\id 1TH Baja Tarahumara
\h 1 TESALONICENSES
\toc1 1 TESALONICENSES

\mt Ye Ju Alué Apeli Napu Bajchá Osele Páulo Alué Ralámuli Napu Tesalónika Ejperégame Nílige

\c 1
\s Kuira suwábaga ꞌemi ralámuli Tesalónika ejperégame napu ekí Onorúgame oyérame ju.
\p
\v 1 Ne Páulo, ꞌlige Silasi, ꞌlige Timoteo, osiáguru jena apélichi ꞌemi náolimia, ꞌemi napu ekí Onorúgame oyérame ju, napu Tesalónika anilichi weꞌká riógachi napuíme ju. ꞌÉmika pe biꞌlepi ꞌnátili ꞌnátame ju pe Oꞌnó Onorúgamecho naꞌtálila ꞌlige Waꞌlula Esukristo naꞌtálila, alué napu ꞌpa rewagachi ajtí Onorúgame ꞌyuga. Neka najkíguru napurigá ꞌwe guꞌíriwa ꞌemi Onorúgamete napurigá ꞌla sébali olame ralámuli nímempá ꞌemi napurigá tabilé weꞌká ꞌnátaga mochímala.
\s Jena ruwimela Páulo ruwíligo alué Tesalónika ejperégame ꞌwe aꞌlá oyérame níligo Onorúgame
\p
\v 2 Nabí waꞌlú cheliera iꞌlime ju Onorúgame napu nokame ju ꞌemi.
\v 3 Nabí napuꞌlige raꞌichalia ramué Oꞌnó Onorúgame ꞌyuga anilime ju ꞌemi ꞌwe aꞌlá nóchame ko. ꞌÉmika ꞌwe aꞌlá bijchígame ju Onorúgame aꞌwalí nejime ko, alekeri ꞌwe aꞌlá semáriga maꞌchina ꞌemi nochálila. ꞌÉmika asíriga ꞌla galeme júkuru ralámuli, alekeri asíriga aꞌwágame nóchame ju ꞌemi alué ralámuli guꞌíriniliga. ꞌÉmika asíriga ꞌla anáchame ju ꞌwe aꞌlá machiame ꞌemi alué Waꞌlula Esukristo asíriga ꞌla sébali olamio napurigá anílige boꞌné. Alekeri ꞌemi tabilé guwana rujsú.
\v 4 ꞌEmi Onorúgame oyérame napurigá ramué, asíriga galilía ꞌemi Onorúgamete. ꞌLa machiáa ramué Onorúgame wanápiligo napurigá ꞌemi Onorúgame oyérame nímala.
\v 5 Napu ꞌemi ruilíe ramué alué aꞌká raꞌíchali Onorúgame raꞌichálila, Onorúgame Alawala ꞌsmi ꞌla aꞌwágame nejkuria, napurigá ramué ꞌemi ruyewa ye raꞌíchali, ꞌlige ꞌémika asíriga ꞌla inámaturu ye raꞌíchali. ꞌEmi ꞌla machí churigá níligo ramué ꞌemi ꞌyuga. Pe biꞌlepi kéturu ramué naꞌtálila pe ꞌemi guꞌírilimecho.
\p
\v 6 ꞌLige ꞌémika napurigá ramué aꞌchigóriga nokáturu, aminami napurigá alué Waꞌlula Esusi. ꞌÉmika asíriga ganíliga gepúturu napuꞌlige ramué Onorúgame raꞌichálila ruilía ꞌemi. ꞌÉmika asíriga resí nilia mochílekuru abiénachigó ꞌwe raꞌsálagá gepúlekuru ꞌemi alué raꞌíchali Onorúgame nila. Onorúgame Alawala guꞌírile napurigá ꞌwe ganíliga mochímala ꞌemi.
\v 7 Suwábaga napu ekí Onorúgame oyérame ju napu Maseronia anilichi ejperégame ju ꞌlige napu Akaya anilichi ejperégame ju ꞌemi akega napu aní uché jaré ralámuli, aꞌchigóriga nokinali alué napurigá nokame ju ꞌemi.
