\id 2TH Baja Tarahumara
\h 2 TESALONICENSES
\toc1 2 TESALONICENSES
\mt Ye Ju Alué Apeli Napu Nujubá Osele Páulo Alué Ralámuli Napu Tesalónika Ejperégame Nílige
\c 1
\s Kuira suwábaga ꞌemi ralámuli Tesalónika ejperégame napu ekí Onorúgame oyérame ju.
\p
\v 1 Ne Páulo náoli ye raꞌíchali, Silasi ꞌlige Timoteo jena mochí ne ꞌyuga. Náoli ne ꞌemi ralámuli napu Tesalónika anilichi weꞌká riógachi napuíme ju Onorúgame raꞌichálila benimea, ꞌemi ralámuli napu ꞌwe ꞌla oyérame ju Onorúgame ramué Oꞌnola ꞌlige Waꞌlula Esukristo.
\v 2 ꞌWe najkiá napurigá Oꞌnó Onorúgame ꞌlige Waꞌlula Esukristo ꞌwe ꞌla semáriga guꞌírimala ꞌemi napurigá ꞌla biꞌlepi ꞌnata mochímala.
\s Jena ruwimela Páulo ruwíligo ꞌwe anáchame níligo alué ralámuli rekó chibi oliae cha nokame ralámulite
\p
\v 3 ꞌEmi Onorúgame oyérame napurigá ramué, ramueka senibí rawé cheliera ꞌyalía Onorúgame. Onorúgame ꞌwe ꞌla guꞌírame ju ꞌemi, alekeri cheliera ꞌyalía. Ye guꞌírilite ꞌemi aminacho ꞌla oyérame ju Onorúgame, ꞌlige aminacho asíriga ꞌla ganili ꞌemi aꞌbopi.
\v 4 Alekeri ꞌwe ruyame ju churigá ka ꞌemi napuꞌlige raꞌichalia bilénami reꞌobachi ꞌwe ganíliga. ꞌWe ruyame ju ꞌwe ꞌla anachio ꞌemi rekó ꞌwe najátalia ꞌemi alué cha nokame ralámulite, ꞌlige ꞌwe ꞌla anachio ꞌemi napuꞌlige ꞌwe ená oliae ꞌemi alué cha nokame ralámulite. ꞌÉmika tajsiné aꞌreme ju eꞌwá Onorúgame raꞌichálila.
\v 5 Alarigá ꞌwe ꞌla maꞌchígime néré ꞌwe ꞌla semáriga guꞌírilio ꞌemi Onorúgamete, ꞌlige Onorúgame ꞌwe aꞌlá gatéligo napurigá ꞌemi ꞌwe aꞌlá sébali eꞌwímala. Alekeri ꞌwe aꞌlá ju Onorúgame aꞌrea napurigá resí nílimala ꞌemi.
\p
\v 6 Aminami aka ꞌwe ꞌla júpaché gastigaria Onorúgame alué ralámuli napu ꞌwe cha nokame ju ꞌemi ꞌyuga.
\v 7 ꞌLige ꞌwe ꞌla júkuru aꞌkinana ꞌla guꞌírisa Onorúgame suwábaga ꞌemi napu ꞌwe resí nilia mochí jipe napurigá ꞌma ꞌla tabilé resí nílamala. Aꞌchigóriga guꞌírisa ꞌla kékuruchigó ramué. Alarigá nejkúrimala Onorúgame iꞌlibeko napuꞌlige uché nawá Esukristo weꞌká santo ánjeli ꞌyuga ꞌpa rewagáchika napurigá ꞌma ꞌla resíbopua ramué. Nawámala Esukristo ꞌpa rewagáchika naꞌírale.
\v 8 Ralámuli gastigárimia nawámala alué tabilé Onorúgame oyérame, ꞌlige tabilé eꞌwame alué raꞌíchali napu ruyame ju chieri ko alué Waꞌlula Esusi.
\v 9 Alué ralámuli gastigáriwili ju alué gastígote napu tabilé suwíbame nímala, ꞌlige ꞌma ꞌlúpua alué ralámuli ꞌmi mejká napu tabilé peꞌtá nérélamala Onorúgame alemi nibilé Onorúgame aꞌwalila.
