\id 1th
\h 1 Tesalonisenses
\mt2 Bachá Osirúami
\mt2 mapurigá San Pablo oséli echo'ná
\mt TESALÓNACHI PIRÉAMI
\c 1
\s Echi Pablo galá osé echi jaré napawika bichíiyami
\p
\v 1 Nijé Pablo 'yemi mi osé, si'néami máputamo napawika bichíiyami ju Jesucristo niráa, echo'ná Tesalónachi anilíwachi piréami. Echi Silbano riwéami rijói, echi Timoteo ayénachó tamí yuwa muchuwi. Aboni ayénachó 'yemi mi ripora, si'néami 'yemi máputamo ma napawíkami ju Riosi Onorúami yuwa, ayénachó echi Walubela Jesucristo yuwa. Nijeni nakí mapu Riosi, tamujé Onolá, ayénachó echi Walubela Jesucristo 'yemi mi wabé galigá ku'wírama, ayénachó mapu 'yemi mi 'yama mapurigátamo galá kilíi ologá pirélabo.
\s Echi jaré bichíiyami echo'ná Tesalónachi piréami ne galabé niráa bichíili
\p
\v 2 Ne sinibita walú natétara 'ya Riosi si'néami 'yemi jiti. Ayénachóta sinibí 'nata 'yemi jiti mapalita Riosi yuwa tániga ra'icha.
\v 3 Ayénachó mapalita tániga ra'icha tamujé Riósawala yuwa, echi mapu tamujé Onolá ju, tamujeta sinibí 'nata mapurigá 'yémitamo ne wabé galá bichíiga olali, ayénachó mapurigátamo ne wabé galigá nóchali, Riosi nóchala olayá, ayénachó mapurigátamo galá bichíili Jesucristo niráa, mapu Binói sinibí 'yemi mi waminabi ku'wírama.
\v 4 'Yemi ritémtami, Riosi 'yemi mi ne wabé galé. A'lí tamujeta galá machí mapu Riosi ma 'yemi mi chapili, Binói níwala niráa.
\v 5 Chabénala mapalita bachá niráa 'yemi mi nawésali echi Galabé Riosi Ra'íchala, echalí tamujeta ketasi wepi wikabé ra'íchali tamujé aboni chopi ra'íchala. Chopi tamujeta ne wabé galá jiwériga niráa nawésali mapurigá echi Wabé Galabé Riosi Iwigala tamujé tamí 'yali nawésanala. A'lí echirigata ne galá bichíiga nawésali mapujítita galá bichíi mapu je'ná Galabé Riosi Ra'íchala ne bichíwali ju. 'Yemi aboni ne galá machí mapu churigá tamujeta galabé ologá nóchali echo'ná 'yémichi mapurigá 'yémitamo galá ku'wíratami níibo.
\p
\v 6 A'lí 'yemi aboni ayénachó sinibí echirigá achigórigá olali mapurigá tamujeta olali. Ayénachótamo olali mapurigá echi Walubela Jesucristo Binói olali. A'lí bichétamo ne wabé kaníili mapalítamo bichíili Riosi Ra'íchala, mapurigá echi Wabé Galabé Riosi Iwigala 'yemi mi kanílatali. Chópitamo arigá ne wabé risúu olárami níili mapujítitamo echirigá bichíili.
\v 7 Echijiti we galá níima achigórigá olánalasa echi auché jaré napawika bichíiyami, achigórigá mapurigá 'yémitamo olá. Galá níima achigórigá olánalasa si'néami echi jaré napawika bichíiyami echo'ná Maseróniachi anilíwachi kawírali piréami, ayénachó si'néami echi jaré napawika bichíiyami echo'ná Akáyachi anilíwachi piréami.
\v 8 A'lí 'yémitamo ma galá machírali auché jaré pagótami echi Galabé Riosi Ra'íchala. A'lí ketasi chopi echirigá machíratami níili echo'ná Maseróniachi, echo'ná Akáyachi piréami, chopi ayénachó ne suníami piréami pagótami ma galá ruyérami ju mapurigá 'yémitamo ma galá bichíili Riosi. Echijiti ma ketasi arigá 'wérali ju mapu tamujeta abijí ruyebo aboni mapu churigá 'yémitamo ma galá bichíili.
