\id 2PE Baja Tarahumara
\h 2 PEDRO
\toc1 2 PEDRO
\mt Ye Ju Nujubá Osirúgime Apeli Napu Pegro Nulale Osíniliga
\c 1
\s Kuira suwábaga ꞌemi ralámuli Onorúgame oyérame Asia ejperégame.
\p
\v 1 Ne Simoni Pegro Esukrístote nulérigime ju ne napurigá nulame nímala ne Onorúgame nila nochálilachi. Alekeri náule ne ye apeli ꞌwe ꞌla ruigá ye raꞌíchali rejcholi ꞌemi napu ꞌwe ꞌla bijchígame ju Onorúgame nila raꞌíchali aꞌchigóriga napurigá ramué. ꞌÉmika ꞌwe ꞌla bijchígame ju napugiti Esukrístoka ꞌwe ꞌla sébali oláligime, alué napu ramué alawala biꞌwele. Alueka pe Onorúgame ju.
\v 2 ꞌWe ꞌla nisa ꞌla képá Onorúgame ꞌwe ꞌla guꞌírasa napurigá aminabi ꞌwe ꞌla machiboa churigá ko Onorúgame ꞌlige Esusi napu ramué nuleme ju. ꞌLige alarigaka ꞌwe ꞌla ꞌnátili naꞌtámala ꞌemi.
\s Jena ruwimela Pegro ruwíligo churigá ꞌla sébali olámili ko suwábaga ralámuli napu ꞌla Onorúgame oyérame ju
\p
\v 3 Abé ꞌla machisúká churigá ko Esusi, ꞌliko abé ꞌla námapua churigá ko Onorúgame aꞌwalila, ꞌlige ꞌla umubawa ꞌla sébali olá napurigá najkí alué. Ramué wanápale napurigá ramué ꞌla narépua alué semátiri tábiri napu nejime ju alué.
\v 4 Onorúgameka boꞌné aꞌwalílate ꞌla sébali olámala napu ꞌla sébali olámorílige. Aní ꞌwe ꞌla sébali olásiká napu nulá alué, ꞌliko ꞌwe ꞌla naꞌtáwará Onorúgame nila ꞌnátali ꞌlige ꞌma tabilé oyérawará alué chátiri ꞌnátali napu nerú jena wijchimoba.
\v 5 Alekeri neka ye rejcholi ruyé ꞌemi napurigá abé ꞌla oyérame nímala Onorúgame: Alekeri ꞌwe ꞌla niraga etewa ralámuli, ꞌlige aminacho ꞌla beniboa churigá ko Onorúgame,
\v 6 ꞌlige aminami tase aꞌrewa napurigá neyúramala alué chátiri ꞌnátali. ꞌWe ꞌla anachawa rekó resí ikié ꞌemi, tase guwana rujsuka, ꞌwe ꞌla oyériga mochiwa Onorúgame.
\v 7 ꞌWe ꞌla niraga etewa uché jaré ralámuli Kristo oyérame napurigá ꞌemi aꞌboi rijimala neraga. Suwábaga ralámuli ꞌla niraga etewa.
\p
\v 8 ꞌEmi aminacho ꞌla sébali olame nísaká ye rejcholi ꞌliko ꞌwe ꞌla ganíliga ejperéramala ꞌemi. Napu ꞌemi bení churigá ko Waꞌlula Esukristo, ꞌla guꞌírimala napurigá ꞌemi ꞌla ganíliga ejperélamala.
\v 9 ꞌEmi tabilé sébali olásaká ye rejcholi, ꞌliko ꞌémika tabilé néráme ju Kristo ꞌma biꞌwíligo ꞌemi alawala. ꞌÉmika tabilé maꞌchílime neraga mochí.
\v 10 ꞌLiko ꞌemi napu Onorúgamete wanápurigame ju napurigá alué oyérame nímala, aminabi ꞌwe ꞌla sébali olawa napu nulame ju Onorúgame. ꞌLige alarigaka tabilé siné guwana rujsúmala ꞌemi.
