\id 1JN
\h 1 JUAN
\toc1 1 JUAN
\mt1 1 XUUA
\mt2 Ná nꞌda ra søcuą bi ꞌyoꞌtꞌa rá ꞌbäiui ra Jesucristo ra Xuua
\c 1
\s Ram Hma ngue di ꞌdajʉ ra ꞌdaꞌyote
\p
\v 1 Nuꞌa mí ꞌbʉ ꞌbʉ rá mbʉdi thoho, gueꞌa dá hɛ̨the ma dähe, nɛ dá øhmbe a bi ma, nɛ dá nuhe xʉn ho, nɛ dá thähmbe ma ꞌyɛ̨he. Nɛ gueꞌa ra Jesucristo a, rám Hma Oją ngue bi ma di ꞌdajʉ ra ꞌdaꞌyote.
\v 2 Nguetho nuꞌa di ꞌdajʉ ra ꞌdaꞌyote bin ꞌyusɛ gue bin jąꞌi, nɛ dá nuhe, janangueꞌa dí mamhbe majuąni a bin ja, nɛ dí xi ahʉ ya gue ząi xmí ꞌbʉi nɛ ząi dim ꞌbʉi. Mam bí ꞌbʉhmi rá Ta nguetho nꞌdatꞌ Oją a, nɛ bin ꞌyusɛ ua dí ꞌbʉhmbʉ.
\v 3 Nɛ nuꞌa dá nuhe nɛ dá øhmbe a bi ma, gueꞌa dí xi ahe a ya, nꞌdahma nɛꞌahʉ gui pąhmhʉ a, nɛ gätho dan yąmanhohʉ a ra Ta nɛ rá Tsꞌʉntꞌʉ ra Jesucristo.
\v 4 Guehna dí otꞌahʉ na ya, nꞌdamhma nɛꞌahʉ din ja ahʉ ran johya xʉn ho.
\s Nu Oją ran Nɛqui a
\p
\v 5 Nuꞌa Oją ran Nɛqui a, nde da ma xʉn hotho a, nɛ hinꞌyʉ ra ꞌbɛxui nangueꞌa. Nɛ gueꞌa ram hma bi xije ra Jesucristo, nɛ gueꞌa dí xiꞌahʉ a ya.
\v 6 Sä dí ɛ̨mhbʉ dí yąmanhohʉ ra Jesús, pɛ nuꞌbʉ guextaꞌa dí ꞌyohʉ bʉ ja ra ꞌbɛxui, dí fɛhnihʉ ꞌbʉ, nguetho hín dí øthʉ a rán säui a majuąni.
\v 7 Pɛ nuꞌbʉ majuąni dí ꞌyohʉ bʉ ja ran nɛqui guepʉ ꞌbʉ Oją, hinꞌyʉ ꞌbɛꞌa ga ąhmbʉ bʉ, nɛ dí yąmanhohʉ a ꞌbʉ, nɛ nu rá ji ra Jesús rá Tsꞌʉntꞌʉ Oją, thocpa thoho i thugahʉ gätho ma tsꞌoquihʉ a.
\v 8 Pɛ nuꞌbʉ sä dí ɛ̨mhbʉ hinꞌyʉ gahʉ ra tsꞌoqui, dadín hyäzɛhɛhʉ ꞌbʉ, nguetho hin dá cʉꞌtꞌ ma mbʉihʉ a majuąni.
\v 9 Pɛ nuꞌbʉ ga mamhbʉ ma tsꞌoquihʉ, gue hingui ho dá øthʉ, da zä di pungahʉ Oją nangue ra Cristo bi gutꞌi, nɛ da mbercahʉ gätho ran tsꞌo, tengu mím ma.
\v 10 Pɛ nuꞌbʉ sä dí ɛ̨mhbʉ hin te dá øthʉ yʉ tsꞌoqui, dí nubɛthąnihʉ Oją ꞌbʉ, nguetho bi ꞌyɛ̨n Oją gätho bi ꞌyøtꞌ yʉ tsꞌoqui. Pɛ xíngui tsꞌʉ dí cʉꞌtꞌ ma mbʉihʉ rám hman a ꞌbʉ.
\c 2
\s Ma hocpatehʉ a ra Jesucristo
\p
\v 1 Ma zi tꞌʉhni ahʉ gue dyʉ ꞌyɛ̨cꞌyɛihʉ, dí otꞌahʉ ra søcuą i ja ua, dadí hɛcꞌahʉ hin gui ꞌyøthʉ yʉ tsꞌoqui. Pɛ nuꞌbʉ ga øthʉ nꞌda ra tsꞌoqui, gue him majuąni dí numanhohʉ, pɛ dí ꞌbähmbʉ ma Hocpatehʉ din hocpaui bʉ ꞌbʉh ra Ta, ra Jesucristo, ra Hocjąꞌi a.