\v 9 Si'winárigá aboni galá ku ruwigá nawesa mapu churigá 'yémitamo tamujé tamí nareli mapalita 'yénali 'yemi mi nawésiya Riosi Ra'íchala. Ayénachó aboni sinibí ruwigá nawesa mapu churigá 'yémitamo ma waminá ariweli echi jaré amachíkalawami namuti, mapurigátamo ku ro'wibo Riosi yuwa, ayénachó mapurigátamo chopi galá bichíiga o'wikébo echi ne bichíwali Walubela Riosi, echi mapu sinibí niráa bitéami ju.
\v 10 Ayénachó aboni we galá ku ruwigá nawesa mapu churigá 'yémitamo we buwé mapurigá echo'ná ripá riwigachi jonsa ku nawama echi Walubela Jesusi, echi bilepi Riosi Ranala, echi mapu Riosi ku owíntali mapalí Binói ma mukúami níili. A'lí echi bilepi Jesucristo ju mapu tamujé tamí ku wikawa, mapurigata ketasi walú kastigo 'yárami níibo, ketasi mapurigá echi auché jaré chati oláami pagótami 'yárami níima.
\c 2
\s Echi Pablo we galá nawésali Riosi Ra'íchala echo'ná Tesalónachi
\p
\v 1 Keni ritémawa, 'yemi aboni ne galá machí mapu tamujeta ketasi wepi 'yénali mapalita echo'ná sili 'yemi 'nésiya.
\v 2 Chopi 'yémitamo ma galá machí mapurigá tamujé ne wabé risúa níilita chabénala mapalita nawesa 'yénali echo'ná Jilípochi anilíwachi walúlachi, ayénachótamo machí mapurigá tamujeta ne wabé risúu olárami níili echo'ná. Chopi mapalita sili echo'ná 'yémichi, echalí Riosi tamujé tamí ku'wírali mapurigata tarapé majaga 'yemi mi nawésabo echi Wabé Galabé Riosi Ra'íchala, mapalí echi auché jaré pagótami arigá tamujé tamí ne wabé kichiga sayérali.
\v 3 Mapujiti tamujeta chopi nawésali echi ne Bichíwali. Tamujeta ketasi 'yemi mi 'yékanalaga nawésali, mapujítita chopi nakili máputamo galá bichíibo Riosi Ra'íchala.
\v 4 Chopi tamujeta nawésali Riosi Ra'íchala mapujiti Riosi Binói tamujé tamí chapili mapurigata echirigá nawésabo. A'lí ketásita nawesa mapurigata chopi kanílatabo echi jaré pagótami. Si'winárigá tamujeta nawesa mapujiti Riosi Binói tamujé tamí júuli echirigá nawésanala. A'lí Riosi tamujé tamí ne galá machí, tamujé sulálachi niráa.
\v 5 A'lí 'yemi aboni galá machí mapu tamujeta ke siné 'yemi mi ne su'wé anigá 'yékali, chopi mapurigá 'yémitamo bichíibo tamujé nawésawala. Nibilé chota 'yemi mi 'yékaka aneli máputa 'yemi amígowala ju, chopi mapurigá 'yémitamo tamujé tamí 'yabo wenomí. Riosi Binói galá machí mapu tamujeta ke siné echirigá olali.
\v 6 Tamujeta ke siné amí mapurigá echi jaré pagótami tamujé tamí o'wéalatama. Ketásita amí mapurigá 'yémitamo tamujé tamí echirigá o'wéalatama, nibilé cho mapurigá auché jaré pagótami echirigá tamujé tamí o'wéalatama. Chopi echi Walubela Jesucristo Binói tamujé tamí júuli 'yemi mi nawésanala, echijiti nakisáagá, tamujé ayénata galá omérabo 'yemi yuwa o'wéalatiya.
\v 7 Si'winárigá tamujeta sinibí ne wabé galigá oláami níili mapalita echo'ná 'yemi yuwa 'yénali, achigórigá mapurigá bilé mukí iyétami ne wabé galigá tibútaga ochébana binói kúchuwala.
\v 8 A'lí mapujiti tamujeta 'yemi mi echirigá ne wabé galé, echijítita ne wabé nakili 'yemi mi nawésanala echi Galabé Riosi Ra'íchala. Ayénachóta ne wabé nakili mapurigata sinibí 'yemi mi ku'wíraga pirélabo, mapujítita 'yemi mi echirigá ne wabé simírami galeli.
\v 9 Keni ritémawa, 'yémitamo galá machí mapurigá tamujeta sinibí we nílaga nóchali mapurigata galá kopoa. 'Yémitamo galá machí mapurigá tamujeta nóchali sinibí rawé, sinibí rokogó ayénachó, mapurigata ketasi wepi kopoa jaré 'yemi níwala ko'wáami, mapalita 'yénali 'yemi mi nawésiya echi We Galabé Riosi Ra'íchala.
