\id PHM Baja Tarahumara
\h FILEMÓN
\toc1 FILEMÓN
\mt Ye Ju Alué Apeli Napu Osele Páulo Alué Bilimoni
\c 1
\p Kuira mué Bilimoni.
\p
\v 1 Ne Páulo ꞌwe repori mué. Neka jipe jena ajtí galírale bajcháriga. Galírale bajcharu ne alué Kristo Esusi raꞌichálila beníriga eyénachi. Ye rió Timoteo ꞌwe náolachigó reporali. Ye rió ꞌwe oyérame ju alué Kristo Esusi napurigá mué ꞌlige napurigá ne. Ramueka ꞌwe ganíliga etuwía mué, mué abiena alué nóchali nóchame kame napu nejile Onorúgame.
\v 2 Abiena ꞌwe repori ne alué mukí Apia anilime, alué Esukristo oyérame napurigá ramué. Abiena repori ne alué rió Arkipo anilime. Alué rió Arkipo nejkuri alué Onorúgame nila raꞌíchali beniria napurigá ramué. ꞌLige abiena ꞌwe repori ne alué ralámuli napu jsime ju alé napu mué Bilimoni bejté alué Onorúgame nila raꞌíchali benimea.
\v 3 Onorúgame ramué Oꞌnola ꞌla guꞌírisa ꞌla képá ꞌemi, ꞌlige abiénachigó alué Waꞌlula Esukristo, napurigá ꞌla biꞌlepi ꞌnátaga mochímala ꞌemi Onorúgamecho, tabilé weꞌká ꞌnátaga.
\s Jena ruwimela Páulo ruwíligo ꞌwe raꞌsálagá ajtíligo napugiti Bilimoni ꞌwe galeme ko ralámuli Esukristo oyérame
\p
\v 4 Neka weꞌsá cheliera ꞌyame júturu Onorúgame, Onorúgame ꞌwe ꞌla guꞌírimpá mué. Neka akéturu ꞌwe ꞌla oyérame ko mué alué Waꞌlula Esusi raꞌichálila, ꞌlige ꞌwe ꞌla galeme ko mué Esusi, ꞌlige ꞌwe ꞌla naꞌtemame ko mué Esukristo oyérame. Alekeri cheliera ꞌya ne Onorúgame.
\v 5 Jaré ralámuli aní mué ꞌwe aꞌlá bijchígime ko alué Esukristo raꞌichálila. Abiénachigó aní mué ꞌwe ꞌla ganíliga eteme ko suwábaga ralámuli napu Onorúgame oyérame ju.
\v 6 Neka tánime ju Onorúgame napurigá aꞌwalí ꞌyámala mué napurigá ꞌla eꞌwémala mué Onorúgame nila raꞌíchali. Alarigá ka aminacho ꞌla námamala mué chiena ꞌla ka Kristo oyérilia.
\v 7 ꞌLige ne jipe ꞌwe raꞌsálagá ajtí, napugiti mué ꞌwe ꞌla galeme kame alué ralámuli Esukristo oyérame, mué ꞌwe semáriga oilárime kame alué ralámuli Esukristo oyérilichi. Alekeri ꞌwe raꞌsálagá ajtí ne.
\s Jena ruwimela Páulo najkió napurigá Bilimoni naꞌtemaka etémala alué Onésimo
\p
\v 8 Ne ꞌwe aꞌlá machíguru mué ꞌwe aꞌlá rió ko, alekeri ruwimela ne bilé raꞌíchali. Ne nígame júkuru bilé nóchali napurigá nulémala ralámuli, alué nóchali napu alué Kristo ꞌyale neꞌchí,
\v 9 neka tabiléchigo nuléniligó mué. Neka pe najkí napurigá mué ꞌwe ꞌla naꞌtemámala alué ralámuli. Ne Páulo yaꞌmá oꞌchérame kame, alekeri ꞌla niraga etewa ne. Jena galírale bajcháriga ajtí ne jipe, pe alué Esukristo raꞌichálila ruwime kóriká.
