\id eph
\h Efesios
\mt2 OSIRÚAMI
\mt2 Mapurigá San Pablo oseli echo'ná
\mt EJÉSOCHI PIRÉAMI
\c 1
\s Pablo osé echo'ná Ejésochi piréami
\p
\v 1 Nijé Pablo, Riosi jiti julárami níili nawisánala mapurigá Binói chopi nakili. Nijeni 'yemi mi je'ná jerigá osé, si'néami 'yemi echo'ná Ejésochi piréami mapu ikítamo galá bichíyami ju Jesucristo niráa, si'néami mapu ikítamo echijiti ma galabéala ku niwálami ju.
\p
\v 2 Wabeni nakí mapurigá echi Walubela Riosi, tamujé Onolá, sinibí 'yemi mi ku'wírama, ayénachó mapurigá echi Walubela Jesucristo 'yemi mi ku'wírama, ayénachóni nakí máputamo 'yárami níibo mapurigátamo sinibí kilíi ologá pirélabo.
\s Riosi tamujé tamí ganílatali mapujítita bichíi Jesucristo niráa
\p
\v 3 Galá níima mapu si'néamita waminabi walubélaga anebo Riosi, echi mapu echi Walubela Jesucristo Onolá ju, mapujiti Riosi ma tamujé tamí ku'wírali mapujítita galá bichíili Jesucristo niráa; ayénachó Binói tamujé tamí 'yali mapurigata sinibí niráa kanílabo echo'ná ripá riwigachi, mapujítita napawíkami ju Jesucristo yuwa.
\p
\v 4 Ki'yá chokichí mapalí Riosi ke cho niwáli je'ná kawí, echalí Binói tamujé tamí chapili mapurigata galabératami níibo, mapujítita galá bichíibo riwéali Jesucristo niráa, mapurigata bacháami Riosi yuwa jábabo, Binói níwala niráa, tarapé chati sitíi oláami.
\v 5 Echalí jonsa Riosi echirigá bachá niráa galá machigá suwaba mapu ikí ikimea riwéali, echijiti tamujé tamí chapili mapurigata Binói kúchuwala níibo mapujítita echirigá bichíibo riwéali Jesucristo niráa, wabé wakinana. A'lí Riosi echirigá olali achigórigá mapurigá Binói nakili olánala ki'yá chokichí jonsa.
\v 6 Tamujeta sinibí waminabi walubélaga ané Riosi, mapujiti Binói ne wabé Walubela ju, ayénachó mapujiti Binói ne wabé simírami galabé ju. Echijiti Riosi tamujé tamí ne wabé ku'wírali mapalita napabúrami níili echi bilepi Riosi Ranala yuwa, echi mapu Riosi Binói ne wabé galé.
\v 7 Riosi ayénachó tamujé tamí ne wabé simírami galé, echijiti echi bilepi Riosi Ranala ma tamujé tamí ku wikáwali, mapujiti Binói wabé léntaga mi'lirúami níili tamujé chati sitíi olalila chopi jiti. Echijiti Jesucristo omérali tamujé tamí ku wikáwiya suwaba mapu ikita chati sitíi olali.
\v 8 A'lí Riosi ne sébali tamujé tamí machírali mapu chuyena Binói tamujé tamí ne wabé galé, ayénachó Riosi tamujé tamí 'yali mapurigata ne sébali galá machíami níibo, mapurigata galá machiboa ne suwaba namuti.
\v 9 Ayénachó Riosi ma tamujé tamí machírali suwaba mapu ikí Binói nakili olánala, chopi chabé ki'yá jena'í wichimóbachi piréami pagótami ketasi cho machili suwaba je'ná jeyiri.
\v 10 A'lí mapurigá Riosi nakili olánala, suwaba ne bichíwali echirigá olárami níima echalí mapalí ma sébali tétali, mapujiti Riosi wilama Jesucristo ne Walubela Nuláami niráa, mapurigá Jesucristo ne Walubela níima jena'í wichimóbachi, echo'ná ripá riwigachi ayénachó.
\p
\v 11 A'lí mapujiti tamujé napabúrami níibo riwérali Jesucristo yuwa, echijiti Riosi tamujé tamí chapili chabé ki'yánala mapurigá tamujeta 'yárami níibo mapurigá Binói tamujé tamí 'yama waminánomí. A'lí ne suwaba je'ná jerigá olárami níima achigórigá mapurigá Riosi bachá niráa 'nátaga nakili olánala, mapujiti Riosi sinibí suwaba olá achigórigá mapurigá Binói galá mayé.
\v 12 A'lí Riosi echirigá olali mapurigá tamujé máputa ne bachá niráa bichíili Jesucristo niráa, sinibí ne wabé galabé ologá pirélabo, mapurigá Riosi echijiti waminabi walubélaga anérami níima, mapujiti Riosi ne wabé Walubela ju.
\v 13 Ayénachó 'yémitamo echirigá napabúrami níili Jesucristo yuwa mapalítamo galá námiga bichíili echi ne Bichíwali Riosi Ra'íchala, jeanigá máputamo ku wikawárami níibo átamo bichíisagá Jesucristo niráa. Echalítamo ayénachó bawirárami niráa níili Riosi jiti, mapujiti Riosi 'yemi mi 'yali echi Galabé Riosi Iwigala mapurigá Binói bachá niráa bichíwaga anili mapu 'yama.
\v 14 A'lí Riosi echirigá tamujé tamí 'ya echi Wabé Galabé Riosi Iwigala mapurigata ne galá machiboa máputa ne bichíwali narepo ne suwaba echi galabéala mapu Riosi tamujé tamí 'yama waminánomí, mapalí Binói ma sebárama ku wikáwiya si'néami mapu ikí Binói níwala pagótami níima. A'lí Riosi echirigá olama mapurigá Binói echijiti sinibí waminabi walubélaga anérami níima, mapujiti Riosi Binói ne wabé Walubela ju.
\s Pablo tani mapu Riosi 'yama mapurigá echi jaré bichíiyami ne wabé galá machíami níima
\p
\v 15 Echijiti mapalí jonsa nijeni námali mapurigá 'yémitamo echirigá ne galá bichíili Jesucristo niráa, ayénachó mapurigátamo ne wabé galé si'néami echi auché jaré mapu ikí Riosi níwala ju,
\v 16 echalí jonsa nijeni ke siné ariwé walú natétara ayá Riosi, sinibí mapalini Riosi yuwa tániga ra'icha si'néami 'yemi jiti.
\v 17 Nijeni sinibí tani mapurigá Riosi 'yemi mi 'yama mapurigátamo ne galá machíami níibo, mapurigá Riosi Iwigala 'yemi mi machíratama, mapurigátamo ne wabé galá machiboa Riosi Ra'íchala, mapurigátamo waminabi galá machiboa Binói Riosi, echi mapu Jesucristo Riósawala ju, echi mapu ayénachó echi Walubela Onorúami ju.
\v 18 Nijeni ayénachó tani mapurigá Riosi 'yemi mi ne galá machírama, mapurigátamo ne galá machiboa mapu Riosi tamujé tamí bayeli mapurigata galá bichíyami níibo, ayénachó mapurigata buwebo mapurigá Riosi tamujé tamí wabé o'wéalatama waminánomí, ayénachó mapu Riosi tamujé tamí 'yama echi ne wabé simírami galabéala, ne wabé walubela, mapujítita Binói níwala ju.
