\id COL Baja Tarahumara
\h COLOSENSES
\toc1 COLOSENSES
\mt Ye Ju Alué Apeli Napu Osele Páulo Alué Ralámuli Napu Kolosa Ejperégame Nílige
\c 1
\s Kuira suwábaga ꞌemi ralámuli Onorúgame oyérame Kolosa ejperégame.
\p
\v 1 Ne Páulo ꞌlige Timoteo náulia ye apeli ꞌemi ralámuli Kolosa ejperégame, ꞌemi ralámuli napu Onorúgamete wanápurigame ju, ꞌlige napu ꞌla bijchígime ju Kristo Esusi raꞌichálila. Neka Kristo Esúsite wanápurigame ju napurigá nulame nímala ne ꞌlige benírame ne suwábaga ralámuli Onorúgame nila raꞌíchali. Alarigá najkile Onorúgame. Timotéoka Onorúgame oyérame júchigó napurigá ne.
\v 2 ꞌÉmika Krístote wanápurigame ju, ꞌlige ꞌémika asíriga aꞌlá oyérame ju alué. Neka ꞌwe najkí napurigá ꞌemi ꞌwe semáriga narémala nejkúrali Oꞌnó Onorúgame nejílala, ꞌlige aminami najkí ne napurigá ꞌemi tabilé weꞌká eꞌkarúgame ꞌnátame nímala.
\p
\v 3 Senibí napuꞌlige raꞌichalia Onorúgame ꞌyuga, ramueka cheliera iꞌlime niru Onorúgame waꞌlú guꞌírigorikábá ꞌemi, Onorúgame napu ju Waꞌlula Esukristo Oꞌnola.
\v 4 Uché jaré ralámuli ruwí ꞌemi ꞌwe ꞌla bijchígame ko ꞌwe ꞌla nejkúrime ko Kristo Esusi, ꞌlige ruwíchigó ꞌwe ꞌla galegá eteme ko ꞌemi suwábaga alué napu wanápurigame ju Onorúgamete. Alekeri cheliera iꞌlí Onorúgame.
\v 5 ꞌÉmika ꞌwe ꞌla bijchígame ju ꞌlige ꞌla ganíliga eteme ju ꞌemi alué oyérame napugiti machiame ꞌemi Onorúgame ꞌwe semátiri raweli nígame ko ꞌpa rewagachi ꞌemi iꞌlime. ꞌÉmika ꞌma ꞌla gepule alué ꞌla bijchiá raꞌíchali.
\v 6 Alué raꞌíchali Onorúgame raꞌichálila napu akele ꞌemi, jipe ꞌma ꞌla gepú weꞌká ralámuli jena wijchimoba ejperégame, ꞌlige weꞌká ralámuli ꞌma ꞌla semáriga ꞌnátame ju aꞌchigóriga napurigá ꞌnátame ju ꞌemi napusí gepule Onorúgame ꞌwe ꞌla guꞌírame ko ralámuli.
\v 7 Alué rió Epáprasi anilime ꞌsile ye raꞌíchali beniria ꞌemi. Alué rioka Kristo nila raꞌíchali benírame ju napurigá ramué. Ramueka ꞌwe galegá eteru alué rió, ꞌlige ramué nuleru napurigá simela ꞌemi benírimia.
\v 8 Alué rioka ꞌwe ꞌla ruwí ꞌemi ꞌwe ꞌla guꞌírilio Onorúgame Alawálate napurigá ꞌemi ꞌla naꞌtemaka etémala uché jaré ralámuli.
\p
\v 9 Alekeri ramueka ꞌwe raꞌichalia Onorúgame ꞌyuga tániga napurigá uché rajpé guꞌírimala ꞌemi ꞌlige napurigá Onorúgame Alawala abiena guꞌírimala ꞌemi napurigá machimela tachiri najkió Onorúgame.
\v 10 ꞌLige abiena ꞌwe tánilia Onorúgame napurigá guꞌíriwa ꞌemi napurigá ꞌla semáriga ejperélamala ꞌemi ꞌla napurigá Waꞌlula Esukristo oyérame neraga, napurigá Onorúgame ꞌwe ganíliga asimela ꞌemi ꞌyuga, sébali olagá suwábaga napu nulá Onorúgame. Alarigá abé ꞌla námamala ꞌemi churigá ko Onorúgame.