\p
\v 10 Ayénachó 'yémitamo galá machí mapurigá tamujé sinibí galabé niráa, ne galá wachínaga olali 'yemi napawika bichíiyami yuwa. Chópita ke siné chati sitíi olali mapurigá jaré omérama tamujé tamí wi'nijiya chati sitíi oláami niráa. A'lí Riosi Binói ayénachó echirigá galá machí.
\v 11 Ayénachótamo galá machí mapu churigá tamujeta sinibí 'yemi mi waminabi bichíirataga nawésali, ayénachó mapurigata sinibí kanílatali 'yemi ibili niráa mapurigá bilé onorúami we galigá, kanílataga, galá ruyé echi jaré binói kúchuwala.
\v 12 A'lí tamujeta ma 'yemi mi nuleli máputamo sinibí galabé ologá 'yénabo, achigórigá mapurigá galá níima máputamo olabo, mapujiti 'yémitamo ma Riosi níwala ju. A'lí Riosi 'yemi mi bayeli mapurigátamo ayénachó o'wéalatami níibo Binói yuwa, echo'ná mapo'ná Riosi Binói wabé Walubela Nuláami ju.
\p
\v 13 Echijiti tamujé ayénachó tarapé siné ariwé walú natétara ayá Riosi 'yemi jiti mapujítitamo galá bichíili Riosi Ra'íchala mapalí tamujeta 'yemi mi nawésali. Echalítamo ne galá bichíili tamujé nawésawala mapurigá ne bichíwali Riosi Ra'íchala niráa. Echalítamo ketasi mayeli mapu bilé rijói ra'íchala chopi níili. A'lí tamujé nawésawala ne bichíwali Riosi Ra'íchala niráa níili. A'lí echi Galabé Riosi Ra'íchala 'yemi mi niwá ne galá wachínaga oláami niráa, si'néami mapu ikítamo ne galá bichíi.
\v 14 Keni ritémawa mapalí 'yémitamo wabé risúu olárami níili echi auché jaré ke bichíiyami 'yemi pagótamawala jiti, echalí achigórigá ikili 'yemi mapurigá ikili echi auché jaré napawika bichíiyami Juríosi pagótami mapu Jesucristo níwala pagótami ju, echo'ná Juréachi anilíwachi kawírali piréami, mapujiti aboni ayénachó ne wabé risúu olárami níili echi auché jaré ke bichíiyami Juríosi jiti.
\v 15 Je'ná Juríosi aboni nulali mi'línala echi Walubela Jesucristo. A'lí chabénala niráa aboni ayénachó ko'yali echi jaré o'wéala nawésami mapu Riosi júuli nawésanala echo'ná abónichi. Ayénachó aboni tamujé tamí ku machí a'wali echo'ná aboni ri'obáwalachi jonsa. Aboni ketásirapé olá mapurigá Riosi nakí, chopi aboni wabé sayérami ju si'néami echi auché jaré pagótami.
\v 16 Ayénachó aboni ketasi nakí mapu tamujeta nawésabo echi auché jaré isena mapu ketasi Juríosi pagótami ju, mapujiti tamujeta we nakí nawésanala echi auché jaré isena pagótami mapurigá aboni ayénachó galá ku wikawárami níima. Chopi echi jaré Juriosi echirigá ologá waminabi ne wabé simírami chati sitíi olá. Echijiti jipi echi Walubela Riosi ne wabé simírami 'yama, a'lí echi jaré ke bichíiyami Juríosi pagótami walú kastigo 'yárami níima.
\s Echi Pablo we nakili auchecho siné 'nénala echo'ná Tesalónachi piréami ritémtami
\p
\v 17 Keni ritémawa, ne sinibí mapalí tamujeta pe wi'libé waná niráa muchúwi echo'ná 'yémichi jonsa, echalita ketasi 'yemi mi ritiwá, chópita sulachí niráa sinibí we galigá 'nata 'yemi jiti. Ayénachóta wisabé 'nátali mapurigata wabé simánali echo'ná 'yemi mi 'nésiya.
\v 18 Tamujeta we 'nátaga nakili mapurigata echo'ná simabo 'yemi mi 'nésiya. Nijé Pablo wisabé nakili máputa echirigá simabo, chopi echi riablo, Satanasi riwéami, sinibí tamujé tamí kumeli, mapurigata ketasi omérabo echo'ná simiba.
