\id 1PE
\h 1 PEDRO
\toc1 1 PEDRO
\mt1 1 PEDRO
\mt2 Ná nꞌda ra søcuą bi ꞌyoꞌtꞌa ra Pedro
\c 1
\s Ran zɛngua
\p
\v 1 Nugä drá Pedrogä, ma ꞌbäigäꞌbe ra Jesucristo. Dí pɛnhꞌnahʉ ra søcuą gyʉ ꞌyɛ̨cꞌyɛ̨ihʉ ra Cristo, nꞌdaꞌa nꞌdanni gá mbähä ja ra häi Ponto nɛpʉ Galacia nɛpʉ Capadocia nɛpʉ Asia nɛpʉ Bitinia.
\v 2 Nu ma Tahʉ Oją mayaꞌbʉ thoho bi huancahʉ, nɛ bi zänni da ꞌyørcahʉ yʉ́ tꞌʉhni gahʉ. Nɛ bi ꞌuega ma mbʉihʉ a rá Hogandąhi Oją, nɛ bi mbän rá ji nanguejʉ a ra Jesucristo, guepʉ nan zä ga øthʉ a i xijʉ. Dí äpꞌa Oją ngue manꞌda gui hyąmhbʉ rá mate, nɛ manꞌda da hyu ni mbʉihʉ bʉya.
\s Ga tąfʉ ran dąte
\p
\v 3 Jamadi Oją, ngue nu rá Ta ma Hmuhʉ ra Jesucristo, nɛ rá Oją a. Nguetho xʉn ngu rán huɛ̨cate bi jajʉ dám ꞌbʉhmbʉ maꞌdaꞌyo. Nuya dí pąhmbʉ gan nuhʉ ran ho maząi, nguetho bi dąmbɛ̨ni ra Jesucristo.
\v 4 Nɛ nuya dí tømhbʉ ʉ yʉ erencia di ꞌdajʉ Oją ngue mꞌbɛꞌtsꞌi bʉ mahɛ̨tsꞌi, nɛ njąmꞌbʉ dim ꞌbɛdi, nɛ njąmꞌbʉ din tsꞌoni.
\v 5 Nɛ nuya i fäjʉ Oją nangue rá tsꞌɛdi, nguetho dí ɛ̨cꞌyɛ̨ihʉ a. Nɛ ya i sänni da yąnjʉ xʉn ho ꞌbʉ bi zøn ra pa ran zɛgui.
\v 6 Nɛ nuꞌbʉ dím bɛ̨mhbʉ ya, nɛ guehya ní ꞌdajʉ ran johya, madagueꞌbʉ da du ma mbʉihʉ bʉ na sähʉ høntꞌa go man ʉnbi ꞌda yʉ pa ya, ꞌbʉ da ꞌyɛ̨n Oją.
\v 7 Tengu ra oro i tsꞌä ngue ra sibi ngue din hogui. Nɛ ngutho ma tꞌɛ̨cꞌyɛ̨ihʉ i tsꞌä, nɛ manꞌda di muui a xinda gueꞌa ra oro ngue dim ꞌbɛdi. Janangueꞌa di nɛcmanho ma tꞌɛ̨cꞌyɛ̨ihʉ ꞌbʉ bá peng ra Jesucristo, nɛ da numanhojʉ, nɛ di ꞌdajʉ ran ho, nɛ ꞌdarbʉ dam ꞌbʉhmbʉ bʉya.
\v 8 Nɛ nuya madagueꞌbʉ hinga nán nuhʉ ra Cristo, pɛ ɛ̨mmɛ guín numanhohʉ a. Nɛ madagueꞌbʉ hin guín nuhʉ a ya, pɛ guí pąhmbʉ majuąni a. Janangueꞌa ɛ̨mmɛ dadí johyahʉ, tengu thoꞌbʉ ya dí ꞌbʉhmbʉ ra Cristo bʉ mahɛ̨tsꞌi. Nɛ hin di jua ʉ mam hmansɛhʉ gam mamhbʉ a ran johya.
\v 9 Nguetho ya dí dʉꞌmi dí hąmhbʉ a dí tømhbʉ, ngue da yąnjʉ Oją.
\v 10 Guehna bi ꞌyoꞌtꞌʉ yʉ pøngahyą mayaꞌbʉ ngue da yąnjʉ rá mate Oją. Nɛ bi hyądumbʉi min nde xtám bądi xʉn ho ꞌbɛꞌa nam bøn a ram hma bi ꞌyoꞌtꞌʉ.
\v 11 Min nde xtám bądi jąmꞌbʉ din ja a, nɛ ndaꞌa ní pa din ja a bi man rá Hogandąhi ra Cristo mi o yʉ́ mbʉi. Nguetho bi bɛ̨nbi da ꞌyoꞌtꞌi ꞌbɛꞌa da ꞌyøtꞌ ra Cristo ꞌbʉ bi zøhø, ngue da nu ran ʉnbi ngue da tho, nɛ da tꞌɛ̨spa ꞌbʉ mꞌbɛjua.
\v 12 Pɛ bi xi Oją ʉ yʉ pøngahyą ngue hin da bąsɛ, xinga gueꞌʉ yʉ jąꞌi mi ꞌbʉhmbʉ, pɛgue gueꞌa go i sijʉ a ya nangue ran ho maꞌdaꞌyo. Nɛ nuꞌʉ to bi xijʉ na, bi ma nangue rá Hogandąhi bá pɛnpa Oją. Nɛꞌʉ yʉ́m ꞌbɛhni Oją mahɛ̨tsꞌi ɛ̨mmɛ in nde da bądi ꞌbɛꞌa nam bøn a i sijʉ ya.
