\id col
\h Kolosenses
\mt2 Osirúami
\mt2 mapurigá San Pablo oséli echo'ná
\mt KOLÓSACHI PIRÉAMI
\c 1
\s Echi Pablo osé echo'ná Kolósachi piréami napawika bichíyami
\p
\v 1 Nijé, Pablo, 'yemi mi osé je'ná oselí. Nijeni julárami ju nawisánala echi Galabé Riosi Ra'íchala mapurigá Riosi Binói nakí. Ayénachó echi rijimala Timoteo tamí yuwa atí.
\v 2 Nijeni je'ná jerigá 'yemi mi osé máputamo echo'ná Kolósachi anilíwachi piréami ju, si'néami máputamo ikí Riosi níwala pagótami ju, mapujítitamo galá bichíi Jesucristo niráa. Wabeni nakí mapu echi Walubela Riosi, tamujé Onolá, 'yemi mi wabé ku'wírama, ayénachó mapu Binói 'yemi mi 'yama mapurigátamo kilí ologá pirélabo.
\s Echi Pablo tani mapurigá Riosi ku'wírama echi jaré bichíyami
\p
\v 3 Ne sinibí mapalí tamujeta Riosi yuwa ra'íchaga tani mapurigá Binói 'yemi mi ku'wírama, tamujeta walú natétara 'ya echi Walubela Riosi, echi mapu tamujé Walubélawala Jesucristo Onolá ju.
\v 4 Tamujeta ma námali mapurigá 'yémitamo ma wabé galá bichíili Jesucristo niráa. Ayénachóta námali mapurigátamo ne wabé galé si'néami echi auché jaré Riosi níwala pagótami.
\v 5 A'lí 'yémitamo echirigá galé aboni mapujítitamo galá bichíiga buwé mapurigátamo narepo ne suwaba echi galabéala mapu Riosi 'yemi mi 'yama echo'ná ripá riwigachi. A'lí bichétamo echirigá bichíiga buweli chabé jonsa mapalí jónsatamo bachá niráa námali echi ne bichíwali galabé Riosi Ra'íchala.
\v 6 A'lí je'ná Galabé Riosi Ra'íchala mapu nawisárami níili echo'ná 'yémichi ayénachó ma nawisárami ju ne suníami jena'í wichimóbachi. A'lí mapurigá 'yémitamo wabé galabératami níili mapalítamo galá bichíili echirigá nawisálawami jeanigá mapu Riosi ne bichíwali 'yemi mi wabé galé, jipi ayénachó auché jaré pagótami wikanáami piréami echirigá achigórigá bichíisimi. A'lí aboni ayénachó echirigá achigórigá galabératami níilasimí.
\v 7 A'lí bichétamo bachá niráa binératami níili Riosi Ra'íchala mapalí echi Epájasi riwéami rijimala 'yemi mi nawésali. A'lí echi Epájasi Jesucristo piónawala ju ne galá bichíyami niráa, mapurigá tamujé ayénachó Jesucristo piónawala ju. A'lí ne si'néamita ne wabé galé echi Epájasi mapujiti binói ne galá nawésami ju Jesucristo Ra'íchala.
\v 8 A'lí echi Epájasi ma tamujé tamí ruyeli mapurigá 'yémitamo a'nagupi galéami ju, ritémtami niráa, mapurigá echi Wabé Galabé Riosi Iwigala 'yemi mi echirigá olírali.
\p
\v 9 Echijiti tamujeta sinibí táni mapurigá Riosi 'yemi mi ku'wírama. A'lí bicheta echirigá tánali echalí rawé jonsa mapalita bachá námali máputamo galá bichíyami níili. A'lí bicheta we tani Riosi máputamo ne sébali galá machiboa suwaba mapu Riosi Binói nakí máputamo olabo. Ayénachóta tani mapu Riosi 'yemi mi 'yama mapurigátamo ne galá machíami níibo, ayénachó mapurigátamo galá 'nátami níibo, achigórigá mapurigá Riosi Binói galá 'nátami ju.
\v 10 A'lí bicheta tani máputamo sinibí galabé ologá 'yénabo mapurigá galá níima oluwawa mapujiti 'yémitamo echi Walubela Jesucristo níwala ju. Ayénachóta tani máputamo sinibí ne suwaba galá olabo mapurigá Riosi nakí máputamo olabo, ayénachó máputamo sinibí ne sébali olabo echi ne wabé galabé oluwáwami. Ayénachóta táni máputamo sinibí rawé binebo waminabi galabé machiyá Riosi.
\v 11 Ayénachóta tani mapu Riosi 'yemi mi waminabi galá bichíiratama, mapujiti Binói echi ne wabé jiwérami Walubela Riosi ju. Echalítamo wabé kanílaga pirélabo, ayénachótamo galá omérabo kilí ologá anacha mapurigátamo risúu olárami ju, ayénachótamo arigá ne wabé kanílabo sulachí niráa.
\v 12 Ayénachóta tani mapu 'yémitamo sinibí walú natétara 'yabo echi Riosi Onorúami, mapu tamujé tamí ku'wírali mapurigata galá omérabo narée suwaba echi galabéala nijíwami mapu Riosi tamujé tamí 'yama, achigórigá mapurigá si'néami echi auché jaré Riosi níwala pagótami ayénachó narema echo'ná ripá riwigachi, mapo'ná sinibí ne wabé ratábami niráa rayénama.
