\id 1PE Baja Tarahumara
\h 1 PEDRO
\toc1 1 PEDRO
\mt Ye Ju Alué Apeli Bajchá Osirúgime Napu Osale Pegro
\c 1
\s Kuira suwábaga ꞌemi ralámuli Onorúgame oyérame.
\p
\v 1 Ne Pegro Esukrístote ꞌyárigame ju nóchali napurigá nulame nímala ne ꞌlige napurigá einámala ne ichúrimi ralámuli beníriga Onorúgame nila raꞌíchali. Reporali náwala ne suwábaga ꞌemi napu mochí jipe ichúrimi seꞌwí napu tase ꞌla ꞌemi aꞌboi ejperélachi ju. Jaré ꞌemi mochíkuru jipe alé Ponto anilichi, ꞌlige jaréchigo Galasia anilichi, ꞌlige jaréchigo Kaparosia anilichi, ꞌlige jaréchigo Asia anilichi, ꞌlige jaréchigo Bitinia anilichi.
\v 2 Suwábaga ꞌemi oséguru ne napu Onorúgame ꞌma ꞌla ꞌnata asálige bajchabéchigo ꞌemi wanápamia napurigá ꞌla eꞌwame nímala ꞌemi napu Onorúgame najkí. Onorúgame boꞌné Alawálate biꞌwele ꞌemi alawala napurigá ꞌla eꞌwímala ꞌemi alué Onorúgame. ꞌÉmika ꞌma ꞌla biꞌwígame alawégame ju napugiti Esukristo ꞌma mukúligame bilena gulusichi ꞌemi nila gastigo oꞌtogá. Onorúgame ꞌla naꞌtemasa ꞌla képá ꞌemi napurigá ꞌemi ꞌwe ꞌla ganíliga ejperélamala.
\s Jena ruwimela Pegro ruwíligo ꞌla narépulikó napu Onorúgame nejímorílige
\p
\v 3 Senibí ꞌwe aꞌlá aniboa ꞌwe aꞌlá nejkúrame ko Onorúgame alué Esukristo Oꞌnola napu ju ramué nuleme. Napuꞌlige Esukristo ajánasa alésí akiná ꞌwe aꞌlá semáriga ejperéliru ramué napugiti Onorúgame ꞌwe aꞌlá naꞌtemáligame ramué, ꞌlige ꞌwe aꞌlá machigá mochiru ꞌma ꞌla biꞌwígame alawégame nírigo.
\v 4 Abiena ꞌwe aꞌlá machigá mochiru ꞌwe aꞌlá nejimio Onorúgame napu nejímorílige napuꞌlige moinásiga rewagachi. ꞌWe aꞌlá semáriga ju, pecha seꞌwiná ikimélagó.
\v 5 ꞌÉmika ꞌwe ꞌla bijchigi napu aní Onorúgame, alekeri Onorúgame ꞌwe aꞌlá repú ꞌemi boꞌné aꞌwalílate napurigá ꞌla narémala ꞌemi napu Onorúgame nejílala ju napuꞌlige ꞌma sebasa raweli napuꞌlige narépuli ju napu nejímorílige.
\p
\v 6 Alekeri ꞌwe aꞌlá raꞌsáligá mochí ꞌemi, rekó iꞌsínimi ꞌwe resí ikié ꞌemi alemi napu ꞌemi mochí.
\v 7 ꞌÉmika ꞌwe resí ikíguru napurigá ꞌla machimela ꞌemi pala ꞌla bijchiá ꞌla bijchígame ka ꞌemi napu aní Onorúgame. ꞌÉmika ꞌwe ꞌla bijchigi napu aní Onorúgame. ꞌWe aꞌlá ju alué ꞌnátili meꞌtigá alué ꞌoro. Alué ꞌóroka naꞌichí wajsélime ju bilena sikolichi napurigá ꞌla biꞌwígame maꞌchínamala alué ꞌoro. Aꞌchigóriga júkuru ꞌemi naꞌtálila, Onorúgameka elame júkuru napurigá resí ikimela ꞌemi, ꞌlige ꞌemi tabilé aꞌrésaká Onorúgame oyeria rekó ꞌwe resí ikié ꞌemi ꞌliko ꞌla biꞌwimela ꞌemi aꞌboi alawala. Alarigá Esukristo ꞌwe aꞌlá semáriga raꞌichámala ꞌemi olagá napuꞌlige uché ku nawasa jena wijchimoba.
\p
\v 8 ꞌÉmika ꞌwe ꞌla nirame ju alué Esukristo rekó ꞌemi tabilé siné eteme képá, ꞌlige jipe ꞌwe aꞌlá bijchígiga napu aní Onorúgame ꞌwe aꞌlá raꞌsálá ꞌemi, ꞌlige tabilé gayena ꞌemi ruyá chiena raꞌsálá mochigo ꞌemi, pecha iꞌtigá raꞌíchali alarigá aniá,
\v 9 napugiti ꞌémika aminabi ꞌwe aꞌlá námame churigá ka napuꞌlige ꞌwe ꞌla bijchígilia napu aní Onorúgame. Aminami ꞌwe ꞌla bijchígiga ꞌemi ꞌwe aꞌlá biꞌwimela ꞌemi alawala.
\p
\v 10 Suwábaga napu ruwime nile napu anele Onorúgame ꞌwe aꞌlá machile churigá ꞌla biꞌwime ko ralámuli alawala ꞌlige ꞌwe aꞌlá raꞌíchaturu tachiri ꞌyamio Onorúgame ꞌemi.
