\id JUD Baja Tarahumara
\h JUDAS
\toc1 JUDAS
\mt Ye Ju Alué Apeli Napu Osale Jura
\c 1
\s Kuira suwábaga ꞌemi ralámuli.
\p
\v 1 Ne Jura anilime rió osá ye raꞌíchali rejcholi. Alué Esukristo reꞌpá ajtígame, aluete ꞌyárukuru ne bilé nóchali. Neka uꞌtala bonirúgame niraga ju Santiago ꞌyuga. ꞌÉmika Onorúgamete bayérigame nílekuru napurigá ꞌemi Onorúgame oyérame nímala, alekeri neka ꞌemi oséguru. Oꞌnó Onorúgameka asíriga ꞌla galegá etélekuru ꞌemi. ꞌLige Esukristo ꞌwe nejkura napurigá tabilé che ikimela ꞌemi ralámuli.
\v 2 ꞌWe ꞌla kékuru Onorúgame naꞌtemasa ꞌemi, aminami waꞌlú nejisa aꞌwalí napurigá ta weꞌká ꞌnata mochímala ꞌemi. ꞌLige Onorúgame ꞌwe ꞌla ganíliga etesa, ꞌla júkuru ꞌemi.
\s Jena ruwimela Jura ruwíligo jaré rió sébiligo alé ꞌyégali benírame
\p
\v 3 ꞌEmi ne amígola, neka asíriga ruinálituru jena osagá boꞌné Onorúgame ꞌláchigo nejkúrilikó ꞌemi ꞌlige néchigó, ꞌlige taꞌchó osiachi, uchéchigo bilé ꞌnátili maꞌchínaturu. Jípeko nawésali náomili júkuru ne napurigá ꞌla nemímala ꞌemi seꞌwiná nokachi uché jaré ralámuli, alué ralámuli napu sairúgame ju alué raꞌíchali napu Onorúgame benírale bajchá rawé mochígame ralámuli napu Onorúgame oyérame nile. Alué raꞌíchali ꞌya nerúgame ꞌla sébali nílikuru, tabilé tase rokáré.
\v 4 Jaré rió ꞌma alemi mochí napu ꞌemi mochí. Alué ralámulika Onorúgame oyérame koríguru aꞌboika, tabiléchigo Onorúgame oyérame ke anígó, pe laní ꞌyégiga. Alué ralámuli asíriga aꞌwágame gastigo narémili júkuru Onorúgame nila. Alarigá anile Onorúgame raꞌichálila ꞌwe ꞌya, ꞌma asíriga weꞌká bamí ju. Alué ralámulika tabilé Onorúgame ꞌyuga ꞌnátame ju. Aꞌboika aní ꞌwe ꞌla narénili alué Onorúgame nejílala nawésali, tabiléchigo ꞌla ꞌnátame kéréko aꞌboika, pe weꞌká umugí ꞌyuga okónilime ke aní. Alué ralámuli tabilé bijchigi Esukristo ko biꞌlepi waꞌlula nulame jena wijchimoba ramué ꞌyuga.
\p
\v 5 Neka uché naꞌtárime oláekeꞌé ꞌemi napurigá ꞌemi machimela alakimeo alué cha nokame ralámuli. ꞌÉmika ꞌma machílké alieti ruimeo ne, abirigá uchéchigo siné ruimé ne alué chukimeli ko alué cha nokame ralámuli, pe aꞌchigóriga nímala napurigá ikílige ꞌya mochígame ralámuli. Onorúgame suwábaga ralámuli napu ekí nílige israelita ꞌma buyánale alé Ejipto mochígichi. Alué ralámuli israelita pe napurigá ralirúgame nile alé Ejipto. Alekeri Onorúgame ꞌma buyánale alé Ejipto. Onorúgameka gawí nuebo ꞌyámoríle, nobi tabilé eꞌwele ko Onorúgame ꞌla ruwichi. ꞌLiko Onorúgameka ꞌma suwábale suwábaga alué ralámuli napu ekí tabilé oyérale Onorúgame raꞌichálila, tasiné sébale alé gawí nuébochi.
\v 6 Abiénachigó aꞌchigóriga ikimeli ju alué ralámuli cha nokame napu ejperé napu ꞌemi mochí, napurigá ikile jaré santo ánjeli. Alueka tabilé ejtebile alé napu Onorúgame ꞌyálige napurigá mochímala, alueka pe seꞌwí simíbale. ꞌLiko Onorúgame ꞌma gastigárile alué santo ánjeli, wamí chonárale mochile karénate bulugá. Tabilé siné buyásamala alé karénate buluruga mochiga. Onorúgameka alé mochiámala bulugá napusí boꞌné nawámala alué santo ánjeli gastigárimia.
