\id php
\h Filipenses
\mt2 Osirúami
\mt2 Mapurigá San Pablo Oseli echo'ná
\mt JILÍPOCHI PIRÉAMI
\c 1
\s Echi Pablo oseli echi jaré napawika bichíyami echo'ná Jilípochi piréami
\p
\v 1 Nijé, Pablo, 'yemi mi osé. Echi Timoteo ayénachó tamí yuwa atí. Tamujé echi Walubela Jesucristo piónawala ju. Jipi nijeni 'yemi mi je'ná jerigá osé, 'yemi echo'ná Jilípochi piréami, si'néami máputamo Riosi níwala pagótami ju, ne si'néami máputamo Jesucristo yuwa napawíkami niráa ju. Ayénachóni 'yemi mi osé, 'yemi o'wéala ochérami, ayénachó 'yemi nagúurami, riákono anilíwami.
\v 2 Nijeni nakí mapu echi Walubela Riosi Onorúami, ayénachó echi Walubela Jesucristo, 'yemi mi ne wabé ku'wírama, ayénachó mapu 'yemi mi 'yama mapurigátamo galá kilí ologá pirélabo.
\s Pablo táni mapurigá Riosi ku'wírama echi jaré bichíyami
\p
\v 3 Nijeni ne walú natétara 'ya keni Riósawa ne sinibí mapalini 'nata 'yemi jiti.
\v 4 A'lí ne sinibí mapalini Riosi yuwa ra'icha, echalí nijeni ne wabé kaníliga táni mapurigá Riosi waminabi ku'wírama si'néami 'yemi;
\v 5 mapujiti chabé ne chokichí jonsa, tamujeta ne napawika nóchali, echi Wabé Galabé Riosi Ra'íchala nawésiya, jipi yénasí.
\v 6 A'lí nijeni ne bichíwali mayé mapu echi Walubela Riosi mapu chabénala chótali 'yemi mi galabératiya mapalí jónsatamo bachá niráa bichíili, ayénachó waminabi sísama 'yemi mi echirigá galabératiya echalí rawé yénasí mapalí echi Walubela Jesucristo ku nolínama.
\v 7 A'lí we galá ju mapu nijeni echirigá 'natáma mapu Riosi waminabi sísama 'yemi mi galabératiya, mapujiti nijeni 'yemi mi ne wabé galé. A'lí Riosi 'yemi mi ne wabé ku'wira, achigórigá mapurigá Binói tamí ku'wira mapalini pachá bachárami ju, ayénachó mapalini párami níima echo'ná mapo'ná echi jaré o'wéala muchuwi, mapurigani galá ra'icháma jeanigá mapu arigá galá ju bichíilawa echi Galabé Riosi Ra'íchala, mapujiti ne Bichíwali ju.
\v 8 A'lí echi Walubela Riosi ne galá machí mapu chuyena nijeni ne wabé galé 'yemi si'néami, mapurigá echi Walubela Jesucristo tamí 'ya mapurigani 'yemi mi ne wabé galema, mapujiti Binói ne wabé galéami ju.
\v 9 A'lí nijeni táni Riosi mapurigá 'yémitamo waminabi ne wabé galéami níibo, ayénachó máputamo wabé galá machíami níibo, mapurigátamo galá machiboa suwaba namuti,
\v 10 ayénachó mapurigátamo machiboa mapu chuyiri 'nalí ju echi ne wabé galabéala, mapurigátamo sinibí nakiboa olánala echi mapu galabé ju. A'lí echirigá ologá 'yémitamo sinibí omérabo ne wabé galabé ologá piréliya. A'lí waminánomí mapalí Jesucristo ku nolínama 'yémitamo tarapé chati sitíi oláami níibo, nirapétamo wi'nijírami níibo mapurigá chati sitíi oláami niráa.
\v 11 A'lí Jesucristo 'yemi mi 'yama mapurigátamo sinibí echirigá ne wabé galabé ologá pirélabo, mapurigá Riosi Binói sinibí waminabi walubélaga anérami níima, mapurigá si'néami pagótami machimea mapu Riosi ne wabé Walubela ju.
\s Nijeni chopi bité mapurigani olama mapurigá Jesucristo nakí
\p
\v 12 'Yemi keni ritémawa, nijeni wabé nakí mapurigá 'yémitamo galá machiboa mapu echi Wabé Galabé Riosi Ra'íchala arigá waminabi wabé nawisárami níili mapujiti nijeni wisabé ne wabé risúu olárami níili mapalini echirigá nawésali.
\v 13 Mapujiti ne si'néami echi jaré sontarsi jena'í walubé kalírali, echi ne walubela silíami bitélachi tibúami, si'néami galá machí mapu nijeni chopi jena'í pachá bachárami ju mapujítini bichíi echi Walubela Jesucristo niráa. Si'néami echi auché jaré pagótami ayénachó echirigá machí.