\v 19 Tamujeta 'yemi mi ne wabé 'nénali mapujiti waminánomí rawé mapalí echi Walubela Jesucristo ku nawama, echalí tamujeta mayé máputa wabé kanílatami níibo mapujiti 'yémitamo ne galá bichíiyami ju Jesucristo niráa, ayénachóta ne wabé nóchami níibo mapujiti 'yémitamo galá bichíili tamujé nawésawala.
\v 20 Ne bichíwali tamujeta wabé nóchami ju, ayénachóta wabé kanílatami ju, mapujiti 'yémitamo ma galá bichíili Jesucristo niráa.
\c 3
\p
\v 1 Tamujeta ne wabé 'nata 'yemi jiti, ayénachóta ne wabé machináali mapu churigátamo muchúwi, echijiti nijeni nakili julánala echi rijimala Timoteo echo'ná 'yémichi. Echalita ra'íchaga katéwali mapurigá nijé, echi Silbano yuwa, jena'í Aténachi anilíwachi tibíbota.
\v 2 Ayénachóta ra'íchaga katéwali mapurigá nijeni julama echi Timoteo echo'ná 'yemi mi 'némiya. Échiko sinibí we galá ku'wíraga nóchali tamujé tamí yuwa, Jesucristo Ra'íchala nawésiya, mapurigá bilé galabé pioni, Riosi piónawala niráa. A'lí echi Timoteo galá omero 'yemi mi waminabi bichíiratiya mapurigátamo waminabi kanílaga bichíibo, Jesucristo niráa,
\v 3 mapurigá ke wesi 'yemi ariwébotamo bichíisiya mapujítitamo je'ná jerigá wabé risúu olárami ju. A'lí 'yemi aboni ma galá machí mapu tamujé máputa bichíi Jesucristo niráa, arigá risúu olárami níibota.
\v 4 Ayénachó chabénala mapalita abijí echo'ná 'yemi yuwa muchili, echalita bachá niráa aneli mapu tamujeta arigá wabé risúu olárami níibo. A'lí jípitamo ma galá machí mapurigá ma echirigá ikili.
\v 5 Echijiti mapalí nijeni echirigá ne wabé machináali mapu churigá 'yémitamo muchúwi, echalini echo'ná 'yémichi júuli echi Timoteo mapurigani galá machimea áchatamo abijí galá bichíili, mapujiti nijeni wabé majali mapu echi riablo, siné káachi 'yemi mi chati olírama. A'lí a echirigá ikisáagá, tamujé nóchala wepi nochárami níimi, mapurigata nóchaga 'yénali echo'ná 'yémichi, echi wabé Galabé Riosi Ra'íchala nawésiya.
\p
\v 6 Chopi jipi echi Timoteo ma ku nawali echo'ná Tesalónachi jonsa. A'lí binói tamujé tamí ku ruyeli mapurigá 'yémitamo ne galá bichíiyami ju Jesucristo niráa, ayénachó mapurigátamo ne wabé galéami ju. Binói tamujé tamí ruyeli mapurigá 'yémitamo sinibí ne wabé galigá 'nata tamujé tamí jiti, ayénachó mapurigátamo ne wabé nakí tamujé tamí 'nénala, achigórigá mapurigá tamujé ayénachó ne wabé nakí 'yemi mi 'nénala.
\v 7 Echijiti, 'yemi keni ritémawa, tamujeta arigá ne wabé kanílatami níili 'yemi jiti, mapuyénata ne wabé, risúu olárami níili, mapujítita nawésaga 'yénali Riosi Ra'íchala jena'í Aténachi anilíwachi. A'lí tamujeta chopi echirigá kanílatarami níili mapujiti echi Timoteo tamujé tamí ruyeli mapurigá 'yémitamo abijí ne galá bichíiyami níili.
\v 8 Jipi tamujeta auchecho ku kaníliga piré mapujítita machí mapu 'yémitamo ne galá bichíiga 'yena echi Walubela Jesucristo yuwa.
\v 9 Tamujé sinibí ne walubé natétara 'ya echi tamujé Riósawala echi jaré 'yemi jiti mapujiti 'yémitamo tamujé tamí ne wabé simírami kanílatali bacháami Riosi yuwa, chópita ketasi chirigá omero echirigá ne wabé simírami niráa natétara ayá, mapurigá galá níimi máputa 'yabo mapujiti 'yémitamo echirigá tamujé tamí ne wabé simírami niráa kanílatali.
