\id 1JN Baja Tarahumara
\h 1 JUAN
\toc1 1 JUAN
\mt Ye Ju Alué Apeli Napu Bajchá Osale Juani
\c 1
\s Kuira suwábaga ꞌemi ralámuli Onorúgame oyérame.
\p
\v 1 Ne Juani jena osé ne ꞌemi ꞌwe ꞌla sébali ruigá ꞌma asáligo ꞌwe ꞌya alué Esukristo napuꞌlige taꞌchó iꞌtégichi ye gawí. ꞌLige ꞌma nerúligo napu ramué akirú. ꞌLige jena wijchimoba nawáligo Esukristo ruwimea churigá ꞌla ganíliga ejperéliwa. Ramué, ꞌlige uché jaré, eteru ꞌlige nocharu ramué aꞌboi sekálate.
\v 2 ꞌLige ꞌla maꞌchiná eteru ramué, ne ꞌlige uché jaré, ꞌlige ruilía ꞌemi jena wijchimoba nawáligo Kristo, ꞌla oyérisiká alué Esukristo ꞌliko ꞌla senibí ejperéliwa ramué ꞌlige apiépiri ralámuli alué Onorúgame ꞌyuga.
\v 3 Ramué ꞌla ruiliwa ꞌemi napu eteru ramué ꞌlige napu akirú napu anile alué Esukristo, napurigá ꞌemi ꞌlige ramué napuíka ꞌla Onorúgame oyérame niwa, napurigá oyeria mochiwa Onorúgame. Ramueka Onorúgame oyérame niru ꞌlige alué Inolá napu ju Esukristo.
\v 4 Neka ye nawésali oséguru ꞌemi napurigá suwábaga ramué ꞌwe ꞌla ganíliga ejperéliwa.
\s Jena ruwimela Juani ruwíligo Onorúgame ꞌwe ꞌla ꞌnátame ko, tabilé seꞌwináriga
\p
\v 5 Ye ꞌnátili rejcholi ju napu beníriru ramué Esukrístote, ꞌlige ramueka ꞌemi ruilía napu aní alué Esukristo. Krístoka aníturu ꞌwe ꞌla ꞌnátame ko Onorúgame, tabilé tase seꞌwináriga, ꞌlige tabilé siné seꞌwináriga ꞌnátame ko.
\v 6 ꞌWe ꞌla Onorúgame oyérame korusúká, ꞌlige kúchigo pe seꞌwiná nokagá eꞌyénisiká ꞌliko pe ꞌyégame niru, ꞌlige pe tabilé eꞌwame niru napu najkí Onorúgame.
\v 7 ꞌLa tabilé che nokagá eꞌyéname níriká, ꞌlige ꞌla semáriga ꞌnátaga napurigá najkí Onorúgame, ꞌliko ꞌla ganíliga ejperégame niwa ramué oꞌmaka, napugiti ꞌma ꞌla biꞌwíligame ramué alawala alué Onorúgame Inolá Esusi napuꞌlige mukisá.\f + \fr 1:7 \ft Juánika regá anime osale: “Alué Esukristo elalá ramué alawala biꞌweme ju.” ꞌLige ramueka regá anime osirú: “ꞌMa ꞌla biꞌwele ramué alawala Esusi napuꞌlige mukiá.” \f*
\p
\v 8 Regá anisúgaká: “Ramueka ꞌma ꞌla Onorúgame oyérame niru, ꞌlige jipe ꞌma tabilé chátiri ꞌnátili ꞌnátame niru, pe ꞌla aꞌlala ꞌnátalicho.” ꞌLiko Onorúgame níriká ꞌma chátiri ꞌnátame niru, alésíko pe ramué aꞌbopi resí ikiame niwa.
\v 9 ꞌWe ꞌla eꞌkali tánilime níriká Onorúgame napuꞌlige cha nokinálisa, cha nokisuga ma,\f + \fr 1:9 \ft Chátiri ꞌnátaga einalia ka tabilé ꞌla ju Onorúgame níriga aꞌchigóriga resíriga ju napurigá cha ꞌsika einalia. \f* ꞌliko Onorúgameka ꞌla yati nejkúrimala, napugiti Onorúgameka ꞌla sébali olame kame napu aní boꞌné, alueka tase lámala bilé ralámuli ꞌwe cha ꞌsika eyénachi: “Rekó cha ꞌsíkame ke ye rió, tabilé gastigárimala ne.”
\v 10 Tase siné rawé seꞌwiná nokame koriáká ramué ralámuli, ꞌliko aniánti kérélawa: “Onorúgameka pe ꞌyégame ju.” Alésíko tabilé korume niwa Onorúgame nila raꞌíchali.
\c 2
\s Jena ruwimela Juani ruwíligo Esukristo ramué guꞌírame ko
\p
\v 1 ꞌEmi napu ne ꞌwe najkí, neka osé ꞌemi ye raꞌíchali napurigá tabilé chátiri ꞌnátaga eꞌyénamala ꞌemi, ꞌlige tabilé cha nokagá. ꞌLige neyúrisaká alué chátiri ꞌnátili ꞌlige cha nokisá ꞌemi, ꞌliko Esukristo tániwa nejkúrali alué Esukristo napu ꞌla nejkúrime ju, ꞌliko Esukristo Onorúgame tánimala napurigá Onorúgame ꞌwe ꞌla nejkúrimala.
