\id 2CO Baja Tarahumara
\h 2 CORINTIOS
\toc1 2 CORINTIOS
\mt Ye Ju Alué Apeli Nujubá Osirúgime Napu Páulo Osele Alué Ralámuli Napu Korinto Ejperégame Nílige
\c 1
\s Kuira ꞌemi ralámuli Korinto ejperégame napu ekí Onorúgame oyérame ju.
\p
\v 1 Ne Páulo osá ye osilí. Kristo Esusi wanápale neꞌchí napurigá ne nulame nímala aleké nila nóchali. Ye rió Timoteo, Esukristo oyérame ju napurigá ramué, alueka jena ajtí ne ꞌyuga.
\p Osée ne ꞌemi ralámuli Esukristo oyérame napu napuíme ju alé bilena galírale Onorúgame nila raꞌíchali benimea, ꞌlige alué Onorúgame eꞌkali tánimia, ꞌlige cheliera ꞌyamia Onorúgame, ꞌemi alé weꞌká riógichi Korinto ejperégame ralámuli. ꞌLige abiena osé ne ꞌemi ralámuli Onorúgame oyérame napu ejperégame ju alé weꞌkanami weꞌká riógichi napu Akaya anilime gawí ju.\f + \fr 1:1 \ft Alé Korinto pebalé biꞌlénapi kéré alué Akaya anilichi waꞌlú gawí boꞌígichi, napurigá bilé “país” neraga ju alué Akaya. \f*
\p
\v 2 ꞌLa kékuru ꞌemi ralámuli Onorúgame ramué Oꞌnola ꞌwe aꞌlá nesérasa. ꞌLige alué Waꞌlula Esukristo ꞌwe aꞌlá nesérosachigó, napurigá ꞌwe aꞌlá ganíliga mochímala ꞌemi ralámuli aꞌbopi, tase weꞌká ꞌnátaga pe biꞌlepi.
\s Jena ruwimela Onorúgame ꞌwe ꞌla naꞌtemame ko ramué
\p
\v 3 Waꞌlula ju Onorúgame, alué napu Waꞌlula Esukristo Oꞌnola ju. ꞌLige Onorúgame ꞌwe ꞌla naꞌtemame ju ramué napurigá bilé oꞌnó. ꞌLige Onorúgame senibí nejkúrime ju napuꞌlige chibi ikisuga, bilé tábiri tabilé ꞌla nisa.
\v 4 Esukristo ꞌwe aꞌlá naꞌtemame ju ramué, ꞌlige ramué alekeri gite ꞌwe ꞌla naꞌtemátékuru alué uché jaré ralámuli resí ikichi, napurigá naꞌtemame ju Onorúgame ramué.
\v 5 Ramué ralámuli ꞌwe resí ikiáchigó, napurigá ikile Esukristo ꞌya. ꞌLige ramué resí ikiachi, ꞌlige Esukristo guꞌiri ramué.
\v 6 Alarigá beniaa ramué napurigá ramué ꞌemi guꞌíriwa, ꞌemi chibi ikisá. ꞌLige Onorúgame ꞌwe naꞌtemame ju ramué, ramué abiénachigó alarigá beniboa ꞌwe naꞌtemaka járowa ꞌemi. ꞌLige alarigá ꞌemi ꞌwe aꞌlá anachámala napuꞌlige ꞌemi resí ikiá.
\v 7 Tabilé chérikáwé rekó ꞌemi ꞌwe resí ikié napurigá ramué, Onorúgame ꞌla semáriga guꞌírimala ꞌemi. ꞌWe ꞌla machíguru ꞌemi ꞌla anachamio.
\p
\v 8 Ramueka rupóráekeꞌé bilé raꞌíchali napurigá ikíliga ramué ꞌwe resí ikiá alé waꞌlú gawí boꞌígichi weꞌkaná weꞌká riógichi alé Asia anilichi. ꞌLige ramué ꞌla najkiá napurigá ꞌemi ꞌla námaka akimela ye raꞌíchali. Ramué ralámuli amulí suwirúkuru alé Asia anilichi eꞌyénaga.
\v 9 ꞌLige ramueka ꞌa meꞌliboli mayélikeꞌé alé, ꞌlige ramueka ꞌma tabilé neyúsiwa mayélikeꞌé alé Asia. ꞌLige pe boꞌné Onorúgame alarigá elálekeꞌé napurigá ramué alarigá naꞌtawa. ꞌLige ramué alarigá ꞌla machirú Onorúgame ꞌwe aꞌlá benégame ko nejkúriga. Ramué ta guꞌírisiká Onorúgamete, tabilé chérigá neyúsiwakeꞌé ramué. ꞌLige tabilé chéréko rekó ramué meꞌliruge alé, alué Onorúgame ꞌla ku mochiámili ju ramué suwisáká.
\v 10 Onorúgame ꞌwe semáriga guꞌírikuru ramué aliena resírikáchi mochígichi ramué. Jípeko tabilé chérikáwé rekó uchéchigo alakiruge ramué, napugiti Onorúgame ꞌwe semáriga nejkúrimili kame uchéchigo siné. ꞌLige napurigá aní ne ꞌla bijchiá ju.
\v 11 ꞌEmi ralámuli tániwa Onorúgame napurigá ramué guꞌírimala napuꞌlige ramué resí ikiachi. Napuꞌlige ramué ꞌwe resí ikichi, ꞌlige Onorúgame ꞌla nejímala alué aꞌwalí uché rajpé. ꞌLige Onorúgame ꞌla sébali olasa napurigá tánilige ꞌemi ralámuli, ꞌlige ꞌemi ꞌwe aꞌlá sébali machimeli júkuru alué Onorúgame ꞌwe aꞌlá sébali olame ko. ꞌLige animela ꞌemi ralámuli: “Waꞌlú cheliérabá mué Onorúgame, ꞌwe semáriga nejkuri mué”, animela ꞌemi.
\s Jena ruwimela chonagá ta simíligo Páulo alé Korinto
\p
\v 12 Ramueka tabilé chijúnaga rupoa alué raꞌíchili panápurimi eꞌyénaga. Alué raꞌíchali napu ramué benírilie, suwábaga ꞌwe aꞌlá ju. Aka ramué tasemi ꞌyégiliguru ꞌemi. ꞌLa suwábaga raꞌíchili ꞌwe aꞌlá oꞌwé raꞌíchame niru ramueka ꞌemi ꞌyuga. Onorúgame nejíguru bilé aꞌwalí. ꞌLige ꞌla sébali oliame ju ramué napurigá aniá ꞌlige napurigá naꞌtalia ramué. ꞌLige Onorúgame guꞌiri ramué napurigá ramué ꞌwe aꞌlá sébali olawa. Ramueka tabilé ꞌyégiga eꞌyenálime júkuru, tase napurigá alué ralámuli tabilé Onorúgame oyérame.
\v 13 ꞌLige ramueka osiáguru ye osilí, ꞌlige ye osilí suwábaga ꞌwe aꞌlá biꞌígame raꞌíchame ju, ꞌla maꞌchígime ruwime júkuru ye raꞌíchali napurigá ꞌla námaka akimela ꞌemi ye raꞌíchili.
\v 14 ꞌLige ꞌemi ꞌwe pee námame ju churigá nírigo ramué, ꞌlige pe abé iꞌlibeko abé weꞌká raꞌíchali námame nímala ꞌemi. ꞌLige abé iꞌlibeko napuꞌlige ku reꞌkínasa alué Waꞌlula Esukristo jena wijchimoba, ꞌlige ꞌwe ganíliga mochímala ꞌemi ramué ꞌyuga, alarigá napurigá ramué ꞌwe ganíliga mochíwachigó ꞌemi ꞌyuga.
\p
\v 15 ꞌLige neka ꞌla machiéturu ꞌemi ralámuli uché rajpé beninalio churigá nírigo ramué. ꞌLige ne alekeri osá siminálituru alé Korinto. ꞌLige ne osá simisáká alé, ꞌliko uché rajpé abé aꞌlá benimélikeꞌé ꞌemi alué raꞌíchali.
\v 16 ꞌLige ne alé Maseronia anilime gawí weꞌkaná weꞌká riógichi boꞌígichi simiá, alemi simíromala olae ne. ꞌLige ne ku jeka enegá aleka simíromala olae ne. ꞌLige alarigaka abé aꞌlá benimétigo ꞌemi Onorúgame nila raꞌíchali. ꞌLige ne alé Korinto sebasa, ꞌemi ralámuli neꞌchí guꞌírimili kéturu, peꞌtá goꞌame nejía napurigá sebámala ne alé alué waꞌlú ejiro Jurea anilichi weꞌkaná weꞌká riógichi.
\v 17 ꞌLige ne ꞌla alarigá simé olae napurigá anile ne alé osilichi. Neka tabilé alieri ju napurigá alué ralámuli tabilé Onorúgame oyérame. Alué ralámuli tabilé Onorúgame oyérame, iꞌsínimi ꞌwe aꞌlá raꞌíchame ju, nobi tabiléchigo sébali olame júkó. Ne alarigá ꞌla anisáká, neka ꞌla simela.
\p
\v 18 ꞌLige Onorúgameka ꞌla sébali olame júkuru napurigá aní. ꞌLige ramuéchigó ꞌla sébali olame niru napurigá aniame ju ramué.
\v 19 ꞌLige Esukristo Onorúgame Inolá ꞌwe ꞌla sébali olame ju napurigá aní alué boꞌné, ꞌlige ramueka alarigá rutúkuru ye raꞌíchali, ne Páulo, Timoteo ꞌlige Silasi.
\p
\v 20 ꞌLige Onorúgame anile ꞌya bajchá rawé julámoríle bilé rió nejkúrime napurigá nejkúrimala. ꞌLige Onorúgame ꞌwe aꞌlá sébali olale napurigá anile boꞌné. Júlale alué Kristo napurigá nejkúrimala. ꞌLige ramueka alué Esukristo oyérame niru, alekeri jipe alué Esukristo nejímili júkuru bilé aꞌwalí. ꞌLige ꞌla sébali olawa ramué napurigá aniá ramué. Alué ralámuli etesa ramué ꞌwe aꞌlá sébali oliachi ꞌlige machimela alué ralámuli Onorúgame ꞌwe aꞌlá guꞌírio ramué. ꞌLige alué ralámuli ꞌwe aꞌlá ganíliga mochímala Onorúgame ꞌyuga. ꞌLige animela alué ralámuli, “Waꞌlula ju Onorúgame.”
\v 21 ꞌLige Onorúgame ju ramué guꞌírame napurigá ramué ꞌwe aꞌlá sébali oyérame niwa Kristo. Onorúgame nejíkuru ye raꞌíchali beniame.
\v 22 ꞌLige Onorúgame nejíkuru boꞌné Alawala ꞌla aꞌwágame napurigá ramué ralámuli ꞌla machiboa ꞌla Onorúgame ꞌkúchila nírigo ramué. ꞌLige ramué ralámuli alekeri gite ꞌla machiáguru Onorúgame bilé rawé nejímio bilé raweli ꞌwe semátiri. ꞌLige napurigá anile alué boꞌné Onorúgame, ꞌla sébali olamio. Onorúgameka etea ajtíkuru. ꞌLa machíguru ꞌla bijchiá aniá.
\p
\v 23 Neka tabilé simíroteꞌé alé Korinto napurigá anié ne napugiti neka machiame pecha ꞌcho ꞌla sébali ka ꞌemi ralámuli napurigá ꞌla gepúmala ꞌemi alué rejcholi napu ne ruimeli nílige alé sebasa napu ꞌemi ralámuli mochí. ꞌLige ye rejcholi napu ne ruimeli nile ꞌwe aꞌwágame nímili nile ꞌemi ralámuli níriga. ꞌLige ꞌemi ralámuli alué raꞌíchali akisá, ꞌlige seweka mochímili nile ꞌemi.
\v 24 ꞌLige neka tabilé aꞌwágame nulénili. ꞌEmi ꞌwe aꞌlá ꞌnátame júpaché alué Esukristo ꞌyuga. ꞌLige neka pe iligá najkí napurigá napuíka beniboa ye Onorúgame raꞌichálila napurigá ꞌla ganíliga mochímala ꞌemi, nobi ꞌemi ralámuli taꞌchó ꞌme ꞌla sébali nile napurigá ꞌla benimela alué raꞌíchali, alué napu ne ruimeli nile alé sébaga. Alekeri tabilé osá simiru ne alemi.
\c 2
\p
\v 1 ꞌLige ne alé sebásaká, alué raꞌíchali ruwisáká ne alé, ꞌlige ꞌemi ralámuli ꞌwe seweka mochíbamili nímilikuru alué raꞌíchali akisá. Neka tabilé seweka mochiánili ꞌemi uchéchigo siné.
\v 2 Neka tabilé sebánili alé ꞌemi tabilé aꞌrésaká alué chátiri ꞌnátili. Neka najkí napurigá ꞌla ganíliga mochímala ꞌemi ꞌlige ꞌwe aꞌlá ꞌnátaga biꞌlepi ꞌnátili. Alarigá nokisáká ꞌemi, ꞌliko ꞌwe ganíliga sebámala ne alemi.
\p
\v 3 Ne bilé apeli nábolegéturu alé ꞌmi napurigá ꞌla gatewa alué raꞌíchali ꞌemi aꞌbopi ꞌla ganíliga. Ne boꞌné tabilé gaténili alé sébaga. Neka tabilé raꞌichánali chibiyeti raꞌíchali. Neka ꞌla ganíliga sebánili alé. ꞌLige ne ꞌwe aꞌlá ganíliga asimela napuꞌlige ꞌemi ralámuli ꞌwe aꞌlá benigá mochígichi alué rejcholi. ꞌLige ꞌemi ralámuli ꞌwe ganíliga mochímalachigó alé.
\v 4 ꞌLige ne ꞌwe seweka ꞌsiéturu alué osilí osá, ꞌlige nalaka ꞌsiéturu ne. ꞌLige ꞌwe galé ne ꞌemi, alekeri osé ne ꞌemi. Alué osilí, tabilé neꞌogí kéré.
\s Jena ruwimela napurigá eꞌkaga nokísiwa  alué ralámuli rekó cha nokame ke
\p
\v 5 Alé ajtí bilé rió ꞌwe inílime ꞌwe resí olá ꞌemi ralámuli, pe boꞌnepi gompaniérola ke waꞌlú seweli ꞌya ꞌemi. Ne abiénachigó ꞌwe seweka ajtí alarigá mochígichi ꞌemi. ꞌÉmika abéchigo resí nilia mochí alué rió chojkila gite, tabilé ganíliga mochíkuru ꞌemi nibilé nétiri ganíliga ajtíkuru. Neka tabiléchigo neꞌochániligó alué rió uché rajpé.