\s I xijʉ Oją ngue xtán hojʉ
\p
\v 13 Pɛ nuya dan sähʉ ga øthʉ a rán thɛhʉ a dí tɛnhdʉ, ngue ga sąmzɛhɛ ma mbʉihʉ ꞌbɛꞌa gätho dím bɛ̨mhbʉ. Nɛ høntꞌa rá mate Oją ga tømhbʉ di ꞌdajʉ ꞌbʉ bá ɛ̨h ra Cristo.
\v 14 Nɛ ga øthʉ ꞌbɛꞌa i xijʉ Oją, tengu yʉ tꞌʉhni i øtꞌa i xih yʉ́ ta. Nɛ hin ga øthʉ tengu mi øthʉ mamꞌbɛtꞌo ngue ma pähä zɛhɛhʉ ꞌbʉ nte mi pąhmbʉ. 
\v 15 Pɛ gä xtán hotho ga øthʉ, nguetho xʉn hotho Oją ngue bi zoncahʉ bi ꞌyøtꞌe yʉ́ tꞌʉhni gahʉ a.
\v 16 Tengu ntꞌoꞌtꞌi: “Xtán hotho ahʉ nguetho xʉn hotho gä,” bi ꞌyɛ̨n Oją.
\v 17 Pɛ nuꞌbʉ dí yąhʉ Oją, dí ɛ̨mfʉ ma Tahʉ. Pɛ gam bɛ̨mhbʉ njuąntho da gurcahʉ ꞌbɛꞌa dá øthʉ nꞌda ngu nꞌdajʉ. Janangueꞌa dam fähmbʉ ngue gan numansuhʉ Oją gätho yʉ pa dí ꞌbʉhmbʉ ua ja ra ximhäi.
\v 18 Nguetho dí pąhmbʉ bi yąnjʉ Oją nangue yʉn tꞌøtꞌe bi xänga ma tahʉ säti thoho. Pɛ hing ra mbɛti í yąnjʉ a, nuꞌa dim ꞌbɛꞌa.
\v 19 Pɛ bi yąnjʉ ra Cristo ꞌbʉ mi du ngue bi mbän rá ji, nɛ høntꞌa da zä di pø a nꞌda a. Nguetho xʉn hotho ra Cristo, tengu nꞌda ra dɛꞌyo mi man Oją mayaꞌbʉ ngue da ꞌbøtsꞌe, pɛ gueꞌa hing ra mbɛdi nɛ xʉn hotho.
\v 20 Nu ra Cristo bi tsꞌänni din yąnte ꞌbʉ hin ní ꞌyøtꞌ ra ximhäi a Oją. Nɛ ran zɛgui ya ja bi nɛqui ua ja ra ximhäi nanguejʉ.
\v 21 Nɛ nangue ra Cristo bi zøcua, gueꞌa dá ɛ̨cꞌyɛ̨ihʉ Oją ya, ngue bi xox a ra Cristo ꞌbʉ mi du, nɛ bi ꞌyɛ̨spi. Janangueꞌa dí pąhmbʉ majuąni di ꞌdajʉ rán ho Oją dí tømhbʉ ya.
\v 22 Nuya nangue rá Hogandąhi Oją dá tɛnhdʉ ram hma majuąni, nɛ gueꞌa dán hojʉ a. Nɛ gueꞌa dán zä ya majuąni ga huɛ̨c ma cuhʉ. Janangueꞌa mpähä thoho dan huɛ̨jʉ nꞌda ngu nꞌdajʉ nangue gätho ma mbʉihʉ.
\v 23 Nguetho dám ꞌbʉhmbʉ maꞌdaꞌyo nangue rám hman Oją da hyätꞌi maząi a, nɛ njąmꞌbʉ di ꞌbɛh rá tsꞌɛdi a. Pɛ nu ma tehʉ bi ꞌdac ma tahʉ nɛ ma mbehʉ, hinga gueꞌa da hyätꞌi maząi a.
\v 24 Nɛ ntꞌoꞌtꞌi:
\q Tengu yʉ paxi thoho yʉ jąꞌi,
\q nɛ gätho xʉn ho ꞌbɛꞌa pɛꞌtsꞌi tengu yʉ́ døni ʉ yʉ paxi.
\q Pɛ nu yʉ paxi di hmangui, nɛ yʉ́ døni i høe.
\q 
\v 25 Pɛ nuꞌa rám hman a ra Hmu njąmꞌbʉ dim ꞌbɛh rá tsꞌɛdi. 
\m Gueꞌa ran ho maꞌdaꞌyo i sijʉ a.
\c 2
\s Nuꞌa ra Cristo tengu nꞌda ra do
\p
\v 1 Jatho ga ɛshʉ gätho ran ʉcpate nɛ ra fɛhni nɛꞌbʉ yoho ma mbʉihʉ, nɛ ga ɛshʉ ran tsꞌɛya nɛ ran cꞌąte.
\v 2 Nɛ tengu yʉ ꞌuɛre ngue maꞌdaꞌyo bim ꞌbʉi, ngue ɛ̨mmɛ i hon ra xiꞌba da zi, nɛ ngutho ga øthʉ, thocpa thoho ga homhbʉ rá hogamhma Oją, ngue dín te xʉn ho ma mbʉihʉ a.
