\id 2co
\h 2 Corintios
\mt2 Osá Osirúami
\mt2 mapurigá San Pablo oseli echo'ná
\mt KORÍNTOCHI PIRÉAMI 
\c 1
\s Echi Pablo auchecho siné osé echi jaré napawika bichíiyami ritémtami
\p
\v 1 Nijé, Pablo, 'yemi mi osé. Echi Walubela Jesucristo tamí júuli nawisánala mapurigá Riosi Binói nakili. Echi rijimala Timoteo mapu tamí yuwa atí, ayénachó 'yemi mi ripóraga náwala. A'lí nijeni 'yemi mi osé, ne si'néami 'yemi napawika bichíiyami máputamo Riosi níwala ju, echo'ná Koríntochi anilíwachi walúlachi piréami. Ayénachóni 'yemi mi osé ne si'néami 'yemi napawika bichíiyami echo'ná ne suníami noligá piréami, echo'ná Akáyachi anilíwachi kawírali.
\v 2 Nijeni ne wabé nakí mapu Riosi, tamujé Onolá, ayénachó echi Walubela Jesucristo, 'yemi mi ku'wírama, ayénachó mapu 'yemi mi 'yama mapurigátamo sinibí we galá kilí ologá pirélabo.
\s Echi Pablo ne wabé risúu olárami níili
\p
\v 3 Galá níima mapu tamujeta waminabi walubélaga anesa Riosi, echi mapu tamujé Walubélawala Jesucristo Onolá ju, mapujiti echi Walubela Riosi Onorúami ju mapu tamujé tamí ne wabé natimá, ayénachó Binói sinibí tamujé tamí ku kanílata mapalita o'mona.
\v 4 Mapujiti Riosi sinibí tamujé tamí wabé galá ku kanílata mapalita wabé risúu olárami ju, mapurigá tamujeta ayénachó galá omérabo ku kanílatiya echi auché jaré, si'néami mapu ikí risúu olárami ju. A'lí tamujeta echirigá ku kanílatabo aboni, achigórigá mapurigá Riosi ma tamujé tamí ku kanílatali.
\v 5 Mapujiti tamujé máputa julárami níili nawisánala Jesucristo Ra'íchala ne bichíwali wabé risúu olárami ju mapujítita bichíi Jesucristo niráa, chopi echi Walubela Jesucristo Binói ne wabé simírami risúu olárami níili. Echijiti tamujeta ayénachó ne wabé simírami ku kanílatami juta mapujiti Jesucristo Binói tamujé tamí ne wabé ku kanílata.
\v 6 Echijiti mapalí tamujé nawésami arigá ne wabé risúu olárami juta, Riosi chopi ariwé mapurigata echirigá risúu olárami níibo, mapurigá tamujé echijiti binebo churigata omérabo 'yemi mi ku kanílatiya pe waminana, mapalí siné káachi, 'yémitamo ayénachó risúu olárami níibo, ayénachó mapurigata omérabo 'yemi mi ku'wíriya mapurigátamo ne galá machiboa Riosi. Mapujiti mapalí Riosi tamujé tamí ku kanílata, Binói echirigá olá mapurigata omérabo 'yemi mi ku kanílatiya pe waminana. Echalí 'yémitamo galá omérabo kilí ologá anacha, mapalítamo risúu ologá a'najátarami níibo, achigórigá mapurigá tamujeta risúu olárami ju jipi rawé.
\v 7 Tamujeta mayé mapu 'yémitamo sinibí waminabi galá bichíisabo Jesucristo niráa. Echijítita ayénachó mayé mapu achigórigá mapurigá 'yémitamo ayénachó risúu olárami ju, mapurigá tamujeta risúu olárami níili, echirigá ayénachó Riosi 'yemi mi ku kanílata, achigórigá mapurigá Binói tamujé tamí ku kanílatali.
\p
\v 8 Keni ritémawa nijeni nakí mapu 'yémitamo galá machiboa mapu churigá nijeni ne wabé risúu olárami níili mapalini echo'ná Ásiachi anilíwachi kawírali iyénali, mapujiti echalini ne wabé simírami risúu olárami níili. Echalini ne noguí ma ketasi omérali anacha mapalini echirigá risúu olárami níili, ayénachóni mayeli mapurigá nijeni ma ketasi waminabi bitélama jena'í wichimóbachi.
\v 9 Echalini mayeli mapurigani we yáati mi'lirúami níima, chopi ne suwaba je'ná jerigá ikili mapurigá nijeni ma ketasi waminabi mayema mápuni galá omero ku'wíriya nijé binói niráa. Chópini mayema mapu Riosi tamí ku'wiro, Echi mapu galá ku o'winta echi jaré suwíami.
\v 10 Ne bichíwali Riosi tamí ku'wírali mapurigani ketasi echirigá mi'lirúami níima, mapujiti echi auché jaré ne wabé tamí mi'lináali. A'lí Riosi abijí jipi rawé tamí ku'wira, ayénachóni bichíi mapu Riosi waminabi tamí echirigá ku'wírama
\v 11 a 'yémitamo Riosi yuwa tániga ra'ichásagá tamí jiti, ayénachó a wikabé auché jaré ritémtami echirigá Riosi yuwa tániga ra'ichásagá tamí jiti, a'lí waminana rawé ne wabé wikabé ritémtami ayénachó walú natétara 'yama Riosi, ma riwisáa mapurigá Binói ne bichíwali tamí ku'wiro.
\s Echi Pablo ruyé echo'ná Koríntochi piréami mapu piri jiti binói ke cho nawali echo'ná abónichi
\p
\v 12 A'lí nijeni sinibí ne wabé kanila mapujítini, binói niráa ne galá machí mapu nijeni sinibí galabé ologá iyénali jena'í wichimóbachi, ayénachó mapurigani tarapé 'yékami níili. Chopi ne bachá niráa nijeni ne wabé kanila mapujítini echirigá galabé ologá iyénali echo'ná 'yémichi. A'lí Riosi Binói níili mapu tamí wabé galigá ku'wírali mapurigani omérama echirigá galabé ologá bitéliya, chopi ketasi níili echi wabé machiwáwami mapu nijeni wabé machili, mapu tamí echirigá galabé ologá bitératali.
\v 13 A'lí sinibí mapalini 'yemi mi osé, echalí chópini osé echi jaré namuti mapu 'yémitamo galá omérabo machiyá mapu churigá aniwáami ju, mapalítamo 'neni echi oselí. A'lí nijeni we nakí mapurigátamo ne sébali galá machiboa ne suwaba
\v 14 mapu ikítamo chopi péebi niráa machí jipi rawé, mapurigá echalí rawé mapalí echi Walubela Jesucristo ku nolínama, 'yémitamo wabé kanílabo tamí jiti mapujítini 'yemi mi nawésali Riosi Ra'íchala. Echalí nijeni echirigá achigórigá kanílama 'yemi jiti mapujítitamo galá bichíili nijé nawésawala.
\p
\v 15 A'lí echirigá mayega, nijeni 'nátali mapurigani bachá niráa echo'ná simea, 'yemi mi 'némiya, mapurigá 'yémitamo echirigá osá chokéami kanílabo mapujiti nijeni 'yemi mi 'nema osá chokéami.
\v 16 Echirigá nijeni 'nátali mapurigani echo'ná simírasama, 'yemi mi 'nésiya, mapalini simea echo'ná Maseróniachi anilíwachi kawírali. Ayénachóni mayeli mapu pe waminánala mapalini wakiná ku simea echo'ná Maseróniachi jonsa, echalini auchecho siné 'yemi mi 'nésama. Echirigá 'yémitamo galá omérabo tamí ku'wíriya mapalí nijeni waminabi simea echo'ná Juréachi anilíwachi kawírali.
\v 17 Chopi nijeni ketasi cho omérali echirigá olayá. Echijiti, ¿áchatamo mayé mapu nijeni arigá ketasi simináali echo'ná 'yemi mi 'nésiya, mapalini arigá anili mápuni echo'ná simea? Nijeni ketasi olá mapurigá auché jaré pagótami jena'í wichimóbachi piréami olá, mapalí aboni wepi aní mapu churigá aboni olama, chopi aboni arigá we yáati 'nata mapu ketasi ne bichíwali echirigá olama.
\v 18 A'lí Riosi Binói galá machí mapu nijeni ketasi wepi 'yemi mi ané, jeanigá: Ayena, mapalini arigá nakí jeanénala: Ketasi.
\v 19 Mapujiti tamujeta 'yemi mi nawésali Jesucristo jiti rugá, echi Walubela Riosi Ranala. Nijé, Pablo, echirigá 'yemi mi nawésali, echi Silbano ayénachó, echi Timoteo. A'lí echi Walubela Jesucristo sinibí ne bichíwaga ra'íchali. Binói ke siné 'yékaka ra'íchali, ketasi mapurigá echi jaré 'yékami pagótami ra'icha mapu wepi jeaní: Ayena ne bichíwali ju, chopi aboni we yáati 'nata mapu ketasi bichíwali ju.
\v 20 Mapujiti ne suwaba mapu ikí Riosi bachá niráa ne bichíwaga anili, ma ne suwaba sébali echirigá ikili, mapujiti echi Walubela Jesucristo ma julárami níili jena'í wichimóbachi, a'lí Binói sébali olali mapurigá Riosi bachá niráa bichíwaga anili mapu olárami níima. Echijiti mapalita Riosi yuwa ra'íchaga, waminabi walubélaga ané Binói Riosi, echalita ma sunisa jeaní: Echirigá nílaka, echi Walubela Jesucristo jiti.
\v 21 A'lí Riosi Binói ju mapu sinibí tamujé tamí waminabi bichíirata Jesucristo niráa, achigórigá mapurigá Binói ayénachó 'yemi mi bichíirata. Ayénachó Riosi ju mapu tamujé tamí chapili mapurigata nochabo Binói nóchala olayá.
\v 22 A'lí Riosi ma tamujé tamí bawirali, pachana tamujé sulálachi niráa, mapurigata Binói níwala níibo. Ayénachó Riosi tamujé tamí 'yali echi Wabé Galabé Riosi Iwigala mapurigá bitélama pachana tamujé sulálachi, mapurigata echijiti galá machiboa máputa ne bichíwali sinibí niráa pirélabo Riosi yuwa waminánomí.
\p
\v 23 Echi Walubela Riosi galá machí mapu nijeni ke cho nawali echo'ná Koríntochi 'yemi mi 'némiya, mapujiti nijeni ketasi chopi nakili mapurigá nijeni 'yemi mi yónama mapalini echirigá 'yemi mi yuwa nawá. A'lí je'ná jerigá mapurigá nijeni aní, ne bichíwali ju. Echijiti galá níima Riosi Binói tamí wi'nijisa, a ketasi echirigá bichíwali níisagá.
\v 24 Ketasi bichíwali ju mapu nijeni sinibí nakí 'yemi mi nulénala mapu churigátamo olabo, mapurigá Jesucristo jiti bichíiyami niráa. Nijeni chopi nakí máputamo waminabi kanílabo, mapujítini galá machí máputamo ma galá bichíi Jesucristo niráa.
\c 2
\p
\v 1 A'lí echirigá 'nátaga, nijeni ketasi nakili auché siminala 'yemi mi 'nésiya, mapujiti nijeni ketasi nakí mapu nijeni 'yemi mi o'monáratama, chopi ani echo'ná 'yemi yuwa nawásagá, abijí 'wérali níimi mápuni 'yemi mi oyérama mapujítitamo ketasi cho galá nijéwaga olali mapurigá nijeni 'yemi mi osogá nuleli.
\v 2 A'lí a nijeni 'yemi mi oyérasagá, echalí nijeni ne bichíwali 'yemi mi o'monáratiyami níimi. A'lí 'yemi aboni arigá jútamo mapu tamí galá ganílata, chopi a nijeni 'yemi mi oyérasagá, nijeni 'yemi mi o'monáratiyami níimi.
\v 3 Echijiti nijeni 'yemi mi pe oyéraga oseli, mapujiti nijeni ketasi siminali echo'ná 'yemi mi 'némiya, chopi mapurigá 'yémitamo tamí waminabi o'monáratama, mapujiti chopi galá níima 'yemi tamí kanílatasa. A'lí nijeni ne bichíwali mayeli mapu a nijeni kaníliami níisagá, echalí ne si'néami 'yemi ayénachó galá kaníliami níibitamo.
\v 4 Chabénala mapalí nijeni 'yemi mi echirigá oseli, echalí arigá 'wérali níili mápuni echirigá 'yemi mi oyéraga osema; chopi nijeni echijiti arigá ne wabé o'monáratami níili sulachí niráa, ayénachó nijeni we nalali. A'lí echalí nijeni ketasi chopi echirigá oseli mapurigani 'yemi mi o'monáratama, mapujiti nijeni chopi nakili máputamo galá machiboa mapurigá nijeni 'yemi mi ne wabé galé.
\s Pablo nulá mapu aboni ku wikawama echi rijói mapu chabénala wabé chati olali
\p
\v 5 Echo'ná 'yémichi atí bilé rijói mapu chabénala wabé chati sitíi olali. A'lí échiko echijiti ne wabé simírami o'monáratali ne si'néami tamujé, mapujiti nijeni wabé o'monáratami níili, achigórigá mapurigá 'yémitamo ayénachó o'monáratami níili. Chopi echi rijói ma wikáwali tali, echijiti nijeni ketasi nakí máputamo waminabi kastigo 'yabo echi rijói.
\v 6 Mapujiti chabénala mapalí si'néami 'yémitamo napawili, echalítamo ma galá sébali kastigo 'yali echi rijói.
\v 7 Echijiti jipi galá níima máputamo ku wikawabo echi rijói, ayénachó máputamo auchecho ku kanílatabo, mapurigá échiko ketasi ne wabé simírami o'monama.
\v 8 Echijiti 'yemi nimí ané máputamo auchecho ne wabé galebo echi rijói, mapurigá binói galá machimea mapu chu yena 'yémitamo galéami jú.