\v 14 Echijiti ne noguí si'néami echi jaré ritémtami ayénachó waminabi wabé nílaga nakili nawisánala Riosi Ra'íchala, ayénachó aboni tarapé majaga echirigá nawésali, mapujiti aboni waminabi galá bichíili echi Walubela Jesucristo niráa.
\v 15 Bichíwali ju mapu jaré aboni we ra'icha Jesucristo jiti rugá, chopi mapujiti aboni wabé sulíami ju, ayénachó mapujiti aboni tamí we kichí; chopi auché jaré ritémtami ne bichíwali galá bichíiga nawésa Jesucristo jiti rugá, mapurigá auché jaré pagótami ayénachó galá bichíima.
\v 16 Jaré aboni chopi nawesa Jesucristo jiti rugá mapujiti aboni wabé nakí mapu anérami níima o'wéala nawésami niráa. Abóniko ketasi nakí mapu echi auché jaré pagótami bichíima Jesucristo niráa; aboni chopi nakí mapurigá nijeni waminabi kumérami níima, mapalini jena'í pachá bachárami ju.
\v 17 Chopi auché jaré ritémtami wabé galigá nawesa echi Galabé Riosi Ra'íchala, mapujiti aboni ne galá machí mapu nijeni jena'í pachá bachárami ju mapujítini galá bichíiga nawesa Riosi Ra'íchala mapurigá echi auché jaré pagótami ku wikawárami níima, a galá bichíisagá.
\v 18 Chopi nijeni arigá kanila mapalí jaré ritémtami nawesa Jesucristo jiti rugá. ¿Chu chireko a jaré chopi echirigá nawisásagá mapujiti aboni wabé nakí mapurigá aboni niráa anérami níima o'wéala nawésami? Nijeni ayénachó wabé kanila mapalí auché jaré nawesa chopi mapujiti aboni nakí mapu echi pagótami galá bichíisa ku wikawárami níima. A'lí nijeni sinibí waminabi kanílasama mapalí echi ritémtami arigá nawesa Jesucristo jiti rugá,
\v 19 mapujiti nijeni galá machí mapu je'ná jiti suwaba chopi ne galá ikimea tamí yuwa, mapujiti 'yémitamo sinibí táni Riosi mapurigá tamí waminabi ku'wírama, ayénachó mapujiti echi Galabé Jesucristo Iwigala sinibí tamí ku'wira.
\v 20 A'lí nijeni ne wabé nakí mapurigani tarapé riwélama, chopi mapurigani sinibí omérama ne galá bichíiga ra'icha echi We Galabé Riosi Ra'íchala, mapurigá echi auché jaré pagótami, tamí riwisá mapurigani galabé olá, arigá waminabi galá machimea mapu nijeni chopi omero echirigá galabé olayá mapujiti echi Walubela Jesucristo echirigá tamí olira. A'lí nijeni sinibí echirigá nakili, ayénachóni echirigá nakí jipi yénasí, áni waminabi bitélasagá, áni waminá mi'lirúami níisagá, keremá.
\v 21 Mapujiti áni waminabi bitélasagá, nijeni chopi nakimea olánala mapurigá Jesucristo nakí mapurigani olama. A'lí áni waminá mi'lirúami níisagá, nijeni ne wabé simírami narema, mapujítini Jesucristo yuwa asimea.
\v 22 Chopi áni waminabi bitélasagá jena'í wichimóbachi, echalí nijeni waminabi omérama echi Walubela Jesucristo nóchala olayá. Echijiti nijeni ketasi machí chuyiri waminabi galabé níima.
\v 23 Nijeni nakí mapurigani waminabi olama Jesucristo nóchala olayá, chópini ayénachó nakí mapurigani waminá mukumea, mapurigani asimea echi Walubela Jesucristo yuwa echo'ná ripá riwigachi, mapujiti echirigá waminabi wabé galabé níima.
\v 24 Chopi si'winárigá waminabi 'wérali ju mapurigá nijeni waminabi bitélasama jena'í wichimóbachi, mapurigani 'yemi mi waminabi binérama Riosi Ra'íchala.
\v 25 A'lí mapujiti nijeni je'ná jerigá ne bichíwali mayé, echijítini galá machí mapu nijeni abijí ripima 'yemi yuwa, mapurigani 'yemi mi ku'wírama mapurigátamo waminabi nokuísabo olayá mapurigá Jesucristo chopi nakí, ayénachó mapurigátamo waminabi kanílaga bichíibo Jesucristo niráa.
\v 26 Echirigá nijeni auchecho siné echo'ná 'yemi yuwa asimea, mapurigá 'yémitamo ne wabé kanílabo mapujítitamo galá bichíyami ju Jesucristo niráa.
