\id ROM Baja Tarahumara
\h ROMANOS
\toc1 ROMANOS
\mt Ye Ju Alué Apeli Napu Osele Páulo Alué Ralámuli Napu Roma Ejperégame Nílige
\c 1
\s Kuira ꞌemi ralámuli Roma ejperégame napu ekí Onorúgame oyérame ju.
\p
\v 1 Ne Páulo nulá osíniliga ye osilí,\f + \fr 1:1 \ft Eꞌnesi 16:22. \f* neka wanápurigame ju Kristo Esúsite. Alué Kristo Esúsite nulérigime ju ne napurigá nuleme nímala ne ꞌlige benírame Onorúgame nila raꞌíchali.\f + \fr 1:1 \ft Eꞌnesi glosario “apóstol”. \f*
\p
\v 2 Ye raꞌíchali Onorúgame nila ꞌwe ꞌya mochígame ralámuli osale, alué napu ruwime nile napu anele Onorúgame,\f + \fr 1:2 \ft Eꞌnesi glosario “profeta”. \f* osale bilena apélichi, napu ju Onorúgame nila osilí.
\v 3 Alué raꞌíchalika ruwime nile tachiri nóchali nígame nímili níliga Waꞌlula Esukristo Onorúgame Inolá, alué napu ramué nuleme ju. Alueka ralámuli nile napurigá ramué, alué napu Rabí rijimala nile.\f + \fr 1:3 \ft Eꞌnesi glosario “ancestor”. \f*
\v 4 ꞌLige ꞌwe ꞌla machiaa ꞌla bijchiá ꞌla Onorúgame Inolá níligo napugiti Onorúgame Alawala ajalí ꞌyáligame napuꞌlige meꞌlisuga.
\p
\v 5 Onorúgame nulele alué Esukristo napurigá wanápamala neꞌchí napurigá Onorúgame nila nochálilachi nochámala ne, ꞌlige napurigá beníramala ne alué ralámuli tabilé jurío churigá ko Onorúgame napurigá weꞌká ralámuli ꞌla bijchígimala Onorúgame raꞌichálila ꞌlige napurigá ꞌwe ꞌla eꞌwímala Kristo.
\v 6 ꞌÉmika ꞌma aꞌlá wanápurigame ju Esukrístote napurigá ꞌemi Esukristo oyérame nímala, ꞌemi napu alé Roma ejperégame ju.
\p
\v 7 Reporali náwala ne, ꞌemi napu ꞌwe galilía Onorúgamete, ꞌlige napu wanápurigame ju Onorúgamete napurigá ꞌla Onorúgame oyérame nímala ꞌemi, Onorúgame napu ju Waꞌlula ramué Oꞌnola ꞌlige Waꞌlula Esukristo ramué nuleme ꞌwe aꞌlá semáriga guꞌírisa ꞌla képá ꞌemi, ꞌlige aminami ꞌla biꞌlepi ꞌnátili ꞌyasa ꞌla képá ꞌemi.
\s Jena ruwimela Páulo ꞌwe siminalio alé Roma anilichi
\p
\v 8 Neka waꞌlú cheliera ꞌya Onorúgame napugiti Onorúgameka Esukristo nuléligime napurigá bujémala tabilé aꞌlá ꞌnátili napu ꞌnátame nile ꞌemi. Bochígimi ꞌwe aꞌlá semáriga raꞌicha ralámuli ꞌemi olagá, ralámulika raꞌicha ꞌwe ꞌla bijchígame ko ꞌemi napu aní Onorúgame.
\v 9 Neka ꞌwe ꞌla ganíliga benírime ju ralámuli Esukristo nila raꞌíchali rejcholi, ꞌlige Onorúgame boꞌné ꞌwe aꞌlá machí tánime ko ne Onorúgame, napurigá ꞌwe aꞌlá guꞌírimala ꞌemi ralámuli
\v 10 ꞌlige Onorúgame ꞌwe aꞌlá machí senibí tánime ko ne napurigá elímala neꞌchí napurigá simela ne alé napu ꞌemi ejperé, ꞌla nirásaká alarigá Onorúgame.
\v 11 Neka ꞌemi eténili ꞌlige oilárinili ne ꞌemi napurigá abé raꞌsálagá mochímala ꞌemi aꞌboi alawálachi napurigá tabilé guwana rujsúmala ꞌemi Onorúgame oyeria.
\v 12 Alarigá ꞌla oilárimala ne ꞌemi ꞌlige ꞌemi ꞌla oilárimala neꞌchí.
\p
\v 13 ꞌEmi Esukristo oyérame napurigá ne, ꞌwe siminali ne alemi ꞌlige tabiléchigo gayénigo ne alemi simiá. Neka ꞌwe siminali alemi napu ꞌemi ejperé ꞌemi benírimia Onorúgame nila raꞌíchali, aꞌchigóriga napurigá beniri ne uché jarénami, napurigá weꞌká ralámuli ꞌla oyéramala Onorúgame.
\v 14 Neka benírimili júkuru Onorúgame nila raꞌíchali rejcholi suwábaga ralámuli, ralámuli griego raꞌíchame o tabilé griego raꞌíchame, ꞌwe jebénigame o tabilé jebénigame.
\v 15 Alekeri ꞌwe siminali ne ye raꞌíchali benírimia alé weꞌká riógachi Roma anilichi napu ꞌemi ejperé.
\s Jena ruwimela Páulo churigá ka napuꞌlige bijchígilia napu aní Onorúgame
\p
\v 16 Neka tabilé chijúniga beníriguru Onorúgame nila raꞌíchali rejcholi, alué raꞌíchalika Onorúgame aꞌwalila ju ꞌlige suwábaga ralámuli napu ꞌla nirame ju alué raꞌíchali ꞌlige napu ꞌla oyérame ju alué raꞌíchali, suwisá ꞌla rewagachi moinámala. Tabilé chéré rekó jurío ke o rekó tabilé jurío ke.
\v 17 Alué aꞌlala raꞌíchalika ꞌwe aꞌlá maꞌchígime ruwíguru churigá gatéligo Onorúgame napurigá ralámuli ꞌla naꞌtámala napurigá Onorúgame najkí. Aka regá aníché Onorúgame nila raꞌíchali: “Alué ralámuli napu ꞌla Onorúgame oyérame ju, alueka ꞌla bijchígame ju ꞌla sébali olame ko napu aní Onorúgame.”\f + \fr 1:17 \ft Eꞌnesi Habacuc 2:4 ꞌlige Gálatas 3:11 ꞌlige Hebreos 10:38. \f*
\s Jena ruwimela Páulo Onorúgame ꞌma ꞌoni aꞌréligo ralámuli cha nokame
\p
\v 18 Onorúgameka ꞌwe ayoga ajtí alué ralámuli iꞌnílime ꞌyuga tabilé ꞌla nirame Onorúgame, alué ralámuli napu tabilé najkí napurigá uché jaré ralámuli benimela Onorúgame raꞌichálila.
\v 19 Alué ralámulika ꞌwe aꞌlá machí suwábaga churigá ka Onorúgame napugiti boꞌné Onorúgame ꞌwe aꞌlá etériligime suwábaga napu boꞌné newale.
\v 20 Rekó tabilé etérume ke Onorúgame, ꞌláchigo etérume júkó napu newale Onorúgame, ꞌlige etega ralámuli suwábaga tábiri napu newale Onorúgame ꞌwe aꞌlá machirú waꞌlú aꞌwalí nígame ko Onorúgame. Alekeri pecha animeli júkó tabilé machime ko churigá ko Onorúgame.
\v 21 Rekó ꞌwe aꞌlá machime ke churigá ko Onorúgame, tabiléchigo nirame júkó Onorúgame aminami tabilé ꞌyame ju cheliera. Iligá pe eꞌkarúgame chíbiriga ꞌnátaga eꞌyéname ju, alekeri tabilé ꞌla ꞌnata.
\v 22 Alueka ꞌwe jebénime korí, nobi tabiléchigo jebénime júkó,
\v 23 pecha nirame kame Onorúgame napu tajsiné mukume ju, pe ꞌwe aꞌlá nirame ju weꞌká eꞌkarúgame tábiri, ꞌlige iwérali tánime ju, alué eꞌkarúgame tábiri ka ju napuyeri rió napu pe mukume ju siné rawé ꞌlige napuyeri chulugí ꞌlige napuyeri alué ajágame naó ronégame ꞌlige aminámichigó napuyeri alué ajágame wijchí biꞌtigá eꞌyéname napu ju sinowí. Suwábaga alieti tábiri newasa iwérali tánime ju.
\p
\v 24 Alekeri Onorúgame ꞌma ꞌoni aꞌrele alué ralámuli, alekeri alué ralámuli ꞌwe cha noká napugiti tabilé aꞌlá ꞌnátame kame.\f + \fr 1:24 \ft Eꞌnesi bersíkulo 29-30. \f* Tabilé chijúname ju rióchoká okoka.
\v 25 ꞌLige tabilé bijchigi napu aní Onorúgame, pe ꞌwe ꞌla bijchígime ju alué ꞌyégali, ꞌwe tánime ju iwérali napu Onorúgame newale napu ꞌpami rewagachi mochí ꞌlige apiépiri tábiri napu newale Onorúgame ꞌlige ꞌma tabilé tánime ju iwérali ꞌla Onorúgame. Nabí ꞌwe ꞌla raꞌichálime ju Onorúgame olagá, ꞌlige ꞌwe ꞌla wikarálime ju Onorúgame wikala. Alarigá júpá.
\p
\v 26 Alekeri Onorúgame ꞌoni aꞌrele alué ralámuli, alekeri alué ralámuli ꞌwe cha noká napu nokanali aꞌboi. Abiénachigo jaré umugí pe umugíchoká newime ju,
\v 27 ꞌlige aminami jaré rió tabilé newínili umugí ꞌyuga, pe rióchoká newime ju, nobi jípeko ꞌwe resí nilia mochiko.
\p
\v 28 Alué ralámulika ꞌma aꞌrele Onorúgame oyeria ꞌlige ꞌma tabilé aꞌlá ꞌnata, alekeri Onorúgame ꞌoni aꞌrele alué ralámuli, alekeri alué ralámuli ꞌwe cha noká napu nokanali aꞌboi.
\v 29 ꞌWe cha nokame ju alué ralámuli, ꞌwe korume ju napu tabilé aꞌboi nila ju, napuíme ju cha nokimea, ꞌlige ꞌwe enowélame ju, ꞌlige meꞌgá eꞌyéname ju uché jaré ralámuli, ꞌlige ꞌwe naꞌáuka ejperégame ju alué ralámuli uché jaré ralámuli ꞌyuga, ꞌlige ꞌwe ꞌyégiga raꞌíchime ju.
\v 30 ꞌWe chárigá raꞌíchame ju uché jaré ralámuli olagá, ꞌwe gichime ju Onorúgame, ꞌwe gawéliga raꞌíchame ju, ꞌwe gunarume ju ꞌlige ꞌwe riólame ju. ꞌNátame ju churigá cha olamia bilé ralámuli, ꞌlige tabilé eꞌwame ju napu nulé aꞌboi oꞌnola.
\v 31 Tabilé bijchígime ju bilé raꞌíchali ruilía, tabilé sébali olame ju ꞌla sébali olámirisá bilé nóchali, tabilé siné eꞌkame ju ꞌlige tabilé naꞌtemame ju uché jaré ralámuli.
\v 32 ꞌWe aꞌlá machí alué ralámuli Onorúgame anió ꞌma meꞌliati ko alué ralámuli alanokame, abiénachigo resí nokagá ejperégame júkó, ꞌlige ꞌwe raꞌsálagá eteme ju uché jaré ralámuli ꞌwe iꞌnílime.
\c 2
\s Jena ruwimela Páulo ruwíligo Onorúgame ꞌla sébali  gastigárime ko bilé ralámuli ꞌwe cha ꞌsime
\p
\v 1 Mué napuꞌlige neꞌocha uché jaré ralámuli pe mué boꞌné cheꞌwime kéré, napugiti mué abiena cha ꞌsika ilírome kámechigó napurigá uché jaré cha nokame ralámuli.
\v 2 ꞌWe ꞌla machiaa Onorúgame ꞌwe ꞌla etea ajtigó cha nokiachi ꞌlige tabilé pe arigá aꞌremio tase gastigáriga.
\v 3 Mué napu neꞌóchame ju ralámuli cha nokame kóriká ꞌlige mué boꞌné ꞌwe cha ꞌsika ilírome kéchigó, tase mayewa pe arigá aꞌremio Onorúgame mué tabilé gastigáriga.
\v 4 Mueka tabilé najkiéréko napurigá Onorúgamete naꞌtemápua. Onorúgameka tabilé yati gastigárime ju napuꞌlige cha ꞌsisa mué, ꞌlige mueka abichilubi ꞌwe cha ꞌsika ilírome ju. Onorúgameka najkí napurigá aꞌrémala mué chibi ꞌsika eyena.
\v 5 Abichilubi chibi ꞌsika einásaká mué ꞌliko Onorúgame aꞌwágame gastigárimala mué napuꞌlige seba raweli napuꞌlige Onorúgame gastigárimili ju ralámuli napuchilú resí nokale.
\v 6 Onorúgame semati raweli ꞌyámala ralámuli ꞌla sébali olásaká napu Onorúgame najkí ꞌlige gastigo ꞌyámala alué napu tabilé sébali olame ju.
\v 7 ꞌLa rewagachi moinámala alué ralámuli napu ekí eꞌwime ju Onorúgame, alué napu najkime ju napurigá naꞌtemaka etewa Onorúgamete ꞌlige alué napu ꞌla moinánilime ju ꞌpa rewagachi napuꞌlige suwisá.
\v 8 ꞌLige ꞌwe aꞌwágame gastigárimala alué ralámuli napu tabilé naꞌtemaka eteme ju uché jaré ralámuli ꞌlige napu tabilé eꞌwame ju napu Onorúgame najkí. ꞌWe ayóniga etémala Onorúgame alué ralámuli.
\v 9 ꞌWe resí nílamala suwábaga alué ralámuli napu cha nokame ju, alué ralámuli jurío ꞌlige abiena alué ralámuli tabilé jurío.
\v 10 Onorúgameka ꞌwe ꞌla nirámala alué ralámuli napu ekí tabilé iꞌnílime ju, alué napu ꞌla naꞌtemaka eꞌyéname ju uché jaré ralámuli. Aminami Onorúgame ꞌwe aꞌlala ꞌnátili ꞌyámala alué ralámuli, alué jurío ꞌlige abiena alué tabilé jurío.
\p
\v 11 Onorúgameka aꞌchigó aliena naꞌtemame ju suwábaga ralámuli.
\v 12 Ralámuli tabilé jurío tabilé machime ju chonime raꞌíchali chujkugá Moisesi nila nulalí napu Onorúgame ꞌyale, nobi ꞌláchigo machime júkó tabilé ꞌla ko cha nokiá. ꞌLige alué ralámuli jurío napu cha nokame ju rekó ꞌwe aꞌlá machime ke Moisesi nulalila, alueka ꞌwe machí Onorúgame waꞌlú gastigo nejimio.
\v 13 Pecha ꞌwesi ralámuli biꞌwime júkó alawala pe gepuga alué nulalí Moisesi nila, iligá ꞌla sébali olame ju suwábaga napu aní Moisesi nulalila, alueka ꞌla biꞌwimela alawala. Abiénachigó ꞌla biꞌwimela alué ralámuli alawala napu ꞌla sébali olame ju suwábaga aꞌboi rejchólila.
\v 14 Alué ralámuli tabilé jurío napu tabilé nígame ju alué Moisesi nila nulalí ꞌlige ꞌla eꞌwame aꞌboi nila rejcholi rekó tabilé nígame ke alué Moisesi nila nulalí, alueka ꞌla aꞌká ralámuli ju
\v 15 napugiti tabilé iꞌníliga járome kame. Boꞌné Onorúgame rekile alué ꞌnátili. Chibi nokasá yati ne nílime ju. Alekeri machime ju tabilé ꞌla ko chibi nokiá. ꞌLige ꞌwe aꞌlá nochasa abiena ꞌwe ꞌla ne nílime ju. ꞌWe aꞌlá machime ju tabilé aꞌlá ko chaꞌsimía ꞌlige ꞌwe aꞌlá machime ju ꞌwe aꞌlá ko tabilé cha nokogá eꞌyénilia.
\v 16 Napuꞌlige raweli sebasa Onorúgame ralámuli gustisia olámachi, Onorúgame Esukristo julámala gaténiliga ralámuli ꞌyuga. Esukrístoka waꞌlú gastigo ꞌyámala alué ralámuli ꞌwe chátiri ꞌnata mochísaká ꞌlige tabilé gastigo ꞌyámala ꞌla ꞌnata mochime ka. Alarigá ruyeme ju ne ralámuli.
\s Jena ruwimela Páulo bilé ralámuli ꞌla bijchiá  ꞌla Onorúgame oyérame ka tabilé chérikáme ko  rekó sikirétigame ke peꞌtá guwala isílala
\p
\v 17 ꞌÉmika jurío korí ꞌlige ꞌwe raꞌsálá ꞌemi jurío kóriká ꞌlige ꞌwe machime ju ꞌemi Moisesi nulalila ꞌlige ꞌwe raꞌsálá ꞌemi ꞌla Onorúgame oyérame kame.
\v 18 ꞌÉmika ꞌwe aꞌlá machime korime ju napu Onorúgame najkí, ꞌlige aminami ꞌwe ejbénigame korí ꞌemi nóchaga napurigá Onorúgame nulá.
\v 19 ꞌLige ꞌnata ꞌemi ꞌla umubamio beniria alué tabilé machime ralámuli churigá ka Onorúgame.\f + \fr 2:19 \ft Yolí raꞌíchaga ka regá aní: “ꞌÉmika umébame korí oꞌtoa ꞌemi alué ralámuli tabilé maꞌchílime ꞌlige raꞌósali ko ꞌemi alué ralámuli chonárale mochígame.’’\f*
\v 20 ꞌÉmika anime ju ꞌla jebénigame ko ꞌemi rejcholi ruyea uché jaré ralámuli, alué tabilé rejchirúgame napu pe yati simíbame ju uché jaré ralámulite bayérilia, ꞌlige abiena alué ralámuli napu pee machime ju Onorúgame nila raꞌíchali. ꞌÉmika niga mochime ju alué Moisesi nila nulalí ꞌlige alekeri ꞌwe ejbénigame korí ꞌemi suwábaga ꞌnátili ꞌlige senibí rawé ꞌla aꞌlala raꞌíchali raꞌíchame korí ꞌemi tabilé ꞌyégali.
\v 21 ꞌÉmika ꞌwe ꞌla rejcholi benírame ju uché jaré ralámuli, ¿ꞌlige ꞌemi chonigá tabilé ꞌla benime júkó bajchá? ꞌÉmika benírame ju ralámuli tabilé ꞌla ko chigolia, ¿ꞌlige chonigá chigome júkó ꞌemi?
\v 22 ꞌÉmika tabilé ꞌla korime ju uché jaré umugí ꞌyuga okokia tabilé ꞌla ꞌemi ꞌyula, ¿ꞌlige chonigá ꞌémika ꞌla ꞌyuga okome júkó alué che jaré umugí ꞌyuga tase ꞌla ꞌemi ꞌyula? ꞌÉmika ꞌwe aꞌlá ruyeme ju ralámuli tabilé aꞌlá ko iwérali tánilia alué eꞌkarúganti tábiri napu pe ralámuli newálila ju, ¿ꞌlige chonigá ꞌémika chigome júché tábiri napu nerú alemi pachá alué tábiri napu iwérali tánime ju alué ralámuli napu tabilé oyérame ju Onorúgame?