\v 11 Ramueka ꞌwe tánilia Onorúgame napurigá abé waꞌlú aꞌwalí ꞌyawa ꞌemi Onorúgamete. Alueka ꞌla nígame ju aꞌwalí napurigá ꞌla anachámala ꞌemi napuꞌlige resí ikiá ꞌlige napurigá ꞌwe ꞌla ganíliga
\v 12 cheliera ꞌyámala Oꞌnó Onorúgame waꞌlú nejkúrigoriká, alué Onorúgame napu ꞌma ꞌla wanápale ꞌemi napurigá ꞌemi narémala semati raweli napu Onorúgame nejímorílige.
\v 13 Onorúgame ramué Oꞌnola ꞌsile alué chátiri ꞌnátili bujea ramué, napurigá ramué ꞌma tabilé chátiri ꞌnátili ꞌnátame niwa. ꞌLige boꞌné alawala nejíturu napurigá ramué mochiwa napu nulame ju Onorúgame Inolá Esukristo.
\v 14 Alué Onorúgame Inolá ꞌsime ju chátiri bowechi buyana ramué napuꞌlige mukusá, ꞌlige eꞌkame ju ꞌwe cha nokisuga ramué.
\s Jena ruwimela Páulo ruwíligo ꞌwe ꞌla ganíliga ejperélirigo napugiti Esukristo ꞌma mukúligame bilena gulusichi chujkugá
\p
\v 15 Oꞌnó Onorúgameka tabilé etérume ju, nobi alué Inolaka ꞌláchigo etérukó napu Esukristo anilime ju. Ye Esukristo pe abalieri júchigó napurigá Onorúgame. Alueka ꞌwe ꞌyasi ajtígame ju tabilé ꞌcho nerúgichi ye gawí.
\v 16 Alué ꞌsile newá suwábaga napu ekí nerú jena wijchimoba ꞌlige napu ekí nerú ꞌpa rewagachi, suwábaga napu ekí eteru jena ꞌlige napu ekí tabilé eteru, ꞌlige alué santo ánjeli napu weꞌká nóchali nóchame ju, ꞌlige alué weꞌká alawá napu tabilé etérume ju. Pe alué Onorúgame Inolá ꞌsile suwábaga newá napu ekí boꞌné najkile.
\v 17 Krístoka asíriga ꞌyasi bejtégame nile taꞌchó nerúgichi ye gawí ꞌlige rewagátiri, alué júkuru suwábaga gateme napurigá ꞌla semáriga nímala jena wijchimoba.
\v 18 Aminami Kristo júkuru Waꞌlula alué oyérame nuleme ꞌlige alué júkuru bajchá ajánigame ꞌpa rewagachi simea. Alarigá ꞌsile biꞌneli waꞌlula nulame nimia.
\v 19 Onorúgameka asíriga raꞌsálagá asale Esukristo ꞌyuga. Esukristo suwábaga nígame ju napu ekí niga ajtí Onorúgame jipe, alueka Onorúgame ju.
\v 20 Onorúgameka alué Esukristo júlale napurigá ku ꞌla ganíliga ejperélamala suwábaga ralámuli jena gawichí ejperégame. Alarigá ꞌsile Onorúgame napurigá jena gawichí mukugá Esukristo bilena gulusichi ꞌla ganíliga ejperélamala ralámuli.
\p
\v 21 ꞌÉmika tabilé Onorúgame ꞌyuga ꞌnátame nile ꞌyako, pe Onorúgame saíla neraga mochile ꞌemi, pe asíriga chátiri tábiri nóchaga.
\v 22 Onorúgameka suwábaga gatele Kristo júliga jena wijchimoba, nawálekuru napuyeri rió neraga ꞌlige ꞌma meꞌlíliru ralámulite bilena gulusichi ujchagá. Pe alarigá gatele Onorúgame napurigá ꞌemi alawala ꞌma biꞌwérigame nímala ꞌlige tabilé chojkila nímala.
\v 23 Alarigá nímala ꞌemi ꞌla aminabi eꞌwásaká Onorúgame raꞌichálila, ꞌlige tabilé guwana rujsusa alué raꞌíchali beniá. ꞌÉmika ꞌwe ꞌla machí aliena ꞌla nimio aminabi oyérilia ꞌwe semati raꞌíchali Onorúgame nila. ꞌÉmika ꞌma aké ye raꞌíchali. Ye raꞌíchalika bochígimi ruirúgame ju ralámulite Onorúgame oyérame napu echilú ju jena wijchimoba. Neka Onorúgamete nulérigime ju napurigá ne benírimala ye raꞌíchali napurigá ꞌla námaka akimémpá suwábaga ralámuli ye Onorúgame nila raꞌíchali.