\v 10 A'lí tamujeta sinibí rawé, sinibí rokogó, ne wabé tániga ra'icha Riosi yuwa mapurigá Binói tamujé tamí ku'wírama mapurigata echo'ná simabo, 'yemi mi 'nébiya, mapurigata echirigá omérabo 'yemi mi binériya mapurigátamo waminabi, ne sébali, ne galá bichíiyami níibo.
\p
\v 11 Echirigá tamujeta ne wabé nakí mapu Riosi Binói, tamujé Onolá, tamujé tamí ku'wírama, ayénachó mapu tamujé Walubélawala Jesucristo tamujé tamí ku'wírama mapurigata omérabo echo'ná simiba 'yemi mi 'nébiya.
\v 12 Ayénachóta ne wabé nakí mapu echi Walubela Jesucristo 'yemi mi 'yama máputamo waminabi ne wabé simírami galebo a'nagupi, ayénachó máputamo wabé galebo ne si'néami echi auché jaré pagótami, achigórigá mapurigá tamujeta ne wabé galé 'yemi.
\v 13 Echirigá tamujeta nakí mapu echi Walubela Jesucristo 'yemi mi waminabi bichíiratama mapurigátamo sinibí ne galabé bichíiyami níibo ne sulachí niráa, mapurigátamo chopi Riosi níwala níibo, ayénachó mapurigá tamujé Riósawala 'yemi mi riwimea galabé oláami niráa, echalí ne jubá rawé mapalí tamujé Walubélawala Jesucristo ku nawama jena'í wichimóbachi, ne si'néami echi jaré Binói níwala pagótami yuwa.
\c 4
\s Riosi nakí máputa galabé ologá pirélabo
\p
\v 1 'Yemi keni ritémawa, jipi ne jubáami tamujeta 'yemi mi ne wabé nakigá je'ná jerigá nulé, achigórigá mapurigá echi Walubela Jesucristo tamujé tamí nuleli 'yemi mi nulénala, máputamo abijí waminabi wabé simírami galabé ologá 'yénabo, achigórigá mapurigá Riosi nakí. Tamujeta 'yemi mi echirigá binérali chabé chokichí jonsa, a'lí bicheta abijí 'yemi mi ané máputamo waminabi echirigá ologá pirélabo.
\p
\v 2 'Yémitamo ma galá machí mapu churigá tamujeta 'yemi mi nuleli olánala, mapurigá echi Walubela Jesucristo ayénachó tamujé tamí nuleli 'yemi mi nulénala.
\v 3 A'lí Riosi ne wabé nakí mapu 'yémitamo chopi ne wabé galabé ologá pirélabo mapurigá Binói ma 'yemi mi galabérali, ayénachó Riosi ketasi nakí mapu ke wesi 'yemi chuwé bilétari yuwa kochimea.
\v 4 Chopi Riosi nakí mapu ibili 'yemi machiboa galabé ologá piréliya 'yemi aboni jubila chopi yuwa, máputamo galabé olabo 'yemi jubila, ayénachó máputamo galá galebo aboni.
\v 5 A'lí Riosi ketasi nakí máputamo chuwé bilétari yuwa kochiboa mapalítamo we 'nátaga nakí echirigá chati sitíi olánala, mapurigá we olá echi auché jaré pagótami mapu ketasi machí Riosi.
\v 6 Ayénachó Riosi ketasi nakí mapu 'yemi echirigá chati sitíi olabo, auché jaré 'yemi ritémawala sayéraga. Binói ketasi nakí mapu ke wesi 'yékaka ologá 'yésama auché bilé rijói upila, mapujiti echi Walubela Riosi walú kastigo 'yama si'néami echi jaré mapu ikí echirigá chati sitíi olako. Chabénala tamujeta ma 'yemi mi echirigá nawésaga aneli.
\v 7 Mapujiti Riosi tamujé tamí bayeli mapurigata Binói níwala pagótami níibo, mapurigata chopi galabé ologá pirélabo, ne galá bi'wíami suléami niráa. Riosi ketasi nakí máputa we chati sitíi chuwé ologá pirélabo, ne wabé chati sitíi suléami niráa.
\v 8 A'lí echi jaré mapu ikí ketasi galá nijéwaga olako je'ná mapu tamujeta binera, abóniko ketasi 'me tamujé tamí nirá, ayénachó aboni ke 'me nirá Riosi mapu tamujé tamí 'yali Binói Wabé Galabé Iwigala.