\v 27 Sinibí ne wabé galabé ologá pirélasi, achigórigá mapurigátamo binératami níili galabé olánala, mapalítamo nawésarami níili Jesucristo Ra'íchala. A'lí nijeni nakí mapu ne si'néamitamo sinibí ne napawika niráa waminabi galá bichíisabotamo, ayénachó mapu si'néamitamo sinibí ne napawika nochabo mapurigá echi auché jaré pagótami galá nawésarami níima echi Galabé Riosi Ra'íchala. Nijeni nakí máputamo sinibí echirigá oláami níibo, áni echo'ná nawásagá 'yemi mi 'nénala, ayénachó a auché jaré tamí ruyésagá, 'yemi jiti rugá, mapalini mikabé atí.
\v 28 Chopi ketasi biyiri jiti majasi mapalí auché jaré 'yemi mi sayera. A'lí bichétamo echirigá ologá riwírabo mapurigá echi jaré 'yemi sayela ma waminá 'wigáami ju, chópitamo ayénachó riwírabo mapurigá Riosi 'yemi mi ma ku wikáwali.
\v 29 Mapujiti 'yémitamo 'yárami ju mapurigátamo galá bichíibo Jesucristo niráa, ayénachótamo 'yárami ju mapurigátamo risúu olárami níibo, mapujítitamo echirigá galá bichíi Jesucristo niráa.
\v 30 'Yémitamo chabénala niráa ma riwáli mapurigá nijeni wabé ni'yúraga olali, Riosi nóchala olayá, ayénachó jípitamo abijí ruyérami ju mapurigá nijeni echirigá ni'yúraga olá.
\c 2
\s Jesucristo ne Walubela níisa arigá a Binói niráa tabéatali
\p
\v 1 Jesucristo 'yemi mi nílatali mapurigátamo ne galá bichíibo; ayénachó 'yémitamo wabé kanila mapujiti Jesucristo 'yemi mi wabé galé. A'lí jípitamo níwa echi Wabé Galabé Jesucristo Iwigala, ayénachótamo a'nagupi ne wabé natimaka galé.
\v 2 Echijiti ne galá sébali tamí kaníratasi 'yemi. Sinibí bilénapi chópirigá ologá pirélasi. A'nagupi wabé galesi, ne napawika chópirigá ologá, bilénapi niráa 'nátaga.
\v 3 Sinibí galabé olasi ibili 'yemi, ketasi mapurigá wabé níliami niráa. Ketasi bilé nóchami níisi, chopi sinibí mapurigá kuchípala niráa mayesi. Galá níima mapurigá ibili 'yemi sinibí mayesa mapu echi auché jaré waminabi o'wéala ju, ketasi mapurigá 'yemi niráa.
\v 4 Ke wesi 'yemi sinibí nakíami níisi echi wabé galabéala chopi; ayénachó nakisí mapurigá echi auché jaré ritémtami narema echi wabé galabéala.
\p
\v 5 Sinibí achigórigá 'nátami níisi 'yemi, mapurigá echi Walubela Jesucristo galabé 'nátali.
\v 6 Mapujiti Jesucristo, echi Walubela Riosi yuwa, chopi a yiri níili, chopi Binói ketasi 'wérali olali mapurigá sinibí niráa achigó yiri níima Riosi yuwa.
\v 7 Chopi mapalí Jesucristo nawali jena'í wichimóbachi táa múchali niráa, echalí Binói pe okuáa bamíbali niráa ariweli Binói walubélawala, mapujiti Binói iyénali jena'í wichimóbachi mapurigá pióntami niráa.
\v 8 A'lí mapalí Jesucristo iyénali mapurigá Rijói niráa, echalí Binói abijí waminabi tabéala niráa niírali, mapujiti Jesucristo a Binói niráa nijali mapurigá mi'lirúami níima. A'lí Jesucristo ne wabé mi'lirúami níili, biléana kúrsichi michóniga.
\v 9 Echijiti Riosi wilali Jesucristo mapurigá ne wabé simírami Walubela niráa, mapurigá Jesucristo ne bachá Walubela níima, si'néami echi auché jaré o'wéala yuwa.
\v 10 A'lí Riosi echirigá olali mapurigá echalí ne jubá rawé ne si'néami pagótami jena'í wichimóbachi tibíami bacháami Jesucristo yuwa chokoba jábama mapalí aboni námiko Binói Jesucristo riwalá, ayénachó mapurigá si'néami pagótami echo'ná ripá riwigachi muchúwami echirigá olama, ne si'néami echi auché jaré pagótami ayénachó, si'néami mapu ikí waminá 'wigaga suwíliko.
\v 11 Echalí ne si'néami pagótami machimea mapu Jesucristo ne bachá Walubela ju, ayénachó si'néami aboni jeanimea mapu Binói ne Walubela ju. A'lí Riosi Onorúami echirigá waminabi walubélaga anérami níima.