\v 13 A'lí echi riablo ne wabé omériami ju tamujé tamí sayera. Chabénala mapalita ketasi cho machili Riosi, echalí echi riablo tamujé tamí omérali, chopi jipi mapujítita galá bichíiga nijewa Riosi, jipi Riosi tamujé tamí muchúwali echo'ná mapo'ná echi bilepi Riosi Ranala we Nuláami ju, echi mapu Riosi ne wabé galé.
\v 14 A'lí echi bilepi Riosi Ranala tamujé tamí ku'wírali mapalí Binói miná mi'lirúami níili tamujé chati sitíi olalila jiti. Echirigá Binói tamujé tamí ku wikáwali suwaba mapurigata chati sitíi olali.
\s Riosi 'yali mapurigá echi jaré pagótami omérama kilí ologá piréliya Binói yuwa, mapujiti echi bilepi Riosi Ranala wabé léniga mukuli aboni jiti echo'ná kúrsichi
\p
\v 15 A'lí echi Walubela Riosi Onorúami ke ritiwíwami ju. Chopi echi bilepi Riosi Ranala arigá nawali jena'í wichimóbachi mapurigá Rijói niráa. A'lí echi Bilepi Jesucristo chopi a yiri ju echi Walubela Riosi Onorúami yuwa, chopi Jesucristo mapurigá Rijói niráa niílali. A'lí echi Bilepi Riosi Ranala sinibí bitéali chabé chokichí mapalí ke cho niwárami níili suwaba echi jaré namuti mapu ikí nirú.
\v 16 A'lí echi Walubela Riosi nuleli echi bilepi Binói Ranala niwánala ne suwaba namuti mapu ikí nirú echo'ná ripá riwigachi, ayénachó ne suwaba namuti mapu ikí nirú jena'í wichimóbachi. Echirigá echi bilepi Riosi Ranala niwáli ne suwaba echi jaré namuti mapu ikí ke machiná nirú, ayénachó Binói niwáli ne suwaba echi auché jaré namuti mapu ikí galá machiná nirú. Ayénachó Binói niwáli ne si'néami echi jaré o'wéala Riosi kapitánawala, ne si'néami mapu ikí pée o'wéala ju mulubé Riosi yuwa, ayénachó ne si'néami mapu ikí o'wéala ju tamujé pagótami yuwa. Echirigá ne suwaba namuti niwárami níili Jesucristo jiti, ayénachó ne suwaba niwárami níili mapurigá Jesucristo níwala níima.
\v 17 A'lí echi Walubela Jesucristo sinibí niráa bitéali ki'yá chokichí mapalí ketasi cho niwárami níili echi jaré namuti mapu ikí nirú. A'lí biché Binói sinibí jiwérataga olá mapurigá ne suwaba namuti ketasi miná suwibama.
\v 18 Ne suwaba je'ná jerigá ne bichíwali ju. Chopi ayénachó bichíwali ju mapu echi Walubela Jesucristo ne Walubela ju si'néami echi jaré napawika bichíyami yuwa achigórigá mapurigá bilé rijói mo'ola ne bachá niráa ju suwaba echi rijói sapala yuwa. Mapujiti ne si'néami echi jaré napawika bichíyami, ne napawika niráa, mapurigá bilepi rijói niráa ju, chopi Jesucristo ne Walubela ju si'néami aboni yuwa, mapurigá echi bilé rijói mo'ola niráa. Ayénachó Jesucristo 'ya mapurigá echi jaré napawika bichíyami galá bichíiga pirélama. Ayénachó Jesucristo ne bachá níili mapu Binói ku owínali mapalí ma mukúami níili, mapurigá Binói echijiti ne Walubela níima ne suwaba yuwa.
\v 19 Mapujiti echi Walubela Riosi Binói ne suwaba nakili bitéranala echo'ná pachana Jesucristo yuwa.
\v 20 Ne si'néami pagótami wabé sayérali Riosi, chopi Riosi ketasi nakili mapu echi pagótami echirigá waminabi sayérama Binói. Echijiti Riosi nijali echi bilepi kepu Raná mapurigá Binói Jesucristo mukumea echi jaré pagótami chati sitíi olalila jiti, echo'ná biléana kúrsichi michónataga. Echirigá ne si'néami pagótami mapu ikí bichíima Jesucristo niráa, galá ku kanílama Riosi yuwa. A'lí Riosi nakili mapu ne si'néami pagótami jena'í wichimóbachi piréami echirigá ku kanílama Binói yuwa, ne si'néami pagótami echo'ná ripá riwigachi muchúami ayénachó. Echijiti Jesucristo mukuli echo'ná kúrsichi, aboni chati sitíi olalila jiti.
\p
\v 21 Chabénala 'yémitamo ketásirapé machili Riosi. Echalí 'yémitamo sinibí wikabé namuti wabé chati sitíi olali. Echirigátamo chopi wabé chati sitíi 'nátaga sayérali Riosi echo'ná 'yemi sulálachi niráa. Jipi Riosi ma 'yemi mi ku kanílatali Binói yuwa, mapurigátamo ne wabé galigá pirélabo Riosi yuwa.
\v 22 A'lí Riosi je'ná jerigá olali mapujiti Binói Ranala, echi Walubela Jesucristo, rijói niráa wabé léniga mukuli echo'ná kúrsichi, mapurigá Riosi echijiti galá omérama 'yemi mi wéemi raweka jawaba bacháami Binói Riosi yuwa, Binói níwala niráa, tarapé chati sitíi oláami, nirapé wi'nijírami niráa.
