\id 2PE
\h 2 PEDRO
\toc1 2 PEDRO
\mt1 2 PEDRO
\mt2 Ná yoho ra søcuą bi ꞌyoꞌtꞌa ra Pedro
\c 1
\s Ran zɛngua
\p
\v 1 Nugä dra Simón Pedrogä, rá ꞌyɛ̨hɛ̨gä ra Jesucristo, nɛ ma ꞌbäigäꞌbe a. Dí pɛnhꞌnahʉ ra søcuą ja ua, ngue gätho nꞌdatꞌa dí ɛ̨cꞌyɛ̨ihʉ a bi zängahʉ Oją. Nɛ ꞌda nan zimanhogdahʉ Oją, nguetho ꞌda í hoga thohohʉ ra Jesucristo, nuꞌa ma Ojąhʉ a nɛ mam pørpatehʉ a.
\v 2 Dí äp Oją manꞌda gui pąhmbʉ a, nɛ ma Hmuhʉ ra Jesús. Nɛ manꞌda gui hyąmhbʉ rá mate, nɛ manꞌda da hyu ni mbʉihʉ bʉya.
\s Nu Oją i ørcahʉ dan jahʉ tengu a 
\p
\v 3 Nu rá tsꞌɛdi Oją bi ꞌdajʉ ꞌbɛꞌa gätho ga homhbʉ ngue dam ꞌbʉhmbʉ ra ꞌdaꞌyomꞌbʉi, janangueꞌa bi zä bʉ dá tɛnhdʉ Oją. Nguetho dá pąhmbʉ a bi zoncahʉ ꞌdarbʉ dam ꞌbʉhmbʉ bʉ bí ja rá tsꞌɛdi mixte.
\v 4 Nɛ nangue rá tsꞌɛdi i ørcahʉ ran ho mixte thoho ngue mím ma, nguetho i ørcahʉ dan jahʉ tengu a, ngue in yąnjʉ bʉ ja rá tsꞌoꞌyu ra ximhäi i øtꞌ ran tsꞌiyate.
\v 5 Nɛ nuꞌbʉ dí pąhmbʉ in yąnjʉ Oją nangue ra tsꞌoꞌyu, ɛ̨mmɛ ga hądumbʉihʉ ga øthʉ ꞌbɛꞌa mangua ꞌbʉ. Ya dí ɛ̨cꞌyɛ̨ihʉ rá mate bi hogahʉ. Pɛ hinga høntꞌa, nuya ga øthʉ yʉ hogantꞌøtꞌe. Nɛ hinga høntꞌa ga øthʉ yʉ hogan tꞌøtꞌe, pɛ manꞌda ga homhbʉ dan xähmbʉ ga pąhmbʉ rá ꞌyu Oją.
\v 6 Nɛ hinga høntꞌa dan xähmbʉ rá ꞌyu Oją, pɛ manꞌda ga sąmzɛhɛ ma mbʉihʉ. Nɛ hinga høntꞌa ga sąmzɛhɛ ma mbʉihʉ, nɛ manꞌda ga sɛthʉ. Nɛ hinga høntꞌa ga sɛthʉ, nɛ manꞌda høntꞌa Oją gam bɛ̨mhbʉ.
\v 7 Nɛ hinga høntꞌa ga øthʉ ngue gam bɛ̨mhbʉ Oją, nɛ manꞌda ga fäx ma mi ꞌyɛ̨cꞌyɛ̨ihʉ. Nɛ hinga høntꞌa ga fäx ma mi ꞌyɛ̨cꞌyɛ̨ihʉ, nɛ manꞌda ga huɛ̨jʉ gätho yʉ jąꞌi.
\v 8 Nɛ nuꞌbʉ ɛ̨mmɛ ga humbi ga øthʉ ʉ im mangua, dyʉ hoga mbɛfi gahʉ a ma Hmuhʉ ꞌbʉ, nɛ da zä ga fäx ma mi jąꞌihʉ bʉya, nguetho dí pąh ma Hmuhʉ ra Jesucristo.