\v 3 Nguetho ya dá tįmhbʉ a rá mate Oją nangue rám hma, nɛ dá pąhmbʉ ngue xʉn ho a.
\v 4 Nɛ manꞌda gam bɛ̨mhbʉ ga cuathʉ ra Cristo xʉn ho, nuꞌa bi ꞌdajʉ ra te. Madagueꞌbʉ i pa ma ʉcpi, tenguꞌbʉ nꞌda ra gądo di bʉntꞌa nꞌda ra do, pɛ Oją bi huahni manꞌda di muui bʉ da thøh rá ngu.
\v 5 Tenguꞌbʉ nꞌda ra do manꞌda di muui a ra Cristo bʉ ja ra ngu, nɛ nujʉ i pa ma cuati gahʉ bʉya, tenguꞌbʉ dyʉ dohʉ, da ꞌyøjʉ rá ngu Oją ngue hin di nɛqui. Nɛ yʉ́ mbäją gahʉ Oją, nguetho dí unhdʉ Oją yʉn tꞌunni gätho ma mbʉihʉ. Nɛ di thocpa a rá Ta man tꞌunnihʉ a ra Cristo, janangueꞌa da numanho Oją ʉ.
\v 6 Nɛ ntꞌoꞌtꞌi mayaꞌbʉ bʉ ja rám hman Oją nangue ꞌbɛꞌa da tꞌørpa ra Cristo. Bi ꞌyɛ̨n Oją:
\q Tenguꞌbʉ drá ngʉrpagądo dá huahna nꞌda ra do manꞌda di muui, nɛ dá høpʉ ja ma dongu bʉ Sión, nubʉ hapʉ ja ma tsꞌɛdi, bi ꞌyɛ̨n Oją.
\q Nɛ nuꞌa toꞌo da guatꞌa, hin da mbɛꞌtsꞌ rá sä ꞌbʉ bi nu ran juąnbi,
\m bi ꞌyɛ̨n Oją.
\v 7 Nɛjʉ xʉn ngu dadí muhʉ nguetho dí cuathʉ a ra Cristo. Pɛ madagueꞌbʉ hin da guatꞌʉ ꞌda, pɛ guextaꞌa din ja tengu bi man Oją, ngue bi ꞌyɛ̨na:
\q Madagueꞌbʉ him bi numanho ʉ ꞌda yʉ gądo a ra do,
\q pɛ da gopʉ ja ma dongu, ngue manꞌda di muui ꞌbʉ da thøh ma ngu,
\m bi ꞌyɛ̨n Oją.
\v 8 Nɛ manꞌda mi hma:
\q Nuꞌa ra Cristo tenguꞌbʉ nꞌda ra do ngue di ferpʉ rá gua nꞌda, nɛ dim ꞌbɛpʉ,
\m bi ꞌyɛ̨n ra tꞌohni. Nɛ bi tsꞌänbi dim ꞌbɛpʉ, nguetho hinguin nde da ꞌyɛ̨cꞌyɛ̨i ram hma nangue ra Cristo.
\s Yʉ́ tꞌʉhni gahʉ Oją
\p
\v 9 Pɛ nujʉ, Oją bi huancahʉ bi ꞌyørcahʉ tenguꞌbʉ nꞌdaꞌbʉi gahʉ, maꞌueque ma mbʉihʉ. Nɛ gätho gahʉ dyʉ mbäją gahʉ bi ꞌdac ma tsꞌɛdihʉ Oją, nɛ yʉ́ mbɛti gahʉ a. Nguetho in nde ga uhmbʉ ngue mixte xʉn ho Oją, ngue bá jʉgahʉ bʉ ja ra ꞌbɛxui mi ꞌbʉhmbʉ, nɛ bi zixcahʉ bʉ ja rán nɛqui mahotho ya.
\v 10 Nuꞌbʉ mámꞌbɛtꞌo mi ꞌbʉhmbʉ tenguꞌbʉ dyʉ hyoya tꞌʉhnihʉ, nɛ nuya dí ꞌbʉhmbʉ yʉ́ tꞌʉhni gahʉ Oją. Pɛ nu mámꞌbɛtꞌo him mi pąhmbʉ rá mate Oją, pɛ nuya dá hąmhbʉ rá mate Oją ya.
\s Ga humbi ga øthʉ ngue yʉ́ mbɛfi gahʉ Oją
\p
\v 11 Ma zi cu ahʉ, ɛ̨mmɛ dadí huɛ̨cꞌahʉ. Janangueꞌa ntsꞌɛdi dí xiꞌahʉ ga øthʉ tenguꞌbʉ hin dyʉ mɛnguhʉ ua ja ra ximhäi, hin ga øthʉ rá pähä ma nyon ꞌyomfɛ̨nihʉ ngue i ørcahʉ ran sʉi ma mbʉihʉ.
\v 12 Nɛ thocpa thoho dam fähmbʉ dan ꞌyomanhohʉ, nguetho in nujʉ ʉ hingui pą Oją. Nɛ madagueꞌbʉ i ɛ̨njʉ dyʉ tsꞌomꞌbäihʉ, pɛ xømhma thoho da zøn ra pa da ꞌyɛ̨spa Oją ꞌbʉ bi nu ran hocjąꞌi dí ørpahʉ. Nguetho da zä da xocpa yʉ́ mbʉi Oją ʉ.
\v 13 Nɛ ga øthʉ a im man a ra tsꞌʉtꞌabi ngue i ꞌbɛtꞌo ua ja ma häihʉ, janangueꞌa da hnumanho ma Hmuhʉ ra Cristo bʉya.
