\id JAS
\h SANTIAGO
\toc1 SANTIAGO
\mt1 SANTIAGO
\mt2 Ra søcuą bi ꞌyoꞌtꞌa ra Jacobo Santiago
\c 1
\s Ran zɛngua
\p
\v 1 Nugä drá Jacobogä, rá ꞌyɛ̨hɛ̨gä Oją nɛ ma Hmuhʉ ra Jesucristo. Nɛ hønbʉ go hapʉ gá mbähä nꞌda ngu nꞌda ahʉ, dí zɛngua ahʉ ma mɛni ahʉ, ngue nꞌdatꞌʉ mam bombøtahʉ ʉ ꞌdɛꞌmayoho yʉ́ tsꞌʉntꞌʉ ra Israel.
\s Di ꞌdajʉ ran ꞌyomfɛ̨ni Oją
\p
\v 2 Ma zi cu ahʉ, ndeꞌbʉ dan johyahʉ ꞌbʉ dí sähʉ yʉn ʉnbi, høntꞌa go man ʉnbi dín nuhʉ.
\v 3 Nguetho dí pąhmbʉ nuꞌbʉ da tsꞌäc ma tꞌɛ̨cꞌyɛ̨ihʉ, gueꞌa ní jajʉ ga häthʉ xʉn ho a.
\v 4 Pɛ i jatho ga häthʉ xʉn ho nɛ hin gan suhʉ, nɛ gueꞌa dín te ma mbʉihʉ a, nɛ di hąjʉ xʉn ho ra tsꞌɛdi, nɛ nte ga ꞌbɛhmbʉ bʉya.
\v 5 Pɛ nuꞌbʉ hin dí pąhmbʉ ndaꞌa xʉn ho ga øthʉ, ga äfʉ Oją ran ꞌyomfɛ̨ni nɛ di ꞌdajʉ a. Nguetho di unni xʉn ho toꞌo da ꞌyäpi, nɛ hin di japi da mbɛꞌtsꞌ rá sä nꞌda.
\v 6 Pɛ jatho nꞌdatꞌa gam bɛ̨mhbʉ ꞌbʉ ja ꞌbɛꞌa dí äfʉ, nɛ hinga ꞌdahmaꞌdanꞌyo gam bɛ̨mhbʉ. Hin ga øthʉ tengu ra tꞌøthe bʉ ja ra dądądehe, hønbʉ go hapʉ ní ꞌyɛn ran dąhi.
\v 7 Nu ra jąꞌi i øtꞌe tengu a, sä im bɛ̨ni di unꞌna i äp a Oją, pɛ nte di unni.
\v 8 Nguetho ꞌdahmaꞌdanꞌyo im bɛ̨nsɛ, nɛ hingui sä nꞌdatꞌa da ꞌyøtꞌe.
\v 9 Pɛ ɛ̨mmɛ di johya nꞌda zi hyoya ꞌyɛ̨cꞌyɛ̨i, nguetho i pądi ɛ̨mmɛ xʉn ngu di muui bʉ nan nu Oją.
\v 10 Nɛꞌa ra mɛmbɛti ꞌyɛ̨cꞌyɛ̨i, ɛ̨mmɛ di johya ꞌbʉ mi bądi hinga gueꞌa rá mbɛti ní numanho Oją a, ngue nu rá mbɛti tengu yʉ́ døni ʉ yʉ paxi i høe.
\v 11 Ngue nuꞌbʉ xpám bøx ra hyadi ɛ̨mmɛ xʉm pa, di hmang yʉ paxi nɛ i høh yʉ́ døni bʉya, nɛ him man di nɛcmanho. Din jabʉ nꞌda ra mɛmbɛti ꞌbʉ høntꞌa ra mbɛti in numanho, madagueꞌbʉ di thoqui dim pɛfi, pɛ di ꞌbɛdi ꞌbɛꞌa gätho i pɛꞌtsꞌi.
\s Ga häthʉ ꞌbʉ bi tsꞌäjʉ
\p
\v 12 Nuꞌbʉ ga häthʉ yʉn ʉnbi, dan johyahʉ bʉya. Nguetho nuꞌbʉ mi tsꞌäjʉ nɛ dá häthʉ, ya din ꞌdajʉ ra temaząi, tengu bi man Oją di ꞌdajʉ ꞌbʉ høntꞌa gam bɛ̨mhbʉ a.
\s Dím bɛ̨nsɛhʉ yʉ tsꞌoqui
\p
\v 13 Nuꞌbʉ ꞌbʉꞌa nꞌda da bɛ̨ni da ꞌyøtꞌa nꞌda ra tsꞌoqui, pɛ hin da ꞌyɛ̨na Oją bi bɛ̨nbi. Nguetho xʉn ho Oją nɛ hingui xifi da ꞌyøtꞌ ra tsꞌoqui nꞌda ra jąꞌi, nɛ xín da zä da si Oją da ꞌyøtꞌ ra tsꞌoqui.
\v 14 Pɛ nꞌda ngu nꞌda yʉ jąꞌi ꞌbʉ im bɛ̨ni da ꞌyøtꞌ yʉ tsꞌoqui, pɛ bin ꞌyørpazɛhɛ nangue rán ꞌyomfɛ̨ni sɛ.