\v 2 Alueka mukúlekuru ramué resítiri ꞌnátili bujigá. Esukrístoka tabilé pe uꞌkabi ralámuli guꞌíriga mukúlekuru, Esukrístoka suwábaga ralámuli guꞌíriga mukúlekuru napu ekí jena wijchimoba ejperéliru.
\p
\v 3 ꞌLa eꞌwásiká napurigá nulale Esukristo, aꞌliko ꞌla machiboa ꞌla oyérame níligo Esukristo.
\v 4 Bilé rió anisá: “Neka ꞌla oyérame ju Esukristo”, ꞌlige tabilé eꞌwasa alué rió napurigá nulá Esukristo, ꞌliko ꞌyégame nímala alué rió.
\v 5 Bilé ralámuli ꞌla sébali oyérame Onorúgame nila raꞌíchali, alué ralámulika ꞌla galeme nímala Onorúgame, ꞌlige ꞌwe ꞌla niraga etémala uché jaré ralámuli, aꞌchigóriga napurigá Onorúgame galé ramué. ꞌLige ꞌla nélegíaká Onorúgame, ꞌla machiboa Onorúgame oyérame nírigo.
\v 6 Bilé ralámuli ꞌwe ꞌla oyérame kórisáká Onorúgame, alueka aꞌchigóriga naꞌtámili júkuru ꞌla napurigá ꞌnátale Esukristo jena wijchimoba asagá.
\s Jena ruwimela Juani ruwíligo Esukristo ꞌsíligo sébali gatea
\p
\v 7 ꞌEmi napu ꞌwe galilía Onorúgamete, neka pecha nuebo nulalí ruwígó, pe aba alué raꞌíchali ruwí ne napu akele ꞌemi ꞌyasi.
\v 8 Pe iligá jípeko abechigó ꞌla námatume ruwí ne. Jipe ꞌla machí ꞌemi tachiri gite mukúligo Esukristo, ꞌlige churigá sébali olá ajtigó Esukristo jipe ꞌemi guꞌiria, ꞌlige ꞌla machigá ajtigó choniá mochigo ꞌemi.
\p
\v 9 Bilé ralámuli Onorúgame oyérame ꞌwe ꞌla námame korisá chonime ko ye raꞌíchali tabilé ꞌyégali, ꞌlige tabilé ꞌla ganíliga eteme nisa uché jaré ralámuli, ꞌliko alué ralámuli tabilé ꞌla eꞌwame kéré Onorúgame nila raꞌíchali.
\v 10 Bilé ralámuli Onorúgame oyérame ꞌwe ꞌla galeme uché jaré Esukristo oyérame ralámuli, ꞌlige ꞌwe ꞌla niraga eteme, alué ralámulika ꞌwe ꞌla eꞌwame kéré ye tabilé ꞌyégali raꞌíchali. Alueka tabilé che nokagá eꞌyénamala, napurigá uché jaré ralámuli tabilé che nokimémpáchigó.
\v 11 Ralámuli ꞌwe ayome ka uché jaré Esukristo oyérame ralámuli ꞌyuga, alueka tabilé námame nímala alué napu ju ꞌla tabilé ꞌyégali raꞌíchali, alué ralámulika napurigá chónigichi eꞌyéname pe alarigá kérélamala, tabilé raꞌósiga ilígichi, alué ralámulika pe napurigá siego kérélamala. Ye raꞌíchalika ruwime kéré alieri ralámulika bijí tabilé ꞌcho ꞌla biꞌwígame alawégame ko.
\p
\v 12 Neka oséguru ꞌemi napu pe kulí chojkí Esukristo oyeria, ꞌemi napu ꞌma bujérigame ju chátiri ꞌnátili Esukrístote, alué Esukrístoka ꞌsile sébali gatea, alué resítiri ꞌnátili bujigá, napurigá ꞌma senibí biꞌwígame alawégame nímempá ꞌemi.
\v 13 ꞌLige abiena osé ne ꞌemi napu ꞌma ꞌla sébali oyérame ju Esukristo. ꞌEmi ꞌwe ꞌla machí Esukristo ꞌwe nejkúrime ko suwábaga nóchalichi ꞌlige ꞌnátalichi, ꞌlige aminami abiena oyérame ju ꞌemi alué napu ꞌyasi ajtígame ju taꞌchó gayénichi ye gawí. Abiena osé ne ꞌemi napu bení churigá ko ꞌwe ꞌla sébali oyérilia Onorúgame ralámuli níriga, ꞌemi abichilubi ꞌwe jale alué Remónisi naꞌtálila aꞌrea, ꞌlige arigá ꞌma ꞌla umébale ꞌemi alué Remónisi naꞌtálila aꞌrea.
\p Aminami osé ne ꞌemi napu pe kulí eꞌyena aꞌlala bowechi, eꞌwasia napu nulá Onorúgame.