\v 2 Nguetho guesɛ a ran tꞌunni a di hoga ma tsꞌoquihʉ. Nɛ hinga høngdahʉ in nde di hogahʉ, pɛ gätho yʉ tsꞌoqui ja ua ja ra ximhäi in nde di hoqui nangue bi du ra Cristo.
\v 3 Nuꞌbʉ majuąni dí øthʉ ʉ yʉ́n tꞌɛ̨di Oją, da zä ga pąhmbʉ gue dí yąmanhohʉ a bʉya.
\v 4 Pɛ sä ɛ̨n i ꞌda: “Dí pącä Oją,” ɛ̨n ʉ, pɛ fɛhni ʉ nɛ hingui ørpa yʉ́n tꞌɛ̨di, nɛ hin di cʉꞌtꞌ rá mbʉi a majuąni.
\v 5 Pɛ nuꞌbʉ i øtꞌa man Oją nꞌda, hinga ndetho bi huɛ̨c Oją nꞌda ꞌbʉ, pɛ bi bømanho a bi ꞌyørpe. Ga xi ahʉ ya ꞌbɛpʉ dán zä ga pąhmbʉ ꞌbʉ majuąni dí ꞌbʉhmbʉ a ra Cristo.
\v 6 Nguetho nuꞌbʉ ɛ̨nꞌa nꞌda gue i ꞌbʉhmi ra Cristo, “jatho ga øtꞌä tengu bi ꞌyøtꞌ ra Cristo,” da ꞌyɛ̨nsɛ ꞌbʉ.
\v 7 Ma zi cu ahʉ, nu ran tꞌɛ̨di dí otꞌahʉ gue dan huɛ̨jʉ, him maꞌdaꞌyo a, pɛgue guetꞌa ram hma mbʉdi bi sijʉ mayaꞌbʉ, ꞌbʉ ra mbʉdi thoho dá pąhmbʉ ra Cristo.
\v 8 Pɛgue tengu ꞌbʉ maꞌdaꞌyo a, nguetho janaguehya dí øthʉ ya tengu bi ꞌyøtꞌ ra Cristo. Nguetho bi dʉꞌmi di ꞌuegahʉ ra ꞌbɛxui ma mbʉihʉ ra nyotꞌi majuąni.
\v 9 Nuꞌbʉ sä ɛ̨nꞌa nꞌda i ꞌbʉpʉ ja ran nɛqui, nɛ i san rá cu, pɛ guexta bʉ ja ra ꞌbɛxui i ꞌbʉ ꞌbʉ.
\v 10 Nɛ nuꞌa toꞌo di huɛ̨c rá cu, bin ząm bʉ ja ran nɛqui a, nɛ nuꞌa hin hapʉ da dąncꞌa.
\v 11 Pɛ nuꞌa toꞌo san rá cu, i ꞌbʉpʉ ja ra ꞌbɛxui a, nɛ i ząm bʉ. Hingui sä da bądi ndaꞌa xʉn ho, nguetho bi ꞌbɛrpa ran ꞌyomfɛ̨ni a ra ꞌbɛxui.
\v 12 Dí otꞌahʉ ma zi tꞌʉhni ahʉ, nguetho dí pądi xʉ punꞌna ni tsꞌoquihʉ, bi hocꞌahʉ ra Cristo.
\v 13 Nɛ nuya ꞌda ahʉ dyʉ dącꞌyɛihʉ, dí otꞌahʉ nguetho dí pądi guí pąhmbʉ a mí ꞌbʉi gueꞌbʉ rá mbʉdi thoho. Nɛ ꞌda ahʉ gyʉ tsꞌʉntꞌʉhʉ, dí otꞌahʉ nguetho dí pądi gá tąfʉ ra zįthu. Nɛ xø dí otꞌahʉ ya gätho ahʉ ma zi tꞌʉhni ahʉ, nguetho gätho gahʉ dá pąhmbʉ ra Ta.
\v 14 Nɛ xø dí otꞌahʉ, dyʉ dącꞌyɛihʉ, nguetho dí pądi gá pąhmbʉ a mí ꞌbʉi gueꞌbʉ rá mbʉdi thoho. Nɛ xø dí otꞌahʉ gyʉ tsꞌʉntꞌʉhʉ, nguetho dí pądi i ja ni tsꞌɛdihʉ gá tąfʉ ra zįthu, nangue rám hman Oją thocpa thoho guím bɛ̨mhbʉ.
\v 15 O guídí hohʉ rá pähä ra ximhäi, gue hin gui ꞌyøtꞌ ni pähä zɛhɛhʉ. Nguetho nuꞌbʉ dadí ho ma pähä zɛhɛhʉ, hin dadi hohʉ Oją ꞌbʉ.