\v 23 ꞌÉmika ꞌwe machime ju napu Onorúgame najkí, tabiléchigo ꞌla eꞌwame kéréko ꞌemi napu Onorúgame najkí. ꞌLige ralámuli etega alanokachi ꞌemi tabilé ꞌla nirame ju Onorúgame.
\v 24 Alekeri Onorúgame raꞌichálila regá aní: “ꞌEmi ralámuli jurío tabilé eꞌwame ju napu nulá Onorúgame alekeri alué ralámuli tabilé jurío tabilé ꞌla niraga raꞌíchame ju Onorúgame olagá.”\f + \fr 2:24 \ft Eꞌnesi Isaías 52:5 ꞌlige Ezequiel 36:20-23. \f*
\p
\v 25 Sikirétigame nisa ꞌemi peꞌtá isílala guwala ꞌlige ꞌla eꞌwame nisa ꞌemi napu najkí Onorúgame, alarigaka ꞌwe aꞌlá najtékame ju. ꞌLige sikirétigame nisa ꞌemi peꞌtá isílala guwala ꞌlige tabilé eꞌwasa napu najkí Onorúgame, ꞌliko tabilé najtékame nímala rekó sikirétigame ke ꞌemi peꞌtá isílala guwala.
\v 26 Ralámuli tabilé jurío rekó tabilé sikirétigame ke peꞌtá isílala guwala ꞌlige ꞌla eꞌwame nisa napu nulá Onorúgame, alué ralámulika nímala napurigá alué ralámuli napu sikirétigame ju peꞌtá isílala guwala alué napu ꞌla eꞌwime ju Onorúgame.
\v 27 Napuꞌlige ꞌemi etea alué ralámuli napu tabilé sikirétigame ju peꞌtá isílala guwala ꞌwe ꞌla sébali olao alué nulalí napu Onorúgame ꞌyale Moisesi, ꞌlige ꞌémika ꞌwe chijunámala etega tabilé ꞌla sébali olame ko ꞌemi alué nulalí rekó ꞌwe ꞌla machime ke alué nulalí ꞌlige rekó ꞌla sikirétigame ke peꞌtá isílala guwala.
\v 28 Bilé ralámuli napu ꞌla bijchiá ꞌla Onorúgame oyérame ju, tabilé chéré rekó sikirétigame ke peꞌtá isílala guwala.
\v 29 Alué ꞌla bijchiá ꞌla Onorúgame oyérame ka, alueka ꞌla Onorúgame Alawala alawégame ju ꞌlige ꞌla eꞌwame ju napu nulá Onorúgame. Onorúgameka ꞌwe aꞌlá raꞌsálagá ajtí alué ralámuli ꞌyuga napugiti etéeme alué ralámuli naꞌtálila. ꞌLige pe ralámulika tabilé eteme ju alué uché bilé ralámuli naꞌtálila, ralámulika ꞌwe najtékame nerame ju ꞌnalina alué sikirékime bilé rió peꞌtá isílala guwala. Tabiléchigo machígó tachiri ꞌnata ajtigó.
\c 3
\p
\v 1 ¿Tacha ꞌla júkó jurío níriga ꞌlige sikerétigame níriga peꞌtá isílala guwala wiꞌchila?
\v 2 ꞌWe ꞌla júpaché jurío níriga ꞌlige sikirétigame níriga peꞌtá isílala guwala napugiti Onorúgame ꞌyáligame alué boꞌné Onorúgame nila raꞌíchali alué ralámuli jurío ꞌya ejperégame ꞌlige jipe bijí alué raꞌíchali oyérilime niru.
\v 3 ꞌLige ¿chukimélawé ꞌma aꞌresa Onorúgame oyeria jaré alué ralámuli ꞌlige napu ꞌla sikirétigame nile peꞌtá isílala guwala wiꞌchila? ¿ꞌLige ꞌlacha alekeri ꞌma tabilé sébili olámalawé Onorúgame napu sébili olámorílige?
\v 4 Tabilé alarigá ju, Onorúgameka sébili olame ju rekó ralámulika tabilé sébili olame ke. Regá aníché Onorúgame nila raꞌíchali:
\q Mué Onorúgame, mueka tabilé siné ꞌyégali ruwime ju,
\q alekeri napuꞌlige ralámuli anichi ꞌwe ꞌyégali raꞌíchame ko mué,
\q mueka senibí neyúrimala.\f + \fr 3:4 \ft Eꞌnesi Salmos 51:4. \f*
\p
\v 5 Regá ꞌnátame ju jaré ralámuli: “Napuꞌlige cha nokisuga ꞌlige ku guwana naꞌtásiga, suwábaga eꞌnesi chiena ꞌla semá ꞌsime ko Onorúgame ka. ꞌLiko tabilé ꞌla ju Onorúgame gastigaria ramué napuꞌlige cha nokisuga.’’ (Regá raꞌíchame ju ralámuli napu tabilé Onorúgame oyérame ju.)
\v 6 Tabilé ꞌla ju alarigá naꞌtalia. Onorúgameka tabilé ꞌyégimala napuꞌlige raweli sebasa napu Onorúgame gastigo ꞌyámili ju ralámuli.
\p
\v 7 Abirigáchigo jaréchigo regá anime ju: “Napuꞌlige ne ꞌyégali raꞌíchachi, Onorúgame guꞌírame kéré ne. Onorúgame pecha gastigáromili júkó neꞌchí.”
\v 8 Jaré ralámuli anime ju, alarigá nejime kará ne rejcholi, tabiléchigo bijchiá júkó, alué ralámulika gastigáriwili ju.
\s Jena ruwimela Páulo ruwíligo suwábaga tabilé aꞌlá  alawégame nírigo jena wijchimoba ejperégame
\p
\v 9 ¿Abé aꞌká ralámuli niru ramué jurío abé aꞌlá ꞌnátame meꞌtagá uché jaré ralámuli? Tabilé. Napurigá aní ne, suwábaga ralámuli tabilé aꞌlá alawégame niru rekó jaré jurío nírige ꞌlige aminami jaré tabilé jurío ke.
\v 10 Regá aní Onorúgame nila raꞌíchali:
\q Tabilé ꞌwesi ralámuli mochí biꞌwígame alawégame.
\q
\v 11  Tabilé ꞌwesi iꞌté ꞌla námame churigá ka alué aꞌlala ꞌnátili.
\q Tabilé ꞌwesi iꞌté ꞌla oyérinilime Onorúgame.
\q
\v 12  Suwábaga ꞌma aꞌrele Onorúgame oyeria,
\q pe napuchíbiriga ꞌnátaga eꞌyena,
\q suwábaga ꞌwe cha noká.
\q Tabilé ꞌwesi ralámuli mochí ꞌla semáriga ꞌnátame,
\q nibilé pe bilé.\f + \fr 3:12 \ft Eꞌnesi Salmos 14:1-3 ꞌlige Salmos 53:1-3 ꞌlige Eclesiastes 7:20. \f*
\q
\v 13  Napuꞌlige raꞌicha pe chibiyeti raꞌíchame ju,
\q ꞌlige ꞌwe ꞌyégali raꞌíchame ju.\f + \fr 3:13 \ft Eꞌnesi Salmos 5:9. \f*
\q Asíriga ená nílime ju ralámuli alué raꞌíchali gepua
\q napurigá kame ju bilé sinowí sowelá.\f + \fr 3:13 \ft Eꞌnesi Salmos 140:3. \f*
\q
\v 14  ꞌLige ꞌwe gawéliga raꞌíchame ju ralámuli olagá,
\q ꞌwe ayóniga ralámuli.\f + \fr 3:14 \ft Eꞌnesi Salmos 10:7. \f*
\q
\v 15  ꞌLige ꞌwe jigame ju ralámuli meꞌliachi.
\q
\v 16  Asíriga resíriga aꞌreme ju ralámuli,
\q asíriga pobre aꞌreme ju.
\q
\v 17  Alué ralámulika senibí naꞌáuka ejperégame ju.\f + \fr 3:17 \ft Eꞌnesi Isaías 59:7-8. \f*
\q
\v 18  Tabilé nirame ju Onorúgame,
\q tabilé majame ju Onorúgame.\f + \fr 3:18 \ft Eꞌnesi Salmos 36:1. \f*
\m Regá aní Onorúgame nila raꞌíchali.
\p
\v 19 ꞌWe ꞌla machiaa ꞌwe ꞌla maꞌchígime anió alué raꞌíchali alé osilichi napu ju Moisesi osilila napurigá ꞌla machiboa alué napu nígame niru alué osilí tabilé ꞌwesi mochigo jena wijchimoba ꞌla sébali olame, ye raꞌíchalika júkuru napurigá machiboa alué napu nígame niru alué osilí suwábaga ralámuli tabilé aꞌlá alawégame niru jena wijchimoba ejperégame, ꞌlige suwábaga ꞌwe cha nokame Onorúgame gastigárimala.
\v 20 Rekó ꞌla sébali olame nírige alué nulalí Moisesi osilila pecha biꞌwígame alawégame nírukó. Onorúgameka pecha animélagó: “Ye rioka ꞌla tabilé seꞌwiná ꞌsíkame neraga etewá ne.” Alué nulalí Moisesi osilílaka osirúgime júkuru pe napurigá ꞌla machiboa tabilé aꞌlá alawégame nírigo.
\s Jena ruwimela Páulo ruwíligo Onorúgame náwiligo  Kristo Esusi napurigá oꞌtomela suwábaga  tabilé aꞌlá ꞌnátili napu nerúlige jena wijchimoba
\p
\v 21 Alué Moisesi ꞌlige alué ralámuli napu ruwime nile napu anele Onorúgame ꞌla maꞌchígime ruwile tabilé chérikó Onorúgame níriga rekó tabilé sébali oliae alué napu nulá alué nulalí Moisesi osilila.
\v 22 Onorúgameka ꞌla niraga eté suwábaga ralámuli napu ꞌla bijchígime ju napu anile Esukristo ꞌlige napu ꞌla eꞌwame ju. Onorúgameka pecha chélágó rekó tabilé jurío ke ralámuli o rekó jurío ke ralámuli.
\v 23 Suwábaga ralámuli tabilé ꞌla bijchiá ꞌla biꞌwígame alawégame ju, ꞌlige tabilé sébali olame ju napu Onorúgame najkí.
\v 24 Onorúgameka ꞌwe naꞌtemá ramué, alekeri júlale Kristo Esusi napurigá oꞌtomela suwábaga tabilé aꞌlá ꞌnátili (pecado). Alué ꞌsile suwábaga gatea.
\v 25 Onorúgameka Kristo Esusi júlale napurigá ramué neraga mukumela gulusichi. ꞌLa bijchígisiká ramué, ramué neraga mukumea nawáligo Kristo Esusi ꞌliko Onorúgame ꞌla eꞌkámala ramué. Regá ꞌwe ꞌla maꞌchígime nérékuru chiena ꞌla naꞌtamao Onorúgame ramué. ꞌLige maꞌchígime nélékuru Onorúgameka tabilé yati gastigáriligo alué ꞌya mochígame napugiti Onorúgameka ꞌwe ꞌla buweme kame napurigá ku guwana naꞌtawa ramué.
\v 26 Aꞌchigóriga jipe ꞌwe ꞌla maꞌchígime nérékuru chiena ꞌla naꞌtemao Onorúgame ramué. ꞌLige ꞌwe maꞌchígime nérékuru bijí ꞌwe ꞌla naꞌtamame ko Onorúgame alué ralámuli napu ꞌla Esusi oyérame ju.
\p
\v 27 Ramueka pecha regá anéwagó Onorúgame: “Ramueka ꞌwe ꞌla sébali olame niru alué nulalí Moisesi nila.” Pecha ꞌla ju rekó alarigá aniá, pecha ꞌla sébali olame nírigime. Onorúgameka ꞌwe naꞌtemá ramué napugiti ramueka Esukristo oyérame nírigime.
\v 28 Onorúgameka pecha regá animélagó: “Ye rioka ꞌwe aꞌlá alawégame ju napugiti ꞌla sébali olame kame napu nulá alué nulalí Moisesi osilila.” Onorúgameka iligá regá animela: “Ye rioka ꞌwe aꞌlá alawégame ju napugiti ꞌla bijchígime kame napu aní ne.”
\p
\v 29 Onorúgameka tase pe juríocho ralámuli naꞌtemame ju, Onorúgameka naꞌtemame ju suwábaga ralámuli rekó tabilé jurío ke.
\v 30 Onorúgameka pe biꞌlepi ju, ꞌlige Onorúgame júkuru napu oyera suwábaga ralámuli napu oyérame ju Esukristo, alué jurío ralámuli ꞌlige alué tabilé jurío ralámuli.
\v 31 Rekó Esukristo oyérame nírige pecha regá naꞌtáwagó: “Ramueka ꞌma ꞌla bijchígime niru napu aní Esukristo, ꞌma pecha najtékame júkó alué nulalí Moisesi nila.” Iligá tase aꞌrewa alué nulalí Moisesi nila. Alué Moisesi nulalílaka abiena najtékame ju. Napuꞌlige Esusi mukusá suwábaga ꞌla sébali ikile napu aní alué nulalí Moisesi nila.
\c 4
\s Jena ruwimela Páulo ruwíligo Abraámi  ꞌwe ꞌla bijchígiligo napu anile Onorúgame
\p
\v 1 Regá aniboa: ¿Churigá ꞌla naꞌtemaka etele Onorúgame alué Abraámi ramué rijimala ye ꞌya ajtígame?
\v 2 Onorúgame ꞌwe galegá etesa alué Abraámi pe etega ꞌwe ꞌla sébali olame ko eꞌkarúgame napu Onorúgame nulele, ꞌliko Abraámi animékuru: Neka ꞌwe ꞌla sébali olame ju napu Onorúgame nulá, alekeri ꞌla rewagachi moinámala ne. Regá animékuru, nobi Onorúgameka tabiléchigo regá ꞌnátaga etélekó alué Abraámi: “Ye rioka ꞌla rewagachi moinámala ꞌla sébili olame kame napu ne nulá.” Pecha alarigá ꞌnátalekó Onorúgame pe ꞌla sébili olagáriká alué Abraámi.
\v 3 Aka regá aníché alué osilí Moisesi osilila: “Onorúgameka regá ꞌnátaga etele alué Abraámi: Ye rió ꞌla rewagachi moinámala napugiti ꞌwe ꞌla bijchígiligame napu aní ne.”\f + \fr 4:3 \ft Eꞌnesi Génesis 15:6. \f*
\v 4 Napuꞌlige bilé rió nochasa enomí meka, alué enomika tabilé pe kógilime nímala alué enomí alué nóchame, alué enomika ꞌma métigame júkuru, alué nóchame mélekuru.
\v 5 Onorúgameka ꞌwe ꞌla biꞌwígame alawégame neraga eteme ju bilé ralámuli rekó cha ꞌsíkame nílige napugiti alué ralámulika ꞌla bijchígiligame napu anile Onorúgame.
\v 6 Aka alué boꞌné Rabí anílegeꞌé Onorúgame ꞌwe ꞌla neraga eteme ko apiépiri ralámuli napu ꞌla bijchígime ju napu aní Onorúgame.
\v 7 Regá anime osale:
\q ꞌWe ganíliga mochí alué ralámuli
\q napu eꞌkárigime ju Onorúgamete.
\q
\v 8  ꞌWe ganíliga mochí alué ralámuli
\q napu Onorúgame eꞌkame ju.\f + \fr 4:8 \ft Eꞌnesi Salmos 32:1-2. \f*
\p
\v 9 ¿Chieri júkó alué ralámuli napu ꞌwe raꞌsálá mochí, napu tabilé gastigárile Onorúgame? ¿Pe alué napu ju ꞌla sikirétigame peꞌtá isílala o alué tabilé sikirétigame peꞌtá isílala? ¿Aka Onorúgame ꞌwe ꞌla neraga etéligeꞌé alué Abraámi, ꞌwe ꞌla bijchígilime napu anile Onorúgame?
\v 10 ¿Chiéniko ꞌla neraga etélekó? ¿Bajchá taꞌchó sikirekia peꞌtá alué isílala guwala o máchala nujubá ꞌma sikirésiga? Aka taꞌchó sikirékiaguru peꞌtá isílala.
\v 11-12 ꞌLige aꞌkinana Abraámika ꞌma sikiréliru peꞌtá alué isílala napurigá machimela ralámuli ꞌma aꞌlá oyérame ko Onorúgame. ꞌLige taꞌchó sikirekia, alueka ꞌla bijchígime nile napu Onorúgame anile, ꞌlige Onorúgame ꞌwe aꞌlá niraga etele. ꞌLiko Abraámika ju suwábaga ralámuli oꞌnola napu ꞌla bijchígame ju napu aní Onorúgame ꞌlige Onorúgameka ꞌla nirá alué ralámuli, tabilé chéré rekó sikirétigame ke peꞌtá alué isílala o tabilé sikirétigame ke.
\s Jena ruwimela Páulo ruwíligo Onorúgame  ꞌla sébali olame ko  bilé tábiri ꞌla sébali olámirisá
\p
\v 13 Onorúgame anele alué Abraámi ꞌlige alué Abraámi rijimala ꞌwe aꞌkinana oꞌchérigame: “Suwábaga ye gawí ꞌemi nila nímala.” Onorúgameka pecha regá ꞌnátalekó: “Abraámika ꞌwe ꞌla sébali olame ju napu aní alué nulalí, alekeri ꞌyámala ne suwábaga ye gawí.” Pecha alarigá ꞌnátalekó Onorúgameka. Onorúgameka alarigá anele alué Abraámi ꞌlige alué Abraámi rijimala aꞌkinana oꞌchérigame napugiti Abraámika ꞌwéchigo ꞌla bijchígiligame ꞌla sébali olame ko Onorúgame bilé tábiri ꞌla sébali olámirisá, alekeri Onorúgame sébali rió neraga etele alué Abraámi.
\v 14 Onorúgame ꞌla biꞌweme nisa ralámuli alawala pe aluecho napu ꞌla sébali olame ju alué Moisesi nila nulalí, ꞌliko pecha sirbe nímilikó rekó ꞌwe ꞌla bijchígilie napu aní Onorúgame, ꞌlige tabilé siné ꞌla biꞌwígame alawégame níwilikuru.
\v 15 Jaré ralámuli ꞌnátame ju rewagachi simamio pe ꞌla sébali olagá Moisesi nila nulalí, nobi tabiléchigo alarigá júkó. Tabilé ꞌwesi ralámuli umébame ju sébali olá alué nulalí Moisesi nila rekó ꞌwe iwérali olae sébali olániliga alué nulalí Moisesi nila, abirigáchigo gastigáriwili ju. ꞌLige napuꞌlige ralámuli ꞌla bijchígisa ꞌla sébali olame ko Onorúgame napu anile, ꞌliko tabilé gastigo narémala alué ralámuli.
\p
\v 16 ꞌWe ꞌla najkiáká napurigá ꞌla nejkúrimala Onorúgame, ꞌliko ꞌwe ꞌla bijchígilime ju napu aní Onorúgame. Alarigá suwábaga ralámuli ꞌla guꞌíriwa Onorúgamete ꞌla najkisáká ꞌemi napurigá guꞌíriwa. Onorúgame tabilé lale: “Neka guꞌírimala pe aluecho napu ꞌwe ꞌla sébali olame ju alué Moisesi nila nulalí.” Onorúgameka lale ꞌlina: “Neka ꞌwe ꞌla guꞌírimala ꞌlina alué napu ꞌla bijchígime ju napu aní ne napurigá bijchígile alué Abraámi.” Alekeri suwábaga ramué oꞌnola ju alué Abraámi.
\v 17 Aka regá aníché Onorúgame nila osilí: “Neka mué ajchá waꞌlula weꞌkaná gawichí mochígame ralámuli oꞌnola neraga.” Alué Onorúgame júkuru napu oyérale alué Abraámi, alué Onorúgame napu ajalí ꞌyame ju suwígame ꞌlige napu machime ju suwábaga napu ikimeli ju.