\s Jena ruwimela Páulo ruwíligo suwábaga ralámuli Onorúgame oyérame guꞌírame ko
\p
\v 24 Neka asíriga ejelía ajtí jena jipe ꞌemi guꞌiria, ꞌlige asíriga raꞌsálagá ajtí ne. Tabilé seweka ajtí ne rekó ꞌwe ejelíe. Néchigó aꞌchigóriga resí ikí napuyena resí ikile Esukristo jena wijchimoba. Alueka resí ikílekuru alué oyérame ralámuli guꞌíriga. Néchigó aliena resí ikiá ajtí alué Onorúgame oyérame guꞌíriga.
\v 25 Onorúgameka nulele neꞌchí napurigá ne ꞌemi guꞌírimala Onorúgame raꞌichálila beníriga, napurigá ꞌla maꞌchígime námamala suwábaga ꞌemi.
\v 26 Alué raꞌíchali napu ralámuli tabilé machime nile ꞌya, jípeko Onorúgame beniri alué ralámuli napu boꞌné wanápale Onorúgame oyérame ralámuli.
\v 27 Onorúgameka najkí napurigá námamala alué ralámuli tabilé jurío, alué ꞌwe aꞌlá semátiri raꞌíchali napu tabilé námale ꞌya mochígame ralámuli, ꞌlige alué ꞌwe semátiri raꞌíchalika pe Kristo ju napu ꞌma ajtí ꞌemi alawálachi, ꞌemi napu Onorúgame oyérame ju. Alekeri ꞌwe aꞌlá machigá mochí ꞌemi Esukristo nejimio Onorúgame aꞌwalila.
\p
\v 28 Ramueka ichúrimi eꞌyéniga ꞌwe ꞌla ruyá chieri ko Kristo. Ramueka rejcholi ruilíguru ralámuli, ꞌlige guꞌírilia napurigá ꞌwe aꞌlá námaka ejtebímala, ꞌlige napurigá ꞌla sebámala aꞌpílipi Kristo ajtígichi sébali olagá.
\v 29 Neka ꞌwe iwériga nocha ꞌlige aminami asíriga aꞌlá benírame ju ne napurigá ralámuli ꞌla sebámala alé napu ajtí Kristo. Neka Kristo aꞌwalílate nocha ꞌlige beniri ne.
\c 2
\p
\v 1 Neka najkí napurigá ꞌemi ꞌla machimela ꞌwe aꞌwágame nochio ne ꞌlige aminami ꞌemi beníriga ꞌlige aminami Laorisea anilichi weꞌká riógichi ejperégame ꞌlige aminami suwábaga napu tabilé ꞌcho machime ju neꞌchí.
\v 2 Neka suwábaga alué ralámuli guꞌiri napurigá oiláriga mochímala ꞌlige ꞌla raꞌsálagá mochímala alué ralámuli napurigá tabilé weꞌká ꞌnata mochímala, napurigá ꞌla biꞌlepi ꞌnátili ꞌnata mochímala ꞌlige ꞌla aꞌbopi galegá, ꞌlige napurigá ꞌla námamala churigá ko Kristo. ꞌWe ꞌyako ralámuli tabilé ꞌla námale churigá níligo alué Kristo.
\v 3 Suwábaga napu tabilé ꞌla námame ju ralámuli churigá ko Onorúgame, pe Esukristo oyériga ꞌla machiboa churigá ko Onorúgame.
\v 4 Neka ye ruwíguru napurigá tabilé ꞌwesi ralámuli ꞌyégaga raꞌichámala ꞌemi ꞌyuga, ruigá churigá ko Onorúgame. Pe alarigá ꞌnátame ju aꞌboi, ꞌwe semáriga raꞌíchame ju nobi tabiléchigo bijchiá júkó.
\v 5 Neka pecha ꞌemi ꞌyuga ajtí ko, nobi ꞌwéchigo nélégó ne ꞌemi, ꞌlige ꞌwe ganíliga ajtí ne ꞌwe aꞌlá ejpéniga nóchame kame ꞌemi, ꞌlige aminami ꞌwe ꞌla bijchigia mochígame ꞌemi Kristo raꞌichálilachi.
\s Jena ruwimela Páulo ruwíligo napuꞌlige oyérilia  Kristo pe biꞌlepi ꞌnátili naꞌtáwili ko
\p
\v 6 ꞌÉmika ꞌwe aꞌlá eꞌwegá nokísimili júkuru Kristo Esusi napurigá oꞌwínilige ꞌemi ꞌya napuꞌlige chojkía Kristo Esusi oyeria.