\v 16 Nguetho nuꞌʉ yʉ́ pähä ra ximhäi, gätho him bi zän Oją ʉ, ꞌbɛꞌa gä di ho ní ngøcꞌyɛi nꞌda, nɛ ní dä nꞌda di ho ꞌbɛꞌa gätho in nu nde da mbɛzɛhɛ, nɛꞌbʉ im bɛ̨ni jasɛ rán ꞌyomfɛ̨ni nꞌda. Pɛ nuꞌʉ bi nɛquidą ua ja ra ximhäi ʉ tengu ʉ.
\v 17 Pɛ nu ra ximhäi ní mba bʉ da guadi, nɛꞌʉ yʉ́n ꞌyomfɛ̨ni ra ximhäi da guaꞌʉ. Pɛ nuꞌʉ ørpa rá pähä Oją, dim ꞌbʉmanho gätho yʉ pa maząi.
\s Ba ɛ̨h rán sʉiui ra Cristo
\p
\v 18 Ma zi tꞌʉhni ahʉ, rán zɛgui ya. Nɛ xtá øhmbʉ ngue di nɛqui nꞌda rán sʉiui ra Cristo. Nɛ nuya bi mbʉdi bi nɛqui xʉn ngu yʉ́ mfätsꞌihʉ a rán sʉiui ra Cristo. Janangueꞌa dí pąhmbʉ mbɛ rán zɛgui ya.
\v 19 Nɛ gueꞌʉ ꞌda xʉm bøngua dí ꞌbʉhmbʉ. Pɛ him majuąni ma miꞌyɛ̨cꞌyɛihʉ ʉ, nguetho nuꞌbʉ majuąni ma cuhʉ ʉ, hin xtá ꞌue ʉ ꞌbʉ. Pɛ bi bønꞌʉ janangueꞌa bi ꞌyusɛ gue him majuąni ma cuhʉ ʉ gätho ʉ bi bøni.
\v 20 Pɛ nu ahʉ bi ꞌdajʉ rá Hogandąhi Oją a ra Cristo. Janangueꞌa gätho gahʉ dí pąhmbʉ ndaꞌa majuąni.
\v 21 Dí otꞌahʉ na, pɛ hin dí ɛ̨nꞌi hin guí pąhmbʉ a majuąni. Pɛ guí pąhmbʉ a, nɛ guí pąhmbʉ hinguin ꞌyoui ra fɛhni a majuąni.
\v 22 Nuꞌa gue ɛ̨na hing ra Cristo a ra Jesús, ɛ gueꞌa ra ngʉrpa fɛhni a, nɛ rán sʉiui Oją a, nguetho i ɛ̨na hing rá Tsꞌʉntꞌʉ Oją a ra Jesucristo, nɛ xíngui ɛ̨cꞌyɛiba a rá Ta bʉya.
\v 23 Nguetho nuꞌa toꞌo hingui ɛ̨cꞌyɛi ra Cristo rá Tsꞌʉntꞌʉ Oją xínga gueꞌa Oją rá Ta i pądi. Pɛ nuꞌa toꞌo ɛ̨cꞌyɛi rá Tsꞌʉntꞌʉ nɛꞌa rá Ta i pąrpa a bʉya.
\v 24 Nɛ nuꞌa ꞌbɛꞌa gätho dá øhmbʉ ra mbʉdi dá pąhmbʉ ra Cristo, ga thoqui gam bɛ̨mhbʉ a. Nguetho nuꞌbʉ dí thoqui dím bɛ̨mhbʉ a, ząi dí ꞌbʉhmbʉ a ra Tsꞌʉntꞌʉ nɛꞌa rá Ta bʉya.
\v 25 Nɛ bi xijʉ majuąni di ꞌdajʉ ra ꞌdaꞌyote gue i ja ya nɛ njąmꞌbʉ da guadi.
\v 26 Guehna dí otꞌahʉ na, nguetho ꞌbʉ i ꞌda in nde da hyä ahʉ.
\v 27 Pɛ nu ahʉ, nuꞌa rá Hogandąhi bi ꞌdajʉ ra Jesucristo bin ząm bʉ ma mbʉihʉ a, nɛ guesɛ a i xängahʉ gätho ꞌbɛꞌa man Oją. Janangueꞌa him mahyoni toꞌo da xängahʉ yʉ́n thɛhʉ. Nɛ nuꞌa i xängahʉ rá Hogandąhi Oją majuąni a, hing ra fɛhni a. Nɛ di bɛ̨ngahʉ dan ząmhbʉ bʉ ꞌbʉh ra Cristo.
\v 28 Nɛ nuya ma zi tꞌʉhni ahʉ, damin ząmhbʉ bʉ ꞌbʉh ra Cristo, nꞌdamhma dan johyahʉ ꞌbʉ dá nuhʉ nɛ hin ga pɛsꞌ ma sähʉ.
\v 29 Nuꞌbʉ dí pąhmbʉ gue xʉn ho Oją, ngutho ga pąhmbʉ gue bim ꞌbʉi maꞌdaꞌyo nangue Oją ʉ toꞌo gätho i øtꞌ ran ho.