\v 11 Kristo Alawálaka ꞌwe aꞌlá machírile alué ralámuli napu ruwime nile napu anele Onorúgame chiena resí ikimeo Kristo ꞌlige chiena aꞌlá semati raweli naremio kúchigo alué Kristo abé aꞌkinana ꞌlige alué Onorúgame nila raꞌíchali nareme ka ꞌwe eꞌwérali olale machináliga chiéniko ikimeo suwábaga alarigá.
\v 12 ꞌLige Onorúgameka ꞌwe ꞌla machírile tabilé pe aꞌboi niga ejtebimio alué raꞌíchali alué Onorúgamete nulalime napurigá benírimala ralámuli. Onorúgameka machírilekuru alué boꞌné nuleme ralámuli, alué nujubá ejperélimili ralámuli benimeo alué raꞌíchali, alué ralámuli napu narémili nile semati raweli. Alué júkuru raꞌíchali napu beníriliru ꞌemi Onorúgame Alawala aꞌwalílate, alué Alawá napu ꞌpa rewagáchika julárigame ju. Alué santo ánjeli rewagachi mochígame ꞌwe machinálilechigó chiéniko ikimeo suwábaga alarigá.
\s Jena ruwimela Pegro ruwíligo ejperéliwilikó napurigá Onorúgame najkí
\p
\v 13 Alekeri ꞌwe ꞌla ꞌnátaga mochiwa, ꞌwe aꞌlá machigá tachiri chonoká mochigo ꞌemi aꞌboi napurigá ꞌla gainámala bilé nóchali. ꞌWe aꞌlá machigá mochiwa ꞌwe aꞌlá nejkúrimio Onorúgame napuꞌlige Esukristo uché ku nawasa.
\v 14 ꞌLa ganíliga ejperélawa, ꞌla napurigá alué ꞌkuchi ꞌwe aꞌlá eꞌwame. Tase ejperélawa napurigá ejperégame nile ꞌemi ꞌya napuꞌlige taꞌchó oyeria Onorúgame, tase cha nokiboa chibi nokinálisiga.
\v 15 Iligá jípeko ꞌla ganíliga ejperélawa ꞌla napurigá Onorúgame najkí napugiti Onorúgame napu ꞌemi wanápale, pecha chátiri ꞌnátame kame.
\v 16 Aka Onorúgame nila raꞌíchali regá aníché: “ꞌLa ganíliga ejperélawa ꞌla napurigá ne najkí, neka ꞌla biꞌwígame alawégame kame.”
\p
\v 17 Onorúgame napu ꞌla sébali gastigárime ju ralámuli tase regá anigá: “Yeka tabilé gastigárimala ne rekó resí ꞌsíkame ke.” ꞌEmi “Oꞌnó” aneme nísaká Onorúgame, ꞌliko ꞌemi ꞌla nirámili ju senibí rawé Onorúgame napuꞌlige bijí jena gawichí mochiga,
\v 18 napugiti Onorúgame ꞌwe ꞌla machíriligame ꞌemi tabilé ꞌla ko alué ꞌnátili napu beníriliru ꞌemi alué ꞌya mochígame ꞌemi umúlilate rekó alué ꞌemi umúlila ꞌwe aꞌlá kolae alué aꞌboi naꞌtálila. ꞌLige ꞌemi aꞌboi ꞌla machí tase pe tabiri tábirite najtétiligo Onorúgame napurigá ꞌemi ꞌwe aꞌlá ꞌnátame nímala, alueka pecha ꞌórote najtétilekó,
\v 19 iligá Onorúgameka alué Kristo elalate najtétile, napugiti napuꞌlige meꞌlisuga alué Kristo bilena gulusichi ujchagá, alueka níligame napurigá bilé boꞌá meꞌliame Onorúgame kógilime. Alarigá nílekuru alué Kristo.
\v 20 Suwábaga ye tábiri napu ruwí ne, Onorúgameka ꞌma ꞌla ꞌnata asale bajchibéchigo taꞌchó newá gawí, iligá pe ꞌma guwichí nawale Kristo jena wijchimoba ꞌwe kulí. Boꞌné Onorúgame alarigá ꞌnata asale tachiri ꞌla ko ꞌemi níriga.
\v 21 ꞌÉmika ꞌwe ꞌla oyérame júkuru Onorúgame napugiti Kristo nawáligame bilena gulusichi mukumea ꞌemi nila gastigo oꞌtogá ꞌlige aminami ꞌwe ꞌla machiame ꞌemi Onorúgame ajalí ꞌyáligo alué Kristo ꞌlige waꞌlula neraga ajcháligo alé ꞌpa rewagachi, alekeri ꞌemi ꞌla bijchigi napu aní Onorúgame.
\p
\v 22 ꞌÉmika ꞌwe ꞌla biꞌwígame alawégame gayénale napugiti ꞌemi ꞌwe ꞌla eꞌwáligame alué Onorúgame nila raꞌíchali napu tabilé ꞌyégali ruwime ju. Onorúgame Alawala ꞌwe ꞌla guꞌírile ꞌemi napurigá ꞌla eꞌwímala ꞌemi Onorúgame. ꞌLiko ꞌla ganíliga járowa oꞌmaka ꞌemi.
\v 23 ꞌÉmika napurigá uché oꞌchérigame alarigá júkuru, nobi tabiléchigo ꞌemi aꞌboi eꞌyela rojpálachigó, ꞌemi eꞌyélaka ꞌma suwime ju siné rawé, ꞌémika napurigá uché siné oꞌchérigame alarigá júkuru napugiti ꞌémika ꞌla bijchígiligame Onorúgame nila raꞌíchali, ꞌlige alué raꞌíchalika senibí nerúlamala.