\p
\v 18 Napuꞌlige Onorúgame anesa ochérimio alué Abraámi inolá ꞌlige apalóchila, ochila, umúlila, ꞌlige ególila, ꞌlige aminacho weꞌká, ꞌwe ꞌla bijchígile Abraámi alanichi Onorúgame. ꞌLige ochérale alué Abraámi inolá ꞌlige apalóchila ꞌlige ochila, ꞌlige umúlila ꞌlige ególila ꞌlige aminacho weꞌká, ꞌlige weꞌkanami gawichí simíbale ejperélimia.
\v 19 Rekó ꞌma ꞌwe oꞌchérame ke Abraámi, tabilé chélále, ꞌma amulí bilé siento bamígame nile, ꞌlige ꞌma ꞌwe ꞌla machigá asale alué Abraámi ꞌma pe aꞌkinana mukumeo, ꞌmáchigo ꞌma ꞌwe oꞌchérigame níligame, ꞌlige ꞌwe ꞌla machigá asale tabilé siné rojparáligo alué Abraámi upila napu Sara anilime nile, tabilé siné ꞌkúchigame níligo, tabiléchigo chélálekó, iligá alué Abraámika ꞌwe ꞌla bijchígale ꞌla bijchiá alarigá nimio napurigá anile Onorúgame, Onorúgame ꞌla elimio alué upila napu Sara anilime nile napurigá ꞌla ꞌkúchigame nímala.
\v 20 Abraámika tabilé gawéliga akele alanichi Onorúgame, oꞌchérimio alué Abraámi inolá, iligá alué Abraámika abéchigo ꞌla bijchígale siné rawé ꞌla ranélimio alué Sara napurigá anile Onorúgame. ꞌLige alué Abraámika anele Onorúgame waꞌlú aꞌwalí nígame ko Onorúgame
\v 21 ꞌlige ꞌla sébali olame ko bilé tábiri ꞌla sébali olámirisá.
\v 22 Alekeri Onorúgame ꞌla sébali olame rió neraga etele alué Abraámi ꞌla biꞌwígame alawégame neraga.
\p
\v 23-24 Onorúgame nila raꞌíchalika ruwí Onorúgame ꞌwe ꞌla biꞌwígame alawégame neraga etéligo Abraámi napugiti Abraámi ꞌwe ꞌla bijchígiligame napu anile Onorúgame. ꞌLige ye raꞌíchalika ruwime ke aní Onorúgame ꞌwe ꞌla biꞌwígame alawégame neraga eteo ramué aꞌchigóriga napurigá Abraámi, napugiti ramué ꞌwe ꞌla bijchígime nírigime napu aní Onorúgame ꞌlige ꞌla bijchígime nírigime Onorúgame ajalí ꞌyáligo Esusi napu ju ramué nuleme.
\v 25 Onorúgame alarigá elale napurigá meꞌliboa alué Esusi napurigá oꞌtogá mukumela suwábaga alué gastigo napu ramué narépuli nílige, ꞌlige napurigá ku uché ajánamala Esusi napurigá Onorúgame ꞌwe ꞌla biꞌwígame alawégame ralámuli neraga etémala ramué.
\c 5
\s Jena ruwimela Páulo ruwíligo Onorúgame  ꞌla biꞌwígame alawégame neraga eteo ramué
\p
\v 1 Onorúgame ꞌwe ꞌla sébali olame ralámuli niraga eté ramué napugiti ramueka ꞌla bijchígime nírigime ꞌla sébali olame ko Onorúgame bilé tábiri ꞌla sébali olámirisá, alekeri ꞌla ganíliga ejperégame niru ꞌla iwérali tániga Onorúgame. Waꞌlula Esukristo napu ramué nuleme ju, ꞌma ꞌla gatele, gulusichi mukule ramué nila gastigo oꞌtogá napurigá ramué ꞌla ganíliga ejperégame niwa.
\v 2 ꞌWe raꞌsáligá mochiru, ramueka ꞌwéchigo ꞌla machiame ꞌwe ꞌla nejkura ajtigó Onorúgame napugiti ramueka ꞌwe ꞌla bijchígime nírigime ꞌla nejkúrime ko Onorúgame. Abiena ꞌwe raꞌsálagá mochiru napugiti ꞌwe ꞌla machiame ꞌla rewagachi moinawio Onorúgame ꞌyuga mochimia napuꞌlige suwisuga.
\v 3 Abiénachigo ꞌla ganíliga ejperélirukó rekó iꞌsínimi ꞌwe resí níliga ejperégame nírige. ꞌWéchigo ꞌla machiame alarigá benírame ko anáchaga rekó resí níliga ejperélirige.
\v 4 ꞌLige benisúgaká anáchaga rekó resí níliga ejperégame nírige iꞌsínimi, ꞌwe ꞌla ganíliga etewa ramué Onorúgamete, ꞌlige alésíko ꞌla machigá mochiwa ꞌla sébali olamio napurigá anílige boꞌné Onorúgame.
\v 5 ꞌLige alésíko tabilé chijunawa, Onorúgame ꞌwe naꞌtemaka eté ramué, alekeri náole boꞌné alawala napurigá asimémpá ramué alawálachi.
\p
\v 6 ꞌYako tabilé aꞌká ralámuli nírigeturu, pe chibi nokogá járome nírigeturu. Ramué aꞌboi ralámulika tabilé machime nírige churigá ꞌla moinawa rewagachi, alekeri Esukristo mukúlekuru ramué guꞌíriga. Onorúgameka ꞌma ꞌla machigá asale aliéniko mukumeo Kristo.
\v 7 Napuꞌlige meꞌliboli nisa bilé rió tabilé cheꞌsika oyame, ꞌlige uché bilé rió etesa meꞌlibólikó alué rió tabilé cheꞌsime, siné kachi regá animela alué rió alé ilígame etea meꞌlibólikó alué rió tabilé cheꞌsime: “Neꞌchí ꞌlina meꞌliboa, tase alué rió.” Siné kachi tabilé che animérémá.
\v 8 Esukrístoka meꞌlíliru bilena gulusichi ujchagá ramué nila gastigo oꞌtogá rekó ꞌwe cha nokame nírige ramué, rekó alué Esukristo saíla nírige ramué, ꞌlige ꞌwe aꞌlá machiaa Onorúgame ꞌwe naꞌtemao ramué.
\v 9 Jipe Onorúgame ꞌwe ꞌla sébali olame ralámuli neraga eté ramué aka Kristo mukúlepeché bilena gulusichi ramué nila gastigo oꞌtogá, alekeri Onorúgame ꞌla biꞌwígame alawégame neraga eté ramué. Onorúgame tabilé gastigárimala ramué napuꞌlige ꞌma sebasa raweli napu Onorúgame gastigárimili ju suwábaga ralámuli cha nokame, napuꞌlige rewagachi oꞌtomeli ju Onorúgame oyérame ralámuli.
\v 10 Onorúgame saíla nírige, ꞌlige ꞌma gatele alué boꞌné inolá náoliga napurigá meꞌliboa bilena gulusichi. Jípeko Onorúgame ꞌkúchila niru ꞌlige ꞌla rewagachi simawa napugiti Krístoka ꞌpa rewagachi ajtigame ꞌwe tania Onorúgame napurigá Onorúgame ꞌla guꞌírimala ramué.
\v 11 ꞌLige aminami ꞌwe ꞌla raꞌsálá mochiru Waꞌlula Esukristo ꞌmáchigo ꞌla gatéligime napurigá ꞌla Onorúgame gompaniérola niwa.
\s Jena ruwimela Páulo ruwíligo pe bilé rió chojkila gite  tabilé aꞌlá alawégame ochérame ko ralámuli ꞌlige pe biꞌlepi rió ꞌsíligo suwábaga gatea napurigá biꞌwígame alawégame gainámala ralámuli
\p
\v 12 ꞌWe ꞌya bajchá bejtégame rió Arani anilime tabilé ꞌla sébali olale napu nulélige Onorúgame ꞌlige mukule\f + \fr 5:12 \ft Alué Arani tase yati mukule napuꞌlige tabilé eꞌwisa Onorúgame. ꞌWe aꞌkinana mukule. Tabilé goꞌsáká alué masana rakala napu tabilé goꞌnúliga ajchárigame nile alué Arani, pecha mukumeli nílekó nibilé ramué pecha suwiboli nílekó. \f* ꞌlige alé si seꞌwinárigá ikile alué ꞌya bajchá bejtégame rió naꞌtálila ꞌlige jípesí ejperégame tabilé aꞌlá ꞌnátame ju ralámuli ꞌlige suwábaga suwiboli niru.
\v 13 Alué ꞌwe ꞌya ejperégame ralámuli napuꞌlige tabilé ꞌcho ochérachi Moisesi tabilé ꞌcho nerule alué nulalí napu Onorúgame ꞌyale alué Moisesi, ꞌmáchigo ꞌla machime nílekó tachiri ꞌnátili ꞌla aꞌlala ko, ꞌlige ꞌla machime nile Onorúgamete gastigáriwio cha nokisáká, abiénachigo cha nokame nílekó.
\v 14 Abirigáchigo suwíleko rekó Onorúgame tabilé raꞌíchige alué ralámuli ꞌyuga ruigá tachiri chuꞌsimía ꞌla ko ꞌlige tachiri chuꞌsimía tabilé ꞌla ko napurigá ruyele Onorúgame alué Arani ꞌlige Moisesi. Esúsika nile napurigá apiépiri ralámuli napurigá alué Arani nobi Esúsika ꞌwéchigo ꞌla eꞌwime nílekó Onorúgame.
\p
\v 15 ꞌYa chojkiná rawé Arani tabilé eꞌwele Onorúgame ꞌlige tabilé aꞌlá alawégame gayénale. Alué Arani chojkila ju ꞌlige jípeko suwábaga ralámuli abisíchigo cheꞌwíguru ꞌlige alekeri tabilé aꞌlá alawega eꞌyena. Alué biꞌwígame alawá napu nejí Onorúgame ꞌwe ꞌla ju. Onorúgame júlale alué Esukristo napurigá alué Esukristo nejímala aꞌlala ꞌnátili.
\v 16 Alué tabilé aꞌlala ꞌnátili napu ꞌnátale alué Arani tase aꞌchigóriga ju napurigá alué aꞌlala ꞌnátili napu nejile Onorúgame. Suwábaga alué ralámuli napu tabilé eꞌwame ju napu Onorúgame najkí napurigá ꞌsile Arani ꞌwe ꞌya, alueka narémala waꞌlú gastigo. ꞌLige alué ralámuli napu ꞌla eꞌwame ju napu Onorúgame najkí napurigá ꞌsile Esukristo, alueka ꞌla tabilé narémala gastigo rekó ꞌwe cha nokágame ke.
\v 17 ꞌYa bajchá rawé napuꞌlige Arani tabilé eꞌwele Onorúgame, alé si aꞌkinana suwábaga ralámuli tabilé aꞌlá alawégame oꞌchérame ju ꞌlige jaré abé weꞌká bamigá suwime ju ꞌlige jaré taꞌmé weꞌká bamigá, ꞌlige ꞌwe ꞌla bijchígisaká Onorúgame Esukristo júlaligo napurigá oꞌtomela suwábaga alué tabilé aꞌlala ꞌnátili, ꞌlige aꞌresa cha noká ꞌliko ꞌla moinámala ꞌpa rewagachi napuꞌlige suwisá.
\p
\v 18 Pe bilé rió chojkila gite tabilé eꞌwagáriká ꞌya chojkiná rawé napu Onorúgame nulale, aꞌlígesí ꞌma resítiri alawégame oꞌchérame ju ralámuli, ꞌlige pe biꞌlepi rió ꞌsile suwábaga gatea napurigá tabilé resítiri alawégame nímala ralámuli.
\v 19 Yeka pe aniame kérékuru pe tabilé eꞌwáligame Arani ꞌya chojkiná rawé napu Onorúgame nulale, ꞌma resítiri alawégame oꞌchérame ko ralámuli. Abiénachigo weꞌká ralámuli tabilé resítiri alawélamalagó napugiti Esukristo ꞌla eꞌwéligame Onorúgame.
\p
\v 20 Onorúgame ꞌyale Moisesi alué nulalí napurigá machimela ralámuli tachiri chuꞌsimía tabilé ꞌla ko ꞌlige tachiri chuꞌsimía ꞌla ko. ꞌLige napuꞌlige ralámuli ꞌma machisá ꞌwe cha nokao napu Onorúgame tabilé najkí ꞌliko alué ralámuli abéchigo cha nokame ju, ꞌliko Onorúgame abé naꞌtemame ju alué ralámuli.
\v 21 ꞌWe ꞌyasi chojkiná rawé ꞌwe cha nokale ralámuli, jípesí abalarigá eꞌyena, alekeri suwime ju, ꞌlige Onorúgameka ꞌwe ꞌla naꞌtemaka guꞌira ralámuli jipe ejperégame napurigá eꞌwámala napurigá najkí Onorúgame, napurigá ꞌla rewagachi simámala napuꞌlige suwisá. Waꞌlula Esukristo ꞌma gatele napurigá Onorúgame najkí.
\c 6
\s Jena ruwimela Páulo ruwíligo Onorúgame ꞌyáligo ajalí  alué Kristo napuꞌlige meꞌlisuga, aꞌchigóriga ꞌya aꞌwalí ramué
\p
\v 1 ¿Chonokibóaché ꞌliko? ¿ꞌWe cha nokiboa napurigá Onorúgame abé naꞌtemámala ramué?
\v 2 ¿ꞌLacha bijí iꞌníliga járome níwaché, ꞌma aꞌrégame nírige alué tabilé aꞌlá ꞌnátili, ꞌlige ꞌlacha bijí naꞌtáwaché alué tabilé aꞌlá ꞌnátili?
\v 3 ¿Tabilé nélá ꞌemi? Suwábaga ramué napu ꞌla bijchígime niru Kristo Esusi mukúligo ramué guꞌíriga, jípeko Onorúgame aꞌwalila aꞌwalígame niru. ꞌMa Onorúgame oyérame niru. Seꞌwináriga ꞌnátame niru.
\v 4 Napurigá Onorúgame ꞌla ꞌyale ajalí alué Kristo napuꞌlige alué Kristo meꞌlisuga, aꞌchigóriga ꞌla nejí aꞌwalí jipe napurigá ramué ꞌla umabawa aꞌrea alué tabilé aꞌlá ꞌnátili napugiti Kristo ku ajániligame, alekeri ramuéchigó napurigá ku ajánigame ralámuli niru napugiti ꞌma ꞌla aꞌrérigame alué tabilé aꞌlá ꞌnátili napu ꞌnátaga eꞌyéname nírige.
\p
\v 5 Ramué ꞌma bijchígisiká Kristo alé gulusichi mukúligo, ꞌliko ꞌla ku ajánarigame niwa ramuéchigó napuꞌlige suwisuga napurigá ajánaliru alué Kristo.
\v 6 Kristo mukule bilena gulusichi ramué nila gastigo oꞌtogá napurigá ramué ꞌma tabilé ejperélawa napurigá ejperégame ju alué ralámuli napu tabilé umébame aꞌrea chibi noká.
\v 7 Napuꞌlige Kristo alawala bajkisá bilé ralámulichi chojkime ju nulea alué ralámuli, ꞌlige alué ralámuli ꞌma tabilé umériwa alué tabilé aꞌlá ꞌnátalite.
\v 8 Alué Kristo alawala bajkisá ramuechi ꞌliko ꞌla gainawa eꞌwá napurigá najkí Onorúgame.
\v 9 Ramué ꞌla machiaa alué Kristo ku ajánaligo ꞌlige tabilé siné ku mukumeo.
\v 10 Alué Krístoka mukule ramué nila gastigo oꞌtogá. Pe siꞌnepi mukule. ꞌMa tabilé che siné mukumela. Alueka ꞌma Onorúgame ꞌyuga ajtí.
\v 11 ꞌEmi ꞌwe ꞌla eꞌwawa napu najkí Onorúgame, ꞌmáchigo aꞌlá ꞌnátame kame ꞌemi Kristo Esusi naꞌtálila, ꞌlige alué Kristo Esusi alawala nejkúrime ju napurigá tabilé naꞌtawa Remónisi naꞌtálila.
\p
\v 12 ꞌLa listo mochiwa napurigá tabilé neyúrimala Remónisi naꞌtálila.
\v 13 Tase aꞌrewa napurigá ꞌemi sekala cha nokimela, tase aꞌrewa napurigá ꞌemi chuꞌala chátiri raꞌíchali raꞌichámala. Iligá ꞌla eliwa ꞌlina napurigá Onorúgame nulámala ꞌemi alawálachi, ꞌlige ꞌla oyérawa Onorúgame. ꞌÉmika napurigá suwígame kéturu napugiti chátiri bowechi eꞌyéname níligame.
\v 14 Jípeko alué tabilé aꞌlá ꞌnátili ꞌma tabilé umubámala ꞌemi nulea napugiti ꞌémika pecha regá ꞌnata mochígime: “Neka ꞌla rewagachi moinámala neka ꞌla sébali olame kame alué Moisesi nila nulalí.” Iligá ꞌémika ꞌla bijchigi ꞌla nejkúrime ko Onorúgame.
\s Jena ruwimela Páulo ruwíligo bilé rió napu nóchame ju bilé batroni  ꞌyuga pe alué biꞌlepi batrónicho eꞌweme ko
\p
\v 15 ꞌÉmika ꞌma tabilé regá ꞌnátame nísaká: “Neka taꞌmé ꞌwe chélá rekó tabilé umebe ne sébali olá Moisesi nulalila”, ꞌlige ꞌlacha alekeri cha nokogá eꞌyénamalawé ꞌemi.
\v 16 ꞌÉmika ꞌla machíguru bilé rió napu nóchame ju bilé batroni ꞌyuga pe alué biꞌlepi batroni eꞌweme ko. ꞌEmi ꞌwe cha nokigá eꞌyéname nisa ꞌlige ꞌma aꞌrénalasa ꞌemi cha noká, siné kachi tabilé gainámala ꞌemi aꞌrea. ꞌLige ꞌla Onorúgame eꞌweme nisa ꞌemi ꞌla semáriga ejperélamala.
\v 17 ꞌÉmika ꞌwe cha nokogá járome nile ꞌyabé raweka nobi jípeko ꞌwéchigo aꞌlá eꞌwágó ꞌemi napu beníriliru. ꞌLige alekeri ꞌwe raꞌsálagá ajtí ne, ꞌlige waꞌlú cheliera ꞌya ne Onorúgame.
\v 18 Jípeko ꞌma ꞌla Onorúgame nila nóchalichi nóchame ju ꞌemi. ꞌMa tabilé Remónisi nochálilachi.
\v 19 Jipe ruimé ne ꞌla maꞌchígime tabilé nóchali kame raꞌíchalite napugiti ꞌémika tabilé ꞌcho námame kame ye raꞌíchali. ꞌÉmika Remónisi nochálilachi nóchame nile napuꞌlige tabilé ꞌcho oyeria Onorúgame, alekeri ꞌémika ꞌwe cha nokame nile. ꞌÉmika ꞌyuga okome nile tabilé aꞌboi upila ꞌlige iꞌkirú chibi nokagá járome nile. Jípeko ꞌla Onorúgame nila nochálilachi nochámili júkuru ꞌemi.
\p
\v 20 Napuꞌlige ꞌemi bijí tabilé ꞌcho oyérame ka Onorúgame, regá ꞌnátame nile ꞌemi: “Ramueka pecha chélágó tabilé eꞌwiga Onorúgame napugiti ramueka pecha oyérame nírigime Onorúgame.”