\v 23 A'lí bichétamo pe waminánomí echirigá jawábarami níibo átamo ne bichíwali ne wabé galá bichíyami níisagá Jesucristo niráa. Ayénachó átamo ne sinibí echirigá achigórigá galá bichíisagá, ayénachó átamo ke siné ariwésagá bichíisiya mapu Riosi sinibí 'yemi mi waminabi ku'wírama. Mapujiti mátamo bichíili echirigá nawisálawami mapurigá ayénachó nawisárami ju ne suníami jena'í wichimóbachi. A'lí nijé Pablo ayénachó ku'wira echirigá nawesa.
\p
\v 24 Jipi nijeni arigá wabé kanila mapalí echi jaré ke bichíyami pagótami tamí risúu olá mapujítini 'yemi mi nawesa Riosi Ra'íchala. A'lí nijeni echirigá kanila mapujítini echirigá péebi niráa risúu olárami ju, mapurigá Jesucristo Binói waminabi wabé simírami risúu olárami níili mapalí Binói waminá mi'lirúami níili echi jaré Binói pagótamawala chati sitíi olalila jiti. A'lí si'néami echi jaré napawika bichíyami, ne napawika niráa ju, mapurigá Binói Jesucristo sapala niráa ju.
\v 25 A'lí Riosi tamí wilali mapurigani nawésama echi jaré napawika bichíyami. Echirigá Riosi tamí nawesánala júuli mapurigani 'yemi mi echirigá ku'wírama, mapurigani ne suwaba, ne sébali niráa, 'yemi mi nawésama Riosi Ra'íchala.
\v 26 Ayénachó tamí nawesánala júuli mapurigani galá machírama echi jaré pagótami mapurigá echi Walubela Riosi Ranala pachana bitélama echi jaré bichíyami pagótami sulálachi niráa. Chopi chabé ki'yá, ne wabé wikabé bamíbali jonsa, je'ná jerigá ketasi cho machirúami níili jena'í wichimóbachi piréami jiti. Chopi jipi Riosi ma 'yali mapurigá Binói níwala pagótami galá machimea ne suwaba je'ná jeyiri.
\v 27 A'lí Riosi nakili mapu echi jaré Binói níwala pagótami galá machimea mapurigá Binói Riosi wabé omériga olama riwéali echi jaré isena pagótami yuwa mapu ketasi Juríosi ju. A'lí Riosi je'ná jerigá olánali: Binói nakili mapu echi Walubela Jesucristo bitélama echo'ná pachana 'yemi sulálachi niráa. A'lí bichétamo echijiti bichíiga buwebo mapurigátamo wabé o'wéalatami níibo Jesucristo yuwa waminánomí.
\p
\v 28 A'lí tamujeta sinibí galá nawesa Jesucristo jiti rugá. A'lí tamujeta echirigá galá ruwigá binera ne si'néami pagótami mapurigá aboni galá machimea Riosi Ra'íchala, ayénachó mapurigá aboni galá bichíima Jesucristo niráa, mapurigá aboni napabúrami níima Jesucristo yuwa.
\v 29 A'lí bicheni sinibí echirigá nawésaga nocha mapurigá echi Walubela Jesucristo Binói tamí wabé omériga jiwérata.
\c 2
\p
\v 1 A'lí nijeni wabé nakí mapu 'yémitamo galá machiboa mapu chu yena 'nata nijé 'yemi jiti. Ayénachó nijeni wabé tani Riosi 'yemi jiti, ayénachóni tani echi auché jaré napawika bichíyami jiti echo'ná Laoriséachi anilíwachi piréami, si'néami mapu ikí ketasi cho tamí ritiwako.
\v 2 Ayénachóni nakí mapu si'néami aboni ne galá kanílatami níima sulachí niráa, mapurigá aboni a'nagupi ne wabé galema. Ayénachóni nakí mapu aboni sinibí ne galá bichíiga pirélama Jesucristo niráa, ayénachó mapurigá aboni ne bichíwali galá machíami níima mapurigá aboni galá machimea echi wabé galabéala mapu chinátami niráa níili, mapujiti ki'yá rawé Riosi ketasi cho machiná niráa riwírali echi Walubela Jesucristo jena'í wichimóbachi, chopi chabé bukulí rawé jonsa Binói ma machiná niráa riwírali.
\v 3 Mapujiti echi jaré pagótami chopi ne galá 'nátami níima, ayénachó aboni chopi ne galá machíami níima mapalí aboni ne galá machí echi Walubela Jesucristo.
\v 4 A'lí nijeni 'yemi mi je'ná jerigá ané mapurigátamo ketasi bichíibo mapalí auché jaré wabé simati ra'íchami 'yemi mi nakí 'yékanala.
\v 5 Jípini ketasi echo'ná 'yemi yuwa atí, chópini arigá sinibí wabé 'nata 'yemi jiti. Echijítini wabé kanila mapalini nami mapu 'yémitamo arigá we galá olá, mapurigá galá ju máputamo olabo. Ayénachó nijeni wabé kaníili mapalini nami mapu 'yémitamo sinibí waminabi galá bichíisimi Jesucristo niráa.
\p
\v 6 Echijiti mapurigá 'yémitamo ma galá bichíiga nareli echi Walubela Jesucristo echo'ná pachana 'yemi sulálachi niráa, echirigá achigórigá galá níima máputamo sinibí ne galabé ologá napawika pirélasa Binói yuwa.
