbɛtꞌo, pɛ hinga nɛ a bi tho a ꞌbʉ mí tho yʉ́ mɛnguhʉ gue him mí ɛ̨cꞌyɛi Oją. Nɛ nuꞌa í zimmanho ʉ yʉ́m ꞌbɛhni yʉ israel, nɛ gue a í fądi mí ɛ̨cꞌyɛi mbo rá mbʉi a Oją.
\v 32 Nɛ xʉn ngu miꞌda xtán zä xcá xi ahʉ, pɛ hinga xøtꞌa yʉ ora ga xi ahʉ, nangue ra Gedeón nɛ ra Barac, nɛ nangue ra Sansón nɛ ra Jefté, nɛ nangue ra David nɛ ra Samuel, nɛ gätho miꞌda yʉ pøngahyą.
\v 33 Nɛ mí ɛ̨cꞌyɛi majuąni Oją ʉ, nɛ gueꞌa í hyąn rá tsꞌɛdi Oją ʉ, gue bi dąp yʉ jąꞌi mí ꞌbʉpʉ nꞌdanni miꞌda yʉ häi ꞌbʉ mín sʉhmbʉ. Nɛ bin tsꞌʉtꞌabi xʉn ho. Nɛ mí ɛ̨cꞌyɛi majuąni a bi sifi, janangueꞌa gätho bi zä bi ꞌyør bʉya. Nɛ nuꞌʉ miꞌda mí ɛ̨cꞌyɛi majuąni a Oją, janangueꞌa him bi za yʉ dązate.
\v 34 Nɛ him bin zø ʉ miꞌda bí thøtpʉ ja ra orno ꞌbʉ ɛ̨mmɛ midí thoni nám pa, nguetho bi ꞌyɛ̨cꞌyɛi a majuąni ʉ. Nɛ him bi zä bi tho miꞌda ꞌbʉ mí tꞌɛ̨mbi xtá tho nangue ra juai. Nɛ nuꞌbʉ mí güent yʉ́ jąꞌi ʉ miꞌda, bi japꞌa Oją bi zaqui. Nɛ madagueꞌbʉ him mí ja yʉ́ tsꞌɛdi ʉ miꞌda, pɛgue tenguꞌbʉ ya mí ja yʉ́ tsꞌɛdi ꞌbʉ mí ꞌyɛ̨cꞌyɛi majuąni Oją, nɛ gueꞌa í ꞌda ʉ yʉ dofʉi yʉ́n sʉihʉ.
\v 35 Nɛ mí ꞌbʉ i ꞌda yʉ xisu ꞌdaꞌa nꞌdanni, gue xí du yʉ́ tꞌʉhni. Pɛ bi dąmbɛ̨ni ʉ yʉ́ tꞌʉhni ꞌbʉ mí ꞌyɛ̨cꞌyɛi majuąni ʉ yʉ́ mbe. Nɛ nuꞌʉ miꞌda bi ndesɛ bi tho nangueꞌa bi ꞌbɛnza, nɛ him bi nde bi goh yʉ́ mbʉi guepʉ xtá mba ma thøgue, nguetho bi ꞌyɛ̨cꞌyɛi majuąni da bømanho bʉ ja ran dąte ʉ, da mba bʉ ja ra te manꞌda xʉn ho.
\v 36 Nɛ nuꞌa í ꞌyɛ̨cꞌyɛi majuąni ʉ miꞌda, nɛ gueꞌa í hyätꞌ yʉn ʉcpi gue bi tꞌʉspi, nɛ bi hyätꞌ ꞌbʉ mím ꞌbɛnza, nɛꞌbʉ bi thuꞌtꞌi ꞌda nangue yʉ cadena nɛ bi jotꞌa fädi.