\v 21 ¿Tachiri métukó ꞌlige ꞌemi alanokigá eꞌyénaga iligá pe chijúnaga eꞌyena ꞌemi jipe alanokisá napugiti ꞌémika ꞌwe gawélime níligame Onorúgame?
\v 22 Jípeko ꞌmáchigo tabilé nóchame kame ꞌemi Remónisi nochálilachi, jípeko ꞌma ꞌla Onorúgame nila nochálilachi nóchame ju ꞌemi, ꞌlige alarigáká ꞌwe ꞌla ju, napugiti Onorúgame nila nochálilachi nocháliaká ꞌla Onorúgame ꞌyuga mochímili kame ꞌemi napuꞌlige suwisá.
\v 23 Alué ralámuli napu tabilé eꞌweme ju Onorúgame ꞌlige cha nokame, alueka tabilé Onorúgame oyérame nímala jena wijchimoba mochiga nibilé napuꞌlige suwisá, tabilé moinámala rewagachi. Onorúgameka ꞌla gatele napurigá ralámuli ꞌla Onorúgame oyéramala jena wijchimoba ꞌlige napurigá ꞌpa rewagachi moinámala ejperélimia napuꞌlige suwisá Waꞌlula Kristo Esusi ꞌyuga.
\c 7
\s Jena ruwimela Páulo ruwíligo bilé mukí gunégame  pe biꞌlepi rió ꞌyuga bejtélimio
\p
\v 1 ꞌEmi Onorúgame oyérame, ꞌémika ꞌwe ꞌla machí tachiri gite osirúgime ko alué nulalí Moisesi nila, ꞌlige machí ꞌemi ꞌwe ꞌla sébali oláwili ko alué nulalí bijí ajagá mochiga.
\v 2 ꞌEmi ꞌwe ꞌla machí bilé mukí gunégame pe biꞌlepi riocho ꞌyuga bejtélimili ko napuꞌlige bijí ꞌla ajagá ajtígachi alué rió napu júpá boꞌné gunala. ꞌLige alué rió alué mukí gunala ꞌma mukusá, ꞌliko alué mukí ꞌla ikiárélamala uché bilé rió rewá. Alarigá aní alué nulalí Moisesi nila.
\v 3 ꞌLige alué mukí seꞌnú rió rewisáká bijí gunégame ke, waꞌlú gastigo rewimela. ꞌLige alué rió alué mukí gunala ꞌma mukusá ꞌliko alué mukí ꞌla ikiárélamala uché bilé rió rewá.
\p
\v 4 Yeka aniame kéré Kristo mukúligo, ꞌlige ꞌma tabilé sébali oláwili ko napu aní alué Moisesi nila nulalí napurigá ꞌla moinawa rewagachi. Kristo mukule ramué oꞌtomea rewagachi. ꞌLige ku ajánale, alekeri Kristo ꞌyuga newíkame káréliru, ꞌlige ꞌla umbawa sébali olá napu Onorúgame najkí. ꞌLiko ramué napurigá alué mukí gunámakame káréliru, ꞌlige Krístoka ju napurigá alué mukí gunala napu mukule. Napuꞌlige Kristo mukusá ꞌma oꞌtole alué gastigo napu ramué narépuli nílige. ꞌLiko ꞌma tabilé eꞌwérali olawa beniá alué Moisesi nila nulalí napurigá ꞌla rewagachi moinawa.
\v 5 Napuꞌlige ꞌwe cha nokogá ejperégichi ramué ꞌya bajchá rawé taꞌchó oyeria Esukristo, ꞌlige alué Moisesi nila nulalí machisuga ramué chuꞌsimía ꞌwe ꞌla ko ꞌlige chuꞌsimía tabilé ꞌla ko aꞌlígesí ramué oyériliru alué cha nokiame ꞌlina, ꞌlige alué cha nokiame oyéraga tabilé Onorúgame oyériliru.
\v 6 Jípeko ꞌma tabilé regá ꞌnátame niru: “Ramueka ꞌla rewagachi simawa napugiti ꞌla nígame nírigime Moisesi nila nulalí.” ꞌMa pecha regá ꞌnátame nírukó. Iligá regá ꞌnátame niru napuꞌlige meꞌlisuga Kristo ꞌma seꞌwináriga ikíligo. ꞌLige jípeko Onorúgame Alawala guꞌírame ju ramué napurigá ꞌla gainawa eꞌwá napu Onorúgame najkí.
\s Jena ruwimela Páulo ruwíligo tabilé machime níligo chieri ꞌnátili tabilé aꞌlá ko
\p
\v 7 ¿Tabilé sirbe ju alué nulalí Moisesi nila? Abiénaguru, napugiti neka ꞌwe ꞌla machiame chuꞌsimía ꞌla ko, pe alué nulalí leéraga. Neka pecha machimékó chuꞌsimía aꞌlá ko ꞌlige chuꞌsimía tabilé ꞌla ko tabilé machisáká ne alué nulalí. Tabilé machisáká ne regá anime osilí chujkugó alé nulalichi: “Tase weꞌká eꞌkarúgamea tábiri niga asináliwa. Onorúgame tase alarigá najkí”, pecha machimé ko ne tabilé ꞌla ko alarigá naꞌtálila.
\v 8 Machisá ne alué nulalí, alésí akiná chojkí ne eꞌkarúgame tábiri najkiá, peka ꞌla kachi alarigá naꞌtalia. Napuꞌlige bilé ralámuli tabilé ꞌcho machiá alué Moisesi nila nulalí, tabilé mayeme ju tabilé ꞌla ko napuꞌlige cha ꞌsiá.
\v 9 Napuꞌlige tabilé ꞌcho ꞌla nama ne alué Moisesi nila nulalí, tabilé machime ke ne tabilé ꞌla ꞌnátili ko eꞌkarúgame tábiri najkiá, ꞌma aꞌkinana napuꞌlige leérasa ne alué nulalí, machí ne chieri ꞌnátili tabilé aꞌlala ko, ꞌlige machí ne tabilé aꞌlá alawégame ko ne.
\v 10 Onorúgameka nejile ye nulalí napurigá machiboa chuꞌsimía tabilé aꞌlá ko, ꞌlige alésí ꞌla machí ne tabilé aꞌlá alawégame ko ne.
\v 11 Remónisi ꞌyégaturu neꞌchí. Napuꞌlige ne ꞌla námasa napu aní alué Moisesi nila nulalí tabilé ꞌla ko chaꞌsimía, ꞌlige Remónisika aniéturu ꞌwe aꞌlá ko chaꞌsimía.
\p
\v 12 Alué nulalí Moisesi nila ꞌwe aꞌlá ju, Onorúgame nila kame.
\v 13 Alué nulalí Moisesi nila ꞌwe aꞌlá nísaká, ꞌliko ¿ꞌlacha alué nulalí Moisesi nila nulá napurigá chaꞌsímala ne? Tabilégurú. Alué Moisesi nila nulalí leéraga ꞌwe ꞌla machí ne tabilé aꞌlá alawégame ko ne. ꞌLige ꞌla machí ne chiena enárigá nimio tabilé ꞌla naꞌtásiga bijí ajagá mochiga.
\p
\v 14 ꞌWe ꞌla machiaa ꞌwe ꞌla ko alué Moisesi nila nulalí, neka abiénachigo tabilé umébagó aꞌrea alué tabilé aꞌlá ꞌnátili.
\v 15 Neka tabilé aꞌlá ꞌnátame ju rekó ꞌwe aꞌlá naꞌtánilie ne. Neka tabilé nama chonigá alaꞌsime ko ne.
\v 16 Napuꞌlige ꞌnata ne bilé ꞌnátili napu tabilé naꞌtánili ne, alarigá ꞌwe ꞌla machí ne ꞌwe ꞌla ko alué nulalí Moisesi nila.
\v 17 Alué tabilé aꞌlá ꞌnátili napu ꞌnata ne tabilé Onorúgame naꞌtálila ju, alué ꞌnátilika Remónisi naꞌtálila ju.
\v 18 Neka ꞌwe aꞌlá naꞌtánili, tabiléchigo gainárigó, alekeri napu ꞌnata ne tabilé ꞌla ju alué ꞌnátili. Alué ꞌnátili ju napu ꞌnata ralámuli, alué ꞌnátilika ꞌnátame ju ralámuli napusí Arani tabilé eꞌwale napurigá nulale Onorúgame.
\v 19 Tabilé aꞌlá ꞌnátili ꞌnata ne rekó ꞌwe aꞌlá naꞌtánalie ne.
\v 20 Chaꞌsime ju ne rekó tabilé chaꞌsínilie ne. Neka ꞌwe chaꞌsime ju napugiti pe Remónisi naꞌtálila ꞌnátame kame ne.
\p
\v 21 ꞌWe ꞌla machí ne senibí tabilé aꞌlá ꞌnátame ko ne rekó aꞌlá naꞌtánalie ne.
\v 22 Neka ꞌwe ꞌla nirá alué nulalí Onorúgame nila,
\v 23 aba bilé ꞌnátili nerú ne alawálachi alué napu tabilé aꞌré neꞌchí napurigá naꞌtámala ne napurigá ne naꞌtánili. ꞌLige alué tabilé aꞌlá ꞌnátilika ꞌma umero neꞌchí.
\p
\v 24 ¡Resí ikí ne! ¿Chieri ꞌla nejkúrimala napurigá ne ꞌwe aꞌlá naꞌtámala?
\v 25 Pe alué Waꞌlula Esukrístocho ꞌla umubámala nejkura. Alekeri neka waꞌlú cheliera ꞌya Onorúgame suwábaga ꞌla gatéligime boꞌné. Neka ꞌwe aꞌlá néléme ju Onorúgame nobi tabiléchigo umébago ne ꞌla sébali olá napurigá alué najkí.
\c 8
\s Jena ruwimela Páulo ruwíligo ku ajániwili ko ꞌla asisáká  ramué alawálachi alué ajalí napu ku ajánale Esusi
\p
\v 1 Suwábaga napu Kristo Esusi oyérame ju tabilé narémala gastigo, alué napu tabilé ejperégame ju pe napurigá aꞌboi najkí, alué napu ejperégame ju napurigá najkí Onorúgame Alawala.
\v 2 Onorúgame Alawala napu ajalí nejime ju ꞌma bujé neꞌchí alué tabilé aꞌlá ꞌnátili.
\v 3 Ralámuli tabilé umébale aꞌrea tabilé aꞌlá ꞌnátili pe Moisesi nila nulalí leéraga. Alekeri Onorúgame júlale boꞌné Inolá Esukristo napuyeri rió neraga napurigá tabilé umérowa Remónisi naꞌtálilate.
\v 4 Napurigá sébali olawa napu aní alué Moisesi nila nulalí, napurigá tabilé eꞌwawa alué tabilé aꞌlá ꞌnátili napu ramué aꞌboi naꞌtalia, ramueka sébali oliame ju ꞌlina napu najkí Onorúgame Alawala ꞌma ꞌla Onorúgame Alawala alawégame nírigime. ꞌMa tabilé eꞌwílime niru alué tabilé aꞌlá ꞌnátili napu oꞌwísale napuꞌlige cha ꞌsile Arani.
\p
\v 5 Alué ralámuli napu eꞌwame ju tabilé aꞌlá ꞌnátili, alueka tabilé eꞌwame ju napu nulame ju Onorúgame Alawala. Alué ralámuli napu eꞌweme ju Onorúgame Alawala, alueka tabilé eꞌweme ju chátiri ꞌnátili.
\v 6 Pe aꞌboi naꞌtálila eꞌwalíaká pe aꞌrilime kéré Onorúgame nila ꞌnátili, ꞌlige ꞌla eꞌwalíaká napu najkí Onorúgame Alawala ꞌla biꞌlepi ꞌnátili ꞌnátame niwa ꞌla Onorúgame naꞌtálilacho.
\v 7 Alué ꞌwe eꞌwime tabilé aꞌlá ꞌnátili, alueka Onorúgame saíla ju napugiti tabilé eꞌwame kame napu najkí Onorúgame. Aminami tabilé umébame ju sébali olá napu najkí Onorúgame rekó ꞌla sébali olánilie.
\v 8 Alué napu ejperégame ju tase ꞌla sébali olagá napu najkí Onorúgame, alué ralámulika tase ꞌla niraga etewa Onorúgamete, alueka ejperégame kame napurigá aꞌboi najkí.
\p
\v 9 ꞌEmi ralámuli tabilé eꞌwime ju napu najkí aꞌboi, iligá ꞌémika ꞌwe ꞌla eꞌwame ju napu najkí Onorúgame Alawala napugiti ꞌémika ꞌla Onorúgame Alawala alawégame kame. Bilé ralámuli tabilé alawégame Kristo Alawala tabilé Kristo oyérame ju.
\v 10 ꞌÉmika Kristo Alawala alawégame ju, rekó suwigé ꞌemi cha ꞌsíkiriká Arani ꞌla rewagachi moinámala ꞌemi napugiti Onorúgame oyérame kame ꞌemi.
\v 11 Onorúgame Alawala ju napu ku ꞌyale ajalí alué Esusi napuꞌlige mukusá, alué alawá alawégame nísaká ꞌemi ku ajánamala ꞌemi napuꞌlige suwisá.
\p
\v 12 Alekeri ꞌemi Onorúgame oyérame ꞌma tabilé ejperélawa pe napurigá najkí ꞌemi aꞌboi, iligá ejperélawa napurigá Onorúgame najkí,
\v 13 ꞌemi ejperélasaká napurigá ꞌemi aꞌboi najkí, ꞌma aꞌreme kérélamala ꞌemi Onorúgame oyeria. Onorúgame Alawala ꞌla guꞌírisa ꞌemi napurigá ꞌemi ꞌma tabilé cha nokináliga járome nímala, ꞌliko ꞌwe ꞌla oyéramala ꞌemi Onorúgame,
\v 14 napugiti suwábaga ralámuli ꞌla eꞌwame kame napu najkí Onorúgame Alawala, alueka ꞌla Onorúgame ꞌkúchila kame.
\v 15 Onorúgameka nejile boꞌné alawala ꞌlige pecha nejílekó napurigá majawa, iligá ꞌla Onorúgame ꞌkúchila júkuru ꞌemi jípeko napugiti ꞌla Onorúgame Alawala alawégame kame ꞌemi. ꞌMa ꞌla Onorúgame ꞌkúchila gainasa ꞌemi ꞌma ꞌla ikiáré regá anea Onorúgame: “¡Oꞌnó, ne Oꞌnola!”\f + \fr 8:15 \ft Yolí raꞌíchalika “Abba Padre” anime chujkú osilichi. \f*
\v 16 Onorúgame Alawala ꞌwe ꞌla machiri ramué ꞌma ꞌla Onorúgame ꞌkúchila nírigo.
\v 17 ꞌLa Onorúgame ꞌkúchila níriká ꞌla narépua napu Onorúgame nejímala aꞌchigóriga napurigá Kristo narémala. ꞌLa anachásiká napurigá Kristo anáchale resí oliá, napuꞌlige ramué ꞌpa rewagachi moinásiga Onorúgame ꞌwe aꞌlá niraga etémala ramué aꞌchigóriga napurigá niralia alué Kristo Onorúgamete.
\p
\v 18 Rekó jípeko ꞌwe resí nilia mochírige, ꞌpa rewagáchika asíriga ganíliga mochiwa.
\v 19 Ye gawí ꞌlige suwábaga napu Onorúgame newale ꞌwe resí nili ꞌlige abichilubi resí nílamala napusí ꞌma machisá ralámuli jena wijchimoba ejperégame ꞌla Onorúgame ꞌkúchila nírigo.
\v 20-21 Onorúgame elale napurigá resí ikimela ye gawí ꞌlige suwábaga napu Onorúgame newale, Onorúgameka abiénachigo ꞌla elámalagó napurigá ku ꞌla semáriga nímala jena gawichí ꞌlige suwábaga napu Onorúgame newale, abiena Onorúgame ꞌwe ꞌla guꞌírimala ramué.
\v 22 ꞌWe ꞌla machiáa senibí ꞌwe resí nilio ye gawí ꞌlige suwábaga napu Onorúgame newale napurigá resí nílime ju bilé mukí napuꞌlige ochérimichi bilé uꞌtátiri.
\v 23 ꞌLige abiena ramuéchigó ꞌwe resí nilia mochiru ramué napu alawégame niru Onorúgame Alawala. ꞌLa alawégame niru Onorúgame Alawala nobi abiénachigo tabilé ꞌcho ꞌla ꞌnátame nírukó napurigá Onorúgame najkí. Buigá mochiru napurigá Onorúgame sébali olámala.
\v 24 Esukristo ꞌma oꞌtole ramué nila gastigo napurigá ramué ꞌla biꞌwígame alawégame niwa ꞌlige buigá mochiru napurigá ku ꞌla semáriga nímala jena gawichí. Bilé ralámuli ꞌla etea napurigá ikimeli ju, ꞌliko alué ralámuli ꞌma pecha buigá asimeli júkó.
\v 25 Tabilé ꞌcho etewía ka napurigá ikimeli ju ꞌliko ꞌla builime ju napusí seba aleké rawé ꞌwe ꞌla anáchaga rekó resí oliae.
\p
\v 26 Aꞌchigóriga ju Onorúgame Alawala ꞌwe ꞌla nejkúrime ju Onorúgame ꞌyuga raꞌichálichi napugiti tabilé ejebénigame nírigime Onorúgame ꞌyuga raꞌíchaga. Onorúgame Alawálaka aꞌwágame tánime ju Onorúgame napurigá Onorúgame ramué guꞌírimala. Alué alawaka pecha raꞌíchalite tánime júkó Onorúgame, alueka nalame ju napuꞌlige najkiá napurigá Onorúgame ramué guꞌírimala.
\v 27 ꞌLige Onorúgame ꞌwe ꞌla eteme ju tachiri ꞌnátame ko ralámuli ꞌlige abiena ꞌla machí tachiri tánilio boꞌné alawálate. Onorúgame Alawálaka tánime ju Onorúgame napurigá ralámuli guꞌírimala, napurigá najkí boꞌné Onorúgame.
\s Jena ruwimela Páulo ruwíligo tabilé guwana rujsúpoli ko  rekó resí ikiáe
\p
\v 28 ꞌWe ꞌla machiáguru Onorúgame ꞌwe ꞌla guꞌírime ko alué ralámuli napu ꞌla nirame ju Onorúgame, ralámuli napu Onorúgame wanápale napurigá sébali olámala napu Onorúgame najkí.
\v 29 Onorúgame ꞌma ꞌla machigá asale ꞌyasi chieri ꞌla Onorúgame oyérame nimio, ꞌlige nimio napurigá alué boꞌné Inolá Kristo. ꞌLige alué Kristo nimio waꞌlula baꞌchirúgame neraga.
\v 30 Alué ralámuli napu Onorúgame ꞌma ꞌla machigá asale Onorúgame oyérame nimio, alué ralámuli wanápale, ꞌlige alué napu wanápale ꞌwe ꞌla guꞌírile napurigá sébali olame nímala napu Onorúgame najkí, ꞌlige ꞌwe ꞌla niraga etele.
\p
\v 31 ¿Churigá júkó ꞌliko? Onorúgame ꞌla ramué repuka asisáká, ꞌliko ¿chiérite umériwawé ramué? ¡Taꞌwésitegurú!
\v 32 Onorúgameka pecha regá ꞌnátale ko: “Pe meꞌlibóleké ne Inolá wijchimoba julásaká ne.” Iligá Onorúgameka júlale boꞌné Inolá napurigá mukumela bilena gulusichi ralámuli nila gastigo oꞌtogá. ꞌLige ¿ꞌlacha ta nejímalawé suwábaga tábiri napu ꞌla ju?