\v 24 Aka regá aníché Onorúgame nila osilichi:
\q Suwábaga ralámuli napurigá gajsalá alarigá ju.
\q Alué gajsalá jami jágame ꞌwe ꞌla semati sewame ju
\q nobi ꞌmáchigo wakíbame júkó alué gajsalá
\q ꞌlige ꞌma rujsume ju alué sewalá.
\q
\v 25 Alué Onorúgame nila raꞌíchalika tabilé siné che ikime ju.
\m Alué raꞌíchali júkuru napu beníriliru ꞌemi.
\c 2
\p
\v 1 ꞌLiko ꞌemi níriga ꞌma tase cha nokiboa, tase ꞌyégame niwa, tase neꞌochawa ralámuli ꞌwe cha nokame níriká, tase nejkemewa napuꞌlige bilé ralámuli ꞌwe ꞌla nóchachi, ꞌlige tase rupoa uché bilénami bilé ꞌyégali pe bilé naꞌáwali oꞌinániliga.
\v 2 Napurigá uꞌkuchí ꞌkuchi pe kulí oꞌchérigame aꞌboi eꞌyela chiꞌwala ꞌyáame júturu chiꞌnálichi, ꞌemi aꞌchigóriga ꞌyáawachigó alué aꞌlala ꞌnátili. ꞌWe ꞌla ꞌyáasaká ꞌemi alué aꞌlala ꞌnátili ꞌliko aminacho Onorúgame oyérame nímala ꞌemi ꞌlige ꞌla biꞌwígame alawégame nímala ꞌemi.
\v 3 ꞌÉmika ꞌwéchigo ꞌla machiame chiena ꞌla semáriga nejkúrime ko Onorúgame.
\s Jena ruwimela Pegro ruwíligo Krístoka ko  napurigá alué rejté napu ralámuli gawéliga etele
\p
\v 4 ꞌLiko aminacho abé aꞌlá oyériwa alué Esukristo napu ju napurigá bilé rejté napu ralámuli gawéliga etele napuꞌlige alué waꞌlú reꞌobá newá, nobi alué rejteka abéchigo najtékame júkó, napu Onorúgame tabilé gawélele.\f + \fr 2:4 \ft Napuꞌlige Pegro rejté aniá pe Esukristo olagá aní. \ft* \f*
\v 5 ꞌYako alé reꞌobachi bejtégame nile Onorúgame Alawala. Jípeko ramué alawálachi pachágana ajtí, ꞌliko ramué niru napurigá bilé reꞌobá waꞌlú. Ramueka niru napurigá bilé rejté alué waꞌlú reꞌobá newárigime. Abiena nirú ramuéchigó napurigá eꞌwélala balé napu nóchame ju Onorúgame nila nóchalichi. ꞌLiko ꞌwe ꞌla eliwa napurigá Onorúgame nulémala ꞌemi. Boꞌné Esukristo ꞌwe ꞌla guꞌiri napurigá ꞌemi ꞌla eꞌwame nímala napu aní Onorúgame. ꞌLige ꞌémichigó aꞌchigóriga ju napurigá alué rejté, ꞌlige Onorúgame ꞌemi nulémala napurigá ꞌemi benírimala ralámuli napurigá ꞌla Onorúgame oyérame nímala aminacho weꞌká ralámuli.
\v 6 Aka regá aníché Onorúgame nila osilichi:
\q ꞌWe ꞌla eꞌnésibá, 
\q ye rejté ajchámala ne jena Sioni anilichi weꞌká riógichi,
\q ye rejteka abé aꞌlala júkuru meꞌtigá suwábaga che jarela,
\q ꞌlige suwábaga ralámuli napu ekí ꞌla nirame ju alué rejté,
\q tabilé siné chijúniga eꞌyénamala.
\m
\v 7 ꞌLige ꞌemi níriká napu ꞌwe ꞌla bijchígame ju napu aní Onorúgame nila raꞌíchali, ꞌwe najtékame ju alué rejté, ꞌlige ꞌla tase gawéliga eté ꞌemi alué rejté ꞌwe aꞌlala. ꞌLige ꞌma sebárilekuru raweli alué ralámuli napu tabilé ꞌla nirame nile napu aní Onorúgame. Alé Onorúgame nila osilichi regá aní:
\q Alué rejté napu ralámuli nóchame pe gawéliga etele,
\q abé aꞌlala rejté ju jipe, abé aꞌlá asíbagame.
\m
\v 8 Abiena regá aníchigó Onorúgame nila osilichi:
\q Bilé rejté napu torómala ralámuli,
\q rejté napu ralámuli roꞌábamala.
\m Alué ralámuli ꞌma toroka eꞌyena napuꞌlige tabilé eꞌwá napu aní Onorúgame nila osilí. Alarigá gastigari Onorúgame alué ralámuli.
\s Jena ruwimela ꞌma ꞌla Onorúgamete wanáparigame nírigo
\p
\v 9 ꞌÉmika wanáparigame ju Onorúgamete napurigá Onorúgame nochálilachi nochámala ꞌemi. ꞌEmi ralámuli ju napu Onorúgame wanápale. ꞌEmi ralámuli ꞌla Onorúgame oyérame ju. ꞌÉmika nokimela suwábaga ralámuli beniria chiena ꞌla semáriga nejkúrame ko Onorúgame, napugiti ꞌémika Onorúgamete buinárigame kame alé ꞌwe resírikáchi napurigá ꞌla aꞌkabámana eꞌyénamala ꞌemi.