\p
\v 9 Jipi ketasi arigá 'wérali ju mapu nijeni 'yemi mi osema jeanigá máputamo a'nagupi galebo, ritémtami niráa, mapujiti 'yémitamo ma a'nagupi galé, mapurigá Riosi Binói 'yemi mi binérali máputamo galebo.
\v 10 A'lí 'yémitamo sinibí echirigá ne wabé galé echi auché jaré ritémtami ne suníami echo'ná Maseróniachi anilíwachi kawírali piréami. Jipi, 'yemi ritémtami, tamujeta 'yemi mi ané máputamo abijí waminabi wabé simírami galébotamo a'nagupi.
\v 11 Ayénachóta 'yemi mi ané máputamo kilíi ologá pirélabo, máputamo ne galá nochabo 'yemi aboni nóchala olayá, ayénachó máputamo 'yemi aboni sikala jiti nochabo mapurigá tamujeta ma 'yemi mi nuleli.
\v 12 Galá níima máputamo sinibí echirigá olabo, mapurigá echi auché jaré ke bichíiyami ayénachó animea mapu 'yémitamo galá oláami ju. Ayénachó galá níima máputamo sinibí echirigá galá nochabo mapurigátamo sinibí níwabo suwaba mapu ikítamo newalé.
\s Echi Walubela Jesucristo ku nolínama jena'í wichimóbachi
\p
\v 13 'Yemi tamujé ritémawala, tamujeta wabé nakí máputamo galá machiboa mapu churigá ikimea echi auché jaré ritémtami yuwa, si'néami mapu ikí ma suwíami ju, mapurigá 'yémitamo ketasi o'monábo mapurigá echi auché jaré pagótami ne wabé o'mona, si'néami mapu ikí ketasi bichíiga buwé mapurigá echi jaré suwíami ku o'wínama echalí ne jubá rawé.
\v 14 Echirigá mapurigá tamujeta galá bichíi mapu echi Walubela Jesucristo mukuli, ayénachó mapu Binói auchecho ku owínali mapalí Binói ma mukúami níili, echirigá achigórigá tamujeta galá bichíi mapu Riosi ku o'wíntama, echi Walubela Jesucristo yuwa, ne si'néami echi jaré bichíiyami mapu ikí Jesucristo niráa bichíiga suwíliko.
\p
\v 15 Echijiti tamujeta 'yemi mi je'ná jerigá ané, mapurigá echi Walubela Jesucristo tamujé tamí binérali, mapu tamujé bichíiyami máputa abijí tibibo a'kámi niráa echalí ne jubá rawé yénasí mapalí ku nawama jena'í wichimóbachi echi Walubela Jesucristo, tamujeta ketasi bachá niráa simabo, chópita napawika simabo echi auché jaré yuwa, si'néami echi jaré bichíiyami mapu ikí ma suwili.
\v 16 Mapujiti echi Walubela Jesucristo Binói ku rikínama echo'ná ripá riwigachi jonsa. Echalí Binói mapurigá Nuláami niráa ne wabé o'weli ra'íchaga ku nolínama jena'í wichimóbachi. Echalí bilé walubela Riosi kapitánawala ayénachó o'weli ra'íchaga nawama. Ayénachó ne wabé iwéami anema echi Riosi níwala korneta anilíwami. Echalí ne bachá niráa ku o'wínama si'néami echi jaré ma suwíami mapu ikí Jesucristo niráa bichíiga suwili.
\v 17 A'lí pe jubáami tamujé máputa abijí a'kámi tibiko echalí ne jubáami rawé yénasí, tamujeta echi jaré aboni yuwa ke sayiná torúami níibo echo'ná ripá nolírali mapurigata echo'ná ikárali naripabo echi Walubela Jesucristo. A'lí echalí jonsa tamujeta sinibí niráa echirigá muchibo echi Walubela Jesucristo yuwa.
\v 18 Echijiti a'nagupi wabé kanílasi je'ná ra'íchali jiti.
\c 5
\p
\v 1 Keni ritémawa, ketasi arigá 'wérali ju mapu nijeni 'yemi mi osema jeanigá mapu chu kilíbuko suwaba je'ná jerigá ikimea, mapujiti ke wesi ne galá machí. 'Yémitamo ma galá ruyérami ju, mapu ke wesi pagótami galá machimea chu kilíbuko ku nolínama echi Walubela Jesucristo.