\s Echi jaré napawika bichíyami ne galá machira echi ne Bichíwali
\p
\v 12 Echijiti 'yemi, keni ritémawa mápuni ne wabé galé, achigórigá mapurigátamo sinibí galá tamí nijéwali, jipi ayénachó galá tamí nijéwasi mapalí nijeni 'yemi mi ané máputamo kilí ologá, galá majaga, sinibí galabé ologá pirélabotamo, mapujiti Riosi ma 'yemi mi ku wikáwali. Jipi waminabi echirigá olasi mapalí nijeni mikabé atí, achigórigá mapurigátamo olali chabénala mapalini echo'ná 'yemi yuwa asali.
\v 13 A'lí echi Walubela Riosi chopi ju mapu 'yemi mi echirigá galabé oliri, ayénachó Binói sinibí 'yemi mi ku'wira mapurigátamo echirigá galabé olabo, mapujiti Riosi wabé nakí máputamo echirigá galabé oláami níibo.
\v 14 Sinibí ne suwaba galabé olasi. Tarapé ni'yókami níisi, nibilé siné chuwé na'áwami niráa.
\v 15 Mapurigátamo ketasi riwirúami níibo chati sitíi oláami niráa, chopi mapurigátamo Riosi kúchuwala níibo, tarapé chati sitíi oláami, mapuyénasítamo wabé galabé ologá piré jena'í wichimóbachi, mapo'ná echi auché jaré pagótami wabé chati sitíi oláami ju, wabé sitíi 'nátami ayénachó. A'lí mapuyénasí 'yémitamo echirigá galabé ologá piré, echalítamo galá machírabo echi ne Bichíwali jena'í mapo'ná echi auché jaré chati sitíi oláami pagótami mapurigá echo'ná rokowárali niráa chopi piré. A'lí bichétamo galá ratábami niráa níibo jena'í rokowárali, mapurigá echi wikabé sopolí ne galá ratábami ju.
\v 16 Ayénachótamo galá nawisabo echi we Galabé Riosi Ra'íchala. A'lí echalí mapalí echi Walubela Jesucristo ku nolínama, nijeni ne wabé kanílama mapujiti 'yémitamo galá bichíyami níili. Echalí nijeni machimea mapu nijeni galabé ologá bitéali, ayénachó mápuni ketasi 'wepi nóchali mapalini 'yemi mi nawésali echi Galabé Riosi Ra'íchala, mapujiti 'yémitamo galá bichíili.
\v 17 A'lí mapujítitamo echirigá galá bichíili, echijiti 'yémitamo aboni niráa 'yali Riosi, mapurigátamo chopi olabo mapurigá Riosi Binói nakí. A'lí nijeni arigá waminá mi'lirúami níisagá mapujítini ayénachó chopi nakí olánala mapurigá Riosi nakí, echalini arigá ne wabé kanílama, ayénachóni nakí mapu 'yémitamo galá kanílabo tamí yuwa.
\v 18 ¡Echirigá ne wabé kanílasi 'yemi, achigórigá mapurigá nijeni wabé kanila!
\s Pablo julánali echi Timoteo echo'ná Jilípochi, echi Epajorito ayénachó
\p
\v 19 A'lí echi Walubela Jesucristo echirigá nakisáagá, nijeni mayé mapu ke 'me ayó nijeni julama echi Timoteo echo'ná 'yemi mi 'nénala, mapurigani wabé kanílama mapalí binói ku nawasa tamí ku ruyema mapu 'yémitamo galabé ologá piré.
\v 20 A'lí je'ná Timoteo achigórigá 'nátami ju mapurigá nijeni 'nata, ayénachó binói ne wabé nakí mapu 'yémitamo ne bichíwali waminabi ku'wíratami níibo. A'lí ke wesi auché bilé nirú tamí yuwa nóchami mapu achigórigá galabéala 'nátami ju.
\v 21 Mapujiti ne si'néami echi auché jaré chopi nakí olánala mapurigá aboni nakí. A'lí ke wesi nakí olánala mapurigá Jesucristo nakí mapu aboni olama.
\v 22 Chopi 'yémitamo ma galá machí mapurigá echi Timoteo sinibí galabé ologá bitéali, ayénachó mapurigá binói sinibí tamí ku'wírali je'ná Galabé Riosi Ra'íchala nawésiya, achigórigá mapurigá bilé towí, wabé galá ku'wira binói onolá.
\v 23 Nijeni mayé mapu ke 'me ayó nijeni echirigá julama echi Timoteo echo'ná 'yemi mi 'nénala, mapalini ma galá machí churigani ikimea nijé;
\v 24 chopi nijeni ayénachó mayé mapu echi Walubela Jesucristo tamí ku'wírama mapurigá ke 'me ayó nijé binói ayénachó omérama echo'ná simiyá 'yemi mi 'némiya.