\v 14 Neka aminami oséguru ꞌemi napu ꞌma ꞌla sébali oyérame ju Esukristo, alué napu ꞌyasi ajtígame ju taꞌchó gayénichi ye gawí. Abiena osé ne ꞌemi napu bení churigá ko ꞌwe ꞌla oyéralia Onorúgame, ꞌemi napu tabilé bijchígame ju alué ꞌyégali raꞌíchali, ꞌémika pe Onorúgamecho ꞌwe ꞌla bijchigi, ꞌemi napu ꞌma umérole alué Riablo.
\p
\v 15 Tabilé weꞌká ꞌnata mochiwa, tase najkiá mochiwa weꞌká eꞌkarúginti, suwábaga alué ꞌnátili asíriga chátiri ju Onorúgame níriga. ꞌEmi alué ꞌnátili oyérasaká, ꞌliko ꞌma tabilé oyérinilime nímala ꞌemi Waꞌlula Oꞌnó Onorúgame naꞌtálila.
\v 16 Alué ꞌnátilika tabilé Onorúgame nejílala ju, pe ramué aꞌboi naꞌtálila ju alueka, napurigá weꞌká eꞌkarúginti najkigá járilia ꞌlige umugítiri, ꞌlige uchéchigo jaré tábiri.
\v 17 Suwábaga alué ꞌnátilika ꞌma suwibámala, nobi Onorúgame naꞌtálilaká ꞌláchigo senibí nerúlamalagó, ꞌlige ꞌwe ꞌla ju ꞌla suériga naꞌtemaka guꞌírilia ralámuli, napurigá Onorúgame najkí.
\s Jena ruwimela Juani ruwíligo weꞌká eꞌyénimio Kristo korime aꞌbopi
\p
\v 18 ꞌEmi ꞌla machí bilé rió sebámaráo Kristo korime ralámuli buyáname korime alé resítiri bowechi, ꞌma weꞌká mochíkuru alanime ralámuli, alekeri ꞌla maꞌchígime nérékuru ꞌma pe ꞌwe gajumio ye gawí.
\v 19 Alué ralámuli napu ralámuli buyáname korime alé resítiri bowechi, iꞌbé bajchabeka ramué ꞌyuga eꞌyénituru péchigo seꞌwinátiri ꞌnátili ꞌnátaga eꞌyéname kérélekó. ꞌLa bijchiá ꞌla oyérame nísaká Onorúgame napurigá ramué, ꞌla bijí ramué ꞌyuga eꞌyénimikuru, ꞌma rojale, alekeri maꞌchí nérékuru tabilé ꞌla Onorúgame oyérame níligo.
\p
\v 20 ꞌÉmika tabiléchigo alarigá júkó. ꞌÉmika Onorúgamete ꞌyaru Onorúgame Alawala. Onorúgame Alawala gite ꞌwe ꞌla machí ꞌemi alarigá ikimeo.
\v 21 ꞌEmi ꞌwe ꞌla námame ju Onorúgame nila raꞌíchali, alekeri osé ne ꞌemi Onorúgame nila raꞌíchali. ꞌÉmika ꞌwéchigo ꞌla námame. ꞌEmi ꞌwe ꞌla machíguru bilé rió ꞌwe ꞌla raꞌíchame ka, tabilé ꞌyégiga raꞌíchame ko.
\p
\v 22 Bilé rió, tabilé Onorúgamete julárigame korime Esusi rewigáchika, ꞌliko alué rioka ꞌyégiga raꞌíchame nímala, alueka Kristo korime nímala boꞌnepi, ꞌlige Oꞌnó Onorúgame saíla nímala.
\v 23 Suwábaga napu ekí anime ju tabilé Onorúgamete julárigame ko Esusi tabilé machime ju churigá ko Oꞌnó Onorúgame. Bilé rió ꞌwe ꞌla ruyeme nisa ꞌwe ꞌla biꞌwígame chieri ko Onorúgame Inolá, alueka ꞌma ꞌla oyérame ju Onorúgame.
\p
\v 24 ꞌWe ꞌla ꞌnátaga mochiwa, ꞌla eꞌwawa, ꞌwe ꞌla oyériwa napu akélige ꞌemi ꞌya napu pe kulí oyeria ꞌemi Esukristo. Alarigá nokisáká ꞌemi, ꞌliko asíriga ꞌla oyérame nímala ꞌemi Esukristo, ꞌlige aminami Oꞌnó Onorúgame.
\v 25 Alarigáchigo aníligame Esukristo ꞌla simawio rewagachi ꞌlige alé ejperéliwio senibí neraga napuꞌlige suwisuga.
\p
\v 26 Neka ruyéguru ꞌemi alarigá ko alué ralámuli ꞌyégali ruyeme ꞌemi.
\v 27 Onorúgame Alawala pachágana ajtíkuru ꞌemi saꞌpálachi, alekeri tabilé rokárékuru bilé aꞌlala ꞌnátili benírime. Onorúgame Alawala suwábaga benírime ju, ꞌwe ꞌla bijchiá tabilé ꞌyégali. Alekeri napurigá aní alué Onorúgame Alawala ꞌla Esukristo naꞌtálila ꞌnátaga mochiwa suwábaga napurigá benírile Onorúgame Alawala ꞌya.