\v 15 Nɛ nuꞌa ꞌbɛꞌa bi numanho sɛ, nɛ nuꞌbʉ mi bɛ̨ni da ꞌyøtꞌe, nɛ gueꞌa dí mbʉxca yʉ tsꞌoqui rá mbʉi a. Nɛ nuꞌbʉ mi ꞌyøtꞌʉ yʉ tsꞌoqui mi bɛ̨ni, nɛ manꞌda bi thoqui bi ꞌyør bʉya, nɛ gueꞌa dí nu ran ʉnbi maząi a bʉya.
\v 16 Ma zi cu ahʉ, hin dan hyäzɛhɛhʉ ꞌbʉ dí øthʉ yʉ tsꞌoqui, gueꞌa hin gam bɛ̨mhbʉ Oją di ꞌbɛcpahʉ.
\v 17 Nguetho xʉn hotho ꞌbɛꞌa gätho di ꞌdajʉ Oją, nɛ høntꞌʉ gätho xʉn ho bí nɛxpʉ bí ꞌbʉ Oją, ngue bi zän yʉ nyotꞌi ua ja ra häi. Nuꞌʉ jaꞌbʉ di ꞌbɛh yʉ́n nɛqui ꞌbʉ xʉ ꞌbätꞌʉ, pɛ nu Oją njąmꞌbʉ di ꞌbɛh ran ho.
\v 18 Rá pähä zɛhɛ Oją bi xąndgahʉ ꞌbʉ má hąmhbʉ rám hma majuąni, nɛ yʉ́ tꞌʉhni gahʉ a bʉya. Janangueꞌa manꞌda xʉn hojʉ xinda gueꞌʉ miꞌda gätho bi ꞌyøtꞌe.
\s Dan xähmbʉ ram hma nɛ ga øthʉ yʉ́n thɛhʉ
\p
\v 19 Gueꞌa dí pąhmbʉ a, ma zi cu ahʉ. Janangueꞌa dan ɛ̨hya dan xähmbʉ a rám hma, xinda gueꞌbʉ go dan yąsɛhʉ, ogue ga ɛ̨mhbʉ go dí pąsɛhʉ ngue dan junthʉ.
\v 20 Nguetho nuꞌbʉ dadín junthʉ, hingui sä ga øthʉ ꞌbɛꞌa nde Oją.
\v 21 Pɛ ga ɛshʉ a ná øthʉ yʉ tsꞌoqui, nɛ ran tsꞌo ząi dá bɛ̨mhbʉ. Nɛ hin dan ꞌyɛ̨zɛhɛhʉ. Janangueꞌa da zä ga cʉꞌtꞌ ma mbʉihʉ a ram hma, tenguꞌbʉ nꞌda ra hmudä da thupʉ, nɛ din te bʉ. Nɛ gueꞌa dí pøcpa ma mbʉihʉ a bʉya.
\v 22 Pɛ hinga høntho dan xäthohʉ ram hma. Nguetho dán hyäzɛhɛhʉ ꞌbʉ dím bɛ̨mhbʉ hinꞌyʉ manꞌda ga øthʉ. Pɛ i jatho thocpa thoho ga øthʉ yʉ́n thɛhʉ a ram hma dadín xähmbʉ.
\v 23 Nguetho nuꞌbʉ dí ɛ̨mhbʉ dadín xähmbʉ ram hma, nɛ hin dí øthʉ yʉ́n thɛhʉ, dadí pumbɛ̨ni thohʉ a dán xähmbʉ ꞌbʉ. Tenguꞌbʉ dí hɛ̨thʉ ran hyɛ̨dä ma hmihʉ, nɛ hin dí ząmhbʉ bʉ.
\v 24 Dá nuhma a ma hmihʉ, pɛ ꞌbex dá pumbɛ̨nihʉ ꞌbʉ má ꞌuehmbʉ.
\v 25 Pɛ nuꞌbʉ dan ząmhbʉ a ra ꞌdaꞌyomhma, gueꞌa di zɛjʉ ga øthʉ yʉ́n thɛhʉ a. Nɛ nuꞌbʉ ząi dí øthʉ a, nɛ hin dí pumbɛ̨nihʉ a, di jącpahʉ Oją bʉya nangue ꞌbɛꞌa gätho dí øthʉ.
\v 26 Nuꞌbʉ sä ɛ̨na ørpa rá ꞌbɛfi Oją nꞌda, nɛ hin di jamansu ꞌbɛꞌa ma, din hyäzɛhɛ ꞌbʉ, nɛ nte ní mbatꞌa ní ꞌyørpa rá ꞌbɛfi Oją ꞌbʉ.
\v 27 Pɛ nuna majuąni rá ꞌbɛfi Oją ma Tahʉ da numanho ꞌbʉ ga fäxhʉ yʉ hyoya tꞌʉhni, nɛ yʉ xisu xʉn du yʉ́ ndø, ngue in nu ran ʉnbi. Nɛ ndeꞌbʉ dam fäsɛhʉ hin di tsꞌonga man ꞌyomfɛ̨nihʉ rán tꞌøtꞌe ra ximhäi.