\v 9 Pɛ nuꞌbʉ hin ga øthʉ ʉ im mangua, hin dí cʉthʉ xʉn ho ran nɛqui ma mbʉihʉ ꞌbʉ. Nguetho dí pumbɛ̨ni thohʉ ngue mꞌbeꞌtꞌe ma mbʉihʉ nangue yʉ tsꞌoqui mi øthʉ.
\v 10 Pɛ ma zi cuꞌahʉ, ɛ̨mmɛ ga hądumbʉihʉ ga uhmbʉ ngue yʉ́ thahni gahʉ Oją, ngue bi zoncahʉ a. Nɛ nuꞌbʉ din jabʉ ga øthʉ, hin hapʉ ga tąnjʉ ꞌbʉ.
\v 11 Nɛ din johya Oją ꞌbʉ dá cʉthʉ bʉ di manda rá tsꞌɛdi maząi a ma Yąntehʉ ma Hmuhʉ ra Jesucristo bʉya.
\v 12 Janangueꞌa thocpa thoho dín nde ga bɛ̨nꞌnahʉ na mangua, madagueꞌbʉ guí pąhmahʉ a, nɛ guí ząnthʉ bʉ ja ram hma majuąni ngue bi si ahʉ.
\v 13 Pɛ manꞌda xʉn ho ꞌbʉ ga thoqui ga ꞌyomfɛ̨ni ahʉ, ngue gätho yʉ pa dí ꞌbʉcä ua gätho ma ngøcꞌyɛ̨i, ga ja ahʉ guim bɛ̨mhhʉ a dá xiꞌahʉ.
\v 14 Nguetho mitsꞌʉtho da zøn ra pa ngue ga soh ma ngøcꞌyɛ̨i, ngubʉ bi xicä ma Hmuhʉ ra Jesucristo.
\v 15 Janangue ɛ̨mmɛ dí humbi dí xiꞌahʉ, nꞌdamhma thocpa thoho guim bɛ̨mhbʉ a ꞌbʉ dá mbagä.
\s Dá nuhe rá tsꞌɛdi mixte ra Cristo ngue ma däsɛhe
\p
\v 16 Nugä xtá xiꞌahʉ nangue rá tsꞌɛdi ma Hmuhʉ ra Jesucristo, din ja ꞌbʉ bá ɛ̨cua mahønꞌa a. Hinga ngu miꞌda yʉ jąꞌi im bɛ̨nsɛ ꞌda yʉ cuento ngue ní hyätꞌa nꞌda. Pɛ nuꞌa dá nuhe, gueꞌa dím mamhbe a. Nɛ gueꞌa xtá xiꞌahʉ a, nguetho dá nusɛhe rá tsꞌɛdi mixte ra Cristo ngue ma däsɛhe.
\v 17 Gueꞌbʉ má øhmbe nꞌdandį rá nde Oją bí ꞌyɛ̨h mahɛ̨tsꞌi mixte thoho, nɛ gueꞌa í ꞌyɛ̨spa a rá Tsꞌʉntꞌʉ ꞌbʉ mi ꞌyɛ̨na: “Guehna ma Tsꞌʉntꞌʉgä na, ngue ɛ̨mmɛ dadí huɛ̨cä na, nɛ ní hyu ma mbʉi na,” bi ꞌyɛ̨n Oją. Nɛ bi japi ɛ̨mmɛ bi nɛcthoho.
\v 18 Nɛ majuąni dá øhmbe rá nde Oją bí ꞌyɛ̨h mahɛ̨tsꞌi, nguetho ꞌdarbʉ mi ꞌbʉhmbe ra Jesucristo bʉ ja ra tꞌøhø guepʉ bin yą.