\v 10 ꞌYabeko ꞌemi tabilé wanáparigame nile Onorúgamete. Jípeko ꞌla wanáparigame júkuru ꞌemi Onorúgamete. ꞌYabeko tabilé naꞌtemaka etélime nile ꞌemi Onorúgamete, jípeko ꞌla naꞌtemaka etélime ju ꞌemi Onorúgamete.
\s Jena ruwimela napurigá ꞌla tabilé cha nokogá ejperéliwa  napurigá tabilé che animela ralámuli
\p
\v 11 ꞌEmi Onorúgame oyérame, neka ꞌwe galé ꞌemi, neka raꞌíchaguru ꞌemi napurigá pe sígame neraga jemi wijchimoba. Neka najkíguru napurigá tabilé seꞌwiná nokimela ꞌemi rekó seꞌwiná nokinali nílisa ꞌemi. Onorúgame Alawálaka ku roꞌina ajtí bilé ralámuli seꞌwiná ꞌsínilichi.
\v 12 ꞌWe aꞌlá ꞌnátaga eꞌyénawa ꞌemi alé ꞌmi napu ejperé alué tabilé Onorúgame oyérame ralámuli. Rekó jipe ꞌwe aniá mochige alué ralámuli ꞌwe cha nokame ralámuli ko ꞌemi, ꞌlige etega alué ralámuli tabilé cha nokame ralámuli ko ꞌemi, arigá iꞌkilimi ꞌwe aꞌlá semáriga raꞌichámala Onorúgame olagá, ꞌlige animela ꞌwe ꞌla nejkúrime ko Onorúgame napuꞌlige Onorúgame nawachi gustisia olamia jena wijchimoba.
\p
\v 13 ꞌWe ꞌla eꞌwiwa ꞌemi napuꞌlige nulachi alué eꞌwélala napu Onorúgame mochile jena wijchimoba, ꞌwe ꞌla eꞌwawa alué abé waꞌlula selígame. (Yolí raꞌíchagaká “emperador” anime chujkú alé Onorúgame nila osilichi.)
\v 14 ꞌLige ꞌwe ꞌla eꞌwawa napuꞌlige nulachi alué eꞌsélikame napu mochiárigime ju alué abé waꞌlula selígamete, napurigá gastigárimala alué ꞌwe cha nokame ralámuli, ꞌlige napurigá ꞌla guꞌírimala suwábaga napu ekí ꞌla aꞌká ralámuli ju.
\v 15 Aka Onorúgame najkíché napurigá ꞌla tabilé cha nokame ralámuli nímala ꞌemi ꞌla eꞌwame napurigá tabilé chibi animela ꞌemi olagá alué ralámuli tabilé machime tachiri najkió Onorúgame ꞌlige ꞌwe gawélime Onorúgame.
\p
\v 16 ꞌÉmika lisensia nígame ju napurigá eꞌyénamala Onorúgame nila raꞌíchali beníriga ralámuli, nobi tabiléchigo regá anigágó: “Ramueka pecha neꞌocháwagó rekó chibi nokiáe napugiti ramueka ꞌla lisensia nígame nírigime napurigá ichúrimi eꞌyéniwa.” ꞌÉmika benírimili júkuru ꞌla napurigá ꞌla Onorúgame nila nóchalichi nóchame.
\v 17 ꞌWe aꞌlá niraga etewa suwábaga ralámuli. ꞌWe aꞌlá niraga etewa alué ralámuli Esukristo oyérame. ꞌWe ꞌla oyériwa Onorúgame. Aminami ꞌwe ꞌla nirawa alué abé waꞌlula selígame.
\s Jena ruwimela Pegro ruwíligo Esusi tabilé chéláligó rekó resí oliae
\p
\v 18 ꞌEmi ralámuli napu nochárilime ju bilena galírale tabilé najtétiga ꞌwe ꞌla niraga eꞌwime niwa alué ꞌemi aꞌboi batrónila. Tase pe alué batroni tabilé che anime ꞌwe aꞌlá eꞌwime niwa, abiena alué ꞌwe cha anime batroni ꞌwe aꞌlá eꞌwíwachigó.
\v 19 ꞌWe aꞌlá júkuru anachalia rekó resí oliáe ꞌemi peka resí nokágame ke ꞌemi, ꞌémika pe Onorúgame oyériga ꞌla anáchame kame.
\v 20 ꞌEmi níriga pecha najtékame júkó anachalia napuꞌlige gastigárilia pe cha nokágame nísaká ꞌemi, pe rioksi anachálinti kárélamala. ꞌEmi ꞌwe resí oliáe peka resí nokágame ke ꞌemi, ꞌliko ꞌwe ꞌla guꞌíriwa ꞌemi Onorúgamete, ꞌliko pecha chérélamalagó rekó resí oliae ꞌemi.
\v 21 ꞌÉmika Onorúgamete wanápurigame júkuru napurigá resí oláwachigó ꞌemi. Napurigá anáchale Esukristo jena wijchimoba ꞌemi alawala biꞌwea, ꞌémichigó ꞌla anachawa resí oliae.
\v 22 Alué Esukrístoka pecha siné iníliga ilírome níleko ꞌlige aminami pecha ꞌyégali raꞌíchali raꞌíchalekó.
\v 23 Napuꞌlige Esusi jechalia ꞌlige chibi anilía, alueka pecha chibi anigá nejélekó. Esúsika iligá ꞌwe ꞌla Onorúgame ꞌyuga raꞌíchame nile napurigá Onorúgame oꞌtomela alué Esusi alawala, Onorúgame napu ꞌwe ꞌla sébali gastigárime ju ralámuli.