\v 14 Nɛꞌʉ miꞌda toꞌo gätho bi un yʉ́n tꞌɛ̨di ra tsꞌʉtꞌabi, gätho ga ɛ̨cꞌyɛ̨ihʉ ʉ. Nguetho i ja yʉ́ tsꞌɛdi di ʉnba ʉ toꞌo øtꞌ yʉ tsꞌoqui, nɛ da numanho ʉ toꞌo øtꞌ ran ho.
\v 15 Nguetho nɛꞌa Oją rá pähä a ꞌbʉ dí øthʉ a, nɛ gueꞌa dí ꞌyɛꞌtsꞌʉ yʉn cꞌąte im man ʉ yʉ ꞌyąmbʉi bʉya.
\v 16 Nuya hingui ørcahʉ ra tsꞌɛdi ga tɛnhdʉ yʉ́n tꞌɛ̨di Oją, nguetho in ndejʉ mpähä thoho ga tɛnhdʉ. Pɛ hin gam bɛ̨mhbʉ gueꞌa ní jajʉ ga øthʉ yʉ tsꞌoqui a, pɛ manꞌda ga øthʉ ngue yʉ́ mbɛfi gahʉ Oją.
\v 17 Nɛ gan numanhohʉ gätho yʉ jąꞌi, nɛ ga huɛ̨c ma miꞌyɛ̨cꞌyɛ̨i hʉ, nɛ gan numansuhʉ Oją, nɛ ga ɛ̨spahʉ ra tsꞌʉtꞌabi i ꞌbɛtꞌo ua ma häihʉ.
\s Ga øthʉ tengu bi ꞌyøt ra Cristo bin ʉnbi nanguejʉ
\p
\v 18 Gyʉ ꞌyɛ̨hɛ̨hʉ nɛ gyʉ mbɛfihʉ dami ꞌyɛ̨cꞌyɛ̨i ni hmuhʉ ꞌbʉ gadí zɛhmbʉ ʉ. Nɛꞌʉ yʉ hocjąꞌi nɛꞌʉ yʉ tsꞌomꞌbäi ꞌbʉ di ʉnꞌnahʉ, gätho guin numansuhʉ ʉ.
\v 19 Nguetho manꞌda da numanho ahʉ Oją ꞌbʉ gui hyäthʉ yʉn ʉnbi ꞌbʉ nte man tsꞌo gá ꞌyøthʉ, pɛ bi ʉnꞌnahʉ nangue guí tɛnhdʉ Oją.
\v 20 Pɛ nuꞌbʉ gan nuhʉ ran ʉnbi nangue ma tsꞌoquihʉ, nɛ ga häthʉ, pɛ hin gam bɛ̨mhbʉ ga tąhmbʉ nꞌda ran ho nangueꞌa. Høntho dá jut ma tsꞌoquihʉ. Pɛ nuꞌbʉ ga häthʉ ran ʉnbi nangue ran ho dí øthʉ, da numanhojʉ Oją.
\v 21 Oją bi zänni ga häthʉ yʉn ʉnbi tengu ra Cristo, bi nde bin ʉnbi nanguejʉ, nɛ bi ꞌyurcahʉ ꞌbɛꞌa ga øthʉ.
\v 22 Nguetho nu ra Cristo njąmꞌbʉ bi ꞌyøtꞌ yʉ tsꞌoqui, nɛ njąmꞌbʉ bi man yʉ fɛhni.
\v 23 Nɛ nuꞌbʉ mi tsꞌani, njąmꞌbʉ bi dądi. Nuꞌbʉ mi mba ma ʉcpi, him bi ma dí coꞌtsꞌi. Him bi zu da zan yʉ jąꞌi, nguetho bi bądi Oją da numanho a.
\v 24 Nu rá jąꞌi zɛhɛ ra Cristo bi nu ran ʉnbi nangue ma tsꞌoquihʉ ꞌbʉ mi ꞌdømpꞌʉ ja ra za. Nɛ gueꞌa í thøgahʉ ma tsꞌon ꞌyomfɛ̨nihʉ a, nguepʉ da zä ga øthʉ ran ho ya. Nu yʉn ʉnbi bi zä ꞌbʉ mi tho, gueꞌa í yąnjʉ a.
\v 25 Nujʉ dá ꞌbɛhmbʉ ra ꞌyu, tengu yʉ dɛꞌyo. Pɛ nuya bá penjʉ bʉ ꞌbʉh ma mbändɛꞌyohʉ, nuꞌa i färca ma mbʉihʉ.
\c 3
\s Ran zofo bi sih yʉ xisu nɛ yʉ́ ndø
\p
\v 1 Nuꞌahʉ gyʉ xisuhʉ, gui ꞌyɛ̨spa ni ndøsɛhʉ nꞌda ngu nꞌda ahʉ. Nɛ nuꞌbʉ ꞌda ni ndøhʉ hinguin nde da ꞌyɛ̨cꞌyɛ̨i rám hman Oją, pɛ nuꞌbʉ bi nu guí ꞌbʉmanhohʉ, xømhma thoho da zøni da ꞌyɛ̨cꞌyɛ̨i ʉ, nɛ hinga hnɛhi thoho ja a gui xihmbʉ ꞌbʉ hinguin nde da ꞌyøde. 
\v 2 Nguetho da nu ahʉ gadím fähmbʉ ngue guín numansuhʉ Oją, nɛ hin gui ꞌyomtꞌɛ̨nihʉ.