\c 3
\s Yʉ́ tꞌʉhnigahʉ Oją
\p
\v 1 Dyʉ́ ꞌyɛ̨cꞌyɛihʉ, gam bɛ̨mhbʉ gue ɛ̨mmɛ xʉn ngu rán huɛ̨cate ra Ta, ngue bi ꞌyøtꞌe ngue yʉ́ tꞌʉhnigahʉ a. Janangueꞌa hingui pąjʉ ʉ i tɛn ra ximhäi, nguetho njąmꞌbʉ mi pą Oją. 
\v 2 Ma zi tꞌʉhni ahʉ, nuya yʉ́ tꞌʉhnigahʉ Oją. Nɛ hinga na urcahʉ hague dán jahʉ mꞌbɛjua. Pɛ nuꞌbʉ bi nɛqui ꞌbɛꞌa da ꞌyørcahʉ, dí pąhmbʉ dan jahʉ tengu ra Cristo, nguetho da zä ga pąhmbʉ hague majuąni in ja a ra Cristo.
\v 3 Nɛ nꞌda ngu nꞌdajʉ ꞌbʉ dí tømhbʉ dan jahʉ tengu ra Cristo, janangueꞌa dadín hoc zɛhɛ ma mbʉihʉ, dín ndehʉ da gohi xʉn ho tengu ra Cristo.
\v 4 Nuꞌa toꞌo øtꞌ ra tsꞌoqui i fɛsthoho rán tꞌɛ̨di Oją, nguetho nuꞌa ra tsꞌoqui nam bøni ram fɛꞌtsꞌi nangue yʉn tꞌɛ̨di.
\v 5 Pɛ dí pąhmbʉ bi zøcua ra Cristo gue di ꞌbɛrca ma tsꞌoquihʉ. Nɛ nuꞌa ra Cristo hinꞌyʉ rá tsꞌoqui a.
\v 6 Nuꞌbʉ ząi ꞌbʉhmi ra Cristo nꞌda, hingui nde da ꞌyøtꞌ yʉ tsꞌoqui a. Pɛ nuꞌbʉ bin ząm bʉ ja yʉ tsꞌoqui nꞌda, njąmꞌbʉ bi cʉꞌtꞌ rá mbʉi hague in ja a ra Cristo, nɛ njąmꞌbʉ bi ndepe di hocpa rá mbʉi.
\v 7 Ma zi tꞌʉhni ahʉ, njon gui jafʉ da hyä ahʉ, nguetho høntꞌʉ gue ząi øtꞌ ran ho bi mba mahoqui ʉ nɛ xʉn ho ʉ tengu ra Cristo.
\v 8 Pɛ nuꞌa ząi øtꞌ ran tsꞌo, rá ꞌyɛ̨hɛ ra zįthu a. Nguetho nu ra zįthu ząi øtꞌ ra tsꞌoqui gueꞌbʉ go rá mbʉdi thoho. Nɛ gueꞌa í zøcua ja ra ximhäi rá Tsꞌʉntꞌʉ Oją, gue di tsꞌonba rá ꞌbɛfi ra zįthu.
\v 9 Nuꞌʉ toꞌo bim ꞌbʉi mahønꞌa nangue Oją, hingan ząi øt yʉ tsꞌoqui ʉ, nguetho í hyąxta Oją yʉ́ ta gue ra hogambʉi. Hingui sä din ząm bʉ ja yʉ tsꞌoqui nguetho bim ꞌbʉi mahønꞌa nangue Oją.
\v 10 Da zä ga pąhmbʉ ndaꞌʉ yʉ́ tꞌʉhni Oją nɛ ndaꞌʉ yʉ́ tꞌʉhni ra zįthu. Nguetho nuꞌʉ toꞌo bin ząm bʉ ja ra tsꞌoqui, nɛ hin di huɛ̨c yʉ́ cu, hing yʉ́ tꞌʉhni Oją ʉ.
\s Dan huɛ̨jʉ nꞌda ngu nꞌdajʉ
\p
\v 11 Nguetho guehna ran tꞌɛ̨di bi sijʉ ꞌbʉ rá mbʉdi dá pąhmbʉ ra Cristo, ngue dan huɛ̨jʉ nꞌda ngu nꞌdajʉ.
\v 12 Nɛ hin ga øthʉ a bi ꞌyøtꞌa ra Caín gue í hyąxta a rám ꞌbäi ra zįthu nɛ bi hyo rán ꞌyohʉ. Hanja ngue bi hyo a. Nguetho hingui ho rá mbʉi a, janangueꞌa bi hyo rán ꞌyohʉ ngue xʉn ho rá mbʉi a.
