\id 2TI Baja Tarahumara
\h 2 TIMOTEO
\toc1 2 TIMOTEO
\mt Ye Ju Alué Apeli Napu Nujubá Osele Páulo Alué Timoteo
\c 1
\s Kuira mué Timoteo.
\p
\v 1 Ne Páulo osá ye osilí. Alué Kristo Esusi napu ꞌpa rewagáchika julárigame nílige Onorúgamete nejíturu bilé nóchali. Alarigá lale boꞌné Onorúgame. Onorúgame anile: “ꞌLa oyérisiká Kristo Esusi ꞌliko semati raweli rewimela ꞌemi.” Onorúgameka tabilé siné ꞌyégame ju. Nabí bijchiá ruwime ju.
\v 2 Neka mué Timoteo oséguru. Neka asíriga naꞌtemaka eteme ju mué napurigá ne boꞌné inolá neraga. Onorúgame júkuru ramué Oꞌnola, ꞌlige Esukristo júkuru ramué nuleme. ꞌWe semáriga nejkúrasa ꞌla képá Onorúgame, ꞌlige Esukristo semati bamíbali nejisa ꞌla képá. Alueka ꞌwe naꞌtemame ju ramué. Semáriga nijkúrasa ꞌla képá Onorúgame napurigá tabilé weꞌká naꞌtawa ramué, biꞌlepi ꞌnátili ꞌnátaga Onorúgame naꞌtálilacho.
\s Jena ruwimela Páulo ꞌwe tániligo Onorúgame napurigá ꞌla semáriga guꞌírimala Timoteo
\p
\v 3 Rawé ꞌlige rukomi raꞌíchame júturu ne Onorúgame ꞌyuga, cheliera iꞌgá waꞌlú guꞌírilio mué aluete. Neka israelita ju. Neka Onorúgame nochálilachi nóchame júkuru, napurigá nokale alué ralámuli israelita ꞌya mochígame. Neka ꞌla biꞌwígame ꞌnátame ju, ne naꞌtálilaká asíriga ꞌla biꞌwígame júkuru.
\v 4 Neka ꞌwe ganíliga ajtigéturu mué bejtélachi, ꞌlige neka ꞌwe ꞌla nélá, ꞌma simichi ne, ꞌma nalagáturu mué. Alekeri mué ꞌyuga raꞌichánili ne Onorúgame raꞌichálila uchéchigo siné, napurigá ꞌwe ganíliga raꞌichawa ramué okaka.
\v 5 Neka ꞌwe nélá, mué ꞌla bijchígime ke Onorúgame raꞌichálila, aꞌchigóriga bijchígime kéturu mué uꞌsula napu Lóira anilime nílige, ꞌlige mué eyélatiri napu Unisia anilime nílige.
\p
\v 6 Alekeri neka najkíguru napurigá aminabi sísimala mué Onorúgame raꞌichálila benírisia Onorúgamete ꞌyáliru mué alué nóchali napuꞌlige ne sekálate nochá mué.
\v 7 Onorúgameka pecha majárime ꞌnátili nejílekó. Alueka waꞌlú aꞌwalí ꞌyale ramué napurigá ꞌla niraga etewa chejaré ralámuli, ꞌla naꞌtemaka suwábaga, ꞌlige napurigá ta guwana rujsúpua ramué, ꞌla biꞌlepi ꞌnátaga járilime júkuru tabilé iꞌkirú nokogá.
\v 8 Alekeri tabilé chijunawa ralámuli raꞌíchali ruyea ꞌwe ꞌla ko alué waꞌlula Onorúgame ramué nuleme. Tabilé chijunawa ruigá ne galírale bajcháriga ajtigó. Neka galírale bajcháriga ajtíkuru Esukristo raꞌichálila beníriga. Neka asíriga resí nilia ajtíkuru ye raꞌíchali beníriga ralámuli. Muéchigo abiena resí ikimeli júkuru napurigá ne. Onorúgame nejí aꞌwalí napurigá anachawa.
\v 9 Alué ꞌsílekuru ramué aꞌkabámana jawa, alué ꞌsílekuru nóchali ꞌya ramué napurigá Onorúgame nila nochálilachi nochawa. Ramueka tabilé benégame niru Onorúgame nochálila nóchaga. Onorúgameka abirigáchigo benírile ko ramué naꞌtemaka. Napuꞌlige Onorúgame taꞌchó newá ye gawí, ꞌwe ꞌla ꞌnátale boꞌné churigá guꞌírimio, ꞌnata asale Kristo Esusi julamia.
