\id gal
\h Gálatas
\mt Osirúami
\mt2 mapurigá San Pablo oseli echo'ná
\mt2 GALÁSIACHI PIRÉAMI
\c 1
\s Pablo osé echo'ná Kalásiachi piréami napawika bichíyami
\p
\v 1 Nijé ju Pablo. Riosi tamí nawésanala júuli. Ke wesi pagótami tamí echirigá júuli. Nibilé wesi rijói tamí wilali nawésami niráa. Chopi Jesucristo Binói tamí nawesánala júuli. A'lí Riosi Onorúami achigórigá tamí júuli. A'lí echi Onorúami níili mapu ku owíntali echi Walubela Jesucristo mapalí Binói ma mukúami níili.
\v 2 Nijé 'yemi nimí je'ná jerigá osé. A'lí si'néami echi jaré ritémtami tamí yuwa muchúwami ayénachó 'yemi mi ripora, 'yemi echo'ná Kalásiachi anilíwachi kawírali piréami, si'néami mapu ikítamo napawika bichíyami ju.
\v 3 Ne wabeni nakí mapurigá Riosi Onorúami, ayénachó echi Walubela Jesucristo, anawika 'yemi mi wabé ku'wírama mapurigátamo ne galá kilí 'nátaga ologá pirélabo.
\v 4 A'lí echi Walubela Jesucristo a Binói niráa nijali mapurigá Binói mi'lirúami níima. A'lí je'ná jerigá olali mapurigá Binói galá omérama ku wikáwiya tamujé chati olalila, ayénachó mapurigá Binói omérama tamujé tamí ku'wíriya mapuyénasíta piré jena'í wichimóbachi, mapo'ná auché jaré pagótami sinibí wabé chati oláami ju. A'lí echi Walubela Jesucristo suwaba echirigá olali achigórigá mapurigá echi Onorúami, tamujé Riósawala nakili.
\v 5 ¡Sinibí ne wabé walubélaga anérami nílaka Riosi! ¡Echirigá níima!
\s Ketasi nirú auché bilé si'nú nawésala echi pagótami ku'wíriami
\p
\v 6 Nijeni ne wabé cha níraga 'nata mapujiti 'yémitamo ma we yáati ariwénali Riosi bichiya. A'lí Riosi bukulí 'yemi mi bayeli mapujiti Jesucristo 'yemi mi ne wabé galé. Chopi jípitamo nakí máputamo si'nú nawésala bichíibo, mayega mapurigátamo siné káachi echijiti ku'wíratami níibo.
\v 7 Chopi tarapé nilú auché bilé si'nú nawésami 'yemi mi ku'wíriami. Jipi auché jaré pagótami 'yemi mi wabé kumé. Abóniko ketasi binera echi Galabé Riosi Ra'íchala, mapujiti aboni ketasi 'yemi mi ruyé mapurigá echi Walubela Jesucristo wabé omérami ju 'yemi mi ku'wíriya.
\v 8 Chopi tamujé ma 'yemi mi binérali mapurigá Jesucristo bilepi ju tamujé tamí Ku'wíriami. Jipi a auché jaré siné káachi 'yemi mi auché si'winárigá nawésasagá, galá níima sinibí niráa kastigo 'yárami níisa echirigá nawésami, mapujiti aboni ketasi nawésami ju echi ne Bichíwali. Ayena siné káachi a tamujé aboni 'yemi mi auché si'winárigá nawésasagá, galá níima tamujé aboni arigá sinibí niráa walú kastigo 'yárami níisa. A'lí a bilé walula Riosi kapitánawala ripá riwigachi jonsa simíami, siné káachi 'yemi mi auché si'winárigá nawésasagá, ayénachó galá níima échiko sinibí niráa walú kastigo 'yárami níisa.
\v 9 Mani 'yemi mi bachá niráa jerigá aneli. A'lí jípini auchecho siné 'yemi mi achigórigá jeané: Jipi a bilé rijói siné káachi 'yemi mi sayéraga nawésasagá mapurigátamo ma bichíili, galá níima sinibí niráa kastigo 'yárami níisa echirigá nawésami, mapujiti échiko ketasi nawesa jeanigá mapu Jesucristo bilepi ju 'yemi mi ku'wíriami.
\p
\v 10 A'lí mapalini je'ná jerigá aní, nijeni ketasi chopi jerigá aní mapurigá echi jaré pagótami tamí galá nilama, chópini jerigá aní mapurigá Riosi Binói tamí galá nilama. Nijeni ketasi chopi nakí kanílatanala echi jaré pagótami, mapujiti ani chopi kanílatasagá echi jaré pagótami, echalí nijeni ma ketasi mapurigá Jesucristo piónawala niráa níima.
\s Echi Pablo rugá osá mapu churigá binói Riosi jiti julárami níili nawésanala
\p
\v 11 Chopi 'yemi ritémtami ne galá machisí je'ná jeyiri: Mapalí nijeni 'yemi mi nawesa jeanigá mapu Jesucristo bilepi ju tamujé tamí Ku'wíriami, echirigá nawésala ketasi chopi jaré pagótami 'nátala ju.
\v 12 Mapujiti ke wesi pagótami tamí 'yali mapurigani echirigá nawésama. Nibilé wesi pagótami tamí echirigá binérali. Chopi echi Walubela Jesucristo Binói echirigá tamí machírali.
\p
\v 13 'Yémitamo ma galá námaliré mapu churigá nijeni olali chabéanokuá mapalini chopi bichíili mapurigá echi auché jaré Juríosi pagótami bichíi. Ayénachótamo ma galá machí mapurigani ne wabé yóniga a'najátali echi jaré Riosi níwala napawika bichíyami pagótami. Echalini suwaba suwábanali aboni.
\v 14 A'lí echalí mapalini abijí bichíili mapurigá echi jaré Juríosi pagótami bichíi, echalini ne wabé simírami machíami níili echirigá amachiya mapurigá aboni olá. Chopi auché jaré nijé pagótamawala, achigó yiri mapurgá nijé, ketasi echirigá simírami machíami níili. Ayénachó nijeni wabé simírami níliami níili mapurigani waminabi bichíima mapurigá echi jaré ki'yá piréami nijé pagótamawala bichíili, ayénachó mapurigani karúmati olama mapurigá aboni sinibí olali.
\v 15 Chopi echi Walubela Riosi chabé ki'yá tamí galá machigá chapili, mapalí nijeni ke cho ranarúami níili. A'lí Binói ne wabé galigá tamí bayeli mapurigani galá bichíima. A'lí mapalí Binói echirigá nakili,
\v 16 echalí Riosi tamí galá machírali mapurigani galá machimea echi bilepi Riosi Ranala, mapurigá nijeni galá omérama nawésiya echi auché jaré isena pagótami mapu ketasi Juríosi ju, jeanigá mapurigá echi bilepi Riosi Ranala ku wikáwami ju mapurigá echi pagótami chati sitíi olá. Chopi mapalí je'ná jerigá ikili, echalí nijeni ketasi rukuésiya simili echi auché jaré pagótami yuwa.
\v 17 Nibilé cho simílini echo'ná ripáami Jerusalémachi anilíwachi walúlachi mapurigá nijeni 'nema echi auché jaré o'wéala mapu Riosi bachá niráa júuli nawésanala, nibilé cho mapurigani rukuema aboni jaré namuti. Chopi nijeni we yáati simili echo'ná auché biléana waná kawichí, Arábiachi anilíwachi. A'lí pe wakinánokuá nijeni auchecho siné ku nawali echo'ná Ramáskochi.
\p
\v 18 Echalí nijeni ketasi we yáati simili echo'ná Jerusalémachi. Chopi ma simírasa baikiyá bamíbali, echalí nijeni echo'ná simili. Echalí jonsa nijeni machili echi Pegro. A'lí bicheni chopi makói miná malí rawé asali binói yuwa.
\v 19 Echalini ayénachó riwali echi Jakobo, echi mapu pe rijimala níili echi Walubela Jesusi. Chópini ketasi wesi riwali echi auché jaré o'wéala mapu Riosi nawésanala júuli.
\v 20 Nijeni 'yemi mi ne bichíwaga ané mapu ne bichíwali ju mapurigá nijeni 'yemi mi osé. A'lí Riosi Binói galá machí mapu nijeni 'yemi mi ne bichíwaga ané.
\p
\v 21 Echalí jonsa pe wakinánokuá nijeni simili echo'ná Síriachi anilíwachi kawírali, echo'ná Silísiachi anilíwachi kawírali ayénachó.