\v 9 Chabénala nijeni 'yemi mi oseli suwaba je'ná jiti, mapurigani galá machimea áchatamo ne bichíwali nakí olánala mapurigá nijeni 'yemi mi nuleli.
\v 10 Jipi galá machisí mapu a 'yémitamo ku wikawásagá jaré, echalí nijeni ayénachó ku wikawama. Mapujiti a nijeni ku wikawásagá auché jaré, echalí nijeni ku wikawa aboni, mapurigá 'yémitamo waminabi binératami níibo echirigá ku wikáwiya auché jaré, mapujiti nijeni julárami níili echi Walubela Jesucristo jiti.
\v 11 A'lí tamujeta ketasi nakí mapu echi riablo, Satanasi riwéami, tamujé tamí 'yékama, mapujítita galá machí mapurigá wabé 'yékaka olá echi riablo.
\s Pablo ketasi kanila asali echo'ná Tróachi
\p
\v 12 A'lí mapalí nijeni nawali echo'ná Tróachi anilíwachi mapurigani echo'ná nawisama echi Wabé Galabé Jesucristo Ra'íchala, echalí nijeni risensia 'yárami níili mapurigani galá nochama, echi Walubela Jesucristo nóchala olayá.
\v 13 Chopi nijeni arigá ketasi kaníili sulachí niráa, mapujítini ketasi riwali echi tamujé rijimala Tito riwéami echo'ná Tróachi. Echijiti ma ripórasa echo'ná piréami, nijeni waminabi simili echo'ná Maseróniachi anilíwachi kawírali simiyá.
\p
\v 14 Chopi nijeni sinibí walú natétara 'ya echi Walubela Riosi mapujiti Binói nijali mapurigá echi Walubela Jesucristo niyúrama, echi chati sitíi oluwáwami sayéraga. Ayénachó Riosi 'yá mapu tamujé bichíiyami echirigá nayúrabo mapujítita najata echi Walubela Jesucristo yuwa, ayénachó Riosi tamujé tamí 'yá mapurigata galá machíami niráa nawésabo si'néami pagótami echi Galabé Riosi Ra'íchala. A'lí echirigá ologá tamujeta ayénachó ju mapurigá bilé wabé su'weti júkami moluwá niráa, mapu wikanáami mikabé galá jubá.
\v 15 Echi Walubela Jesucristo mapurigá echi wabé su'weti júkami moluwá niráa ju Riosi yuwa, mapujiti Riosi ne wabé kanila Jesucristo jiti. Ayénachó tamujé Jesucristo jiti bichíiyami mapurigá echi wabé su'weti júkami moluwá niráa juta, Riosi yuwa, mapujiti Jesucristo tamujé tamí yuwa atí. Echijiti echi auché jaré mapu ikí ayénachó galá bichíiyami ju, aboni galá machimea mapu Jesucristo tamujé tamí yuwa atikó. Ayénachó echi auché jaré mapu ikí waminá 'wigáami níima, abóniko ayénachó galá machimea mapu Jesucristo tamujé tamí yuwa atikó.
\v 16 Echijiti Riosi ayénachó kanila tamujé bichíiyami jiti, mapalita we nawesa Jesucristo jiti rugá. A'lí mapalí echi auché jaré mapu ikí waminá 'wigáami níimako echirigá namsa tamujé nawésawala, echalí aboni galá 'natáma mapurigá aboni chopi waminá 'wigáami níima sinibí niráa. Chopi mapalí echi auché jaré galá bichíiyami echirigá namsa tamujé nawésawala, echalí aboni kaníliga 'natáma mapurigá aboni sinibí piréami níima Riosi yuwa. Echijiti ne wabé 'wérali ju mapu tamujeta waminabi nawisabo Riosi Ra'íchala, chopi ke wesi galá omero echirigá nawésiya, a Riosi Binói ketasi omératasagá.
\v 17 A'lí tamujeta ketasi 'yékaka niráa nawesa Riosi Ra'íchala, ketasi mapurigá auché jaré mapu we nakulíwaga, wabé 'yékaka niráa nawesa. Si'winárigá tamujeta ne galá bichíwali niráa nawesa echi Galabé Riosi Ra'íchala, mapurigá Riosi tamujé tamí júuli nawisánala. Echijiti tamujeta bacháami Riosi yuwa ne galabé niráa nawesa mapurigá Jesucristo níwala pagótami niráa.
\c 3
\s Riosi bukulíwami a'láraga nuleli echi pagótami
\p
\v 1 A'lí mapalí nijeni je'ná jerigá ra'icha, nijeni ketasi nakí mapu 'yémitamo chopi mayebo mapu nijeni ne wabé simírami galabé nawésami ju, chopi arigá ketasi 'wérali ju mapu auché jaré 'yemi mi osogá ruyema mapu nijeni ayena ne wabé galabé nawésami ju. Nibilé cho 'wérali níima mapu 'yémitamo osogá ruyebo auché jaréana piréami mapu nijeni echirigá galabé nawésami ju, chopi echi auché jaré mapu 'yékaka nawésako, arigá sinibí echirigá olá.
\v 2 Ketasi 'wérali ju echirigá osesa echi auché jaréana piréami mapujiti 'yemi aboni mapurigá nijé oselíwala niráa jútamo, mapujiti 'yémitamo ma bukulíwami galabé niráa nakulíwarami jútamo, mapujítitamo ma galá bichíili nijé nawésawala. A'lí 'yémitamo echirigá osirúami niráa níili echi auché jaré pagótami alíwami, mapurigá aboni galá omérama machigá 'néniya mapurigá nijeni nawesa, mapalí aboni galá riwimea mapurigá 'yemi bichíyami ma bukulíwami niráa galabé ologá piré. A'lí 'yémitamo echirigá osirúami niráa jú pachana 'yemi sulálachi niráa.
\v 3 Echirigá 'yémitamo ibili niráa mapurigá bilé oselí osirúami niráa ju, echi mapu echi Walubela Jesucristo Binói osali, echi mapu nijeni 'ya echi auché jaré pagótami. Chópitamo ketasi ju mapurigá bilé oselí, echi tinta jiti osirúami, mapujítitamo osirúami niráa níili echi Wabé Galabé Sinibí Bitéami Riosi Iwigala jiti. Nibilé chótamo echo'ná biléana chipérami ritérali niráa osirúami jútamo, chópitamo osirúami niráa níili pachana echi jaré pagótami sulálachi niráa.
\p
\v 4 A'lí bicheni galá bichíi mapu je'ná jerigá ne bichíwali ju, mapujítini ne galá bichíi Riosi, echi Walubela Jesucristo jiti.
\v 5 A'lí nijé, binói chopi niráa, ketasi wabé omériami ju Riosi nóchala olayá. Si'winárigá nijeni chopi omero Riosi nóchala olayá mapujiti Riosi Binói tamí galá omérata.
\v 6 Mapujiti Riosi Binói tamí galá omératali Binói nóchala olayá, achigórigá mapurigá Binói bukulíwami niráa bichíwaga anili. Mapujiti Riosi nulalila mapurigá echi walula Moisesi osali, chopi tamujé tamí binérali máputa arigá waminá suwiboa mapujítita ketasi omérali sébali galabé nijéwaga olayá mapurigata echirigá nulérami níili; chopi jipi tamujeta galá omero olayá mapurigá Riosi tamujé tamí nulé mapujiti Riosi ma tamujé tamí 'yali Binói Wabé Galabé Iwigala mapurigata echijiti sinibí niráa pirélabo.
\p
\v 7 Chabé ki'yá echi walula Moisesi 'yárami níili Riosi nulalila, echo'ná okuá rité chibéramichi osirúami. A'lí Riosi ne wabé simírami ratábami níili mapalí echirigá 'yali, echijiti echi Moisesi cho'olá ayénachó ne wabé ratábali mapalí Riosi yuwa asali. A'lí pe kinánala echi auché jaré Isaeli anilíwami pagótami ketasi omérali ne wachínaga 'néniya echi Moisesi cho'olá, mapujiti echirigá ne wabé ratábali, pe téeli niráa. A'lí jena'í wichimóbachi piréami pagótami chopi suwí mapujiti aboni ketasi galá nijéwaga olá mapurigá aboni echirigá nulérami níili. Chopi a echiyena ratábasagá mapalí echi nulalíwami 'yárami níili,
\v 8 waminabi ne wabé simírami galabé ju jipi rawé mapalí echi Wabé Galabé Riosi Iwigala echo'ná pachana echi jaré bichíyami sulálachi bité.
\v 9 A'lí jena'í wichimóbachi piréami pagótami chopi wi'nijírami ju echi nulalíwami jiti. Chopi a ne walubela níisagá echi nulalíwami, a'lí ne wabé simírami walubela niráa ju echi Wabé Galabé Riosi Ra'íchala nawisálawami jeanigá mapu Riosi tamujé tamí wé galá naré mapalita galá bichíi Jesucristo niráa.
\v 10 Mapujiti echi nulalíwami mapu chabénala ne walubela niráa níili, ma ketasi 'me walubela niráa ju, mapujiti echi Wabé Galabé Jesucristo Ra'íchala nawisálawami ne wabé simírami walubela niráa ju.
\v 11 A'lí a ne walubela niráa níisagá echi nulalíwami mapu ketasi sinibí niráa nirúami níili, a'lí ne wabé simírami walubela niráa ju echi Wabé Galabé Jesucristo Ra'íchala nawisálawami, mapujiti Jesucristo Ra'íchala ke siné suwibama.
\p
\v 12 A'lí mapujiti tamujeta echirigá ne galá bichíi, echijiti tamujeta sinibí tarapé majaga we nawesábo echi Galabé Jesucristo Ra'íchala.
\v 13 Chopi tamujeta ketasi olá mapurigá echi Moisesi olali, mapujiti échiko waminá na'ómali binói cho'olá, bilé wisibula jiti, mapurigá echi auché jaré Isaeli anilíwami pagótami ketasi riwimea echi ratábawala waminá cho'wíami, mapujiti binói cho'olá ketasi sinibí niráa echirigá ratábami níima riwéali. Si'winárigá tamujeta ne galá machíami niráa nawesa Jesucristo Ra'íchala.
\v 14 Echalí ki'yánala echi jaré Isaeli pagótami ketasi galá machili mapu churigá aniwáami ju Riosi Ra'íchala. A'lí jipi yénasí echi jaré jipi piréami Isaeli pagótami ketasi cho galá machí mapu churigá aniwáami ju, mapalí aboni kipugú 'nékowachi Riosi nulalila oselíwala, mapu chabé ki'yá osirúami níili. Jipi rawé yénasí aboni 'nátawala abijí mapurigá na'omárami niráa ju, mapurigá echi Moisesi cho'olá na'omárami níili. Echijiti aboni ketasi cho omero galá machiyá mapu churigá aniwáami ju Riosi Ra'íchala. A'lí aboni chopi galá machimea mapalí aboni ma ne galá bichíi Jesucristo niráa.
\v 15 Mapujiti jipi rawé yénasí mapalí echi jaré Isaeli pagótami galá kipugú Riosi Ra'íchala oselíwala 'nékowachi, mapurigá osali echi Moisesi, echalí aboni arigá ketasi galá bichíi, mapujiti aboni 'nátawala abijí mapurigá na'omárami niráa ju. Echijiti aboni ketasi cho omero machiyá mapu chu aniwáami ju Riosi Ra'íchala.
\v 16 Chopi a bilé aboni arigá ne galá bichíisagá echi Walubela Jesucristo niráa, echalí binói 'nátawala ma ketasi waminabi echirigá na'omárami niráa níima, chopi échiko ma galá omérama machiyá mapu churigá aniwáami ju Riosi Ra'íchala.
\v 17 Mapujiti echi Walubela Jesucristo mapurigá echi Galabé Riosi Iwigála niráa ju. A'lí mapalí echi Walubela Jesucristo Iwigala pachana jaré pagótami sulálachi atí, echalí aboni ma ketasi waminabi nulérami ju echi nulalíwami jiti.
\v 18 Echijiti si'néami tamujé bichíyami galá machiná niráa 'yena. Ma ketasi waminabi na'omárami niráa ju tamujé cho'olachi, ketasi mapurigá echi Moisesi cho'olá niráa. Chópita ne galá 'nérabo echi auché jaré pagótami mapu Jesucristo ne wabé Walubela ju, achigórigá mapurigá bilé sipéjo wabé galá rataba echi rayénali jiti. A'lí echi Walubela Riosi Iwigala echirigá sinibí tamujé tamí waminabi nakuliwa mapurigá echi Walubela Jesucristo niráa. A'lí bicheta echirigá sinibí waminabi o'wéalatami níibo mapurigá Binói ne Walubela ju. A'lí echi Walubela Jesucristo Binói mapu je'ná jerigá olá, arigá mapurigá echi Wabé Galabé Riosi Iwigala niráa ju.
\c 4
\p
\v 1 Echijiti tamujé nawésami ke siné ariwebo Riosi nóchala olayá, mapujiti Riosi Binói ne wabé natimaga tamujé tamí júuli nawisánala Binói Ra'íchala.
\v 2 Chopi tamujeta ke siné chiná niráa 'yena. A'lí bicheta ma ariweli suwaba riwélaga oluwáwami, ayénachóta ketasi 'yékaka olá, nibileta nawesa jeanigá mapu Riosi Ra'íchala si'winárigá ju. Chopi tamujeta sinibí nawesa echi ne Bichíwali Riosi Ra'íchala. A'lí bicheta echirigá olá mapurigá si'néami 'yemi galá omérabo machiyá, bacháami Riosi yuwa, mapu tamujeta ne bichíwali olá Riosi nóchala.
\v 3 Chopi a tamujé nawésawala, mapurigata sinibí nawesa Riosi Ra'íchala, abijí ketasi cho machirúami níisagá, ne galá machíami niráa, echalí echi jaré pagótami mapu waminá 'wigáami níima, abóniko chopi ju mapu echirigá ke machíami niráa mayé tamujé nawésawala.