\v 13 Janangueꞌa, ma zi cu ahʉ, hin ga hyonya thohohʉ ngueꞌbʉ di ʉgahʉ yʉ jąꞌi i tɛn ra ximhäi.
\v 14 Pɛ nujʉ dí pąhmbʉ dá sohmbʉ rá tsꞌɛdi ran dąte, nɛ dá sømhbʉ bʉ ja rá tsꞌɛdi ra te. Guehna dí pąhmbʉ nguetho dadí huɛ̨c ma miꞌyɛ̨cꞌyɛihʉ. Nuꞌa toꞌo hinꞌyʉ rán huɛ̨cate, bin ząm bʉ ja rá tsꞌɛdi ran dąte a.
\v 15 Nuꞌa toꞌo di ʉp rá cu, ra hyodu a. Nɛ dí pąhmbʉ njoꞌo nꞌda ra hyodu i ja ra ꞌdaꞌyote maząi.
\v 16 Pɛ nu ra Cristo bi ꞌyurcahʉ ꞌbɛꞌa njuąntho ran huɛ̨cate, ngue bi däsɛ rá te nanguejʉ. Nɛ jatho ngutho ga øthʉ, hin ga su ga dä ma tehʉ guepʉ da zä ga fäx ma cuhʉ.
\v 17 Pɛ nuꞌa toꞌo i ja ꞌbɛꞌa i pɛꞌtsꞌi, nɛ i pądi hinꞌyʉ ꞌbɛꞌa da hyon a rá cu, nɛ nuꞌbʉ hingui ørpa ran huɛ̨cate, hinguim bɛ̨ni da numanho Oją a ꞌbʉ.
\v 18 Ma zi tꞌʉhni ahʉ, hinga høntho gam manthohʉ ran huɛ̨cate, pɛ guemhma ga øthʉ a.
\s Dadín johyahʉ ꞌbʉ dí yąhʉ Oją
\p
\v 19 Nɛ nuꞌbʉ majuąni dí øthʉ ran huɛ̨cate, janangue dí pąhmbʉ yʉ́ tꞌʉhnigahʉ a Majuąni, nɛ gueꞌa nan johyahʉ bʉ ja rá hmi a.
\v 20 Pɛ nuꞌbʉ ga juąnba zɛhɛ ma mbʉihʉ, pɛ da hyurca ma mbʉihʉ Oją, madagueꞌbʉ i pądi ꞌbɛꞌa gätho dá øthʉ, nguetho manꞌda ja rán huɛ̨cate xinda guejʉ.
\v 21 Janangueꞌa ma zi cu ahʉ, nuꞌbʉ hin te dí tįmhbʉ ja ma mbʉihʉ a xʉn tsꞌo, dadín johyahʉ ngue dí pąhmbʉ dí yąmanhohʉ Oją,
\v 22 nɛ di ꞌdajʉ ꞌbɛꞌa gätho dí äfʉ ꞌbʉ dí yąhʉ, nguetho dí ørpahʉ yʉ́n tꞌɛ̨di, nɛ dí ørpahʉ gätho i numanho.
\v 23 Nɛ i ja ua yʉ́n tꞌɛ̨di Oją, gue ga ɛ̨cꞌyɛihʉ rá Tsꞌʉntꞌʉ, ra Jesucristo, nɛ dan huɛ̨jʉ nꞌda ngu nꞌdajʉ, tengu bi xijʉ.
\v 24 Nɛ nuꞌa toꞌo i ørpa yʉ́n tꞌɛ̨di, i ꞌbʉhmi Oją nɛ bim ꞌbʉpʉ Oją bʉ rá mbʉi a bʉya. Nɛ dí pąhmbʉ dí ꞌbʉhmbʉ Oją, nguetho gueꞌa di bɛ̨ngahʉ rá Hogandąhi bi ꞌdajʉ.
\c 4
\s Ndaꞌa rám Hman Oją, nɛ ndaꞌa rám hman a rán sʉiui Oją
\p
\v 1 Ma zi cu ahʉ, hingui sä ga ɛ̨cꞌyɛihʉ ꞌbɛꞌa gätho ním hma ɛ̨mbi rám hman Oją. Pɛ i jatho ga pąhmbʉ ꞌbʉ majuąni ngue gueꞌa rám hman Oją, uague hinꞌna. Nguetho xʉn ngu yʉ hyäte pøngahyą i ꞌyoua ja ra ximhäi.
\v 2 Nɛ nuꞌa jatho ga pąhmbʉ ndaꞌa ním hma bi bɛ̨nba rá Hogandąhi Oją, nuꞌbʉ im ma ngue rá Thahni Oją ngue bin jąꞌi nɛ gueꞌa ra Jesucristo a, gueꞌa ram hma bi bɛ̨nba rá Hogandąhi Oją a bʉya.