\v 10 ꞌMa sébalekuru Esukristo ramué aꞌkabámana jawamia. ꞌLa machirú Onorúgame ꞌwe ꞌla nejkúrime ko. Onorúgameka Remónisi uméralekuru, ꞌma ꞌla mochítékuru napurigá Onorúgame najkí, ꞌlige aminami napurigá nabí Onorúgame si mochiwa ꞌpa rewagachi.
\p
\v 11 Onorúgamete ꞌyárukuru ne ye bilé nóchali napurigá gatewa Onorúgame ꞌyuga sairúgame neraga mochígame. ꞌLige abiena nulélekuru neꞌchí napurigá nulame nímala ne ꞌlige abiena benírame nímala ne Onorúgame raꞌichálila alué ralámuli tabilé jurío.\f + \fr 1:11 \ft Alué ralámuli jurío aniáká, pe ralámuli israelita aniame kéré. \f*
\v 12 Neka ꞌláchigo sébali olame kame alué nóchali nulésiga, alekeri ꞌwe resí nilia ajtí ne. Abirigáchigo tabilé chijúnago ne rekó galírale bajcháriga ajtigé. Neka asíriga ꞌla machí alué Esukristo, alué napu ne oyérame ju. ꞌWe ꞌla bijchiga ajtí ne, alueka waꞌlú aꞌwalí ꞌyáturu neꞌchí napurigá aꞌwágame nocha asimela ne ye Onorúgame raꞌichálila beníria ralámuli, napusí ku boꞌné nawá jena wijchimoba.
\p
\v 13 Tabilé aꞌréwaguru beniria napu ne beniri mué. ꞌWe ꞌla eꞌwewa Kristo Esusi, ꞌlige ꞌwe ꞌla galewa. Alarigá ꞌwe ꞌla benírimala mué.
\v 14 ꞌWe ꞌla repúpua alué nóchali Onorúgame nila. Onorúgame Alawálaka ramué si bejtégame júkuru, ꞌlige nejkúrame júkuru repúkichi alué Onorúgame nejílala nóchali.
\p
\v 15 Mué ꞌma machíguru, suwábaga ne gompaniérola alé Asia anilime waꞌlú gawí weꞌkaná riógachi mochígame ralámuli ꞌma biꞌneli aꞌrigó neꞌchí. Alueka tabilé anáchale, bilé Pigelo anilime kéturu, ꞌlige bilé Ermójeni.
\v 16 ꞌLige uchéchigo bilé kéturu alueka ꞌla anáchigeturu, alueka Onesípora anilime kéturu. Alueka asíriga weꞌsá nejkúrituru. Alueka tabilé chijúname kéturu jena nawá ne galírale bajcháriga ajtígichi. Onorúgame naꞌtemasa ꞌla kékuru alué rió ꞌlige ꞌkúchila ꞌyúriga.
\v 17 Alueka nawálekuru jena waꞌlú weꞌká riógichi Roma anilichi neꞌchí eꞌnemia. Weꞌlí ꞌsile neꞌchí ꞌya. ꞌWe nóchali olagá rewá neꞌchí. Abirigáchigo ꞌla rewale ko neꞌchí jena asirúgichi galírale bajcháriga.
\v 18 ꞌLa kékuru Onorúgame ꞌwe ꞌla naꞌtemasa alué rió napuꞌlige raweli sébachi gustisia olachi Onorúgame. Mué ꞌwe ꞌla machíguru ye rió Onesípora ꞌla guꞌírigo neꞌchí alé weꞌká riógichi Ebeso anilichi.
\c 2
\s Jena ruwimela Páulo ruwíligo ꞌla anachálime ko  rekó ꞌwe resíriga etuwíe
\p
\v 1 Mué Timoteo, napurigá ne inolá neraga ju mué, Esukristo aꞌwalílate nocháwaká napurigá ꞌla sébali olámala mué alué Onorúgame nejílala nóchali.