\v 19 Ayénachóni tani máputamo galá machiboa mapu chu yena Riosi ne wabé simírami omériami ju, ayénachó máputamo machiboa mapu Riosi Binói ne wabé omériga olá pachana tamujé sulálachi, si'néami mapu ikita ma galá bichíili Jesucristo niráa. A'lí Riosi echirigá achigórigá ne wabé simírami omériga olali,
\v 20 mapalí Binói ku owíntali Jesucristo mapalí ma mukúami níili, ayénachó mapalí Binói achábali Jesucristo echo'ná watonachi Binói Riosi yuwa, echo'ná ripá riwigachi.
\v 21 Echalí Riosi ne wabé simírami walubérali Jesucristo, ketasi mapurigá echi auché jaré silíami jena'í wichimóbachi piréami. Riosi ne wabé walubérali Jesucristo, ketasi mapurigá echi auché jaré wabé o'wéala, nibilé cho mapurigá echi jaré wabé omérami, nibilé cho mapurigá echi jaré o'wéala nuláami. Echirigá Riosi ne wabé simírami walubérali Jesucristo ketasi mapurigá mapuyíripi echi auché jaré o'wéala mapu ikita o'wéala niráa mayé jipi rawé, nibilé cho mapurigá mapuyíripi echi jaré o'wéala mapu nirúlama waminánomí.
\v 22 Echalí Riosi echirigá ne wabé simírami walubérali Jesucristo mapurigá Binói ne Walubela níima suwaba namuti yuwa, ayénachó Riosi wilali Jesucristo mapurigá ne bachá Walubela níima si'néami echi jaré napawika bichíyami yuwa.
\v 23 A'lí ne si'néami echi jaré napawika bichíyami, ne napawika Jesucristo sapala niráa ju, mapujiti Jesucristo bité pachana si'néami aboni sulálachi, ayénachó Jesucristo echirigá ne buchuwíina kanápuromí atí.
\c 2
\s Riosi ne wabé karigá ku wikáwali echi jaré bichíyami
\p
\v 1 Riosi ma 'yemi mi 'yali mapurigátamo sinibí niráa pirélabo Jesucristo yuwa, mapalítamo abijí suwíami niráa níili mapujítitamo ne wabé chati sitíi olali.
\v 2 Chabénala 'yémitamo echirigá chati sitíi ologá piréali mapujítitamo chopi chati sitíi olali achigórigá mapurigá echi auché jaré ke bichíyami pagótami jena'í wichimóbachi piréami chati olá, ayénachó mapurigá echi riablo nulá olánala, echi mapu walula niráa nulá echo'ná ikárali. A'lí echi riablo ju mapu ketasi nijiyárata echi jaré pagótami, si'néami mapu ikí ketasi nijéwiyami ju Riosi.
\v 3 Chabénala si'néami tamujé achigórigá chati sitíi ologá piréali mapurigá aboni abijí olá. Echalita chopi olali mapurigá tamujé aboni nakili chati sitíi olánala, mapujítita we chati sitíi suléami níili, ayénachóta wabé chati sitíi 'nátami níili. Echijiti echalí galá níimili mapu Riosi tamujé tamí walubé kastigo 'yami, achigórigá mapurigá Binói ne walubé kastigo 'yama echi auché jaré chati sitíi oláami pagótami.
\v 4 Chopi Riosi ne wabé simírami natimáami ju, ayénachó Binói ne wabé simírami tamujé tamí galeli,
\v 5 echijiti Binói tamujé tamí 'yali mapurigata sinibí niráa pirélabo Jesucristo yuwa. A'lí Riosi echirigá tamujé tamí 'yali mapalí tamujeta suwíami niráa níili mapujítita abijí wabé chati sitíi ologá piréali. Echijiti jipi 'yémitamo chopi ku wikawárami ju mapujiti Riosi ne wabé simírami Galabé ju.
\v 6 A'lí Riosi ayénachó tamujé tamí ku owíntali Jesucristo yuwa, ayénachó tamujé tamí muchuwábali echo'ná ripá riwigachi, Jesucristo yuwa.
\v 7 A'lí Riosi je'ná jerigá olali mapurigá waminánomí Binói galá omérama machíriya echi pagótami mapu Binói ne wabé simírami galéami ju, ayénachó mapu Binói ne wabé Galabé ju, mapujiti Binói júuli Jesucristo tamujé tamí ku'wíramiya.
\v 8 Riosi 'yemi mi ne wabé simírami galeli, echijiti mapalítamo galá bichíili Jesucristo niráa, 'yémitamo ku wikawárami níili mapurigátamo chati sitíi olali, chópitamo ketasi echirigá ku wikawárami níili mapujítitamo galabé olali aboni niráa, mapujiti Riosi Binói 'yemi mi ku wikáwali mapujiti Binói ne wabé galéami ju.
\v 9 A'lí Riosi ke wesi ku wikáwa chopi mapujiti aboni galabé olá. Echijiti ketasi galá ju mapu echi jaré pagótami nóchama.
\v 10 Riosi tamujé tamí niwáli. A'lí mapujítita galá bichíili, Riosi tamujé tamí napabuli Jesucristo yuwa, echijiti Riosi ayénachó tamujé tamí galabé niráa ku niwáli, mapurigata chopi galabé oláami níibo, achigórigá mapurigá Riosi Binói bachá niráa tamujé tamí a'lárali mapurigata echirigá galabé oláami níibo.
\s Tamujé galá kilíi ologá piré mapujítita bichíi Jesucristo niráa
\p
\v 11 Echijiti galá ku 'natasi mapu churigátamo ologá piréali chabénala. 'Yémitamo ketasi Juríosi anilíwami pagótami ju. Echi jaré Juríosi sinibí noligá sikiré si'néami aboni kúchuwala kúrowi, echijiti echi jaré Juríosi 'yemi mi ané ke noligá sikirétami niráa.
\v 12 Echalí 'yémitamo ketasi Jesucristo yuwa níili. 'Yémitamo mapurigá isena pagótami níili echi jaré Isaeli pagótami yuwa. Echalítamo ketasi cho galá machili Riosi Nulalila mapurigá Riosi nuleli echi jaré Isaeli pagótami, chabé ki'yá jonsa. Nibilé chótamo machili Riosi Ra'íchala mapurigá Binói bichíwaga anili mapu julama echi bilepi Binói Ranala jena'í wichimóbachi. Echalí 'yémitamo chopi 'wigáami niráa piréali, ayénachótamo ketasi machili Riosi Ra'íchala mapujítitamo ketasi Riosi yuwa níili.
\v 13 Chopi jipi 'yémitamo ma napawíkami ju Jesucristo yuwa, echijiti 'yemi máputamo chabénala mikabé niráa muchili, ma mulubéantarami níili Riosi yuwa, mapujiti Jesucristo wabé léntaga mi'lirúami níili 'yemi chati olalila jiti.
\v 14 Jesucristo chopi ju mapu tamujé tamí 'ya máputa kilíi ologá pirélabo. Chabénala 'yémitamo mapurigá auché jaré isena pagótami níili tamujé Juríosi pagótami yuwa, chopi Jesucristo ma tamujé tamí ku niwáli mapurigá bilénapi napawíkami pagótami niráa, si'néami 'yemi isena yuwa. Echirigá Jesucristo Binói ma ku katéwali mapurigata ketasi waminabi a'nagupi nakichibo. Echijiti Jesucristo ma suwábali echi mapu tamujé tamí okoná niráa rojuánali, mapurigá biléana tigótami niráa.