\v 8 Alué ralámuli napu gepule alué Waꞌlula Esusi nila raꞌíchali napu ꞌemi ruwile, ꞌma ruyea mochí ichúrimi ejperégame ralámuli. Alekeri weꞌká ralámuli ꞌma machí ꞌemi ꞌwe aꞌlá oyérame ko Onorúgame. ꞌLige alekeri pecha ruwiboa ramué churigá ko ꞌemi.
\v 9 Alueka ꞌwe aꞌlá machí ꞌemi kóliga eꞌyénilio ramué, ꞌlige ꞌwe aꞌlá raꞌicha ꞌemi olagá, ꞌemi ꞌwe aꞌlá semáriga etéligo ramué. ꞌLige aníchigó ꞌma aꞌréligo ꞌemi oyeria alué tábiri napu pe newárigime ju igute o rejtete kómá, Onorúgame ꞌlina oyériniliga alué Onorúgame napu nabí ajagá ajtime ju ꞌlige napu ꞌla bijchiá Onorúgame ju.
\v 10 Abiena raꞌicha ralámuli ꞌemi ꞌwe buigá mochigo napurigá uché sebámala Onorúgame Inolá ꞌpa rewagáchika, alué napu uché ku ajánale siné mukusá, alué Onorúgame Inolá Esusi anilime. Alué júkuru gastígochi buyáname ramué, alué gastigo napu abé iꞌlibeko nerúlimili ju.
\c 2
\s Jena ruwimela Páulo beníriligo  alué ralámuli Tesalónika ejperégame
\p
\v 1 ꞌEmi Onorúgame oyérame, ꞌemi aꞌbopi ꞌwe aꞌlá machíguru tabilé rioksi níligo ye nóchali, nóchale ꞌemi beníriga Onorúgame nila raꞌíchali.
\v 2 Bajchabé taꞌchó seba napu ꞌemi mochílige, Bilipo anilichi weꞌká riógachi eꞌyénilituru ꞌemi ꞌwe aꞌlá machíguru aliena tabilé ꞌla galélirigo ramué alé mochígame ralámulite ꞌlige asíriga resí olaru ramué.\f + \fr 2:2 \ft Eꞌnesi Hechos 16:19-40. \f* Napuꞌlige sebalia napu ꞌemi mochí abiena ꞌwe resí olaru ramué, nobi Onorúgame ꞌwéchigo nejkúrikó napurigá ramué tabilé majawa Onorúgame nila raꞌíchali beníriga ꞌemi.
\v 3 Ramué nila raꞌíchalika pecha ꞌyégali júkó, ꞌlige ꞌnátalitiri asíriga ꞌla biꞌwígame ju. Ramueka pecha ꞌyégiga beníriligo ꞌemi.
\v 4 Ramueka raꞌicháliguru Onorúgame nejígempá alué nóchali ꞌemi benírilime alué aꞌlala raꞌíchali. Pecha najkigá raꞌicháligo napurigá ralámuli ꞌwe aꞌlá niraga etémala ramué, ramueka pe najkiáꞌé napurigá ꞌla nirawa ramué Onorúgamete. Onorúgame ꞌla machí chieti ka ramué naꞌtálila pala ꞌwe aꞌlá ꞌnátili ka o tabilé ꞌla ka alué ꞌnátili.
\v 5 ꞌEmi ꞌwe aꞌlá machíguru ramué tajsiné raꞌíchame nírigo ꞌwe semáriga napurigá ꞌemi ꞌwe aꞌlá niraga etémala ramué, ꞌlige tajsiné raꞌíchame nírigo ꞌwe semáriga pe bilé tábiri bujéniliga ꞌemi. Onorúgameka ꞌwe aꞌlá machí tajsiné larigá nírigo.
\v 6 Ramueka pecha lonoká mochírukó napurigá ꞌemi ꞌlige uché jaré ralámuli ꞌwe aꞌlá niraga etémala ramué napurigá eꞌwélala niraga.
\v 7 Alué Kristo\f + \fr 2:7 \ft Napuꞌlige Páulo aniá Esusi, Kristo, Esukristo, ꞌlige Kristo Esusi, pe biꞌlepi ralámuli ju. Eꞌnesi glosario “Cristo” ꞌlige “Jesús”. \f* alué ꞌsmi ye nóchali nejía napurigá nuebo nóchali oꞌwinawa. Alekeri nóchali nígame niru napurigá aꞌwágame nulawa, nobi tabiléchigo siné alarigá nokirúkó. Ramueka napurigá bilé eyela napu repume ju boꞌné ꞌkúchila, alarigá nokirú.