\v 2 Mueka asíriga ꞌla benile rejcholi napu ne ruwí weꞌká ralámuli akériga. Mueka ꞌwe ꞌla ruyéwaká uché jaré ralámuli napu ekí Onorúgame oyérame ju. Alueka amináchigo uché jaré ralámuli benírimili júkuru.
\p
\v 3 ꞌLa anachawa napuꞌlige resí nílilie napurigá Kristo Esusi sontálola.
\v 4 Bilé ꞌwe ꞌla sontáloka pecha chebilena chujkírame júkó, pe iligá sébali oliáme ꞌnátame ju nóchali napu alué gapitani ꞌyálige napurigá sontalo nímala. Alué sontáloka najkíguru napurigá ꞌwe ganíliga asimela alué gapitani alué boꞌné sontalo ꞌyuga. Alarigá ju ramué Esukristo oyérame pe biꞌlepi naꞌtálime júkuru napurigá nulá boꞌné Esukristo.
\v 5 Bilé rió ꞌwe roweme nisa, ꞌla sébali olámili júkuru napurigá ju bilé reꞌgí. Tabilé sébali olásaká, ꞌliko tabilé mémala.
\v 6 Abiénachigo alué echame, bajchá goꞌmeli júkuru alué goꞌame rakégame.
\v 7 ꞌWe ꞌla náꞌtawa napurigá aní ne. Onorúgame ꞌla nejkúrimala napurigá ꞌla námapua suwábaga ye raꞌíchali.
\p
\v 8 ꞌWe ꞌla naꞌtawa ye. Esukrístoka uchéchigo siné narélekuru alawá siné mukusá, ꞌma ku ajagá ajtí. ꞌLige Esukristo alué waꞌlula nulame Rabí rijimala nile ꞌwe ꞌya ajtígame.\f + \fr 2:8 \ft Alué ralámuli israelita anime nile: “Alué aꞌkabámana jáwame ralámuli, alueka Rabí rijimala nímala aꞌkinana oꞌchérigame”, arigá anile. \f* Ye raꞌíchali júkuru napu ne ruwí,
\v 9 alekeri ꞌwe resí nília ajtí ne. Karénate buluruga ajtí ne napurigá bilé rió ralámuli meꞌgá ilírome, nobi rekó neka buluruga ajtigé, Onorúgame raꞌichálilaka tabiléchigo buluruga ajtíkó.
\v 10 Neka ꞌla anáchame júkuru rekó ꞌwe resí oliáe uché jaré ralámuli guꞌíriga, alué ralámuli napu Onorúgame bayélige, napurigá ꞌla aꞌkabámana eꞌyénigime nímala ꞌla Onorúgame oyériga. Kristo Esusi ꞌsime ju buyana aꞌkabámana jawa. Alué ralámulika asíriga ꞌla semáriga mochímala senibí ꞌpa rewagachi Onorúgame ꞌyuga.
\q
\v 11  Alué napu jipe ruwimela ne, ꞌwe ꞌla bijchiá ju:
\q ꞌLa bijchígisiká Esukristo mukúligo 
\q napurigá aꞌkabámana jawániliga
\q ꞌlige tabilé chátiri bowechi mochisa,
\q ꞌliko ramué abiénachigo Esukristo ꞌyuga mochiwa.
\q
\v 12  Napu ekí ꞌla anáchame ju,
\q ꞌla nochámala Esukristo ꞌyuga.
\q Tabilé machiórisúga chiériko Esukristo,
\q ꞌliko Esukristo tabilé machió orimela ꞌliko ramué.
\q
\v 13  Ramué tabilé oyérisiká Esukristo raꞌichálila,
\q alueka abirigá sébali olámili júkuru napurigá anílige boꞌné.
\q Alueka abirigá sébali olame ju,
\q alueka Onorúgame kame, pecha ꞌyégime júkó.
\p
\v 14 ꞌWe aꞌkué ruyewa napurigá ꞌla ꞌnátaga mochímala ye raꞌíchali alué ralámuli. Ruyewa pecha ꞌla júkó naꞌáuka mochilia aꞌbopi, ruyewa Onorúgame asíriga ꞌla eꞌnegá ajtigó. Alarigá raꞌichalia, pecha ꞌla júkó. Pe najsibume ju alué ꞌwe ꞌla gepume ralámuli.
