\id REV
\h APOCALIPSIS
\toc1 APOCALIPSIS
\mt1 APOCALIPSIS
\mt2 Rán tꞌuti ra Jesucristo bi nu ra Xuua
\c 1
\s Rám hman ra Jesucristo bi sih ra Xuua
\p
\v 1 Nuꞌa Oją bi ꞌyut yʉ́ ꞌyɛ̨hɛ̨ i ꞌbʉcua ja ra häi. Janangueꞌa nu ra Jesucristo bá pɛhna nꞌda rám ꞌbɛhni mahɛ̨tsꞌi bi ꞌyurcä dra Xuuagä, rá ꞌyɛ̨hɛ̨gä, ꞌbɛꞌa din ja.
\v 2 Nɛ nugä dra Xuuagä dí oꞌtꞌä ya ꞌbɛꞌa gätho dín nugä, nɛꞌa rám hman Oją nɛꞌa rám hman ra Jesucristo i xiqui. Gätho dí oꞌtꞌä ngue da fądi ꞌbɛꞌa majuąni din ja.
\v 3 Din johya gätho toꞌo da manꞌa ꞌbɛꞌa ntꞌoꞌtꞌi ua  ja ra søcuą. Nɛ din johya toꞌo gätho da ꞌyøde ꞌbɛꞌa din ja. Nɛ din johya ꞌbʉ da ꞌyøtꞌe ꞌbɛꞌa gätho i mangua ja ra søcuą, nguetho him mayaꞌa din ja ꞌbɛꞌa gätho ntꞌoꞌtꞌi ua.
\s I tꞌorpa ra søcuą yʉ ꞌyɛ̨cꞌyɛ̨i bʉ ja yoto yʉ hnini
\p
\v 4 Nugä dra Xuuagä dí otꞌahʉ ra søcuą gätho yʉ ꞌyɛ̨cꞌyɛ̨i dim pɛti bʉ ja yoto yʉ hnini bʉ ja ra häi Asia. Oją di jąp ahʉ nɛ da hyutꞌa ni mbʉihʉ, guetꞌa Oją i ꞌbʉi nɛ mi ꞌbʉi, nɛ guetꞌa dim ꞌbʉi maząi. Nɛ rá Hogandąhi Oją i juadi xʉn ho rá tsꞌɛdi, gue i ꞌbʉpʉ hapʉ di manda rá tsꞌɛdi Oją, i pɛnꞌnahʉ rán jąpi.
\v 5 Nɛ bí pɛnꞌnahʉ rán jąpi a ra Jesucristo, nɛ da hyutꞌa ni mbʉihʉ. Nuꞌa ra Jesucristo ząi i mam majuąni, nɛ rá mbʉdi bi dąmbɛ̨ni ꞌbʉ mi du, nɛ dim hmutsꞌʉtꞌabi nɛ di manda gätho yʉ tsꞌʉtꞌabi gue i ꞌbʉcua ja ra häi. Nuꞌa di huɛ̨gahʉ nɛ bi yąnjʉ nangue ma tsꞌoquihʉ, bi mberca ma mbʉihʉ nangue ran tsꞌo, nangue rá ji bi mbäm ꞌbʉ mi du bʉ ja ra pontꞌi.
\v 6 Nu ra Jesucristo bi ꞌdajʉ ra tsꞌɛdi dan tsꞌʉtꞌabihʉ nɛ dam mbäjąhʉ ga ørpahʉ rá ꞌbɛfi bʉ i ja rá tsꞌɛdi Oją rá Ta. Nɛ nuꞌa ra Jesucristo din ja rá nuįxte nɛ rá tsꞌɛdi hønꞌbʉ go njąmꞌbʉ maząi. Nɛ høntꞌa gam bɛ̨mhbʉ a ya.
\v 7 Nuna ra Jesucristo guetꞌa ba ɛ̨hɛ̨ ban ꞌyohʉ yʉ güi, nɛ gätho  yʉ jąꞌi da nu. Nɛ gätho toꞌo bi ʉcpi da nu, nɛ gätho yʉ jąꞌi i ꞌbʉcua ja ra ximhäi ɛ̨mmɛ din ja ra dumbʉi ꞌbʉ bi nu a. Majuąni njabʉ din ja ꞌbʉ bá ɛ̨hɛ̨. Nɛ høntꞌa gam bɛ̨mhbʉ a ya. 
\v 8 Nu ra Cristo bi ꞌyɛ̨na: “Nugä ra mbʉdi dám ꞌbʉcä, nɛ njąmꞌbʉ him mi ꞌbʉcä,” ɛ̨nꞌa ra Hmu mahɛ̨tsꞌi nuįxte rá tsꞌɛdi, nuꞌa i ꞌbʉi nɛ mi ꞌbʉi, nɛ i ꞌbʉi maząi.
\s Ra Xuua bi nu madą rá tsꞌɛdi ra Cristo
\p
\v 9 Nugä dra Xuuagä, ni cujʉ nangue ra Cristo, dí otꞌahʉ ra søcuą ya. Nujʉ dí comhbʉ yʉn ʉnbi guín nuhʉ nangue dí ɛ̨cꞌyɛihʉ ra Hmu mahɛ̨tsꞌi. Nuꞌa Oją di manda bʉ ja ma mbʉihʉ, nɛ ra Jesucristo bi ꞌdajʉ ra tsꞌɛdi ngue hin dadí xømbʉihʉ ꞌbɛꞌa dí nuhʉ. Nɛ nugä dra Xuuagä dí ofädigä bʉ ja ra häi Patmos, nꞌda ra tꞌʉhäi i ja bʉ ja ra dehe nguetho dím mangä rám hman Oją nɛ dí mangä nangue ra Jesucristo.
\v 10 Nuꞌa ra pa domingo dán yąꞌbe Oją, nɛ ꞌbex bi bɛ̨ngä a rá tsꞌɛdi rá Hogandąhi Oją. Nɛ dá øcä nꞌda ra nde bʉ ja ma xʉthä tenguꞌbʉ nꞌda ra thʉxi, ɛ̨mmɛ ntsꞌɛdi thoho.
\v 11 Nɛ nu ra nde bi ꞌyɛ̨na: “Nugä dra mbʉdigä nɛ hinjąmꞌbʉ ngue him mi ꞌbʉcä, nɛ ząi dí ꞌbʉcä.” Nɛ nuꞌa ra nde bi xicä, bi ꞌyɛ̨na: “Gui ꞌyoꞌtꞌ ya ꞌbɛꞌa gätho gui nu, nɛ gui pɛnpʉ ꞌbʉh yʉ ꞌyɛ̨cꞌyɛ̨i, gueꞌʉ dim pɛti bʉ ja yoto yʉ hnini bʉ ja ra häi Asia, guepʉ ja ra hnini Efeso, nɛpʉ ja ra hnini Esmirna, nɛpʉ ja ra hnini Pérgamo, nɛpʉ ja ra hnini Tiatira, nɛpʉ ja ra hnini Sardis, nɛpʉ ja ra hnini Filadelfia, nɛpʉ ja ra hnini Laodicea.”
\v 12 Nɛ nugä dra Xuuagä ꞌbex dá nyɛ̨gui ngue dín nde ga nugä toꞌo bin yą. Nɛ dá nugä yoto yʉ lámpara ngue ra oro yʉ́ gua.
\v 13 Nɛ dá nugä i ꞌbä inde bʉ ja yʉ lámpara ra Cristo, ngueꞌa bin jąꞌi ua ja ra ximhäi, mi he ra pahni xʉm mba, i sørpʉ ja yʉ́ gua, nɛ man thuꞌtꞌi rá tįya nꞌda ran gʉtꞌi ngue ra oro.
\v 14 Nuꞌʉ yʉ́ xtą tengu ra tꞌaxca xidɛꞌyo, ogue tengu ra tꞌaxcasɛ. Nɛ nu yʉ́ dä ɛ̨mmɛ bi hyätꞌi tenguꞌbʉ nꞌda ra sibi i sø.
\v 15 Nɛ nuꞌʉ yʉ́ gua, ɛ̨mmɛ di fɛxni tengu ra xitꞌɛgui ra bronce di hoc ra sibi nɛ i pa nthąmmi xʉn ho. Nɛ nuꞌa rá nde tengu yʉ dąthe xʉn ngu nɛ ntsꞌɛdi di hį.
\v 16 Nɛ mi o rán ꞌyɛi yoto yʉ sø, nɛ bi bøxpʉ ja rá nde tengu nꞌda ra espada i yoho yʉ́ hɛtꞌi ngue din juąnbate. Nɛ nuꞌa rá hmi ɛ̨mmɛ bi fɛxni tengu rá tsꞌɛdi ra hyadi ꞌbʉ bi hyuxyadi.
\v 17 Nɛ nuꞌbʉ má nugä, dá tąngä bʉ ja rá gua tenguꞌbʉ ya xtá tugä. Pɛ nuna bi dosca rán ꞌyɛi nɛ bi xiqui: “ꞌYo guín su, nguetho nugä dra mbʉdigä nɛ dran zɛguigä, nɛ hinjąmꞌbʉ him mi ꞌbʉcä.
\v 18 Nugä ząi dí ꞌbʉi, guecä dá tugä pɛ nuya guí nu dí ꞌbʉcä ya, nɛ dam ꞌbʉcä maząi hønꞌbʉ go njąmꞌbʉ. Nɛ i ja ma tsꞌɛdi gue dadí manda hapʉ i pa ʉ xʉn du. I jagä ran sogui ngue ga xocpa ʉ ꞌda, nɛ ga jurpa ʉ miꞌda.”
\v 19 Nɛ bi xiqui, bi ꞌyɛ̨na: “Dami ꞌyoꞌtꞌ ya ꞌbɛꞌa gätho guí nu ya, ngue gätho i ja ya, nɛꞌʉ gätho din ja mꞌbɛjua.
\v 20 Ga xi a ya ꞌbɛꞌa ní hmɛpya i ja bʉ man ꞌyɛi, ngue yoto yʉ sø nɛꞌʉ yoto yʉ lámpara ngue yʉ oro yʉ́ gua. Gue yoto yʉ sø, rá hmɛpya ʉ yoto yʉm ꞌbɛhni mahɛ̨tsꞌi, gue di zɛꞌʉ dim pɛti bʉ yoto yʉ hnini, ngue ꞌdaꞌa nꞌdanni yʉ hnini i ꞌbʉi. Nɛ nuꞌʉ yoto yʉ lámpara rá hmɛpya ʉ yoto yʉ́m pɛti yʉ ꞌyɛ̨cꞌyɛi hapʉ ząi dim pɛti.”
\c 2
\s Ram hma da hmam bʉ ja ra hnini Éfeso
\p
\v 1 Nuꞌa ra nde bi xicä ngue ga oꞌtꞌa nꞌda ra søcuą, ga undä a ram ꞌbɛhni ngue i fäx ʉ yʉ ꞌyɛ̨cꞌyɛi bʉ ja ra hnini Éfeso. Nɛ nuꞌa ra søcuą da hmam bʉ ꞌbʉh yʉ ꞌyɛ̨cꞌyɛi. Nu yʉ́m hmansɛ a gue i ꞌyo inde bʉ ja yoto yʉ lámpara, nɛ i o rán ꞌyɛi yoto yʉ sø.
\v 2 Nɛ nuꞌa ra nde bi xiꞌʉ yʉ ꞌyɛ̨cꞌyɛi bʉ, bi ꞌyɛ̨na: “Dí pącä ꞌbɛꞌa gätho gá ꞌyøthʉ bʉ, nɛ dí pącä hangu nangu ra ꞌbɛfi gá ꞌyøthʉ. Nɛ dí pącä gue hin gán xømbʉi nangue ni ꞌbɛfihʉ. Nɛ dí pącä ngue xingui tsꞌʉ gadí jafʉ da ꞌyøtꞌ ran tsꞌomꞌbäi nꞌda. Nɛ gá ꞌyänhdʉ ꞌda yʉm hman ʉ toꞌo ɛ̨na yʉ́ ꞌbäihʉ ra Cristo, nɛ gá pąhmbʉ yʉ hyäte thoho ʉ.
\v 3 Nɛ dí pącä gue hin gán xømbʉihʉ ran ʉnbi gá nuhʉ, nɛ ra ꞌbɛfi gá ꞌyøthʉ nangue gá ꞌyɛ̨cꞌyɛigahʉ, nɛ xingui tsꞌʉ gá ꞌyɛꞌtsꞌ ni tꞌɛ̨cꞌyɛihʉ.
\v 4 Pɛ i ja ahʉ tsꞌʉ gue hin dí numanhogä, ngue gá ꞌyɛsꞌhʉ tsꞌʉ a guí bɛ̨njʉ ya nɛ hín gadín huɛ̨jʉ. Nɛ hin guín jahʉ bʉ ꞌbʉ ra mbʉdi thoho gá ꞌyɛ̨cꞌyɛigahʉ.
\v 5 Dami bɛ̨mhbʉ ya hangu na ngu bi gąꞌa ni tꞌɛ̨cꞌyɛihʉ ꞌbʉ gmí ꞌyɛsꞌhʉ a gní bɛ̨njʉ nɛ gá ꞌyɛꞌtsꞌ nin huɛ̨catehʉ. Dami päh nin ꞌyomfɛ̨nihʉ ya. Dami thojʉ a gmí øthʉ rá mbʉdi thoho. Pɛ nuꞌbʉ guextaꞌa guí øthʉ, ga ꞌuecä nꞌda ra lámpara ꞌbʉ, nɛ him man ga ja ahʉ tenguꞌbʉ ra lámpara bʉ guí ꞌbʉhmbʉ, ꞌbʉ hin gui hoc nin ꞌyomfɛ̨nihʉ.
\v 6 Pɛ i ja ahʉ ꞌbɛꞌa xʉn ho tsꞌʉ, nguetho nꞌdatꞌa dím bɛ̨mhbʉ gue hin dín numanhohʉ a i øtꞌʉ yʉ nicolaítas.
\v 7 Nuꞌbʉ i ja ni zaguhʉ, gui ꞌyøhmbʉ ꞌbɛꞌa da xi ahʉ a rá Hogandąhi Oją gätho gyʉ ꞌyɛ̨cꞌyɛihʉ. Nɛ nuꞌʉ toꞌo hin da thąpi nangue ran tsꞌo, ga undä ran tꞌɛ̨di da za yʉn dätꞌo bʉ ja ra za tꞌɛ̨mbi rá za ra temaząi, gue i ꞌbäpʉ ꞌbʉ Oją,” bi ꞌyɛ̨nꞌa ra nde bi zoqui.
\s Ram hma da hmam bʉ ra hnini Esmirna
\p
\v 8 Nɛ xø bi ꞌyɛ̨ngui: “Nuya gui ꞌyorpa ra søcuą ram ꞌbɛhni gue i fäx yʉ ꞌyɛ̨cꞌyɛi bʉ ja ra hnini Esmirna. Nɛ gui xifi gue mam hmangä, guecä mi ꞌbʉcä ꞌbʉ ra mbʉdi thoho nɛ dam ꞌbʉcä maząi, nugä dá tugä nɛ dá ndantsꞌ mahønꞌa nɛ dí ꞌbʉhya, gui ꞌyɛ̨na. Nɛ nuꞌa ra søcuą da hmam bʉ ꞌbʉh yʉ ꞌyɛ̨cꞌyɛi bʉ ra hnini Esmirna.”
\v 9 Nɛ ɛ̨nꞌa ra nde: “Dí pącä ꞌbɛꞌa gätho nín ʉnbi guí sähʉ nanguecä. Nɛ dí pącä gue gyʉ hyoyahʉ bʉ ja ra häi, pɛ xʉn ngu i ja ahʉ nangue Oją. Nugä dí pącä gue di cꞌąmanꞌʉ ahʉ ꞌda yʉ judío gue ɛ̨nsɛ majuąni yʉ judío ʉ, gue nde da ma yʉ́ tꞌʉhni Oją ʉ. Pɛ him majuąni yʉ́ tꞌʉhni Oją ʉ, pɛgue rám pɛti ra zįthu a i øtꞌʉ.
\v 10 Nɛ ꞌyo guí suhʉ ran ʉnbi gue mi tsꞌʉtho din ja ahʉ. Gui ꞌyøhmbʉ ya ꞌbɛꞌa din ja ahʉ, ngue gui nuhʉ rán tsꞌäte ra zįthu nuꞌbʉ da jo ahʉ ꞌda ahʉ. Nɛ ꞌdɛtꞌapa guin nuhʉ yʉn ʉnbi. Nɛ nuꞌbʉ hin gui ꞌyɛꞌtsꞌ ni tꞌɛ̨cꞌyɛihʉ madagueꞌa gui tuhʉ, gá tąhmbʉ xʉn ho a ra te ꞌbʉ.
\v 11 Nuꞌbʉ i ja ni zaguhʉ, gui ꞌyøhmbʉ ya ꞌbɛꞌa i xi ahʉ rá Hogandąhi Oją gyʉ ꞌyɛ̨cꞌyɛihʉ. Nɛ nuꞌʉ toꞌo hin da thąpi nangue ran tsꞌo, hin da mba bʉ ja ran ʉnbi maząi, nɛ hin di ʉnba a ná yoho ran dąte,” bi ꞌyɛ̨nꞌa ra nde bi xiqui.
\s Ram hma da hmam bʉ ra hnini Pérgamo
\p
\v 12 Nɛ bi xic mahønꞌa ra nde, bi ꞌyɛ̨na: “Nuya gui ꞌyorpa ra søcuą ram ꞌbɛhni ngue i fäx ʉ yʉ ꞌyɛ̨cꞌyɛi bʉ ja ra hnini Pérgamo, gue da mam bʉ ꞌbʉh yʉ ꞌyɛ̨cꞌyɛi. Nɛ gui ꞌyoꞌtꞌi ꞌbɛꞌa dí mangä gue i jagä ra espada yoho yʉ́ hɛtꞌi.
\v 13 Nugä dí pącä ꞌbɛꞌa guí øthʉ hapʉ guí ꞌbʉhmbʉ, guepʉ di manda ra zįthu. Nɛ dí pącä gue hin gá hyɛhmbʉ ni tꞌɛ̨cꞌyɛihʉ, xíngui tsꞌʉ gá cønjʉ nuꞌbʉ mi mba ntho bʉ a ma hogaꞌyɛ̨hɛ̨ ra Antipas, guepʉ ꞌbʉh ra zįthu.
\v 14 Pɛ i ja ahʉ tsꞌʉ a gue hin dí numanhogä, nguetho i ꞌbʉ i ꞌda ahʉ i tɛn rán xädi ra Balaam, nuꞌa ran ꞌyohʉ gue bi xänba ra Balac ꞌbɛꞌa da ꞌyøtꞌe gue da hyätꞌʉ yʉ israel. Nu ra Balac bi xih yʉ jąꞌi da dɛn yʉ́n gopa yʉ hmite, ngue da zi ꞌbɛꞌa bi mbøspa ʉ, nɛ da ꞌyøtꞌ ran ꞌyomtꞌɛ̨ni.
\v 15 Nɛ i ꞌbʉ i ꞌda ahʉ gue hingui nde da ꞌyɛꞌtsꞌ yʉ́n xädi yʉ nicolaítas, nɛ hin dí numanho ꞌbɛꞌa øtꞌʉ.
\v 16 Janangueꞌa dami päh nin ꞌyomfɛ̨nihʉ. Nɛ nuꞌbʉ hinꞌna, ga mbagä bʉ nꞌdihi nɛ ga sʉꞌʉ nangue mam hmangä, tengu ra espada gue i pøm bʉ ma ndegä,” bi ꞌyɛ̨nꞌa ra nde gue bí ꞌyɛ̨h mahɛ̨tsꞌi.
\v 17 Nɛ bi thoqui bi xiqui, bi ꞌyɛ̨na: “Nɛ toꞌo i ja yʉ́ zagu, da ꞌyøde ꞌbɛꞌa xiꞌa rá Hogandąhi Oją yʉ ꞌyɛ̨cꞌyɛi. Nɛ toꞌo hin da thąpi nangue ran tsꞌo, ga undä ra maná mahɛ̨tsꞌi gue ntꞌągui. Nɛ ga undä nꞌda a nꞌda ra do xʉn tꞌaxi guepʉ ntꞌoꞌtꞌi maꞌdaꞌyo rá thuhu zɛhɛ. Nɛ xínga gueꞌʉ miꞌda yʉ jąꞌi da bądi ꞌbɛꞌa ntꞌoꞌtꞌi bʉ, høntꞌa toꞌo da hyąni,” ɛ̨nꞌa ra nde bí ꞌyɛ̨h mahɛ̨tsꞌi.
\s Ram hma da hmam bʉ ra hnini Tiatira
\p
\v 18 Nɛ bi xic mahønꞌa, bi ꞌyɛ̨na: “Nuya gui ꞌyorpa ra søcuą ram ꞌbɛhni gue i fäx ʉ yʉ ꞌyɛ̨cꞌyɛi bʉ ja ra hnini Tiatira, gue da hmam bʉ ꞌbʉh yʉ ꞌyɛ̨cꞌyɛi. Gui ꞌyorpi ꞌbɛꞌa dí mangä rá Tsꞌʉntꞌʉgä Oją, gue i sø ma dä tengu ra sibi i thɛ, nɛ nuꞌʉ ma gua di fɛxni tengu nꞌda ra bronce ra xitꞌɛgui gue i pa nthąmmi xʉn ho.
\v 19 Dí pącä ꞌbɛꞌa gätho guí øthʉ nɛ dí pącä gue i ja nin huɛ̨catehʉ nɛ majuąni guím bɛ̨njʉ, nɛ ja a ni tꞌɛ̨cꞌyɛihʉ xʉn ho. Nɛ dí pącä gue guí øthʉ xʉn ho rá ꞌbɛfi Oją, nɛ hin gán xømbʉihʉ. Nɛ manꞌda xʉn ho guí øthʉ ya xinda gueꞌbʉ ra mbʉdi tho gá ꞌyɛ̨cꞌyɛihʉ.
\v 20 Pɛ i ja ahʉ tsꞌʉ a hin dí numanhogä, nguetho gadí jafʉ in xänbate bʉ nꞌda ra xisu, ra Jezabel, gueꞌa i ɛ̨nsɛ rá pøngahyą Oją. Pɛ nuꞌa i xänba yʉ ꞌyɛ̨cꞌyɛi bʉ da dɛn yʉ́n tsꞌihmɛ yʉ hmite, nɛ i xänba ran ꞌyomtꞌɛ̨ni.
\v 21 Nugä dá tøꞌmi a ra xisu ngue xtí päh rán ꞌyomfɛ̨ni, pɛ hingui nde, i nde di thocta a ra tsꞌonꞌyomfɛ̨ni.
\v 22 Janangueꞌa ga un ran ʉnbi ntsꞌɛdi, gue din hyɛ̨nꞌna ra xisu, nɛꞌʉ gätho toꞌo i tɛnni da nu ran ʉnbi ntsꞌɛdi gue ga undä. Nɛ din jabʉ ga øtꞌä nuꞌbʉ hin di päh yʉ́n ꞌyomfɛ̨ni ʉ nɛ hin da hyɛh ran tsꞌo i øthʉ a ra xisu.
\v 23 Nɛ nugä ga ho gätho yʉ́ tꞌʉhni a ra xisu, guepʉ da bą ʉ gätho yʉ ꞌyɛ̨cꞌyɛi gue dí pącä yʉ́n ꞌyomfɛ̨ni yʉ jąꞌi, nɛ dí pącä ꞌbɛꞌa gätho in nde yʉ́ mbʉi ʉ. Nɛ ga cosꞌahʉ ꞌbɛꞌa gá ꞌyøthʉ nꞌda ngu nꞌda ahʉ.
\v 24 Pɛ miꞌda ahʉ bʉ ja ra hnini Tiatira gue hin gá tɛnhdʉ rán xädi ra xisu, nɛ hin guí pąhmbʉ rán xädi ra zįthu tengu i man ʉ ꞌda gue ɛ̨na pądi xʉn ho rán xädi ra zįthu. Nɛ nugä hin ga ꞌda ahʉ manꞌda xʉn hɛ̨i gui ꞌyøthʉ.