\v 24 Alué boꞌné oꞌtólekuru ramué nila chátiri ꞌnátili napuꞌlige meꞌlisuga bilena gulusichi ujchagá, alarigá mukúlekuru napurigá ramué ꞌma aꞌrewa cha noká. Krístoka resí oláliru napurigá ꞌemi alawala ꞌla biꞌwígame nímala.
\v 25 ꞌYako ꞌemi napurigá boꞌá eꞌwegágame alarigá eꞌyéname kéturu. Jípeko ꞌma jsílikuru ꞌemi napu ajtí Kristo napu ju napurigá boꞌá neseme napu ꞌémi repume ju.
\c 3
\s Jena ruwimela Pegro ruwíligo churigá ejperélimili ko  alué ralámuli newíkame
\p
\v 1 ꞌEmi umugí ꞌwe ꞌla eꞌwímili júkuru rió ꞌemi aꞌboi ꞌyula napurigá alué rió ꞌwe ꞌla etémala ꞌwe ꞌla aꞌká ko ꞌemi umugí ꞌla sébali olame napu nulá ꞌemi aꞌboi ꞌyula. ꞌLiko jaré ꞌemi ꞌyula tabilé oyérame nísaká Onorúgame ꞌla bijchígimala napu aní Onorúgame pe ꞌemi umugí etega ꞌwe aꞌlá aꞌká umugí ko ꞌemi ꞌla eꞌwime ꞌemi aꞌboi ꞌyula,
\v 2 ꞌlige ꞌwe ꞌla machimela ꞌwe ꞌla eꞌwime umugí ko ꞌemi ꞌlige ꞌwe ꞌla Onorúgame oyérame.
\v 3 Umugí, tase umugílame niwa rekó ꞌwe aꞌká siꞌpúchigame nírige ꞌlige ꞌwe najteme, ꞌlige ꞌwe najteme eꞌkarúgame tábiri uchúchiga ꞌemi gupálachi, ꞌlige weꞌlá ꞌórote newárigime, ꞌlige goloka ꞌwe najteme.
\v 4 Onorúgame níriká pecha najtékame júkó suwábaga alué tábiri ꞌwe najteme. Abé aꞌlá ju ꞌlina ꞌwe aꞌlá mukí níriga ꞌwe aꞌlá ꞌnátame ꞌwe ꞌla biꞌwígame alawégame, alué alawaka pecha che ikimélagó. Suwábaga tábiri napu tabilé alawá ju, alueka suwíbame ju. Alarigaka ꞌwe najtékame júkuru ꞌemi Onorúgame níriga.
\v 5 Alarigá nile alué umugí ꞌya mochígame Onorúgame oyérame ꞌlige napuꞌlige nulachi ꞌla eꞌwime nile rió aꞌboi ꞌyula.
\v 6 Alarigá nile alué Sara ꞌwe ꞌya bejtégame, ꞌwe ꞌla eꞌwime nile alué boꞌné ꞌyula Abraámi rewégame. Regá aneme nile alué Sara alué Abraámi: “Muérigo waꞌlula nulame.” ꞌEmi napurigá alué Sara ꞌkúchila kárékuru ꞌwe ꞌla eꞌwime nísaká aꞌboi ꞌyula tabilé majaga.
\p
\v 7 ꞌEmi rió umugí ꞌyúgame aꞌchigóriga níwachigó ꞌemi aꞌboi ꞌyula umugí ꞌyuga, ꞌwe ꞌla naꞌtemápua, ꞌwe ꞌla nirawa umugí, alueka pecha ꞌme aꞌwágame kame. Alué ꞌemi ꞌyula umugika abiena ꞌla Onorúgame oyérame kame, ꞌlige narémili ju napu nejímili ju Onorúgame rewagachi. ꞌWe ꞌla repúpua ꞌemi ꞌyula umugí napurigá ꞌwe ꞌla najtékame nímala napuꞌlige ꞌemi Onorúgame ꞌyuga raꞌíchachi iwérali taga.
\s Jena ruwimela Pegro ruwíligo  ꞌwe ꞌla anachálime ko rekó chibi anilíe
\p
\v 8 Oꞌmaka ꞌwe ꞌla biꞌlepi ꞌnátaga mochiwa, ꞌwe ꞌla ganíliga, ꞌwe ꞌla naꞌtemaka aꞌbopi, ꞌlige ꞌwe ꞌla nakúriga.
\v 9 Napuꞌlige jaré ralámuli ꞌwe cha nokachi, ꞌémika tase che olawa alué ralámuli cha nokame. Napuꞌlige jaré ralámuli ꞌwe cha anichi ꞌémika tabilé che anewa, iligá ꞌémika ꞌwe tániwa Onorúgame napurigá guꞌírimala alué ralámuli cha anime napurigá ꞌla semátiri ꞌnátili ꞌyámala napugiti alarigá najkiame Onorúgame ꞌlige alarigá nokisáká ꞌemi Onorúgame semati raweli ꞌyámala.
\v 10 Regá aníché Onorúgame nila raꞌíchali:
\q Bilé ralámuli ꞌwe ganíliga bejtélenilisa boꞌnepi
\q ꞌwe ꞌla tabilé che anigá raꞌichámili júkuru
\q uché jaré ralámuli olagá,
\q tase ꞌyégali raꞌíchaga.
\q
\v 11  ꞌWe ꞌla guꞌíriwa uché jaré ralámuli.