\v 4 Chopi mapujiti aboni ketasi bichíyami ju Riosi, echijiti aboni ma ke 'nátami niráa niwálati echi riablo jiti, mapujiti echi riablo walula nuláami ju si'néami echi jaré ke bichíyami pagótami jena'í wichimóbachi piréami yuwa. Echijiti echi jaré pagótami mapu ikí ke bichíinali ma niwálati mapurigá busugachi niráa, mapurigá aboni ketasi machimea mapu Jesucristo ne Wabé Walubela ju. Echijiti aboni ketasi bichíi echi Walubela Jesucristo jiti nawésawala. A'lí echi Walubela Jesucristo chopi ayiri ju Riosi Onorúami yuwa.
\v 5 A'lí mapalí tamujeta nawesa echi pagótami, tamujeta ketasi siné nawesa jeanigá mapu tamujé aboni ne wabé o'wéala ju, chópita sinibí aní mapu echi Walubela Jesucristo ne Wabé Walubela ju, ayénachóta aní mapu tamujé chopi mapurigá 'yemi piónawala niráa ju, mapujítita ne wabé galé echi Walubela Jesucristo.
\v 6 Ki'yá chokichí mapalí wabé rokowárali níili, echalí echi Walubela Riosi arigá nulali mapu galá rayenama jena'í wichimóbachi, ayénachó echi Bilepi Walubela Riosi níili mapu ma ne galá rayéntali pachana tamujé sulálachi niráa, si'néami mapu ikí galá bichíyami juko, mapurigata galá machiboa mapu Riosi ne wabé Walubela ju, mapujítita ma ne galá bichíi Jesucristo mapurigá riwala niráa.
\s Echi jaré Riosi níwala pagótami galá bichíiga piré
\p
\v 7 A'lí tamujé máputa julárami ju nawisánala je'ná ne Wabé Galabé Riosi Ra'íchala, ketasi 'me jiwérami niráa ju, mapujiti tamujé chopi wi'yé jiti niwárami niráa ju, mapurigá echi jaré sikolí niráa. Echirigá tamujeta ne galá machila echi auché jaré jena'í wichimóbachi piréami pagótami mapu echi Walubela Riosi chopi ju mapu tamujé tamí omérata auché isena galabé niráa nakulíwitiya echi jaré pagótami mapu ikí galá bichíi tamujé nawésawala, mapujiti tamujé aboni chopi niráa ketásirapé omériami ju echirigá nakulíwiya.
\v 8 Tamujé nawésami sinibí ne wabé sayératami ju, chopi Riosi sinibí tamujé tamí ku'wira. Wisabé ne wabé nílaka 'nata mapujítita wabé kumérami ju, chopi Riosi ke siné tamujé tamí ariwé.
\v 9 Echi auché jaré ke bichíyami pagótami arigá tamujé tamí risúu ologá a'najata, chopi Riosi sinibí tamujé tamí yuwa atí. A'lí echi jaré tamujé sayela wisabé tamujé tamí omero, chópita ketasi waminá suwábarami ju.
\v 10 Kanápuromí mapo'nata simiba, Riosi Ra'íchala nawésiya, ne sinibí rawé tamujé ne noguí ko'wirúami niráa ju, mapurigá Jesucristo mi'lirúami níili, mapurigá ayénachó galá machirúami níima mapu echi Sinibí Bitéami Walubela Jesucristo pachana tamujé tamí yuwa bité.
\v 11 Echirigá sinibí rawé mapu tamujé nawésami abijí piré jena'í wichimóbachi, echi jaré tamujé sayela wabé tamujé tamí ko'winali, mapujítita bichíyami ju Jesucristo niráa. A'lí echirigá chopi ikí mapurigá galá machirúami níima mapu echi Walubela Jesucristo sinibí bité pachana tamujé tamí yuwa, máputa arigá waminá suwísimi.
\v 12 Echirigá ju mapu tamujé nawésami sinibí ne noguí suwí, mapurigá 'yémitamo arigá sinibí niráa pirélabo.
\p
\v 13 Echo'ná Riosi Ra'íchala oselíwalachi je'ná jerigá osirúami ju: Nijeni galá bichíili, echijítini nawésali. Echirigá achigórigá tamujeta ayénachó galá bichíili Jesucristo niráa. Echijítita we nawesa Binói Ra'íchala.
\v 14 Mapujiti tamujeta galá machí mapu echi Walubela Riosi Onorúami mapu ma ku owíntali echi Walubela Jesucristo, ayénachó tamujé tamí ku owíntama echi Walubela Jesucristo yuwa. A'lí Binói tamujé tamí ku tomea, echi auché jaré 'yemi napawika bichíyami ritémtami yuwa, echo'ná ripá riwigachi mapo'ná Binói sinibí atí.
\v 15 A'lí nijeni je'ná jerigá wabé risúu olárami níili, chopi mapurigá 'yémitamo waminabi ku'wíratami níibo, mapurigá a wikabé echirigá ku'wíratami níisagá Riosi jiti, echalí wikabé ayénachó walú natétara 'yami Riosi, mapurigá Binói echirigá waminabi walubélaga anérami níima.
\p
\v 16 Echijiti nijeni sinibí waminabi galá bichíisimí Riosi, mapujiti jipi nijé sapala arigá waminá suwibásimí, chopi nijé aliwala arigá bukulíwami niráa niwárami nílasimí sinibí rawé.
\v 17 Mapujiti tamujé bichíyami arigá galá omero anacha mapurigata risúu olárami ju jena'í wichimóbachi, mapujítita ketasi wi'libé niráa echirigá risúu olárami níibo. A'lí ayénata galá anachásagá mapalita risúu olárami ju jena'í wichimóbachi, a'lí waminánomí tamujeta sinibí niráa ne wabé simírami o'wéalatami níibo Riosi yuwa echo'ná ripá riwigachi.
\v 18 A'lí tamujé bichíyami ketasi 'me nirási echi jaré namuti mapu galá machiná ritiwíwami ju jena'í wichimóbachi. Chopi ne wabé galá nirási echi jaré Riosi níwala namuti mapu ke siné ritiwíwami ju jena'í wichimóbachi; mapujiti echi jaré namuti mapu galá machiná ritiwíwami juko ketasi wi'libé nirúlama, chopi echi jaré Riosi níwala namuti mapu ke siné ritiwíwami juko, échiko ne sinibí niráa nirúlama.
\c 5
\p
\v 1 Jipi rawé tamujé sapala chopi mapurigá jaré kalí niráa ju mapo'ná tamujé aliwala piré jena'í wichimóbachi, mapu ketasi sinibí niráa nirúlama. Chopi si'néami mapu ikita galá bichíi Jesucristo niráa galata machí mapalí tamujé sapala waminá suwibásagá, echalí tamujé ibili niráa nakulíwarami níibo, mapurigá bukulíwami galabéala niráa sapélabo echo'ná ripá riwigachi. Echalí ayénachó tamujé sapala bukulíwami mapurigá jaré bukulíwami kalí niráa níima mapo'ná tamujé aliwala sinibí niráa pirélama echo'ná ripá riwigachi, mapu ne sinibí niráa nirúlama. A'lí Riosi Binói chopi ju mapu tamujé tamí echirigá bukulíwami niráa nakulíwama, mapujiti ke wesi pagótami omero tamujé tamí echirigá ku nakulíwitiya.
\v 2 A'lí ne bichíwali ju mapuyena tamujé aliwala abijí piré jena'í tamujé sapálachi, mapurigá pachá jaréana kalírali niráa jena'í wichimóbachi nirúami, jípita ne wabé risúu aní, mapujítita chopi nakí mapu tamujé aliwala ku simama echo'ná ripá riwigachi, mapurigá echo'ná ripá riwigachi tamujé aliwala auchecho ku pirélama echo'ná tamujé sapala bukulíwamichi, mapu echo'ná ripá riwigachi nirúlama.
\v 3 Echalí tamujé aliwala auchecho bukulíwami galabéala niráa sapélama echo'ná ripá riwigachi, mapurigá tamujé aliwala ketasi chopi mapurigá aliwá niráa tibima.
\v 4 A'lí jipi mapuyena tamujé aliwala abijí piré jena'í wichimóbachi, tamujé sapálachi niráa, mapurigá pachá jaréana kalírali niráa, jípita abijí wabé risúu aní, ayénachóta risúu olárami ju. A'lí biché ketasi bichíwali ju mapu tamujeta we nakí suwinala, mapurigá tamujé aliwala ma ketasi waminabi pirélama jena'í tamujé sapálachi niráa. Si'winárigá tamujeta chopi nakí mapu tamujé aliwala echirigá bukulíwami galabéala niráa sapélama, mapurigata ma ketasi auchecho siné suwiboa, chopi máputa bukulíwami niráa ku pirélabo ne sinibí niráa.
\v 5 A'lí echi Walubela Riosi chopi ju mapu tamujé tamí a'lárali mapurigá tamujé aliwala echirigá bukulíwami sapélaga pirélama ne sinibí niráa. Ayénachó Riosi Binói tamujé tamí 'yali echi Wabé Galabé Riosi Iwigala, mapurigata echijiti galá machiboa máputa ne bichíwali sinibí niráa pirélabo Riosi yuwa waminánomí.
\p
\v 6 A'lí tamujeta sinibí echirigá galá bichíiga piré, mapujiti tamujeta galá machí mapuyena tamujé aliwala abijí piré jena'í wichimóbachi, tamujé sapálachi niráa, echalí tamujeta ke cho bukulíwami galabéala sapé. A'lí tamujé aliwala ketasi cho piré echo'ná tamujé bukulíwami sapálachi niráa, mapurigá pachá jaré kalírali niráa, mapujiti tamujeta ke cho muchuwi echi Walubela Jesucristo yuwa, echo'ná ripá riwigachi.
\v 7 Echijiti tamujeta ayénachó sinibí galá bichíiga piré, mapujítita galá bichíi Jesucristo niráa. Ketásita achigórigá bichíi mapurigá echi auché jaré pagótami mapu chopi ritiwá echi jaré namuti jena'í wichimóbachi nirúami.
\v 8 A'lí tamujé bichíyami tarapé majawá, chópita waminabi wabé nakí mapu tamujé aliwala ku simama echo'ná ripá riwigachi, mapo'ná echi Walubela Jesucristo atí, ketasi mapu tamujé aliwala waminabi pirélama jena'í wichimóbachi tamujé sapálachi niráa.
\v 9 Echijiti tamujé nawésami sinibí ne wabé nakí máputa ne wabé galabé ologá kanílatabota echi Walubela Jesucristo echalí ne jubá rawé mapalí Binói ku nolínama, abijita pirélasagá, ma suwíami níisagá keremá.
\v 10 Mapujiti arigá 'wérali ju mapu waminánomí ne si'néami tamujé bichíyami, ibili niráa, bacháami jábabo echi Walubela Jesucristo yuwa, mapurigá Binói tamujé tamí justicia olíima. Echalí ibílipi niráa 'yárami níibo achigórigá mapurigata olali jena'í wichimóbachi, mapalí tamujé aliwala abijí piréali jena'í tamujé sapálachi niráa. Echalí rawé echi jaré mapu galabé olali, arigá 'yárami níima echi wabé galabéala; chopi echi auché jaré mapu ketasi 'me galabé oláliko, ketasi 'yárami níima echi galabéala.
\s Jesucristo tamujé tamí 'ya máputa kilí ologá pirélabo
\p
\v 11 Echijiti nijeni machí mapu galá ju máputa ne galá bichíiga majabo echi Walubela Jesucristo, mapurigá chopi galá nijéwaga olabo mapurigá Binói nakí.
\v 12 Jipi nijeni ketasi nakí auchecho siné 'yemi mi anénala mapu nijé binói ne wabé galabé ju. Chopi nijeni arigá nakí ne wabé galabé olánala, mapurigá 'yémitamo omérabo galabé niráa ra'icha, tamí jiti rugá. Echirigá 'yémitamo omérabo ku kuwana ra'íchiya echi auché jaré pagótami mapu wabé nóchaga 'nátami ju, aboni chopi niráa, mapalí auché jaré mayé mapu aboni galabé oláami ju, chopi pachana aboni sulálachi niráa, arigá ketasi galabé ju.
\v 13 Mapujiti a nijeni ke newalite níisagá, chópini echirigá ju mapurigá Riosi waminabi walubélaga anérami níima. A'lí a nijeni galá 'nátami níisagá, chópini echirigá ju mapurigá 'yémitamo waminabi ku'wíratami níibo.
\v 14 Arigá 'wérali ju mapu nijeni galá bitélaga olá achigórigá mapurigani sinibí olá, mapujiti echi Walubela Jesucristo tamujé tamí ne wabé galé. A'lí bicheni ma ne bichíwali mayé mapu echi Bilepi Walubela Jesucristo mukuli ne si'néami tamujé tamí jiti. Echijiti ne si'néami tamujé mapu ikita galá bichíiko ma mapurigá suwíami niráa juta bacháami Riosi yuwa.
\v 15 Ne bichíwali ju mapu echi Walubela Jesucristo mukuli ne si'néami echi jaré pagótami jiti, mapurigá echi jaré mapu ikí galá bichíiga pireko, ma ketasi olama mapurigá aboni chopi nakí mapujiti echi Walubela Jesucristo mukuli aboni jiti, ayénachó ku owínali, mapurigá aboni sinibí olama mapurigá Binói chopi nakí.
\v 16 Echijiti jipi jonsa nijeni ma ketasi 'natama jena'í wichimóbachi piréami pagótami jiti, mapu chu yena o'wéala ju aboni. Chabénala nijeni ayena achigórigá 'nátali echi Walubela Jesucristo jiti mapurigá echi auché jaré ke bichíyami pagótami 'nata Binói jiti, chopi jipi nijeni ma galá bichíi Jesucristo niráa, echijítini ma ketasi 'nata Binói jiti mapurigá echi auché jaré 'nata Binói jiti.