\v 22 Echalí echi auché jaré echo'ná Juréachi anilíwachi kawírali piréami mapu ikí napawika bichíyami níili Jesucristo niráa, ke wesi cho tamí machili.
\v 23 Echalí aboni chopi námali je'ná jerigá ra'icháluachi: Echi rijói mapu chabénala tamujé tamí ne wabé a'najátaga kichili, échiko jipi we nawesa iyena echi galabé Jesucristo Ra'íchala. Chopi chabénala binói wabé kichiga suwábanali si'néami mapu ikí je'ná jerigá bichíili.
\v 24 A'lí aboni chopi waminabi walubéraga aneli Riosi, mapujiti nijeni ma galá bichíyami níili Jesucristo niráa.
\c 2
\s Echi auché jaré o'wéala mapu Riosi bachá niráa júuli nawésanala, ma galá nareli echi Pablo
\p
\v 1 A'lí wakinánokuá ma sebárasa makói miná naó bamíbali, echalini auchecho siné simili echo'ná Jerusalémachi echi Benabé yuwa. Echalini echi Tito ayénachó bayérali.
\v 2 Echalini chopi echo'ná simili mapujiti Riosi Binói tamí machírali mapurigani echo'ná simea. A'lí nijeni pe waná rojuánaga nawésali echi jaré mapu o'wéala níili echi auché jaré napawika bichíyami yuwa. Nijeni ne galá irétaga nawésali echi Galabé Riosi Ra'íchala achigórigá mapurigá nijeni sinibí nawésaga ruyé echi auché jaré isena pagótami mapu ketasi Juríosi ju. A'lí bicheni echirigá olali mapujiti nijeni ketasi nakili mapurigá nijé nawésala waminá sití anérami níima.
\v 3 A'lí echi Tito mapu tamí yuwa iyénali ketasi Juríosi pagótami níili. Chopi echi jaré napawika bichíyami Juríosi pagótami o'wéala arigá ketasi nuleli mapurigá echi Tito noligá sikirétami níima mapurigá echi jaré Juríosi pagótami sinibí olá.
\v 4 Chopi jaré 'yékami rijói arigá nakili mapurigá echi Tito noligá sikirétami níima. A'lí echi jaré aboni ketasi ne bichíwali galá bichíyami ritémtami níili. Aboni chopi wabé 'yékaka niráa mo'wili tamujé bichíyami yuwa mapujiti aboni machináali mapu churigá tamujé risensia níwa mapurigata ma ketasi nijéwaga olabo mapurigá echi auché jaré Juríosi pagótami sinibí olá, mapujiti tamujeta ma galá bichíili echi Walubela Jesucristo niráa. A'lí aboni chopi we nakili mapurigata auchecho siné nulérami níibo echi wikabé namuti nijéwaga olánala.
\v 5 Chopi tamujeta ketásirapé risensia 'yali mapurigá echi jaré aboni nuláma echirigá noligá sikirénala echi Tito. Tamujeta chopi nakili mapurigá 'yémitamo waminabi nawésarami níibo echi wabé Galabé Riosi Ra'íchala jeanigá mapurigátamo galá ku wikawárami níibo, átamo chopi galá bichíisagá echi Walubela Jesucristo niráa.
\p
\v 6 Chopi echi jaré o'wéala napawika bichíyami echo'ná Jerusalémachi piréami ketasi tamí bukulíwami ku ruyeli mapurigani si'winárigá nawésama. Abóniko ne bichíwali o'wéala níili echo'ná piréami napawika bichíyami yuwa, chopi nijeni arigá ketasi 'me nirali aboni, mapujiti Riosi Binói ketasi galabé nirá bilé rijói chopi mapujiti echi rijói walula ju echi jaré pagótami yuwa.
\v 7 Echalí echi jaré o'wéala ketasi tamí bukulíwami ruyeli mapurigani si'winárigá nawésama echi pagótami, chopi aboni galá machili mapurigá Riosi tamí nuleli mapu nijeni nawésama echi jaré isena pagótami echi Galabé Riosi Ra'íchala achigórigá mapurigá chabé chokichí Riosi nuleli echi Pegro mapurigá binói nawésama echi jaré Juríosi pagótami.
\v 8 Mapujiti echi Walubela Riosi echirigá júuli echi Pegro mapurigá binói nawésama echi jaré Juríosi pagótami. A'lí echi Binói Riosi ayénachó achigórigá tamí júuli mapurigá nijeni nawésama echi auché jaré isena pagótami.
\p
\v 9 Echijiti echi Jakobo, echi Pegro ayénachó, echi Juani asíchiko, si'néamika galá machili mapurigá Riosi wabé galigá tamí wilali mapurigá nijeni nawésama echi auché jaré isena pagótami. A'lí mapujiti aboni o'wéala niráa níili echi auché jaré napawika bichíyami yuwa, aboni ne wabé galigá tamujé tamí narépali mapurigá aboni ritémawala niráa. Echalí aboni tamí echirigá narépali, echi Benabé ayénachó. A'lí aboni anili mapu galá níima mapurigá tamujé nawésabo echi auché jaré isena pagótami, chopi aboni anili mapurigá aboni nawésama echi jaré Juríosi pagótami.
\v 10 Chopi aboni ayénachó tamujé tamí tánali mapurigata sinibí galá natimapo echi jaré wabé tisúwati pagótami. A'lí nijeni sinibí echirigá, achigórigá nakili olánala.
\s Echi Pablo oyérali echi Pegro echo'ná Antiokíachi
\p
\v 11 Chopi pe waminánomí mapalí nijeni simili echo'ná Antiokíachi anilíwachi, echalí echi Pegro ayénachó echo'ná nawali. Echalí nijeni pe oyéraga aneli mapurigá binói ketasi galabé ologá iyénali.
\v 12 Mapujiti chabénala niráa echi Pegro sinibí kaníliga ko'wali echi jaré isena pagótami yuwa echo'ná Antiokíachi piréami. Chopi pe kinánala mapalí jaré Juríosi pagótami echo'ná sili, mapu echi Jakobo jiti julárami níili echo'ná Jerusalémachi jonsa, echalí echi Pegro waminá waná simigá, ma ketasi nakili mapu ko'mea echi jaré isena pagótami yuwa, mapujiti binói we majali echi jaré Juríosi jiti, mapujiti echi jaré Juríosi pagótami sinibí anili mapu ketasi risensia níili mapurigá aboni napawika ko'mea echi auché jaré isena pagótami yuwa.
\v 13 Echalí ne si'néami echi jaré Juríosi pagótami echo'ná piréami mapu ikí bichíyami níili Jesucristo niráa ayénachó achigórigá 'yékaka olánali mapurigá echi Pegro olali. A'lí echi Benabé ayénachó echirigá olali.
\v 14 A'lí mapalí nijeni riwali mapu aboni ketasi ne galá wachínaga 'yénali mapurigá echi ne bichíwali Galabé Riosi Ra'íchala tamujé tamí binera, echalí echo'ná bacháami si'néami pagótamichi, nijeni wiriska jeaneli echi Pegro: Mujé binói Juríosi ju, chópimi sinibí ologá bité mapurigá echi auché jaré isena pagótami niráa. A'lí mujemi ketasi ologá bité mapurigá echi jaré Juríosi niráa. ¿Churékula bichemi arigá we nulé echi jaré isena pagótami mapurigá aboni wikabé namuti ologá pirélama achigórigá mapurigá echi auché jaré Juríosi pagótami sinibí ologá piré?
\p
\v 15 A'lí tamujé Juríosi mapu jónsata ochérali Juríosi pagótami níili. Ayénachó tamujé Juríosi sinibí aní mapurigá tamujeta ketasi chati sitíi oláami ju, chópita we chati sitíi oláami niráa ané echi auché jaré isena pagótami.
\v 16 Jipi tamujeta galá machí mapu ke wesi pagótami galá narétami níima Riosi jiti chopi mapujiti aboni galá nijéwaga olá mapurigá echi Moisesi nulali. Galata machí mapu Riosi chopi naré echi jaré mapu ikí galá bichíi Jesucristo niráa. Echijiti tamujeta ayénachó ma galá bichíili Jesucristo niráa, mapurigata echijiti galá narétami níibo. Chópita ketasi mayé mapurigata narétami níibo mapujítita siné káachi ne suwaba galá nijéwaga olásate mapurigá Moisesi osogá nulali. Mapujiti Riosi ke wesi naré chopi mapujiti aboni galá nijéwaga olá mapurigá echi Moisesi osogá nulali.