\v 8 Ramueka ꞌwe galilía ꞌemi, alekeri asíriga ꞌla ganíliga beníriru ramué ꞌemi Onorúgame nila raꞌíchali. ꞌLige aminami ꞌma ꞌla ꞌnátaga mochírige ramué napurigá guꞌírowa ꞌemi rekó suwiyae ꞌemi guꞌíriga.
\v 9 ꞌEmi ralámuli napu ekí Onorúgame oyérame ju napurigá ramué, ꞌemi asíriga ꞌla néláguru asíriga aꞌwágame nóchaligo ramué nabí rawé goꞌame ꞌmea, beꞌá oꞌinasa ꞌlige weꞌliko rukó aꞌrilíturu. Ramueka tabilé najkirú napurigá ꞌemi goꞌame kónimala. Tabilé najkiáguru napurigá ꞌemi resí lámala goꞌame. Alarigá nokiáturu napuꞌlige ꞌemi ruilíe Onorúgame nila raꞌíchali.
\p
\v 10 ꞌEmi napu ꞌwe aꞌlá bijchígame ju napu aní Onorúgame, ꞌwe aꞌlá etele ꞌemi semáriga nóchiligo ramué ꞌemi ejperélichi. ꞌLige Onorúgame abiena etele. Biꞌlepi ꞌnátili ꞌnátame nírige ramué Onorúgame ꞌyuga. ꞌLige ꞌla sébali olaru napurigá najkí Onorúgame. Tabilé che nokirú ramué napurigá tabilé che animela ralámuli cha nokirugo ramué.
\v 11 ꞌEmi ꞌla machí churigá nokirú ramué napurigá ꞌemi ꞌla oꞌwé jábamala. Ramueka asíriga naꞌtamatu ꞌemi aꞌpílipi neraga napurigá bilé oꞌnó boꞌné ꞌkúchila ꞌyuga, alarigá naꞌtamatu ramué ꞌemi.
\v 12 Ramueka iwérali ꞌyáruturu ꞌemi. ꞌEmi ꞌyuga mochíruturu ramué napuꞌlige ꞌemi ꞌwe resí nilia mochígichi, ꞌlige rejcholi ꞌyáruturu ꞌemi napurigá nabí ꞌla sébali olámala napurigá najkí Onorúgame. Onorúgame júkuru bayeme napurigá lisensia nejímala ꞌemi napurigá Onorúgame nulámala ꞌemi alawálachi. Alarigá nokiáká ꞌwe semátiri ju.
\p
\v 13 Napuꞌlige ꞌemi ꞌla bijchígile ye raꞌíchili napu ruilíe ramué, ꞌémika ꞌla napurigá Onorúgame nila raꞌíchali alarigá bijchígile, tase napurigá ramué raꞌichálila neraga. Ye Onorúgame nila raꞌíchalika ꞌwe guꞌiri ꞌemi, ꞌemi napu ekí Onorúgame oyérame ju. Alekeri waꞌlú cheliera iꞌlí Onorúgame.
\v 14 ꞌEmi Onorúgame oyérame, alarigá ikile napurigá ikile alué ralámuli Kristo Esusi oyérame napu napuíme nílige Onorúgame raꞌichálila benimea alé Jurea mochígame. ꞌWe resí oláliru alué ralámuli juríote. Alarigá resí ikile ꞌemi alé napu ꞌemi mochí.
\v 15 Jaré ralámuli jurío nokálekuru meꞌá alué Waꞌlula Esusi ꞌlige abiena meꞌlíliru alué napu ruwime nile napu anele Onorúgame, ꞌlige ramuétiri ꞌma mabúruturu jaré ralámuli juríote. Alueka tabilé nóchame ju napurigá Onorúgame najkí. Alueka suwábaga ralámuli sairúgame neraga mochí.