\v 15 Mapujiti mapalí Jesucristo waminá mi'lirúami níili, echalí Binói ma nakúbali echi nulalíwami, mapurigá echi jaré pagótami nulérami níili wikabé namuti olánala. A'lí mapalí echi jaré pagótami echirigá okoná niráa rojonárami níili, echalí Jesucristo auché si'nú bukulíwami pagótami niwáli, napawíkami Binói Jesucristo yuwa. Echirigá olali Jesucristo mapurigata omérabo kilíi ologá piréliya Binói yuwa.
\v 16 A'lí mapalí Jesucristo echirigá clavo jiti michóniga mi'lirúami níili echo'ná kúrsichi, echalí Binói olali mapurigá ma ketasi 'wérali níima mapurigá okoná rojuáami pagótami a'nagupi na'áwama; ayénachó Binói 'yali mapurigá si'néami pagótami galá omérama kilíi ologá piréliya Riosi yuwa, mapujiti Jesucristo bilénapi napawíkami pagótami niwáli, si'néami echi jaré mapu ikí galá bichíiko Binói Jesucristo.
\p
\v 17 Echijiti Jesucristo jena'í wichimóbachi nawagá nawésali echi Galabé Riosi Ra'íchala mapurigá si'néami pagótami galá bichíiga kilíi ologá pirélama. Echalí Binói 'yemi mi nawésali máputamo mikabé niráa muchili Riosi yuwa, ayénachó Binói echirigá nawésali echi jaré Juríosi pagótami mapu mulubé niráa muchima Riosi yuwa.
\v 18 Mapujiti mapalita bichíi Jesucristo niráa, echalí si'néamita, ibili niráa, mulubéana Riosi Onorúami yuwa, ata Juríosi níisagá, ayénachó ata auché isena níisagá, mapalí echi Bilepi Wabé Galabé Riosi Iwigala tamujé tamí bayé.
\v 19 Echijiti, Riosi yuwa, 'yémitamo ma ketasi mapurigá isena pagótami niráa ju, máputamo jena'í kawírali piré mapo'ná ketasi 'yemi aboni kawíwala ju; chópitamo echo'ná ripá riwigachi piréami níibo, achigórigá mapurigá si'néami echi auché jaré Riosi níwala pagótami echo'ná chopi piréami níima, achigórigá mapurigá Riosi Binói bachá niráa bichíwaga anili, mapujiti 'yémitamo ma Riosi kúchuwala ju.
\v 20 Ayénachó 'yémitamo mapurigá biléana walubé kalí ju, mapujítitamo ibili niráa napawíkami ju Jesucristo yuwa, achigórigá mapurigá wikabé rité napawika bilénapi tigótami ju echo'ná biléana kalírali. A'lí ibili bichíyami mapurigá rité niráa tigótami ju echo'ná Riosi kalílachi. Echi kalí bachá ri'lé niráa tigótami níili mapalí echi jaré bachá bichíili, si'néami mapu ikí Jesucristo bachá niráa júuli nawisánala, ayénachó mapalí echi auché jaré ki'yánala piréami galá bichíili, si'néami mapu ikí Riosi jiti nawésami níili. A'lí Jesucristo Binói sinibí bachá niráa ju, echijiti Jesucristo mapurigá echi Galabé Rité ju, echi mapu bachá niráa tigótami níili echo'ná sitochi.
\v 21 Echirigá Jesucristo mapurigá echi ri'lé bachá tigótami niráa ju. A'lí echo'ná moba echi walubé kalí waminabi ri'iná sísimí, ne suwaba galá tigótami niráa, mapuyénasí biléana walubé ri'obá níima. Riosi ri'obáwala niráa, napawika echi Walubela Jesucristo yuwa.
\v 22 Echirigá 'yemi galá bichíyami ritémtami, napawika Jesucristo yuwa, ne si'néamitamo napawika tigótami niráa ju, ne si'néami echi auché jaré galá bichíyami yuwa, mapurigá ne si'néamitamo biléana walubé galí niráa níibo, mapo'ná Riosi Binói bité, Binói Wabé Galabé Iwigala niráa.
\c 3
\s Pablo julárami níili nawésanala echi Galabé Riosi Ra'íchala echi auché jaré isena pagótami
\p
\v 1 Echijiti nijé, Pablo, sinibí tániga ra'icha Riosi yuwa. Jipi nijeni jena'í pachá bachara atí mapujítini bichíi Jesucristo niráa. A'lí je'ná jerigá ikili mapurigá 'yémitamo waminabi ku'wíratami níibo, si'néami máputamo ikí ketasi Juríosi pagótami ju.
\v 2 'Yémitamo ma galá machibói mapurigá Riosi ne wabé galabé ologá tamí júuli 'yemi mi nawésanala echi Galabé Riosi Ra'íchala.
\v 3 Mapujiti Riosi Binói ma tamí machírali mapurigá Binói nakí olánala, achigórigá mapurigá nijeni bachánala 'yemi mi pe okuáa ra'íchali oseli. Chopi ki'yá chokichí jonsa Riosi ke wesi auché jaré echirigá machírali.
\v 4 A'lí mapalítamo 'neni mapurigá nijeni 'yemi mi oseli, echalítamo galá omérabo machiyá mapu nijeni ma galá machí suwaba mapu ki'yá chokichí jonsa ketasi machirúami níili, Jesucristo jiti rugá.
\v 5 Chabénala ke wesi je'ná jerigá machíratami níili, chopi jipi bukulí Riosi je'ná jerigá machírali echi jaré galabé oláami nawésami mapu Jesucristo jiti julárami níili nawisánala. Ayénachó Riosi echirigá machírali echi auché jaré nawésami, si'néami mapu ikí Riosi jiti nawésami níili. A'lí Riosi echirigá machírali si'néami aboni mapalí echi Galabé Riosi Iwigala echirigá machírali.
\v 6 A'lí echi mapu ki'yá chokichí jonsa ketasi machirúami níili Jesucristo jiti rugá, suwaba je'ná jerigá ju: Mapu Riosi ayénachó narema echi auché jaré isena pagótami mapurigá Binói kúchuwala niráa mapalí aboni galá bichíi echi Wabé Galabé Riosi Ra'íchala, achigórigá mapurigá Riosi narema echi jaré Juríosi mapalí aboni galá bichíi. Ayénachó je'ná jerigá ju: Mapu ne si'néami mapu ikí bichíiko bilénapi niráa napawíkami ju, ayénachó mapu ne si'néami echi jaré isena mapu ikí bichíiko achigórigá bichíwaga anérami ju, mapurigá Jesucristo bichíwaga aneli echi jaré Juríosi.
\v 7 A'lí Riosi Binói wabé omériga ologá tamí wilali mapurigani nocháma je'ná Galabé Riosi Ra'íchala nawésiya, chopi nijé binói ketasi echirigá oláati riwéalini, mapujiti chabénala nijeni wabé chati sitíi oláami níili.
\v 8 Nijeni waminabi ne wabé tabéala ju, ketasi mapurigá echi auché jaré kuchípala, si'néami mapu ikí Riosi níwala ju. Chopi Riosi arigá galá tamí nirali mapalí Binói wabé galigá tamí júuli nawésanala echi jaré isena pagótami je'ná Wabé Galabé Riosi Ra'íchala, jeanigá mapu Jesucristo ne wabé simírami galéami ju, mapuyénasí jena'í wichimóbachi piréami pagótami ketasi omero machiyá mapu chu yena ne wabé simírami galéami ju.