\p
\v 17 A'lí tamujeta ayénachó nakí mapu Riosi tamujé tamí narema mapujítita ma galá bichíili Jesucristo niráa. Echijítita ma ketasi wikabé namuti nijéwaga olá mapurigá echi Moisesi osogá nulali. A'lí echi auché jaré Juríosi pagótami echijiti tamujé tamí wabé chati sitíi oláami ané. ¿Acha bichíwali ju mapu echi Walubela Jesucristo echirigá tamujé tamí niwá wabé chati sitíi oláami niráa, mapurigá echi auché jaré Juríosi pagótami aní? ¡Ketasi chirigá ju!
\v 18 Chopi áni auchecho nakisáagá mapurigani nijéwaga olama suwaba mapurigá Moisesi osogá nulali, mapurigani echijiti narétami níima Riosi jiti, echalini chopi riwirúami níima mapurigá ke nijéwami niráa mapurigá echi Moisesi osogá nulali.
\v 19 Mapujiti nijeni ma ketasi wikabé namuti nijéwaga olá mapurigani echijiti narétami níima Riosi jiti. Echijiti nijeni mapurigá mukúami niráa ju echi nulalíwami jiti, mapujítini ketasi omérali olayá suwaba mapurigá Moisesi osogá nulali. Chopi jipi nijeni ologá bité mapurigá Riosi nakí.
\v 20 A'lí nijeni ma mukúami niráa ju achigórigá mapurigá echi Walubela Jesucristo mukúami níili mapalí Binói michóntarami níili echo'ná kúrsichi. Mani ketasi bité nijé binói niráa, chopi echi Walubela Jesucristo jipi tamí yuwa pachana bité. A'lí mapurigani arigá bité, rijói niráa, echirigani chopi bité mapujítini galá bichíili echi Walubela Riosi Ranala, mapujiti echi Walubela Jesucristo a Binói niráa nijali mapurigá mi'lirúami níima nijé chati sitíi olalila jiti, mapujiti Binói tamí wabé galeli.
\v 21 Nijeni sinibí we nakí bichíinala echi Walubela Riosi, mapujiti Riosi chopi ne wabé galabé ju. Ketasi bichíwali ju mapu Riosi naré echi pagótami chopi mapujiti aboni ne suwaba galá nijéwaga olá mapurigá echi walula Moisesi osogá nulali. Mapujiti a Riosi ne bichíwali echirigá narésagá echi pagótami, echalí nijeni mayemi mapu echi Walubela Jesucristo tarapebi yiri jiti mukuli, chopi Binói ne bichíwali mukuli tamujé chati sitíi olalila jiti, mapurigata galá bichíiga ku wikawárami níima.
\c 3
\s Echi pagótami galá ku wikawárami níima mapalí aboni galá bichíi. Chopi aboni ketasi ku wikawárami níima mapalí aboni chopi galá nijéwaga olá mapurigá Moisesi nulali
\p
\v 1 ¡'Yemi echo'ná Kalásiachi piréami ritémtami mapurigá ke newalite niráa jútamo! ¿Chigá 'yemi mi 'yékali mapurigátamo ma ketasi bichíibo echi ne bichíwami Riosi Ra'íchala nawésawala? Chabé jonsa tamujeta 'yemi mi ne galá machíami niráa nawésali jeanigá mapu echi Walubela Jesucristo echo'ná kúrsichi michóniga mi'lirúami níili mapujiti tamujé aboni ne wabé chati sitíi oláami níili.
\v 2 Je'ná chopi tamí ku nijéwaga ruyesi 'yemi: ¿Áchatamo nareli echi Wabé Galabé Riosi Iwigala echo'ná pachana 'yemi sulálachi niráa chopi mapujítitamo we galá olali mapurigá echi walula Moisesi osogá nulali? Nijeni galá machí máputamo nareli chopi mapujítitamo galá bichíili mapurigá tamujeta 'yemi mi nawésali, jeanigá mapu echi Walubela Jesucristo echo'ná kúrsichi michóniga mi'lirúami níili tamujé chati sitíi olalila jiti.
\v 3 ¡'Yémitamo abijí mapurigá ke newalite niráa ju! Chabénala 'yémitamo chótali bichiya mapujítitamo nareli echi Wabé Galabé Riosi Iwigala echo'ná pachana 'yemi sulálachi niráa. Jipi, ¿áchatamo mayé máputamo ne sébali galá bichíyami níibo chopi mapujítitamo galá nijéwaga olama mapurigá Moisesi osogá nulali?
\v 4 ¡Nijeni mayé mapu 'yémitamo tarapé biyiri bineli chabénala mapalí echi auché jaré 'yemi pagótamawala 'yemi mi wabé chati sitíi risúu ologá a'najátali, mapujítitamo bichíili Jesucristo niráa! ¡Ne galá níimili, a péebi binésagátamo!
\v 5 Mapalí Riosi 'yemi mi 'yali Binói Wabé Galabé Iwigala, ayénachó mapalí Riosi wabé omériga olá echo'ná 'yémichi, mapurigá ke wesi pagótami omero olayá ¿churékula echirigá olá? Ne bichíwali ju mapu Riosi ketasi echirigá olá chopi mapujiti 'yémitamo suwaba galá nijéwaga olá mapurigá Moisesi osogá nulali. Riosi echirigá olá mapujítitamo ma galá bichíili mapurigátamo nawésarami níili echi Galabé Riosi Ra'íchala.
\p
\v 6 Echi ki'yá bitéami Abrami galá bichíili Riosi, echijiti Riosi galá nareli echi Abrami mapurigá bilé Binói ranala niráa.
\v 7 Echijiti 'yemi Juríosi pagótami galá machisí je'ná jeyiri: Echi jaré pagótami mapu ikí galá bichíiko Jesucristo niráa, abóniko mapurigá echi ne bichíwali Abrami kúchala kúchuwala niráa ju, mapujiti aboni galá bichíi achigórigá mapurigá echi Abrami bichíili.
\v 8 Echo'ná Riosi Ra'íchala oselíwalachi ne bachá niráa osirúami níili mapurigá Riosi narema riwéali echi jaré isena pagótami mapalí aboni galá bichíima Riosi niráa. Echijiti Riosi bachá niráa ruyeli echi Abrami je'ná galabé ra'íchali mapalí jeaneli: Ne si'néami echi jaré isena pagótami mapu ikí tamí bichíima galá ku'wíratami níima mapujiti mujemi bachá niráa tamí bichíili.
\v 9 Echirigá ne bichíwali ju mapu echi jaré pagótami mapu ikí galá bichíiko Riosi, si'néami ma galá ku'wíratami ju achigórigá mapurigá echi ki'yá bitéami Abrami ku'wíratami níili mapalí binói galá bichíili Riosi.
\p
\v 10 Si'winárigá ne si'néami echi jaré pagótami mapu ikí nakiko mapu Riosi narema aboni, mapujiti aboni galá nijéwaga olako mapurigá echi Moisesi osogá nulali, abóniko arigá ketasi echirigá narétami níima, chopi aboni walú kastigo 'yárami níima. Mapujiti ke wesi pagótami galá omérali ne sébali galá nijéwaga olayá mapurigá echirigá nulárami níili. Mapujiti echo'ná Riosi nulalila oselíwalachi je'ná jerigá osirúami ju: Ne si'néami echi jaré pagótami mapu ikí ketasi ne sébali nijéwaga olako mapurigá osirúami ju echo'ná Riosi nulalila oselíwalachi, abóniko chopi walú kastigo 'yárami níima.
\v 11 Echijiti ne bichíwali ju mapu Riosi ke wesi naré, chopi mapujiti aboni galá nijéwaga olako mapurigá echi Moisesi osogá nulali. Mapujiti echo'ná Riosi Ra'íchala oselíwalachi je'ná jerigá osirúami ju: Riosi chopi naré echi jaré mapu ikí galá bichíiko Binói Riosi. A'lí aboni sinibí piréami níima.
\v 12 A'lí si'néami echi jaré pagótami mapu ikí chopi nakiko mapurigá Riosi narema aboni mapujiti aboni galá nijéwaga olánali mapurigá Moisesi osogá nulali, abóniko arigá ketasi galá bichíi Riosi. Mapujiti echo'ná Riosi nulalila oselíwalachi je'ná jerigá osirúami ju, mapurigá echi Moisesi osogá nulali: Chopi mapalí echi pagótami ne suwaba galá nijéwaga olako mapurigá aboni nulérami ju, echalí aboni echijiti sinibí pirélama.