\p
\v 28 Jipe ꞌemi napu ekí pe kulí ꞌla oꞌwina Esukristo oyeria, tabilé aꞌrewa Esukristo naꞌtálila. ꞌLiko napuꞌlige uchéchigo siné nawachi alué Esukristo ꞌpa rewagáchika ꞌla tabilé majaga etewa alué Esukristo, ꞌlige tabilé chijunawa napuꞌlige alué Esukristo nawachi.
\v 29 ꞌEmi ꞌla machíguru Onorúgame nabí ꞌla sébali olame ko napu aní. Alekeri ꞌla machíguru ꞌemi napuꞌlige bilé ralámuli ꞌwe ꞌla nóchachi napurigá nulá Onorúgame, ꞌla Onorúgame Alawala narékame ko alué rió.
\c 3
\s Jena ruwimela Juani ruwíligo Onorúgame Alawala alawégame níriká,  ꞌla Onorúgame ꞌkúchila nírigo
\p
\v 1 ꞌWe ꞌla machiboa, Onorúgame chiena galeo ramué, ꞌlige asíriga ꞌla niraga etuwío ramué. Alekeri ꞌla narékiaguru Onorúgame Alawala, jípeko alué alawate Onorúgame ꞌkúchila nírukuru, ꞌla bijchiá alarigá ju. Ralámuli tabilé oyérame Onorúgame, tabilé námame ju alué raꞌíchali, ꞌlige tabilé machí churigá ꞌnátame nírigo ramué, napugiti tabilé oyérame kame Esukristo.
\v 2 ꞌEmi napu ꞌwe galilía Onorúgamete, Onorúgame Alawala nígame nirú ramué. Rekó tabilé machiae alarigá nímio abé iꞌlibeko nujubá rawé, ꞌláchigo machirúgó napuꞌlige Esukristo uchéchigo siné nawachi jena wijchimoba aꞌchigóriga nimio napurigá alué Esukristo.
\v 3 Suwábaga napu ekí ꞌla bijchiga napurigá ikimeo, alueka ꞌma ꞌla biꞌwígame alawégame gayéniguru iꞌkilimi napurigá alué Esukristo.
\p
\v 4 Suwábaga napu ekí cha nokagá járome ka, chibiyeti nóchaga, alueka resítiri alawégame gayena, napugiti bilé rió resítiri alawégame gayéname kame napuꞌlige tabilé eꞌwasa Onorúgame nulalila.
\v 5 ꞌEmi asíriga ꞌla machíguru Esukristo jena wijchimoba nawáligo alué resítiri ꞌnátili bujemia napu niga mochírige. ꞌEmi ꞌla machíguru Esukristo tabilé resítiri alawégame ko.
\v 6 Suwábaga napu ekí Esukristo ꞌyuga ꞌnátame ju aminabi tabilé cha nokagá járome ju. Suwábaga napu ekí abiena cha nokagá járome tabilé ꞌcho ꞌla námame ju alarigá ko Esukristo.
\v 7 ꞌEmi napu ne ꞌwe najkí, ꞌwe ꞌla ꞌnátaga mochiwa napuꞌlige uché jaré ralámuli ruwichi chibiyeti raꞌíchili. Tabilé ꞌla ꞌínili alué ralámuli. Ralámuli ꞌwe ꞌla nóchame ka napurigá Onorúgame najkí, alueka ꞌwe ꞌla sébali ralámuli júkuru.
\v 8 Ralámuli ꞌwe cha nokagá járome, alueka Remónisi oyérame júkuru. Remónisika asíriga tabilé ꞌla nóchame ju napusí jena wijchimoba nawasa. Alekeri Onorúgame júlale boꞌné Inolá jeka wijchimoba napurigá mabuwa alué Remónisi aleké Onorúgame Inolate.
\p
\v 9 Suwábaga napu ekí Onorúgame Alawala alawégame ju, alueka tabilé cha nokigá eꞌyéname ju, ꞌmáchigo Onorúgame Alawala nígame kame alué ralámuli.
\v 10 Alarigá ꞌla machiboa chieri ka ꞌla Onorúgame oyérame ralámuli, ꞌlige chieri ka Remónisi oyérame. Suwábaga napu ekí ta oyérinilime Esukristo napurigá najkí Onorúgame, chibi nokigá járome ju, ꞌlige aminami tabilé ꞌla ganíliga etega uché jaré ralámuli, alueka tabilé Onorúgame Alawala alawégame ju. Alué ralámulika tabilé Onorúgame ꞌkúchila ju.
\s Jena ruwimela Juani ruwíligo ꞌwe ꞌla ganíliga járilime ko oꞌmaka
\p
\v 11 Ye raꞌíchalika ruyame ju churigá ka Onorúgame, ꞌlige ruyame ju alarigá oyératika Onorúgame, pe aba alué ju napu akirú ꞌyabesi napuꞌlige pe kulí oyeria Esukristo. Onorúgame nejíturu ye raꞌíchali napurigá galegá járowa aꞌbopi oꞌmaka ralámuli.