\v 25 Pɛ høntꞌa ga xi ahʉ, guim bɛnthʉ xʉn ho ni tꞌɛ̨cꞌyɛihʉ asta gueꞌbʉ go bá ɛ̨cä mahønꞌa.
\v 26 Nɛ nuꞌʉ toꞌo hin da thąpi nangue ran tsꞌo, nɛꞌbʉ di thoqui da ꞌyøtꞌe ꞌbɛꞌa gätho dí ndegä asta gueꞌbʉ go rán zɛgui ra pa, ga undä ran tꞌɛ̨di di manda ꞌda yʉ xɛqui ra häi, ngue ga comhbe ra tsꞌɛdi bi ꞌdacä ma Ta.
\v 27 Nɛꞌʉ di manda gätho ʉ yʉ jąꞌi ngue ꞌdahma ꞌdanꞌyo bʉ na yą. Nɛ da ꞌyut ram fɛtꞌɛgui ʉ man sʉihe, tenguꞌbʉ da xɛn ra jąhäi a ra bareta ngue din tɛ̨xtꞌi. Nɛ gueꞌa ra tsꞌɛdi bi ꞌdacä ma Ta.
\v 28 Nugä tenguꞌbʉ dra Dąsø. Nɛ toꞌo da ꞌyøtꞌe ꞌbɛꞌa xʉn ho, dam ꞌbʉhmbe ꞌbʉ guá pengä.
\v 29 Nɛ nuꞌbʉ i ja ni zaguhʉ, gui ꞌyøhmbʉ ꞌbɛꞌa i xih rá Hogandąhi Oją yʉ ꞌyɛ̨cꞌyɛi,” ɛ̨nꞌa rá Tsꞌʉntꞌʉ Oją.
\c 3
\s Ram hma da hmam bʉ ra hnini Sardis
\p
\v 1 Nɛ xø bi ꞌyɛ̨ng mahønꞌa: “Nuya gui ꞌyorpa ra søcuą ram ꞌbɛhni i fäx ʉ yʉ ꞌyɛ̨cꞌyɛi ꞌbʉpʉ ja ra hnini Sardis. Nɛ gui xih mam hmangä, ngue dí ꞌbʉꞌbe rá Hogandąhi Oją i juadi xʉn ho yʉ́ tsꞌɛdi. Nɛ i o ma ꞌyɛ ʉ yoto yʉ sø. Nɛ nuna mam hma da hmam bʉ ꞌbʉh yʉ ꞌyɛ̨cꞌyɛi. Nugä dí pącä ꞌbɛꞌa gätho guí øthʉ bʉ. Nu ahʉ guí mamhbʉ maxøtsꞌe thoho, nɛ sä guí ɛ̨mhbʉ guí ꞌbʉhmbʉ nangue Oją, pɛ dí pącä, nu ahʉ, tenguꞌbʉ ya xʉn du ni tehʉ.
\v 2 Pɛ daman nuhmbʉ ya, nɛ dami zacuahʉ a zʉ tsꞌʉ ni tꞌɛ̨cꞌyɛihʉ bi bongui, nꞌdamhma him majuąni da du ni tehʉ ngue gan ʉnbahʉ mazä. Nguetho dí pącä gue hin guí øthʉ in nde Oją gui ꞌyøthʉ.
\v 3 Dami bɛ̨mhbʉ ya ꞌbɛꞌa bi sänꞌnahʉ. Nuya dami päh nin ꞌyomfɛ̨nihʉ, nɛ dami tɛnhdʉ ꞌbɛꞌa gá pąhmbʉ rá mbʉdi. Pɛ nuꞌbʉ hin gui päh nin ꞌyomfɛ̨nihʉ, ga mbagä bʉ tengu nꞌda ra bɛ̨, nɛ hin gui pąhmbʉ ꞌbɛꞌa má ora ga søngä bʉ, nɛ ga ʉnꞌnahʉ.
\v 4 Pɛ i ꞌbʉꞌi ꞌda ahʉ gue him bi tsꞌon yʉ́ mbʉi. Nɛ nuꞌʉ dan ꞌyohe ʉ, nɛ da hye ʉ yʉ pahni xʉn tꞌaxi nguetho yʉ́n sähʉ dan ꞌyohe,” bi ꞌyɛ̨nꞌa ra nde bí ꞌyɛ̨h mahɛ̨tsꞌi.
\v 5 Nɛ bi thoqui bi xic ra nde, bi ꞌyɛ̨na: “Nɛ nuꞌʉ toꞌo hin da thąpi nangue ran tsꞌo, da hye yʉ pahni xʉn tꞌaxi. Nɛ hin ga tsꞌonba yʉ́ thuhu i huxpʉ ja ra søcuą i ma toꞌo i ja ra temaząi. Nɛ gam mangä gue ma mbɛtigä ʉ, guepʉ ja rá hmi ma Ta, guepʉ i ꞌbäh yʉ́m ꞌbɛhni mahɛ̨tsꞌi.
\v 6 Nɛ nuꞌbʉ i ja ni zaguhʉ, dami ꞌyøhmbʉ ꞌbɛꞌa i xih rá Hogandąhi Oją ʉ yʉ ꞌyɛ̨cꞌyɛi,” ɛ̨nꞌa ra nde.
\s Ram hma da hmam bʉ ra hnini Filadelfia
\p
\v 7 Nɛ bi xiqui mahønꞌa: “Nuya gui ꞌyoꞌtꞌ manꞌda ra søcuą, gui unꞌna ram ꞌbɛhni i fäxꞌʉ yʉ ꞌyɛ̨cꞌyɛi ꞌbʉpʉ ja ra hnini Filadelfia, gue da hmam bʉ ꞌbʉh yʉ ꞌyɛ̨cꞌyɛi. Nɛ gui xih mam hmangä gue xʉn hothogä, hinꞌyʉ ma tsꞌoqui, nɛ høntꞌa majuąni dím mangä. Nɛ dí hą ran sogui ngue ra hmɛpya i jagä ra tsꞌɛdi tengu ra hmɛpya bi ꞌyuꞌa ra David. Nɛ nuꞌbʉ ga xocpa nꞌda bʉ ja ma tsꞌɛdi, njoꞌo nꞌda da zä da gurpi, nɛ nuꞌbʉ ga jurpa nꞌda, njon da zä da xocpi.
\v 8 Nugä dí pącä ꞌbɛꞌa gätho guí øthʉ bʉ, nɛ dá xocꞌahʉ rá ꞌyu Oją manꞌda da zä gui ꞌyørcahʉ ma ꞌbɛfi, nɛ hingui sä nꞌda ra jąꞌi da got ra ꞌyu. Nɛ dí pącä ngue hinguin zaqui ni tꞌɛ̨cꞌyɛihʉ, pɛ i ja ahʉ tsꞌʉ. Thocua thoho gá tɛn man xädigä, xíngui tsꞌʉ gá hyɛgahʉ.
\v 9 Pɛ nuya dami ꞌyøhmbʉ tsꞌʉ ya ꞌbɛꞌa din ja yʉ jąꞌi bʉ gue i tɛn ra zįthu, nuꞌʉ im ma gue yʉ hogajudío ʉ, pɛ him majuąni yʉ hogajudío, ngue hingui tɛn Oją ʉ. Nugä ga japi din dąnyahmu bʉ ja ni guahʉ toꞌo i tɛnꞌna ra zįthu, nꞌdahma da bą ʉ ɛ̨mmɛ ngue dádí huɛ̨cꞌahʉ gyʉ ꞌyɛ̨cꞌyɛihʉ.
\v 10 Nɛ nangue a dá xi ahʉ, nɛ hin gán xømbʉihʉ ꞌbʉ mi mba ma ʉnꞌni ahʉ, tengugä, janangueꞌa ga jamansu ahʉ nuꞌbʉ bi zøn ra pa din ja ran ʉnbi ntsꞌutho ua ja ra ximhäi, ngue da tsꞌä gätho yʉ jąꞌi i ꞌbʉcua ja ra ximhäi.
\v 11 Nuya him mayaꞌa ga mbagä bʉ. Ndeꞌbʉ gan jamansuhʉ gue hin gui jafʉ nꞌda di tsꞌonꞌna ni tꞌɛ̨cꞌyɛihʉ, ngue hin da zä gui hyąmhbʉ ꞌbɛꞌa gá tąhmbʉ.
\v 12 Nɛ nuꞌʉ toꞌo hin da thąpi nangue ran tsꞌo, ga japi da hyąn a ra ꞌbɛfi nuįxte thoho, ngue tengu nꞌda ra guangu bʉ ja rá ngu ma Ojąhʉ mahɛ̨tsꞌi, nɛ njąmꞌbʉ da bøm bʉ. Nɛ ga oꞌtꞌä rá thuhu ma Oją bʉ ja rá jąꞌi, nɛ ga orpʉ rá thuhu rá hnini ma Oją, Jerusalén maꞌdaꞌyo, guetꞌa ra hnini ba cąpʉ bí ꞌbʉ Oją mahɛ̨tsꞌi. Nɛꞌa ma thuhu maꞌdaꞌyo ga oꞌtꞌä bʉ ja rá jąꞌi ʉ.
\v 13 Nɛ toꞌo i ja yʉ́ zagu, dami ꞌyøhmbʉ ꞌbɛꞌa i xih rá Hogandąhi Oją ʉ yʉ ꞌyɛ̨cꞌyɛi,” bi ꞌyɛ̨na.
\s Ram hma da hmam bʉ ra hnini Laodicea
\p
\v 14 Nɛ bi xiqui mahønꞌa, bi ꞌyɛ̨na: “Nuya gui ꞌyorpa ra søcuą ram ꞌbɛhni i fäxꞌʉ yʉ ꞌyɛ̨cꞌyɛi ꞌbʉpʉ ja ra hnini Laodicea, da hmam bʉ a. Nɛ gui xih mam hmangä guecä ząi dím mam majuąni. Nugä dá øtꞌä ꞌbɛꞌa gätho i ja ua ya gue bi zänd Oją.
\v 15 Nugä dí pącä ꞌbɛꞌa gätho gá ꞌyøthʉ bʉ, xøgue guí ꞌyo indethʉ, yoho nin ꞌyomfɛ̨nihʉ, nɛ ꞌda xni hothʉ. Manꞌda xcá numanho ahʉ ꞌbʉ nꞌdatꞌa ni tꞌɛ̨cꞌyɛihʉ xquí ꞌyøthʉ, xtán ho ogue hin di ho.
\v 16 Pɛ nugä dí sanꞌnahʉ a gá ꞌyøthʉ, nɛ ga sox ahʉ.
\v 17 Guetho nu ahʉ sä guí ɛ̨mhbʉ gyʉ mɛmbɛtihʉ ꞌbɛꞌa gätho guí homhbʉ, nɛ guí ɛ̨mhbʉ hinꞌyʉ ꞌbɛꞌa manꞌda guí homhbʉ. Pɛ nugä dí pącä gue hinꞌyʉ ꞌbɛꞌa i ja ahʉ di muui. Pɛ huɛ̨cate ahʉ, xøgue ndumbʉi thoho ahʉ, tenguꞌbʉ gyʉ ꞌyąhehʉ nɛ guí xädähʉ,” ɛ̨nꞌa ra nde bí ꞌyɛ̨h mahɛ̨tsꞌi.
\v 18 Nɛ xø bi ꞌyɛ̨na: “Nugä gan zo ahʉ tsꞌʉ, gua ɛ̨hmbʉ ga ꞌda ahʉ ra temaząi, tenguꞌbʉ gui tämhbʉ ra oro mahoqui ngue ra sibi, janangueꞌa majuąni gam mɛmbɛtihʉ. Nɛ ga ꞌda ahʉ ran ho ni mbʉihʉ, tenguꞌbʉ gui tän yʉ pahni xʉn tꞌaxi gui hyehʉ, janangueꞌa hin gui pɛꞌtsꞌ ni sähʉ ngue hinꞌyʉ ꞌbɛꞌa gdí compꞌ ni jąꞌihʉ. Nɛ ga xocꞌa ni dähʉ, tenguꞌbʉ gui tämhbʉ ra ꞌyɛ̨thį gui cospa ni dähʉ, janangueꞌa da zä gui nuhʉ xʉn ho.
\v 19 Nugä ga dąmhyą ahʉ tsꞌʉ, nɛ ga ꞌda ahʉ tsꞌʉ ran ʉnbi gätho toꞌo dadí huɛ̨cä, nꞌdamhma di hocꞌa ni mbʉihʉ. Janangueꞌa daman ɛ̨hyahʉ gui päh nin ꞌyomfɛ̨nihʉ. 
\v 20 Nuya gui ꞌyøhmbʉ tsꞌʉ, nguetho dí ꞌbäcä bʉ ja ra goxthi, dín zo ahʉ. Nɛ toꞌo da ꞌyøh ma ndegä nɛ da xogui, ga cʉrpʉ, dam ꞌbʉꞌbe bʉ nɛ dam pąꞌbe.
\v 21 Nɛ toꞌo hin da thąpi nangue ran tsꞌo, ga japi ga huxhe bʉ mahɛ̨tsꞌi, guepʉ i ja ma tsꞌɛdi, tenguthoho ꞌbʉ má tąpä ran tsꞌo nɛ dí huxꞌbe ma Ta bʉ mahɛ̨tsꞌi.
\v 22 Nɛ toꞌo i ja yʉ́ zagu, da ꞌyøꞌa i xi a rá Hogandąhi Oją ʉ yʉ ꞌyɛ̨cꞌyɛi,” bi ꞌyɛ̨nꞌa ra nde bi xiqui.
\c 4
\s Ran thąnde bʉ mahɛ̨tsꞌi
\p
\v 1 Nɛ nuꞌbʉ mi jua a bi mam bʉya, dá ndøtsꞌe, nɛ dá nugä nsoqui nꞌda ra jutꞌi mahɛ̨tsꞌi. Nɛ nuꞌa ra nde dá øcä tengu thoho nꞌda ra thʉxi i yą ntsꞌɛdi, bi ꞌyɛ̨ngui: “Ba ɛ̨cua nɛ ga utꞌaꞌi ꞌbɛꞌa jatho din ja mꞌbɛjua.”
\v 2 ꞌBex bi ꞌdacä ra tsꞌɛdi rá Hogandąhi Oją gue bi zä dá nugä bʉ. Nɛ dá nugä bʉ mahɛ̨tsꞌi nꞌda ran thutsꞌi mahoqui xʉn ho, tengutho bʉ hux yʉ hmutsꞌʉtꞌabi. Nɛ mí huxpʉ nꞌda.
\v 3 Nɛ nuꞌa toꞌo mi hupʉ, di fɛxni tengu yʉ fɛxna sødo ra jaspe ogue ra cornalina. Nɛ bi goꞌma ra ꞌbɛjʉni di fɛxni tengu ra fɛxna sødo ra esmeralda.
\v 4 Nɛ bi mbäsꞌ pʉ ja ran thutsꞌi mi ꞌdäte ma goho yʉn thutsꞌi, guepʉ mi hupʉ ꞌdäte ma goho yʉ dącꞌyɛi. Gätho mi he yʉ pahni xʉn tꞌaxi nɛ mi huꞌtsꞌ yʉ́ corona ra oro.
\v 5 Nɛ guepʉ ja ran thutsꞌi mi hø inde, bi bøm bʉ ra huɛi ntsꞌɛdi, nɛ ran gäni ɛ̨mmɛ di thoni, nɛ yʉ nde. Nɛ nubʉ mi hu a nꞌda, mi ja bʉ yoto yʉ sibi gue mi xɛh yʉ tꞌʉsibi, rá hmɛpya rá Hogandąhi Oją ʉ, gue í juadi xʉn ho yʉ́ tsꞌɛdi.
\v 6 Nɛ nubʉ mi hu a nꞌda, mi ja bʉ nꞌda ɛ̨na ra deją, nɛ ɛ̨na ra xito. Nɛ dá nugä goho yʉn tꞌuti gue madim ꞌbäꞌtꞌa ran thutsꞌi, gue i ꞌbʉi. Nɛ gätho goho yʉn tꞌuti mi ja yʉ́ dä bʉ yʉ́ hmi nɛ yʉ́ xʉthä, nɛ gätho yʉ́ jąꞌi.
\v 7 Nuꞌa nꞌda ran tꞌuti bi nɛqui tengu nꞌda ra zate ra león, ná yoho bʉya bi nɛqui tengu nꞌda ra toro, nɛ ná hyu bʉya bi nɛqui tengu rá hmi ran ꞌyohʉ, nɛ ná goho bi nɛqui tengu nꞌda ra dąpɛntsꞌʉ madí tʉntsꞌ yʉ́ zahua, tenguꞌbʉ ꞌyo.
\v 8 Nɛ gätho goho yʉn tꞌuti i ꞌbʉi, ja nꞌda ngu nꞌda ꞌdato yʉ́ hua. Nɛ gätho yʉ́ hua i ja xʉn ngu yʉ́ dä maxøtsꞌe nɛpʉ mbo. Nɛ ma pa nɛ ra xui bi dąnde Oją, xíngui tsꞌʉ bin hɛ̨ꞌa nán tuhu, nɛ bi ꞌyɛ̨m ꞌbʉ min tuhu:
\q Xʉn ho, xʉn ho, xʉn hotho Oją
\q nuįxte rá tsꞌɛdi,
\q gueꞌa mi ꞌbʉi nɛ i ꞌbʉhya, nɛ guetꞌa i ꞌbʉi maząi.
\m
\v 9 Nɛ gätho goho yʉn tꞌuti bi dąnde a gue mi hu inde bʉ, bi ꞌyɛ̨spa a Oją nɛ bi xifi jamadi Oją gue i ꞌbʉhya nɛ dim ꞌbʉi maząi hønꞌbʉ go njąmꞌbʉ.
\v 10 Nɛ nuꞌbʉ mi dąnde Oją yʉn tꞌuti, gätho ꞌdäte ma goho yʉ dącꞌyɛi bin dąnyahmu bʉ ja rá hmi a i hu inde bʉ, nɛ bi unꞌndʉ yʉ́ corona ra oro gue mi huꞌtsꞌi.
\v 11 Nɛ bi ꞌyɛ̨na:
\q Nuꞌi ma Hmu ahe, ma Oją ahe,
\q hønꞌa thoho nin säui din ja ni nuįxte nɛ ni tsꞌɛdi, nɛ hønꞌa thoho nin säui da numansu a ʉ gätho i ꞌbʉi.
\q Nguetho gätho gá ꞌyøtꞌe ꞌbɛꞌa i ja ya,
\q nangue ni pähä zɛhɛ, nɛ gueꞌa ni pähä án jaꞌʉ ꞌbɛꞌa i ja ya.
\c 5
\s Ra Tꞌʉdɛꞌyo rán säui di tʉntsꞌa ra søcuą
\p
\v 1 Nɛ nugä dra Xuuagä dá nugä a mi huxpʉ ja ran thutsꞌi mi cą bʉ rán ꞌyɛi nꞌda ra søcuą mꞌbantsꞌi nɛ ntꞌoꞌtꞌi maxøtsꞌe nɛpʉ mbo. Nɛ mi ja yoto yʉ́n cuahmi bʉ ja ra søcuą.
\v 2 Nɛ dá nugä nꞌda ram ꞌbɛhni mahɛ̨tsꞌi xʉn zaqui, nɛ ntsꞌɛdi bi ma: “Ha ꞌbʉ a nꞌda rán säui da xøcꞌʉ yʉ́n cuahmi i ja ua ja ra søcuą, ngue di tʉntsꞌi,” bi ꞌyɛ̨na.
\v 3 Nɛ xínga nꞌda mi ꞌbʉpʉ mahɛ̨tsꞌi, xínga nꞌda mi ꞌbʉpʉ ja ra häi, nɛ xínga nꞌda mi ꞌbʉpʉ i ꞌbʉ ʉ xʉn du rán säui da xøc yʉ́n cuahmi ra søcuą ngue da bądi ꞌbɛꞌa ntꞌoꞌtꞌi bʉ.
\v 4 Nɛ nugä dra Xuuagä ɛ̨mmɛ dán zongä nguetho njongui ꞌbʉi rán säui di tʉntsꞌa ra søcuą ngue da nu ꞌbɛꞌa ntꞌoꞌtꞌi bʉ.
\v 5 Nɛ nu nꞌda ra dącꞌyɛi bi ꞌyɛ̨ngui: “O guí zoni,” bi ꞌyɛ̨ngui, “nguetho ꞌbʉꞌa nꞌda tꞌɛ̨mbi ra León nangue rá ꞌyʉ ra Judá, nɛ rá ꞌyʉ ra tsꞌʉtꞌabi ra David, nuꞌa him bi thąpi nangue ran tsꞌo, nɛ da zä da xøcꞌʉ yʉ́n cuahmi ra søcuą.”
\v 6 Nɛ ꞌbex dá nugä nꞌda i ꞌbä inde bʉ ꞌbʉh yʉn tꞌuti, nɛꞌʉ ꞌdäte magoho yʉ dącꞌyɛi. Nɛ nuꞌa bi nɛqui tengu nꞌda ra Tꞌʉdɛꞌyo bi mba ntho. Nuꞌa ra Tꞌʉdɛꞌyo mi ja yoto yʉ́ dąni nɛ mi ja yoto yʉ́ dä, gueꞌa ra hmɛpya rá Hogandąhi Oją gue í juadi xʉn ho yʉ́ tsꞌɛdi, bá ꞌbɛhni gätho ná ngʉni ra ximhäi.
\v 7 Nɛ bi mba bʉ nɛ bi gąnba ra søcuą gue mi ja bʉ rán ꞌyɛi nꞌda gue mi hupʉ ja ran thutsꞌi.
\v 8 Nɛ nuꞌbʉ mi gąnba ra søcuą, nuꞌʉ ꞌdäte magoho yʉ dącꞌyɛi bin dąnyahmu bʉ ja rá gua ra Tꞌʉdɛꞌyo. Nɛ nꞌda ngu nꞌda mi hą yʉ́ arpaꞌbida, nɛ gätho mi ja yʉ́ ximbo ra oro mayuh rán dɛga ra za i yʉmanho, ra hmɛpya gue ní mba ntꞌɛ̨spi Oją, gue i ɛ̨spa Oją ʉ yʉ́ tꞌʉhni.
\v 9 Nɛ gätho bin tu a nꞌda ra thuhu maꞌdaꞌyo, ɛ̨nꞌʉ:
\q Hønꞌa zɛhɛ i nin säui gui xøcua yʉ́n cuahmi ra søcuą,
\q nguetho ya bi tho i, nɛ nangue ni ji guí jutꞌʉ yʉ jąꞌi, ngue gá ꞌyørpa yʉ́ mbɛti Oją ʉ
\q gätho ʉ ꞌda gue ꞌdahma ꞌdanꞌyo bʉ na yą, nɛ gätho ʉ ꞌda gue ꞌdahma ꞌdanꞌyo yʉ́ ꞌyʉ, nɛ gätho ʉ ꞌda gue ꞌdahma ꞌdanꞌyo yʉ́ häi mi ꞌbʉi.
\q
\v 10 Nɛ gá un ni tsꞌɛdi din tsꞌʉtꞌabi, nɛ dim mbäją bʉ di manda rá tsꞌɛdi Oją,
\q nɛ di manda bʉ ja ra häi, bi ꞌyɛ̨m ꞌbʉ min tuhu.
\m
\v 11 Nɛ nugä dra Xuuagä, ꞌbex dá nugä nɛ dá øcä yʉ́ nde yʉm ꞌbɛhni mahɛ̨tsꞌi ɛ̨mmɛ xʉn ngu yʉ muntsꞌi, ngue yʉ millone thoho madím ꞌbäꞌtꞌa mi hupʉ ja ran thutsꞌi, nɛ yʉn tꞌuti nɛ yʉ dącꞌyɛi.