\v 33 Onorúgame ꞌma ꞌla guꞌírile napurigá sébali olame nímala ꞌemi. ¿ꞌLacha animélawé ralámuli pe cha nokame ko ꞌemi? ¿Aka boꞌné Onorúgame ꞌma ꞌla maꞌchígime aníché tabilé gastigo naremio alué napu guꞌíriliru Onorúgamete napurigá ꞌla sébali olame nímala?
\v 34 Pecha animélagó ralámuli waꞌlú gastigo narépuli ko ramué napugiti Kristo kame napu mukule, ꞌlige alué kame napu ku ajánale, ꞌlige jípeko Onorúgame ꞌyuga ajtíkuru ꞌwe tania Onorúgame napurigá ramué guꞌírimala.
\v 35 ꞌLiko ¿tachírite umériwa ramué napurigá ꞌma tabilé oyérame niwa ramué alué Kristo? Tabilé tábirigurú. Krístoka abichilubi repúmala ramué. Rekó ꞌwe resí níliga ejperélisiga, ꞌlige rekó ꞌwe resí anésiga ralámulite, ꞌlige rekó ꞌwe eꞌlowika eꞌyénisiga ꞌmimi mejkami, ꞌlige rekó ꞌwe ejelísiga ukíbaga mejkami eꞌyénaga, ꞌlige rekó amulí meꞌlisuga ramué, ramueka pecha aꞌrewa oyeria Kristo napugiti boꞌné Kristo abichilubi ꞌwe ꞌla nejkúrimempá. ꞌLige rekó ꞌma suwisuge, abiena alué Kristo ꞌyuga mochiwa.
\v 36 Regá anime osiruga chujkú Onorúgame nila osilichi:
\q Mué oyérame kóriká ramué, ralámulika ꞌma meꞌlinali ramué
\q napurigá boꞌá napu ju meꞌliboli alarigá eté ramué.\f + \fr 8:36 \ft Eꞌnesi Salmos 44:22. \f*
\m
\v 37 Ramueka abiena tabilé guwana rujsúpua napugiti Kristo ꞌwe naꞌtemá ajtigame ramué ꞌlige ꞌwe aꞌlá nejkura ajtigame.
\v 38 Neka ꞌla machí tabilé tábirite umériwilikó ramué napurigá ꞌma tabilé oyérame niwa Kristo. Rekó suwisuge, Kristo abiena ramué ꞌyuga asimela. ꞌLige nibilé santo ánjeli nibilé tabilé aꞌlá alawá neyúramala. Nibilé napu ekí jipe ꞌlige napu ikimela iꞌlibeko tabilé neyúrimala.
\v 39 Nibilé tábiri napu mochí ꞌpa rewagachi, ꞌlige nibilé tábiri napu nerú ꞌle goꞌnágana neyúrimala. Alarigá gatele Onorúgame alué Waꞌlula Kristo Esusi júlaga napurigá mukumela ramué nila gastigo oꞌtogá.
\c 9
\s Jena ruwimela Páulo ruwíligo Onorúgame wanápuligo  alué ralámuli jurío napurigá Onorúgame oyérame nímala
\p
\v 1 Neka ꞌla bijchiá aníbá, tabilé ꞌyégiga napugiti neka Kristo oyérame kame. Napu ꞌnata ne ꞌla Onorúgame Alawala naꞌtálila ju, alekeri ꞌla machí ne tabilé ꞌyégali ko napu ruwí ne,
\v 2 ꞌwe seweka ajtí ne ꞌlige ꞌwe chálagá ajtí ne napugiti weꞌká alué ralámuli jurío tabilé Onorúgame oyeria mochígime napugiti ne abiena jurío kámechigó, alekeri ꞌwe chálá ajtí ne.
\v 3 Alué ralámuli jurío gastigáriwili ju. Neka aꞌrémikuru Kristo oyeria ꞌla biꞌwimeli nísaká alué ralámuli alawala ne aꞌrésaká Kristo oyeria.
\v 4 Rekó Onorúgame ꞌwe ꞌla guꞌírige alué ralámuli jurío ꞌlige abijíchigo weꞌká alué ralámuli tabilé oyérigó Onorúgame. Onorúgame wanápale napurigá ꞌla Onorúgame oyérame nímala alué ralámuli. Napuꞌlige simasa alé Ejipto mochiga Onorúgame oꞌtole alué ralámuli. ꞌLige Onorúgame anele alué ralámuli ꞌwe ꞌla guꞌírimio, abiena ꞌyasa aꞌrele alué nulalí alué Moisesi. Onorúgame ꞌwe ꞌla benírale alué ralámuli churigá tánilime ka iwérali Onorúgame. ꞌWe ꞌla anele ꞌwe ꞌla guꞌírimio alué ralámuli ꞌlige ꞌla sébali guꞌírile napurigá guꞌírimiorílige.
\v 5 Alué ralámulika alué Abraámi ꞌlige Akobo ꞌlige Isaki rijimala ju ꞌwe aꞌkinana oꞌchérigame. Alué Kristo abiena jurío nílechigó, ꞌlige Onorúgame nulame ju bochígimi jena wijchimoba. ꞌWe ꞌla képá senibí regá anisá suwábaga ralámuli: “ꞌWe ꞌla nejkúrime ju Onorúgame.”
\p
\v 6 Neka pecha anígó tabilé sébali oláligo Onorúgame napurigá olámorílige, pecha suwábaga Israeli (Akobo) rijimala ꞌla Onorúgamete ꞌyárigame kame nóchali.
\v 7-8 Onorúgameka tabilé ꞌyale nóchali alué Abraámi inolá napu Ismaeli anilime nile, pe alué Isákicho ꞌla ꞌyale ꞌlige bilé Isaki inolá Akobo anilime ꞌlige alué Akobo ꞌkúchila ꞌyáliru nóchali ꞌlige aminacho aꞌkinana oꞌchérisime.
\v 9 Napuꞌlige tabilé ꞌcho ochérachi Isaki, Onorúgame regá anele alué Abraámi: “Napuꞌlige ꞌma sebasa raweli uché nawámala ne aꞌlige mué upila Sara ranélamala bilé towí.” Alarigá anele rekó tabilé siné rojparame kachi alué Sara.
\p
\v 10 Napuꞌlige taꞌchó oꞌchérachi alué kuate, Onorúgame anele alué Rebeka Isaki upila:
\v 11-12 “Alué baꞌchirúgame tabilé nulémala alué bonila.” Alarigá anile Onorúgame napuꞌlige tabilé ꞌcho etea, napurigá ꞌla machimela ralámuli alué boꞌné Onorúgame ꞌma wanápuligo alué uꞌtabela pe alarigá najkíligame boꞌné.
\v 13 Regá anime chujkú Onorúgame nila osilichi: “Alué Akobo anilime towí ꞌwe galegá etéturu ne ꞌlige Esaú anilime ka tabilé galegá etéturu ne.”
\p
\v 14 ¿Churigá júpaché ꞌlíkobá? ¿Onorúgame jaré tabilé galegá eté?
\v 15 Aka Onorúgame regá anéleché alué Moisesi: “Neka ꞌwe ꞌla galegá etémala alué napu ne boꞌné najkí.”
\v 16 ꞌLiko pecha chéréko rekó bilé rió ꞌla sébali olame ke, Onorúgame apiépiri galegá eteme ju napu boꞌné najkí.
\v 17 Aka Onorúgame regá anéleché alué waꞌlula rey alé Ejipto nulame: “Neka mué ajchá napurigá mué nímala waꞌlula nulame napurigá ralámuli machimela chiena waꞌlú aꞌwalí nígame ko ne, ꞌlige napurigá machimela suwábaga ralámuli jena wijchimoba ejperégame chieri ko ne.”\f + \fr 9:17 \ft Eꞌnesi Éxodo 9:16. \f*
\v 18 ꞌLiko Onorúgame ꞌwe naꞌtemá ralámuli napu alué boꞌné najkí, ꞌlige tabilé eꞌwame newame ju apiépiri ralámuli napu tabilé eꞌwame newánili.
\p
\v 19 ¿ꞌLacha anémalawé Onorúgame ꞌemi ꞌwe iꞌníligame ralámuli ko? Peka ꞌwesi ralámuli abé waꞌlula neraga ꞌnátame kachi meꞌtigá Onorúgame. Siné kachi bilé ꞌemi regá animela: “Alarigá nísaká, ¿ꞌliko chonigá gastigari Onorúgame neꞌchí? Neka ꞌla sébali olame ju napu Onorúgame najkí.”
\v 20 ¿Chieri júpaché mueka napurigá alarigá anémala Onorúgame? Bilé sikolí wejcholite newárigime ꞌlacha regá anémalawé alué ralámuli sikolí newágame: “¿Chonigá alieti sikolí newápeché mué neꞌchí?”
\v 21 Alué ralámuli sikolí newame, newame ju napu chibiyeri newánili alué wejcholite. Wejcholí josa bilé rió oká sikolí newame ju abaleké wejcholite, ꞌlige uneme ju napurigá boꞌné najkí, bilé ꞌwe ꞌla uneme ju baꞌwí roꞌigá ꞌlige bilé uneme ju goꞌame kógimia Onorúgame. 
\p
\v 22 Onorúgameka aꞌchigóriga ju ralámuli ꞌyuga napurigá alué ralámuli sikolí newame. Jaré ralámuli ꞌla elime ju napurigá abichilubi ꞌwe resí nokimela ꞌlige weꞌlisi anáchame ju ꞌlige tase yati ayome ju, ꞌma aꞌkinana ayome ju ꞌlige ꞌwe aꞌwágame gastigárime ju napurigá ralámuli ꞌla machimela Onorúgame waꞌlú aꞌwalí nígame ko.
\v 23 Jaré tabilé gastigárile iligá ꞌwe ꞌla guꞌírile napurigá machimela ralámuli ꞌwe naꞌtemame ko Onorúgame suwábaga ralámuli.
\v 24 ꞌLige tabilé chélagá etele rekó jaré jurío ralámuli nílige napurigá ramué ꞌlige jaré tabilé jurío kachi.
\v 25 Regá anime osale alué Osea anilime rió:
\q Alué ralámuli napu tabilé neꞌchí oyérame ju
\q ꞌla oilárimala ne alué ralámuli
\q napurigá neꞌchí oyérame nímala.
\q ꞌLige ꞌwe naꞌtemámala ne alué ralámuli
\q napu ꞌyako tabilé naꞌtemame ke ne.
\m
\v 26 ꞌLige alemi napu anéliru ralámuli:
\q “ꞌÉmika tabilé neꞌchí oyérame ju”,
\q alanewa ralámuli:
\q “ꞌÉmika ꞌma Onorúgame ꞌkúchila ju
\q alué Onorúgame napu ajalí nejime ju.”
\m
\v 27 ꞌLige aminami regá anime osale Isaíasi: “Rekó weꞌká ke alué ralámuli jurío napurigá saté rejsioli napu mochime ju waꞌlú bakochi suwé, nobi péchigo uꞌkabi ralámuli jurío nímalagó ꞌla rewagachi moinámili napuꞌlige suwisá.
\v 28 ꞌMa peꞌwemi Onorúgame sébali olámala napu sébali olámorílige. Nawámala regá animea: ꞌÉmika ꞌlégana injiérnochi simámala, anémala alué ꞌwe cha nokame ralámuli. ꞌLige alué ꞌla Onorúgame oyérame ralámulika regá anémala: ꞌÉmika ꞌla rewagachi simámala.”
\v 29 Aka regá anime osáleché Isaíasi:
\q Onorúgame Biꞌneli Waꞌlula tabilé bujésaká ramué nila gastigo
\q pe uꞌkabi ralámuli israelita,
\q ꞌliko aꞌchigóriga suwiboli kékuru
\q napurigá alué ralámuli Soroma ejperégame
\q ꞌlige Gomora ejperégame.\f + \fr 9:29 \ft Eꞌnesi Génesis 19. \f*
\s Jena ruwimela Páulo ruwíligo Onorúgame  ꞌla biꞌwígame alawégame newáligo alué ralámuli tabilé israelita
\p
\v 30 Ye raꞌíchilika pe anime kéré: Onorúgame ꞌla biꞌwígame alawégame newáligo alué ralámuli tabilé jurío. Alué ralámuli tabilé juríoka tabilé oyérame nile Onorúgame abirigá ꞌla oyérale Onorúgame.
\v 31-32 ꞌLige alué jurío ralámulika pe gawéliga etéliru Onorúgamete napugiti tabilé bijchígiligame waꞌlú aꞌwalí nígame ko Onorúgame ꞌlige napugiti pe ꞌla sébali olagá alué nulalí Moisesi nila ꞌla biꞌwígame alawégame gainánilime ko rekó tabilé bijchígie Onorúgame julamio alué Kristo ralámuli nila gastigo bujemia napurigá anílige Onorúgame ꞌwe ꞌya.\f + \fr 9:31-32 \ft Eꞌnesi Romanos 10:5. \f* Alekeri pe napurigá pe rejté neraga ju alué Kristo, napu ralámuli torome ju eꞌyénaga.
\v 33 Aka regá aníché Onorúgame nila osilí:
\q Bilé rejté ajchá ne alé Rusaleni anilichi (Sioni)
\q napurigá toroka biꞌtibámala ralámuli,
\q ꞌLige alué ralámuli napu ekí tabilé gaweli alué rejté (Kristo)
\q tabilé chijúniga ejperélamala.\f + \fr 9:33 \ft Eꞌnesi Isaías 28:16. \f*
\c 10
\p
\v 1 ꞌEmi Onorúgame oyérame napurigá ne, neka najkí ꞌlige ꞌwe tani ne Onorúgame napurigá ꞌla biꞌwígame alawégame nímala alué ralámuli jurío napurigá ne.
\v 2 Neka ꞌwe machí ꞌwe nochánilio alué israelita ralámuli Onorúgame nila nóchali, tabiléchigo ꞌla sébali machime júkó ꞌlina napu Onorúgame najkí.
\v 3 Alué ralámulika tabilé námale tachiri najkió Onorúgame napurigá ralámuli ꞌla ꞌnátame nímala napu Onorúgame najkí. ꞌLige alué ralámulika mayele ꞌwe ꞌla sébali olásaká alué nulalí Moisesi nila, ꞌliko ꞌla ganíliga asimeo Onorúgame.\f + \fr 10:3 \ft Eꞌnesi Romanos 10:5. \f* Onorúgameka tabiléchigo alarigá nulálekó.
\v 4 Krístoka nawálekuru mukumea napurigá ralámuli tabilé aminabi eꞌwérali olámala sébali olá alué nulalí Moisesi nila rewagachi moinániliga. ꞌLige alésí akiná suwábaga ralámuli napu ꞌla bijchígime ju Kristo nawáligo ralámuli alawala biꞌwemia, alué ralámulika ꞌla rewagachi moinámala.
\p
\v 5 Aka Moisesi regá anime osáleché: “Onorúgameka anime ju: Bilé rió ꞌla rewagachi moyéname nísaká pe ꞌla sébali olagá napu nulá Moisesi nila nulalí, ꞌliko pe ꞌla sébali olámili nímikuru napu nulá Moisesi nila nulalí, nobi tabiléchigo ꞌwesi umébame júkó ꞌla sébali olá.”
\v 6-7 Bilé rió napu ꞌla oyérame ju Kristo, alué rioka ꞌla machí Kristo ꞌla sébali oláligo napurigá ꞌla rewagachi simawa napuꞌlige suwisuga. Alekeri gite nawale Kristo. Boꞌné ku ajánale ꞌlige abé aꞌkinana ꞌma rewagachi simile. ꞌLige ramué napu ꞌla oyérame niru Kristo ꞌla rewagachi moináwachigó pe ꞌla Kristo oyériga. Pecha regá anibógó: “¿Chieri ꞌla nejkúrimalawé napurigá rewagachi moinawa? ¿Chieri nejímalawé alawá napuꞌlige suwisuga?” Kristo ꞌma gatele.
\v 8 Moisesi abiena regá anílechigó: “ꞌÉmika ꞌwe aꞌlá gepule alué rejcholi napu nulá ꞌwe ꞌla bijchígilime ko napu aní Onorúgame.”\f + \fr 10:8 \ft Eꞌnesi Deuteronomio 30:12-14. \f* Alué rejcholi ju napu ramué beníriru ꞌemi.
\v 9 ꞌLiko ꞌemi ꞌwe ꞌla ruyésaká uché jaré ralámuli alué Esusi Waꞌlula ko ramué nuleme, ꞌlige aminami ꞌemi ꞌla bijchígisa Onorúgame ꞌsíligo ajalí ꞌya alué Esusi napuꞌlige mukusá, ꞌliko ꞌemi ꞌla biꞌwimela alawala aꞌlige yati ꞌla bijchígisa ꞌlige ꞌla rewagachi simámala ꞌemi napuꞌlige suwisá.
\v 10 Napuꞌlige ꞌla bijchígisiga napu aní Onorúgame nila raꞌíchali ꞌliko Onorúgame ꞌla raꞌsálagá etémala ramué. Ramué ꞌla bijchígisiga Waꞌlula ko Esusi ramué nuleme, ꞌlige ramué raꞌichálilate eꞌkali tánilime ju Onorúgame, ꞌlige ꞌla biꞌwiame ju ramué alawala ꞌlige ꞌla rewagachi moinawa.
\p
\v 11 Aka regá aníché Onorúgame nila osilichi: “Suwábaga napu ꞌla bijchígiga oyérame ju Onorúgame, tabilé siné chijunámala.”
\v 12 Onorúgameka ꞌwe ꞌla guꞌírame kame suwábaga ralámuli napu ꞌla tánime ju iwérali rekó jurío ke o tabilé jurío ke. Onorúgameka pecha chélegá eteme júkó.
\v 13 Aka regá aníché Onorúgame nila osilichi: “Suwábaga ralámuli napu ꞌwe aꞌlá bijchígiga tánime ju eꞌkali Onorúgame ꞌla rewagachi moinámala napuꞌlige suwisá, napugiti ꞌma ꞌla biꞌwérigame nímempá alawala bijí ajá mochiga.”
\v 14 ꞌLige ¿churigá ꞌla tánimalaché iwérali peka oyérame ke alué Kristo? ꞌLige ¿churigá ꞌla oyéramalaché Onorúgame alué ralámuli, peka ꞌcho siné eꞌyénaché alemi Onorúgame nila raꞌíchali benírame?
\v 15 ꞌLige ¿churigá ꞌla simámalaché alué ralámuli Onorúgame nila raꞌíchali benírimia aminá uché jarénami peka ꞌwesi iꞌtégichi napurigá julámala? Aka regá aníché Onorúgame nila osilichi: “ꞌWe ꞌla ga kame ju eteria alué ralámuli sébachi napu benírimili ju Onorúgame nila raꞌíchali.”
\p
\v 16 Tabiléchigo suwábaga ꞌla oyéralekó Onorúgame nila raꞌíchali. Aka regá aníleché alué Isaíasi ꞌwe ꞌya: “¿Chieri ꞌla bijchiá ꞌla oyéralekobá Onorúgame napuꞌlige ramué benírisiga Onorúgame nila raꞌíchali alué ralámuli? Tabilé ꞌwésiguru.”
\v 17 Napuꞌlige ralámuli ruwichi Onorúgame júlaligo Kristo, ꞌlige ralámuli ꞌwe ꞌla bijchígisa alué raꞌíchali ꞌma ꞌla Kristo oyérame ju.
\p
\v 18 Aka rukirábá ne bilé raꞌíchali: ¿Bijchiá júlé tabilé sébaligo Onorúgame nila raꞌíchali benírame ralámuli alemi napu mochí jaré ralámuli jurío? Pecha alarigá júkó. Aka Onorúgame nila raꞌíchali regá aníché:
\q ꞌMa eꞌyénale ralámuli bochígimi alemi
\q alué ralámuli ejperélachi.