\v 12 Tase napurigá Kaíni, alué Arani ꞌlige Eba inolá, tabilé alarigá niwa, alueka pe Remónisi gompaniérola nile, alekeri meꞌale boꞌné bonila. ¿Chonigá meꞌale? Alué Kaínika meꞌálekuru ꞌwéchigo chátiri ꞌnátaga eyéname níligame. Kaíni bonílaka ꞌwe ꞌla rió nile, alekeri meꞌlíliru.\f + \fr 3:12 \ft Eꞌnesi Génesis 4:8-16 ꞌlige Hebreos 11:4. \f*
\p
\v 13 ꞌEmi Onorúgame oyérame napurigá ne, tabilé chélagá mochiwa napuꞌlige alué ralámuli tabilé oyérame Onorúgame ꞌwe gichichi ꞌemi.
\v 14 ꞌLa machirúguru ꞌma tabilé chaꞌpiruga mochírigo ramué alué Remónisite. Onorúgame júkuru ramué nuleme. ꞌWe ꞌla machiáguru ꞌwéchigo ꞌla ganíliga járilime kame ꞌla niraga uché jaré ralámuli. Suwábaga ralámuli napu ekí tabilé naꞌtemame ju uché jaré ralámuli Onorúgame oyérame alué ralámulika bijí Remónisite chaꞌpiruga mochígame kéré,
\v 15 pe napurigá bilé ralámuli meꞌagá oyame alarigá júkuru. ꞌLa machíguru ꞌemi bilé ralámuli meꞌagá oyame tabilé alawégame ko Onorúgame Alawala.
\v 16 Jena ruwimé ne churigá ka alué ralámuli napu ꞌwe ganíliga eteme ju uché jaré ralámuli: Esukristo asíriga ꞌla naꞌtemale ralámuli, ꞌlige arigá mukule ralámuli guꞌíriga. Ramuéchigoóꞌla naꞌtemátékuru uché jaré ralámuli.
\v 17 Bilé rió weꞌká eꞌkarúgame nígame ꞌlige goꞌame, ꞌlige tabilé guꞌírame nisa ralámuli tabilé nígame, alué rioka tabilé ꞌla galegá naꞌtemame nímala ralámuli. Alueka tabilé alawégame ju Onorúgame Alawala.
\v 18 ꞌEmi napurigá ne ꞌkúchila, tase pe naꞌtemame koripoa ralámuli. Napuꞌlige guꞌiria bilé ralámuli ꞌla bijchiá ꞌla naꞌtemaka guꞌíriwa ꞌlige ꞌla galegá.
\s Jena ruwimela Juani ruwíligo tabilé chijúniga  raꞌichálime ko Onorúgame ꞌyuga
\p
\v 19 ꞌLa alarigá guꞌírisiká aꞌliko ꞌla machiboa ꞌla oyérilio alué raꞌíchali Onorúgame nila.
\v 20 Ramué aꞌboi laa mochísiga: “¿Chonigá aliena tabilé ꞌla naꞌtemaka guꞌírame júché neka uché jaré ralámuli ꞌlige tabilé ꞌla galegá?” Alarigá naꞌtálika, Onorúgameka ꞌwe ꞌla machí alarigá ꞌnátaga eꞌyénachi ramué.
\v 21 ꞌEmi napu ꞌwe ꞌla galilía Onorúgamete, ramué aꞌboi tabilé eꞌkarúgame ꞌnata mochísiga ꞌliko tabilé chijúniga aminami tabilé majaga raꞌichawa Onorúgame ꞌyuga, iwérali tania.
\v 22 ꞌWe ꞌla machiaa napu ekí tábiri tánilia yati ꞌla nejimio Onorúgame, napugiti ꞌla sébali olagá ejperélirigime napu nulá Onorúgame, ꞌlige ramueka ꞌla semáriga naꞌtalia, ꞌlige ꞌla semáriga guꞌírilia ralámuli ꞌla napurigá najkí Onorúgame.
\v 23 Onorúgameka najkíguru napurigá ꞌwe ꞌla oyériwa alué Esukristo, alué Onorúgame Inolá napu jipe ꞌpa rewagachi ajtí. ꞌLige aminami najkí Onorúgame napurigá ꞌla nabí ꞌla niraga járowa uché jaré ralámuli.
\v 24 Bilé rió ꞌla sébali olame ka napurigá nulá Onorúgame, alué rioka ꞌla Onorúgame ꞌyuga ꞌnátame júkuru, ꞌlige Onorúgameka ꞌla semáriga guꞌíriguruchigó alué rió. Alarigá ꞌla machiboa Onorúgame ꞌwe ꞌla nejkura ajtigó, boꞌnéchigo alawala nejíligime.
\c 4
\s Jena ruwimela Juani ruwíligo ꞌwe ꞌla ꞌnátaga gepúlime ko  pala Onorúgame raꞌichálila ko
\p
\v 1 ꞌEmi napu ꞌwe ꞌla galilía Onorúgamete, tase pe apiépiri raꞌíchili oyériwa. ꞌLa machigá gepuwa pala ꞌla Onorúgame raꞌichálila ko. Weꞌká ralámuli Onorúgame nila rejcholi benírime korime ju, péchigo ꞌyégali benírime júkó ralámuli. Alueka tabilé Onorúgame nila raꞌíchali benírime kéré.
\v 2 Regá ju napurigá ꞌemi machimela bilé ralámuli Onorúgame Alawala alawégame ko: Bilé rió ꞌla bijchígame Esukristo napu ajtí jipe rewagachi alué ko napu jena nawale rió neraga, ꞌliko ꞌla Onorúgame Alawala alawégame nímala alué rió.