\p
\v 25 Chopi nijeni mayé mapu arigá 'wérali ju mápuni ayénachó echo'ná julama echi rijimala Epajorito riwéami, echi mapu tamí yuwa nóchami ju, echi mapu ayénachó achigórigá 'wérali olá, Riosi nóchala olayá. A'lí binói Epajorito ju mapu 'yemi aboni chabénala wakiná júuli mapurigá binói tamí ku'wírama.
\v 26 Echi Epajorito ne wabé 'nénali si'néami 'yemi ritémtami echo'ná Jilípochi piréami, ayénachó binói sinibí 'yemi chopi jiti 'nata, mapujiti binói galá machí mapu 'yémitamo ma ruyérami níili mapurigá binói we nayúami níili.
\v 27 A'lí ne bichíwali ju mapu echi Epajorito ne wabé nayúami níili; ayénachó binói ne noguí mukuli; chopi Riosi ma ne wabé natimaka ku sa'wáli. A'lí Riosi echirigá ologá ayénachó tamí wabé natimali, mapurigani ketasi ne wabé simírami o'monáma, mapujiti nijeni arigá we o'mona wiká karúmati jiti, chopi a ne bichíwali mukusáagá echi Epajorito, echalí nijeni ne wabé simírami o'monámili.
\v 28 Echijiti nijeni waminabi wabé nakí julánala echi Epajorito echo'ná 'yémichi, mapurigá 'yémitamo auchecho ku riwisáa, ne wabé kanílabotamo, ayénachó mapurigá nijeni auchecho ku kanílama.
\v 29 Galá kaníliga ku naresi echi Epajorito, mapujiti bilé rijimala ju, galá bichíyami niráa echi Walubela Jesucristo. Ne sinibí galá nilasi echi auché jaré ritémtami, si'néami mapu ikí achigórigá galabé oláami ju, mapurigá echi Epajorito olá,
\v 30 mapujiti binói ne noguí mukuli mapalí ne wabé simírami nóchali Jesucristo nóchala olayá. Echalí binói arigá ne wabé nakili tamí ku'wíranala, mapalí binói ketasi 'me kaníliami níili, mapujiti echirigá nayúami níili. Echalí binói echirigá nóchali tamí ku'wíriya, mapujiti ke wesi echi auché jaré 'yemi omérali tamí ku'wíriya, mapujítitamo we mikabé muchúwami níili.
\c 3
\s Echi Pablo galá omérali wachínaga ologá bitéliya mapujiti galá bichíili Jesucristo
\p
\v 1 Jipi, 'yemi keni ritémawa, ne wabé kanílasi mapujítitamo ma galá bichíi echi Walubela Jesucristo niráa. Tarapé nóchali ju mapurigani 'yemi mi auchecho siné osema achigórigá mapurigani chabénala 'yemi mi oseli. A'lí 'yémitamo galá ku'wíratami níibo átamo echirigá galá bichíisagá.
\v 2 Galá tibusi 'yemi aboni niráa, mapurigá echi auché jaré si'winárigá nawésami rijói ketasi 'yemi mi 'yékama. Abóniko wabé nakówami ju, mapurigá kochí niráa, ayénachó aboni wabé chati sitíi oláami ju. A'lí aboni chopi nakí mapurigá 'yémitamo noligá sikirétami níibo.
\v 3 Chopi tamujeta galá bichíiga o'wiké Riosi, iwigala niráa; ayénachóta wabé kanila mapujítita Jesucristo níwala ju. Tamujeta galá bichíyami ju Riosi, chópita ketasi mayé mapu echi jaré pagótami ku wikawárami níima, chopi mapujiti aboni noligá sikirétami ju.
\v 4 Chopi a echirigá nakisáagá nijé, siné káachini mayemi mapu nijé binói ku wikawárami níimi mapujítini galabé olali. A jaré mayésagá mapu aboni ku wikawárami níima mapujiti aboni we galá oláami ju, nijeni wabé simírami echirigá galá oláami níili, chópini galá machí mapu nijeni ketasi ku wikawárami níili mapujítini echirigá galabé oláami níili, chópini ne bichíwali ku wikawárami níili mapujítini galá bichíili.
\v 5 Nijeni noligá sikirétami níili ma osá naó rawé chi'lesa, mapalí jónsani nawáli. Nijeni Isaeli anilíwami pagótami ju, ayénachóni bilé ju echi jaré Benjamini kúchala kúchuwala. Nijeni Ebreo ra'íchami ju, mapurigá nijé 'wénawala ayénachó Ebreo ra'íchami níili. A'lí nijeni sinibí galá nijéwali echi nulalíwami, mapujítini níili binériami, Bariseo anilíwami.
\v 6 Echalí chabénala nijeni ne wabé nílaga olánali ne suwaba mapu echi Moisesi osogá nulali, ayénachóni wabé kichiga a'najátali echi jaré napawika bichíyami ritémtami, si'néami mapu ikí bichíyami níili Jesucristo niráa. A'lí mapujítini galá nijéwali echi nulalíwami, echijiti ke wesi echi jaré Juríosi pagótami tamí chibi aneli.