\v 2 'Yemi aboni ma galá machí mapu echalí rawé echi Walubela Jesucristo ke sayiná ku nawama jena'í wichimóbachi, mapalí echi jaré pagótami ketásirapé buwée pirélama. Echalí rawé echi Walubela Jesucristo ke sayiná nawama mapurigá echi jaré chigórami ke sayiná 'yena, rokogó niráa.
\v 3 Waminánomí rawé mapalí echi auché jaré pagótami jena'í wichimóbachi piréami jeanigá pirélama mapu aboni ma we galá kilí ologá piré, echalí si'néami aboni ke sayiná suwaba suwábarami níima, achigórigá mapurigá ke sayiná okolá bilé mukí bocháami mapalí ma ranamea bilé táa múchali. A'lí echalí rawé echi jaré pagótami ke wesi galá omérama waminá júmsiya.
\v 4 'Yemi ritémtami mátamo ne galá machí je'ná jeyiri namuti. Echijiti 'yémitamo ketasi rokowárali niráa piréami ju, ketasi mapurigá echi auché jaré ke bichíiyami pagótami mapu rokowárali niráa piréami ju, mapujiti aboni ketasi machí churigá ikimea jena'í wichimóbachi. Echijiti 'yémitamo ketasi majáratami níibo mapalí ke sayiná sebama echalí echirigá ikíachi rawé. Chopi echalí ne jubá rawé echi auché jaré ke bichíiyami pagótami ne wabé majáratami níima achigórigá mapurigá echi pagótami majáratami ju bilé chigórami jiti mapu ke sayiná ne machiná nawá.
\v 5 Mapujiti ne si'néami 'yemi bichíiyami ma bukulíwami niráa galabé ologá piré, mapujiti echi Walubela Riosi ma galá rayéntali echo'ná pachana 'yemi sulálachi niráa, mapurigátamo suwaba galá machiná niráa olabo mapurigá ne rawé oláami niráa. Tamujeta ketasi rokogó oláami niráa ju, ketasi mapurigá echi auché jaré chati sitíi chuwé oláami pagótami. Abóniko ketasi buwé mapurigá echi Walubela Jesucristo ku nolínama, echijiti aboni mapurigá rokogó kochíami niráa ju.
\v 6 Echijiti ne galá níima mapu tamujeta ketasi olabo mapurigá echi auché jaré ke bichíiyami pagótami, chopi máputa sinibí galá 'nagá, ne galá 'nátaga muchibo.
\v 7 A'lí echi jaré mapu we kochiko, abóniko rokogó we kochí. A'lí echi jaré mapu we tékako, abóniko rokogó we teka.
\v 8 Echijiti galá níima mapu tamujé bichíiyami sinibí galá 'nagá ne galá 'nátaga muchibo, mapujítita ne machiná oláami ju mapurigá ne rawé 'yénami niráa. Galá níima máputa ne sinibí galá bichíiyami níibo, ne galá galéami ayénachó. Echalí tamujeta sinibí ku'wíratami níibo mapurigá echi jaré sontarsi ku'wíratami níili mapalí aboni ne wabé biwárami jiero napáchami níili, mapurigá aboni ketasi chiwárami níima. A'lí tamujeta ne galá bichíi mapu Riosi tamujé tamí suwaba ku'wírama waminánomí rawé. Ne wabé galá ju máputa echirigá bichíi mapu Riosi tamujé tamí ku'wírama, mapujiti tamujeta ne bichíwali ku'wíratami níibo mapurigá echi jaré sontarsi ku'wíratami níili echo'ná mo'ochí mapalí aboni 'yénali echi wabé biwárami jiero ko'yáchaga.
\v 9 A'lí Riosi ketasi tamujé tamí chapili mapurigata chopi miná kastigo 'yárami níibo. Chopi Riosi tamujé tamí chapili mapurigá tamujé Walubélawala Jesucristo ne sébali tamujé tamí ku'wírama.
\v 10 A'lí echi Walubela Jesucristo mukuli tamujé tamí jiti mapurigata sinibí pirélabo Binói yuwa, echalí jonsa mapalí Binói ku nawama, abijí a'kámi níisagá, ayénachó ma suwíami níisagá kéremá.
\v 11 Echijiti a'nagupi waminabi wabé kanílatasi, ayénachó a'nagupi waminabi galá bichíilatasi, achigórigá mapurigátamo sinibí olá.