\v 11 ꞌLige alué Waꞌlula Esukristo napu ramué nuleme ju, ꞌlige napu ramué alawala biꞌweme ju, ꞌwe ꞌla ganíliga rejpórimala napuꞌlige sebasa ꞌemi alé napu ajtí senibí nulá alué.
\p
\v 12 Alekeri aꞌkuepi néláramala ne ꞌemi ꞌwe ꞌla sébali oliame ko napu Onorúgame nulá, rekó ꞌemi ꞌwe ꞌla machiépá ꞌwe ꞌla oyérilime ko Onorúgame ꞌlige aminami rekó tabilé guwana rujsue ꞌemi Onorúgame oyeria.
\v 13 Neka ꞌwe ilimela ꞌwe ꞌla rejcholi ruyea ꞌemi jipe bijí ajagá asagá ne, napurigá ꞌla machigá nokísamala ꞌemi tabilé siné aꞌrilime ko Onorúgame oyeria.
\v 14 Alué Waꞌlula Esukristo ꞌwe ꞌla maꞌchígime ruwí ꞌma pe ꞌwemi mukumeo ne, alekeri rejcholi nejí ne.
\v 15 Neka ꞌwe maꞌchígime benírimala ꞌemi ye raꞌíchali rejcholi napurigá ꞌemi ꞌla nélémala ye raꞌíchali nujubami napuꞌlige ꞌma mukusá ne.
\s Jena ruwimela Pegro etéligo Waꞌlula Esusi napuꞌlige Onorúgame ꞌyuga raꞌíchachi
\p
\v 16 Raꞌíchali napu ruyeru ꞌemi larigá ko Esukristo aꞌwalila ꞌlige chiena waꞌlú aꞌwaliga nawamio Esukristo napuꞌlige uché ku nawá jena wijchimoba, alué raꞌíchalika tabilé ꞌyégali kéturu, napugiti ramueka etérigame asíriga ꞌla semáriga ilíligo alé rabó semáriga raꞌósiga, napu nílige Onorúgame aꞌwalila,
\v 17 ꞌlige aminami ramueka akea járigeturu napuꞌlige Onorúgame ꞌwe ꞌla niraga regá anechi Esusi: “Yeka ne Inolá ju alué napu ne ꞌwe galé. Neka ꞌwe raꞌsálagá ajtí ye ne Inolá ꞌyuga.”\f + \fr 1:17 \ft Eꞌnesi San Mateo 3:17. \f*
\v 18 Ramueka aꞌboi akea járigeturu alanechi Onorúgame alué Esusi alé rabó napu Onorúgame níriká ꞌwe najtékame nílige, ramueka Esusi ꞌyuga mochírigeturu.
\p
\v 19 Alekeri ꞌwe ꞌla bijchígilia ramueka ꞌla bijchiá ko napu ruwile alué ralámuli ꞌya mochígame napu ruwime nile napu anele Onorúgame. Alueka aniéturu Onorúgame julamio bilé nejkúrime. Alekeri ꞌwe ꞌla gepuwa alué raꞌíchali ꞌya nerúgame, alué raꞌíchilika ꞌwe ꞌla ruwime ju churigá ejperélitiká napusí ku nawachi Kristo.
\v 20 ꞌWe ꞌla machiboa ꞌemi alué raꞌíchali napu narele alué ralámuli tabilé pe aꞌboi naꞌtálila níligo.
\v 21 Alué ralámuli napu ruwime nile napu anele Onorúgame tabilé ruwile pe aꞌboi ꞌnátaga napu anele Onorúgame, Onorúgame Alawala ꞌsile guꞌiria napurigá ꞌla semáriga ruwimela.