\v 37 Nɛ bi tho ʉ ꞌda gue bi mba ma batꞌado. Nɛ nuꞌʉ miꞌda bi thɛngui nde nangue ra thɛgui. Nɛ miꞌda í tho ra juai ꞌbʉ mí sifi da mba ma thøgue. Nɛ mí ꞌyotho ʉ miꞌda, nɛ í huɛ̨hi thoho ʉ, mí he yʉ xidɛꞌyo, nguetho pa ma ʉcpi. Nɛ mí sä ran ʉ gue mí pa ma ʉnbi. Nɛ gätho ʉ bi hyätꞌi, nguetho bi ꞌyɛ̨cꞌyɛi majuąni a Oją.
\v 38 Nɛ him mí fądi gue manꞌda xʉn ho ʉ, pɛ manꞌda di muui ʉ xinda gueꞌʉ gätho ra ximhäi. Pɛ ha sä mí ꞌyotho bʉ ja yʉ ʉhäi ꞌbʉ mí ꞌdagui, nɛpʉ ja yʉ tꞌøhø. Nɛ mí ꞌbʉpʉ ja yʉ hyądo nɛpʉ ja yʉ hyąhäi.
\v 39 Pɛ gätho bi hnumanho ʉ nangue bi ꞌyɛ̨cꞌyɛi majuąni Oją. Janangueꞌa i pa mfɛ̨ni thoho ʉ. Pɛ him ꞌbex bi hyąn a bi xi a Oją di unni.
\v 40 Nguetho xí zän Oją ꞌbɛꞌa manꞌda xʉn ho da ꞌyøtꞌe nanguejʉ, gue ꞌdarbʉ ní hąmhbʉ ran ho ʉ mí ꞌbʉh mayaꞌbʉ.
\c 12
\s Thocpa thoho ga tɛnhdʉ a ma ngʉrpihʉ ra Jesús
\p
\v 1 Janangueꞌa nujʉ i ꞌbʉi xʉn ngu yʉ jąꞌi gue xʉ ꞌyurcahʉ a majuąni Oją tengu ja dá xi ahʉ. Janangueꞌa ga ꞌuejʉ tsꞌʉ gätho di pajʉ, nɛ yʉ tsꞌoqui gue tenguꞌbʉ an thuꞌtꞌi ma guahʉ, nꞌdahma ga häthʉ dan tihmbʉ nangueꞌa ran tąha bin ꞌdajʉ guepʉ go him min sä.
\v 2 Nɛ thocpa thoho ga hanthʉ a ma ngʉrpihʉ ra Jesús, janangueꞌa da zä nꞌdatꞌa ga øthʉ bʉya. Nɛ di jajʉ ga øthʉ tengu bi ꞌyøzɛhɛ, gue bi ꞌyɛ̨cꞌyɛi majuąni a Oją, nɛ gueꞌa í hyätꞌ ran ʉnbi bʉ ja ra pontꞌi a. Nɛ nuꞌa ran dąte bi nu, yʉ́n dąte ʉ yʉ tsꞌomꞌbäi, ɛ̨mmɛ ma ʉcpi a. Pɛ him bi zu da nu a tengu a, nguetho mí pądi din ja ran johya mꞌbɛjua nanguejʉ. Nɛ nuya bí ꞌbʉpʉ mahɛ̨tsꞌi ꞌdarbʉ ní mandaui Oją. Nɛ guepʉ i sixcahʉ bʉ.
\v 3 Nɛ gam bɛ̨mhbʉ tengu bi ꞌyøtꞌ ra Jesús, bi hyät ꞌbʉ mí tsꞌʉi, nɛꞌbʉ bin ʉnba bʉ ꞌbʉh yʉ tsꞌomꞌbäi. Janangueꞌa hin dan xømbʉihʉ, nɛ hin gam bɛ̨mhbʉ gue ga penjʉ.
\v 4 Pɛ nu ahʉ hinga ná ɛsꞌhʉ yʉ tsꞌoqui guepʉ gdí tuhʉ. Pɛ dami ꞌyɛsꞌhʉ ʉ, madagueꞌbʉ gdí tuhʉ ꞌda ahʉ.