\v 7 Alué ralámuli abichigó alarigá narémala alué gastigo.
\p Abiénachigó gastigárimala alué ralámuli napurigá alué ralámuli alé waꞌlú weꞌká riógichi Soroma anilichi ejperégame ꞌlige Gomora\f + \fr 1:7 \ft Alé Soroma ꞌlige Gomora rewégichi ꞌwe cha nokame ralámuli ejperégame nile ꞌya napuꞌlige bejtégichi Abraámi. Onorúgame ꞌma eꞌkósale suwábaga ralámuli ꞌma galítiri ꞌyúriga. Eꞌnesi Génesis kapítulo 18 ꞌlige 19. \f* anilichi ejperégametiri ꞌlige aminami uchéchigo jarénami weꞌká riógichi ejperégame alé aꞌbemi. Ralámuli alué napu ekí rió nílige asíriga weꞌká umugí ꞌyuga okole, ꞌlige aminami riocho ka okole. ꞌLiko Onorúgame ꞌma gajúnale suwábaga galí alué weꞌkaná weꞌká riógichi jágame ꞌlige aminami ralámulitiri ꞌma suwábaga suwábale napu ekí ejperégame nílige alé weꞌkaná weꞌká riógichi, ꞌma eꞌkósale naꞌite. Yeka ruwime ju Onorúgame naꞌite suwábimio ralámuli cha nokame, ꞌlige tajsiné choꞌimela alué naꞌí.
\p
\v 8 ꞌLige abiena alué ralámuli napu chátiri eteme ju remuka, alué ralámuli anime júturu: “ꞌWe ꞌla oyérawa alué remugí.” Alué ralámulika ꞌma najsabú suwábaga aꞌlala raꞌíchali napu nerú jena wijchimoba, ꞌma boꞌné saꞌpálatiri. Tabilé najkí alué aꞌboi ralámuli napurigá Onorúgame nulámala. Pe gawéliga eteme ju Onorúgame ꞌlige santo ánjeli ꞌlige Remónisitiri.\f + \fr 1:8 \ft Alué Remónisi ꞌyako ꞌwe aꞌlá santo ánjeli nílige, iligá chaꞌsile ꞌliko Onorúgameka ꞌpa rewagáchikana pale. Eꞌnesi glosario “Satanás”. \f*
\v 9 Alué waꞌlula santo ánjeli Migeli rewégame, aka alué Migeli peka che anéligeꞌé Remónisi, ꞌlige alué ralámulika tabilé ikiárékuru napurigá gawélimala alué Remónisi. Alué Migeli Remónisi si raꞌicha ilile napuꞌlige mukule alué Moisesi. Alué Remónisika alué Moisesi saꞌpala oꞌtonálile, ꞌlige alué Migélika pe tabilé che anele, pe ꞌla niraga etele alué Remónisi. Pe iligá regá anele: “Boꞌné Onorúgame machílké mué Moisesi saꞌpala oꞌtosáká.”
\v 10 Asíriga chátiri raꞌíchali raꞌíchame ju napuyépiri raꞌíchali napu ekí tabilé námame ju aꞌbopi. Pe napurigá eꞌyéname ju ajágame pe alarigá eꞌyéniniliga aní alué ralámuli, pe goꞌámecho ꞌlige okókime ꞌnátame ju alué ralámuli, ꞌlige pe umugí ꞌyuga okókime. Pe aliéricho ꞌnátaga eꞌyéname kame napurigá jami oyame ajágame. Pecha siné ꞌnátame júkó alueka Onorúgame ꞌyuga. Napuꞌlige bilé rió alieti ꞌnata, ꞌliko alué rioka pe boꞌnepi cha ikimela.