\v 15 Napusí gainaru si nochawa alué nóchali napu mué ni napurigá Onorúgame ꞌla ꞌwe nóchame neraga etémala ꞌla sébali olame, ꞌliko ꞌla tabilé chijunámala mué. ꞌWe ꞌla gepuwa alué ꞌwe ꞌla bijchiá raꞌíchali, ꞌlige aminami ꞌwe ꞌla eꞌwawa.
\v 16 Pecha ꞌla júkó tabilé neraga raꞌichalia Onorúgame. Ralámuli tabilé Onorúgame ꞌnátaga raꞌíchame ka, aminacho weꞌká raꞌichámala sairúgame neraga Onorúgame ꞌyuga.
\v 17 Ralámulika yati oyéramala alué cha nokame ralámuli raꞌichálila. Alué oká rió ꞌwe cha nokame, bilé Jimeneo anilime ju, ꞌlige uché bilé Bileto anilime ju,
\v 18 alué noká Onorúgame raꞌichálila najsibua. Alué oká rió anile: “ꞌMa simírale raweli napuꞌlige uchéchigo siné ajánamaráe suwígame.” Pe ralámuli najsibuga aní alué ꞌla Onorúgame oyérame.
\v 19 Tabilé chéré rekó alué cha nokame ralámuli lanié, pe Onorúgame raꞌichálila tabilé weꞌkásaká ꞌla júkuru. Onorúgameka pecha weꞌkuámili júkó alué oyérame. ꞌLa machiáguru alarigá ko napugiti Onorúgame raꞌichálila regáchigo aniame: “Alué Waꞌlula Onorúgame ꞌwe ꞌla machí boꞌné ꞌkúchila ralámuli.” Abiena regá aní: “Ralámuli ꞌla bijchiá oyérame ko Waꞌlula Onorúgame, ꞌla nígame ju aꞌwalí napurigá aꞌrémala cha noká.”
\p
\v 20 Bilé waꞌlú galí ilígichi weꞌká eꞌkarúgame newárigime ju ꞌórote ꞌlige plátate, ꞌlige aminami igútiri eꞌkarúgame newárigime ju ꞌlige wejcholítiri. Jaré goꞌame ajchilime ju ꞌlige jaré pe repuga ajchálime ju.
\v 21 Bilé rió aꞌrésaká alué resítiri raweli, ꞌliko alué rió asíriga aꞌlá nímala, asíriga rejchirúgame suwábaga nóchali nóchaga napu Onorúgame ꞌya. Asíriga ꞌla rió nímala, ꞌla Onorúgame oyérasaká, ꞌliko napurigá bilé bilato ꞌórote newárigime nímala, tase napurigá bilé sikolí repuga ajchala.
\p
\v 22 ꞌMa aꞌrewa alué chátiri ꞌnátili napu mué ꞌnátame nile reꞌmalí ka. ꞌWe ꞌla niraga etewa ralámuli. ꞌWe ꞌla sébali rió nínilisiká, asíriga ꞌla sébali olawa napurigá aní Onorúgame nila raꞌíchali. Asíriga ꞌla galegá etélime júkuru ralámuli, asíriga ꞌla niraga aminami. Alarigá nírukuru ꞌla biꞌígame sulégame níriká.
\v 23 Tabilé gepuwa uché jaré ralámuli naꞌáuka raꞌicha jágichi, pecha ꞌla júkó alué raꞌíchali. Alué ralámulika pe tabilé Onorúgame ꞌnátiga raꞌíchame ju. Pecha raꞌichálime júkó alué ralámuli ꞌyuga. Rekó rukechi pecha nejélime júkó. Mué alué ralámuli ꞌyuga raꞌichásaká, pe naꞌáwili oꞌwímala.
\v 24 Mueka Waꞌlula Onorúgame ꞌyuga nóchame júkuru, alekeri tabilé nejkómili júkuru mué uché jaré ralámuli ꞌyuga. Eligá abé ꞌla ju gompaniérola niraga etelia uché jaré ralámuli. Asíriga ꞌla ꞌnátaga asiame júkuru napuꞌlige alué ralámuli Onorúgame raꞌichálila ruyea. Tabilé chélegá etélime júkuru alué ralámuli. Tabilé chéré rekó alué ralámuli cha nokame ke, napurigá ꞌla machimela Onorúgame nila raꞌíchali.