\v 12 Nɛ gätho yʉm ꞌbɛhni mahɛ̨tsꞌi ntsꞌɛdi bin tuhu, nɛ bi ꞌyɛ̨m ꞌbʉ min tuhu:
\q Nangue bi du ra Jesús ra Tꞌʉdɛꞌyo,
\q rán säui din tꞌun rá tsꞌɛdi, nɛ ꞌbɛꞌa gätho di muui,
\q nɛ ran ꞌyomfɛ̨ni nuįxte, nɛ ra tsꞌɛdi nuįxte,
\q nɛ da hyąnba yʉ́m hman ʉ i numansu. Nɛ da tꞌɛ̨spi nɛ ɛ̨mmɛ da hnumanho.
\m
\v 13 Nɛ ꞌbex dá øcä bi mba ntꞌɛ̨spi a huxpʉ ja ran thutsꞌi, nɛ ra Jesús ra Tꞌʉdɛꞌyo. Gätho i ꞌbʉi bi manꞌʉ tengu nꞌdare thoho:
\q Mająpi thoho nɛ i hnumansu ngue nuįxte thoho. Nɛ din ja rá tsꞌɛdi xʉn ho,
\q nɛ gätho i ꞌbʉi da ꞌyɛ̨spi hønꞌbʉ go njąmꞌbʉ maząi. Njabʉ bi ma gätho i ꞌbʉpʉ mahɛ̨tsꞌi, nɛpʉ ja ra häi, nɛꞌʉ xʉn du, nɛꞌʉ ꞌbʉpʉ ja yʉ deją, ngue nꞌdatꞌa bi manꞌʉ.
\m
\v 14 Nɛ gätho goho yʉn tꞌuti i ꞌbäpʉ mahɛ̨tsꞌi bi ꞌyɛ̨na: “Nɛcähe nꞌdatꞌa dím bɛ̨mhbe a,” bi ꞌyɛ̨nꞌʉ. Nɛ gätho ꞌdäte magoho yʉ dącꞌyɛi mi ꞌbʉpʉ bin dąnyahmu i thąnde a huꞌinde bʉ mahɛ̨tsꞌi, nɛ ra Tꞌʉdɛꞌyo.
\c 6
\s Yoto yʉn cuahmi
\p
\v 1 Nɛ nugä dra Xuuagä dá nu ra Jesús ra Tꞌʉdɛꞌyo bi xøcꞌa rá mbʉdi rán cuahmi ra søcuą nɛ bi dʉꞌmi di tʉntsꞌa ra søcuą. Nɛ nꞌda ran tꞌuti bi xicä, nɛ ntꞌøde rá nde tengu ran gäni: “Ba ɛ̨cua gua nuua,” bi ꞌyɛ̨ngui.
\v 2 Nɛ dá hɛ̨tä bʉ, nɛ dá nu nꞌda ra tꞌaxca ndøfani. Nɛ nuꞌa mi huxpʉ mi hą nꞌda ran są, nɛ bi mba ma unni nꞌda ra corona. Nɛ bi mba bʉ ząi da dąh yʉn sʉi din ja.
\v 3 Nɛ nu ra Jesús ra Tꞌʉdɛꞌyo bi xøcꞌa ná yoho rán cuahmi ra søcuą. Nɛ dá øcä a bi mam manꞌda ran tꞌuti, bi xicä: “Ba ɛ̨hɛ, gua nu,” bi ꞌyɛ̨ngui.
\v 4 Nɛ dá nugä, bi bøm bʉ nꞌda ra thɛnga ndøfani. Nɛ mi huxpʉ nꞌda, nɛ bi mba ma unni ra espada xʉm mba. Nɛ bin tꞌunꞌna ran tꞌɛ̨di gue di japi din sʉꞌʉ yʉ jąꞌi gätho ꞌbʉpʉ ja ra ximhäi, ngue din hyo nꞌda ngu nꞌda ʉ.
\v 5 Nɛ nuꞌa ra Jesús ra Tꞌʉdɛꞌyo bi  xøcua ná hyu ran cuahmi, nɛ xø dá øcä rá nde manꞌda ran tꞌuti bi xicä: “Ba ɛ̨hɛ, gua nu,” bi ꞌyɛ̨ngui. ꞌBex dá nugä bi bøm bʉ nꞌda ra ꞌbondøfani, nɛ mi huxpʉ nꞌda mi hą ra tꞌɛntꞌi.
\v 6 Nɛ dá øcä nꞌda ra nde bi bøm bʉ mi ꞌbäh yʉn tꞌuti, bi ꞌyɛ̨na: “Høntꞌa nꞌda kilo ra trigo da dänꞌa nꞌdapa, nɛ høntꞌi hyu kilo ra cebada da dänꞌa nꞌdapa. Pɛ dami jamansuhʉ ra aceite nɛ ra vino, o gadí japi dim ꞌbɛdi.”
\v 7 Nɛ nuꞌbʉ mi xøcꞌa ná goho ran cuahmi a ra Tꞌʉdɛꞌyo, dá øcä rá nde manꞌda ran tꞌuti, bi ꞌyɛ̨ngui: “Ba ɛ̨hɛ gua nu,” bi ꞌyɛ̨na.
\v 8 Nɛ ꞌbex dá nugä bi bøm bʉ nꞌda ra ndøfani xʉn cꞌaxtꞌi tsꞌʉ. Nɛ mi huxpʉ a nꞌda tꞌɛ̨mbi ran dąte, nɛ mí tɛnꞌna ran dąte nꞌda gue xí bøm bʉ ꞌbʉ ʉ xʉn du. Nuꞌʉ bin tꞌun ra tsꞌɛdi di manda ʉ ná goho bʉ ꞌbʉh yʉ jąꞌi gätho ra ximhäi. Nɛ nuꞌʉ bin ja ra tsꞌɛdi gue da hyo yʉ jąꞌi nangue ra espada, nɛ nangue din tumanthuhu, nɛ nangue ra gɛ̨hɛ̨, nɛ yʉ zate da hyo yʉ jąꞌi.
\v 9 Nɛ nuꞌbʉ mi xøcꞌa ná cʉtꞌa rán cuahmi ra søcuą a ra Tꞌʉdɛꞌyo, dá nugä bʉ nꞌda ra mɛxa guepʉ i pa mꞌbøspe Oją, gue bim ꞌbøtsꞌe zɛhɛ ʉ yʉ ꞌyɛ̨cꞌyɛi. Nɛ dá nugä bi hyupʉ ꞌbimɛxa yʉ́ te ʉ gätho í tho a rám hman Oją, nɛ bi ma nangue ra Cristo.
\v 10 Nɛ gätho ʉ mi hupʉ ꞌbimɛxa ntsꞌɛdi bi ꞌyɛ̨na: “Ma Hmu tątethoho ni tsꞌɛdi, nɛ xʉn ho i, nɛ majuąni guím ma. Hamꞌmi pa gui tøꞌmi ngue gui ꞌyørpa ran juąnbi ʉ, nɛ gui cospa ʉ yʉ jąꞌi ꞌbʉpʉ ja ra ximhäi ꞌbɛꞌa bi ꞌyørcahe,” bi ꞌyɛ̨nꞌʉ.
\v 11 Pɛ nuꞌʉ bin tꞌun yʉ́ pahni xʉn tꞌaxi, nɛ bi sifi da døꞌmi tsꞌʉ ꞌda yʉ pa, ja gueꞌbʉ bi guaꞌʉ dí du a rám hman Oją ʉ yʉ́ miꞌyɛ̨hɛhʉ, ngue tengu ʉ.
\v 12 Nɛ nugä dra Xuuagä dá nugä ra Tꞌʉdɛꞌyo bi xøcꞌa ná ꞌdato rán cuahmi a ra søcuą. Nɛ ꞌbex bin ja nꞌda ra ꞌyąmhäi ntsꞌutho. Nɛ nuꞌa ra hyadi gätho ꞌbex bi boqui tengu nꞌda ra ꞌboꞌbøꞌtꞌe, nɛ nuꞌa ra ząna ꞌbex bi thɛngui tengu ra ji.
\v 13 Nɛ gätho yʉ sø bi däpʉ häi, tengu nꞌda ra za i høh yʉ́n dätꞌo ꞌbʉ i huąn ran dąhi.
\v 14 Nɛ nubʉ xʉn cꞌammi ra ximhäi, bi mba mꞌbantsꞌi tenguꞌbʉ ra søcuą, bim ꞌbɛdi. Nɛ gätho yʉ tꞌʉhäi mi ja bʉ ja ra dehe, pɛ nɛꞌʉ gätho yʉ tꞌøhø, bi mba ma pädi bʉ mi ja.
\v 15 Nɛ gätho yʉ tsꞌʉtꞌabi bʉ ja ra häi, nɛ gätho yʉ́ ngʉrpi yʉ jąꞌi, nɛ gätho yʉ hmudofʉi, nɛ gätho yʉ mɛmbɛti, nɛ gätho i jasɛ yʉ́ tsꞌɛdi, nɛ gätho yʉ ꞌyɛ̨hɛ, nɛ gätho hing yʉ ꞌyɛ̨hɛ, bi mba bʉ dąpo, mi honi hapʉ din ꞌyąni guepʉ ja yʉ hyąnhäi, o guepʉ ja yʉ hyądo.
\v 16 Nɛ gätho mi nde ʉ da zɛmba yʉ́ yą yʉ do ꞌbʉ bi xoꞌtꞌ yʉ tꞌøhø nɛ da goꞌmi, ngue i su da nu a rá cuɛ a i huxpʉ ja ran thutsꞌi mahɛ̨tsꞌi, nɛꞌa ra Tꞌʉdɛꞌyo.
\v 17 Nguetho bi zøn ra pa ran ʉnbi ntsꞌutho, nɛ njon da zä da hyät ran ʉnbi.
\c 7
\s Rá ꞌbede ʉ yʉ israel bʉ mahɛ̨tsꞌi
\p
\v 1 Nɛ nubʉya dá nugä goho yʉm ꞌbɛhni mahɛ̨tsꞌi, nɛ ꞌda a nꞌdanni mi ꞌbäpʉ rá nyąni ra ximhäi i sąmꞌma ran dąhi i ꞌyo ua gue xíngui tsꞌʉ din ꞌyo bʉ ja ra häi, o guepʉ ja ra dądeją, nɛ xínga gue di ꞌyąn yʉ za. Nɛꞌʉ yʉ dądeją hin di ꞌyąni, di nɛqui tengu nꞌda ra xito xʉn juąni thoho.
\v 2 Nɛ dá nugä nꞌda ram ꞌbɛhni mahɛ̨tsꞌi bí ꞌyɛ̨pʉ ní bøx ra hyadi, nɛ nuꞌa bá hyą a rá sello Oją ngue i ꞌbʉi, nɛ ntsꞌɛdi bi mbaꞌtꞌʉ goho yʉ́m ꞌbɛhni Oją gue i ꞌbäpʉ yʉ́ nyąni ra ximhäi. Gueꞌʉ mi ꞌbäpʉ bin tꞌun ra tsꞌɛdi di ʉnba ra häi nɛ ra dądeją.
\v 3 Nɛ nuꞌa ram ꞌbɛhni mi hą ra sello, bi xi ʉ miꞌda gue da døꞌmi tsꞌʉ, him ꞌbex di ʉnba ra häi o gue ra dądeją o gue yʉ za, ja gueꞌbʉ di selloba bʉ ja yʉ́ dɛ̨ yʉ ꞌyɛ̨cꞌyɛi a rá sello Oją.
\v 4 Nɛ dá øcä hangu bi ꞌbeh yʉ jąꞌi di jap ra sello yʉ́ dɛ̨, nꞌda ciɛnto nɛ yote ma goho mahuąhi, bi thąsta ʉ yʉ́m bomꞌbɛto yʉ́ tsꞌʉntꞌʉ ra Israel.
\v 5 Bi thąsta ʉ ꞌdɛꞌmayo mahuąhi yʉ́m bomꞌbɛto ra Judá. Nɛ bi thąsta ʉ ꞌdɛꞌmayo mahuąhi yʉ́m bomꞌbɛto ra Rubén. Nɛ bi thąsta ʉ ꞌdɛꞌmayo mahuąhi yʉ́m bomꞌbɛto ra Gad.
\v 6 Nɛ bi thąsta ʉ ꞌdɛꞌmayo mahuąhi yʉ́m bomꞌbɛto ra Aser. Nɛ bi thąsta ʉ ꞌdɛmayo mahuąhi yʉ́m bomꞌbɛto ra Neftalí. Nɛ bi thąsta ʉ ꞌdɛꞌmayo mahuąhi yʉ́m bomꞌbɛto ra Manasés.
\v 7 Nɛ bi thąsta ʉ ꞌdɛꞌmayo mahuąhi ʉ yʉ́m bomꞌbɛto ra Simeón. Nɛ bi thąsta ʉ ꞌdɛꞌmayo mahuąhi yʉ́m bomꞌbɛto ra Leví. Nɛ bi thąsta ʉ ꞌdɛꞌmayo mahuąhi ʉ yʉ́m bomꞌbɛto ra Isacar.
\v 8 Nɛ bi thąsta ʉ ꞌdɛꞌmayo mahuąhi ʉ yʉ́m bomꞌbɛto ra Zabulón. Nɛ bi thąsta ʉ ꞌdɛꞌmayo mahuąhi ʉ yʉ́m bomꞌbɛto ra José. Nɛ bi thąsta ʉ ꞌdɛꞌmayo mahuąhi ʉ yʉ́m bomꞌbɛto ra Benjamín.
\s Yʉ jąꞌi mi he yʉ pahni xʉn tꞌaxi
\p
\v 9 Nɛ nugä dra Xuuagä, dá handi nɛ dá nugä xʉn ngu yʉ jąꞌi nɛ njon da zä da mbede hangu na ngu dá nugä. Dá nu ʉ i ꞌbäpʉ gätho ʉ ꞌda gue ꞌdahma ꞌdanꞌyo bʉ na yą, nɛ gätho ʉ ꞌda gue ꞌdahma ꞌdanꞌyo yʉ́ ꞌyʉ, nɛ gätho ʉ ꞌda gue ꞌdahma ꞌdanꞌyo yʉ́ häi mi ꞌbʉi. Nɛ gätho ʉ mi ꞌbäpʉ mí hɛ̨tꞌa mí huxpʉ ja ran thutsꞌi bʉ mahɛ̨tsꞌi, nɛ mi hɛ̨tꞌa ra Jesús ra Tꞌʉdɛꞌyo. Gätho mi ꞌbäpʉ mi he yʉ́ pahni xʉn tꞌaxi, nɛ mi cą yʉ xijamꞌboza.
\v 10 Nɛ gätho ntsꞌɛdi bi ꞌyɛ̨na:
\q Ɛ̨mmɛ dín numanho ahe, ma Oją ahe,
\q tątetho ni tsꞌɛdi, nɛꞌe gra Jesús gra Tꞌʉdɛꞌyo, dí ɛ̨sꞌahe ngue gá pøje, bi ꞌyɛ̨n ʉ.
\m 
\v 11 Nɛ gätho yʉm ꞌbɛhni mahɛ̨tsꞌi bi mbäꞌtsꞌa mi hupʉ made bʉ mahɛ̨tsꞌi, nɛ gätho ꞌdäte ma goho yʉ dącꞌyɛi nɛꞌʉ gätho goho yʉn tꞌuti bi mbäsꞌ thoho gätho mi ꞌbʉpʉ, bin dąnyahmu, bi nyeꞌmahäi, bi dąnde Oją i hu inde bʉ.
\v 12 Gätho bi ꞌyɛ̨na:
\q Nɛcähe ꞌdatꞌa dím bɛ̨mhbe, dí ɛ̨sꞌahe, ma Oją ahe, nuįxte xʉn ho i.
\q Nɛ gätho guí pądi. Ząi dí xi ahe jamadi nangue ran ho guí ørcahe. Dín numansu ahe, nɛ nte guí hɛ̨mbi, pɛ i ja ni tsꞌɛdi xʉn ho, nɛ gam ꞌbʉi hønꞌbʉ go njąmꞌbʉ maząi.
\q Nɛ hønꞌa tho dím bɛ̨n ahe ya, bi ꞌyɛ̨nꞌʉ.
\m
\v 13 Nɛ nu nꞌda ra dącꞌyɛi bi ꞌyängä dra Xuuagä: “Ha guí pądi hapʉ bá nɛx yʉ.”
\v 14 Nɛ dá ɛ̨mpꞌa ra dącꞌyɛi: “Nuꞌi guí pądi.” Nɛ nuꞌa ra dącꞌyɛi bi ꞌyɛ̨ngui: “Nuꞌʉ gueꞌʉ bi ꞌyɛ̨cꞌyɛi Oją ꞌbʉ mi ja ran ʉnbi ndumbʉi tho bʉ ja ra ximhäi. Nɛ nuꞌa rá ji ra Jesús gue a í bo yʉ́ pahni ʉ, bi japi xtan tꞌaxi.
\v 15 Janangueꞌa i ꞌbähnʉ ja rá hmi Oją yʉ. Nɛ in ꞌyɛ̨hɛ ma pa nɛ ra xui ua ja rá niją Oją. Nɛ gueꞌa i huxpʉ ja ran thutsꞌi di jamansu yʉ.
\v 16 Nɛ him manꞌdandį din tumanthuhu yʉ, nɛ him manꞌdandį din tuthe. Nɛ him manꞌdandį da nu ran ʉnbi nam pa ra hyadi, xinga gue ʉ miꞌda xʉm pa di ʉnbi.
\v 17 Nguetho nu ra Jesús ra Tꞌʉdɛꞌyo gue i ꞌbʉ inde bʉ mahɛ̨tsꞌi da ꞌyøtꞌe tengu ꞌbʉ ra mbändɛꞌyo, nɛ da zixpʉ hapʉ i ja ra dehe gue di un ra te yʉ́ mbʉi. Nɛ nuꞌa Oją him manꞌdandį di japi din zoni.”
\c 8
\s Ná yoto ran cuahmi nɛ ra tꞌutsꞌi ra oro
\p
\v 1 Nɛ nuꞌbʉ mi xøcua na yoto yʉ́n cuahmi ra søcuą, made ora njom bin yą bʉ mahɛ̨tsꞌi nɛ nte bi ꞌyąni.
\v 2 Nuꞌbʉ mí guaꞌa bʉya dá nugä yoto yʉm ꞌbɛhni mahɛ̨tsꞌi ząi i ꞌbäpʉ ja rá hmi Oją, nɛ bin tꞌun yʉ thʉxi nꞌda ngu nꞌda.
\v 3 Nɛ dá nugä nꞌdanꞌyo ram ꞌbɛhni mahɛ̨tsꞌi, bi mba bim ꞌbäpʉ ja rá mɛxa yʉn tꞌunni, nɛ mi thɛ nꞌda ra tꞌutsꞌi ra oro nɛ bi mba ntꞌunni xʉn ngu rá ndɛga ra za din zø bʉ, i yʉmanꞌu, nɛ nuꞌa rá ꞌbifi da mba ma uąspi yʉ́m hma yʉ ꞌyɛ̨cꞌyɛi ꞌbʉ i ɛ̨spa Oją. Nɛ gätho i zø bʉ ja rá mɛxa ra oro gue i høpʉ ja rá hmi a Oją i hu inde bʉ.
\v 4 Nɛ nuꞌa ra ꞌbifi i nɛxpʉ ja rá tꞌutsꞌi a ram ꞌbɛhni, mauątsꞌi yʉ́m hman yʉ ꞌyɛ̨cꞌyɛi ꞌbʉ i ɛ̨spa Oją, nɛ bi zøm bʉ bí ꞌbʉ Oją.
\v 5 Nɛ nuꞌa ram ꞌbɛhni bi yusꞌ yʉ dɛspi bʉ ja ra tꞌutsꞌi ra oro gue mi zø bʉ ja ra mɛxa, nɛ bi ꞌyɛm bʉ ja ra ximhäi. Nɛ ꞌbex dá øcä ntsꞌɛdi yʉn gäni din thoni. Nɛ dá nu ntsꞌɛdi yʉ huɛi bi cꞌuɛ̨ti bʉ ja ra ximhäi, nɛ bin ja nꞌda ra ꞌyąmhäi bʉ.
\s Yʉ thʉxi
\p
\v 6 Nuya bim ꞌbäpʉ yoto yʉm ꞌbɛhni mahɛ̨tsꞌi i tøꞌmi da huixtꞌ yʉ́ thʉxi.
\v 7 Nɛ rá mbʉdi ram ꞌbɛhni bi huixtꞌ rá thʉxi, ꞌbex bi tꞌɛn bʉ häi yʉn do, nɛ ra sibi, mauąspi ra ji. Nɛ ná hyu xɛqui ra häi bin zø, bi gopʉ mi yoxɛqui ra häi. Nɛpʉ na hyu xɛqui bin zø yʉ za nɛ yʉ tꞌɛi xʉn cꞌammi. Pɛ bi gohi yo xɛqui ngue him bin zø.
\v 8 Nɛ na yoho yʉm ꞌbɛhni bi huixtꞌ rá thʉxi, nɛ dá nu tengu nꞌda ra tꞌøhø xʉn ndoho, i sø nɛ ɛ̨mmɛ ndøspi, nɛ bi mba ntꞌɛntꞌi bʉ ja ra dądeją.
\v 9 Nɛ na hyu xɛqui ra dądeją bi japi din ji. Nɛ gätho bi du ʉ mi ꞌbʉpʉ mbo ra dehe. Nɛ gätho yʉ dąmbosa gue mi ꞌyo bʉ bin tsꞌoni. Pɛ bi go ʉ yoxɛqui ra dądeją ngue him bin tsꞌoni.
\v 10 Nɛ ná hyu yʉm ꞌbɛhni bi huixtꞌ rá thʉxi. Nɛ ꞌbex bi däh mahɛ̨tsꞌi nꞌda ra sø xʉn ndoho ngue i zø nɛ ɛ̨mmɛ xɛh yʉ tꞌʉsibi. Nɛ bi däpʉ ja ná hyu yʉ dąthe nɛ ná hyu yʉ mbøthe bʉ ja ra ximhäi.
\v 11 Nu rá thuhu ra sø ngue bi dägui ra Ajenjo na. Nɛ guepʉ bi däh ra sø gätho ra dehe ɛ̨mmɛ bi juꞌtsꞌi. Nɛ xʉn ngu yʉ jąꞌi bi du ngue bi zi a ra dehe xʉn ju.
\v 12 Nɛ nu ná goho ram ꞌbɛhni bi huixtꞌ rá thʉxi. Nɛ ꞌbex bi boqui ná hyu xɛqui ra hyadi, nɛꞌa ná hyu xɛqui ra ząna bi boqui. Nɛ a ná hyu nɛtsꞌi yʉ sø bi boqui. Nɛ mbɛ ngoho ora ra pa nɛ ra xui him bin ja ran nɛqui.
\v 13 Nɛ drá Xuuagä dá nu nꞌda ram ꞌbɛhni mahɛ̨tsꞌi mi ꞌyo inde bʉ mahɛ̨tsꞌi, nɛ ɛ̨mmɛ ntsꞌɛdi mbafi, bi ꞌyɛ̨na: “Huɛ̨cate, huɛ̨cate, huɛ̨cate yʉ jąꞌi ꞌbʉpʉ ja ra ximhäi, nangue ꞌbɛꞌa din ja ꞌbʉ bi huixtꞌ yʉ́ thʉxi yʉ mi hyu yʉm ꞌbɛhni mahɛ̨tsꞌi gue i ꞌbähnʉ,” bi ꞌyɛ̨na.
\c 9
\p
\v 1 Nɛ ná cʉtꞌa yʉm ꞌbɛhni bi huixtꞌ rá thʉxi nɛ dá nu nꞌda ra sø tengu nꞌda ram ꞌbɛhni mahɛ̨tsꞌi ngue hingui ho, bi däpʉ mahɛ̨tsꞌi bi zøpʉ ja ra ximhäi. Nɛ bin tꞌunꞌna nꞌda ran sogui da xoc ra hyąhäi ngue ɛ̨mmɛ xʉn hɛ̨ nɛ ntsꞌutho, guepʉ i ꞌbʉ a ra zįthu.