\p
\v 13 Chopi Jesucristo tamujé tamí ku'wírali mapurigata ma ketasi chati sitíi oláami anérami níibo mapujítita ketasi sébali galá nijéwaga olali mapurigá Moisesi osogá nulali. Mapujiti Jesucristo Binói wabé chati sitíi oláami anérami níili mapalí Binói michóntami níili echo'ná kúrsichi, ne si'néami tamujé chati sitíi olalila jiti, mapurigá je'ná jerigá osirúami ju echo'ná Riosi Ra'íchala oselíwalachi: Ne wabé chati sitíi oláami anérami ju mapuyíripi rijói, echo'ná biléana kúrsichi michóntami níisa.
\v 14 A'lí je'ná jerigá olárami níili mapurigá echi jaré isena pagótami ayénachó ku'wíratami níima mapalí aboni galá bichíima Jesucristo niráa, achigórigá mapurigá Riosi bachá niráa bichíwaga aneli echi ki'yá bitéami Abrami mapu si'néami echi jaré isena pagótami ku'wíratami níima riwéali binói Abrami jiti, mapujiti echi Walubela Jesucristo arigá mapurigá echi Abrami kúchala kúchuwala níili. A'lí Binói Jesucristo arigá ku'wírama riwéali si'néami pagótami mapu ikí bichíima Binói niráa. Ayénachó echirigá olárami níili mapurigá ne si'néamita mapu ikí galá bichíibo riwéaliko, echirigá galá narepo echi Wabé Galabé Riosi Iwigala mapurigá Riosi Binói bachá niráa ne bichíwaga anili mapurigá Binói tamujé tamí 'yama riwéali.
\s Riosi ketasi naré echi jaré pagótami mapu galá nijéwaga olá mapurigá Moisesi osogá nulali, chopi Binói ayena naré echi jaré mapu ikí galá bichíiko
\p
\v 15 'Yemi keni ritémawa nijeni 'yemi mi anema mapurigá echi jaré pagótami olá: Mapalí bilé rijói siká achesa biléana oselichi mapo'ná osirúami ju jeanigá mapu pe waminánomí echi bilé rijói ne bichíwali olama bilé namuti, echalí jonsa ke wesi auché jaré pagótami omero aniyá mapu echi rijói ketasi echirigá anili. Nibilé wesi omero aniyá mapu echi rijói ayénachó nakili mapu auché jaré namuti ayénachó olárami níima, mapujiti ketasi echirigá osirúami níili echo'ná oselichi.
\v 16 A'lí Riosi Binói echirigá ne bichíwaga aneli echi Abrami jeanigá mapu piri Binói Riosi 'yama riwéali echi Abrami. Ayénachó Riosi ne bichíwaga aneli echi Abrami mapu piri Binói Riosi 'yama riwéali echi bilepi Abrami kúchala kúchuwala mapu nolínama riwéali, echi mapu ne Walubela níima riwéali. Chopi ketasi jerigá osirúami ju mapu Riosi echirigá bichíwaga aneli mapu piri Binói Riosi 'yama riwéali echi jaré wikabé Abrami kúchala kúchuwala, chopi jerigá osirúami ju: Nijeni je'ná jerigá 'yama echi bilepi mujé kúchala kúchuwala. A'lí nijé Pablo 'yemi mi ané mapu echi bilepi Abrami kúchala kúchuwala, échiko echi Walubela Jesucristo ju.
\v 17 A'lí mapurigá nijeni aní, je'ná jerigá aniwáami ju: Riosi chabé ki'yá, bachá niráa, ne bichíwaga aneli echi Abrami mapu churigá Binói Riosi olama riwéali. A'lí Riosi Binói waminabi wabé bichíwaga aneli mapu Binói echirigá olama riwéali. Chopi echalí jonsa wakinánala naó kiento waminá baisá makói bamíbali echi walula Moisesi osogá nuleli echi pagótami. A'lí mapurigá echi Moisesi osogá nulali ketasi chirigá omero olayá mapurigá echi pagótami ariwema mapurigá Riosi Binói bachá niráa bichíwaga aneli echi Abrami, mapujiti Riosi arigá abijí olama mapurigá Binói ne bichíwaga aneli echi Abrami mapu Binói Riosi olama riwéali.
\v 18 A'lí a tamujé narésagá echi jaré namuti mapu Riosi tamujé tamí kóntami niráa 'ya chopi mapalita galá sébali olabo mapurigá echi walula Moisesi osogá nulali, a'lí ma ketasi kóntami niráa níima. Chopi Riosi bachá niráa ne bichíwaga aneli echi Abrami mapurigá Binói we kóntami niráa 'yama riwéali suwaba.
\p
\v 19 A'lí ¿piri jiti echirigá nulérami níili echi pagótami, mapurigá echi walula Moisesi osogá nuleli? Aboni pe wakinana echirigá nulérami níili, mapurigá aboni echijiti galá machimea mapurigá aboni we chati sitíi oláami níili. A'lí Riosi chopi nakili mapurigá aboni echirigá nulérami níima mapuyénasí Binói Riosi Ranala nawama riwéali jena'í wichimóbachi. Mapujiti Riosi bichíwaga aneli echi Binói Ranala mapu Binói Riosi kóntami niráa 'yama riwéali echi Wabé Galabé Riosi Iwigala. A'lí echi jaré o'wéala Riosi kapitánawala níili mapu ruyeli echi Moisesi mapu churigá binói osimea riwéali Riosi nulalila. Echirigá níili mapu echi Moisesi chopi julárami níili ruyénala echi pagótami mapu churigá Riosi nuleli aboni.
\v 20 Chopi mapalí Riosi bichíwaga aneli echi Abrami, echalí Riosi Binói ra'íchali echi Abrami yuwa, mapujiti Riosi bilepi ju. A'lí ketasi 'wérali níili mapurigá Riosi julama auché bilé echi Abrami yuwa ra'ichánala.
\s Riosi nulalila ketasi sayéraga aní echi jaré namuti mapu Riosi bachá niráa ne bichíwaga aneli echi Abrami
\p
\v 21 ¿Acha bichíwali ju mapu Riosi nulalila sayéraga aní echi jaré namuti mapu Riosi bachá niráa ne wabé bichíwaga aneli echi Abrami? Ketasi chirigá ju, mapujiti a tamujé 'yárami níisagá mapurigata sinibí piréami níibo mapujítita galá nijéwaga olali mapurigá Moisesi osogá nulali, echalí ne bichíwali chopi 'wérali níima mapurigata galá nijéwaga olabo mapurigá Moisesi osogá nulali.
\v 22 Chopi Riosi Ra'íchala osirúami je'ná jerigá aniwáami ju: Mapu si'néami pagótami jena'í wichimóbachi piréami we chati sitíi oláami ju. Abóniko arigá we chati sitíi olá, echijiti si'néami aboni kastigo 'yárami níima. Chopi echi jaré mapu ikí galá bichíiko Jesucristo niráa, abóniko ku wikawárami níima mapujiti aboni 'yárami níima mapurigá Riosi bachá niráa bichíwaga aneli echi Abrami mapu Binói 'yama riwéali.
\p
\v 23 Chopi chabénala mapalita ke cho bichíili Jesucristo niráa, echalita sinibí arigá we chati sitíi ologá piréali. Echalí tamujé ketasi omérali galá nijéwaga olayá mapurigá echi Moisesi osogá nulali. Echijítita we yáati galá bichíili mapalita nawésarami níili Jesucristo Ra'íchala.
\v 24 A'lí mapuyénasí echi Walubela Jesucristo nawali jena'í wichimóbachi tamujé chopi nulérami níili mapurigá Riosi nulalila osirúami tamujé tamí nulé. Echalí tamujé tamí nulérami níili mapurigá jaré kúuchi nulérami ju bilé tiwé pioni jiti, mapujiti echi jaré kúuchi ketasi cho ochérami ju, nibilé cho galá machíami ju. A'lí bicheta echirigá tibútarami níili mapuyénasí echi Walubela Jesucristo nawali, mapurigá mapalita ma galá bichíisibo Binói niráa, echalita ma galá narétami níibo Riosi jiti mapurigá Binói kúchuwala niráa.
\v 25 Chopi tamujeta ma galá bichíili echi Walubela Jesucristo niráa, mapu ma nawali jena'í wichimóbachi. Echijiti tamujeta ma ketasi waminabi tibútarami ju mapurigá echi jaré kúuchi niráa. Ayénachó tamujeta echijiti ma ketasi chopi nijéwaga olabo mapurigá echi Moisesi chabénala niráa osogá tamujé tamí nuleli.