\v 6 ꞌÉmika ꞌmáchigo gastigárilime siné. ꞌMa ꞌla júkuru.
\v 7 Jípeko ꞌemi eꞌkámala ke alué rió, ku amigo niraga etewa. Jípeko ku naꞌtemápua alué rió napurigá tabilé aꞌrémala Onorúgame naꞌtálila ꞌnata.
\v 8 Jipe ne taní napurigá simámala ꞌemi alué rió eꞌnemia, napurigá ꞌemi anémala alué rió ꞌma ku ꞌla galeo ꞌemi alué rió.
\v 9 Neka oséguru ꞌemi pala ꞌla eꞌwara ꞌemi, pala ꞌla eꞌkara ꞌemi alué rió.
\v 10 ꞌEmi ꞌla eꞌkásaká alué rió ꞌliko ne abiénachigó ꞌla eꞌkámala alué rió. Neka abiena ꞌla ꞌnata ajtí napurigá suwábaga ku ꞌla ganíliga nokísimala ꞌemi ralámuli. Alué Krístoka ꞌwéchigo ꞌla eꞌnegá ajtigame neꞌchí, alekeri gaténili ne napuꞌlige ralámuli eꞌkurú nokogá eꞌyénachi, siné kachi ꞌla gatémala ne.
\v 11 Alarigá alué Remónisi tabilé chérigá neyúromala. ꞌLa machirú alieri ko alué Remónisi. Alué ꞌsime júkuru Onorúgame raꞌichálila najsabua.
\s Jena ruwimela Onorúgame nuebo raꞌíchali nuláligo  napurigá ꞌla sébali olámala alué ralámuli
\p
\v 12 ꞌLige ne alé weꞌká riógichi Tróasi anilichi sebasa, ne ꞌla ruwíturu alué raꞌíchali Kristo nila rejcholi. ꞌLige Onorúgame ꞌwe aꞌlá nejkúrale neꞌchí beniria napurigá ꞌla semáriga maꞌchínamala alué raꞌíchali.
\v 13 ꞌLige ne boꞌneko taꞌmé ꞌwe ganíliga rejpíkuru ꞌnalina, pecha ajtigá alué rió Tito anilime alué ne gompaniérola. ꞌLige alekeri simíturu ne uchéchigo bilena alé Maseronia anilime gawí boꞌígichi, Tito ꞌyasia alemi.
\p
\v 14-15 Rekó neka aꞌrigé alué raꞌíchali beniria alé weꞌká riógachi Tróasi anilichi, Onorúgameka abiénachigo ꞌla nejkúrigo rekó panápuri eyénachi ne. Ralámulika ye raꞌíchali akigá, benime ju Onorúgame nila raꞌíchali. Jaré ralámuli ꞌla benime ju ye raꞌíchali, ꞌlige jaré ralámuli tabilé benime ju ye raꞌíchali. Rekó ta benime ke, ꞌwe ꞌla machí aꞌboika Kristo oyérame nírigo ramué.
\v 16 Alué ralámulika tabilé Kristo oyérame ju, napuꞌlige aké ramué raꞌichálichi, ꞌwe aꞌlá machíguru reꞌlé simámili ko alé injierno anilichi, nobi alué ralámulika tabiléchigo ꞌnátame júkó. ꞌLige alué ralámuli Kristo oyérame, napuꞌlige aké ramué raꞌichálichi, ꞌwe ꞌla machíguru ꞌpa rewagachi simamio. Onorúgame aꞌwalí nígame júkuru napurigá ꞌla semáriga maꞌchínamala suwábaga ye.
\v 17 Ramueka pecha beníriligo Onorúgame nila raꞌíchali pe enomí koruka napurigá nokame ju uché jaré ralámuli, pe iligá iꞌkilí ruilíguru ralámuli napurigá ꞌla naꞌtámala. Ramueka Onorúgamete nulérigime nírigime, ꞌlige Onorúgameka ramué eꞌnegá ajtíkuru nabí rawé. ꞌLige Kristo waꞌlú aꞌwalí nejíchigó.
\c 3
\p
\v 1 ꞌLige siné kachi ꞌemi mayéleké ramué ꞌwe gunarume nírigo, ꞌlige ramueka tabilé alieri niru. Ramueka pecha aniágó: “ꞌWe jebénigame niru ramué”, tase alaniá ramueka. Ramueka tabilé resílalía napurigá bilé apeli newawa anigá ꞌwe ꞌla ralámuli kóriká ramué.
\v 2 Bilé rió machinálisaká churigá naꞌtálime ko ramué, ꞌliko aꞌboi ꞌemi eꞌnéniga ꞌla machibóaguru alué rió ꞌma ꞌla aꞌkabámana mochígame kame ꞌemi napugiti ꞌemi ꞌma ꞌla sébali oláligime napu ramué benírilige.
\v 3 Jipe ꞌemi ralámuli Onorúgame Alawala nígame júkuru alé sulachí, alekeri ꞌwe aꞌlá oyérame ju ꞌemi Onorúgame. ꞌLige alekeri ꞌla maꞌchígime nérékuru ye ꞌnátili, napurigá ramué ꞌwe aꞌlá sébali benírilige ꞌemi, napugiti ꞌemi ralámuli ꞌwe aꞌlá oyérame kame Onorúgame. Onorúgame osale alué nulalí oká rejtechi napurigá Moisesi niga asimela, nobi ꞌémika nígame ju alué nulalí alé sulachí. ꞌMa ꞌla naꞌtátékuru Onorúgame ꞌyuga ꞌlige ꞌwe aꞌlá eꞌwiwa.
\p
\v 4 Alué Kristo ꞌyákuru ramué bilé ꞌnátili napurigá ramué ꞌwe aꞌlá machiboa ꞌla sébali olálikuru ꞌla semáriga benírilekuru ramué ꞌemi. Onorúgame ꞌla eꞌnegá ajtíkuru ramué, ꞌwe ꞌla ganíliga ajtí ramué ꞌyuga. ꞌLige alekeri ramué tabilé gunarume nírukuru. Ramué aꞌboi tabilé aniboa ꞌwe aꞌlá ju.
\v 5 Ramueka ruyá bilé ꞌnátili napurigá aní Onorúgame. Pecha aniboa ramueka: “Ramueka ꞌwe ejebénigame niru beníriga”, tase alaniboa ramueka.
\v 6 Ralámuli ꞌla machíguru chiéniko cha nokáliga alué osilichi eꞌnéniga, alué osilí napu Onorúgame ꞌyale alué Moisesi, nobi tabiléchigo aꞌwalí nígame nílekó napurigá tabilé buyásimala alé tabilé ꞌla bowechi. Jípeko ye Onorúgame Alawálate aꞌwalí nígame niru ramué. Jípeko alekeri ꞌwe ꞌla beniria mochírukuru ramué ye raꞌíchali.
\p
\v 7 ꞌLige bilé rawé alué rió Moisesi ꞌwe rasórutume banega asálekeꞌé alé weꞌká ralámuli mochígichi. Onorúgame boꞌné alarigá ajchálekeꞌé rapame banega alué rió Moisesi napurigá alué ralámuli ꞌla machimela alué rió Moisesi Onorúgame ꞌyuga eyéname ko ꞌlige napurigá alué ralámuli ꞌla machimela alué Moisesi nulalila ꞌwe najtékame raꞌíchame níligo, boꞌné Onorúgame nulalila níligime. ꞌLige alué ralámuli israelita ꞌwe rasólekeꞌé alué rió alarigá ajtígichi alé. ꞌLige tabilé gayénalekeꞌé alué ralámuli oꞌwemi eꞌnena. Weꞌlisi rasólekeꞌé alué ralámuli, rekó weꞌlibeko taꞌmé rapame banega ajtígichi kachi abiena rasólekeꞌé alué ralámuli.
\v 8 ꞌLige alué rejcholi napu benírale alué rió Moisesi ꞌwe semati nílekeꞌé kaka, nobi alué rejcholi napu jipe beniaa uché rajpé abé semati ju, meꞌtagá alué rió Moisesi rejchólila, napugiti jípeko Onorúgame Alawala nígame niru ramué ralámuli.
\v 9 Chiena ꞌla nílige alué nulalí napu alué Moisesi benírile alué ralámuli napurigá machimela chibi nokáliga, jípeko abé aꞌlá júkuru Onorúgame nejile boꞌné Alawala napurigá ꞌla aꞌwalí nígame niwa ramué ralámuli napurigá ꞌla sébali olawa napurigá nulá Onorúgame.
\v 10 Ye ꞌnátili nuebo abé aꞌlá júkuru, tase napurigá alué ꞌya nerúgame.
\v 11 Ye ꞌnátili tabilé siné suwime nímala. ꞌLige alué ꞌya nerúgame ꞌnátilika abiena ꞌla semati nílekuru. Abéchigo ꞌla semati júkuru ye ꞌnátili nuebo, abé aꞌlá sébali ju.
\p
\v 12 ꞌLige ramué ralámuli tabilé chijúnaga ruyá ye rejcholi napugiti alueka ꞌwe aꞌlá kame, ꞌlige aminami tabilé siné suwíbame júkuru ye rejchólika. ꞌLige alekeri tabilé chijúnaga ruyelia ramué ralámuli ye raꞌíchali apiépiri ralámuli.
\v 13 Ramueka tase napurigá alué rió Moisesi, tabilé alieri niru ramué. Alué rió Moisesi napuꞌlige rapame banega asisá, ꞌlige ku taꞌmé rapame banega asagá, ꞌwe chijúnale. ꞌLige chijúnaga alué rió arigá peꞌtá chinite oꞌpóliga asíbalekeꞌé banalá napurigá ta etémala alué ralámuli taꞌmé rapame banega ajtígichi alué rió. Alué rió Moisesi tabilé najkílekeꞌé napurigá alué ralámuli machimela ꞌma suwábiliga alué aꞌwalí napu nígame nílige alué rió Moisesi.
\v 14 ꞌLige alué ralámulika abirigáchigo machíleké alué rió Moisesi ꞌma suwábiliga alué aꞌwalí. ꞌLige weꞌká ralámuli jipe ejperégame alé Israeli, alueka ꞌwe raꞌíchame ju alué osilí napu nerú alé líbrochi, napurigá raꞌíchale alué Moisesi ꞌwe ꞌya. ꞌLige pe aꞌbopi ꞌla sébali olame korime ju alué raꞌíchali,
\v 15 nobi rekó weꞌsá akee alué raꞌíchali, tabilé sébali olame júkuru. Pe Esukristo aꞌwalílate ꞌla sébali olámili ju.
\v 16 ꞌLige bilé rió alué Esukristo oyérasa, ꞌlige alué Onorúgame Alawálaka guꞌírimala napurigá alué rió ꞌwe ꞌla semáriga machimela alué ko nuebo ꞌnátili ꞌwe aꞌlala.
\v 17 Alué Waꞌlula Esukristo pe biꞌlepi ju alué Onorúgame Alawala nejime ju, napurigá ꞌla naꞌtawa alué semati ꞌnátili. Napuꞌlige nígame niru ramué alué Onorúgame Alawala, ꞌliko ꞌla sébali eꞌwawa ramué Onorúgame ꞌyuga. ꞌLiko tabilé eꞌwiwa alué Remónisi. ꞌLige alarigá ꞌla ꞌwe semáriga beniboa alué Onorúgame nila rejcholi.
\v 18 ꞌLige ramué ralámuli ꞌwe aꞌlá sébali benisá alué Onorúgame nila rejcholi, ꞌlige ramué ralámuli ꞌwe semáriga raꞌíchame niwa. ꞌLige aminami ꞌwe semáriga benírame niwa ramué ralámuli alué Onorúgame raꞌichálila. Alué ralámuli ꞌla etémala Onorúgame Alawala ramué guꞌírichi napurigá eꞌwiwa Esukristo. Aminacho iꞌkilimi ꞌla naꞌtáwaréko Esukristo naꞌtálila.
\c 4
\s Jena ruwimela ramué saꞌpala ko napurigá  bilé sekolí wejcholite newárigime
\p
\v 1 Alekeri tabilé guwana rujsinígó ramueka napugiti Onorúgame nejile ye bilé ꞌnátili napurigá beníriga nokísiwa uché jaré ralámuli. Ramueka ꞌwe resítiri nírukuru, nobi Onorúgame arigáchigo nejílekó ye bilé ꞌnátili, aminabi nejí iwérali.
\v 2 Ramueka ꞌla beníriliguru alué Onorúgame nila raꞌíchali napurigá aní. Ramueka pecha weꞌká ꞌnátili ꞌnátaga raꞌicháligo, pe biꞌlepi naꞌtálime ju Onorúgame nila naꞌtálilacho. Ramueka pecha enomí meka nokiágó alué Onorúgame raꞌichálila beníriga. Suwábaga ralámuli machíguru ramué ꞌwe ꞌla biꞌígame benírilia. Onorúgameka ꞌla eꞌnegá ajtíkuru ramué.
\v 3 Ramueka beníriliguru churigá ꞌla buyásiwa alé tabilé ꞌla bowechi. ꞌLige weꞌká ralámuli tabilé bijchígiga aké alué raꞌíchali rekó ꞌla námaka akee alué raꞌíchali alanime ko. ꞌLige ramueka tabilé chojkila niru, alué ralámuli ꞌma eꞌwegágame ju.
\v 4 Alué Remónisika napu nabí najsibua ajtí jena gawichí, ꞌwe aꞌwágame chaꞌpigá ajtí alué ralámuli, alekeri tabilé siné námame ju churigá ko Kristo raꞌichálila ꞌwe semátiri. Pecha siné námame júkó tachiri gite nawáligo Onorúgame jena gawichí napurigá rió neraga.
\v 5 Ramueka tabilé eꞌwélala koriá ꞌwe najtékame, tase alaniá ramueka. Alué Esukristo ju ꞌla Waꞌlula ka, ramueka pe iligá uꞌkuchípala ralámuli niru. Ramueka guꞌírili ꞌemi napugiti ramueka oyérinili napurigá ꞌsile Esusi jena wijchimoba.