\v 7 Pe biꞌlepi ꞌnátili naꞌtámili júkuru ꞌemi pe alué Esukristo naꞌtálilacho, ꞌla oyérimili júkuru ꞌemi alué ꞌnátili aminabi senibí rawé ꞌla napurigá benile ꞌemi ꞌya, ꞌla senibí cheliera anega Onorúgame.
\p
\v 8 ꞌWe aꞌlá ꞌnátiga eꞌyéniwa alué ꞌyégali nawésali ruyame ꞌyuga. ꞌWe ꞌla ꞌnátaga, alueka pe ꞌemi ꞌyegániliga eꞌyena pe alué ꞌyégali raꞌíchalite. Alueka tabilé ruwime ju Kristo eꞌwélime, alueka pe ꞌnátame ju napurigá ꞌnátame ju ralámuli napu tabilé Kristo oyérame ju.
\p
\v 9 Krístoka aꞌchigóyéri ju napurigá Onorúgame. Onorúgame aꞌwalila nígame ju ꞌlige pe biꞌlepi ꞌnátili ꞌnátame ju pe Onorúgame ꞌyuga.
\v 10 ꞌLige ꞌémika ye aꞌwalí nígame ju ꞌlige aminami Kristo Alawala napugiti ꞌémika aleké oyérame kame. Alué kame Waꞌlula biꞌneli neyúriga, umérale suwábaga alué eꞌwélala napu Remónisi gompaniérola ju.
\v 11 Napuꞌlige ꞌemi ꞌma tabilé eꞌwesa alué chátiri ꞌnátili, ꞌwe ꞌla néléramala Kristo ꞌemi nuleo. Jaré ralámuli Onorúgame oyérame korime ju napugiti sikirétigame kame peꞌtá isílala wiꞌchila, nobi tabiléchigo aꞌreme júkó chátiri ꞌnátili. Kristo ꞌsime ju chátiri ꞌnátili bujea.
\v 12 Napuꞌlige ꞌemi ꞌma rewarásiga bilena baꞌwichí, alueka pe anime kéré Kristo mukúligo ꞌlige ku ajániligo ramué alawala biꞌwigá. ꞌÉmika ꞌwe ꞌla bijchígime ju Onorúgame waꞌlú aꞌwalí nígame ko napurigá ꞌyámala aꞌwalí bilé mukúgame.
\v 13 Abé ꞌyabeko ꞌemi alawala napurigá suwígame nile napugiti ꞌémika cha chátiri alawégame níligame. Nobi jípeko Onorúgame ꞌmáchigo ꞌla ꞌyáleko boꞌné alawala ꞌemi aꞌchigóriga napurigá ꞌyale Kristo. Onorúgameka ꞌma bujele alué chátiri ꞌnátili napu ꞌnátame nírige suwábaga ramué.
\v 14 Tabilé gainaru sébali olá Moisesi nila nulalí, nobi Onorúgameka gatélekó Kristo júliga napurigá mukumela bilena gulusichi.
\v 15 ꞌMa neyúrile Onorúgame napuꞌlige uchéchigo siné ꞌyasa ajalí alué Kristo napurigá ku ajagá asimela. Onorúgame ꞌma bujele aꞌwalila suwábaga eꞌwélala napu ekí Remónisi gompaniérola nile. ꞌWe chijúniga mochí Remónisi gompaniérola ꞌma meꞌtiruga mochígempá. Onorúgameka buluruga oꞌtoginti káré alué Remónisi gompaniérola napurigá suwábaga ralámuli etémala.
\s Jena ruwimela Páulo ruwíligo ꞌwe ꞌla oyérilime ko  Onorúgame napu ꞌpa rewagachi ajtí
\p
\v 16 ꞌMa neyúriga ajtí Onorúgame, alekeri ꞌma tabilé ꞌwesi seꞌwiná animeli júkuru tachiri goꞌame goꞌyátiká, pecha animeli júkó: ye goꞌámeka tabilé goꞌyame júché aleké rawé, ꞌlige tabilé bajílime júché alué pee rekútume aleké rawé. Jaré ralámuli tabilé ꞌla korime ju jaré goꞌame goꞌá. ꞌLige jaré nabí ꞌla sébali oliame korime ju apiépiri piesta, ꞌlige jaréchigo nabí mechá oliame korime ju piesta napuꞌlige mechá uꞌtá enágichi, ꞌlige jaréchigo anime ju nabí tarali ꞌla sébali oliame ko ꞌla neraga resíbilichi rawé.