\v 10 Alarigá ikimela napuꞌlige alué Waꞌlula Esukristo seba napurigá ꞌwe ꞌla ganíliga etewa alué ralámulite napu oyérame ju Esukristo. ꞌÉmika ꞌma ꞌla oyérame ju alué raꞌíchali napu ruyérige ꞌemi. Alekeri ꞌémika napuíka mochímili júkuru uché jaré oyérame ꞌyuga aꞌlige rawé napuꞌlige sébachi Esukristo.
\p
\v 11 Alekeri ramué ꞌwe tánilia Onorúgame napurigá Onorúgame aꞌwalí ꞌyámala ꞌemi napurigá ꞌwe aꞌlá sébali olámala napu najkí ꞌemi. Onorúgame ꞌsime ju ye ꞌnátili ꞌya, ꞌlige ꞌla sébali olagá ye, Onorúgame ꞌwe aꞌlá ganíliga etémala ꞌemi.
\v 12 Alarigá tánili ramué Onorúgame napurigá ꞌemi nímala napurigá alué Waꞌlula Esusi ꞌlige napurigá ralámuli ꞌwe aꞌlá nirámala Esusi, ꞌlige alué Esusi ꞌwe aꞌlá nirámala ꞌemi. Alarigá ikimela Onorúgame ꞌlige Waꞌlula Esusi asíriga ꞌla sébali olámili ju ꞌemi ꞌyuga.
\c 2
\s Jena ruwimela Páulo ruwíligo churigá ko alué cha ꞌsime rió
\p
\v 1 Jena ruimé ne churigá nimio napuꞌlige uché nawachi Waꞌlula Esukristo ꞌpa rewagáchika, ꞌlige aminami churigá napuípili ko ramué alé alué Esukristo ꞌyuga.
\v 2 Ramueka ꞌwe tánalia ꞌemi napurigá tabilé guwana rujsúmala ꞌemi weꞌká tábiri ꞌnátaga. ꞌWe aꞌlá naꞌtawa bilé ralámuli anichi Onorúgame raꞌíchali ꞌyáligo. ꞌLige ꞌwe aꞌlá naꞌtawa bilé ralámuli anichi ramué júligo bilé raꞌíchali osiruga anigá ꞌma ku sébiligo alué Waꞌlula Esukristo jena wijchimoba. Tabilé majawa, nibilé bijchígiwa. Siné kachi bilénami osilichi maꞌchínamala alanime raꞌíchali.
\v 3 Tabilé bijchígiwa, bajchá ꞌwe aꞌlá rukiboa. Tabilé ꞌcho sébachi alaké rawé napuꞌlige nawámachi Waꞌlula Esukristo, weꞌká ralámuli sairámala Onorúgame, aꞌlige maꞌchínamala alué rió napu ꞌyégame ju, alué rió napu juláwili ju injiérnochika Onorúgamete.
\v 4 Alué rioka Onorúgame saíla ju, ꞌlige alueka tabilé nirámala napu ralámuli nirame ju. ꞌMa reꞌobachi pachá alé mesa ilígichi nawámili ju ꞌlige aleka iligá Onorúgame korimela.
\p
\v 5 ¿Tacha nélá ꞌemi ne ye tábiri ruwichi ne ꞌemi si eyénaga?
\v 6 ꞌLige ꞌemi ꞌwe ꞌla machí chonigá tabilé ꞌcho maꞌchínimio alué rió chátiri ꞌyégame napusí ꞌma sebasa raweli aꞌlige kulí maꞌchínamala alué rió.
\v 7 Alué rió chátiri ꞌyégame ꞌma ꞌwe ꞌla sébali ꞌnata ajtí churigá resí olamio ralámuli, pe rokáré napurigá ꞌmi chajkénami elawa alué napu ilí alemi raꞌama.
\v 8 Aꞌlige maꞌchínamala alué rió napu ju ꞌwe chátiri ꞌwe ꞌyégame, alué Onorúgame saíla. ꞌLige alué Waꞌlula Esusi ꞌma rekábamala alué ꞌyégame rió pe buchigá. Pe Esusi etega raꞌósiga ilígichi mukumela alué rió ꞌyégame.
\v 9 Alué rioka sebámala ꞌwe aꞌwágame napugiti Satanasi guꞌira asimémpá alué rió aꞌwalí ꞌya. ꞌWe aꞌwágame nímala alué rió napuꞌlige seba jena. Asíriga waꞌlú nílamala aꞌwalí, eꞌkarúgame nóchali nochámala napu taꞌwesi ralámuli gainásaré.