\v 9 Echirigá Riosi tamí nuleli mapurigani galá machírama si'néami pagótami mapu churigá Binói Riosi nakili olánala. A'lí echi Walubela Riosi mapu niwáli suwaba namuti mapu ikí nirú, Échiko ki'yá chokichí jonsa ketasi cho machírali jena'í wichimóbachi piréami pagótami mapurigá Binói nakili olánala, chopi jipi bukulí jonsa tamí echirigá machírali.
\v 10 A'lí je'ná jerigá ikili mapurigá, jipi jonsa, si'néami mapu ikí napawika bichíyami ju Jesucristo niráa ne galá machírama echi jaré o'wéala Riosi kapitánawala, echo'ná ripá riwigachi nuláami, mapu echi Walubela Riosi ne wabé simírami machíami ju ne suwaba namuti.
\v 11 A'lí Riosi je'ná jerigá olali achigórigá mapurigá Binói sinibí nakili olánala. Chabé ki'yá Riosi nijali Jesucristo, echi mapu tamujé Walubélawala ju, mapurigá Jesucristo mi'lirúami níima jena'í wichimóbachi.
\v 12 A'lí mapujiti Jesucristo echirigá mukuli tamujé chati sitíi olalila jiti, jípita galá omérabo mulubéaniya Riosi yuwa, mapujítita ma ketasi majawá, mapujítita galá bichíi Jesucristo niráa.
\v 13 Echijiti nijeni 'yemi mi ne wabé tani máputamo sinibí waminabi ne wabé nílaka bichíisabo, ayénachó máputamo ketasi ariwebo bichíisiya chopi mapujiti nijeni wabé risúu olárami ju, mapujiti nijeni 'yemi mi nawésali Riosi Ra'íchala. Nijeni chopi echirigá risúu olárami ju mapurigá 'yémitamo echijiti waminabi galá bichíibo Jesucristo niráa.
\s Jesucristo ne wabé simírami galéami ju
\p
\v 14 A'lí je'ná jiti nijeni sinibí chokóbaga wiliba bacháami echi Walubela Jesucristo Onolá yuwa, mapurigani tániga ra'icháma Binói yuwa.
\v 15 Echi Walubela Riosi niwáli ne si'néami pagótami mapu ikí nirú jena'í wichimóbachi, ayénachó ne si'néami mapu ikí nirú echo'ná ripá riwigachi. Echijiti tamujeta Onorúami niráa ané Riosi. A'lí echijiti si'néami rijói mapu ikí kúchuwami ju ayénachó onorúami anérami ju.
\v 16 Nijeni sinibí tani Riosi mapurigá Binói 'yemi mi wabé iwébanama pachana 'yemi sulálachi niráa, echi Wabé Galabé Riosi Iwigala jiti; mapurigátamo omérabo galabé ologá piréliya, mapujiti Riosi Binói ne wabé Walubela ju, ne wabé Omériami ayénachó.
\v 17 Nijeni echirigá tani mapurigá Jesucristo bitélama echo'ná pachana 'yemi sulálachi, mapurigátamo sinibí waminabi galá bichíisabo, ayénachó mapurigátamo ne wabé galéami níibo. Echalítamo níibo mapurigá echi wabé jiwérami okó, wabé ri'lé nawéami, echi mapu ketasi waminá na'mini.
\v 18 Echalítamo galá omérabo machiyá, ne si'néami echi auché jaré galá bichíyami pagótami yuwa mapu chuyena ne wabé simírami galéami ju echi Walubela Jesucristo. Mapujiti mapurigá je'ná kawí ne wabé simírami wi'lé ju, ne wabé simírami wi'lí ayénachó, echirigá achigórigá echi Walubela Jesucristo ne wabé simírami galéami ju. Ayénachó mapurigá echi walú ba'wí ne wabé simírami ri'lé ju, ayénachó mapurigá echi sopolí ne wabé simírami ripabé muchuwi, echirigá achigórigá echi Walubela Jesucristo ne wabé simírami galéami ju.
\v 19 Echirigani tani mapurigátamo galá machiboa mapu chuyena ne wabé simírami galéami ju echi Walubela Jesucristo; ayénachóni tani mapurigá Riosi Binói bitélama pachana 'yemi sulálachi, mapurigá Binói 'yemi mi nulema suwaba mapu ikítamo olabo. Ne bichíwali ju mapu echi Walubela Jesucristo tamujé tamí ne wabé simírami galé, chópita ke siné omérabo ne gáliga machiyá mapu chuyena galéami ju Binói.
\p
\v 20 Jipi jonsa nijeni nakí mapu Riosi waminabi walubélaga anérami níima, mapujiti Riosi ne wabé omériami ju, ne wabé simírami niráa olayá, suwaba namuti máputa tani tamujé, ayénachó mapurigata chopi 'nata tamujé, mapujiti Binói echirigá ne wabé omériga olá pachana tamujé tamí yuwa.
\v 21 ¡Nijeni nakí mapu ne si'néami echi jaré napawika bichíyami ritémtami sinibí niráa waminabi walubélaga anema Riosi, ne sinibí, mapujiti Jesucristo ne wabé simírami Walubela ju! ¡Echirigá níima!
\c 4
\s Echi Wabé Galabé Riosi Iwigala bilénapi niráa napabú si'néami mapu ikí galá bichíiko
\p
\v 1 Echijiti nijé mápuni jena'í pachá bachara atí, arigá 'yemi mi tani máputamo sinibí galabé ologá pirélabo, mapujiti galá níima mapu echirigá olama ne si'néami pagótami mapu ikí ma bayérami níiliko bichíinala, mapurigá 'yémitamo ayénachó bayérami níili.
\v 2 Tarapé nóchami níisi, chopi sinibí wabé galesi echi auché jaré pagótami. Sinibí galá kilíi ologá pirélasi echi auché jaré yuwa. Sinibí wabé galigá 'natasi mapu churigátamo omérabo ganílatiya echi auché jaré.
\v 3 Sinibí bilénapi niráa bichíisi, achigórigá mapurigá echi Wabé Galabé Riosi Iwigala 'yemi mi binera, mapujítitamo napabúrami niráa ju, mapujiti Riosi ma 'yemi mi 'yali mapurigátamo galá kilíi ologá pirélabo.
\v 4 Ne si'néami echi jaré mapu ikí bichíyami ju Jesucristo niráa, si'néami bilénapi niráa napawíkami ju mapurigá bilepi rijói sapala niráa, ayénachó bilepi nirú echi Wabé Galabé Riosi Iwigala, mapurigá Riosi ayénachó ma 'yemi mi bayeli mapurigátamo bichíibo máputamo ku'wíratami níibo echi Bilepi Walubela Jesucristo jiti.
\v 5 Bilepi Walubela Jesucristo nirú, ayénachó bilepi galabé Bichíilawami nirú, ayénachó bilénapi pagókowami nirú.
\v 6 Ayénachó bilepi Riosi nirú, echi mapu Onorúami ju, si'néami Onolá, mapujiti Riosi niwáli si'néami pagótami. A'lí Riosi ne Walubela ju ne si'néami pagótami yuwa, ayénachó Binói nóchaga olá pachana echi jaré bichíyami ritémtami sulálachi, ayénachó Riosi pachana si'néami aboni yuwa atí.