\v 17 Suwábaga alueka pe ruwime kéré churigá nímili níligo aꞌkinana rawé, pe ruyame ju churigá nawale Kristo jena wijchimoba ꞌlige churigá ku nawamio jena wijchimoba. Abé ꞌla ju Kristo ꞌemi nulea.
\v 18 Mochí jaré ralámuli napu asíriga ꞌla nerame korime ju alué santo ánjeli ꞌlige napu ꞌwe aꞌlá aꞌká ralámuli neraga eꞌyéname ju, ꞌlige napu ꞌwe eteme korime ju eꞌkarúgame tábiri remugichi, tase aꞌréwaká napurigá ꞌyégali raꞌichámala ꞌemi ꞌyuga, alueka pecha ꞌla Onorúgame oyérame kame. Alué ralámulika pe aꞌboi nila ꞌnátili bijchígime ju.
\v 19 Suwábaga alué ralámuli tabilé oyérame ju Kristo, alué Kristo napu nuleme ju suwábaga oyérame, ꞌlige napu aminacho aꞌwalí ꞌyame ju alué oyérame. Krístoka suwábaga tábiri ꞌyame ju napu resílá alué oyérame. Onorúgameka ꞌma ꞌla ꞌnátalige churigá ꞌyamio biꞌlepi ꞌnátili.
\p
\v 20 ꞌÉmika ꞌyako ꞌnátame nile napurigá uché jaré ralámuli, nobi jípeko ꞌmáchigo ꞌla biꞌlepi ꞌnátili ꞌnátame júkó ꞌemi pe Krístocho ꞌyuga napu mukule ꞌemi guꞌíriga. ꞌÉmika ꞌma pecha aꞌchigóriga nokimeli júkó napurigá nokame nílige ꞌemi ꞌya. ¿ꞌLígebiché chonigá oyériliaché ye nulalí napurigá oyérame nílige ꞌemi ꞌya, alué nulalí napu anime ju:
\v 21 “¿Tabilé chaꞌpiboa alué tábiri, tabilé goꞌpoa alué goꞌame?”
\v 22 Alué rejchólika pe ralámuli rejchólila ju, alué rejchólika pe aꞌkinánami ꞌma tabilé najtékame ju.
\v 23 Alué raꞌíchali ꞌwe ꞌla Onorúgame raꞌichálila kárékuru. Weꞌká ralámuli ꞌwe ꞌla oyérame ju ye raꞌíchali. Ramueka alekeri ꞌwe ꞌla niralia napugiti ruyame kame churigá ꞌla tabilé nasinákuli niwa, ꞌlige churigá tabilé riólame niwa, ꞌlige churigá ꞌla ꞌnátaga eꞌyénawa ramué. Nobi alué nulalika tabilé biꞌweme ju ramué naꞌtálila.
\c 3
\p
\v 1 ꞌÉmika ꞌma alawégame ju Kristo Alawala, ꞌla semáriga oyérimili júkuru ꞌemi alué rewagachi nerúgame ꞌnátili napu ajtí Kristo alé wajtoná napu ajtí Onorúgame.
\v 2 Pe Onorúgame naꞌtálilacho ꞌnátaga nokísimili júkuru ꞌemi, tase alué chátiri ralámuli naꞌtálila, alué napu jena wijchimoba mochí.
\v 3 Napuꞌlige Kristo meꞌlíliru gulusichi ujchagá, ꞌémichigó napurigá suwígame nílechigó, nobi jípeko ꞌma ku ajágame neraga mochí ꞌemi, ꞌmáchigo alawégame kame ꞌemi Kristo Alawala, ꞌlige Krístoka Onorúgame Alawala alawégame ju.
\v 4 Kristo júkuru aꞌwalí nejime napurigá ꞌwe aꞌlá naꞌtawa. Napuꞌlige Onorúgame uchéchigo siné julasa alué Kristo napurigá ralámuli ꞌla etémala, ꞌlige ꞌemi abiena etéwachigó ralámulite aleké ꞌyuga napugiti ꞌémika alawégame kame Onorúgame nila.