\v 2 Nɛ nuꞌbʉ mí xocꞌa, bi bøm bʉ ra ꞌbifi xʉm pothi tengu ꞌbʉ fʉn ra sibi xʉn ndoho. Nɛ ꞌbex bi goꞌma ra hyadi a ra ꞌbifi nɛ bin uąntsꞌui ran dąhi gätho ra ximhäi.
\v 3 Nɛ xʉn ngu yʉ hɛꞌyąxi bi bøm bʉ ja ra ꞌbifi ngue bin ꞌyo gätho ra ximhäi. Nɛ bin tꞌun yʉ́ tsꞌɛdi da ꞌyøtꞌe tengu ran ʉnbi di un yʉ mbozʉ.
\v 4 Nɛ bi sifi ngue hin di tsꞌon yʉ tꞌɛi o gue yʉ za o gue miꞌda i ja ua ja ra ximhäi, høntꞌʉ yʉ jąꞌi di ʉnbi gätho toꞌo him mi ja rá sello Oją bʉ ja yʉ́ dɛ̨.
\v 5 Nɛ him bi japi da hyo yʉ jąꞌi, høntꞌa cʉtꞌa ząna di ʉnba yʉ jąꞌi, tengu i øtꞌ yʉ mbozʉ ꞌbʉ i sa nꞌda.
\v 6 Nɛ nuꞌʉ yʉ pa gue i ꞌyo ua yʉ hɛꞌyąxi in nde yʉ jąꞌi da du pɛ hingui sä da du, høntꞌa ran ʉnbi thoho da nu.
\v 7 Nɛ nu yʉ hɛꞌyąxi di nɛqui tengu yʉ fani ɛ̨na da mba ra sʉi, pɛ nu yʉ́ hmi tengu yʉ́ hmi yʉ jąꞌi, nɛ i huꞌtsꞌ yʉ corona yʉ oro.
\v 8 Nɛ nu ʉ mi ja yʉ́ xtą tengu nꞌda ra xisu, nɛ mi ja yʉ́ tsꞌi tengu yʉ́ tsꞌi ra dązate.
\v 9 Nɛ nu ʉ mi ja bʉ yʉ́ tįya tengu rá xi ra dąhuą, pɛ xʉm mɛ tengu ra tꞌɛgui. Nɛ di hį yʉ́ zahua tenguꞌbʉ yʉ carro i jʉt yʉ fani i tihi, ɛ̨mmɛ di thoni tenguꞌbʉ i pa bʉ ja ran sʉi.
\v 10 Nɛ nu yʉ́ ꞌyozʉ tengu yʉ mbozʉ, nɛ cʉtꞌa ząna bin tꞌun ran tꞌɛ̨di di ʉnba yʉ jąꞌi, nangue yʉ́ ꞌbite i ja yʉ́ ꞌyozʉ.
\v 11 Nɛ nuꞌa rá hmu ʉ yʉ hɛꞌyąxi ꞌbʉpʉ ja ra hyąhäi ngue ɛ̨mmɛ xʉn hɛ̨, nɛ nuꞌa rá thuhu ra Abadón ngue rá nde ra hebreo, nɛ nuꞌʉ yʉ griego ɛ̨mbi ra Apolión. Pɛ nu rá thuhu nde da ma, gue nde di tsꞌoni ꞌbɛꞌa gätho i ja.
\v 12 Nuya rá mbʉdi ran ʉnbi bi thogui, pɛ ba ɛ̨h mi yoho yʉn ʉnbi.
\v 13 Nɛ ná ꞌdato yʉm ꞌbɛhni bi huixtꞌ rá thʉxi. ꞌBex dá øcä nꞌda ra nde bi bøm bʉ ja yʉ́ dąni gueꞌʉ mi ja bʉ goho yʉ́ tsꞌątꞌi ra mɛxa ngue ra oro i høpʉ ja rá hmi Oją.
\v 14 Nɛ nu a ra nde bi ꞌyɛ̨mpꞌa ná ꞌdato yʉm ꞌbɛhni mahɛ̨tsꞌi gue i ja bʉ rá thʉxi: “Dami xocꞌʉ goho yʉm ꞌbɛhni mahɛ̨tsꞌi ngue nthuꞌtꞌi bʉ ja ra dąthe Eufrates,” bi tꞌɛ̨mbi.
\v 15 Nɛ bi mba nsoqui, nguetho bi døꞌmi da zøn ra ora, nɛ ra pa, nɛ ra ząna, nɛ ra jɛya da socꞌʉ. Nɛ da mba ʉ da hyo a ná hyu njąꞌi bʉ ꞌbʉh yʉ jąꞌi gätho ra ximhäi.
\v 16 Nɛ yociɛnto millone yʉ dofʉi i hux yʉ ndøfani bi dɛnꞌndʉ. Nugä dra Xuuagä dá øcä hangu na ngu bi mba. 
\v 17 Nɛ in ja bʉ ꞌbʉ má nugä yʉ ndøfani, nɛ nuꞌʉ yʉ dofʉi madin tøgue bi däc yʉ́ tįya ra tꞌɛgui ma cʉhʉ xʉn thɛni, xʉn cꞌammi nɛ xʉn cꞌaxtꞌi. Nɛ nuꞌʉ yʉ́ yą yʉ ndøfani tengu yʉ́ yą yʉ dązate. Nɛ bi bøm bʉ ja yʉ́ nde yʉ ndøfani ra sibi nɛ ra ꞌbifi nɛ ra dɛspi.
\v 18 Nɛ na hyu ram ꞌbede yʉ jąꞌi mi ꞌbʉcua ja ra ximhäi bi du nangue rán ʉnbi ra sibi, ra ꞌbifi nɛ ra dɛspi gue bi bøm bʉ yʉ́ nde yʉ ndøfani.
\v 19 Nu yʉ ndøfani mi ja yʉ́ tsꞌɛdi nangue ꞌbɛꞌa bi bøm bʉ ja yʉ́ nde, nɛ mi ja ra tsꞌɛdi yʉ́ ꞌyozʉ, nguetho yʉ́ ꞌyozʉ i ja yʉ́ yą tengu yʉ pozʉ di ʉnba yʉ jąꞌi.
\v 20 Nɛ gätho miꞌda yʉ jąꞌi gue him bi du, him bi päh yʉ́n ꞌyomfɛ̨ni, pɛ guextaꞌa bi dąnde yʉ zįthu nɛꞌʉ yʉ hmite bi ꞌyøzɛhɛ, yʉ́n tꞌøtꞌe ra oro nɛ ra tꞌaxi nɛ ra fɛxna tꞌɛgui, nɛ ra do, nɛ yʉ za, yʉ hmite ʉ gue hingui nute nɛ hingui øhnahyą, nɛ hingui sä din ꞌyo.
\v 21 Nɛ xingui tsꞌʉ bi hyɛh yʉn tꞌøtꞌe xʉn tsꞌo. Guextaꞌa bin hyodu nɛ bim bądi nɛ bin ꞌyomtꞌɛ̨ni, nɛ bim pɛ̨.
\c 10
\s Ra tꞌʉsøcuą i cą nꞌda rám ꞌbɛhni Oją
\p
\v 1 Nɛ nugä dra Xuuagä dá nugä manꞌda rám ꞌbɛhni Oją bá cąh mahɛ̨tsꞌi, mi ja rá tsꞌɛdi. Nɛ bán ꞌyoui nꞌda ra güi, nɛ mi comba ra ꞌbɛjʉni rá yą. Nɛ nuꞌa rá hmi bi yoxni tengu ra hyadi, nɛ nuꞌʉ yʉ́ gua madi nɛqui tenguꞌbʉ nꞌda ra sibi.
\v 2 Nɛ mi cą nꞌda ra tꞌʉsøcuą ma tʉntsꞌi. Nɛ nuꞌa rán ꞌyɛigua mí nɛmpꞌʉ ja ra dądeją, nɛ nuꞌa rá gąhągua mi nɛmpꞌʉ ja ra häi.
\v 3 Nɛ nuꞌa ram ꞌbɛhni ntsꞌɛdi bi mbafi, tenguꞌbʉ i mba a ra dązate.
\v 4 Nɛ nuꞌbʉ mi mbafi, ꞌbex dá øcä yoto yʉn gäni. Nɛ mí ɛ̨ngä xcá oꞌtꞌä ra søcuą ꞌbɛꞌa dá nugä, pɛ ꞌbex dá øcä nꞌda ra nde mahɛ̨tsꞌi bi ꞌyɛ̨ngui: “ꞌYo guí oꞌtꞌya ꞌbɛꞌa bi ma yʉn gäni, nguetho hingui sä gui ma ꞌbɛꞌa bi manꞌʉ.”
\v 5 Nɛ dá nugä rám ꞌbɛhni Oją mahɛ̨tsꞌi gue i ꞌbäpʉ ja ra deją nɛpʉ ja ra häi, bi ꞌuąꞌtsꞌ rán ꞌyɛi bʉ mahɛ̨tsꞌi.
\v 6 Nɛ bi ndønba rá thuhu Oją i ꞌbʉi nɛ dim ꞌbʉi maząi, gue bi ꞌyøtꞌ mahɛ̨tsꞌi nɛ ra ximhäi nɛ ra deją nɛ gätho ꞌbɛꞌa i jabʉ. Bi ndønba rá thuhu, gue majuąni hin da døꞌmi miꞌda yʉ pa ꞌbɛꞌa din ja.
\v 7 Nɛ ɛ̨na, nuꞌbʉ bi huixtꞌ rá thʉxi a ná yoto rám ꞌbɛhni Oją gue mi ꞌbʉhnʉ, ꞌbex din ja bʉya ꞌbɛꞌa bi xi Oją yʉ́ pøngahyą mayaꞌbʉ gue din ja, gue him mám fądi.
\v 8 Nɛ nuꞌa ra nde mahɛ̨tsꞌi bi ꞌyɛ̨ngä mahønꞌa: “Nuꞌi, ní mba bʉ, bá cąnꞌa ra søcuą gue i cąꞌa rám ꞌbɛhni Oją mahɛ̨tsꞌi i ꞌbähnʉ ja ra deją nɛ ra häi.”
\v 9 Janangueꞌa dá mbagä bʉ mi ꞌbäꞌa ram ꞌbɛhni mahɛ̨tsꞌi, nɛ dá xifi gue di ꞌdacꞌa ra søcuą. Nɛ nuꞌa ram ꞌbɛhni bi ꞌyɛ̨ngui: “Cąni, nɛ gui sa. Nɛ nuꞌbʉ gá sa, tenguꞌbʉ ra tꞌafitꞌasa bʉ dán zä ni nde, pɛ nuꞌbʉ bi mba bʉ ni foho ɛ̨mmɛ xtán ju bʉya.”
\v 10 Nɛ dá cąngä ra søcuą bʉya, nɛ dá sagä a. Nɛ bin ja tengu bi xicä ram ꞌbɛhni, xʉ cʉhi ꞌbʉ má sagä, ɛ̨mmɛ xʉn ų, pɛ guepʉ ma foho, ɛ̨mmɛ xʉn ju.
\v 11 Nɛ bi xiqui: “Jatho gui mampꞌa rám hma Oją mahønꞌa, hønbʉ go hapʉ ꞌbʉh yʉ jąꞌi ꞌdahma ꞌdanꞌyo bʉ na yą nɛ ꞌda nꞌdanni yʉ́ häi, nɛpʉ ꞌbʉh yʉ tsꞌʉtꞌabi.” Nɛ gueꞌa bi sicä a dra Xuuagä. 
\c 11
\s Yoho yʉ pøngahyą
\p
\v 1 Nɛ nugä dra Xuuagä, bin ꞌdacä nꞌda ra tꞌɛni gue ra za, nɛ bi tꞌɛ̨ngui: “Ní mba bʉ ja ra dąniją nɛ gui ꞌyɛni hangu na ndoho ra ngu. Nɛpʉ ja ra mɛxa i pøx yʉn tꞌunni yʉ jąꞌi.” Nɛ bi siqui ga pede hangu na ngu yʉ jąꞌi i thąnde Oją bʉ.
\v 2 Pɛ bi sicä: “O guí ɛni hangu na ndoho ra häi ma mbäꞌtꞌi bʉ thi ja ra dąniją, nguetho bin tꞌunꞌdʉ yʉ jąꞌi ꞌdahma ꞌdanꞌyo bʉ na yą, gueꞌʉ hingui pą Oją. Nɛ yote ma yozna din ꞌyo bʉ nɛ di ʉnꞌna rá hogahnini Oją.”
\v 3 Nɛ bi ꞌyɛ̨ngui: “Ga pɛnhdä bʉ yoho ma pøngahyą, nɛ da hye yʉ he tenguꞌbʉ i tu yʉ́ mbʉi. Nɛ nꞌda mahuąhi yo ciɛnto nɛ hyąte pa da manꞌa mam hmangä bʉ ʉ,” ɛ̨n Oją.
\v 4 Nɛ nuꞌʉ yoho yʉ́ pøngahyą Oją, gueꞌʉ mí uꞌʉ yoho yʉ za ngue yʉ olivo, nɛꞌʉ yoho bʉ tøh yʉ lámpara gue i ꞌbäpʉ ja rá hmi ra Hmu mahɛ̨tsꞌi, gueꞌa di manda gätho ra ximhäi.
\v 5 Nɛ toꞌo im bɛ̨ni di ʉnba ʉ yoho yʉn ꞌyohʉ gue yʉ́ pøngahyą Oją, da bøn ra sibi bʉ yʉ́ nde ngueꞌa í zøꞌʉ. Nɛ gueꞌa dí duꞌʉ gätho yʉ́n sʉihʉ ʉ yoho yʉ́ pøngahyą Oją.
\v 6 Nɛ nuꞌʉ yoho yʉ pøngahyą, din ja yʉ́ tsꞌɛdi ngue di japi hin din ꞌye gätho yʉ pa gue dim pøngahyą bʉ. Nɛ din ja rá tsꞌɛdi gue gätho yʉ dehe di japi ngue din ji. Nɛ din ja yʉ́ tsꞌɛdi høntꞌa go ꞌbɛꞌa man ʉnbi di ʉnba ra ximhäi, høntꞌa go ní pa i nde.
\v 7 Nɛ nuꞌbʉ mi guaꞌa rá ꞌbɛfi Oją ʉ, ꞌbex bi bøm bʉ ja ra hyąhäi ɛ̨mmɛ xʉn hɛ̨ tengu nꞌda ran dątezate, rám ꞌbɛhni ra zįthu ɛ̨mmɛ ntsꞌutho. Nɛ bi mba bʉ, bi zʉꞌʉ yoho yʉ́ pøngahyą Oją, nɛ bi dąha bi hyo ʉ.
\v 8 Nɛ nuꞌʉ yʉ́ ngøcꞌyɛi ʉ yoho bi du, mi ꞌbɛm bʉ ja ra calle made ra dąhnini, gue nꞌdatꞌa ra hnini guepʉ bi du ra Hmu mahɛ̨tsꞌi bʉ ja ra pontꞌi. Nɛ nuꞌa ran tsꞌo bin ja bʉ ja ra dąhnini ꞌdaꞌangu nan tsꞌoui bin ja bʉ ja ra hnini Sodoma, nɛpʉ ja ra häi Egipto.
\v 9 Nɛ nhyupa made bi mba yʉ jąꞌi gätho ꞌdahma ꞌdanꞌyo bʉ na yą gue bi nɛxpʉ gätho yʉ häi, bi hyɛ̨tꞌʉ ꞌbom bʉ xí du. Nɛ him bi japi bi mba ntꞌägui.
\v 10 Nɛ gätho yʉ jąꞌi i ꞌbʉcua ja ra ximhäi bin johya ꞌbʉ mi du ʉ, nɛ nangue ran johya, bi un yʉn tꞌunni nꞌda ngu nꞌda, nɛ bi hyu yʉ́ mbʉi ngue hin di paha mahønꞌa ʉ yʉ́ pøngahyą Oją, nguetho bi nu ran ʉnbi nangue ꞌbɛꞌa bi ꞌyørpa ʉ.
\v 11 Pɛ nuꞌbʉ mi tho a nhyupa made mi ꞌbom bʉ, pɛ Oją bi un ra xɛhyą mahønꞌa, nɛ ꞌbex bi ndantsꞌʉ, nɛ gätho toꞌo bi nu, ɛ̨mmɛ bin su ʉ.
\v 12 ꞌBex bá ɛ̨ꞌa nꞌda ra nde mahɛ̨tsꞌi ntsꞌɛdi bin yą, bi ꞌyɛ̨mpꞌʉ: “Ba ɛ̨cua ya,” bi ꞌyɛ̨na. Nɛ bi ndex mahɛ̨tsꞌi ʉ, in ꞌyohʉ nꞌda ra güi. Nɛ gätho yʉ́n sʉihʉ mi ꞌbäpʉ bi nu ꞌbɛꞌa bin ja.
\v 13 Nɛ nuꞌbʉ mi mba ʉ yʉ́ pøngahyą Oją, ꞌbex bi ꞌyąn ra häi bʉ ja ra dąhnini, ɛ̨mmɛ ntsꞌutho. Nɛ ná ꞌdɛtꞌa ra xɛqui ra hnini bin tsꞌoni, yoto mahuąhi yʉ jąꞌi bi du nangue ntsꞌɛdi ra ꞌyąnhäi. Nɛ nuꞌʉ yʉ jąꞌi gue him bi du, ɛ̨mmɛ bin su, nɛ bi ꞌyɛ̨spa Oją mahɛ̨tsꞌi bʉya.
\v 14 Nuya ná yoho yʉn ʉnbi bi thogui, nɛ ꞌbex ba ɛ̨ꞌa ná hyu ran ʉnbi.
\s Ná yoto ra thʉxi 
\p
\v 15 Nɛ nuꞌbʉ mi huixtꞌ rá thʉxi a ná yoto ram ꞌbɛhni mahɛ̨tsꞌi gue mi ꞌbäpʉ, ꞌbexque ntꞌøde bʉ mahɛ̨tsꞌi xʉn ngu yʉ nde ntsꞌɛdi bin yą, bi ꞌyɛ̨na: 
\q Nuya gätho ra ximhäi bi dą Oją ma Hmuhʉ,
\q nɛꞌa ra Cristo bi huahni, 
\q nɛ høntꞌʉ di manda bʉ hønꞌbʉ go njąmꞌbʉ maząi, bi ꞌyɛ̨nꞌʉ yʉ nde i yą mahɛ̨tsꞌi.
\m 
\v 16 Nɛ nuꞌʉ ꞌdäte magoho yʉ dącꞌyɛi ngue mi hupʉ ja yʉ́n thutsꞌi di mbäꞌtꞌa Oją bʉ mi hudi, bin dąnyahmu nɛ bi dąnde Oją.
\v 17 Nɛ bi ꞌyɛ̨m ꞌbʉ mi dąnde:
\q Nuꞌi ma Oją ahe nte guí hɛ̨mbi,
\q Nuꞌi ząi guí ꞌbʉi, nɛ ząi gmi ꞌbʉi,
\q nuya gá dʉꞌmi gá ꞌbɛrpa yʉ́ tsꞌɛdi gätho miꞌda,
\q nɛ da zä gui manda xʉn ho ꞌbɛꞌa gätho i ja.
\q Dí xi ahe jamadi, ngue ya gá ꞌyuh ni tsꞌɛdi tąte thoho.
\q 
\v 18 Nuꞌʉ yʉ jąꞌi i ꞌbʉpʉ hønbʉ go hapʉ i ja yʉ häi ɛ̨mmɛ bin cuɛ
\q ngue ya bi zøn ra ora da nu ran ʉnbi.
\q Nuya bi zøn ra ora da nu nin juąnbi, nɛ gätho ʉ xʉn du.
\q Bi zøn ra ora gue gui unꞌdʉ ya ꞌbɛꞌa bi dąꞌʉ ni ꞌyɛ̨hɛ nɛ ni pøngahyą.
\q Nɛ bi zøn ra ora gue gui unꞌdʉ yʉn tꞌunni gätho bi ꞌyɛ̨cꞌyɛi,
\q høntꞌa go toꞌo i ja yʉ́ tsꞌɛdi, nɛꞌʉ hinꞌyʉ yʉ́ tsꞌɛdi.
\q Nɛ bi zøn ra ora, gue gui juaꞌʉ gätho toꞌo di ʉnba yʉ́ mijąꞌihʉ, bi ꞌyɛ̨nꞌʉ.
\m
\v 19 Nɛ nuꞌbʉ mi guaꞌa bi manꞌʉ yʉ dącꞌyɛ̨i, dra Xuuagä dá nugä nsoqui ra dąniją mahɛ̨tsꞌi. Nɛ dá nugä ra huada i høpʉ mbo, guepʉ mꞌbɛꞌtsꞌi ran hoqui bi ꞌyøtꞌui Oją ʉ yʉ́ ꞌyɛ̨cꞌyɛi. Nɛ bin ja ntsꞌɛdi ra huɛi, nɛ bin thoni, nɛ yʉn gäni, nɛ bin ja nꞌda ra ꞌyąmhäi, nɛ bi hyøh yʉn do.
\c 12
\s Ra xisu nɛ ra jąrga
\p
\v 1 Nɛ dá hantꞌa nꞌda ran tꞌuti xʉn ndoho bʉ magątsꞌi, ngue nꞌda ra xisu mi he ra hyadi ngue rá pahni, nɛ mi tøpʉ ja ra ząna. Nɛ mi huꞌtsꞌa nꞌda ra corona gue min ꞌyoui ꞌdɛꞌmayoho yʉ sø.
\v 2 Nɛ nuꞌa ra xisu mi hątꞌʉhni a, nɛ ɛ̨mmɛ mi mbafi ngue xʉn ʉ, ngue nde dim ꞌbʉh rá tꞌʉhni. 
\v 3 Nɛ bi nɛqui bʉ manꞌda ran tꞌuti tengu nꞌda ra jąrga xʉn ndoho nɛ xʉn thɛni, ɛ̨mmɛ ntsꞌutho. Nɛ nuꞌa ra jąrga mi ja yoto yʉ́ yą, nɛ nꞌda ngu nꞌda yʉ́ yą mi huꞌtsꞌ yʉ corona. Nɛ mi ja ꞌdɛtꞌa yʉ́ dąni.
\v 4 Nɛ nuꞌbʉ mi uąnꞌna rá ꞌyozʉ, bi hyøm bʉ häi ná hyu nɛtsꞌi yʉ sø mi ja bʉ mahɛ̨tsꞌi. Nɛ nu ra jąrga ꞌdarbʉ mi ꞌbähmi ra xisu, i nde da zapꞌa rá tꞌʉhni ꞌbʉ bim ꞌbʉi.
\v 5 Nɛ bim ꞌbʉꞌa nꞌda ra tsꞌʉntꞌʉ, rá tꞌʉhni ra xisu bʉya. Nɛ guehna ra tsꞌʉntꞌʉ din tsꞌʉtꞌabi gätho yʉ häi, nɛ njon di japi da mbɛstaꞌa da ma. Pɛ nuꞌbʉ mim ꞌbʉi, bi jamansu Oją, nɛ ꞌbex bi zixpʉ mahɛ̨tsꞌi bí ja rá tsꞌɛdi. 
\v 6 Pɛ nu ra xisu bi ꞌdagui, bi mba bʉ maꞌueni guepʉ bi hocua Oją dim ꞌbʉi nꞌda mahuąhi nɛ yociɛnto nɛ hyąte pa. Nɛ din ja bʉ ꞌbɛꞌa gätho da hyoni.
\v 7 Nɛ nu bʉ mahɛ̨tsꞌi bin ja nꞌda ra dąsʉi, nuꞌa rá ngʉrba mꞌbɛhni Oją mahɛ̨tsꞌi ngue ra Miguel nɛ gätho ʉ miꞌda yʉ́m ꞌbɛhni Oją mahɛ̨tsꞌi, bin sʉhmbʉ a ra jąrga nɛꞌʉ gätho yʉ́ ꞌyɛ̨hɛ a ra jąrga.