\v 3 Nɛ nuꞌbʉ guím bɛ̨ni gan hoczɛhɛhʉ, pɛ nangue ni mbʉihʉ. Nɛ hin guim bɛ̨mhbʉ nangue ꞌbɛꞌa gä i jaꞌahʉ thi ngue dí nɛcmanho ahʉ, ogue ni yąhʉ, ogue ni hehʉ gui hojʉ, ogue yʉ thebe, ogue yʉ tsꞌʉngu.
\v 4 Pɛ gan hoczɛhɛhʉ ngue ni mbʉihʉ, ngue di nɛcmanhotho bʉ dá nu Oją, ngue hin di nɛqui, nɛ nuꞌa njąmꞌbʉ dim ꞌbɛ a. Ngueꞌa hin gan ꞌyɛ̨zɛhɛhʉ, pɛ gan johyahʉ nangue Oją. Nɛ ɛ̨mmɛ xʉn ngu di muui bʉ nam bɛ̨n Oją a.
\v 5 Nɛ njabʉ mi øtꞌ yʉ xisu mi ꞌbʉh mayaꞌbʉ, ngue gueꞌʉ yʉ ꞌyɛ̨cꞌyɛ̨i mi numansu Oją, nuꞌʉ mi hoczɛhɛ yʉ́ mbʉi ngue mi numansu yʉ́ ndø.
\v 6 Tengu ra Sara bi ꞌyɛ̨cꞌyɛ̨i a rá ndø ngue ra Abraham, nɛ bi ꞌyɛ̨mbi rá hmu. Nuya tenguꞌbʉ yʉ́ tꞌįxu ahʉ ra Sara ꞌbʉ guí øthʉ ꞌbɛꞌa mi øtꞌe, ngue thocpa thoho gui ꞌyøthʉ ran ho nɛ nte gui suhʉ.
\v 7 Nɛ ngutho dí xiꞌahʉ, man ꞌyohʉ ahʉ, dam ꞌbʉmanhohʉ ma xisuhʉ nangue ran ꞌyomfɛ̨ni bi ꞌdajʉ Oją. Ga pąhmbʉ hinꞌyʉ yʉ́ tsꞌɛdi yʉ́ jąꞌi ʉ yʉ xisu, janangueꞌa ga fäxhʉ ʉ. Nɛ gan numansuhʉ ʉ, nguetho nꞌdatꞌa rá mate Oją i conhui rá xisu nꞌda ran ꞌyohʉ, ngue nꞌdatꞌa ra te maꞌdaꞌyo. Nɛ nuꞌbʉ hin dam ꞌbʉmanho ma xisuhʉ, hin da ꞌyømanho ma ndehʉ Oją ꞌbʉ.
\s Ga øthʉ a di bɛ̨nga ma mbʉihʉ Oją
\p
\v 8 Nɛ gätho gahʉ nꞌdatꞌa gam bɛ̨mhbʉ nꞌda ngu nꞌdajʉ, nɛ gam bɛ̨mhbʉ tenguꞌbʉ ꞌda dá sähʉ ꞌbɛꞌa i sä a nꞌda. Nɛ dan huɛ̨jʉ nꞌda ngu nꞌdajʉ, nɛ din ja ma yembʉihʉ, nɛ hin dan ꞌyɛ̨zɛhɛhʉ nꞌda ngu nꞌdajʉ.
\v 9 Nɛ hin ga cospahʉ ran tsꞌo ꞌbʉ ꞌbʉi to da ꞌyørcahʉ ran tsꞌo,  xín ga cospahʉ ran tsꞌante ꞌbʉ ꞌboꞌo da zanjʉ. Pɛ ga äfʉ ran jąpi tengu thoho i ørcahʉ Oją, bi zoncahʉ di ꞌdajʉ rán jąpi.
\v 10 Nguetho ntꞌoꞌtꞌi:
\q Høntꞌa go toꞌo in nde dim ꞌbʉmanho, nɛ da nu yʉ pa xʉn ho,
\q pɛ i jatho da ząm rá jąni nangue ran tsꞌo,
\q nɛ xín da man yʉ fɛhni.
\q 
\v 11 Nɛ da hyɛ a ran tsꞌo, da ꞌyøtꞌ ran ho.
\q Nɛ hin da nde dim ꞌbʉh yʉ́n sʉihʉ, pɛ ɛ̨mmɛ da hyoni ꞌbɛpʉ dí hocpa rá mbʉi rá mijąꞌiui.
\q 
\v 12 Nguetho nu ra Hmu in numanho ʉ to i øtꞌ ran ho,
\q nɛ i ømanho ꞌbʉ ja a äpi,
\q pɛgue da zʉ ʉ øtꞌ ran tsꞌo, 
\m bi ꞌyɛ̨n rá tꞌohni.
\v 13 Pɛ toꞌo maha di ʉngahʉ ꞌbʉ dan ɛ̨hya ga øthʉ ran ho.
\v 14 Pɛ madagueꞌbʉ ga sähʉ ran ʉ ꞌbʉ dí øthʉ ran ho, pɛ gueꞌa manꞌda ná tįmhbʉ rán ho Oją a. Janangueꞌa hin ga suhʉ ꞌbʉ in nde di pijʉ ʉ ꞌda, xín da du ma mbʉihʉ.
\v 15 Pɛ høntho gan numansuhʉ ra Cristo mbo ma mbʉihʉ, ngue ma Hmuhʉ a. Nɛ thocpa thoho dan sähʉ ga xihmbʉ ꞌbɛꞌa dí ɛ̨cꞌyɛ̨ihʉ ꞌbʉ ꞌboꞌo da ꞌyängahʉ. Pɛ jante thoho ga xihmbʉ nɛ gan numansuhʉ ʉ.