\v 7 Ayénachó galá níima máputamo waminabi galá bichíibo Jesucristo niráa achigórigá mapurigátamo binératami níili. Ayénachó galá níima máputamo sinibí walú natétara 'yabo Riosi. Echalítamo ne bichíwali galá jiwériga bichíyami níibo, mapurigá echi walú rojuá wabé jiwérami ju, mapujiti wabé jiwéraga nawéami ju.
\s Echi jaré bichíyami bukulíwami niráa ku piré mapujiti aboni galá bichíi Jesucristo niráa
\p
\v 8 Ne galá tibútasi 'yemi aboni niráa, mapurigá echi jaré 'yékaka nawésami ketasi 'yemi mi 'yékama, mapujiti aboni ne wabé 'yékaka niráa ra'icha. A'lí aboni chopi ra'icha achigórigá mapurigá aboni 'yékaka niráa 'nata, ayénachó mapurigá echi auché jaré ke bichíyami pagótami sinibí 'nata, jena'í wichimóbachi nirúami namuti jiti.
\p
\v 9 A'lí echi Walubela Jesucristo arigá achigó yiri ju echi Walubela Riosi Onorúami yuwa, chopi Jesucristo ayénachó Rijói ju.
\v 10 A'lí 'yemi galá bichíyami ma sebárali suwaba echi ne wabé galabéala, mapujiti 'yémitamo ma napabúrami ju echi Walubela Jesucristo yuwa. A'lí Binói Jesucristo waminabi ne wabé simírami Walubela ju, ketasi mapurigá echi auché jaré o'wéala iwigá.
\v 11 Echi jaré Juríosi pagótami sinibí noligá sikirela echi jaré aboni kúchuwala echo'ná aboni sapálachi niráa, mapurigá aboni isena niráa níima echi auché jaré pagótami yuwa. Chopi 'yemi galá bichíyami arigá wabé galabératami níili echo'ná pachana 'yemi sulálachi niráa mapalítamo napabúrami níili Jesucristo yuwa, mapurigátamo isena níibo echi auché jaré ke bichíyami pagótami yuwa. A'lí bichétamo chopi echirigá galabératami níili echo'ná pachana 'yemi sulálachi mapalítamo ku wikawárami níili ne suwaba máputamo chati sitíi olali, ne suwaba mapu ikí 'yémitamo chati sitíi olánali 'yemi sapálachi niráa. A'lí echi Walubela Jesucristo 'yemi mi echirigá galabératali mapalítamo galá bichíili Binói niráa.
\v 12 A'lí mapalí 'yemi bichíyami ma pagótami níili echo'ná ba'wírali, echalí 'yémitamo echi Walubela Jesucristo yuwa chu'wirótami niráa níili echo'ná ba'wírali. A'lí bichétamo ayénachó ku owíntarami niráa níili echi Walubela Jesucristo yuwa echalí mapalítamo ku 'machínali echo'ná ba'wírali jonsa, mapujítitamo bachá niráa galá bichíili echi Walubela Riosi niráa, echi mapu ne suwaba omérami ju, echi mapu ku owíntali echi Walubela Jesucristo mapalí Binói ma mukúami níili.
\v 13 Chabénala 'yémitamo mapurigá suwíami niráa níili iwigá niráa mapujítitamo ketasi bichíyami níili Riosi. Echalítamo ketasi cho napabúrami níili Jesucristo yuwa, chópitamo wabé chati sitíi oláami níili. Echalítamo achigórigá ologá piréali mapurigá echi auché jaré wichimóbachi piréami. Chopi jipi Riosi ma 'yemi mi 'yali mapurigátamo ne sinibí niráa pirélabo echi Walubela Jesucristo yuwa, mapujiti Riosi ma 'yemi mi ku wikáwali suwaba mapurigátamo chati sitíi olali.
\v 14 Jena'í wichimóbachi piréami pagótami ketasi ne sébali galá nijéwaga olali mapurigá Riosi nulali. Echijiti arigá 'wérali níili mapu Riosi tamujé tamí kastigo 'yama, chopi echi Walubela Jesucristo mi'lirúami níili tamujé chati sitíi olalila jiti, clavo jiti michónataga echo'ná kúrsichi, echijiti Riosi ma galá ku wikáwali suwaba mapu ikí tamujeta chati sitíi olali, si'néami mapu ikita ma galá bichíiliko Jesucristo niráa.
\v 15 A'lí mapalí echi Walubela Jesucristo mukuli echo'ná kúrsichi tamujé chati sitíi olalila jiti, Binói echirigá wabé omérali suwaba echi jaré o'wéala chati sitíi iwigá mapu arigá wabé omérami níili. Ayénachó echi Walubela Jesucristo ne machiná niráa 'nérali mapurigá echi jaré o'wéala chati sitíi iwigá ma omératami níili, mapujiti aboni tibili mapurigá omératami niráa mapalí echi Walubela Jesucristo echirigá ni'yúrali.