\v 3 Jaré ralámuli tabilé bijchígame Onorúgamete julárigame ko Esukristo jékana napurigá ralámuli guꞌírimala chátiri ꞌnátili bujea, alué ralámulika tabilé Onorúgame Alawala alawégame júkuru, ꞌliko alué ralámuli pe Esukristo saíla alawá alawégame júkuru. ꞌEmi machíguru raꞌíchali napu ruwime ju sebamio alué ralámuli ꞌwe chátiri ꞌnátili ꞌnátame ꞌlige seꞌwinátiri raꞌíchali benírime ralámuli, napu alawégame ju alué chátiri alawá napu eyena jena wijchimoba.
\p
\v 4 ꞌEmi napu ekí alawégame ju Onorúgame Alawala ꞌma Onorúgame ꞌkúchila ju ꞌemi. ꞌMa umérilekuru ꞌemi alué ralámuli seꞌwinátiri raꞌíchali benírime uché jaré ralámuli, Onorúgame Alawálaka ꞌwéchigo aꞌwágame kame meꞌtigá Remónisi alawala.
\v 5 Alué ralámulika napu Remónisi alawala alawégame ju, napurigá Remónisi najkí alarigá benírime ju. ꞌLige ralámuli napu ekí Remónisi gompaniérola ju ꞌwe ꞌla oyérame ju alarigá beníriga eꞌyénachi alué ralámuli.
\v 6 Ramueka Onorúgame ꞌkúchila niru, bilé rió Onorúgame Alawala alawégame ꞌwe ꞌla gepume ju napuꞌlige ramué alué Onorúgame nila raꞌíchali beníriga járilichi. Ralámuli tabilé alawégame Onorúgame Alawala tabilé gepume ju ramué napuꞌlige alué raꞌíchali beniria járilichi. Alarigá machiáa bilé ralámuli Onorúgame Alawala alawégame ko, Remónisi alawala alawégame kómá. Alarigá ꞌla machirúguru bilé rió ꞌwe ꞌla bijchiá raꞌíchali benírime ko o ꞌyégali benírime kómá.
\s Jena ruwimela Juani ruwíligo Onorúgame  ꞌwe ꞌla ganíliga eteme ko ralámuli
\p
\v 7 ꞌEmi ralámuli napu ꞌwe galilía Onorúgamete, ꞌwe ꞌla ganíliga etega járowa ꞌémi aꞌbopi, ꞌwe ꞌla niraga, napugiti ꞌémika ꞌma alawégame kame Onorúgame Alawala napugiti ꞌémika ꞌma ꞌla oyériligame Onorúgame. Suwábaga alué ralámuli napu ekí ꞌla ganíliga eteme ju uché jaré ralámuli, alueka ꞌma ꞌla alawégame ju Onorúgame Alawala, ꞌlige asíriga ꞌla machí churigá nejkúrime ko Onorúgame.
\v 8 Bilé ralámuli tabilé alarigá galeme ka uché jaré, alué ralámulika tabilé oyérame ju Onorúgame. Onorúgameka ꞌwe ganíliga eteme ju ralámuli.
\v 9 Onorúgameka júlalekuru boꞌné Inolá Esukristo jeka wijchimoba ramué naꞌtemaka napurigá biꞌwémala ramué alawala napurigá ejperéliwa ꞌla napurigá najkí alué boꞌné Onorúgame, napurigá ejperéliwa alué Esukristo aꞌwalílate.
\v 10 Ramueka tabilé oyérame nírige Onorúgame, Onorúgameka abirigáchigo ꞌla galeme nílekó ramué. ꞌWe ꞌla naꞌtemale ramué, ꞌlige júlalekuru boꞌné Inolá Esukristo napurigá gastigo narémala, alué gastigo napu ramué narépuli nílige chibi nokagá járame ka ramué. ꞌLiko alué nawálekuru gastigo naremia ramué neraga.
\p
\v 11 ꞌEmi napu ꞌwe galilía Onorúgamete, Onorúgameka asíriga galéturu,\f + \fr 4:11 \ft Eꞌnesi glosario “amor”. \f* ꞌliko ramué aꞌchigóriga galeti kárékuru uché jaré ralámuli.
\v 12 Taꞌwesi eteme ju Onorúgame, tabilé machirú chieti ko Onorúgame. ꞌLa ꞌwe ꞌla galegá járiliká uché jaré ralámuli, ꞌliko ꞌla maꞌchí néré Onorúgame ꞌla nejkura ajtigó napurigá ꞌwe ꞌla galewa uché jaré ralámuli. Alarigá ꞌla maꞌchí nélélamala ꞌla ramuechi pachágana ajtigó Onorúgame Alawala.
\v 13 ꞌLa machiáa Onorúgame ꞌkúchila nírigo napugiti ramué ꞌma alawégame nírigo Onorúgame Alawala, napugiti boꞌné Onorúgame nejíligime boꞌné Alawala.
\v 14 Napu ramué eteru ꞌla ruilía ramué uché jaré, Onorúgame júlaligo boꞌné Inolá ralámuli bujéniliga alué chátiri ꞌnátili.