\c 2
\s Hin ga huandahʉ toꞌo gan numanhohʉ
\p
\v 1 Ma zi cu ahʉ, nuꞌbʉ dí ɛ̨cꞌyɛ̨ihʉ ma Hmuhʉ ra Jesucristo ngue mixte xʉn ho a, ndeꞌbʉ ga øthʉ tengu i øtꞌa, ngue hin ga huandahʉ toꞌo dín numansuhʉ.
\v 2 Xiꞌbʉ da zøm bʉ ja mam pɛtihʉ nꞌda ran ꞌyohʉ i fo rá ꞌyɛ ram foꞌyɛ ɛ̨mmɛ xʉm hmadi, nɛ mahotho rá he. Nɛ da zøm bʉ nꞌda zi hyoya hingui ho rá he.
\v 3 Nɛ manꞌda gan numanhohʉ a mahotho rá he, xinda gueꞌa nꞌda zi hyoya. Nɛ ga ɛ̨mfʉ a mahotho rá he: “Nuꞌi nꞌyø, damin säya tsꞌʉ ua ja ran thutsꞌi,” ga ɛ̨mfʉ. Nɛ nuꞌa zi hyoya bʉya: “Nuꞌe, damím ꞌbäh nʉ ogue damí hyuh nʉ häi ja rá hyo ran thutsꞌi,” ga ɛ̨mfʉ a bʉya.
\v 4 Ha hin dím bɛ̨mhbʉ ngue yoho man tꞌøtꞌehʉ ꞌbʉ dí samhbʉ a nan hyoya ʉ ꞌda, nɛ nuꞌa na mɛmbɛti ʉ ꞌda, gueꞌa na ɛ̨spahʉ ʉ. Nɛ guextaꞌa ra tsꞌoqui dí øthʉ ꞌbʉ dí huandahʉ a dín numanhohʉ.
\v 5 Ma zi cu ahʉ, damí ꞌyøhmbʉ na ga xi ahʉ. Ha him bi huan Oją ʉ xʉn ngu i hyoya bʉ na nu ra ximhäi, ngue da dįn a manꞌda di muui, ngue da gomhbʉ yʉ́n jąpi ʉ di un yʉ́ tꞌʉhni Oją. Nɛ gueꞌa bi ma majuąni di unꞌndʉ toꞌo gätho da bɛ̨n a.
\v 6 Pɛ nuya gá ꞌyąsäbahʉ yʉ hyoya. Ha hin dí pąhmbʉ ngue gueꞌʉ yʉ mɛmbɛti di ʉngahʉ, nɛ i sixcahʉ bʉ ja yʉ nguntsꞌʉtꞌabi.
\v 7 Ha hinga gueꞌʉ yʉ mɛmbɛti dí øhmbʉ im man ra tsꞌore nangue rá hoga thuhu ma Hmuhʉ ra Cristo.
\v 8 Pɛ: “Ga huɛ̨c ma mijąꞌihʉ tengutho bʉ na huɛ̨czɛhɛ ma jąꞌihʉ.” Guehna xʉn ho ga øthʉ na, nguetho rán tꞌɛ̨di ra Cristo mixte thoho a, tengu man tꞌoꞌtꞌi bʉ rám hman Oją.
\v 9 Pɛ nuꞌbʉ hinga gätho yʉ jąꞌi dadí huɛ̨jʉ, ra tsꞌoqui a dí øthʉ ꞌbʉ, nɛ dín dupatehʉ a ran tꞌɛ̨di ngue im ma gätho ꞌda i gu bʉ dán huɛ̨jʉ.
\v 10 Pɛ dín ndehʉ made tho ga øthʉ gätho rán tꞌɛ̨di Oją. Pɛ madahøntꞌa nꞌdatho rán tꞌɛ̨di Oją hin dá øthʉ, ya dín dupatethʉ gätho rán tꞌɛ̨di Oją ꞌbʉ.
\v 11 Ngubʉ dí ørpahʉ yʉ́n tꞌɛ̨di Oją ngue bi ꞌyɛ̨na: “O guí øthʉ ran ꞌyomtꞌɛ̨ni,” nɛ: “O guí hącpahʉ rá te ni mijąꞌihʉ,” bi ꞌyɛ̨na. Madagueꞌbʉ hin dí øthʉ ran ꞌyomtꞌɛ̨ni, pɛ dí hącpahʉ rá te ma mijąꞌihʉ, guemhma dín dupatethʉ gätho rán tꞌɛ̨di Oją ꞌbʉ. Nguetho nꞌdatꞌa Oją bi ma gätho yʉ́n tꞌɛ̨di.
\v 12 Pɛ nuꞌa rán tꞌɛ̨di ra Cristo, gueꞌa di zɛjʉ ga øthʉ yʉ́n thɛhʉ. Nɛ gueꞌa rán tꞌɛ̨di dí ꞌyängahʉ Oją a ꞌbʉ dá øthʉ o hinꞌna. Janangueꞌa ga jamansuhʉ a dím mamhbʉ nɛꞌa dí øthʉ.
\v 13 Nɛ nuꞌbʉ him bi ꞌyøtꞌ ran huɛ̨cate nꞌda, nɛ hingui ngu ꞌbɛꞌa dí huɛ̨c Oją a ꞌbʉ bi juąnbi. Pɛ nuꞌbʉ bi ꞌyøtꞌ ran huɛ̨cate nꞌda, da bømanho ꞌbʉ bi juąnba Oją a.