\p
\v 7 Chopi Riosi tamujé tamí ibili niráa 'yali mapu churigata omérabo nocha, Binói nóchala olayá, achigórigá mapurigá Jesucristo Binói tamujé tamí 'yali mapurigata nochabo.
\v 8 Echijiti je'ná jerigá osirúami ju echo'ná Riosi Ra'íchala oselíwalachi:
\q Jesucristo echo'ná ripá riwigachi ku muyénali, ayénachó Binói tóli wikabé echi jaré mapu pachá mo'wárami niráa níili.
\q A'lí Binói Jesucristo 'yali ibili echi jaré bichíyami mapu churigá nocháma, Binói nóchala olayá.
\p
\v 9 ¿Churigá aniwáami ju mapu ku moyénali? Je'ná jerigá aniwáami ju: Jesucristo ayena bachá niráa ne wabé ri'libé biléana waná rikínali mapo'ná muchuwi echi jaré suwíami aliwala.
\v 10 A'lí Binói mapu echo'ná wabé ri'libé rikínali, ayénachó ne wabé ripabé ku moyénali, echo'ná ne wabé ripabé riwigachi, mapurigá Binói Jesucristo sinepi niráa ne suníami niráa asimea.
\v 11 A'lí Jesucristo ibili niráa 'yali mapurigata omérabo olayá mapurigá Binói nakí máputa olabo. Echirigá Jesucristo júuli echi jaré makói miná okuá nawésami mapurigá aboni nawisáma Riosi Ra'íchala, ayénachó 'yali mapurigá auché jaré nawisáma mapurigá Riosi Binói 'yali mapu aboni nawisáma, ayénachó 'yali mapurigá auché jaré nawisama Riosi Ra'íchala mapurigá si'néami mapu ikí bichíiko ku wikawárami níima, ayénachó 'yali mapu auché jaré galá nisema echi jaré Riosi níwala pagótami, ayénachó mapurigá auché jaré galá binérama Riosi Ra'íchala.
\v 12 Echirigá Jesucristo a'lárali echi jaré Binói níwala pagótami mapurigá aboni galá omérama olayá Binói nóchala, mapurigá echi jaré napawika bichíyami waminabi galá bichíyami níima. Ne si'néami aboni bilénapi niráa napawíkami ju, mapurigá bilepi rijói sapala niráa. A'lí je'ná jerigá aniwáami ju: Echi Jesucristo sapala waminabi ochérasama mapalí ibili echi jaré napawika bichíyami waminabi galá bichíisama,
\v 13 mapuyénasí ne si'néami tamujé, máputa napawika bichíyami ju, bilénapi chópirigá bichíyami níibo; ayénachó mapuyénasí ne si'néamita ne sébali galá machiboa echi Walubela Riosi Ranala. Echalita ne sébali galá binératami níibo echi ne Bichíwali, mapurigá Jesucristo Binói ne sébali galá machíami ju suwaba namuti.
\v 14 Echalita ma ketasi mapurigá echi jaré kúuchi niráa níibo, mapujiti echi jaré kúuchi we 'yáati auché si'nú 'nata, ayénachó aboni arigá bichíi mapalí jaré pagótami auché si'nú niráa 'yékaka binera aboni. Echiyiri pagótami wabé machíami ju 'yékaka binériya, mapurigá tamujé napawika bichíiyami arigá bichíibo echi mapu ketasi bichíwali ju.
\v 15 Waminabi galá níima máputamo ne wabé galigá ra'ichábo echi ne Bichíwali, ayénachó máputamo waminabi nokuísabo Jesucristo yuwa, mapujítita napawíkami niráa ju mapurigá bilepi rijói sapala niráa. A'lí Jesucristo ne Walubela ju tamujé tamí yuwa, mapurigá echi bilepi rijói mo'ola ne bachá niráa ju, suwaba binói sapala yuwa.
\v 16 A'lí Jesucristo echirigá bilénapi niráa napabú ne si'néami echi jaré napawika bichíyami, mapurigá bilepi rijói sapala ne suwaba bilénapi niráa napawíkami ju. Echi bilepi rijói sapala wikanáami niráa rojuáami ju, chopi ne suwaba arigá bilénapi wabé iwéami nachúkami ju. A'lí mapalí ne suwaba echi jaré kúuchi rojuáami galá ju, echalí echi rijói galá kaníla. Echirigá ayénachó mapalí ibili echi jaré napawika bichíyami a'nagupi galéami ju, echalí ne si'néami ne wabé kaníila.
\s Jesucristo tamujé tamí 'ya mapurigata auché si'nú galabéala niráa pirélabo
\p
\v 17 Je'ná jerigá ju mapu nijeni 'yemi mi ané, ayénachó mapu nijeni 'yemi mi wabé nulé, mapujiti echi Walubela Jesucristo je'ná jerigá nakí: Mapu 'yémitamo ma ketasi chati sitíi ologá pirélabo, ketasi mapurigá olá echi auché jaré mapu ikí ketasi machí Riosi. Aboni wabé chati sitíi olá achigórigá mapurigá aboni ma wabé chati sitíi 'nata.
\v 18 Aboni ketasirapé machí echi ne Bichíwali. A'lí aboni ketasi auché si'nú galabéala niráa piré, mapujiti aboni ma biwárali aboni sulálachi; echijiti aboni ketasi machí galabé ologá piréliya.
\v 19 Aboni tarapé te riwéalawami, chopi aboni chuwé, olá karúmati ne wabé simírami chati sitíi oluwáwami.
\v 20 Chopi echi Walubela Jesucristo ketasi echirigá 'yemi mi binérali, mapurigátamo echirigá olabo,
\v 21 mapujiti ne bichíwali ju mapu 'yémitamo ma námali jaré nawésachi Jesucristo jiti rugá. Ayénachó bichíwali ju mapu 'yémitamo ma binératami níili echi ne Bichíwali, mapurigá Jesucristo Binói ju echi ne Bichíwali.
\v 22 Chabénala si'néami 'yémitamo chati sitíi ologá piréali, mapalítamo ketasi cho bichíili Jesucristo niráa. Jípitamo siné káachi abijí nakí chati sitíi olánala, mapujiti si'néamita abijí chati sitíi suléami ju, chopi tamujé máputa bichíi Jesucristo niráa, ma auché si'nú galabéala niráa niwárami ju. Echijiti waminá ariwesi mapurigátamo chabénala chati sitíi ologá piréali, mapujiti echiyiri oluwáwami ne wabé simírami chati sitíi ju. A'lí jípitamo chopi echirigá chati sitíi olá mapalítamo 'yékarami ju, mapujítitamo nakí chati sitíi olánala.
\v 23 Galá níima mapu 'yémitamo auché si'nú galabéala niráa niwárami níibo echo'ná 'yemi sulálachi, ayénachó mapurigátamo si'nú ne wabé galabéala niráa 'natabo.
\v 24 Ayénachó galá níima máputamo si'nú ne wabé galabéala niráa ku nakulíwarami níibo, mapurigátamo chopi galabé ologá pirélabo, achigórigá mapurigá Jesucristo tamujé tamí 'yali máputa pirélabo. Echi Walubela Riosi wabé nakí mapurigata echirigá galabé ologá pirélabo. A'lí si'néami mapu ikí echirigá olako, abóniko ne bichíwali galabé wachínaga ologá piré.