\v 5 Ha gá pumbɛ̨nihʉ a ran zofo gue i xijʉ Oją, gue yʉ́ tꞌʉhni gahʉ a, tengu mam bʉ ja ra tꞌohni bʉ i ɛ̨na:
\q Ma tsꞌʉntꞌʉ i, dami bɛ̨ni ꞌbɛꞌa dí mbɛpꞌa a ni Hmu, gueꞌbʉ bi xi i hapʉ gá ꞌbɛdi.
\q Nɛ xín gui sämanꞌʉ ꞌbʉ bi zʉ i.
\q 
\v 6 Nuꞌa ra Hmu i xänba ʉ di huɛ̨qui,
\q nɛ i fɛ ʉ gätho ʉ i ɛ̨mbi yʉ́ tꞌʉhni. 
\m 
\v 7 Dami hyäthʉ ʉ yʉm fɛi, nguetho gueꞌʉ i xänꞌnahʉ ʉ. Nu Oją i ɛ̨na yʉ́ tꞌʉhni ahʉ. Nɛ joꞌo nꞌda ra tꞌʉhni gue hin da xänba rá ta nangue yʉm fɛi.
\v 8 Pɛ nuꞌbʉ hin da mbɛpꞌahʉ Oją, tengu ʉ gätho yʉ́ tꞌʉhni i fɛi, nuꞌbʉ, masque hin yʉ́ tꞌʉhni ahʉ ꞌbʉ. Guín jahʉ tengu ra tꞌʉhni gue hinga mfądi toꞌo rá ta.
\v 9 Nɛ manꞌda, nuꞌbʉ mín tꞌʉhnihʉ, gueꞌbʉ mí mbɛgba ma tahʉ dám ꞌbʉhmbʉ ua ja ra häi, dá numansuhʉ ʉ. Hanja manꞌda hin dín umhbʉ da mbɛgbahʉ Oją, rá Ta ma mbʉihʉ, janangue ga tįmhbʉ ra te ma mbʉihʉ.
\v 10 Nu ma tahʉ ua ja ra ximhäi bi mbɛgbahʉ ꞌbʉ nꞌdandį, gue mím bɛ̨ni xʉn ho. Pɛ nu Oją ꞌbʉ i fɛgbahʉ, ząi xʉn ho i ørcahʉ, gue di jajʉ xtán hothogahʉ tengu a.
\v 11 Majuąni hin dí ɛ̨mhbʉ xʉn ho a ram fɛi ꞌbʉ ra ora dí sähʉ a, nguetho xʉn ʉ. Pɛ nuꞌbʉ bin hoh ma mbʉihʉ nangue ram fɛi, nɛ dí ꞌbʉmanhohʉ bʉya, nɛ i hu ma mbʉihʉ.
\s Ntsꞌutho ꞌbʉ ga hɛhmbʉ rá nde Oją
\p
\v 12-13 Janangueꞌa dan ɛ̨hyahʉ mahønꞌa gue ga thojʉ a rá ꞌbɛfi Oją, nɛ hin ga ꞌuehmbʉ. Pɛ ga hąxhʉ ra ꞌyu xʉn juąni. Nubʉya nu ni guahʉ guí hɛ̨mfʉ, mí ɛ̨na xtá ꞌuagui, pɛgue da yąni, da hyą ra tsꞌɛdi mahønꞌa.
\v 14 Nɛ gui hyomhbʉ hin gui dʉmhbʉ nꞌda ra sʉi. Nɛ gui hyomhbʉ ra hogambʉi. Nguetho nuꞌa hinꞌyʉ ra hogambʉi hin da zä da nu a ra Hmu.