\v 8 Pɛ nuꞌa ra jąrga him bi dąha, nɛ Oją him bi japi dim ꞌbʉpʉ mahɛ̨tsꞌi bʉya.
\v 9 Nɛ bi thønꞌa thi bʉ mahɛ̨tsꞌi a ra jąrga, guetꞌa ra cꞌɛ̨yą, ra zįthu a, rá thuhu ra Satanás, gue i häte gätho ua ja ra ximhäi gueꞌbʉ rá mbʉdi thoho.
\v 10 Nɛ nubʉya nugä dra Xuuagä dá øcä nꞌda ra nde mahɛ̨tsꞌi ntsꞌɛdi bin yą bi ꞌyɛ̨na: “Ya bi zøn ra pa da yąnꞌʉ yʉ ꞌyɛ̨cꞌyɛi, nɛ da nu a rá tsꞌɛdi Oją, di manda rá tsꞌɛdi Oją ʉ, nɛ a ra Cristo. Nguetho ya bi thønꞌa thi bʉ mahɛ̨tsꞌi ra zįthu ngue nząi madi yąpꞌʉ ma cuhʉ bʉ ja rá hmi Oją ma pa nɛ ra xui.
\v 11 Pɛ gueꞌa rá ji ra Jesús, tenguꞌbʉ ra Dɛꞌyo, ní dąpꞌa ra zįthu ʉ yʉ ꞌyɛ̨cꞌyɛi, nɛꞌbʉ i ma ngue ɛ̨cꞌyɛi ra Jesús, nɛꞌbʉ hingui su da du.
\v 12 Janangueꞌa dan johyahʉ gätho dí ꞌbʉhmbʉ mahɛ̨tsꞌi. Pɛ ndumbʉi thoho ahʉ gue guí ꞌbʉhmbʉ bʉ ja ra häi, nɛpʉ ja ra deją, nguetho bi zøm bʉ ja ra ximhäi ra zįthu, nɛ ɛ̨mmɛ in cuɛ. I pądi him mayaꞌa yʉ pa din ja rá tsꞌɛdi bʉ,” bi ꞌyɛ̨nꞌa ra nde dá øcä bin yą bʉ mahɛ̨tsꞌi.
\v 13 Nɛ nuꞌbʉ mi nu ra jąrga zįthu ngue bá tꞌɛntꞌua häi, bi guꞌa ra xisu gue bim ꞌbʉh rá tsꞌʉntꞌʉ.
\v 14 Pɛ nuꞌa ra xisu bi mba ntꞌunni yoho yʉ zahua tengu nꞌda ra pɛntsꞌʉ xʉn ndoho, nɛ bi zägui bi mba maꞌueni guepʉ him bi zä bi bɛntꞌa ra jąrga. Nɛ bi mba ma jamansu bʉ hyu jɛya made.
\v 15 Nu ra jąrga bʉya bi bøn ra dehe rá nde, tenguꞌbʉ nꞌda ra dąthe xʉn ndoho, ɛ̨na xtán duxꞌa ra xisu ra dehe.
\v 16 Pɛ Oją bi xocꞌa nꞌda ra hyąhäi guepʉ bi yʉꞌa ra dehe bi bøm bʉ rá nde ra jąrga.
\v 17 Pɛ nu ra jąrga bʉya ɛ̨mmɛ bi dɛ ra cuɛ nangueꞌa ra xisu, nɛ bi mba bi zʉꞌʉ gätho miꞌda ngue rá ꞌyʉꞌa ra xisu, gätho ʉ gue bi ꞌyøtꞌa bi man Oją nɛ bi dɛnꞌdʉ ꞌbɛꞌa bi manꞌa ra Jesús.
\c 13
\s Ran tꞌuti bi bøxpʉ ja ra deją, nɛ ran tꞌuti bi bøxpʉ ja ra häi
\p
\v 1 Nɛ bi mba bim ꞌbäpʉ ja ndenthe a ra jąrga zįthu. Nɛ nugä dra Xuuagä dá nu manꞌda tengu nꞌda ra zate, bi bøxpʉ ja ra dądeją. Nɛ nuna ra zate mi ja yoto yʉ́ yą, nɛ ꞌdɛtꞌa yʉ́ dąni, guepʉ mi ja ꞌdɛtꞌa yʉ corona. Nɛ mán tꞌoꞌtꞌi bʉ yʉ́ yą yʉ́ thuhu zɛhɛ a ra zate ɛ̨mbi guesɛ Oją, nɛ bi ma mantsꞌo nangue Oją.
\v 2 Nɛ nuna ra zate dá nu, gue bi bøxpʉ ja ra deją, tengu nꞌda ram hmasni, pɛ nu yʉ́ gua tengu yʉ́ gua yʉ oso, nɛ nu ʉ yʉ́ nde, tengu yʉ́ nde yʉ león. Nɛ nuꞌa ra jąrga bi un zɛhɛ rá tsꞌɛdi ná yoho ra zate gue xí bøxpʉ ja ra deją. Nɛ bi un ran tꞌɛ̨di di manda bʉ hapʉ i ja rá tsꞌɛdi ra jąrga zįthu, ɛ̨mmɛ xʉn ngu ra tsꞌɛdi mi ja a.
\v 3 Nuꞌa nꞌda rá yą mi ja bʉ nꞌda ra sɛni ngue mí ɛ̨mbi dí du a, pɛ bi zä. Nɛ gätho yʉ jąꞌi mi ꞌbʉcua ja ra ximhäi, bi dɛnni, nɛ bi hyonya thoho nangue rá tsꞌɛdi mi ja.
\v 4 Nɛ nu ʉ yʉ jąꞌi bi dąnde ra jąrga, nguetho ya xi un rá tsꞌɛdi ra zate xi bøxpʉ ja ra deją. Nɛ bi dąnde ra zate, nɛ bi ꞌyɛ̨na: “Njoꞌo manꞌda tengu na, nɛ njoꞌo toꞌo da zä din sʉhmi na.”
\v 5 Nɛ bin tꞌun rán tꞌɛ̨di ra zate xí bøxpʉ ja ra deją, da man ra tsꞌore xʉn tsꞌo nangue Oją. Nɛ bin tꞌun ran tꞌɛ̨di din ja rá tsꞌɛdi yote ma yozna.
\v 6 Nɛ nuꞌbʉ mí nyą, ɛ̨mmɛ xʉn tsꞌo bi ma nangue Oją. Bi ndøm mántsꞌo rá thuhu Oją, nɛpʉ bí ꞌbʉi, nɛ gätho ʉ i ꞌbʉpʉ mahɛ̨tsꞌi.
\v 7 Nɛ bin tꞌun ran tꞌɛ̨di ngue din sʉhmbʉ yʉ́ tꞌʉhni Oją ngue di japi di ꞌbɛꞌʉ. Nɛ bin tꞌun ra tsꞌɛdi ngue di manda gätho ná ngu yʉ jąꞌi ꞌbʉcua ja ra ximhäi, gätho yʉ häi, nɛ gätho ꞌdahma ꞌdanꞌyo bʉ na yą yʉ jąꞌi, gätho yʉ hnini.
\v 8 Nɛ gätho yʉ jąꞌi bi dąnde a. Pɛ him bi dąnde ʉ xmán tꞌoꞌtꞌi yʉ́ thuhu bʉ ja rá søcuą ra Jesús gue bi ꞌyoꞌtꞌa ra Tꞌʉdɛꞌyo gueꞌa bi tho. Nɛ ya mán tꞌoꞌtꞌi bʉ ʉ yʉ́ thuhu ʉ ꞌbʉ má hinꞌyʉ ra ximhäi, im ma toꞌo i ja ra temaząi.
\v 9 Nuꞌʉ toꞌo i ja yʉ́ zagu, dami ꞌyøhmbʉ xʉn ho ya.
\v 10 Nuꞌa toꞌo di un ran ʉnbi yʉ jąꞌi gue da gotꞌ ra fädi, nɛsɛ a da nu ran ʉnbi ngue da mba njotꞌi. Nɛ toꞌo din hote ngue di sɛnte, nɛsɛ a da nu ran dąte ngue da tsꞌɛni. Janangueꞌa toꞌo gätho ʉ yʉ́ tꞌʉhni Oją, jatho høntꞌa da bɛ̨ni gue yʉ́ yąnte Oją, nɛ hin din xømbʉi.
\v 11 Nɛ nubʉya dá nu manꞌda ran tꞌuti gue bi bøxpʉ ja ra häi, nɛ mi ja yoho yʉ́ tꞌʉdąni tengu nꞌda ra tꞌʉdɛꞌyo. Pɛ nuꞌbʉ mín yą ɛ̨mmɛ ntsꞌutho tengutho ra jąrga zįthu.
\v 12 Nɛ nuꞌa ran tꞌuti xí bøxpʉ ja ra häi bin ja rá tsꞌɛdi tengu ra zate ngue xí bøxpʉ ja ra dądeją ngue mi ja nꞌda ra sɛni a nꞌda rá yą gue xí zä. Nɛ bi japi gätho i ꞌbʉcua ja ra häi da dąnde ra mbʉdi ra zate.
\v 13 Nɛ nuꞌa ran tꞌuti gue bi bøxpʉ ja ra häi, bi ꞌyøtꞌ yʉn tꞌuti ntsꞌutho, bi japi bá cąh mahɛ̨tsꞌi ra sibi ngue da nu yʉ jąꞌi.
\v 14 Nɛ bi hyätꞌ yʉ jąꞌi gätho ꞌbʉcua ja ra ximhäi ꞌbʉ mi ꞌyøtꞌ yʉ hyonya ntꞌøtꞌe. Nɛ hønꞌbʉ i ꞌbäpʉ ja rá hmi ra zate xí bøxpʉ ja ra deją, bi zä bi ꞌyøtꞌʉ. Nɛ bi xih yʉ jąꞌi da ꞌyøtꞌa nꞌda ra nyoguido tengu ra zate xí bøxpʉ ja ra deją, gue mí ja ra sɛni bʉ ja nꞌda rá yą, ngue xí zä.
\v 15 Nɛ nuꞌa ran tꞌuti gue bi bøxpʉ ja ra häi, bin tꞌun ran tꞌɛ̨di di japi dim ꞌbʉ a ra nyoguido ntꞌøtꞌe tengu ra zate bi bøxpʉ ja ra deją. Nɛ di japi din yą. Nɛ bi japi da mba ntho gätho toꞌo him bi dąnde a.
\v 16 Nɛ bi manda ngue gätho yʉ jąꞌi din ja rá hmɛpya ra nyoguido bʉ ja rá dɛ̨ nɛpʉ ja rán ꞌyɛi, madagueꞌa høntꞌa go má jąꞌi, gätho i ja yʉ́ tsꞌɛdi nɛꞌʉ hinꞌyʉ yʉ́ tsꞌɛdi, gätho yʉ mɛmbɛti nɛ gätho yʉ hyoya, gätho yʉ ꞌyɛ̨hɛ nɛ gätho ngue hing yʉ ꞌyɛ̨hɛ, gätho yʉ jąꞌi jatho din ja ra hmɛpya.
\v 17 Nɛ hingui sä nꞌda ra jąꞌi dim pä o gue din täi ꞌbʉ hin di nɛqui rá hmɛpya ra zate xí bøxpʉ ja ra deją, nu bʉ ja rá jąꞌi. Gätho jatho din ja ra hmɛpya ngue nam bøni rá thuhu, o rá número, rá hmɛpya rá thuhu ra zate.
\v 18 Jatho gan ꞌyomfɛ̨nihʉ xʉn ho ngue gui pąhmbʉ ꞌbɛꞌa nam bønꞌa rá número ra zate, nguetho nu rá número, ꞌdato ciɛnto nɛ hyąte ma ꞌdato, rá número nꞌda ra jąꞌi.
\c 14
\s Bin tuhu ʉ bim pøhø
\p
\v 1 Nɛ nubʉya dá nugä ra Jesús ra Tꞌʉdɛꞌyo i ꞌbäpʉ ja ra nyuni tꞌɛ̨mbi Sión. Nɛ mi ꞌbähmbʉ ra Jesús nꞌda ciɛnto nɛ yote ma goho mahuąhi yʉ jąꞌi ngue gätho i ja bʉ ja yʉ́ dɛ rá thuhu ra Jesús nɛ rá thuhu rá Ta.
\v 2 Nɛ dá øcä nꞌda ra nde bʉ mahɛ̨tsꞌi ntꞌøde tengu yʉ dehe xʉn ngu ɛ̨mmɛ di hį nɛ tengu ran gäni ntsꞌɛdi di thoni. Nɛ dá øcä tenguꞌbʉ yʉ arpaꞌbida xʉn ngu i pɛi.
\v 3 Nɛ nuꞌʉ nꞌda ciɛnto nɛ yote ma goho mahuąhi bi yąn Oją bʉ ja ra ximhäi, nɛ bin tupʉ nꞌda ra thuhu maꞌdaꞌyo bʉ ja rá hmi Oją gueꞌa i huxpʉ ja rán thutsꞌi, nɛ guepʉ ꞌbäh yʉn tꞌuti i ꞌbʉi, nɛ yʉ dącꞌyɛi. Nɛ njoꞌo miꞌda bi zä bi bą a ra thuhu.
\v 4 Nɛ nuꞌʉ, gätho xʉn hotho ʉ, gue høntꞌa Oją mbɛ̨ni. Nɛ i tɛnꞌna ra Dɛꞌyo hønbʉ go hapʉ da mba. Nɛ nuꞌʉ gue bi yąm bʉ ja ra ximhäi bʉ ꞌbʉh miꞌda yʉ jąꞌi, yʉn tꞌunni manꞌda xʉn ho bin tꞌun Oją nɛ ra Dɛꞌyo.
\v 5 Nɛ xinga nꞌda ra fɛhni bi thįnba ʉ, xøgue xingui tsꞌʉ yʉ́ tsꞌoqui bʉ na nu Oją.
\s Nuꞌa bi manꞌʉ hyu yʉ́m ꞌbɛhni Oją mahɛ̨tsꞌi
\p
\v 6 Nɛ nubʉya dá nugä manꞌda ram ꞌbɛhni mahɛ̨tsꞌi mi ꞌyo inde bʉ mahɛ̨tsꞌi, nɛ i cą ra søcuą ntꞌoꞌtꞌi bʉ ran ho maꞌdaꞌyo hin njąmꞌbʉ da guadi nɛ da mba gätho nangʉni ra ximhäi. Da mba bʉ gätho yʉ häi nɛ nu yʉ jąꞌi ꞌdahma ꞌdanꞌyo bʉ na yą da ꞌyøde høntꞌa go toꞌo ní jąꞌi.
\v 7 Nɛ nuꞌa ram ꞌbɛhni mahɛ̨tsꞌi ntsꞌɛdi bi ꞌyɛ̨na: “Dami numansuhʉ Oją nɛ gui ꞌyɛ̨spahʉ rá tsꞌɛdi nuįxte a, nguetho ya bi zøn ra ora da ꞌyøtꞌ rán juąnbi Oją. Dami thąndehʉ a ya, gueꞌa gue bi ꞌyøtꞌ mahɛ̨tsꞌi nɛ bi ꞌyøtꞌ ra ximhäi. Nɛ bi ꞌyøtꞌ yʉ deją nɛ bi ꞌyøtꞌ yʉ mbøthe,” bi ꞌyɛ̨na.
\v 8 Nɛ nuꞌa manꞌda ram ꞌbɛhni mahɛ̨tsꞌi mahønꞌa bi dɛnꞌna rá mbʉdi mꞌbɛhni, nɛ bi ꞌyɛ̨na: “Ya bin theh rá tsꞌɛdi ra dąhnini Babilonia ngue ɛ̨mmɛ mi ja rá tsꞌɛdi. Nguetho nuꞌʉ yʉ jąꞌi mi ꞌbʉpʉ bi xąndi gätho ra ximhäi a ran ꞌyomtꞌɛ̨ni mí øzɛhɛ. Nɛ gätho ʉ bi ꞌyøtꞌ ran tsꞌo tengu nꞌda ra įti gue comꞌma rá sɛ̨i gätho miꞌda,” bi ꞌyɛ̨na.
\v 9-10 Nɛ nuꞌa ná hyu ram ꞌbɛhni mahɛ̨tsꞌi bi dɛnꞌna ná yoho, nɛ ntsꞌɛdi bi ꞌyɛ̨na: “Toꞌo gue da dąnde ra zate gue bi bøxpʉ ja ra deją, nɛ ra nyoguido, ngue i ja rá hmɛpya bʉ ja rá dɛ̨ o guepʉ ja rá ꞌyɛ, da nu hangu nangu rá tsꞌɛdi rá cuɛ Oją. Nu Oją xíngui tsꞌʉ da ꞌyɛꞌtsꞌa ran ʉnbi di unꞌndʉ nangue rá cuɛ. Nɛ da nu a ra Jesús ra Dɛꞌyo nɛ yʉ́ hogam ꞌbɛhni mahɛ̨tsꞌi ꞌbʉ bin tꞌunꞌna, ngue ra sibi nꞌyoui ra dɛspi.
\v 11 Nuꞌa ra ꞌbifi i pøm bʉ njąmꞌbʉ din hɛ̨ a høntꞌbʉ go njąmꞌbʉ maząi. Nɛ nuꞌʉ i ꞌbʉpʉ njąmꞌbʉ din hɛ̨ a ran ʉnbi i nu ʉ ma pa nɛ ra xui. Gueꞌʉ gätho bi dąnde ra zate xí bøxpʉ ja ra deją, nɛ ra nyoguido, gätho ʉ i ja bʉ ja rá jąꞌi rá hmɛpya nɛ rá thuhu ra zate.
\v 12 Pɛ nu ahʉ gyʉ ꞌyɛ̨cꞌyɛihʉ pɛ ndeꞌbʉ manꞌda gui hyądumbʉihʉ gui thoc ni tꞌɛ̨cꞌyɛihʉ nɛ gui hyäthʉ yʉn ʉnbi. Nguetho yʉ́ tꞌʉhni Oją ʉ gätho di thoqui i øtꞌ yʉ́n tꞌɛ̨di nɛ di thoqui i ɛ̨cꞌyɛi ra Jesús,” bi ꞌyɛ̨nꞌa ná hyu rám ꞌbɛhni Oją mahɛ̨tsꞌi.
\v 13 Nɛ nubʉya bi ꞌyɛ̨ngä manꞌda ra nde dá øcä mahɛ̨tsꞌi: “Dami ꞌyoꞌtꞌ ya ꞌbɛꞌa ga xi a i. Din johya thoho gätho ʉ  xʉn du ꞌbʉ ya mí ɛ̨cꞌyɛi a ra Hmu Cristo mahɛ̨tsꞌi. Mająpi thoho, ɛ̨nꞌa rá Hogandąhi Oją, nguetho din säya a rá ꞌbɛfi mi øtꞌe. Nɛ nuꞌa ran ho mi øtꞌua ja ra ximhäi ʉ, nɛ nubʉ mahɛ̨tsꞌi da nu rá muui bʉ.”
\s Rán sofo ra ximhäi
\p
\v 14 Nɛ dá nu nꞌda ra güi xʉn tꞌaxi thoho nɛ mi hu inde bʉ ja ra güi a nꞌda tengu nꞌda ra jąꞌi. Nɛ mi huꞌtsꞌa nꞌda ra corona ra oro. Nɛ mi hą ra mbore thɛni ɛ̨mmɛ hɛtꞌi.
\v 15 Nɛ bá pøm bʉ rá dąniją Oją mahɛ̨tsꞌi manꞌda rám ꞌbɛhni Oją, nɛ ntsꞌɛdi bi xi a mi hupʉ ja ra güi: “Dami ꞌyørpa yʉ jąꞌi bʉ häi tenguꞌbʉ da hyɛc yʉ uva xʉn yąxpʉ ja ra nuąndätꞌo. Nguetho ya bi zøn ra ora gue gui pɛꞌtsꞌʉ bin ja bʉ ni huąhi,” bi ꞌyɛ̨nꞌa rám ꞌbɛhni Oją.
\v 16 Nɛ ꞌbex bi ꞌyøtꞌa mi hupʉ ja ra güi tengu xi sifi.
\v 17 Nɛ manꞌda ram ꞌbɛhni bá pøm bʉ ja rá ngu Oją mahɛ̨tsꞌi nɛꞌa mi hą nꞌda ra mbore thɛni ɛ̨mmɛ i hɛtꞌi.
\v 18 Nɛ xø bá pøm bʉ manꞌda rám ꞌbɛhni Oją bʉya guepʉ ja rá mɛxa yʉ́n tꞌunni Oją, nɛ nuꞌa di manda da dɛ ra sibi bʉ. Nɛ ntsꞌɛdi bi xi a ram ꞌbɛhni gue mi hą ra mbore thɛni: “Dami ꞌyøtꞌ ya tengu i øtꞌ yʉ jąꞌi ꞌbʉ i hɛc yʉ uva hingui ho nguetho bi zøn ra ora gue da nu ran ʉnbi ʉ nangue rán juąnbi Oją,” bi ꞌyɛ̨na.
\v 19-20 Nɛ njabʉ bi ꞌyøtꞌ rám ꞌbɛhni Oją, tengutho ꞌbʉ di pɛt yʉ uva nɛ da ꞌyɛn bʉ ja ran thɛꞌmi da bøn rán gui bʉya. Nɛ tengutho ra jąꞌi i nɛꞌtꞌʉ yʉ uva da bøn yʉ́n gui, nɛ ngutho da ꞌyørpa ʉ to da zɛmbi, da nu rá cuɛ Oją ɛ̨mmɛ ntsꞌutho. Janangueꞌa ran tꞌuti ngue bi mbän rá ji. Nɛ bi ꞌyørpʉ ja ra ndehnini, nɛ ɛ̨mmɛ xʉn ngu ra ji bi mbäni, hyuciɛnto kilómetro nan jʉnni, nɛ nan hɛ̨ tengu ꞌbʉ da hyɛcpʉ ja yʉ́ nde yʉ fani a ra ji bi ꞌyugui.
\c 15
\s Yoto yʉm ꞌbɛhni di manda yoto yʉn ʉnbi
\p
\v 1 Nɛ nugä dra Xuuagä dá nu manꞌda ran tꞌuti bʉ mahɛ̨tsꞌi, nɛ ɛ̨mmɛ dá hyonya thoho. Mi ꞌbähmbʉ bʉ yoto yʉ́m ꞌbɛhni Oją mahɛ̨tsꞌi, gue ʉ di manda yoto yʉn ʉnbi din ja ua ja ra ximhäi, nɛ nuꞌbʉ bi thoh yʉn ʉnbi, ya bi thoh rá cuɛ Oją bʉya.
\v 2 Nɛ dá nu nꞌda ra xito di nɛqui tengu ra deją, rá cʉhʉ xʉn thɛni tengu ra sibi. Nɛ gätho mi ꞌbäpʉ ja ra xito, gueꞌʉ gue him bi dąnde ra zate xí bøxpʉ ja ra dehe, bi zɛdi, hím bi dąnde ra nyoguido ngue ra pøte a, nɛ xím bin japꞌa rá número o rá thuhu a. Nɛ nꞌda ngu nꞌda mi hą yʉ ꞌbida, ngue yʉ arpa xí unꞌna Oją ʉ.
\v 3 Nɛ gätho mi ꞌbäpʉ bin tuh rá thuhu ra Moisés rá ꞌyɛ̨hɛ Oją, nɛ bin tuh rá thuhu ra Jesús ra Dɛꞌyo. Bi ꞌyɛ̨nꞌʉ:
\q Nuꞌi ma Oją ahe, ma Hmu ahe, nuįxte thoho ni tsꞌɛdi, ɛ̨mmɛ xʉn ho i, nɛ ma hyonya thoho nin tꞌøtꞌe.
\q Majuąni nin tꞌøtꞌe xʉn hotho ʉ.
\q Nuꞌi grá hoga tsꞌʉtꞌabi maząi.