\p
\v 26 Mapujiti ne si'néami 'yemi mapu ikítamo bichíi Jesucristo niráa, mátamo Riosi kúchuwala ju, mapujítitamo ma napawíkami niráa ju echi Walubela Jesucristo yuwa.
\v 27 A'lí ne si'néami 'yemi máputamo pagótami níili echi Wabé Galabé Riosi Iwigala jiti mapurigátamo echirigá napabúrami níibo Jesucristo yuwa, 'yémitamo ma nakulíwarami niráa ju mapurigátamo ne galabé níibo achigórigá mapurigá Jesucristo ne wabé galabé ju.
\v 28 Echijiti ne si'néami 'yemi bichíyami chopi a yiri ju. ¿Chu chireko arigá Juríosi pagótami níisa, echi auché jaré isena kéremá? ¿Chu chireko arigá pióntami níisa, echi jaré nuláami kéréma? ¿Chu chireko arigá rijói níisa, echi jaré muguí kéremá? Mapujiti si'néami 'yemi bichíyami ne napawíkami, mapurigá bilepi niráa ju, mapujítitamo ma napabúrami níili echi Walubela Jesucristo yuwa.
\v 29 A'lí mapujítitamo ma Jesucristo níwala jú, echijítitamo ne bichíwali echi Abrami kúchala kúchuwala niráa jútamo. A'lí mapurigá Riosi ne bichíwaga anili mapu Binói 'yama riwéali echi Abrami, echirigá 'yémitamo ayénachó achigórigá narepo.
\c 4
\p
\v 1 Mapurigá nijeni aní, je'ná jerigá aniwáami ju: Bilé bachá wilíami towí ranarúami sinibí suwaba narema binói onolá níwala namuti, mapalí binói onolá ma mukusá. Chopi a echi onorúami ma mukusá mapuyénasí echi towí abijí we táa níisa, echalí échiko nulérami níima auché jaré jiti, achigórigá mapurigá echi jaré pióntami ayénachó nulérami ju. Chopi echi towí arigá we níwami ju ne suwaba echi jaré namuti mapu binói onolá níwala níili.
\v 2 Echalí auché jaré echo'ná binói kalílachi nóchami we tibútama echi towí. Ayénachó aboni we nulema echi towí mapuyénasí ma sebama tétali mapurigá binói onolá bachá niráa aneli, mapalí echi towí ne bichíwali narema riwéali ne suwaba echi jaré wikabé namuti mapu binói onolá níwala níili.
\v 3 Echirigá achigórigá ikili tamujé tamí yuwa. Chabénala mapalita ke cho bichíili Jesucristo niráa, echalita arigá mapurigá echi jaré kúuchi níili. Echalita chopi 'nátali, suwaba echi jaré namuti jiti, achigórigá mapurigá echi auché jaré jena'í wichimóbachi piréami sinibí 'nátaga piré.
\v 4 Chopi mapalí ma sébali tétali, echalí Riosi júuli kepu Raná jena'í wichimóbachi. Echalí echi bilepi Riosi Ranala ranarúami níili mapurigá bilé táa niráa, mapalí bilé mukí ranali. A'lí echi bilepi Riosi Ranala ranarúami níili mapurigá bilé Juríosi pagótami niráa, echijiti arigá 'wérali níili mapurigá Binói galá nijéwami níima Riosi nulalila.
\v 5 Echalí arigá 'wérali níili mapu si'néami tamujé echirigá nijéwaga olabo mapurigá echi walula Moisesi osogá nulali. Chopi echi bilepi Riosi Ranala tamujé tamí ku'wíramiya nawali, mapurigata ma ketasi waminabi echirigá nulérami níibo, chopi mapurigá Riosi tamujé tamí narema mapurigá Binói kúchuwala niráa.
\p
\v 6 A'lí Riosi júuli echi bilepi Binói Ranala Iwigala echo'ná pachana si'néami 'yemi bichíyami sulálachi, mapurigá echirigá 'nératami níima mapu 'yémitamo ne bichíwali Riosi kúchuwala niráa ju. A'lí echi Wabé Galabé Iwigá echo'ná pachana 'yemi sulálachi bitélaga, wabé kanílaga jeané echi Walubela Riosi: ¡Mujemi keni Onó ju!
\v 7 Echirigá ibili 'yemi bichíyami ma Riosi kúchuwala niráa ju. Mátamo ketasi mapurigá pióntami niráa ju. A'lí mapujítitamo Riosi kúchuwala niráa ju, echijiti Riosi ayénachó 'yemi mi 'yama ne suwaba Binói níwala namuti, mapujiti Jesucristo 'yemi mi ku'wírimiya mukuli.
\s Echi Pablo wabé galigá nakili mapurigá ibili bichíyami waminabi galá bichíima
\p
\v 8 Chabénala mapalí 'yémitamo ketasi cho machili echi Walubela Riosi, echalítamo sinibí ne wabé nílaga chokoba jaga o'wikeli echi jaré amachíkalawami namuti mapu ketasi mapurigá Riosi niráa ju.
\v 9 Jipi 'yémitamo ma galá machí Riosi, chopi waminabi galabé níimili jeanigá mapu echi Walubela Riosi ma 'yemi mi galá machí, mapurigá Binói kúchuwala niráa. Echijiti jipi ¿churékulátamo auchecho chopi nakí echi wikabé sití namuti nijéwaga olánala, mapurigátamo chabénala nulérami níili, mapalítamo abijí echirigá wabé nílaga ologá piréali, mapalítamo arigá ketasi echijiti ku'wíratami níili?
\v 10 'Yémitamo abijí wabé nakí wisabé omowánala mapujítitamo mayé mapurigá Riosi echijiti wabé kanílama. Echijítitamo abijí sinibí wabé omawa echalí jaré michá sébachi, wisabé omowálawachi sébachi ayénachó, jaré bamíbali sébachi asíchiko.
\v 11 Weni majaga newalá 'yemi jiti, mapujítini mayé mapu siné káachi nijeni wepi nóchali, echalí mapalini 'yemi mi nawésali Riosi Ra'íchala, mapujiti siné káachi 'yémitamo ketasi galá bichíiliré.
\p
\v 12 Keni ritémawa 'yemi nimí tani mapurigátamo sinibí olabo mapurigá nijeni olá. Nijeni ma ketasi nijéwaga olá mapurigá Moisesi osogá nulali, mapurigá echi auché jaré Juríosi pagótami sinibí nijéwaga olá. A'lí chabé chokichí 'yémitamo nibilé cho echirigá nijéwaga olali mapujítitamo ketasi Juríosi pagótami níili. A'lí echalí chabénala mapalí nijeni 'yemi mi bachá niráa nawésali, echalítamo ketasi tamí kichili, chopi jípitamo we tamí kichínali.
\v 13 A'lí 'yémitamo we galá machí mapurigá chabé chokichí nijeni nawésimiya tibili Riosi Ra'íchala echo'ná 'yémichi mapujítini nayúami níili.
\v 14 Echalini wabé risúu níili mapujítini echirigá nayúami níili. Chopi 'yémitamo ketasi tamí kichili mapujítini echirigá nayúami níili. Si'winárigá 'yémitamo sinibí tamí galá nareli mapurigá nijeni bilé Riosi kapitánawala niráa níisa. ¡Ayena 'yémitamo ne galabé niráa tamí nareli mapurigá nijeni níisa Jesucristo Binói, kéremá!
\v 15 Echalí chabé chokichí 'yémitamo ne wabé kaníili mapalini bachá niráa 'yemi mi nawésali Riosi Ra'íchala. Chopi jipi ¿churékulátamo ma ketasi echirigá kanila tamí jiti? Nijeni ne bichíwali rugá aní mapu chabé chokichí 'yémitamo ne wabé tamí galeli. Ayénachótamo we nakili tamí ku'wíranala. ¡Echalítamo a ne abónitamo machí a'wápo 'yemi aboni busila kéremá, tamí 'yábiya, átamo echirigá omérasagá tamí ku'wíriya!
\v 16 Jipi ¿áchatamo mayé mapu nijeni 'yemi mi sayéraga olali mapujiti nijeni 'yemi mi ruyeli echi ne bichíwali?