\v 10 Alué rió ꞌwe inílame ꞌwe ꞌla benélimala ꞌyégiga alué ralámuli napu tabilé bijchígile Onorúgame nila raꞌíchali, alué napu tabilé nirame nile alué ꞌwe ꞌla bijchiá raꞌíchali napurigá ꞌla buyásimili nílige alé resítirichi. Alué ralámulika ꞌlégana injiérnochi simámala.
\v 11-12 Alekeri Onorúgame elí alué ralámuli napurigá bijchígamala alué ꞌyégali raꞌíchali alué Remónisi raꞌichálila, napurigá alué ralámuli ꞌlégana injiérnochi simámala napu ekí tabilé ꞌla oyérale alué raꞌíchali Onorúgame nila raꞌíchali, alué ralámuli napu pe ꞌwe ganílime ju alué chátiri tábiri nóchaga, tase ꞌla Onorúgame nila nóchali. Alueka tabilé machí resí nokigá jario.
\s Jena ruwimela Páulo ruwíligo Onorúgame repáligo  napurigá ꞌla buyásawa alé resítirichi
\p
\v 13 ꞌEmi Onorúgame oyérame napurigá ramué, Onorúgame ꞌwe galé ꞌemi, alueka ꞌwe ꞌyasi ꞌnátaligame napurigá ꞌemi buyámala alé resítiri bowechi. ꞌLige Onorúgame Alawala wanápale ꞌemi, ꞌlige ꞌémika ꞌwe aꞌlá bijchígale alué bijchígili raꞌíchali. Alekeri waꞌlú cheliera ꞌyáwili ju Onorúgame.
\v 14 Onorúgameka boꞌné nila raꞌíchalite bayele ꞌemi, alué raꞌíchali napu ramué ꞌemi benírilia, napurigá narémala ꞌemi alué Waꞌlula Esukristo aꞌwalila.
\p
\v 15 ꞌLiko ꞌemi Onorúgame oyérame, tase guwana rujsúpua, ꞌlige tabilé weꞌkuawa alué raꞌíchali napu ramué ꞌemi beníriru napuíka mochiga ꞌlige iꞌsínimi apélichi osagá.
\v 16 Alué Waꞌlula Esukristo ꞌlige Onorúgame ramué Oꞌnola ꞌwe aꞌlá sébali olame ju. ꞌWe galele ramué ꞌlige tabilé siné aꞌreme ju ramué oilaria. Alekeri ꞌla machiaa ramué buyawa alué tabilé aꞌlá bowechi.
\v 17 Alekeri tani ne Onorúgame ꞌlige Esukristo napurigá waꞌlú aꞌwalí ꞌyámala ꞌemi napurigá ꞌwe aꞌlá sébali maꞌchínamala suwábaga napu noká ꞌemi ꞌlige napu raꞌicha ꞌemi.
\c 3
\s Jena ruwimela Páulo najkió  napurigá Esukristo raꞌichálila sebámala bochígimi
\p
\v 1 Pe uꞌkabi raꞌíchali ruimé ne. ꞌEmi Onorúgame oyérame napurigá ramué, jípeko najkí ne napurigá ꞌemi Onorúgame tánamala napurigá ramué guꞌírimala, napurigá alué Waꞌlula Esukristo raꞌichálila ꞌla yati sebámala bochígimi, ꞌlige napurigá ꞌla oyéramala ralámuli alué raꞌíchali ꞌwe ꞌla ganíliga, aꞌchigóriga napurigá oyérale ꞌemi.
\v 2 ꞌWe ꞌla tániwa Onorúgame napurigá tabilé aꞌrémala napurigá resí olawa ramué alué cha nokame ralámulite. Pecha suwábaga ralámuli bijchígame kame Onorúgame nila raꞌíchali napu ramué ruyá.
\v 3 Alué Waꞌlula Esukrístoka ꞌwe aꞌlá sébali olame ju napu anime ju, ꞌwéchigo ꞌla biꞌlepi ꞌnátili ꞌnátame kame, ꞌlige alueka ꞌwe aꞌlá nejkúrimala napurigá ꞌla biꞌlepi ꞌnátili ꞌnátaga járomala ꞌemi, ꞌlige ꞌwe ꞌla nejkúrimala napurigá tabilé cha olawa ꞌemi alué cha nokame ralámulite.