\q 
\v 4 Xinga nꞌda dim ꞌbʉi gue hin da dąnde i,
\q gue hin da numansu ni thuhu, nuꞌi ma Hmu ahe.
\q Hønꞌa thoho i xʉn ho i, ma Oją ahe.
\q Gätho høntꞌa go ꞌbɛꞌa má nde da dąnde i,
\q nguetho gätho ya bi nu ngue xʉn ho ꞌbɛꞌa gätho guí øtꞌe, bi ꞌyɛ̨nꞌʉ.
\m
\v 5 Nɛ nubʉya dá nu nsoqui nꞌda ra jutꞌi i ja bʉ mbo rá dąniją Oją bʉ mahɛ̨tsꞌi, guepʉ mꞌbɛꞌtsꞌi yʉn tꞌɛ̨di bi ꞌyoꞌtꞌ ra Moisés.
\v 6 Nɛ yoto yʉ́m ꞌbɛhni Oją ngue di manda yʉn ʉnbi bʉ ja ra häi bi bøm bʉ. Gätho i he yʉ́ pahni xʉn tꞌaxi ngue ra lino, nɛ gätho bi duꞌtꞌ yʉ́ tįya ra oro.
\v 7 Nɛ nuꞌa nꞌda ran tꞌuti mí ꞌbäpʉ bi unꞌi yoto yʉ ximbo bi unꞌndʉ yʉ́m ꞌbɛhni Oją. Gätho ma yudi rá cuɛ Oją, nɛ nuꞌbʉ ꞌdah miꞌda da mbän ʉ mí po bʉ ja ra ximbo, gätho yʉ jąꞌi iꞌbʉcua ja ra ximhäi da nu rá cuɛ Oją, gue i ꞌbʉi maząi.
\v 8 Nɛ gätho rá niją Oją bʉ mahɛ̨tsꞌi ma yudi rá tsꞌɛdi nɛ rá nuįxte Oją tengu ra ꞌbifi ꞌbʉ i yupʉ mbo ra ngu. Nɛ xinga nꞌda sä da yʉrpʉ asta gueꞌbʉ bi guaꞌa rá ꞌbɛfi ʉ yoto yʉm ꞌbɛhni gue di manda yoto yʉn ʉnbi ua ja ra ximhäi.
\c 16
\s Yʉ ximbo i po yʉn ʉnbi ngue rá cuɛ Oją
\p
\v 1 Nɛ dá øcä nꞌda ra nde gue bi bøm bʉ ja rá dąniją Oją. Nɛ nuꞌa ra nde bi xi ʉ yʉm ꞌbɛhni: “Dami fämhbʉ bʉ ja ra ximhäi rán ʉnbi Oją ntsꞌutho i po ʉ yoto ni ximbohʉ,” bi ꞌyɛ̨na.
\v 2 Nu rá mbʉdi ram ꞌbɛhni bi mbäm bʉ ja ra ximhäi rá cuɛ Oją mí po bʉ ja rá ximbo. Nɛ gätho yʉ jąꞌi gue bin ja rá hmɛpya a ra zate xí bøxpʉ ja ra dehe, nɛꞌa ra nyoguido ngue i thąnde ʉ, bi nu ran ʉ ngue yʉ sąsi xʉn tsꞌotho.
\v 3 Nubʉya ná yoho ram ꞌbɛhni mahɛ̨tsꞌi bi mbän a rá cuɛ Oją mi po bʉ ja rá ximbo, bʉ ja ra dądeją. Nuꞌa ra dehe bʉya bin ja tengu rá ji nꞌda ra jąꞌi xʉn du. Nɛ gätho mi ꞌbʉpʉ mbo ra deją bi du.
\v 4 Nɛ ná hyu ram ꞌbɛhni mahɛ̨tsꞌi bi mbänꞌa rá cuɛ Oją mi po bʉ ja rá ximbo hapʉ ja gätho yʉ dąthe nɛ gätho yʉ mbøthe. Gätho ra dehe mi po bʉ bin ji.
\v 5 ꞌBex dá øcä rá nde rám ꞌbɛhni Oją gueꞌa bi ʉnba yʉ dehe bi ꞌyɛ̨na: “Nuꞌi ma hoga Hmu, ma Oją i, ząi guí ꞌbʉi nɛ gmí ꞌbʉi, xʉn hotho gätho nin juąnbi, nguetho rán säui ʉ gá ʉnbi.
\v 6 Ya gá un ra ji da zi ʉ, nguetho bi hyo ʉ nim ꞌbɛhni bʉ häi nɛ ni pøngahyą. Nuya gá cospa ra pengui nangue ꞌbɛꞌa bi ꞌyøtꞌʉ,” bi ꞌyɛ̨na.
\v 7 Nɛ dá øcä nꞌda ra nde bi bøm bʉ ja ra mɛxa guepʉ mí ja yʉ́n tꞌunni Oją, i ɛ̨na: “Ma Hmu i Oją nuįxte ni tsꞌɛdi xʉn ho, njuąntho a nin juąnbi, ngue rán säui ʉ,” bi ꞌyɛ̨na.
\v 8 Nɛ nuꞌa ná goho rám ꞌbɛhni bi mbäm bʉ ja ra hyadi a rá cuɛ Oją mi po bʉ ja rá ximbo. Nɛ ɛ̨mmɛ bin ja rá tsꞌɛdi ra hyadi ngue bin zø ʉ mi ꞌbʉpʉ ja ra ximhäi nangue nam pa ra hyadi.
\v 9 Nɛ nuꞌʉ gue bi nu ran ʉnbi nangue rá tsꞌɛdi ra hyadi, bi ndømantsꞌo rá thuhu Oją, gueꞌa bi manda yʉn ʉnbi, pɛ guextaꞌa him bi ꞌyɛ̨spa Oją, him bi päh yʉ́n ꞌyomfɛ̨ni ʉ.
\v 10 Nuya ná cʉtꞌa ram ꞌbɛhni bi mbäm bʉ rá cuɛ Oją mi po bʉ ja rá ximbo, nɛ bi mbäm bʉ hapʉ i ja rá tsꞌɛdi ra zate xí bøxpʉ ja ra dehe. Nɛ nupʉ hapʉ ja rá tsꞌɛdi, gätho xʉm ꞌbɛxui thoho bʉ. Nɛ nuꞌʉ yʉ jąꞌi gue i ꞌbʉpʉ bi zasɛ yʉ́ jąni nangue ran ʉnbi bi nu.
\v 11 Nɛ bi cꞌąmantsꞌotho Oją nangue yʉn ʉ, nɛ nangue yʉ sąsi mi ja. Pɛ guextaꞌa him bi ꞌyɛꞌtsꞌa ran tsꞌo mi øtꞌe, him bi päh yʉ́n ꞌyomfɛ̨ni.
\v 12 Nɛ nuꞌa ná ꞌdato ram ꞌbɛhni bi mbäm bʉ rá cuɛ Oją mi po bʉ ja rá ximbo, bi mbäm bʉ ja ra dąthe xʉn ndoho tꞌɛ̨mbi Eufrates. Nɛ bi xä ra dehe nɛ ꞌbex bi ꞌyoꞌtꞌ ra dąthe ngue da zä da thopʉ yʉ tsꞌʉtꞌabi gue ní ꞌyɛ̨pʉ ní bøx ra hyadi.
\v 13 Nɛ nugä dra Xuuagä, dá nu hyu yʉ tsꞌonthį di nɛqui tengu yʉ ꞌuɛ, ngue bi bøm bʉ ja rá nde ra jąrga zįthu, nɛpʉ ja rá nde ra zate xí bøxpʉ ja ra deją, nɛ bi bøm bʉ ja rá nde ran tꞌuti xí bøxpʉ ja ra häi, gue ra hyäte pøngahyą.
\v 14 Nguetho nuꞌʉ, gueꞌʉ yʉ́ tsꞌonthį ra zįthu ʉ i ja yʉ́ tsꞌɛdi ngue da ꞌyøtꞌ yʉ hyonya ntꞌøtꞌe. Nɛ nuꞌʉ bi mba bʉ gätho ná ngʉni ra ximhäi, hønbʉ go hapʉ ꞌbʉh yʉ tsꞌʉtꞌabi, ngue bi japi di pɛt yʉ jąꞌi. Ngue din ja ra dąsʉi din sʉhmbʉ Oją. Nɛ nuꞌa ra pa din ja ra sʉi gätho da nu rá tsꞌɛdi Oją nuįxte.
\v 15 Nɛ dá øcä rá nde ra Jesucristo ngue bi ꞌyɛ̨na: “Gui ꞌyøhmbʉ ya, nugä ba ɛ̨cä tengu nꞌda ra bɛ̨. Hinga mfądi njąmꞌbʉ ga søhø. Din johya thoho ʉ gue him bin ąhą pɛ bi jamansu yʉ he dá unni, janangueꞌa hin din ꞌyąhe nɛ hin din ꞌyąsä bʉya, ngue im bɛ̨ntho a ran hoqui dá ørpa ʉ, janangueꞌa hin di nɛqui yʉ́ tsꞌoqui, nɛ hin da mbɛꞌtsꞌ yʉ́ sä,” bi ꞌyɛ̨na.
\v 16 Nɛ gätho bim pɛti bʉ yʉ tsꞌʉtꞌabi nɛ yʉ jąꞌi bʉ ja ra xɛqui tꞌɛ̨mbi Armagedón, ngue yʉ́ nde yʉ hebreo a.
\v 17 Nuya ná yoto ram ꞌbɛhni bi mbäm bʉ rá cuɛ Oją mi po bʉ ja rá ximbo, bi huic ran dąhi ꞌbɛꞌa mi po bʉ. ꞌBex bi tꞌø a nꞌda ra nde bi bøm bʉ ja rá niją Oją mahɛ̨tsꞌi, guepʉ i hu inde Oją. Nɛ nuꞌa ra nde bi ꞌyɛ̨na: “Ya da guadi gätho man tsꞌɛmbi,” bi ꞌyɛ̨na.
\v 18 Nɛ ꞌbex bi hyätꞌi ntsꞌɛdi yʉ huɛi, nɛ ntsꞌɛdi bin thoni yʉ ngäni. Nɛ bin ja nꞌda ra ꞌyąnhäi ntsꞌɛdi hin jąmꞌbʉ bi nu nꞌda ra jąꞌi tengu na, asta gueꞌbʉ go mim ꞌbʉ ʉ yʉ mbʉdi thoho yʉ jąꞌi.
\v 19 Nu ra ꞌyąnhäi bi xɛnꞌa ra dąhnini Babilonia, hyu xɛqui bi bøni. Nɛ gätho miꞌda yʉ hnini hønbʉ go hapʉ mi ja bi guadi. Nɛ bi bɛ̨n Oją gue xʉn tsꞌotho mi øtꞌ yʉ jąꞌi ꞌbʉpʉ ja ra dąhnini Babilonia, nɛ ntsꞌɛdi bi ʉnba ʉ, nangue rá cuɛ ntsꞌɛdi a, asta gueꞌbʉ go min theh rá cuɛ Oją.
\v 20 Nɛ gätho yʉ tꞌʉhäi i ja bʉ ja yʉ deją bim ꞌbɛdi. Nɛ gätho yʉ nyuni nɛ yʉ tꞌøhø bim ꞌbɛdi, hinꞌyʉ bʉya.
\v 21 Nɛ ꞌbex bi däpʉ mahɛ̨tsꞌi yʉn do ɛ̨mmɛ ntsꞌutho nguetho yote kilo nán hyʉ nꞌda ran do, bi zʉ i ꞌda yʉ jąꞌi. Pɛ nu ʉ yʉ jąꞌi bi cꞌąmantsꞌo Oją nangue ran ʉnbi ntsꞌɛdi bi nu nangue yʉn do.
\c 17
\s Ra ngʉrpa ꞌyomtꞌɛ̨ni xisu
\p
\v 1 Nɛ nuꞌa nꞌda ʉ yʉ́m ꞌbɛhni Oją mahɛ̨tsꞌi gueꞌa mí ja nꞌda ra ximbo, bi xicä: “Ba ɛ̨hɛ ga utꞌa i rán juąnbi Oją da nu ra ꞌyomtꞌɛ̨ni xisu i hupʉ ja yʉ dehe ꞌdahma ꞌdanꞌyo bʉ gätho ra ximhäi.
\v 2 Nuꞌʉ yʉ tsꞌʉtꞌabi bʉ ja ra ximhäi bi ꞌyøthʉ ran tsꞌo a ra ꞌyomtꞌɛ̨ni xisu. Nɛ yʉ jąꞌi ꞌbʉcua ja ra ximhäi bi xänba bʉ gue da ꞌyøtꞌ ran tsꞌo guepʉ ꞌbʉ a ra ꞌyomtꞌɛ̨ni xisu. Gätho mi øtꞌ ran tsꞌo tenguꞌbʉ įti thoho,” bi ꞌyɛ̨m ꞌbʉ mi xiqui.
\v 3 Nɛ nubʉya nu rám ꞌbɛhni Oją bi zixcä bʉ ja nꞌda ra huɛnhäi maꞌueni njon mi ꞌbʉpʉ. Nɛ nu rá Hogandąhi Oją bi jaqui gue dá handi, nɛ dá nugä a ra xisu i huxꞌa nꞌda ra zate xʉn thɛni. Nu ra zate mi ja yoto yʉ́ yą nɛ ꞌdɛtꞌa yʉ́ dąni, nɛ ntꞌoꞌtꞌi bʉ ja rá jąꞌi ɛ̨na jasɛ rá tsꞌɛdi, gue rá thuhu ɛ̨na guesɛ Oją.
\v 4 Nu ra xisu mi he nꞌda ra hocꞌbøꞌtꞌe xʉn jʉpoi nɛ xʉn thɛni. Nɛ ɛ̨mmɛ madín ꞌyøtꞌe xʉn ho nangue yʉ thebe nɛ yʉm foꞌyɛ ra oro nɛ yʉ tsꞌʉngu ɛ̨mmɛ xʉm hmadi thoho, nɛ høntꞌa go mi cuat rá pahni. Nɛ mi thɛ nꞌda ra tasa ra oro. Pɛ gätho ꞌbɛꞌa mi po ra tasa ra hmɛpya nangue gätho yʉn tsꞌo mi øtꞌ ra xisu.
\v 5 Nɛ nubʉ ja rá dɛ̨ ntꞌoꞌtꞌi bʉ rá thuhu: “Ra dąhnini Babilonia, ngue ja rá tsꞌɛdi tenguꞌbʉ rá mbe gätho yʉ ꞌyomtꞌɛ̨ni nɛ tenguꞌbʉ rá mbe gätho i øtꞌ ran tsꞌo hønbʉ go hapʉ i ja ra ximhäi,” bi ꞌyɛ̨nꞌa ra tꞌohni. Pɛ hin da bąsɛ nꞌda ꞌbɛꞌa ním bønꞌa.
\v 6 Nɛ dá hantꞌa ra xisu, tengu ꞌbʉ įti thoho nangue yʉ́ ji ʉ gätho bi hyo ꞌbʉ mi dɛn Oją nɛꞌbʉ mi mampꞌa rám hman ra Jesús. Nɛ nugä drá Xuuagä, dadí hyonya thoho ꞌbʉ má nugä a nꞌda ran tꞌuti. 
\v 7 Nɛ nu rám ꞌbɛhni Oją mahɛ̨tsꞌi bi xiqui: “O gadí hyonya thoho, nguetho ga xi a ya ꞌbɛꞌa ni hmɛpya a ra xisu, nɛ ꞌbɛꞌa ni hmɛpya a ra zate i huxꞌa ra xisu, gue i ja yoto yʉ́ yą nɛ i ja ꞌdɛtꞌa yʉ́ dąni.
\v 8 Nuꞌa ran tꞌuti ngue ra zate gá nu, pɛ gueꞌa nꞌda mi ꞌbʉi, nɛ hingui ꞌbʉh ya, pɛ him ma yaꞌa ba ɛ̨hɛ mahønꞌa, da bøm bʉ ja ra hyąhäi ɛ̨mmɛ xʉn hɛ̨. Nɛ mꞌbɛjua da nu ran dąte xʉn ho hin dim ꞌbʉh mahønꞌa. Nɛ gätho yʉ jąꞌi ngue hinga ntꞌoꞌtꞌi yʉ́ thuhu bʉ ja ra søcuą mahɛ̨tsꞌi, gue bi tꞌorpʉ ꞌbʉ ma hinꞌyʉ ra ximhäi, di hyonya thoho ꞌbʉ bi nu mahønꞌa tengu bʉ í hnu ra zate. Nguetho mi ꞌbʉi, nɛ njoꞌo ya, pɛ dim ꞌbʉi mahønꞌa.
\v 9 Nuꞌʉ toꞌo i ja yʉ́n ꞌyomfɛ̨ni xʉn ho, sä da bądi ꞌbɛꞌa nim bøn a ra hmɛpya. Nu yoto yʉ́ yą ra zate ra hmɛpya ngue ʉ yoto yʉ nyuni guepʉ i hu a ra xisu.
\v 10 Nɛ ra hmɛpya gueꞌʉ yoto yʉ tsꞌʉtꞌabi, ngue yʉ tsꞌomꞌbäi thoho. Bi du ʉ cʉtꞌa nɛ nu ná ꞌdato i ꞌbʉpʉ ya, nɛ ná yoto dim ꞌbʉi, pɛ hingan yaꞌa din tsꞌʉtꞌabi.
\v 11 Nɛ nuꞌa nꞌda, ná hyąto ra tsꞌʉtꞌabi bʉya, gueꞌa gue mi ꞌbʉi, pɛ njoꞌo ya. Nuꞌbʉ bá ɛ̨h mahønꞌa, di manda tengu ʉ yoto yʉ tsꞌomꞌbäi tsꞌʉtꞌabi, pɛ mꞌbɛjua da mba da nu ran ʉnbi maząi.
\v 12 Nɛ nuꞌʉ yʉ́ dąni ra zate gá nu, yʉ hmɛpya ngue ꞌdɛtꞌa yʉ tsꞌʉtꞌabi din ja yʉ́ tsꞌɛdi ꞌda yʉ tꞌʉ ora tho nɛ da gomhbʉ rá tsꞌɛdi ra zate.
\v 13 Nɛ gätho yʉ tsꞌʉtꞌabi ꞌdatꞌa da bɛ̨ni ngue di un ra tsꞌɛdi di manda ra zate.
\v 14 Nɛ gätho yʉ tsꞌʉtꞌabi da zʉꞌa ra Jesús ra Dɛꞌyo. Pɛ nuꞌa ra Jesús da dąha, nguetho ra Hmu a nangue gätho miꞌda yʉ hmu, nɛ ra hmutsꞌʉtꞌabi nangue gätho miꞌda yʉ tsꞌʉtꞌabi. Nɛ nuꞌʉ gätho din ꞌyohʉ ra Jesús ꞌbʉ bi dąhą, gueꞌʉ bi zon Oją ʉ, nɛ bi huahni, nɛ him bi ꞌyɛꞌtsꞌa ní dɛnni,” bi ꞌyɛ̨nꞌa ram ꞌbɛhni.
\v 15 Nɛ nu rám ꞌbɛhni Oją mahɛ̨tsꞌi xø bi xicä mahønꞌa dra Xuuagä: “Nu yʉ dehe gá nu guepʉ mi huh ra xisu, ra hmɛpya a nangue gätho miꞌda yʉ jąꞌi i ꞌbʉh nangʉni ra ximhäi, gätho yʉ häi gätho yʉ nde ꞌdahma ꞌdanꞌyo bʉ na yą.
\v 16 Nɛ nu yʉ dąni gá nu, ngue yʉ́ hmɛpya yʉ tsꞌʉtꞌabi, nɛꞌa ra zate, mꞌbɛjua da zʉ a ra ꞌyomtꞌɛ̨ni xisu ʉ. Nɛ nuꞌʉ da hyącpi ꞌbɛꞌa gätho mi ja a ra xisu, nɛ da zap rá ngøcꞌyɛi a, nɛ da ꞌyuꞌma ra xisu nangue ra sibi.
\v 17 Nguetho Oją bi bɛ̨nba yʉ tsꞌʉtꞌabi da ꞌyøtꞌe tengu mim bɛ̨n Oją, ngue nꞌda ngu nꞌda ʉ di un rá tsꞌɛdi ra zate di manda, asta gueꞌbʉ go bin ja ꞌbɛꞌa bi man Oją ngue din ja.
\v 18 Nɛ nuꞌa ra xisu gá nu bʉ, rá hmɛpya ra dąhnini gueꞌa di manda yʉ tsꞌʉtꞌabi a, nangue gätho yʉ häi i ja ua ja ra ximhäi,” bi ꞌyɛ̨nꞌa ram ꞌbɛhni.
\c 18
\s Bi ꞌbɛh rá tsꞌɛdi ra dąhnini Babilonia
\p
\v 1 Mꞌbɛjua dá nugä manꞌda ram ꞌbɛhni bá cąh mahɛ̨tsꞌi, nɛ ɛ̨mmɛ i ja rá tsꞌɛdi. Nɛ i ja rán nɛqui, bi hyät ra ximhäi ꞌbʉ mi gąi, tengu ra hyadi.
\v 2 Nɛ ɛ̨mmɛ tsꞌɛdi bin yą, bi ꞌyɛ̨na: “Bi guahya, bi guahya rá tsꞌɛdi ra dąhnini Babilonia. Nɛ høntꞌʉ yʉ zįthu dim ꞌbʉpʉ, nɛ gätho yʉ tsꞌonthį. Nɛ i ꞌbʉpʉ høntꞌa go ꞌbɛꞌa mán tsꞌo, nɛ yʉ doja gue hingui ho øtꞌe, xʉn tsꞌotho.
\v 3 Nguetho nu yʉ mɛngu bʉ bi xänba ran tsꞌo gätho yʉ jąꞌi mi søm bʉ gue i ꞌbʉh ná ngʉni ra ximhäi. Nɛ gätho yʉ tsꞌʉtꞌabi bi gomhbʉ ran tsꞌo ra hnini, ngue tenguꞌbʉ ra ꞌyomtꞌɛ̨ni xisu bʉ. Nɛ xʉn ngu yʉ jąꞌi ꞌda nꞌdanni yʉ́ häi, bim mɛmbɛti ꞌbʉ mí mbäpꞌʉ ꞌbɛꞌa gätho bi numanhosɛ yʉ mɛngu bʉ ja a ra hnini,” bi ꞌyɛ̨nꞌa ram ꞌbɛhni.
\v 4 Nɛ dra Xuuagä dá øcä manꞌda ra nde bí ꞌyɛ̨h mahɛ̨tsꞌi, bi ꞌyɛ̨na: “Ba ɛ̨hɛ gätho yʉ jąꞌi ngue ma mbɛtigä, dami pøm bʉ ja ra dąhnini, gue hin gui cohma øtꞌehʉ ran tsꞌo i ja bʉ, nɛ hin guin nuhʉ ran ʉnbi gue da nu ʉ toꞌo da gopʉ.
\v 5 Nguetho nuꞌbʉ sä da mba ma muntsꞌi yʉ́n tsꞌo i tꞌørpʉ, tenguꞌbʉ da zʉh nán hɛ̨tsꞌi ra ximhäi mahɛ̨tsꞌi. Nɛ nuꞌa Oją xíngui tsꞌʉ bi pumbɛ̨ni ran tsꞌo ꞌbɛꞌa bi tꞌørpʉ.”
\v 6 Nɛ bi sih yʉ́m ꞌbɛhni Oją bʉya: “Nuya dami cospahʉ ra pengui tenguthoho bi ꞌyørpa miꞌda, dami cospahʉ ran ʉ gue gui yofʉ mahønꞌa.