\v 17 Ayénachó echirigá ju mapu ibílipi mapu ikí napawíkami niráa juko Jesucristo yuwa, mapujiti aboni galá bichíi Binói niráa, aboni ma ketasi waminabi olá mapurigá chabénala olali, chopi jipi aboni suwaba ma ku si'nú, bukulíwami niráa, ne wabé galabé olá.
\p
\v 18 A'lí Riosi suwaba je'ná jerigá olá, ayénachó Riosi ju mapu tamujé tamí ku niwáli mapurigá Binói amígowala niráa, mapujiti echi Walubela Jesucristo mukuli tamujé tamí jiti. A'lí Riosi ayénachó tamujé tamí nawesánala júuli mapurigá echi auché jaré pagótami galá bichíima, mapurigá aboni ayénachó echijiti ku niwárami níima Riosi amígowala niráa.
\v 19 Echirigá ne bichíwali ju mapu Riosi wabé nakili mapu echi jaré pagótami jena'í wichimóbachi piréami ku niwárami níimi Binói amígowala niráa. Echijiti Riosi júuli echi Walubela Jesucristo mapurigá Binói mukumea si'néami aboni chati sitíi olalila jiti. A'lí Riosi tamujé tamí nawesánala júuli, mapurigá jena'í wichimóbachi piréami galá bichíiga, auchecho ku niwárami níima Riosi amígowala niráa.
\v 20 Echirigá ne bichíwali ju mapu echi Walubela Jesucristo Binói tamujé tamí júuli mapurigata nawésabo jena'í wichimóbachi piréami pagótami. Echijiti mapalí tamujeta 'yemi mi nawesa, tamujeta 'yemi mi ruyé achigórigá mapurigá Riosi Binói nakí 'yemi mi ruyénala. Echijiti jipi tamujeta wabé nílaka 'yemi mi jeané: Galá bichíisi Jesucristo niráa, mapurigátamo ku niwárami níibo Riosi amígowala niráa, achigórigá mapurigá echi Walubela Jesucristo nakí.
\v 21 A'lí echi Walubela Jesucristo ke siné chati sitíi olali, chopi Riosi arigá walú kastigo 'yali echi Walubela Jesucristo, tamujé chati sitíi olalila jiti, mapurigá Binói chati sitíi oláami niráa. A'lí Riosi echirigá olali mapurigá a tamujé galá bichíiga, napawíkami níisagá echi Walubela Jesucristo yuwa, echalí Riosi tamujé tamí niráma ne galabé wachínaga oláami niráa, achigórigá mapurigá Jesucristo galabé wachínaga oláami ju.
\c 6
\p
\v 1 Echirigá biché mapurigá keni apanérawa niráa, máputa napawika nocha Riosi nóchala olayá, nijeni 'yemi mi ruyé máputamo sinibí waminabi galabé bichíisabo Jesucristo niráa, mapujiti echi Walubela Riosi wabé galabé ologá, ma 'yemi mi wisabé niráa ku'wírali.
\v 2 Mapujiti Riosi Ra'íchala oselíwalachi je'ná jerigá osirúami ju mapurigá Riosi Binói jeaní:
\q Mapalí nijeni nakili, Nijeni 'yemi mi galá kipuli.
\q Echalí mapalí 'yémitamo wikáwali tali, echalí Nijeni ne bichíwali 'yemi mi ku wikáwali.
\m Jipi rawé Riosi wabé nakí kipúnala echi jaré pagótami wikáwali táami. Jipi rawé Riosi wabé nakí mapu ku wikáwama echi jaré pagótami.
\p
\v 3 A'lí tamujeta ke wesi kumé, mapurigá ke wesi sayéraga ra'icháma tamujé nóchala jiti.
\v 4 Si'winárigá tamujé nawésami chopi nakí máputa suwaba galabé olabo, mapurigá si'néami pagótami galá machimea mapu tamujé, Riosi piónawala niráa jú. Echijiti tamujeta sinibí kilí niráa anacha mapalí tamujeta risúu olárami ju, ayénachó mapalita we newalé ko'wáami, ayénachó mapalita ketasi omero Riosi nóchala olayá mapujiti auché jaré pagótami tamujé tamí wabé kumé.
\v 5 Mapujiti echi auché jaré wisabé tamí wipisoli, ayénachó aboni wisabé tamí pachá bachali. Ayénachóni wisabé wabé risúu olárami níili mapalí wikabé pagótami sinepi niráa ne wabé buchuwí anigá na'áwali tamí sayéraga. Ayénachóni wisabé wabé iwéami nóchali. Ayénachóni wisabé tarapé kochili rokogó. Ayénachóni wisabé ne wabé 'locheli.
\v 6 'Yémitamo galá machí mapu nijeni ne bichíwali Riosi piónawala niráa ju, mapujiti nijeni sinibí ne wabé galabé ologá bité. Ayénachótamo echirigá machí mapujiti nijeni galá machíami ju echi ne Bichíwali, ayénachó mapujítini sinibí galabé kilí oláami niráa jú. Ayénachótamo galá machí mapu nijeni Riosi piónawala niráa ju mapujítitamo galá machí mapu echi Wabé Galabé Riosi Iwigala pachana tamí yuwa atí, ayénachó mapujítitamo machí mapu nijeni sinibí 'yemi mi wabé galé.
\v 7 Ayénachótamo galá machí mapu nijeni ne bichíwali Riosi piónawala ju, mapujiti nijeni sinibí 'yemi mi nawesa echi ne Bichíwali, ayénachó mapujítitamo ritiwá mapu Riosi wabé omériga olá tamí yuwa. A'lí nijeni sinibí galá wachínaga olá mapalini nocha, Riosi nóchala olayá, ayénachó mapalini ni'yúraga ra'icha mapujiti auché jaré wabé sayera nijé nawésawala.
\v 8 Sinéami káachi echi auché jaré pagótami tamí we galá nirá, chopi auché siné káachi aboni tamí wabé chijuna. Sinéami káachi aboni galá ra'icha tamí jiti, chopi auché siné káachi aboni wabé chati sití ra'icha tamí jiti rugá. Sinéami káachi echi auché jaré aní mapu nijeni wabé 'yékaka ra'íchami ju, chopi auché siné káachi aboni aní mapu nijeni chopi ra'icha echi ne Bichíwali.
\v 9 Sinéami káachi aboni tamí olá mapurigá ke machirúami niráa, chopi auché siné káachi tamí olá mapurigá galá machirúami niráa. Sinéami káachi nijeni arigá ne noguí mi'lirúami ju, chópini abijí waminabi bitélasimi. Sinéami káachi nijeni kastigo 'yárami ju, chópini ketasi mi'lirúami niráa ju.
\v 10 Auché jaré tamí o'monárasagá, nijeni arigá sinibí we kanila. Nijeni wabé risúwati ju, chópini we olá mapurigá auché jaré ritémtami ne wabé níwami níima echo'ná ripá riwigachi. A'lí nijeni ketasi biyiri níwa, chópini arigá níwa ne suwaba echi wabé galabéala mapu Riosi tamí 'ya.
\p
\v 11 'Yemi ritémtami echo'ná Koríntochi piréami, nijeni ne wabé galigá 'yemi mi galá machíami niráa oseli ne suwaba mapurigani 'nátali pachana nijé sulálachi niráa.
\v 12 Nijeni ne bichíwali 'yemi mi ne wabé galé, chopi 'yémitamo ke 'me tamí galé.
\v 13 Jipi nijeni 'yemi mi ne wabé galigá ruyé, mapurigá nijeni ne bichíwali 'yemi onolá niráa, máputamo tamí wabé galebo achigórigá mapurigá nijeni 'yemi mi galé.
\s Echi jaré napawika bichíyami mapurigá echi Walubela Riosi ri'obáwala ju, mapujiti echi Wabé Galabé Riosi Iwigala bité echo'ná pachana aboni sulálachi
\p
\v 14 Ketasi ne sinibí napawika 'yénsi echi auché jaré ke bichíyami pagótami yuwa. Echirigá ologá 'yémitamo mapurigá wáasi, biléana bulirúami niráa níibotamo, mapalí bilé wáasi ke galá simí. A'lí 'yemi galabé wachínaga oláami, ketasi galá ju máputamo sinibí napawíkami níibo echi auché jaré wabé chati sitíi oláami yuwa, mapujiti 'yémitamo ketasi achigó yiri ju aboni yuwa, achigórigá mapurigá echo'ná rayénachi ketasi chopi a yiri ju echi rukuáwami yuwa.
\v 15 Echi Walubela Jesucristo ketasi ne bilénapi chópirigá 'nata echi riablo yuwa. A'lí echi jaré Jesucristo jiti bichíyami nibilé cho bilénapi chópirigá olá echi auché jaré ke bichíyami yuwa.
\v 16 Echi Walubela Riosi ke siné risensia 'yali mapu echi jaré amachíkalawami namuti nirúlama echo'ná pachá echi walubé Riosi ri'obáwalachi, mapujiti Riosi nakí mapu Binói chopi waminabi walubélaga anérami níima. A'lí Riosi nibilé cho risensia 'ya mapu 'yemi napawika bichíyami chokoba jaga o'wikebo echi jaré amachíkalawami namuti, mapujiti Riosi Binói pachana bité echo'ná 'yemi sulálachi, echijiti si'néami 'yemi napawíkami mapurigá Riosi ri'obáwala niráa jútamo, echijiti galá níima máputamo chopi chokoba jaga waminabi walubélaga anebo echi Walubela Riosi, mapurigá Riosi Binói 'yemi jiti rugá jeanili:
\q Nijeni echo'ná aboni yuwa yénaga bitélama.
\q A'lí Nijeni aboni Riósawala níima.
\q A'lí aboni Nijé níwala pagótami níima.
\m
\v 17 Echijiti Riosi ayénachó tamujé tamí jeané mapurigá je'ná jerigá osirúami ju:
\q Ku 'machínasi echo'ná echi auché jaré chati sitíi oláami pagótamichi jonsa.
\m Ayénachó Riosi tamujé tamí jeané:
\q Echo'ná abónichi jonsa waminá waná rojuasi.
\q A'lí ke siné chokoba jaga o'wikesi echi jaré amachíkalawami namuti.
\q Echalí Nijeni 'yemi mi narema mapurigá Nijé níwala pagótami niráa.
\q
\v 18 A'lí Nijeni níima 'yemi Onolá,
\q ayénachó 'yemi níibotamo Nijé kúchuwala. Echirigá aní echi Walubela Riosi, echi mapu ne suwaba omérami ju.
\c 7
\p
\v 1 Echirigá biché 'yemi nijé ritémawala mápuni ne wabé galé, galá 'natasi mapurigá Riosi tamujé tamí je'ná jerigá bichíwaga aneli. Galá níima ariwesa suwaba chati sitíi oluwáwami. Ketasi galá ju máputa chati sitíi olabo, nibilé cho galá ju máputa chati sitíi 'natabo. Chopi galá níima máputa ne galá nijéwabo Riosi, mapurigata chopi olabo mapurigá Binói nakí, mapujítita bichíi mapu Riosi chopi ne Walubela ju.
\s Echo'ná Koríntochi piréami napawika bichíyami we o'mónali mapurigá Riosi nakili
\p
\v 2 'Yemi echo'ná Koríntochi piréami ritémtami arigá tamí galá galesi. Nijeni ke wesi 'yemi mi risúu olali. Ke wésini 'yemi mi chati sitíi olírali mapurigátamo echirigá chati sitíi oláami níibo. Ke wésini 'yemi mi 'yékali.
\v 3 Ketásini 'yemi mi echirigá ané mapurigátamo wi'nijírami níibo, mapujiti bachá niráa mani 'yemi mi aneli mapu nijeni sinibí 'yemi mi ne wabé galema, waminábita pirélasagá jena'í wichimóbachi, ma suwisáagá keremá.
\v 4 Nijeni ne wabé ganíili mapujiti 'yémitamo ma galá bichíili Jesucristo niráa, ayénachóni mayé mapu 'yémitamo waminabi galá bichíisabo. A'lí bicheni echirigá ne wabé kanila mapalini arigá ne wabé risúu olárami ju.
\p
\v 5 A'lí mapalí jonsa nijeni nawali jena'í Maseróniachi anilíwachi kawírali, echi Timoteo yuwa, tamujeta tarapé cho galá isábali. Si'winárigá tamujeta ne wabé kumérami níili ne suníami mapo'nata 'yénali, mapujiti echi auché jaré ke bichíyami pagótami sinibí tamujé tamí sayérali, a'lí bicheta ne bichíwali wabé majali sulachí niráa.
\v 6 Chopi Riosi tamujé tamí ku kanílatali mapujiti tamujé tamí yuwa nawali echi Tito, mapujiti Riosi chopi ju mapu galá omero ku kanílatiya echi jaré mapu ikí o'mónami ju.
\v 7 Echalí Riosi ne bichíwali tamujé tamí ku kanílatali mapujiti echi Tito echirigá tamujé tamí yuwa nawali, ayénachó mapujiti echi Tito binói tamujé tamí kanílatali, achigórigá mapurigá 'yemi aboni chabénala niráa galá kanílatali echi binói Tito. Echi binói Tito tamujé tamí aneli mapu churigá 'yémitamo tamujé tamí ne wabé 'nénali, ayénachó mapu chuyena 'yemi ne wabé o'mona mapujiti tamujeta risúu olárami ju, ayénachó mapurigá 'yémitamo sinibí tamujé tamí jiti 'nata. A'lí nijeni waminabi wabé kanílali suwaba je'ná jiti.
\p
\v 8 Chabénala nijeni arigá 'yemi mi o'monáratali mapalini bachá niráa 'yemi mi oseli, chopi jipi rawé nijeni arigá kanila mapujítini echirigá olali. Chabénala nijeni o'mónali, mapujiti echi oselí 'yemi mi o'monárali pe téeli niráa.