\v 6 Napuꞌlige Onorúgame newale gawí, Onorúgame raꞌichálila alarigá aníguru, sineko chóniga ilíligo, ꞌliko Onorúgame nejíligo bilé raꞌósali. ꞌLige ramueka chókame sulégame nírigekuru ꞌyako napurigá ilile gawí, nobi Esukristo biꞌwéleko ramué sulala. Alué gite ꞌla machiáguru Onorúgame.
\p
\v 7 ꞌLige ramué aꞌboi ꞌnátagaká tabilé gainawa ramué ꞌla sébali olá napurigá nulá Onorúgame, pecha aꞌwágame alawégame níriga ramué ꞌónika. Ramueka pe napurigá bilé sekolí, yati gajsime. Alarigá nírukuru ramué napurigá suwábaga ralámuli alarigá ꞌla machimela alué boꞌné Onorúgame nejío alué aꞌwalí napurigá ramué ꞌla gaináwala sébali olá napurigá nulá Onorúgame.
\v 8 Alekeri ramué ꞌla neyúsilime júkuru rekó napuchibi ikiáe. Napuꞌlige chibi ikiáe, tabilé che ikisá ꞌemi, nobi ramueka tabilé siné guwana rujsunígó.
\v 9 Ramueka ꞌwe resí oliá wejpisoka amulí meꞌagá aꞌrele ramué, nobi Onorúgame tabiléchigo aꞌrégó ramué.
\v 10 Panápurimi resí níliga eꞌyéniliguru ramué napurigá resí níliga eyénale Esusi. Abirigáchigo ꞌla ku buyásirikó ramué. Alarigá júkuru ꞌla maꞌchiná nérékuru ꞌla Esusi Alawala nígame nírukuru ramué. Alarigá machimela alué ralámuli alué aꞌwalite buyásiligo alé tabilé ꞌla bowechi.
\v 11 Ramué ralámuli taꞌchó suwiyá, nobi iꞌsínimi amulí meꞌliágó ramué Esusi raꞌichálila beníriga eꞌyénilichi. Alarigá júkuru ꞌla maꞌchiná nérékuru ꞌla Esusi aꞌwalila nígame nírigo.
\v 12 Ramueka ꞌwe resí níliga eꞌyénakuru pe Onorúgame raꞌichálila beníriga eꞌyéniga, nobi ꞌémika ꞌwéchigo ꞌla semáriga benígó Onorúgame raꞌichálila ꞌlige abiénachigó alué Onorúgame aꞌwalila.
\p
\v 13 Onorúgame nila raꞌíchalika regá aníguru: “Onorúgameka ꞌla bijchiá nejkúrame júkuru rekó abichibi ikiae, alekeri aminabi beníraliae ramué alué rejcholi Onorúgame raꞌichálila.”\f + \fr 4:13 \ft Eꞌnesi Salmos 116:10. \f* ꞌLige ramué ralámuli ꞌwe ganíliga mochíruchigó Onorúgame ꞌyuga, napugiti Onorúgameka ꞌwe aꞌlá sébali olame kame napurigá aní boꞌné. ꞌLige alekeri tabilé chijúnaga ruyá ramué Onorúgame raꞌichálila panápurimi.
\v 14 ꞌWe ꞌla machirúguru napuꞌlige ramué suwisuga, Onorúgame ajánamilikó ramué napurigá ajánaliru alué Esusi, napurigá ꞌpa sebámili ju ꞌemi ꞌyuga napu ajtí Onorúgame alé ꞌpa rewagachi.
\v 15 Onorúgame guꞌiri neꞌchí napurigá anachámala ne napuꞌlige resí nilia ajtígichi ne napurigá guꞌírimala ne ꞌemi. ꞌLige weꞌká ralámuli ꞌla niraga etémala Onorúgame, ꞌlige cheliera ꞌyámala ꞌla nejkúrime kóriká.
\p
\v 16 Alekeri ramué ralámuli tabilé guwana rujsunía alué rejcholi beniria. Rekó ramué saꞌpálaka ꞌwe resí ikié, ramué alawálaka aminabi ꞌla naré aꞌwalí alué Onorúgame nejílala.
\v 17 Jena ꞌwe resí nília mochiru ramué nobi taꞌméchigo waꞌlú kéréko, pe yati simíramalaké. Jipe jena ꞌwe resí nilia mochiru ramué, ꞌlige alekeri Onorúgame ꞌwe ꞌla ganíliga etémala ramué alé reꞌpá rewagachi. Tabilé chieri káwé rekó resí nilia mochírige ramué jena, ꞌwe ganíliga mochímili ju ramué alé reꞌpá rewagachi.
\v 18 Alekeri tabilé weꞌká ꞌnátaga mochílime júkuru jena gawichí, pe yati suwimela alué resí níliame iligá abé ꞌla naꞌtálime ju churigá nimia alé ꞌpa rewagachi napu senibí mochíbuli ju ramué.
\c 5
\s Jena ruwimela uchéchigo bilé nuebo saꞌpá nígame  níwilikó ꞌpa rewagachi
\p
\v 1 Ramué saꞌpálaka pe napurigá bilé galí ju, nobi ramué alawálaka tabilé siné che ikime júkó. Ramué saꞌpálaka pe mukume júkuru, ꞌlige reꞌpá rewagachi uché bilé saꞌpá narépua ramué, Onorúgame nejímili ju. Alué tabilé siné suwíbame saꞌpá nímala.
\v 2 Napuꞌlige bijí jena gawichí mochiru ramué ꞌwe seweka ejperégame niru, nobi ꞌláchigo machiágó pe bilé rawé simáwilikó alé reꞌpá napu Onorúgame nejímala uché bilé nuebo saꞌpá.
\v 3 Alué nuebo saꞌpaka napurigá bilé oꞌpacha nímala napurigá tabilé ꞌyeri mochímala ramué alawala.
\v 4 Ramueka ꞌla saꞌpega mochínili napu ju nuebo saꞌpá napu tabile siné che ikimela.
\v 5 Onorúgame nejíkuru boꞌné alawala, alekeri ꞌla machiáguru ramué, abiénachigo alarigá nejímili ju saꞌpá ꞌwe aꞌlala napurigá ramué alawala alé reꞌpá rewagachi mochímala. Alekeri newálikuru ramué.
\p
\v 6 ꞌLige ꞌla machiáguru napuꞌlige bijí jena mochírigo ye saꞌpega, tabilé Esukristo ꞌyuga mochírikuru ramué.
\v 7 ꞌLige ramué jena mochígaká peka siné etuwíguru alué Esukristo, nobi abirigáchigo ꞌwe aꞌlá niráligo ramué alué Esukristo. Alueka nabí eꞌnegá ajtí ramué rekó ramué tabilé etuwíe. ꞌLige ramueka ꞌla machiame alué Esukristo ꞌla sébali olamio. Alarigá ejperégame niru ramué ralámuli ꞌwe ꞌla niraga alué Waꞌlula Esukristo.
\v 8 Ramueka tabilé majawía alué mukiame. Ramueka buyásinilikeꞌé alé ramué saꞌpálachi napurigá ꞌa simela ramué alawala alé napu ajtí alué Waꞌlula Esukristo.
\v 9 Alekeri ꞌla sébali olánilime niru napurigá najkí alué Esukristo jena gawichí mochiga bijí ajagá mochiga ꞌlige abiena alé reꞌpá rewagachi mochiga.
\v 10 Bilé rawé gatémala alué Kristo ramué ꞌyuga (gustisia olámala), alé rukimela pala ꞌla sébali oláliga ramué alué ꞌyuga o tabilé napuꞌlige jena mochírige ajagá, ꞌlige gastigárimala tabilé sébali olásiga ka, nobi ꞌla sébali olásiga ka ꞌwe aꞌlá semati raweli nejímala.
\s Jena ruwimela Kristo mukúligo ramué guꞌíriga
\p
\v 11 ꞌLa machirúguru nerumia bilé gustisia, alekeri ꞌla niraga etewa alué Esukristo, ꞌlige alekeri ꞌwe ꞌla ruyewa alué ꞌnátili uché jaré ralámuli. Onorúgame ꞌla sébali machíguru chonoká mochíriga ramué, ꞌlige najkíguru napurigá ꞌwe aꞌlá machimela ꞌémichigó.
\v 12 Ramueka tabilé gunaruga raꞌichalia, iligá najkiá ꞌnalina napurigá ꞌla námamala ꞌemi napurigá Onorúgame ꞌnátaga mochímala. ꞌÉmika ramué guꞌírimili júkuruchigó ruyea ralámuli napu ꞌnátame ju pe napu etee, tabilé ꞌnátame ju napu alé sulachí ajtí. Alueka pecha machígó ramué Onorúgame ꞌyuga ꞌnata mochírigo.
\v 13 Jaré alué ralámuli loꞌí aneme ju ramué olagá, nobi Onorúgameka ꞌla sébali machíguru. Ta chérikáwé rekó alué ralámuli ꞌla anié, ramueka ꞌemi ralámuli guꞌíriga nokiaꞌe ꞌlige beníriga bilé raꞌíchali.
\v 14 Kristo ꞌwe naꞌtemame ju ramué, alekeri beníriga eꞌyénilia ramué. ꞌLa sébali machiáguru alué Kristo mukúliga ramué neraga, ꞌlige abiénachigó mukúlekuru suwábaga ralámuli guꞌíriga. Alekeri beníriga eꞌyéniliguru ramué.
\v 15 Alué Esukristo mukúlekuru napurigá ramué ralámuli aꞌrewa alué chátiri ꞌnátili, napu ꞌnátame ju ramué ralámuli pe aꞌboi ꞌnátaga. ꞌLige alué Esukrístoka najkiame napurigá oyérawa ramué alué boꞌné Esukristo napugiti napuꞌlige alué Esukristo mukule ꞌya ꞌlige alué boꞌné Onorúgame ku ajániligame. Alarigá ꞌsile Onorúgame ramué guꞌíriga.
\v 16 Jípeko napuꞌlige bilé ralámuli etuwía ramué, tabilé alarigá naꞌtalia napurigá ꞌya. Jípeko alarigá naꞌtalia Kristo mukúliga alué ralámuli guꞌíriga. ꞌYako ramué ralámuli alué Kristo pe apiépiri rió neraga etuíme ke. Alekeri tabilé nirálime ke ramué alué Kristo. Jípeko ramué tabilé alarigá ꞌnátame ralámuli niru, jípeko tase alarigá niru ramué.
\v 17 Bilé rió ꞌla biꞌlepi ꞌnátaga asisáká, pe biꞌlepi Kristo ꞌnátaga, alué rioka ꞌla biꞌígame sulégame nímala. Alué chátiri ꞌnátili ꞌma tabilé ꞌnátame ju, pe alué nuebo ꞌnátalicho.
\p
\v 18 Alarigá ꞌnátale Onorúgame napurigá ꞌla gompaniérola neraga mochiwa alué boꞌné Onorúgame. Onorúgame nulele Kristo napurigá ꞌla gatémala napurigá ꞌla ganíliga mochiwa aꞌbopi ꞌla gompaniero niraga. ꞌLige Kristo nejílekuru ye ꞌnátili napurigá aminabi ruyewa ralámuli napurigá ꞌla amigo niraga etewa Onorúgame.
\v 19 Onorúgame boꞌné ꞌla ruwíguru alué ꞌnátili ramué ralámuli napurigá ꞌla gompaniérola niwa Onorúgame ꞌyuga. Alekeri Onorúgame nulélekuru alué Kristo napurigá ꞌla gatémala. ꞌLa bijchiá mukúligo ramué guꞌíriga, ꞌliko Onorúgame tabilé chélegá eté ramué, ꞌlige julárukuru ramué napurigá ruyewa ye bilé ꞌnátili alué ralámuli.
\v 20 Ramué ralámuli nígame nírukuru Kristo nila aꞌwalí, ꞌlige napuꞌlige ramué ruwiyae alué rejcholi, ꞌlige alué ralámuli ꞌla machime ju alué rejcholi Onorúgame náoligo pe napurigá boꞌné Onorúgame raꞌichálila niraga. Kristo nulele ramué napurigá ꞌemi ralámuli ꞌla aꞌrémala alué resítiri ꞌnátili napurigá ꞌla Onorúgame ꞌyuga naꞌtámala.
\v 21 Onorúgame nulale napurigá Kristo bujémala alué ramué gastígola. Kristo tabilé cheꞌsime nile nobi abirigáchigo gastigárilirukó alué Kristo. Onorúgame boꞌné alarigá elile napurigá mukumela alué Kristo ramué nila gastigo oꞌtogá. Alekeri Onorúgame tabilé chérikáme neraga eté jipe ramué.
\c 6
\p
\v 1 Onorúgame ꞌwe semáriga guꞌiri ꞌemi ralámuli, alekeri ꞌla semáriga naregime ju napu Onorúgame nejí. Napu aꞌlige naregí alué semati ꞌnátili, tabilé ku guwana aꞌrewa, tabilé chebilé ꞌnátili chaꞌpiboa.
\v 2 Onorúgame anile ꞌwe ꞌya:
\q ꞌMa sébakuru raweli.
\q Akéturu ne napuꞌlige tániru ne alué aꞌwalí.
\q Jípeko guꞌírimala ne ꞌemi napurigá ꞌla sébali nímala.
\m Ne Páulochigó aníguru ꞌma sébakuru alué raweli. Jipe ju napu Onorúgame buyana ajtí ralámuli chátiri bowechi eꞌyéname.
\s Jena ruwimela alué Páulo ꞌwe resí ikíligo
\p
\v 3 Ramueka tabilé najkiá napurigá bilé rió animela: “Neka tabilé nirá alué raꞌíchali, pecha sébali olá alué boꞌné Páulo.” Ta siné alakime kéturu.
\v 4 ꞌLa maꞌchígime nérékuru Onorúgame ꞌnata mochírigo ramué. ꞌLa anachálime júturu napuꞌlige resí ikiá ꞌemi, rekó tabilé aꞌrélime ke ramué napurigá aꞌminabi eꞌyénawa,
\v 5 rekó wejpisokia, rekó galírale moꞌalía, rekó weꞌká ralámuli napuíme ju ramué meꞌlináliga, rekó ꞌwe aꞌwágame nocháralie, rekó tabilé gainalia rukó gojchiá, rekó tabilé iꞌtégichi goꞌame.