\v 16 ꞌWe cha anime ju ramué olagá napurigá ramué tabilé gainawa raꞌicha alué aꞌká raꞌíchali alué ralámuli tabilé jurío. Tabilé elá napurigá Onorúgame alué ralámuli buinámala alé resítirichi. Ye ralámulika cha nokigá eꞌyéniga pe seꞌwinátiri ꞌnátili ꞌnátaga eꞌyena. ꞌLige Onorúgameka ayoga ajtí alué ralámuli ꞌyuga, Onorúgame ꞌma tabilé guꞌírimala alué ralámuli.
\s Jena ruwimela Páulo  ꞌwe siminalio Tesalónika anilichi uchéchigo siné
\p
\v 17 ꞌEmi ralámuli Onorúgame oyérame napurigá ramué, rekó alué cha nokame ralámuli ꞌma mabuge ramué alé napu mochí ꞌemi, ramueka ꞌwe néléa mochiru ꞌemi. Asíriga eténili ramué ꞌemi. Iꞌsínimi amulí simálituru ꞌemi eꞌnewa.
\v 18 Asíriga simánilituru ramué ꞌemi kólimia, nobi alué Satanásika jábale napurigá tabilé simawa ramué alemi. Ne Páulo asíriga weꞌsá siminalia ajtigéturu alemi.
\v 19 Napuꞌlige uchéchigo siné nawasa alué Waꞌlula Esukristo, ꞌlige rukesa chonikirú ramué, neka ꞌwe aꞌlá raꞌichámala churigá ko ꞌemi ralámuli. Tabilé chijunámala ne. Asíriga raꞌsálámala ne alieti raꞌicha.
\v 20 ꞌLa bijchiá ju, ramueka ꞌwe raꞌsálagá mochiru ꞌemi ꞌyuga.
\c 3
\p
\v 1 Napuꞌlige ramué ꞌwe eténilie ꞌemi, tabilé gainali ramué simibia ꞌemi eꞌnemia. Alekeri naꞌtaru ramué jena Aténachi ejtibílime pe uꞌkabi rawé ne ꞌlige Silasi.
\v 2 Mayeru abé ꞌla níligo Timoteo julalia alemi, ꞌlige ramueka Atena anilichi ejtebiru. Alué Timotéoka Onorúgame oyérame ju, ꞌlige Onorúgame ꞌyuga nóchame ju napurigá ramué, ruigá churigá níligo alué Kristo. Jularu ramué napurigá oilárimala ꞌemi napurigá ꞌwe aꞌlá naꞌtámala ꞌemi Onorúgame ꞌyuga,
\v 3 napurigá alué nejkúralite ꞌla anachámempá ꞌemi napuꞌlige resí ikiá. ꞌEmi ꞌwe aꞌlá machí Onorúgame elame ju napurigá resí ikiboa ramué.
\v 4 Napuꞌlige ramué ꞌemi si mochiga, ruirúturu ꞌwe resí ikiboli níligo ramué bilé rawé, ꞌlige larigá ikíkuru. ꞌEmi asíriga ꞌla machí alieti.
\v 5 Neka ꞌwe machiéturu alué ralámuli tabilé ꞌla nocha mochigo ꞌemi ꞌyuga. Napuꞌlige ne ꞌma tabilé anacha, machináliga pala ꞌla Onorúgame ꞌyuga ꞌnata ꞌemi, Timoteo júlaturu ne napurigá ruwimela. Neka weꞌká ꞌnata ajtigé alué ꞌyégame Remónisi anilime ꞌma ꞌyégali ruyéligo ꞌemi, ꞌlige siné kachi ꞌemi ꞌma tabilé oyérame kéré ko alué raꞌíchali napu ramué beníriru.
\p
\v 6 Timotéoka ꞌma ku sébaturu ꞌemi mochígichi einasa, ꞌlige aní ꞌwe aꞌlá nirá mochigo ꞌemi Onorúgame, ꞌlige aminami ꞌwe ganilia ꞌemi aꞌbopi. Abiena aníchigó ꞌemi ꞌwe raꞌsálá mochigo napuꞌlige ramué nélá semá nokame níligo ramué. ꞌLige abiena ruwí ꞌemi ꞌwe eténilio ramué, aꞌchigóriga napurigá ramué ꞌwe eténili ꞌemi.