\v 7 Dami un ya ran ʉnbi nɛ ntsꞌɛdi ra dumbʉi ꞌbɛꞌa rán thɛui bi ꞌyøtꞌe. Nguetho bi bɛ̨ni maguesɛ, nɛ bi ꞌyøtꞌ yʉ tsꞌoqui bi numanhosɛ, nɛ xʉn ngu ꞌbɛꞌa gätho bi hyonsɛ. Tenguꞌbʉ nꞌda ra xisu da mansɛ mbo rá mbʉi, da ꞌyɛ̨na: “Nugä xʉn ngu ma tsꞌɛdigä, hingan tsꞌogui thohogä, nɛ njąmꞌbʉ din jagä ra dumbʉi,” ngubʉ bi ma.
\v 8 Pɛ janangueꞌa da nu ran ʉnbi di und Oją, nɛ gätho ꞌbɛꞌa din ja, ꞌda huɛ̨tho án ja gätho yʉ ꞌyąnthį. Nɛ da nu ra gɛ̨hɛ nɛ ra dumbʉi, nɛ di juadi nangue ra sibi. Nguetho tąte thoho rá tsꞌɛdi Oją ra Hmu, gue di unꞌna rán thɛui bi ꞌyøtꞌe.
\v 9 Nɛ nu yʉ́ tsꞌʉtꞌabi gätho yʉ häi gue ząi i comhbʉ ran tsꞌo, gätho din zoni nɛ dim mbafi ꞌbʉ i hand rá ꞌbifi ra dąhnini ngue i zø.
\v 10 Nɛ gätho dim ꞌbämanhɛ̨ nguetho ɛ̨mmɛ i su da nu ran ʉnbi tengu in nu ʉ i ꞌbʉpʉ ja ra dąhnini. Nɛ da ma: “Huɛ̨cate, huɛ̨cate, nguetho mahotho ra dąhnini, nɛ ɛ̨mmɛ mi ja rá tsꞌɛdi, pɛ nꞌda huɛ̨tho gue bi tsꞌɛmbi,” da ꞌyɛ̨nꞌʉ.
\v 11 Nɛ gätho yʉ mbä bʉ ja gätho ra ximhäi din zoni nɛ dim mbafi, nguetho njoꞌo da dämbi ꞌbɛꞌa da mbä.
\v 12 Ngue yʉ oro, yʉ tꞌaxi, yʉn ꞌyøtꞌe, yʉ perla, nɛ ra ꞌbøꞌtꞌe ra lino xʉn ho, ra ꞌbøꞌtꞌe ra seda, ra ꞌbøꞌtꞌe xʉn tudi xʉn jʉpoi nɛ xʉn thɛni, nɛ gätho yʉ za gue mumanꞌu, nɛꞌʉ ntꞌøtꞌe yʉ doꞌyo, nɛ gätho ʉ yʉ za ntꞌøtꞌe ɛ̨mmɛ xʉm hmadi, nɛꞌʉ ntꞌøtꞌe ra bronce ngue ra thɛnga fɛxna tꞌɛgui, nɛꞌʉ ntꞌøtꞌe ra tꞌɛgui, nɛꞌʉ ntꞌøtꞌe ra ꞌyaxi.
\v 13 Nɛ ząi mi ꞌbä bʉ yʉ canela, yʉ ꞌyɛ̨thi ngue in ꞌyohʉ yʉ tʉhʉ, ra tꞌʉza mumanꞌu, yʉ ꞌyɛ̨thi i yʉmanho, yʉ perfume, yʉ vino, yʉ aceite, ra hocjʉni, ra trigo, yʉn dąni, yʉ dɛꞌyo, yʉ fani, yʉ carro, nɛ yʉ ꞌyɛ̨hɛ mi ꞌbä bʉ, nguetho mi ꞌbäp yʉ́ te yʉ jąꞌi tenguꞌbʉ i ꞌbä yʉ fani.
\v 14 Nɛ da ꞌyɛ̨nꞌʉ yʉ mbä: “Gätho gue xʉn ho gmi honi bin thegue. Nɛ gätho yʉ mbɛti nɛ gätho ꞌbɛꞌa mahotho ya bi mba. Him manꞌdandį guin nu mahønꞌa tengu mí ja bʉ,” da ꞌyɛ̨nꞌʉ.
\v 15 Nɛ nuꞌʉ gue bim mɛmbɛti ngueꞌʉ mim pä bʉ ja ra dąhnini, dim ꞌbämanhɛ̨ tho, nguetho i su da nu ran ʉnbi, tengu in nuꞌʉ mi ꞌbʉpʉ. Nɛ ɛ̨mmɛ din zoni, i tu yʉ́ mbʉi, nguetho njoꞌo da däi ꞌbɛꞌa i ja da mbä.
\v 16 Nɛ da ꞌyɛ̨na: “Dumbʉi thoho nangue ꞌbɛꞌa bin ja ra dąhnini, ɛ̨mmɛ mi ja bʉ mahotho, nɛ mi ja bʉ yʉ ꞌbøꞌtꞌe ra lino, nɛ yʉ ꞌbøꞌtꞌe xʉn jʉpoi, nɛ yʉ ꞌbøꞌtꞌe xʉn thɛni, nɛ madi nɛqui bʉ ꞌbɛꞌa mahotho gue yʉ oro nɛ yʉn ꞌyøtꞌe nɛ yʉ perla xʉm hmadi.
\v 17 Nuya nte jabʉ ya, nꞌda oratho ám ꞌbɛdi gätho ɛ̨mmɛ xʉm hmadi mi ja bʉ,” da ꞌyɛ̨nꞌʉ mim pä bʉ. Nɛ gätho yʉ́ hmu yʉ barco nɛꞌʉ gätho i hu bʉ, nɛ gätho yʉ mbɛfi di ꞌyon yʉ barco, mi ꞌbämanhɛ̨tho.
\v 18 Nɛ bi du yʉ́ mbʉi ꞌbʉ mi nu ra ꞌbifi i zø ra dąhnini, nɛ bi ꞌyɛ̨na: “Hinꞌyʉ manꞌda ra hnini mahotho tengu nʉ.”
\v 19 Nɛ nuꞌʉ, bi ꞌyʉx yʉ́ yą yʉ fonthäi, ra hmɛpya gue tu yʉ́ mbʉi, nɛ bin zoni nɛ bi mbafi, ɛ̨na: “Huɛ̨cate ra dąhnini ɛ̨mmɛ mi ja rá tsꞌɛdi, nguetho gätho gahʉ dyʉ́ hmuhʉ yʉ barco dám mɛmbɛtihʉ nʉ, nɛ xøgue nꞌda oratho ám ꞌbɛdi gätho mi ja bʉ,” bi ꞌyɛ̨nꞌʉ.
\v 20 Pɛ gan johyahʉ gätho ahʉ gue guí ꞌbʉhmbʉ ua mahɛ̨tsꞌi, gan johyahʉ nangue ꞌbɛꞌa bin ja ra dąhnini, bi tsꞌɛmbi. Nɛ dan johyahe gätho gahe ma ꞌbäihe ra Cristo ua ja ra häi, nɛ gätho gyʉ pøngahyąhʉ Oją, nɛ gätho gahʉ ngue dí tɛnhdʉ Oją, dan johyahʉ, nguetho ya bi cosꞌahʉ ꞌbɛꞌa bi ꞌyøtꞌahʉ yʉ jąꞌi mi ꞌbʉpʉ ja a ra dąhnini.
\v 21 Nɛ nubʉya nꞌda rám ꞌbɛhni Oją mahɛ̨tsꞌi ngue xʉn ngu rá tsꞌɛdi, bi gʉꞌtsꞌa nꞌda ra do ɛ̨mmɛ xʉn ndoho, nɛ ntsꞌɛdi bi ꞌyɛm bʉ ja ra dądeją. Nɛ bi ꞌyɛ̨na: “Tengu thoho din ja ra dąhnini Babilonia ngue mi ja rá tsꞌɛdi, pɛ njąmꞌbʉ da hnu mahønꞌa, gätho nꞌda mꞌbɛdi thoho.
\v 22 Nɛ hin da tꞌøpʉ mahønꞌa yʉ mbɛꞌbida, gätho ʉ i pɛ yʉ arpa, nɛ gätho ʉ i huixt yʉ thʉxi, xínga gueꞌʉ yʉ hyʉxi. Xinga nꞌda ran ꞌyohʉ dim pɛpʉ mahønꞌa, nɛ njon din cʉm bʉ mahønꞌa.
\v 23 Nɛ din cąꞌbɛxui thoho, him manꞌdandį mahønꞌa di nɛqui bʉ yʉ sibi, nɛ njon da ꞌyøtꞌ ran thąti bʉ ngue din johya tengu mi øtꞌe. Nguetho manꞌda mi ja yʉ́ tsꞌɛdi ʉ mi øtꞌ yʉ́ ꞌbɛfi bʉ xínda gueꞌʉ miꞌda gätho ra ximhäi. Pɛ mi hät yʉ jąꞌi ꞌbʉ mi xänbi di ho yʉ́ pähä zɛhɛ ʉ gätho mi søm bʉ, bí nɛxpʉ ná ngʉni ra ximhäi.
\v 24 Nɛ guepʉ bim fän yʉ́ ji ʉ yʉ́ pøngahyą Oją, nɛ ʉ gätho miꞌda yʉ́ tꞌʉhni Oją, gue bi tho. Pɛ guepʉ bi tho ʉ, nɛ gueꞌa í tsꞌɛmba a ra dąhnini,” bi ꞌyɛ̨nꞌa rám ꞌbɛhni Oją.
\c 19
\p
\v 1 Nɛ nubʉya, dra Xuuagä dá øcä yʉ́ nde nꞌda muntsꞌi yʉ jąꞌi i ꞌbʉpʉ mahɛ̨tsꞌi. Nɛ bi ꞌyɛ̨nꞌʉ: “Dí ɛ̨spahʉ Oją, nguetho ma pørpątehʉ a, nɛ hønsɛ ma Ojąhʉ i ja rá nuįxte nɛ tąte thoho rá tsꞌɛdi.
\v 2 Xʉn ho rán tsꞌɛmbi Oją, nguetho rán säui bi tꞌørpa ra dąhnini, tenguꞌbʉ ra ꞌyomtꞌɛ̨ni xisu, gue bi tsꞌonba yʉ́ mbʉi gätho yʉ jąꞌi ra ximhäi. Nɛ nuya Oją bi cospa ʉ gätho toꞌo bi hyo yʉ́ ꞌyɛ̨hɛ,” bi ꞌyɛ̨na.
\v 3 Nɛ ntsꞌɛdi bi mam mahønꞌa yʉ nde dá øcä: “Dí ɛ̨spahʉ Oją nguetho ya bi juah ra sibi a ra dąhnini, nɛ hin din hɛ̨ a nín ꞌyo rá ꞌbifi,” bi ꞌyɛ̨nꞌʉ yʉ jąꞌi.
\v 4 Nubʉya gätho ꞌdäte magoho yʉ dącꞌyɛi ngue ząi di mbäꞌtsꞌa Oją, nɛꞌʉ goho yʉn tꞌuti i ꞌbʉi, bin dąnyahmu bʉ i hu a Oją, nɛ bi dąnde. Nɛ gätho bi ma bi ꞌyɛ̨nꞌʉ: “Nɛcähe, ngubʉ dím bɛ̨mhbe dí ɛ̨spahe Oją,” ɛ̨nꞌʉ.
\s Bi zin rá xisu ra Dɛꞌyo
\p
\v 5 Nɛ dá øcä manꞌda ra nde bi bøm bʉ guepʉ i hu a Oją, ngue bi ma: “Dami ꞌyɛ̨spa ma Ojąhʉ gätho ʉ yʉ́ ꞌyɛ̨hɛ. Dami ꞌyɛ̨spahʉ gätho toꞌo i numansu Oją, nɛꞌʉ i ja yʉ́ tsꞌɛdi nɛꞌʉ hinꞌna,” bi ꞌyɛ̨nꞌa ra nde.
\v 6 Nɛ dá øcä yʉ́ nde yʉ jąꞌi xʉn ngu, ngue di hį tenguꞌbʉ xʉn ngu yʉ dehe, nɛ tenguꞌbʉ bi thoni yʉn gäni. Nɛ bi ꞌyɛ̨m ꞌbʉ mi yą: “Dí ɛ̨spahʉ Oją, nguetho di manda ya ra Hmu, ma Ojąhʉ tąte thoho rá tsꞌɛdi.
\v 7 Gätho dan johyahʉ, nɛ da hyu ma mbʉihʉ, nɛ ga ɛ̨spahʉ Oją ngue i ja rá tsꞌɛdi. Nguetho bi zøn ra ora da zin yʉ ꞌyɛ̨cꞌyɛi ra Jesús, ra Dɛꞌyo, tengu thoho nꞌda ran ꞌyohʉ din thątꞌui rá xisu. Nɛ mahøntho da mba ra xisu, mahoqui thoho.
\v 8 Nɛ bin tꞌun ran tꞌɛ̨di da hye ra pahni di fɛxni, gue ra lino xíngui tsꞌʉ tsꞌo. Nuꞌa ra pahni xʉn tꞌaxi nam bøni ngue bi mba mahoqui yʉ́ tsꞌoqui ʉ yʉ́ tꞌʉhni Oją nɛ nubʉya i øtꞌ yʉ́n thɛhʉ.”
\v 9 Nɛ nuna ram ꞌbɛhni mahɛ̨tsꞌi bi xicä ꞌbɛꞌa ga oꞌtꞌ ya: “Din johya gätho toꞌo ʉ bi tsꞌon bʉ ja ran sihmɛ nangue rán thąti ra Dɛꞌyo. Majuąni rám hman Oją na dí xi a ya,” bi ꞌyɛ̨ng rám ꞌbɛhni Oją mahɛ̨tsꞌi. 
\v 10 Nɛ nubʉya dán dąnyahmu bʉ ja rá gua ram ꞌbɛhni mahɛ̨tsꞌi. Pɛ nuꞌa bi xicä: “O guín jabʉ, nguetho nugä rá ꞌyɛ̨hɛ thohogä Oją tengu thoho i, nɛ tengu ni cuhʉ, gätho ʉ i mampꞌa rám hman Oją nangue ra Jesús, gätho dadí jafʉ da fąh ra Jesús,” bi ꞌyɛ̨ng ꞌbʉ mi xiqui.
\s Nuꞌa nꞌda bi hyux ra tꞌaxca ndøfani
\p
\v 11 Nɛ nubʉya, dra Xuuagä, dá nugä nsoqui mahɛ̨tsꞌi. Nɛ mi ꞌbäpʉ nꞌda ra tꞌaxca ndøfani pa nthutsꞌi. Nɛ nuꞌa i hutsꞌi, Majuąni a rá thuhu, nguetho ząi im mam majuąni a. Nɛ di Jąꞌtsꞌa rá thuhu, janangueꞌa nꞌda ngu nꞌda di unꞌna rán säui ꞌbʉ bi juąnbi, nɛ xʉn ho ꞌbʉ i øtꞌ ran sʉi a.
\v 12 Nɛ nuꞌʉ yʉ́ dä a mi huxpʉ, mi zø tengu ra sibi, nɛ mi jabʉ xʉn ngu yʉ corona bʉ ja rá yą. Nɛ nu rá thuhu ntꞌoꞌtꞌi bʉ, hønsɛ mi pądi ꞌbɛꞌa rá thuhu.
\v 13 Nɛ nu rá pahni mi he, bi zinni gätho ra ji, nɛ nu rá thuhu, ngue rám Hman Oją a.
\v 14 Nɛ nuꞌʉ yʉ dofʉi mahɛ̨tsꞌi, gätho mi he ra tꞌaxca lino mahotho, xíngui tsꞌʉ xʉn tsꞌo. Nɛ gätho mi hux yʉ tꞌaxca ndøfani, nɛ bi dɛnꞌna ra mbʉdi mi huxpʉ ja ra ndøfani.
\v 15 Nɛ nuꞌa ra ngʉrbi i pøxpʉ ja rá nde nꞌda ra espada ɛ̨mmɛ hɛtꞌi, ngue da dąp yʉ́n sʉihʉ ꞌbʉpʉ gätho yʉ häi bʉ ja ra ximhäi. Nɛ gätho di manda ʉ bʉya, nɛ njon di japi da mbɛstaꞌa da ma. Nɛ tengutho ra jąꞌi bʉ ja ran thɛꞌma guiꞌuva, i nɛn yʉ uva, nɛ ngutho da ꞌyørpa ʉ to da zɛmbi, di un rá cuɛ Oją ntsꞌutho, ngue nuꞌa nte hɛ̨mbi da ꞌyøtꞌe.
\v 16 Nɛ ntꞌoꞌtꞌi bʉ ja rá pahni nɛ rá xįnthe rá thuhu, ngue ra Hmutsꞌʉtꞌabi a ngue di manda gätho yʉ tsꞌʉtꞌabi, nɛ rá thuhu, ngue ra Ngʉrpa Hmu a ngue di manda gätho yʉ hmu.
\v 17 Nɛ dá nugä nꞌda rám ꞌbɛhni Oją mahɛ̨tsꞌi mi ꞌbäpʉ ja ra hyadi, nɛ ntsꞌɛdi bi mbaꞌtꞌʉ gätho yʉ doja mi ꞌyo bʉ magątsꞌi, bi ꞌyɛ̨mbi: “Gätho ahʉ gyʉ dojahʉ, ba ɛ̨hmbʉ ya, nguetho Oją bi ꞌyøtꞌahʉ nꞌda ra dąntsꞌihmɛ.
\v 18 Ba ɛ̨hmbʉ ya gui sihʉ yʉ́ ngøcꞌyɛi yʉ tsꞌʉtꞌabi nɛ yʉ hmudofʉi, nɛꞌʉ gätho mi ja yʉ́ tsꞌɛdi. Nɛ yʉ ndøfani nɛ gätho mi hutsꞌi, nɛ gätho yʉ jąꞌi yʉ ꞌyɛ̨hɛ nɛ gätho hing yʉ ꞌyɛ̨hɛ, nɛ yʉ hmu uague yʉ́ mbɛfi,” bi ꞌyɛ̨m ꞌbʉ mi mbaꞌtꞌ yʉ doja.
\v 19 Nɛ dá nugä ra zate gue xí bøxpʉ ja ra dądeją, nɛ ꞌdarbʉ bim pɛtihʉ gätho yʉ tsꞌʉtꞌabi ngue gätho yʉ häi, ngue da ꞌyørpa nꞌda ra dąsʉi a mi huxpʉ ja ra tꞌaxca ndøfani, nɛꞌʉ gätho mi tɛnni.
\v 20 Nɛ nu ra zate bʉya bi mba mfɛntꞌi a, nɛꞌa ra hyäte pøngahyą bi fɛntꞌi, gueꞌa ran tꞌuti í bøx ra häi nɛ xí ꞌyøtꞌ yʉ hyonya ntꞌøtꞌe bʉ ja rá hmi ra zate. Nɛ gueꞌa mi hät yʉ jąꞌi gätho toꞌo mi ja rá thuhu bʉ ja rá dɛ̨. Gätho yoho bi tꞌɛntpʉ ja ra sibi ra azufre, tengu nꞌda ra deją na ndoho a ra sibi.
\v 21 Nɛ gätho yʉ jąꞌi mi tɛnꞌna ra zate, bi tho nangue ra espada mi pøxpʉ ja rá nde a mi huxpʉ ja ra tꞌaxca ndøfani. Nɛ nuꞌʉ yʉ doja bʉya bin niyą thoho nangue yʉ ngøcꞌyɛi.
\c 20
\s Nꞌda mahuąhi njɛya
\p
\v 1 Nɛ nubʉya, dra Xuuagä dá nugä manꞌda rám ꞌbɛhni Oją mahɛ̨tsꞌi bá cąi nɛ bá hyą rán sogui ra hyąhäi ɛ̨mmɛ xʉn hɛ̨ nɛ ntsꞌutho, guepʉ i ꞌbʉh yʉ zįthu. Nɛ nuꞌa rám ꞌbɛhni Oją mi cą nꞌda ra cadena xʉn ndoho.
\v 2 Nɛ bi bɛntꞌa ra jąrga, nɛ tꞌɛ̨mbi ra cꞌɛ̨yą, pɛ guetꞌa ra zįthu, rá thuhu í Satanás. Nɛ bi mba nthątꞌi nꞌda mahuąhi njɛya nangue ra cadena.
\v 3 Nɛ nuꞌa rám ꞌbɛhni Oją bʉya, bi ꞌyɛntpʉ ja ra hyąhäi a ra zįthu. Nɛ bi goꞌmi, nɛ bi hyʉtꞌa ran sogui, nɛ bi cuahmi xʉn ho, ngue hin da zä da bøm bʉ da hyät yʉ jąꞌi, asta gueꞌbʉ bi guaꞌa nꞌda mahuąhi njɛya. Mꞌbɛjua da mba nsoꞌtsꞌi ꞌda yʉ pa.
\v 4 Nɛ dá nugä manꞌda ra hmɛpya mahɛ̨tsꞌi, xʉn ngu yʉn thutsꞌi, nɛ nu toꞌo mi huxpʉ bin tꞌun ran tꞌɛ̨di da ꞌyøtꞌ ran juąnbate, gätho min ꞌyohʉ ʉ bi tho ꞌbʉ mi ma i ɛ̨cꞌyɛ̨i ra Jesús, nɛꞌbʉ mi mampꞌa rám hman Oją. Gue nuꞌʉ gätho him mi thąnde ra zate xí bøxpʉ ja ra deją nɛ rá nyoguido. Nɛ nte mi ja bʉ yʉ́ dɛ̨ rá thuhu ra zate, xínga guepʉ ja yʉ́ ꞌyɛ. Nuꞌʉ bi ndantsꞌ mahønꞌa ꞌbʉ mi du, nɛ bin ꞌyohʉ ra Jesús bin tsꞌʉtꞌabi nꞌda mahuąhi njɛya. 
\v 5 Nɛ guehya yʉ́ mbʉdi bi xox Oją bi tꞌurcä. Pɛ nuꞌʉ miꞌda gue bi du, hin da dąmbɛ̨ni asta gueꞌbʉ bi guaꞌa nꞌda mahuąhi njɛya.
\v 6 Nɛ di johya nɛ mająpi ʉ gätho ʉ ra mbʉdi da xox Oją, nɛ hin da nu a na yoho ran dąte ngue ra sibi maząi. Nɛ dim mbäją nangue ra Cristo bʉ bí ja rá tsꞌɛdi Oją, nɛ din ꞌyohʉ ra Cristo ngue din tsꞌʉtꞌabi nꞌda mahuąhi njɛya.
\s Da mba nthąpi ra zįthu
\p
\v 7 Nɛ nuꞌbʉ bi guaꞌa nꞌda mahuąhi njɛya, da mba nsocui a ra zįthu mi ofädi.
\v 8 Nɛ nuꞌa ra zįthu bʉya da bøm bʉ, xø da hyät mahønꞌa yʉ jąꞌi gätho na ngʉni ra ximhäi. Da mba bʉ ja ra häi Gog nɛ ra häi Magog nɛ di japi dim pɛti gätho nangue din ja ra dąsʉi. Nɛ xʉn ngu da dɛnni hingui sä da ꞌbede, tengu ra ꞌbomu ꞌbom bʉ ndendeją, njon da hyätꞌi da mbede.
\v 9 Nɛ din ꞌyɛ̨rpa thoho bʉ ní mba bi mbäꞌtsꞌi hapʉ mi ꞌbʉ ʉ min ꞌyohʉ Oją, guepʉ ja ra dąhnini di huɛ̨c Oją. Pɛ bá cąh mahɛ̨tsꞌi ra sibi bi juadi gätho yʉ́n sʉihʉ. 
\v 10 Nɛ nuꞌa ra zįthu ngue bi hyätꞌʉ, bi tꞌɛntpʉ ja ra sibi i thɛ ra azufre, tengu nꞌda ra deją na ndoho, guepʉ xí tꞌɛntpʉ ra zate xí bøxpʉ ja ra dądeją, nɛꞌa ra hyäte pøngahyą gue ran tꞌuti xí bøxpʉ ja ra häi. Nɛ gätho hyu da nu ran ʉnbi nangue ra sibi, ma pa nɛ ra xui hønꞌbʉ go njąmꞌbʉ gätho yʉ pa maząi.