\v 19 Janangueꞌa manꞌda da zä ga pąhmbʉ majuąni a mi hmam bʉ ja yʉ́ søcuą yʉ pøngahyą mayaꞌbʉ, ngue mi ma nangue ra Cristo ba ɛ̨hɛ̨, nɛ din ja rá tsꞌɛdi mixte. Nɛ nu ram hma man tꞌoꞌtꞌi, xʉn ho ꞌbʉ thocpa thoho ga honi ga pąhmbʉ, tenguꞌbʉ ra nyotꞌi di yotꞌua ja ra ꞌbɛxui, gueꞌbʉ go bi zøn ra pa ngue da mbʉdi gan nuhʉ yʉ hmɛpya ngue udi ya ba ɛ̨pʉ ra Hmu, ga pąhmbʉ xʉn ho ꞌbɛꞌa man tꞌoꞌtꞌi bʉya.
\v 20 Nɛ mꞌbɛtꞌo thoho ga pąhmbʉ ngue xínga nꞌda ra jąꞌi sä da bąsɛ nꞌda rá tꞌohni Oją ꞌbʉ hin nangue a rá Hogandąhi di zɛdi.
\v 21 Nguetho nuꞌʉ yʉ́ pøngahyą Oją maꞌueque yʉ́ mbʉi, him bi bɛ̨nsɛ a ram hma bi ꞌyoꞌtꞌʉ, pɛ guesɛ a rá Hogandąhi Oją bi bɛ̨nbi ꞌbɛꞌa bi ꞌyoꞌtꞌ ꞌbʉ mi ꞌyoꞌtꞌ rám hman Oją ʉ.
\c 2
\s Dim ꞌbʉh yʉ hyäte xänbate 
\p
\v 1 Nɛ mi ꞌbʉhmbʉ ꞌda yʉ hyäte pøngahyą yʉ jąꞌi israel mayaꞌbʉ, ngutho ahʉ, gam ꞌbʉhmbʉ ꞌda yʉ hyäte xänbate. Nɛ yʉ ząndate tho, nguetho di cʉꞌtꞌ yʉ́m hmansɛ ꞌbʉ im man rám hman Oją. Nɛ nangue ʉ yʉ́m hma dím ꞌbɛꞌa nꞌda ʉ. Nɛ hingui ørpa rá pähä a ra Hmu ngue bi gurba yʉ́ tsꞌoqui. Janangue a ją xʉn dąmbɛ̨ni, ya xím ꞌbɛdi.
\v 2 Nɛ xʉn ngu da dɛnꞌna dí ꞌyøtꞌ yʉ́ pähäzɛhɛ ʉ yʉ hyäte xänbate. Janangue da mba nthenni thoho a ra ꞌyu majuąni. 
\v 3 Nɛ ɛ̨mmɛ da nde da hyä ahʉ nangue yʉm hma mahotho, nguetho da nde gui juthʉ ʉ. Pɛ ya mayaꞌbʉ thoho bi tsꞌänni da nu yʉn ʉnbi ʉ, tengu øtꞌʉ, nɛ guehma da nu nguetho hingui pa ma pumbɛ̨ni ꞌbɛꞌa da nu.
\v 4 Nguetho xínga gueꞌʉ yʉ́m ꞌbɛhni Oją mahɛ̨tsꞌi bi yąm ꞌbʉ mi ꞌyøtꞌ ra tsꞌoqui. Nɛꞌʉ bi hyøtpʉ ja ra ꞌbɛxui, bi dątꞌi con yʉ cadena, guepʉ bi gotꞌʉ, da dømpꞌʉ ran juąnbi.
\v 5 Nɛ xím bi yąn yʉ jąꞌi ꞌbʉ mayaꞌbʉ a Oją, hinda høntꞌa ra Noé, ngue bi ꞌyɛ̨cꞌyɛ̨i Oją, nɛ bi xih yʉ jąꞌi xtá ꞌyøtꞌ ran ho. Nɛ høntꞌʉ yotonjąꞌi min ꞌyohʉ ra Noé bi yąn Oją ꞌbʉ mam bá pɛnh ra ꞌye, bin ja ra dąmbʉntꞌi gätho ra ximhäi nangue ʉ yʉ tsꞌomꞌbäi mi ꞌbʉi.