\v 4 ꞌLige ꞌwe aꞌlá machiaa ramué ꞌemi abichilubi ꞌla sébali olamio napu ramué nulalía. Waꞌlula Esukristo nejí alué ꞌnátili.
\v 5 Neka najkié napurigá alué Waꞌlula Esukristo nejkúrimala naꞌtálichi napurigá ꞌemi ꞌwe ꞌla galémala ralámuli, aꞌchigóriga napurigá galeme ju Onorúgame suwábaga ralámuli, ꞌlige napurigá anachámala napurigá anáchale Kristo.
\s Jena ruwimela Páulo churigá nocháwilikó
\p
\v 6 ꞌEmi oyérame napurigá ramué, alué Waꞌlula Esukristo nóchali ꞌya ramué napurigá ramué ꞌemi tebúpua, alekeri nulelia ramué ꞌemi napurigá tabilé napuíka eꞌyénamala alué oyérame ꞌyuga napu ꞌwe najsinákuli ju, napu tabilé sébali olame ju alué rejcholi napu ramué beníriru ꞌemi.
\v 7 ꞌEmi aꞌboi ꞌwe ꞌla machí churigá ejperélitiká ꞌemi níriga napurigá ꞌla aꞌchigóriga ejperélamala napurigá ramué. Ramueka tabilé najsinákuli neraga mochírigeturu napuꞌlige ꞌemi si mochiga,
\v 8 ꞌlige tajsiné naretu alué goꞌame napu ꞌemi ꞌyánili ramué. Ramueka rukuchégame nocháruturu ꞌlige abiena rukomi goꞌame meka napurigá tabilé seꞌwiná lámala ꞌemi.
\v 9 Ramueka ꞌemi beníriga eꞌyénilituru, ꞌlige ꞌla nílige napurigá ꞌemi goꞌame kónimala, nobi ramueka najkirú napurigá ꞌemi benimela nóchaga ramué etega.
\v 10 Napuꞌlige ꞌemi ꞌyuga mochiga ramué ye rejcholi beníririgeturu: Bilé rió tabilé nochásaká tabilé goꞌmeli júkuru.
\v 11 Ramueka akirú tabilé nocha mochigo jaré ꞌemi, pe nejkumega eꞌyéname kará.
\v 12 Alué Waꞌlula Esukristo nóchali ꞌyale ramué napurigá ꞌemi repúpua, alekeri nulelia ramué alué ralámuli najsinákuli napurigá nochámala napurigá mémala goꞌame.
\p
\v 13 ꞌEmi Onorúgame oyérame napurigá ramué, tabilé aꞌchigóriga niwa napurigá alué ralámuli najsinákuli, tase najsinawa ꞌla nóchali nóchaga.
\v 14 Jaré ralámuli oyérame tabilé eꞌwásaká napu aní ye apeli napu ramué osirú. ꞌWe ꞌla naꞌtáwaká churigá ka alué rió, ꞌlige tase gompaniérola niwa alué rió napurigá alué rió ꞌla chijunámala.
\v 15 Tabiléchigo saíla neraga etéwagó alué rió, ꞌwe ꞌla ruyewa ꞌlina rejcholi napurigá Onorúgame oyérame neraga.
\b 
\p
\v 16 Najkí ne napurigá alué Waꞌlula Esukristo ꞌwe ꞌla guꞌírimala ꞌemi senibí napurigá tabilé weꞌká ꞌnátili naꞌtámala ꞌemi ꞌlige napurigá ꞌla ganíliga ejperélamala ꞌemi.
\p
\v 17 Ne Páulo reparánili ne boꞌné sekálate osigá ye jena nujubá enágame osilí. Nabí alarigá osame ju ne napuꞌlige náolia bilé raꞌíchali.\f + \fr 3:17 \ft Uché bilé rió osale ye osilí napu Páulo anele. Pe jénacho osale boꞌné sekálate. \f*
\v 18 Neka najkíguru napurigá alué Waꞌlula Esukrístote guꞌíriwa ꞌemi senibí. Alarigá ju.
\p Pe ikí képá ye raꞌíchali. Waꞌlú cheliérabá.