\s Galá níima mapu si'néami echi jaré Jesucristo jiti bichíyami chopi asa echi jaré namuti ripá riwigachi jonsa nolínami
\p
\v 16 Echijiti ketasi ariwesi 'yemi mapu echi auché jaré Juríosi pagótami 'yemi mi wi'nijima mapujítitamo ko'wá jaré namuti mapu aboni ketasi risensia niráa mayé, nirapé mapurigá aboni 'yemi mi wi'nijima mapujítitamo bají jaré bajíwami mapu aboni ketasi risensia niráa mayé. Ke siné ariwesi mapurigá aboni 'yemi mi wi'nijima mapujiti 'yémitamo ketasi omawa mapalí aboni arigá wabé omawa, nibilé mapalí 'yémitamo ketasi omawa mapalí echi michá bukulíwami ju, nirapé mapalí 'yémitamo ketasi isaba achigórigá mapurigá aboni olá echalí isábawachi rawé.
\v 17 Mapujiti ne suwaba echiyiri namuti chopi tamujé tamí binérali mapu churigá ikimea riwéalo ma nawáachi echi Walubela Jesucristo jena'í wichimóbachi.
\v 18 Ketasi ariwesi mapu echi auché jaré pagótami 'yemi mi 'yema echi mékowami mapu Riosi 'yemi mi 'yama. Aboni chopi nakimea 'yemi mi bichíiranala mapu arigá 'wérali ju máputamo wabé o'wikebo echi jaré o'wéala Riosi kapitánawala, ayénachó mapu 'yémitamo risúu nílabo 'yemi aboni niráa. A'lí echiyiri binériami chopi wabé binera jaré namuti mapu aboni ke siné galá machí, mapujiti aboni arigá ne wabé nóchami ju. A'lí aboni chopi 'nata mapurigá echi auché jaré ke bichíyami pagótami 'nata.
\v 19 A'lí echiyiri pagótami ketasi napawíkami niráa 'yena echi Walubela Jesucristo yuwa. Chopi Binói ne Walubela ju echi jaré napawika bichíyami yuwa, achigórigá mapurigá bilé rijói mo'ola ne bachá niráa ju, ne suwaba echi rijói sapala yuwa. A'lí Jesucristo galá bichíira echi jaré napawika bichíyami achigórigá mapurigá bilé rijói ayénachó galá ochera mapalí binói galá ko'wá echi ko'wáami. Ayénachó Jesucristo galá napabú echi jaré bichíyami mapurigá aboni bilepi niráa níima, achigórigá mapurigá echi bilé rijói sapala bilepi niráa ju. A'lí suwaba je'ná jerigá olárami ju mapurigá echi Walubela Riosi nakí.
\p
\v 20 Chopi 'yemi bichíyami ma suwíami niráa jútamo Jesucristo yuwa, mapurigátamo ma ketasi waminabi chati ologá pirélabo mapurigátamo chabénala chati ologá piréali. Echijiti 'yémitamo ma ketasi achigórigá 'nata jena'í wichimóbachi nirúami namuti jiti, mapurigá echi auché jaré pagótami sinibí 'nata. Nibilé cho 'wérali ju mapu 'yémitamo abijí nijéwaga olabo mapurigá echi auché jaré jena'í wichimóbachi piréami pagótami 'yemi mi nulé.
\v 21 Mapujiti echi jaré pagótami jena'í wichimóbachi piréami sinibí 'yemi mi je'ná jerigá nulé: ¡Ketasi chachesi je'ná! ¡Ketasi kosí echi auché bilé namuti, nibilé chapisí!
\v 22 'Yémitamo echirigá nulérami ju, chopi ne suwaba echi jaré namuti suwaba suwábarami níima pe waminánomí mapalí 'yémitamo ma echirigá suwábabo karúmati. Ayénachó jena'í wichimóbachi piréami pagótami chopi ju mapu 'yemi mi echirigá binéraga nuleli. Riosi ketasi 'yemi mi echirigá nuleli.
\v 23 Bichíwali ju mapu jaré pagótami mayé mapu aboni ne wabé machíami ju, mapujiti aboni galá nijewa echiyiri nulalíwami. Ayénachó echiyiri pagótami mayé mapu aboni galá nijéwaga olá mapurigá Riosi nulá, mapalí aboni wi'lí niráa amachí, ayénachó mapalí aboni risúu nila aboni niráa. Chopi mapalí aboni suní echirigá olayá, echalí aboni abijí ne wabé nakí chati sitíi olánala.
\c 3
\p
\v 1 Chopi jipi 'yémitamo ma ku o'wíntarami niráa ju, echi Walubela Jesucristo yuwa, echi mapu echo'ná ripá riwigachi ku atí, echo'ná watoná Riosi yuwa. Echijiti jipi bachá niráa chopi ne wabé galabé ologá pirélasi, ayénachó ne wabé galabé 'natasi, mapujiti echiyiri oluwáwami ripá riwigachi jonsa simíbami ju.
\v 2 Ne sinibí galá 'natasi echiyiri ne wabé galabéala 'nalina, mapu echo'ná ripá riwigachi jonsa simíbami ju. Chopi ketasi ne wabé simírami 'natasi jena'í wichimóbachi nirúami namuti jiti.
\v 3 Mapujiti mapalí echi Walubela Jesucristo mukuli 'yemi chati sitíi olalila jiti, echalí Riosi 'yemi mi nirali mapurigá ma suwíami niráa. A'lí jípita ketasi machiná niráa ritiwá echi Walubela Jesucristo, chopi mapujiti Binói ma ku owíntarami ju, echijiti tamujé bichíyami bukulíwami niráa ku piré Binói yuwa, ayénachóta napawíkami ju Riosi yuwa.