\s Ran zɛgui ran juąnbi
\p
\v 11 Nɛ drá Xuuagä dá nugä mahønꞌa, gue nꞌda ran thutsꞌi xʉn ndoho xʉn tꞌaxi, nɛ mi hupʉ Oją. Nɛ nu ra ximhäi nɛ mahɛ̨tsꞌi bim ꞌbɛ ꞌbʉ mi hyantꞌa mi hupʉ, nɛ him man ja bʉya.
\v 12 Nɛ dá nugä gätho ʉ xʉn du, høntꞌa go ꞌbɛꞌa ní jąꞌi, mi ꞌbäpʉ ja rá hmi Oją i hupʉ. Nɛ bi mba ma tʉntsꞌi yʉ søcuą bʉ, nɛꞌa ra søcuą im ma toꞌo i ja ra temaząi. Nɛ gätho bi mba ma juąnbi nangueꞌa ntꞌoꞌtꞌi bʉ ꞌbɛꞌa gätho bi ꞌyøtꞌa, nuꞌbʉ mi ꞌbʉi.
\v 13 Nɛ gätho ʉ gue bi du bʉ ja ra deją, nɛ gätho ʉ miꞌda bi du hønbʉ go hapʉ, ngue gätho i ꞌbʉpʉ ꞌbʉꞌʉ xʉn du, bi bøm bʉ, nɛ bim ꞌbäpʉ ja rá hmi Oją. Nɛ bi mba ma juąnbi nangue ꞌbɛꞌa gätho bi ꞌyøtꞌ ꞌbʉ mi ꞌbʉi.
\v 14 Nɛ nuꞌa ra xɛqui mi ꞌbʉꞌʉ xʉn du, bi tꞌɛntpʉ ja ra sibi, tengu ra deją na ndoho. Gueꞌa na yoho ran dąte a.
\v 15 Nɛ nubʉ ja ra søcuą gue im ma toꞌo i ja ra temaząi, nɛ nuꞌʉ gätho him man tꞌoꞌtꞌi yʉ́ thuhu bʉ, bi tꞌɛntpʉ ja ra sibi.
\c 21
\s Maꞌdaꞌyo mahɛ̨tsꞌi nɛ ra ximhäi
\p
\v 1 Nɛ nubʉya, dra Xuuagä, dá nugä manꞌda bi tꞌurcä, ngue maꞌdaꞌyo mahɛ̨tsꞌi nɛ maꞌdaꞌyo ra ximhäi. Nguetho ya bim ꞌbɛdi ꞌbɛꞌa gätho mi ja bʉ mahɛ̨tsꞌi nɛ ra ximhäi. Nɛ hinꞌyʉ ra deją bʉ ja ra ꞌdaꞌyo ximhäi.
\v 2 Nɛ dá nugä bá cąh mahɛ̨tsꞌi guepʉ bí ꞌbʉ Oją nꞌda ra hogahnini, gueꞌa ra Jerusalén maꞌdaꞌyo, mahotho, mahoqui, tengu nꞌda ra hmute i he ra pahni mahotho da mba dín thątꞌui rá ndø.
\v 3 Nɛ dá øcä nꞌda ra nde ntsꞌɛdi bin yą, gue bá nɛxpʉ ja ran thutsꞌi bʉ bí hu Oją, bi ꞌyɛ̨na: “Dami hyand ya, bi gącua mahɛ̨tsꞌi rá ngu Oją,” bi ꞌyɛ̨na, nɛ nuya ząi dim ꞌbʉhmbʉ yʉ jąꞌi a.
\v 4 Nɛ guesɛ Oją di un ran johya, nɛ him man ja yʉ guidä yʉ jąꞌi, nɛ hin din ja ran dąte mahønꞌa bʉ, nɛ hin din ja yʉ dumbʉi bʉ. Nguetho gätho ꞌbɛꞌa mán ʉnbi mi ja, ya bi thogui.
\v 5 Nɛ nu Oją ngue i hupʉ ja ran thutsꞌi, bi ꞌyɛ̨na: “Gätho maꞌdaꞌyo dá øtꞌä ya.” Nɛ bi xiqui, dra Xuuagä: “Dami ꞌyoꞌtꞌ ya ꞌbɛꞌa dí xi a i, nɛ sä da tꞌɛ̨cꞌyɛi nguetho majuąni a.”
\v 6 Nɛ bi xiqui mahønꞌa: “Ya bi guadi ꞌbɛꞌa gätho dá øtꞌä ya. Gätho dá dʉꞌmi, nɛ ga juacä ra ꞌbɛfi dá dʉꞌmi. Ząi dám ꞌbʉcä nɛ dam ꞌbʉi maząi. Nɛ nuꞌʉ toꞌo i sä ngue di ꞌbɛ a ra te mahyoni thoho, tenguꞌbʉ i tuthe, ga undä ra te i juadi, tenguꞌbʉ ra mbøthe im fontsꞌa ra dehe ga unni, nɛ hin da gurqui.
\v 7 Nɛ toꞌo da dąha, ga comhbe ꞌbɛꞌa gätho i jagä, nɛ ga øtꞌe ma tꞌʉhnigä ʉ, nɛ dyʉ Ojągä ʉ.
\v 8 Pɛ ga ɛntpʉ ja ra sibi ʉ toꞌo i su yʉn ʉnbi ꞌbʉ da dɛngui, nɛꞌʉ toꞌo yoho yʉ́n ꞌyomfɛ̨ni, nɛ gätho ʉ xʉn tsꞌo yʉ́ mbʉi, nɛ gätho yʉ hyodu, nɛ gätho yʉ ꞌyomtꞌɛ̨ni, nɛ gätho ʉ in yąhʉ yʉ zįthu, nɛ gätho ʉ i thąnde høntꞌa go ꞌbɛꞌa gue him majuąni, nɛ gätho ʉ i man yʉ fɛhni. Gätho ya da nu na yoho ran dąte, da tꞌɛntpʉ i zø ra sibi ra azufre, tengu ra deją na ndoho,” bi ꞌyɛ̨n Oją.
\s Maꞌdaꞌyo ra hnini Jerusalén
\p
\v 9 Nɛ xø dá nugä manꞌda ra hmɛpya bi tꞌurcä. Nuꞌa nꞌda ʉ yʉ́m ꞌbɛhni Oją mahɛ̨tsꞌi gue min ꞌyohʉ ꞌdato yʉm ꞌbɛhni, gueꞌʉ mi thɛ yʉ ximbo gue bi un yʉn ʉnbi bʉ ja ra häi, nɛ nuꞌa bi xiqui: “Ba ɛ̨hɛ, ga utꞌa ra hnini, tenguꞌbʉ ra hmute bin thątꞌui ra Dɛꞌyo.”
\v 10 Nɛ nuꞌa rá Hogandąhi Oją bi bɛ̨ngä manꞌda mahønꞌa, tenguꞌbʉ bi zixcä a rám ꞌbɛhni Oją bʉ ja nꞌda ra tꞌøhø xʉn hɛ̨tsꞌi, nɛ bi ꞌyurca ra hogahnini Jerusalén maꞌdaꞌyo, bi gąh mahɛ̨tsꞌi guepʉ bí ꞌbʉ Oją.
\v 11 Nɛ nuꞌa ra hnini ɛ̨mmɛ di yoxni nangue rán hosɛ Oją i ꞌbʉpʉ mbo. Nɛ di yoxni tengu ra do ra jaspe i pømhyatsꞌi.
\v 12 Nɛ nuꞌa ra hnini mi ja bʉ ra mbäꞌtꞌi, ra jądo xʉn hɛ̨tsꞌi, goho yʉ́ tsꞌątꞌi. Nɛ nuꞌa ra mbäꞌtꞌi, mi ja bʉ ꞌdɛꞌmagoho yʉ dąjutꞌi, nɛ nꞌda ngu nꞌda yʉ jutꞌi mi ꞌbäpʉ nꞌda rám ꞌbɛhni Oją mahɛ̨tsꞌi, da mbäh ra goxthi. Nɛ nuꞌʉ ꞌdɛꞌmayoho yʉ jutꞌi, nꞌda a nꞌda ntꞌoꞌtꞌi yʉ́ thuhu ʉ ꞌdɛꞌma yoho yʉ́ tsꞌʉntꞌʉ ra Israel.
\v 13 Nɛ nꞌda nguadi min ja hyu yʉ jutꞌi, hyu i xopʉ ní bøx ra hyadi, nɛ hyu i xopʉ ní yʉh ra hyadi, nɛ hyu i xopʉ ra norte, nɛ hyu i xopʉ ra sur.
\v 14 Nɛ nuꞌa ra hnini mi faꞌtsꞌi ꞌdɛꞌmayoho yʉ do, nꞌdaꞌa nꞌda ntꞌoꞌtꞌi yʉ́ thuhu ʉ ꞌdɛꞌmayoho yʉn ꞌyohʉ gue yʉ́ ꞌbäihʉ ra Jesús, ngue ra Dɛꞌyo.
\v 15 Nɛ nuꞌa rám ꞌbɛhni Oją mahɛ̨tsꞌi gue dán yąꞌbe, mi hą nꞌda ra tꞌɛni ra oro, tenguꞌbʉ ra metro, gue da ꞌyɛn ra hnini, hangu na ndoho yʉ jutꞌi, nɛ yʉ føꞌtꞌe.
\v 16 Nuꞌa ra hnini xʉn zantꞌma ndoho, ꞌdaꞌangu ná mba, nɛ ꞌdaꞌangu nán jʉnni. Nɛ nuꞌa ram ꞌbɛhni mahɛ̨tsꞌi bi ꞌyɛn ra hnini, nɛ bi ꞌyʉꞌ ra güɛnda ngue yo mahuąhi nɛ yo ciɛnto kilómetro ná ndoho, ꞌdaꞌangu ná mba, ꞌdaꞌangu nán jʉnni, nɛ ꞌdaꞌangu nán hɛ̨tsꞌi.
\v 17 Nɛ nuꞌa ram ꞌbɛhni bi ꞌyɛni hangu nán hɛ̨tsꞌi rá mbäꞌtꞌi ra hnini, nɛ bi ꞌyʉꞌ ra güɛnda ngue hyąte ma goho metro. Nɛ bi ꞌyɛni tengutho i øtꞌ yʉ jąꞌi.
\v 18 Nɛ nuꞌa ra mbäꞌtꞌi ntꞌøtꞌe nangue yʉ do ra jaspe, pɛ nu ra hnini ntꞌøtꞌe nangue ra oro, tenguꞌbʉ ra xito a ra oro. 
\v 19 Nɛ nuꞌʉ ꞌdɛꞌmayoho yʉ dądo mi faꞌtsꞌa ra mbäꞌtꞌi, xʉn ngu ntꞌʉtꞌi yʉ tꞌʉdo ꞌdahma ꞌdanꞌyo, ngue di fɛxni, xʉm hmadi di muui. Nuꞌa rá mbʉdi ra dądo ntꞌʉtꞌi yʉ tꞌʉdo ra jaspe, nuꞌa ná yoho ra dądo ntꞌʉtꞌi yʉ tꞌʉdo ra zafiro, nuꞌa ná hyu ra dądo ntꞌʉtꞌi yʉ ágata, nu ná goho ra dądo ntꞌʉtꞌi yʉ esmeralda.
\v 20 Nɛ nuꞌa ná cʉtꞌa ra dądo ntꞌʉtꞌi yʉ ónice, ná ꞌdato ra dądo ntꞌʉtꞌi yʉ cornalina, ná yoto ra dądo ntꞌʉtꞌi yʉ crisólita, ná hyąto ra dądo ntꞌʉtꞌi yʉ berilo, ná gʉto ra dądo ntꞌʉtꞌi yʉ topacio, ná ꞌdɛtꞌa ra dądo ntꞌʉtꞌi yʉ crisoprasa, ná ꞌdɛꞌmaꞌda ra dądo ntꞌʉtꞌi yʉ jacinto, ná ꞌdɛꞌmayoho ra dądo ntꞌʉtꞌi yʉ amatista.
\v 21 Nɛ gätho ꞌdɛꞌmayoho yʉ́ jutꞌi rá mbäꞌtꞌi ra hnini ntꞌøtꞌe nangue yʉ perla gue xʉn tꞌaxi, nɛ nꞌdaꞌa nꞌda yʉ perla gue bi tꞌøtꞌe nꞌda ngu nꞌda ra jutꞌi. Nɛ nuꞌa ra calle xʉn ndoho bʉ mbo ra hnini ntꞌøtꞌe nangue ra oro xʉn ho, tenguꞌbʉ ra xito a ra oro.
\v 22 Nɛ hin dá nugä nꞌda ra niją bʉ, nguetho gätho rá ngusɛ Oją a ra hnini, ngue ra Hmu tątetho rá tsꞌɛdi, nɛ ra Dɛꞌyo, nɛ ꞌdarpʉ i ꞌbʉhmbʉ ʉ i ꞌbʉpʉ ja ra hnini.
\v 23 Nɛ nuꞌa ra hnini, him mahyoni ra hyadi di yorpʉ, ogue ra ząna, nguetho guesɛ Oją nɛ ra Dɛꞌyo di yorpʉ.
\v 24 Nɛ nangueꞌa ra nyotꞌi i ja bʉ, gätho di yotꞌʉ nɛ dim ꞌbʉmanho ʉ yʉ jąꞌi dim ꞌbʉpʉ gätho yʉ häi ua ja ra ximhäi. Nɛ yʉ tsꞌʉtꞌabi gätho yʉ häi dim ꞌbʉi di dä bʉ ʉ yʉn ho xʉ ꞌyøtꞌe, tenguꞌbʉ di um bʉ yʉn tꞌunni xʉn ngu di muui.
\v 25 Nɛ nsoquitho yʉ jutꞌi gätho ra pa, nɛ njąmꞌbʉ da mba njutꞌi, nguetho njąmꞌbʉ din xui bʉ.
\v 26 Nɛ høntꞌa go ꞌbɛꞌa gätho di muui, gue bi zän Oją bi ꞌyøtꞌ yʉ jąꞌi ꞌdahma ꞌdanꞌyo yʉ häi ua ja ra ximhäi, nɛ gueꞌa da hyąxpʉ ʉ, ní thįm bʉ mbo ra hnini.
\v 27 Pɛ hin da yʉrpʉ ja ra hnini ꞌbɛꞌa xʉn tsꞌo, xíng yʉ tsꞌomꞌbäi da yʉrpʉ, xíng yʉ hyäte. Pɛ høntꞌʉ toꞌo bi ꞌyorpa rá thuhu ra Dɛꞌyo bʉ ja rá søcuą, gue toꞌo gätho bi un ra temaząi, høntꞌʉ da zä da yʉrpʉ.
\c 22
\s Mi tsꞌʉtho ba ɛ̨h ra Jesucristo
\p
\v 1 Nɛ nuꞌa rám ꞌbɛhni Oją xø bi ꞌyurcä manꞌda mahønꞌa, dra Xuuagä. Ngue nꞌda ra dąthe mahoqui thoho ra dehe xʉn güe tengu ra xito, tꞌɛ̨mbi rá dehe ra temaząi. Nɛ bí nɛxpʉ ja rán thutsꞌi Oją nɛ ra Jesús ra Dɛꞌyo.
\v 2 Nɛ bi thoꞌinde bʉ ja ra calle xʉn ndoho bʉ ja ra hnini. Nɛ nꞌda nꞌdanguadi mi ꞌbäpʉ yʉ za tꞌɛ̨mbi yʉ za gue di un ra te. Nɛ nuꞌʉ yʉ za din zʉdi, nꞌdazna ngu nꞌdazna maꞌdaꞌyo yʉn dätꞌo din zʉpʉ, janangueꞌa ꞌdɛmayo nidį din zʉdi nꞌdajɛya. Nɛ nuꞌʉ yʉ́ xi di un yʉ́n zaqui gätho yʉ jąꞌi.
\v 3 Nɛ hinꞌyʉ ꞌbɛꞌa dí hnu rán tsꞌɛmbi Oją bʉ. Pɛ din ja bʉ rá tsꞌɛdi Oją nɛ rá tsꞌɛdi ra Jesús ra Dɛꞌyo. Nɛ gätho yʉ́ ꞌyɛ̨hɛ da dąnde ʉ nɛ da ꞌyørpa yʉ́ ꞌbɛfi.
\v 4 Nɛ nuꞌʉ dim ꞌbʉpʉ da nu rá hmi Oją, nɛ gätho din ja rá thuhu Oją bʉ ja yʉ́ dɛ̨.
\v 5 Nɛ hinꞌyʉ bʉ ra xui, janangueꞌa njon da hyom manꞌda ran nɛqui, xíng ra hyadi, nguetho guesɛ Oją ra Hmu di yozɛhɛ bʉ. Nɛ nuꞌʉ dim ꞌbʉpʉ din tsꞌʉtꞌabi gätho yʉ pa maząi.
\v 6 Nɛ nuꞌa ram ꞌbɛhni bi xicä: “Gätho ram hma gá ꞌyøde, majuąni a, nɛ da zä da tꞌɛ̨cꞌyɛi gätho. Nuꞌa Oją ra Hmu, gueꞌa di un rá Hogandąhi yʉ́ pøngahyą, ya bá pɛncä ua drám ꞌbɛhnigä a, ngue ga xi ahʉ ꞌbɛꞌa din ja, gue yʉ́ ꞌyɛ̨hɛ ahʉ Oją. Nɛ him mayaꞌa din ja,” bi ꞌyɛ̨na.
\v 7 “Dami ꞌyøhmbʉ ya,” ɛ̨nꞌa ra Jesús, “him mayaꞌa gue gua ɛ̨cä. Gan johyahʉ gätho ahʉ gue guí ɛ̨cꞌyɛ̨ihʉ ꞌbɛꞌa din ja, ntꞌoꞌtꞌi bʉ ja ra søcuą,” bi ꞌyɛ̨na.
\v 8 Nɛ nugä dra Xuuagä, majuąni dá øde nɛ dá nugä ꞌbɛꞌa gätho bi tꞌurqui ngue dá oꞌtꞌä ua. Nɛ nuꞌbʉ mi guaꞌa ꞌbɛꞌa dá øcä nɛ ꞌbɛꞌa xí ꞌyurqui, dán dąnyahmu bʉ ja rá gua ram ꞌbɛhni mahɛ̨tsꞌi bi ꞌyurqui gätho, dí ɛ̨na gue ga thąnde.
\v 9 Pɛ nu ram ꞌbɛhni bi xiqui: “O guí thąndegui, nguetho nugä dra ꞌyɛ̨hɛ̨gä tengu i, nɛ ni cuhʉ miꞌda yʉ pøngahyą, nɛ gätho miꞌda ʉ gue i ɛ̨cꞌyɛi ꞌbɛꞌa gá ꞌyorpʉ ja ra søcuą. Hønsɛ Oją gui thąnde,” bi ꞌyɛ̨na.
\v 10 Nɛ xø bi xicä ram ꞌbɛhni bʉya: “O guí pɛsꞌ thoho na gá ꞌyoꞌtꞌi, ngue ꞌbɛꞌa din ja, nguetho him mayaꞌa din ja.
\v 11 Nɛ nuꞌʉ toꞌo i øtꞌ ran tsꞌo, thocua thoho da ꞌyøtꞌ ran tsꞌo, nɛ gätho toꞌo i øtꞌ ran tsꞌomꞌbäi, thocua thoho da ꞌyøtꞌe. Pɛ nuꞌʉ toꞌo i øtꞌ ran ho, thocua thoho da ꞌyøtꞌ ran ho, nɛ toꞌo mahoqui thoho yʉ́ mbʉi thocua thoho gue xtán ho yʉ́ mbʉi,” bi ꞌyɛ̨nꞌa rám ꞌbɛhni Oją mahɛ̨tsꞌi ꞌbʉ mi xiqui.
\v 12 Nɛ bi ꞌyɛ̨ngä ra Jesús bʉya: “Nɛ guehna dí xi ahʉ, him mayaꞌa ba ɛ̨cä. Nɛ nꞌda ngu nꞌda ga un rán thɛui ꞌbɛꞌa gätho bi ꞌyøtꞌe.
\v 13 Nugä gätho dá dʉꞌmi nɛ ga juacä ra ꞌbɛfi dá dʉꞌmi, dra mbʉdigä nɛ dran zɛguigä, ząi dám ꞌbʉi nɛ dam ꞌbʉi maząi.
\v 14 Mająpi thoho gätho mahoqui yʉ́ mbʉi nangue Oją, tenguꞌbʉ mꞌbeni yʉ́ pahni. Janangueꞌa i ja yʉ́n tꞌɛ̨di da yʉrpʉ ja yʉ́ goxthi ra hnini. Nɛ nuꞌʉ toꞌo da zä da yʉrpʉ, da zä da zi yʉ́n dätꞌo yʉ za gue tꞌɛ̨mbi yʉ za di un ra temaząi.
\v 15 Pɛ hingui sä da yʉrpʉ gätho ʉ ngue bi ꞌuegue nangue Oją. Nɛ da gopʉ thi ʉ gätho i yąhʉ yʉ zįthu, nɛ gätho yʉ ꞌyomtꞌɛ̨ni, nɛ gätho yʉ hyodu, nɛ gätho i thąnde ꞌbɛꞌa him majuąni, nɛ gätho yʉ jąꞌi gue di ho da man yʉ fɛhni, hingui sä da yʉrpʉ ʉ.
\v 16 Nugä dra Jesúsgä, dá pɛnhdä bʉ mam ꞌbɛhnigä gue da xi ahʉ gyʉ ꞌyɛ̨cꞌyɛihʉ, gue ꞌbɛꞌa gá ꞌyorpʉ ja ra søcuą. Nugä dram bomꞌbɛtogä ra David, nɛ tenguꞌbʉ dra Dąsø dín ꞌyoꞌbe ran nɛqui,” bi ꞌyɛ̨nꞌa ra Jesús.
\v 17 “Ba ɛ̨hmbʉ gätho ahʉ,” ɛ̨nꞌa rá Hogandąhi Oją, nɛꞌa rá xisu ra Dɛꞌyo ɛ̨na. Nɛꞌʉ gätho gue i øde, da ma: “Ba ɛ̨hmbʉ.” Nɛ ba ɛ̨cua gätho i tuthe, nɛ gui sihʉ ra dehe gue di un ra temaząi, nɛ hin gui juthʉ a.
\s Ran zofo ran zɛgui
\p
\v 18 Nɛ nuya dí xi ahʉ, gätho ahʉ guí nuhʉ ya yʉm hma i jaua, ngue i ma ꞌbɛꞌa din ja, o gue ahʉ guí øhmbʉ ꞌbʉ i hman ya yʉm hma ntꞌoꞌtꞌi ua, pɛ nuꞌbʉ guí ɛ̨na gui hyuspahʉ miꞌda yʉm hma, pɛ da hyusꞌahʉ Oją ʉ yʉn ʉnbi im mangua ja ra søcuą ꞌbʉ.
\v 19 O nuꞌbʉ guí ɛ̨mhbʉ him majuąni ꞌda yʉm hma ntꞌoꞌtꞌi ua, ɛ̨na gueꞌbʉ gdí ꞌuejʉ ʉ, pɛ Oją di ꞌuecꞌahʉ yʉn jąpi im mangua ngue hin di ja ahʉ gui cʉrpʉ ja ra hogahnini, nɛ hin di ja ahʉ gui sifʉ yʉ́n dätꞌo a ra za di un ra temaząi.
\v 20 Nɛ nuꞌa ra Jesús gue bi man ya yʉm hma gätho i jaua, i ɛ̨m bʉya, “Majuąni ba ɛ̨cä nꞌdihi,” bi ꞌyɛ̨na. Nɛ gueꞌa dín ndeꞌe, nɛ dí xi a i, ba ɛ̨hɛ ma Hmu i Jesús.
\v 21 Nɛ gätho ahʉ dín nde guin nuhʉ rán jąpi a ma Hmuhʉ ra Jesús. Nɛ høntꞌa dí xi ahʉ ya.