\p
\v 17 Echi jaré Juríosi pagótami echo'ná Jerusalémachi jonsa simírami wikabé namuti olá mapurigá 'yémitamo we galebo echi jaré aboni, chopi aboni echirigá arigá wabé 'yékaka olá mapujiti aboni chopi we nakí máputamo si'winárigá bichíibo. A'lí aboni chopi nakí 'yemi mi bichíiranala achigórigá mapurigá aboni bichíi, mapurigátamo ma ketasi waminabi bichíibo mapurigá tamujé Riosi jiti nawésami 'yemi mi binérali.
\v 18 Ne bichíwali we galabé ju máputa galebo auché jaré pagótami, chopi mapurigata ku'wírabo aboni. Nijeni ayénachó we nakí mapu 'yémitamo sinibí tamí galebo, ketasi chopi mapalini echo'ná 'yemi yuwa atí.
\v 19 ¡'Yemi mapurigá nijé kúchuwala niráa jútamo! Ayénachó nijeni we okolá sulachí niráa mapalini 'nata máputamo ketasi galá bichíi. Nijeni wabé simírami echirigá okolá mapalini echirigá 'nata, achigórigá mapurigá bilé mukí wabé okolá mapalí ranamea bilé táa múchali. Ayénachó nijeni waminabi echirigá okoma sulachí niráa mapuyénasí echi Walubela Jesucristo ne bichíwali bitélama echo'ná pachana 'yemi sulálachi, mapurigá 'yémitamo ne galabé oláami níibo mapurigá Jesucristo ne wabé galabé ju.
\v 20 Nijé ne bichíwali nakili mápuni echo'ná 'yemi mi yuwa asimea jipi rawé, mapurigá nijeni 'yemi mi wabé galigá ra'íchama, mapujítini sinibí wabé níliga 'nata 'yemi jiti.
\s Pablo binera echi Agara riwéami mukí jiti rugá, echi Sara riwéami ayénachó
\p
\v 21 'Yemi máputamo chopi waminabi nijéwaga olánali mapurigá Moisesi osogá nulali, tamí ku nijéwaga anesi je'ná jeyiri: ¿Kéchatamo siné námali mapurigá aniwáami ju mapurigá echi Moisesi osogá nulali?
\v 22 Mapujiti jerigá aniwáami ju: Mapu echi Abrami okuá kúrowi kúchuwami níili. A'lí echi bilé, echi pióntami mukí ranala níili. A'lí echi auché bilé binói Abrami a upila ranala níili. A'lí Abrami upila ketasi nulérami níili mapurigá pióntami niráa.
\v 23 A'lí echi towí mapu echi pióntami mukí ranala níili chopi ranarúami níili mapurigá si'néami echi auché jaré kúuchi ranarúami ju. Chopi echi auché bilé towí mapu ne Abrami upila ranala níili, échiko chopi ranarúami níili mapujiti Riosi ne bachá niráa bichíwaga anili mapu binói echirigá ranarúami níima riwéali. A'lí binói Abrami upila ketasi pióntami niráa níili.
\v 24 A'lí ne suwaba je'ná jerigá irétaga niráa anirúami níili, mapujiti osá chokéami níili mapalí Riosi ne bichíwaga anili mapurigá Binói olama riwéali, a'lí echi okuá mukí jerigá ju mapurigá echi okoná ra'íchali mapurigá Riosi bichíwaga ra'íchali. A'lí Riosi bachá niráa echirigá bichíwaga ra'íchali echo'ná ripabé rabó Sinaíchi anilíwachi mapalí Riosi Binói aneli echi Moisesi mapurigá osogá nulema echi jaré Juríosi pagótami. A'lí je'ná bilé bichíwaga ra'íchali mapurigá echi Agara riwéami mukí niráa ju. A'lí ne si'néami echi jaré pagótami mapu chopi nijéwaga olá mapurigá echi Moisesi echirigá osogá nuleli, abóniko we pióntami niráa ju mapurigá echi Agara we pióntami níili, mapujiti arigá 'wérali ju mapu aboni ne suwaba galá nijéwaga olama mapurigá echi Moisesi osogá nulali.
\v 25 A'lí echi Agara riwéami mukí nulérami níili mapurigá pióntami niráa. Chopi echi jaré Juríosi pagótami ayénachó nulérami níili echo'ná ripá rabó, Sinaíchi anilíwachi, mapujiti biléana ripá rabó ju echo'ná Arábiachi anilíwachi kawírali nirúami, mapo'ná echi jaré Juríosi pagótami nulérami níili mapurigá echi Moisesi osogá nuleli. Ayénachó echo'ná walúlachi Jerusalémachi piréami Juríosi pagótami nulérami ju mapurigá echi Moisesi osogá nuleli. Echijiti aboni arigá nulérami ju mapurigá pióntami niráa, mapujiti arigá 'wérali ju mapurigá aboni galá nijéwaga olama achigórigá mapurigá echi Moisesi osogá nuleli.
\v 26 Chopi si'néami tamujé bichíyami ma ketasi nulérami ju mapurigá pióntami niráa, mapujiti tamujé chopi piréami ju echo'ná bukulíwami walúlachi Jerusalémachi anilíwachi mapu echo'ná ripá riwigachi jonsa nawáami ju.
\v 27 A'lí je'ná jerigá osirúami ju echo'ná Riosi Ra'íchala oselíwalachi: ¡Wabé kanili mujé mukí ke ranáami, mápumi ke kúchuwa! ¡Ne wabé ganíliga siná mujé mukí mápumi ke siné ranali bilé táa! Mapujiti ne wikabé simírami kúchuwami níima echi mukí mapu ku pátami níili, ketasi mapurigá echi mukí kunéami.
\p
\v 28 'Yemi keni ritémawa, nijeni je'ná jerigá 'yemi mi ané: Tamujé bichíyami ne bichíwali achigórigá juta mapurigá echi Isaka níili, mapujiti tamujé ayénachó Riosi tanala ju mapujiti Riosi bachá niráa ne bichíwaga anili máputa Binói kúchuwala níibo mapujítita galá bichíibo riwéali. A'lí Riosi ayénachó bachá niráa ne bichíwaga anili mapu echi Isaka ranarúami níima riwéali mapurigá echi Abrami ranala niráa.
\v 29 A'lí echalí rawé echi biléala towí mapu chopi ranarúami níili mapurigá si'néami echi auché jaré ranarúami juko, échiko we kichiga a'najátali echi auché bilé mapu Riosi Iwigala jiti ranarúami níili. A'lí echirigá achigórigá olárami ju jipi rawé yénasí, mapujiti echi jaré ke bichíyami abijí we kichiga a'najata echi auché jaré galá bichíyami.
\v 30 Chopi ¿churigá anirúami ju echo'ná Riosi Ra'íchala oselíwalachi? Je'ná jerigá aní: Miná machí pa echi pióntami mukí, echi binói ranala ayénachó. Mapujiti echi pióntami mukí ranala ketasi níwami níima echi jaré mujé níwala namuti. Chopi níwami níima echi auché bilé mujé ranala, echi mapu mujé binói upila ranala ju, echi mukí mapu ketasi pióntami niráa ju.
\v 31 'Yemi keni ritémawa echirigá ju mapu tamujé bichíyami ketásita mapurigá echi pióntami mukí kúchuwala niráa ju. Chopi tamujé mapurigá echi auché bilé mukí kúchuwala niráa ju, echi mapu ketasi pióntami niráa níili.
\c 5
\s Ketasi waminabi nijéwaga olasi mapurigá pióntami niráa suwaba mapu echi Moisesi osogá nulali
\p
\v 1 Echi Walubela Jesucristo ma tamujé tamí ku machí a'wali mapurigata ma ketasi waminabi nijéwaga olabo mapurigá pióntami niráa, suwaba mapu echi Moisesi osogá nulali. Echijiti ketasi waminabi echirigá nijéwaga olasi 'yemi bichíyami, nibilé auchecho siné chotasi echirigá nijéwaga olayá mapurigá echi Moisesi osogá nulali, mapujítitamo ma ketasi echirigá nulérami ju, mapurigá pióntami niráa, mapurigátamo waminabi echirigá nijéwaga olabo.
\p
\v 2 ¡Galá tamí kipusi! Nijé, Pablo, 'yemi mi ané mapu átamo chopi nakisáagá máputamo noligá sikirétami níibo mapurigátamo echijiti ku'wíratami níibo, echalítamo tarapé chirigá ku wikawárami níibo, mapujiti átamo echirigá olásagá 'yémitamo ketasi galá bichíi echi Walubela Jesucristo niráa.