\v 15 Nɛ ꞌda gdám fäxta nin ꞌyomfɛ̨nihʉ nꞌda ngu nꞌda ahʉ, janangueꞌa hin dim ꞌbʉ i ꞌda ahʉ hin da nde rá mate Oją. Nɛ xínga nꞌda ahʉ din ja tengu nꞌda rá ꞌyʉ ra tsꞌoqui, gue hin di nɛqui ꞌbʉ rá mbʉdi, pɛ nuꞌbʉ bi bøtsꞌe din xąndi, di tsꞌon ʉ miꞌda bʉya.
\v 16 Nɛ dam fähmbʉ njon dan ꞌyomtꞌɛ̨nihʉ. Nɛ xín ga samhbʉ a rá mate Oją, tengu bi ꞌyøtꞌ ra Esaú, gue í pä a ra tʉhʉ a rán jąpi mí ɛ̨na xtí unꞌna Oją, gue rá mbʉdi tsꞌʉntꞌʉ ra Isaac.
\v 17 Nɛ guí pąhmbʉ ꞌbɛꞌa bi ꞌyøtꞌ ra Esaú, gue mꞌbɛjua bi nde a ran jąpi mí ɛ̨na xtí unꞌna rá ta. Pɛ him mam bi zä bi unꞌna. Nɛ tsꞌɛdi bin zoni, pɛ him bi dįni ꞌbɛꞌa xtá ꞌyøtꞌ mahønꞌa gue xtá hyąnꞌa.
\v 18 Gam bɛ̨mhbʉ ꞌbɛꞌa bi ꞌyøtꞌ yʉ israel, bi zøm bʉ ja nꞌda ra tꞌøhø ua ja ra ximhäi, guepʉ bi dɛ ra sibi ntsꞌutho, nɛ bi ꞌbɛxui yʉ güi tengu ꞌbʉ ra xui, nɛ bin ja ra ndønthį ꞌbʉ mi sih yʉ́n tꞌɛ̨di Oją ʉ. Pɛgue nꞌda ra hmɛpya a tengutho bʉ rá ngu Oją gue ɛ̨mmɛ xʉn dʉxqui.
\v 19 Nɛ bi ꞌyøh ra thʉxi, nɛ rá nde Oją bi ꞌyø ʉ. Nɛ nuꞌbʉ mí ꞌyø a rá nde ʉ yʉ israel, ɛ̨mmɛ bi ꞌyäh ra mate gue hin da ꞌyøh mahønꞌa, nguetho ɛ̨mmɛ bin su.
\v 20 Him mí hätꞌi da ꞌyø a ra nde bi xifi, bi ꞌyɛ̨na: “Xinga nꞌda ra jąꞌi nɛ xing yʉ zuꞌuɛ̨ da zä da däcua, nuꞌbʉ da däcua, ꞌbexque da tho, nɛ da mba ma ꞌyɛꞌmado o gue da mba ma sʉnza.”
\v 21 Ɛ̨mmɛ ntsꞌutho ꞌbɛꞌa bin ja bʉ. Nɛsɛ ra Moisés bi ꞌyɛ̨na: “Dí fɛtꞌi gue dín su.”
\v 22 Pɛ nujʉ ya njuąntho rá hnini Oją bʉ mahɛ̨tsꞌi dí cʉthʉ, i pąpʉ ma mbʉihʉ, gue Oją ząi ꞌbʉi. Nɛ i tꞌɛ̨mbi ra tꞌøhø Sión a rá hnini Oją, nɛ i tꞌɛ̨mbi Jerusalén bʉ mahɛ̨tsꞌi. Nɛ dá sømhbʉ bʉ ꞌbʉh yʉ́m ꞌbɛhni Oją mahɛ̨tsꞌi gue yʉ mahuąhi thoho, guepʉ di muntsꞌi i thąnde Oją ɛ̨mmɛ di johya.