\v 16 Nɛ thocpa thoho ga øthʉ a di bɛ̨nga ma mbʉihʉ Oją. Janangueꞌa da mbɛꞌtsꞌ yʉ́ sä toꞌo di cꞌąmanꞌʉ ran ho dí øthʉ ꞌbʉ dí tɛnhdʉ ra Cristo.
\v 17 Nguetho manꞌda xʉn ho ꞌbʉ gueꞌa ran ho ná sähʉ ran ʉnbi, ꞌbʉ da nde Oją, xínda gueꞌbʉ ga sähʉ ran ʉnbi nangue ma tsꞌoqui zɛhɛhʉ.
\v 18 Nɛꞌa ra Cristo bin ʉnbi, nɛ njąmꞌbʉ bi ꞌyøtꞌ yʉ tsꞌoqui. Pɛ nꞌdandį thoho bi du nangue ma tsꞌoquihʉ, guejʉ dyʉ tsꞌomꞌbäihʉ, nguetho bi nde da zixcahʉ bʉ bí ꞌbʉ Oją. Nɛ majuąni bi tho rá ngøcꞌyɛ̨i, pɛ nu rá mbʉi guextaꞌa mi ꞌbʉi. 
\v 19 Nɛ nu rá mbʉi ra Cristo ꞌbʉ mi du, bi mba bi zop yʉ́ mbʉi ʉ xʉn du ngue ofädi.
\v 20 Ngue yʉ́ mbʉi yʉ jąꞌi nangue ʉ ngue him bi ꞌyɛ̨cꞌyɛ̨i Oją ꞌbʉ mayaꞌbʉ thoho. Pɛ Oją mi tøꞌmi xtá ꞌyɛ̨cꞌyɛ̨i gätho ní ꞌyøtꞌ ra barco ra Noé. Guepʉ bi zä bin yąn ʉ zi hyąto njąꞌi thoho, bi bong ꞌbʉ min ja ran tsꞌɛmbi, nangue ra dehe ra dąmbʉntꞌi.
\v 21 Nɛ nu ran xixyą nam bøni, nɛjʉ dám pomhbʉ ran tsꞌɛmbi nangue bi dąmbɛ̨ni ra Jesucristo. Nɛ nu ran xixyą hinguin nde da ma ngue i pa mꞌbeꞌtꞌe ma jąꞌihʉ ngue ra häi, pɛ nam bøni dí äfʉ Oją di hoga ma mbʉihʉ.
\v 22 Nɛ nuya, nu ra Jesucristo bi mba mahɛ̨tsꞌi, darbʉ di mandaui bʉ ja rá tsꞌɛdi Oją. Nɛ nuꞌʉ gätho yʉ tsꞌɛdi i ꞌbʉi i su a ra Cristo, nguetho høntꞌa i ja rá tsꞌɛdi xinda gueꞌʉ yʉ́m ꞌbɛhni Oją mahɛ̨tsꞌi nɛ yʉ zįthu.
\c 4
\s Dan darbahʉ rá mate Oją
\p
\v 1 Mꞌbɛtꞌo thoho dan sähʉ din ʉnba ma ngøcꞌyɛ̨ihʉ tengu ra Cristo, nɛ gueꞌa ní täc yʉ tsꞌoqui a. Nguetho nuꞌa to bin ʉnba rá ngøcꞌyɛ̨i, him man da nde yʉ tsꞌoqui a.
\v 2 Nɛ gätho miꞌda yʉ pa dí ꞌbʉhmbʉ ua ja ra ximhäi, hin dám ꞌbʉhmbʉ nangue ma pähä zɛhɛhʉ, pɛ dam ꞌbʉhmbʉ ga øthʉ rá pähä Oją.
\v 3 Dá xøtꞌa dá øthʉ rán tꞌøtꞌe ra ximhäi, midí hohʉ ran ꞌyomtꞌɛ̨ni, nɛ mi øtꞌ ma pähä zɛhɛhʉ, nɛ mi minhdʉ, nɛ madín sixhʉ bʉ ja yʉ calle nɛ mi mbahmbʉ bʉ, nɛ dám munshʉ bʉ dám minhdʉ, nɛ mi thąndehʉ yʉ pøte, pɛgue Oją him bi zänni ga thąndehʉ ʉ.
\v 4 Nɛ nuꞌʉ ꞌbʉcua ja ra ximhäi hingui sä da bądi hanja hin dí øthʉ ran tonto tengu i øtꞌʉ, janangueꞌa i sanjʉ ʉ ya.
\v 5 Pɛ Oją di ʉnba ʉ to i sanjʉ, nguetho di juąnba Oją ʉ ꞌbʉi nɛꞌʉ xʉn du.
\v 6 Nɛ nu yʉ jąꞌi xʉn du ya, bi sih ran ho maꞌdaꞌyo ꞌbʉ mi ꞌbʉi, ngueꞌa í zä bi un Oją ra te yʉ́ mbʉi ʉ, madagueꞌbʉ ya xʉn du yʉ́ ngøcꞌyɛ̨i. Nɛ gueꞌa rán säui nangue yʉ́ tsꞌoqui, nangue gätho yʉ jąꞌi i tu.