\p
\v 25 Echijiti ma ketasi 'yékaka ra'ichasi, chopi ibílipika ne bichíwaga ra'ichasi echi auché jaré yuwa, mapujiti si'néami tamujé bilénapi niráa napawíkami ju, mapu ikita bichíyami ju Jesucristo niráa.
\p
\v 26 A'lí átamo na'áwasagá, ketasi ne wabé simírami na'áwasi mapuyénasí chati sitíi oluwáwami níima. A'lí nirapé bilé rawé arichesi na'awa,
\v 27 mapujiti átamo echirigá wi'libé niráa na'áwasagá, siné káchitamo echirigá ariwebo mapurigá echi riablo 'yemi mi wabé chati sitíi olírama.
\p
\v 28 'Yemi máputamo chabénala wabé chigórami níiliko, waminá ariwesi chigówami. Jipi jonsa galá nochasi 'yemi aboni sikala jiti, mapurigátamo galá mepo wenomí. Echirigátamo níwabo máputamo galá omérabo ayá echi auché jaré wabé tisúwati.
\p
\v 29 Ke siné sitírarigá ra'ichasi, chopi sinibí wabé galabé niráa ra'ichasi, mapurigá echi auché jaré mapu ikí námiko 'yemi ra'íchachi waminabi galá bichíyami níima Riosi, ayénachó mapurigá aboni waminabi wabé kanílama sulachí niráa.
\v 30 Ketasi o'monáratasi echi Wabé Galabé Riosi Iwigala, chopi sinibí galá nijéwasi mapurigá Riosi Iwigala 'yemi mi nulé, mapujiti 'yémitamo 'yárami níili echi Galabé Riosi Iwigala mapurigá echi auché jaré pagótami galá machimea mapu 'yémitamo Riosi níwala pagótami ju. A'lí bichétamo echijiti tibútarami níibo echalí ne jubá rawé yénasí, mapalí Riosi 'yemi mi ne sébali ku'wírama.
\p
\v 31 Ke siné chijúnaga kichisi auché jaré, nibilé siné yónasi. Ke siné a'nagupi na'áwasi, nibilé siné chaati sitíi ra'ichási echi auché jaré pagótami. Waminá ariwesi suwaba chati sitíi oluwáwami.
\v 32 Chopi si'winárigá sinibí wabé galabé oláami níisi. Sinibí a'nagupi wabé natimasi, ayénachó a'nagupi ku wikáwasi, achigórigá mapurigá Riosi 'yemi mi ku wikáwali mapujítitamo bichíili Jesucristo niráa.
\c 5
\s Galá níima mapu Riosi kúchuwala chopi galabé ologá pirélama
\p
\v 1 'Yémitamo ma Riosi kúchuwala ju, ayénachó Riosi Binói 'yemi mi wabé galé, echijiti galabé oláami níisi, mapurigá Riosi galabé oláami ju.
\v 2 A'nagupi ne wabé galigá pirélasi, achigórigá mapurigá Jesucristo tamujé tamí ne wabé galeli, ayénachó mapurigá Jesucristo ne wabé galigá, a Binói niráa nijali mapurigá waminá mi'lirúami níima tamujé chati sitíi olalila jiti. Chabé ki'yá echi jaré Juríosi pagótami ko'wagá 'yali Riosi echi jaré méchuli. A'lí Riosi echirigá ganíliga ku wikáwali aboni chati sitíi olalila, chopi Riosi tamujé tamí waminabi ne wabé ganíliga ku wikawa mapujiti Jesucristo mi'lirúami níili tamujé chati sitíi olalila jiti.
\p
\v 3 'Yémitamo Riosi níwala pagótami ju, echijiti ketasi chati sitíi chuwé olasi. Ke siné chuwé bilétari yuwa kochisí, nibilé siné si'winárigá chati sitíi chuwé olasi, nibilé korusi auché jaré níwala namuti. Ke siné a'nagupi kaníliga ra'ichasi echiyiri chati sitíi oluwáwami jiti rugá.
\v 4 Nibilé siné kaníliga ra'ichasi echiyiri wabé riwéluami oluwáwami jiti rugá, mapujiti echiyiri oluwáwami ne wabé riwéluami ju. Ke siné sitíragá ra'ichasi, nibilé chuwé ra'ichasi; mapujiti echirigá ra'ichálawami ketasi galá ju, chopi sinibí galabé niráa ra'ichasi, walú natétara agá Riosi.
\v 5 'Yémitamo ma galá machí mapu echi jaré chuwé bilétari yuwa kochíami, ke wesi echo'ná Jesucristo yuwa muchima mapo'ná Binói wabé Walubela Nuláami níima, mapo'ná Riosi Onorúami ayénachó we nulá. Nibilé wesi chati sitíi chuwé oláami echo'ná Binói yuwa muchima, nibilé wesi mapu wabé korúkami ju auché jaré níwala namuti (mapujiti echiyiri korúkami achigórigá chati sitíi oláami ju mapurigá echi jaré mapu ikí wabé o'wiké echi jaré amachíkalawami namuti.)
\v 6 Ketasi ariwesi mapu auché jaré 'yemi mi 'yékama, mapalí aboni ke newalite niráa ra'icha. Riosi ne bichíwali ne walubé kastigo 'yama si'néami echi jaré pagótami mapu ikí echirigá wabé chati sitíi chuwé olako, echi jaré mapu ikí ketasi nijewa Riosi nulalila.
\v 7 Tarapé siné echirigá chati sitíi olasi 'yemi, mapurigá aboni chati sitíi olá.
\p
\v 8 Chabénala niráa 'yémitamo ne wabé chati sitíi ologá piréali, mapurigá echo'ná rokowárali piréami niráa, chopi jípitamo Jesucristo yuwa napabúrami ju, echijítitamo echo'ná galá rayénachi niráa piréami ju. Sinibí ne wabé galabé olasi mapurigá echo'ná galá rayénachi piréami niráa.
\v 9 Mapujiti echi Wabé Galabé Riosi Iwigala wabé omériga olá pachana 'yemi sulálachi niráa, mapurigátamo ne wabé galabé níibo, ne wabé bichíwaga ra'íchami ayénachó, ne wabé galabé wachínaga oláami ayénachó.
\v 10 Sinibí we nakisí binénala mapurigá echi Walubela Jesucristo we nakí, mapu 'yémitamo olabo.
\v 11 Tarapé siné olasi echi wabé chati sitíi oluwáwami, mapu echi auché jaré pagótami we olá, si'néami mapu ikí echo'ná rokowárali niráa piréami ju, mapujiti echiyiri chati sitíi oluwáwami ketasi 'yemi mi ku'wírama. Si'winárigá, waminabi galá níima mapu 'yémitamo sinibí wabé galabé ologá pirélabo. Echalí 'yémitamo machírabo echi auché jaré pagótami mapu echi chati sitíi oluwáwami ne wabé simírami chati sitíi ju.
\v 12 Mapujiti wabé riwéluami ju echi wikabé chati sitíi oluwáwami jiti rugá ra'ichálawa, suwaba mapu ikí aboni we chiná niráa chati sitíi olá.
\v 13 Chopi mapalí suwaba namuti ne galá rayéntami ju, echalí suwaba galá machirúami níima, mapujiti mapalí galá rayena echalí suwaba namuti galá machiná niráa riwirúami ju.
\v 14 Echijiti je'ná jerigá osirúami ju jena'í Riosi Ra'íchala oselíwalachi:
\q ¡Ku busuré mujé mápumi kochíami niráa ju!
