\id 2th
\h 2 Tesalonisenses
\mt2 Osá Osirúami
\mt2 mapurigá San Pablo oséli echo'ná
\mt TESALÓNACHI PIRÉAMI
\c 1
\s Pablo osé echo'ná Tesalónachi piréami napawika bichíiyami ritémtami
\p
\v 1 Nijé Pablo, 'yemi mi osé si'néami máputamo napawika bichíiyami ju echo'ná Tesalónachi anilíwachi walúlachi piréami. Echi Silbano, echi Timoteo ayénachó 'yemi mi ripora, 'yemi máputamo napawíkami ju Riosi yuwa, echi mapu tamujé Onolá ju, ayénachó máputamo napawíkami ju echi Walubela Jesucristo yuwa.
\v 2 Nijeni nakí mapu echi Walubela Riosi, tamujé Onolá, ayénachó echi Walubela Jesucristo 'yemi mi wabé galigá ku'wírama, ayénachó mapu 'yemi mi 'yama mapurigátamo we galá kilíi ologá pirélabo.
\s Riosi walú kastigo 'yama echi jaré chati sitíi oláami echalí mapalí echi Walubela Jesucristo ku nawama jena'í wichimóbachi
\p
\v 3 Keni ritémawa arigá 'wérali ju mapu tamujeta sinibí walú natétara 'yabo Riosi 'yemi jiti. Ne wabé galabé ju máputa echirigá natétara 'yabo Riosi mapujiti 'yémitamo sinibí waminabi galá bichíisimi, ayénachótamo si'néami sinibí waminabi galá galésimi a'nagupi.
\v 4 Echijiti tamujé aboni ne wabé nóchaga ra'íchata 'yemi jiti rugá, mapalita ra'icha echi auché jaréana piréami napawika bichíiyami ritémtami, mapujiti mapalí 'yémitamo ne wabé risúu ologá a'najátarami ju, echalí 'yémitamo arigá sinibí waminabi galá bichíisimi, ayénachó 'yémitamo arigá galá anacha mapalí echi auché jaré pagótami 'yemi mi ne wabé risúu olá.
\v 5 A'lí mapalí 'yémitamo echirigá anacha, echalítamo ne galá machira echi auché jaré pagótami mapurigá Riosi ne wabé galabé ju, tarapé sitíraga, mapalí Binói 'yemi mi risensia 'yali máputamo sinibí niráa muchibo echo'ná ripá riwigachi, mapo'ná Binói sinibí niráa Galabé Nuláami ju. A'lí jipi rawé 'yemi bichíiyami arigá ne wabé risúu olárami ju mapujítitamo bichíi Jesucristo niráa.
\p
\v 6 Pe waminánomí Riosi ne wabé risúu nílatama echi jaré chati sitíi oláami pagótami mapu 'yemi mi echirigá risúu olá jipi rawé, chopi mapalí Riosi echirigá risúu nílatama aboni, echalí Binói arigá ne galabé, tarapé sitíraga olama, mapujiti arigá 'wérali ju mapu aboni kastigo 'yárami níima.
\v 7 Ayénachó Riosi ne wabé galabé, tarapé sitíraga olama mapalí Binói 'yemi mi 'yama mapurigátamo galá ku isábabo, ne si'néami mapu ikítamo wabé risúu olárami ju jipi rawé, achigórigá mapurigá Binói tamujé tamí 'yama mapurigá tamujeta ayénachó galá isábabo. A'lí je'ná jerigá ikimea echalí ne jubá rawé mapalí echi Walubela Jesucristo ke sayiná ku nawama, echo'ná ripá riwigachi jonsa, echi jaré wikabé wabé jiwérami Riosi kapitánawala yuwa. Echalí echo'ná Binóichi moba, ne noligá ne wabé ratábama mapurigá ne walú rajáami niráa.