\p
\v 11 Asíriga resíriká nímala alué ralámuli níriga. Alué ralámulika napurigá Kaíni alarigá ꞌnátame ju napuꞌlige ayole bonila ꞌyuga. ꞌLige aminami pe ꞌnátame ju alué ralámuli napurigá alué Balaámi pe enomí méniliga. Benírale ꞌwe ꞌla ko Onorúgame saega mochíriga. ꞌLige alué ralámulika abiena napurigá Koré\f + \fr 1:11 \ft Alué Koreka sairúgame nile Onorúgame ꞌlige Moisesi, ꞌliko Onorúgameka gasínale alué gawí ꞌlige alégana rusule alué Koré ꞌma gompaniérola si, ꞌlige kúchigo naꞌoga ilíbale gawí. Eꞌnesi Números 16:1-35. \f* anilime rió alarigá ꞌnátame ju, alueka pecha oyéralega Onorúgame nila rejcholi ꞌlige sairúgame neraga gayénale alué eꞌwélala ꞌyuga. Alué ralámuli napu ekí sairúgame neraga mochí, suwimela napurigá meꞌlíliru alué Koré anilime.\f + \fr 1:11 \ft Kaínika nile bajchá ochérigame Arani inolá. Eꞌnesi Génesis 4:3-9. Alué Balaámika sujkurúgame nile. ꞌYégime nile ralámuli napuꞌlige Moisesi nulechi alué ralámuli israelita. Eꞌnesi Números 22–24. \f*
\v 12 Ye weꞌká rió cha nokáme ka ꞌemi si napuíka goꞌyame júkuru alué goꞌame newárigime napu ꞌemi goꞌyame ju alé napuísa Onorúgame raꞌichálila benimea, tabiléchigo Onorúgame oyérame kéréko alué ralámuli. Pe asíriga jobátigame ju napurigá rejté reꞌlé baꞌichí mochígame rejpúrame kárigó reꞌkésiga pecha maꞌchígime ka reꞌlé baꞌichika. Alué ralámulika tabilé chijúname ju. Pe iligá aꞌbopi niraga ꞌnátame ju. Alueka pecha guꞌírame júkó uché jaré ralámuli. Alueka pe napurigá bilé nolí wakígame ekáralimi júmame, pe alarigá júkuru. Alué ralámuli ꞌwe bajchá uchútame, tabiléchigo sébali olame júkó ꞌlige. ꞌLige abiena napurigá bilé masana tabilé rakeme, alarigá ju alué ralámuli, ꞌlige pe ꞌma boꞌniboli ju alué masana.
\v 13 ꞌLige aminami alué ralámuli napurigá baꞌwí gomichi ename alarigá ju. Alué baꞌwí asíriga weꞌká repuga aꞌreme ju gomichi suwékimi. Alarigá júkuru alué cha nokame ralámuli. Asíriga weꞌká eꞌkarúgame cha nokogá eꞌyéname ju, tabilé niraga aꞌbopi. Tabilé chijúname ju. ꞌLige aminami alué ralámuli pe napurigá alué soꞌpilí wajségame,\f + \fr 1:13 \ft Ralámulika aní: “Napuꞌlige paka ilisá soꞌpilí wajségame, bilé tábiri ruwime kará. Tabilé ꞌla bamíbali ruwime kará.” \f* alarigá ju, pe eꞌyéname ju. Napuꞌlige suwisá, nabí chónagachi mochímala, tasiné buyásiga. ꞌLige alué ralámuli tajsiné buyásiga mochímala alé chonárale.
\p
\v 14 Enoko rewégame nile bilé rió ꞌwe ꞌya ajtígame. Aránika Enoko biꞌchela\f + \fr 1:14 \ft Alué Enoko oꞌnola, Jareri anilime nile. Enoko ochila ka, Majalaleli anilime nile. Enoko umúlila ka, Kainani anilime nile. Enoko ególila ka, Enosi anilime nile. Enoko geyóchila ka, Seti anilime nile. Enoko biꞌchela ka, Arani anilime nile. Alué Arani anilime rió nile ꞌya bajchá ajtígame taꞌwesi ꞌcho rió iꞌtégichi. \f* nile. Alué Enoko ruwile alarigá ikimeo alué cha nokame ralámuli aꞌkinana rawé. Regá anile alué rió: “ꞌWe ꞌla buigá mochiwa, ꞌma sebámili júkuru alué Waꞌlula Onorúgame weꞌká mili santo ánjeli ꞌyuga,
\v 15 ꞌlige gustisia olámala suwábaga ralámuli, ꞌlige aminami alué gastigo ꞌyámala alué napu ekí tabilé ꞌnátame ju Onorúgame naꞌtálila. Alué ralámulika asíriga weꞌká eꞌkarú nokogá eꞌyéname júkuru tabilé Onorúgame nulalila ꞌnátaga. ꞌLige aminami asíriga tabilé ꞌla raꞌíchali raꞌíchame júkuru Onorúgame olagá.”
\v 16 Alué ralámulika ꞌwe cha anigá nokame ju sairúgame neraga raꞌíchame ju Onorúgame olagá. Pe alué chátiri ꞌnátalicho ꞌnátaga eꞌyéname ju pe aꞌbopi ꞌnátaga. ꞌLige asíriga najtékame korigá eꞌyéname ju aꞌbopi. ꞌLige aminami asíriga ꞌla semáriga raꞌíchame ju uché jaré ralámuli olagá napuꞌlige guꞌírilime najkigá.
\s Jena ruwimela Jura ruwíligo uché peꞌkabi rejcholi
\p
\v 17 ꞌEmi Onorúgame oyérame napu ne ꞌwe galegá eté, naꞌtáwaguru alué raꞌíchali napu raꞌíchilige alué makué oká rió napu Waꞌlula Esukristo ꞌyuga eꞌyénilige.