\s Jena ruwimela Páulo ruwíligo churigá ꞌnátame níligo  bilé rió tabilé ꞌcho oyérame ka Onorúgame  ꞌlige churigá ꞌnátame ko jipe Onorúgame oyérame ka
\p
\v 5 Alekeri ꞌma aꞌrewa alué chátiri ꞌnátali napu ꞌnátame ju ralámuli jena wijchimoba ejperégame. Tase ꞌyuga okópua eꞌsena umugí tabilé ꞌemi aꞌboi ꞌyula. Rió níriga tase rewiboa bilé rió. Tase pe umugicho ꞌnata mochiwa. Tase naꞌtawa chátiri nochálime. ꞌLige tase weꞌká eꞌkarúgame najkiboa. ꞌWe najkiáká eꞌkarúgame tábiri ꞌliko pe abé nerálime kárémala alué eꞌkarúgame tábiri peka najkigá Onorúgame.
\v 6 Alué chátiri ꞌnátali naꞌtalia pe gastigo rewiyame ju, alekeri Onorúgame ayome ju ꞌlige ꞌoni aꞌreme ju.
\v 7 Abé ꞌya ꞌemi ꞌwe chátiri ꞌnátame nile ꞌlige ꞌwe cha nokame nile ꞌemi.
\v 8 Nobi jípeko ꞌma aꞌrewa suwábaga alieti ꞌnátili. Tase ayowa, tabilé naꞌtawa chibi olianti uché jaré, tabilé chibi anigá raꞌichawa Onorúgame olagá nibilé uché jaré ralámulitiri olagá.
\v 9 Tase ꞌyégiga raꞌichawa ꞌemi aꞌbopi, ꞌémika ꞌma tabilé oyérame kame alué ꞌya nerúgame ꞌnátili napuꞌlige tabilé ꞌcho oyeria Onorúgame.
\v 10 ꞌÉmika ꞌma alawégame júkuru Onorúgame Alawala. ꞌLige ꞌémika aminacho oyérame júkuru Onorúgame, alué napu bajchá bejtégame rió newale.
\v 11 ꞌLiko pecha chéréko rekó jaré griego ke, rekó jaré ralámuli jurío ke. Tabilé chéré rekó jaré sikirétigame ke peꞌtá isílala guwala Onorúgame oyérame kórigá, o rekó tabilé sikirétigame ke. Tabilé chéré rekó jaré mejkaka sígame ke. ꞌLige tabilé chéré rekó ꞌwe machime ke o tabilé machime ke. ꞌLige tabilé chéré jaré ralirúgame ke tabilé najtétaga nochárilime, ꞌlige tabilé chéré rekó jaré tabilé ralirúgame ke. Nobi abéchigo najtékame júkó Kristo Alawala napu suwábaga Onorúgame oyérame ralámulichi ajtí.
\p
\v 12 Onorúgame wanápule ꞌemi napurigá pe alekecho oyérame nímala. Onorúgameka ꞌwe galegá eté ꞌemi. Alekeri ꞌwe ꞌla sébali olagá ejperélawa. ꞌLige ꞌwe ꞌla naꞌtemápua uché jaré ralámuli, ꞌla ꞌwe ꞌla rejchiruga mochiwa guꞌírimia uché jaré ralámuli tase riólaga, ꞌla ꞌwe ꞌla anáchaga eꞌyénawa rekó resí ikié ꞌemi.
\v 13 ꞌLa ꞌwe ꞌla naꞌtemaka eꞌyénawa ꞌemi aꞌbopi, ꞌla eꞌkawa ꞌemi aꞌbopi naꞌáuka eꞌyéname nísaká. Napurigá Waꞌlula Esukristo eꞌkale ꞌemi, aꞌchigóriga eꞌkawa ꞌémichigó.
\v 14 Alarigaka ꞌwe najtékame júkuru ꞌwe ꞌla naꞌtemaka járilia ꞌemi aꞌbopi, ꞌlige alarigaka ꞌla biꞌlepi ꞌnátili naꞌtawa.
\v 15 Neka najkí napurigá Kristo Alawala ꞌemi guꞌírimala ꞌla semáriga ꞌnata. Onorúgameka ꞌemi wanápalekuru napurigá ꞌla biꞌlepi ꞌnátali ꞌnátaga nokísamala. ꞌLige ꞌla cheliera iꞌlime júkuru Onorúgame waꞌlú nejkúrigorikábá.
\p
\v 16 Neka najkíbá napurigá tabilé siné weꞌkuawa alué semátiri raꞌíchali napu benírale Kristo. Napuꞌlige beniria uché jaré ꞌwe ꞌla beníriwa, ꞌlige wikarawa Onorúgame nila wiká waꞌlú cheliera iꞌgá Onorúgame ꞌwe ꞌla nejkúrime kóriká.