\v 25 Asíriga ꞌla rejcholi iꞌlime júkuru alué ralámuli napu sairúgame neraga mochí, tabilé riólame rió neraga ꞌyawa rejcholi. Siné kachi ꞌla guꞌírimala Onorúgame alué ralámuli napurigá ꞌla bijchígimala alué ꞌla bijchiá raꞌíchali.
\v 26 Alarigáká ꞌwe ꞌla naꞌtámili júkuru, ꞌlige ꞌma aꞌrémili júkuru alué Remónisi naꞌtálila. Jípeko Remónisi asíriga chaꞌpigá ajtí alué ralámuli, ꞌlige alué ralámuli eꞌwame ju napu Remónisi najkí.
\c 3
\s Jena ruwimela Páulo ruwíligo peꞌwemi sebamio resítiri raweli
\p
\v 1 ꞌWe ꞌla gepuwa ye raꞌíchali: Napuꞌlige amulí suwíbachi gawí, ꞌwe resítiri bamí nímala, asíriga chárigá nímala.
\v 2 Ralámuli pe aꞌbopi naꞌtemaka járomala. Pe weꞌká eꞌkarúginti korúmala. ꞌLige aminami asíriga rióliga raꞌichámala, asíriga aꞌká ralámuli kolámala aꞌboi meꞌtigá uché jaré ralámuli. Aminami asíriga chátiri raꞌichámala uché jaré ralámuli olagá. Tabilé eꞌwámala napu aní oꞌnola ꞌlige eyela. ꞌLige aminami tabilé cheliera nejímala rekó ꞌla guꞌírasa alué ralámuli. Tabilé nirámala Onorúgame.
\v 3 Tabilé galémala uché jaré ralámuli. Tabilé eꞌkámala uché jaré ralámuli. ꞌLige sairúgame neraga raꞌichámala uché jaré ralámuli olagá, cha olániliga. Cha nokimela napuꞌlige cha nokinálisa tabilé niraga uché jaré ralámuli. Napurigá ajágame jami oyame alieri nímala, asíriga ayoga etémala suwábaga ꞌla semátiri.
\v 4 ꞌLige aminami uché jaré ralámuli ꞌyégimala. ꞌLige tabilé ꞌnátame nímala, pe napuchibi nokogá járome nímala. ꞌMa sébali ejebénigame mayémala aꞌboi, ꞌma tabilé ꞌwesi tábiri resíláame neraga naꞌtámala. Abé ꞌla korimela chibi nokogá eꞌyénilia meꞌtigá Onorúgame ꞌyuga naꞌtalia.
\v 5 ꞌLige asíriga ꞌla Onorúgame oyérame korime nímala nobi tabiléchigo ꞌnátame kéréko, tabilé tánime Onorúgame napurigá ꞌla ꞌnátaga eꞌyénamala. Mué Timoteo, tase gompaniero gainawa alué chátiri ralámuli ꞌyuga, pecha bijchígame ka Onorúgame nila raꞌíchali.
\p
\v 6 Alué ralámulika ꞌwe semátiri raꞌíchame ju napurigá ꞌla bayérowa alé alué umugí ejperélachi napu mochí alué tabilé ꞌla ꞌnátame umugí. Alué umugika ꞌwe resítiri alawégame ju, ꞌwe chátiri ꞌnátame ju, ꞌwe koruka eteme weꞌká rió. Alekeri alué chaꞌsime rió tabilé nóchali olámala alué umugí gompaniérola gayena.
\v 7 Ye umugika weꞌká nóchali benináliguru nobi tabilé siné eꞌwame júkó napu aní Onorúgame nila raꞌíchali.
\v 8 Alué rioka tabilé nirame ju alué ꞌla aꞌká raꞌíchali. Aꞌchigóriga ju alué rió napurigá nílige alué oká rió sujkurúgame ꞌya mochígame, alué napu sairúgame neraga mochílige Moisesi ꞌyuga. Alué ralámuli bilé Janesi anilime nile, ꞌlige bilé Jabresi anilime nile.\f + \fr 3:8 \ft Siné kachi alué oká rió sujkurúgame karáeturu alé Ejipto mochígame ꞌwe ꞌya rawé, alué napu Moisesi saega mochílige. Jaré ralámuli aní pe “geriyero” aniame ko Janesi aniáká. ꞌLige jaré ralámuli aní pe “sairúgame niraga” aniame ko Jambresi aniáká.\f*
\v 9 Alué ralámuli cha nokame ka tabilé weꞌká gompaniérotamala. Suwábaga ralámuli machimela alué ralámuli tabilé ꞌla ꞌnátame ko, aꞌchigóriga napurigá alué oká rió Ejipto mochígame.