\m
\v 19 Aka chéchigo rukirábá ne: ¿Tabilé ꞌcho siné eꞌyéniligarémá alué ralámuli alé Israeli anilichi Onorúgame nila raꞌíchali benírame ralámuli? Aka ꞌma ꞌla eꞌyéniliché. Alekeri ꞌla akele, tabiléchigo ꞌla bijchiá ꞌla oyéralekó. Aka Moisesi regá anime osáleché:
\q ꞌWe ꞌla guꞌírimala ne (Onorúgame) alué ralámuli tabilé jurío,
\q napuꞌlige etea alué ralámuli jurío
\q ꞌwe ꞌla guꞌírichi ne alué ralámuli tabilé jurío ꞌwe ayoa mochímala.
\q Neka naꞌáutamala ꞌemi ralámuli jurío 
\q alué ralámuli ꞌyuga napu tabilé nígame ju
\q Onorúgame nila raꞌíchali.\f + \fr 10:19 \ft Eꞌnesi Deuteronomio 32:21. \f*
\m
\v 20 Aka alué Isaíasi regá anime osáleché:
\q Alé napu tabilé siné eꞌyéname nile beníriga
\q Onorúgame nila raꞌíchali benírame,
\q jípeko alé weꞌká mochí Onorúgame oyérame.
\q Alé napu tabilé ꞌwesi ralámuli oyérame nile Onorúgame
\q jípeko ꞌma oyérame ju Onorúgame nila raꞌíchali.
\m
\v 21 ꞌLige abiena osáleché Isaíasi: “Senibí rawé guꞌírinilige Onorúgame alué ralámuli israelita ꞌwe gawélime Onorúgame.”\f + \fr 10:21 \ft Isaías 65:1-2. \f*
\c 11
\s Jena ruwimela Páulo ruwíligo Onorúgame wanápuligo  alué ralámuli jurío napurigá nochámala Onorúgame nila nóchalichi
\p
\v 1 ¿Regáchala mayé ꞌemi Onorúgame ꞌma tabilé guꞌírio alué ralámuli israelita? Pecha alarigá júkó. Alué ralámuli israelítaka wanápuliru napurigá nochámala Onorúgame nila nóchali. Neka israelita júchigó. Neka Abraámi ꞌlige Benjamini\f + \fr 11:1 \ft ꞌWe ꞌya taꞌchó ochérachi alué Páulo, alué rió Akobo anilime makué oká rió ꞌkúchigame nile, bilé alué Benjamini anilime nile. Alué rió Akobo abé aꞌkinana ꞌma waꞌlú rió kachi alué Akobo chebilé rewá ꞌyáliru Onorúgamete, Israeli anilime rewá ꞌyáliru Onorúgamete. ꞌLige alésí akiná oꞌchérale alué ralámuli israelita. \f* rijimala ju alué napu ꞌwe ꞌya ejperele.
\v 2 Onorúgameka ꞌma ꞌla ꞌnata asale wanápamia napurigá nochámala Onorúgame nila nóchali alué ralámuli jurío ꞌwe ꞌya taꞌchó oꞌchérachi alué ralámuli jurío. ¿Tacha machíché ꞌemi napu anile alué rió napu Elíasi anilime nile napu ruwime nile napu anele Onorúgame? Alueka Onorúgame ꞌyuga raꞌíchale jurío ralámuli ayóniga.
\v 3 Regá anele: “Mué Waꞌlula Onorúgame, ꞌma meꞌlíliru alué ralámuli napu ruwime nile napu anele Onorúgame, ꞌlige ꞌma gajúnale alé weꞌkaná mesa tegoli.\f + \fr 11:3 \ft Eꞌnesi glosario “altar”. \f* Pe necho rejpípá ajagá, ꞌlige abiena meꞌlinali neꞌchí.”
\v 4 Nobi Onorúgameka regáchigo anélekó: “Neka tabilé aꞌré napurigá meꞌliboa alué gichao mili ralámuli jurío napu tabilé tánime ju iwérali alué tabilé Onorúgame alué Baáli anilime napu pe newárigime ju.”
\v 5 Jípechigó ꞌwe uꞌkabi ralámuli israelita mochí ꞌla Onorúgame oyérame, rekó weꞌká israelita ralámuli mochige. ꞌLige Onorúgame ꞌwe naꞌtemá alué ralámuli napurigá ꞌla Onorúgame oyéramala alué ralámuli.
\v 6 Onorúgameka tabilé naꞌtemale alué uꞌkabi ralámuli napu jipe ꞌla Onorúgame oyérame ju ꞌwe ꞌla ꞌnátame kóriká, pe iligá naꞌtemale boꞌné.
\p
\v 7 Alué ralámuli israelita ꞌwe eꞌwérali olame nile ꞌla sébali olániliga alué Moisesi nila nulalí ꞌla biꞌwígame alawégame gainániliga. Onorúgame ꞌla niraga etele alué uꞌkabi ralámuli israelita napu boꞌné najkile. ꞌLige uché jareka tabilé nirale ꞌlige tabilé námame newale tachiri najkió Onorúgame.
\v 8 Aka regá aníché Onorúgame nila raꞌíchali: “Onorúgame tabilé námame newale. ꞌLige jipe abalarigá ju, tabilé námame ju.”\f + \fr 11:8 \ft Eꞌnesi Deuteronomio 29:4. \f*
\v 9 ꞌLige Rabíchigó abiena regá anime osale:
\q Waꞌlú gastigo naresa ꞌla képá alué ralámuli
\q napu waꞌlú goꞌame newame ju piesta newagá
\q
\v 10  napurigá tabilé námame nímala napu eté
\q napurigá ꞌwe resí níliga eꞌyénamala senibí.\f + \fr 11:10 \ft Eꞌnesi Salmos 69:22-23. \f*
\s Jena ruwimela Páulo ruwíligo abéchigo weꞌká ralámuli tabilé jurío  ꞌla biꞌwimeo alawala ꞌla Onorúgame oyérame
\p
\v 11 Aka neka rukéguru ꞌemi: ¿Alué ralámuli jurío pala tabilé uché siné oyérame nímalawé Onorúgame? Aka abiena ku ꞌláguru. Jípeko tabilé oyérame ju Onorúgame ꞌma guwana rujsúligame nobi uchéchigo ku ꞌla oyérame nímalagó. Jipe etea alué ralámuli jurío ꞌwe ꞌla oyerio Onorúgame alué ralámuli tabilé jurío ꞌlige ꞌwe ꞌla guꞌirilio Onorúgamete alué ralámuli, abéchigo weꞌká ralámuli jurío ꞌla oyéramala Onorúgame ꞌlige ꞌla biꞌwimela alawala.
\v 12 Napuꞌlige alué ralámuli jurío aꞌresa Onorúgame oyeria ꞌliko Onorúgame nila raꞌíchali benírame uchéchigo bilénami simíbale benírimia uché jaré ralámuli napu tabilé jurío ju. ꞌLiko napuꞌlige uchéchigo siné oyérasa Onorúgame alué ralámuli jurío, ꞌliko asíriga weꞌká ralámuli aminacho ꞌla machimela chiena ꞌla nejkúrime ko Onorúgame.
\p
\v 13 Jípeko raꞌichámala ne ꞌemi ꞌyuga napu tabilé jurío ju, Onorúgame jula neꞌchí napurigá beníramala ne ꞌemi Onorúgame nila raꞌíchali, ꞌlige ne níriká alué nóchali ꞌwe najtékame ju, ꞌlige ꞌwe ganili ne aleké nóchali nóchaga.
\v 14 Neka najkí napurigá alué ralámuli jurío ꞌwe ayoa mochímala ꞌemi etega ꞌwe ꞌla oyerio napu ne beniri ꞌemi ralámuli tabilé jurío, ꞌlige aꞌrénimala cha noká.
\v 15 Napuꞌlige alué ralámuli jurío aꞌresa Onorúgame oyeria, ꞌliko alué Onorúgame nila raꞌíchali benírame uché jarénami simíbale napu ejperégame nile alué ralámuli tabilé jurío. ꞌLige ¿chukimélawé jena wijchimoba napuꞌlige alué ralámuli jurío ku ꞌla oyérasa Onorúgame? Alué ralámuli jurío ꞌlige alué ralámuli tabilé jurío ꞌma ꞌla biꞌwimela alawala.
\v 16 Alué Abraámi ꞌlige alué uché jaré ꞌwe ꞌya ejperégame ralámuli israelita Onorúgamete wanápurigame nile napurigá Onorúgame nila nóchali nochámala, abiena alué ralámuli israelita jipe ejperégame Onorúgamete wanápurigame ju napurigá Onorúgame nila nóchali nochámala.\f + \fr 11:16 \ft Páuloka regá anime osale: Alué bajchá wajsérigame baní Onorúgame kógiwili nisa, ꞌlige abiena suwábaga alué uché jarela baní abiena Onorúgame nila nímalachigó. Rojá nawala Onorúgame nila nisa, ꞌliko abiénachigó alué rojá Onorúgame nila nímala ꞌma suwábaga atuala ꞌyúriga. \f*
\p
\v 17 Bilé olibo galírale ilígame rijpunáliru peꞌkabi atuala ꞌlige alé naꞌchucháliru alué olibo jami ilígame atuala. Ye raꞌíchalika pe aniame kéré alué ralámuli jurío ko napurigá alué olibo galírale ilígame olibo jino.\f + \fr 11:17 \ft Alué olibo napu echilú masana alachilú ju. ꞌLige alué olíboka rakeme ju aseituna anelime. \f* ꞌLige ꞌemi ralámuli tabilé juríoka ju napurigá alué olibo jami jágame alué olibo pe koriente.
\v 18 ꞌLige ꞌemi ralámuli tabilé jurío tabilé gichiga etewa alué ralámuli jurío napu tabilé oyérame ju Onorúgame, napugiti ꞌémika kame napurigá alué olibo koriente atuala alé jino olíbochi naꞌchuchárigame, ꞌlige alué ralámuli juríoka ju napurigá olibo jino atuala ꞌlige nawala.
\p
\v 19 Siné kachi jaré ꞌemi animela: “Alué olibo jino atuálaka rijpunáliru peꞌkabi alé naꞌchuchamia alué olibo koriente atuala jami ilígame na mejkaka aꞌpárigame.”
\v 20 ꞌLa bijchiá ju napu animela ꞌemi, alué olibo jino atuala ꞌma rijpunálirigo napugiti ꞌma aꞌréligame Onorúgame oyeria. Tabiléchigo gunarume níwagó ꞌemi, iligá ꞌwe majawa ꞌlina aꞌregá Onorúgame oyeria.
\v 21 Aka Onorúgame tabilé eꞌkáligeꞌé alué ralámuli jurío, ¿mayé ꞌemi Onorúgame ꞌla eꞌkamio ꞌemi aꞌrésaká Onorúgame oyeria? Pecha eꞌkámaligó.
\v 22 ꞌWe ꞌla naꞌtásibá. Onorúgame ꞌwe naꞌtemame ju alué ralámuli ꞌla sébali olame napurigá Onorúgame najkí ꞌlige ꞌwe aꞌwágame gastigo ꞌyame ju alué ꞌma aꞌreme Onorúgame oyeria. ꞌLige ꞌwe naꞌtemápua ꞌemi Onorúgamete tabilé aꞌrésaká Onorúgame oyeria. ꞌMa aꞌrésaká ꞌemi Onorúgame oyeria ꞌma tabilé naꞌtemápua ꞌemi Onorúgamete. Aꞌlígeko ꞌma rijpunárigame kárélamala ꞌemi alé jino olíbochi jágame atawá.
\v 23 ꞌLige alué ralámuli jurío ꞌma uché ku ꞌla oyérasaká Onorúgame ꞌliko Onorúgameka uché ku ꞌla eꞌkámala alué ralámuli.
\v 24 ꞌÉmika ju napurigá alué olibo koriente atawala, alué napu naꞌchucháliru alé olibo jínochi. Aka Onorúgame ꞌla naꞌchúchaligeꞌé alué olibo jínochi alué olibo koriente, ꞌlige ¿tacha ꞌla ku naꞌchuchámalawé Onorúgame alué Olibo jino atawala ku alé olibo jínochi napu rijpunálirige? 
\s Jena ruwimela Páulo ruwíligo aminacho  abé weꞌká ralámuli israelita oyérimio Onorúgame  napuꞌlige ꞌma oyérasa weꞌká ralámuli tabilé israelita
\p
\v 25 ꞌEmi ralámuli tabilé israelita, ruimé ne bilé ꞌnátili napu ꞌemi tabilé machí napurigá ꞌnata ajtí Onorúgame, napurigá tabilé gunarume nímala ꞌemi. Ajaré ralámuli israelita ꞌma aꞌrele Onorúgame oyeria nobi abiénachigo ku ꞌla oyéramalagó Onorúgame alué ralámuli. Alué ralámuli israelita tabilé oyérame nímala Onorúgame napusí ꞌma ꞌla Onorúgame oyérasa suwábaga alué tabilé israelita ralámuli napu ekí Onorúgame najkí napurigá Onorúgame oyérame nímala.
\v 26-27 Aꞌlige si suwábaga alué ralámuli israelita ꞌma biꞌwígame alawélamala napurigá aní Onorúgame nila osilí. Alué osilika regá aní:
\q Julámala ne Rusalénika ye rió napu ꞌwe aꞌlá ꞌnátili ꞌyámala
\q suwábaga alué ralámuli israelita.
\q Alarigá gatémala ne.\f + \fr 11:26-27 \ft Eꞌnesi Isaías 59:20-21. \f*
\p
\v 28 Alué ralámuli israelita ꞌma aꞌrele Onorúgame oyeria, alekeri alué raꞌíchali Onorúgame nila ꞌemi ralámuli tabilé israelita ꞌlina beníriliru. ꞌLige Onorúgame abiena ꞌwe ꞌla naꞌtemá alué ralámuli jurío rekó ꞌma aꞌregé Onorúgame oyeria. Onorúgameka ꞌmáchigo ꞌla anéligame alué Abraámi ꞌwe ꞌla guꞌírimio alué ralámuli israelita
\v 29 ꞌlige Onorúgameka senibí ꞌla sébali olame ju bilé tábiri ꞌla sébali olámorisá.
\v 30 ꞌÉmika tabilé oyérame nile Onorúgame nobi jípeko ꞌwéchigo naꞌtemáligó ꞌemi Onorúgamete napugiti ralámuli israelita aꞌréligame Onorúgame oyeria.
\v 31 Alué ralámuli jurío aꞌrele Onorúgame oyeria napugiti gawéliga gepúligime napuꞌlige ꞌwe ꞌla ruilía Onorúgame nila raꞌíchali. ꞌLiko napuꞌlige uché siné ꞌla oyérasa Onorúgame alué ralámuli jurío Onorúgame ꞌwe ꞌla naꞌtemámala alué ralámuli etega ꞌwe ꞌla naꞌtemakio Onorúgamete ꞌemi ralámuli tabilé jurío.
\v 32 Boꞌné Onorúgame elale napurigá cha nokame nímala suwábaga ralámuli, alarigá elale boꞌné Onorúgame ꞌwe naꞌtemamia suwábaga ralámuli tabilé eꞌwame.
\p
\v 33 ꞌWe aꞌlá ꞌnátame ju Onorúgame, taꞌwesi anaga. ꞌLige pecha ꞌwesi anámalagó Onorúgame.
\v 34 “¿Chieri ꞌla machí napu ꞌnata Onorúgame? ¿Chieri ꞌla ruyémala rejcholi Onorúgame?
\v 35 ¿Chieri ralámuli kógile bajchá Onorúgame napurigá ꞌla nejímalachigó Onorúgame?”\f + \fr 11:35 \ft Eꞌnesi Job 36:22-32. \f*
\v 36 Onorúgame newálila júkuru suwábaga napu nerú jena wijchimoba ꞌlige rewagachi. ꞌLige alekeri boꞌné nila ju. Senibí ꞌwe ꞌla oyérisiga Onorúgame ꞌla képá ꞌla semáriga raꞌíchaga Onorúgame olagá. Alarigá olásiga ꞌla képá.
\c 12
\s Jena ruwimela Páulo ruwíligo sébali oliame ko  napu najkí Onorúgame
\p
\v 1 ꞌEmi Onorúgame oyérame napurigá ne, Onorúgame ꞌwe naꞌtemá ꞌemi. Alekeri tani ne napurigá ꞌemi ꞌla senibí ꞌla sébali olame nímala napu Onorúgame najkí. ꞌLa alarigá oliame júkuru ꞌemi ꞌla Onorúgame oyérame níriká.
\v 2 Tase alarigá ejperélawa napurigá ejperégame ju ralámuli jipe ejperégame napu tabilé Onorúgame oyérame ju. ꞌLa lisensia ꞌyawa Onorúgame napurigá seꞌnú ꞌnátili nejímala. ꞌLige alarigá ꞌla machimela ꞌemi alué ꞌnátili napu aꞌlala ju, alué ꞌnátili napu Onorúgame galeme ju.
\p
\v 3 Neka ꞌwe naꞌtemaka etuíme ju Onorúgamete aꞌchigóriga napurigá chejaré ꞌlige Onorúgamete wanápurigame ju ne napurigá Onorúgame nila raꞌíchali beníramala ne ralámuli, alekeri ye rejcholi ruyémala ne suwábaga ꞌemi: “Naꞌtáwaká Onorúgame ꞌsíligo ꞌnátali ꞌya ꞌemi.”
\v 4 Ramueka sekégame niru, ronégame niru, najkégame niru, ꞌlige buségame niru. Sekaka nóchame ju, ꞌlige ronoka simime ju, najkaka akeme ju, ꞌlige busika eteme ju.
\v 5 Aꞌchigóriga ju. Weꞌká niru ramué, ꞌlige aꞌpílipi ramué seꞌnú nóchali nígame niru, nobi suwábaga ramué pe abalué biꞌlepi Kristo oyérame niru.
\p
\v 6 Aka Onorúgame ꞌyáligeꞌé aꞌpílipi ramué Onorúgame oyérame napurigá najkí boꞌné Onorúgame. Onorúgame nejísaká napurigá raꞌichawa Onorúgame nila raꞌíchali, eliwa napurigá Onorúgame nejkúrimala napuꞌlige mué raꞌíchachi rejcholi ruyea ralámuli.
\v 7 Onorúgame nejísaká napurigá guꞌíriwa uché jaré ralámuli, ꞌwe aꞌlá guꞌíriwa. Onorúgame nejísaká napurigá beníriwa uché jaré ralámuli, ꞌwe aꞌlá beníriwa.
\v 8 Onorúgame nejísaká napurigá oiláriwa uché jaré ralámuli, ꞌwe aꞌlá oiláriwa. ꞌEmi guꞌírisaká uché jaré ralámuli, tabilé chélagá guꞌíriwa. Onorúgame nejísaká napurigá waꞌlula niwa, ꞌwe ꞌla sébali nochawa. Onorúgame nejísaká napurigá guꞌíriwa ralámuli oꞌchérame ꞌlige nayúkame, ꞌwe aꞌlá ganíliga guꞌírilime júkuru.
\s Jena ruwimela Páulo ruwíligo napurigá ꞌwe aꞌlá nakúriga ejperéliwa
\p
\v 9 ꞌWe aꞌlá niraga járowa aꞌbopi. Tase pe aniboa: “Neka ꞌwe ganíliga eté mué”, peka ganíliga eteme ke. Tabilé oiláriwa tabilé aꞌlá ꞌnátili, ꞌwe ꞌla oilawa ꞌlina alué aꞌlala ꞌnátili.
\v 10 Onorúgame oyérame niru alekeri ꞌla ganíliga eꞌyéniwa aꞌbopi.
\p
\v 11 ꞌLa Onorúgame oyériga beníriwa ralámuli napuꞌlige beniria Onorúgame nila raꞌíchali.