\v 7 Chabénala nijeni mayeli mapu suwaba je'ná jeyiri tamí ku'wíriami níili, chopi mani galá bichíili Jesucristo niráa, echijítini mayé mapu suwaba echi jaré namuti mápuni echirigá nijéwaga olali tarapé tamí ku'wírali, ayénachóni ma ariweli echiyiri namuti mapurigani chopi bichíima Jesucristo niráa.
\v 8 Echirigani ma tarapé natéami niráli suwaba echiyiri namuti mapurigani chabénala olali. Jipi nijeni chopi machinala echi Walubela Jesucristo, mapujítini mayé mapu suwaba echiyiri namuti mápuni chabénala olali tarapé natéami niráa ju, mapurigá ripuka niráa. Chopi ne wabé simírami galabé ju máputa bichíibo Jesucristo niráa, ayénachó máputa Binói níwala níibo. Echijiti nijeni ma ariweli suwaba echi jaré namuti mápuni chabénala olali.
\v 9 Jipi nijeni chopi nakí mapurigani Jesucristo yuwa riwirúami níima, ne galabé wachínaga oláami niráa, mapujiti Riosi tamí echirigá 'yama, mapujítini ma galá bichíili Jesucristo niráa. Chopi nijeni ketasi echirigá galá wachínaga oláami níima, mapujiti nijé binói nijéwaga olali mapurigá Moisesi osogá nulali.
\v 10 Nijeni chopi nakí mápuni waminabi galá machimea Jesucristo, ayénachó mápuni níwama Binói níwala omérawala, achigórigá mapurigá Binói wabé omériami níili mapalí ku owínali, mapalí ma mukúami níili. Ayénachóni nakí mápuni risúu olárami níima mapurigá Jesucristo risúu olárami níili, ayénachó mápuni mukumea mapurigá Binói mukuli,
\v 11 mapujítini nakí mápuni auchecho ku owínama echalí mapalini ma mukúami níima.
\s Echi Pablo galá bichíiga bitéali mapurigá binói auchecho ku owínama waminánomí
\p
\v 12 Nijé ketasi nakí aninala mápuni ma sebárali suwaba je'ná jeyiri, mapujiti nijeni ketasi cho sebárali echi ne wabé Galabéala. Arigani bacháami minabi inara mapurigani sebárama echi ne wabé Galabéala, mapujiti Jesucristo bachá niráa tamí ku wikáwali mapurigani echirigá 'yárami níima.
\v 13 Keni ritémawa, nijé binói ketasi aní mápuni ma sebárali echi ne wabé Galabéala, chópini arigá 'wérali olá mapurigani ma ketasi auchecho ku 'natama suwaba echi jaré namuti jiti mápuni ma olali. Jípini 'wérali olá mapurigani sebárama ne suwaba mapu Riosi tamí 'yama waminánomí,
\v 14 mapurigani sunima suwaba nóchali mapu Riosi tamí 'yali mapurigani olama, ayénachó mapurigani narema echi wabé Galabéala mapu Riosi tamí 'yama, mapujiti echi Walubela Riosi echo'ná ripá riwigachi atíami tamujé tamí 'yama echi ne wabé Galabéala, mapujítita Jesucristo níwala ju.
\v 15 Galá níima mapu ne si'néami tamujé mapu ikita sébali galá bichíyami juko ayénachó je'ná jerigá 'natasa. A'lí a jaré 'yemi si'winárigá 'natásagá bilé namuti jiti, echalí Riosi ayénachó 'yemi mi machírama mapu nijeni ne bichíwali aní.
\v 16 Chopi arigá galá níima máputa waminabi galá bichíiga olabo, achigórigá mapurigata ma galá bichíili.
\v 17 'Yemi keni ritémawa sinibí achigórigá galabé olasi mapurigá nijeni olá, ayénachó olasi mapurigá echi auché jaré ritémtami olá, si'néami mapu ikí chopi olá mapurigá tamujeta binérali aboni.
\v 18 Mapujiti wikabé 'yena Jesucristo kúrsuwala sayériya. Je'ná jerigá aniwáami ju: Abóniko chopi sayéraga nawesa jeanigá mapu Jesucristo ketasi mukuli echi pagótami chati sitíi olalila jiti. Chabénala nijeni wisabé 'yemi mi je'ná jerigá aneli, ayénachóni abijí ne ukuénaga 'yemi mi echirigá ruyé.
\v 19 Echalí ne jubá rawé abóniko waminá suwábarami níima. Abóniko ketasi o'wiké echi Walubela Riosi, chopi aboni chuwé olá mapurigá aboni chopi nakí olánala. A'lí abóniko ne wabé nóchami ju, chopi galá níima mapu aboni ne wabé riwélasa. Abóniko chopi wabé koruka 'nata jena'í wichimóbachi nirúami namuti jiti.