\v 10 Najkí ne napurigá ꞌla naꞌtemámala mué Onésimo. Jipe alué rió Onésimo napurigá ne boꞌné inolá neraga alarigá ju, napugiti ꞌwe aꞌlá semáriga bijchígame alué Oꞌnó Onorúgame nila raꞌíchali. Ne ruigéturu alué raꞌíchali galírale bajcháriga asagá.
\p
\v 11 Alué rió nóchale alé mué bejtélachi ꞌma weꞌká rawé. ꞌLige taꞌmé waꞌlú nejkúrile kaka, pecha Onorúgame oyérame níliga. Jípeko uché rajpé abé waꞌlú nejkúrimala alué rió mué ꞌyuga ꞌlige akiná abiénachigó.
\v 12 ꞌLige ne jipe jula alué rió Onésimo alé napu mué ajtí. Jipe ꞌwe ꞌla niraga etewa alué rió napurigá ne neraga.
\v 13 Neka machí mué ꞌwe aꞌlá guꞌírimio neꞌchí, alekeri amulí taꞌmé jula ne alué rió Onésimo, alué rió jena waꞌlú nejkúrime nímiligó.
\v 14 Tabilé nulénili ne mué. Boꞌné ꞌnátaga guꞌíriwagó neꞌchí.
\v 15 ꞌLa nílikeꞌé ꞌmásasa. Jípeko ꞌma ku seba mué bejtélachi, jípeko ꞌla Onorúgame oyérame júkuru tase napurigá iꞌbé.
\v 16 Ne ꞌwe aꞌlá galé alué rió Onésimo. Mueka jípeko abéchigo rasigá galé alué rió, mué ꞌyuga nóchame kame, ꞌlige Esukristo oyérame kame.
\p
\v 17 Mué Bilimoni ne gompaniérola ju, alekeri jipe ꞌwe aꞌlá niraga etewa alué rió Onésimo napurigá ne.
\v 18 Alué Onésimo cha ꞌsile iꞌbé. Onésimo wikasáká enomí, ꞌliko ne Páulo najtétamala alué enomí mué Bilimoni.
\v 19 Ne boꞌné osá ye raꞌíchali. Neka ꞌla bijchiá aní ꞌla najtétimia napu wiká alué Onésimo. ꞌWe ꞌla niraga etewa neꞌchí. Neka ꞌla semáriga nejkúrituru napuꞌlige mué resíriká eyénachi.
\v 20 Ne Páulo ꞌlige mué Bilimoni, ramueka okánika niru alué Esukristo oyérame, alekeri oilawa napu ne najkí. Oiláriwa neꞌchí Kristo oyérachi.
\p
\v 21 Neka ꞌla machí ꞌla sébali olámala ko mué, ꞌlige uché rajpé abé aꞌlá semáriga olámala mué ꞌlige, alekeri osé ne mué.
\p
\v 22 Abiena ꞌma ꞌla gatewa alé mué bejtélachi napu ne gojchimela alé sebasa, ne ꞌla sebásakabá alé mué bejtélachi. Mué ꞌwe aꞌlá tániwa Onorúgame napurigá ꞌla alarigá nímala.
\b
\p
\v 23 Ye rió Epáprasi jena ajtí ne ꞌyuga galírale bajchárigachigó, alué Esukristo raꞌichálila benírime kóriká ralámuli. ꞌLige alué ye rió Epáprasi ꞌwe reporali náolachigó.
\v 24 Alué Marko, ꞌlige Aristarko, ꞌlige Rémasi, ꞌlige alué Lukasi ꞌwe reporali náolachigó. Suwábaga ye ralámuli abiénachigó nóchame ju napurigá ne, alué Esukristo raꞌichálila ruyá.
\p
\v 25 Semáriga guꞌírisa ꞌla képá alué Waꞌlula Esukristo ꞌemi ralámuli napu ekí alé ejperégame ju.
\p Pe ekí képá ye raꞌíchali. Waꞌlú cheliérabá.