\id 3JN Baja Tarahumara
\h 3 JUAN
\toc1 3 JUAN
\mt Ye Ju Alué Apeli Nujubá Osirúgime Napu Osale Juani
\c 1
\p Kuira mué Gayo.
\p
\v 1 Ne Juani, napu repume ju Onorúgame oyérame ralámuli, osé ne mué Gayo, mué napu ꞌwe galilía Onorúgamete, napu ne ꞌwe galegá etéchigó.
\s Jena ruwimela Juani ruwíligo ꞌwe raꞌsáláo napugiti alué Gayo ꞌwe ꞌla oyérame níligo Onorúgame
\p
\v 2 Mué rió Gayo, Onorúgame ꞌwe ꞌla guꞌiri mué ꞌla biꞌlepi ꞌnátili ꞌnata pe ꞌla Onorúgamecho oyérilime, aꞌchigóriga ꞌla képáchigó napurigá ꞌwe ꞌla semáriga guꞌírisiga mué Onorúgamete napurigá ꞌwe aꞌlá maꞌchínamala mué nochálila, ꞌlige aminami tabilé nayuka ilírosa ꞌla képá mué.
\v 3 ꞌWe raꞌsálá ne napuꞌlige machisá ꞌwe ꞌla oyériga eyenio mué Onorúgame nila raꞌíchali tabilé ꞌyégali, jaré jena ejperégame ralámuli Onorúgame oyérame napu eꞌyénale alé napu mué ajtí ruwíturu ꞌla oyériga eyenio mué alué raꞌíchali tabilé ꞌyégali ruwime.
\v 4 Neka ꞌwe raꞌsálagá ajtí machiame ne ꞌwe ꞌla oyériga eꞌyenio mué Onorúgame nila raꞌíchali, ꞌemi napu ne beniri Onorúgame nila raꞌíchali napuꞌlige pe kulí benichi ꞌemi.
\p
\v 5 Mué napu ꞌwe galilía Onorúgamete, mueka ꞌla lisensia ꞌyame ju napurigá cheꞌlebámala mué bejtélachi suwábaga napu Onorúgame nila raꞌíchali benírisia jsime ju alemi, alué pe kulí siné jsime alemi Onorúgame nila raꞌíchali benírimia rekó tabilé siné eteme ke mué ꞌyabesi,
\v 6 suwábaga alué ralámuli ꞌwe ꞌla ruyele ralámuli Onorúgame oyérame jena ejperégame ꞌwe ꞌla lisensia ꞌyame ko mué napurigá cheꞌlebámala alé alemi eꞌyénachi, ꞌlige ꞌwe ꞌla ꞌyame kará mué goꞌame napurigá nutugega simámala bilénami simiba Onorúgame nila raꞌíchali benírimia.
\v 7 Asíriga ꞌla júkuru alarigá guꞌírichi mué alué ralámuli napugiti alué ralámulika eꞌyéname alemi ꞌwe ꞌla oyériga Onorúgame tabilé nareka eꞌkarúgame tábiri iꞌlía, nibilé goꞌámetiri iꞌlía alué ralámulite napu tabilé oyérame ju Onorúgame.
\v 8 Alekeri ramué ꞌwe ꞌla guꞌíritékuru alué ralámuli napu Onorúgame nila raꞌíchali beníriga eꞌyena alé ꞌmi napurigá gompaniérola niwa.
\s Jena ruwimela Juani ruwíligo ꞌwe nejkumeme níligo alué rió Riótrepe anilime
\p
\v 9 Neka osé bilé raꞌíchali alué ralámuli Onorúgame oyérame napu ejperé alé napu mué ajtí ruigá alemi eꞌyénigo jaré alué Onorúgame nila raꞌíchali benírame ralámuli napurigá guꞌírimala ꞌemi pe iligá ꞌwe nejkumeme alué rió Riótrepe rewégame, ꞌwe waꞌlula neraga chujkírime ju pe nejkumega, taꞌmé ganíliga ajtí napurigá ꞌemi nuleme nímala ne.
\v 10 Alekeri napuꞌlige alemi simisá neꞌochámala ne alué rió ꞌlige ꞌwe ꞌla maꞌchígime ruyémala ne napurigá tabilé ꞌyégiga einámala chátiri raꞌíchali beníriga eꞌyenio ramué peka ꞌla bijchiá kachi, ꞌlige pe alieti ꞌnátaga tabilé lisensia ꞌyame ju napurigá cheꞌlebámala alé, alemi jsime ralámuli Onorúgame nila raꞌíchali benírimia ralámuli, ꞌlige jaré ꞌla lisensia ꞌyánilisa napurigá cheꞌlebámala aꞌboi ejperélachi, yati sulime ju ꞌlige ꞌma tabilé elime ju napurigá simela alé ꞌmi Onorúgame nila raꞌíchali gepumia napu napuíme ju suwábaga ꞌemi Onorúgame oyérame.
\v 11 Mué rió Gayo ꞌwe galilime Onorúgamete tase oyériga ilíriwa alué chátiri rejcholi, iligá aꞌlá rejcholi oyériwa ꞌnalina. Alué ꞌwe aꞌlala rejcholi oyérame ka, alueka ꞌla Onorúgame ꞌkúchila nímala, alué pe tabilé aꞌlá rejcholi oyérame ka pe tabilé Onorúgame oyérame kérélamala.
\s Jena ruwimela Juani ruwíligo Remetrio ꞌwe ꞌla oyérame níligo Onorúgame
\p
\v 12 Suwábaga ralámuli ruwí ꞌwe aꞌlá oyérame ko alué Remetrio aꞌlala rejcholi, ramuéchigó ruwiyá ꞌwe ꞌla oyerio Remetrio alué aꞌlala rejcholi, ꞌlige ꞌemi ꞌwe ꞌla machí ꞌla bijchiá ko napu ruyá ramué ꞌwe ꞌla oyerio alué Remetrio alué aꞌlala rejcholi.
\p
\v 13 Neka weꞌká raꞌíchali raꞌichánili mué ꞌyuga, nobi tabiléchigo aminabi osimélagó ne.
\v 14 Pe ꞌwemi simea ne alemi napu mué ajtí mué ꞌyuga raꞌichamia.
\b
\p
\v 15 ꞌWe ꞌla biꞌlepi ꞌnátili ꞌnátaga asisá ꞌla képá mué. ꞌWe nábole reporali suwábaga napu mué machime ju napu jena mochí. Muéchigó ꞌwe repóriwaká suwábaga machirume.
\p Pe ekí képá ye raꞌíchali. Waꞌlú cheliérabá.