\v 6 Rekó napuchibi ikiae ramué tabilé chibiyeti naꞌtáligo, ꞌla naꞌtáliguru ramué napurigá ꞌnata Onorúgame, ramué ꞌwe ꞌla anachálime ju, ꞌwe ꞌla guꞌírime ju ramué alué uché jaré ralámuli. Alarigá niru ramué napugiti Onorúgame nejíligime boꞌné alawala. Alué alawálate ꞌla niraga jaro alué ralámuli, tabilé chátiri ꞌnátaga.
\v 7 Alué alawálate abiena aminabi beníriga eꞌyénowa alué ꞌla bijchiá raꞌíchali. Onorúgame nejíguru ye aꞌwalí napurigá beníriga eꞌyénawa alué Onorúgame nila raꞌíchali, ꞌlige napurigá nemípua napuꞌlige lanichi: “Tabilé ꞌla ju alué Onorúgame raꞌichálila.”
\v 8 Iꞌsínimi ꞌwe ꞌla niraga etuime ju ramué, iꞌsínimi tabilé ꞌla nirálime ju ramué. Iꞌsínimi ꞌwe aꞌlá niraga raꞌíchame ju ramué olagá, iꞌsínimi tabilé niraga raꞌíchame ju ramué olagá. Iꞌsínimi ꞌyégame anilime ju ramué rekó ꞌla bijchiá raꞌichálichi.
\v 9 Iꞌsínimi tabilé machirume neraga etuíme ju ramué rekó ꞌwe aꞌlá machime ke. Iꞌsínimi amulí suwiyáguru, abirigáchigo aꞌlá ajagá nokísiligó ramué. Rekó wejpisolia ramué, tabiléchigo suwiyágó.
\v 10 ꞌLige ramueka iꞌsínimi ꞌwe sewélime ju nobi ꞌwéchigo ꞌla ganíliga mochírikó, ramueka ꞌwe aꞌlá machiáa ye rejcholi ꞌwe aꞌlá nimio. ꞌLige ramué tabilé nígame nírukuru, nobi Onorúgame nila raꞌíchalika napu ramué benírilia uché jaré ralámuli, ꞌwe najtékame ju. Rekó tabilé tábiri nígame nírige, Onorúgame júkuru Waꞌlula Oꞌnó, alué suwábaga nila júkuru.
\p
\v 11 ꞌLige ramueka ꞌwe aꞌlá niralia ꞌemi ralámuli alé Koríntochi ejperégame. Ramueka raꞌicháliguru ꞌwe aꞌká gompaniero niraga. Ramueka ꞌwe aꞌlá naꞌtalia ꞌemi ꞌyuga, tabilé chátiri naꞌtalia ramué.
\v 12 ꞌLige ramueka nabí ꞌwe aꞌlá galilía ꞌemi, nobi ꞌémika tabilé ꞌla galeme júkuru ramué.
\v 13 Neka táaguru napurigá ꞌemi oꞌnola niraga: ꞌWe ꞌla nirawa neꞌchí, neka ꞌwe ꞌla niraga etéguru ꞌemi.
\s Jena ruwimela Onorúgame ramué ꞌyuga ajtigá
\p
\v 14 Bilé rió ꞌwe ꞌla ꞌnátame nísaká Onorúgame ꞌyuga, tabilé gompaniéroga einámala alué rió napu tabilé ꞌla ꞌnátame ju Onorúgame ꞌyuga.\f + \fr 6:14 \ft Páulo ꞌnata ajtí napuꞌlige asaraga eyénachi bilé rió napurigá ꞌla aꞌnari aꞌwáganti ju alué oisí. \f* Bilé rió biꞌwígame alawégame nísaká, tabilé ꞌla biꞌlepi naꞌtámala alué rió chátiri alawégame ꞌyuga.
\v 15 Alué Esukristo tabilé gompaniérola júkuru alué Remónisi. ꞌLige ꞌemi ralámuli tabilé gompaniérola niwa bilé rió tabilé Esukristo oyérame.
\v 16 Pecha ꞌla júkó alé Onorúgame galílachi bajkiá tániga enalia bilé mono newárigime napu tabilé Onorúgame ju. ꞌLige Onorúgame Alawálaka jena ramué sulálachi bejtékuru. Ramué saꞌpálaka Onorúgame bejtélachi ju. Alekeri tabilé ꞌla júkuru alué Remónisi naꞌtálila naꞌtalia, tase napubuwa alué ꞌwe aꞌlala ꞌnátili si. Ramueka Onorúgame galila nírukuru, alekeri ꞌwe ꞌla biꞌwígame niwa. ꞌYako regá anílekuru Onorúgame:
\q Ne alawala asimela bejtega ꞌemi ralámulichi.
\q ꞌLige ꞌemi ralámuli panápuri eꞌyénachi,
\q alué alawaka aba alemi einámala ꞌemi ꞌyuga.
\q Alué ꞌla neꞌchí oyérame ralámuli,
\q neka ꞌwe aꞌlá galémala alué ralámuli.
\q ꞌLige alué ralámuli neꞌchí oyérame,
\q nabí neꞌchí oyérimili júkuru.
\m
\v 17 Abiena anile Onorúgame:
\q Buyásiwa alué ralámuli pecha ꞌla ꞌnátame ka neꞌchí ꞌyuga.
\q Tabilé oyérawa alué chátiri ꞌnátili.
\q Napuꞌlige ꞌla tabilé oyérasa chátiri ꞌnátili,
\q ꞌliko ne ꞌwe ꞌla galémala ꞌemi.
\q
\v 18  Abiena anile Waꞌlula Onorúgame napu abé aꞌwágame ju:
\q Ne nímala ꞌemi ralámuli oꞌnola,
\q ꞌlige ꞌémika ne ꞌkúchila nímili júkuru.
\c 7
\p
\v 1 ꞌEmi ralámuli ne amígola, Onorúgame ꞌwe ꞌla sébali olame júkuru napurigá aní boꞌné. Alekeri aꞌrewa alué chátiri ꞌnátili. Alué chátiri ꞌnátili ꞌma chókame newámala ramué alawala, alésíko ꞌma nayúpua pecha ꞌla ꞌnátame níriga. Abé ꞌla júkuru ꞌla sébali olame ralámuli níriga ꞌla niraga etewa Onorúgame.
\s Jena ruwimela Páulo ꞌwe ganíliga asáligo  alué ralámuli Korinto mochígame ꞌyuga
\p
\v 2 ꞌWe ꞌla ganíliga etewa ramué, ramueka pecha siné beníriligo chátiri ꞌnátili ꞌemi, nibilé alué uché jaré ralámuli. ꞌLige aminami tabilé asemi ꞌwesi ralámuli bujelia enomí ꞌyégiga.
\v 3 Neka pecha che anégó chibieti ꞌemi. Ne ꞌya aniéturu ꞌwe galeme kéturu ne ꞌemi. Neka tabilé chélá rekó mukié ne ꞌemi guꞌíriga.
\v 4 Neka ꞌla machí ꞌemi ꞌwe ꞌla sébali olame ka, alekeri ꞌwe ganíliga ajtíkuru ne ꞌemi ꞌyuga. Neka ꞌwe aꞌlá welagá ajtíkuru, ꞌlige ꞌwe aꞌlá raꞌsálagá ajtíkuru ne, rekó chibi ikié ne.
\p
\v 5 Napuꞌlige sébalige ramué alé waꞌlú gawí Maseronia anilichi, tabilé siné resíbulia ramué. ꞌLige alué ralámuli alé ejperégame ꞌla iwégame cha aní ramué alé sebasa. ꞌLige ramué ꞌla iwégame majawía alanilía alé alué ralámulite. ꞌLige ramueka tabilé machiáekeꞌé alakiboa alé alué ralámuli alanichi. ꞌLige ramueka ꞌwe seweka mochiru alanilía alé.
\v 6 ꞌLige alué Onorúgame júlalekeꞌé alué rió Tito anilime alé napu ramué mochílige. Alarigá ju Onorúgame, ꞌwe aꞌlá guꞌírame ju ralámuli napuꞌlige seweka mochígichi. ꞌLige alué rió Tito waꞌlú nejkuri sebasa alé napu ramué mochírige. Alarigá Onorúgame ꞌla waꞌlú oyérali ꞌyale ramué.
\v 7 ꞌLige alué rió Tito jena sébaga ꞌwe aꞌlá ruwí alarigá oláriga ꞌemi ralámuli alé Korinto. ꞌLige alué rió ꞌla ꞌwe aꞌlá galegá etérigorí alué ꞌemi ralámulite. ꞌLige ramué alué raꞌíchali akisá ꞌlige waꞌlú raꞌsálárukeꞌé. ꞌLige alué Tito ruyé neꞌchí ꞌemi ralámuli alé ejperégame ꞌwe eténilia neꞌchí. ꞌLige aminami ruwí ꞌemi ralámuli ꞌwe seweka mochigo neꞌchí sewétisa. ꞌLige aminami ruwí alué raꞌíchali, ꞌemi ralámuli ꞌwe nejkúrinilia mochigo. ꞌLige neka alué raꞌíchili akisáká uché rajpé abé ꞌla ganíliga rejpíkeꞌé.
\p
\v 8 ꞌEmi ꞌwe seweka mochíbale napuꞌlige naresa ꞌemi alué apeli napu ne neꞌóchaga osele, péchigo peꞌwera seweka mochíliko ꞌemi. Neka sewéturu ꞌemi seweka mochígichi, péchigo peꞌwera sewélekó ꞌemi,
\v 9 ꞌwéchigo ꞌla maꞌchina ko. ꞌÉmika yati gatele ꞌemi aꞌbopi, alekeri ꞌwe ꞌla ganíliga ajtíkuru ne. Alarigá najkíliko napurigá ꞌemi seweka mochímala.
\v 10 Bilé ralámuli chibi ꞌsísaká ꞌlige ꞌwe seweka asimela ꞌla machigá cha ꞌsíligame napu Onorúgame tabilé galeme ju, ꞌliko alué ralámuli aꞌrémala alué chátiri ꞌnátili, ku ꞌla ganíliga asimela. Nobi bilé ralámuli chibi ꞌsísaká, ꞌlige tabilé siné ꞌnátame ju chibi ꞌsíliga napu Onorúgame tabilé galeme ju, ꞌlige alué ralámuli tabilé siné aꞌrémala alué chátiri ꞌnátili.
\v 11 Nobi ꞌémika Onorúgamete ꞌyáliru alué seweli, ꞌlige yati gatele, tabilé naréniliga alué gastigo. ꞌÉmika ꞌwe ayole alué rió ꞌyuga napu cha ꞌsile, ꞌliko ꞌemi gastigárile alué rió. ꞌWe majale ꞌemi ne ayora mayega. Najkile napurigá ne guꞌírimala. ꞌÉmika ꞌwe aꞌlá ꞌnátale. ꞌÉmika ꞌwe ꞌla sébali olale.
\v 12 Neka bilé apeli osigéturu nobi tabilé osé ne napurigá gastigárimala ꞌemi alué rió, ꞌlige neka tabilé osákuru napurigá guꞌírimala alué ralámuli tabilé cheꞌsíkime, pe osá ne alué osilí machináliga pala ꞌla bijchiá eꞌwánokirá ꞌemi ꞌlige machináliga pala ꞌla bijchiá galea ꞌemi neꞌchí.
\v 13 Napurigá nokale ꞌemi, ꞌwe ꞌla ganíliga mochiru.
\p Amináchigo ꞌwe ꞌla ganíliga mochiru ramué napuꞌlige machisáká Tito ꞌwe ꞌla ganílime nile ꞌemi ꞌyuga. ꞌEmi waꞌlú guꞌírile, alekeri tabilé weꞌká ꞌnata asale.
\v 14 Ne boꞌné ruigétigó ꞌemi ꞌwe aꞌlá ralámuli ko ꞌlige boꞌné Tito ꞌla etélikuru ꞌla bijchiá ko. Alué suwábaga raꞌíchali napu ruyélige alué Tito ꞌemi ꞌla bijchiá júkuru. Alué raꞌíchali napu ramué ruyelie ꞌemi, abiénachigó bijchiá kéturuchigó.
\v 15 Alué Tito abé aꞌlá ganíliga asale napuꞌlige etesa ꞌemi ꞌwe aꞌlá sébali oláligo alué Onorúgame raꞌichálila napu benírile. ꞌWe ꞌla niraga eꞌtele ꞌemi alué rió.
\v 16 ꞌWe aꞌlá raꞌsálá ne, ꞌémika ꞌwe aꞌlá sébali olame kame napurigá nulá Onorúgame.
\c 8
\s Jena ruwimela napurigá guꞌíriwa alué ralámuli tabilé nígame
\p
\v 1 ꞌEmi ralámuli Esukristo oyérame, jípeko uché bilé raꞌíchali akimela ꞌemi. Ramueka jípeko najkiá napurigá ꞌemi ralámuli ꞌwe aꞌlá machimela alué ralámuli alé Maseronia ejperégame, Onorúgame ꞌwe aꞌlá guꞌírile alué ralámuli napu napuíme nile alé bilena alué rejcholi benimea. Alué ralámuli alé ichúrimi mochígame ju alé Maseronia anilime gawí boꞌígichi.
\v 2 ꞌLige alué ralámulika ꞌwe resí ikime júkuru kaka. Aminami tabilé nígame gayéniguru alué ralámuli aliena resí oliá, ꞌlige tabilé tábiri nígame nílekuru alué ralámuli, nobi Onorúgame ꞌyuga ꞌnátaga ꞌwe raꞌsálagá ejperégame nile alué ralámuli. ꞌLige rekó alué ralámulika tabilé nígame ke, weꞌká enomí napubule alué ralámuli guꞌírimia alué ralámuli tabilé nígame Rusaleni ejperégame, ꞌlige alé oꞌtiame nílekeꞌé alué enomí.
\v 3 Ne ꞌwe aꞌlá etiá alué ralámuli weꞌká enomí napubúligo, ne alekeri ꞌla sébali machíguru alué ralámuli ꞌla napubúligo alué enomí. ꞌLige alué ralámuli napu nejile, amulí suwábaga nejíkuru alué napu nígame nílige. ꞌLige ramueka tabilé asemi nulélikuru napurigá napubúmala alué enomí. Pe aꞌboi ꞌla sébali ꞌnátalekeꞌé ralámuli guꞌírimia uché jaré ralámuli tabilé nígame.
\v 4 Alué ralámulika alanékuru ramué olagá:
\p ―Pe rekó, ramueka guꞌíriwaráekeꞌé alué ralámuli tabilé nígame alé Rusaleni ejperégame.