\v 8 Echalí echi Walubela Jesucristo ku nawama ne walú kastigo 'yámiya echi jaré mapu ketasi nakili bichíinala Riosi, ne si'néami mapu ikí ketasi nijéwanali echi we Galabé Ra'íchali, tamujé Walubela Jesucristo Ra'íchala.
\v 9 A'lí aboni ne sinibí niráa walú kastigo 'yárami níima, ayénachó aboni sinibí niráa waminá 'wigáami níima. A'lí aboni chakena waná ulútami níima mapurigá aboni ke siné muchima echi Walubela Jesucristo yuwa, ayénachó mapurigá aboni ke siné riwimea mapurigá Jesucristo ne Walubela niráa ju, ne wabé omériga oláami ju.
\v 10 Mapujiti echalí rawé echi Walubela Jesucristo ke sayiná ku nawama jena'í wichimóbachi, mapurigá Binói waminabi walubélaga anérami níima echi jaré Binói níwala pagótami jiti, ayénachó mapurigá ne si'néami aboni galá ba'yóriga riwimea Binói Jesucristo, ne wabé Walubela niráa. A'lí 'yémitamo ayénachó echirigá riwiboa echi Walubela Jesucristo mapujítitamo ma galá bichíili tamujé nawésawala.
\p
\v 11 Echijiti ne sinibí rawé tamujeta we ra'icha Riosi yuwa, 'yemi jiti tániga, máputamo waminabi ne galá bichíiyami níibo, ayénachó mapurigá Riosi Binói galá nirama mapurigá 'yémitamo galá bichíili, echalí jonsa mapalí Binói 'yemi mi bayeli bichíinala. Ayénachóta táni mapu Riosi 'yemi mi ne wabé omératama mapurigátamo galá omérabo olayá suwaba mapu ikí 'yemi aboni nakí galabé niráa olánala, ayénachó máputamo omérabo olayá suwaba mapu ikítamo galá bichíiga olá, Riosi nóchala olayá.
\v 12 Echalí tamujé Walubélawala Jesucristo waminabi wabé walubélaga anérami níima, mapujiti 'yémitamo echirigá galabé ologá piré. Ayénachó Jesucristo 'yemi mi 'yama máputamo wabé o'wéalatami níibo mapujiti tamujé Riósawala ne wabé galabé ju, ayénachó mapujiti echi Walubela Jesucristo ne wabé galabé ju.
\c 2
\s Echi bilé wabé omérami rijói wabé chati sitíi oláami, mapu nolínama jena'í wichimóbachi
\p
\v 1 Jipi 'yemi ritémtami, tamujeta galá bichíi mapu echi Walubela Jesucristo ke sayiná ku nawama jena'í wichimóbachi mapalí Binói tamujé tamí napabúmiya nawama mapurigata Binói yuwa napabúrami níibo. Chopi tamujeta 'yemi mi táni
\v 2 máputamo ketasi siné si'winárigá bichíibo. Echijiti ketasi majáratami níisi a bilé chati iwigá 'yemi mi ra'íchasagá jeanigá mapu ma sébali echi Walubela Jesucristo rawéwala. Nirapé majáratami níisi a jaré pagótami 'yemi mi nawésasagá jeanigá mapu ma sébali echi Walubela Jesucristo rawéwala. Nibilé cho majáratami níisi, átamo siné káachi 'nésagá bilé oselí osirúami jeanigá mapu ma sébali echi Walubela Jesucristo rawéwala. Arigá ketasi bichíisi mapalí echi auché jaré pagótami 'yemi mi 'yékaka anema mapu echi oselí, nijé Pablo oselíwala ju, mapujiti nijeni ke siné echirigá anigá osimea.
\v 3 Ketasi ariwesi máputamo echirigá 'yékarami níibo, mapujiti ne bachá niráa mapalí echi Walubela Jesucristo ke cho ku nawá jena'í wichimóbachi, echalí arigá ikimea mapu echi jaré pagótami jena'í wichimóbachi piréami ne wabé sayérami nílama Riosi. Echalí ayénachó bachá niráa nolínama jena'í wichimóbachi echi bilé wabé omérami rijói, ne wabé simírami chati sitíi oláami, echi mapu arigá káraga suwábarami níima waminánomí.