\v 7 ꞌEmi Onorúgame oyérame, ramueka asíriga resí ikiá mochírukuru, asíriga cha noká ralámuli ramué ꞌyuga. Napuꞌlige nélália ramué ꞌwe aꞌlá Onorúgame ꞌyuga ꞌnata mochigo ꞌemi, rekó cha ikié ꞌemi, ꞌliko ku raꞌsálárime ju ramué ꞌma tabilé seweka mochiru.
\v 8 ꞌÉmika asíriga ꞌla semáriga oyera mochíkuru alué Waꞌlula Esukristo, alekeri ramueka ꞌwe raꞌsálagá mochiru.
\v 9 Napuꞌlige Onorúgame ꞌyuga raꞌichalia ꞌwe raꞌsáláru ramué raꞌíchaga alieti tábiri nóchame ko ꞌemi. Waꞌlú cheliera ꞌyawa Onorúgame ꞌwe aꞌlá guꞌírilimpá ꞌemi.
\v 10 Napuꞌlige raꞌichalia Onorúgame ꞌyuga rawé ꞌlige rukomi, asíriga tánilia napurigá ꞌla nejímala bilé rawé napurigá ramué ꞌemi eꞌnewa. Ramueka ꞌwe guꞌírinili ꞌemi napurigá aminá abé benimela Onorúgame nila raꞌíchali.
\p
\v 11 Ramueka najkiáguru napurigá ramué Oꞌnola Onorúgame ꞌlige alué Waꞌlula Esusi si ꞌwe nejkúrimala napurigá ramué ꞌla sebawa napu ꞌemi mochí.
\v 12 Abiena najkiá napurigá alué Waꞌlula Esusi ꞌla nejkúrimala napurigá ꞌla ganíliga járomala ꞌemi aꞌboi ꞌlige ꞌwe aꞌlá nirálichi uché jaré ralámuli, napurigá nirálime ju ramué ꞌemi.
\v 13 Ramueka najkiáguru napurigá waꞌlú ꞌyámala aꞌwalí pachágana sulachí napurigá tabilé chátiri naꞌtámala ꞌemi, ꞌlige napurigá ꞌla sébali olame ralámuli nímala ꞌemi Onorúgame ꞌyuga napuꞌlige mochiga ꞌemi Waꞌlula Esusi ꞌyuga napu ajtí Onorúgame ramué Oꞌnola.
\c 4
\s Jena ruwimela Páulo ruwíligo churigá olálime ko  napurigá najkí Onorúgame
\p
\v 1 Jípeko pe uꞌkabi raꞌíchali ruimé ne. ꞌEmi ralámuli Onorúgame oyérame napurigá ramué, ramueka ꞌwe aꞌlá benírituru ꞌemi alué aꞌká raꞌíchali churigá eꞌwélime ko Onorúgame. ꞌLige ꞌémika ꞌla sébali oláguru. Jípeko najkiáguru ramué napurigá ꞌemi abichilubi ꞌwe aꞌlá eꞌwámala napurigá najkí Onorúgame, napurigá ꞌla raꞌsálámala Onorúgame. Waꞌlula Esusi aꞌwalílate ꞌla sébali olámili ju ꞌemi.
\v 2 ꞌÉmika ꞌla machigá mochí alué aꞌká raꞌíchali napu ramué benírilige. Alué Waꞌlula Esusi nejíturu ye nóchali napurigá ꞌemi beníriwa.
\p
\v 3 Ne ꞌla ruwimela alieti najkió Onorúgame. Onorúgameka najkíguru napurigá ꞌemi ꞌla sébali ralámuli gainámala biꞌlepi ꞌnátili ꞌnátame pe Onorúgamecho, ꞌlige aminami napurigá tabilé okómala ꞌemi uché jaré umugí ꞌyuga alué napu tabilé ꞌemi aꞌboi ꞌyula ju.
\v 4 ꞌLige aminami aꞌpílipi ꞌemi ꞌwe aꞌlá niraga etémili ju ꞌemi aꞌboi ꞌyula napurigá ralámuli napu ꞌwe aꞌlá ꞌnátame ju Onorúgame ꞌyuga.