\c 2
\s Jena ruwimela Pegro ruwíligo chukimeo  alué ralámuli napu tabilé ꞌla rejcholi benírame ju
\p
\v 1 Nobi alé Israeli anilichi weꞌká ralámuli mochile regá anime: “Neka ruwime ju napu ané Onorúgame neꞌchí.” Pe lanime nile peka bijchiá kachi. Aꞌchigóriga nímala alé napu ꞌemi mochí, weꞌká mochímala alieti anime ralámuli. Alueka ruwimela tabilé ꞌla bijchiá raꞌíchali. ꞌLige aminami ruwimela Esukristo tabilé waꞌlula ko, nobi Onorúgameka pe yati neraga meꞌlimela alieti anime ralámuli.
\v 2 Weꞌká ralámuli oyéramala alué ralámuli raꞌichálila, ꞌlige aꞌchigóriga nokimela napurigá nokame ju alué ralámuli ꞌwe cha nokame. Etega alarigá nokame ko alué ralámuli, uché jaré ralámuli ꞌwe cha nokame ralámuli korimela Onorúgame oyérame ralámuli olagá.
\v 3 Alué ralámulika pe ꞌwe ménilia mochímala enomí, ꞌlige pe ꞌyégali beníriga ꞌma nejpomela enomí ꞌemi nila enomí. Onorúgameka asíriga iꞌbesi ꞌla eꞌnagá ajtí gastigárinilia alué ralámuli napugiti Onorúgameka pecha siné gojchime kame, ꞌma naꞌichí ꞌlúmala.
\p
\v 4 Onorúgameka tabilé eꞌkale alué santo ánjeli napuꞌlige cha nokisá, iligá waꞌlú gastigo ꞌyale, injiérnochi ꞌluka ꞌwe chóniga ilígichi ꞌwe reꞌlé, ꞌlige alé mochí karénate buluruga, alé mochímala napusí seba raweli napuꞌlige Onorúgame gastigárimichi suwábaga alué cha nokágame santo ánjeli.
\v 5 Aminami Onorúgame tabilé eꞌkale alué ralámuli napu cha nokogá ejperégame nile ꞌya napuꞌlige ajtígichi jena wijchimoba alué Noé anilime rió, Onorúgameka elegá waꞌlú uꞌkírile alué ralámuli meꞌlimea, pe alué Noé anilime riocho ꞌwe ꞌla repule napugiti Noeka ꞌla tabilé ꞌyégali raꞌíchame níligame, iligá ꞌwe ꞌla rejcholi ruyeme nile napurigá ꞌla semáriga ejperélamala. Onorúgameka tabilé meꞌale uché jaré gichao ralámuli napu Noé rijimala nílige. 
\v 6 Onorúgameka abiena gastigárile alué ralámuli Soroma ejperégame ꞌlige Gomora ejperégame, ꞌma meꞌale naꞌite ꞌlige ꞌma najpisó gayénale suwábaga ralámuli alé okaná weꞌká riógichi ejperégame, ꞌma galítiri ꞌyúriga ꞌma najpisó gayénale. Onorúgameka alarigá gastigárale alé okaná weꞌká riógichi ejperégame ralámuli napurigá ꞌla naꞌtámala alué cha nokame ralámuli chujkimeli ko aꞌkinánami alué cha nokame ralámuli.
\v 7 Nobi tabiléchigo meꞌale ko bilé rió Loti anilime, alué rioka ꞌwe aꞌlá rió níligame napu ꞌwe seweka asale etea eꞌkarúriga nokachi alué ralámuli alé okaná weꞌká riógichi ejperégame.
\v 8 Alué rió Loti anilímeka nabí ꞌwe eteme nile napuchíbiriga nokachi alé ejperégame ralámuli ꞌlige ꞌwe resí nílime nile alieti etega.