\v 7 Nuya bi zøn ra pa ran zɛgui. Janangueꞌa dan ꞌyomfɛ̨nihʉ xʉn ho, nɛ ga sąmzɛhɛ ma mbʉihʉ, ngue da zä thocpa thoho dan yąhʉ Oją bʉya.
\v 8 Nɛ mꞌbɛtꞌo thoho ga øthʉ ngue ɛ̨mmɛ dan huɛ̨jʉ nꞌda ngu  nꞌdajʉ. Nguetho nuꞌa toꞌo ja rán huɛ̨cate, di punba rá tsꞌoqui rá mijąꞌiui, madagueꞌbʉ xʉn ngu yʉ́ tsꞌoqui.
\v 9 Dan säyabahʉ nꞌda ngu nꞌdajʉ bʉ ja ma ngumhbʉ nangue ma pähä zɛhɛhʉ.
\v 10 Nɛ ꞌda dám fäxtahʉ nꞌda ngu nꞌdajʉ nangue rá ꞌbɛfi Oją ꞌdahma ꞌdanꞌyo bin ꞌdajʉ, gue dan darbahʉ a rá mate Oją ꞌdahma ꞌdanꞌyo ngue dá hąmhbʉ.
\v 11 Nɛ nu to bin tꞌun ra ꞌbɛfi da mampꞌa rám hman Oją, da ma tenguꞌbʉ da guesɛ Oją da ma. Nu to bin tꞌun ra ꞌbɛfi da mbäxꞌʉ miꞌda, da mbätsꞌi nangue ra tsꞌɛdi xʉn ho bi unꞌna Oją. Ngueꞌa da nde dí ꞌyɛ̨spa Oją a ꞌbɛꞌa gätho øtꞌe, nangue dí tɛnhdʉ ra Jesucristo, nuꞌa mixte thoho, nɛ i ja rá tsꞌɛdi gätho yʉ pa maząi.
\s Gan nuhʉ ran ʉnbi nangue dí tɛnhdʉ ra Cristo
\p
\v 12 Ma zi cuꞌahʉ, hin ga hyonya thohohʉ ꞌbʉ i tsꞌäjʉ yʉn ʉnbi ntsꞌɛdi, nɛ hin ga ɛ̨mhbʉ, hague in ja a ya.
\v 13 Pɛ dan johya thohohʉ, nguetho dí comhbʉ yʉ́n ʉnbi ra Cristo. Nɛ nuꞌbʉ bi nɛqui xʉn ho rá tsꞌɛdi, manꞌda xʉn ngu ran johya gan nuhʉ bʉya. 
\v 14 Nuꞌbʉ pa ma ʉgui gahʉ nangue dí tɛnhdʉ ra Cristo, pɛ mająpi gahʉ, nguetho mixte thoho rá tsꞌɛdi rá Hogandąhi Oją dín nuhʉ bʉya. Nɛ madagueꞌbʉ di ʉcpa ra Cristo ʉ ꞌda, pɛ nujʉ dí ɛ̨spahʉ a.
\v 15 Pɛ nuꞌbʉ gan hotehʉ nɛ gam pɛ̨hʉ, ogue nꞌda ran tsꞌo ga øthʉ, ogue sä dan thįnthʉ ꞌbɛꞌa øtꞌ ma mijąꞌihʉ, ga pɛꞌtsꞌ ma sähʉ ꞌbʉ, nɛ gan nuhʉ ran ʉnbi nangue a ra tsꞌoqui dá øthʉ.
\v 16 Pɛ nuꞌbʉ dín nuhʉ ran ʉnbi nangue dí tɛnhdʉ ra Cristo, hin ga pɛꞌtsꞌ ma sähʉ ꞌbʉ. Pɛ ga ɛ̨mfʉ jamadi Oją, ngue dí pąhmbʉ ngue dí tɛnhdʉ ra Cristo.
\v 17 Nguetho bi zøn ra pa ya di dʉꞌmi øtꞌ rán tsꞌɛmbi Oją. Pɛ rá mbʉdi thoho gahʉ i ørcahʉ ran tsꞌɛmbi, ngue yʉ́ tꞌʉhni gahʉ a. Pɛ tsꞌʉtho dín nuhʉ. Pɛ nuꞌʉ hingui ɛ̨cꞌyɛ̨i rám hman Oją, xʉn ngu ꞌbɛꞌa gä da nu ʉ ꞌbʉ bi zøn ra pa da ꞌyøtꞌe xʉn ho rán tsꞌɛmbi Oją.
\v 18 Nɛ ɛ̨mmɛ xʉn ngu yʉn ʉnbi gan nuhʉ bʉ dí pøjʉ Oją, ngue dyʉ ꞌyɛ̨cꞌyɛ̨ihʉ, nguetho jaꞌbʉ nꞌdandį hin dí øhmbʉ a i xijʉ. Nɛ ꞌbʉh miꞌda ꞌbe xíngui tsꞌʉ nde da ꞌyøde, nɛ i san Oją. Nɛ nuꞌʉ hin da zä dim pø ʉ.
\v 19 Janangueꞌa nuꞌbʉ dí sähʉ yʉn ʉnbi bi zängahʉ Oją, pɛ ga däh ma mbʉihʉ Oją di jamansujʉ. Nɛ njąmꞌbʉ da hyɛgahʉ, nguetho gueꞌa bi ꞌdajʉ ra te. Nɛ ga thoqui ga øthʉ ran ho.