\v 4 Tamujé bichíyami chópita Jesucristo jiti piré. A'lí waminánomí mapalí Binói ne machiná niráa ku nawama jena'í wichimóbachi, echalí si'néami 'yemi máputamo Jesucristo niráa bichíiko, ne machiná niráa riwirúami níibo mulubé Binói yuwa, ne wabé o'wéala niráa, achigórigá mapurigá Binói ne wabé Walubela ju.
\s Echi jaré bichíyami bukulíwami ologá piré
\p
\v 5 'Yémitamo ma suwíami niráa ju, echijiti ma ketasi waminabi nijéwaga olasi mapurigá 'yemi aboni chopi wabé chati sitíi olánali, achigórigá mapurigá echi auché jaré jena'í wichimóbachi piréami we olá. Ke wesi chuwé bilétari yuwa kochisí. Ke bilé namuti chati sitíi olasi. Nibilé chuwé chibi yiri olasi. Ketasi níilasi chati sitíi olánala. Ketasi korusi echi auché jaré níwala namuti, mapujiti átamo echirigá korúsagá, 'yémitamo achigórigá chati sitíi olá mapurigá echi jaré pagótami olá mapu we o'wiké echi jaré amachíkalawami namuti.
\v 6 A'lí Riosi arigá walú kastigo 'yama si'néami echi jaré pagótami je'ná jeyiri oláami, si'néami mapu ikí ketasi galá nijéwaga olali mapurigá Binói nulali.
\v 7 A'lí 'yemi bichíyami ayénachó echirigá achigórigá chati sitíi ologá piréali chabénala, mapalítamo ketasi cho galá bichíyami níili.
\v 8 Chopi jipi ketasi waminabi echirigá olasi. Ketásirapé na'áwasi 'yemi. Waminá ariwesi suwaba chati sitíi oluwáwami. Ketasi chuwé sayéraga ra'íchasi auché jaré pagótami, nibilé siné chati sití ra'íchasi.
\v 9 Ketasi 'yékaka ra'ichási a'nagupi, mapujítitamo ma bukulíwami nakulíwarami ju. Mátamo ariweli mapurigátamo chabénala ologá piréali.
\v 10 Mátamo auché si'nú bukulíwami galabé oláami niwárami ju. Jipi jonsa 'yémitamo sinibí waminabi niwárami níilasabo echirigá galabé oláami niráa, mapuyénasítamo ne sébali galabé oláami niráa níibo mapurigá Riosi nakí, mapujiti Riosi Binói 'yemi mi 'yali mapurigátamo echirigá bukulíwami niwárami níibo. A'lí bichétamo echirigá waminabi galabé oláami niráa niwárami nílasabo mapuyénasí 'yémitamo ne galá machiboa Binói Riosi.
\v 11 Jipi si'néami 'yemi galá bichíyami chopi a yiri ju mapujítitamo Riosi kúchuwala ju. Echijiti 'yemi máputamo Griego anilíwami pagótami ju, ma ketasi waminabi 'natasi máputamo Griego chopi ju. A'lí 'yemi máputamo Juríosi anilíwami pagótami ju, ma ketasi waminabi 'natasi máputamo Juríosi chopi ju. Ayénachó 'yemi máputamo ma noligá sikirétami ju, ma ketasi waminabi 'natasi máputamo echirigá níili. Ayénachó 'yemi máputamo ketasi noligá sikirétami ju, ma ketasi waminabi 'natasi máputamo ketasi echirigá níili. A'lí 'yemi máputamo si'wina piréami ju, ma ketasi waminabi 'natasi máputamo echirigá si'wina piréami ju. A'lí 'yemi máputamo tarapé binératami niráa ju, ma ketasi waminabi 'natasi máputamo echirigá ju. A'lí tarapé chiré átamo pióntami níisa, nirapé chiré átamo ketasi pióntami níisa. Chopi ne wabé simírami galabé ju mapu echi Walubela Jesucristo ma galá bité echo'ná pachana 'yemi sulálachi niráa. A'lí echi Walubela Jesucristo ne wabé Walubela ju, ayénachó Binói echo'ná pachana si'néami 'yemi napawika bichíyami sulálachi atí.
\p
\v 12 Echi Walubela Riosi 'yemi mi ne wabé galé. Ayénachó Riosi ma 'yemi mi chapili mapurigátamo Binói níwala pagótami níibo. Echijiti ne wabé natimaga pirélasi echi auché jaré pagótami. Ne wabé galabé oláami níilasi. Chopi tarapé nóchami niráa nílasi, nirapé mapurigá o'wéala niráa olasi. Chopi sinibí galá kilí ologá pirélasi, galá anáchaga mapalí auché jaré 'yemi mi risúu olá.
\v 13 Sinibí ne wabé galesi a'nagupi, kilí niráa anáchaga mapalí auché jaré ketasi olá mapurigá 'yémitamo nakí. A'nagupi ku wikawasi, mapalí auché jaré 'yemi mi sitila olá. A'lí achigórigá mapurigá echi Walubela Jesucristo 'yemi mi ku wikáwali, echirigá ayénachó ku wikawasi echi auché jaré mapu 'yemi mi sitila olá.
\v 14 Ne suwaba je'ná jerigá olasi 'yemi, ayénachó ne wabé galéami níilasi, mapujiti átamo echirigá a'nagupi galésagá, echalí ne si'néami 'yémitamo a'nawí chópirigá 'nátami níibo.