\v 9 Onorúgameka asíriga ꞌla machí alarigá guꞌírimio alué ralámuli ꞌla Onorúgame oyérame napu resí nilia mochí napuꞌlige etea ꞌwe cha nokachi uché jaré ralámuli. ꞌLige asíriga ꞌla machí Onorúgame churigá gastigárimio ralámuli cha nokame napuꞌlige seba raweli Onorúgame gastigárimala suwábaga ralámuli cha nokame.
\p
\v 10 Onorúgameka abé rajpé gastigárimala alué ralámuli napu tabilé eꞌweme ju Onorúgame, ꞌlige alué napu chibi nokogá ejperégame ju napu chibi nokinali aꞌboi. Alué benírame napu ꞌyégali benírame ju asíriga riólame ju, ꞌlige tabilé majame ju chibiyeti anega alué santo ánjeli.
\v 11 Alué santo ánjelika abéchigo aꞌwágame júkó meꞌtigá alué benírame, ꞌlige napuꞌlige Onorúgame ꞌyuga raꞌicha jágichi, tabilé chibi aneme ju alué benírame napu ꞌyégali benírame ju. Alueka buigá mochime ju napurigá Onorúgame ꞌsímala gastigaria.
\p
\v 12 Alué ꞌyégali benírameka napurigá ajágame jami oyame, alarigá ju, napu pe chaꞌpisá meꞌliame ju. Sairúgame raꞌíchame ju napu aꞌboi tabilé námame ju.
\v 13 ꞌWe resí ikimela alué ꞌyégali benírame napugiti cha resí oláligime uché jaré. Asíriga ganílime ju chibi nokogá eꞌyénaga rawemi. Tabilé buweme ju napusí chonasa. Asíriga chijunárigame ju napu nokogá eꞌyena alué ꞌemi si eꞌyénaga.
\p
\v 14 Alué ꞌyégali benírameka napu ꞌemi si eꞌyena pe umugí eꞌnéniga eꞌyéname ju pe ꞌyuga okóniliga. Alueka tabilé aꞌreme ju cha noká. Alué benírameka asíriga ꞌyégiga raꞌíchame ju alué ralámuli ꞌyuga napu tabilé ꞌcho ꞌla bijchígime ju churigá ko Kristo. Alueka asíriga ejpénigime ju churigá bujemio uché jaré ralámuli nila. Nobi Onorúgameka gastigárimalagó alué ꞌyégali benírame.
\v 15 Alué ꞌyégali benírameka napurigá eꞌwagágame neraga eꞌyena napugiti ꞌma aꞌréligame Onorúgame eꞌwea. Alueka pe Balaámi naꞌtálila ꞌlina oyérale napu Beori inolá nílige, alué ꞌwe ꞌya bejtégame. Alué Balaámika weꞌká enomí meme nílige pe ꞌyégali raꞌíchali beníriga.
\v 16 Onorúgameka aꞌwalí ꞌyale bilé bulito napurigá raꞌichámala napurigá raꞌíchame ju ralámuli. ꞌLige raꞌíchale alué bulito Balaámi neꞌóchaga. ꞌLiko Balaámika abisibi aꞌrele ꞌyégali raꞌíchali beniria.
\p
\v 17 Alué ꞌyégali benírameka pe napurigá bilé bajisoli wakígame, pe alarigá ju, ꞌlige pe napurigá bilé bemolí ekárale ꞌmame. Onorúgameka gastigárimala alué ꞌyégali benírame ꞌlégana injiérnochi júliga napu ꞌwe chóniga ilígame ju.
\v 18 Alué ꞌyégali benírameka ꞌwe semáriga raꞌíchame ju ralámuli ꞌyuga napu pe kulí ꞌla oyérame ju Onorúgame. Alueka ruwime ju weꞌká umugí ꞌyuga oꞌkome ko ꞌlige ꞌwe nígame korime ju. Alarigá ruyame ju napurigá alué ralámuli napu pe kulí ꞌla oyérame ju Onorúgame aꞌchigóriga nokimela.