\c 5
\s Di jamansu yʉ́ dɛꞌyo Oją ʉ yʉ ngʉrbi
\p
\v 1 Nuya nꞌda ram hma dí xiꞌahʉ, yʉ́ ngʉrbi ahʉ yʉ ꞌyɛ̨cꞌyɛ̨i. Nɛcä drá ngʉrbigä, dá nusɛ ra Cristo ꞌbʉ mi du, nɛcä ga comhbʉ ran jąpi din ꞌdajʉ mꞌbɛjua.
\v 2 Ma mi ngʉrbi ahʉ dyʉ mbändɛꞌyohʉ, dí xiꞌahʉ ya, jatho ga jamansuhʉ yʉ́ dɛꞌyo Oją, nguetho ꞌyo ma güɛndahʉ ga jamansuhʉ ʉ. Nɛ hin gam bɛ̨mhbʉ i tꞌørcahʉ tsꞌɛdi, pɛgue gam bɛ̨mhbʉ ma pähä zɛhɛhʉ ga øthʉ. Nɛ hin nangue a din jurgahʉ ngue dyʉ ngʉrbihʉ, pɛ nangue a dín numanho sɛhʉ a.
\v 3 Nɛ hin ga sʉthohʉ yʉ́ tꞌʉhni Oją hapʉ dí ꞌbʉhmbʉ nꞌda ngu nꞌdajʉ, pɛ janate tho ga uthʉ ra ꞌyu nangue man tꞌøtꞌe zɛhɛhʉ.
\v 4 Nɛ nuꞌbʉ bi nɛqui ma Hmuhʉ dyʉ́ mbändɛꞌyohʉ, di ꞌdajʉ ran jąpi ngue ga tąhmbʉ, ngue hin jąmꞌbʉ din thegue.
\v 5 Ngutho ahʉ man ꞌyohʉ ahʉ, dami ꞌyɛ̨cꞌyɛ̨ihʉ ꞌbɛꞌa im man yʉ dącꞌyɛ̨i ngue ni ngʉrbihʉ. Nɛ gätho ahʉ gan umhbʉ da si ahʉ nꞌda ngu nꞌda ahʉ. Nɛ njąmꞌbʉ gan ꞌyɛ̨zɛhɛhʉ, nguetho:
\q Da zʉ Oją a din ꞌyɛ̨tsꞌi,
\q pɛ di un rá mate a toꞌo hin din ꞌyɛ̨tsꞌi.
\m
\v 6 Janangueꞌa ga øthʉ ngue hinꞌyʉ ma tsꞌɛdi zɛhɛhʉ bʉ ja rá hmi Oją, gam bɛ̨mhbʉ høntꞌa ja rá tsꞌɛdi xínda guejʉ. Janangueꞌa da ꞌyɛ̨sca zɛhɛhʉ Oją ꞌbʉ bi zøn ra pa.
\v 7 Nɛ ga xihmbʉ Oją gätho ma dumbʉihʉ, nguetho di jamansujʉ a.
\v 8 Damín äthąhʉ xʉn ho, ngue damím fähmbʉ, nguetho nu man sʉihʉ ra zįthu i ꞌyo ua, tengu nꞌda ra zate i ꞌyo, in cuɛ, i honi toꞌo da za.
\v 9 Pɛ dami sʉhmbʉ a ra zįthu nangue rá tsꞌɛdi Oją guí ɛ̨cꞌyɛ̨ihʉ. Nɛ gam bɛ̨mhbʉ ngue nꞌdatꞌʉ yʉn ʉnbi dín nuhʉ ma miꞌyɛ̨cꞌyɛ̨ihʉ ngue gätho ra ximhäi.
\v 10 Pɛ nu Oją ɛ̨mmɛ xʉn ngu rá mate, bi zoncahʉ ga comhbʉ rá tsꞌɛdi mixte gätho yʉ pa maząi, nangue dí ꞌbʉhmbʉ ra Cristo. Pɛ mꞌbɛtꞌo thoho dan ʉnbahʉ tsꞌʉ, ngue di hoga ma mbʉihʉ Oją, nɛ di hąt ra tsꞌɛdi ma mbʉihʉ, nɛ di jajʉ dan ząmhbʉ xʉn ho bʉ.
\v 11 Nu Oją nte hɛ̨mbi, gätho da zä da ꞌyøtꞌe, gätho yʉ pa maząi. Nɛ gueꞌa gam bɛ̨mhbʉ a ya.
\s Rán zɛgui ran zɛngua
\p
\v 12 Dí pɛnhꞌnahʉ ra søcuą i ja ua, ngue da gąx a ra Silas, nuna nꞌda ma cuhʉ ngue da zä ga ɛ̨cꞌyɛ̨ihʉ a man a. Nuna ra søcuą ja ua, hingui ngu ꞌbɛꞌa ma, nꞌda ran zofo thoho, nɛ dí xiꞌahʉ majuąni rá mate Oją a guí tɛnhdʉ. Janangueꞌa damín ząmhbʉ bʉ.
\v 13 I pɛnhꞌnahʉ ran zɛngua ni cuhʉ i ꞌbʉcua Babilonia, nthahni nangue Oją, tengu ahʉ. Nɛhna ra Xuua Marcos di zɛngua ahʉ, tenguꞌbʉ ma tsꞌʉntꞌʉ na.
\v 14 Nɛ ząi gan zohmbʉ nꞌda ngu nꞌda ahʉ nangue ran huɛ̨cate. Nɛ dín nde da hyu ni mbʉihʉ nangue guí tɛnhdʉ ra Cristo. Nɛ gueꞌa gam bɛ̨mhbʉ a ya. Høntꞌa dí xiꞌahʉ ya.