\v 15 Ne galabé kilí oláami níilasi pachana 'yemi sulálachi niráa, mapurigá Riosi Binói 'yemi mi 'yama mapurigátamo olabo, mapujiti Riosi echijiti 'yemi mi bayeli mapurigátamo napawika bichíyami níibo, Binói kúchuwala niráa. Ayénachó ne sinibí niráa walú natétara 'yasi Riosi.
\p
\v 16 Sulachí niráa sinibí chopi ne galá 'natasi echi Walubela Jesucristo Ra'íchala. A'nagupi ne galá machigá binérasi echi Galabé Riosi Ra'íchala, mapurigátamo echirigá a'nagupi waminabi galá bichíiratabo. Sinibí ne wabé kaníliga nawajisi echi jaré karúmati Riosi nawajíwala mapurigátamo sinibí echirigá walú natétara 'yabo Riosi ne sulachí niráa.
\v 17 A'lí ne suwaba mapu ikí 'yémitamo olá, ayénachó ne suwaba mapu ikí 'yémitamo ra'icha, ne suwaba ne galabé niráa olasi, mapujítitamo ma galá bichíi echi Walubela Jesucristo riwalá niráa. A'lí sinibí walú natétara 'yasi Riosi Onorúami, mapurigá echi Walubela Jesucristo 'yemi mi ku'wira echirigá natétara ayá.
\s Pablo ruyé echi jaré napawika bichíyami mapu churigá galá níima mapurigá aboni galabé ologá pirélama
\p
\v 18 'Yemi muguí kunéami sinibí galá nijéwasi 'yemi aboni kunala, mapurigá galá níima máputamo olabo, mapujítitamo ma galá bichíyami ju echi Walubela Jesucristo niráa.
\v 19 'Yemi rijói jubéami ne galá galesi 'yemi aboni jubila, a'lí ketasi yónasi.
\v 20 'Yemi kúcharami sinibí ne suwaba jiti galá nijéwasi 'yemi 'wénawala, mapujiti echi Walubela Riosi we kanila mapalítamo echirigá olá.
\v 21 'Yemi 'wéntami ketasi na'áwatasi echi jaré 'yemi kúchuwala, mapurigá aboni ketasi mayema mapu ne wabé nóchali ju oluwawa mapurigá 'yémitamo nulé aboni.
\v 22 'Yemi pióntami ne galá nijéwasi echi jaré 'yemi o'wéalawala mapu 'yemi mi nulé jena'í wichimóbachi. Ne sinibí galá nijéwaga olasi mapurigá aboni 'yemi mi nulé, ketasi chopi nijéwasi mapalí aboni 'yemi mi galá ritiwá, mapurigá aboni echijiti galá kanílama 'yemi jiti, chopi ayénachó sinibí galá nijéwaga olasi mapalí aboni ketasi 'yemi mi ritiwá, mapujiti echi Walubela Riosi sinibí 'yemi mi ne galá ritiwá mapu churigátamo olá.
\v 23 A'lí karúmati mapuyíripi 'yémitamo olá, ne suwaba wabé galabé nílaga olasi, mapurigátamo echi Walubela Jesucristo nóchala olá, ketasi mapurigátamo echi jaré pagótami nóchala olá.
\v 24 Mapujiti 'yémitamo ma galá machí mapu echi Walubela Jesucristo 'yemi mi 'yama mapurigá natétawami niráa mapurigá 'yémitamo ne sinibí niráa ku pirélabo echo'ná ripá riwigachi, Riosi yuwa, mapujiti 'yémitamo olá echi Walubela Jesucristo nóchala, a'lí Jesucristo Binói ne bichíwali 'yemi Walubélawala ju.
\v 25 Chopi mapuyíripi chati sitíi olako arigá kastigo 'yárami níima, mapujiti aboni echirigá chati sitíi olali, mapujiti Riosi arigá kastigo 'yama ibili niráa, achigórigá mapurigá aboni chati sitíi olali, chu chireko mapuyíripi níisa.
\c 4
\p
\v 1 'Yemi nuláami sinibí galabé 'nátaga, galá wachínaga olasi echi jaré 'yemi piónawala yuwa. Ayénachó sinibí 'natási mapurigá 'yemi aboni Walubélawala echo'ná ripá riwigachi atí.
\p
\v 2 Sinibí niráa ra'ichási Riosi yuwa. A'lí ketasi ariwesi echirigá olayá, chopi sinibí galá 'nátaga ra'ichási Riosi yuwa, galá busuréami niráa. Ayénachó sinibí walú natétara 'yasi Riosi.
\v 3 Ayénachó tansi Riosi tamujé tamí jiti mapurigá echi Walubela Riosi tamujé tamí ku'wírama mapurigata omérabo 'yena Riosi Ra'íchala nawésiya. Ayénachó tansi mapurigá Riosi tamujé tamí ku'wírama mapurigata galá omérabo machíratiya echi pagótami Jesucristo Ra'íchala, echi mapu chabé ki'yako ketasi machirúami níili. Jipi nijeni pachá bachárami ju mapujítini echirigá nawésali Binói Ra'íchala.
\v 4 Sinibí echirigá tansi Riosi tamí jiti mapurigá nijeni galá omérama ne galá machíami niráa machíratiya echi pagótami Binói Ra'íchala, mapurigá galá níima mapurigá nijeni sinibí olama.
\p
\v 5 Sinibí ne galá 'nátaga, ne galabé olasi echi auché jaré pagótami mapu ke cho galá bichíyami ju. We ya echirigá olasi mapujiti 'yémitamo ketasi machí chu kilíbuko 'yémitamo auchecho siné riwiboa echi jaré aboni.