\v 17 Suwábaga napu ekí nóchali nocha ꞌemi ꞌlige napu beniri ꞌemi, ꞌlige napu raꞌicha ꞌemi, ꞌwe ꞌla oyériga nokiboa Waꞌlula Esusi, waꞌlú cheliera iꞌgá Oꞌnó Onorúgame Esusi júliga kórikábá.
\s Jena ruwimela Páulo ruwíligo churigá ejperélimili ko  ralámuli napu Esukristo oyérame ju
\p
\v 18 ꞌEmi umugí rió ꞌyúgame, ꞌla nirawa ꞌemi aꞌboi ꞌyula rió, alarigáchigo kame ꞌma ꞌla Waꞌlula Esukristo oyérame níriká.
\v 19 Suwábaga ꞌemi rió umugí ꞌyúgame ꞌla galegá etewa aꞌboi ꞌyula umugí ꞌlige aminami tabilé chibi anigá.
\p
\v 20 ꞌEmi napu ꞌkuchi ju, ꞌwe aꞌlá eꞌwélime júkuru ꞌemi eyela ꞌlige ꞌemi oꞌnólachigó suwábaga tábiri nulachi. Alarigá nokiáká ꞌwe ganílime júkuru Waꞌlula Esukristo.
\v 21 ꞌEmi rió ꞌlige umugí napu ekí ꞌkúchigame ju, tase ená anigá nulewa ꞌemi aꞌboi ꞌkúchila napurigá ꞌla tase sewémala.
\p
\v 22 ꞌEmi napu ralirúgame ju, ꞌwe ꞌla eꞌwiwa alué waꞌlula ꞌemi nuleme. ꞌLa eꞌwiwa napuꞌlige eꞌnegá ilígichi alué waꞌlula napuꞌlige tabilé eꞌnegá ilígichi abiena ꞌla eꞌwíwachigó, jaré pe napuꞌlige eꞌnegá jágichi alué eꞌwélala, pe aꞌlígecho ꞌla eꞌwame ju. ꞌLa ganíliga eꞌwawa ꞌla niraga Waꞌlula Esukristo.
\v 23 Napu ekí nóchali nochalia asíriga ꞌla nochawa ꞌla ganíliga, ꞌla napurigá Esukristo nulágame neraga nochawa, tase pe bilé rió nulágame neraga.
\v 24 ꞌÉmika ꞌla machí alarigá nochálika ꞌla semati raweli naremio ꞌemi abé iꞌlibeko napu Waꞌlula Esukristo nejímili ju. ꞌÉmika aleké oyérame kame.
\v 25 Bilé ralámuli cha ꞌsime, alueka gastigáriwili júkuru Onorúgamete. Onorúgameka gastigárime ju suwábaga napu cha nokame ju, tabilé chéré rekó ꞌwe nígame ke o tabilé nígame ke.
\c 4
\p
\v 1 ꞌEmi eꞌwélala napu nóchame nuleme ju, ꞌla ꞌyawa goꞌame ꞌlige napu ekí tábiri resí la alué ralámuli napu ꞌemi ralale nochárimia. ꞌWe ꞌla machíguru ꞌemi bilé Waꞌlula Nuleme ko ꞌemi napu reꞌpá rewagachi ajtí.
\p
\v 2 Senibí ꞌla ꞌnátiga raꞌichawa Onorúgame ꞌyuga ꞌlige ꞌla cheliera ꞌyawa Onorúgame.
\v 3 ꞌLa tániwa Onorúgame napurigá tabilé ꞌwesi nejkumémala ramué benírilichi churigá ko Kristo napu ralámuli tabilé machime nílige abé iꞌbé. Neka pe alué raꞌíchali ruigáriká galírale bajcháriga ajtí ne jena.
\v 4 ꞌLa tániwa Onorúgame napurigá ne ꞌla gainámempá ye raꞌíchali beniria.
\p
\v 5 ꞌWe aꞌlá ꞌnátaga eꞌyénawa alué ralámuli ꞌyuga, alué napu tabilé Kristo oyérame ju. ꞌWe ꞌla ruilime júkuru napu ikisá rukechi ralámuli churigá ko Kristo.
\v 6 ꞌLa semáriga raꞌichálime júkuru alué ralámuli ꞌyuga, ꞌwe ꞌla ga kanti tase napurigá bilé rió ayóganti neraga, ꞌlige aminami ꞌla benigá nejélime júkuru bilé raꞌíchali rukechi.