\q Tase chibi nokogá eꞌyénawa.
\q Senibí ꞌwe ꞌla niraga ejperélimili júkuru ꞌemi uché jaré ralámuli,
\q tase chibi anigá.
\q
\v 12  Onorúgameka ꞌwe aꞌlá repuka ajtigame
\q alué aꞌká ralámuli tase iꞌnílime
\q ꞌlige ꞌwe ꞌla gepume ju napuꞌlige táachi iwérali,
\q nobi Onorúgameka ꞌwéchigo ayoga ajtíkó 
\q alué iꞌnílime ralámuli ꞌyuga.
\p
\v 13 ¿Chiérite cha oláwawé ꞌemi ꞌla senibí ꞌla aꞌká ralámuli nísaká ꞌemi, tase iꞌnílime? Tabilé ꞌwésiguru.
\v 14 Napuꞌlige ꞌemi ꞌwe resí oliae Onorúgame oyérame kóriká, ꞌwe raꞌsálagá mochiwa. Tase ꞌwesi ralámuli majawa, nibilé tábiri majawa,
\v 15 iligá ꞌwe ꞌla nirawa Kristo napu ramué nuleme ju. Senibí ꞌwe ꞌla rejchiruga mochiwa, ꞌla benigá nejiawa napuꞌlige ralámuli rukechi chonigá ꞌemi ꞌwe ꞌla oyérame ko Esukristo.
\v 16 ꞌWe ꞌla iꞌkilí nejiawa tase ayógame raꞌíchaga, ꞌla niraga. Tase chibi anigá raꞌíchiwa napurigá chijúniga ejtebímala ꞌémi alué napu gawelia mochime ju ꞌemi olagá, ꞌemi napu Kristo oyérame ju. Alueka chijúniga ejtebímala etega ꞌwe ꞌla raꞌíchame ko ꞌemi.
\v 17 Abé aꞌlá ju ꞌwe aꞌlá nochalia rekó resí ikié ꞌemi, boꞌné Onorúgame alarigá najkisáká napurigá resí ikimela ꞌemi.
\p
\v 18 Esukristo abiena resí ikile, ꞌlige pe siꞌnepi resí ikile biꞌwigá ramué alawala. Esukrístoka rekó tabilé che ꞌsíkame ke abirigá meꞌlíliru, alué cha nokame ralámuli neraga. Alueka mukúlekuru napurigá ramué ꞌla Onorúgame oyériwa. Rekó meꞌliruge, Onorúgame ku ajánirile.
\v 19 ꞌLige ku ajánasa Esukristo, simile regá anemia alué alawá galírale moꞌáriga mochígame Riáblote chaꞌpiruga: “ꞌWe ꞌla ju resí ikiá ꞌemi, pecha ꞌla niráligime ꞌemi neꞌchí.”
\v 20 Alué ralámuli napu tabilé eꞌwálige ꞌya napuꞌlige alué Noé bijí bejtégichi jena wijchimoba, ꞌya aꞌlige Onorúgame ꞌwe ꞌla buwélekuru alué alawá napurigá ꞌla Onorúgame oyéramala napuꞌlige Noé newachi alué barko nobi tabiléchigo eꞌwálekó. Pe osánópi ꞌla moꞌile alé bárkochi. ꞌLige aꞌkinana waꞌlú uꞌkusá, tabilé suwile siꞌlika.
\v 21 Alué baꞌwika pe ruwime kéré alué baꞌwí napu rewarálime niru. Napuꞌlige rewaralia ramué baꞌwichí nasipa jaga pecha júkó napurigá biꞌwiboa chiꞌcholi, alueka júkuru napurigá uché jaré ralámuli etémala ꞌla Onorúgame oyérame nírigo, ꞌlige ꞌma bujérigime nírigo alué chátiri ꞌnátili napugiti Esukristo ꞌma ꞌla ku ajánaligame,
\v 22 ꞌlige jipe ꞌpa rewagachi ajtí Onorúgame ꞌyuga alé wajtoná napu Onorúgame ajtí, ꞌlige jípeko alué ju nuleme suwábaga santo ánjeli rewagachi mochígame ꞌlige suwábaga alué eꞌwélala nuleme napu nulame ju rewagachi.
\c 4
\s Jena ruwimela Pegro ruwíligo aꞌpílipi ꞌemi ꞌyárigame ko nóchali  napurigá ꞌla sébali olámala ralámuli guꞌíria
\p
\v 1 Kristo ꞌwe resí ikile napuꞌlige meꞌliae, alekeri ramué pecha chélátéko rekó resí ikiae, napugiti alué resí ikime ka, pe alué chátiri ꞌnátili aꞌregá resí ikime kame
\v 2 ꞌwe ꞌla semáriga bejtélimia bijí jena wijchimoba asagá napurigá Onorúgame najkí, tase napurigá najkiá ramué aꞌboi.
\v 3 ꞌÉmika ꞌwe ꞌyako pe napurigá ralámuli tabilé Onorúgame oyérame alarigá ejperégame nílekuru ꞌemi chibi nokame, najkigá eꞌyéname nílekuru ꞌemi peka aꞌboi nila ke, ꞌlige aminami weꞌká umugí ꞌyuga okome nile ꞌemi, ꞌwe rasigá bajime nílekuru ꞌemi rekútime, ꞌwe newame nílekuru ꞌemi piesta ꞌwe ꞌla oyériga alué eꞌkarúgame tábiri napu ꞌemi aꞌboi ralámuli newame nile iwérali tánimia napurigá Onorúgame niraga peka ꞌla Onorúgame kachi.