\p
\v 12 ꞌLa ganíliga mochiwa buigá Onorúgame ꞌla sébili olame ko napu aní. ꞌLa anachawa rekó resí kachi. ꞌLige tabilé siné aꞌrewa Onorúgame ꞌyuga raꞌicha.
\p
\v 13 ꞌLa kógiwa chejaré ralámuli napu resí laa napu Onorúgame oyérame ju. ꞌLa lisensia ꞌyawa napurigá mué bejtélachi okómala uché bilénaka jsime napu ju Onorúgame oyérame.
\p
\v 14 Napuꞌlige uché bilé ralámuli chibi ꞌsisa, ꞌlige mué níriga tabilé che anewa alué ralámuli. Pe iligá regá anewa ꞌlina Onorúgame: “Mué Onorúgame, rekó chibi ꞌsié alué rió, abiena ꞌla guꞌírowa.”
\p
\v 15 Napuꞌlige ꞌwe raꞌsálagá sisá chejaré ralámuli alé ꞌemi ejperélachi, ꞌwe raꞌsáláwachigó. Napuꞌlige ꞌwe seweka jsisá alué ralámuli ꞌemi ejperélachi ꞌla iwérali ꞌyawa.
\p
\v 16 ꞌLa ganíliga ejperélawa ꞌemi uché jaré ralámuli ꞌyuga. Tase gunarume niwa, ꞌla niraga etewa ralámuli napu tabilé nígame ju, alué ꞌwe pobre. Tabilé naꞌtawa abé ejebénigame ko ꞌemi meꞌtigá uché jaré.
\p
\v 17 Cha ꞌsisa bilé ralámuli tabilé che ꞌsípua mué níriga. ꞌLa aꞌká ralámuli niwa napurigá etémala che jaré ralámuli, ꞌlige napurigá ꞌla regá animela ꞌemi olagá: “Alueka ꞌla Onorúgame oyérame ju.”
\v 18 ꞌLa niraga etewa suwábaga ralámuli napurigá tabilé ayómala ꞌemi ꞌyuga.
\v 19 ꞌEmi napu ne ꞌwe naꞌtemá, napuꞌlige chibi ꞌsisa bilé ralámuli, mueka tase che olawa, iligá aꞌrewa napurigá Onorúgame ꞌsímala gastigaria. Onorúgame nila osilichi regá aní: “Ne ꞌsímala gatea, ne ꞌsímala gastigaria alué cha nokame ralámuli.”\f + \fr 12:19 \ft Deuteronomio 32:35. \f* Alarigá anile boꞌné Onorúgame.
\v 20 ꞌLige regá aníchigó Onorúgame nila raꞌíchali: “ꞌWe resí anilime nisa mué bilé ralámulite, ꞌlige bilé rawé ꞌwe eꞌlowika sebasa mué bejtélachi goꞌame tasia, ꞌla kógiwa goꞌame, ꞌlige balámaka sabasa baꞌwí tasia, ꞌla ꞌyawa baꞌwí. Tase regá naꞌtawa mué níriga: ꞌLacha ꞌyáwawé goꞌame ye ralámuli ꞌwe resí aneme neꞌchí. Alarigá ꞌwe chijunámala alué ralámuli.”\f + \fr 12:20 \ft Eꞌnesi Proverbios 25:21-22. \f*
\v 21 Ayori nisa goꞌame táachi alué ralámuli iligá ꞌwe raꞌsálagá ꞌyawa ꞌlina goꞌame alué ralámuli, tase ayoga.
\c 13
\p
\v 1 Suwábaga ralámuli eꞌwámili júkuru napu nulá eꞌwélala napu mochiárigime ju bilena weꞌká riógachi, Onorúgame elile alué ralámuli napurigá eꞌwélala nímala.
\v 2 ꞌLige apiépiri napu tabilé eꞌwame ju napu nulá alué eꞌwélala pe Onorúgame gawélime kérélamala. ꞌLige apiépiri napu tabilé eꞌwame ju gastigáriwa alué eꞌwélalate.
\v 3 Alué eꞌwélalaka pecha mochiárigime júkó napurigá majaga ejperélimala alué ꞌla sébali olame ralámuli napu nulá eꞌwélala, alueka mochiárigime júkuru napurigá majámala alué cha nokogá eꞌyéname ralámuli. ꞌEmi tabilé majaga mochínilisaká alué eꞌwélala, ꞌliko tabilé che nokogá eꞌyéniwa. Tabilé cha nokogá járowa, tase iꞌníliga, alarigá ꞌla regá animela alué eꞌwélala: “Ye ralámulika ꞌla tabilé cha nokogá járome ju, tabilé iꞌníliga”,
\v 4 napugiti alué eꞌwélalaka ꞌyárigame kame nóchali Onorúgamete napurigá nulémala ralámuli bilena weꞌká riógachi. ꞌWe cha ꞌsika ilírome nísaká mué, ꞌwe iníliga, ꞌliko senibí majaga bejtélamala mué alué eꞌwélala. Alué eꞌwélalaka lisensia nígame ju napurigá gastigárimala ralámuli, Onorúgame ꞌyale lisensia alué eꞌwélala napurigá gastigárimala ralámuli chibi nokame.
\v 5 ꞌWe ꞌla sébali olawa pe boꞌné ꞌnátaga napu najkí bilé waꞌlula napugiti alarigá kame, pecha lawa: “ꞌLa sébali olásiká tabilé gastigáriwa ramué.” ꞌLige aminami tase pe alarigá mayewa, iligá pe ꞌla boꞌné ꞌnátaga sébali olawa napugiti ꞌémika ꞌwe ꞌla machiame alarigá najkió Onorúgame.
\v 6 ꞌLige aminami ꞌla najtétilime júkuru enomí napu senibí bamí najtétilime ju (impuesto), alué eꞌwélala iꞌlime kame napugiti alué eꞌwélalaka Onorúgame guꞌíriga nóchame kame.
\p
\v 7 ꞌLa najtétilime júkuru wikame níriká alué enomí napu najtétilime ju senibí bamí eꞌwélala iꞌlime. ꞌLa niraga etewa suwábaga alué eꞌwélala, tase gawéliga.
\v 8 Bilé ralámuli enomí tanesa mué, yati najtétawa, ꞌlige ꞌla niraga etewa uché jaré ralámuli, ꞌlige ꞌla naꞌtemaka. Alué napu ꞌla niraga eteme ju uché jaré ralámuli, alueka ꞌla sébali olá alué nulalí Moisesi nila.
\v 9 Alué nulalí Moisesi nila regá aní: “Tabilé seꞌnú mukí ꞌyuga gojchiboa napu tabilé mué ꞌyula ju. Tabilé nejkowa ralámuli ꞌyuga. Tabilé chigowa. Tase weꞌká eꞌkarúgame niga asináliwa. Onorúgame tabilé alarigá najkí.” ꞌLige aminami regá anílechigó Moisesi: “ꞌWe aꞌlá naꞌtemaka etewa uché jaré ralámuli napurigá mué boꞌnepi.”
\v 10 Bilé ralámuli ꞌla naꞌtemaka eteme uché jaré ralámuli napurigá boꞌnepi, alueka tabilé siné gawéliga etémala nibilé siné chibi olámala uché jaré ralámuli. Alué ꞌla naꞌtemaka eteme ka uché jaré ralámuli, alueka ꞌla sébali olame kárékuru alué nulalí Moisesi nila.
\p
\v 11 ꞌLa ganíliga etewa uché jaré ralámuli, napugiti aminacho uꞌkabi rawé rokárekáme napurigá nawámala Waꞌlula Esukristo ramué oꞌtomea. Aminacho uꞌkabi rawé rokáré napurigá nawámala Waꞌlula Esukristo, tase napurigá abé ꞌya napu pe kulí chojkiálichi Esukristo oyeria.
\v 12 ꞌMa amulí seba raweli napurigá nawámala Waꞌlula Esukristo. ꞌMa aꞌrewa alué tabilé aꞌlá ꞌnátili, tabilé aꞌlá naꞌtálika tabilé aꞌlá alawégame niwa. ꞌLa sébali oliáká napu najkí Onorúgame ꞌla biꞌwígame alawégame niwa.
\v 13 ꞌLa semáriga ꞌnátaga eꞌyénawa, tabilé chibi nokogá, tase bajiga eꞌyénawa, nibilé okoka eꞌyénawa eꞌsena umugí napu tabilé ꞌemi aꞌboi ꞌyula ju, tabilé nakoga eꞌyénawa, nibilé enowélame niwa, ꞌlige nibilé naꞌáuka ejperélawa.
\v 14 Iligá ꞌwe tániwa Waꞌlula Esukristo napurigá nejkúrimala, ꞌla nejkúrisaká ꞌma tabilé chátiri ꞌnátaga einámala mué. ꞌLige tase ejperélawa pe napurigá ꞌemi aꞌboi najkí.
\c 14
\s Jena ruwimela Páulo ruwíligo tabilé gawélilime ko ralámuli  napu taꞌmé ꞌla námame ju napu nulá Onorúgame
\p
\v 1 ꞌLa niraga etewa tase gawéliga alué ralámuli napu taꞌmé ꞌla námame ju napu nulá Onorúgame. Tabilé ꞌme ꞌla bijchígasa jaré tábiri ꞌnátili alué ralámuli, tabilé che anewa.
\v 2 Jaré ralámuli ꞌnátame ju tabilé ꞌla ko goꞌaa ajaré goꞌame. Alué ralámulika alarigá ꞌnátame ju napugiti alueka tabilé ꞌcho ꞌme ꞌla námame kame napu nulá Onorúgame. ꞌLige jaréchigo ralámuli tabilé chéláme ju napuyépiri goꞌame goꞌgá, napu ekí goꞌame nerú.
\v 3 Alué napu ꞌla goꞌyame ju eꞌkarúgamea goꞌame tabilé gawélimili ju alué uché jaré napu tabilé goꞌyame ju ajaré goꞌame. ꞌLige aꞌchigóriga, alué napu tabilé goꞌyame ju ajaré goꞌame tabilé gawélimili ju alué napu goꞌyame ju napuyépiri goꞌame. Onorúgameka suwábaga ꞌla niraga eté.
\v 4 Pecha aniame júkó bilé ralámuli nóchame tabilé ꞌla nóchachi tabilé alué rió batrónila níriká: “ꞌLa abé najsinákuliti rió, tabilé benéganti nóchaga.” Alieti nísaká alué nóchame, pe boꞌné batrónila machíleké. Boꞌné Onorúgame ꞌla animela pala ꞌla nóchame ko o pala tabilé ꞌla nóchame ka alué ralámuli. ꞌLige boꞌné Onorúgame ꞌwe aꞌlá guꞌírimala napurigá ꞌla semáriga nochámala alué nóchame.
\p
\v 5 Aka regá júturuchigó jaré ralámuli, ꞌnátame ju bilé rawé abé najtékame ko meꞌtigá chejaré rawé. ꞌLige jaréchigo ꞌnátame ju suwábaga rawé pe abisibi najtékame ko. Aꞌpílipi ralámuli regá naꞌtámili ju: “ꞌWe ꞌla júpaché napu ꞌnata ne.”
\v 6 Jaré ralámuli anime ju abé najtékame ko sawalachi rawé, ꞌlige jaré anime ju abé najtékame ko romíkichi rawé. Alué okaná chojkégame ralámuli alarigá ꞌnátame ju nobi abiénachigo ꞌla Onorúgame oyérame kéréko. ꞌLige aminami alué napu goꞌyame ju apiépiri goꞌame ꞌwe ꞌla nawesasa goꞌyame ju ꞌla nejígorikábá goꞌame Onorúgame. ꞌLige alué napu tabilé goꞌyame ju jaré goꞌame ꞌwe ꞌla nawesasa goꞌyame júchigó goꞌame ꞌla nejígorikábá goꞌame Onorúgame, nobi abiénachigo ꞌla Onorúgame oyérame kéréko napugiti ꞌla nawesasa goꞌyame kame goꞌame.
\p
\v 7-8 Onorúgame ju ramué nuleme napuꞌlige bijí ajagá mochírigichi ꞌlige alué nulame júchigó napuꞌlige suwisuga. ꞌLiko ꞌwe aꞌlá eꞌwawa napu Onorúgame najkí. Bijí ajagá mochíriká Onorúgame ꞌkúchila niru ꞌlige suwisúgaká abiena Onorúgame ꞌkúchila niru.
\v 9 Alekeri mukule Kristo ꞌlige ku ajánale ralámuli ajágame nuleme nimia ꞌlige alué suwígame ralámulichigó.
\p
\v 10 ꞌLiko ¿chonigá gawéliga eteme ju mué alué uché jaré ralámuli Onorúgame oyérame? Onorúgame boꞌné animela: “ꞌÉmika ꞌla sébali olálepá napu ne najkié.” ꞌLige boꞌné Onorúgame animela: “ꞌÉmika tabilé sébali olálepá napu ne najkié.”
\v 11 Regá aní Onorúgame nila osilichi:
\q Neka ꞌla bijchiá aní: 
\q “Suwábaga ralámuli chojkóbaga jábamala napu ne ajtí”,
\q ꞌlige suwábaga animela: 
\q “Mueka Waꞌlula Onorúgame ju,
\q ꞌwe aꞌlá nejkúrime.”
\m
\v 12 Aꞌpílipi ramué ruyéwili júkuru Onorúgame napu raꞌicharu napuꞌlige bijí mochiga jena wijchimoba ꞌlige napu chibi nokirú ramué.
\s Jena ruwimela Páulo ruwíligo tabilé che aniame ko ꞌemi aꞌbopi  napurigá tabilé guwana rujsúmala uché jaré Onorúgame oyeria
\p
\v 13 Alekeri tabilé che aniboa ꞌemi aꞌbopi, aꞌbopi gawélesa ka ꞌemi ꞌliko guwana rujsúmala ꞌemi Onorúgame oyeria ꞌemi iligá ꞌwe ꞌla nakúriga nokísiwa.
\v 14 Jaré ralámuli mayeme ju bilé ralámuli goꞌsá goꞌame napu tabilé goꞌame kórí, alueka mayeme ju Onorúgame gastigárimio goꞌsáká. Nobi Waꞌlula Esúsika ꞌwéchigo ꞌla lisensia nejígó napurigá goꞌpoa napuyépiri goꞌame. ꞌLige bilé rió ꞌnátame nisa regá: “Tabilé ꞌla ju alué goꞌame goꞌaa, Onorúgame gastigárimala goꞌsúká alué goꞌame”, ꞌliko tabilé goꞌmeli ju alué goꞌame.
\v 15 Mué goꞌsáká goꞌame uché jaré Onorúgame oyérame etériga alué goꞌame napu tabilé goꞌyame ju alué ralámuli, ꞌliko tabilé nirame kárélamala mué alué ralámuli. Tase ꞌla ju alarigá, mué goꞌsáká goꞌame napu tabilé goꞌyame ju uché jaré ralámuli, ꞌlige etesa aleké goꞌame goꞌyachi mué, ꞌliko alué ralámuli ꞌma tabilé oyéramala Onorúgame. Kristo mukule alué ralámuli guꞌíriga.
\v 16 Tase etériga goꞌpoa aleké goꞌame alué uché jaré ralámuli napurigá tabilé lámala: “Ye rioka goꞌyame ju napu tabilé nejí lisensia Onorúgame napurigá goꞌpoa.”
\v 17 Onorúgame níriká pecha chéréko napuyépiri goꞌame goꞌyae, ꞌlige bajilia. Onorúgameka pe iligá najkí napurigá ꞌla sébali olawa napu boꞌné najkí, ꞌlige najkí napurigá tabilé iꞌkurúgame chátiri tábiri ꞌnátaga ejperélawa ꞌlige napurigá ꞌla ganíliga ejperélawa. Onorúgame Alawala ꞌsime ju nejkuria napurigá tabilé iꞌkurúgame chátiri tábiri naꞌtawa ꞌlige napurigá ꞌla ganíliga ejperélawa.
\v 18 Kristo nila nóchali nochalia ka, Onorúgame ꞌwe raꞌsálagá asimela, ꞌlige ralámuli ꞌwe aꞌlá niraga etémala ramué.
\p
\v 19 Alekeri ꞌla ganíliga ejperélawa ꞌemi, ꞌlige oiláriwa ꞌemi aꞌbopi napurigá aminabi ꞌwe aꞌlá oyéramala Onorúgame nila raꞌíchali.
\v 20 Suwábaga goꞌame ꞌwe aꞌlá ju goꞌá. Iligá etériga goꞌsuga alué goꞌame napu tabilé goꞌyame ju jaré ralámuli, alué ralámuli ayómala, ꞌma guwana rujsúmala Onorúgame oyeria.
\v 21 Iligá tabilé goꞌpoa aleké goꞌame ꞌlige tabilé bajiwa alué iꞌwilí baꞌwila rekútume alué uché jaré ralámuli Onorúgame oyérame etériga, napugiti etésaká alué uché jaré ralámuli Onorúgame oyérame ꞌliko alué ralámuli ꞌma pe abisí aꞌrémala Onorúgame oyeria.
\v 22 Mueka ꞌla machigá bejtélawa tabilé sulío Onorúgame apiépiri goꞌame goꞌyachi ꞌlige iꞌwilí baꞌwila bajílichi. ꞌLa ganíliga ejperégame ju alué napu lame ju ꞌwe aꞌlá ko apiépiri goꞌame goꞌá ꞌlige ꞌwe ꞌla ko bajilia alué iꞌwilí baꞌwila. ꞌLa ganíliga ejperégame júchigó alué napu regá ꞌnátame ju: “Neka jaré goꞌame tabilé goꞌyame ju.”
\v 23 Bilé rió lasa: “¿Pala ayómalawé Onorúgame ye goꞌame goꞌsá ne o tabilé ayómerémá?” ꞌlige abirigá goꞌsá, alueka pe boꞌnepi tabilé aꞌlá alawégame gayena, alueka majaga goꞌyáame bilé tábiri goꞌame Onorúgame ayora mayega.
\c 15
\s Jena ruwimela Páulo ruwíligo ꞌwe ꞌla guꞌírilime ko alué uché jaré  napu tabilé ꞌcho ꞌla námame ju Onorúgame nila raꞌíchali
\p
\v 1 Ramué napu ꞌwe aꞌlá machiaa tachiri najkió Onorúgame tase pe aꞌbocho ꞌla ganíliga mochiwa. Iligá ꞌla guꞌíriwa ꞌlina alué napu taꞌchó ꞌla námame ju Onorúgame nila raꞌíchali napurigá aminabi abé aꞌlá oyéramala Onorúgame napurigá abé aꞌlá bijchígimala napu aní Onorúgame.
\v 2 Oꞌmaka ꞌwe aꞌlá guꞌíritékuru alué napu taꞌchó ꞌla námame ju Onorúgame nila raꞌíchali. Alarigá abé aꞌlá oyéramala Onorúgame.
\v 3 Kristo senibí sébali olale napu Onorúgame nulele, tase napurigá boꞌné najkile. Aka regá aníché Onorúgame nila osilichi: “Mué Onorúgame, neka ꞌwe nirá mué, alekeri ralámuli chibi anechi mué, pe neꞌchí chibi aneme kéré.”\f + \fr 15:3 \ft Eꞌnesi Salmos 69:9. \f*
\v 4 Suwábaga alué osilí napu osiruga chujkú alé Onorúgame nila osilichi, alueka pe ramué benírame kéré napu najkí Onorúgame. Napu aní aleké osilichi ꞌla oilárime ju ramué napurigá tabilé guwana rujsúpua ꞌlige napurigá ꞌla machigá mochiwa ꞌla sébali olamio Onorúgame napu aní. Alekeri ꞌla machirú Onorúgame ꞌla sébali olamio napu aní.