\v 19 Alué ꞌyégali benírameka ruwime ju tabilé eꞌwélame ko Moisesi nila nulalí nobi alueka eꞌweme ju alué chátiri ꞌnátili. Napuꞌlige bilé ralámuli ꞌwe ꞌla oyérame nisa alué chátiri ꞌnátili, ꞌma tabilé umébame ju aꞌrea alué ꞌnátili ꞌnata rekó aꞌrénilie.
\v 20 Waꞌlula Esukristo ju ramué alawala biꞌweme ꞌlige ramué nuleme ju. Napuꞌlige bilé ralámuli ꞌma aꞌresa alué chátiri ꞌnátali oyeria napugiti ꞌma námame kame churigá ko Waꞌlula Esukristo, ꞌlige kúchigo oyélasaká alué chátiri ꞌnátili ꞌliko abéchigo chaꞌsime gayéname ju.
\v 21 Abé ꞌla nílige alué ralámuli tabilé machisá churigá ko Waꞌlula Esukristo, nobi jípeko ꞌmáchigo ꞌla machígó, ꞌlige aꞌrésaká Onorúgame nulalila oyeria, abéchigo cha nokame nímala meꞌtigá abé iꞌbé.
\v 22 Alarigá nokame ju alué ralámuli napurigá aní ye raꞌíchali: “Oꞌkochí boꞌné yoꞌsá, ku goꞌyame ju, ꞌlige bilé gowí ꞌwe ꞌla uꞌbárigame anaga wejsogachi bajkime ju.”
\c 3
\s Jena ruwimela Pegro ruwíligo Esukristo  uchéchigo siné nawamio jena wijchimoba
\p
\v 1 Suwábaga ꞌemi napu ne ꞌwe galegá eté, ye ju nujubá osirúgime apeli napu ne ꞌemi náola napurigá ꞌemi tabilé aꞌrémala alué aꞌlala ꞌnátili ꞌnata.
\v 2 Neka najkí napurigá ꞌemi ꞌwe ꞌla nélámala napu ruwílige alué ralámuli ꞌwe ꞌya napu ruwime nílige napu anele Onorúgame. ꞌLige aminami tabilé weꞌkuawa alué nulalí napu nejile Waꞌlula Esukristo napu ramué alawala biꞌweme ju. ꞌLige ramué makué oká rió napu Esusi ꞌyuga eꞌyéniru ruyeru napu Esusi benírale ramué.
\p
\v 3 ꞌWe aꞌlá ꞌnátaga ejperélawa ꞌemi napugiti ꞌma amulí suwíbachi gawí jsimela weꞌká ralámuli ꞌwe cha nokame napu nokinali aꞌboi ꞌlige asíriga gawélimala ꞌemi olagá.
\v 4 ꞌLige regá animela: “Esusi uchéchigo siné nawámaoriéturu. ¿Koche ajtí? Napusí Onorúgame newale ye gawí, suwábaga peba alarigá ju.”
\v 5 Tabilé bijchiá ju. Alué ralámulika tabilé námame ju. Onorúgmeka ꞌwe ꞌya newale gawí ꞌlige rewagátiri pe boꞌné ꞌnátaga, ꞌlige waná elale baꞌwí ꞌlige weꞌétiri.
\v 6 ꞌLige aminami tabilé weꞌkuawa Onorúgame baꞌwite oꞌpólirigo gawí ꞌwe ꞌya.
\v 7 ꞌLige aminami alué rewagá ꞌlige ye gawí napu jipe nerú Onorúgameka ꞌwe ꞌla ꞌnata ajtí chiéniko julamio naꞌí napurigá rajimela ye gawí ꞌlige rewagátiri napuꞌlige gastigáriwili ju suwábaga alué ralámuli cha nokame.
\p
\v 8 Aminami ꞌemi ralámuli napu ne ꞌwe galegá eté, tabilé weꞌkuawa Onorúgame níriká, bilé rawé napurigá bilé mili bamí nerame ju ꞌlige bilé mili bamí napurigá bilé rawé nerame ju.