\v 15 Bilé ralámuli napu ꞌla niraga ajtí Onorúgame Inolá ko alué Esukristo, alué napu nawale jena wijchimoba, ꞌliko alué rió ꞌla Onorúgame oyériga eyéname ju, ꞌla eꞌwagá, ꞌlige ꞌla Onorúgame Alawala alawégame ju.
\p
\v 16 Alarigá ꞌwe ꞌla bijchigia mochiru ꞌwe galilío ramué alué Onorúgamete. Onorúgameka ꞌwe naꞌtemame ju ramué. ꞌLige apiépiri ralámuli napu ꞌwe ganíliga eteme ju uché jaré, alué ralámulika ꞌla Onorúgame oyérame kérélamala, ꞌlige Onorúgameka ꞌla guꞌírame kérélamala alué ralámuli napurigá ꞌla galegá etémala uché jaré ralámuli.
\v 17 Napuꞌlige ꞌwe ganíliga etelia ralámuli, regá ꞌwe ꞌla machiaa ꞌwe ꞌla ganíliga nejkurio Onorúgame. ꞌWe ꞌla machiaa suwábaga ꞌla biꞌwígame alawégame nírigo, alekeri napuꞌlige raweli sébachi Onorúgame gustisia olamia ramué ralámuli tabilé majawa, ꞌwéchigo ꞌla Onorúgame ꞌyuga ꞌnátame nírigime.
\v 18 ꞌWe ꞌla ganíliga eteme níriká uché jaré ralámuli ꞌla napurigá Onorúgame najkí, ꞌliko tabilé majaga eꞌyéniwa, ꞌwe majaga eꞌyéniliká pe waꞌlú gastigo nímala, napugiti alué pe majaga ejperégameká pe bijí tabilé ꞌcho ꞌla oyérame nímime Onorúgame.
\p
\v 19 Onorúgameka bajchá ꞌwe galele ramué, ramué taꞌchó galilichi alué Onorúgame, alekeri ramué ꞌwe ꞌla niráwachigó Onorúgame.
\v 20 Bilé rió ꞌwe ꞌla nirame kórisá Onorúgame, ꞌlige ꞌwe ayome nisa Onorúgame oyérame ralámuli ꞌyuga, ꞌliko alué rió ꞌwe ꞌyégame nímala, tabilé nirame nímala Onorúgame alué rió. Bilé rió tabilé nirame nisa ralámuli rekó ꞌwe ꞌla etee, ¿ꞌlige ꞌlacha nirámalawé Onorúgame? Onorúgameka pecha maꞌchiná ajtigá.
\v 21 Jena ruimé ne churigá nuláliga Onorúgame: Ralámuli napu ekí galegá járome ju Onorúgame, aꞌchigóriga galegá etémili júkuru Onorúgame oyérame ralámuli. Regá nulale Onorúgame.
\c 5
\s Jena ruwimela Juani ruwíligo suwábaga ralámuli  napu alawégame ju Onorúgame Alawala  alueka ꞌla umubamio alué chátiri ꞌnátili umeria
\p
\v 1 Suwábaga ralámuli napu ekí ꞌla bijchigi ꞌla Onorúgamete julárigame níligo alué Esusi\f + \fr 5:1 \ft Eꞌnesi glosario “Jesús” ꞌlige “Cristo”. \f* ꞌpákana rewagáchika, napurigá buinámala ralámuli alé resítiri bowechi, alué ralámulika nímala napurigá uchéchigo siné oꞌchérigame napugiti Onorúgame ꞌma seꞌnú alawá ꞌyáligame napu ju boꞌné alawala. Suwábaga ralámuli napu ekí ꞌwe ꞌla nirame Onorúgame abiena ꞌwe ꞌla nerámalachigó alué napu ju napurigá uchéchigo siné oꞌchérigame.
\v 2 Napuꞌlige ꞌwe ꞌla niralia Onorúgame ꞌlige ꞌla sébali oliá napurigá najkí, alarigá ꞌla machiboa ꞌla galilío uché jaré ralámuli.
\v 3 ꞌWe ꞌla niráliká Onorúgame ꞌwe ꞌla eꞌwálime júkuru napu nulá Onorúgame.
\v 4 Suwábaga ralámuli napu ekí Onorúgame Alawala alawégame ju ꞌwe ꞌla umubámala alué chátiri ꞌnátili umeria. Ramuéꞌé ꞌla umubawa alué chátiri ꞌnátili umeria ꞌla lisensia ꞌyásiká napurigá nejkúrimala Onorúgame.
\v 5 ¿Chieri ꞌla umérame ju Remónisi? Pe alué ralámuliguru alué napu ꞌla bijchigi la Onorúgame Inolá ko Esusi napu jena wijchimoba nawale.
\s Jena ruwimela Juani ruwíligo  tachiri gite nawáligo Esukristo jena wijchimoba
\p
\v 6-7 Esukrístoka napuꞌlige rewarásiga chojkile rejcholi beniria ralámuli churigá ꞌla rewagachi moyéname ka ralámuli. ꞌLige ꞌma mukule bilena gulusichi napurigá mukumeli nílige. Esúsika mukule gastigo nareka, alué gastigo napu ramué narépuli nílige.