\v 6 Ximangutho a ra hnini Sodoma nɛ Gomorra, bi nu ran tsꞌɛmbi nɛ bi gohi bim ꞌbospi ʉ. Janangueꞌa nu Oją i urcahʉ ꞌbɛꞌa din jap ʉ yʉ jąꞌi hinguin nde da dɛn Oją.
\v 7 Pɛ bi yąn a ra Lot ra hocjąꞌi a. Nɛ nuꞌa ɛ̨mmɛ madin xømbʉi nangue ʉ yʉ́n tꞌøtꞌe ʉ mi sänzɛhɛ ꞌbɛꞌa mi øtꞌe.
\v 8 Nɛ ɛ̨mmɛ madi ʉnba rá mbʉi a ra hocjąꞌi, nguetho nꞌdapa ngu nꞌdapa min nu yʉ́n tꞌøtꞌe xʉn tsꞌo nɛ mi øh yʉ́ tsꞌore ꞌbʉ ꞌdarbʉ mi ꞌbʉhmbʉ bʉ ra hnini Sodoma.
\v 9 Janangueꞌa dí pąhmbʉ ja rá tsꞌɛdi Oją i färpa yʉ́ mbʉi ʉ toꞌo mbɛ̨n Oją, hin da ꞌyøtꞌe tengu øtꞌ yʉ tsꞌomꞌbäi ꞌbʉ ꞌdarbʉ i ꞌbʉhmbʉ. Nɛ i ja rá tsꞌɛdi Oją da gorbʉ ja ran ʉnbi ʉ yʉ tsꞌomꞌbäi, nɛ ya in nu ya gätho yʉ pa tømpꞌʉ ran juąnbi ʉ.
\v 10 Nɛ nuꞌʉ ꞌda i ørpa yʉ́ pähä yʉ́ ngøcꞌyɛ̨i, manꞌda da nu ran ʉnbi ʉ. Pɛ di tsꞌon yʉ́ mbʉi ngue i øzɛhɛ yʉ́ pähä zɛhɛ, nɛ i san ma Hmuhʉ ra Cristo. Nuꞌʉ yʉ zambʉi ʉ, nɛ yʉn ꞌyɛ̨tsꞌi ʉ, i thenda ʉ toꞌo ja yʉ́n tꞌɛ̨di, nɛ hingui su.
\v 11 Pɛ nu yʉ́m ꞌbɛhni Oją mahɛ̨tsꞌi manꞌda i ja yʉ́ tsꞌɛdi nɛ yʉ́n tꞌɛ̨di xinda gueꞌʉ yʉn ꞌyohʉ i sante, pɛ i su di cospa ran tsꞌante ʉ go i sante, nguepʉ ja rá hmi Oją.
\v 12 Tengu yʉ  zuꞌuɛ̨ i ꞌbʉcua ja ra ximhäi, i tsꞌänba ʉ ngue da fɛntꞌi nɛ ma zä dim ꞌbɛdi, nɛ ngutho ʉ yʉ hyäte xänbate. Nɛ i sani ꞌbɛꞌa hingui pądi. Nɛ nuꞌbʉ bi du, høntꞌa ran ʉnbi maząi da nu.
\v 13 I øtꞌ ran tsꞌo, pɛ høntꞌa ran ʉnbi da dąhą. Nɛ im bɛ̨ni ngue ran johya ꞌbʉ di thocꞌa ní ꞌyøtꞌ yʉ́ pähä zɛhɛ gä ra pa. Nɛ nuꞌʉ tengu yʉn tsꞌoni nɛ yʉ mbɛdi bʉ guidím pɛtihʉ, nguetho di johya i øtꞌ yʉ́ pähäzɛhɛ ꞌbʉ guí sihmɛhʉ ʉ.