\v 4 A'lí echi wabé simírami chati sitíi oláami rijói ne wabé sayérama echi Walubela Riosi, ayénachó sayérama suwaba karúmati mapu ikí echi jaré ke bichíiyami pagótami galá riosi ané, ayénachó arigá sayérama ne suwaba echi jaré amachíkalawami namuti jena'í wichimóbachi nirúami. A'lí echi wabé chati sitíi oláami rijói echo'ná Riosi ri'obáwalachi nawagá asibáma jeanigá mapu binói ne bichíwali echi Walubela Riosi ju.
\p
\v 5 ¿Kéchatamo newalá mapurigá nijeni 'yemi mi je'ná jerigá aneli chabénala mapalini abijí echo'ná 'yemi yuwa asali?
\v 6 Ayénachó jipi 'yémitamo galá machí chigá jú mapu ketasi ariwé mapurigá echi wabé simírami chati sitíi oláami rijói ne machiná niráa nolínama jena'í wichimóbachi. Chopi mapalí ma seba binói tétawala, echalí 'nalina ma echi wabé simírami chati sitíi oláami rijói ne bichíwali ne machiná niráa nolínama jena'í wichimóbachi.
\v 7 Mapujiti jipi echi wabé chati sitíi oluwáwami we chiná niráa nocha echo'ná pachá echi jaré chati sitíi oláami pagótami sulálachi. Chopi Bilé nirú mapu ketasi ariwé mapu echi pagótami ne wabé simírami chati sitíi chuwé olama jipi rawé. A'lí mapalí Échiko waminá 'yératami níisa, echalí echi jaré chati sitíi oláami pagótami ne bichíwali ne wabé simírami chati sitíi chuwé olama.
\v 8 Chopi echalí 'nalí rawé echi wabé simírami chati sitíi oláami rijói ne machiná niráa nawama jena'í wichimóbachi. A'lí echalí mapalí echi Walubela Jesucristo ne wabé ratábami niráa ku nolínama jena'í wichimóbachi, echalí Binói waminá púchaga mi'limea echi wabé simírami chati sitíi oláami rijói.
\v 9 A'lí mapalí echi wabé simírami chati sitíi oláami rijói echirigá nolínama jena'í wichimóbachi, echalí échiko chopi nawama mapujiti echi Satanasi riwéami riablo we nulugá julama. A'lí echi wabé simírami chati sitíi oláami rijói ne wabé omériami níima. Ayénachó binói wisabé, ne wabé 'yékaka niráa, ne wabé omériga olama mapurigá ke wesi pagótami omero olayá.
\v 10 Ayénachó echi wabé simírami chati sitíi oláami rijói suwaba karúmati echirigá ne wabé chati sitíi ologá, ne wabé 'yékama echi jaré pagótami jena'í wichimóbachi piréami, si'néami mapu ikí waminá 'wigáami níimako, mapujiti aboni ketasi nakili bichíinala echi ne Bichíwali, mapurigá aboni echirigá galá ku wikawárami níima.
\v 11 Echijiti Riosi ariwema mapurigá aboni ne wabé 'yékarami níima, mapurigá aboni chopi bichíima echi ne wabé 'yékalawami,
\v 12 mapurigá aboni walú kastigo 'yárami níima, si'néami mapu ikí ketasi nakili bichíinala echi ne bichíwali, si'néami mapu ikí chopi waminabi wabé nakili olánala echi wabé chati sitíi oluwáwami.