\s Hingui ho ꞌbʉ nte nꞌyoui yʉn tꞌøtꞌe rá tꞌɛ̨cꞌyɛ̨i nꞌda
\p
\v 14 Ma zi cu ahʉ, ꞌbɛꞌa gue ní mba a i øtꞌ i ꞌda sä ɛ̨na ja yʉ́ tꞌɛ̨cꞌyɛ̨i, pɛ hingui øtꞌʉ yʉ́n thɛhʉ. Hin da yąn Oją nꞌda ꞌbʉ sä ɛ̨na ja rá tꞌɛ̨cꞌyɛ̨i.
\v 15-16 Xiꞌbʉ ꞌbʉꞌa nꞌda ma cuhʉ ra ꞌyąhe nɛ sä ra thuhu. Nɛ ga ɛ̨mfʉ: “Ní mba, bá he ni he, nɛ bán sihmɛ, da hyu ni mbʉi,” ga ɛ̨mfʉ. Pɛ nte dá unhdʉ ꞌbɛꞌa honi. ꞌBɛꞌa gue ní mba a dá ørpahʉ ꞌbʉ.
\v 17 In jabʉ nꞌda ꞌbʉ hingui øtꞌ yʉn tꞌøtꞌe rán säui rá tꞌɛ̨cꞌyɛ̨i, nu rá tꞌɛ̨cꞌyɛ̨i nte di muui, tenguꞌbʉ nꞌda ra du ngue hingui di ꞌyąni. 
\v 18 Pɛ nuꞌbʉ gui ꞌyɛ̨njʉ: “Nuꞌi ja ni hogantꞌøtꞌe, pɛ nugähe dí ɛ̨cꞌyɛ̨i mbo ma mbʉihe.” Nɛ ga xiꞌahʉ bʉya, damí ꞌyurca ni tꞌɛ̨cꞌyɛ̨i ngue nte nꞌyoui nin tꞌøtꞌehʉ, gan nugä. Nugä da zä ga ut ahʉ yʉn tꞌøtꞌe dí øtꞌä, janangueꞌa di nɛqui ma tꞌɛ̨cꞌyɛ̨igä ngue majuąni a.
\v 19 Guí pąhmbʉ i ꞌbʉ Oją, pɛ hin dí gua a zi tsꞌʉ. Nguetho nɛꞌʉ yʉ zįthu i pądi i ꞌbʉ Oją, pɛ ɛ̨mmɛ di fɛtꞌi, nguetho yʉ́n sʉihʉ Oją ʉ.
\v 20 Gyʉ́ ꞌyąmbʉihʉ, ha hin guí pąhmbʉ ngue xingui tsꞌʉ nte di muui ni tꞌɛ̨cꞌyɛ̨ihʉ ꞌbʉ hin te guí øthʉ.
\v 21 Ndeꞌbʉ gam bɛ̨mhbʉ tsꞌʉ nangue mam bombøtahʉ ra Abraham. Ja bi nɛqui a xmí pą Oją xʉn ho ꞌbʉ mi ꞌyøtꞌa bi xifi, ngue bi gäxpʉ ja ra do a Isaac rá tsꞌʉntꞌʉ, ngue ɛ̨na xtá hyo xtí unꞌna Oją.
\v 22 Nangue bi ꞌyɛ̨cꞌyɛ̨i mbo rá mbʉi, bin ja ra tsꞌɛdi bʉya ngue da ꞌyøtꞌʉ yʉ́n thɛhʉ. Janangueꞌa rám pɛ ra tꞌɛ̨cꞌyɛ̨i ʉ yʉn tꞌøtꞌe.
\v 23 Nɛ gueꞌa mi mam bʉ ja rám hman Oją, bi ꞌyɛ̨na: “Nu ra Abraham bi ꞌyɛ̨cꞌyɛ̨i a bi man Oją, janangueꞌa bi ꞌyɛ̨mp Oją xʉn ho,” nɛ bi ꞌyɛ̨mbi rá amigo xʉn ho Oją bʉya.
\v 24 Dí pąhmbʉ ya, i ɛ̨mp Oją xʉn ho nꞌda ra jąꞌi ꞌbʉ øtꞌ rán säui rá tꞌɛ̨cꞌyɛ̨i, nɛ hinga sä da ꞌyɛ̨na ɛ̨cꞌyɛ̨i Oją.
\v 25 Ximangutho a Rahab, ngue ra xisu ząi min ꞌyomtꞌɛ̨ni mam ꞌbɛtꞌo. Pɛ bi ꞌyɛ̨mp Oją xʉn ho ꞌbʉ midí nɛqui rá tꞌɛ̨cꞌyɛ̨i, ꞌbʉ mi ꞌyøtꞌa ran ho bi ꞌyøtꞌe, ngue bi jamansu ʉ yʉ ꞌyɛ̨cꞌyɛ̨i ꞌbʉ mi mba bá ąspa rá hnini. Nɛ bá uti nꞌdanꞌyo ra ꞌyu bá hąx ꞌbʉ mam bá pengui, janangueꞌa him bi mba mfɛntꞌi ʉ.