\v 14 Nɛ høntꞌa ran ꞌyomtꞌɛ̨ni im bɛ̨m ꞌbʉ i hand yʉ xisu, nɛ njąmꞌbʉ sä da ꞌyɛꞌtsꞌ yʉ́ tsꞌoqui. I hätꞌʉ ꞌda hinga na ɛ̨cꞌyɛ̨i xʉn ho, nguetho nuꞌʉ thocpa thoho yʉ ziyate. Pɛ Oją di ʉnba ʉ.
\v 15 Nguetho bi zoh ra ꞌyu xʉn juąni, bi mbasɛ bʉ maꞌueni. Nɛ i tɛn ra ꞌyu mi tɛn ra pøngahyą Balaam, rá tsꞌʉntꞌʉ a ra Beor, nuꞌa ɛ̨mmɛ madí ho din juꞌtꞌi nangue yʉ tsꞌoqui mi øtꞌe.
\v 16 Pɛ bi hɛcpa Oją ꞌbʉ nꞌdandį, ngue bi japi bin yą rá fani hingui sä din yą. Pɛ bin yą rá fani ngue bi hɛcpa a ra pøngahyą, ngue hin da ꞌyøtꞌa ra tsꞌoqui mi ɛ̨na xtá ꞌyøtꞌe.
\v 17 Pɛ nuya yʉ hyäte ya, tengu nꞌda ra hyądo ɛ̨na i po bʉ ra dehe, pɛ nte po bʉ. Nɛ tengu yʉ güi i tuxta ran dąhi, sä ɛ̨na din ꞌye. Nɛ ntsꞌänni ra ꞌbɛxui manꞌda xʉm pothi da nu ʉ, tengu ʉ, gätho yʉ pa maząi.
\v 18 Nguetho ɛ̨mmɛ xʉ ngu ꞌbɛꞌa ma, pɛ hinꞌyʉ ꞌbɛꞌa nam bøni. Nɛ i hät yʉ jąꞌi mi ɛ̨na xtá ꞌuepʉ ja ra tsꞌoꞌyu. Nɛ xø i xifi dá ꞌyøthʉ yʉ tsꞌoqui, nɛ ɛ̨mmɛ da ꞌyørpa yʉ́ pähä yʉ́ ngøcꞌyɛ̨i, nɛ im bɛ̨ni nte din japi.
\v 19 Nɛ i xifi, mathøgue thoho ahʉ, njon da ząmp ahʉ ꞌbʉ gui tɛngahe, sä ɛ̨na. Pɛ i fɛhni ʉ, nguetho guesɛ ʉ i sąm ra zįthu ʉ. Nguetho nuꞌbʉ bi dąp ra tsꞌoqui nꞌda ra jąꞌi, ya rá ꞌyɛ̨hɛ̨ ra zįthu a bʉya, nɛ hingui sä da mba mathøgue nangue yʉ́ tsꞌoqui.
\v 20 Nguetho nuꞌbʉ nꞌda ra jąꞌi bin yąni nangue rá tsꞌoꞌyu ra ximhäi, nangue bin xäh rám hma ma Hmuhʉ mam pøtehʉ ra Jesucristo, pɛ nuꞌbʉ da mbengui mahønꞌa, hingui sä da bøm bʉ ja yʉ tsꞌoqui mahønꞌa a. Nɛ nubʉya manꞌda xʉn tsꞌo da ꞌyøtꞌe xinda gueꞌa mi øtꞌ ꞌbʉ him mi pąh ra Cristo.
\v 21 Janangueꞌa nuꞌʉ to bi mbenc ꞌbʉ ya mi dʉꞌmi da bąꞌa ra hogaꞌyu, manꞌda xʉn ho ꞌbʉ hin xtí dʉꞌmi, nguetho bi hyɛtho rá hogantꞌɛ̨di Oją ꞌbʉ mi sänbi.
\v 22 Nɛ bi ꞌyøtꞌe tengu man tꞌoꞌtꞌi: “Tenguꞌbʉ nꞌda ra foꞌyo bi zi mahønꞌa yʉ́ tsꞌodi xí zani. Nɛ tenguꞌbʉ nꞌda ra tsꞌʉdi bi ꞌyo mahønꞌa ra bøhäi ꞌbʉ xín hi.”