\v 3 Pɛ toꞌo gätho ngue ɛ̨na hin bin jąꞌi a  rá Thahni Oją gue ra Jesucristo, pɛ nuꞌa ra hyäte a ꞌbʉ, nguetho bi thocpa rám hman a rán sʉiui ra Cristo. Xtá øhmbʉ ngue din ꞌyo ua rám hma, nɛ ya i ꞌyo ua rám hman a ya.
\v 4 Ma zi tꞌʉhni ahʉ, yʉ́ tꞌʉhnigahʉ Oją. Ya dá tąfʉ ʉ yʉ hyäte pøngahyą, nguetho nuꞌa dí ꞌbʉhmbʉ, manꞌda ja rá tsꞌɛdi a xinda gueꞌa rán sʉiui Oją, ngue i ꞌbʉcua ja ra ximhäi.
\v 5 Nu yʉ hyäte pøngahyą, yʉ́ mbɛfi ra ximhäi ʉ, nɛ guecua ja ra ximhäi bi nɛquidą yʉ́m hman ʉ, janangueꞌa i ømanho ra ximhäi ꞌbɛꞌa im man ʉ.
\v 6 Pɛ nujʉ yʉ́ tꞌʉhnigahʉ Oją. Janangueꞌa høntꞌa toꞌo i pą a Oją i ømanho ma hmamhbʉ ʉ. Pɛ nuꞌʉ ngue hin yʉ́ tꞌʉhni Oją, hingui ømanho ma hmamhbʉ ʉ. Guepʉ na pąhmbʉ bʉya ndaꞌa i tɛnꞌna majuąni, nɛ ndaꞌa i tɛnꞌna him majuąni.
\s Ran huɛ̨cate a Oją
\p
\v 7 Ma zi cu ahʉ, ndeꞌbʉ dan huɛ̨jʉ nꞌda ngu nꞌdajʉ. Nguetho nu ran huɛ̨cate bí ꞌyɛ̨pʉ ꞌbʉ Oją. Nɛ nuꞌa di huɛ̨c rá mijąꞌiui, gueꞌa bim ꞌbʉi maꞌdaꞌyo nangue Oją, nɛ dim pąhmi Oją a.
\v 8 Pɛ nuꞌa hinꞌyʉ rán huɛ̨cate, hingui pą a Oją a, nguetho nuꞌa Oją ran huɛ̨cate a.
\v 9 Oją bi ꞌyurcahʉ ran huɛ̨cate ꞌbʉ mambá pɛnhua ja ra ximhäi rá ꞌdatsꞌʉntꞌʉ bi yąnjʉ, nꞌdahma din jajʉ ra ꞌdaꞌyote.
\v 10 Oją bi ꞌyurcahʉ ran huɛ̨cate ngue majuąni, nguetho bá pɛnhua rá Tsꞌʉntꞌʉ ngue bin däsɛ bi gurca ma tsꞌoquihʉ. Nɛ mada hangu gam bɛ̨mhbʉ Oją, pɛ njąmꞌbʉ da zä gam bɛ̨mhbʉ, tengu bʉ nam bɛ̨njʉ.
\v 11 Ma zi cu ahʉ, nuꞌbʉ ɛmmɛ xʉn ngu rán huɛ̨cate bi ꞌyørgahʉ Oją, ndeꞌbʉ nɛjʉ dan huɛ̨jʉ nꞌda ngu nꞌdajʉ.
\v 12 Hingui sä gan nuhʉ Oją nangue ma dähʉ. Pɛ mfądi bin ząm bʉ ja ma mbʉihʉ ꞌbʉ dadín huɛ̨jʉ. Nɛ bi bømanho rán huɛ̨cate i ørcahʉ bʉya.
\v 13 Dí pąhmbʉ ngue dí ꞌbʉhmbʉ Oją, nɛ nu Oją bin ząm bʉ ja ma mbʉihʉ. Guehna dí pąhmbʉ, nguetho bi ꞌdajʉ rá Hogandąhi,
\v 14 nɛje dí bɛ̨nꞌnahʉ nguetho dá nusɛhe rá Tsꞌʉntꞌʉ Oją, nɛ dí mamhbe majuąni bá pɛnh Oją ua ja ra ximhäi gue da yąnba yʉ́ te yʉ jąꞌi.
\v 15 Nuꞌa toꞌo im ma ngue rá Tsꞌʉntꞌʉ Oją a ra Jesús, nuꞌa Oją bin ząm bʉ ja rá mbʉi, nɛ nuꞌa ra jąꞌi xim mi ꞌbʉhmi Oją a.
\v 16 Dín nuhʉ rán huɛ̨cate Oją, nguetho dí ɛ̨cꞌyɛibahʉ a. Nu Oją ran huɛ̨cate a. Nuꞌa toꞌo ząi ɛ̨cꞌyɛi rán huɛ̨cate Oją, nɛꞌbʉ ząi di huɛ̨c rá mijąꞌiui, nuꞌa i ꞌbʉhmi Oją a, nɛ Oją bin ząm bʉ ja rá mbʉi a.