\v 9 Chopi jipi rawé nijeni echijiti galá kanila, chopi nijeni ketasi echirigá ganila mapujiti 'yémitamo o'monáratami níili. Nijeni chopi ganila mapujiti 'yémitamo wikáwali tánali Riosi, mapalítamo echirigá o'monáratami níili. Echirigátamo chopi o'monáratami níili mapurigá Riosi nakili, a'lí nijeni echirigá ketasi wepi 'yemi mi kumeli.
\v 10 Mapujiti mapalita o'monáratami ju mapurigá Riosi nakí, echalita wikáwali tani Riosi mapurigata ku wikáwarami níibo. A'lí waminánomí tamujé chopi waminabi kanílabo mapujítita echirigá wikáwali tánali. Chopi mapalí echi auché jaré ke bichíyami pagótami jena'í wichimóbachi piréami o'monáratami ju, echalí aboni we o'mona mapujiti we chati sitíi olá, chopi aboni arigá ketasi wikáwali tani Riosi, echijiti aboni chopi waminá suwimea.
\v 11 'Yémitamo ne bichíwali o'monáratami níili mapurigá Riosi nakili. A'lí jípitamo galá machí mapurigá ikili mapujítitamo echirigá o'monáratami níili. Echalí mapalítamo echirigá o'monáratami níili 'yémitamo wabé chati sitíi oláami niráa niráli echi bilé rijói mapu chati sitíi olali. Ayénachó echalítamo nakili tamí ku ruyénala mapurigátamo olali. Ayénachótamo na'áwatarami níili mapujiti echi bilé echirigá chati sitíi olali. Ayénachótamo ne wabé majali mapujiti bilé 'yemi echirigá chati sitíi olali. A'lí bichétamo auchecho siné nakili tamí 'nénala. Ayénachótamo nakili kastigo 'yánala echi bilé rijói 'yemi mapu echirigá chati sitíi olali. Echijiti jipi nijeni galá machí mapu echi auché jaré 'yemi ketasi chokila jútamo mapurigá echi bilé rijói chati sitíi olali.
\v 12 Echirigá biché chabénala mapalí nijeni 'yemi mi oseli echi oselí, nijeni ketasi echirigá oseli echi bilé rijói jiti mapu chati sitíi olali. Nibilé choni 'yemi mi echirigá oseli echi auché bilé jiti mapu sayératami níili. Chópini 'yemi mi echirigá oseli mapurigá 'yemi aboni, bacháami Riosi yuwa, galá ku 'natabo mapu chu yena 'yémitamo ne bichíwali tamí wabé galé.
\v 13 Echijiti nijeni ma ku ganílatami ju mapujiti 'yémitamo auchecho siné ma ku 'nátali mapurigátamo ne bichíwali tamí galé.
\p Chopi nijeni ayénachó kaníili mapujiti echi Tito wabé ganílatami níili 'yemi jiti, mapujiti si'néami 'yemi galá kanílatali echi binói.
\v 14 Echirigá nijeni ketasi 'yékali chabénala mapalini aneli echi Tito mapu nijeni mayeli mapu 'yémitamo ne galá bichíyami níili. Chopi achigórigá mapurigá nijeni sinibí 'yemi mi galá ne bichíwaga aneli, echirigá ayénachó ne bichíwali níili mapurigá nijeni aneli echi Tito, mapalini aneli mapu nijeni mayé mapu 'yémitamo galá bichíyami ju.
\v 15 A'lí echi Tito 'yemi mi waminabi ne wabé galé sinibí mapalí binói 'nata mapurigá si'néami 'yémitamo ne galá nijéwali suwaba mapurigá binói 'yemi mi nuleli, ayénachó mapurigátamo wabé galigá nareli echi binói, mapujítitamo we majali Riosi.
\v 16 Nijeni ayénachó ne wabé ganila mapujiti nijeni mayé mapu 'yémitamo ne bichíwali olabo suwaba mapurigá nijeni 'yemi mi nulema.
\c 8
\s Wikabé niráa 'yánalaga
\p
\v 1 Jipi, 'yemi keni ritémawa, nijeni nakí 'yemi mi ruyénala mapurigá Riosi ne wabé galigá ku'wírali echi auché jaré napawika bichíyami echo'ná Maseróniachi anilíwachi kawírali piréami mapurigá aboni galá olama mapurigá Binói nakili.
\v 2 Aboni ne wabé risúu olárami níili mapalí aboni ne wabé kumérami níili echi auché jaré ke bichíyami pagótami jiti. Chopi aboni arigá ne wabé kaníili. Echijiti aboni ne wabé tisúwati ke, arigá wikabé niráa 'yali, mapurigá ne wabé níwami niráa, echi auché jaré wabé tisúwati ritémtami ku'wíriya.
\v 3 A'lí nijeni 'yemi mi ne bichíwaga ruyé mapurigá aboni ne wabé kanílaga 'yali mapuyena aboni galá omérali ayá, ayénachó aboni arigá waminabi ne wabé simírami 'yali, mapalí aboni arigá ketasi 'me níwali.
\v 4 Echalí aboni tamí wabé tánali mapurigani risensia 'yama mapurigá aboni ayénachó napabuka náwalama wenomí, echi auché jaré wabé tisúwati ritémtami 'yánala.
\v 5 A'lí nijeni mayeli mapu aboni ayena 'yama riwéali wenomí, chopi aboni waminabi ne wabé simírami galabé namuti 'yali, ketasi mapurigá nijeni mayeli, mapujiti aboni bachá niráa 'yali aboni sulala echi Walubela Jesucristo, mapurigá aboni chopi olama mapurigá Binói nakí. A'lí pe jubáami aboni galá tamí 'yali aboni niráa mapurigá aboni omérama nagúura Riosi nóchala olayá, mapurigá echi Walubela Jesucristo nakili.
\v 6 Echijiti jipi nijeni aneli echi Tito mapurigá binói echo'ná 'yemi yuwa ma suwaba sunima napabuya echi wenomí mapu binói chabénala chótali napabuya, mapujiti 'yemi echo'ná Koríntochi piréami ne wabé galigá 'yabo riwéali wenomí, echi auché jaré wabé tisúwati ritémtami 'yánalaga náwalama.
\v 7 A'lí 'yémitamo sinibí wabé simírami galá olá suwaba mapu ikítamo olá. Echirigátamo simírami galá bichíyami ju, ayénachótamo simírami galá binériami ju Riosi Ra'íchala. Ayénachótamo simírami galá machíami ju. Ayénachótamo simírami wabé nílaka nakí ku'wíranala auché jaré. Ayénachótamo ne wabé simírami tamujé tamí galé. Jipi ayénachó galá níima máputamo simírami niráa 'yabo wenomí, echi auché jaré wabé tisúwati ritémtami 'yánala.
\p
\v 8 Nijeni ketasi 'yemi mi echirigá wabé 'wérali niráa nulé. Chópini 'yemi mi echirigá ané mapurigátamo galá machiboa mapurigá auché jaré ritémtami wabé kaníliga 'yali wenomí, echi auché jaré wabé tisúwati ritémtami 'yánalaga. Echirigátamo galá machiboa áchatamo ne bichíwali galá galema 'yemi.
\v 9 Mapujiti 'mátamo galá machí mapurigá echi Walubela Jesucristo sinibí ne wabé galéami níili. Ki'yá chokichí jonsa Binói ne suwaba namuti níwami níili mapu ikí nirúali, chopi wakinánokuá Binói ne wabé risúwati níilinali, mapujiti Binói 'yemi mi ne wabé galigá ku'wíranali, mapurigá 'yémitamo niwárami níibo ne wabé simírami níwami niráa echo'ná ripá riwigachi.
\p
\v 10 Nijeni 'yemi mi je'ná jerigá ruyé mapurigátamo waminabi ku'wíratami níibo. Chabé, bilé bamíbali jonsa, 'yémitamo galá o'wínali wenomí napabuya, echi auché jaré wabé tisúwati ritémtami 'yánalaga. Echalítamo chótali we ganílaga ayá.
\v 11 Jipi waminabi echirigá nokíisi kaníliga napabúsiya echi wenomí mapuyénasítamo sunibo. Galá níima ibili niráa 'yemi arigá ganíliga 'yasa jaré wenomí, suwaba mapu ikí ibílitamo omero nijaa.
\v 12 Mapujiti a bilé rijói ne bichíwali nakisáagá 'yánala Riosi jaré wenomí, echalí Riosi arigá kaníliga narema mapalí echi bilé rijói galá 'ya mapuyénasí binói níwami ju. A'lí Riosi ketasi taní echi jaré namuti máputa ketasi níwa.
\p
\v 13 A'lí nijeni ketasi 'yemi mi je'ná jerigá ané mapurigá 'yémitamo ne wabé tisúwati niráa tibibo, mapujítitamo ku'wírali echi auché jaré.
\v 14 Chopi nijeni 'yemi mi je'ná jerigá ané mapurigá ne si'néami 'yemi napawika bichíyami chopi ikí níwabotamo. Jipi 'yemi echo'ná Koríntochi piréami wabé simírami níwa. Echijiti jipi 'yemi galá omero ku'wíriya echi auché jaréana piréami ritémtami mapu jipi rawé we newalé ko'wáami, chopi waminánomí auché siné káachi, echi jaré aboni waminabi simírami níwamiré, mapuyena 'yemi aboni wabé newaréami níibirétamo. Echalí aboni galá omérama ku ku'wíriya 'yemi, mapalítamo newalebo ko'wáami. Echirigá ne si'néami 'yemi napawika bichíyami ku ne a'nawí chopi ikí níwabotamo.
\v 15 Mapurigá echo'ná Riosi Ra'íchala oselíwalachi je'ná jerigá osirúami ju: Echi mapu we simírami napabúliko echi ko'wáami mapu Riosi 'yali ripá riwigachi jonsa, arigá ketasi simírami níwali. A'lí echi mapu pe okuáa napabúliko arigá ketasi auché newaleli.
\s Echi Tito galabé oláami níili
\p
\v 16 Chopi nijeni walú natétara 'ya Riosi mapujiti Binói 'yali mapurigá echi Tito 'yemi mi galema achigórigá mapurigá nijeni 'yemi mi wabé galé.
\v 17 Mapujiti echi Tito galá nijéwali mapalí nijeni aneli mapu echo'ná 'yémichi simea, echi wenomí napabúbiya. Chopi mapujiti binói ayénachó 'yemi mi wabé galé, echijiti binói we nílaka simináali echo'ná 'yémichi simiyá.
\p
\v 18 A'lí echi binói Tito yuwa, ayénachóni jula auché bilé rijimala mapu we galá nigúraga nocha echi Galabé Riosi Ra'íchala nawésiya, echi mapu si'néami echi auché jaré napawika bichíiyami sinibí galabé oláami niráa ané.
\v 19 A'lí ketasi chopi ju mapu aboni galabé oláami ané je'ná rijimala, chopi aboni ayénachó chapili echi binói mapurigá tamujé tamí yuwa inama mapalita rojuániga nachútabo echi wenomí, echi jaré tisúwati, mapurigá echi Walubela Jescristo waminabi walubélaga anérami níima, ayénachó mapurigá galá 'nératami níima mapu 'yemi aboni we galigá oláami jútamo.
\v 20 Echirigata galá tibupo mapurigá ke wesi omérama tamujé tamí wi'nijiya, jeanigá máputa ketasi galá nachuta echi wenomí máputa napabú 'yena.
\v 21 Mapujiti tamujeta sinibí nakí máputa suwaba namuti galabé wachínaga niráa olabo, bacháami echi Walubela Jesucristo yuwa, ayénachó ne galá wachínaga niráa bacháami echi auché jaré pagótami yuwa.
\p
\v 22 Ayénachóta jula auché bilé rijimala aboni yuwa, echi máputa ma wisabé niráa riwali ne wabé galá galigá nóchami niráa, wikabé namuti jiti. A'lí jipi binói waminabi wabé galigá nochama 'yemi yuwa, mapujiti binói mayé mapu 'yémitamo ne wabé galá oláami jútamo.
\v 23 A'lí a auché jaré 'yemi mi rukuésagá echi Tito jiti rugá, echalí jeanesi mapu echi Tito nijé apanérawala ju, mapu binói tamí yuwa nóchami ju, mapu 'yemi mi ku'wírama. A'lí a rukuésagá echi auché okuá ritémtami jiti rugá, echalí jeanesi mapu aboni julárami níili echi auché jaréana piréami napawika bichíyami jiti, ayénachó mapurigá aboni chopi waminabi walubélaga ané echi Walubela Jesucristo.
\v 24 Echijiti galá 'nérasi mapurigátamo ne bichíwali galá galé je'ná okuá ritémtami. Echirigátamo ayénachó 'nérabo ne si'néami echi auché jaréana piréami napawika bichíyami mapu nijeni bichíwaga anili mapalini wabé nílaka niráa ra'íchali 'yemi jiti rugá.
\c 9
\s Echo'ná Koríntochi piréami napawika bichíyami napabuka 'yali wenomí echi auché jaréana piréami wabé tisúwati ritémtami
\p
\v 1 Nijeni mayé mapu ketasi 'me 'wérali ju mapurigá nijeni 'yemi mi osema jeanigá máputamo napabubo wenomí echi auché jaréana piréami wabé tisúwati ritémtami 'yánala,
\v 2 mapujítini galá machí mapurigátamo arigá nakí echirigá 'yánala. Echijiti nijeni we nóchaga niráa 'nátaga ra'íchali 'yemi jiti mapalini ruyeli echi auché jaré napawika bichíyami echo'ná Maseróniachi anilíwachi kawírali piréami mapurigá 'yémitamo echo'ná Akáyachi anilíwachi kawírali piréami arigá we nakili 'yánala echi wenomí, chabénala bamíbali jonsa. Echijiti ne noguí si'néami aboni ayénachó nakili echirigá 'yánala wenomí, achigórigá mapurigá 'yémitamo olali.