\v 20 Chopi tamujé bichíyami mata níwa risensia máputa echo'ná ripá riwigachi piréami níibo. A'lí jípita buwé mapurigá echo'ná ripá riwigachi jonsa ku nolínama echi Walubela Jesucristo, echi mapu tamujé tamí Ku'wíriami ju.
\v 21 Échiko si'nú bukulíwami ku galabéala niráa niwáma tamujé sapala mapu arigá risúwati, pe omérami ju; mapurigá tamujé sapala ku galabé niwárami níima, achigórigá mapurigá Jesucristo galabéala sapala, echo'ná ripá riwigachi nirúami. A'lí Jesucristo echirigá ne wabé omériga olama mapujiti Binói ne Walubela ju, suwaba namuti yuwa.
\c 4
\s Sinibí wabé kanílasi mapujítitamo bichíi echi Walubela Jesucristo
\p
\v 1 Echijiti 'yemi keni ritémawa sinibí waminabi nokuíisi ne galá bichíisiya. Nijeni 'yemi mi ne wabé galé; ayénachóni ne wabé nakí 'yemi mi 'nénala, mapujiti 'yémitamo galá bichíili Jesucristo niráa, mapalí nijeni 'yemi mi nawésali Riosi Ra'íchala. Echirigá 'yémitamo tamí 'yárami níili mapurigá nijé natétawami niráa.
\v 2 Nijeni we táni mapurigá echi okuá muguí, echi Eboria riwéami, echi Síntike riwéami, a'nagupi auchecho galá ku kanílaga chópirigá 'natama, mapujiti okuánika galá bichíyami ju Jesucristo, mapurigá ritémtami niráa.
\v 3 Ayénachó nijeni mi táni, mujé mápumi galá bichíiga nóchami ju tamí yuwa, mápumi galá ku'wírama je'ná okuá muguí mapu galá bichíyami ju Jesucristo, mapurigá ritémtami niráa. Abóniko ma wabé tamí ku'wírali mapalini iyénali echi Galabé Riosi Ra'íchala nawésiya, achigórigá mapurigá echi Klemente riwéami rijói ayénachó tamí ku'wírali, ayénachó mapurigá echi auché jaré ritémtami tamí wabé ku'wírali. Ne si'néami aboni riwalá ma osirúami ju echo'ná Riosi oselíwalachi mapurigá aboni ne sinibí niráa pirélama.
\p
\v 4 Sinibí ne wabé kanílasi mapujítitamo echi Walubela Jesucristo níwala ju. Auchecho siné nijeni 'yemi mi jerigá ruyé: ¡Ne wabé kanílasi!
\v 5 Sinibí ne wabé galigá olasi suwaba mapu ikítamo olá, mapurigá echi auché jaré pagótami 'yemi mi machimea mapurigá ne galá galéami niráa. ¡Echi Walubela Jesucristo ke 'me ayó ku nolínama jena'í wichimóbachi!
\p
\v 6 Tarapebi yiri jiti siwega 'natasi 'yemi, chopi sinibí Riosi yuwa ra'íchaga tansi mapurigá Binói 'yemi mi ku'wírama; ayénachó sinibí walú natétara 'yasi.
\v 7 Echalí Riosi 'yemi mi 'yama máputamo sinibí kilí ologá pirélabo. A'lí bichétamo ketasi omérabo machiyá mapu churigá Riosi echiyena ne wabé simírami 'yemi mi ku'wira, chopi Binói 'yemi mi echirigá tibútama sulachí niráa, ayénachó Binói 'yemi mi 'yama máputamo sinibí galabé niráa 'natabo.
\s Galá 'natasi echi galabéala 'nalina
\p
\v 8 Keni ritémawa, ne jubáami niráa nijeni 'yemi mi ané máputamo suwaba chopi 'natabo echi ne Bichíwali 'nalina, ayénachó 'natasi suwaba echi ne wabé galabéala 'nalina mapu galabé nirárami ju, ayénachó chopi 'natasi suwaba mapu wachínaga oluwáwami ju. Sinibí 'natasi suwaba mapu ketasi chati sitíi oluwáwami ju, ayénachó 'natasi suwaba echi jaré namuti 'nalina mapu Riosi echijiti sinibí galá kanila, ayénachó 'natasi ne suwaba 'nalina mapu machirúami ju galabéala niráa. Echirigá sinibí 'natasi suwaba echi galabéala 'nalina, suwaba mapu Riosi Binói galabéala niráa ané.