\b 
\p
\v 7 Alué Tíkiko napu Onorúgame oyérame júchigó napurigá ramué, napu ꞌwe nejkúrime ju beniria Waꞌlula Esukristo raꞌichálila. Alué ꞌla ruwimela alakió ne jena asagá.
\v 8 Alekeri alemi jula ne alué Tíkiko anilime rió napurigá ruwimela alakiá mochigo ramué jena napu mochiru ramué ꞌlige napurigá alué ꞌla ꞌyámala iwérali napurigá abisibi ꞌla oyériga nokísimala Kristo.
\v 9 Uché bilé rió simélachigó Tíkiko ꞌyuga alué Onésimo rewégame napu abiena Onorúgame oyérame júchigó napurigá ramué napu ꞌwe galegá etuime ju ramué. Alueka abiena alé Kolosa bejtégame ju. Alué okaka nokimeli júkuru ꞌemi ruyea napu ikiá mochiru ramué jena.
\p
\v 10 Aristarko anilime rió jena ajtíchigó galírale bajcháriga ne ꞌyuga, ꞌwe náola reporali, ꞌlige Marko abiénachigó náola reporali, alué napu Bernabé rijimala ju. Neka ꞌma náolaturu bilé apeli ruwime chieri ko Marko anilime. Alué rió sebasa alemi ꞌla ganíliga etewa, ꞌlige ꞌla ganíliga repóriwa.
\v 11 Uché bile rió napu Esusi anilime ju napu Justo anilime ju abiena náwala reporálichigó. Alué bakiá ralámuli jurío ju, ꞌlige ne ꞌyuga benírame ju ralámuli Onorúgame nila raꞌíchali, ꞌlige neka ꞌwe ganíliga ajtíkuru ꞌwe ꞌla nejkura mochígime alué ralámuli.
\v 12 ꞌLige Epáprasi abiena ꞌwe náola reporali, napu senibí ꞌla eꞌwame ju napu Kristo Esusi nulá, napu aba alé weꞌká riógichi bejtégame júchigó napu ꞌemi ejperégame ju. Alué Epáprasi ꞌwe tania ajtime ju Onorúgame napurigá ꞌemi ꞌla sebámala ꞌla sébali ralámuli gayenia ꞌlige napurigá ꞌla sébali olame nímala ꞌemi ꞌwe ꞌla ꞌnátame napurigá Onorúgame najkí.
\v 13 Ne boꞌné ꞌla machí alué rió Epáprasi ꞌwe ꞌnata ajtigó choniká mochigo ꞌemi ꞌlige choniká mochigo alué ralámuli Laorisea ejperégame, ꞌlige abiena ꞌnata ajtí choniká mochigo alué ralámuli Erápolosi ejperégame.
\v 14 Alué ꞌyóome, Lukasi anilime rió ꞌwe náola reporali, alué rió napu ramué ꞌwe galegá etelia. ꞌLige alué rió Remasi anilime abiena ꞌwe náola reporali.
\p
\v 15 ꞌWe repóriwa alué ralámuli Onorúgame oyérame napu ejperé Laorisea rewégichi. ꞌLige abiena repóriwa alué Nimpa anilime mukí ꞌlige alué ralámuli napu napuíme ju Onorúgame raꞌichálila benimea alé galírale Nimpa bejtélachi.
\v 16 ꞌLige ꞌma etesa ꞌemi chonime ka ye apeli ꞌmi Laorisea anilichi weꞌká riógichi náola napurigá alé mochígame ralámuli eꞌnémempá chonime ka ye apeli, ꞌlige alué Laorisea anilichi mochígame abiena náomala uché bilé apeli napu ne osegé alé napu ꞌemi mochí napurigá ꞌemi eꞌnémala alué apeli chonime ka.
\v 17 ꞌWe ꞌla ruyewa alué Arkipo ye raꞌíchali napu ruwí ne, regá anewa: “ꞌWe ꞌla sébali olawa nóchali alué napu Waꞌlula Esukrístote ꞌyaru mué napurigá sébali olámala mué.”
\p
\v 18 Ne Páulo náola ne reporali napu osá ne ne boꞌné sekálate, ne boꞌné osilila ju ye: “ꞌLa néléwa neꞌchí jena galírale bajcháriga ajtígichi ne. ꞌWe ꞌla nisa ꞌla képá Onorúgame ꞌwe semáriga guꞌiria ꞌemi.”
\p Pe ekí júpá ye raꞌíchali. Waꞌlú cheliérabá.