\p
\v 10 Mueka asíriga ꞌla machíguru alieti benírame ko ne, ꞌlige chuꞌsime ko ne, ꞌlige tachiri gite beniri ne. Mué ꞌla machilke ne ꞌwe ꞌla oyérame ko Onorúgame. Abiena machí mué ne tabilé ꞌme ayome ko ralámuli ꞌyuga. ꞌLige ꞌwe galeme ko ne ralámuli. ꞌLige aminami abiena machí mué ne ꞌwe anáchame ko rekó rasíriga etuíme ke.
\v 11 Asíriga najátilime kéturu ne alué chátiri ralámulite, ꞌlige alekeri asíriga resí nilia ajtíkuru ne. Mué ꞌwe ꞌla machilke alarigá etélirigo ne alé Antiokía anilichi weꞌká riógichi, ꞌlige alé Ikonio anilichi weꞌká riógichi, ꞌlige alé Lístrasi anilichi weꞌká riógichi. Ye lakiná weꞌká riógichi asíriga anacha ne resí níliga eyéniga, ꞌlige waꞌlula Onorúgame ꞌwe guꞌiri neꞌchí napurigá ne ꞌla maꞌchínamala resí níliga eyénachi.
\v 12 ꞌLa bijchiá ju, suwábaga napu ekí ꞌla Esukristo oyériga ejperénilime ka asíriga najátawili ju alué chátiri ralámulite.
\v 13 Alué chátiri ꞌyégame ralámulika aminacho weꞌká eꞌkarúgame chátiri nochámala. ꞌMa ꞌyégamala, pe aꞌbopi ꞌyegámala alué ralámuli.
\p
\v 14 Nobi mué Timotéoka, tabiléchigo aꞌréwagó Onorúgame raꞌichálila napu mué benílige. Mueka ꞌma machíguru ꞌla bijchiá ko alué raꞌíchali. Mueka asíriga ꞌla machíguru ralámuli alué napu nokale mué beníria.
\v 15 Mueka asíriga uꞌtá ka benílekuru Onorúgame raꞌichálila. Ye raꞌíchalika ꞌwe nejkúrimala machiachi churigá maꞌchínawa alé resiti bowechi. Alué raꞌíchali ruwime ju alué Esukristo napu Onorúgamete julárigame nílige ꞌpa rewagáchika, alué buinámala ramué alé resítirichi. Alué oyérilime júkuru.
\v 16 Suwábaga ye raꞌíchali, Onorúgame ꞌsílekuru náwala napurigá ralámuli beníriwa. ꞌWe ꞌla ju napurigá rejcholi ruyewa ralámuli napuꞌlige tabilé aꞌlá ꞌnátachi, napurigá ku ꞌla naꞌtámala. ꞌLige aminami guꞌíriwa machiachi ꞌwe ꞌla ko ꞌla tabilé cha nokame nírigichi.
\v 17 Ye raꞌíchalika regá júkuru napurigá bilé rió Onorúgame oyérame ꞌwe ꞌla ꞌnátaga asimela ꞌla sébali olagá, napurigá ꞌla Onorúgame oyériga asimela.
\c 4
\s Jena ruwimela Páulo ruwíligo nabí ꞌwe ꞌla ꞌnata mochílime ko  beníria Onorúgame raꞌichálila
\p
\v 1 Onorúgame ꞌwéchigo ꞌla eꞌnegá ajtigame ꞌlige Esukristo abechigó. Alué ꞌsímala ralámuli gustisia olá alué napu ajagá mochí jipe ꞌlige alué napu ꞌma suwile. ꞌLige Esukristo ku jena nawámala, ꞌlige Waꞌlula nímala alué Esukristo jena suwábaga ralámuli nuleme.