\v 9 Sinibí galabé ologá pirélasi achigórigá mapurigá nijeni 'yemi mi binérali, achigórigá mapurigá nijeni 'yemi mi nuleli máputamo olabo, ne suwaba máputamo námali tamí ra'íchachi, ne suwaba mapu ikítamo riwali tamí oláachi. Jipi jonsa ne suwaba echirigá galabé olasi, a'lí echi Walubela Riosi mapu 'yemi mi 'yali mapurigátamo sinibí galá kilí ologá pirélabo, Échiko sinibí 'yemi mi yuwa níima.
\s Echo'ná Jilípochi piréami náwali jaré wenomí echi Pablo 'yánala
\p
\v 10 Nijeni ne wabé kanila mapurigá bichíyami niráa echi Walubela Jesucristo, mapujiti 'yémitamo ma auchecho siné ku 'nátali tamí jiti. Nijeni ke siné mayeli mapu 'yémitamo ketasi tamí jiti 'natabo, mapujítini galá machí máputamo ketasi omérali tamí ku'wíranalaga náwala, mapujiti chabé jonsa ke wesi simili echo'ná 'yémichi jonsa, jena'í yénasí.
\v 11 Nijeni ketasi aní mápuni ne wabé newalé jaré namuti, mapujiti nijeni ma bineli mápuni sinibí kanílama echi jaré namuti chopi jiti mapu ikini níwa.
\v 12 Nijeni galá machí risúwati niráa bitéliya, ayénachóni machí ne simírami niráa níwaga bitéliya. Nijeni sinibí kanílaga bité mapalini ne suwaba níwa, ayénachó mapalini ne wabé 'loché. Echirigá nijeni sinibí galá kanila mapalini tarapé namuti níwa, achigórigá mapurigani kanila mapalini wikabé simírami níwa.
\v 13 Nijeni galá omero anacha mapuyíripi tamí yuwa ikí, mapujiti Jesucristo tamí jiwérata.
\v 14 Chopi 'yémitamo arigá ne wabé galabé olali mapalítamo náwala tamí ku'wíranala.
\p
\v 15 'Yemi napawika bichíyami ritémtami echo'ná Jilípochi piréami ne galá machí mapu ke wesi auché jaré ritémtami tamí ku'wírali mapalí nijeni chótali nawésiya Riosi Ra'íchala, mapujiti chabénala mapalí echo'ná Maseróniachi anilíwachi kawírali jonsa nijeni waminá bacháami auché jaréana nawisásiya simili, echalí 'yémitamo chopi náwali tamí ku'wíranala, mapujítitamo galá kaníili mapalí nijeni 'yemi mi nawésali Riosi Ra'íchala.
\v 16 Chabé mapalí nijeni abijí echo'ná Tesalónachi anilíwachi walúlachi asali, echalí 'yémitamo náwali tamí ku'wíranala. A'lí ketasi sinepi chopi níili mapalítamo echirigá náwali tamí 'yánalaga echi jaré namuti mapu nijeni newaleli.
\v 17 Nijeni ketasi chopi nakí mapu 'yémitamo tamí 'yabo jaré 'yemi níwala namuti. Nijeni nakí mapu 'yémitamo waminabi wabé níwami níibo Riosi yuwa, mapujítitamo echirigá ku'wírali mapurigá Riosi Ra'íchala waminabi nawisárami níima.
\v 18 Mapujiti nijeni ma nareli suwaba mapu ikí nijeni newalé. Mani nareli echi jaré namuti mapu 'yémitamo náwali tamí ku'wíranala, echi Epajorito tórataga. Jípini ne wabé simírami níwa. A'lí Riosi Binói ne wabé kaníili mapujiti 'yémitamo echirigá tamí ku'wírali, achigórigá mapurigá Binói kaníili mapalí echi jaré Juríosi pagótami ikósaga 'yali echi wabé simírami júkami moluwá.
\v 19 A'lí echi Walubela nijé Riósawala ne wabé simírami 'yemi mi 'yama suwaba mapu ikítamo newalé, achigórigá mapurigá Binói ne wabé simírami níwami ju echo'ná ripá riwigachi, Jesucristo yuwa.
\v 20 ¡Sinibí niráa waminabi walubélaga anérami nílaga Riosi, tamujé Onolá! ¡Echirigá níima!
\s Pablo ku ripora echi jaré napawika bichíyami
\p
\v 21 Nijeni náwali walú ripóranala ne si'néami echi jaré napawika bichíyami ritémtami, mapujítita Jesucristo níwala ju.
\v 22 Ne si'néami echi jaré Riosi níwala pagótami jena'í Rómachi piréami ayénachó 'yemi mi ripóraga náwali. A'lí ne bachá niráa 'yemi mi ripóraga náwali echi jaré ritémtami mapu echo'ná echi ne walula silíami kalílachi nóchami ju.
\v 23 Nijeni wabé nakí mapu echi Walubela Jesucristo sinibí ne wabé galigá ku'wírama si'néami 'yemi. ¡Echirigá níima!