\v 17 Nɛ nangue dí ꞌbʉhmbʉ Oją dí pąhmbʉ xʉn ho rán huɛ̨cate. Janangueꞌa dan johyahʉ ꞌbʉ bi zøn ra pa din ja ran juąnbi. Nguetho dí ꞌbʉhmbʉ tengutho ma Hmuhʉ ra Cristo i ꞌbʉhmi Oją, madagueꞌbʉ guexta dí ꞌbʉhmbʉ ua ja ra ximhäi.
\v 18 Nuꞌa toꞌo i su ran juąnbi, i su nguetho hinga na pądi xʉn ho ran huɛ̨cate i ørpa Oją. Pɛ nu rán huɛ̨cate Oją di ꞌuecꞌa ra mbidi a. Pɛ nuꞌbʉ dín suhʉ, dí ɛ̨mhbʉ di ʉngahʉ Oją ꞌbʉ.
\v 19 Dí øthʉ ran huɛ̨cate, nguetho mꞌbɛtꞌo bi huɛ̨gahʉ Oją.
\v 20 “Dí numanho Oja,” sä dí ɛ̨mhbʉ, pɛ dadí ʉp ma cuhʉ. Dí fɛhnihʉ ꞌbʉ. Nguetho nuꞌbʉ hin dadí huɛ̨c ma cuhʉ gue ząntꞌa dín nuhʉ, hague dán zä ga numanhohʉ Oją gue njąmꞌbʉ dín nuhʉ.
\v 21 Nɛ jaua rán tꞌɛ̨di Oją, bi xijʉ: “Nuꞌa toꞌo da numanho Oją, pɛ i jatho ngue nɛꞌa rá cu da numanho, nɛ di huɛ̨qui.”
\c 5
\s Dí tąfʉ ra ximhäi nangue ma tꞌɛ̨cꞌyɛihʉ
\p
\v 1 Nuꞌʉ toꞌo gätho i ɛ̨cꞌyɛi gue bin jąꞌi Oją nɛ nꞌdatꞌa ra Jesucristo a, yʉ́ tꞌʉhni Oją ʉ. Nɛ gätho toꞌo i numanho Oją nɛꞌʉ yʉ́ tꞌʉhni Oją di huɛ̨cꞌʉ nguetho nꞌdatꞌa Oją yʉ́ Ta.
\v 2 Nɛ nuꞌbʉ majuąni dín numanhohʉ Oją, nɛꞌbʉ dí øthʉ yʉ́n tꞌɛ̨di, dí pąhmbʉ bʉya ngue majuąni dadí huɛ̨c ma cuhʉ.
\v 3 Nɛ nuꞌbʉ majuąni dín numanhohʉ Oją, ga øthʉ yʉ́n tꞌɛ̨di, nɛ nuꞌʉ yʉ́n tꞌɛ̨di hingui hɛ̨i.
\v 4 Nguetho nuꞌʉ toꞌo bim ꞌbʉi maꞌdaꞌyo nangue Oją bin tꞌun ra tsꞌɛdi rá mbʉi gue da dąp ra ximhäi. Nɛ dí tąfʉ rá tsꞌɛdi ra ximhäi nangue dí ɛ̨cꞌyɛihʉ ra Cristo.
\v 5 Toꞌo ngue i tąp rá tsꞌɛdi ra ximhäi. Nuꞌa gue i ɛ̨cꞌyɛi ngue rá Tsꞌʉntꞌʉ Oją a ra Jesús.
\s Rá Hogandąhi Oją di bɛ̨ngahʉ rá Tsꞌʉntꞌʉ Oją a ra Jesús
\p
\v 6 Nu ra Jesucristo bi zøcua ja ra häi. Bin xixyą ra dehe a. Nɛ nꞌdatꞌa gue bi mbän rá ji ꞌbʉ mi du a. Nɛ hinga høntꞌa ngue bin xixyą ra dehe, pɛ nɛ bi mbän rá ji, ngue bi du. Nuꞌa ra Jesucristo, rá Thahni Oją a. Gueꞌa im ma majuąni rá Hogandąhi Oją nguetho hingui sä dim fɛhni a.
\v 7 Hyu ʉ bí ꞌbʉh mahɛ̨tsꞌi im ma majuąni gue rá Tsꞌʉntꞌʉ Oją a ra Jesucristo. Nuꞌa nꞌda, ra Ta, nuꞌa nꞌda ram Hma, nuꞌa nꞌda rá Hogandąhi Oją, nɛ nꞌdatꞌa im manꞌʉ.
\v 8 Nɛ hyu ʉ i urcahʉ majuąni ua ja ra ximhäi gue rá Tsꞌʉntꞌʉ Oją a ra Jesucristo. Nuꞌa nꞌda, rá Hogandąhi Oją, nuꞌa nꞌda rán xixyą ra Jesucristo, nuꞌa nꞌda, rán dąte ra Jesucristo. Nɛ gätho ʉ hyu nꞌdatꞌa i urcahʉ. 