\s Echi jaré mapu Riosi chapili mapurigá aboni ku wikawárami níima
\p
\v 13 Chopi arigá 'wérali ju mapu tamujeta sinibí walú natétara 'yabo Riosi 'yemi jiti, si'néami máputamo ikí galá bichíiyami ritémtami ju, mapu echi Walubela Jesucristo 'yemi mi ne wabé galé, mapujiti echi Walubela Riosi 'yemi mi chapili ki'yá chokichí jonsa mapurigátamo ku wikawárami níibo, mapurigátamo ne galabé oláami niwárami níibo, echi we Galabé Riosi Iwigala jiti, mapujiti 'yémitamo galá bichíili echi ne Bichíwali.
\v 14 Echijiti mapalí tamujé 'yemi mi nawésali echi we Galabé Riosi Ra'íchala, echalí Riosi 'yemi mi bayeli mapurigátamo galá bichíibo, ayénachó mapurigátamo wabé o'wéalatarami níibo waminánomí, tamujé Walubélawala Jesucristo yuwa.
\p
\v 15 Sinibí waminabi ne galá bichíiga pirélasi, 'yemi ritémtami. Ketasi siné wikawási, chopi sinibí 'natasi mapurigá tamujeta 'yemi mi binérali mapalita 'yemi mi nawésali Riosi Ra'íchala, ayénachó mapalí tamujeta 'yemi mi oséli Riosi Ra'íchala.
\v 16-17 A'lí tamujeta nakí mapu Jesucristo Binói 'yemi mi kanílatama sulachí niráa, ayénachó mapu Riosi Onorúami 'yemi mi echirigá kanílatama, ayénachó mapurigá Riosi 'yemi mi waminabi galá bichíiratama mapurigátamo sinibí ne galabé niráa ra'ichábo, ayénachó mapurigátamo sinibí ne galabé niráa olabo. A'lí echi Walubela Riosi Onorúami níili mapu ne wabé galabé ologá, tamujé tamí ne wabé galeli. Ayénachó Binói tamujé tamí 'yali mapurigata ne sinibí niráa wabé kanílatami níibo, ayénachó mapurigata galá bichíibo máputa ku'wíratami níibo, mapujiti Binói tamujé tamí ne wabé galeli.
\c 3
\s Echi Pablo táni mapu echi jaré ritémtami Riosi yuwa ra'íchaga tánama mapurigá binói Pablo ku'wíratami níima
\p
\v 1 'Yemi keni ritémawa, ne jubá niráa, 'yemi nimí táni máputamo Riosi yuwa ra'íchaga tánabo tamujé tamí jiti, mapurigá ke 'me ayó tamujeta galá omérabo nawésiya Riosi Ra'íchala ne suníami, ayénachó mapurigá wikabé pagótami galá bichíima, achigórigá mapurigá ikili chabénala echo'ná 'yémichi, mapalita 'yemi mi nawésali.
\v 2 Ayénachó tansi Riosi mapurigá tamujeta galá ku'wíratami níibo mapurigá echi jaré wabé chati sitíi oláami rijói, we kichíami, ketasi tamujé tamí chibi olama, mapujiti wikabé ketasi bichíi Riosi.
\v 3 Chopi echi Walubela Jesucristo ne wabé bichíwaga oláami ju. A'lí Binói 'yemi mi waminabi galá bichíiratama, ayénachó 'yemi mi tibútama mapurigá echi chati sitíi oláami riablo ketasi 'yemi mi suwábama.
\v 4 A'lí echi Walubela Jesucristo tamujé tamí bichíirata mapu 'yémitamo sinibí galá olá achigórigá mapurigá tamujeta 'yemi mi nuleli. Ayénachó tamujé tamí bichíirata mapu 'yémitamo sinibí echirigá olísabo.
\v 5 Tamujeta ne wabé nakí mapu echi Walubela Jesucristo 'yemi mi ku'wírama mapurigátamo galá machiboa mapu chu yena 'yemi mi galé Riosi, ayénachó mapurigátamo sinibí kilíi ologá anachabo mapurigá echi Walubela Jesucristo anáchali.