\v 5 Tase niwa napurigá alué ralámuli tabilé machime Onorúgame alué napu tabilé ꞌla ꞌnátame ju. Alué ralámulika pe napuchíbiriga nokinali aꞌboi alarigá nokame ju, pe apiépiri umugí ꞌyuga okome ju.
\v 6 ꞌLa ꞌnátaga mochiwa tase che olawa uché jaré ralámuli. Seꞌnú mukí ꞌyuga gojchiáká uché bilé rió ꞌyula, ꞌliko ꞌwe cha oliame ju alué mukí ꞌyula. Pecha ꞌyégalime júkó uché bilé rió. Onorúgame gastigárimala ralámuli alanokame. ꞌMa ruitúturu ye raꞌíchali, ꞌma anéruturu suwábaga ralámuli napurigá tabilé cha nokimela.
\v 7 Onorúgame tabilé repá napurigá chátiri ꞌnátili ꞌnátame niwa, Onorúgameka najkí napurigá ꞌwe aꞌlá biꞌwígame ꞌnátili ꞌnátame niwa ꞌlige aminami asíriga ꞌla sébali ꞌnátame ralámuli niwa.
\v 8 Ye raꞌíchalika pecha pe bilé rió nila júkó, ye raꞌíchalika Onorúgame nila júkuru. Bilé rió tabilé nirásaká ye raꞌíchali, alueka tabilé ꞌla nirame kérélamala Onorúgame, alué napu nejime ju boꞌné alawala.
\p
\v 9 Onorúgame ꞌyale iwérali ꞌemi napurigá ꞌwe ganíliga járomala ꞌemi aꞌbopi niraga. Alekeri ramueka pecha aminabi nejíwili júkó rejcholi.
\v 10 ꞌEmi ꞌwe aꞌlá galéguru suwábaga alué ralámuli Onorúgame oyérame alé Maseronia anilichi mochígame. Ramueka najkiá napurigá ꞌemi abisibi ꞌwe aꞌlá nirame nímala alué uché jaré ralámuli.
\p
\v 11 ꞌWe aꞌlá naꞌtawa napurigá ꞌwe aꞌlá ganíliga ejperéramala ꞌemi, tabilé uchútamala ꞌemi uché jaré ralámuli nila nochálilachi. Sekate nochawa napurigá nulálige ramué ꞌya,
\v 12 napurigá ꞌwe aꞌlá niraga etéwampá ꞌemi alué tabilé Onorúgame oyérame ralámulite, ꞌlige napurigá tabilé tábiri resí lámala ꞌemi. Alarigá ka tabilé taga eꞌyénamala ꞌemi goꞌame.
\s Jena ruwimela Páulo ruwíligo  uché ku nawamio alué Waꞌlula Esukristo
\p
\v 13 ꞌEmi Onorúgame oyérame napurigá ramué, ramueka najkiá napurigá ꞌla námamala ꞌemi chukime ko bilé ralámuli mukusá. Tabilé najkiá napurigá seweka mochímala ꞌemi napurigá mochime ju ralámuli alué tabilé Onorúgame oyérame. Alueka tabilé moinámili ju ꞌpa rewagachi napuꞌlige suwisá.
\v 14 Ramueka ꞌla bijchígiliguru alué Esusi mukúligo, ꞌlige ku ajánaligo. Alekeri ꞌla bijchígilia Onorúgame oꞌtomeo Esusi ꞌlige boꞌné oyérame napu ꞌma suwile alé napu ajtí Onorúgame.
\p
\v 15 Ramueka ruwiyá napurigá anílige Waꞌlula Esusi, alué raꞌíchali ruyéruturu ramué Esukristo oyérame napu ekí ajagá mochí napuꞌlige Esusi nawasa, ramué tabilé bajchá iꞌnawa ꞌpa rewagachi simiba.
\v 16 Napuꞌlige alué Waꞌlula Esusi jékana wijchimoba reꞌkinia, eꞌwele raꞌíchaga nulámala, ꞌlige alué waꞌlula santo ánjeli abiena eꞌwele raꞌichámala. ꞌLige abiena eꞌwele rabisímala Onorúgame nila rabisíkime alué buchigá rabisíkime (“trompeta” anilime), ꞌlige alué oyérame napu abé iꞌbé suwílige ajánamili ju.