\v 3 Ayénachó wikabé rijói noligá sikirétami nílanaliko mapujiti aboni mayé mapu aboni echijiti ku wikawárami níima. Chopi nijeni nakí auchecho siné jerigá ruyénala ibili aboni: Arigá 'wérali ju máputamo ayénachó ne suwaba galá nijéwaga olabo mapurigá echi Moisesi osogá nulali. Chópitamo ketasi chirigá omero echirigá nijéwaga olayá.
\v 4 Mátamo ariweli echi Walubela Jesucristo si'néami 'yemi máputamo mayé máputamo ku wikawárami níibo chopi mapujítitamo galá nijéwaga olá mapurigá echi Moisesi osogá nulali. Mátamo chakena niráa rujuíli, mapujiti 'yémitamo ketasi bichíi mapu Riosi 'yemi mi ku'wírama chopi mapujiti Binói 'yemi mi wabé galé.
\v 5 Chopi tamujeta galá bichíyami ju, ayénachóta ma níwa echi Wabé Galabé Riosi Iwigala, echijítita galá bichíiga buwé mapurigá Riosi tamujé tamí narema mapurigá Binói kúchuwala niráa.
\v 6 A'lí mapujítita ma napawíkami niráa ju Jesucristo yuwa, echijítita ketasi waminabi ku'wíratami ju mapalita noligá sikirétami níisa. Nirapeta waminabi ku'wíratami ju, mapalita siné káachi ketasi noligá sikirétami níisa. Chópita ku'wíratami ju mapujítita ne galá bichíi Jesucristo niráa. Ayénachó mapujítita echirigá bichíiga wabé galigá pirélabo echi auché jaré pagótami.
\p
\v 7 Chabénala niráa 'yémitamo chótali wabé galabé ologá piréliya. Chopi jipi ¿chigá 'yemi mi ariwérali mapurigátamo ma ketasi waminabi nijéwabo echi ne bichíwali?
\v 8 Je'ná si'nú bichíiluwami ketasi Riosi níwala ju. Chopi echi Walubela Riosi ju mapu 'yemi mi ne wabé galigá bayé.
\v 9 We chati sitíi oluwáwami ju máputamo ma ketasi nijewa echi ne Bichíwali. A'lí echi chati sitíi oluwáwami mapurigá echi levadura anilíwami ju. Galá newalasi mapurigá pe táa achésuwa echi levadura, a'lí ne suwaba echi batusí waminá walú nílama.
\v 10 Nijeni mayé mapu echi Walubela Jesucristo ketasi ariwema mapu 'yémitamo si'winárigá 'natabo. Chopi Riosi Binói kastigo 'yama echi rijói mapu 'yemi mi chakena a'wasá, ke chiré mapuyíripi níisa.
\p
\v 11 Keni ritémawa a nijeni siné káachi abijí nawésasagá jeanigá mapu echi pagótami ku'wíratami níima mapalí aboni noligá sikirétami níisa ¿churékulani abijí we kichiga a'najátuwa? Mapujiti ani echirigá nawésasagá, echalí aboni ma ketasi tamí kichimi, mapujiti aboni chopi tamí wabé kichí mapujiti nijeni we nawesa jeanigá mapu echi Walubela Jesucristo chopi mi'lirúami níili echo'ná kúrsichi mapurigá Binói echijiti omérama ku wikáwiya mapurigá si'néami echi jaré pagótami wabé chati sitíi olali.
\v 12 ¡Chopi ne galá níimi a aboni niráa sikiresa ne si'néami echi auché jaré mapu ikí 'yemi mi 'wérali ané máputamo arigá noligá sikirétami níibo!
\p
\v 13 Keni ritémawa, Riosi ma 'yemi mi bayeli mapurigátamo ma ketasi waminabi nulérami níibo echi wikabé namuti olayá mapurigá echi Moisesi osogá nulali. Chopi jipi mapalítamo ma ketasi waminabi echirigá nulérami ju, ketasi chuwé olasi mapurigá 'yemi aboni chopi nakí olánala. Chopi si'winárigá sinibí ne galá nagúurasi a'nagupi, mapujítitamo ne wabé galé a'nagupi.
\v 14 Mapujiti 'yémitamo ne sébali galá nijéwabo suwaba echi auché jaré Riosi nulalila mapalítamo galá nijéwabo je'ná bilepi nulalíwami: Galá galé mujé echi auché jaré pagótami, achigórigá mapurigami we galé a mujé binói niráa.
\v 15 Chopi a 'yémitamo a'nagupi nakówaga, ayénachó átamo a'nagupi suwábanalasagá mapurigá echi jaré jobátami namuti olá, echalí ne galá 'nénasi mapurigátamo ketasi a'nagupi ko'wiboa.
\s Galá níima máputa chopi olabo mapurigá echi Wabé Galabé Riosi Iwigala tamujé tamí nulé
\p
\v 16 Nijeni 'yemi mi je'ná jerigá ané: Sinibí ne galá nijéwaga olasi mapurigá echi Wabé Galabé Riosi Iwigala 'yemi mi nulé, echalítamo ma ketasi chopi waminabi olabo mapurigá 'yemi aboni chopi nakí olánala.
\v 17 Mapujiti mapalítamo chuwé olá mapurigá 'yemi aboni chopi nakí olánala, echalítamo echirigá ologá ne wabé sayera echi Wabé Galabé Riosi Iwigala. A'lí echi Wabé Galabé Riosi Iwigala ayénachó wabé sayera echiyiri oluwáwami. A'lí je'ná okuánika echirigá a'nagupi nasayera. A'lí 'yémitamo echijiti ketasi omero galabé olayá mapalítamo nakí echirigá galabé olánala.
\v 18 Chopi átamo suwaba galá nijéwaga olásagá mapurigá echi Wabé Galabé Riosi Iwigala 'yemi mi nulé, echalí ma ketasi 'wérali ju máputamo nijéwaga olabo mapurigá echi Moisesi osogá nulali.
\p
\v 19 A'lí ne galá machirúami ju mapurigá echi pagótami chati sitíi olá mapurigá aboni chopi nakí olánala, mapujiti jaré mapu ma niwíami ju arigá chuwé bilétari yuwa kochí, a'lí auché jaré mapu ketasi cho niwíami ju arigá wabé chati sitíi ologá, chuwé bilétari yuwa kochí. Ayénachó aboni wabé chati sití ologá wikabé namuti we chuwé olá.
\v 20 A'lí aboni ketasi galá o'wiké echi bilepi Walubela Riosi, chopi aboni chokoba jaga o'wiké echi jaré amachíkalawami namuti mapu jaré pagótami jiti niwárami níili. Ayénachó jaré aboni wabé sukurúami ju. A'lí jaré aboni wabé sayérami ju, ne wabé nakóami ayénachó. A'lí auché jaré ne wabé korúkami ju. A'lí aboni péebi jiti we yáati wabé na'awa. A'lí aboni sinibí chopi olá mapurigá aboni nakí olánala. A'lí aboni a'nagupi nakichiga chopi wikanáami niráa rojuá.
\v 21 A'lí echi pagótami a'nawí wabé kolúkami ju. Ayénachó jaré aboni we nakówaga ko'yáami ju. A'lí aboni we bajiga tékami ju. Ayénachó aboni we koruka ko'wéami ju. A'lí echi pagótami sinibí waminabi echirigá chuwé olá. A'lí aboni wikabé auché jaré je'ná jeyiri chati sití namuti ayénachó olá. Echijiti nijeni 'yemi mi je'ná jerigá ané mapurigá nijeni 'yemi mi chabénala ruyeli: Mapu echi jaré echirigá oláami pagótami ketasi chirigá mo'wimea Riosi yuwa echo'ná ripá riwigachi mapo'ná Riosi sinibí niráa galá nulema Binói pagótamawala.
\p
\v 22 Chopi mapalí echi jaré galá bichíyami pagótami galá nulérami ju echi Wabé Galabé Riosi Iwigala jiti, echalí aboni ne wabé galé a'nagupi, ayénachó aboni sinibí galá ganila, ayénachó aboni ne galá kilí ologá piré. A'lí mapalí aboni echirigá nulérami ju echi Wabé Galabé Riosi Iwigala jiti, echalí aboni sinibí kilí buwé mapurigá Riosi chopi ku'wírama aboni. Ayénachó aboni we natimáami níima. Ayena cho aboni we galabé oláami níima. Ayénachó aboni sinibí galá bichíyami níima Riosi.