\v 23 Nɛ dá cʉthʉ bʉ an thutsꞌi ma thuhuhʉ bʉ mahɛ̨tsꞌi, guepʉ dám pɛtihʉ gätho toꞌo bi hyąn ra herencia bi un Oją. Nɛ dá cʉthʉ bʉ bí ꞌbʉ Oją ra Zɛꞌmi di juąnbi gätho. Nɛpʉ ꞌbʉh yʉ́ mbʉi ʉ i tu, gue nuꞌʉ bi tꞌɛ̨mbi xʉn ho ꞌbʉ mí hocꞌa Oją.
\v 24 Nɛ dá cʉthʉ bʉ ꞌbʉh ra Jesús ma hocpatehʉ bʉ bí ꞌbʉ a i ørcahʉ ran hoqui maꞌdaꞌyo. Nɛ dí cʉthʉ nangue rá ji ra Jesús ꞌbʉ mí tho, í pungahʉ Oją a. Janangueꞌa manꞌda xʉn ho i xijʉ rá ji ꞌbʉ mí tho, xinda gueꞌa rá ji ra Abel ꞌbʉ mí tho, nuꞌa i ma di ʉnba a to bi hyo a.
\v 25 Janangueꞌa i jatho dam fähmbʉ hin ga hɛhmbʉ a rá nde a in zojʉ ya. Gam bɛ̨mhbʉ him bi zä bi zo a ran ʉnbi ʉ bi mbɛsta a rá nde Oją, ꞌbʉ mí tsꞌocua ja ra ximhäi. Janangueꞌa ꞌbe xíngui tsꞌʉ da zä ga sohmbʉ ran ʉnbi ꞌbʉ ga fɛstahʉ a Oją, nguetho mahɛ̨tsꞌi bʉ in zojʉ ya.
\v 26 Nuꞌbʉ mí man yʉn tꞌɛ̨di Oją bʉ ja ra tꞌøhø, bi japi bi ꞌyąn ra häi. Pɛ nuya i ɛ̨n Oją: “Manꞌdandį ga japi di ꞌyąni, pɛ hinga høn ra häi, pɛ nɛ mahɛ̨tsꞌi,” bi ꞌyɛ̨n Oją.
\v 27 Nɛ nuꞌa ꞌbɛꞌa gätho hingui dʉ, da mba ma bʉntꞌi. Nɛ din ząm bʉ ʉ hingui sä da mba ma ꞌueque, gue nuꞌʉ ꞌbɛꞌa gätho bi zän Oją gue din ząm bʉ.
\v 28 Nɛ bin ꞌdajʉ bʉ di manda Oją gue hingui sä da mba ma ꞌueque. Janangueꞌa ga xihmbʉ jamadi Oją, nɛ ga thąndehʉ ngue ga numansuhʉ nɛ ga suhʉ. Nɛ gueꞌa numanho a bʉya.
\v 29 Nguetho nu ma Ojąhʉ di juadi ꞌbɛꞌa hingui numanho tengu ra sibi.
\c 13
\s Ga øthʉ a dí numanhojʉ Oją
\p
\v 1 O guí ɛꞌtsꞌa gnán huɛ̨jʉ nꞌda ngu nꞌda ahʉ tenguꞌbʉ guidín cuhʉ.
\v 2 Nɛ guim bɛ̨mhbʉ gui säyabahʉ ja ni ngumhbʉ toꞌo da zøm bʉ. Nɛ nuꞌʉ ꞌda njabʉ mí øtꞌe, bi zin ʉ ꞌda yʉ́m ꞌbɛhni Oją bá nɛxpʉ mahɛ̨tsꞌi nɛ him mí pądi.
\v 3 Nɛ dami bɛ̨mhbʉ ʉ yʉ ofädi, ngue tenguꞌbʉ nꞌda gnan ofädithohʉ. Nɛ guim bɛ̨mhbʉ ʉ bi mba ma ʉnbi, nguetho nɛ ahʉ i ja ni jąꞌihʉ gue sä da mba ma ʉnꞌni ahʉ.