\v 9 Dí ɛ̨cꞌyɛihʉ yʉ́m hman yʉ jąꞌi ꞌbʉ majuąni, pɛ manꞌda ja tsꞌɛdi tho ga ɛ̨cꞌyɛihʉ rám hman Oją. Nɛ bi man Oją gue rá Tsꞌʉntꞌʉ a ra Jesús.
\v 10 Nuꞌa toꞌo ɛ̨cꞌyɛi rá Tsꞌʉntꞌʉ Oją, i pąsɛ mbo rá mbʉi gue majuąni a. Pɛ nuꞌa toꞌo hingui ɛ̨cꞌyɛi, i nubɛthąni Oją a ꞌbʉ, nguetho hingui ɛ̨cꞌyɛi a bi man Oją nangue rá Tsꞌʉntꞌʉ.
\v 11 Nɛ i jaua a ram hma ngue bi ma, gue Oją bi ꞌdajʉ ra ꞌdaꞌyote maząi ꞌbʉ má ɛ̨cꞌyɛihʉ rá Tsꞌʉntꞌʉ.
\v 12 Nuꞌa ꞌbʉhmi rá Tsꞌʉntꞌʉ Oją, i ja ra te maꞌdaꞌyo a, pɛ nuꞌa hingui ꞌbʉhmi rá Tsꞌʉntꞌʉ Oją, hingui ja ra te maꞌdaꞌyo a.
\s Dí pąhmbʉ dí pɛshʉ ra ꞌdaꞌyote maząi
\p
\v 13 Janangueꞌa dí otꞌahʉ gyʉ ꞌyɛ̨cꞌyɛihʉ a rá Tsꞌʉntꞌʉ Oją, nꞌdahma gui pąhmbʉ i jajʉ ra ꞌdaꞌyote.
\v 14 Nɛ dadín johyahʉ gue dan yąhʉ Oją, dí pąhmbʉ i numanhojʉ. Nɛ nuꞌbʉ din thɛui rá pähä Oją a dí ähmbʉ, dí pąhmbʉ i ømanho ꞌbʉ dí yąhʉ a.
\v 15 Nɛ nuꞌbʉ dí pąhmbʉ ngue ømanho, ga pąhmbʉ gue da ꞌyøtꞌa dí ähmbʉ ꞌbʉ.
\v 16 Nuꞌbʉ dín nuhʉ nꞌda ma cuhʉ i øtꞌ ra tsꞌoqui, ngue him má zä bi hyąx ra tsꞌoꞌyu, ga äfʉ rá mate Oją nangue a. Nu Oją bʉya di japi ba pengui toꞌo bi ꞌyøtꞌ ra tsꞌoqui. Pɛ nuꞌbʉ ꞌboꞌo má zä bi hyąx ra tsꞌoꞌyu, pɛ hin dí ɛ̨n ahʉ ga äfʉ rá mate Oją nangue a.
\v 17 Gätho ʉ hing yʉ́n thɛhʉ i øtꞌa nꞌda, ra tsꞌoqui a. Pɛ jaꞌbʉ øtꞌ ra tsꞌoqui nꞌda him má zä bi hyąx ra tsꞌoꞌyu, janangueꞌa ga äfʉ Oją bʉya.
\v 18 Dí pąhmbʉ toꞌo gätho bim ꞌbʉi maꞌdaꞌyo nangue Oją, hin din ząm bʉ ja yʉ tsꞌoqui a. Nguetho i fäh rá Tsꞌʉntꞌʉ Oją a, nɛ hingui sä di ꞌuecꞌa ra zįthu bʉ ꞌbʉ Oją a.
\v 19 Nɛ dí pąhmbʉ ngue yʉ́ tꞌʉhnigahʉ Oją. Nɛ dí pąhmbʉ i o rá tsꞌɛdi ra zįthu ʉ gätho miꞌda i ꞌbʉcua ja ra ximhäi.
\v 20 Nujʉ dí pąhmbʉ bi zøcua ja ra ximhäi rá Tsꞌʉntꞌʉ Oją, nɛ nuꞌa bi jajʉ dá pąhmbʉ a majuąni. Nɛ dí ꞌbʉhmbʉ a majuąni nguetho dí ꞌbʉhmbʉ ra Jesucristo. Nɛ gueꞌa majuąni Oją a, nɛ gueꞌa di ꞌdajʉ ra ꞌdaꞌyote ma mbʉihʉ a gue njąmꞌbʉ da guadi.
\v 21 Ma zi tꞌʉhni ahʉ, hin ga ɛ̨cꞌyɛihʉ yʉ hyäte oją. Nɛ høntꞌa dí xi ahʉ ya.