\v 9 Waꞌlúlaka tabilé najkigá ꞌsmi napurigá ꞌemi gastigáriwa tabilé oyérame kóriká, alué Onorúgameka najkí napurigá suwábaga ꞌemi aꞌrémala cha noká. Alekeri tabilé anaga gastigárime ju.
\p
\v 10 Nobi napuꞌlige Waꞌlula Esukristo ku nawá, nawámala pe yati neraga napurigá nawame ju bilé chigórigame. Aꞌlige rawé suwibámala rewagá ꞌlige sopilítiri, aꞌwágame rolómala napurigá anime ju naꞌí. Suwábaga napu ju ye gawí ꞌlige suwábaga napu nerú jena ꞌma tané ikimela rajagá.
\p
\v 11 Suwábaga suwibámili ju alarigá. ꞌLiko ꞌemi pe Onorúgamecho eꞌwímili júkuru ꞌlige ꞌla sébali olamili júkuru ꞌemi napu Onorúgame najkí.
\v 12 ꞌLa ꞌnátaga mochiwa Onorúgame nawamio bilé rawé gustisia olamia suwábaga ralámuli. Aꞌlige rawé Onorúgame eꞌkósimala rewagá, soꞌpilí, rayénali ꞌlige mechátiri.
\v 13 Nobi ramueka ꞌwe ꞌla buigá mochiwa Onorúgame newamio uché bilé rewagá nuebo ꞌlige gawítiri napurigá anílige boꞌné, alarigá newámala aꞌliko suwábaga ralámuli ꞌla sébali olámala napu Onorúgame najkí.
\p
\v 14 Alekeri ꞌemi napu ne ꞌwe galegá eté, ꞌwe ꞌla buigá mochiwa ꞌlige suwábaga ꞌla sébali olawa pe Onorúgamecho ꞌyuga ꞌnátaga.
\v 15 Aka regá anime osáligeꞌé Páulo napu ramué ꞌwe galegá eteru: “Onorúgameka tabilé anaga gastigárime ju bilé ralámuli chaꞌsisa. Alueka buweme júkuru napurigá alué ralámuli ku ꞌla naꞌtámala.” Onorúgame ꞌsile ye ꞌnátali ꞌya alué Páulo ꞌlige néchigó alarigá ꞌnátame júchigó.
\v 16 Aꞌpili apélichi napu Páulo osale aꞌchigóriga anime ju. Iꞌsínimi jaré raꞌíchali ꞌwe nóchali kame ju námilia. Alekeri jaré ralámuli napu tabilé námame ju Onorúgame nila raꞌíchali, alueka pe seꞌwináriga ruyeme ju alué raꞌíchali suwábaga Onorúgame nila raꞌíchali, ꞌlige alekeri gastigáriwili ju alué ralámuli.
\p
\v 17 ꞌEmi napu ne ꞌwe galegá eté, ꞌemi ꞌwe ꞌla machíguru ye raꞌíchali. ꞌLiko ꞌwe ꞌla rejchiruga mochiwa napurigá alué napu pe ꞌyégali benírame ju, tabilé umbámala ꞌemi ꞌyegaria. ꞌÉmika ꞌma ꞌwe aꞌlá ꞌnata mochíkuru napurigá ne, ꞌlige tabilé najkí ne napurigá rujsúmala ꞌemi.
\v 18 Neka najkí napurigá aminabi benimela ꞌemi churigá ko Waꞌlula Esukristo. Aminacho ꞌwe ꞌla beniboa churigá ka Waꞌlula Esukristo napu ramué alawala biꞌweme ju ꞌlige aminami ramué nuleme ju. ꞌLige senibí ꞌwe ꞌla raꞌichawa alué olagá.
\p Pe ekí képá ye raꞌíchali. Waꞌlú cheliérabá.