\s Echi Pablo galá ruyé echi jaré bichíiyami
\p
\v 12 Keni ritémawa, 'yemi nimí wabé táni mapurigátamo galabé nílabo echi jaré nawésami mapu 'yemi mi nawesa Riosi Ra'íchala. Echi jaré aboni 'yemi mi nulé, ayénachó aboni 'yemi mi ruyé mapurigá echi Walubela Jesucristo nakí.
\v 13 Ne wabé galabé níima máputamo sinibí echirigá wabé galabé nílabo echi jaré aboni, ayénachó máputamo wabé galebo, mapujiti aboni we nocha Riosi nóchala olayá. A'lí sinibí ne galá kilíi ologá pirélasi a'nagupi.
\p
\v 14 Ayénachóta 'yemi mi nulé, 'yemi ritémtami, máputamo galá ruwigá ruyebo echi jaré mapu ketasi nakí nochánala, mapu aboni arigá we nóchaga mema aboni ko'wámawala, ayénachó máputamo waminabi bichíiratabo echi jaré mapu ketasi 'me galá bichíi, ayénachó máputamo galá ku'wírabo echi jaré mapu ketasi 'me jiwérami ju, ayénachó máputamo waminabi anáchaga, arigá galebo ne si'néami pagótami.
\p
\v 15 Sinibí ne galá 'néniga tibusi mapurigá ke wesi 'yemi chati sitíila olabo echi auché jaré mapu arigá 'yemi mi sitíila olá. Si'winárigá sinibí chopi waminabi wabé galabé olasi a'nagupi, ayénachó galabé olasi ne si'néami echi auché jaré pagótami.
\p
\v 16 Sinibí ne wabé galá kaníliga pirélasi.
\v 17 Sinibí galá tániga ra'ichási Riosi.
\v 18 Sinibí walú natétara 'yasi Riosi ne suwaba jiti mapurigá ikísimi, mapujiti Riosi nakí máputamo echirigá olabo, mapujítitamo bichíiyami ju Jesucristo niráa.
\p
\v 19 Mapalí echi Wabé Galabé Riosi Iwigala tamujé tamí ra'icha pachana tamujé sulálachi niráa, echalí mapurigá na'í rajáami niráa ju. Ketasi siné cho'wasi echi Galabé Riosi Iwigala, chopi sinibí galá nijéwaga olasi suwaba mapu Riosi Iwigala 'yemi mi nulé.
\v 20 Sinibí ne galá galigá bichíisi mapurigá nawesa echi jaré mapu ikí Riosi júuli nawesánala.
\v 21 Mapalí jaré pagótami 'yemi mi nawesa, sinibí ne galá 'nátaga machisí acha achigó yiri jú, Riosi Ra'íchala yuwa. Ne galá bichíisi echi nawesálawami mapu achigó yiri ju Riosi Ra'íchala yuwa, chopi ketasi bichíisi mapalí ketasi achigó yiri ju, Riosi Ra'íchala yuwa.
\v 22 Ketasi biyiri chati sitíi olasi.
\p
\v 23 Riosi Binói 'yemi mi 'ya mapurigátamo kilíi ologá pirélabo. Nijeni ne wabé nakí mapu Riosi Binói 'yemi mi suwaba galabératama, ayénachó mapurigátamo suwaba galá tibútarami níibo 'yemi iwigala, ayénachó 'yemi aliwala, ayénachó 'yemi sapala, mapurigátamo tarapé chati sitíi oláami níibo mapuyénasí tamujé Walubélawala Jesucristo ku nawama.
\v 24 Echi Walubela Riosi 'yemi mi bayeli mapurigátamo galá bichíibo. A'lí Riosi ne wabé bichíwami ju. Ayénachó Riosi suwaba sunima ne suwaba je'ná jeyiri mapurigá Binói bachá niráa bichíwaga anili.
\s Echi Pablo ripóraga náwala echi jaré ritémtami
\p
\v 25 'Yemi keni ritémawa, sinibí Riosi yuwa tániga ra'ichási tamujé jiti.
\p
\v 26 Tamujeta 'yemi mi walú ripora, si'néami 'yemi ritémtami, ibili niráa.
\v 27 Nijeni 'yemi mi nulé, echi Walubela jiti, máputamo galá machíami niráa ra'íchaga 'nebo je'ná oselí osirúami echalí mapalítamo napawika muchuwi, si'néami máputamo ikí galá bichíiyami ritémtami niráa ju.
\p
\v 28 Tamujeta we nakí mapu tamujé Walubélawala Jesucristo sinibí 'yemi mi ne wabé galigá ku'wírama. ¡Echirigá níima!