\q ¡Ku owíini mujé mápumi mukúami niráa ju!
\q A'lí Jesucristo mi galá machírama echi ne Bichíwali.
\p
\v 15 Echijiti sinibí galá 'natasi mapu churigátamo ologá pirélabo. Ketasi ologá pirélasi mapurigá echi auché jaré mapu ke galá machíami ju, chopi sinibí galabé ologá pirélasi mapurigá echi jaré galá machíami niráa.
\v 16 We yaa galabé olasi suwaba máputamo omero, Riosi nóchala olayá, mapujiti waminánomí rawé 'yémitamo wabé risúu olárami níibo.
\v 17 Echijiti sinibí ne wabé galabé 'nátami níisi. Sinibí nakisí machinália mapurigá echi Walubela Jesucristo nakí máputamo olabo.
\v 18 Ketasi tégasi, mapujiti átamo tégasagá 'yémitamo chopi waminabi chati sitíi olísabo, mapuyénasítamo sinibí niráa kastigo 'yárami níibo. Si'winárigá sinibí galá nijéwaga olasi mapurigá echi Galabé Riosi Iwigala 'yemi mi nulé.
\v 19 Wisabé a'nagupi ruwigá kaníliga ra'ichasi Riosi Ra'íchala, mapurigá osirúami ju echo'ná Sálmochi anilíwachi, ayénachó a'nagupi nawajisi echi we galabé Riosi nawajíwala. Sinibí echirigá wabé kaníliga nawajiga, waminabi walubélaga anesi echi Walubela Jesucristo.
\v 20 Sinibí niráa walú natétara 'yasi echi Walubela Riosi Onorúami, suwaba namuti jiti, mapujítitamo galá bichíi Jesucristo niráa.
\s A'nagupi ne galá nijiyasi
\p
\v 21 A'nagupi ne galá nijiyasi si'néami 'yemi bichíyami, achigórigá mapurigátamo galá o'wiké Riosi.
\p
\v 22 'Yemi 'muguí kunéami ne galá nijéwasi 'yemi aboni kunala chopi, achigórigá mapurigátamo galá nijewa echi Walubela Jesucristo.
\v 23 Mapujiti echi rijói upéami walula ju binói upila yuwa, achigórigá mapurigá Jesucristo ne Walubela ju si'néami echi jaré napawika bichíyami ritémtami yuwa. Ayénachó Jesucristo ku Wikáwami ju echi jaré napawika bichíyami. A'lí ne si'néami echi jaré napawika bichíyami, ne napawika niráa, Jesucristo Binói sapala niráa ju.
\v 24 Chopi achigórigá mapurigá echi jaré napawika bichíyami galá nijéwami ju Jesucristo, echirigá ayénachó 'yemi 'muguí kunéami ne galá nijéwasi 'yemi aboni kunala chopí, suwaba mapu ikí aboni 'yemi mi nulé.
\p
\v 25 Galá níima mapu ibili rijói jubéami galá galesa aboni jubila chopí, achigórigá mapurigá Jesucristo wabé galeli echi jaré napawika bichíyami ritémtami. Echijiti Jesucristo a Binói niráa nijali mapurigá waminá mi'lirúami níima, aboni chati sitíi olalila jiti.
\v 26 A'lí biché Jesucristo echirigá olali mapurigá Binói omérama galabératiya echi jaré napawika bichíyami, ayénachó mapurigá Binói omérama bi'wayá aboni, echi ba'wí jiti, ayénachó mapujiti aboni galá bichíi Binói Ra'íchala,
\v 27 mapujiti Jesucristo nakí mapu ne si'néami echi jaré napawika bichíyami bacháami Binói yuwa jábama waminánomí, wabé o'wéalatami niráa, tarapé wi'nijírami mapurigá chati sitíi oláami niráa, mapurigá aboni chopi Riosi níwala níima, ne wabé galabé oláami niráa.
\v 28 Echirigá achigórigá galá níima mapu echi rijói upéami galá galesa binói upila, mapujiti mapalí bilé rijói we galé binói upila, echalí échiko ayénachó a binói niráa we galé.
\v 29 Mapujiti ke wesi kichí binói sapala, chopi si'winárigá ibili galá ko'ogá, we galá tibuta aboni sapala. A'lí Jesucristo echirigá achigórigá galá tibuta echi jaré napawika bichíyami,
\v 30 mapujiti si'néami echi jaré napawika bichíyami, ne napawika niráa, mapurigá echi Jesucristo sapala niráa ju. Echirigá si'néami tamujé bichíyami, echo'ná Binói sapálachi nachuka, wikanáami rojuáami niráa juta, mapurigá Binói sapala niráa, ayénachó mapurigá Binói ochilá niráa.
\v 31 Je'ná jiti bilé rijói ariwema kepu onó, kepu iyé omá, a'lí upema bilé mukí yuwa, a'lí okuánika mapurigá bilepi niráa níima.
\v 32 Je'ná jerigá ketasi galá machirúami ju, chopi arigá wabé galabé ju. Nijeni 'yemi mi ané mapu je'ná jerigá Jesucristo jiti rugá aniwáwami ju, ayénachó echi jaré napawika bichíyami jiti rugá aniwáwami ju.
\v 33 Chopi ayénachó je'ná jerigá aniwáwami ju: Mapu galá níima mapu ibili 'yemi wabé galá galema 'yemi aboni jubila achigórigá mapurigátamo a aboni niráa wabé galé. Ayénachó galá níima mapu echi jaré 'muguí galá o'wikesa aboni kunala.
\c 6
\p
\v 1 'Yemi kúchatami ne galá nijéwasi 'yemi 'wénawala, mapujítitamo galá bichíyami ju Jesucristo niráa. Ne galá wachínaga oluwáwami ju máputamo echirigá nijéwabo.
\v 2 Riosi je'ná jerigá 'yemi mi nulé: Galá o'wiké kemi onó, echi kemi iyé ayénachó. A'lí biché mapalí Riosi 'yemi mi echirigá nuleli, echalí ne chokichí, ne bachá níili mapalí Binói ayénachó bichíwaga anili máputamo wabé ku'wíratami níibo, átamo galá nijéwasagá bilé nulalíwami mapurigá Binói 'yemi mi nuleli.
\v 3 Mapujiti echalí Riosi je'ná jerigá ne bichíwaga anili: 'Yémitamo ne wabé kaníliami níibo, ayénachótamo wi'libé bamíbali pirélabo jena'í wichimóbachi, átamo galá o'wikésagá 'yemi 'wénawala.
\p
\v 4 'Yemi 'wéntami ketasi chuwé yóniga na'áwatasi echi jaré 'yemi kúchuwala, chopi galá nijéwiyami ochébanatasi, ne galá ruwigá mapurigá galá bichíyami níima Jesucristo niráa.
\p
\v 5 'Yemi pióntami galá majáami niráa, ne galá o'wikeka nijéwasi echi jaré nuláami mapu 'yemi mi nulé jena'í wichimóbachi, achigórigá mapurigá galá nijéwiya niráa echi Walubela Jesucristo.
\v 6 Sinibí ne galá nijéwaga olasi suwaba mapu ikí aboni 'yemi mi nulé. Ketasi chopi echirigá olasi mapalí aboni 'yemi mi ritiwá, chopi sinibí ne wabé nílaka galá nijéwaga olasi mapujiti Riosi echirigá nakí.