\v 4 Nɛ gätho ahʉ guin numansuhʉ a ran thąti gá ꞌyøthʉ ni xisuhʉ, nɛ a bi ꞌyøtꞌʉ miꞌda. Nɛ gam ꞌbʉmanho nangue nin thątihʉ, njon di tsꞌon a. Nguetho di ʉnba Oją ʉ toꞌo da ꞌyøtꞌ ran ꞌyomtꞌɛ̨ni, nɛ ʉ hinga na din thąti, nɛ ʉ xʉn thąti nuꞌbʉ i øtꞌ ran ꞌyomtꞌɛ̨ni.
\v 5 Nɛ ꞌyo guí numanhohʉ xʉn ngu ra mbɛti. Pɛ gan johyahʉ nangue hangu tsꞌʉ i ja ahʉ. Nguetho: “Njąmꞌbʉ ga hɛcꞌahʉ, thocpa thoho ga jamansu ahʉ,” bi ꞌyɛ̨n Oją.
\v 6 Janangueꞌa sä dan johyahʉ ꞌbʉ dí ɛ̨mhbʉ:
\q I fäxcahʉ ra Hmu,
\q nɛ hin ga suhʉ ꞌbɛꞌa da zä da ꞌyørcahʉ yʉ jąꞌi.
\m
\v 7 Dami bɛ̨mhbʉ ꞌbɛꞌa bi ꞌyøtꞌʉ yʉ ngʉrpi gue bi xi ahʉ rám hman Oją. Nɛ guim bɛ̨mhbʉ ꞌbɛꞌa bi bøni nangue ra te man nám ꞌbʉ ʉ. Nɛ gui thojʉ a bi ꞌyutꞌahʉ, nangue bi ꞌyɛ̨cꞌyɛi majuąni a Oją ʉ.
\v 8 Nu ra Jesucristo hingui dim pädi, gueꞌbʉ go mayaꞌbʉ, nɛhya nɛ gätho yʉ pa hønꞌbʉ go njąmꞌbʉ.
\v 9 Janangueꞌa hin gan hyɛhmbʉ da tsꞌix ahʉ bʉ maꞌueni, guepʉ i hman yʉm hma ꞌdahma ꞌdanꞌyo nɛ hingam fądi. Pɛ nuꞌa ná bɛ̨mhbʉ rá mate Oją gueꞌa ní zac ma mbʉihʉ a, xinda gueꞌʉ yʉn tꞌɛ̨di gue ꞌbɛꞌa i tsꞌi. Nguetho njoꞌo toꞌo xí zac yʉ́ mbʉi ꞌbʉ supi ꞌbʉ ja a i si.
\v 10 Pɛgue i jajʉ nꞌda ran tsꞌihmɛ, tengu ra hmɛpya gue ra ꞌbøtsꞌe mí øtꞌ yʉ mbäją bʉ ja ra niją mayaꞌbʉ, him mí ja ran tꞌɛ̨di da zi.
\v 11 Pɛ nu rá hmumbäją yʉ israel ꞌbʉ mí mbøspa Oją nangue yʉ tsꞌoqui, bi dɛxpʉ mbo a rá ji ʉ yʉ zuꞌuɛ̨, guepʉ ja ra cuarto manꞌda xʉn dʉxqui. Pɛ nu yʉ́ ngø ʉ yʉ zuꞌuɛ̨ mí zø bʉ ndehnini.
\v 12 Nɛ gueꞌa bi ꞌyøtꞌ ra Jesús, bin ʉnbi bi du bʉ ndehnini bʉ ꞌbʉh yʉ israel. Nɛ gueꞌa rá jisɛ í hoc yʉ jąꞌi.
\v 13 Pɛ ga mbähä ga tɛnhdʉ bʉ ndehnini bʉ ꞌbʉh ra Jesús, tenguꞌbʉ nꞌda na ꞌbɛngadahʉ bʉ maꞌueni.