\v 18 Regá anime: “Aꞌlige rawé napuꞌlige ꞌma amulí suwíbachi gawí, asíriga weꞌká ralámuli mochímala Onorúgame gawélime, asíriga chátiri raꞌíchali raꞌichámala Onorúgame olagá. Alué ralámulika pe napu nóchame ju aꞌboi, pe aluecho oyéramala. Alué ralámulika tabilé naꞌtámala Onorúgame ꞌyuga.”
\v 19 Alué raꞌíchali napu ruwílige alué ralámuli, jipe ꞌma ꞌla bijchiá maꞌchínaguru. Ye cha nokame rioka weꞌká eꞌkarúgame ꞌnátame ju napurigá ꞌemi tabilé biꞌlepi ꞌnátili ꞌnátaga mochímala. Alué rioka pecha Onorúgame Alawala alawégame júkó, alueka ju pe napurigá bilé ajágame, tabilé ꞌnátame Onorúgame ꞌyuga.
\p
\v 20 ꞌEmi ne amígola, ꞌla nakúrilime júkuru aꞌbopi níriga napurigá ꞌemi ꞌwe ꞌla eꞌwémala alué Onorúgame nila raꞌíchali. Tániwa Onorúgame napurigá boꞌné alawala guꞌírimala ramué Onorúgame ꞌyuga raꞌichálichi.
\v 21 ꞌLa ꞌwe ꞌla niraga járiwa ꞌla guꞌíriga uché jaré ralámuli, ꞌla ganíliga eꞌyéniwa uché jaré ꞌyuga aꞌchigóriga napurigá galeme ju Onorúgame ramué. Uché siné sebámala alué Waꞌlula Esukristo ramué naꞌtemaka. Asíriga ꞌla buigá mochiwa aꞌlige rawé. Alué ꞌsímili júkuru ramué aꞌwalí ꞌya napurigá ramué alué aꞌwalite ꞌla nabí ejperélawa rewagachi.
\p
\v 22 Jaré ralámuli aꞌnagú ꞌnátame ju, bilena tabilé ꞌla niraga, bilena ꞌwe ꞌla niraga, pecha machime ka ye Onorúgame raꞌichálila. Siné rawé naꞌtámaréko abe. ꞌWe ꞌla naꞌtemápua alué ralámuli.
\v 23 Jaré mochí asíriga cha nokame ralámuli. ꞌLiko bilé rejcholi ꞌyásiga ꞌla júleké alué cha nokame ralámuli napurigá ku ꞌla oꞌwé naꞌtámala. Jípesíko ꞌla ꞌnátaga nokísiwagó napurigá tabilé resí ikimela ꞌemi. Alué ralámulika ꞌwe cha nokame ju. Tabilé galétékuru napurigá nokame ju alué ralámuli, alueka pe sairúgame neraga kame Onorúgame ꞌyuga.
\s Jena ruwimela Jura ruwíligo ꞌwe ꞌla raꞌsálagá járilime ko nabí
\p
\v 24 Pe Onorúgamecho ju napurigá ꞌemi repúmala napurigá tabilé seꞌnú bowé chaꞌpimela ꞌemi. Pe aluecho ju napurigá nejkúrimala napurigá ꞌla aꞌbé oꞌwemi neraga jawa napu ajtí Onorúgame. Ramueka ꞌwe cha nokogá eꞌyéname nírikuru kákobá, Onorúgameka abirigáchigo ꞌla eꞌkale ko. ꞌWe ꞌla raꞌsálagá jáwaguru oꞌwemi napu Onorúgame ajtí, Onorúgameka ꞌla semáriga kame.
\v 25 Biꞌlepi Onorúgame ju. Napuꞌlige Onorúgame sébale jena wijchimoba bilé rió neraga Esukristo rewega, alué ꞌsílekuru ramué buyana alé resítirichi. Alueka waꞌlú aꞌwalí nígame kame napurigá aminabi nokísiwa tabilé guwana rusuka. Alué Onorúgame Alawala gite aꞌlá sébali oꞌtoboa ramué napu ajtí Onorúgame reꞌpá rewagachi. Suwábaga ralámuli ꞌwe ꞌla niraga etewa Onorúgame. Asíriga aꞌwágame ju. Alué júkuru biꞌneli neyúriga Waꞌlula. Alarigá nile ꞌya napu taꞌchó iꞌtégichi ye gawí. Abalarigá júkuru jipe, alarigá nímili júkuru nabí.
\p Pe ekí képá ye raꞌíchali. Waꞌlú cheliérabá.