\v 2 Alekeri ꞌwe ꞌla anigá ajchámala ne mué napurigá ꞌwe ꞌla ruyémala mué alué ralámuli Onorúgame raꞌichálila oyérame. ꞌLa ruyéwaká alué ralámuli rekó sairúgame neraga mochige alué raꞌíchali Onorúgame raꞌichálila. Ruyéwaká napuꞌlige ruyénili mué ꞌlige napuꞌlige tabilé ruyénili mué. ꞌLa ruilime júkuru rejcholi alué ralámuli napurigá ku ꞌla naꞌtámala. ꞌLige aminami ꞌla ruyewa nawésali napurigá ꞌla oilárimala ye raꞌíchali. ꞌLa beníriwa, tase guwana rujsúpua aminabi jawa beníria ye raꞌíchali napuꞌlige alué ralámuli tabilé námachi ye raꞌíchali.
\v 3 Abé iꞌlibeko weꞌká ralámuli tabilé gepúmala ye raꞌíchali, ye raꞌíchali napu ꞌwe nejkúrime ju napurigá ꞌla sébali ralámuli niwa. ꞌLige ralámulika asíriga weꞌká benírime napubúmala, ꞌlige alué weꞌká benírime ꞌwe ꞌla korimela napurigá nochámala ralámuli napuchíbiriga nokinali aꞌboi, tabilé chérigá korimela rekó cha nokame ke. Ye chátiri raꞌíchali gepúnili alué cha nokame ralámuli.
\v 4 ꞌMa pecha gepúniligó alué ꞌla bijchiá raꞌíchali. Pe eligá alué tabilé ꞌla ꞌnátalicho ꞌnátiga nokísimala.
\v 5 Nobi mué Timotéoka, ꞌwéchigo ꞌla naꞌtáwagó suwábaga napu ekí ꞌla aꞌká ꞌnátalicho, ꞌla anachawa alué resí nílilime, ꞌwe ꞌla anewa alué ralámuli tabilé Onorúgame oyérame. ꞌLa semáriga sébili oláwaguru suwábaga napu Onorúgame benírale mué.
\p
\v 6 Alué napu ne nocha ajtí jipe Onorúgame nochálila, alueka pe jípecho nímala.\f + \fr 4:6 \ft Yolí raꞌíchaga aní: “Seré ofrecido en sacrificio.” \f* ꞌMa sébali ajtí ne Onorúgame ꞌyuga bejtélimia ꞌpa rewagachi. ꞌMa amulí seba raweli napuꞌlige mukumeli ju ne.
\v 7 Neka ꞌma ꞌla nóchakuru napu ne nulérige. ꞌMa ꞌla sébali olaka ne, tabilé guwana wijchigá.\f + \fr 4:7 \ft Yolí raꞌíchaga aní: “He peleado la buena batalla, he llegado al término de la carrera, he mantenido la fe.’’\f*
\v 8 Jípeko alué métigame buwémala ke ne alué semati gorona anilime, napu semati raweli aniame ju napu Onorúgame ꞌyame ju alué ꞌla nóchame ralámuli. Onorúgame júkuru biꞌneli neyúriga Waꞌlula. Alué júkuru asíriga ꞌla sébali gastigárime ralámuli, alueka asíriga ꞌla semátiri nejímala aꞌkinana napuꞌlige raweli seba. Pecha necho júkó alué meme, suwábaga ralámuli narémili júkuru napu ekí ꞌwe najkime napurigá Onorúgame jena wijchimoba nawámala, alué napu ꞌwe néléme ju Onorúgame (Esukristo).
\p
\v 9 ꞌWe jigasa ꞌla képá napurigá yati sebawa jena napu ajtí ne.
\v 10 Alué Rémasi anilime rió ꞌwe galele alué tabilé Onorúgame ꞌyuga ꞌnátame ralámuli. Alekeri ꞌma aꞌrele neꞌchí, ꞌlige ꞌma simile alé waꞌlú weꞌká riógichi Tesalónika anilichi. Alué rió Kresente anilime ꞌwe ꞌla rió ju, eligá pe simile alé waꞌlú gawí boꞌígichi weꞌkaná riógachi Galasia anilichi. ꞌLige Títoka ꞌma simílechigo waꞌlú gawí boꞌígichi weꞌkaná riógachi Ralmasia anilichi.
\v 11 Pe Lukasi ꞌla jena ajtíkuru neꞌchí ꞌyuga. Marko ꞌyáwagó, ꞌlige yati ꞌyuga nawáwaká. Alueka ꞌla nejkúrime kéturu ye nóchali, ꞌlige uchéchigo nejkúrimala jena.