\p
\v 5 ꞌLige ramueka tabilé weꞌká enomí napubura mayélikeꞌé alué ralámuli. ꞌLige alué ralámulika ꞌla weꞌká sebárelekeꞌé alué enomí napubua. ꞌLige pe kulí chojkía alué ralámuli enomí napubua, bajchá Onorúgame tánele napurigá ꞌla gainámala alué ralámuli napubua enomí. ꞌLige aminami anílekeꞌé alué ralámuli nokogá:
\p ―Ramueka ꞌla semáriga guꞌíriwa alué Páulo ―anile.
\p
\v 6 Ralámuli alé Maseronia ejperégame ꞌwe aꞌlá sébali olale. ꞌEmi abiénachigó ꞌwe ꞌla sébali olale. Títoka weꞌká napubule enomí ꞌemi ꞌyuga napurigá alué ralámuli tabilé nígame guꞌírimala alué Rusaleni ejperégame. Jípeko tániliꞌe ramué alué Tito napurigá gayénamala napabua alué enomí alé napu mochí ꞌemi.
\v 7 ꞌEmi ralámuli ꞌwe aꞌlá sébali olame júkuru. ꞌWe aꞌlá sébali bijchígime júkuru ꞌemi ralámuli Onorúgame raꞌichálila. Aminami ꞌwe aꞌlá semáriga ruwime júkuru ꞌemi ralámuli Onorúgame nila raꞌíchali. ꞌLige ꞌemi ꞌwe aꞌlá machime júkuru churigá nejkúrime ko Onorúgame. ꞌLige aminami ꞌwe aꞌlá galeme júkuru ramué ralámuli. ꞌLige ꞌemi ralámuli ꞌwe aꞌlá sébali olámili júkuru alué enomí napubusa napu chojkile ꞌemi ralámuli ꞌya.
\p
\v 8 Neka tabilé uméraga nulá napurigá napubuwa alué enomí alé Rusaleni oꞌtowame. Neka pe machinale pala ꞌla sébali olame ka ꞌemi ralámuli ꞌlige pala ꞌla naꞌtemame ka ꞌemi alué uché jaré ralámuli ꞌyuga.
\v 9 ꞌLige ꞌemi ralámuli ꞌwe aꞌlá machíguru ꞌwe semáriga guꞌírilekuru ramué ꞌya alué Waꞌlula Esukristo. Esukrístoka alé rewagachi asagá ꞌwe semati weꞌká eꞌkarúgame nígame nílekuru, ꞌlige alé ꞌpákana rewagáchika nawálekuru ramué ralámuli guꞌírimia jena, ꞌlige alué Esukrístoka jena wijchimoba asagá tabilé nígame nílekuru. Tabilé nígame gayénale ramué guꞌíriniliga.
\p
\v 10 Jena ruimé ne churigá guꞌírilime ka alué ralámuli tabilé nígame. ꞌEmi ꞌya bamí chojkílekuru alué enomí napubua. ꞌLige ꞌwe aꞌlá welagá napubule alué enomí.
\v 11 ꞌLige neka jípeko najkíguru napurigá ꞌemi ralámuli ꞌla gainámala napubua alué enomí. ꞌÉmika ꞌwe aꞌlá wélagá napubuwa alué enomí napu chojkílige ꞌemi ꞌya bajchá napubuwa alué enomí abirigá nokísiwa ꞌwe aꞌlá wélagá.
\v 12 Nejiwa napu ikiri nejía ꞌemi, pe iligá ꞌla ganíliga nejiwa, tabilé weꞌká ꞌnátaga. Alarigá najkí Onorúgame.
\p
\v 13 Ramueka tabilé najkiá napurigá suwábaga nejímala ꞌemi. ꞌEmi suwábaga nejísaká, ꞌma tabilé niga ejtibímala ꞌemi.
\v 14 Ramueka najkiá napurigá ꞌla oꞌmaka niga mochímala rekó pe aꞌtabé nígame ke. Siné kachi aꞌkinana tabilé nígame nisa ꞌemi, ꞌla nejkúrimala alué ralámuli Rusaleni mochígame. Alarigaka ꞌla oꞌmaka niga mochímala enomí. Alarigá ꞌla tabilé siné gurúlamala goꞌame.
\v 15 Alué Onorúgame raꞌichálila napu ꞌya osale Moisesi, aníguru: “Alué ralámuli napu weꞌká napubule alué goꞌame maná anilime, tabilé rasírale. Alué napu abé uꞌkabi napubule alué goꞌame maná, ꞌla sébali sebárime nile.”\f + \fr 8:15 \ft Páuloka aní siné kachi alué enomí tabilé kógisaká alué uché jaré ralámuli tabilé nígame, ꞌliko ꞌma weꞌkámala alué enomí. Eꞌnesi Éxodo 16:18.\f*
\s Jena ruwimela Páulo júlaligo Tito alé Korinto
\p
\v 16 Neka cheliera ꞌya Onorúgame abiena ꞌla ꞌyáligame Tito alué ꞌnátili napurigá guꞌírimala ꞌemi, aꞌchigóriga napurigá Onorúgame ꞌyale neꞌchí.
\v 17 ꞌLige napuꞌlige ne jula alué rió Tito alé Korinto, napurigá guꞌírimala ꞌemi ralámuli, alué rió Títoka ꞌwe yati eꞌwá napurigá nulé ne, napugiti alué rió ꞌwe galeme ju ꞌemi aꞌchigóriga napurigá ne ꞌwe galeme ju ꞌemi.
\p
\v 18 Bilé rió jula ne Tito ꞌyuga. Alué rió ꞌwe semáriga ruyame ju Onorúgame nila raꞌíchali. ꞌLige alué ralámuli jena ejperégame napu napuíme ju Onorúgame nila rejcholi benimea, anile:
\p ―Alué rió ꞌla ju julalia ―anile.
\v 19 Alué ralámuli jena ejperégame alué Esukristo oyérame, alué ralámulika korule alué rió napurigá alé Rusaleni simela ramué ꞌyuga. ꞌLige ramueka oꞌtolia alué enomí alué ralámuli tabilé nígame ꞌyawa napurigá alué ralámuli ꞌla cheliera ꞌyámala alué Onorúgame, ꞌlige aminami napurigá alué ralámuli ꞌla machimela ramué ralámuli ꞌla semáriga guꞌirilio.
\v 20 ꞌLige ramueka ꞌwe aꞌlá sébali gateru alué raꞌíchali napurigá pe nujubapi kachi tabilé ꞌwesi che animela alué enomí gite, ꞌlige aminami napurigá ꞌwe aꞌlá sébali sebámala alué enomí alé Rusaleni.
\v 21 ꞌLige Onorúgame ꞌwe aꞌlá sébali machíguru alarigá nochalio ramué. ꞌLige ramueka najkiáguru napurigá alué ralámuli ꞌwe aꞌlá machimélachigó churigá ka ye nejkúrali.
\p
\v 22 ꞌLige ramueka julawa uché bilé rió alué oká rió ꞌyuga. Alué rió ꞌwe aꞌlá sébali olame ju napurigá najkí Onorúgame. Ramueka weꞌsá eteme niru alué rió ꞌwe aꞌlá sébali olachi. Alué rió ꞌwe ꞌla ꞌnata napurigá ꞌemi ꞌwe ꞌla sébali olamio alué enomí napubua.
\v 23 Ne boꞌné jula alué Tito, ꞌlige alué ralámuli Esukristo oyérame jena Maseronia jula alué uché jaré oká rió. Alué oká rió ꞌwe ꞌla sébali olame ju napu nulá Kristo.
\v 24 Pe rekó ꞌla niráwagó ꞌemi alué rió alemi eꞌyénachi. ꞌLige ramué ꞌla weꞌsá ruyeru alué rió ꞌemi ꞌwe aꞌká ralámuli ko. ꞌLige ramueka alekeri najkiá napurigá alué raꞌíchali ꞌla bijchiá nímala. ꞌLige aꞌkinana ku jeka sigá ꞌla ruimeli júkuru alué rió alarigá olárilige ꞌemi ralámulite alé. Ruyémili júkuru ralámuli jena ichúrimi mochígame, alué Esukristo oyérame ralámuli, ꞌwe ꞌla niraga etéliru.
\c 9
\p
\v 1 Neka tabilé uché aminabi osénili ye osilí ꞌemi ralámuli napurigá napubúmala enomí ꞌemi. Pe ye osilite ꞌla sébali nímala napurigá ꞌla sébali olámala ꞌemi.
\v 2 ꞌLige neka ꞌwe aꞌlá machí ꞌemi ralámuli ꞌwe aꞌlá welagá mochigo napurigá guꞌírimala ꞌemi uché jaré ralámuli. ꞌLige neka jena mochígame ralámuli ruyé alué raꞌíchali ꞌemi ꞌwe aꞌlá sébali nejkúrinilia mochigo. ꞌLige ꞌemi ralámuli napuꞌlige chojkile napubua alué enomí ꞌya bamí, ꞌlige alué ralámuli jena Maseronia mochígame akisá, amulí suwábaga alué ralámuli chojkílechigó napubua enomí.
\v 3 ꞌLige ne jula alemi alué bakiá rió ne gompaniérola napurigá ꞌemi ralámuli ꞌwe aꞌlá gatega mochímala alé sébachi alué bakiá rió. ꞌLige jena mochígame ralámuli ꞌwe aꞌlá ruyé ꞌemi ꞌwe aꞌlá napubua mochigo alué enomí napu oꞌtoboli ju alé Rusaleni. Neka tabilé ꞌyegánili.
\v 4 ꞌLige jaré ralámuli jena Maseronia ejperégame si simámili júkuru ramué ꞌyuga. ꞌLige ꞌemi ralámuli tabilé ꞌcho napubuga mochísaká alué enomí, ꞌliko ramué ꞌwe chijunáwili júkuru. ꞌLige ꞌemi ralámuli abiénachigó chijunámili júkuru.
\v 5 ꞌLige napurigá ta chijunámala ꞌemi napuꞌlige ramué sebasa alé napu ꞌemi mochí, ꞌlige alekeri jula ne ye bakiá rió alemi alué Esukristo oyérame, napurigá ꞌemi ralámuli ꞌwe aꞌlá gatega mochímala alué napu ekí oꞌtoboli ju alé Rusaleni anilichi. ꞌLige ramué ralámulika tabilé najkiá napurigá nejímala bilé ralámuli napugiti uché jaré ralámuli ꞌwe aꞌwágame tánichi, pe nejímala napu ekí ꞌla ikíroba nejía, ꞌlige ꞌla ꞌwe aꞌlá ganíliga nejímala.
\s Jena ruwimela churigá guꞌírilime ko  alué uché jaré ralámuli napu tabilé nígame ju
\p
\v 6 ꞌLige ꞌemi ralámuli ꞌla námaka akiboa ye raꞌíchali: Alué ralámuli pe uꞌkabi talí echágame ka, pe uꞌkabi ꞌwímala. Alué ralámuli weꞌká echágame ka, alueka abé weꞌká ꞌwímala. ꞌEmi ralámuli ꞌla weꞌká nejisa alué alé Rusaleni oꞌtowame, ꞌlige ꞌemi ralámuli weꞌká narémala ku pe aꞌkinana kachi.
\v 7 ꞌLige bilé rió nejínilisaká, ꞌlige alué rió sébali olámili júkuru, tabilé ꞌyegámili júkuru alué rió. ꞌLige tabiléchigo eꞌwérili júkó kaka, pe iligá ꞌla sébali oliame júkeꞌé ꞌnalina. Onorúgame ꞌwe ꞌla galéguru alué ralámuli napu ꞌwe aꞌlá ganíliga nejime ju, napu tabilé weꞌká ꞌnátaga nejime ju.
\v 8 ꞌLige Onorúgameka nejímili júkuru napu ekí tábiri resí laru, napugiti Onorúgameka nígame kame alué weꞌká eꞌkarúgame tábiri. ꞌLige alekeri alué Onorúgame ꞌwe semáriga nejímili júkuru alué eꞌkarúgame napu resí lalia ramué, ꞌlige ꞌemi ralámuli ꞌwe semáriga nochámili júkuru alué Onorúgame nejílala aꞌwalite.
\v 9 Aka alarigá anime júpaché alué Onorúgame nila rejcholi:
\q Alué rió ꞌwe semáriga guꞌírilekuru alué ralámuli tabilé nígame,
\q ꞌlige abé weꞌká ꞌyámala.
\q ꞌLige alekeri Onorúgame tabilé siné weꞌkawámala alué rió
\q ꞌwe ꞌla semáriga guꞌíriligo alué ralámuli tabilé nígame.\f + \fr 9:9 \ft Eꞌnesi Salmos 112:9. \f*
\m
\v 10 ꞌLige alekeri tabilé chérékuru rekó bilé rió weꞌká nejíe enomí alé Rusaleni oꞌtowame, napugiti Onorúgame ꞌwe aꞌlá aminabi ꞌyámili kame alué weꞌká enomí alué rió napurigá alué rió ꞌla aminabi ꞌyámala uché jaré ralámuli. Alarigá ju napurigá bilé rió echame guꞌíriniliga uché jaré ralámuli, Onorúgame abé weꞌká ꞌyámili ju talí, ꞌlige abé weꞌká rakémala alué echarúgame.
\v 11 Onorúgame ꞌwe aꞌlá aminabi ꞌyámala ꞌemi ralámuli abé weꞌká enomí ꞌlige aminabi aꞌwalí napurigá ꞌemi ꞌla aminabi nokísimala alué weꞌká ralámuli guꞌiria. ꞌLige suwábaga alué ꞌnátili ꞌwe semáriga maꞌchínamala. ꞌLige alué ralámulika alé Rusaleni mochígame waꞌlú cheliera ꞌyámala Onorúgame, napugiti semáriga guꞌíriligime ramué ralámuli.
\v 12 ꞌLige ye enomí napu nejí ꞌemi weꞌká ralámuli, weꞌká ralámuli ꞌwe semáriga narémala alué enomí. ꞌLige abiénachigó weꞌká ralámuli ꞌwe ꞌla nirámala Onorúgame.
\v 13 Alué ralámuli napu ye enomí narémili ju, cheliera ꞌyámili júkuru Onorúgame. Alué ralámuli alarigá ꞌla machimela ꞌemi ꞌwe ꞌla eꞌweme ko Onorúgame napurigá nulá Kristo. ꞌLige ꞌwe ꞌla niraga etémala Onorúgame napugiti ꞌwe ꞌla nejkúrigoriká ꞌemi ꞌla napubúligo alué enomí.