\c 3
\s Ra Cristo bi ma majuąni ba ɛ̨h mahønꞌa
\p
\v 1 Ná yoho na ra søcuą dí otꞌahʉ ya, ma zi cuꞌahʉ. Nɛ nu gätho yoho yʉ søcuą nꞌdatꞌa dím bɛ̨ni manꞌda ga bɛ̨nꞌna ni hogan ꞌyomfɛ̨nihʉ.
\v 2 Nꞌdamhma guim bɛ̨mhbʉ ʉ yʉm hma mi ma mamꞌbɛtꞌo ʉ yʉ́ pøngahyą Oją. Nɛ guim bɛ̨mhbʉ mam hmamhbe dá xiꞌahe, ma ꞌbäi gähe ma Hmuhʉ ra Jesucristo, nɛ ma pørpatehʉ a.
\v 3 Mꞌbɛtꞌo thoho ga pąhmbʉ ꞌbɛꞌa din ja ꞌbʉ rán zɛgui yʉ pa. Di nɛqui ꞌda yʉ ꞌyʉspate da denthoho ra ꞌyu majuąni, gueꞌʉ ząi øtꞌ yʉ́ pähä zɛhɛ.
\v 4 Nɛ da ꞌyɛ̨na: “Hapʉ gán yąhʉ ngue bi xiꞌahʉ ra Jesucristo ba ɛ̨h mahønꞌa, nɛ hin jąmꞌbʉ i sä ba ɛ̨hɛ̨. Nɛ gueꞌbʉ go mi ꞌbʉ ʉ ndu ma ngʉrba bøtahʉ mayaꞌbʉ thoho, guextaꞌa i ja, gueꞌbʉ go rá mbʉdi ra ximhäi,” da ꞌyɛ̨na.
\v 5 Pɛ nuꞌʉ ꞌda i ɛ̨na, i ɛ̨na nguetho di pumbɛ̨ni tho ꞌbɛꞌa bin ja mayaꞌbʉ, nɛ hinguin nde da bądi, ngue bi juah ra ximhäi Oją nangue ra dąmbʉntꞌi. Nguetho xí ꞌyøtꞌ Oją mahɛ̨tsꞌi nɛ ra ximhäi nangue rám hma. Nɛ bi japi bi bøx pʉ ja ra dehe a ra häi, nɛ gueꞌa ra dehe ín ꞌyøtꞌ ra häi.
\v 6 Pɛ guetꞌa ra dehe bi juah ra ximhäi mi ja, ngue bi mbʉntꞌi.
\v 7 Nɛ nuya mahɛ̨tsꞌi nɛ ra ximhäi ngue i ja ya, Oją i sänni di juadi mahønꞌa. Pɛ i tøꞌmi da zøn ra pa ngue bi ma ba pɛnh ra sibi ua ja ra häi, gueꞌa ran ʉnbi da ꞌyøtꞌa Oją a nangue yʉ tsꞌomꞌbäi.
\v 8 Ma zi cuꞌahʉ, hin ga pumbɛ̨ni thohʉ ngue nuꞌa dí ɛ̨mfʉ nꞌda mahuąhi njɛya, da zä da ꞌyɛ̨n Oją nꞌdapa tho bʉ nam bɛ̨n a, nɛ nuꞌa dí ɛ̨mfʉ nꞌdapa thoho, da zä da ꞌyɛ̨n Oją nꞌda mahuąhi njɛya bʉ nam bɛ̨n a.
\v 9 Nɛ hingui dąnhyɛ̨i Oją tengu im man i ꞌda, guemhma da ꞌyøtꞌe ꞌbɛꞌa bi ma da ꞌyøtꞌe. Pɛ i tøgbahʉ Oją da zøni ga coh ma mbʉihʉ, nguetho in nde xínga nꞌda dam ꞌbɛhmbʉ.