\v 26 Ja ga pąhmbʉ bʉya ngue hingui ho rá tꞌɛ̨cꞌyɛ̨i nꞌda ꞌbʉ hingui øtꞌʉ yʉ́n thɛhʉ, tengu nꞌda ra jąꞌi xʉn du ngue hinꞌyʉ bʉ rá mbʉi.
\c 3
\s Ga sąmzɛhɛ ma jąnihʉ
\p
\v 1 Ma zi cu ahʉ, ndeꞌbʉ hinga gätho dan xänbatehʉ bʉ ja ram pɛti. Nguetho dí pąhmbʉ Oją da nu ꞌbɛꞌa dí øthʉ, nɛ nuje, manꞌda da ꞌyängahe Oją, xinda gueꞌbʉ hin xcán xänbatehe.
\v 2 Nɛ gätho gahʉ xʉn ngu yʉ nidi jaꞌbʉ dí øthʉ yʉ tsꞌoqui. Pɛ nuꞌbʉ ꞌbʉꞌa nꞌda xinga nꞌda ra tsꞌoqui im ma, ya xʉn te xʉn ho rá mbʉi a, nɛ i pądi di jamansu xʉn ho gätho i øtꞌa ꞌbʉ.
\v 3 Tenguꞌbʉ dí cärbahʉ yʉ́n tsꞌare yʉ fani, da ꞌyøtꞌa dí xihmbʉ bʉya, nɛ hinga høntꞌa rá nde di ꞌbäꞌtꞌi, pɛ ꞌda dí ꞌbäthoho. Ngutho ꞌbʉ i sąmzɛhɛ rá jąni nꞌda, nɛ hinga høntꞌa rám hma da bądi da ząmmi, pɛ da da bądi di jamansu xʉn ho gätho i øtꞌe.
\v 4 Nɛ tengu ra dąbarco, madagueꞌa xʉ ndoho, nɛ tsꞌɛdi ran dąhi i joni, pɛ ɛ̨mmɛ zicuɛ a ní mba ma ꞌyoni, pɛ hønbʉ go da ndepe dí mba a di ꞌyoni.
\v 5 Ngutho ma jąnihʉ, zicuɛ, pɛ ɛ̨mmɛ xʉn ngu da bøni nangue ꞌbɛꞌa da ma. O tenguꞌbʉ nꞌda ra dɛspi zicuɛ, pɛ ɛ̨mmɛ xʉn ngu ꞌbɛꞌa da ꞌyudi, nɛ da zä da ꞌyu a nꞌda ra xąnthø xʉ ndoho.
\v 6 Nguetho ma jąnihʉ tenguꞌbʉ nꞌda ra sibi. Nɛ manꞌda xʉn tsꞌo øtꞌ ma jąnihʉ xinda gueꞌa ma ꞌyɛhʉ ogue ma guahʉ. Nɛ gueꞌa ní tsꞌoni gätho dí øthʉ a, nɛ di xąnd ran tsꞌo gätho ra ximhäi, ngue di bɛ̨nba a ra zįthu.
\v 7 Pɛ nu yʉ jąꞌi manꞌda da zä di maxubi høntꞌa go má zate nɛ yʉ doja nɛ yʉ pozʉ nɛ yʉ huą.
\v 8 Pɛ nu rá jąni nꞌda, njoꞌo to da zä di hąt ra ꞌyu. Nɛ i hote, tengu nꞌda ra pozʉ, ɛ̨mmɛ in cuɛ, ran dąte a rá nde.
\v 9 Nangue ma jąnihʉ sä dí ɛ̨mhbʉ dí ɛ̨spahʉ Oją ma Tahʉ, pɛ nɛ dí äfʉ ra ꞌyąnthį ma mijąꞌihʉ. Pɛ nuꞌʉ, bi zänꞌna Oją ʉ, bi ndepe dim ꞌbʉi tengu tho Oją ʉ.
\v 10 Nꞌdatꞌa ma ndehʉ ná yąhʉ ꞌbʉ dí ɛ̨spahʉ Oją nɛꞌbʉ dí äfʉ ra ꞌyąnthį ma mijąꞌihʉ. Pɛ ma zi cu ahʉ, hingui sä ga øthʉ tengu a.
\v 11 Ha i sä ꞌdarbʉ da bøhmi ra dehe xʉn ho a ra dehe xʉn xą.
\v 12 O ꞌbɛꞌa di ja yʉ zaꞌixi, ma zi cu ahʉ, ha nɛꞌʉ yʉ pɛni i zʉpʉ. O xi nꞌda ra zabotꞌi, ha zʉpʉ yʉ ixi. Xíngui sä ꞌdarbʉ da bøhmi ra dehe xʉn ho a hingui ho.
\s Bí nɛxpʉ bí ꞌbʉ Oją ran ꞌyomfɛ̨ni xʉn ho
\p
\v 13 Nuꞌbʉ dí pąhmbʉ ran ꞌyomfɛ̨ni, pɛ ga uhmbʉ ꞌbʉ, nangue ran hocjąꞌi ga øthʉ, nɛ hin dan ꞌyɛ̨zɛhɛhʉ, guepʉ da fądi majuąni i ja man ꞌyomfɛ̨nihʉ.