\v 7 Sinibí echirigá wabé nílaka nochasi, mapurigá echi Walubela Jesucristo nóchala olayá niráa, ketasi mapurigá jaré pagótami nóchala olayá.
\v 8 Mapujiti 'yémitamo ma galá machí mapurigá echi Walubela Jesucristo galá ku natétama ibili niráa, achigórigá mapurigá ibili galá olali. Ayénachó Binói galá natétama echi jaré pioni mapu galá olako, achigórigá mapurigá Binói galá natétama echi jaré nuláami mapu galá olako.
\p
\v 9 'Yemi nuláami máputamo níwa pioni, sinibí achigórigá galabé niráa olasi 'yemi piónawala yuwa, ke siné majáraga. Galá ku 'natasi mapurigá Jesucristo ne Walubela ju echi jaré pioni yuwa, achigórigá mapurigá Binói ayénachó Walubela ju 'yemi yuwa. A'lí Jesucristo echo'ná ripá riwigachi atí, chopi Binói sinibí galabé nirá echi jaré pióntami, achigórigá mapurigá Binói galabé nirá 'yemi nuláami.
\s Echi jaré napawika bichíyami ritémtami we sayera echi riablo
\p
\v 10 Jipi 'yemi napawika bichíyami ritémtami, waminabi galá bichíisasi echi Walubela Jesucristo niráa, mapujítitamo napawíkami ju Binói yuwa, ayénachó Binói suwaba omérami ju.
\v 11 Galá bichíiga chapisí suwaba mapu ikí Riosi 'yemi mi 'ya mapurigátamo omérabo nayúriya, echi riablo sayériya, mapurigátamo ketasi waminá omératami níibo mapalí echi riablo 'yemi mi 'yékama.
\v 12 Mapujiti tamujeta ketasi sayera auché jaré pagótami, chópita sayera echi wabé chati sitíi oláami riablo, echi jaré wikabé binói níwala o'wéala chati sitíi oláami aliwá ayénachó, suwaba mapu ikí ma waminá a'wátami níili echo'ná ripá riwigachi jonsa, suwaba mapu ikí jipi rawé o'wéala niráa nulá jena'í wichimóbachi mapo'ná jaré pagótami wabé simírami chati sitíi oláami ju, mapurigá echo'ná rokowárali piréami niráa.
\v 13 Echijiti galá bichíiga chapisí suwaba mapu ikí Riosi 'yemi mi 'ya, mapurigátamo omérabo sayériya echi riablo mapu wabé chati sitíi oláami ju, mapujiti jipi rawé echi riablo we nuláami ju jena'í wichimóbachi. A'lí mapalítamo sayera echi riablo, sinibí galá bichíyami níisi Riosi.
\v 14 Ne sinibí echirigá galá bichíyami níisi echi ne Bichíwali. A'lí bichétamo galá kariwérami níibo mapurigá echi jaré sontarsi kariwérami ju mapalí aboni galá iwéami púkami ju. Ayénachó sinibí galá wachínaga oláami níisi. Echalítamo ku'wíratami níibo mapurigá echi riablo ke omérama 'yemi mi suwábiya, achigórigá mapurigá echi jaré sontarsi ku'wíratami ju mapalí aboni jiero napáchami ju mapurigá aboni ketasi chi'wánarami níima auché jaré jiti.
\v 15 Ne galá kariwesi mapurigátamo nawisabo echi Galabé Riosi Ra'íchala, mapurigá echi jaré pagótami galá bichíiga kilíi ologá pirélama. Echirigá kariwesi achigórigá mapurigá echi jaré sontarsi galá kariwé mapalí aboni galá akará.
\v 16 Ne bachá niráa sinibí galá bichíisi Riosi, echalítamo galá ku'wíratami níibo mapurigá echi riablo ketasi omérama 'yemi mi suwábiya, mapujiti échiko 'yemi mi wabé sayera achigórigá mapurigá echi jaré sontarsi sayéraga a'wasá echi jaré owá rajáami, chopi mapalítamo galá bichíi Riosi, echalítamo omero niyúriya echi Riablo sayériya, achigórigá mapurigá echi jaré pagótami waminá cho'wá echi na'í rajáami mapu sontarsi a'wali.
\v 17 Galá bichíisi Jesucristo niráa mapurigátamo ku wikawárami níibo mapurigátamo chati sitíi olali. Echalítamo sinibí niráa ku'wíratami níibo, mapurigá echi riablo ke siné omérama 'yemi mi suwábiya. Echalítamo ku'wíratami níibo mapurigá echi jaré sontarsi ku'wíratami ju mapurigá aboni ketasi chiwárami níima mo'ochí, mapalí aboni jiero niwárami ko'yáchami ju. Sinibí galá bichíisi Riosi Ra'íchala mapurigátamo omérabo, echi riablo sayériya; mapujiti Riosi Ra'íchala mapurigá bilé wabé oláami wi'libé ripiyá niráa ju mapu echi Wabé Galabé Riosi Iwigala 'yemi mi 'ya mapurigátamo omérabo echirigá nayúriya.
\v 18 Sinibí echirigá olasi, sinibí niráa ra'íchaga Riosi yuwa, mapurigá echi Wabé Galabé Riosi Iwigala 'yemi mi binera. Sinibí mapurigá galá 'nagá muchúami niráa níisi. Ke siné ariwesi echirigá Riosi yuwa ra'icha, chopi sinibí tansi Riosi mapurigá si'néami echi jaré Riosi níwala pagótami galá ku'wíratami níima.
\v 19 Ayénachó tansi Riosi tamí jiti, mapurigá Riosi tamí 'yama mapurigani galá omérama nawesa Binói Ra'íchala, ayénachó mapurigani tarapé majaga nawisáma. Echirigá tansi mapurigani galá omérama machíratiya echi jaré pagótami echi Galabé Riosi Ra'íchala, mapu ketasi cho galá machirúami ju, mapurigá aboni ku wikawárami níima, a galá bichíisagá.
\v 20 Riosi echirigá tamí júuli mapurigani ra'icháma Binói jiti, mapurigani echirigá nawisama Riosi Ra'íchala. Echijiti jípini jena'í pachá bachara atí. Arigá tansi Riosi mapurigá nijeni galá omérama nawesa Riosi Ra'íchala, mapurigá galá níima mápuni nawisama, tarapé majáami niráa.
\s Ne jubáami niráa echi Pablo ku ripora jaré ritémtami
\p
\v 21 Echi Tíkiko riwéami rijimala 'yemi mi ruyema mapu churigá atikó nijé, ayénachó mapu pírini olayá atí.
\v 22 Echijiti nijeni júuli echi Tíkiko echo'ná 'yémichi, mapurigá binói 'yemi mi ruyema mapu churigá atí nijé, mapurigátamo echijiti waminabi kaníratami níibo.
\p
\v 23 Nijeni ne wabé nakí mapu Riosi Onorúami, ayénachó echi Walubela Jesucristo galá 'yama mapurigá echi jaré napawika bichíyami galá kilíi ologá pirélama, ayénachó mapurigá aboni galá galéami níima, ne galá bichíyami ayénachó.
\v 24 Ayénachóni nakí mapurigá Riosi ne wabé ku'wírama si'néami mapu ikí sinibí niráa galeko tamujé Walubélawala Jesucristo, si'néami mapu ikí ke siné ariwé echirigá galé. ¡Echirigá níima!