\v 3 Jipi nijeni jula je'ná bikiyá ritémtami 'yemi mi ruyénala mapurigátamo ne bichíwali olabo mapurigá nijeni ma echirigá wabé nóchaga 'nátaga niráa ruyeli echi auché jaré mapu 'yémitamo nakili olánala. Echirigani jula aboni mapurigá 'yémitamo we yáati napabubo echi wenomí, mapurigá nijeni ma ruyeli echi auché jaré mapu 'yémitamo 'yabo riwéali.
\v 4 Galá níima 'yemi echirigá bachá niráa napabusa echi wenomí, mapurigá nijeni ketasi riwélatami níima waminánomí mapalí nijeni echo'ná simea 'yemi mi 'némiya; ayénachó mapurigá 'yémitamo ketasi cho riwélatami níibo, a tamí yuwa sisá jaré echo'ná Maseróniachi piréami ritémtami; mapujiti a echirigá ikisáagá, echalí 'yémitamo ne wabé riwélatami níibo átamo ketasi cho ma napabúrami níwasagá echi wenomí, mapujiti nijeni ma ruyeli aboni mapu 'yémitamo wabé nakili 'yánala, chabé bamíbali jonsa.
\v 5 Echijiti nijeni arigá 'wérali mayeli mápuni bachá julama je'ná bikiyá ritémtami 'yemi mi echirigá ruyénala, ayénachó mapurigá aboni 'yemi mi ku'wírama echi wenomí napabuya máputamo chabé jonsa anili nijibo ruyá. Echirigá nijeni bachá niráa júuli aboni mapurigá 'yémitamo bachá niráa ne wabé galigá napabubo echi wenomí, mapurigá ketasi 'wérali níima máputamo napabubo mapalí nijeni ma echo'ná nawá, mapurigá nijeni 'yemi mi nuléla niráa.
\p
\v 6 Je'ná jerigá galá 'natasi 'yemi: Echi rijói mapu pe uchíi ichako, ayénachó pe okuáa 'wima. A'lí echi mapu wi'libé ichako, ayénachó wikabé 'wima.
\v 7 Galá níima ibili niráa 'yemi 'yasa mapu ikítamo ne sulachí niráa galá nakí 'yánala, chopi ketasi risirúami niráa níisi. Wabé galigá 'yasi. Ketasi chopi 'yasi mapurigá 'wérali nulérami niráa, mapujiti Riosi wabé galé echi jaré mapu ikí wabé kaníliga nijáami.
\v 8 A'lí echi Walubela Riosi ne wabé omérami ju 'yemi mi ne wabé simírami ku'wíriya, mapurigátamo sinibí níwabo suwaba echi jaré namuti mapu ikí 'yemi aboni newalebo, ayénachó mapurigátamo auché jaré waminabi níwabo máputamo omérabo ayá, mapurigátamo echirigá galabé ologá ku'wírabo auché jaré.
\v 9 Mapurigá echo'ná Riosi Ra'íchala oselíwalachi je'ná jerigá osirúami ju:
\q Echi galabé oláami rijói wikabé namuti 'ya echi auché jaré wabé tisúwati pagótami.
\q Échiko sinibí ne wabé natimáami ju.
\m
\v 10 A'lí echi Walubela Riosi mapu we nijá echi raká ichiwáami, Echi mapu ayénachó nijá echi ko'wáami máputa ko'wá, Échiko ayénachó 'yemi mi ne wabé simírami 'yama mapurigátamo galá omérabo ku'wíriya echi jaré tisúwati ritémtami, mapurigá 'yemi galabé olalila wikabé niráa muwema.
\v 11 Echirigá 'yémitamo ne bichíwali karúmati níwami níibo, mapurigátamo omérabo wikabé ayá echi auché jaré wabé newaléami. A'lí mapalí tamujeta nachútabo echi wenomí máputamo náwalabo 'yánala echi jaré tisúwati ritémtami, echalí aboni walú natétara 'yama Riosi.
\v 12 Mapujiti mapalita echirigá 'yánalaga olá, echalí tamujeta ketasi chopi 'ya echi jaré namuti mapu ikí newalé echi jaré napawika bichíyami ritémtami, chópita ayénachó olá mapurigá aboni wisabé walú natétara 'yama Riosi.
\v 13 Ayénachó aboni waminabi walubélaga anema Riosi, mapalítamo echirigá wabé galigá kóobo aboni, mapujiti echalí ne galá machirúami níima mapu 'yémitamo galá nijéwaga olá mapurigá echi Walubela Jesucristo 'yemi mi nulé, mapujiti 'yémitamo echirigá ne sébali 'ya aboni, echi auché jaré tisúwati ayénachó.
\v 14 A'lí aboni ayénachó Riosi yuwa ra'icháma, 'yemi jiti tániga, mapujiti aboni 'yemi mi ne wabé galema, mapujiti Riosi Binói echirigá wabé galigá olali máputamo galabé oláami níibo.
\v 15 ¡Walú natétara 'yabo Riosi mapujiti Binói tamujé tamí ne wabé simírami 'yali, mapuyénasíta tarapé chirigá omero ku ruyá mapu chu yena ne wabé simírami ju!
\c 10
\s Riosi Binói nawisánalaga júuli echi Pablo
\p
\v 1 Nijé, Pablo, 'yemi mi ne wabé tani máputamo galá nijéwaga olabo mapurigá nijeni 'yemi mi ané, mapujiti nijeni nulérami níili echi wabé natimáami, ne wabé galéami Walubela Jesucristo jiti, echi mapu sinibí ne wabé galabé oláami ju. A'lí jaré 'yemi aní mapu nijeni ne wabé kilí oláami ju mapalini echo'ná 'yemi mi yuwa atí, chopi mapu nijeni 'yemi mi ne wabé aparúami niráa osé mapalini echo'ná mikabé atí.
\v 2 Jipi nijeni nakí máputamo galá tamí nijéwabo, mapurigá waminánomí mapalini echo'ná 'yemi mi yuwa nawá, echalí ketasi 'wérali níimi mapu nijeni aparúami niráa sayérama echi jaré 'yemi mapu ikí aniko mapu nijeni 'yékaka olá, mapurigá echi auché jaré ke bichíyami pagótami olá. Nijeni ketasi echirigá 'yékaka olá, echijiti nijeni ne bichíwali sayéraga ra'íchama echi jaré 'yemi echirigá aníami.
\v 3 Ne bichíwali ju mapu tamujé bichíyami wepi pagótami chopi ju. A'lí mapalí tamujeta we sayera echi chati sitíi oluwáwami, echalí tamujeta ketasi nakowa mapurigá echi auché jaré ke bichíyami pagótami jena'í wichimóbachi we nakowa.
\v 4 Mapujiti mapalí tamujé bichíyami sayera echi chati sitíi oluwáwami, echalí tamujeta ketasi karúmati ripiyá jiti nakowa, chópita arigá we jiwériga sayera echi chati sitíi oluwáwami mapurigá Riosi tamujé tamí jiwérata.
\v 5 A'lí echi auché jaré ke bichíyami pagótami sinibí we sayera echi ne Bichíwali, ayénachó aboni sayéraga olá mapurigá echi auché jaré pagótami ketasi galá bichíima Riosi. Chopi tamujé bichíyami arigá galá bichíiga na'ura echiyiri chati sitíi oluwáwami. A'lí tamujeta sinibí galabé niráa 'nata mapurigata sinibí galá nijéwami níibo mapurigá Jesucristo tamujé tamí nulé, ayénachóta galá bichíirabo echi auché jaré pagótami Jesucristo niráa, mapurigá aboni ketasi waminabi echirigá chati sitíi 'natáma mapurigá aboni sinibí ne wabé nóchaga 'nátaga chati sitíi 'nátali.
\v 6 A'lí echalí mapalí nijeni galá machimea chigá 'yemi ne galá sébali ne galá nijewa echi Walubela Jesucristo, echalí nijé binói arigá kastigo 'yama echi auché jaré mapu ketasi galá nijéwako.
\p
\v 7 'Yémitamo chopi ritiwá echi jaré namuti mapu ikí ne machiná nirú, chopi galá níima máputamo machiboa suwaba echi ne Bichíwali. A'lí a bilé rijói ne bichíwali mayésagá mapu binói Jesucristo níwala ju, galá níima échiko galá machisá mapu nijé binói ayénachó achigórigá Jesucristo níwala juni.
\v 8 Nijeni 'yemi mi ne bichíwali niráa waminabi ne 'wérali ané mapu Riosi Binói tamí júuli 'yemi mi ruyénala mapurigátamo olabo. Echijiti nijeni tarapé riwela, mapujiti echi Walubela Riosi ne bichíwali tamí júuli echirigá ruyénala. A'lí nijeni je'ná jerigá olá mapurigá 'yémitamo waminabi galá bichíibo, ketasi mapurigátamo waminá 'wigáami níibo.
\v 9 Nijeni ketasi nakí mapu 'yémitamo mayebo mapu nijeni chopi 'yemi mi oseli mapujiti nijeni 'yemi mi wabé majáranali.
\v 10 Jaré 'yemi jeaní mapu nijeni 'yemi mi ne wabé jiwériga nulé mapalini 'yemi mi osé, chopi mapu nijé binói arigá tarapé jiwérami niráa juni. A'lí aboni ketasi galabé niráa mayé nijé ni'ogala.
\v 11 Chopi galá níima mapu si'néami mapu ikí echirigá aniko ne galá machimea mapu achigórigá mapurigani 'yemi mi jiwériga nulé mapalini 'yemi mi osé mikabé jonsa, echirigá ayénachó nijeni achigórigá ne wabé jiwériga olama mapalini 'yemi yuwa asimea.
\p
\v 12 Nijeni ketasi wabé nóchaga 'nátaga niráa jeanimea mapu nijé binói achigó yiri ju echi auché jaré yuwa mapu ikí aniko mapu aboni chopi niráa ne wabé galabé ju. Nibilé choni nóchaga 'nátaga niráa jeanimea mapu nijeni waminabi wabé galabé ju ketasi mapurigá aboni, mapujiti si'néami echirigá ra'íchami chopi mapurigá ke newalite niráa ra'icha, ayénachó aboni ke newalite niráa ju mapalí aboni mayé waminabi galabé oláami ketasi mapurigá auché jaré.
\v 13 Nijeni ke bilé cho mayema mapu arigá 'wérali ju mapu nijé binói wikanáami simea Riosi Ra'íchala nawisásiya, mapo'ná Riosi Binói ketasi cho tamí júuli, mapujiti Riosi chopi ju mapu tamujé tamí ané mapuyénasíta simabo, Binói Ra'íchala nawisásiya. A'lí Riosi Binói arigá ma tamí risensia 'yali mapurigani sebama echo'ná Koríntochi, 'yemi pirélachi yénasí.
\v 14 Echijiti mapalí nijeni 'yemi mi je'ná jerigá nulé, echalí nijeni chopi olá mapurigá Riosi tamí nuleli, mapujiti Riosi chabénala niráa tamí nuleli 'yemi mi nawésanala. A'lí nijeni níili mápuni ne bachá nawali echo'ná 'yémichi echi we Galabé Jesucristo Nawésawala nawisásiya.
\v 15 A'lí nijeni ke siné nílama mapurigá nijé níwala niráa echi nóchali mapu auché jaré ritémtami chopi nóchaga olali. Si'winárigá nijeni arigá mayé mapu 'yémitamo abijí waminabi galá bichíisabo. A'lí nijeni omérama waminabi nocha echo'ná 'yémichi. Chopi nijeni ke siné nochama mapo'ná Riosi ketasi cho tamí júuli nochánala.
\v 16 Nijeni mayé mapu pe waminánomí nijeni auché jaréana simea, mapurigani ayénachó nawisáma Riosi Ra'íchala echo'ná 'yémichi jonsa, auché jaréana we mikabé wamináami, chópini ke siné chopi nochama echo'ná mapo'ná auché jaré ritémtami we nocha, Riosi nóchala olayá, nibilé choni nílama mapurigá nijé níwala niráa echi nóchali mapu auché jaré ritémtami nóchaga olali.
\p
\v 17 A jaré wabé nóchaga 'nátaga nílanalasagá, galá níima mapu aboni chopi nóchami níisa mapujiti echi Walubela Jesucristo galabé oláami niráa aboni.
\v 18 A'lí mapuyíripi rijói aníko mapu binói niráa we galabé oláami ju, échiko ketasi ne bichíwali galabé oláami ju.
\c 11
\s Echi Pablo ne bichíwali Riosi jiti jurálami níili
\p
\v 1 ¡Galá níimi 'yémitamo tamí waminabi kipusa, átamo arigá mayésagá mapu nijeni ke newalite niráa ra'icha! ¡Arigá tamí galá kipusi!
\v 2 Mapujiti nijeni wabé nílika, ketasi nakí mapu echi riablo 'yemi mi 'yékama. A'lí Riosi Binói echirigá tamí 'natárali, mapujiti nijeni ne bichíwaga anili mapu nijeni 'yemi mi 'yama echi Walubela Jesucristo mapurigátamo Binói níwala níibo. Echijiti nijeni ne wabé nakí mápuni ne bichíwali 'yemi mi 'yama echi Walubela Jesucristo, mapujiti 'yémitamo mapurigá bilé tiwé ju, mapu ke cho bilé rijói yuwa kochíami, mapu nijeni 'yama kunénala bilepi Rijói yuwa, echi mapu echi Walubela Jesucristo ju.
\v 3 Chopi nijeni wabé majawá mapujítini mayé mapu siné káachi 'yémitamo ariwebo mapurigá echi riablo 'yemi mi 'yékama achigórigá mapurigá echi binói riablo, mapurigá sinowi nílaka, ne wabé 'yékali echi bachá bitéami mukí, Eva riwéami. A'lí echirigá ikisáa 'yemi 'nátala chakena ulútami níima, mapurigátamo ma ketasi waminabi galebo echi Walubela Jesucristo ne sulachí niráa.