\v 14 Pɛ nuꞌbʉ xʉn ju dím bɛ̨nba ma mijąꞌihʉ nangue ran tsꞌɛya, nɛ dadí mispahʉ, nɛ sä dí ɛ̨mhbʉ ja man ꞌyomfɛ̨nihʉ, pɛ ra fɛhni a dím mamhbʉ ꞌbʉ.
\v 15 Pɛ nuna ra tsꞌonꞌyomfɛ̨ni na him bí nɛxpʉ bí ꞌbʉ Oją, pɛ bi nɛquida ua ja ra ximhäi, nɛ dá bɛ̨nsɛ ma mbʉihʉ, nɛ ra zįthu bi bɛ̨ngahʉ tengu na.
\v 16 Nguetho nuꞌbʉ dí øthʉ ran tsꞌɛya, nɛ dín nde dam mixtehʉ, nuꞌbʉ, dí øthʉ gätho yʉ tsꞌoqui ꞌbʉ, nɛ yʉ sʉi.
\v 17 Pɛ nu ran ꞌyomfɛ̨ni di ꞌdajʉ Oją, nꞌdatꞌa gam bɛ̨mhbʉ, nɛ ga hocpahʉ rá mbʉi ma mijąꞌihʉ, nɛ gan numanhohʉ ʉ, nɛ din ja man huɛ̨catehʉ, nɛ ga fäxhʉ ʉ, nɛ hin da goh ma mbʉihʉ ꞌbʉ ja a dí xihmbʉ ʉ, nɛ hin ga häthʉ ʉ.
\v 18 Pɛ nuꞌbʉ jante thoho ga hocpahʉ rá mbʉi ma mijąꞌihʉ, dí øthʉ tenguꞌbʉ dí pomhbʉ ra hmudä dí bøx ran ho ꞌbʉ.
\c 4
\s Hin ga øthʉ rá pähä ra ximhäi
\p
\v 1 Ha hin guí pąhmbʉ hapʉ di nɛqui ʉ yʉn sʉi guí øthʉ, nɛ yʉn heque. Ha hinga gueꞌʉ di ho ni mbʉi zɛhɛhʉ a gnín sʉhmbʉ. 
\v 2 Nuꞌa hin ní zä gui tįmhbʉ a guín ndehʉ, gueꞌa gnín hote thohohʉ a. Nɛ gueꞌa ran tsꞌɛya a gnín sʉhmbʉ ꞌnɛ gnín tunhdʉ, nguetho hingui sä gui tąhmbʉ a guín ndehʉ nangue ni pähä zɛhɛhʉ. Pɛ hin guí tįmhbʉ ngue hin guí äfʉ Oją.
\v 3 Pɛ madagueꞌbʉ guí äfʉ Oją a guín ndesɛhʉ, pɛ hin di ꞌdaꞌahʉ, nguetho hingui ho guím bɛ̨mhbʉ, guín nde gui xąnd ni pähä zɛhɛhʉ.
\v 4 Sä guí ɛ̨mhbʉ høntꞌa Oją guím bɛ̨mhbʉ, nɛ ya guí tɛn thohohʉ ra ximhäi. Ha hin guí pąhmbʉ gadín sʉhmbʉ Oją ꞌbʉ guín numanhothʉ ra ximhäi.
\v 5 Uague guí ɛ̨mhbʉ säti thoho bi man rá tꞌohni Oją ngue bi ꞌyɛ̨na: “Pɛ ɛ̨mmɛ dín ndepe da bɛ̨ngui, janangueꞌa dá un ma Hogandąhi di huɛ̨cꞌʉ, nɛ di jamansup yʉ́ mbʉi,” bi ꞌyɛ̨n Oją.
\v 6 Pɛ di zɛtꞌa ni mbʉihʉ Oją, nꞌdamhma da zä høntꞌa guim bɛ̨mhbʉ a. Janangueꞌa ɛ̨n Oją, di un rá mate nꞌda ꞌbʉ hin din ꞌyɛ̨zɛhɛ, pɛ da zʉ a nꞌda ꞌbʉ din ꞌyɛ̨zɛhɛ, i ɛ̨n rá tꞌohni Oją.
\v 7 Damin unsɛhʉ ya ngue di manda ahʉ Oją, nɛ dami sʉhmbʉ ra zįthu, da ꞌdagui nangueꞌahʉ.
\v 8 Ząi damim bɛ̨mhbʉ ngue ꞌdarbʉ guí ꞌbʉhmbʉ Oją, nɛ ząi da hyutꞌa ni mbʉihʉ bʉya. Dami ꞌyɛshʉ yʉ tsꞌoqui guí øthʉ, nɛ hingui yoho da bɛ̨n ni mbʉihʉ.
\v 9 Pɛ i jatho da du ma mbʉihʉ nguetho dyʉ́ tsꞌomꞌbäi hʉ. Nɛ dan zomhbʉ, hingui sä dan thethohʉ. Nu ma thedehʉ dim pommi ra tsꞌoni, nɛ nu man johyahʉ dim pommi ra dumbʉi.