\v 14 ꞌLige alué ralámuli alarigá ꞌwe aꞌlá cheliera ꞌyámala Onorúgame napugiti Onorúgame ꞌyáligame alué ꞌnátili ꞌemi ralámuli alué Korinto ejperégame ꞌlige Onorúgame tánimala napurigá aminabi ꞌyámala alué aꞌwalí ꞌemi.
\v 15 Waꞌlú cheliera ꞌyámala Onorúgame napugiti asíriga waꞌlú guꞌírili nábole ꞌemi ralámuli. Onorúgameka pecha goblálome júkó rekó waꞌlú nejkurie. Ramueka tabilé nígame niru bilé raꞌíchali ꞌla najteme cheliera ꞌyalime Onorúgame. Ramueka pecha siné sebárirugó alué ꞌnátili.
\c 10
\s Jena ruwimela Páulo nulame ko Esukristo nila nochálilachi
\p
\v 1 Kristo ꞌwe aꞌlá kilí rió nile, Onorúgame aꞌwalila nígame nile. Nabí ꞌla ꞌnátaga ajtime nile guꞌírimia uché jaré ralámuli. ꞌLige neka abiénachigó alarigá nínili napurigá nile alué Kristo, alekeri ne ꞌla kilí eyénaguru. ꞌLige alué uché jaré ralámuli anime ju ne ꞌwe majalégame rió kará alué weꞌká ralámuli ꞌyuga. ꞌLige anime júkuru alué ralámuli, ne mejká asagáká ꞌwe aꞌwágame nulame osilí osame kará tabilé majaga. ꞌLige napuꞌlige ne aꞌbé asagáká, ꞌliko iꞌkilí ajtime kará ne, pe majá ajtime kará ne. ꞌLige alué raꞌíchalika tabilé peꞌtá bijchiá júkuru napurigá anime ju alué ralámuli.
\v 2 ꞌWe ꞌla ꞌnátaga mochiwa. Napuꞌlige simisá ne alemi ꞌemi eꞌnemia, tabilé cha nokiboa napurigá ne tabilé neꞌochámala ꞌemi. Tabilé alarigá naꞌtawa ne neꞌóchame ko pe apiépiri rió neraga. Neꞌóchame ju ne alué Onorúgame aꞌwalílate.
\v 3 Bijchiá júkuru ne apiépiri rió neraga ko, tabiléchigo neꞌóchagó ne napurigá apiépiri rió niraga.
\v 4 Napuꞌlige ne neꞌocha, tabiléchigo ralámuli aꞌwalílate neꞌógó ne, pe Onorúgame aꞌwalílate gite. Ramueka jena mochírukuru nakoa Remónisi si pe Onorúgame aꞌwalílate gite ka ꞌla neyúrowareké.
\v 5 Ye aꞌwalila gite ꞌla suwábaga umérome ju ne apiépiri tabilé ꞌla ꞌnátame rió ꞌyuga, alué napu sairúgame ju alué napu ramué benírilia Onorúgame nila raꞌíchali. Ramueka tánilia Kristo napurigá biꞌwémala aꞌpílipi ralámuli naꞌtálila napu chátiri ju ꞌlige napurigá ꞌla biꞌlepi ꞌnátaga mochímala.
\v 6 ꞌLige ramueka ꞌla ꞌnátaga mochírukuru napurigá neꞌochawa ramué alué ralámuli tabilé sébali olame napu Onorúgame nulá. ꞌEmi ꞌwe aꞌlá naꞌtásaká Onorúgame nila rejcholi, ꞌlige bilé rawé tabilé sébali olásaká, ramueka ꞌwe ꞌla eꞌnegá mochiwa ꞌemi.
\p
\v 7 ꞌLige ꞌemi ralámuli pe apiépiri rió neraga eteme ju ramué. ꞌEmi ralámuli ꞌla Kristo oyérame ka, ꞌla naꞌtawa ye: Aka ramué ralámuli Kristo oyérame nírupaché.
\v 8 Alué Waꞌlula Esukristo ꞌyáguru neꞌchí aꞌwalí napurigá guꞌírimala ne ꞌemi. Alueka pecha nejígó aꞌwalí napurigá ne ꞌemi resí olámala. Tabilé chijúniga ruwí ne.
\v 9 ꞌLige ꞌemi ralámuli tase mayewa ne osáo napurigá ne ꞌemi majárimala alué osilite, tase alarigá naꞌtawa ꞌemi.
\v 10 Jaré ralámuli anime ju alué osilí ꞌwe ená anigá osirúgime kará, alarigá osame kará ne, ꞌlige ne jena sebásaká, tabilé alarigá raꞌíchame kará ne, pe tabilé benegá raꞌíchame kará ne.
\v 11 Jaré ralámuli alarigá anime ju, tabiléchigo bijchiá júkó. ꞌLa sébali olame ju ne napurigá osá ne. Napurigá aní ne alé osilichi alarigá ꞌsime ju ne alé sebasa. Neka najkí napurigá ꞌemi ralámuli ꞌwe aꞌlá námaka mochímala ye raꞌíchali.
\p
\v 12 Ramueka tabilé alieri niru tase napurigá alué ralámuli ꞌwe gunaruga oyame ralámuli. Alué rió ꞌwe gunaruga oyame ka, pe ꞌnátame ju napurigá bilé rió loꞌí niraga. Alué rió alarigá lame ju: “Neka abé ꞌla júkeꞌé meꞌtigá alué uché jaré ralámuli.”
\v 13 Ramueka pe biꞌlepi ꞌnátili ꞌnátame niru Onorúgame ꞌyuga. ꞌLige boꞌné Onorúgame ꞌwe nejkúrime júkuru napurigá ramué ꞌwe aꞌlá machiboa pala ꞌla sébali oliao ramué. Onorúgame júlalekuru ramué alé Korinto napurigá ꞌemi beníriwa. Pe yecho raꞌichawa ramué.
\v 14 Uché jaré ralámuli tabilé che animela ꞌemi aꞌboi beníriga Onorúgame nila raꞌíchali. Napuꞌlige ramué sebaru alé napu ꞌemi ralámuli mochí, tabilé ꞌwesi ralámuli iꞌtigé alé napu beniame ju Onorúgame nila rejcholi.
\v 15 ꞌLa képá bilé rawé ꞌemi ꞌwe ꞌla Onorúgame oyérasaká, ꞌlige ꞌemi ꞌwe aꞌlá guꞌírimala ramué napurigá simawa aminá uché bilena gawichí napu tabilé siné akeme ju alué ralámuli Onorúgame nila raꞌíchali. Ramueka tabilé benírili Onorúgame nila raꞌíchali alué ralámuli napu ꞌma akeme ju Onorúgame nila raꞌíchali.
\v 16 ꞌLige alarigá ꞌemi ralámuli ꞌwe aꞌlá guꞌírimala ramué ralámuli alé uché bilena simálichi uché jaré ralámuli benírimia. Tabilé beníriwa ramué napu uché jaré ꞌma beníriliru.
\p
\v 17-18 ꞌLige alué rió boꞌnepi inósaká, ꞌlige alarigaka tabilé ꞌla ju. Boꞌné Onorúgame ruisáká ꞌwe aꞌlá sébali rió ko, ꞌliko ꞌla ju. Bilé rió raꞌichánalesaká uché jaré ralámuli ꞌyuga churigá nejkúrime ko Onorúgame, aꞌlá ju. Ramué aꞌboika tabilé regá aniboa: “Ramueka ꞌwe ejebénegame niru.” Iligá ꞌwe aꞌlá guꞌíriwa raꞌíchali ruyea uché jaré ralámuli. Onorúgame aꞌwalila gite benírilia ramué. Ramué ꞌoni tabilé gainawa bilé ꞌnátili ꞌnata.
\c 11
\s Jena ruwimela Páulo raꞌíchaligo sairúgame niraga alué ralámuli ꞌyuga  napu tabilé aꞌlá benírime ju Onorúgame nila raꞌíchali
\p
\v 1 Pe rekó eꞌkáwagó neꞌchí ye raꞌíchali ruwichi ne, taꞌmé ꞌwe aꞌlá képá ye raꞌíchali kaka napu ne ruimeli ju. Pe gunaruga raꞌichálime ju ye raꞌíchali.\f + \fr 11:1 \ft Alué Páulo raꞌichámorí napurigá bilé rió loꞌí noli chuꞌachika ronobóchaga. \f* Neka alarigá raꞌichámala napugiti ꞌemi alarigá raꞌíchame kame, napurigá ꞌemi ꞌwe aꞌlá ꞌnátaga gepúmala ye raꞌíchali.
\v 2 ꞌLige ne bajchá ye raꞌíchali ruwimela. Onorúgame nejile ye ꞌnátili napurigá ne ꞌla galémala ꞌemi. Napuꞌlige sebasa ramué alé napu ajtí Kristo, neka ꞌemi ꞌyámolá alué Kristo ꞌla sébali ꞌla biꞌwígame. Alarigá anéturu ne Esukristo ꞌya bajchabé rawé. Napurigá ꞌyánili bilé oꞌnó boꞌné malala alué reꞌmalí napurigá newímala alué iwé si ꞌwe ꞌla biꞌwígame sulégame, alarigá ꞌyánili ne ꞌemi Esukristo. Tabilé najkí ne napurigá uché bilé ꞌnátili beniboa. Abiénachigó najkí ne napurigá biꞌwígame alawégame niwa.
\v 3 ꞌLige ꞌemi ralámuli ꞌla machíleké ꞌyégiliga alué Eba anilime mukí ꞌya, alué napu Arani ꞌyula nílige. ꞌLige neka alekeri majá ꞌemi ralámuli, siné kachi aꞌchigóriga ikisábá ꞌemi ralámuli. ꞌLige ꞌemi ralámuli bilé rawé taꞌmé ꞌla ꞌnátaga mochisa, ꞌlige alué Remónisika nasibúmala ꞌemi ralámuli. ꞌLige alué Remónisi ꞌma seꞌnú ꞌnátili ꞌyámala ꞌemi ralámuli. Tabilé ꞌla biꞌlepi naꞌtámala ꞌemi Kristo ꞌyuga.
\v 4 ꞌLige ꞌemi ralámuli tabilé ꞌla ꞌnátaga mochinti júkuru. Pe apiépiri ralámuli raꞌichálila ꞌwe yati bijchíginti júkuru ꞌemi. ꞌLige bilé rió ruisá regá: “Krístoka tabilé alarigá ju, tase napurigá ruwime ju Páulo”, anisá, ꞌlige ꞌemi ralámuli yati bijchígame júkuru. ꞌLige bilé rió anisá uché bilé alawá nerúgará, ꞌlige ꞌémika ralámuli yati beninálime júkuru alué ꞌnátili. Pecha anime júkó ꞌemi ralámuli: “Tabilé ꞌla ju alué raꞌíchali”, tabilé anime ju ꞌemi. ꞌLige bilé rió anisá alué Esukristo tabilé aꞌkabámana jáwame ju, ꞌémika yati bijchígame ju.
\v 5 ꞌEmi ꞌla akisáká alué ralámuli ꞌwe riólame ko napurigá eꞌwélala, napuꞌlige ne ruwichi abiénachigó aꞌlá gepútékuru. Ne abé ꞌla machí meꞌtigá alué ralámuli.
\v 6 Neka taꞌmé ꞌla raꞌíchame júkuru alé weꞌká riógachi, neka ꞌwéchigo ꞌla machime kéréko Onorúgame raꞌichálila, weꞌká beniri ne ꞌemi. ꞌLige ꞌemi ralámuli ꞌla machíleké alarigá ko ne. Aka ne weꞌsá ruyéché ꞌemi ralámuli ye raꞌíchali.
\p
\v 7 ꞌLige ne peka siné rawé goblálome júkuru ꞌemi ralámuli alué raꞌíchali beníriga. ¿Oꞌwéchala resitiri ju tabilé goblálilia? Neka tabilé benírime ju napurigá ne najtékame nímala. Neka pe najkí napurigá ꞌemi ꞌwe najtékame nímala.
\v 8 ꞌLige neꞌchí ꞌwe guꞌiri alué ralámuli Esukristo oyérame alé ichúrimi mochígame. Enomí ꞌwe nejime ke alué ralámuli, ꞌlige neka nareme kéturu alué enomí alué ralámuli nejichi napurigá ne ꞌla aminabi einámala beniria alé Korinto asagá.
\v 9 ꞌLige ne alé ꞌemi ralámuli ꞌyuga asagá, enomí resí lame ke ne iꞌsínimi, ꞌlige neka tabiléchigo siné tániko ꞌemi ralámuli enomí, neka ꞌláchigo aꞌpílime kame alué enomí alué ralámuli alé Maseronia mochígamete. Alué ralámuli alé Maseronia mochígame nokame ke alué enomí aꞌpá alé Korinto, ꞌlige alué enomí nareme ke ne. Ne boꞌneka ꞌwe aꞌlá ꞌnátame ke ne ꞌemi ralámuli ꞌyuga. ꞌLige neka aba ꞌwe inánili alué raꞌíchali beniria, ꞌlige neka tabilé nejkumega benírie ne ꞌemi.
\v 10 Neka ꞌla bijchiá aní ye raꞌíchali. Aka alué Kristo ꞌla bijchiá raꞌíchame nílekuru. ꞌLige ne alieri rió júkuruchigó. Biꞌlepi ꞌnátame ju ne alué Esukristo ꞌyuga. Neka tabilé siné narémala alué enomí alé waꞌlú ejiro Akaya anilichi mochígame ralámuli nejílala.
\v 11 ¿Chonigá alarigá raꞌicha ne? ¿Mayé ꞌemi ne tabilé galeo ꞌemi? Onorúgame ꞌla sébali machíguru ꞌwe aꞌlá galeo ne ꞌemi.
\p
\v 12 Alué ralámuli tabilé ꞌla benírime ye raꞌíchali, ꞌwe gunaruga raꞌíchame ju, ꞌlige alué ralámulika najkí napurigá ramué narémala alué enomí napu nejí ꞌemi ralámuli napurigá nareme ju aꞌboi. Ramueka tabilé nakiáguru alarigá. ꞌLige ramueka ꞌwe aꞌká rió nírukeꞌé tase napurigá alué ralámuli.