\v 4 Mapujiti a auché jaré 'yemi mi auché si'winárigá nawésasagá ketasi mapurigá nijeni galabé niráa 'yemi mi nawésali echi Walubela Jesucristo jiti rugá, echalítamo arigá ne galá kipugú. Ayénachó mapalí auché jaré 'yemi mi nawesa jeanigá máputamo narepo auché bilé si'nú iwigá, ketasi mapurigá echi Wabé Galabé Riosi Iwigala máputamo ma nareli chabénala niráa, ayénachó mapalí auché jaré 'yemi mi si'winárigá nawesa ketasi mapurigátamo nawésarami níili Riosi Ra'íchala chabé chokichí, echalítamo arigá ne galá kipugú.
\v 5 Nijeni mayé mapu nijé binói ketásirapé tabéala niráa ju, echi auché jaré yuwa, mapu 'yémitamo o'wéala nawésami niráa mayé.
\v 6 A'lí a nijeni ra'ichásagá mapurigá bilé ke binératami niráa, nijeni arigá ne galá machíami ju. Nijeni sinibí 'yemi mi echirigá 'nérali, ne suwaba namuti jiti mapu ikí nijeni olali.
\p
\v 7 Nijeni ke siné 'yemi mi bujeli mapalí nijeni 'yemi mi nawésali echi Galabé Riosi Ra'íchala. Si'winárigá nijeni chopi binói niráa tabéatali mapurigá 'yémitamo waminabi o'wéalatami níibotamo. ¿Áchatamo mayé mapu galá níimili nijeni arigá 'yemi mi bujesa echalí?
\v 8 Echalí nijeni bujela niráa nareli wenomí mapu echi auché jaréana piréami napawika bichíyami ritémtami tamí 'yali, mapurigani nawésiya ináma Riosi Ra'íchala echo'ná 'yémichi, mapujiti nijeni nareli mapu ikí aboni tamí 'yali mapurigani omérama nocha echo'ná 'yémichi, Riosi Ra'íchala nawésiya.
\v 9 A'lí chabénala nijeni we newaleli mapalini echo'ná 'yemi yuwa asali. Chopi nijeni ke wesi 'yemi mi tánali jaré namuti. Echalí echi auché jaré napawika bichíyami ritémtami echo'ná Maseróniachi anilíwachi kawírali jonsa síami tamí 'yali echi jaré namuti mapu nijeni newaleli. Echalí nijeni ketásirapé namuti 'yemi nimí bujeli, mapujítini ketasi nakili mapu 'yémitamo echirigá bujérami níibotamo. Nibilé choni nakí máputamo echirigá bujérami níibo waminánomí.
\v 10 A'lí achigórigá mapurigá nijeni galá machí echi ne bichíwali Jesucristo Ra'íchala, echirigá nijeni ne bichíwali mayé mapu ke wesi tamí omérama nulée mápuni echirigá bujema wenomí mapalini nawesa Riosi Ra'íchala. Chopi nijeni sinibí ne bichíwali níliami níima mapurigani tarapé namuti 'yemi mi bujema, mapalini 'yemi mi nawesa echi Galabé Riosi Ra'íchala, 'yemi pagótami echo'ná ne suníami Akáyachi piréami.
\v 11 A'lí nijeni echirigá aní mapujítini 'yemi mi ne wabé galé. Echi Walubela Riosi galá machí mapu nijeni 'yemi mi ne wabé simírami galé.
\v 12 A'lí nijeni waminabi sísama olayá mapurigani sinibí olá mapurigá echi auché jaré nawésami mapu 'yémitamo Riosi jiti julárami niráa mayé ketasi omérama waminabi echirigá nóchaga 'nátaga niráa jeaniyá mapu aboni achigórigá oláami ju mapurigá nijeni olá.
\v 13 Mapujiti abóniko ketasi ne bichíwali Riosi jiti julárami níili, chopi aboni sinibí 'yékaka olá mapurigá 'yémitamo mayebo mapu aboni ne bichíwali Jesucristo jiti julárami ju nawisánala.
\v 14 Chopi mapurigá aboni echirigá olako, arigá galá machirúami ju, mapujiti echi Satanasi riwéami riablo binói ayénachó echirigá 'yékaka olá mapurigá echi pagótami mayema mapu binói ne bichíwali bilé wabé ratábami walula Riosi kapitánawala ju.
\v 15 Echijiti echi jaré pagótami mapu arigá nijéwaga olá mapurigá echi riablo nulé, abóniko we nakí wabé 'yékaka olánala, mapurigá echi auché jaré pagótami mayema mapu aboni ne bichíwali galabé oláami ju. Chopi echalí ne jubá rawé echi jaré aboni arigá kastigo 'yárami níima achigórigá mapurigá aboni wabé chati sitíi olali.
\s Echi Pablo wisabé ne wabé risúu olárami níili
\p
\v 16 Auchecho siné nijeni 'yemi mi jeané mapu ke wesi 'yémitamo mayesi mapu nijeni ke newalite niráa ju. ¡Chopi átamo arigá mayésagá mapu nijeni echirigá ke newalite ju, arigá ariwesi mapu nijeni 'yemi mi pe ra'íchama mapurigá bilé ke newalite niráa, mapurigá nijeni ayénachó pe nóchaga 'nátami nílama!
\v 17 Echi Walubela Jesucristo ketasi tamí nuleli mapurigani 'yemi mi jerigá ra'íchama, chópini ke newalite niráa ra'icha mapalí nijeni aní mápuni nóchaga 'nátami niráa nílama.
\v 18 A'lí mapalí wikabé auché jaré ne wabé nóchaga niráa ra'icha mapujiti aboni ne wabé simírami o'wéala niráa mayé, nijeni ayénachó nóchaga niráa ra'icháma
\v 19 mapujiti 'yémitamo risensia 'ya mapu echi jaré ke newalite 'yemi mi ra'íchama, chópitamo arigá mayé mapu 'yemi aboni ne wabé simírami machíami niráa ju.
\v 20 Ayénachótamo ariwé mapu echi jaré 'yékaka nawésami 'yemi mi wabé jiwériga nulema mapurigá aboni piónawala niráa, ayénachó mapurigá aboni waminá suwábama 'yemi níwala namuti. Ayénachótamo ariwé mapu aboni 'yemi o'wéalawala niráa niráma, ayénachó mapurigá aboni 'yemi mi ke 'me nirama, ayénachó mapurigá aboni 'yemi mi waminá cho'nimea.
\v 21 Ketasi galá níima mapu nijeni wabé riwélama mapujiti nijeni ke siné omérali echirigá olayá.
\p Chopi mapalí echi auché jaré we nóchaga 'nátaga ra'icháma, nijeni ayénachó nóchaga 'nátaga ra'icháma, chopi mapurigá ke newalite niráa.
\v 22 Echi auché jaré 'yékaka nawésami nóchaga aní mapu aboni Ebreo anilíwami ra'íchami ju. Nijeni ayénachó Ebreo ra'íchami ju. Aboni nóchaga aní mapu Isaeli anilíwami pagótami ju. Nijeni ayénachó ju. Aboni nóchaga aní mapu echi Abrami kúchala kúchuwala ju. Nijeni ayénachó bilé Abrami kúchala kúchuwala ju.
\v 23 Aboni nóchaga aní mapu aboni echi Walubela Jesucristo piónawala niráa ju. Nijé 'nalí waminabi simírami galabé pioni ju, Jesucristo piónawala niráa, chópini ra'icha mapurigá ke newalite mapalini echirigá aní. Nijeni waminabi wabé simírami nóchali, Jesucristo nóchala olayá, ketasi mapurigá aboni. A'lí mapujiti nijeni we nawésali Jesucristo Ra'íchala nijeni waminabi wisabé wipisótami níili ketasi mapurigá aboni. Nijeni simírami wisabé pachá bachárami níili mapujítini nawésali Jesucristo jiti rugá, ketasi mapurigá aboni, ayénachó nijeni wisabé ne noguí mi'lirúami níili.
\v 24 A'lí mapujiti nijeni nawésali Jesucristo jiti rugá, echi jaré Juríosi pagótami malisa chokéami tamí wisabé wipisoli, baisá makói miná kimakói yénasí niráa.
\v 25 Auché siné baisá chokéami ayénachó nijeni wipisótami níili kusí jiti. Auchecho siné nijeni wisabé basibúrami níili mapuyénasí nijeni ne noguí mi'lílati. A'lí baisá chokéami mapalí nijeni ripá moba iyénali jaréana bárkochi asagá, echalí ibili echi jaré barko ri'lé botowili. A'lí sinepi nijeni tibili echo'ná walú ba'wírali moba bilé rawéwali, waminá bilé rukuwáwali.
\v 26 Wisabeni wabé mikabé iyénali, Riosi Ra'íchala nawésiya. A'lí echo'ná wikanáami bakochi, wisabeni ne noguí u'lúsali. Wisabeni ne noguí mi'lirúami níili jaré chigórami jiti. Ayénachó echi jaré Juríosi pagótami wisabé tamí mi'lináali mapujítini echirigá nawésali Jesucristo Ra'íchala. A'lí echi auché jaré isena pagótami ayénachó wisabé tamí mi'lináali mapujítini echirigá nawésali. Echirigá nijeni wisabé ne noguí mi'lirúami níili echo'ná jaréana o'wéalachi, echo'ná jaréana waná kawichí ayénachó. Echo'ná walú ba'wírali nijeni wisabé ne noguí si'lili. Ayénachó nijeni wisabé ne noguí suwábarami níili echi auché jaré jiti mapu 'yékaka aní mapu ritémtami niráa ju.
\v 27 Wisabeni wabé nóchali, Riosi nóchala olayá. Ayénachóni wisabé wabé kumérami níili. Wisabé rokogó ketásini kochili. Wisabeni ne wabé 'locheli, ayénachóni wisabé balámali. A'lí wisabé tarapeni ko'wali, mapalini chopi Riosi yuwa ra'íchaga olánali. A'lí wisabeni wabé wacheli, ayénachó wisabé ketásini 'me níwali napachala.
\p
\v 28 Nijeni je'ná jerigá ne wabé kumérami níili chabé jonsa, ayénachóni sinibí rawé ne wabé 'nátali echi auché jaré suníami piréami napawika bichíyami ritémtami jiti, mapu churigá 'yéneré.
\v 29 A'lí a bilé rijimala ketasi 'me galá bichíyami níisagá, echalí nijé binói ne wabé natimaga nakimea ku'wíranala echi rijimala. A'lí a bilé lijimala ketasi waminabi bichíisagá mapujiti auché jaré pagótami ke bichíiratali, echalí nijeni ne wabé yoma.
\v 30 Riosi Binói tamí machírali mapurigá nijeni ketasi 'me jiwérami juni. A'lí a 'wérali níisagá mapu nijeni nóchami níima, echalí nijeni chopi echirigá nóchami níima mapujiti Riosi echirigá tamí machírali mápuni ketasi 'me jiwérami ju nijé binói niráa.
\v 31 Echi Walubela Riosi mapu tamujé Walubélawala Jesucristo Onolá ju, Échiko galá machí mapu nijeni ketasi 'yékaka aní. Ne wabé galá níima mapu echi Walubela Riosi sinibí waminabi walubélaga anérami níima.
\v 32 Chabénala mapalí nijeni echo'ná Ramáskochi anilíwachi walúlachi asali, echi ne walula silíami echo'ná bitéami Arétasi riwéami níili. Echalí echi pe tabéala silíami echo'ná bitéami nulali galabélaga iwénala echo'ná walúlachi yéachi, mapujiti tamí wabé chapináali.
\v 33 A'lí echo'ná walúlachi ne noligá tigótami níili ne wabé ripabé niráa. Chopi nijeni arigá ku machínali echo'ná walúlachi jonsa, mapujiti echi auché jaré ritémtami echo'ná biléana wabé ripabé uchíi yéachi jonsa tamí ri'lena, machímana niráa simérali, wiya jiti bulugá, echo'ná biléana ne wabé walubé walichi achagá. A'lí nijeni waminá 'másali mapurigá echi silíami ketasi tamí chapimea.
\c 12
\s Riosi rimútaga riwírali echi Pablo wikabé namuti
\p
\v 1 Mapalí nijeni ne wabé nóchaga ra'íchali mapujítini echirigá wisabé wabé risúu olárami níili, echalini ketasi 'yemi mi waminabi bichíirali mapu Riosi ne bichíwali tamí júuli nawisánala. Waminabi galá níimili mapu nijeni 'yemi mi anema mapurigá echi Walubela Jesucristo tamí rimútaga riwírali wikabé galabé namuti, ayénachó mapurigá Binói wisabé tamí machírali wikabé namuti mapu echi auché jaré pagótami ketasi cho machí.
\v 2 Nijé, Pablo, galá bichíi Jesucristo niráa. Chabénala nijeni torúami níili echo'ná ripá riwigachi mapo'ná Riosi atí. Ma makói miná naó bamíbali ju mapalí jonsa nijeni torúami níili. Chopi nijeni ketasi galá machí áchani auchérigá, nijé sapala, torúami níiliré, nijé aliwala chopi torúami níiliré omá, Riosi Binói chopi ne galá machí churigá ikili.
\v 3 Chopi nijeni ne bichíwali torúami níili echo'ná ripá riwigachi. A'lí nijeni ketasi machí acha nijé sapala así tólatiré, acha nijé aliwala chopi tólatiré omá. Riosi Binói chopi galá machí.
\v 4 Echalí nijeni ne bichíwali tólati echo'ná ripá riwigachi mapo'nani galá námali wikabé namuti mapu echi auché jaré jena'í wichimóbachi piréami pagótami ketasi cho machí. A'lí tarapé risensia ju mapu nijeni echirigá ruyema aboni.
\v 5 Siné káachi nijeni omérama nóchami níliya mapujiti Riosi echirigá tamí olírali. Chopi nijeni tarapé nóchami níima echi jaré namuti jiti mapu nijé binói olali. A'lí a nijeni nóchami níisagá, chópini echirigá níimani mapujiti Riosi ma tamí machírali mapurigá nijé binói tarapé jiwérami ju.