\v 4 ꞌLige jípeko alué ralámuli napu tabilé oyérame ju Onorúgame ꞌwe gawélime ju ꞌemi olagá, ꞌémika ꞌmáchigo tabilé ꞌyuga eꞌyéname kame alué ralámuli cha nokame.
\v 5 Alueka ruyémili júkuru Onorúgame suwábaga napu ekí tábiri resí nokale alué aꞌboi, alué Onorúgame napu ꞌma ꞌla ꞌnátaga ajtí gatemia ralámuli suwígame ꞌlige ajágame ꞌyuga.
\v 6 Onorúgame nila raꞌíchalika ꞌma ꞌla ruyérigame níligame alué ralámuli bijí ajagá mochígichi ꞌlige alekeri suwábaga ralámuli machí ꞌwe resí nokáligo. Bilé rawé gastigáriwili ju alué ralámuli alawala.
\p
\v 7 Tabilé weꞌká rawé rokáré ye gawí suwibamia alekeri ꞌwe ꞌla ꞌnátaga mochiwa Onorúgame ꞌyuga raꞌicha ꞌlige iwérali tania.
\v 8 ꞌLige ꞌla ꞌwe ꞌla ganíliga ejperéliwa ꞌemi aꞌbopi ꞌla galegá, napugiti regá kame: Bilé ralámuli napu ꞌla galegá eteme ju uché jaré ralámuli, alueka ꞌla gainámala eꞌká napuꞌlige resí ꞌsichi uché bilé ralámuli.
\v 9 ꞌLa eliwa napurigá ꞌemi ejperélachi okómala ꞌlige ꞌla ꞌyawa goꞌame najkisáká, tase ayoga boꞌnepi.
\v 10 Aꞌpílipi ꞌemi ꞌyárigame júkuru nóchali napurigá ꞌemi sébali olámala ralámuli guꞌíria, alekeri ꞌla alarigá guꞌíriwa.
\v 11 Alué napu Onorúgame nila raꞌichálila benírame ju ralámuli ꞌwe ꞌla raꞌsálagá benírimili júkuru ralámuli alué raꞌíchali ꞌla napurigá aní alué raꞌíchali tase seꞌwináriga. Bilé ralámuli napu uché jaré ralámuli guꞌírame ju, alueka ꞌwe ꞌla bijchiá ꞌla guꞌírimili júkuru ꞌla alué aꞌwalite napu Onorúgame nejí. ꞌLige ralámuli etea ꞌwe ꞌla raꞌsálagá benírime ko, animela: “Onorúgameka ꞌwe ꞌla nejkúrime ju.” Pe Esukristo Alawala ꞌwe ꞌla oilárimala napurigá alarigá animela alué rió. Alarigá nisa ꞌla képá senibí.
\s Jena ruwimela Pegro ruwíligo  ꞌwe raꞌsálálime ko napuꞌlige resí ikiá
\p
\v 12 ꞌEmi napu ju Onorúgame oyérame napurigá ne, napuꞌlige ꞌwe resí ikiá ꞌemi tase lawa: “¿Chonigá alakiche ne?” Napuꞌlige resí ikiá ꞌemi, alueka nímala pala ꞌla bijchiá ꞌla bijchígime ka ꞌemi napu aní Onorúgame.
\v 13 Iligá ꞌwe ꞌla raꞌsáláwa resí ikiá napurigá resí ikile alué Kristo, alarigaka ꞌemi ꞌla raꞌsálámalachigó napuꞌlige uché ku nawachi Kristo waꞌlú aꞌwalí niga.
\v 14 ꞌWe ganíliga mochí ꞌemi rekó ꞌwe resí anilime ke ralámulite pe Onorúgame oyérame kóriká napugiti Onorúgame Alawala senibí ꞌla ꞌemi ꞌyuga ajtigame.
\v 15 ꞌEmi resí nilia mochígame, tase resí nokogáriká resí nilia mochiwa, tase resí nilia mochiwa pe ralámuli meꞌagáriká o pe chigóriká o pe panápuri resí ꞌsika ilírigoriká.
\v 16 ꞌWe resí anilía ꞌemi Onorúgame oyérame kóriká tabilé chijunawa, iligá ꞌwe raꞌsálagá mochiwa napugiti ꞌma ꞌla Onorúgame oyérame kame ꞌemi.
\p
\v 17 Jipe ꞌma seba raweli napuꞌlige Onorúgame ꞌwe aꞌwágame gastigárimili nile siné rawé suwábaga ralámuli jena wijchimoba, ꞌlige ꞌwe aꞌwágame gastigáriliaguru ramué Onorúgamete rekó ꞌla Onorúgame oyérame nírige, ꞌlige abéchigo resí ikimela alué ralámuli tabilé Onorúgame oyérame.
\v 18 ꞌWe nóchali olagá sebásiga ꞌpa rewagachi ramué ralámuli rekó ꞌla Onorúgame oyérame nírige, ¿ꞌliko chukimélaché alué napu tabilé Onorúgame oyérame ju rekó ꞌla rewagachi moinánilie?
\v 19 Alekeri ꞌemi napu Onorúgame oyérame ju, tase guwana rujsúpua rekó resí níliga ejperégame ke, Onorúgame boꞌné alarigá elá, abichilubi ꞌwe ꞌla aꞌká ralámuli niwa, ꞌlige ꞌla eliwa Onorúgame napurigá ꞌemi repúmala, alué Onorúgame napu ꞌemi newale napu senibí ꞌla sébali olame ju bilé nóchali olá.