\v 8 Onorúgame Alawala ꞌwe ꞌla ꞌnátale suwábaga ꞌla bijchiá ꞌla alarigá ikíligo.
\v 9 Napuꞌlige bilé ralámuli ruwichi alarigá ko bilé tábiri, ꞌwe ꞌla bijchígime niru. Napuꞌlige Onorúgame rusá tachiri gite nawáligo Esukristo jena wijchimoba abéchigo bijchígitékuru alueka ꞌla bijchiá kame. Onorúgameka ꞌma ruwílekuru, ꞌlige ꞌla maꞌchígime ruwílekuruchigó alarigá ko boꞌné Inolá.
\v 10 Bilé ralámuli ꞌwe ꞌla oyérame Onorúgame Inolá, alueka ꞌma alawégame nímala Onorúgame Alawala. Alué Onorúgame Alawálaka ꞌwe ꞌla guꞌírimala napurigá alué rió ꞌla machigá asimémpá jena wijchimoba nawáligo Esukristo. Bilé ralámuli anime tabilé Onorúgame Inolá ko Esukristo alué rioka ꞌwe ꞌyégame korí Onorúgame olagá, tabilé bijchíginilimpá ꞌla bijchiá nawáligo Esukristo jena wijchimoba alué Onorúgame Inolá.
\v 11 Regá ju napu ꞌsile Onorúgame napurigá ꞌla machiboa ye ꞌla bijchiá ko: Onorúgame boꞌné alawala nejíturu napurigá ejperéliwa jena wijchimoba napurigá najkí Onorúgame.
\v 12 Ralámuli napu ekí ꞌla oyérame ju Onorúgame Inolá, alueka ꞌla alawégame júkuru Onorúgame Alawala napurigá ejperélamala napurigá najkí Onorúgame. Ralámuli tabilé oyérameka Onorúgame Inolá, alueka tabilé alawégame ju Onorúgame Alawala.
\s Jena ruwimela Juani ruwíligo apiépiri chátiri ꞌnátili  tabilé ꞌla ko Onorúgame níriga
\p
\v 13 Ye osilí oséguru ne ꞌemi napu ekí Onorúgame Inolá oyérame ju napurigá ꞌla machimela ꞌemi aꞌboi ꞌla Onorúgame ꞌyuga ejperélimio ꞌemi senibí.
\p
\v 14 Napuꞌlige Onorúgame ꞌyuga raꞌichalia apiépiri tábiri tánaga tabilé majaga tánilime ju ꞌwe ꞌla machiame Onorúgame ꞌla akeo.
\v 15 ꞌWe ꞌla machiáká ꞌla akeo napu tánilia ramué aꞌlígeko ꞌla machigá mochiru ꞌla nejimio napu boꞌné ꞌwe ꞌla nerá.
\p
\v 16 Onorúgame tánilime júkuru napurigá bujémala alué resítiri ꞌnátili napuꞌlige bilé ralámuli Onorúgame oyérame taꞌmé chárigá seꞌwiná ꞌsika eyénachi, ꞌlige Onorúgameka ꞌla yati bujémala alué ꞌnátili ꞌla taꞌmé ená ꞌsika einásaká alué ralámuli. Nerú bilé ꞌnátili abé resítiri napu tabilé tánilime ju Onorúgame napurigá bujémala. Napuꞌlige bilé ralámuli nóchachi alué ꞌwe resítiri nóchali, Onorúgameka ꞌma abisibi tabilé guꞌírame ju.
\v 17 Apiépiri chátiri ꞌnátili tabilé ꞌla ju Onorúgame níriga.
\p
\v 18 ꞌWe ꞌla machiaa suwábaga napu ekí Onorúgame Alawala alawégame ju tabilé siné esítiri nóchali nóchaga eꞌyénimio. Esukristo ꞌwe ꞌla repú alué ralámuli, ꞌlige tabilé gainámala Remónisi alué ralámuli umeria.
\p
\v 19 ꞌWe ꞌla machiaa Onorúgame ꞌkúchila nírigo ramué, ꞌlige Remónisika chaꞌpigá ajtigó suwábaga ralámuli jena wijchimoba ejperégame napu tabilé oyérame ju Onorúgame. Alué Remónisi ꞌsime ju nulá napurigá alué ralámuli resí nokagá eꞌyénamala.
\p
\v 20 Abiena ꞌwe ꞌla machiaa nawáligo alué Esukristo Onorúgame Inolá ramué guꞌírimia, ꞌlige nejíligo semátiri ꞌnátili napurigá ꞌla námapua churigá ko Onorúgame ꞌlige ꞌla oyérame nírigo Onorúgame Inolá. Alué Esukristo ju Onorúgame ꞌlige alué ju nejime boꞌné Alawala napurigá ꞌla alué ꞌyuga ejperéliwa senibí.
\v 21 ꞌEmi napu ne ꞌwe najkí, ꞌwe ꞌla ꞌnátiga mochiwa. Tabilé naꞌtawa uché bilé ꞌnátili nerugo abé semátiri meꞌtagá Onorúgame naꞌtálila.\f + \fr 5:21 \ft Yolí raꞌíchagaká aní “Hijitos, cuídense de los dioses falsos.” \f*
\p Pe ekí júpá ye raꞌíchali. Waꞌlú cheliérabá.