\v 13 ꞌLige alué ralámuli raꞌíchali benírame anime ju: “Kristo júlale ramué napurigá ramué nulame niwa aleké nila nóchali”, anime ju alué ralámuli. ꞌLige alué ralámulika tabilé peꞌtá bijchiá anime júkeꞌé alarigá alaniá, pe ꞌemi enomí bujéniliga anime ju alué ralámuli alaniá.
\v 14 ꞌLige alué Satanasi anilime ꞌwe ꞌyégame júchigó. Anime ju alué Satanasi: “Ne ju alué santo ánjeli, alué Onorúgame guꞌírame ju ne”, anime ju alué Satanasi. ꞌLige alué ralámuli alué Satanasi oyérame, ¿ꞌlacha ta ꞌyégame ralámuli nímalachigó?
\v 15 ꞌLige ramueka ꞌla machiáa alanigá eꞌyéname ko alué ralámuli. Anime ju: “Ramueka ꞌwe semáriga oyérame niru alué Onorúgame. Ramueka Onorúgame gompaniérola niru”, anime ju alué ralámuli. ꞌLige rekó alarigá raꞌíchaga oyame ke alué ralámuli, abirigá alé injiérnochi simámala alué ralámuli suwisá, pecha ꞌla biꞌígame alawégame ke aniáwé alué ralámuli. ꞌLige alué boꞌné alé Onorúgame alarigá olámili júkuru alué ralámuli, napugiti alué aꞌboi ralámuli alarigá nokáligame. Alekeri alué bowé mélekuru alué ralámuli.
\s Jena ruwimela Páulo ꞌwe resí ikíligo
\p
\v 16 Tabilé ganílime ju ne alarigá raꞌicha. Raꞌicha ne napurigá loꞌí neraga, tabiléchigo loꞌí júkó ne. ꞌLige ꞌemi ralámuli ꞌwe gepume júkuru neꞌchí napuꞌlige napurigá bilé rió loꞌí alarigá raꞌíchachi ne. ꞌLige ne alekeri alarigá raꞌichámala, napurigá ꞌemi ralámuli ꞌwe aꞌlá gepúmala ye raꞌíchali napu ne ruimeli ju.
\v 17 ꞌLige alué Waꞌlula Esukristo tabilé siné raꞌíchale napurigá bilé rió loꞌí, neka raꞌichámili júkuru napurigá bilé rió loꞌí napurigá ꞌemi ꞌwe aꞌlá gepúmala ye raꞌíchali, alarigá raꞌichálichi ꞌwe aꞌlá gepume kame ꞌemi ralámuli.
\v 18 ꞌLige alué tabilé Esukristo oyérame ralámuli, alarigá raꞌíchame júkuru napurigá bilé rió loꞌí neraga. ꞌLige ꞌemi ralámuli ꞌwe aꞌlá gepume júkuru alué raꞌíchali. ꞌLige alekeri alarigá raꞌichama olá ne.
\v 19 ꞌLige ꞌemi ralámuli ꞌwe semati raꞌíchali benió olá alué alieti raꞌíchali akigá, ꞌlige ꞌwe aꞌlá ejebénigame kólá ꞌemi.
\v 20 ꞌLige ꞌemi ralámuli pe apiépiri ralámuli ꞌwe eꞌweme júkuru. ꞌÉmika yati eꞌwame júkuru napu chíbiriga nulalíe. Rekó napurigá bilé ajágame alarigá nulalíe, yati eꞌwame júkuru ꞌemi. ꞌLige ꞌemi ralámuli tabilé chéláme júkuru rekó reꞌwániga bujilíe alué napu nígame ju ꞌemi. ꞌLige abiena ꞌwe galeme júkuru ꞌemi alué rió rekó iꞌnílime kachi. ꞌLige aminami tabilé chéláme júkuru ꞌemi ralámuli napurigá bilé bulito alarigá nochárilie. ꞌLige ꞌemi ꞌwe aꞌlá nirame ju alué ralámuli napurigá eꞌwélala neraga rekó napuchibi nokame kachi. Rekó wejpisokie ꞌemi alué gujsite, ꞌémika abiena ꞌwe ꞌla galeme júkuru alué ralámuli.
\v 21 Neka pecha alarigá olame júkó ꞌemi. ¿ꞌÉmika najkí napurigá wejpisópua? ¿Najkiáchalá napurigá bujewa enomí? ¿Najkiáchalá napurigá ꞌwe riólaga raꞌichawa? ꞌLige ꞌemi ralámuli uché rajpé abé aꞌká mayele ke alué ralámuli meꞌtagá ramué. Bilé loꞌí niraga raꞌicha ne, napurigá ꞌla naꞌtawa.
\p ꞌLige ne alarigá raꞌichámala napurigá bilé rió loꞌí napurigá ꞌla machimea ꞌemi tabilé ꞌla ꞌnátame ko.
\v 22 ¿Ebreo ralámuli ju alué ꞌyégame ralámuli? Néchigó ebreo ju. ¿Israelita ralámuli ju alué ꞌyégame ralámuli? Néchigo israelita ju, alué ralámuli napu Onorúgame rojánale napurigá Onorúgame oyérame nímala. ¿Abraámi rijimala ju alué ꞌyégame ralámuli? Néchigo Abraámi rijimala júchigó.\f + \fr 11:22 \ft Abraámi bajchá oꞌwísigime nile alué ralámuli ebreo ꞌyuga. \f*
\v 23 ¿ꞌLa Kristo oyérame ju alué ralámuli? Neka abé rajpé ꞌla Kristo oyérame ju. Neka pe bilé rió loꞌí neraga raꞌíchame ju, alué raꞌíchali aꞌláchigo ꞌla bijchiá kéréko. Neka abéchigo aꞌwágame nóchagó, ꞌlige abéchigo mejkami eyénagó alué Onorúgame raꞌichálila beníriga. ꞌLige neka abé weꞌsá galírale bajchilígó pe Onorúgame nila raꞌíchali beníriga eyénachi ne. ꞌLige aminami abé aꞌwágame wejpisókiame júkuru ne. ꞌLige weꞌsá amulí mukié ne.
\v 24 ꞌLige malígisa chaꞌpirúgame ju ne alué ralámuli alé Israeli mochígamete, alué ralámuli tabilé Esukristo oyérame. ꞌLige napu ikisá chaꞌpisá, baisá makué miná gi makuesa wejpirú ne alué wiꞌchí siꞌpinárigamete.
\v 25 Baisá wejperú ne alué gusite. Sinéchigo amulí meꞌlirú ne rejtete bajsibuga. Siné rawé napu ne asagá enale alué barko alé waꞌlú baꞌwichí, ꞌma bokuí kiba, ꞌlige ne alé baꞌwichí rejpí peꞌtá alué rabileta chaꞌpigá, bilé rukó ꞌlige bilé rawé. ꞌLige sinéchigo abiénachigó ꞌma bokuí kiba barko alé waꞌlú baꞌwichí enagá. ꞌLige uchéchigo siné enegé ne alé bárkochi abiénachigó ꞌma bokuí kiba alé waꞌlú baꞌwichí.
\v 26 Neka ichúrimi eyéname ke, iꞌsínimi alé bakóchimi simírome ke ne, iꞌsínimi amulí siꞌlime ke ne. Iꞌsínimi ꞌwe majame ke ne alué chigórigame ralámuli napuꞌlige alemi bowésiga enárigichi. ꞌLige iꞌsínimi alué ralámuli Israeli mochígame meꞌlinálime kéturu neꞌchí. ꞌLige iꞌsínimi alué ralámuli tabilé Israeli mochígame abiénachigó meꞌlinálime kéturu neꞌchí. ꞌLige ne alé weꞌká riógichi ajtígichi, ꞌlige iꞌsínimi alué ralámuli ꞌwe chaꞌpinálime kéturu neꞌchí. ꞌLige alé jami eyénachi, ꞌwe majame ke ne alué ajágame jobátigame. ꞌLige napuꞌlige ne eyénachi alé bárkochi iꞌsínimi amulí chigólime ke ne. Iꞌsínimi amulí meꞌliame ke ne alué ralámulite napu Onorúgame oyérame korí, tabiléchigo Onorúgame oyérame ke anile ko.
\v 27 ꞌLige neka nóchame kéturu ꞌla iwégame tabilé resíbika. Amulí tabilé anáchame kéturu ne iꞌsínimi. ꞌLige iꞌsínimi ꞌla iwégame gojchináliga oyame kéturu ne. ꞌLige aminami ꞌla iwégame ejelime kéturu ne balámaka. Iꞌsínimi tabilé goꞌgá ꞌsime kéturu ne nocha. ꞌLige jarénami ꞌla iwégame ukíwame kéturu ne, pecha iꞌtégame ka alué gemá napurigá gemaboa.
\p
\v 28 ꞌLige neka ꞌwe resí níliame kéturu. ꞌLige aminabi uché rajpé weꞌká ꞌnátaga ajtime ke ne alué ralámuli alué Esukristo oyérame ralámuli ꞌyuga, alué napu napuíme ju alué Esukristo raꞌichálila benimea.
\v 29 ꞌLige alué ralámuli Esukristo oyérame resí ikichi, ꞌlige ne ꞌwe cháláme júturu napurigá ne boꞌné resí ikime niraga. ꞌLige alué ralámuli Esukristo oyérame chibi ꞌsisa, ꞌlige ne ꞌwe chijúname ju napurigá ne boꞌné chibi ꞌsíkame niraga.
\v 30 Neka pecha che anígó ꞌwe ꞌla ralámuli ko ne ꞌlige ꞌwe ꞌla anáchame. Neka ꞌwe resítiri ju, tabilé aꞌwalí nígame ju ne. Neka pe aníguru napurigá ꞌla machiboa Onorúgame biꞌlepi ꞌwe aꞌwágame ju. Alué simíguru neꞌchí guꞌíria.
\v 31 Onorúgame júkuru alué Waꞌlula Esukristo Oꞌnola, ꞌlige alué ralámuli Onorúgame oyérame nabí cheliera ꞌyámili ju Onorúgame. ꞌLige ye raꞌíchali napu ne ruwí, ꞌla bijchiá júkuru. Onorúgame ꞌla machíguru ne ꞌla bijchiá raꞌicho.
\v 32 Ne ruwimela churigá guꞌíriliga Onorúgame neꞌchí alé Ramasko anilichi weꞌká riógachi napu tegótigame ju noligá ꞌwe reꞌpá ilígame. Alué rió abé waꞌlula Arétasi anilime rió alé Ramáskochi ajchale bilé rió selígame abé uꞌtabela. ꞌLige alué rió selígame uꞌtabela weꞌká sontalo júlale neꞌchí chaꞌpínaliga. Bochígimi noligá mochí alé weꞌká riógichi napurigá ta maꞌchínamala ne.
\v 33 ꞌLige ne ꞌwe majá ꞌyamía alué sontálote, ꞌlige ꞌla naꞌtemáturu ne alé weꞌká riógichi ajtígichi, ꞌlige maꞌchí pátú ne alé waꞌlú goꞌlechi tegoli ꞌyétigichi. Alé reꞌpá alé uꞌtá ewágichi alégana maꞌchí pátú ne alué waꞌlú atabechi ajchagá oꞌwiga reꞌkiburu ne alé. ꞌLige alarigá alué Onorúgame ꞌwe aꞌlá semáriga guꞌírikuru neꞌchí, ꞌlige alarigá tabilé chaꞌpirú ne. 
\c 12
\s Jena ruwimela Páulo ruwíligo napu Onorúgame etéraligo
\p
\v 1 ꞌLige neka chijuna ruyá napu ikílige ne. ꞌLige siné kachi pecha nejkúrimeréko ye raꞌíchali ꞌemi ralámuli níriga. ꞌLige neka abirigá ruimeli júkuru iligá tabilé rióliga. Ruimé ne napu Onorúgame etérale neꞌchí.
\v 2 Neka machí bilé rió Kristo oyérame simíliga alé rewagachi napu Onorúgame ajtí, ꞌya nile makué naó bamí. ꞌLige pala ꞌla ajagá simíliga alué rió o pe alué alawálacho simílegeré Boꞌné Onorúgameka aꞌlá sébali machíleké. Neka tabilé ꞌla machí.
\v 3-4 ꞌLige neka ꞌla machí alué ꞌla sébaligo alé napu ajtí Onorúgame, alé napu ꞌwe semárikáchi ju. Pe alué boꞌné Onorúgameka ꞌla machíleké alarigá moyénaliga alué rió alé rewagachi. ꞌLige alé rewagachi ruyéleru alué rió bilé raꞌíchali. ꞌLige Onorúgame tabilé lisensia ꞌyale napurigá ruwimela alué rió alué raꞌíchali napu akele alé rewagachi. Ne kéturu alué rió napu simile alé ꞌpa rewagachi.
\v 5 Uché bilé rió nísaká, ꞌlige neka ꞌla raꞌichámala ke napu ikile, nobi tabiléchigo uché bilé rió nílekó, pe ne kéturu. Alekeri tabilé uché rajpé raꞌichámala ne, neka tabilé gunarúgame nínili. Onorúgame ꞌsile neꞌchí oꞌtoa. Neka pecha aꞌwalí nígame ka.
\v 6 Ne raꞌichásaká napu ikile ne ꞌpa rewagachi, ꞌla bijchiá nímala ke. Rekó regá raꞌiche, pecha loꞌí kéréko ne. Tabiléchigo aminabi animélagó ne. Ralámuli pecha machígó churigá ikíliga ne alé reꞌpá rewagachi, pecha machígó ne ꞌyega aniá. Alekeri abé aꞌlá ju tabilé raꞌichalia.
\p
\v 7 ꞌLige aminami boꞌné Onorúgame lisensia ꞌyale alué Satanasi napurigá nejkumémala neꞌchí ꞌyuga. ꞌLige ne rió alarigá ꞌla tabilé gunarume nímala alué Satanasi nejkumesa. ꞌLige ne tajché olásigaká alué Satanásite, ꞌlige ꞌwe rasigá gunarume nímala ne, ne ꞌwe semati etérume kóriká Onorúgamete. Alekeri Onorúgame lisensia ꞌyale napurigá alué Satanasi seꞌwiná olámala neꞌchí napurigá tabilé gunarume nímala ne.