\c 5
\s Jena ruwimela Pegro bilé ruwíligo bilé nawésali  beníriligo alué ralámuli Onorúgame oyérame
\p
\v 1 Bilé rejcholi ruyémala ne alué eꞌwélala napu nulame ju reꞌobachi. Neka abiena waꞌlula júchigó nulame reꞌobachi, ꞌlige neka etuáturu resí ikichi Kristo. Iꞌlibeko etewa chiena aꞌwágame ka Kristo napuꞌlige uché ku nawachi ꞌpa rewagáchika.
\v 2 ꞌWe ꞌla tebúpua alué ralámuli Onorúgame oyérame napu Onorúgame ꞌwe ꞌla repúniliga aꞌrele, napurigá repume ju ralámuli alué boꞌá aꞌboi bujkula. ꞌWe ꞌla ganíliga repúpua ꞌla napurigá Onorúgame najkí, tase repúpua enomí koruka,
\v 3 tase aꞌwágame nulewa, tase niwa napurigá bilé batroni ꞌwe ayoga nulame. Iligá ꞌwe ꞌla repúpua aꞌnalina napurigá lámala alué ralámuli: “Alué rioka ꞌwe ꞌla Onorúgame oyérame ju.”
\v 4 Alarigá ꞌwe ꞌla nímala. Napuꞌlige nawasa alué waꞌlula ꞌemi eꞌwélala repume, aꞌlige ꞌemi narémala bilé gorona\f + \fr 5:4 \ft ꞌWe ꞌyako alé Gresia anilichi bilé rió mesa roweka (carrera) bilé gorona moꞌkótilime nile. Alué gorónaka sewate newárigime nile. \f* napu tabilé che ikime ju, napu ꞌla nabí niga mochímala ꞌemi. 
\p
\v 5 ꞌEmi ejtemali aꞌchigóriga níwachigó, ꞌwe ꞌla nirawa alué eꞌwélala reꞌobachi nulame, oꞌmaka ꞌemi ejtemali ꞌwe ꞌla nirawa ꞌemi aꞌbopi, aka regá aníché alué osilí Onorúgame nila:
\q Onorúgameka tabilé galeme ju alué gunarume ralámuli,
\q iligá ꞌwe la galegá eteme ju alué tabilé gunarume.
\m
\v 6 ꞌWe ꞌla iꞌkilí rió niwa, tase riólame, ꞌla eꞌwagá napu nulá Onorúgame napurigá alué Onorúgame ꞌwe ꞌla najtékame newámala mué.
\v 7 ꞌWe seweti nísaká Onorúgame ruyéwaguru. Onorúgameka ꞌwéchigo naꞌtemame ꞌemi, eꞌwéwagurú napurigá nejkúrimala.
\p
\v 8 ꞌLa ꞌnátaga mochiwa, alué Remónisi napu ju ramué saíla, alueka pe ralámuli roꞌábiniliga eyena, eꞌnéniga eyena chieri ꞌla ka rekabalia, alueka eyena napurigá bilé mawiyá ꞌwe opurúgime. 
\v 9 ꞌWe ꞌla anachawa rekó ꞌwe ená ꞌsichi Remónisi, ꞌwe ꞌla oyériga Onorúgame, ꞌwe ꞌla bijchígiga napu aní Onorúgame, ꞌwe ꞌla machigá ꞌemi ꞌwe ejelía mochígochigó uché bilénami jena wijchimoba uché jaré napu júpáchigó Kristo oyérame napurigá ꞌemi.
\v 10 ꞌLige ꞌma resí ikisá ꞌemi pe uꞌkabi rawé, Onorúgame ꞌwe ꞌla semáriga ꞌnátame newámala ꞌemi ꞌla biꞌlepi ꞌnátili ꞌnátame ꞌlige ꞌla aꞌwágame sulégame, tase umérilime Riáblote. Alarigá guꞌírimala Onorúgame ꞌemi, alué Onorúgame napu ꞌwe naꞌtemá ramué napu najkí napurigá ꞌla rewagachi simawa ramué napuꞌlige suwisuga Esukristo ꞌyuga mochiwa.
\v 11 Onorúgame waꞌlú aꞌwalí nígame ju. Alarigá ju.
\b 
\p
\v 12 Pe uꞌkabi osilí náola ne, Silbano osá ye osilí napu ꞌemi náola ne, ye rió Silbano napu ꞌwe ꞌla oyérame ju Onorúgame. Neka ꞌwe ꞌla niraga eté ye rió Silbano. Neka osilí náola ꞌemi napurigá tabilé guwana rujsúmala ꞌemi. Tabilé siné aꞌrewa Onorúgame oyeria. Pecha naꞌtáwagó tabilé nejkúrimio Onorúgame.
\p
\v 13 Ralámuli napu ekí Onorúgame oyérame ju, napu jena Babilonia\f + \fr 5:13 \ft Mayelia siné kachi pe Roma olagá aníligo napuꞌlige Babilonia aniá. \f* ejperé, reporali náwalia ꞌemi. Alué ralámulika Onorúgame wanápale napurigá Onorúgame oyérame nímala napurigá ꞌemi, ꞌlige Marko napu ju napurigá ne inolá abiena náwaliachigó reporali.
\v 14 ꞌWe aꞌlá reporaga járowa ꞌemi aꞌbopi níriga, ꞌwe ꞌla ganíliga tase seweka suwábaga ꞌemi napu Kristo oyérame ju.
\p Pe ikí képá ye raꞌíchali. Waꞌlú cheliérabá.