\v 14 Nguetho nuua ja ra ximhäi hinꞌyʉ ua nꞌda ma hninihʉ gue din ząi xʉn ho. Pɛ dí homhbʉ ra dąhnini gue njąmꞌbʉ da gua a, guepʉ nín ząmhbʉ bʉ.
\v 15 Nɛ ndeꞌbʉ thocpa thoho ga thąndehʉ Oją nangue ma ndehʉ, nɛ ga xihmbʉ ra jamadi. Nɛ di thocꞌa mam hmamhbʉ a ra Jesucristo, tenguꞌbʉ di un Oją ma ꞌbøtsꞌehʉ.
\v 16 Nɛ hin dam pumbɛ̨nihʉ a na øthʉ ran ho, nɛ hin dam pumbɛ̨nihʉ ga comhbʉ ꞌbɛꞌa jajʉ, nguetho nɛꞌʉ tenguꞌbʉ yʉ ꞌbøtsꞌe i numanho Oją ʉ.
\v 17 Nɛ gui ꞌyøthʉ a xi a ni ngʉrpihʉ, nɛ gui pąhmbʉ ja yʉ́n tꞌɛ̨di da xi ahʉ ꞌbɛꞌa gui ꞌyøthʉ. Nguetho i fätꞌa ni mbʉihʉ ʉ, nɛ i jatho di däp Oją ra güɛnda nangue ahʉ. Gui ꞌyøthʉ a dán johya ni ngʉrpihʉ, nɛ hin da du yʉ́ mbʉi. Nguetho nuꞌbʉ   hin gui ꞌyøthʉ a,  xín da bømanho ahʉ ꞌbʉ.
\v 18 ꞌYäfʉ rám fätsꞌi Oją nanguecähe, nguetho nꞌdatꞌa dím bɛ̨mhbe ga tɛnhde a, nɛ dí nde ga øthe xʉn ho gätho.
\v 19 Dí ä ahʉ ra mate, gue ɛ̨mmɛ gui ꞌyäfʉ Oją di jaqui ga mbagä bʉ nꞌdihi.
\s I äp rán jąpi Oją ʉ yʉ́ cu 
\p
\v 20 Nu Oją ra hocpate a, bi xoxpʉ ꞌbʉ ʉ xʉn du a ma Hmuhʉ ra Jesucristo, nuꞌa di jamansuc ma mbʉihʉ. Nɛ nuꞌa rá ji í hocꞌa ran hoqui njąmꞌbʉ da guadi.
\v 21 Nɛ dí äp rá mate Oją da ꞌyøtꞌahʉ hin hapʉ gui ꞌbɛhmbʉ, nꞌdahma da zä gui ꞌyøthʉ rá pähä a. Nɛ dí äp rá mate da ꞌyørcahʉ ꞌbɛꞌa gätho i nde a rá tsꞌɛdi ra Jesucristo. Ga numansuhʉ Oją gätho yʉ pa maząi. Nɛ høntꞌa gam bɛ̨mhbʉ a.
\v 22 Ma zi cu ahʉ, dí ä ahʉ ra mate hin gan xømbʉihʉ gui ꞌyøhmbʉ na ran zofo, nguetho nuna ram hma dá otꞌahʉ hingui ngu ꞌbɛꞌa ma.
\v 23 Ja nꞌda ram hma dí nde ga xi ahʉ, nuꞌa man ꞌyohʉhʉ ra Timoteo ya bi soꞌtsꞌi. Nuꞌbʉ da zøcua nꞌdihi, ga six ꞌbʉ dá mba bʉ.
\v 24 Zɛnguagahʉ tsꞌʉ bʉ gätho ni ngʉrpihʉ, nɛ gätho ʉ yʉ cu gue ma miꞌyɛ̨cꞌyɛihʉ. Nɛhya bá nɛxpʉ Italia i pɛnꞌnahʉ ran zɛngua.
\v 25 Nɛ dí äp rán jąpi Oją nangue gätho ahʉ. Nɛ høntꞌa dí xi ahʉ ya.