\v 12 Bilé rió júlaturu ne alé Ebeso anilichi weꞌká riógachi, Tichi anilime rió.
\v 13 Napuꞌlige mué Timoteo ku jeka nawá, gemá aꞌpáwaká. Alé Tróasi anilichi weꞌká riógichi aꞌrigéturu ne Karpo anilime rió bejtélachi. ꞌLige abiena aꞌpáwaká alué baká weꞌlí gapílame osirúgime kabítigame, ꞌlige alué osilí wiꞌchíparachi osirúgime kabítigame. Ye wiꞌchípara kabítigame abé rajpé resí la ne.\f + \fr 4:13 \ft Siné kachi alué osirúgime kabítigame waꞌlú raꞌíchame raꞌíchali gatélime nile, siné kachi alué Onorúgame raꞌichálila ꞌya nerúgame raꞌíchame nile, uché jaré raꞌíchali abiena. \f*
\p
\v 14 Alué Alejantro napu jiero meꞌchoga nóchame ju, asíriga resí olá neꞌchí. Onorúgameka ꞌwe ꞌla machí tabilé sébali oláligo. Onorúgame gastigárimala pecha sébali oláligo.
\v 15 ꞌLa ꞌwe ꞌnátiga asiboa mué, asíriga chaꞌsime ju alué rió. Alueka cha sairuga neraga raꞌíchame níligame alué raꞌíchali napu ramué benírilia.
\p
\v 16 Napuꞌlige ne oꞌtorú gustisia olamia pe kulí siné, tabilé ꞌwesi mochígeturu ne gompaniérola, suwábaga asíriga majawá neꞌchí ꞌyuga simíbiga. Neka abirigá ꞌla niraga etiá alué ralámuli napu aꞌrele neꞌchí, ꞌlige abiena najkí ne napurigá Onorúgame ꞌwe ꞌla niraga etémala alué ralámuli.
\v 17 Pe Onorúgamecho rejpí neꞌchí ꞌyuga ꞌlige aꞌwalí ꞌya neꞌchí napurigá Onorúgame raꞌichálila beníriwa napurigá gepúmala alué ralámuli napu tabilé jurío ju. Alué Remónisi ꞌma amulí chaꞌpiéturu neꞌchí,\f + \fr 4:17 \ft Yolí raꞌíchaga, “me sacó de la boca del león”. \f* nobi Onorúgameka ꞌwéchigo nejkúrikó napurigá ne ꞌla ku maꞌchínamala alé resítirichi.
\v 18 Alué Waꞌlula Onorúgame ꞌsímala maꞌchí pa neꞌchí suwábaga resítiri bowechi, ꞌlige Onorúgame ꞌpa rewagachi oꞌtomela neꞌchí, alé napu nulame ju boꞌné Onorúgame. Asíriga ꞌla ju Onorúgame ꞌla niraga etelia ralámuli níriga. Alarigá ju.
\b 
\p
\v 19 ꞌWe repori ne alué Prisila anilime mukí ꞌlige aminami alué rió Akila abiena náwala ne reporali. ꞌLige alué Onesípora ꞌyula ꞌlige ꞌkúchila abiénachigó repori ne.
\v 20 Alué rió Erasto alé Korinto anilichi weꞌká riógichi rejpile. ꞌLige alué Trópimo anilime Mileto anilichi weꞌká riógichi aꞌréturu ne ꞌwe nayume.
\v 21 Mué Timoteo, ꞌwe jigaga napurigá sebawa jena taꞌchó romó kachi. ꞌWe náola reporali ye ralámuli Eúbulo, ꞌlige Purente abiena, ꞌlige Lino abiena, ꞌlige alué rió Kláurio abiena, weꞌká aminá uché jaré napu ekí Onorúgame oyérame ju.
\p
\v 22 Semáriga guꞌírisa ꞌla képá Waꞌlula Esukristo napurigá ꞌla aꞌwágame sulégame nímala mué. Abiénachigó guꞌírisa ꞌla képá Onorúgame suwábaga alué ralámuli napu ekí mochí alé mué ꞌyuga.
\p Pe ekí képá ye raꞌíchali. Waꞌlú cheliérabá.