\v 10 Nɛ ga øthʉ ngue hinꞌyʉ ma tsꞌɛdi zɛhɛhʉ bʉ ja rá hmi Oją. Ga äfʉ ra punbi, janangueꞌa di pungahʉ nɛ di jajʉ dan johyahʉ bʉya.
\s Hin dan cꞌąmanꞌʉhʉ
\p
\v 11 Ma zi cu ahʉ, o gadín cꞌąmanꞌʉhʉ, nguetho nuꞌbʉ gadín cꞌąmanꞌʉhʉ, masque guím bɛ̨mhbʉ hingui ho rán tꞌɛ̨di Oją i ɛ̨na dan huɛ̨jʉ. Nɛ nuꞌbʉ hin dí øthʉ rán tꞌɛ̨di Oją, ɛ̨na gueꞌbʉ jasɛ man tꞌɛ̨dihʉ ꞌbʉ.
\v 12 Pɛ høntꞌa nꞌda sä di ꞌdajʉ yʉn tꞌɛ̨di, nguetho Oją a, nɛ høntꞌa sä da yąnꞌa nꞌda nɛ i sä di juaꞌa nꞌda. Pɛ ha dím bɛ̨mhbʉ dyʉ ojąhʉ ngue sä ga ɛ̨mhbʉ ja yʉ́ tsꞌoqui ʉ ꞌda.
\s Hin dí hand bʉ ní ꞌyɛ̨h man zaquihʉ
\p
\v 13 Mbähä dan ꞌyomfɛ̨nihʉ tsꞌʉ ya, nguetho dí ɛ̨nthohʉ: “Nuya ogue nixudi ga mbähä nꞌdanni, dam ꞌbʉhmbʉ nꞌda jɛya bʉ, nɛ dam pɛhmbʉ, ga tąhmbʉ,” dadín ꞌyɛ̨mfʉ.
\v 14 Pɛ hingui sä gam mamhbʉ tengu a, nguetho ya hin dí pąhmbʉ ꞌbɛꞌa ga øthʉ, nɛ hin dí hand bʉ ní ꞌyɛ̨h man zaquihʉ. Tengu tho nꞌda ra güi, guín nu, jabʉ, nɛ xø gán nu, hinꞌyʉ bʉ. Njarbʉ nꞌda ra jąꞌi.
\v 15 Pɛ ndeꞌbʉ ga ɛ̨mhbʉ: “Nuꞌbʉ da nde Oją, dam ꞌbʉhmbʉ tsꞌʉ, nɛ din ja ꞌbɛꞌa da zä ga øthʉ bʉya.” Guehna gam mamhbʉ na ya.
\v 16 Pɛ dán ꞌyɛ̨zɛhɛhʉ ꞌbʉ hin dá äfʉ Oją ꞌbɛꞌa da zä ga øthʉ. Pɛ ra tsꞌoqui a.
\v 17 Nuꞌbʉ dí pąhmbʉ a ran ho, nɛ hin dí øthʉ a, ra tsꞌoqui a ꞌbʉ.
\c 5
\s Nꞌda ran zofo i sih yʉ mɛmbɛti
\p
\v 1 Damin ꞌyomfɛ̨nihʉ tsꞌʉ gyʉ mɛmbɛtihʉ, gan zomhbʉ nɛ ga mbahmbʉ nguetho ntsꞌutho ra ꞌyąnthį guin nuhʉ.
\v 2 Nuꞌa ꞌbɛꞌa gä guí pɛshʉ tenguꞌbʉ xʉ ꞌya bʉ nam bɛ̨n Oją, nɛ  ni hehʉ tenguꞌbʉ xʉn za yʉ zuꞌuɛ̨.
\v 3 Nu ni mbɛtihʉ xʉn tsꞌom bʉ na nu Oją a, nguetho nin tsꞌiyatehʉ a gní tįmhbʉ ʉ, nɛ hin gá pąhmbʉ ndaꞌa xʉn ho xquí jafʉ. Nɛ gueꞌa dí jua ahʉ a tenguꞌbʉ ra sibi. Nɛ tenguꞌbʉ guidí munshʉ a ran ʉnbi guin nuhʉ ꞌbʉ ran zɛgui.
\v 4 Gá hyät ni mbɛfihʉ hin gá juarpahʉ yʉ́n zäbi ꞌbʉ min xopʉ ni huąhihʉ. Nɛ nuꞌa ran zäbi gá cønba ni mbɛfihʉ, nɛ gueꞌa dí yąp ahʉ a. Nɛ nuꞌa rá tsꞌoni ni mbɛfihʉ bi ꞌyø Oją tąte thoho rá tsꞌɛdi, nɛ da hyą ra güɛnda nangueꞌʉ.
\v 5 Nuꞌahʉ gám ꞌbʉhmbʉ nangue nin johya zɛhɛhʉ nguecua ja ra ximhäi gyʉ́ ziyatehʉ. Nɛ bi zac ni mbʉihʉ tengu nꞌda ra tsꞌʉdi. Pɛ gueꞌa dín jaꞌahʉ tenguꞌbʉ ran thotsꞌʉdi ꞌbʉ rán zɛgui ra pa.
\v 6 Nɛ nuꞌahʉ guí cothʉ fädi ʉ nte in dupate, nɛ xø guí hohʉ bʉya, nɛ hin di mu.