\v 8 ꞌLige ne baisá tani alué Waꞌlula Esukristo napurigá bujémala alué napu neꞌchí resí olale alué Satanasi,
\v 9 ꞌlige ané neꞌchí Esukristo: “Ne aꞌwalila ꞌwe ꞌla ju, aluete ꞌwe ꞌla anachawa. ꞌWe ꞌla maꞌchígime nérékuru napuꞌlige ne guꞌírichi alué bilé ralámuli ꞌwe resítiri.” Alekeri ꞌwe ꞌla ganíliga ajtí ne rekó ne chibi ikié, ꞌla sébali néré Kristo nejkúrime ko napurigá ꞌla anachawa.
\v 10 ꞌLige ne ꞌwe aꞌlá raꞌsálagá ajtí rekó ꞌwe resí ikié ne, alué Esukristo uché rajpé abé aꞌlá semáriga guꞌírame ju neꞌchí. ꞌLige ne iꞌsínimi ꞌwe rasigá resí ikime ju, tabilé chérigá neyúsisa ꞌínili. ꞌLige iꞌsínimi alué ralámuli neꞌchí meꞌlinálime júkuru alué Esukristo raꞌichálila ruigá eyénachi ne. Iꞌsínimi ꞌla iwégame resíriga oyame ju ne, tabilé chérigá neyúsisaká ꞌínili. ꞌLige neka tabilé bilé aꞌwalí nígame júkuru napurigá neyúsimala ne alé. ꞌLige neka abirigáchigo ꞌla neyúsime júkuru napurigá bilé rió waꞌlú aꞌwalí nígame niraga, ꞌlige pe Onorúgame aꞌwalila gite ꞌla neyúsime júkuru ne.
\s Jena ruwimela weꞌká ꞌnata asáligo Páulo choniká mochigo  alué Onorúgame oyérame ralámuli alé Korinto mochígame
\p
\v 11 Pe napurigá bilé rió loꞌí niraga raꞌicha ne, alarigá raꞌíchame ju ne napurigá ꞌla akimela ꞌemi. ꞌÉmika ꞌwe ꞌla semáriga raꞌíchame ju alué chátiri ralámuli ꞌyuga. ꞌLa raꞌichátékuru neꞌchí olagá rekó pe uꞌtabela ke ne, napugiti neka abé najtékame raꞌíchame kame meꞌtigá alué ralámuli napu mayeme ju eꞌwélala ko Krístote julárigame.
\v 12 Onorúgame ꞌyale neꞌchí alué aꞌwalí napurigá ralámuli saꞌwámala ne napuꞌlige ne ꞌemi ꞌyuga ajtigé. Abiénachigó waꞌlú aꞌwalí ꞌyaru ne Onorúgamete napurigá ꞌla anachámala ne napuꞌlige ꞌwe resí oliachi ne. Alarigá nejkúrile Onorúgame napurigá ꞌla machigá mochímala ꞌemi Krístote julárigame ko ne.
\v 13 Neka tabilé naré alué enomí napu neꞌchí ꞌyámoríle ꞌemi. Neka pe naréturu alué uché jaré Onorúgame oyérame ralámuli nejílala. Tabilé ꞌla nísaká alué ꞌemi nila enomí naregía, ꞌliko eꞌkáibogó ne. Neka tabilé chibi ꞌsíliga mayé ne. ꞌÉmika pe abisibi najtékame ju napurigá alué uché jaré ralámuli.
\p
\v 14 ꞌLige neka uchéchigo ꞌma sébali gatega ajtíkuru alemi simea ne napu ꞌemi ralámuli mochí. ꞌMa baisá nímala ne alemi simiá. ꞌLige ne alé uché sebasa, neka tabilé najkí napurigá ꞌemi ralámuli nejímala enomí, iligá neka najkí ꞌnalina napurigá ꞌemi ralámuli ꞌla biꞌlepi ꞌnátaga mochímala alué Esukristo naꞌtálilacho. Alué enomika tabilé najkí ne. ꞌLige neka napurigá bilé ꞌkuchi oꞌnola alarigá ju. Bilé oꞌnoka ꞌyame ju goꞌame alué ꞌkuchi. ꞌKuchi pecha nóchame ka napurigá ꞌyame goꞌame oꞌnola.
\v 15 Siné kachi resí lásiga ka ꞌemi, neka abaꞌlá nejímala suwábaga alué napu ekí ni ne. ꞌLige neka weꞌká rawé nochámala ꞌemi ralámuli guꞌíriga siné kachi resí lásiga ka. Ta cheri káwé ne mukusáká ꞌemi guꞌíriga. Neka abé galesa ꞌemi ralámuli, ꞌlige ꞌemi abé ꞌla galémili júkuru neꞌchí, nobi taꞌméchigo ꞌla alarigá galeme káréko ꞌemi neꞌchí.
\p
\v 16 Neka pecha nejkumégó alé, nobi jaréchigo anígó pe ꞌyégiga olá ne. Tabilé bijchiá ju.
\v 17 Tasemi jula ne bujéniliga enomí.
\v 18 Ne júleturu Tito uchéchigo bilé gompaniero ꞌyúriga napu ꞌemi ꞌla machime ju. ¿Pe ꞌyégile Tito ꞌemi ꞌyuga? Tabilé ꞌyégile. Alué Tito ꞌemi guꞌírile napurigá ne. Tabilé tábiri bujélikó. Alué ꞌlige néchigó Onorúgame Alawala ajchágame niru sulachí. Biꞌlepi ꞌnátame nírukuru. Ramué okaka Kristo oyérame nírukuru.
\p
\v 19 ꞌLige siné kachi ꞌemi mayéréko ramué pe alarigá raꞌíchame ko pe napurigá ꞌemi ꞌwe aꞌká ralámuli. Ramueka Esukristo oyérame niru, ꞌlige Onorúgame ꞌwe aꞌlá repúguru ramué napurigá ramué tabilé ꞌyega raꞌichawa. ꞌLige ramué ꞌwe aꞌlá galelía ꞌemi ralámuli. Ramueka benírilia ꞌemi napurigá ꞌwe aꞌlá benimela Onorúgame nila raꞌíchali, ꞌlige ꞌemi ralámuli ꞌla alarigá ꞌla aꞌwágame sulégame nímala.
\v 20 Weꞌká ꞌnata ajtí ne, ꞌlige ne alé Korinto sebasa, machimela ne pala ꞌla sébali oláliga ꞌemi Onorúgame ꞌyuga. ꞌÉmika tabilé ganíliga etémala neꞌchí napugiti neka ꞌemi gastigárimala ta sébali olásaká Onorúgame nila raꞌíchali. Siné kachi napuꞌlige ne alé sebasa jaré ꞌemi ꞌwe cha aniá mochímala, ꞌlige jaréchigo ꞌwe najkuelia mochímala uché jaré nóchame etega, jaré ꞌwe yati naꞌáumala ꞌlige jaré ralámuli weꞌká ka napuísa ꞌwe bochí aniá mochímala, pe uché jaré neꞌochia, ꞌwe ganílime ju uché jaré ralámuli neꞌóchaga pe tabilé akériga alué ralámuli, ꞌlige jaré ꞌwe riólame ju, ꞌwe jebénigame korime ju, ꞌlige weꞌká ka napuísa aꞌbopi raꞌíchame ju tabilé niraga uché jaré ralámuli.
\v 21 Onorúgame boꞌné ꞌla machírimala ne aliena iꞌnílime ko ꞌemi. ꞌLiko ꞌwe chijúnaga rejpímala ne, ꞌlige nalámala ne alué weꞌká ralámuli weꞌká rawé ꞌwe iꞌníliga eꞌyénachi alué weꞌká ralámuli cha nokogá, ꞌlige tabilé ku aꞌkabámana ꞌnátame ju alué ralámuli. Tabilé aꞌreme ju weꞌká umugí ꞌyuga okoa, ꞌlige tabilé siné táame nile bilé eꞌkali, pecha nirame níliga Onorúgame nulalila.
\c 13
\s Jena ruwimela Páulo uchéchigo siné juláligo  napurigá ꞌla gatémala alué ralámuli ꞌyuga
\p
\v 1 Neka ꞌma osá simíkuru alé ꞌemi ejperélachi, weꞌká ralámuli etéguru ꞌemi ꞌwe cha noká mochigo. Onorúgame raꞌichálila ꞌya nerúgame aní pecha gastigárilime júkó bilé rió ta iꞌtélasaká oká restigo o bakiá ma,
\v 2 ꞌlige ne ꞌwe aꞌlá machíguru ꞌemi ralámuli alarigá ko, weꞌká ralámuli etiáguru ꞌemi ꞌwe iꞌníliga eꞌyénachi, ꞌlige uché simigá ne alé, ꞌma ꞌla gatémala ne ꞌemi ꞌyuga alué tabilé ꞌla ꞌnátili. Neka ꞌya ꞌla aniéturu napurigá ꞌla gatega mochiwa. Jípeko uchéchigo siné nábola ne ye osilí. Napuꞌlige ne alé sebasa, ꞌwe aꞌwágame gastigárimala ne ꞌemi napu ꞌwe ꞌya ꞌwe cha nokogá eꞌyénilige ꞌemi.
\v 3 ꞌLige ꞌemi ꞌla machimela alué Kristo nuleo neꞌchí. Gateme ne ꞌemi ꞌyuga napurigá Kristo niraga. Alueka pecha najsíname júkó gatega ꞌemi ꞌyuga. Abéchigo aꞌwágame gateme júkuru ꞌemi ꞌyuga.
\v 4 Bijchiá júkuru alarigá aꞌréligo napuꞌlige gulusichi ujchagá meꞌlíliru napurigá tabilé aꞌwágame niraga, nobi napuꞌlige ꞌma ku ajánasa, ꞌliko ꞌla maꞌchígime nérékuru waꞌlú aꞌwalí nígame níligo. Ramué abiénachigó tabilé aꞌwalí nígame kárékuru, nobi ramueka waꞌlú aꞌwalí nígame niru ko sulachí Onorúgame nila aꞌwalila, ꞌlige alué aꞌwalila gite guꞌíriliguru ramué ꞌemi.
\p
\v 5 ꞌLige ꞌemi ralámuli ꞌwe ꞌla naꞌtawa pala ꞌla bijchiá Onorúgame oyérame ka ꞌemi. ꞌLige ꞌémika aníguru ꞌla bijchiá Kristo Esusi oyérame ko. Pala ꞌla bijchiá ka, rukiboa ꞌemi aꞌbopi. ꞌLige ꞌla bijchígime nísaká ꞌemi Onorúgame nila rejcholi, ¿tabilé machí ꞌemi ralámuli alé sulálachi ajtigó bejtega alué Kristo Esusi? Alarigá júkuru ꞌemi ralámuli ꞌla biꞌlepi ꞌnátaga ejperégame nísaká alué Esukristo ꞌyuga.
\v 6 ꞌEmi ꞌla biꞌlepi ꞌnátaga mochísaká Esukristo ꞌyuga ꞌliko abiénachigó ꞌla machimela neka biꞌlepi ꞌnátame ka Esukristo ꞌyuga.
\v 7 ꞌLige ramué ralámulika tániwa Onorúgame napurigá alué Onorúgame ꞌwe aꞌlá semáriga guꞌírimala ꞌemi, napurigá ꞌemi tabilé siné resiti naꞌtámala. Neka tabilé chélá rekó tabilé niraga etuwíe neꞌchí. Neka iligá najkí napurigá ꞌemi ralámuli ꞌwe aꞌká nímala Onorúgame ꞌyuga. Rekó ꞌémika mayé ramué tabilé sébali olame ko, abé ꞌla ju ꞌemi ꞌwe aꞌká ralámuli nímala.
\v 8 Ramueka tabilé aniboa ꞌwe aꞌlá nocharu ramué o tabilé ꞌla nocharu ramué, tase aniboa ramué. Ramueka ꞌwe aꞌlá sébali oꞌwé eꞌinaru tabilé chérigá ꞌyégiwa Onorúgame. Ramueka ꞌwe aꞌlá sébali bijchiga ruwá.
\v 9 Napuꞌlige ne chibi ꞌsika einásaká, pe boꞌné Onorúgame ꞌla maꞌchí pame ju neꞌchí, ꞌlige ꞌwe ꞌla ganíliga ajtí ne. ꞌÉmika ye etega abé aꞌlá niraga etémala Onorúgame ꞌlige abé ꞌla narémala Onorúgame aꞌwalila. Ramueka ꞌwe tánilia Onorúgame napurigá ꞌemi ꞌwe ꞌla sébali olame nímala.
\v 10 Tabilé gastigárinili ne ꞌemi, aꞌbopi ku naꞌtáwaguru. Alekeri osé ne ꞌemi, napurigá ꞌma gatega mochiwa, ne taꞌchó sébachi alé. Ta gatésaká ꞌemi ꞌliko gastigárimala ne ꞌemi Esukristo aꞌwalila gite. Onorúgameka pecha nejí ko alué aꞌwalí napurigá ne resí olámala ꞌemi. Alueka nejíkuru napurigá guꞌírimala ne ꞌemi napurigá ꞌla sébali olame nímala ꞌemi.
\b 
\p
\v 11 ꞌEmi ralámuli Esukristo oyérame, pe ikipi képá ye raꞌíchali, pe ikipi raꞌíchali ruimé ne, ꞌwe aꞌká ralámuli nisa ꞌla képá ꞌemi. ꞌLa oilawa, ꞌlige ꞌla biꞌlepi ꞌnátaga nokísiwa oꞌmaka ꞌla nakúriga nokísiwa. Alarigá ꞌla képá. Onorúgame júkuru ꞌwe galeme ramué, ꞌlige nejime ju bilé iwérali napurigá tabilé weꞌká ꞌnátaga mochiwa, tabilé chélagá, tabilé seweka, ꞌlige tabilé majaga.
\v 12 ꞌLige ꞌemi ralámuli ꞌwe aꞌlá niraga repórime niwa ꞌemi aꞌbopi.
\v 13 Alué ralámuli alué Esukristo oyérame jena mochígame napu ne ajtí, alué suwábaga waꞌlú reporali nábola.
\p
\v 14 ꞌEmi ralámuli ꞌwe aꞌlá semáriga niraga naresa ꞌla képá alué napu nejí Waꞌlula Esukristo, alué napu ꞌpa rewagachi ajtí. ꞌWe semáriga naresa ꞌla képá ꞌemi ralámuli alué ganílili napu Onorúgame nejí. Abiénachigo ꞌwe ꞌla ꞌnátaga eꞌyénawa Onorúgame Alawala ꞌyuga.
\p Pe ikí képá ye raꞌíchali. Waꞌlú cheliérabá.