\v 10 Pɛ nuꞌbʉ bá ɛ̨h ra Hmu, tenguꞌbʉ ba ɛ̨ꞌa nꞌda ra bɛ̨ ꞌbʉ bin xui, hinga mfądi ꞌbɛꞌa ma ora da zøhø. Nɛ di juadi gätho ʉ di nɛqui mahɛ̨tsꞌi, ɛ̨mmɛ din thoni ndøspi, nɛ gätho ꞌbɛꞌa i ja da mbʉntꞌi ngue nám pa. Nɛ gätho ra häi, nɛ gätho ꞌbɛꞌa bi ꞌyøtꞌ yʉ jąꞌi ua ja ra häi, gätho din zø ʉ.
\v 11 Janangueꞌa nte man tsꞌo da bɛ̨n ma mbʉihʉ, nɛ thocpa thoho gan numansuhʉ Oją, nguetho dí pąhmbʉ da mbʉntꞌ ra ximhäi ra sibi.
\v 12 Nɛ nuya dín dømdahʉ da zøn ra pa bi man Oją, ngue da ꞌyuh mahɛ̨tsꞌi, nɛ dim ꞌbɛdi gätho jabʉ. Nɛ din hyɛgui ꞌbɛꞌa gätho i ja nangue ra sibi. Nɛ dí xønhdʉ din ja nꞌdihi a.
\v 13 Nguetho dí tømdahʉ maꞌdaꞌyo mahɛ̨tsꞌi nɛ ra ximhäi, tengu bi ma majuąni Oją, ngue din ząm bʉ ran ho.
\v 14 Janangueꞌa, ma zi cuꞌahʉ, nuꞌbʉ dí tømhbʉ ngue din ja, ga humbi gan nde da numanhojʉ ra Cristo ꞌbʉ bá ɛ̨hɛ̨ da ꞌyøtꞌ ran tsꞌʉtꞌabi. Nɛ nte man tsꞌoni, nɛ nte man dupate da dįngahʉ ꞌbʉ bá ɛ̨h pʉya.
\v 15 Nɛ gam bɛ̨mhbʉ ngue i sɛt rá mbʉi Oją, i tøꞌmi dim pøꞌʉ ꞌbʉcua ja ra ximhäi. Tengu thoho bi ꞌyotꞌahʉ ma zi cuhʉ ra Pablo nangue rán ꞌyomfɛ̨ni bi un Oją.
\v 16 Nɛ mbɛ gätho yʉ́ søcuą bi ꞌyoꞌtꞌi im ma tengu dí otꞌahʉ ya. Pɛ xʉn hɛ̨i da fądi ꞌbɛꞌa nam bønꞌi ꞌda yʉm hma bi ꞌyoꞌtꞌa ra Pablo. Nɛ ꞌbʉꞌi ꞌda him bin xädi nɛ him bin ząm bʉ ja ram hma. Janangueꞌa nuꞌbʉ sä im manꞌa rá tꞌohni ra Pablo, ogue miꞌda yʉ́ tꞌohni Oją, pɛ hinga gueꞌa bʉ na hma. Nɛ gueꞌa ím ꞌbɛꞌi ꞌda a.
\v 17 Pɛ nuꞌahʉ guí pąhmbʉ ngue ngubʉ da ꞌyøtꞌi ꞌda yʉ jąꞌi. Janangueꞌa gam fähmbʉ hin da zixꞌahʉ bʉ rá ꞌyu Oją gmí ząmhbʉ, guepʉ i yą ʉ yʉ jąꞌi i honsɛ yʉ́m hmansɛ.
\v 18 Pɛ manꞌda damí pąhmbʉ rá mate ma Hmuhʉ ra Jesucristo, nɛ ma pørpatehʉ a. Nɛ nuꞌa ga ɛ̨spahʉ a ya, nɛ gätho yʉ pa maząi. Nɛ gueꞌa gam bɛ̨mhbʉ a ya. Høntꞌa dí xiꞌahʉ ya.