\v 17 ꞌLige napu ekí ajagá mochí, abiena oꞌtiboli ju alué suwígame ꞌyúriga ꞌpa rewagachi, ꞌlige suwábaga ramué nolírale jímempuá najtepamia alué Waꞌlula Esukristo nabí alué waꞌlula ꞌyuga ejperélimia.
\v 18 Alekeri ꞌwe aꞌlá oiláriwa ꞌemi aꞌbopi ye raꞌíchali raꞌíchaga.
\c 5
\s Jena ruwimela Páulo ruwíligo  listo mochílime ko napuꞌlige ku nawachi Esusi
\p
\v 1 ꞌEmi Onorúgame oyérame napurigá ramué, pecha osiboli júkó chiéniko sebamio ye raweli, nibilé osiboa ramué tachiri tábiri simírimio bajchá, ꞌemi ꞌma machiame.
\v 2 ꞌEmi ꞌma machí alué Waꞌlula Esusi uché nawamio napuꞌlige ralámuli ꞌma tabilé buwechi aliéniko sebamio. Napurigá bilé chigórigame rukó sébame tábiri chigomia, tabilé machirume ju aliéniko sebamio, ꞌlige tabilé machiáa chiéniko nawamio Esusi.
\v 3 Napuꞌlige ralámuli aniá mochígichi: “Suwábaga asíriga ꞌla ju, tabilé che ikimeli ju”, ꞌlige yati neraga asíriga ená ikimela. Aꞌchigóriga ikimela napurigá ikime ju bilé mukí uꞌtátiri ranélimili nisa, yati neraga oꞌkome ju rojpachí. Ralámulichigó ꞌwe resí ikimeli ju.
\p
\v 4 Nobi ꞌemi Onorúgame oyérame ꞌwéchigo ꞌla machigá mochíkó bilé rawé Esukristo uchéchigo nawamio ꞌlige ꞌwe ꞌla rejchiruga mochímili júkuru ꞌemi.
\v 5 Suwábaga ꞌemi Onorúgame ꞌkúchila júkuru, ꞌwe aꞌlá guꞌíriliguru suwábaga ꞌemi Oꞌnó Onorúgamete napurigá ꞌla námamala ꞌemi ená ikimeo bilé rawé jena wijchimoba. Ramueka pecha Remónisi ꞌkúchila nírukó.
\v 6 Alekeri tase naꞌtawa ramué napurigá Remónisi ꞌkúchila neraga, Remónisi ꞌkúchilaka tabilé machí ená ikimeo bilé rawé. Alueka napurigá okoka biꞌtígame, alarigá mochí. ꞌLa eꞌnegá mochiwa, ꞌlige aminami asíriga ꞌla ꞌnátaga.
\v 7 Ralámuli tabilé Onorúgame ꞌyuga ꞌnátame ka pe napurigá okókame alarigá mochí o napurigá tégili kómá.
\v 8 Ramué napu ꞌla Onorúgame ꞌyuga ꞌnátame niru, ꞌwe aꞌlá ꞌnátaga mochiwa, ꞌlige ꞌla machigá mochiwa Onorúgame ꞌla nejkúrime ko, ꞌlige ꞌwe aꞌlá galewa uché jaré ralámuli. ꞌWe aꞌlá machiáguru Onorúgame ꞌsimio alué resítirichi buyana ramué ꞌlige aminabi nabí ꞌla repúmala.
\v 9 Onorúgameka pecha gastigárimia bayele ko ramué. Alueka bayélekuru ramué alé resítirichi buinamia. Júlale alué Waꞌlula Esukristo napurigá ramué ꞌla buyawa alé resítirichi.
\v 10 Alueka ramué guꞌíriga mukúlekuru. Alekeri tabilé chéré rekó ajagá mochírige o suwisuga, alué ꞌyuga mochíwili ju nabí ꞌpa rewagachi.
\v 11 ꞌLiko ꞌla oiláriwa aꞌnagupi nakúriga rejcholi nejiga. ꞌÉmika ꞌma alarigá noká mochíkuru.