\s Ga häthʉ ꞌbɛꞌa i tꞌørcahʉ
\p
\v 7 Janangueꞌa ma zi cuꞌahʉ, nuꞌbʉ i tꞌørcahʉ a, pɛ hin dan xømbʉihʉ, nɛ ga tømhbʉ gueꞌbʉ go bá ɛ̨h ma Hmuhʉ ra Cristo. Tenguꞌbʉ dí tuhmbʉ yʉ hmudä ua ja ra häi, dí tømhbʉ høntꞌbʉ go njąmꞌbʉ ba ɛ̨h ra ꞌye, di hoqui ꞌbɛꞌa gä xtá tuhmbʉ bʉya. Nɛ din ja a mi numanhohʉ din ja bʉya.
\v 8 Janangueꞌa ga sɛthʉ hin dan xømbʉihʉ, nguetho ya him mayaꞌa ba ɛ̨h ra Hmu.
\v 9 Ma zi cuꞌahʉ, hin ga ɛ̨mhbʉ rá tsꞌoqui na nꞌda ma cuhʉ ꞌbʉ dín nuhʉ yʉn ʉnbi, nɛ xømhma di ʉngahʉ Oją. Pɛ guim bɛ̨mhbʉ mi tsꞌʉtho da zøꞌa ra zɛꞌmi ya. 
\v 10 Ma zi cuꞌahʉ, gam bɛ̨mhbʉ gue bi hyät yʉn ʉnbi ʉ yʉ́ pøngahyą Oją, nɛ ngutho ga häthʉ ʉ.
\v 11 Nguetho dí pąhmbʉ mająpi ʉ i hät yʉn ʉnbi. Xtá øhmbʉ ngue bi hyät yʉn ʉnbi a ra Job, nɛ xʉn ngu ran ho bi tꞌørpa mꞌbɛjua. Nguetho nuꞌa Oją xʉn ngu rán huɛ̨cate nɛ xʉn ngu rá mate.
\v 12 Hnɛhi thoho hin ga uąspahʉ rá thuhu Oją a mam hmansɛhʉ, xín ga ndønbahʉ rá thuhu ꞌbɛꞌa manꞌda jaua ja ra häi ngue ga ɛ̨mhbʉ di zɛrca mam hmansɛhʉ. “Ha guí ɛ̨cꞌyɛ̨i a dí xiꞌi uague hinꞌna,” ga ɛ̨mthohohʉ. Janangueꞌa hin di ʉngahʉ Oją.
\s Dan yąhʉ Oją
\p
\v 13 Nuꞌbʉ dín nuhʉ ran ʉnbi, dan yąhʉ Oją ꞌbʉ. O nuꞌbʉ dadín johyahʉ, dan tuhmbʉ nꞌda ra thuhu ngue dí ɛ̨spahʉ Oją.
\v 14 Nuꞌbʉ xʉn ʉjʉ, ga xihmbʉ yʉ ngʉrbi bʉ ja ram pɛti ba ɛ̨hɛ̨ da ꞌyäp rá mfätsꞌi ra Hmu, nɛ da jajʉ ra aceite nangue rá thuhu ra Hmu.
\v 15 Nɛ Oją di ꞌuecꞌa ran ʉ dí hɛ̨mfʉ, nguetho dá ɛ̨cꞌyɛ̨ihʉ ngue majuąni da yąnjʉ ꞌbʉ má äfʉ a. Nɛ nuꞌbʉ ma tsꞌoquihʉ a dán hyɛ̨nhdʉ, pɛ di pungahʉ.
\v 16 Nɛ dan xih ma tsꞌoquihʉ nꞌda ngu nꞌdajʉ, janangueꞌa da zä dan ꞌyäfʉ rá mate Oją nꞌda ngu nꞌdajʉ, nɛ nuꞌbʉ xʉn ʉ nꞌda da yąm bʉya. Nguetho xʉn ngu rá tsꞌɛdi da ꞌyøtꞌ Oją ꞌbʉ da ꞌyäp a majuąni nꞌdatꞌa Oją im bɛ̨ni, nɛ gueꞌbʉ di bɛ̨nba Oją a i ädi.
\v 17 Tengu a ra Elías, nuꞌa nꞌda ra jąꞌi thoho tengu gahʉ, nɛ bi hyąh rá mbʉi bi ꞌyäp Oją ngue hin din ꞌye. Nɛ him bin ꞌye ua ja ra ximhäi gätho nhyunjɛya nɛ nꞌdato ząna.
\v 18 Nɛ xø bin yąui Oją mahønꞌa ngue bi ꞌyäp ra ꞌye. Nɛ bá pɛnhꞌna Oją ra ꞌye, nɛ bi bøx yʉ hmudä ua ja ra häi bʉya.
\v 19-20 Ma zi cuꞌahʉ, nuꞌbʉ nꞌda ra ꞌyɛ̨cꞌyɛ̨i da ꞌuepʉ ja ra ꞌyu xʉn juąni, nɛ nuꞌbʉ da zä ba sihʉ mahønꞌa, ga pąhmbʉ ngue dá yąnbahʉ rá te a xí ꞌuegue. Nɛ madagueꞌbʉ xʉn ngu yʉ́ tsꞌoqui, pɛ bi mba ma punbi.