\p
\v 6 'Yemi ritémtami, tamujé 'yemi mi nulé, tamujé Walubélawala Jesucristo nulalila jiti, máputamo waná ariwebo mapuyíripi rijimala mapu ke nakiko nochánala, mapuyíripi ketasi ologá bité mapurigá tamujé 'yemi mi binérali máputamo olabo.
\v 7 A'lí 'yémitamo ma galá machí mapu churigá galá níima olasa, mapurigátamo achigórigá olabo mapurigá tamujeta sinibí olá, mapujiti tamujé ke sineta ariweli nocha mapalita echo'ná 'yemi yuwa piréali.
\v 8 Nirapeta wepi chuwé ko'wali auché jaré níwala ko'wáami. Chópita 'wérali ologá sinibí rawé, sinibí rokogó, wabé nóchaga ko'wali mapurigata ketasi suwebo 'yemi níwala ko'wáami.
\v 9 A'lí echalita arigá risensia níwali máputa tabo mapurigá 'yémitamo tamujé tamí 'yabo echi ko'wáami, mapujiti echalí tamujeta 'yemi mi nawésiya 'yénali Riosi Ra'íchala. Chopi si'winárigá tamujeta sinibí we nóchaga ko'wali tamujé aboni ko'wáamawala mapurigata echirigá 'nérabo 'yemi mapu churigá galá níima mapu 'yémitamo ayénachó olabo.
\v 10 Mapujiti chabénala mapalita abijí echo'ná 'yemi yuwa muchili, tamujeta 'yemi mi je'ná jerigá nuleli: A bilé rijói ketasi nakisáagá nochánala, galá níima mapu ketasi cho ko'mea.
\v 11 Mapujiti auché jaré tamujé tamí ané mapu jaré 'yemi ketasi nóchaga piré, máputamo wepi 'yénaga echo'ná auché jaréana bitichí, we nakí nulánala mapurigá echo'ná o'wéala niráa.
\v 12 Jipi tamujeta we táni echiyiri rijói mapu ibili niráa ne galá kilíi nóchaga, galá mega ko'mea aboni níwala ko'wáami. A'lí tamujeta 'yemi mi echirigá nulé tamujé Walubélawala Jesucristo nulalila jiti.
\p
\v 13 'Yemi keni ritémawa, ke siné ariwesi ne wabé galabé olayá.
\v 14 A'lí a bilé rijói ketasi galá nijéwasagá mapurigá tamujeta 'yemi mi je'ná jerigá osega nulé, ne galá machisí si'néami 'yemi mapu chigá jú echiyiri rijói. A'lí ketasi yuwa yénasí echiyiri rijói yuwa, mapurigá binói echijiti we riwélama.
\v 15 Chopi ketasi waminá sayérasi echiyiri rijói, mapujiti arigá rijimala niráa ju. Si'winárigá wabé galigá ruyesi mapurigá galá nijéwama tamujé nulalila.
\s Pablo nakili mapu echi Walubela Jesucristo sinibí ku'wírama echi jaré bichíiyami
\p
\v 16 A'lí echi Walubela Jesucristo Binói sinibí 'yemi mi 'ya máputamo kilíi ologá piré. Nijeni wabé nakí mapu Binói 'yemi mi 'yama mapurigátamo arigá sinibí waminabi galabé kilíi ologá pirélabo. Ayénachóni nakí mapu echi Walubela Jesucristo sinibí níima ne si'néami 'yemi mi yuwa.
\p
\v 17 Nijé, Pablo, 'yemi mi je'ná jerigá osega ripora, nijé binói sikala jiti osogá, achigórigá mapurigá nijeni sinibí osá mapalini niwá bilé oselí. Nijeni sinibí je'ná jerigá osá.
\v 18 Nijeni wabé nakí mapu echi Walubela Jesucristo sinibí ne wabé galigá ku'wírama si'néami 'yemi. ¡Echirigá níima!