\v 23 A'lí aboni tarapé nóchami níima, tarapé machiná niráami niráa. Nibilé cho chuwé oláami níima aboni. A'lí sinibí risensia ju mapu echi jaré pagótami echirigá oláami níima, mapujiti echi nulalíwami ketasi sayera echiyiri oluwáwami.
\v 24 A'lí echi jaré Jesucristo níwala pagótami ma bichíwaga anili mapu aboni ma ketasi olama mapurigá aboni chopi nakí olánala. Echirigá suwaba mapurigá aboni chopi nakili olánala ma mi'lirúami niráa níili, mapurigá echo'ná biléana kúrsichi, clavo jiti michóntarami niráa, achigórigá mapurigá Jesucristo Binói mi'lirúami níili. Echirigá aboni ma ketasi chopi olá mapurigá aboni nakí. A'lí aboni nirapé waminabi echirigá olánali.
\v 25 A'lí mapujiti echi Wabé Galabé Riosi Iwigala ma tamujé tamí 'yali mapurigata bukulíwami niráa pirélabo, ayénachó galá níima máputa risensia 'yabo mapurigá echi Galabé Riosi Iwigala tamujé tamí binérama mapu churigata ologá pirélabo.
\p
\v 26 Ketasi galá níima mapu tamujeta wabé nóchaga, machiná niráami níibo, mapujiti echi auché jaré ketasi kanílama mapalita echirigá olá. Nibilé galá ju máputa we koruka níliami níibo, nirapé mapurigata korúkabo echi auché jaré níwala namuti.
\c 6
\s A'nagupi ku'wírasi
\p
\v 1 'Yemi keni ritémawa máputamo galabé olá mapurigá echi Wabé Galabé Riosi Iwigala 'yemi mi binera, a bilé bichíyami, siné káachi, chati sitíi olásagá, echalí galá níima máputamo ku'wírabo echi chati sitíi oláami rijimala mapurigá binói wikáwali tánama Riosi, mapurigá binói echirigá ku wikawárami níima, ayénachó mapurigá binói auchecho galá ologá inama. Chopi galá níima máputamo kilí niráa, ne galá 'nátaga echirigá olabo, mapurigá 'yemi ketasi ayénachó echirigá chati sitíi olántarami níibo.
\v 2 Sinibí ku'wírasi echi auché jaré mapu ikí risúu olárami ju. Echirigá ologá 'yémitamo sinibí galá nijéwaga olabo mapurigá Jesucristo nulali.
\p
\v 3 Mapujiti echi rijói mapu a binói mayeko wabé walula niráa, mapalí binói arigá ketasi biyiri ju, échiko chopi a binói niráa ne wabé 'yeka.
\v 4 We galá níima ibili niráa echirigá we galá machigá 'natasa mapurigá ibili olá. A'lí mapalí bilé rijói echirigá mayé mapu binói galabé olá, echalí binói niráa echijiti we kanílama. A'lí echi rijói ketasi chopi echirigá kanílama mapalí binói mayé mapu binói waminabi galabé olá, ketasi mapurigá echi auché jaré.
\v 5 Mapujiti ibili niráa ku 'yárami níima achigórigá mapurigá aboni olali.
\p
\v 6 Galá níima mapu si'néami echi jaré mapu ikí binératami juko echi Galabé Riosi Ra'íchala sinibí 'yasa echi jaré namuti mapu ikí newalé echi binériami mapu galá binera aboni echi Galabé Riosi Ra'íchala.
\p
\v 7 Ketasi 'yékarami niráa nílasi 'yemi. Ke wesi pagótami wi'libé niráa chuwé kachigá kalema Riosi, mapujiti Riosi ke 'me ayó kastigo 'yama echi jaré pagótami. A'lí mapurigá ibili rijói olá, echirigá binói rijói achigórigá olárami níima. Ayénachó mapu ikí talí bilé rijói ichá, echirigá achigórigá echi binói rijói auchecho ku 'wima.
\v 8 A bilé rijói wabé chuwé chati sitíi olásagá mapurigá binói chopi nakí olánala, échiko chopi ichá echi wabé chati sití jena'í wichimóbachi. Ayénachó échiko 'wima echi wabé chati sití, mapujiti echalí ne jubá rawé binói chopi 'yárami níima mapu sinibí niráa mukúami níima. Chopi a bilé rijói galabé olásagá mapurigá echi Wabé Galabé Riosi Iwigala nakí mapurigá binói olama, échiko chopi ichá echi wabé galabé jena'í wichimóbachi. Ayénachó échiko 'wima echi wabé galabé, mapujiti echalí ne jubá rawé binói 'yárami níima echi sinibí niráa bitélawami.
\v 9 Echirigá ketasi galá níima máputa ariwebo echi ne wabé galabé olayá, mapujiti pe waminana, ma sébachi tétali, tamujeta galá ku natétarami níibo, ata sinibí niráa galá bichíisagá. A'lí bicheta echirigá 'wibo echi ne wabé galabéala.
\v 10 Echirigá galá níima mapu tamujeta galabé olabo echi auché jaré pagótami ne sinibí mapalita echirigá omero. A'lí ne bachá niráa galá níima máputa galabé olabo echi jaré ritémtami galá bichíyami Jesucristo niráa.
\s Echi Pablo galá ruyé echi jaré bichíyami ayénachó ku ripora aboni
\p
\v 11 Galá 'nesi mapurigá nijé, Pablo, je'ná pe okuá 'yemi mi oseli ne o'weli niráa osirúami. Nijé binói sikala jiti nijeni 'yemi mi jerigá oseli.
\v 12 Si'néami echi jaré mapu wabé nakiko mapurigá 'yémitamo noligá sikirétami níibo, abóniko chopi echirigá nakí mapurigá aboni echijiti we galérami níima echi auché jaré ke bichíyami pagótami jiti. Ayénachó aboni echirigá nakí mapurigá aboni ketasi wabé risúu ologá a'najátarami níima mapurigá bichíyami niráa, mapurigá Jesucristo, aboni jiti, miná mi'lirúami níili echo'ná kúrsichi.
\v 13 A'lí echi jaré mapu ikí mayeko mapu arigá 'wérali ju máputamo noligá sikirétami níibo, abóniko arigá ketasi ne sébali galá nijéwaga olá mapurigá echi Moisesi osogá nulali. Chopi aboni wabé nakí mapu 'yémitamo echirigá noligá sikirétami níibo, mapurigá aboni echijiti wabé nóchami níima, chopi mapujiti aboni 'yemi mi arigá 'wérali aneli mapurigátamo echirigá noligá sikirétami níibo.
\v 14 A'lí nijeni ketasi chirigá nakí mapurigá nijé binói echirigá nóchami níima. Chópini ayena a nócha mapujiti tamujé Walubéluala Jesucristo ma tamí jiti mukuli echo'ná kúrsichi. Jipi je'ná wichimoba tamí yuwa ma tarapé natiguí, mapujiti je'ná wichimoba tamí yuwa mapurigá mi'lirúami niráa níili mapalí Jesucristo mi'lirúami níili echo'ná kúrsichi. A'lí nijeni ayénachó echo'ná kúrsichi niráa michóniga mi'lirúami ju mapurigani ma ketasi waminabi galema je'ná wichimoba.
\v 15 A'lí Jesucristo yuwa tarapé natiguí mapurigata ma noligá sikirétami níisa, nirapé natiguí mapurigata siné káachi ketasi noligá sikirétami níisa. Chopi wabé natikí mapu ma bukulíwami ku niwárami níisate, pachana tamujé sulálachi niráa.
\v 16 A'lí nijeni nakí mapu Riosi 'yemi mi 'yama mapurigátamo kilí ologá pirélabo, ayénachó mapurigá Riosi 'yemi mi ne wabé natimama, ne si'néami mapu ikítamo je'ná jerigá ologá bichíyami ju, ne si'néami mapu ikítamo echi ne bichíwali Riosi níwala pagótami ju.
\p
\v 17 ¡Jipi waminana jonsa, nijé Pablo ketasi nakí mapurigá echi jaré pagótami tamí waminabi kumema! Nijeni wikanáami niráa bawéami juni, mapo'nani wisabé wabé wipisótami níili mapujítini bichíyami níili Jesucristo niráa, echirigá nijeni ma bawirárami niráa ju mapurigá Jesucristo níwala niráa.
\p
\v 18 'Yemi keni ritémawa, nijeni we nakí mapurigá echi Walubela Jesucristo si'néami 'yemi mi galá ku'wírama. ¡Echirigá níima!