\v 6 A'lí a nijeni arigá nakisáagá ra'ichánala jeanigá mapu nijé binói ne wabé galabé oláami ju, echalí nijeni chopi bichíwaga ra'íchami níima, mapujiti nijeni ne bichíwali galabé oláami ju. Chopi nijeni ke siné ra'icha jeanigá mapu nijé binói galabé oláami ju, mapurigá ke wesi mayema mapu nijé waminabi galabé oláami ju, ketasi mapurigá aboni ritiwá mapu nijeni galabé olá, ayénachó mapurigá ke wesi mayema mapu nijé waminabi galabé ra'íchami ju ketasi chopi mapurigá aboni kipugú tamí galabé ra'íchaga aníachi.
\p
\v 7 A'lí Riosi ne bichíwali echirigá tamí riwírali echi jaré ne wabé simírami galabéala namuti, chopi mapurigá nijeni ketasi echijiti ne wabé nóchami níima, Riosi ariweli mapurigá echi Satanasi riwéami riablo tamí ne wabé risúu olama. Echalí nijeni ne wabé okoli, mapurigá bilé rijói ne wabé okolá mapalí bilé wi'lí so'uwá jiti so'wí.
\v 8 A'lí baisá chokéami nijeni wabé tánali echi Walubela Jesucristo mapurigá tamí 'yema echi okolíwami.
\v 9 Echalí echi Walubela Jesucristo tamí ku nijéwaga jeaneli: Nijeni mi ne wabé simírami galé. Echi chopi sébali ju. A'lí ketasi arigá 'wérali ju mapu Nijeni mi waminá 'yema echi okolíwami, mapujiti mapalí mujemi ketasi jiwérami ju, echalí mujemi waminabi galá machí mapu Nijé Binói ne wabé omérami ju. Echijiti nijé, Pablo, ne wabé kaníili. Nijé binói we nóchami ju mapujiti nijeni tarapé jiwérami ju, mapurigá echi Walubela Jesucristo we omériga olama pachana tamí yuwa.
\v 10 Echijiti nijeni sinibí echirigá kanila mapalini ketasi jiwérami ju, ayénachó mapalí auché jaré pagótami tamí wabé sitila ané, ayénachó mapalini ne wabé newaléami ju. Ayénachó nijeni arigá kanili mapalini a'najátarami ju, ayénachó mapalini risúu olárami ju mapujítini bichíi Jesucristo niráa. A'lí bicheni echirigá kanila mapujiti mapalini tarapé jiwera, echalí echi Walubela Jesucristo tamí waminabi jiwérataga olá.
\s Echi Pablo sinibí 'nátali echi jaré napawika bichíyami jiti echo'ná Koríntochi piréami
\p
\v 11 Nijeni mapurigá ke newalite niráa níili, mapalini echirigá we nóchaga ra'íchali nijé binói chopi jiti rugá. Echalí arigá 'wérali níili mapurigani echirigá nóchaga ra'icháma mapujiti 'yémitamo ketasi nakili tamí nijéwanala. Galá níima 'yemi 'nalítamo galá ra'ichása tamí jiti rugá, mapujiti nijeni tarapé tabéala niráa ju echi auché jaré yuwa mapu 'yémitamo o'wéala nawésami ané, arigani tarapebi yiri níisagá, mapurigá 'yémitamo tamí ané.
\v 12 Chabénala mapalí nijeni wabé kaligá nóchali echo'ná 'yémichi, echalí 'yémitamo galá machíratami níili mapu nijeni ne bichíwali Riosi jiti julárami níili, mapujiti Riosi tamí omératali mapurigani wikabé galabéala karúmati, chibi yirítere olama mapurigá ke wesi auché jaré pagótami omérali olayá.
\v 13 A'lí nijeni ke siné 'yemi mi ke 'me nirali, chópini sinibí mayeli mapu 'yémitamo chopi a yiri jútamo echi auché jaréana piréami napawika bichíyami yuwa. A'lí nijeni ke siné risensia 'yali mapurigá 'yémitamo tamí 'yabo wenomí. Siné káachi galá níimi nijeni 'yemi mi bujesa wenomí, mapujiti echi auché jaréana piréami napawika bichíyami sinibí tamí 'yali wenomí mapalini newaléami níili. ¡Tamí ku wikawasi mapujítini ketasi nareli 'yemi níwala, nijírami niráa, achigórigá mapurigani nareli echi auché jaréana piréami ritémtami níwala!
\p
\v 14 Jipi nijeni galá kariwé mapurigani auchecho siné baisáala simea echo'ná 'yemi 'némiya. A'lí nijeni ketasi biyiri 'yemi mi bujema, mapujiti ketásini nakí echi jaré 'yemi níwala namuti, chópini nakí mapurigá 'yémitamo galá galebo Riosi, mapujiti ketasi arigá 'wérali ju mapu echi jaré kúcharami napabuma wenomí echi jaré aboni 'wénawala 'yábiya, chopi 'wérali ju mapu echi jaré 'wéntami 'nalí napabuma, aboni kúchuwala 'yábiya. A'lí 'yémitamo mapurigá nijé kúchuwala niráa ju.
\v 15 Echijiti nijeni wabé kaníliga suwábama nijé níwala namuti 'yemi mi ku'wíriya. Ayénachóni ne wabé kaníliga nochama mapuyénasíni mukumea mapurigá 'yémitamo galá bichíibo Jesucristo niráa, mapurigá 'yemi aliwala ku pirélama Riosi yuwa sinibí niráa. Chópini mayé mapalí nijeni 'yemi mi waminabi galé, echalí 'yémitamo ke 'me tamí galé.
\p
\v 16 'Yémitamo galá machí mapu nijeni ketasi nareli 'yemi níwala wenomí nijíwami, chopi jaré 'yemi arigá mayé mapu nijeni 'yékaka olali mapurigá 'yémitamo bichíibo nijé nawésawala.
\v 17 Nijeni ketasi echirigá 'yékaka olali, nibilé cho 'yemi mi 'yékali echi auché jaré mapu nijeni júuli echo'ná 'yémichi.
\v 18 A'lí nijeni jeaneli echi Tito mapu binói echo'ná 'yémichi simea, ayénachó binói yuwa júulini echi auché bilé rijimala. ¿Acha 'yemi mi 'yékali echi Tito? Nijeni mayé mapu binói sinibí achigórigá olali mapurigá nijeni olá. ¿Kecha bichíwali ju mapu tamujé sinibí a'nawí chópirigá ologá 'yénali?
\p
\v 19 Siné káachi 'yémitamo mayé iré omá mapu nijeni wepi je'ná jerigá aní niyúramiya, chopi ketasi echirigá ju. Nijeni we bichíwaga ra'icha bacháami Riosi yuwa, mapurigá Jesucristo bichíyami niráa. A'lí suwaba mapu ikí nijeni aní, echirigani aní mapurigá 'yémitamo waminabi bichíisabo, mapujítitamo nijé ritémawala niráa ju mápuni ne wabé galé.
\v 20 A'lí nijeni we majá mapurigá siné káachi nijeni 'yemi mi riwiméaré ketasi galabé oláami niráa, mapurigá nijeni nakí máputamo chopi galabé oláami níibo mapalí nijeni nawá echo'ná 'yémichi. Ayénachóni majá mapurigá siné káachi 'yémitamo tamí riwiboa yóami niráa, mapujiti arigá 'wérali ju mapurigá nijeni yónama echi jaré 'yemi mapu chati sitíi olako. Echirigá nijeni wabé majá mapurigá siné káachi nijeni 'yemi mi riwimea we chuwé nakówami niráa, we korúkami keremá, wabé chati sitíi na'áwami keremá, aboni o'wéala niráa nílanalami keremá, chati sití ra'íchaga ruyéami keremá, chiná sayéraga ra'íchami keremá, we nóchami keremá, we chati sitíi chuwé oláami keremá.
\v 21 Ke 'me ayó nijeni echo'ná nawama 'yemi mi 'némiya, chopi nijeni we majawá mapurigá echi Walubela Nijé Riósawala tamí riwélatama 'yemi jiti, ayénachó mapurigá echirigá 'wérali níima mapu nijeni we nalama wikabé 'yemi jiti, si'néami 'yemi mapu ikítamo chabé jonsa wabé chati sitíi olali, chópitamo abijí ketasi cho ariweli echirigá mapurigátamo wabé chati sitíi olali, mapujiti jaré wabé simírami chati sitíi olali, ayénachó jaré chuwé bilétari yuwa kochili, ayénachó jaré wabé simírami chati sitíi chuwé olali.
\c 13
\s Pablo galá nulé echo'ná Koríntochi piréami mapu aboni galabé olama, ayénachó Pablo ripora aboni
\p
\v 1 Jipi ma baisáala ju mapu nijeni echo'ná 'yemi mi 'némiya simea. Jípini justicia olama. A'lí suwaba namuti ra'íchali chopi galá katiwárami níima mapalí okuá testigo chópirigá anisá, bakiyá keremá.
\v 2 Chabénala mapalini osáala niráa iyénali, echalí nijeni aneli mapu echi jaré chati sitíi oláami arigá justicia olírami níima. Jipi mapalini mikabé atí, nijeni auchecho siné echirigá ané echi jaré chati sitíi oláami. Ayénachóni jerigá ané ne si'néami 'yemi: Mapalini auchecho siné nawama echo'ná 'yemi mi 'némiya, echalí nijeni ne bichíwali ne galá wachínaga olama justicia. Ayénachóni arigá kastigo 'yama echi jaré mapu ikí chati sitíi olali.
\v 3 Echalítamo ne bichíwali machiboa mapu nijeni chopi ra'icha mapurigá Jesucristo tamí nulé ra'ichánala. A'lí echi Walubela Jesucristo sinibí wabé omériga olá mapalí Binói 'yemi mi ku'wíra. Binói sinibí wabé omériga 'yemi mi olíima justicia.
\v 4 Bichíwali ju mapu echi Walubela Jesucristo arigá clavo jiti michóntami níili echo'ná kúrsichi mapurigá tarapé jiwérami niráa, chopi jipi rawé Jesucristo sinibí ku bité, Riosi jiwérawala jiti. A'lí jipi rawé nijeni ayénachó tarapé jiwérami niráa ju mapurigá Binói tarapé jiwérami níili, chópini bukulíwami niráa ku bité Binói yuwa, Riosi jiwérawala jiti, mapurigani 'yemi mi ku'wírama.
\p
\v 5 'Yemi aboni galá machisí áchatamo ne bichíwali galá bichíyami ju Jesucristo niráa. 'Yemi aboni niráa ne galá machigá 'natasi: ¿Áchatamo galá bichíyami ju? ¿Kéchatamo machí mapu Jesucristo echo'ná pachana 'yemi yuwa áti? A ketasi pachana 'yemi yuwa asisáagá, 'yémitamo ketasi ne bichíwali galá bichíyami ju.
\v 6 A'lí nijeni mayé mapu átamo echirigá 'natásagá, echalítamo galá machiboa mapu nijeni ayénachó ne galá bichíyami ju Jesucristo niráa.
\v 7 A'lí nijeni Riosi yuwa ra'íchaga tánama mapu 'yémitamo tarapebi yiri chati sitíi olabo. Chópini ketasi echirigá tánama chopi mapurigá anirúami níimi mapu nijé binói galabé olali, Riosi nóchala olayá. Nijeni chopi echirigá tánama Riosi mapurigá 'yémitamo ne bichíwali galabé oláami níibo. ¡Ke chiré nijeni ketasi galá nóchami anérami níisagá!
\v 8 Mapujiti nijeni tarapebi yiri omero, echi ne bichíwali Riosi Ra'íchala sayéraga olayá. Chópini ayena galá omero olayá mapurigá echi ne bichíwali Riosi Ra'íchala galá machirúami níima.
\v 9 Echijítini we kaníla mapalí ketasi 'wérali ju mapu nijeni 'yemi mi oyérama. Nijeni chopi nakí mapu 'yémitamo waminabi galá bichíyami níibo Jesucristo niráa, ayénachóni tani Riosi mapu 'yémitamo ne sébali galabé oláami níibo.
\v 10 Jípini bachá niráa 'yemi mi je'ná jerigá osé, mapalini ketasi cho echo'ná simea 'yemi mi 'némiya, mapurigá mapalini echo'ná 'yemi yuwa nawama, echalí ketasi arigá 'wérali níima mapurigá nijeni 'yemi mi oyérama. Mapujiti echi Walubela Jesucristo tamí nuleli mapurigani 'yemi mi waminabi bichíiratama, chopi ketasi tamí nuleli mapurigani chopi 'yemi mi wabé oyéraga majajárama, mapujiti echi Walubela Jesucristo chopi nakí mapurigátamo waminabi galá bichíyami níibo.
\p
\v 11 Jipi 'yemi keni ritémawa, nijeni nakí máputamo wabé kanílabo. Sinibí waminabi galabé oláami nílasi. Ke siné o'monási. Si'néami chopi a yiri 'nátaga pirélasi. Ketasi nakosi a'nagupi. Echalí echi Walubela Riosi mapu tamujé tamí 'ya máputa wabé galéami níibo, máputa sinibí a'nagupi kaligá chópirigá 'natabo, echi Walubela Riosi sinibí 'yemi mi yuwa asimea.
\v 12 A'nagupi ne wabé galigá naripasi.
\v 13 Ne si'néami echi jaré galá bichíyami ritémtami jena'í piréami galá ripóraga náwalasi.
\p
\v 14 Nijeni ne wabé nakí mapu echi Walubela Jesucristo 'yemi mi waminabi ku'wírama, ayénachó mapu Riosi Onorúami 'yemi mi waminabi galema, ayénachó mapu si'néami 'yémitamo a'nagupi waminabi ganílatabo, mapujítitamo níwa echi Wabé Galabé Riosi Iwigala. ¡Echirigá níima!