\v 6 Sinibí ne galá galigá ra'íchasi echi auché jaré. Ketasi chuwé ra'íchasi. Sinibí galá 'natasi mapu churigátamo nijéwabo echi auché jaré mapu 'yemi mi rukué jaré namuti.
\s Echi Pablo ripóraga náwala echi jaré bichíyami echo'ná Kolósachi piréami
\p
\v 7 Echi Tíkiko riwéami rijói 'yemi mi ruyema suwaba namuti mapu churigá nijeni atí. Échiko tamujé rijimala niráa ju, ne wabé galérami niráa. Ayénachó binói galá nóchali tamí yuwa mapurigá echi Walubela Jesucristo piónawala niráa, mapalita napawika 'yénali echi Walubela Jesucristo nóchala olayá.
\v 8 Je'ná jiti nijeni julama echo'ná 'yémichi mapurigá binói 'yemi mi ruyema mapu churigata muchuwi tamujé, ayénachó mapurigá binói 'yemi mi waminabi galá kanílatama.
\v 9 Ayena binói yuwa simea echi Onésimo riwéami rijói mapu nijeni ayénachó ne wabé galé. Échiko nijé rijimala niráa ju, mapujiti binói ne galá bichíyami ju. Ayénachó je'ná bilé echo'ná Kolósachi bitéami níili. A'lí mapalí aboni okuánika echo'ná sisáa, echalí aboni 'yemi mi galá ruyema ne suwaba mapurigá ikí jena'í Rómachi piréami napawika bichíyami yuwa.
\p
\v 10 Echi Aristáruko riwéami rijói 'yemi mi ripóraga ra'icha, echi mapu tamí yuwa jena'í bachara atí. Echi Marko ayénachó 'yemi mi ripora, echi mapu echi Benabé yuwa najirémami niráa ju. Chabé jonsa 'yemi nulérami níili máputamo galá narepo echi Marko. Jipi ayénachó ne galá naresi, a binói nawásagá echo'ná mapo'ná 'yemi muchuwi.
\v 11 A'lí echi Jesusi riwéami rijói mapu ayénachó Justo anilíwami ju, échiko 'yemi mi ripóraga ra'icha. A'lí je'ná bikiyá chopi ju, echi jaré Juríosi pagótami galá bichíyami, mapu tamí yuwa nóchaga nawesa Riosi Ra'íchala, mapurigá Riosi arigá galá nulema echi jaré pagótami pachana aboni sulálachi niráa, ne si'néami mapu ikí galá bichíima Jesucristo niráa. A'lí echi jaré bikiyá aboni sinibí tamí ne wabé kanírali.
\v 12 Ayénachó echi Epájasi riwéami rijói 'yemi mi ripora, echi mapu ayénachó echo'ná bitéami ju 'yemi yuwa. Échiko ayénachó Jesucristo piónawala ju. Ayénachó binói sinibí wisabé Riosi yuwa ra'íchaga tani mapurigá 'yémitamo galá ku'wíratami níibo, mapurigátamo waminabi galabé bichíibo, ayénachó mapurigátamo sinibí nakiboa olánala ne suwaba achigórigá mapurigá Riosi nakí.
\v 13 A'lí nijeni ayénachó 'yemi mi ruyé mapurigá echi Epájasi sinibí we 'nata 'yemi jiti, ayénachó mapurigá binói sinibí we 'nata echi auché jaré napawika bichíyami jiti, ne si'néami mapu ikí echo'ná Laoriséachi anilíwachi walúlachi piréami ju, ayénachó ne si'néami mapu ikí echo'ná Yeráporichi anilíwachi walúlachi piréami ju.
\v 14 Ayénachó 'yemi mi ripora echi Lúkasi, echi mapu ówami ju, echi mapu si'néamita ne wabé galé. Ayénachó 'yemi mi ripora echi Remási riwéami rijói.
\p
\v 15 Ne galá ripórasi 'yemi echi jaré ritémtami echo'ná Laoriséachi piréami. Ayénachó ripórasi echi Nínjasi riwéami rijimala. Ayénachó galá ripórasi si'néami echi auché jaré napawika bichíyami ritémtami mapu ikí napawiko echo'ná binói bitélachi.
\v 16 Mapalí 'yémitamo ma galá 'nesa je'ná oselí osirúami, ayénachó 'nérasi echo'ná Laoriséachi piréami napawika bichíyami. A'lí ayénachó galá 'nesi 'yemi echi auché bilé oselí mapu nijeni oséli echo'ná Laoriséachi piréami napawika bichíyami, mapurigá si'néami 'yémitamo ayénachó kipubo mapurigá nijeni oséli echi jaré aboni.
\v 17 Ayénachó jeanesi echi Arkipo riwéami rijimala: Sinibí ne suwaba galá nóchaga olá echi Walubela Jesucristo nóchala mapurigami 'yárami níili olánala.
\p
\v 18 Nijé Pablo, ma ne jubá 'yemi nimí pe okuá ra'íchali je'ná jerigá osagá walú ripóraga náwala. Nijeni je'ná jerigá osali, nijé binói sikala jiti. Sinibí galá 'natasi mapurigá nijeni pachá bachárami ju jipi rawé. Nijeni nakí mapu Riosi 'yemi mi wabé galigá ku'wírama. ¡Echirigá níima!