\v 5 Onorúgame ꞌwe ꞌla nejkúrame ju napurigá ꞌla anachawa rekó resí anilíe ꞌlige nejkúrame ju napurigá ꞌla tabilé seweka mochiwa, alué tani ne napurigá ꞌla guꞌírimala ꞌemi napurigá ꞌwe aꞌlá niraga járomala ꞌemi aꞌbopi napurigá ꞌsile Kristo Esusi.
\v 6 Alarigá suwábaga napuíka ꞌemi ꞌwe aꞌlá raꞌichámala Onorúgame olagá, alué Onorúgame napu alué Waꞌlula Esukristo Oꞌnola ju.
\p
\v 7 ꞌLiko alarigá ꞌwe aꞌlá niraga járowa ꞌemi aꞌbopi napurigá nirale Kristo ꞌemi. ꞌLige alarigá ꞌwe aꞌlá niraga raꞌichámala ralámuli Onorúgame olagá.
\v 8 Kristo nawálekuru ralámuli jurío guꞌírimia napurigá etémala ralámuli Onorúgame ꞌwe aꞌlá sébali olame ko napu sébali olámorílige.
\v 9 Abiena nawale napurigá ralámuli tabilé jurío animela ꞌwe aꞌlá nejkúrame ko Onorúgame. Aka regá aníché Rabí Onorúgame nila osilichi:
\q Bochígimi napu ejperé alué ralámuli tabilé jurío
\q alemi eyéniga raꞌichámala ne ꞌwe aꞌlá ko mué Onorúgame
\q ꞌlige wikarámala ne mué nila wiká.\f + \fr 15:9 \ft Eꞌnesi Salmos 18:49. \f*
\m
\v 10 ꞌLige abiena regá aní Onorúgame nila osilichi:
\q ꞌWe raꞌsálagá mochiwa ꞌemi ralámuli tabilé jurío
\q napu ꞌla Onorúgame oyérame ju.\f + \fr 15:10 \ft Eꞌnesi Deuteronomio 32:43. \f*
\m
\v 11 ꞌLige abiena regá aní Onorúgame nila osilichi:
\q Regá aniboa suwábaga ꞌemi ralámuli tabilé jurío
\q ꞌlige abiena ꞌemi ralámuli jurío:
\q “Onorúgame ꞌla semáriga nejkúrame júpá.”\f + \fr 15:11 \ft Eꞌnesi Salmos 117:1. \f*
\m
\v 12 ꞌLige abiena regá anime osale alué Isaíasi ꞌwe ꞌya:
\q Ochéramala bilé rió ꞌma weꞌká bamí nujubá
\q ꞌma tabilé iꞌtégichi alué Esé ramué rijimala ꞌwe ꞌya ajtígame.\f + \fr 15:12 \ft Esé (Isaí) waꞌlula rey Rabí oꞌnola nile. \f*
\q Alueka waꞌlula nímala ralámuli tabilé jurío nuleme.
\q ꞌLige suwábaga alué ralámuli tabilé jurío
\q ꞌwe aꞌlá bijchígiga mochímala ꞌwe aꞌlá nejkúrimio
\q alué rió ꞌwe aꞌkinana ochérigame
\q (Isaíasika pe alué Esukristo olagá anime ke anile).\f + \fr 15:12 \ft Eꞌnesi Isaías 11:10. \f*
\p
\v 13 Onorúgame napu nejime ju iwérali ꞌwe raꞌsálárisa ꞌla képá ꞌemi napurigá ꞌla ganíliga mochímala ꞌemi napugiti ꞌémika ꞌwe aꞌlá bijchígame kame napu aní Onorúgame. ꞌLige aminabi tani ne Onorúgame napurigá guꞌírimala ꞌemi boꞌné alawálate napurigá aminabi bijchígame nímala ꞌemi ꞌla sébali olame ko Onorúgame bilé tábiri ꞌla sébali olámirisá.
\p
\v 14 ꞌEmi Onorúgame oyérame napurigá ne, neka ꞌwe aꞌlá machigá ajtí ꞌwe naꞌtemaka eteme ko ꞌemi uché jaré ralámuli. ꞌLige ꞌwe machigá ajtí ne ꞌwe ejpénigime ko ꞌemi beníriga aꞌbopi Onorúgame nila raꞌíchali.
\v 15 Abiena bilé rejcholi ruyé ne ꞌemi jena ye osilichi napurigá tabilé weꞌkuámala ꞌemi. Neka ꞌla maꞌchígime ruyé ꞌemi napugiti Onorúgame ꞌma ꞌla alarigá ꞌnata asáligame,
\v 16 napurigá beníramala ne alué ralámuli tabilé jurío alué raꞌíchali napu ju Onorúgame nila. ꞌLige ralámuli alué raꞌíchali akigá ꞌwe aꞌlá oyéramala Onorúgame ꞌlige Onorúgame ꞌwe ꞌla nirámala. Onorúgame Alawala ꞌsile gatea napurigá ꞌwe ꞌla nirawa Onorúgamete.
\p
\v 17 Neka ꞌwe raꞌsálagá ajtí napugiti Kristo Esusi ꞌwe ꞌla guꞌírimpá neꞌchí napurigá beníramala ne alué ralámuli Onorúgame nila raꞌíchali.
\v 18 Neka tase seꞌwináriga ruwimela, neka pe ruwimela Onorúgame boꞌné najkíligo napurigá beníramala ne Onorúgame nila raꞌíchali alué ralámuli tabilé jurío napurigá ꞌla oyéramala Onorúgame, ꞌlige boꞌné Onorúgame ꞌsmíguru napurigá suwábaga ꞌla semáriga maꞌchínamala
\v 19 napuꞌlige saꞌwachi ne ralámuli ꞌwe nayúkame (milagro) ꞌlige napuꞌlige raꞌíchachi ne Onorúgame nila raꞌíchali. ꞌLige ꞌma bochígimi beníruturu ne Onorúgame nila raꞌíchali alé weꞌká riógachi si Rusaleni anilichi wamí waꞌlú gawichí Iliria anilichi si.
\v 20 Neka tabilé siné benírituru Onorúgame nila raꞌíchali alemi napu ꞌma eꞌyénale uché jaré ralámuli Onorúgame nila raꞌíchali beníriga ralámuli, iligá neka beniri ꞌlina ralámuli Onorúgame nila raꞌíchali ꞌwe aꞌlá ꞌnátaga alemi napu tabilé siné ꞌcho akirume nílige Onorúgame nila raꞌíchali nibilé alué raꞌíchali napu ruwime ju churigá ka Kristo.
\v 21 Neka sébali oláturu napurigá aní alué osilí ꞌya nerúgame taꞌchó ochérachi Esusi:
\q Ralámuli napu tabilé siné akeme nile Onorúgame nila raꞌíchali
\q ꞌwe ꞌla námamala churigá ka Kristo.\f + \fr 15:21 \ft Eꞌnesi Isaías 52:15. \f*
\s Jena ruwimela Páulo ruwíligo alué boꞌné Páulo ꞌwe siminalio Roma
\p
\v 22 Tabilé ikiri ne alemi Roma anilichi simiá ꞌemi eꞌnemia, rekó senibí siminalia ajtigé ne alemi.
\v 23 Jípeko ꞌla ikírimarékó ne simiá alemi ꞌemi ꞌyuga asimea napu ꞌemi ejperé. ꞌMa weꞌká bamí júpá siminalia ne alemi napu ꞌemi ejperé.
\v 24 Alé Roma napu ꞌemi ejperé simíromolá ne napuꞌlige simiá enagá España anilichi. Oká mechá asimé ne alé Roma, bakiá mechá kómá. Bajchá Rusaleni simíromolá ne. Napuꞌlige alé Roma yénaga simichi ne aminá España anilichi, najkí ne napurigá jaré ꞌemi neꞌchí guꞌírimala pabé paberia ꞌlige aminami najkí ne napurigá ꞌyúriwa ne España anilichi si.
\v 25 Jipe yátiká alé Rusaleni anilichi simé olá ne enomí oꞌtomia alué ralámuli Onorúgame oyérame alé Rusaleni ejperégame. ꞌLige alé Rusaleni yéniga Roma simé ne.
\v 26 Jena Maseronia ꞌlige Akaya (Gresia) anilichi ejperégame ralámuli Onorúgame oyérame aꞌboi ꞌnátaga napabule enomí napurigá oꞌtowa Onorúgame oyérame ralámuli Rusaleni ejperégame ꞌwe pobre.
\v 27 Aꞌboi ꞌnátaga napabule enomí napugiti alué ralámuli jurío nokáligame beniria Onorúgame nila raꞌíchali alué ralámuli tabilé jurío, alekeri guꞌíriguru, enomí napabúlekuru napurigá oꞌtowa alué ralámuli jurío.
\v 28 Napuꞌlige ꞌma ꞌyasa ne alué enomí alué ralámuli alé yéniga simé ne alé España anilichi, bajchá alé Roma sebámala ne ꞌemi ꞌyuga asimea.
\v 29 ꞌWe machí ne napuꞌlige sebasa ne alé napu ꞌemi ejperé, ꞌwe ꞌla guꞌírimio Kristo ꞌemi napurigá ꞌla námamala ꞌemi napu ne ꞌemi beniri.
\p
\v 30 ꞌEmi Onorúgame oyérame napurigá ne, neka ꞌwe tani Onorúgame napurigá repúmala neꞌchí napurigá tabilé che ikimela ne, ꞌlige najkí ne napurigá ꞌemi ꞌwe tánimalachigó Onorúgame aꞌchigóriga napurigá ne, napurigá repúmala Onorúgame neꞌchí,
\v 31 napurigá tabilé che olámala neꞌchí alué ralámuli tabilé oyérame Kristo napu mochí alé Rusaleni, ꞌlige napurigá ꞌla semáriga narémala alué enomí Onorúgame oyérame alé Rusaleni ejperégame tabilé nígame,
\v 32 Onorúgame elasa ꞌla képá ꞌwe aꞌlá sebasa ne ꞌwe ꞌla raꞌsálagá napuꞌlige ꞌemi etea ne alé napu ejperé ꞌemi, ꞌlige Onorúgame nejkúrisa ꞌla képá napurigá resíbamala ne alé ꞌemi ejperélachi.
\v 33 Alué Waꞌlula Onorúgame ꞌla aminabi ꞌemi repuka asisá ꞌla képá, Onorúgame napu nejkúrime ju napurigá tase eꞌkarúgame chibiyeti ꞌnátaga járowa.
\c 16
\s Jena ruwimela Páulo ꞌwe náwiligo reporali  suwábaga ralámuli napu Onorúgame oyérame ju
\p
\v 1 Neka ruwíbá churigá ka alué mukí Pebe anilime. Alué mukika ꞌwe ꞌla oyérame ju Onorúgame ꞌlige ꞌwe nejkúrime ju napuꞌlige napuíkichi alé Sinkrea anilichi.
\v 2 ꞌLa niraga etewa napugiti Waꞌlula Onorúgame oyérame kame, napurigá nirálime ju apiépiri alué Onorúgame oyérame. ꞌLa guꞌíriwa napugiti alué mukika ꞌla guꞌíriligime weꞌká ralámuli ꞌlige neꞌchítiri abiena ꞌla guꞌírituru.
\p
\v 3 ꞌWe repóriwa alué mukí Prisila anilime ꞌlige alué Prisila gunala Akila anilime rió. Alué okánika nóchame kéturu ne ꞌyuga Kristo Esusi nila nóchalichi.
\v 4 Alué ralámuli siné amulí suwíturu neꞌchí guꞌíriga. Alekeri ꞌwe raꞌsálagá ajtí ne ꞌlige abiena ꞌwe raꞌsálagá mochíchigó suwábaga alué ralámuli Onorúgame oyérame napu tabilé jurío ju.
\v 5 Abiena ꞌwe ꞌla repóriwa alué ralámuli Onorúgame oyérame napu napuíme ju Onorúgame nila raꞌíchali benimea alé Prisila ꞌlige Akila ejperélachi. ꞌWe repóriwa alué rió Epeneto anilime, ꞌwe machime ju ne alué rió. Alué rió júturu napu bajchá oyérale Kristo alé Asia anilichi.
\v 6 ꞌWe repóriwa María, alué napu senibí ꞌyasi ꞌwe guꞌiri ꞌemi.
\v 7 ꞌWe repóriwachigó alué Antróniko ꞌlige alué Juníasi napu jurío júchigó napurigá ne, ꞌlige napuíka mochírige ramué galírale moꞌáriga. Esukristo ꞌyale nóchali alué oká rió napu ꞌwe ꞌla machirume ju weꞌká ralámulite. ꞌLige alué oká rió bajchá oyérale Onorúgame neꞌchí meꞌtigá.
\p
\v 8 ꞌWe repóriwachigó alué Ampliato anilime rió, alué rió ꞌwe machime ju ne, ꞌlige ꞌwe ꞌla oyérame ju Onorúgame.
\v 9 ꞌWe repóriwachigó alué Urbano anilime rió, alué napu júchigó Kristo nila nóchilichi nóchame, ꞌlige abiena ꞌwe repóriwa alué Etakisi anilime rió, alué rió napu ꞌwe ꞌla nirá ne.
\v 10 ꞌWe repóriwachigó alué rió Apélesi anilime. Alué rioka weꞌsá ꞌwe resí ikígame ju pe Kristo oyériga. ꞌLige abiena ꞌwe repóriwa suwábaga alué ralámuli Aristóbulo anilime rió galílachi ejperégame.
\v 11 Abiena repóriwachigó alué rió Erorioni anilime, alué rió abiena jurío ju napurigá ne, ꞌlige alué ralámuli Narsiso anilime rió galílachi ejperégame napu ꞌwe ꞌla oyérame ju Onorúgame.
\v 12 ꞌWe repóriwachigó alué Tripena anilime mukí ꞌlige Triposa anilime mukí napu nóchame ju Waꞌlula Onorúgame nila nóchilichi. ꞌWe repóriwachigó alué Pérsire, ꞌwe machime ju ne alué mukí, ꞌlige ꞌwe nocha alué mukí Onorúgame nila nóchalichi.
\v 13 ꞌWe repóriwachigó alué Rupo anilime rió, napu Onorúgame ꞌyale nóchali ꞌwe ꞌla semáriga, ꞌlige alué eyélachigó napu ꞌwe naꞌtemá neꞌchí napurigá boꞌné ranala neraga.
\v 14 ꞌWe repóriwachigó alué maligi rió, alué Asínkrito anilime, ꞌlige Plegonte, ꞌlige Érmesi, ꞌlige Patróbasi, ꞌlige Érmasi, ꞌlige suwábaga alué ralámuli Onorúgame oyérame napu napuíme ju Onorúgame nila raꞌíchali benimea aleké maligi rió galílachi.
\v 15 ꞌWe repóriwachigó alué maligi ralámuli, Pilólogo anilime rió, ꞌlige alué Julia anilime mukí, ꞌlige alué Nereo anilime rió, ꞌlige alué waíla, ꞌlige alué Olímpasi anilime rió, ꞌlige suwábaga alué ralámuli napu napuíme ju Onorúgame nila raꞌíchali benimea alué maligi ralámuli galílachi.
\p
\v 16 ꞌLa ganíliga reporawa aꞌbopi ꞌla chuꞌmigá banachí napurigá reporame niru ramué. Ralámuli napu ne ꞌyuga mochí napu Onorúgame oyérame ju napu weꞌkanami ejperégame ju abiena náolachigó reporali.
\p
\v 17 Suwábaga ꞌemi Onorúgame oyérame ꞌla ꞌnátaga, tase ꞌyuga eꞌyénawa alué ralámuli naꞌáwali oꞌwíname ꞌyuga. Alué ralámulika pe gawéliga nokame kéré alué semátiri ꞌnátili napu ne beniri ꞌemi. Tase ꞌyuga eꞌyénawa alué ralámuli
\v 18 napugiti alué ralámulika pecha alué Waꞌlula Esukristo nila nóchalichi nóchame kame. Alué ralámulika ꞌla semáriga raꞌíchame ju péchigo ꞌyégali raꞌíchalite raꞌíchame kéréko ralámuli ꞌyuga.
\v 19 Suwábaga ralámuli ꞌwe ꞌla machí ꞌwe ꞌla eꞌwame ko ꞌemi napu najkí Onorúgame, alekeri ꞌwe raꞌsálagá ajtí ne. Alekeri najkí ne napurigá ꞌemi ꞌwe ꞌla ꞌnátame nímala, najkí ne napurigá ꞌla eꞌwámala ꞌemi napurigá ꞌla bijchiá ꞌla Onorúgame najkí.
\v 20 Alarigá Onorúgame napu ꞌla biꞌlepi biꞌwígame ꞌnátili nejime ju, ꞌma umérimala alué Satanasi ꞌlige alésíko ꞌemi tabilé umériwa alué Satanásite. Alué Waꞌlula Esukristo ꞌla semáriga guꞌírasa ꞌla képá ꞌemi.
\p
\v 21 Alué Timoteo napu ne ꞌyuga nóchame ju abiena náwala reporali. Abiena náwalachigó reporali Lusio ꞌlige Jasoni ꞌlige Sosípatro anilime rió. Ye ralámuli jurío ju napurigá ne.
\p
\v 22 Ne Tersio, neka abiena Onorúgame oyérame júchigó, ꞌlige neka ye osilí osá napu Páulo nulá osíniliga, ne abiénachigó náola reporali. Abisibi osísimala ne napu nulá Páulo osíniliga.
\p
\v 23 Abiena náola reporali Gayo anilime rió. Ne Páulo alé Gayo galílachi gojchime ju ne, ꞌlige abiena alé napuíme ju ralámuli benimea Onorúgame nila raꞌíchali rejcholi. Abiena náola reporali Erasto, enomí gateme napu nerú jena Korinto anilichi alué enomí napu gobierno nila ju. Abiena alué Kuártosi anilime rió napu abiena Onorúgame oyérame ju abiena náola reporali.
\p
\v 24 Alué Waꞌlula Nulame Esukristo ꞌwe ꞌla guꞌírasa ꞌla képá ꞌemi. Alarigá ju.
\s Jena ruwimela Páulo ruwíligo ꞌwe ꞌla semáriga  raꞌichálime ko Onorúgame olagá
\p
\v 25 ¡ꞌWe ꞌla semáriga raꞌichawa Onorúgame olagá! Onorúgameka ꞌla guꞌírimala ꞌemi napurigá ꞌemi ꞌla biꞌlepi ꞌnátili ꞌnátaga eꞌyénamala pe alué biꞌlepi ꞌnátilicho napu Esukristo nejí. Alarigá ruyéturu ne ꞌemi napuꞌlige ꞌemi ruyea ne alué ꞌwe aꞌlá raꞌíchali Onorúgame nila. ꞌLige aminami ꞌwe ꞌla ruyéturu ne tachiri gite nawáligo Esukristo. Onorúgame ꞌma ꞌla alarigá ꞌnata asale ꞌya bajchá napuꞌlige taꞌchó newá ye gawí, pe iligá ralámuli tabilé ꞌwesi machigá mochile tachiri gite nawáligo Esukristo.
\v 26 Nobi jípeko ꞌmáchigo ꞌla machiágó tachiri gite nawáligo Esukristo napugiti ꞌma nerúgame alué osilí napu osale alué ralámuli napu ruwime nile napu anele Onorúgame. Aminami Onorúgame napu senibí asimeli ju alarigá nulale napurigá suwábaga ralámuli ꞌwe ꞌla oyéramala Onorúgame ꞌlige napurigá eꞌwámala napu najkí Waꞌlula Onorúgame.
\p
\v 27 Onorúgame napu biꞌneli neyúriga machime ju suwábaga tábiri, ꞌla nirawa Onorúgame. ꞌLa semáriga raꞌichawa Onorúgame olagá. ꞌLa cheliera ꞌyawa Onorúgame ꞌla machiame chuꞌsíligo Esukristo.
\p Pe ekí képá. Cheliérabá.