\s Jena ruwimela Páulo ꞌwe aꞌlá rejcholi ꞌyáligo  alué Onorúgame oyérame
\p
\v 12 Jípeko ꞌemi Onorúgame oyérame ju napurigá ramué, ꞌwe najkiá napurigá ꞌla nirawa ꞌemi alué ralámuli napu ꞌemi guꞌíriga nóchame ju. Alué Waꞌlula Esukristo ꞌsile ye nóchili ꞌyaa alué ralámuli napurigá rejcholi ꞌyámala ꞌemi.
\v 13 Asíriga ꞌla galegá etélime júkuru ꞌlige ꞌla niraga alué eꞌwélala, ꞌlige ꞌwe aꞌlá ganíliga ejperélawa suwábaga ka.
\p
\v 14 Ramueka ꞌemi Onorúgame oyérame ꞌwe anilíguru napurigá rejcholi ruyémala ꞌemi alué ralámuli nasinákuli napurigá alué ralámuli ꞌla nochámala. ꞌWe oiláriwa alué ralámuli napu ꞌwe kilí ralámuli ju. ꞌLa guꞌíriwa ralámuli alué napu tabilé ꞌcho ꞌla námame ju napu nulá Onorúgame, ꞌlige tase ayoga nulewa.
\p
\v 15 Bilé ralámuli ꞌwe cha ꞌsisa ꞌemi ꞌyuga, ꞌlige ꞌemi níriká tase che olawa alué ralámuli. ꞌWe aꞌlá nakúriwa ꞌemi aꞌbopi, ꞌlige uché jaré ralámuli abiena ꞌla guꞌírimili júkuruchigó.
\p
\v 16 Nabí ꞌla raꞌsálagá mochílime júkuru.
\v 17 Nabí naꞌtawa Onorúgame ꞌyuga.
\v 18 ꞌLa cheliera ꞌyawa Onorúgame suwábaga nejime koriká, tabilé chéré rekó ꞌwe nóchali kame ke iꞌsínimi alué napu Onorúgame nejí. Alarigá najkí Onorúgame, ꞌemi Kristo Esusi oyérame kame.
\p
\v 19 Tabilé che aniboa napurigá sewémala Onorúgame Alawala.
\v 20 Tase gawéliga raꞌichawa alué Onorúgame raꞌichálila nareme ralámuli olagá.
\v 21 Iligá abé ꞌla ju ꞌwe aꞌlá naꞌtalia napu ruwí alué ralámuli, ꞌla machibómpá pala bijchiá ko o tabilé bijchiá kómá. ꞌWe aꞌlá beniboa ꞌla aꞌká raꞌíchali napu tabilé ꞌyégali ju.
\v 22 Tase gepuwa alué chátiri raꞌíchali, ꞌlige tabilé eꞌwawa.
\p
\v 23 Onorúgame ju ralámuli guꞌírame napurigá tabilé weꞌká eꞌkarúginti ꞌnata mochímala ralámuli. Guꞌírilime ju napurigá ꞌwe aꞌlá sébili ralámuli nímala. Neka najkíguru napurigá Onorúgame ꞌemi guꞌírimala napurigá ꞌemi ꞌla sébali olámala napu Onorúgame najkí, napurigá ꞌla sébali olame ralámuli gainámala ꞌemi. Najkí ne napurigá alué ꞌemi alawala ꞌlige ꞌnátili ꞌla biꞌwígame nímala napuꞌlige uché sébachi alué Waꞌlula Esukristo anilime.
\v 24 Alué napu ꞌemi bayele Onorúgame ju, suwábaga ꞌla sébali olame júkuru, suwábaga ꞌla sébali olame kame napu aní.
\b 
\p
\v 25 ꞌEmi Onorúgame oyérame napurigá ramué, ꞌla tániwa Onorúgame napurigá ꞌla guꞌírimala Onorúgame ramué.
\p
\v 26 ꞌWe ꞌla repóriwa ka suwábaga Onorúgame oyérame.
\p
\v 27 Neka nuláguru napurigá raꞌichámala (leéramala) ꞌemi ye osilí suwábaga ralámuli napu ekí Onorúgame oyérame ju. Alarigá najkí alué Waꞌlula Esusi.
\p
\v 28 Najkí ne napurigá guꞌírua ꞌemi alué Waꞌlula Esukrístote. Alarigá ju.
\p Pe ikí képá ye raꞌíchali. Waꞌlú cheliérabá.